੧. ਗਹਪਤਿਵਗ੍ਗੋ
੧. ਕਨ੍ਦਰਕਸੁਤ੍ਤਵਣ੍ਣਨਾ
੧. ਏਵਂ ਮੇ ਸੁਤਨ੍ਤਿ ਕਨ੍ਦਰਕਸੁਤ੍ਤਂ. ਤਤ੍ਥ ਚਮ੍ਪਾਯਨ੍ਤਿ ਏਵਂਨਾਮਕੇ ਨਗਰੇ. ਤਸ੍ਸ ਹਿ ਨਗਰਸ੍ਸ ਆਰਾਮਪੋਕ੍ਖਰਣੀਆਦੀਸੁ ਤੇਸੁ ਤੇਸੁ ਠਾਨੇਸੁ ਚਮ੍ਪਕਰੁਕ੍ਖਾਵ ਉਸ੍ਸਨ੍ਨਾ ਅਹੇਸੁਂ, ਤਸ੍ਮਾ ਚਮ੍ਪਾਤਿ ਸਙ੍ਖਮਗਮਾਸਿ. ਗਗ੍ਗਰਾਯ ਪੋਕ੍ਖਰਣਿਯਾ ਤੀਰੇਤਿ ਤਸ੍ਸ ਚਮ੍ਪਾਨਗਰਸ੍ਸ ਅਵਿਦੂਰੇ ਗਗ੍ਗਰਾਯ ਨਾਮ ਰਾਜਮਹੇਸਿਯਾ ਖਣਿਤਤ੍ਤਾ ਗਗ੍ਗਰਾਤਿ ਲਦ੍ਧਵੋਹਾਰਾ ਪੋਕ੍ਖਰਣੀ ਅਤ੍ਥਿ. ਤਸ੍ਸਾ ਤੀਰੇ ਸਮਨ੍ਤਤੋ ਨੀਲਾਦਿਪਞ੍ਚਵਣ੍ਣਕੁਸੁਮਪਟਿਮਣ੍ਡਿਤਂ ਮਹਨ੍ਤਂ ਚਮ੍ਪਕਵਨਂ. ਤਸ੍ਮਿਂ ਭਗਵਾ ਕੁਸੁਮਗਨ੍ਧਸੁਗਨ੍ਧੇ ਚਮ੍ਪਕਵਨੇ ਵਿਹਰਤਿ. ਤਂ ਸਨ੍ਧਾਯ ‘‘ਗਗ੍ਗਰਾਯ ਪੋਕ੍ਖਰਣਿਯਾ ਤੀਰੇ’’ਤਿ ਵੁਤ੍ਤਂ. ਮਹਤਾ ਭਿਕ੍ਖੁਸਙ੍ਘੇਨ ਸਦ੍ਧਿਨ੍ਤਿ ਅਦਸ੍ਸਿਤਪਰਿਚ੍ਛੇਦੇਨ ਮਹਨ੍ਤੇਨ ਭਿਕ੍ਖੁਸਙ੍ਘੇਨ ਸਦ੍ਧਿਂ. ਪੇਸ੍ਸੋਤਿ ਤਸ੍ਸ ਨਾਮਂ. ਹਤ੍ਥਾਰੋਹਪੁਤ੍ਤੋਤਿ ਹਤ੍ਥਾਚਰਿਯਸ੍ਸ ਪੁਤ੍ਤੋ. ਕਨ੍ਦਰਕੋ ਚ ਪਰਿਬ੍ਬਾਜਕੋਤਿ ਕਨ੍ਦਰਕੋਤਿ ਏਵਂਨਾਮੋ ਛਨ੍ਨਪਰਿਬ੍ਬਾਜਕੋ. ਅਭਿਵਾਦੇਤ੍ਵਾਤਿ ਛਬ੍ਬਣ੍ਣਾਨਂ ਘਨਬੁਦ੍ਧਰਸ੍ਮੀਨਂ ਅਨ੍ਤਰਂ ਪਵਿਸਿਤ੍ਵਾ ਪਸਨ੍ਨਲਾਖਾਰਸੇ ਨਿਮੁਜ੍ਜਮਾਨੋ ਵਿਯ, ਸਿਙ੍ਗੀਸੁਵਣ੍ਣਵਣ੍ਣਂ ਦੁਸ੍ਸਵਰਂ ਪਸਾਰੇਤ੍ਵਾ ਸਸੀਸਂ ਪਾਰੁਪਮਾਨੋ ਵਿਯ, ਵਣ੍ਣਗਨ੍ਧਸਮ੍ਪਨ੍ਨਚਮ੍ਪਕਪੁਪ੍ਫਾਨਿ ਸਿਰਸਾ ਸਮ੍ਪਟਿਚ੍ਛਨ੍ਤੋ ਵਿਯ, ਸਿਨੇਰੁਪਾਦਂ ਉਪਗਚ੍ਛਨ੍ਤੋ ਪੁਣ੍ਣਚਨ੍ਦੋ ਵਿਯ ਭਗਵਤੋ ਚਕ੍ਕਲਕ੍ਖਣਪਟਿਮਣ੍ਡਿਤੇ ਅਲਤ੍ਤਕਵਣ੍ਣਫੁਲ੍ਲਪਦੁਮਸਸ੍ਸਿਰਿਕੇ ਪਾਦੇ ਵਨ੍ਦਿਤ੍ਵਾਤਿ ਅਤ੍ਥੋ. ਏਕਮਨ੍ਤਂ ਨਿਸੀਦੀਤਿ ਛਨਿਸਜ੍ਜਦੋਸਵਿਰਹਿਤੇ ਏਕਸ੍ਮਿਂ ਓਕਾਸੇ ਨਿਸੀਦਿ.
ਤੁਣ੍ਹੀਭੂ ਤਂ ਤੁਣ੍ਹੀਭੂਤਨ੍ਤਿ ਯਤੋ ਯਤੋ ਅਨੁਵਿਲੋਕੇਤਿ, ਤਤੋ ਤਤੋ ਤੁਣ੍ਹੀਭੂਤਮੇਵਾਤਿ ਅਤ੍ਥੋ. ਤਤ੍ਥ ਹਿ ਏਕਭਿਕ੍ਖੁਸ੍ਸਾਪਿ ਹਤ੍ਥਕੁਕ੍ਕੁਚ੍ਚਂ ਵਾ ਪਾਦਕੁਕ੍ਕੁਚ੍ਚਂ ਵਾ ਨਤ੍ਥਿ, ਸਬ੍ਬੇ ਭਗਵਤੋ ਚੇਵ ਗਾਰਵੇਨ ਅਤ੍ਤਨੋ ਚ ਸਿਕ੍ਖਿਤਸਿਕ੍ਖਤਾਯ ਅਞ੍ਞਮਞ੍ਞਂ ਵਿਗਤਸਲ੍ਲਾਪਾ ਅਨ੍ਤਮਸੋ ਉਕ੍ਕਾਸਿਤਸਦ੍ਦਮ੍ਪਿ ਅਕਰੋਨ੍ਤਾ ਸੁਨਿਖਾਤਇਨ੍ਦਖੀਲਾ ਵਿਯ ਨਿਵਾਤਟ੍ਠਾਨੇ ਸਨ੍ਨਿਸਿਨ੍ਨਂ ਮਹਾਸਮੁਦ੍ਦਉਦਕਂ ਵਿਯ ਕਾਯੇਨਪਿ ਨਿਚ੍ਚਲਾ ਮਨਸਾਪਿ ਅਵਿਕ੍ਖਿਤ੍ਤਾ ਰਤ੍ਤਵਲਾਹਕਾ ਵਿਯ ਸਿਨੇਰੁਕੂਟਂ ਭਗਵਨ੍ਤਂ ਪਰਿਵਾਰੇਤ੍ਵਾ ਨਿਸੀਦਿਂਸੁ. ਪਰਿਬ੍ਬਾਜਕਸ੍ਸ ਏਵਂ ਸਨ੍ਨਿਸਿਨ੍ਨਂ ਪਰਿਸਂ ਦਿਸ੍ਵਾ ਮਹਨ੍ਤਂ ਪੀਤਿਸੋਮਨਸ੍ਸਂ ਉਪ੍ਪਜ੍ਜਿ. ਉਪ੍ਪਨ੍ਨਂ ਪਨ ਅਨ੍ਤੋਹਦਯਸ੍ਮਿਂਯੇਵ ਸਨ੍ਨਿਦਹਿਤੁਂ ਅਸਕ੍ਕੋਨ੍ਤੋ ਪਿਯਸਮੁਦਾਹਾਰਂ ਸਮੁਟ੍ਠਾਪੇਸਿ. ਤਸ੍ਮਾ ਅਚ੍ਛਰਿਯਂ ਭੋਤਿਆਦਿਮਾਹ.
ਤਤ੍ਥ ਅਨ੍ਧਸ੍ਸ ਪਬ੍ਬਤਾਰੋਹਨਂ ਵਿਯ ਨਿਚ੍ਚਂ ਨ ਹੋਤੀਤਿ ਅਚ੍ਛਰਿਯਂ. ਅਯਂ ਤਾਵ ਸਦ੍ਦਨਯੋ. ਅਯਂ ਪਨ ਅਟ੍ਠਕਥਾਨਯੋ, ਅਚ੍ਛਰਾਯੋਗ੍ਗਨ੍ਤਿ ਅਚ੍ਛਰਿਯਂ. ਅਚ੍ਛਰਂ ਪਹਰਿਤੁਂ ਯੁਤ੍ਤਨ੍ਤਿ ਅਤ੍ਥੋ. ਅਭੂਤਪੁਬ੍ਬਂ ਭੂਤਨ੍ਤਿ ਅਬ੍ਭੁਤਂ. ਉਭਯਮ੍ਪੇਤਂ ਵਿਮ੍ਹਯਸ੍ਸੇਵਾਧਿਵਚਨਂ. ਤਂ ਪਨੇਤਂ ਗਰਹਅਚ੍ਛਰਿਯਂ, ਪਸਂਸਾਅਚ੍ਛਰਿਯਨ੍ਤਿ ਦੁਵਿਧਂ ਹੋਤਿ. ਤਤ੍ਥ ਅਚ੍ਛਰਿਯਂ ਮੋਗ੍ਗਲ੍ਲਾਨ ਅਬ੍ਭੁਤਂ ਮੋਗ੍ਗਲ੍ਲਾਨ, ਯਾਵ ਬਾਹਾਗਹਣਾਪਿ ਨਾਮ ਸੋ ਮੋਘਪੁਰਿਸੋ ਆਗਮੇਸ੍ਸਤੀਤਿ (ਚੂਲ਼ਵ. ੩੮੩; ਅ. ਨਿ. ੮.੨੦), ਇਦਂ ਗਰਹਅਚ੍ਛਰਿਯਂ ਨਾਮ. ‘‘ਅਚ੍ਛਰਿਯਂ ਨਨ੍ਦਮਾਤੇ ਅਬ੍ਭੁਤਂ ਨਨ੍ਦਮਾਤੇ, ਯਤ੍ਰ ਹਿ ਨਾਮ ਚਿਤ੍ਤੁਪ੍ਪਾਦਮ੍ਪਿ ਪਰਿਸੋਧੇਸ੍ਸਸੀਤਿ (ਅ. ਨਿ. ੭.੫੩) ਇਦਂ ਪਸਂਸਾਅਚ੍ਛਰਿਯਂ ਨਾਮ. ਇਧਾਪਿ ਇਦਮੇਵ ਅਧਿਪ੍ਪੇਤਂ’’ ਅਯਞ੍ਹਿ ਤਂ ਪਸਂਸਨ੍ਤੋ ਏਵਮਾਹ.
ਯਾਵਞ੍ਚਿਦਨ੍ਤਿ ਏਤ੍ਥ ਇਦਨ੍ਤਿ ਨਿਪਾਤਮਤ੍ਤਂ. ਯਾਵਾਤਿ ਪਮਾਣਪਰਿਚ੍ਛੇਦੋ, ਯਾਵ ਸਮ੍ਮਾ ਪਟਿਪਾਦਿਤੋ, ਯਤ੍ਤਕੇਨ ਪਮਾਣੇਨ ਸਮ੍ਮਾ ਪਟਿਪਾਦਿਤੋ, ਨ ਸਕ੍ਕਾ ਤਸ੍ਸ ਵਣ੍ਣੇ ਵਤ੍ਤੁਂ, ਅਥ ਖੋ ਅਚ੍ਛਰਿਯਮੇਵੇਤਂ ਅਬ੍ਭੁਤਮੇਵੇਤਨ੍ਤਿ ਵੁਤ੍ਤਂ ਹੋਤਿ. ਏਤਪਰਮਂਯੇਵਾਤਿ ਏਵਂ ਸਮ੍ਮਾ ਪਟਿਪਾਦਿਤੋ ਏਸੋ ਭਿਕ੍ਖੁਸਙ੍ਘੋ ਤਸ੍ਸਾਪਿ ਭਿਕ੍ਖੁਸਙ੍ਘਸ੍ਸ ਪਰਮੋਤਿ ਏਤਪਰਮੋ, ਤਂ ਏਤਪਰਮਂ ਯਥਾ ਅਯਂ ਪਟਿਪਾਦਿਤੋ, ਏਵਂ ਪਟਿਪਾਦਿਤਂ ਕਤ੍ਵਾ ਪਟਿਪਾਦੇਸੁਂ, ਨ ਇਤੋ ਭਿਯ੍ਯੋਤਿ ਅਤ੍ਥੋ. ਦੁਤਿਯਨਯੇ ਏਵਂ ਪਟਿਪਾਦੇਸ੍ਸਨ੍ਤਿ, ਨ ਇਤੋ ਭਿਯ੍ਯੋਤਿ ਯੋਜੇਤਬ੍ਬਂ. ਤਤ੍ਥ ਪਟਿਪਾਦਿਤੋਤਿ ਆਭਿਸਮਾਚਾਰਿਕਵਤ੍ਤਂ ਆਦਿਂ ਕਤ੍ਵਾ ਸਮ੍ਮਾ ਅਪਚ੍ਚਨੀਕਪਟਿਪਤ੍ਤਿਯਂ ਯੋਜਿਤੋ. ਅਥ ਕਸ੍ਮਾ ਅਯਂ ਪਰਿਬ੍ਬਾਜਕੋ ਅਤੀਤਾਨਾਗਤੇ ਬੁਦ੍ਧੇ ਦਸ੍ਸੇਤਿ, ਕਿਮਸ੍ਸ ਤਿਯਦ੍ਧਜਾਨਨਞਾਣਂ ਅਤ੍ਥੀਤਿ. ਨਤ੍ਥਿ, ਨਯਗ੍ਗਾਹੇ ਪਨ ਠਤ੍ਵਾ ‘‘ਯੇਨਾਕਾਰੇਨ ਅਯਂ ਭਿਕ੍ਖੁਸਙ੍ਘੋ ਸਨ੍ਨਿਸਿਨ੍ਨੋ ਦਨ੍ਤੋ ਵਿਨੀਤੋ ਉਪਸਨ੍ਤੋ, ਅਤੀਤਬੁਦ੍ਧਾਪਿ ਏਤਪਰਮਂਯੇਵ ਕਤ੍ਵਾ ਪਟਿਪਜ੍ਜਾਪੇਸੁਂ, ਅਨਾਗਤਬੁਦ੍ਧਾਪਿ ਪਟਿਪਜ੍ਜਾਪੇਸ੍ਸਨ੍ਤਿ, ਨਤ੍ਥਿ ਇਤੋ ਉਤ੍ਤਰਿ ਪਟਿਪਾਦਨਾ’’ਤਿ ਮਞ੍ਞਮਾਨੋ ਅਨੁਬੁਦ੍ਧਿਯਾ ਏਵਮਾਹ.
੨. ਏਵਮੇਤਂ ਕਨ੍ਦਰਕਾਤਿ ਪਾਟਿਏਕ੍ਕੋ ਅਨੁਸਨ੍ਧਿ. ਭਗਵਾ ਕਿਰ ਤਂ ਸੁਤ੍ਵਾ ‘‘ਕਨ੍ਦਰਕ ਤ੍ਵਂ ਭਿਕ੍ਖੁਸਙ੍ਘਂ ਉਪਸਨ੍ਤੋਤਿ ਵਦਸਿ, ਇਮਸ੍ਸ ਪਨ ਭਿਕ੍ਖੁਸਙ੍ਘਸ੍ਸ ਉਪਸਨ੍ਤਕਾਰਣਂ ਤੁਯ੍ਹਂ ਅਪਾਕਟਂ, ਨ ਹਿ ਤ੍ਵਂ ਸਮਤਿਂਸ ਪਾਰਮਿਯਾ ਪੂਰੇਤ੍ਵਾ ਕੁਸਲਮੂਲਂ ਪਰਿਪਾਚੇਤ੍ਵਾ ਬੋਧਿਪਲ੍ਲਙ੍ਕੇ ਸਬ੍ਬਞ੍ਞੁਤਞ੍ਞਾਣਂ ਪਟਿਵਿਜ੍ਝਿ, ਮਯਾ ਪਨ ਪਾਰਮਿਯੋ ਪੂਰੇਤ੍ਵਾ ਞਾਤਤ੍ਥਚਰਿਯਂ ਲੋਕਤ੍ਥਚਰਿਯਂ ਬੁਦ੍ਧਤ੍ਥਚਰਿਯਞ੍ਚ ਕੋਟਿਂ ਪਾਪੇਤ੍ਵਾ ਬੋਧਿਪਲ੍ਲਙ੍ਕੇ ਸਬ੍ਬਞ੍ਞੁਤਞ੍ਞਾਣਂ ਪਟਿਵਿਦ੍ਧਂ, ਮਯ੍ਹਂ ਏਤੇਸਂ ਉਪਸਨ੍ਤਕਾਰਣਂ ਪਾਕਟ’’ਨ੍ਤਿ ਦਸ੍ਸੇਤੁਂ ਇਮਂ ਦੇਸਨਂ ਆਰਭਿ.
ਸਨ੍ਤਿ ਹਿ ਕਨ੍ਦਰਕਾਤਿ ਅਯਮ੍ਪਿ ਪਾਟਿਏਕ੍ਕੋ ਅਨੁਸਨ੍ਧਿ. ਭਗਵਤੋ ਕਿਰ ਏਤਦਹੋਸਿ – ‘‘ਅਯਂ ਪਰਿਬ੍ਬਾਜਕੋ ਇਮਂ ਭਿਕ੍ਖੁਸਙ੍ਘਂ ਉਪਸਨ੍ਤੋਤਿ ਵਦਤਿ, ਅਯਞ੍ਚ ਭਿਕ੍ਖੁਸਙ੍ਘੋ ਕਪ੍ਪੇਤ੍ਵਾ ਪਕਪ੍ਪੇਤ੍ਵਾ ਕੁਹਕਭਾਵੇਨ ਇਰਿਯਾਪਥਂ ਸਣ੍ਠਪੇਨ੍ਤੋ ਚਿਤ੍ਤੇਨ ਅਨੁਪਸਨ੍ਤੋ ਨ ਉਪਸਨ੍ਤਾਕਾਰਂ ਦਸ੍ਸੇਤਿ. ਏਤ੍ਥ ਪਨ ਭਿਕ੍ਖੁਸਙ੍ਘੇ ਪਟਿਪਦਂ ਪੂਰਯਮਾਨਾਪਿ ਪਟਿਪਦਂ ਪੂਰੇਤ੍ਵਾ ਮਤ੍ਥਕਂ ਪਤ੍ਵਾ ਠਿਤਭਿਕ੍ਖੂਪਿ ਅਤ੍ਥਿ, ਤਤ੍ਥ ਪਟਿਪਦਂ ਪੂਰੇਤ੍ਵਾ ਮਤ੍ਥਕਂ ਪਤ੍ਤਾ ਅਤ੍ਤਨਾ ਪਟਿਵਿਦ੍ਧਗੁਣੇਹੇਵ ਉਪਸਨ੍ਤਾ, ਪਟਿਪਦਂ ਪੂਰਯਮਾਨਾ ਉਪਰਿਮਗ੍ਗਸ੍ਸ ਵਿਪਸ੍ਸਨਾਯ ਉਪਸਨ੍ਤਾ, ਇਤੋ ਮੁਤ੍ਤਾ ਪਨ ਅਵਸੇਸਾ ਚਤੂਹਿ ਸਤਿਪਟ੍ਠਾਨੇਹਿ ਉਪਸਨ੍ਤਾ. ਤਂ ਨੇਸਂ ਉਪਸਨ੍ਤਕਾਰਣਂ ਦਸ੍ਸੇਸ੍ਸਾਮੀ’’ਤਿ ‘‘ਇਮਿਨਾ ਚ ਇਮਿਨਾ ਚ ਕਾਰਣੇਨ ਅਯਂ ਭਿਕ੍ਖੁਸਙ੍ਘੋ ਉਪਸਨ੍ਤੋ’’ਤਿ ਦਸ੍ਸੇਤੁਂ ‘‘ਸਨ੍ਤਿ ਹਿ ਕਨ੍ਦਰਕਾ’’ਤਿਆਦਿਮਾਹ.
