੧੦. ਅਪਣ੍ਣਕਸੁਤ੍ਤਵਣ੍ਣਨਾ

੯੨. ਏਵਂ ਮੇ ਸੁਤਨ੍ਤਿ ਅਪਣ੍ਣਕਸੁਤ੍ਤਂ. ਤਤ੍ਥ ਚਾਰਿਕਨ੍ਤਿ ਅਤੁਰਿਤਚਾਰਿਕਂ.

੯੩. ਅਤ੍ਥਿ ਪਨ ਵੋ ਗਹਪਤਯੋਤਿ ਕਸ੍ਮਾ ਆਹ? ਸੋ ਕਿਰ ਗਾਮੋ ਅਟਵਿਦ੍ਵਾਰੇ ਨਿਵਿਟ੍ਠੋ. ਨਾਨਾਵਿਧਾ ਸਮਣਬ੍ਰਾਹ੍ਮਣਾ ਦਿਵਸਂ ਮਗ੍ਗਂ ਗਨ੍ਤ੍ਵਾ ਸਾਯਂ ਤਂ ਗਾਮਂ ਵਾਸਤ੍ਥਾਯ ਉਪੇਨ੍ਤਿ, ਤੇਸਂ ਤੇ ਮਨੁਸ੍ਸਾ ਮਞ੍ਚਪੀਠਾਨਿ ਪਤ੍ਥਰਿਤ੍ਵਾ ਪਾਦੇ ਧੋਵਿਤ੍ਵਾ ਪਾਦੇ ਮਕ੍ਖੇਤ੍ਵਾ ਕਪ੍ਪਿਯਪਾਨਕਾਨਿ ਦਤ੍ਵਾ ਪੁਨਦਿਵਸੇ ਨਿਮਨ੍ਤੇਤ੍ਵਾ ਦਾਨਂ ਦੇਨ੍ਤਿ. ਤੇ ਪਸਨ੍ਨਚਿਤ੍ਤਾ ਤੇਹਿ ਸਦ੍ਧਿਂ ਸਮ੍ਮਨ੍ਤਯਮਾਨਾ ਏਵਂ ਵਦਨ੍ਤਿ ‘‘ਅਤ੍ਥਿ ਪਨ ਵੋ ਗਹਪਤਯੋ ਕਿਞ੍ਚਿ ਦਸ੍ਸਨਂ ਗਹਿਤ’’ਨ੍ਤਿ? ਨਤ੍ਥਿ, ਭਨ੍ਤੇਤਿ. ‘‘ਗਹਪਤਯੋ ਵਿਨਾ ਦਸ੍ਸਨੇਨ ਲੋਕੋ ਨ ਨਿਯ੍ਯਾਤਿ, ਏਕਂ ਦਸ੍ਸਨਂ ਰੁਚ੍ਚਿਤ੍ਵਾ ਖਮਾਪੇਤ੍ਵਾ ਗਹੇਤੁਂ ਵਟ੍ਟਤਿ, ‘ਸਸ੍ਸਤੋ ਲੋਕੋ’ਤਿ ਦਸ੍ਸਨਂ ਗਣ੍ਹਥਾ’’ਤਿ ਵਤ੍ਵਾ ਪਕ੍ਕਨ੍ਤਾ. ਅਪਰਦਿਵਸੇ ਅਞ੍ਞੇ ਆਗਤਾ. ਤੇਪਿ ਤਥੇਵ ਪੁਚ੍ਛਿਂਸੁ. ਤੇ ਤੇਸਂ ‘‘ਆਮ, ਭਨ੍ਤੇ, ਪੁਰਿਮੇਸੁ ਦਿਵਸੇਸੁ ਤੁਮ੍ਹਾਦਿਸਾ ਸਮਣਬ੍ਰਾਹ੍ਮਣਾ ਆਗਨ੍ਤ੍ਵਾ ‘ਸਸ੍ਸਤੋ ਲੋਕੋ’ਤਿ ਅਮ੍ਹੇ ਇਦਂ ਦਸ੍ਸਨਂ ਗਾਹਾਪੇਤ੍ਵਾ ਗਤਾ’’ਤਿ ਆਰੋਚੇਸੁਂ. ‘‘ਤੇ ਬਾਲਾ ਕਿਂ ਜਾਨਨ੍ਤਿ? ‘ਉਚ੍ਛਿਜ੍ਜਤਿ ਅਯਂ ਲੋਕੋ’ਤਿ ਉਚ੍ਛੇਦਦਸ੍ਸਨਂ ਗਣ੍ਹਥਾ’’ਤਿ ਏਵਂ ਤੇਪਿ ਉਚ੍ਛੇਦਦਸ੍ਸਨਂ ਗਣ੍ਹਾਪੇਤ੍ਵਾ ਪਕ੍ਕਨ੍ਤਾ. ਏਤੇਨੁਪਾਯੇਨ ਅਞ੍ਞੇ ਏਕਚ੍ਚਸਸ੍ਸਤਂ, ਅਞ੍ਞੇ ਅਨ੍ਤਾਨਨ੍ਤਂ, ਅਞ੍ਞੇ ਅਮਰਾਵਿਕ੍ਖੇਪਨ੍ਤਿ ਏਵਂ ਦ੍ਵਾਸਟ੍ਠਿ ਦਿਟ੍ਠਿਯੋ ਉਗ੍ਗਣ੍ਹਾਪੇਸੁਂ. ਤੇ ਪਨ ਏਕਦਿਟ੍ਠਿਯਮ੍ਪਿ ਪਤਿਟ੍ਠਾਤੁਂ ਨਾਸਕ੍ਖਿਂਸੁ. ਸਬ੍ਬਪਚ੍ਛਾ ਭਗਵਾ ਅਗਮਾਸਿ. ਸੋ ਤੇਸਂ ਹਿਤਤ੍ਥਾਯ ਪੁਚ੍ਛਨ੍ਤੋ ‘‘ਅਤ੍ਥਿ ਪਨ ਵੋ ਗਹਪਤਯੋ’’ਤਿਆਦਿਮਾਹ. ਤਤ੍ਥ ਆਕਾਰਵਤੀਤਿ ਕਾਰਣਵਤੀ ਸਹੇਤੁਕਾ. ਅਪਣ੍ਣਕੋਤਿ ਅਵਿਰਦ੍ਧੋ ਅਦ੍ਵੇਜ੍ਝਗਾਮੀ ਏਕਂਸਗਾਹਿਕੋ.

