੯. ਬਹੁਵੇਦਨੀਯਸੁਤ੍ਤਵਣ੍ਣਨਾ

੮੮. ਏਵਂ ਮੇ ਸੁਤਨ੍ਤਿ ਬਹੁਵੇਦਨੀਯਸੁਤ੍ਤਂ. ਤਤ੍ਥ ਪਞ੍ਚਕਙ੍ਗੋ ਥਪਤੀਤਿ ਪਞ੍ਚਕਙ੍ਗੋਤਿ ਤਸ੍ਸ ਨਾਮਂ. ਵਾਸਿਫਰਸੁਨਿਖਾਦਨਦਣ੍ਡਮੁਗ੍ਗਰਕਾਲ਼ਸੁਤ੍ਤਨਾਲ਼ਿਸਙ੍ਖਾਤੇਹਿ ਵਾ ਅਙ੍ਗੇਹਿ ਸਮਨ੍ਨਾਗਤਤ੍ਤਾ ਸੋ ਪਞ੍ਚਙ੍ਗੋਤਿ ਪਞ੍ਞਾਤੋ. ਥਪਤੀਤਿ ਵਡ੍ਢਕੀਜੇਟ੍ਠਕੋ. ਉਦਾਯੀਤਿ ਪਣ੍ਡਿਤਉਦਾਯਿਤ੍ਥੇਰੋ.

੮੯. ਪਰਿਯਾਯਨ੍ਤਿ ਕਾਰਣਂ. ਦ੍ਵੇਪਾਨਨ੍ਦਾਤਿ ਦ੍ਵੇਪਿ, ਆਨਨ੍ਦ. ਪਰਿਯਾਯੇਨਾਤਿ ਕਾਰਣੇਨ. ਏਤ੍ਥ ਚ ਕਾਯਿਕਚੇਤਸਿਕਵਸੇਨ ਦ੍ਵੇ ਵੇਦਿਤਬ੍ਬਾ. ਸੁਖਾਦਿਵਸੇਨ ਤਿਸ੍ਸੋ, ਇਨ੍ਦ੍ਰਿਯਵਸੇਨ ਸੁਖਿਨ੍ਦ੍ਰਿਯਾਦਿਕਾ ਪਞ੍ਚ, ਦ੍ਵਾਰਵਸੇਨ ਚਕ੍ਖੁਸਮ੍ਫਸ੍ਸਜਾਦਿਕਾ ਛ, ਉਪਵਿਚਾਰਵਸੇਨ ‘‘ਚਕ੍ਖੁਨਾ ਰੂਪਂ ਦਿਸ੍ਵਾ ਸੋਮਨਸ੍ਸਟ੍ਠਾਨਿਯਂ ਰੂਪਂ ਉਪਵਿਚਰਤੀ’’ਤਿਆਦਿਕਾ ਅਟ੍ਠਾਰਸ, ਛ ਗੇਹਸ੍ਸਿਤਾਨਿ ਸੋਮਨਸ੍ਸਾਨਿ, ਛ ਨੇਕ੍ਖਮ੍ਮਸਿਤਾਨਿ ਸੋਮਨਸ੍ਸਾਨਿ, ਛ ਗੇਹਸ੍ਸਿਤਾਨਿ ਦੋਮਨਸ੍ਸਾਨਿ, ਛ ਨੇਕ੍ਖਮ੍ਮਸਿਤਾਨਿ ਦੋਮਨਸ੍ਸਾਨਿ, ਛ ਗੇਹਸ੍ਸਿਤਾ ਉਪੇਕ੍ਖਾ, ਛ ਨੇਕ੍ਖਮ੍ਮਸਿਤਾਤਿ ਏਵਂ ਛਤ੍ਤਿਂਸ, ਤਾ ਅਤੀਤੇ ਛਤ੍ਤਿਂਸ, ਅਨਾਗਤੇ ਛਤ੍ਤਿਂਸ, ਪਚ੍ਚੁਪ੍ਪਨ੍ਨੇ ਛਤ੍ਤਿਂਸਾਤਿ ਏਵਂ ਅਟ੍ਠਵੇਦਨਾਸਤਂ ਵੇਦਿਤਬ੍ਬਂ.