ਤਤ੍ਥ ਅਰਹਨ੍ਤੋ ਖੀਣਾਸਵਾਤਿਆਦੀਸੁ ਯਂ ਵਤ੍ਤਬ੍ਬਂ, ਤਂ ਮੂਲਪਰਿਯਾਯਸੁਤ੍ਤਵਣ੍ਣਨਾਯਮੇਵ ਵੁਤ੍ਤਂ. ਸੇਖਪਟਿਪਦਮ੍ਪਿ ਤਤ੍ਥੇਵ ਵਿਤ੍ਥਾਰਿਤਂ. ਸਨ੍ਤਤਸੀਲਾਤਿ ਸਤਤਸੀਲਾ ਨਿਰਨ੍ਤਰਸੀਲਾ. ਸਨ੍ਤਤਵੁਤ੍ਤਿਨੋਤਿ ਤਸ੍ਸੇਵ ਵੇਵਚਨਂ, ਸਨ੍ਤਤਜੀਵਿਕਾ ਵਾਤਿਪਿ ਅਤ੍ਥੋ. ਤਸ੍ਮਿਂ ਸਨ੍ਤਤਸੀਲੇ ਠਤ੍ਵਾਵ ਜੀਵਿਕਂ ਕਪ੍ਪੇਨ੍ਤਿ, ਨ ਦੁਸ੍ਸੀਲ੍ਯਂ ਮਰਣਂ ਪਾਪੁਣਨ੍ਤੀਤਿ ਅਤ੍ਥੋ.
ਨਿਪਕਾਤਿ ਨੇਪਕ੍ਕੇਨ ਸਮਨ੍ਨਾਗਤਾ ਪਞ੍ਞਵਨ੍ਤੋ. ਨਿਪਕਵੁਤ੍ਤਿਨੋਤਿ ਪਞ੍ਞਾਯ ਵੁਤ੍ਤਿਨੋ, ਪਞ੍ਞਾਯ ਠਤ੍ਵਾ ਜੀਵਿਕਂ ਕਪ੍ਪੇਨ੍ਤਿ. ਯਥਾ ਏਕਚ੍ਚੋ ਸਾਸਨੇ ਪਬ੍ਬਜਿਤ੍ਵਾਪਿ ਜੀਵਿਤਕਾਰਣਾ ਛਸੁ ਅਗੋਚਰੇਸੁ ਚਰਤਿ, ਵੇਸਿਯਾਗੋਚਰੋ ਹੋਤਿ, ਵਿਧਵਥੁਲ੍ਲਕੁਮਾਰਿਕਪਣ੍ਡਕਪਾਨਾਗਾਰਭਿਕ੍ਖੁਨਿਗੋਚਰੋ ਹੋਤਿ. ਸਂਸਟ੍ਠੋ ਵਿਹਰਤਿ ਰਾਜੂਹਿ ਰਾਜਮਹਾਮਤ੍ਤੇਹਿ ਤਿਤ੍ਥਿਯੇਹਿ ਤਿਤ੍ਥਿਯਸਾਵਕੇਹਿ ਅਨਨੁਲੋਮਿਕੇਨ ਗਿਹਿਸਂਸਗ੍ਗੇਨ (ਵਿਭ. ੫੧੪), ਵੇਜ੍ਜਕਮ੍ਮਂ ਕਰੋਤਿ, ਦੂਤਕਮ੍ਮਂ ਕਰੋਤਿ, ਪਹਿਣਕਮ੍ਮਂ ਕਰੋਤਿ, ਗਣ੍ਡਂ ਫਾਲੇਤਿ, ਅਰੁਮਕ੍ਖਨਂ ਦੇਤਿ, ਉਦ੍ਧਂਵਿਰੇਚਨਂ ਦੇਤਿ, ਅਧੋਵਿਰੇਚਨਂ ਦੇਤਿ, ਨਤ੍ਥੁਤੇਲਂ ਪਚਤਿ, ਪਿਵਨਤੇਲਂ ਪਚਤਿ, ਵੇਲ਼ੁਦਾਨਂ, ਪਤ੍ਤਦਾਨਂ, ਪੁਪ੍ਫਦਾਨਂ, ਫਲਦਾਨਂ, ਸਿਨਾਨਦਾਨਂ, ਦਨ੍ਤਕਟ੍ਠਦਾਨਂ, ਮੁਖੋਦਕਦਾਨਂ, ਚੁਣ੍ਣਮਤ੍ਤਿਕਦਾਨਂ ਦੇਤਿ, ਚਾਟੁਕਮ੍ਯਂ ਕਰੋਤਿ, ਮੁਗ੍ਗਸੂਪਿਯਂ, ਪਾਰਿਭਟੁਂ, ਜਙ੍ਘਪੇਸਨਿਯਂ ਕਰੋਤੀਤਿ ਏਕਵੀਸਤਿਵਿਧਾਯ ਅਨੇਸਨਾਯ ਜੀਵਿਕਂ ਕਪ੍ਪੇਨ੍ਤੋ ਅਨਿਪਕਵੁਤ੍ਤਿ ਨਾਮ ਹੋਤਿ, ਨ ਪਞ੍ਞਾਯ ਠਤ੍ਵਾ ਜੀਵਿਕਂ ਕਪ੍ਪੇਤਿ, ਤਤੋ ਕਾਲਕਿਰਿਯਂ ਕਤ੍ਵਾ ਸਮਣਯਕ੍ਖੋ ਨਾਮ ਹੁਤ੍ਵਾ ‘‘ਤਸ੍ਸ ਸਙ੍ਘਾਟਿਪਿ ਆਦਿਤ੍ਤਾ ਹੋਤਿ ਸਮ੍ਪਜ੍ਜਲਿਤਾ’’ਤਿ ਵੁਤ੍ਤਨਯੇਨ ਮਹਾਦੁਕ੍ਖਂ ਅਨੁਭੋਤਿ. ਏਵਂਵਿਧਾ ਅਹੁਤ੍ਵਾ ਜੀਵਿਤਹੇਤੁਪਿ ਸਿਕ੍ਖਾਪਦਂ ਅਨਤਿਕ੍ਕਮਨ੍ਤੋ ਚਤੁਪਾਰਿਸੁਦ੍ਧਿਸੀਲੇ ਪਤਿਟ੍ਠਾਯ ਯਥਾਬਲਂ ਬੁਦ੍ਧਵਚਨਂ ਉਗ੍ਗਣ੍ਹਿਤ੍ਵਾ ਰਥਵਿਨੀਤਪਟਿਪਦਂ, ਮਹਾਗੋਸਿਙ੍ਗਪਟਿਪਦਂ, ਮਹਾਸੁਞ੍ਞਤਪਟਿਪਦਂ, ਅਨਙ੍ਗਣਪਟਿਪਦਂ, ਧਮ੍ਮਦਾਯਾਦਪਟਿਪਦਂ, ਨਾਲਕਪਟਿਪਦਂ, ਤੁਵਟ੍ਟਕਪਟਿਪਦਂ, ਚਨ੍ਦੋਪਮਪਟਿਪਦਨ੍ਤਿ ਇਮਾਨਿ ਅਰਿਯਪਟਿਪਦਾਨਿ ਪੂਰੇਨ੍ਤੋ ਚਤੁਪਚ੍ਚਯ-ਸਨ੍ਤੋਸ-ਭਾਵਨਾਰਾਮ-ਅਰਿਯਵਂਸਪਟਿਪਤ੍ਤਿਯਂ ਕਾਯਸਕ੍ਖਿਨੋ ਹੁਤ੍ਵਾ ਅਨੀਕਾ ਨਿਕ੍ਖਨ੍ਤਹਤ੍ਥੀ ਵਿਯ ਯੂਥਾ ਵਿਸ੍ਸਟ੍ਠਸੀਹੋ ਵਿਯ ਨਿਪਚ੍ਛਾਬਨ੍ਧਮਹਾਨਾਵਾ ਵਿਯ ਚ ਗਮਨਾਦੀਸੁ ਏਕਵਿਹਾਰਿਨੋ ਵਿਪਸ੍ਸਨਂ ਪਟ੍ਠਪੇਤ੍ਵਾ ਅਜ੍ਜਅਜ੍ਜੇਵ ਅਰਹਤ੍ਤਨ੍ਤਿ ਪਵਤ੍ਤਉਸ੍ਸਾਹਾ ਵਿਹਰਨ੍ਤੀਤਿ ਅਤ੍ਥੋ.
ਸੁਪ੍ਪਤਿਟ੍ਠਿਤਚਿਤ੍ਤਾਤਿ ਚਤੂਸੁ ਸਤਿਪਟ੍ਠਾਨੇਸੁ ਸੁਟ੍ਠਪਿਤਚਿਤ੍ਤਾ ਹੁਤ੍ਵਾ. ਸੇਸਾ ਸਤਿਪਟ੍ਠਾਨਕਥਾ ਹੇਟ੍ਠਾ ਵਿਤ੍ਥਾਰਿਤਾਵ. ਇਧ ਪਨ ਲੋਕਿਯਲੋਕੁਤ੍ਤਰਮਿਸ੍ਸਕਾ ਸਤਿਪਟ੍ਠਾਨਾ ਕਥਿਤਾ, ਏਤ੍ਤਕੇਨ ਭਿਕ੍ਖੁਸਙ੍ਘਸ੍ਸ ਉਪਸਨ੍ਤਕਾਰਣਂ ਕਥਿਤਂ ਹੋਤਿ.
੩. ਯਾਵ ਸੁਪਞ੍ਞਤ੍ਤਾਤਿ ਯਾਵ ਸੁਟ੍ਠਪਿਤਾ ਸੁਦੇਸਿਤਾ. ਮਯਮ੍ਪਿ ਹਿ, ਭਨ੍ਤੇਤਿ ਇਮਿਨਾ ਏਸ ਅਤ੍ਤਨੋ ਕਾਰਕਭਾਵਂ ਦਸ੍ਸੇਤਿ, ਭਿਕ੍ਖੁਸਙ੍ਘਞ੍ਚ ਉਕ੍ਖਿਪਤਿ. ਅਯਞ੍ਹੇਤ੍ਥ ਅਧਿਪ੍ਪਾਯੋ, ਮਯਮ੍ਪਿ ਹਿ, ਭਨ੍ਤੇ, ਗਿਹਿ…ਪੇ… ਸੁਪ੍ਪਤਿਟ੍ਠਿਤਚਿਤ੍ਤਾ ਵਿਹਰਾਮ, ਭਿਕ੍ਖੁਸਙ੍ਘਸ੍ਸ ਪਨ ਅਯਮੇਵ ਕਸਿ ਚ ਬੀਜਞ੍ਚ ਯੁਗਨਙ੍ਗਲਞ੍ਚ ਫਾਲਪਾਚਨਞ੍ਚ, ਤਸ੍ਮਾ ਭਿਕ੍ਖੁਸਙ੍ਘੋ ਸਬ੍ਬਕਾਲਂ ਸਤਿਪਟ੍ਠਾਨਪਰਾਯਣੋ, ਮਯਂ ਪਨ ਕਾਲੇਨ ਕਾਲਂ ਓਕਾਸਂ ਲਭਿਤ੍ਵਾ ਏਤਂ ਮਨਸਿਕਾਰਂ ਕਰੋਮ, ਮਯਮ੍ਪਿ ਕਾਰਕਾ, ਨ ਸਬ੍ਬਸੋ ਵਿਸ੍ਸਟ੍ਠਕਮ੍ਮਟ੍ਠਾਨਾਯੇਵਾਤਿ. ਮਨੁਸ੍ਸਗਹਨੇਤਿ ਮਨੁਸ੍ਸਾਨਂ ਅਜ੍ਝਾਸਯਗਹਨੇਨ ਗਹਨਤਾ, ਅਜ੍ਝਾਸਯਸ੍ਸਾਪਿ ਨੇਸਂ ਕਿਲੇਸਗਹਨੇਨ ਗਹਨਤਾ ਵੇਦਿਤਬ੍ਬਾ. ਕਸਟਸਾਠੇਯ੍ਯੇਸੁਪਿ ਏਸੇਵ ਨਯੋ. ਤਤ੍ਥ ਅਪਰਿਸੁਦ੍ਧਟ੍ਠੇਨ ਕਸਟਤਾ, ਕੇਰਾਟਿਯਟ੍ਠੇਨ ਸਾਠੇਯ੍ਯਤਾ ਵੇਦਿਤਬ੍ਬਾ. ਸਤ੍ਤਾਨਂ ਹਿਤਾਹਿਤਂ ਜਾਨਾਤੀਤਿ ਏਵਂ ਗਹਨਕਸਟਕੇਰਾਟਿਯਾਨਂ ਮਨੁਸ੍ਸਾਨਂ ਹਿਤਾਹਿਤਪਟਿਪਦਂ ਯਾਵ ਸੁਟ੍ਠੁ ਭਗਵਾ ਜਾਨਾਤਿ. ਯਦਿਦਂ ਪਸਵੋਤਿ ਏਤ੍ਥ ਸਬ੍ਬਾਪਿ ਚਤੁਪ੍ਪਦਜਾਤਿ ਪਸਵੋਤਿ ਅਧਿਪ੍ਪੇਤਾ. ਪਹੋਮੀਤਿ ਸਕ੍ਕੋਮਿ. ਯਾਵਤਕੇਨ ਅਨ੍ਤਰੇਨਾਤਿ ਯਤ੍ਤਕੇਨ ਖਣੇਨ. ਚਮ੍ਪਂ ਗਤਾਗਤਂ ਕਰਿਸ੍ਸਤੀਤਿ ਅਸ੍ਸਮਣ੍ਡਲਤੋ ਯਾਵ ਚਮ੍ਪਾਨਗਰਦ੍ਵਾਰਾ ਗਮਨਞ੍ਚ ਆਗਮਨਞ੍ਚ ਕਰਿਸ੍ਸਤਿ. ਸਾਠੇਯ੍ਯਾਨੀਤਿ ਸਠਤ੍ਤਾਨਿ. ਕੂਟੇਯ੍ਯਾਨੀਤਿ ਕੂਟਤ੍ਤਾਨਿ. ਵਙ੍ਕੇਯ੍ਯਾਨੀਤਿ ਵਙ੍ਕਤ੍ਤਾਨਿ. ਜਿਮ੍ਹੇਯ੍ਯਾਨੀਤਿ ਜਿਮ੍ਹਤ੍ਤਾਨਿ. ਪਾਤੁਕਰਿਸ੍ਸਤੀਤਿ ਪਕਾਸੇਸ੍ਸਤਿ ਦਸ੍ਸੇਸ੍ਸਤਿ. ਨ ਹਿ ਸਕ੍ਕਾ ਤੇਨ ਤਾਨਿ ਏਤ੍ਤਕੇਨ ਅਨ੍ਤਰੇਨ ਦਸ੍ਸੇਤੁਂ.
ਤਤ੍ਥ ਯਸ੍ਸ ਕਿਸ੍ਮਿਞ੍ਚਿਦੇਵ ਠਾਨੇ ਠਾਤੁਕਾਮਸ੍ਸ ਸਤੋ ਯਂ ਠਾਨਂ ਮਨੁਸ੍ਸਾਨਂ ਸਪ੍ਪਟਿਭਯਂ, ਪੁਰਤੋ ਗਨ੍ਤ੍ਵਾ ਵਞ੍ਚੇਤ੍ਵਾ ਠਸ੍ਸਾਮੀਤਿ ਨ ਹੋਤਿ, ਤਸ੍ਮਿਂ ਠਾਤੁਕਾਮਟ੍ਠਾਨੇਯੇਵ ਨਿਖਾਤਤ੍ਥਮ੍ਭੋ ਵਿਯ ਚਤ੍ਤਾਰੋ ਪਾਦੇ ਨਿਚ੍ਚਲੇ ਕਤ੍ਵਾ ਤਿਟ੍ਠਤਿ, ਅਯਂ ਸਠੋ ਨਾਮ. ਯਸ੍ਸ ਪਨ ਕਿਸ੍ਮਿਞ੍ਚਿਦੇਵ ਠਾਨੇ ਅਵਚ੍ਛਿਨ੍ਦਿਤ੍ਵਾ ਖਨ੍ਧਗਤਂ ਪਾਤੇਤੁਕਾਮਸ੍ਸ ਸਤੋ ਯਂ ਠਾਨਂ ਮਨੁਸ੍ਸਾਨਂ ਸਪ੍ਪਟਿਭਯਂ, ਪੁਰਤੋ ਗਨ੍ਤ੍ਵਾ ਵਞ੍ਚੇਤ੍ਵਾ ਪਾਤੇਸ੍ਸਾਮੀਤਿ ਨ ਹੋਤਿ, ਤਤ੍ਥੇਵ ਅਵਚ੍ਛਿਨ੍ਦਿਤ੍ਵਾ ਪਾਤੇਤਿ, ਅਯਂ ਕੂਟੋ ਨਾਮ. ਯਸ੍ਸ ਕਿਸ੍ਮਿਞ੍ਚਿਦੇਵ ਠਾਨੇ ਮਗ੍ਗਾ ਉਕ੍ਕਮ੍ਮ ਨਿਵਤ੍ਤਿਤ੍ਵਾ ਪਟਿਮਗ੍ਗਂ ਆਰੋਹਿਤੁਕਾਮਸ੍ਸ ਸਤੋ ਯਂ ਠਾਨਂ ਮਨੁਸ੍ਸਾਨਂ ਸਪ੍ਪਟਿਭਯਂ, ਪੁਰਤੋ ਗਨ੍ਤ੍ਵਾ ਵਞ੍ਚੇਤ੍ਵਾ ਏਵਂ ਕਰਿਸ੍ਸਾਮੀਤਿ ਨ ਹੋਤਿ, ਤਤ੍ਥੇਵ ਮਗ੍ਗਾ ਉਕ੍ਕਮ੍ਮ ਨਿਵਤ੍ਤਿਤ੍ਵਾ ਪਟਿਮਗ੍ਗਂ ਆਰੋਹਤਿ, ਅਯਂ ਵਙ੍ਕੋ ਨਾਮ. ਯਸ੍ਸ ਪਨ ਕਾਲੇਨ ਵਾਮਤੋ ਕਾਲੇਨ ਦਕ੍ਖਿਣਤੋ ਕਾਲੇਨ ਉਜੁਮਗ੍ਗੇਨੇਵ ਗਨ੍ਤੁਕਾਮਸ੍ਸ ਸਤੋ ਯਂ ਠਾਨਂ ਮਨੁਸ੍ਸਾਨਂ ਸਪ੍ਪਟਿਭਯਂ, ਪੁਰਤੋ ਗਨ੍ਤ੍ਵਾ ਵਞ੍ਚੇਤ੍ਵਾ ਏਵਂ ਕਰਿਸ੍ਸਾਮੀਤਿ ਨ ਹੋਤਿ, ਤਤ੍ਥੇਵ ਕਾਲੇਨ ਵਾਮਤੋ ਕਾਲੇਨ ਦਕ੍ਖਿਣਤੋ ਕਾਲੇਨ ਉਜੁਮਗ੍ਗਂ ਗਚ੍ਛਤਿ, ਤਥਾ ਲਣ੍ਡਂ ਵਾ ਪਸ੍ਸਾਵਂ ਵਾ ਵਿਸ੍ਸਜ੍ਜੇਤੁਕਾਮਸ੍ਸ ਸਤੋ ਇਦਂ ਠਾਨਂ ਸੁਸਮ੍ਮਟ੍ਠਂ ਆਕਿਣ੍ਣਮਨੁਸ੍ਸਂ ਰਮਣੀਯਂ, ਇਮਸ੍ਮਿਂ ਠਾਨੇ ਏਵਰੂਪਂ ਕਾਤੁਂ ਨ ਯੁਤ੍ਤਂ, ਪੁਰਤੋ ਗਨ੍ਤ੍ਵਾ ਪਟਿਚ੍ਛਨ੍ਨਠਾਨੇ ਕਰਿਸ੍ਸਾਮੀਤਿ ਨ ਹੋਤਿ, ਤਤ੍ਥੇਵ ਕਰੋਤਿ, ਅਯਂ ਜਿਮ੍ਹੋ ਨਾਮ. ਇਤਿ ਇਮਂ ਚਤੁਬ੍ਬਿਧਮ੍ਪਿ ਕਿਰਿਯਂ ਸਨ੍ਧਾਯੇਤਂ ਵੁਤ੍ਤਂ. ਸਬ੍ਬਾਨਿ ਤਾਨਿ ਸਾਠੇਯ੍ਯਾਨਿ ਕੂਟੇਯ੍ਯਾਨਿ ਵਙ੍ਕੇਯ੍ਯਾਨਿ ਜਿਮ੍ਹੇਯ੍ਯਾਨਿ ਪਾਤੁਕਰਿਸ੍ਸਤੀਤਿ ਏਵਂ ਕਰੋਨ੍ਤਾਪਿ ਤੇ ਸਠਾਦਯੋ ਤਾਨਿ ਸਾਠੇਯ੍ਯਾਦੀਨਿ ਪਾਤੁਕਰੋਨ੍ਤਿ ਨਾਮ.