੯੪. ਨਤ੍ਥਿ ਦਿਨ੍ਨਨ੍ਤਿਆਦਿ ਦਸਵਤ੍ਥੁਕਾ ਮਿਚ੍ਛਾਦਿਟ੍ਠਿ ਹੇਟ੍ਠਾ ਸਾਲੇਯ੍ਯਕਸੁਤ੍ਤੇ ਵਿਤ੍ਥਾਰਿਤਾ. ਤਥਾ ਤਬ੍ਬਿਪਚ੍ਚਨੀਕਭੂਤਾ ਸਮ੍ਮਾਦਿਟ੍ਠਿ.

੯੫. ਨੇਕ੍ਖਮ੍ਮੇ ਆਨਿਸਂਸਨ੍ਤਿ ਯੋ ਨੇਸਂ ਅਕੁਸਲਤੋ ਨਿਕ੍ਖਨ੍ਤਭਾਵੇ ਆਨਿਸਂਸੋ, ਯੋ ਚ ਵੋਦਾਨਪਕ੍ਖੋ ਵਿਸੁਦ੍ਧਿਪਕ੍ਖੋ, ਤਂ ਨ ਪਸ੍ਸਨ੍ਤੀਤਿ ਅਤ੍ਥੋ. ਅਸਦ੍ਧਮ੍ਮਸਞ੍ਞਤ੍ਤੀਤਿ ਅਭੂਤਧਮ੍ਮਸਞ੍ਞਾਪਨਾ. ਅਤ੍ਤਾਨੁਕ੍ਕਂਸੇਤੀਤਿ ਠਪੇਤ੍ਵਾ ਮਂ ਕੋ ਅਞ੍ਞੋ ਅਤ੍ਤਨੋ ਦਸ੍ਸਨਂ ਪਰੇ ਗਣ੍ਹਾਪੇਤੁਂ ਸਕ੍ਕੋਤੀਤਿ ਅਤ੍ਤਾਨਂ ਉਕ੍ਖਿਪਤਿ. ਪਰਂ ਵਮ੍ਭੇਤੀਤਿ ਏਤ੍ਤਕੇਸੁ ਜਨੇਸੁ ਏਕੋਪਿ ਅਤ੍ਤਨੋ ਦਸ੍ਸਨਂ ਪਰੇ ਗਣ੍ਹਾਪੇਤੁਂ ਨ ਸਕ੍ਕੋਤੀਤਿ ਏਵਂ ਪਰਂ ਹੇਟ੍ਠਾ ਖਿਪਤਿ. ਪੁਬ੍ਬੇਵ ਖੋ ਪਨਾਤਿ ਪੁਬ੍ਬੇ ਮਿਚ੍ਛਾਦਸ੍ਸਨਂ ਗਣ੍ਹਨ੍ਤਸ੍ਸੇਵ ਸੁਸੀਲ੍ਯਂ ਪਹੀਨਂ ਹੋਤਿ, ਦੁਸ੍ਸੀਲਭਾਵੋ ਪਚ੍ਚੁਪਟ੍ਠਿਤੋ. ਏਵਮਸ੍ਸਿਮੇਤਿ ਏਵਂ ਅਸ੍ਸ ਇਮੇ ਮਿਚ੍ਛਾਦਿਟ੍ਠਿਆਦਯੋ ਸਤ੍ਤ. ਅਪਰਾਪਰਂ ਉਪ੍ਪਜ੍ਜਨਵਸੇਨ ਪਨ ਤੇਯੇਵ ਮਿਚ੍ਛਾਦਿਟ੍ਠਿਪਚ੍ਚਯਾ ਅਨੇਕੇ ਪਾਪਕਾ ਅਕੁਸਲਾ ਧਮ੍ਮਾ ਉਪ੍ਪਜ੍ਜਨ੍ਤਿ ਨਾਮ.

ਤਤ੍ਰਾਤਿ ਤਾਸੁ ਤੇਸਂ ਸਮਣਬ੍ਰਾਹ੍ਮਣਾਨਂ ਲਦ੍ਧੀਸੁ. ਕਲਿਗ੍ਗਹੋਤਿ ਪਰਾਜਯਗ੍ਗਾਹੋ. ਦੁਸ੍ਸਮਤ੍ਤੋ ਸਮਾਦਿਨ੍ਨੋਤਿ ਦੁਗ੍ਗਹਿਤੋ ਦੁਪ੍ਪਰਾਮਟ੍ਠੋ. ਏਕਂਸਂ ਫਰਿਤ੍ਵਾ ਤਿਟ੍ਠਤੀਤਿ ਏਕਨ੍ਤਂ ਏਕਕੋਟ੍ਠਾਸਂ ਸਕਵਾਦਮੇਵ ਫਰਿਤ੍ਵਾ ਅਧਿਮੁਚ੍ਚਿਤ੍ਵਾ ਤਿਟ੍ਠਤਿ, ‘‘ਸਚੇ ਖੋ ਨਤ੍ਥਿ ਪਰੋ ਲੋਕੋ’’ਤਿ ਏਵਂ ਸਨ੍ਤੇਯੇਵ ਸੋਤ੍ਥਿਭਾਵਾਵਹੋ ਹੋਤਿ. ਰਿਞ੍ਚਤੀਤਿ ਵਜ੍ਜੇਤਿ.

੯੬. ਸਦ੍ਧਮ੍ਮਸਞ੍ਞਤ੍ਤੀਤਿ ਭੂਤਧਮ੍ਮਸਞ੍ਞਾਪਨਾ.