੯੦. ਪਞ੍ਚ ਖੋ ਇਮੇ, ਆਨਨ੍ਦ, ਕਾਮਗੁਣਾਤਿ ਅਯਂ ਪਾਟਿਏਕ੍ਕੋ ਅਨੁਸਨ੍ਧਿ. ਨ ਕੇਵਲਮ੍ਪਿ ਦ੍ਵੇ ਆਦਿਂ ਕਤ੍ਵਾ ਵੇਦਨਾ ਭਗਵਤਾ ਪਞ੍ਞਤ੍ਤਾ, ਪਰਿਯਾਯੇਨ ਏਕਾਪਿ ਵੇਦਨਾ ਕਥਿਤਾ. ਤਂ ਦਸ੍ਸੇਨ੍ਤੋ ਪਞ੍ਚਕਙ੍ਗਸ੍ਸ ਥਪਤਿਨੋ ਵਾਦਂ ਉਪਤ੍ਥਮ੍ਭੇਤੁਂ ਇਮਂ ਦੇਸਨਂ ਆਰਭਿ.

ਅਭਿਕ੍ਕਨ੍ਤਤਰਨ੍ਤਿ ਸੁਨ੍ਦਰਤਰਂ. ਪਣੀਤਤਰਨ੍ਤਿ ਅਤਪ੍ਪਕਤਰਂ. ਏਤ੍ਥ ਚ ਚਤੁਤ੍ਥਜ੍ਝਾਨਤੋ ਪਟ੍ਠਾਯ ਅਦੁਕ੍ਖਮਸੁਖਾ ਵੇਦਨਾ, ਸਾਪਿ ਸਨ੍ਤਟ੍ਠੇਨ ਪਣੀਤਟ੍ਠੇਨ ਚ ਸੁਖਨ੍ਤਿ ਵੁਤ੍ਤਾ. ਛ ਗੇਹਸ੍ਸਿਤਾਨਿ ਸੁਖਨ੍ਤਿ ਵੁਤ੍ਤਾਨਿ. ਨਿਰੋਧੋ ਅਵੇਦਯਿਤਸੁਖਵਸੇਨ ਸੁਖਂ ਨਾਮ ਜਾਤੋ. ਪਞ੍ਚਕਾਮਗੁਣਵਸੇਨ ਹਿ ਅਟ੍ਠਸਮਾਪਤ੍ਤਿਵਸੇਨ ਚ ਉਪ੍ਪਨ੍ਨਂ ਵੇਦਯਿਤਸੁਖਂ ਨਾਮ. ਨਿਰੋਧੋ ਅਵੇਦਯਿਤਸੁਖਂ ਨਾਮ. ਇਤਿ ਵੇਦਯਿਤਸੁਖਂ ਵਾ ਹੋਤੁ ਅਵੇਦਯਿਤਸੁਖਂ ਵਾ, ਤਂ ਨਿਦ੍ਦੁਕ੍ਖਭਾਵਸਙ੍ਖਾਤੇਨ ਸੁਖਟ੍ਠੇਨ ਏਕਨ੍ਤਸੁਖਮੇਵ ਜਾਤਂ.

੯੧. ਯਤ੍ਥ ਯਤ੍ਥਾਤਿ ਯਸ੍ਮਿਂ ਯਸ੍ਮਿਂ ਠਾਨੇ. ਸੁਖਂ ਉਪਲਬ੍ਭਤੀਤਿ ਵੇਦਯਿਤਸੁਖਂ ਵਾ ਅਵੇਦਯਿਤਸੁਖਂ ਵਾ ਉਪਲਬ੍ਭਤਿ. ਤਂ ਤਂ ਤਥਾਗਤੋ ਸੁਖਸ੍ਮਿਂ ਪਞ੍ਞਪੇਤੀਤਿ ਤਂ ਸਬ੍ਬਂ ਤਥਾਗਤੋ ਨਿਦ੍ਦੁਕ੍ਖਭਾਵਂ ਸੁਖਸ੍ਮਿਂਯੇਵ ਪਞ੍ਞਪੇਤੀਤਿ. ਇਧ ਭਗਵਾ ਨਿਰੋਧਸਮਾਪਤ੍ਤਿਂ ਸੀਸਂ ਕਤ੍ਵਾ ਨੇਯ੍ਯਪੁਗ੍ਗਲਵਸੇਨ ਅਰਹਤ੍ਤਨਿਕੂਟੇਨੇਵ ਦੇਸਨਂ ਨਿਟ੍ਠਾਪੇਸੀਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਬਹੁਵੇਦਨੀਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.