ਏਵਂ ਪਸੂਨਂ ਉਤ੍ਤਾਨਭਾਵਂ ਦਸ੍ਸੇਤ੍ਵਾ ਇਦਾਨਿ ਮਨੁਸ੍ਸਾਨਂ ਗਹਨਭਾਵਂ ਦਸ੍ਸੇਨ੍ਤੋ ਅਮ੍ਹਾਕਂ ਪਨ, ਭਨ੍ਤੇਤਿਆਦਿਮਾਹ. ਤਤ੍ਥ ਦਾਸਾਤਿ ਅਨ੍ਤੋਜਾਤਕਾ ਵਾ ਧਨਕ੍ਕੀਤਾ ਵਾ ਕਰਮਰਾਨੀਤਾ ਵਾ ਸਯਂ ਵਾ ਦਾਸਬ੍ਯਂ ਉਪਗਤਾ. ਪੇਸ੍ਸਾਤਿ ਪੇਸਨਕਾਰਕਾ. ਕਮ੍ਮਕਰਾਤਿ ਭਤ੍ਤਵੇਤਨਭਤਾ. ਅਞ੍ਞਥਾਵ ਕਾਯੇਨਾਤਿ ਅਞ੍ਞੇਨੇਵਾਕਾਰੇਨ ਕਾਯੇਨ ਸਮੁਦਾਚਰਨ੍ਤਿ, ਅਞ੍ਞੇਨੇਵਾਕਾਰੇਨ ਵਾਚਾਯ, ਅਞ੍ਞੇਨ ਚ ਨੇਸਂ ਆਕਾਰੇਨ ਚਿਤ੍ਤਂ ਠਿਤਂ ਹੋਤੀਤਿ ਦਸ੍ਸੇਤਿ. ਤਤ੍ਥ ਯੇ ਸਮ੍ਮੁਖਾ ਸਾਮਿਕੇ ਦਿਸ੍ਵਾ ਪਚ੍ਚੁਗ੍ਗਮਨਂ ਕਰੋਨ੍ਤਿ, ਹਤ੍ਥਤੋ ਭਣ੍ਡਕਂ ਗਣ੍ਹਨ੍ਤਿ, ਇਮਂ ਵਿਸ੍ਸਜ੍ਜੇਤ੍ਵਾ ਇਮਂ ਗਣ੍ਹਨ੍ਤਾ ਸੇਸਾਨਿਪਿ ਆਸਨ-ਪਞ੍ਞਾਪਨ-ਤਾਲਵਣ੍ਟਬੀਜਨ-ਪਾਦਧੋਵਨਾਦੀਨਿ ਸਬ੍ਬਾਨਿ ਕਿਚ੍ਚਾਨਿ ਕਰੋਨ੍ਤਿ, ਪਰਮ੍ਮੁਖਕਾਲੇ ਪਨ ਤੇਲਮ੍ਪਿ ਉਤ੍ਤਰਨ੍ਤਂ ਨ ਓਲੋਕੇਨ੍ਤਿ, ਸਤਗ੍ਘਨਕੇਪਿ ਸਹਸ੍ਸਗ੍ਘਨਕੇਪਿ ਕਮ੍ਮੇ ਪਰਿਹਾਯਨ੍ਤੇ ਨਿਵਤ੍ਤਿਤ੍ਵਾ ਓਲੋਕੇਤੁਮ੍ਪਿ ਨ ਇਚ੍ਛਨ੍ਤਿ, ਇਮੇ ਅਞ੍ਞਥਾ ਕਾਯੇਨ ਸਮੁਦਾਚਰਨ੍ਤਿ ਨਾਮ. ਯੇ ਪਨ ਸਮ੍ਮੁਖਾ ‘‘ਅਮ੍ਹਾਕਂ ਸਾਮਿ ਅਮ੍ਹਾਕਂ ਅਯ੍ਯੋ’’ਤਿਆਦੀਨਿ ਵਤ੍ਵਾ ਪਸਂਸਨ੍ਤਿ, ਪਰਮ੍ਮੁਖਾ ਅਵਤ੍ਤਬ੍ਬਂ ਨਾਮ ਨਤ੍ਥਿ, ਯਂ ਇਚ੍ਛਨ੍ਤਿ, ਤਂ ਵਦਨ੍ਤਿ, ਇਮੇ ਅਞ੍ਞਥਾ ਵਾਚਾਯ ਸਮੁਦਾਚਰਨ੍ਤਿ ਨਾਮ.
੪. ਚਤ੍ਤਾਰੋਮੇ ਪੇਸ੍ਸਪੁਗ੍ਗਲਾਤਿ ਅਯਮ੍ਪਿ ਪਾਟਿਏਕ੍ਕੋ ਅਨੁਸਨ੍ਧਿ. ਅਯਞ੍ਹਿ ਪੇਸ੍ਸੋ ‘‘ਯਾਵਞ੍ਚਿਦਂ, ਭਨ੍ਤੇ, ਭਗਵਾ ਏਵਂ ਮਨੁਸ੍ਸਗਹਣੇ ਏਵਂ ਮਨੁਸ੍ਸਕਸਟੇ ਏਵਂ ਮਨੁਸ੍ਸਸਾਠੇਯ੍ਯੇ ਵਤ੍ਤਮਾਨੇ ਸਤ੍ਤਾਨਂ ਹਿਤਾਹਿਤਂ ਜਾਨਾਤੀ’’ਤਿ ਆਹ. ਪੁਰਿਮੇ ਚ ਤਯੋ ਪੁਗ੍ਗਲਾ ਅਹਿਤਪਟਿਪਦਂ ਪਟਿਪਨ੍ਨਾ, ਉਪਰਿ ਚਤੁਤ੍ਥੋ ਹਿਤਪਟਿਪਦਂ, ਏਵਮਹਂ ਸਤ੍ਤਾਨਂ ਹਿਤਾਹਿਤਂ ਜਾਨਾਮੀਤਿ ਦਸ੍ਸੇਤੁਂ ਇਮਂ ਦੇਸਨਂ ਆਰਭਿ. ਹੇਟ੍ਠਾ ਕਨ੍ਦਰਕਸ੍ਸ ਕਥਾਯ ਸਦ੍ਧਿਂ ਯੋਜੇਤੁਮ੍ਪਿ ਵਟ੍ਟਤਿ. ਤੇਨ ਵੁਤ੍ਤਂ ‘‘ਯਾਵਞ੍ਚਿਦਂ ਭੋਤਾ ਗੋਤਮੇਨ ਸਮ੍ਮਾ ਭਿਕ੍ਖੁਸਙ੍ਘੋ ਪਟਿਪਾਦਿਤੋ’’ਤਿ. ਅਥਸ੍ਸ ਭਗਵਾ ‘‘ਪੁਰਿਮੇ ਤਯੋ ਪੁਗ੍ਗਲੇ ਪਹਾਯ ਉਪਰਿ ਚਤੁਤ੍ਥਪੁਗ੍ਗਲਸ੍ਸ ਹਿਤਪਟਿਪਤ੍ਤਿਯਂਯੇਵ ਪਟਿਪਾਦੇਮੀ’’ਤਿ ਦਸ੍ਸੇਨ੍ਤੋਪਿ ਇਮਂ ਦੇਸਨਂ ਆਰਭਿ. ਸਨ੍ਤੋਤਿ ਇਦਂ ਸਂਵਿਜ੍ਜਮਾਨਾਤਿ ਪਦਸ੍ਸੇਵ ਵੇਵਚਨਂ. ‘‘ਸਨ੍ਤਾ ਹੋਨ੍ਤਿ ਸਮਿਤਾ ਵੂਪਸਨ੍ਤਾ’’ਤਿ (ਵਿਭ. ੫੪੨) ਏਤ੍ਥ ਹਿ ਨਿਰੁਦ੍ਧਾ ਸਨ੍ਤਾਤਿ ਵੁਤ੍ਤਾ. ‘‘ਸਨ੍ਤਾ ਏਤੇ ਵਿਹਾਰਾ ਅਰਿਯਸ੍ਸ ਵਿਨਯੇ ਵੁਚ੍ਚਨ੍ਤੀ’’ਤਿ ਏਤ੍ਥ (ਮ. ਨਿ. ੧.੮੨) ਨਿਬ੍ਬੁਤਾ. ‘‘ਸਨ੍ਤੋ ਹਵੇ ਸਬ੍ਭਿ ਪਵੇਦਯਨ੍ਤੀ’’ਤਿ ਏਤ੍ਥ (ਜਾ. ੨.੨੧.੪੧੩) ਪਣ੍ਡਿਤਾ. ਇਧ ਪਨ ਵਿਜ੍ਜਮਾਨਾ ਉਪਲਬ੍ਭਮਾਨਾਤਿ ਅਤ੍ਥੋ.
ਅਤ੍ਤਨ੍ਤਪਾਦੀਸੁ ਅਤ੍ਤਾਨਂ ਤਪਤਿ ਦੁਕ੍ਖਾਪੇਤੀਤਿ ਅਤ੍ਤਨ੍ਤਪੋ. ਅਤ੍ਤਨੋ ਪਰਿਤਾਪਨਾਨੁਯੋਗਂ ਅਤ੍ਤਪਰਿਤਾਪਨਾਨੁਯੋਗਂ. ਪਰਂ ਤਪਤਿ ਦੁਕ੍ਖਾਪੇਤੀਤਿ ਪਰਨ੍ਤਪੋ. ਪਰੇਸਂ ਪਰਿਤਾਪਨਾਨੁਯੋਗਂ ਪਰਪਰਿਤਾਪਨਾਨੁਯੋਗਂ. ਦਿਟ੍ਠੇਵ ਧਮ੍ਮੇਤਿ ਇਮਸ੍ਮਿਂਯੇਵ ਅਤ੍ਤਭਾਵੇ. ਨਿਚ੍ਛਾਤੋਤਿ ਛਾਤਂ ਵੁਚ੍ਚਤਿ ਤਣ੍ਹਾ, ਸਾ ਅਸ੍ਸ ਨਤ੍ਥੀਤਿ ਨਿਚ੍ਛਾਤੋ. ਸਬ੍ਬਕਿਲੇਸਾਨਂ ਨਿਬ੍ਬੁਤਤ੍ਤਾ ਨਿਬ੍ਬੁਤੋ. ਅਨ੍ਤੋ ਤਾਪਨਕਿਲੇਸਾਨਂ ਅਭਾਵਾ ਸੀਤਲੋ ਜਾਤੋਤਿ ਸੀਤਿਭੂਤੋ. ਝਾਨਮਗ੍ਗਫਲਨਿਬ੍ਬਾਨਸੁਖਾਨਿ ਪਟਿਸਂਵੇਦੇਤੀਤਿ ਸੁਖਪਟਿਸਂਵੇਦੀ. ਬ੍ਰਹ੍ਮਭੂਤੇਨ ਅਤ੍ਤਨਾਤਿ ਸੇਟ੍ਠਭੂਤੇਨ ਅਤ੍ਤਨਾ. ਚਿਤ੍ਤਂ ਆਰਾਧੇਤੀਤਿ ਚਿਤ੍ਤਂ ਸਮ੍ਪਾਦੇਤਿ, ਪਰਿਪੂਰੇਤਿ ਗਣ੍ਹਾਤਿ ਪਸਾਦੇਤੀਤਿ ਅਤ੍ਥੋ.
੫. ਦੁਕ੍ਖਪਟਿਕ੍ਕੂਲਨ੍ਤਿ ਦੁਕ੍ਖਸ੍ਸ ਪਟਿਕੂਲਂ, ਪਚ੍ਚਨੀਕਸਣ੍ਠਿਤਂ ਦੁਕ੍ਖਂ ਅਪਤ੍ਥਯਮਾਨਨ੍ਤਿ ਅਤ੍ਥੋ.
੬. ਪਣ੍ਡਿਤੋਤਿ ਇਧ ਚਤੂਹਿ ਕਾਰਣੇਹਿ ਪਣ੍ਡਿਤੋਤਿ ਨ ਵਤ੍ਤਬ੍ਬੋ, ਸਤਿਪਟ੍ਠਾਨੇਸੁ ਪਨ ਕਮ੍ਮਂ ਕਰੋਤੀਤਿ ਪਣ੍ਡਿਤੋਤਿ ਵਤ੍ਤੁਂ ਵਟ੍ਟਤਿ. ਮਹਾਪਞ੍ਞੋਤਿ ਇਦਮ੍ਪਿ ਮਹਨ੍ਤੇ ਅਤ੍ਥੇ ਪਰਿਗ੍ਗਣ੍ਹਾਤੀਤਿਆਦਿਨਾ ਮਹਾਪਞ੍ਞਲਕ੍ਖਣੇਨ ਨ ਵਤ੍ਤਬ੍ਬਂ, ਸਤਿਪਟ੍ਠਾਨਪਰਿਗ੍ਗਾਹਿਕਾਯ ਪਨ ਪਞ੍ਞਾਯ ਸਮਨ੍ਨਾਗਤਤ੍ਤਾ ਮਹਾਪਞ੍ਞੋਤਿ ਵਤ੍ਤੁਂ ਵਟ੍ਟਤਿ. ਮਹਤਾ ਅਤ੍ਥੇਨ ਸਂਯੁਤ੍ਤੋ ਅਗਮਿਸ੍ਸਾਤਿ ਮਹਤਾ ਅਤ੍ਥੇਨ ਸਂਯੁਤ੍ਤੋ ਹੁਤ੍ਵਾ ਗਤੋ ਭਵੇਯ੍ਯ, ਸੋਤਾਪਤ੍ਤਿਫਲਂ ਪਾਪੁਣੇਯ੍ਯਾਤਿ ਅਤ੍ਥੋ. ਕਿਂ ਪਨ ਯੇਸਂ ਮਗ੍ਗਫਲਾਨਂ ਉਪਨਿਸ੍ਸਯੋ ਅਤ੍ਥਿ, ਬੁਦ੍ਧਾਨਂ ਸਮ੍ਮੁਖੀਭਾਵੇ ਠਿਤੇਪਿ ਤੇਸਂ ਅਨ੍ਤਰਾਯੋ ਹੋਤੀਤਿ. ਆਮ ਹੋਤਿ, ਨ ਪਨ ਬੁਦ੍ਧੇ ਪਟਿਚ੍ਚ, ਅਥ ਖੋ ਕਿਰਿਯਪਰਿਹਾਨਿਯਾ ਵਾ ਪਾਪਮਿਤ੍ਤਤਾਯ ਵਾ ਹੋਤਿ. ਤਤ੍ਥ ਕਿਰਿਯਪਰਿਹਾਨਿਯਾ ਹੋਤਿ ਨਾਮ – ਸਚੇ ਹਿ ਧਮ੍ਮਸੇਨਾਪਤਿ ਧਨਞ੍ਜਾਨਿਸ੍ਸ ਬ੍ਰਾਹ੍ਮਣਸ੍ਸ ਆਸਯਂ ਞਤ੍ਵਾ ਧਮ੍ਮਂ ਅਦੇਸਯਿਸ੍ਸਾ, ਸੋ ਬ੍ਰਾਹ੍ਮਣੋ ਸੋਤਾਪਨ੍ਨੋ ਅਭਵਿਸ੍ਸਾ, ਏਵਂ ਤਾਵ ਕਿਰਿਯਪਰਿਹਾਨਿਯਾ ਹੋਤਿ. ਪਾਪਮਿਤ੍ਤਤਾਯ ਹੋਤਿ ਨਾਮ – ਸਚੇ ਹਿ ਅਜਾਤਸਤ੍ਤੁ ਦੇਵਦਤ੍ਤਸ੍ਸ ਵਚਨਂ ਗਹੇਤ੍ਵਾ ਪਿਤੁਘਾਤਕਮ੍ਮਂ ਨਾਕਰਿਸ੍ਸਾ, ਸਾਮਞ੍ਞਫਲਸੁਤ੍ਤਕਥਿਤਦਿਵਸੇਵ ਸੋਤਾਪਨ੍ਨੋ ਅਭਵਿਸ੍ਸਾ, ਤਸ੍ਸ ਵਚਨਂ ਗਹੇਤ੍ਵਾ ਪਿਤੁਘਾਤਕਮ੍ਮਸ੍ਸ ਕਤਤ੍ਤਾ ਪਨ ਨ ਹੋਤਿ, ਏਵਂ ਪਾਪਮਿਤ੍ਤਤਾਯ ਹੋਤਿ. ਇਮਸ੍ਸਾਪਿ ਉਪਾਸਕਸ੍ਸ ਕਿਰਿਯਪਰਿਹਾਨਿ ਜਾਤਾ, ਅਪਰਿਨਿਟ੍ਠਿਤਾਯ ਦੇਸਨਾਯ ਉਟ੍ਠਹਿਤ੍ਵਾ ਪਕ੍ਕਨ੍ਤੋ. ਅਪਿਚ, ਭਿਕ੍ਖਵੇ, ਏਤ੍ਤਾਵਤਾਪਿ ਪੇਸ੍ਸੋਹਤ੍ਥਾਰੋਹਪੁਤ੍ਤੋ ਮਹਤਾ ਅਤ੍ਥੇਨ ਸਂਯੁਤ੍ਤੋਤਿ ਕਤਰੇਨ ਮਹਨ੍ਤੇਨ ਅਤ੍ਥੇਨ? ਦ੍ਵੀਹਿ ਆਨਿਸਂਸੇਹਿ. ਸੋ ਕਿਰ ਉਪਾਸਕੋ ਸਙ੍ਘੇ ਚ ਪਸਾਦਂ ਪਟਿਲਭਿ, ਸਤਿਪਟ੍ਠਾਨਪਰਿਗ੍ਗਹਣਤ੍ਥਾਯ ਚਸ੍ਸ ਅਭਿਨਵੋ ਨਯੋ ਉਦਪਾਦਿ. ਤੇਨ ਵੁਤ੍ਤਂ ‘‘ਮਹਤਾ ਅਤ੍ਥੇਨ ਸਂਯੁਤ੍ਤੋ’’ਤਿ. ਕਨ੍ਦਰਕੋ ਪਨ ਸਙ੍ਘੇ ਪਸਾਦਮੇਵ ਪਟਿਲਭਿ. ਏਤਸ੍ਸ ਭਗਵਾ ਕਾਲੋਤਿ ਏਤਸ੍ਸ ਧਮ੍ਮਕ੍ਖਾਨਸ੍ਸ, ਚਤੁਨ੍ਨਂ ਵਾ ਪੁਗ੍ਗਲਾਨਂ ਵਿਭਜਨਸ੍ਸ ਕਾਲੋ.
੮. ਓਰਬ੍ਭਿਕਾਦੀਸੁ ਉਰਬ੍ਭਾ ਵੁਚ੍ਚਨ੍ਤਿ ਏਲ਼ਕਾ, ਉਰਬ੍ਭੇ ਹਨਤੀਤਿ ਓਰਬ੍ਭਿਕੋ. ਸੂਕਰਿਕਾਦੀਸੁਪਿ ਏਸੇਵ ਨਯੋ. ਲੁਦ੍ਦੋਤਿ ਦਾਰੁਣੋ ਕਕ੍ਖਲ਼ੋ. ਮਚ੍ਛਘਾਤਕੋਤਿ ਮਚ੍ਛਬਨ੍ਧਕੇਵਟ੍ਟੋ. ਬਨ੍ਧਨਾਗਾਰਿਕੋਤਿ ਬਨ੍ਧਨਾਗਾਰਗੋਪਕੋ. ਕੁਰੁਰਕਮ੍ਮਨ੍ਤਾਤਿ ਦਾਰੁਣਕਮ੍ਮਨ੍ਤਾ.
੯. ਮੁਦ੍ਧਾਵਸਿਤ੍ਤੋਤਿ ਖਤ੍ਤਿਯਾਭਿਸੇਕੇਨ ਮੁਦ੍ਧਨਿ ਅਭਿਸਿਤ੍ਤੋ. ਪੁਰਤ੍ਥਿਮੇਨ ਨਗਰਸ੍ਸਾਤਿ ਨਗਰਤੋ ਪੁਰਤ੍ਥਿਮਦਿਸਾਯ. ਸਨ੍ਥਾਗਾਰਨ੍ਤਿ ਯਞ੍ਞਸਾਲਂ. ਖਰਾਜਿਨਂ ਨਿਵਾਸੇਤ੍ਵਾਤਿ ਸਖੁਰਂ ਅਜਿਨਚਮ੍ਮਂ ਨਿਵਾਸੇਤ੍ਵਾ. ਸਪ੍ਪਿਤੇਲੇਨਾਤਿ ਸਪ੍ਪਿਨਾ ਚ ਤੇਲੇਨ ਚ. ਠਪੇਤ੍ਵਾ ਹਿ ਸਪ੍ਪਿਂ ਅਵਸੇਸੋ ਯੋ ਕੋਚਿ ਸ੍ਨੇਹੋ ਤੇਲਨ੍ਤਿ ਵੁਚ੍ਚਤਿ. ਕਣ੍ਡੂਵਮਾਨੋਤਿ ਨਖਾਨਂ ਛਿਨ੍ਨਤ੍ਤਾ ਕਣ੍ਡੂਵਿਤਬ੍ਬਕਾਲੇ ਤੇਨ ਕਣ੍ਡੂਵਮਾਨੋ. ਅਨਨ੍ਤਰਹਿਤਾਯਾਤਿ ਅਸਨ੍ਥਤਾਯ. ਸਰੂਪਵਚ੍ਛਾਯਾਤਿ ਸਦਿਸਵਚ੍ਛਾਯ. ਸਚੇ ਗਾਵੀ ਸੇਤਾ ਹੋਤਿ, ਵਚ੍ਛੋਪਿ ਸੇਤਕੋਵ. ਸਚੇ ਗਾਵੀ ਕਬਰਾ ਵਾ ਰਤ੍ਤਾ ਵਾ, ਵਚ੍ਛੋਪਿ ਤਾਦਿਸੋ ਵਾਤਿ ਏਵਂ ਸਰੂਪਵਚ੍ਛਾਯ. ਸੋ ਏਵਮਾਹਾਤਿ ਸੋ ਰਾਜਾ ਏਵਂ ਵਦੇਤਿ. ਵਚ੍ਛਤਰਾਤਿ ਤਰੁਣਵਚ੍ਛਕਭਾਵਂ ਅਤਿਕ੍ਕਨ੍ਤਾ ਬਲਵਵਚ੍ਛਾ. ਵਚ੍ਛਤਰੀਸੁਪਿ ਏਸੇਵ ਨਯੋ. ਬਰਿਹਿਸਤ੍ਥਾਯਾਤਿ ਪਰਿਕ੍ਖੇਪਕਰਣਤ੍ਥਾਯ ਚੇਵ ਯਞ੍ਞਭੂਮਿਯਂ ਅਤ੍ਥਰਣਤ੍ਥਾਯ ਚ. ਸੇਸਂ ਹੇਟ੍ਠਾ ਤਤ੍ਥ ਤਤ੍ਥ ਵਿਤ੍ਥਾਰਿਤਤ੍ਤਾ ਉਤ੍ਤਾਨਮੇਵਾਤਿ.
ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ
ਕਨ੍ਦਰਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੨. ਅਟ੍ਠਕਨਾਗਰਸੁਤ੍ਤਵਣ੍ਣਨਾ
੧੭. ਏਵਂ ਮੇ ਸੁਤਨ੍ਤਿ ਅਟ੍ਠਕਨਾਗਰਸੁਤ੍ਤਂ. ਤਤ੍ਥ ਬੇਲੁਵਗਾਮਕੇਤਿ ਵੇਸਾਲਿਯਾ ਦਕ੍ਖਿਣਪਸ੍ਸੇ ਅਵਿਦੂਰੇ ਬੇਲੁਵਗਾਮਕੋ ਨਾਮ ਅਤ੍ਥਿ, ਤਂ ਗੋਚਰਗਾਮਂ ਕਤ੍ਵਾਤਿ ਅਤ੍ਥੋ. ਦਸਮੋਤਿ ਸੋ ਹਿ ਜਾਤਿਗੋਤ੍ਤਵਸੇਨ ਚੇਵ ਸਾਰਪ੍ਪਤ੍ਤਕੁਲਗਣਨਾਯ ਚ ਦਸਮੇ ਠਾਨੇ ਗਣੀਯਤਿ, ਤੇਨਸ੍ਸ ਦਸਮੋਤ੍ਵੇਵ ਨਾਮਂ ਜਾਤਂ. ਅਟ੍ਠਕਨਾਗਰੋਤਿ ਅਟ੍ਠਕਨਗਰਵਾਸੀ. ਕੁਕ੍ਕੁਟਾਰਾਮੋਤਿ ਕੁਕ੍ਕੁਟਸੇਟ੍ਠਿਨਾ ਕਾਰਿਤੋ ਆਰਾਮੋ.
੧੮. ਤੇਨ ਭਗਵਤਾ…ਪੇ… ਅਕ੍ਖਾਤੋਤਿ ਏਤ੍ਥ ਅਯਂ ਸਙ੍ਖੇਪਤ੍ਥੋ, ਯੋ ਸੋ ਭਗਵਾ ਸਮਤਿਂਸ ਪਾਰਮਿਯੋ ਪੂਰੇਤ੍ਵਾ ਸਬ੍ਬਕਿਲੇਸੇ ਭਞ੍ਜਿਤ੍ਵਾ ਅਨੁਤ੍ਤਰਂ ਸਮ੍ਮਾਸਮ੍ਬੋਧਿਂ ਅਭਿਸਮ੍ਬੁਦ੍ਧੋ, ਤੇਨ ਭਗਵਤਾ, ਤੇਸਂ ਤੇਸਂ ਸਤ੍ਤਾਨਂ ਆਸਯਾਨੁਸਯਂ ਜਾਨਤਾ, ਹਤ੍ਥਤਲੇ ਠਪਿਤਆਮਲਕਂ ਵਿਯ ਸਬ੍ਬਂ ਞੇਯ੍ਯਧਮ੍ਮਂ ਪਸ੍ਸਤਾ. ਅਪਿਚ ਪੁਬ੍ਬੇਨਿਵਾਸਾਦੀਹਿ ਜਾਨਤਾ, ਦਿਬ੍ਬੇਨ ਚਕ੍ਖੁਨਾ ਪਸ੍ਸਤਾ, ਤੀਹਿ ਵਿਜ੍ਜਾਹਿ ਛਹਿ ਵਾ ਪਨ ਅਭਿਞ੍ਞਾਹਿ ਜਾਨਤਾ, ਸਬ੍ਬਤ੍ਥ ਅਪ੍ਪਟਿਹਤੇਨ ਸਮਨ੍ਤਚਕ੍ਖੁਨਾ ਪਸ੍ਸਤਾ, ਸਬ੍ਬਧਮ੍ਮਜਾਨਨਸਮਤ੍ਥਾਯ ਪਞ੍ਞਾਯ ਜਾਨਤਾ, ਸਬ੍ਬਸਤ੍ਤਾਨਂ ਚਕ੍ਖੁਵਿਸਯਾਤੀਤਾਨਿ ਤਿਰੋਕੁਟ੍ਟਾਦਿਗਤਾਨਿਪਿ ਰੂਪਾਨਿ ਅਤਿਵਿਸੁਦ੍ਧੇਨ ਮਂਸਚਕ੍ਖੁਨਾ ਪਸ੍ਸਤਾ, ਅਤ੍ਤਹਿਤਸਾਧਿਕਾਯ ਸਮਾਧਿਪਦਟ੍ਠਾਨਾਯ ਪਟਿਵੇਧਪਞ੍ਞਾਯ ਜਾਨਤਾ, ਪਰਹਿਤਸਾਧਿਕਾਯ ਕਰੁਣਾਪਦਟ੍ਠਾਨਾਯ ਦੇਸਨਾਪਞ੍ਞਾਯ ਪਸ੍ਸਤਾ, ਅਰੀਨਂ ਹਤਤ੍ਤਾ ਪਚ੍ਚਯਾਦੀਨਞ੍ਚ ਅਰਹਤ੍ਤਾ ਅਰਹਤਾ, ਸਮ੍ਮਾ ਸਾਮਞ੍ਚ ਸਚ੍ਚਾਨਂ ਬੁਦ੍ਧਤ੍ਤਾ ਸਮ੍ਮਾਸਮ੍ਬੁਦ੍ਧੇਨ. ਅਨ੍ਤਰਾਯਿਕਧਮ੍ਮੇ ਵਾ ਜਾਨਤਾ, ਨਿਯ੍ਯਾਨਿਕਧਮ੍ਮੇ ਪਸ੍ਸਤਾ, ਕਿਲੇਸਾਰੀਨਂ ਹਤਤ੍ਤਾ ਅਰਹਤਾ, ਸਾਮਂ ਸਬ੍ਬਧਮ੍ਮਾਨਂ ਬੁਦ੍ਧਤ੍ਤਾ ਸਮ੍ਮਾਸਮ੍ਬੁਦ੍ਧੇਨਾਤਿ ਏਵਂ ਚਤੁਵੇਸਾਰਜ੍ਜਵਸੇਨ ਚਤੂਹਿ ਕਾਰਣੇਹਿ ਥੋਮਿਤੇਨ. ਅਤ੍ਥਿ ਨੁ ਖੋ ਏਕੋ ਧਮ੍ਮੋ ਅਕ੍ਖਾਤੋਤਿ.
੧੯. ਅਭਿਸਙ੍ਖਤਨ੍ਤਿ ਕਤਂ ਉਪ੍ਪਾਦਿਤਂ. ਅਭਿਸਞ੍ਚੇਤਯਿਤਨ੍ਤਿ ਚੇਤਯਿਤਂ ਪਕਪ੍ਪਿਤਂ. ਸੋ ਤਤ੍ਥ ਠਿਤੋਤਿ ਸੋ ਤਸ੍ਮਿਂ ਸਮਥਵਿਪਸ੍ਸਨਾਧਮ੍ਮੇ ਠਿਤੋ. ਧਮ੍ਮਰਾਗੇਨ ਧਮ੍ਮਨਨ੍ਦਿਯਾਤਿ ਪਦਦ੍ਵਯੇਹਿ ਸਮਥਵਿਪਸ੍ਸਨਾਸੁ ਛਨ੍ਦਰਾਗੋ ਵੁਤ੍ਤੋ. ਸਮਥਵਿਪਸ੍ਸਨਾਸੁ ਹਿ ਸਬ੍ਬੇਨ ਸਬ੍ਬਂ ਛਨ੍ਦਰਾਗਂ ਪਰਿਯਾਦਿਯਿਤੁਂ ਸਕ੍ਕੋਨ੍ਤੋ ਅਰਹਾ ਹੋਤਿ, ਅਸਕ੍ਕੋਨ੍ਤੋ ਅਨਾਗਾਮੀ ਹੋਤਿ. ਸੋ ਸਮਥਵਿਪਸ੍ਸਨਾਸੁ ਛਨ੍ਦਰਾਗਸ੍ਸ ਅਪ੍ਪਹੀਨਤ੍ਤਾ ਚਤੁਤ੍ਥਜ੍ਝਾਨਚੇਤਨਾਯ ਸੁਦ੍ਧਾਵਾਸੇ ਨਿਬ੍ਬਤ੍ਤਤਿ, ਅਯਂ ਆਚਰਿਯਾਨਂ ਸਮਾਨਕਥਾ.
ਵਿਤਣ੍ਡਵਾਦੀ ਪਨਾਹ ‘‘ਤੇਨੇਵ ਧਮ੍ਮਰਾਗੇਨਾਤਿ ਵਚਨਤੋ ਅਕੁਸਲੇਨ ਸੁਦ੍ਧਾਵਾਸੇ ਨਿਬ੍ਬਤ੍ਤਤੀ’’ਤਿ ਸੋ ‘‘ਸੁਤ੍ਤਂ ਆਹਰਾ’’ਤਿ ਵਤ੍ਤਬ੍ਬੋ, ਅਦ੍ਧਾ ਅਞ੍ਞਂ ਅਪਸ੍ਸਨ੍ਤੋ ਇਦਮੇਵ ਆਹਰਿਸ੍ਸਤਿ, ਤਤੋ ਵਤ੍ਤਬ੍ਬੋ ‘‘ਕਿਂ ਪਨਿਦਂ ਸੁਤ੍ਤਂ ਨੇਯ੍ਯਤ੍ਥਂ ਨੀਤਤ੍ਥ’’ਨ੍ਤਿ, ਅਦ੍ਧਾ ਨੀਤਤ੍ਥਨ੍ਤਿ ਵਕ੍ਖਤਿ. ਤਤੋ ਵਤ੍ਤਬ੍ਬੋ – ਏਵਂ ਸਨ੍ਤੇ ਅਨਾਗਾਮਿਫਲਤ੍ਥਿਕੇਨ ਸਮਥਵਿਪਸ੍ਸਨਾਸੁ ਛਨ੍ਦਰਾਗੋ ਕਤ੍ਤਬ੍ਬੋ ਭਵਿਸ੍ਸਤਿ, ਛਨ੍ਦਰਾਗੇ ਉਪ੍ਪਾਦਿਤੇ ਅਨਾਗਾਮਿਫਲਂ ਪਟਿਵਿਦ੍ਧਂ ਭਵਿਸ੍ਸਤਿ ‘‘ਮਾ ਸੁਤ੍ਤਂ ਮੇ ਲਦ੍ਧ’’ਨ੍ਤਿ ਯਂ ਵਾ ਤਂ ਵਾ ਦੀਪੇਹਿ. ਪਞ੍ਹਂ ਕਥੇਨ੍ਤੇਨ ਹਿ ਆਚਰਿਯਸ੍ਸ ਸਨ੍ਤਿਕੇ ਉਗ੍ਗਹੇਤ੍ਵਾ ਅਤ੍ਥਰਸਂ ਪਟਿਵਿਜ੍ਝਿਤ੍ਵਾ ਕਥੇਤੁਂ ਵਟ੍ਟਤਿ, ਅਕੁਸਲੇਨ ਹਿ ਸਗ੍ਗੇ, ਕੁਸਲੇਨ ਵਾ ਅਪਾਯੇ ਪਟਿਸਨ੍ਧਿ ਨਾਮ ਨਤ੍ਥਿ. ਵੁਤ੍ਤਞ੍ਹੇਤਂ ਭਗਵਤਾ –
‘‘ਨ, ਭਿਕ੍ਖਵੇ, ਲੋਭਜੇਨ ਕਮ੍ਮੇਨ ਦੋਸਜੇਨ ਕਮ੍ਮੇਨ ਮੋਹਜੇਨ ਕਮ੍ਮੇਨ ਦੇਵਾ ਪਞ੍ਞਾਯਨ੍ਤਿ, ਮਨੁਸ੍ਸਾ ਪਞ੍ਞਾਯਨ੍ਤਿ, ਯਾ ਵਾ ਪਨਞ੍ਞਾਪਿ ਕਾਚਿ ਸੁਗਤਿਯੋ, ਅਥ ਖੋ, ਭਿਕ੍ਖਵੇ, ਲੋਭਜੇਨ ਕਮ੍ਮੇਨ ਦੋਸਜੇਨ ਕਮ੍ਮੇਨ ਮੋਹਜੇਨ ਕਮ੍ਮੇਨ ਨਿਰਯੋ ਪਞ੍ਞਾਯਤਿ, ਤਿਰਚ੍ਛਾਨਯੋਨਿ ਪਞ੍ਞਾਯਤਿ, ਪੇਤ੍ਤਿਵਿਸਯੋ ਪਞ੍ਞਾਯਤਿ, ਯਾ ਵਾ ਪਨਞ੍ਞਾਪਿ ਕਾਚਿ ਦੁਗ੍ਗਤਿਯੋ’’ਤਿ –
ਏਵਂ ਪਞ੍ਞਾਪੇਤਬ੍ਬੋ. ਸਚੇ ਸਞ੍ਜਾਨਾਤਿ ਸਞ੍ਜਾਨਾਤੁ, ਨੋ ਚੇ ਸਞ੍ਜਾਨਾਤਿ, ‘‘ਗਚ੍ਛ ਪਾਤੋਵ ਵਿਹਾਰਂ ਪਵਿਸਿਤ੍ਵਾ ਯਾਗੁਂ ਪਿਵਾਹੀ’’ਤਿ ਉਯ੍ਯੋਜੇਤਬ੍ਬੋ.
ਯਥਾ ਚ ਪਨ ਇਮਸ੍ਮਿਂ ਸੁਤ੍ਤੇ, ਏਵਂ ਮਹਾਮਾਲੁਕ੍ਯੋਵਾਦੇਪਿ ਮਹਾਸਤਿਪਟ੍ਠਾਨੇਪਿ ਕਾਯਗਤਾਸਤਿਸੁਤ੍ਤੇਪਿ ਸਮਥਵਿਪਸ੍ਸਨਾ ਕਥਿਤਾ. ਤਤ੍ਥ ਇਮਸ੍ਮਿਂ ਸੁਤ੍ਤੇ ਸਮਥਵਸੇਨ ਗਚ੍ਛਤੋਪਿ ਵਿਪਸ੍ਸਨਾਵਸੇਨ ਗਚ੍ਛਤੋਪਿ ਸਮਥਧੁਰਮੇਵ ਧੁਰਂ, ਮਹਾਮਾਲੁਕ੍ਯੋਵਾਦੇ ਵਿਪਸ੍ਸਨਾਵ ਧੁਰਂ, ਮਹਾਸਤਿਪਟ੍ਠਾਨਂ ਪਨ ਵਿਪਸ੍ਸਨੁਤ੍ਤਰਂ ਨਾਮ ਕਥਿਤਂ, ਕਾਯਗਤਾਸਤਿਸੁਤ੍ਤਂ ਸਮਥੁਤ੍ਤਰਨ੍ਤਿ.
ਅਯਂ ਖੋ ਗਹਪਤਿ…ਪੇ… ਏਕਧਮ੍ਮੋ ਅਕ੍ਖਾਤੋਤਿ ਏਕਧਮ੍ਮਂ ਪੁਚ੍ਛਿਤੇਨ ਅਯਮ੍ਪਿ ਏਕਧਮ੍ਮੋਤਿ ਏਵਂ ਪੁਚ੍ਛਾਵਸੇਨ ਕਥਿਤਤ੍ਤਾ ਏਕਾਦਸਪਿ ਧਮ੍ਮਾ ਏਕਧਮ੍ਮੋ ਨਾਮ ਜਾਤੋ. ਮਹਾਸਕੁਲੁਦਾਯਿਸੁਤ੍ਤਸ੍ਮਿਞ੍ਹਿ ਏਕੂਨਵੀਸਤਿ ਪਬ੍ਬਾਨਿ ਪਟਿਪਦਾਵਸੇਨ ਏਕਧਮ੍ਮੋ ਨਾਮ ਜਾਤਾਨਿ, ਇਧ ਏਕਾਦਸਪੁਚ੍ਛਾਵਸੇਨ ਏਕਧਮ੍ਮੋਤਿ ਆਗਤਾਨਿ. ਅਮਤੁਪ੍ਪਤ੍ਤਿਯਤ੍ਥੇਨ ਵਾ ਸਬ੍ਬਾਨਿਪਿ ਏਕਧਮ੍ਮੋਤਿ ਵਤ੍ਤੁਂ ਵਟ੍ਟਤਿ.
੨੧. ਨਿਧਿਮੁਖਂ ਗਵੇਸਨ੍ਤੋਤਿ ਨਿਧਿਂ ਪਰਿਯੇਸਨ੍ਤੋ. ਸਕਿਦੇਵਾਤਿ ਏਕਪਯੋਗੇਨ. ਕਥਂ ਪਨ ਏਕਪਯੋਗੇਨੇਵ ਏਕਾਦਸਨ੍ਨਂ ਨਿਧੀਨਂ ਅਧਿਗਮੋ ਹੋਤੀਤਿ. ਇਧੇਕਚ੍ਚੋ ਅਰਞ੍ਞੇ ਨਿਧਿਂ ਗਵੇਸਮਾਨੋ ਚਰਤਿ, ਤਮੇਨਂ ਅਞ੍ਞਤਰੋ ਅਤ੍ਥਚਰਕੋ ਦਿਸ੍ਵਾ ‘‘ਕਿਂ ਭੋ ਚਰਸੀ’’ਤਿ ਪੁਚ੍ਛਤਿ. ਸੋ ‘‘ਜੀਵਿਤਵੁਤ੍ਤਿਂ ਪਰਿਯੇਸਾਮੀ’’ਤਿ ਆਹ. ਇਤਰੋ ‘‘ਤੇਨ ਹਿ ਸਮ੍ਮ ਆਗਚ੍ਛ, ਏਤਂ ਪਾਸਾਣਂ ਪਵਤ੍ਤੇਹੀ’’ਤਿ ਆਹ. ਸੋ ਤਂ ਪਵਤ੍ਤੇਤ੍ਵਾ ਉਪਰੂਪਰਿ ਠਪਿਤਾ ਵਾ ਕੁਚ੍ਛਿਯਾ ਕੁਚ੍ਛਿਂ ਆਹਚ੍ਚ ਠਿਤਾ ਵਾ ਏਕਾਦਸ ਕੁਮ੍ਭਿਯੋ ਪਸ੍ਸੇਯ੍ਯ, ਏਵਂ ਏਕਪਯੋਗੇਨ ਏਕਾਦਸਨ੍ਨਂ ਨਿਧੀਨਂ ਅਧਿਗਮੋ ਹੋਤਿ.
ਆਚਰਿਯਧਨਂ ਪਰਿਯੇਸਿਸ੍ਸਨ੍ਤੀਤਿ ਅਞ੍ਞਤਿਤ੍ਥਿਯਾ ਹਿ ਯਸ੍ਸ ਸਨ੍ਤਿਕੇ ਸਿਪ੍ਪਂ ਉਗ੍ਗਣ੍ਹਨ੍ਤਿ, ਤਸ੍ਸ ਸਿਪ੍ਪੁਗ੍ਗਹਣਤੋ ਪੁਰੇ ਵਾ ਪਚ੍ਛਾ ਵਾ ਅਨ੍ਤਰਨ੍ਤਰੇ ਵਾ ਗੇਹਤੋ ਨੀਹਰਿਤ੍ਵਾ ਧਨਂ ਦੇਨ੍ਤਿ. ਯੇਸਂ ਗੇਹੇ ਨਤ੍ਥਿ, ਤੇ ਞਾਤਿਸਭਾਗਤੋ ਪਰਿਯੇਸਨ੍ਤਿ, ਤਥਾ ਅਲਭਮਾਨਾ ਭਿਕ੍ਖਮ੍ਪਿ ਚਰਿਤ੍ਵਾ ਦੇਨ੍ਤਿਯੇਵ. ਤਂ ਸਨ੍ਧਾਯੇਤਂ ਵੁਤ੍ਤਂ.