ਕਟਗ੍ਗਹੋਤਿ ਜਯਗ੍ਗਾਹੋ. ਸੁਸਮਤ੍ਤੋ ਸਮਾਦਿਨ੍ਨੋਤਿ ਸੁਗ੍ਗਹਿਤੋ ਸੁਪਰਾਮਟ੍ਠੋ. ਉਭਯਂਸਂ ਫਰਿਤ੍ਵਾ ਤਿਟ੍ਠਤੀਤਿ ਉਭਯਨ੍ਤਂ ਉਭਯਕੋਟ੍ਠਾਸਂ ਸਕਵਾਦਂ ਪਰਵਾਦਞ੍ਚ ਫਰਿਤ੍ਵਾ ਅਧਿਮੁਚ੍ਚਿਤ੍ਵਾ ਤਿਟ੍ਠਤਿ ‘‘ਸਚੇ ਖੋ ਅਤ੍ਥਿ ਪਰੋ ਲੋਕੋ’’ਤਿ ਏਵਂ ਸਨ੍ਤੇਪਿ ‘‘ਸਚੇ ਖੋ ਨਤ੍ਥਿ ਪਰੋ ਲੋਕੋ’’ਤਿ ਏਵਂ ਸਨ੍ਤੇਪਿ ਸੋਤ੍ਥਿਭਾਵਾਵਹੋ ਹੋਤਿ. ਪਰਤੋਪਿ ਏਕਂਸਉਭਯਂਸੇਸੁ ਇਮਿਨਾਵ ਨਯੇਨ ਅਤ੍ਥੋ ਵੇਦਿਤਬ੍ਬੋ.

੯੭. ਕਰੋਤੋਤਿ ਸਹਤ੍ਥਾ ਕਰੋਨ੍ਤਸ੍ਸ. ਕਾਰਯਤੋਤਿ ਆਣਤ੍ਤਿਯਾ ਕਾਰੇਨ੍ਤਸ੍ਸ. ਛਿਨ੍ਦਤੋਤਿ ਪਰੇਸਂ ਹਤ੍ਥਾਦੀਨਿ ਛਿਨ੍ਦਨ੍ਤਸ੍ਸ. ਪਚਤੋਤਿ ਦਣ੍ਡੇਨ ਪੀਲ਼ੇਨ੍ਤਸ੍ਸ ਵਾ ਤਜ੍ਜੇਨ੍ਤਸ੍ਸ ਵਾ. ਸੋਚਯਤੋਤਿ ਪਰਸ੍ਸ ਭਣ੍ਡਹਰਣਾਦੀਹਿ ਸੋਕਂ ਸਯਂ ਕਰੋਨ੍ਤਸ੍ਸਪਿ ਪਰੇਹਿ ਕਾਰੇਨ੍ਤਸ੍ਸਪਿ. ਕਿਲਮਤੋਤਿ ਆਹਾਰੂਪਚ੍ਛੇਦ-ਬਨ੍ਧਨਾਗਾਰਪ੍ਪਵੇਸਨਾਦੀਹਿ ਸਯਂ ਕਿਲਮਨ੍ਤਸ੍ਸਾਪਿ ਪਰੇਹਿ ਕਿਲਮਾਪੇਨ੍ਤਸ੍ਸਾਪਿ. ਫਨ੍ਦਤੋ ਫਨ੍ਦਾਪਯਤੋਤਿ ਪਰਂ ਫਨ੍ਦਨ੍ਤਂ ਫਨ੍ਦਨਕਾਲੇ ਸਯਮ੍ਪਿ ਫਨ੍ਦਤੋ ਪਰਮ੍ਪਿ ਫਨ੍ਦਾਪਯਤੋ. ਪਾਣਮਤਿਪਾਤਯਤੋਤਿ ਪਾਣਂ ਹਨਨ੍ਤਸ੍ਸਪਿ ਹਨਾਪੇਨ੍ਤਸ੍ਸਪਿ. ਏਵਂ ਸਬ੍ਬਤ੍ਥ ਕਰਣਕਾਰਾਪਨਵਸੇਨੇਵ ਅਤ੍ਥੋ ਵੇਦਿਤਬ੍ਬੋ.

ਸਨ੍ਧਿਨ੍ਤਿ ਘਰਸਨ੍ਧਿਂ. ਨਿਲ੍ਲੋਪਨ੍ਤਿ ਮਹਾਵਿਲੋਪਂ. ਏਕਾਗਾਰਿਕਨ੍ਤਿ ਏਕਮੇਵ ਘਰਂ ਪਰਿਵਾਰੇਤ੍ਵਾ ਵਿਲੁਮ੍ਪਨਂ. ਪਰਿਪਨ੍ਥੇ ਤਿਟ੍ਠਤੋਤਿ ਆਗਤਾਗਤਾਨਂ ਅਚ੍ਛਿਨ੍ਦਨਤ੍ਥਂ ਮਗ੍ਗੇ ਤਿਟ੍ਠਤੋ. ਕਰੋਤੋ ਨ ਕਰੀਯਤਿ ਪਾਪਨ੍ਤਿ ਯਂਕਿਞ੍ਚਿ ਪਾਪਂ ਕਰੋਮੀਤਿ ਸਞ੍ਞਾਯ ਕਰੋਤੋਪਿ ਪਾਪਂ ਨ ਕਰੀਯਤਿ, ਨਤ੍ਥਿ ਪਾਪਂ. ਸਤ੍ਤਾ ਪਨ ਕਰੋਮਾਤਿ ਏਵਂਸਞ੍ਞਿਨੋ ਹੋਨ੍ਤੀਤਿ ਅਤ੍ਥੋ. ਖੁਰਪਰਿਯਨ੍ਤੇਨਾਤਿ ਖੁਰਨੇਮਿਨਾ, ਖੁਰਧਾਰਸਦਿਸਪਰਿਯਨ੍ਤੇਨ ਵਾ. ਏਕਂ ਮਂਸਖਲਨ੍ਤਿ ਏਕਂ ਮਂਸਰਾਸਿਂ. ਪੁਞ੍ਜਨ੍ਤਿ ਤਸ੍ਸੇਵ ਵੇਵਚਨਂ. ਤਤੋਨਿਦਾਨਨ੍ਤਿ ਏਕਮਂਸਖਲਕਰਣਨਿਦਾਨਂ. ਦਕ੍ਖਿਣਤੀਰੇ ਮਨੁਸ੍ਸਾ ਕਕ੍ਖਲ਼ਾ ਦਾਰੁਣਾ, ਤੇ ਸਨ੍ਧਾਯ ਹਨਨ੍ਤੋਤਿਆਦਿ ਵੁਤ੍ਤਂ. ਉਤ੍ਤਰਤੀਰੇ ਸਦ੍ਧਾ ਹੋਨ੍ਤਿ ਪਸਨ੍ਨਾ ਬੁਦ੍ਧਮਾਮਕਾ ਧਮ੍ਮਮਾਮਕਾ ਸਙ੍ਘਮਾਮਕਾ, ਤੇ ਸਨ੍ਧਾਯ ਦਦਨ੍ਤੋਤਿਆਦਿ ਵੁਤ੍ਤਂ.

ਤਤ੍ਥ ਯਜਨ੍ਤੋਤਿ ਮਹਾਯਾਗਂ ਕਰੋਨ੍ਤੋ. ਦਮੇਨਾਤਿ ਇਨ੍ਦ੍ਰਿਯਦਮੇਨ ਉਪੋਸਥਕਮ੍ਮੇਨ. ਸਂਯਮੇਨਾਤਿ ਸੀਲਸਂਯਮੇਨ. ਸਚ੍ਚਵਜ੍ਜੇਨਾਤਿ ਸਚ੍ਚਵਚਨੇਨ. ਆਗਮੋਤਿ ਆਗਮਨਂ, ਪਵਤ੍ਤੀਤਿ ਅਤ੍ਥੋ. ਸਬ੍ਬਥਾਪਿ ਪਾਪਪੁਞ੍ਞਾਨਂ ਕਿਰਿਯਮੇਵ ਪਟਿਕ੍ਖਿਪਨ੍ਤਿ. ਸੁਕ੍ਕਪਕ੍ਖੋਪਿ ਵੁਤ੍ਤਨਯੇਨੇਵ ਵੇਦਿਤਬ੍ਬੋ. ਸੇਸਮੇਤ੍ਥ ਪੁਰਿਮਵਾਰੇ ਵੁਤ੍ਤਸਦਿਸਮੇਵ.

੧੦੦. ਨਤ੍ਥਿ ਹੇਤੁ ਨਤ੍ਥਿ ਪਚ੍ਚਯੋਤਿ ਏਤ੍ਥ ਪਚ੍ਚਯੋ ਹੇਤੁਵੇਵਚਨਂ. ਉਭਯੇਨਾਪਿ ਵਿਜ੍ਜਮਾਨਕਮੇਵ ਕਾਯਦੁਚ੍ਚਰਿਤਾਦਿਸਂਕਿਲੇਸਪਚ੍ਚਯਂ ਕਾਯਸੁਚਰਿਤਾਦਿਵਿਸੁਦ੍ਧਿਪਚ੍ਚਯਂ ਪਟਿਕ੍ਖਿਪਨ੍ਤਿ. ਨਤ੍ਥਿ ਬਲਂ, ਨਤ੍ਥਿ ਵੀਰਿਯਂ, ਨਤ੍ਥਿ ਪੁਰਿਸਥਾਮੋ, ਨਤ੍ਥਿ ਪੁਰਿਸਪਰਕ੍ਕਮੋਤਿ ਸਤ੍ਤਾਨਂ ਸਂਕਿਲੇਸਿਤੁਂ ਵਾ ਵਿਸੁਜ੍ਝਿਤੁਂ ਵਾ ਬਲਂ ਵਾ ਵੀਰਿਯਂ ਵਾ ਪੁਰਿਸੇਨ ਕਾਤਬ੍ਬੋ ਨਾਮ ਪੁਰਿਸਥਾਮੋ ਵਾ ਪੁਰਿਸਪਰਕ੍ਕਮੋ ਵਾ ਨਤ੍ਥਿ.

ਸਬ੍ਬੇ ਸਤ੍ਤਾਤਿ ਓਟ੍ਠਗੋਣਗਦ੍ਰਭਾਦਯੋ ਅਨਵਸੇਸੇ ਨਿਦਸ੍ਸੇਨ੍ਤਿ. ਸਬ੍ਬੇ ਪਾਣਾਤਿ ਏਕਿਨ੍ਦ੍ਰਿਯੋ ਪਾਣੋ ਦ੍ਵਿਨ੍ਦ੍ਰਿਯੋ ਪਾਣੋਤਿ ਆਦਿਵਸੇਨ ਵਦਨ੍ਤਿ. ਸਬ੍ਬੇ ਭੂਤਾਤਿ ਅਣ੍ਡਕੋਸਵਤ੍ਥਿਕੋਸੇਸੁ ਭੂਤੇ ਸਨ੍ਧਾਯ ਵਦਨ੍ਤਿ. ਸਬ੍ਬੇ ਜੀਵਾਤਿ ਸਾਲਿਯਵਗੋਧੁਮਾਦਯੋ ਸਨ੍ਧਾਯ ਵਦਨ੍ਤਿ. ਤੇਸੁ ਹੇਤੇ ਵਿਰੁਹਨਭਾਵੇਨ ਜੀਵਸਞ੍ਞਿਨੋ. ਅਵਸਾ ਅਬਲਾ ਅਵੀਰਿਯਾਤਿ ਤੇਸਂ ਅਤ੍ਤਨੋ ਵਸੋ ਵਾ ਬਲਂ ਵਾ ਵੀਰਿਯਂ ਵਾ ਨਤ੍ਥਿ. ਨਿਯਤਿਸਙ੍ਗਤਿਭਾਵਪਰਿਣਤਾਤਿ ਏਤ੍ਥ ਨਿਯਤੀਤਿ ਨਿਯਤਤਾ. ਸਙ੍ਗਤੀਤਿ ਛਨ੍ਨਂ ਅਭਿਜਾਤੀਨਂ ਤਤ੍ਥ ਤਤ੍ਥ ਗਮਨਂ. ਭਾਵੋਤਿ ਸਭਾਵੋਯੇਵ. ਏਵਂ ਨਿਯਤਿਯਾ ਚ ਸਙ੍ਗਤਿਯਾ ਚ ਭਾਵੇਨ ਚ ਪਰਿਣਤਾ ਨਾਨਪ੍ਪਕਾਰਤਂ ਪਤ੍ਤਾ. ਯੇਨ ਹਿ ਯਥਾ ਭਵਿਤਬ੍ਬਂ, ਸੋ ਤਥੇਵ ਭਵਤਿ. ਯੇਨ ਨੋ ਭਵਿਤਬ੍ਬਂ, ਸੋ ਨ ਭਵਤੀਤਿ ਦਸ੍ਸੇਨ੍ਤਿ. ਛਸ੍ਵੇਵਾਭਿਜਾਤੀਸੂਤਿ ਛਸੁ ਏਵ ਅਭਿਜਾਤੀਸੁ ਠਤ੍ਵਾ ਸੁਖਞ੍ਚ ਦੁਕ੍ਖਞ੍ਚ ਪਟਿਸਂਵੇਦੇਨ੍ਤਿ, ਅਞ੍ਞਾ ਸੁਖਦੁਕ੍ਖਭੂਮਿ ਨਤ੍ਥੀਤਿ ਦਸ੍ਸੇਨ੍ਤਿ.