ਕਿਮਙ੍ਗਂ ਪਨਾਹਨ੍ਤਿ ਬਾਹਿਰਕਾ ਤਾਵ ਅਨਿਯ੍ਯਾਨਿਕੇਪਿ ਸਾਸਨੇ ਸਿਪ੍ਪਮਤ੍ਤਦਾਯਕਸ੍ਸ ਧਨਂ ਪਰਿਯੇਸਨ੍ਤਿ; ਅਹਂ ਪਨ ਏਵਂਵਿਧੇ ਨਿਯ੍ਯਾਨਿਕਸਾਸਨੇ ਏਕਾਦਸਵਿਧਂ ਅਮਤੁਪ੍ਪਤ੍ਤਿਪਟਿਪਦਂ ਦੇਸੇਨ੍ਤਸ੍ਸ ਆਚਰਿਯਸ੍ਸ ਪੂਜਂ ਕਿਂ ਨ ਕਰਿਸ੍ਸਾਮਿ, ਕਰਿਸ੍ਸਾਮਿਯੇਵਾਤਿ ਵਦਤਿ. ਪਚ੍ਚੇਕਦੁਸ੍ਸਯੁਗੇਨ ਅਚ੍ਛਾਦੇਸੀਤਿ ਏਕਮੇਕਸ੍ਸ ਭਿਕ੍ਖੁਨੋ ਏਕੇਕਂ ਦੁਸ੍ਸਯੁਗਮਦਾਸੀਤਿ ਅਤ੍ਥੋ. ਸਮੁਦਾਚਾਰਵਚਨਂ ਪਨੇਤ੍ਥ ਏਵਰੂਪਂ ਹੋਤਿ, ਤਸ੍ਮਾ ਅਚ੍ਛਾਦੇਸੀਤਿ ਵੁਤ੍ਤਂ. ਪਞ੍ਚਸਤਵਿਹਾਰਨ੍ਤਿ ਪਞ੍ਚਸਤਗ੍ਘਨਿਕਂ ਪਣ੍ਣਸਾਲਂ ਕਾਰੇਸੀਤਿ ਅਤ੍ਥੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ
ਅਟ੍ਠਕਨਾਗਰਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੩. ਸੇਖਸੁਤ੍ਤਵਣ੍ਣਨਾ
੨੨. ਏਵਂ ਮੇ ਸੁਤਨ੍ਤਿ ਸੇਖਸੁਤ੍ਤਂ. ਤਤ੍ਥ ਨਵਂ ਸਨ੍ਥਾਗਾਰਨ੍ਤਿ ਅਧੁਨਾ ਕਾਰਿਤਂ ਸਨ੍ਥਾਗਾਰਂ, ਏਕਾ ਮਹਾਸਾਲਾਤਿ ਅਤ੍ਥੋ. ਉਯ੍ਯੋਗਕਾਲਾਦੀਸੁ ਹਿ ਰਾਜਾਨੋ ਤਤ੍ਥ ਠਤ੍ਵਾ ‘‘ਏਤ੍ਤਕਾ ਪੁਰਤੋ ਗਚ੍ਛਨ੍ਤੁ, ਏਤ੍ਤਕਾ ਪਚ੍ਛਾ, ਏਤ੍ਤਕਾ ਉਭੋਹਿ ਪਸ੍ਸੇਹਿ, ਏਤ੍ਤਕਾ ਹਤ੍ਥੀਸੁ ਅਭਿਰੁਹਨ੍ਤੁ, ਏਤ੍ਤਕਾ ਅਸ੍ਸੇਸੁ, ਏਤ੍ਤਕਾ ਰਥੇਸੁ ਤਿਟ੍ਠਨ੍ਤੂ’’ਤਿ ਏਵਂ ਸਨ੍ਥਂ ਕਰੋਨ੍ਤਿ, ਮਰਿਯਾਦਂ ਬਨ੍ਧਨ੍ਤਿ, ਤਸ੍ਮਾ ਤਂ ਠਾਨਂ ਸਨ੍ਥਾਗਾਰਨ੍ਤਿ ਵੁਚ੍ਚਤਿ. ਉਯ੍ਯੋਗਟ੍ਠਾਨਤੋ ਚ ਆਗਨ੍ਤ੍ਵਾ ਯਾਵ ਗੇਹੇਸੁ ਅਲ੍ਲਗੋਮਯਪਰਿਭਣ੍ਡਾਦੀਨਿ ਕਰੋਨ੍ਤਿ, ਤਾਵ ਦ੍ਵੇ ਤੀਣਿ ਦਿਵਸਾਨਿ ਤੇ ਰਾਜਾਨੋ ਤਤ੍ਥ ਸਨ੍ਥਮ੍ਭਨ੍ਤੀਤਿਪਿ ਸਨ੍ਥਾਗਾਰਂ. ਤੇਸਂ ਰਾਜੂਨਂ ਸਹ ਅਤ੍ਥਾਨੁਸਾਸਨਂ ਅਗਾਰਨ੍ਤਿਪਿ ਸਨ੍ਥਾਗਾਰਂ ਗਣਰਾਜਾਨੋ ਹਿ ਤੇ, ਤਸ੍ਮਾ ਉਪ੍ਪਨ੍ਨਕਿਚ੍ਚਂ ਏਕਸ੍ਸ ਵਸੇਨ ਨ ਛਿਜ੍ਜਤਿ, ਸਬ੍ਬੇਸਂ ਛਨ੍ਦੋ ਲਦ੍ਧੁਂ ਵਟ੍ਟਤਿ, ਤਸ੍ਮਾ ਸਬ੍ਬੇ ਤਤ੍ਥ ਸਨ੍ਨਿਪਤਿਤ੍ਵਾ ਅਨੁਸਾਸਨ੍ਤਿ. ਤੇਨ ਵੁਤ੍ਤਂ ‘‘ਸਹ ਅਤ੍ਥਾਨੁਸਾਸਨਂ ਅਗਾਰਨ੍ਤਿਪਿ ਸਨ੍ਥਾਗਾਰ’’ਨ੍ਤਿ. ਯਸ੍ਮਾ ਪਨੇਤੇ ਤਤ੍ਥ ਸਨ੍ਨਿਪਤਿਤ੍ਵਾ ‘‘ਇਮਸ੍ਮਿਂ ਕਾਲੇ ਕਸਿਤੁਂ ਵਟ੍ਟਤਿ, ਇਮਸ੍ਮਿਂ ਕਾਲੇ ਵਪਿਤੁ’’ਨ੍ਤਿ ਏਵਮਾਦਿਨਾ ਨਯੇਨ ਘਰਾਵਾਸਕਿਚ੍ਚਾਨਿ ਸਮ੍ਮਨ੍ਤਯਨ੍ਤਿ, ਤਸ੍ਮਾ ਛਿਦ੍ਦਾਵਛਿਦ੍ਦਂ ਘਰਾਵਾਸਂ ਤਤ੍ਥ ਸਨ੍ਥਰਨ੍ਤੀਤਿਪਿ ਸਨ੍ਥਾਗਾਰਂ. ਅਚਿਰਕਾਰਿਤਂ ਹੋਤੀਤਿ ਕਟ੍ਠਕਮ੍ਮ-ਸਿਲਾਕਮ੍ਮ-ਚਿਤ੍ਤਕਮ੍ਮਾਦਿਵਸੇਨ ਸੁਸਜ੍ਜਿਤਂ ਦੇਵਵਿਮਾਨਂ ਵਿਯ ਅਧੁਨਾ ਨਿਟ੍ਠਾਪਿਤਂ. ਸਮਣੇਨ ਵਾਤਿ ਏਤ੍ਥ ਯਸ੍ਮਾ ਘਰਵਤ੍ਥੁਪਰਿਗ੍ਗਹਕਾਲੇਯੇਵ ਦੇਵਤਾ ਅਤ੍ਤਨੋ ਵਸਨਟ੍ਠਾਨਂ ਗਣ੍ਹਨ੍ਤਿ, ਤਸ੍ਮਾ ‘‘ਦੇਵੇਨ ਵਾ’’ਤਿ ਅਵਤ੍ਵਾ ‘‘ਸਮਣੇਨ ਵਾ ਬ੍ਰਾਹ੍ਮਣੇਨ ਵਾ ਕੇਨਚਿ ਵਾ ਮਨੁਸ੍ਸਭੂਤੇਨਾ’’ਤਿ ਵੁਤ੍ਤਂ.
ਯੇਨ ਭਗਵਾ ਤੇਨੁਪਸਙ੍ਕਮਿਂਸੂਤਿ ਸਨ੍ਥਾਗਾਰਂ ਨਿਟ੍ਠਿਤਨ੍ਤਿ ਸੁਤ੍ਵਾ ‘‘ਗਚ੍ਛਾਮ, ਨਂ ਪਸ੍ਸਿਸ੍ਸਾਮਾ’’ਤਿ ਗਨ੍ਤ੍ਵਾ ਦ੍ਵਾਰਕੋਟ੍ਠਕਤੋ ਪਟ੍ਠਾਯ ਸਬ੍ਬਂ ਓਲੋਕੇਤ੍ਵਾ ‘‘ਇਦਂ ਸਨ੍ਥਾਗਾਰਂ ਦੇਵਵਿਮਾਨਸਦਿਸਂ ਅਤਿਵਿਯ ਮਨੋਰਮਂ ਸਸ੍ਸਿਰਿਕਂ ਕੇਨ ਪਠਮਂ ਪਰਿਭੁਤ੍ਤਂ ਅਮ੍ਹਾਕਂ ਦੀਘਰਤ੍ਤਂ ਹਿਤਾਯ ਸੁਖਾਯ ਅਸ੍ਸਾ’’ਤਿ ਚਿਨ੍ਤੇਤ੍ਵਾ ‘‘ਅਮ੍ਹਾਕਂ ਞਾਤਿਸੇਟ੍ਠਸ੍ਸ ਪਠਮਂ ਦਿਯ੍ਯਮਾਨੇਪਿ ਸਤ੍ਥੁਨੋਵ ਅਨੁਚ੍ਛਵਿਕਂ, ਦਕ੍ਖਿਣੇਯ੍ਯਵਸੇਨ ਦਿਯ੍ਯਮਾਨੇਪਿ ਸਤ੍ਥੁਨੋਵ ਅਨੁਚ੍ਛਵਿਕਂ, ਤਸ੍ਮਾ ਪਠਮਂ ਸਤ੍ਥਾਰਂ ਪਰਿਭੁਞ੍ਜਾਪੇਸ੍ਸਾਮ, ਭਿਕ੍ਖੁਸਙ੍ਘਸ੍ਸ ਆਗਮਨਂ ਕਰਿਸ੍ਸਾਮ, ਭਿਕ੍ਖੁਸਙ੍ਘੇ ਆਗਤੇ ਤੇਪਿਟਕਂ ਬੁਦ੍ਧਵਚਨਂ ਆਗਤਮੇਵ ਭਵਿਸ੍ਸਤਿ, ਸਤ੍ਥਾਰਂ ਤਿਯਾਮਰਤ੍ਤਿਂ ਅਮ੍ਹਾਕਂ ਧਮ੍ਮਕਥਂ ਕਥਾਪੇਸ੍ਸਾਮ, ਇਤਿ ਤੀਹਿ ਰਤਨੇਹਿ ਪਰਿਭੁਤ੍ਤਂ ਮਯਂ ਪਚ੍ਛਾ ਪਰਿਭੁਞ੍ਜਿਸ੍ਸਾਮ, ਏਵਂ ਨੋ ਦੀਘਰਤ੍ਤਂ ਹਿਤਾਯ ਸੁਖਾਯ ਭਵਿਸ੍ਸਤੀ’’ਤਿ ਸਨ੍ਨਿਟ੍ਠਾਨਂ ਕਤ੍ਵਾ ਉਪਸਙ੍ਕਮਿਂਸੁ.
ਯੇਨ ਸਨ੍ਥਾਗਾਰਂ ਤੇਨੁਪਸਙ੍ਕਮਿਂਸੂਤਿ ਤਂ ਦਿਵਸਂ ਕਿਰ ਸਨ੍ਥਾਗਾਰਂ ਕਿਞ੍ਚਾਪਿ ਰਾਜਕੁਲਾਨਂ ਦਸ੍ਸਨਤ੍ਥਾਯ ਦੇਵਵਿਮਾਨਂ ਵਿਯ ਸੁਸਜ੍ਜਿਤਂ ਹੋਤਿ ਸੁਪਟਿਜਗ੍ਗਿਤਂ, ਬੁਦ੍ਧਾਰਹਂ ਪਨ ਕਤ੍ਵਾ ਅਪ੍ਪਞ੍ਞਤ੍ਤਂ. ਬੁਦ੍ਧਾ ਹਿ ਨਾਮ ਅਰਞ੍ਞਜ੍ਝਾਸਯਾ ਅਰਞ੍ਞਾਰਾਮਾ ਅਨ੍ਤੋਗਾਮੇ ਵਸੇਯ੍ਯੁਂ ਵਾ ਨੋ ਵਾ, ਤਸ੍ਮਾ ਭਗਵਤੋ ਮਨਂ ਜਾਨਿਤ੍ਵਾਵ ਪਞ੍ਞਾਪੇਸ੍ਸਾਮਾਤਿ ਚਿਨ੍ਤੇਤ੍ਵਾ ਤੇ ਭਗਵਨ੍ਤਂ ਉਪਸਙ੍ਕਮਿਂਸੁ. ਇਦਾਨਿ ਪਨ ਮਨਂ ਲਭਿਤ੍ਵਾ ਪਞ੍ਞਾਪੇਤੁਕਾਮਾ ਯੇਨ ਸਨ੍ਥਾਗਾਰਂ ਤੇਨੁਪਸਙ੍ਕਮਿਂਸੁ.
ਸਬ੍ਬਸਨ੍ਥਰਿਂ ਸਨ੍ਥਾਗਾਰਂ ਸਨ੍ਥਰਿਤ੍ਵਾਤਿ ਯਥਾ ਸਬ੍ਬਮੇਵ ਸਨ੍ਥਤਂ ਹੋਤਿ, ਏਵਂ ਤਂ ਸਨ੍ਥਰਾਪੇਤ੍ਵਾ. ਸਬ੍ਬਪਠਮਂ ਤਾਵ ‘‘ਗੋਮਯਂ ਨਾਮ ਸਬ੍ਬਮਙ੍ਗਲੇਸੁ ਵਟ੍ਟਤੀ’’ਤਿ ਸੁਧਾਪਰਿਕਮ੍ਮਕਤਮ੍ਪਿ ਭੂਮਿਂ ਅਲ੍ਲਗੋਮਯੇਨ ਓਪੁਞ੍ਛਾਪੇਤ੍ਵਾ ਪਰਿਸੁਕ੍ਖਭਾਵਂ ਞਤ੍ਵਾ ਯਥਾ ਅਕ੍ਕਨ੍ਤਟ੍ਠਾਨੇ ਪਦਂ ਨ ਪਞ੍ਞਾਯਤਿ, ਏਵਂ ਚਤੁਜ੍ਜਾਤਿਯਗਨ੍ਧੇਹਿ ਲਿਮ੍ਪਾਪੇਤ੍ਵਾ ਉਪਰਿ ਨਾਨਾਵਣ੍ਣੇ ਕਟਸਾਰਕੇ ਸਨ੍ਥਰਿਤ੍ਵਾ ਤੇਸਂ ਉਪਰਿ ਮਹਾਪਿਟ੍ਠਿਕਕੋਜਵਕੇ ਆਦਿਂ ਕਤ੍ਵਾ ਹਤ੍ਥਤ੍ਥਰਕ-ਅਸ੍ਸਤ੍ਥਰਕ-ਸੀਹਤ੍ਥਰਕ-ਬ੍ਯਗ੍ਘਤ੍ਥਰਕ-ਚਨ੍ਦਤ੍ਥਰਕ-ਸੂਰਿਯਤ੍ਥਰਕ-ਚਿਤ੍ਤਤ੍ਥਰਕਾਦੀਹਿ ਨਾਨਾਵਣ੍ਣੇਹਿ ਅਤ੍ਥਰਣੇਹਿ ਸਨ੍ਥਰਿਤਬ੍ਬਕਯੁਤ੍ਤਂ ਸਬ੍ਬੋਕਾਸਂ ਸਨ੍ਥਰਾਪੇਸੁਂ. ਤੇਨ ਵੁਤ੍ਤਂ ‘‘ਸਬ੍ਬਸਨ੍ਥਰਿਂ ਸਨ੍ਥਾਗਾਰਂ ਸਨ੍ਥਰਿਤ੍ਵਾ’’ਤਿ.
ਆਸਨਾਨਿ ਪਞ੍ਞਾਪੇਤ੍ਵਾਤਿ ਮਜ੍ਝਟ੍ਠਾਨੇ ਤਾਵ ਮਙ੍ਗਲਤ੍ਥਮ੍ਭਂ ਨਿਸ੍ਸਾਯ ਮਹਾਰਹਂ ਬੁਦ੍ਧਾਸਨਂ ਪਞ੍ਞਾਪੇਤ੍ਵਾ ਤਤ੍ਥ ਯਂ ਯਂ ਮੁਦੁਕਞ੍ਚ ਮਨੋਰਮਞ੍ਚ ਪਚ੍ਚਤ੍ਥਰਣਂ, ਤਂ ਤਂ ਪਚ੍ਚਤ੍ਥਰਿਤ੍ਵਾ ਭਗਵਤੋ ਲੋਹਿਤਕਂ ਮਨੁਞ੍ਞਦਸ੍ਸਨਂ ਉਪਧਾਨਂ ਉਪਦਹਿਤ੍ਵਾ ਉਪਰਿ ਸੁਵਣ੍ਣਰਜਤਤਾਰਕਵਿਚਿਤ੍ਤਂ ਵਿਤਾਨਂ ਬਨ੍ਧਿਤ੍ਵਾ ਗਨ੍ਧਦਾਮਪੁਪ੍ਫਦਾਮਪਤ੍ਤਦਾਮਾਦੀਹਿ ਪਚ੍ਚਤ੍ਥਰਣੇਹਿ ਅਲਙ੍ਕਰਿਤ੍ਵਾ ਸਮਨ੍ਤਾ ਦ੍ਵਾਦਸਹਤ੍ਥਟ੍ਠਾਨੇ ਪੁਪ੍ਫਜਾਲਂ ਕਰਿਤ੍ਵਾ ਤਿਂਸਹਤ੍ਥਮਤ੍ਤਂ ਠਾਨਂ ਪਟਸਾਣਿਯਾ ਪਰਿਕ੍ਖਿਪਾਪੇਤ੍ਵਾ ਪਚ੍ਛਿਮਭਿਤ੍ਤਿਂ ਨਿਸ੍ਸਾਯ ਭਿਕ੍ਖੁਸਙ੍ਘਸ੍ਸ ਪਲ੍ਲਙ੍ਕਪੀਠ-ਅਪਸ੍ਸਯਪੀਠ-ਮੁਣ੍ਡਪੀਠਾਨਿ ਪਞ੍ਞਾਪੇਤ੍ਵਾ ਉਪਰਿ ਸੇਤਪਚ੍ਚਤ੍ਥਰਣੇਹਿ ਪਚ੍ਚਤ੍ਥਰਾਪੇਤ੍ਵਾ ਪਾਚੀਨਭਿਤ੍ਤਿਂ ਨਿਸ੍ਸਾਯ ਅਤ੍ਤਨੋ ਅਤ੍ਤਨੋ ਮਹਾਪਿਟ੍ਠਿਕਕੋਜਵਕੇ ਪਞ੍ਞਾਪੇਤ੍ਵਾ ਹਂਸਲੋਮਾਦਿਪੂਰਿਤਾਨਿ ਉਪਧਾਨਾਨਿ ਠਪਾਪੇਸੁਂ ‘‘ਏਵਂ ਅਕਿਲਮਮਾਨਾ ਸਬ੍ਬਰਤ੍ਤਿਂ ਧਮ੍ਮਂ ਸੁਣਿਸ੍ਸਾਮਾ’’ਤਿ. ਇਦਂ ਸਨ੍ਧਾਯ ਵੁਤ੍ਤਂ ‘‘ਆਸਨਾਨਿ ਪਞ੍ਞਾਪੇਤ੍ਵਾ’’ਤਿ.
ਉਦਕਮਣਿਕਨ੍ਤਿ ਮਹਾਕੁਚ੍ਛਿਕਂ ਉਦਕਚਾਟਿਂ. ਉਪਟ੍ਠਪੇਤ੍ਵਾਤਿ ਏਵਂ ਭਗਵਾ ਚ ਭਿਕ੍ਖੁਸਙ੍ਘੋ ਚ ਯਥਾਰੁਚਿਯਾ ਹਤ੍ਥੇ ਵਾ ਧੋਵਿਸ੍ਸਨ੍ਤਿ ਪਾਦੇ ਵਾ, ਮੁਖਂ ਵਾ ਵਿਕ੍ਖਾਲੇਸ੍ਸਨ੍ਤੀਤਿ ਤੇਸੁ ਤੇਸੁ ਠਾਨੇਸੁ ਮਣਿਵਣ੍ਣਸ੍ਸ ਉਦਕਸ੍ਸ ਪੂਰਾਪੇਤ੍ਵਾ ਵਾਸਤ੍ਥਾਯ ਨਾਨਾਪੁਪ੍ਫਾਨਿ ਚੇਵ ਉਦਕਵਾਸਚੁਣ੍ਣਾਨਿ ਚ ਪਕ੍ਖਿਪਿਤ੍ਵਾ ਕਦਲਿਪਣ੍ਣੇਹਿ ਪਿਦਹਿਤ੍ਵਾ ਪਤਿਟ੍ਠਾਪੇਸੁਂ. ਇਦਂ ਸਨ੍ਧਾਯ ਵੁਤ੍ਤਂ ‘‘ਉਪਟ੍ਠਪੇਤ੍ਵਾ’’ਤਿ.