ਤਤ੍ਥ ਛ ਅਭਿਜਾਤਿਯੋ ਨਾਮ ਕਣ੍ਹਾਭਿਜਾਤਿ ਨੀਲਾਭਿਜਾਤਿ ਲੋਹਿਤਾਭਿਜਾਤਿ ਹਲਿਦ੍ਦਾਭਿਜਾਤਿ ਸੁਕ੍ਕਾਭਿਜਾਤਿ ਪਰਮਸੁਕ੍ਕਾਭਿਜਾਤੀਤਿ. ਤਤ੍ਥ ਸਾਕੁਣਿਕੋ ਸੂਕਰਿਕੋ ਲੁਦ੍ਦੋ ਮਚ੍ਛਘਾਤਕੋ ਚੋਰੋ ਚੋਰਘਾਤਕੋ, ਯੇ ਵਾ ਪਨਞ੍ਞੇਪਿ ਕੇਚਿ ਕੁਰੂਰਕਮ੍ਮਨ੍ਤਾ, ਅਯਂ ਕਣ੍ਹਾਭਿਜਾਤਿ ਨਾਮ. ਭਿਕ੍ਖੂ ਨੀਲਾਭਿਜਾਤੀਤਿ ਵਦਨ੍ਤਿ. ਤੇ ਕਿਰ ਚਤੂਸੁ ਪਚ੍ਚਯੇਸੁ ਕਣ੍ਟਕੇ ਪਕ੍ਖਿਪਿਤ੍ਵਾ ਖਾਦਨ੍ਤਿ. ‘‘ਭਿਕ੍ਖੂ ਚ ਕਣ੍ਟਕਵੁਤ੍ਤਿਨੋ’’ਤਿ ਅਯਞ੍ਹਿ ਨੇਸਂ ਪਾਲ਼ਿਯੇਵ. ਅਥ ਵਾ ਕਣ੍ਟਕਵੁਤ੍ਤਿਕਾ ਏਵਂ ਨਾਮ ਏਕੇ ਪਬ੍ਬਜਿਤਾਤਿ ਵਦਨ੍ਤਿ. ‘‘ਸਮਣਕਣ੍ਟਕਵੁਤ੍ਤਿਕਾ’’ਤਿਪਿ ਹਿ ਨੇਸਂ ਪਾਲ਼ਿ. ਲੋਹਿਤਾਭਿਜਾਤਿ ਨਾਮ ਨਿਗਣ੍ਠਾ ਏਕਸਾਟਕਾਤਿ ਵਦਨ੍ਤਿ. ਇਮੇ ਕਿਰ ਪੁਰਿਮੇਹਿ ਦ੍ਵੀਹਿ ਪਣ੍ਡਰਤਰਾ. ਗਿਹੀ ਅਚੇਲਕਸਾਵਕਾ ਹਲਿਦ੍ਦਾਭਿਜਾਤੀਤਿ ਵਦਨ੍ਤਿ. ਇਤਿ ਅਤ੍ਤਨੋ ਪਚ੍ਚਯਦਾਯਕੇ ਨਿਗਣ੍ਠੇਹਿਪਿ ਜੇਟ੍ਠਕਤਰੇ ਕਰੋਨ੍ਤਿ. ਨਨ੍ਦੋ, ਵਚ੍ਛੋ, ਸਙ੍ਕਿਚ੍ਚੋ, ਅਯਂ ਸੁਕ੍ਕਾਭਿਜਾਤੀਤਿ ਵਦਨ੍ਤਿ. ਤੇ ਕਿਰ ਪੁਰਿਮੇਹਿ ਚਤੂਹਿ ਪਣ੍ਡਰਤਰਾ. ਆਜੀਵਕੇ ਪਨ ਪਰਮਸੁਕ੍ਕਾਭਿਜਾਤੀਤਿ ਵਦਨ੍ਤਿ. ਤੇ ਕਿਰ ਸਬ੍ਬੇਹਿ ਪਣ੍ਡਰਤਰਾ.

ਤਤ੍ਥ ਸਬ੍ਬੇ ਸਤ੍ਤਾ ਪਠਮਂ ਸਾਕੁਣਿਕਾਦਯੋਵ ਹੋਨ੍ਤਿ, ਤਤੋ ਵਿਸੁਜ੍ਝਮਾਨਾ ਸਕ੍ਯਸਮਣਾ ਹੋਨ੍ਤਿ, ਤਤੋ ਵਿਸੁਜ੍ਝਮਾਨਾ ਨਿਗਣ੍ਠਾ, ਤਤੋ ਆਜੀਵਕਸਾਵਕਾ, ਤਤੋ ਨਨ੍ਦਾਦਯੋ, ਤਤੋ ਆਜੀਵਕਾਤਿ ਅਯਮੇਤੇਸਂ ਲਦ੍ਧਿ. ਸੁਕ੍ਕਪਕ੍ਖੋ ਵੁਤ੍ਤਪਚ੍ਚਨੀਕੇਨ ਵੇਦਿਤਬ੍ਬੋ. ਸੇਸਮਿਧਾਪਿ ਪੁਰਿਮਵਾਰੇ ਵੁਤ੍ਤਸਦਿਸਮੇਵ.