ਤੇਲਪ੍ਪਦੀਪਂ ਆਰੋਪੇਤ੍ਵਾਤਿ ਰਜਤਸੁਵਣ੍ਣਾਦਿਮਯਦਣ੍ਡਾਸੁ ਦੀਪਿਕਾਸੁ ਯੋਨਕਰੂਪਕਿਰਾਤਰੂਪਕਾਦੀਨਂ ਹਤ੍ਥੇ ਠਪਿਤਸੁਵਣ੍ਣਰਜਤਾਦਿਮਯਕਪਲ੍ਲਕਾਦੀਸੁ ਚ ਤੇਲਪ੍ਪਦੀਪਂ ਜਲਯਿਤ੍ਵਾਤਿ ਅਤ੍ਥੋ. ਯੇਨ ਭਗਵਾ ਤੇਨੁਪਸਙ੍ਕਮਿਂਸੂਤਿ ਏਤ੍ਥ ਪਨ ਤੇ ਸਕ੍ਯਰਾਜਾਨੋ ਨ ਕੇਵਲਂ ਸਨ੍ਥਾਗਾਰਮੇਵ, ਅਥ ਖੋ ਯੋਜਨਾਵਟ੍ਟੇ ਕਪਿਲਵਤ੍ਥੁਸ੍ਮਿਂ ਨਗਰਵੀਥਿਯੋਪਿ ਸਮ੍ਮਜ੍ਜਾਪੇਤ੍ਵਾ ਧਜੇ ਉਸ੍ਸਾਪੇਤ੍ਵਾ ਗੇਹਦ੍ਵਾਰੇਸੁ ਪੁਣ੍ਣਘਟੇ ਚ ਕਦਲਿਯੋ ਚ ਠਪਾਪੇਤ੍ਵਾ ਸਕਲਨਗਰਂ ਦੀਪਮਾਲਾਦੀਹਿ ਵਿਪ੍ਪਕਿਣ੍ਣਤਾਰਕਂ ਵਿਯ ਕਤ੍ਵਾ ‘‘ਖੀਰਪਾਯਕੇ ਦਾਰਕੇ ਖੀਰਂ ਪਾਯੇਥ, ਦਹਰੇ ਕੁਮਾਰੇ ਲਹੁਂ ਲਹੁਂ ਭੋਜੇਤ੍ਵਾ ਸਯਾਪੇਥ, ਉਚ੍ਚਾਸਦ੍ਦਂ ਮਾ ਕਰਿਤ੍ਥ, ਅਜ੍ਜ ਏਕਰਤ੍ਤਿਂ ਸਤ੍ਥਾ ਅਨ੍ਤੋਗਾਮੇ ਵਸਿਸ੍ਸਤਿ, ਬੁਦ੍ਧਾ ਨਾਮ ਅਪ੍ਪਸਦ੍ਦਕਾਮਾ ਹੋਨ੍ਤੀ’’ਤਿ ਭੇਰਿਂ ਚਰਾਪੇਤ੍ਵਾ ਸਯਂ ਦਣ੍ਡਦੀਪਿਕਾ ਆਦਾਯ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ.
ਅਥ ਖੋ ਭਗਵਾ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਸਦ੍ਧਿਂ ਭਿਕ੍ਖੁਸਙ੍ਘੇਨ ਯੇਨ ਨਵਂ ਸਨ੍ਥਾਗਾਰਂ ਤੇਨੁਪਸਙ੍ਕਮੀਤਿ. ‘‘ਯਸ੍ਸ ਦਾਨਿ, ਭਨ੍ਤੇ, ਭਗਵਾ ਕਾਲਂ ਮਞ੍ਞਤੀ’’ਤਿ ਏਵਂ ਕਿਰ ਕਾਲੇ ਆਰੋਚਿਤੇ ਭਗਵਾ ਲਾਖਾਰਸੇਨ ਤਿਨ੍ਤਰਤ੍ਤਕੋਵਿਲ਼ਾਰਪੁਪ੍ਫਵਣ੍ਣਂ ਰਤ੍ਤਦੁਪਟ੍ਟਂ ਕਤ੍ਤਰਿਯਾ ਪਦੁਮਂ ਕਨ੍ਤਨ੍ਤੋ ਵਿਯ ਸਂਵਿਧਾਯ ਤਿਮਣ੍ਡਲਂ ਪਟਿਚ੍ਛਾਦੇਨ੍ਤੋ ਨਿਵਾਸੇਤ੍ਵਾ ਸੁਵਣ੍ਣਪਾਮਙ੍ਗੇਨ ਪਦੁਮਕਲਾਪਂ ਪਰਿਕ੍ਖਿਪਨ੍ਤੋ ਵਿਯ ਵਿਜ੍ਜੁਲ੍ਲਤਾਸਸ੍ਸਿਰਿਕਂ ਕਾਯਬਨ੍ਧਨਂ ਬਨ੍ਧਿਤ੍ਵਾ ਰਤ੍ਤਕਮ੍ਬਲੇਨ ਗਜਕੁਮ੍ਭਂ ਪਰਿਯੋਨਦ੍ਧਨ੍ਤੋ ਵਿਯ ਰਤਨਸਤੁਬ੍ਬੇਧੇ ਸੁਵਣ੍ਣਗ੍ਘਿਕੇ ਪਵਾਲ਼ਜਾਲਂ ਖਿਪਮਾਨੋ ਵਿਯ ਸੁਵਣ੍ਣਚੇਤਿਯੇ ਰਤ੍ਤਕਮ੍ਬਲਕਞ੍ਚੁਕਂ ਪਟਿਮੁਞ੍ਚਨ੍ਤੋ ਵਿਯ ਗਚ੍ਛਨ੍ਤਂ ਪੁਣ੍ਣਚਨ੍ਦਂ ਰਤ੍ਤਵਣ੍ਣਵਲਾਹਕੇਨ ਪਟਿਚ੍ਛਾਦਯਮਾਨੋ ਵਿਯ ਕਞ੍ਚਨਪਬ੍ਬਤਮਤ੍ਥਕੇ ਸੁਪਕ੍ਕਲਾਖਾਰਸਂ ਪਰਿਸਿਞ੍ਚਨ੍ਤੋ ਵਿਯ ਚਿਤ੍ਤਕੂਟਪਬ੍ਬਤਮਤ੍ਥਕਂ ਵਿਜ੍ਜੁਲ੍ਲਤਾਯ ਪਰਿਕ੍ਖਿਪਨ੍ਤੋ ਵਿਯ ਚ ਸਚਕ੍ਕਵਾਲ਼ਸਿਨੇਰੁਯੁਗਨ੍ਧਰਂ ਮਹਾਪਥਵਿਂ ਚਾਲੇਤ੍ਵਾ ਗਹਿਤਂ ਨਿਗ੍ਰੋਧਪਲ੍ਲਵਸਮਾਨਵਣ੍ਣਂ ਰਤ੍ਤਵਰਪਂਸੁਕੂਲਂ ਪਾਰੁਪਿਤ੍ਵਾ ਗਨ੍ਧਕੁਟਿਦ੍ਵਾਰਤੋ ਨਿਕ੍ਖਮਿ ਕਞ੍ਚਨਗੁਹਤੋ ਸੀਹੋ ਵਿਯ ਉਦਯਪਬ੍ਬਤਕੂਟਤੋ ਪੁਣ੍ਣਚਨ੍ਦੋ ਵਿਯ ਚ. ਨਿਕ੍ਖਮਿਤ੍ਵਾ ਪਨ ਗਨ੍ਧਕੁਟਿਪਮੁਖੇ ਅਟ੍ਠਾਸਿ.
ਅਥਸ੍ਸ ਕਾਯਤੋ ਮੇਘਮੁਖੇਹਿ ਵਿਜ੍ਜੁਕਲਾਪਾ ਵਿਯ ਰਸ੍ਮਿਯੋ ਨਿਕ੍ਖਮਿਤ੍ਵਾ ਸੁਵਣ੍ਣਰਸਧਾਰਾਪਰਿਸੇਕਮਞ੍ਜਰਿਪਤ੍ਤਪੁਪ੍ਫਫਲਵਿਟਪੇ ਵਿਯ ਆਰਾਮਰੁਕ੍ਖੇ ਕਰਿਂਸੁ. ਤਾਵਦੇਵ ਚ ਅਤ੍ਤਨੋ ਅਤ੍ਤਨੋ ਪਤ੍ਤਚੀਵਰਮਾਦਾਯ ਮਹਾਭਿਕ੍ਖੁਸਙ੍ਘੋ ਭਗਵਨ੍ਤਂ ਪਰਿਵਾਰੇਸਿ. ਤੇ ਪਨ ਪਰਿਵਾਰੇਤ੍ਵਾ ਠਿਤਾ ਭਿਕ੍ਖੂ ਏਵਰੂਪਾ ਅਹੇਸੁਂ ਅਪ੍ਪਿਚ੍ਛਾ ਸਨ੍ਤੁਟ੍ਠਾ ਪਵਿਵਿਤ੍ਤਾ ਅਸਂਸਟ੍ਠਾ ਆਰਦ੍ਧਵੀਰਿਯਾ ਵਤ੍ਤਾਰੋ ਵਚਨਕ੍ਖਮਾ ਚੋਦਕਾ ਪਾਪਗਰਹੀ ਸੀਲਸਮ੍ਪਨ੍ਨਾ ਸਮਾਧਿਸਮ੍ਪਨ੍ਨਾ ਪਞ੍ਞਾਵਿਮੁਤ੍ਤਿਵਿਮੁਤ੍ਤਿਞਾਣਦਸ੍ਸਨਸਮ੍ਪਨ੍ਨਾਤਿ. ਤੇਹਿ ਪਰਿਵਾਰਿਤੋ ਭਗਵਾ ਰਤ੍ਤਕਮ੍ਬਲਪਰਿਕ੍ਖਿਤ੍ਤੋ ਵਿਯ ਸੁਵਣ੍ਣਕ੍ਖਨ੍ਧੋ ਰਤ੍ਤਪਦੁਮਸਣ੍ਡਮਜ੍ਝਗਤਾ ਵਿਯ ਸੁਵਣ੍ਣਨਾਵਾ ਪਵਾਲ਼ਵੇਦਿਕਾਪਰਿਕ੍ਖਿਤ੍ਤੋ ਵਿਯ ਸੁਵਣ੍ਣਪਾਸਾਦੋ ਵਿਰੋਚਿਤ੍ਥ. ਸਾਰਿਪੁਤ੍ਤਮੋਗ੍ਗਲ੍ਲਾਨਾਦਯੋ ਮਹਾਥੇਰਾਪਿ ਨਂ ਮੇਘਵਣ੍ਣਂ ਪਂਸੁਕੂਲਂ ਪਾਰੁਪਿਤ੍ਵਾ ਮਣਿਵਮ੍ਮਵਮ੍ਮਿਕਾ ਵਿਯ ਮਹਾਨਾਗਾ ਪਰਿਵਾਰਯਿਂਸੁ ਵਨ੍ਤਰਾਗਾ ਭਿਨ੍ਨਕਿਲੇਸਾ ਵਿਜਟਿਤਜਟਾ ਛਿਨ੍ਨਬਨ੍ਧਨਾ ਕੁਲੇ ਵਾ ਗਣੇ ਵਾ ਅਲਗ੍ਗਾ.
ਇਤਿ ਭਗਵਾ ਸਯਂ ਵੀਤਰਾਗੋ ਵੀਤਰਾਗੇਹਿ, ਵੀਤਦੋਸੋ ਵੀਤਦੋਸੇਹਿ, ਵੀਤਮੋਹੋ ਵੀਤਮੋਹੇਹਿ, ਨਿਤ੍ਤਣ੍ਹੋ ਨਿਤ੍ਤਣ੍ਹੇਹਿ, ਨਿਕ੍ਕਿਲੇਸੋ ਨਿਕ੍ਕਿਲੇਸੇਹਿ, ਸਯਂ ਬੁਦ੍ਧੋ ਬਹੁਸ੍ਸੁਤਬੁਦ੍ਧੇਹਿ ਪਰਿਵਾਰਿਤੋ, ਪਤ੍ਤਪਰਿਵਾਰਿਤਂ ਵਿਯ ਕੇਸਰਂ, ਕੇਸਰਪਰਿਵਾਰਿਤਾ ਵਿਯ ਕਣ੍ਣਿਕਾ, ਅਟ੍ਠਨਾਗਸਹਸ੍ਸਪਰਿਵਾਰਿਤੋ ਵਿਯ ਛਦ੍ਦਨ੍ਤੋ ਨਾਗਰਾਜਾ, ਨਵੁਤਿਹਂਸਸਹਸ੍ਸਪਰਿਵਾਰਿਤੋ ਵਿਯ ਧਤਰਟ੍ਠੋ ਹਂਸਰਾਜਾ, ਸੇਨਙ੍ਗਪਰਿਵਾਰਿਤੋ ਵਿਯ ਚਕ੍ਕਵਤ੍ਤਿ, ਮਰੁਗਣਪਰਿਵਾਰਿਤੋ ਵਿਯ ਸਕ੍ਕੋ ਦੇਵਰਾਜਾ, ਬ੍ਰਹ੍ਮਗਣਪਰਿਵਾਰਿਤੋ ਵਿਯ ਹਾਰਿਤਮਹਾਬ੍ਰਹ੍ਮਾ, ਤਾਰਾਗਣਪਰਿਵਾਰਿਤੋ ਵਿਯ ਪੁਣ੍ਣਚਨ੍ਦੋ, ਅਸਮੇਨ ਬੁਦ੍ਧਵੇਸੇਨ ਅਪਰਿਮਾਣੇਨ ਬੁਦ੍ਧਵਿਲਾਸੇਨ ਕਪਿਲਵਤ੍ਥੁਗਮਨਮਗ੍ਗਂ ਪਟਿਪਜ੍ਜਿ.
ਅਥਸ੍ਸ ਪੁਰਤ੍ਥਿਮਕਾਯਤੋ ਸੁਵਣ੍ਣਵਣ੍ਣਾ ਰਸ੍ਮੀ ਉਟ੍ਠਹਿਤ੍ਵਾ ਅਸੀਤਿਹਤ੍ਥਟ੍ਠਾਨਂ ਅਗ੍ਗਹੇਸਿ. ਪਚ੍ਛਿਮਕਾਯਤੋ ਦਕ੍ਖਿਣਹਤ੍ਥਤੋ, ਵਾਮਹਤ੍ਥਤੋ ਸੁਵਣ੍ਣਵਣ੍ਣਾ ਰਸ੍ਮੀ ਉਟ੍ਠਹਿਤ੍ਵਾ ਅਸੀਤਿਹਤ੍ਥਟ੍ਠਾਨਂ ਅਗ੍ਗਹੇਸਿ. ਉਪਰਿ ਕੇਸਨ੍ਤਤੋ ਪਟ੍ਠਾਯ ਸਬ੍ਬਕੇਸਾਵਤ੍ਤੇਹਿ ਮੋਰਗੀਵਵਣ੍ਣਾ ਰਸ੍ਮੀ ਉਟ੍ਠਹਿਤ੍ਵਾ ਗਗਨਤਲੇ ਅਸੀਤਿਹਤ੍ਥਟ੍ਠਾਨਂ ਅਗ੍ਗਹੇਸਿ. ਹੇਟ੍ਠਾ ਪਾਦਤਲੇਹਿ ਪਵਾਲ਼ਵਣ੍ਣਾ ਰਸ੍ਮੀ ਉਟ੍ਠਹਿਤ੍ਵਾ ਘਨਪਥਵਿਯਂ ਅਸੀਤਿਹਤ੍ਥਟ੍ਠਾਨਂ ਅਗ੍ਗਹੇਸਿ. ਏਵਂ ਸਮਨ੍ਤਾ ਅਸੀਤਿਹਤ੍ਥਮਤ੍ਤਂ ਠਾਨਂ ਛਬ੍ਬਣ੍ਣਾ ਬੁਦ੍ਧਰਸ੍ਮਿਯੋ ਵਿਜ੍ਜੋਤਮਾਨਾ ਵਿਪ੍ਫਨ੍ਦਮਾਨਾ ਕਞ੍ਚਨਦਣ੍ਡਦੀਪਿਕਾਹਿ ਨਿਚ੍ਛਰਿਤ੍ਵਾ ਆਕਾਸਂ ਪਕ੍ਖਨ੍ਦਜਾਲਾ ਵਿਯ ਚਾਤੁਦ੍ਦੀਪਿਕਮਹਾਮੇਘਤੋ ਨਿਕ੍ਖਨ੍ਤਵਿਜ੍ਜੁਲ੍ਲਤਾ ਵਿਯ ਵਿਧਾਵਿਂਸੁ. ਸਬ੍ਬਦਿਸਾਭਾਗਾ ਸੁਵਣ੍ਣਚਮ੍ਪਕਪੁਪ੍ਫੇਹਿ ਵਿਕਿਰਿਯਮਾਨਾ ਵਿਯ, ਸੁਵਣ੍ਣਘਟਾ ਨਿਕ੍ਖਨ੍ਤਸੁਵਣ੍ਣਰਸਧਾਰਾਹਿ ਸਿਞ੍ਚਮਾਨਾ ਵਿਯ, ਪਸਾਰਿਤਸੁਵਣ੍ਣਪਟਪਰਿਕ੍ਖਿਤ੍ਤਾ ਵਿਯ, ਵੇਰਮ੍ਭਵਾਤਸਮੁਟ੍ਠਿਤਕਿਂਸੁਕਕਣਿਕਾਰਪੁਪ੍ਫਚੁਣ੍ਣਸਮੋਕਿਣ੍ਣਾ ਵਿਯ ਵਿਪ੍ਪਕਿਰਿਂਸੁ.
ਭਗਵਤੋਪਿ ਅਸੀਤਿਅਨੁਬ੍ਯਞ੍ਜਨਬ੍ਯਾਮਪ੍ਪਭਾਦ੍ਵਤ੍ਤਿਂਸਵਰਲਕ੍ਖਣਸਮੁਜ੍ਜਲਂ ਸਰੀਰਂ ਸਮੁਗ੍ਗਤਤਾਰਕਂ ਵਿਯ ਗਗਨਤਲਂ, ਵਿਕਸਿਤਮਿਵ ਪਦੁਮਵਨਂ, ਸਬ੍ਬਪਾਲਿਫੁਲ੍ਲੋ ਵਿਯ ਯੋਜਨਸਤਿਕੋ ਪਾਰਿਚ੍ਛਤ੍ਤਕੋ, ਪਟਿਪਾਟਿਯਾ ਠਪਿਤਾਨਂ ਦ੍ਵਤ੍ਤਿਂਸੂਚਨ੍ਦਾਨਂ ਦ੍ਵਤ੍ਤਿਂਸਸੂਰਿਯਾਨਂ ਦ੍ਵਤ੍ਤਿਂਸਚਕ੍ਕਵਤ੍ਤੀਨਂ ਦ੍ਵਤ੍ਤਿਂਸਦੇਵਰਾਜਾਨਂ ਦ੍ਵਤ੍ਤਿਂਸਮਹਾਬ੍ਰਹ੍ਮਾਨਂ ਸਿਰਿਯਾ ਸਿਰਿਂ ਅਭਿਭਵਮਾਨਂ ਵਿਯ ਵਿਰੋਚਿਤ੍ਥ, ਯਥਾ ਤਂ ਦਸਹਿ ਪਾਰਮੀਹਿ ਦਸਹਿ ਉਪਪਾਰਮੀਹਿ ਦਸਹਿ ਪਰਮਤ੍ਥਪਾਰਮੀਹਿ ਸੁਪੂਰਿਤਾਹਿ ਸਮਤਿਂਸਪਾਰਮਿਤਾਹਿ ਅਲਙ੍ਕਤਂ. ਕਪ੍ਪਸਤਸਹਸਾਧਿਕਾਨਿ ਚਤ੍ਤਾਰਿ ਅਸਙ੍ਖ੍ਯੇਯ੍ਯਾਨਿ ਦਿਨ੍ਨਦਾਨਂ ਰਕ੍ਖਿਤਸੀਲਂ ਕਤਕਲ੍ਯਾਣਕਮ੍ਮਂ ਏਕਸ੍ਮਿਂ ਅਤ੍ਤਭਾਵੇ ਓਸਰਿਤ੍ਵਾ ਵਿਪਾਕਂ ਦਾਤੁਂ ਠਾਨਂ ਅਲਭਮਾਨਂ ਸਮ੍ਬਾਧਪਤ੍ਤਂ ਵਿਯ ਅਹੋਸਿ. ਨਾਵਾਸਹਸ੍ਸਭਣ੍ਡਂ ਏਕਨਾਵਂ ਆਰੋਪਨਕਾਲੋ ਵਿਯ, ਸਕਟਸਹਸ੍ਸਭਣ੍ਡਂ ਏਕਸਕਟਂ ਆਰੋਪਨਕਾਲੋ ਵਿਯ, ਪਞ੍ਚਵੀਸਤਿਯਾ ਨਦੀਨਂ ਓਘਸ੍ਸ ਸਮ੍ਭਿਜ੍ਜ ਮੁਖਦ੍ਵਾਰੇ ਏਕਤੋ ਰਾਸੀਭੂਤਕਾਲੋ ਵਿਯ ਚ ਅਹੋਸਿ.
ਇਮਾਯ ਬੁਦ੍ਧਸਿਰਿਯਾ ਓਭਾਸਮਾਨਸ੍ਸਾਪਿ ਚ ਭਗਵਤੋ ਪੁਰਤੋ ਅਨੇਕਾਨਿ ਦਣ੍ਡਦੀਪਿਕਸਹਸ੍ਸਾਨਿ ਉਕ੍ਖਿਪਿਂਸੁ. ਤਥਾ ਪਚ੍ਛਤੋ. ਵਾਮਪਸ੍ਸੇ ਦਕ੍ਖਿਣਪਸ੍ਸੇ. ਜਾਤਿਕੁਸੁਮਚਮ੍ਪਕਵਨਮਲ੍ਲਿਕਰਤ੍ਤੁਪ੍ਪਲਨੀਲੁਪ੍ਪਲਮਕੁਲਸਿਨ੍ਦੁਵਾਰਪੁਪ੍ਫਾਨਿ ਚੇਵ ਨੀਲਪੀਤਾਦਿਵਣ੍ਣਸੁਗਨ੍ਧਗਨ੍ਧਚੁਣ੍ਣਾਨਿ ਚ ਚਾਤੁਦ੍ਦੀਪਿਕਮੇਘਵਿਸ੍ਸਟ੍ਠੋਦਕਵੁਟ੍ਠਿਯੋ ਵਿਯ ਵਿਪ੍ਪਕਿਰਿਂਸੁ. ਪਞ੍ਚਙ੍ਗਿਕਤੂਰਿਯਨਿਗ੍ਘੋਸਾ ਚੇਵ ਬੁਦ੍ਧਧਮ੍ਮਸਙ੍ਘਗੁਣਪ੍ਪਟਿਸਂਯੁਤ੍ਤਾ ਥੁਤਿਘੋਸਾ ਚ ਸਬ੍ਬਦਿਸਾ ਪੂਰਯਿਂਸੁ. ਦੇਵਮਨੁਸ੍ਸਨਾਗਸੁਪਣ੍ਣਗਨ੍ਧਬ੍ਬਯਕ੍ਖਾਦੀਨਂ ਅਕ੍ਖੀਨਿ ਅਮਤਪਾਨਂ ਵਿਯ ਲਭਿਂਸੁ. ਇਮਸ੍ਮਿਂ ਪਨ ਠਾਨੇ ਠਤ੍ਵਾ ਪਦਸਹਸ੍ਸੇਨ ਗਮਨਵਣ੍ਣਂ ਵਤ੍ਤੁਂ ਵਟ੍ਟਤਿ. ਤਤ੍ਰਿਦਂ ਮੁਖਮਤ੍ਤਂ –
‘‘ਏਵਂ ਸਬ੍ਬਙ੍ਗਸਮ੍ਪਨ੍ਨੋ, ਕਮ੍ਪਯਨ੍ਤੋ ਵਸੁਨ੍ਧਰਂ;
ਅਹੇਠਯਨ੍ਤੋ ਪਾਣਾਨਿ, ਯਾਤਿ ਲੋਕਵਿਨਾਯਕੋ.
ਦਕ੍ਖਿਣਂ ਪਠਮਂ ਪਾਦਂ, ਉਦ੍ਧਰਨ੍ਤੋ ਨਰਾਸਭੋ;
ਗਚ੍ਛਨ੍ਤੋ ਸਿਰਿਸਮ੍ਪਨ੍ਨੋ, ਸੋਭਤੇ ਦ੍ਵਿਪਦੁਤ੍ਤਮੋ.
ਗਚ੍ਛਤੋ ਬੁਦ੍ਧਸੇਟ੍ਠਸ੍ਸ, ਹੇਟ੍ਠਾ ਪਾਦਤਲਂ ਮੁਦੁ;
ਸਮਂ ਸਮ੍ਫੁਸਤੇ ਭੂਮਿਂ, ਰਜਸਾ ਨੁਪਲਿਪ੍ਪਤਿ.
ਨਿਨ੍ਨਟ੍ਠਾਨਂ ਉਨ੍ਨਮਤਿ, ਗਚ੍ਛਨ੍ਤੇ ਲੋਕਨਾਯਕੇ;
ਉਨ੍ਨਤਞ੍ਚ ਸਮਂ ਹੋਤਿ, ਪਥਵੀ ਚ ਅਚੇਤਨਾ.
ਪਾਸਾਣਾ ਸਕ੍ਖਰਾ ਚੇਵ, ਕਥਲਾ ਖਾਣੁਕਣ੍ਟਕਾ;
ਸਬ੍ਬੇ ਮਗ੍ਗਾ ਵਿਵਜ੍ਜਨ੍ਤਿ, ਗਚ੍ਛਨ੍ਤੇ ਲੋਕਨਾਯਕੇ.
ਨਾਤਿਦੂਰੇ ਉਦ੍ਧਰਤਿ, ਨਚ੍ਚਾਸਨ੍ਨੇ ਚ ਨਿਕ੍ਖਿਪਂ;
ਅਘਟ੍ਟਯਨ੍ਤੋ ਨਿਯ੍ਯਾਤਿ, ਉਭੋ ਜਾਣੂ ਚ ਗੋਪ੍ਫਕੇ.
ਨਾਤਿਸੀਘਂ ਪਕ੍ਕਮਤਿ, ਸਮ੍ਪਨ੍ਨਚਰਣੋ ਮੁਨਿ;
ਨ ਚਾਤਿਸਣਿਕਂ ਯਾਤਿ, ਗਚ੍ਛਮਾਨੋ ਸਮਾਹਿਤੋ.
ਉਦ੍ਧਂ ਅਧੋ ਚ ਤਿਰਿਯਂ, ਦਿਸਞ੍ਚ ਵਿਦਿਸਂ ਤਥਾ;
ਨ ਪੇਕ੍ਖਮਾਨੋ ਸੋ ਯਾਤਿ, ਯੁਗਮਤ੍ਤਮ੍ਹਿ ਪੇਕ੍ਖਤਿ.
ਨਾਗਵਿਕ੍ਕਨ੍ਤਚਾਰੋ ਸੋ, ਗਮਨੇ ਸੋਭਤੇ ਜਿਨੋ;
ਚਾਰੁਂ ਗਚ੍ਛਤਿ ਲੋਕਗ੍ਗੋ, ਹਾਸਯਨ੍ਤੋ ਸਦੇਵਕੇ.
ਉਲ਼ੁਰਾਜਾਵ ਸੋਭਨ੍ਤੋ, ਚਤੁਚਾਰੀਵ ਕੇਸਰੀ;
ਤੋਸਯਨ੍ਤੋ ਬਹੂ ਸਤ੍ਤੇ, ਪੁਰਂ ਸੇਟ੍ਠਂ ਉਪਾਗਮੀ’’ਤਿ.
ਵਣ੍ਣਕਾਲੋ ਨਾਮ ਕਿਰੇਸ, ਏਵਂਵਿਧੇਸੁ ਕਾਲੇਸੁ ਬੁਦ੍ਧਸ੍ਸ ਸਰੀਰਵਣ੍ਣੇ ਵਾ ਗੁਣਵਣ੍ਣੇ ਵਾ ਧਮ੍ਮਕਥਿਕਸ੍ਸ ਥਾਮੋਯੇਵ ਪਮਾਣਂ ਚੁਣ੍ਣਿਯਪਦੇਹਿ ਵਾ ਗਾਥਾਬਨ੍ਧੇਨ ਵਾ ਯਤ੍ਤਕਂ ਸਕ੍ਕੋਤਿ, ਤਤ੍ਤਕਂ ਵਤ੍ਤਬ੍ਬਂ. ਦੁਕ੍ਕਥਿਤਨ੍ਤਿ ਨ ਵਤ੍ਤਬ੍ਬਂ. ਅਪ੍ਪਮਾਣਵਣ੍ਣਾ ਹਿ ਬੁਦ੍ਧਾ, ਤੇਸਂ ਬੁਦ੍ਧਾਪਿ ਅਨਵਸੇਸਤੋ ਵਣ੍ਣਂ ਵਤ੍ਤੁਂ ਅਸਮਤ੍ਥਾ, ਪਗੇਵ ਇਤਰਾ ਪਜਾਤਿ. ਇਮਿਨਾ ਸਿਰਿਵਿਲਾਸੇਨ ਅਲਙ੍ਕਤਪ੍ਪਟਿਯਤ੍ਤਂ ਸਕ੍ਯਰਾਜਪੁਰਂ ਪਵਿਸਿਤ੍ਵਾ ਭਗਵਾ ਪਸਨ੍ਨਚਿਤ੍ਤੇਨ ਜਨੇਨ ਗਨ੍ਧਧੂਮਵਾਸਚੁਣ੍ਣਾਦੀਹਿ ਪੂਜਯਮਾਨੋ ਸਨ੍ਥਾਗਾਰਂ ਪਾਵਿਸਿ. ਤੇਨ ਵੁਤ੍ਤਂ – ‘‘ਅਥ ਖੋ ਭਗਵਾ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਸਦ੍ਧਿਂ ਭਿਕ੍ਖੁਸਙ੍ਘੇਨ ਯੇਨ ਏਵਂ ਸਨ੍ਥਾਗਾਰਂ ਤੇਨੁਪਸਙ੍ਕਮੀ’’ਤਿ.
ਭਗਵਨ੍ਤਂਯੇਵ ਪੁਰਕ੍ਖਤ੍ਵਾਤਿ ਭਗਵਨ੍ਤਂ ਪੁਰਤੋ ਕਤ੍ਵਾ. ਤਤ੍ਥ ਭਗਵਾ ਭਿਕ੍ਖੂਨਞ੍ਚੇਵ ਉਪਾਸਕਾਨਞ੍ਚ ਮਜ੍ਝੇ ਨਿਸਿਨ੍ਨੋ ਗਨ੍ਧੋਦਕੇਨ ਨ੍ਹਾਪੇਤ੍ਵਾ ਦੁਕੂਲਚੁਮ੍ਬਟਕੇਨ ਵੋਦਕਂ ਕਤ੍ਵਾ ਜਾਤਿਹਿਙ੍ਗੁਲਕੇਨ ਮਜ੍ਜਿਤ੍ਵਾ ਰਤ੍ਤਕਮ੍ਬਲਪਲਿਵੇਠਿਤੇ ਪੀਠੇ ਠਪਿਤਰਤ੍ਤਸੁਵਣ੍ਣਘਨਪਟਿਮਾ ਵਿਯ ਅਤਿਵਿਰੋਚਿਤ੍ਥ. ਅਯਂ ਪਨੇਤ੍ਥ ਪੋਰਾਣਾਨਂ ਵਣ੍ਣਭਣਨਮਗ੍ਗੋ –
‘‘ਗਨ੍ਤ੍ਵਾਨ ਮਣ੍ਡਲਮਾਲ਼ਂ, ਨਾਗਵਿਕ੍ਕਨ੍ਤਚਰਣੋ;
ਓਭਾਸਯਨ੍ਤੋ ਲੋਕਗ੍ਗੋ, ਨਿਸੀਦਿ ਵਰਮਾਸਨੇ.
ਤਸ੍ਮਿਂ ਨਿਸਿਨ੍ਨੋ ਨਰਦਮ੍ਮਸਾਰਥਿ,
ਦੇਵਾਤਿਦੇਵੋ ਸਤਪੁਞ੍ਞਲਕ੍ਖਣੋ;
ਬੁਦ੍ਧਾਸਨੇ ਮਜ੍ਝਗਤੋ ਵਿਰੋਚਤਿ,
ਸੁਵਣ੍ਣਨੇਕ੍ਖਂ ਵਿਯ ਪਣ੍ਡੁਕਮ੍ਬਲੇ.
ਨੇਕ੍ਖਂ ਜਮ੍ਬੋਨਦਸ੍ਸੇਵ, ਨਿਕ੍ਖਿਤ੍ਤਂ ਪਣ੍ਡੁਕਮ੍ਬਲੇ;
ਵਿਰੋਚਤਿ ਵੀਤਮਲੋ, ਮਣਿਵੇਰੋਚਨੋ ਯਥਾ.
ਮਹਾਸਾਲੋਵ ਸਮ੍ਫੁਲ੍ਲੋ, ਨੇਰੁਰਾਜਾਵਲਙ੍ਕਤੋ;
ਸੁਵਣ੍ਣਯੂਪਸਙ੍ਕਾਸੋ, ਪਦੁਮੋ ਕੋਕਨਦੋ ਯਥਾ.
ਜਲਨ੍ਤੋ ਦੀਪਰੁਕ੍ਖੋਵ, ਪਬ੍ਬਤਗ੍ਗੇ ਯਥਾ ਸਿਖੀ;
ਦੇਵਾਨਂ ਪਾਰਿਚ੍ਛਤ੍ਤੋਵ, ਸਬ੍ਬਫੁਲ੍ਲੋ ਵਿਰੋਚਥਾ’’ਤਿ.
ਕਾਪਿਲਵਤ੍ਥਵੇ ਸਕ੍ਯੇ ਬਹੁਦੇਵ ਰਤ੍ਤਿਂ ਧਮ੍ਮਿਯਾ ਕਥਾਯਾਤਿ ਏਤ੍ਥ ਧਮ੍ਮੀ ਕਥਾ ਨਾਮ ਸਨ੍ਥਾਗਾਰਅਨੁਮੋਦਨਪ੍ਪਟਿਸਂਯੁਤ੍ਤਾ ਪਕਿਣ੍ਣਕਕਥਾ ਵੇਦਿਤਬ੍ਬਾ. ਤਦਾ ਹਿ ਭਗਵਾ ਆਕਾਸਗਙ੍ਗਂ ਓਤਾਰੇਨ੍ਤੋ ਵਿਯ ਪਥਵੋਜਂ ਆਕਡ੍ਢਨ੍ਤੋ ਵਿਯ ਮਹਾਜਮ੍ਬੁਂ ਖਨ੍ਧੇ ਗਹੇਤ੍ਵਾ ਚਾਲੇਨ੍ਤੋ ਵਿਯ ਯੋਜਨਿਕਂ ਮਧੁਭਣ੍ਡਂ ਚਕ੍ਕਯਨ੍ਤੇਨ ਪੀਲ਼ੇਤ੍ਵਾ ਮਧੁਪਾਨਂ ਪਾਯਮਾਨੋ ਵਿਯ ਕਾਪਿਲਵਤ੍ਥਵਾਨਂ ਸਕ੍ਯਾਨਂ ਹਿਤਸੁਖਾਵਹਂ ਪਕਿਣ੍ਣਕਕਥਂ ਕਥੇਸਿ. ‘‘ਆਵਾਸਦਾਨਂ ਨਾਮੇਤਂ ਮਹਾਰਾਜ ਮਹਨ੍ਤਂ, ਤੁਮ੍ਹਾਕਂ ਆਵਾਸੋ ਮਯਾ ਪਰਿਭੁਤ੍ਤੋ ਭਿਕ੍ਖੁਸਙ੍ਘੇਨ ਪਰਿਭੁਤ੍ਤੋ ਮਯਾ ਚ ਭਿਕ੍ਖੁਸਙ੍ਘੇਨ ਚ ਪਰਿਭੁਤ੍ਤੋ ਪਨ ਧਮ੍ਮਰਤਨੇਨ ਪਰਿਭੁਤ੍ਤੋ ਯੇਵਾਤਿ ਤੀਹਿ ਰਤਨੇਹਿ ਪਰਿਭੁਤ੍ਤੋ ਨਾਮ ਹੋਤਿ. ਆਵਾਸਦਾਨਸ੍ਮਿਞ੍ਹਿ ਦਿਨ੍ਨੇ ਸਬ੍ਬਦਾਨਂ ਦਿਨ੍ਨਮੇਵ ਹੋਤਿ. ਭੂਮਟ੍ਠਕਪਣ੍ਣਸਾਲਾਯ ਵਾ ਸਾਖਾਮਣ੍ਡਪਸ੍ਸ ਵਾਪਿ ਆਨਿਸਂਸੋ ਨਾਮ ਪਰਿਚ੍ਛਿਨ੍ਦਿਤੁਂ ਨ ਸਕ੍ਕਾ’’ਤਿ ਨਾਨਾਨਯਵਿਚਿਤ੍ਤਂ ਬਹੁਂ ਧਮ੍ਮਕਥਂ ਕਥੇਤ੍ਵਾ –
‘‘ਸੀਤਂ ਉਣ੍ਹਂ ਪਟਿਹਨ੍ਤਿ, ਤਤੋ ਵਾਲ਼ਮਿਗਾਨਿ ਚ;
ਸਰੀਸਪੇ ਚ ਮਕਸੇ, ਸਿਸਿਰੇ ਚਾਪਿ ਵੁਟ੍ਠਿਯੋ.
ਤਤੋ ਵਾਤਾਤਪੋ ਘੋਰੋ, ਸਞ੍ਜਾਤੋ ਪਟਿਹਞ੍ਞਤਿ;
ਲੇਣਤ੍ਥਞ੍ਚ ਸੁਖਤ੍ਥਞ੍ਚ, ਝਾਯਿਤੁਞ੍ਚ ਵਿਪਸ੍ਸਿਤੁਂ.
ਵਿਹਾਰਦਾਨਂ ਸਙ੍ਘਸ੍ਸ, ਅਗ੍ਗਂ ਬੁਦ੍ਧੇਨ ਵਣ੍ਣਿਤਂ;
ਤਸ੍ਮਾ ਹਿ ਪਣ੍ਡਿਤੋ ਪੋਸੋ, ਸਮ੍ਪਸ੍ਸਂ ਅਤ੍ਥਮਤ੍ਤਨੋ.
ਵਿਹਾਰੇ ਕਾਰਯੇ ਰਮ੍ਮੇ, ਵਾਸਯੇਤ੍ਥ ਬਹੁਸ੍ਸੁਤੇ;
ਤੇਸਂ ਅਨ੍ਨਞ੍ਚ ਪਾਨਞ੍ਚ, ਵਤ੍ਥਸੇਨਾਸਨਾਨਿ ਚ.
ਦਦੇਯ੍ਯ ਉਜੁਭੂਤੇਸੁ, ਵਿਪ੍ਪਸਨ੍ਨੇਨ ਚੇਤਸਾ;
ਤੇ ਤਸ੍ਸ ਧਮ੍ਮਂ ਦੇਸੇਨ੍ਤਿ, ਸਬ੍ਬਦੁਕ੍ਖਾਪਨੂਦਨਂ;
ਯਂ ਸੋ ਧਮ੍ਮਂ ਇਧਞ੍ਞਾਯ, ਪਰਿਨਿਬ੍ਬਾਤਿ ਅਨਾਸਵੋ’’ਤਿ. (ਚੂਲ਼ਵ. ੨੯੫) –
ਏਵਂ ਅਯਮ੍ਪਿ ਆਵਾਸੇ ਆਨਿਸਂਸੋ, ਅਯਮ੍ਪਿ ਆਨਿਸਂਸੋਤਿ ਬਹੁਦੇਵਰਤ੍ਤਿਂ ਅਤਿਰੇਕਤਰਂ ਦਿਯਡ੍ਢਯਾਮਂ ਆਵਾਸਾਨਿਸਂਸਕਥਂ ਕਥੇਸਿ. ਤਤ੍ਥ ਇਮਾ ਗਾਥਾਵ ਸਙ੍ਗਹਂ ਆਰੁਲ਼੍ਹਾ, ਪਕਿਣ੍ਣਕਧਮ੍ਮਦੇਸਨਾ ਪਨ ਸਙ੍ਗਹਂ ਨ ਆਰੋਹਤਿ. ਸਨ੍ਦਸ੍ਸੇਸੀਤਿਆਦੀਨਿ ਵੁਤ੍ਤਤ੍ਥਾਨੇਵ.