ਇਮਾਸੁ ਪਨ ਤੀਸੁ ਦਿਟ੍ਠੀਸੁ ਨਤ੍ਥਿਕਦਿਟ੍ਠਿ ਵਿਪਾਕਂ ਪਟਿਬਾਹਤਿ, ਅਕਿਰਿਯਦਿਟ੍ਠਿ ਕਮ੍ਮਂ ਪਟਿਬਾਹਤਿ, ਅਹੇਤੁਕਦਿਟ੍ਠਿ ਉਭਯਮ੍ਪਿ ਪਟਿਬਾਹਤਿ. ਤਤ੍ਥ ਕਮ੍ਮਂ ਪਟਿਬਾਹਨ੍ਤੇਨਾਪਿ ਵਿਪਾਕੋ ਪਟਿਬਾਹਿਤੋ ਹੋਤਿ, ਵਿਪਾਕਂ ਪਟਿਬਾਹਨ੍ਤੇਨਾਪਿ ਕਮ੍ਮਂ ਪਟਿਬਾਹਿਤਂ. ਇਤਿ ਸਬ੍ਬੇਪੇਤੇ ਅਤ੍ਥਤੋ ਉਭਯਪਟਿਬਾਹਕਾ ਨਤ੍ਥਿਕਵਾਦਾ ਚੇਵ ਅਹੇਤੁਕਵਾਦਾ ਅਕਿਰਿਯਵਾਦਾ ਚ ਹੋਨ੍ਤਿ. ਯੇ ਪਨ ਤੇਸਂ ਲਦ੍ਧਿਂ ਗਹੇਤ੍ਵਾ ਰਤ੍ਤਿਟ੍ਠਾਨੇ ਦਿਵਾਟ੍ਠਾਨੇ ਨਿਸਿਨ੍ਨਾ ਸਜ੍ਝਾਯਨ੍ਤਿ ਵੀਮਂਸਨ੍ਤਿ, ਤੇਸਂ – ‘‘ਨਤ੍ਥਿ ਦਿਨ੍ਨਂ ਨਤ੍ਥਿ ਯਿਟ੍ਠਂ, ਕਰੋਤੋ ਨ ਕਰਿਯਤਿ ਪਾਪਂ, ਨਤ੍ਥਿ ਹੇਤੁ ਨਤ੍ਥਿ ਪਚ੍ਚਯੋ’’ਤਿ ਤਸ੍ਮਿਂ ਆਰਮ੍ਮਣੇ ਮਿਚ੍ਛਾਸਤਿ ਸਨ੍ਤਿਟ੍ਠਤਿ, ਚਿਤ੍ਤਂ ਏਕਗ੍ਗਂ ਹੋਤਿ, ਜਵਨਾਨਿ ਜਵਨ੍ਤਿ, ਪਠਮਜਵਨੇ ਸਤੇਕਿਚ੍ਛਾ ਹੋਨ੍ਤਿ, ਤਥਾ ਦੁਤਿਯਾਦੀਸੁ. ਸਤ੍ਤਮੇ ਬੁਦ੍ਧਾਨਮ੍ਪਿ ਅਤੇਕਿਚ੍ਛਾ ਅਨਿਵਤ੍ਤਿਨੋ ਅਰਿਟ੍ਠਕਣ੍ਟਕਸਦਿਸਾ.

ਤਤ੍ਥ ਕੋਚਿ ਏਕਂ ਦਸ੍ਸਨਂ ਓਕ੍ਕਮਤਿ, ਕੋਚਿ ਦ੍ਵੇ, ਕੋਚਿ ਤੀਣਿਪਿ, ਏਕਸ੍ਮਿਂ ਓਕ੍ਕਨ੍ਤੇਪਿ ਦ੍ਵੀਸੁ ਤੀਸੁ ਓਕ੍ਕਨ੍ਤੇਸੁਪਿ ਨਿਯਤਮਿਚ੍ਛਾਦਿਟ੍ਠਿਕੋਵ ਹੋਤਿ, ਪਤ੍ਤੋ ਸਗ੍ਗਮਗ੍ਗਾਵਰਣਞ੍ਚੇਵ ਮੋਕ੍ਖਮਗ੍ਗਾਵਰਣਞ੍ਚ, ਅਭਬ੍ਬੋ ਤਸ੍ਸ ਅਤ੍ਤਭਾਵਸ੍ਸ ਅਨਨ੍ਤਰਂ ਸਗ੍ਗਮ੍ਪਿ ਗਨ੍ਤੁਂ, ਪਗੇਵ ਮੋਕ੍ਖਂ. ਵਟ੍ਟਖਾਣੁ ਨਾਮੇਸ ਸਤ੍ਤੋ ਪਥਵੀਗੋਪਕੋ. ਕਿਂ ਪਨੇਸ ਏਕਸ੍ਮਿਂਯੇਵ ਅਤ੍ਤਭਾਵੇ ਨਿਯਤੋ ਹੋਤਿ, ਉਦਾਹੁ ਅਞ੍ਞਸ੍ਮਿਮ੍ਪੀਤਿ? ਏਕਸ੍ਮਿਞ੍ਞੇਵ ਨਿਯਤੋ, ਆਸੇਵਨਵਸੇਨ ਪਨ ਭਵਨ੍ਤਰੇਪਿ ਤਂ ਤਂ ਦਿਟ੍ਠਿਂ ਰੋਚੇਤਿਯੇਵ. ਏਵਰੂਪਸ੍ਸ ਹਿ ਯੇਭੁਯ੍ਯੇਨ ਭਵਤੋ ਵੁਟ੍ਠਾਨਂ ਨਾਮ ਨਤ੍ਥਿ.

ਤਸ੍ਮਾ ਅਕਲ੍ਯਾਣਜਨਂ, ਆਸੀਵਿਸਮਿਵੋਰਗਂ;

ਆਰਕਾ ਪਰਿਵਜ੍ਜੇਯ੍ਯ, ਭੂਤਿਕਾਮੋ ਵਿਚਕ੍ਖਣੋਤਿ.

੧੦੩. ਨਤ੍ਥਿ ਸਬ੍ਬਸੋ ਆਰੁਪ੍ਪਾਤਿ ਅਰੂਪਬ੍ਰਹ੍ਮਲੋਕੋ ਨਾਮ ਸਬ੍ਬਾਕਾਰੇਨ ਨਤ੍ਥਿ. ਮਨੋਮਯਾਤਿ ਝਾਨਚਿਤ੍ਤਮਯਾ. ਸਞ੍ਞਾਮਯਾਤਿ ਅਰੂਪਜ੍ਝਾਨਸਞ੍ਞਾਯ ਸਞ੍ਞਾਮਯਾ. ਰੂਪਾਨਂਯੇਵ ਨਿਬ੍ਬਿਦਾਯ ਵਿਰਾਗਾਯ ਨਿਰੋਧਾਯ ਪਟਿਪਨ੍ਨੋ ਹੋਤੀਤਿ ਅਯਂ ਲਾਭੀ ਵਾ ਹੋਤਿ ਤਕ੍ਕੀ ਵਾ. ਲਾਭੀ ਨਾਮ ਰੂਪਾਵਚਰਜ੍ਝਾਨਲਾਭੀ. ਤਸ੍ਸ ਰੂਪਾਵਚਰੇ ਕਙ੍ਖਾ ਨਤ੍ਥਿ, ਅਰੂਪਾਵਚਰਲੋਕੇ ਅਤ੍ਥਿ. ਸੋ – ‘‘ਅਹਂ ਆਰੁਪ੍ਪਾ ਅਤ੍ਥੀਤਿ ਵਦਨ੍ਤਾਨਮ੍ਪਿ ਨਤ੍ਥੀਤਿ ਵਦਨ੍ਤਾਨਮ੍ਪਿ ਸੁਣਾਮਿ, ਅਤ੍ਥਿ ਨਤ੍ਥੀਤਿ ਪਨ ਨ ਜਾਨਾਮਿ. ਚਤੁਤ੍ਥਜ੍ਝਾਨਂ ਪਦਟ੍ਠਾਨਂ ਕਤ੍ਵਾ ਅਰੂਪਾਵਚਰਜ੍ਝਾਨਂ ਨਿਬ੍ਬਤ੍ਤੇਸ੍ਸਾਮਿ. ਸਚੇ ਆਰੁਪ੍ਪਾ ਅਤ੍ਥਿ, ਤਤ੍ਥ ਨਿਬ੍ਬਤ੍ਤਿਸ੍ਸਾਮਿ, ਸਚੇ ਨਤ੍ਥਿ, ਰੂਪਾਵਚਰਬ੍ਰਹ੍ਮਲੋਕੇ ਨਿਬ੍ਬਤ੍ਤਿਸ੍ਸਾਮਿ. ਏਵਂ ਮੇ ਅਪਣ੍ਣਕੋ ਧਮ੍ਮੋ ਅਪਣ੍ਣਕੋਵ ਅਵਿਰਦ੍ਧੋਵ ਭਵਿਸ੍ਸਤੀ’’ਤਿ ਤਥਾ ਪਟਿਪਜ੍ਜਤਿ. ਤਕ੍ਕੀ ਪਨ ਅਪ੍ਪਟਿਲਦ੍ਧਜ੍ਝਾਨੋ, ਤਸ੍ਸਾਪਿ ਰੂਪਜ੍ਝਾਨੇ ਕਙ੍ਖਾ ਨਤ੍ਥਿ, ਅਰੂਪਲੋਕੇ ਪਨ ਅਤ੍ਥਿ. ਸੋ – ‘‘ਅਹਂ ਆਰੁਪ੍ਪਾ ਅਤ੍ਥੀਤਿ ਵਦਨ੍ਤਾਨਮ੍ਪਿ ਨਤ੍ਥੀਤਿ ਵਦਨ੍ਤਾਨਮ੍ਪਿ ਸੁਣਾਮਿ, ਅਤ੍ਥਿ ਨਤ੍ਥੀਤਿ ਪਨ ਨ ਜਾਨਾਮਿ. ਕਸਿਣਪਰਿਕਮ੍ਮਂ ਕਤ੍ਵਾ ਚਤੁਤ੍ਥਜ੍ਝਾਨਂ ਨਿਬ੍ਬਤ੍ਤੇਤ੍ਵਾ ਤਂ ਪਦਟ੍ਠਾਨਂ ਕਤ੍ਵਾ ਅਰੂਪਾਵਚਰਜ੍ਝਾਨਂ ਨਿਬ੍ਬਤ੍ਤੇਸ੍ਸਾਮਿ. ਸਚੇ ਆਰੁਪ੍ਪਾ ਅਤ੍ਥਿ, ਤਤ੍ਥ ਨਿਬ੍ਬਤ੍ਤਿਸ੍ਸਾਮਿ. ਸਚੇ ਨਤ੍ਥਿ, ਰੂਪਾਵਚਰਬ੍ਰਹ੍ਮਲੋਕੇ ਨਿਬ੍ਬਤ੍ਤਿਸ੍ਸਾਮਿ. ਏਵਂ ਮੇ ਅਪਣ੍ਣਕੋ ਧਮ੍ਮੋ ਅਪਣ੍ਣਕੋਵ ਅਵਿਰਦ੍ਧੋਵ ਭਵਿਸ੍ਸਤੀ’’ਤਿ ਤਥਾ ਪਟਿਪਜ੍ਜਤਿ.

੧੦੪. ਭਵਨਿਰੋਧੋਤਿ ਨਿਬ੍ਬਾਨਂ. ਸਾਰਾਗਾਯ ਸਨ੍ਤਿਕੇਤਿ ਰਾਗਵਸੇਨ ਵਟ੍ਟੇ ਰਜ੍ਜਨਸ੍ਸ ਸਨ੍ਤਿਕੇ. ਸਂਯੋਗਾਯਾਤਿ ਤਣ੍ਹਾਵਸੇਨ ਸਂਯੋਜਨਤ੍ਥਾਯ. ਅਭਿਨਨ੍ਦਨਾਯਾਤਿ ਤਣ੍ਹਾਦਿਟ੍ਠਿਵਸੇਨ ਅਭਿਨਨ੍ਦਨਾਯ. ਪਟਿਪਨ੍ਨੋ ਹੋਤੀਤਿ ਅਯਮ੍ਪਿ ਲਾਭੀ ਵਾ ਹੋਤਿ ਤਕ੍ਕੀ ਵਾ. ਲਾਭੀ ਨਾਮ ਅਟ੍ਠਸਮਾਪਤ੍ਤਿਲਾਭੀ. ਤਸ੍ਸ ਆਰੁਪ੍ਪੇ ਕਙ੍ਖਾ ਨਤ੍ਥਿ, ਨਿਬ੍ਬਾਨੇ ਅਤ੍ਥਿ. ਸੋ – ‘‘ਅਹਂ ਨਿਰੋਧੋ ਅਤ੍ਥੀਤਿਪਿ ਨਤ੍ਥੀਤਿਪਿ ਸੁਣਾਮਿ, ਸਯਂ ਨ ਜਾਨਾਮਿ. ਸਮਾਪਤ੍ਤਿਂ ਪਾਦਕਂ ਕਤ੍ਵਾ ਵਿਪਸ੍ਸਨਂ ਵਡ੍ਢੇਸ੍ਸਾਮਿ. ਸਚੇ ਨਿਰੋਧੋ ਭਵਿਸ੍ਸਤਿ, ਅਰਹਤ੍ਤਂ ਪਤ੍ਵਾ ਪਰਿਨਿਬ੍ਬਾਯਿਸ੍ਸਾਮਿ. ਨੋ ਚੇ ਭਵਿਸ੍ਸਤਿ, ਆਰੁਪ੍ਪੇ ਨਿਬ੍ਬਤ੍ਤਿਸ੍ਸਾਮੀ’’ਤਿ ਏਵਂ ਪਟਿਪਜ੍ਜਤਿ. ਤਕ੍ਕੀ ਪਨ ਏਕਸਮਾਪਤ੍ਤਿਯਾਪਿ ਨ ਲਾਭੀ, ਆਰੁਪ੍ਪੇ ਪਨਸ੍ਸ ਕਙ੍ਖਾ ਨਤ੍ਥਿ, ਭਵਨਿਰੋਧੇ ਅਤ੍ਥਿ. ਸੋ – ‘‘ਅਹਂ ਨਿਰੋਧੋ ਅਤ੍ਥੀਤਿਪਿ ਨਤ੍ਥੀਤਿਪਿ ਸੁਣਾਮਿ, ਸਯਂ ਨ ਜਾਨਾਮਿ, ਕਸਿਣਪਰਿਕਮ੍ਮਂ ਕਤ੍ਵਾ ਅਟ੍ਠਸਮਾਪਤ੍ਤਿਯੋ ਨਿਬ੍ਬਤ੍ਤੇਤ੍ਵਾ ਸਮਾਪਤ੍ਤਿਪਦਟ੍ਠਾਨਂ ਵਿਪਸ੍ਸਨਂ ਵਡ੍ਢੇਸ੍ਸਾਮਿ. ਸਚੇ ਨਿਰੋਧੋ ਭਵਿਸ੍ਸਤਿ, ਅਰਹਤ੍ਤਂ ਪਤ੍ਵਾ ਪਰਿਨਿਬ੍ਬਾਯਿਸ੍ਸਾਮਿ. ਨੋ ਚੇ ਭਵਿਸ੍ਸਤਿ, ਆਰੁਪ੍ਪੇ ਨਿਬ੍ਬਤ੍ਤਿਸ੍ਸਾਮੀ’’ਤਿ ਏਵਂ ਪਟਿਪਜ੍ਜਤਿ. ਏਤ੍ਥਾਹ – ‘‘ਅਤ੍ਥਿ ਦਿਨ੍ਨਨ੍ਤਿਆਦੀਨਿ ਤਾਵ ਅਪਣ੍ਣਕਾਨਿ ਭਵਨ੍ਤੁ, ਨਤ੍ਥਿ ਦਿਨ੍ਨਨ੍ਤਿਆਦੀਨਿ ਪਨ ਕਥਂ ਅਪਣ੍ਣਕਾਨੀ’’ਤਿ. ਗਹਣਵਸੇਨ. ਤਾਨਿ ਹਿ ਅਪਣ੍ਣਕਂ ਅਪਣ੍ਣਕਨ੍ਤਿ ਏਵਂ ਗਹਿਤਤ੍ਤਾ ਅਪਣ੍ਣਕਾਨਿ ਨਾਮ ਜਾਤਾਨਿ.

੧੦੫. ਚਤ੍ਤਾਰੋਮੇਤਿ ਅਯਂ ਪਾਟਿਏਕ੍ਕੋ ਅਨੁਸਨ੍ਧਿ. ਨਤ੍ਥਿਕਵਾਦੋ, ਅਹੇਤੁਕਵਾਦੋ ਅਕਿਰਿਯਵਾਦੋ, ਆਰੁਪ੍ਪਾ ਨਤ੍ਥਿ ਨਿਰੋਧੋ ਨਤ੍ਥੀਤਿ ਏਵਂਵਾਦਿਨੋ ਚ ਦ੍ਵੇਤਿ ਇਮੇ ਪਞ੍ਚ ਪੁਗ੍ਗਲਾ ਹੇਟ੍ਠਾ ਤਯੋ ਪੁਗ੍ਗਲਾਵ ਹੋਨ੍ਤਿ. ਅਤ੍ਥਿਕਵਾਦਾਦਯੋ ਪਞ੍ਚ ਏਕੋ ਚਤੁਤ੍ਥਪੁਗ੍ਗਲੋਵ ਹੋਤਿ. ਏਤਮਤ੍ਥਂ ਦਸ੍ਸੇਤੁਂ ਭਗਵਾ ਇਮਂ ਦੇਸਨਂ ਆਰਭਿ. ਤਤ੍ਥ ਸਬ੍ਬਂ ਅਤ੍ਥਤੋ ਉਤ੍ਤਾਨਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਅਪਣ੍ਣਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਪਠਮਵਗ੍ਗਵਣ੍ਣਨਾ ਨਿਟ੍ਠਿਤਾ.