ਆਯਸ੍ਮਨ੍ਤਂ ਆਨਨ੍ਦਂ ਆਮਨ੍ਤੇਸੀਤਿ ਧਮ੍ਮਕਥਂ ਕਥਾਪੇਤੁਕਾਮੋ ਜਾਨਾਪੇਸਿ. ਅਥ ਕਸ੍ਮਾ ਸਾਰਿਪੁਤ੍ਤਮਹਾਮੋਗ੍ਗਲ੍ਲਾਨਮਹਾਕਸ੍ਸਪਾਦੀਸੁ ਅਸੀਤਿਮਹਾਥੇਰੇਸੁ ਵਿਜ੍ਜਮਾਨੇਸੁ ਭਗਵਾ ਆਨਨ੍ਦਤ੍ਥੇਰਸ੍ਸ ਭਾਰਮਕਾਸੀਤਿ. ਪਰਿਸਜ੍ਝਾਸਯਵਸੇਨ. ਆਯਸ੍ਮਾ ਹਿ ਆਨਨ੍ਦੋ ਬਹੁਸ੍ਸੁਤਾਨਂ ਅਗ੍ਗੋ, ਪਹੋਸਿ ਪਰਿਮਣ੍ਡਲੇਹਿ ਪਦਬ੍ਯਞ੍ਜਨੇਹਿ ਮਧੁਰਧਮ੍ਮਕਥਂ ਕਥੇਤੁਨ੍ਤਿ ਸਾਕਿਯਮਣ੍ਡਲੇ ਪਾਕਟੋ ਪਞ੍ਞਾਤੋ. ਤਸ੍ਸ ਸਕ੍ਯਰਾਜੂਹਿ ਵਿਹਾਰਂ ਗਨ੍ਤ੍ਵਾਪਿ ਧਮ੍ਮਕਥਾ ਸੁਤਪੁਬ੍ਬਾ, ਓਰੋਧਾ ਪਨ ਨੇਸਂ ਨ ਯਥਾਰੁਚਿਯਾ ਵਿਹਾਰਂ ਗਨ੍ਤੁਂ ਲਭਨ੍ਤਿ, ਤੇਸਂ ਏਤਦਹੋਸਿ – ‘‘ਅਹੋ ਵਤ ਭਗਵਾ ਅਪ੍ਪਂਯੇਵ ਧਮ੍ਮਕਥਂ ਕਥੇਤ੍ਵਾ ਅਮ੍ਹਾਕਂ ਞਾਤਿਸੇਟ੍ਠਸ੍ਸ ਆਨਨ੍ਦਸ੍ਸ ਭਾਰਂ ਕਰੇਯ੍ਯਾ’’ਤਿ. ਤੇਸਂ ਅਜ੍ਝਾਸਯਵਸੇਨ ਭਗਵਾ ਤਸ੍ਸੇਵ ਭਾਰਮਕਾਸਿ.
ਸੇਖੋ ਪਾਟਿਪਦੋਤਿ ਪਟਿਪਨ੍ਨਕੋ ਸੇਖਸਮਣੋ. ਸੋ ਤੁਯ੍ਹਂ ਪਟਿਭਾਤੁ ਉਪਟ੍ਠਾਤੁ, ਤਸ੍ਸ ਪਟਿਪਦਂ ਦੇਸੇਹੀਤਿ ਪਟਿਪਦਾਯ ਪੁਗ੍ਗਲਂ ਨਿਯਮੇਤ੍ਵਾ ਦਸ੍ਸੇਤਿ. ਕਸ੍ਮਾ ਪਨ ਭਗਵਾ ਇਮਂ ਪਟਿਪਦਂ ਨਿਯਮੇਸਿ? ਬਹੂਹਿ ਕਾਰਣੇਹਿ. ਇਮੇ ਤਾਵ ਸਕ੍ਯਾ ਮਙ੍ਗਲਸਾਲਾਯ ਮਙ੍ਗਲਂ ਪਚ੍ਚਾਸੀਸਨ੍ਤਿ ਵਡ੍ਢਿਂ ਇਚ੍ਛਨ੍ਤਿ, ਅਯਞ੍ਚ ਸੇਖਪਟਿਪਦਾ ਮਯ੍ਹਂ ਸਾਸਨੇ ਮਙ੍ਗਲਪਟਿਪਦਾ ਵਡ੍ਢਮਾਨਕਪਟਿਪਦਾਤਿਪਿ ਇਮਂ ਪਟਿਪਦਂ ਨਿਯਮੇਸਿ. ਤਸ੍ਸਞ੍ਚ ਪਰਿਸਤਿ ਸੇਖਾਵ ਬਹੂ ਨਿਸਿਨ੍ਨਾ, ਤੇ ਅਤ੍ਤਨਾ ਪਟਿਵਿਦ੍ਧਟ੍ਠਾਨੇ ਕਥੀਯਮਾਨੇ ਅਕਿਲਮਨ੍ਤਾਵ ਸਲ੍ਲਕ੍ਖੇਸ੍ਸਨ੍ਤੀਤਿਪਿ ਇਮਂ ਪਟਿਪਦਂ ਨਿਯਮੇਸਿ. ਆਯਸ੍ਮਾ ਚ ਆਨਨ੍ਦੋ ਸੇਖਪਟਿਸਮ੍ਭਿਦਾਪਤ੍ਤੋਵ, ਸੋ ਅਤ੍ਤਨਾ ਪਟਿਵਿਦ੍ਧੇ ਪਚ੍ਚਕ੍ਖਟ੍ਠਾਨੇ ਕਥੇਨ੍ਤੋ ਅਕਿਲਮਨ੍ਤੋ ਵਿਞ੍ਞਾਪੇਤੁਂ ਸਕ੍ਖਿਸ੍ਸਤੀਤਿਪਿ ਇਮਂ ਪਟਿਪਦਂ ਨਿਯਮੇਸਿ. ਸੇਖਪਟਿਪਦਾਯ ਚ ਤਿਸ੍ਸੋਪਿ ਸਿਕ੍ਖਾ ਓਸਟਾ, ਤਤ੍ਥ ਅਧਿਸੀਲਸਿਕ੍ਖਾਯ ਕਥਿਤਾਯ ਸਕਲਂ ਵਿਨਯਪਿਟਕਂ ਕਥਿਤਮੇਵ ਹੋਤਿ, ਅਧਿਚਿਤ੍ਤਸਿਕ੍ਖਾਯ ਕਥਿਤਾਯ ਸਕਲਂ ਸੁਤ੍ਤਨ੍ਤਪਿਟਕਂ ਕਥਿਤਂ ਹੋਤਿ, ਅਧਿਪਞ੍ਞਾਸਿਕ੍ਖਾਯ ਕਥਿਤਾਯ ਸਕਲਂ ਅਭਿਧਮ੍ਮਪਿਟਕਂ ਕਥਿਤਂ ਹੋਤਿ, ਆਨਨ੍ਦੋ ਚ ਬਹੁਸ੍ਸੁਤੋ ਤਿਪਿਟਕਧਰੋ, ਸੋ ਪਹੋਤਿ ਤੀਹਿ ਪਿਟਕੇਹਿ ਤਿਸ੍ਸੋ ਸਿਕ੍ਖਾ ਕਥੇਤੁਂ, ਏਵਂ ਕਥਿਤੇ ਸਕ੍ਯਾਨਂ ਮਙ੍ਗਲਮੇਵ ਵਡ੍ਢਿਯੇਵ ਭਵਿਸ੍ਸਤੀਤਿਪਿ ਇਮਂ ਪਟਿਪਦਂ ਨਿਯਮੇਸਿ.
ਪਿਟ੍ਠਿ ਮੇ ਆਗਿਲਾਯਤੀਤਿ ਕਸ੍ਮਾ ਆਗਿਲਾਯਤਿ? ਭਗਵਤੋ ਹਿ ਛਬ੍ਬਸ੍ਸਾਨਿ ਪਧਾਨਂ ਪਦਹਨ੍ਤਸ੍ਸ ਮਹਨ੍ਤਂ ਕਾਯਦੁਕ੍ਖਂ ਅਹੋਸਿ, ਅਥਸ੍ਸ ਅਪਰਭਾਗੇ ਮਹਲ੍ਲਕਕਾਲੇ ਪਿਟ੍ਠਿਵਾਤੋ ਉਪ੍ਪਜ੍ਜਿ. ਅਕਾਰਣਂ ਵਾ ਏਤਂ. ਪਹੋਤਿ ਹਿ ਭਗਵਾ ਉਪ੍ਪਨ੍ਨਂ ਵੇਦਨਂ ਵਿਕ੍ਖਮ੍ਭੇਤ੍ਵਾ ਏਕਮ੍ਪਿ ਦ੍ਵੇਪਿ ਸਤ੍ਤਾਹੇ ਏਕਪਲ੍ਲਙ੍ਕੇਨ ਨਿਸੀਦਿਤੁਂ. ਸਨ੍ਥਾਗਾਰਸਾਲਂ ਪਨ ਚਤੂਹਿ ਇਰਿਯਾਪਥੇਹਿ ਪਰਿਭੁਞ੍ਜਿਤੁਕਾਮੋ ਅਹੋਸਿ, ਤਤ੍ਥ ਪਾਦਧੋਵਨਟ੍ਠਾਨਤੋ ਯਾਵ ਧਮ੍ਮਾਸਨਾ ਅਗਮਾਸਿ, ਏਤ੍ਤਕੇ ਠਾਨੇ ਗਮਨਂ ਨਿਪ੍ਫਨ੍ਨਂ. ਧਮ੍ਮਾਸਨਂ ਪਤ੍ਤੋ ਥੋਕਂ ਠਤ੍ਵਾ ਨਿਸੀਦਿ, ਏਤ੍ਤਕੇ ਠਾਨਂ. ਦਿਯਡ੍ਢਯਾਮਂ ਧਮ੍ਮਾਸਨੇ ਨਿਸੀਦਿ, ਏਤ੍ਤਕੇ ਠਾਨੇ ਨਿਸਜ੍ਜਾ ਨਿਪ੍ਫਨ੍ਨਾ. ਇਦਾਨਿ ਦਕ੍ਖਿਣੇਨ ਪਸ੍ਸੇਨ ਥੋਕਂ ਨਿਪਨ੍ਨੇ ਸਯਨਂ ਨਿਪ੍ਫਜ੍ਜਿਸ੍ਸਤੀਤਿ ਏਵਂ ਚਤੂਹਿ ਇਰਿਯਾਪਥੇਹਿ ਪਰਿਭੁਞ੍ਜਿਤੁਕਾਮੋ ਅਹੋਸਿ. ਉਪਾਦਿਨ੍ਨਕਸਰੀਰਞ੍ਚ ਨਾਮ ‘‘ਨੋ ਆਗਿਲਾਯਤੀ’’ਤਿ ਨ ਵਤ੍ਤਬ੍ਬਂ, ਤਸ੍ਮਾ ਚਿਰਂ ਨਿਸਜ੍ਜਾਯ ਸਞ੍ਜਾਤਂ ਅਪ੍ਪਕਮ੍ਪਿ ਆਗਿਲਾਯਨਂ ਗਹੇਤ੍ਵਾ ਏਵਮਾਹ.
ਸਙ੍ਘਾਟਿਂ ਪਞ੍ਞਾਪੇਤ੍ਵਾਤਿ ਸਨ੍ਥਾਗਾਰਸ੍ਸ ਕਿਰ ਏਕਪਸ੍ਸੇ ਤੇ ਰਾਜਾਨੋ ਪਟ੍ਟਸਾਣਿਂ ਪਰਿਕ੍ਖਿਪਾਪੇਤ੍ਵਾ ਕਪ੍ਪਿਯਮਞ੍ਚਕਂ ਪਞ੍ਞਪੇਤ੍ਵਾ ਕਪ੍ਪਿਯਪਚ੍ਚਤ੍ਥਰਣੇਨ ਅਤ੍ਥਰਿਤ੍ਵਾ ਉਪਰਿ ਸੁਵਣ੍ਣ-ਤਾਰਕ-ਗਨ੍ਧਮਾਲਾ-ਦਾਮਪਟਿਮਣ੍ਡਿਤਂ ਵਿਤਾਨਂ ਬਨ੍ਧਿਤ੍ਵਾ ਗਨ੍ਧਤੇਲਪ੍ਪਦੀਪਂ ਆਰੋਪਯਿਂਸੁ ‘‘ਅਪ੍ਪੇਵ ਨਾਮ ਸਤ੍ਥਾ ਧਮ੍ਮਾਸਨਤੋ ਵੁਟ੍ਠਾਯ ਥੋਕਂ ਵਿਸ੍ਸਮਨ੍ਤੋ ਇਧ ਨਿਪਜ੍ਜੇਯ੍ਯ, ਏਵਂ ਨੋ ਇਮਂ ਸਨ੍ਥਾਗਾਰਂ ਭਗਵਤਾ ਚਤੂਹਿ ਇਰਿਯਾਪਥੇਹਿ ਪਰਿਭੁਤ੍ਤਂ ਦੀਘਰਤ੍ਤਂ ਹਿਤਾਯ ਸੁਖਾਯ ਭਵਿਸ੍ਸਤੀ’’ਤਿ. ਸਤ੍ਥਾਪਿ ਤਦੇਵ ਸਨ੍ਧਾਯ ਤਤ੍ਥ ਸਙ੍ਘਾਟਿਂ ਪਞ੍ਞਪੇਤ੍ਵਾ ਨਿਪਜ੍ਜਿ. ਉਟ੍ਠਾਨਸਞ੍ਞਂ ਮਨਸਿ ਕਰਿਤ੍ਵਾਤਿ ਏਤ੍ਤਕਂ ਕਾਲਂ ਅਤਿਕ੍ਕਮਿਤ੍ਵਾ ਵੁਟ੍ਠਹਿਸ੍ਸਾਮੀਤਿ ਵੁਟ੍ਠਾਨਸਞ੍ਞਂ ਚਿਤ੍ਤੇ ਠਪੇਤ੍ਵਾ.
੨੩. ਮਹਾਨਾਮਂ ਸਕ੍ਕਂ ਆਮਨ੍ਤੇਸੀਤਿ ਸੋ ਕਿਰ ਤਸ੍ਮਿਂ ਕਾਲੇ ਤਸ੍ਸਂ ਪਰਿਸਤਿ ਜੇਟ੍ਠਕੋ ਪਾਮੋਕ੍ਖੋ, ਤਸ੍ਮਿਂ ਸਙ੍ਗਹਿਤੇ ਸੇਸਪਰਿਸਾ ਸਙ੍ਗਹਿਤਾਵ ਹੋਤੀਤਿ ਥੇਰੋ ਤਮੇਵ ਆਮਨ੍ਤੇਸਿ. ਸੀਲਸਮ੍ਪਨ੍ਨੋਤਿ ਸੀਲੇਨ ਸਮ੍ਪਨ੍ਨੋ, ਸਮ੍ਪਨ੍ਨਸੀਲੋ ਪਰਿਪੁਣ੍ਣਸੀਲੋਤਿ ਅਤ੍ਥੋ. ਸਦ੍ਧਮ੍ਮੇਹੀਤਿ ਸੁਨ੍ਦਰਧਮ੍ਮੇਹਿ, ਸਤਂ ਵਾ ਸਪ੍ਪੁਰਿਸਾਨਂ ਧਮ੍ਮੇਹਿ.
੨੪. ਕਥਞ੍ਚ ਮਹਾਨਾਮਾਤਿ ਇਮਿਨਾ ਏਤ੍ਤਕੇਨ ਠਾਨੇਨ ਸੇਖਪਟਿਪਦਾਯ ਮਾਤਿਕਂ ਠਪੇਤ੍ਵਾ ਪਟਿਪਾਟਿਯਾ ਵਿਤ੍ਥਾਰੇਤੁਕਾਮੋ ਏਵਮਾਹ. ਤਤ੍ਥ ਸੀਲਸਮ੍ਪਨ੍ਨੋਤਿਆਦੀਨਿ ‘‘ਸਮ੍ਪਨ੍ਨਸੀਲਾ, ਭਿਕ੍ਖਵੇ, ਵਿਹਰਥਾ’’ਤਿ ਆਕਙ੍ਖੇਯ੍ਯਸੁਤ੍ਤਾਦੀਸੁ ਵੁਤ੍ਤਨਯੇਨੇਵ ਵੇਦਿਤਬ੍ਬਾਨਿ.
੨੫. ਕਾਯਦੁਚ੍ਚਰਿਤੇਨਾਤਿਆਦੀਸੁ ਉਪਯੋਗਤ੍ਥੇ ਕਰਣਵਚਨਂ, ਹਿਰਿਯਿਤਬ੍ਬਾਨਿ ਕਾਯਦੁਚ੍ਚਰਿਤਾਦੀਨਿ ਹਿਰਿਯਤਿ ਜਿਗੁਚ੍ਛਤੀਤਿ ਅਤ੍ਥੋ. ਓਤ੍ਤਪ੍ਪਨਿਦ੍ਦੇਸੇ ਹੇਤ੍ਵਤ੍ਥੇ ਕਰਣਵਚਨਂ, ਕਾਯਦੁਚ੍ਚਰਿਤਾਦੀਹਿ ਓਤ੍ਤਪ੍ਪਸ੍ਸ ਹੇਤੁਭੂਤੇਹਿ ਓਤ੍ਤਪ੍ਪਤਿ ਭਾਯਤੀਤਿ ਅਤ੍ਥੋ. ਆਰਦ੍ਧਵੀਰਿਯੋਤਿ ਪਗ੍ਗਹਿਤਵੀਰਿਯੋ ਅਨੋਸਕ੍ਕਿਤਮਾਨਸੋ. ਪਹਾਨਾਯਾਤਿ ਪਹਾਨਤ੍ਥਾਯ. ਉਪਸਮ੍ਪਦਾਯਾਤਿ ਪਟਿਲਾਭਤ੍ਥਾਯ. ਥਾਮਵਾਤਿ ਵੀਰਿਯਥਾਮੇਨ ਸਮਨ੍ਨਾਗਤੋ. ਦਲ਼੍ਹਪਰਕ੍ਕਮੋਤਿ ਥਿਰਪਰਕ੍ਕਮੋ. ਅਨਿਕ੍ਖਿਤ੍ਤਧੁਰੋ ਕੁਸਲੇਸੁ ਧਮ੍ਮੇਸੂਤਿ ਕੁਸਲੇਸੁ ਧਮ੍ਮੇਸੁ ਅਨੋਰੋਪਿਤਧੁਰੋ ਅਨੋਸਕ੍ਕਿਤਵੀਰਿਯੋ. ਪਰਮੇਨਾਤਿ ਉਤ੍ਤਮੇਨ. ਸਤਿਨੇਪਕ੍ਕੇਨਾਤਿ ਸਤਿਯਾ ਚ ਨਿਪਕਭਾਵੇਨ ਚ. ਕਸ੍ਮਾ ਪਨ ਸਤਿਭਾਜਨਿਯੇ ਪਞ੍ਞਾ ਆਗਤਾਤਿ? ਸਤਿਯਾ ਬਲਵਭਾਵਦੀਪਨਤ੍ਥਂ. ਪਞ੍ਞਾਵਿਪ੍ਪਯੁਤ੍ਤਾ ਹਿ ਸਤਿ ਦੁਬ੍ਬਲਾ ਹੋਤਿ, ਸਮ੍ਪਯੁਤ੍ਤਾ ਬਲਵਤੀਤਿ.
ਚਿਰਕਤਮ੍ਪੀਤਿ ਅਤ੍ਤਨਾ ਵਾ ਪਰੇਨ ਵਾ ਕਾਯੇਨ ਚਿਰਕਤਂ ਚੇਤਿਯਙ੍ਗਣਵਤ੍ਤਾਦਿ ਅਸੀਤਿ ਮਹਾਵਤ੍ਤਪਟਿਪਤ੍ਤਿਪੂਰਣਂ. ਚਿਰਭਾਸਿਤਮ੍ਪੀਤਿ ਅਤ੍ਤਨਾ ਵਾ ਪਰੇਨ ਵਾ ਵਾਚਾਯ ਚਿਰਭਾਸਿਤਂ ਸਕ੍ਕਚ੍ਚਂ ਉਦ੍ਦਿਸਨ-ਉਦ੍ਦਿਸਾਪਨ-ਧਮ੍ਮੋਸਾਰਣ-ਧਮ੍ਮਦੇਸਨਾ-ਉਪਨਿਸਿਨ੍ਨਕਥਾ-ਅਨੁਮੋਦਨਿਯਾਦਿਵਸੇਨ ਪਵਤ੍ਤਿਤਂ ਵਚੀਕਮ੍ਮਂ. ਸਰਿਤਾ ਅਨੁਸ੍ਸਰਿਤਾਤਿ ਤਸ੍ਮਿਂ ਕਾਯੇਨ ਚਿਰਕਤੇ ‘‘ਕਾਯੋ ਨਾਮ ਕਾਯਵਿਞ੍ਞਤ੍ਤਿ, ਚਿਰਭਾਸਿਤੇ ਵਾਚਾ ਨਾਮ ਵਚੀਵਿਞ੍ਞਤ੍ਤਿ. ਤਦੁਭਯਮ੍ਪਿ ਰੂਪਂ, ਤਂਸਮੁਟ੍ਠਾਪਿਕਾ ਚਿਤ੍ਤਚੇਤਸਿਕਾ ਅਰੂਪਂ. ਇਤਿ ਇਮੇ ਰੂਪਾਰੂਪਧਮ੍ਮਾ ਏਵਂ ਉਪ੍ਪਜ੍ਜਿਤ੍ਵਾ ਏਵਂ ਨਿਰੁਦ੍ਧਾ’’ਤਿ ਸਰਤਿ ਚੇਵ ਅਨੁਸ੍ਸਰਤਿ ਚ, ਸਤਿਸਮ੍ਬੋਜ੍ਝਙ੍ਗਂ ਸਮੁਟ੍ਠਾਪੇਤੀਤਿ ਅਤ੍ਥੋ. ਬੋਜ੍ਝਙ੍ਗਸਮੁਟ੍ਠਾਪਿਕਾ ਹਿ ਸਤਿ ਇਧ ਅਧਿਪ੍ਪੇਤਾ. ਤਾਯ ਸਤਿਯਾ ਏਸ ਸਕਿਮ੍ਪਿ ਸਰਣੇਨ ਸਰਿਤਾ, ਪੁਨਪ੍ਪੁਨਂ ਸਰਣੇਨ ਅਨੁਸ੍ਸਰਿਤਾਤਿ ਵੇਦਿਤਬ੍ਬਾ.
ਉਦਯਤ੍ਥਗਾਮਿਨਿਯਾਤਿ ਪਞ੍ਚਨ੍ਨਂ ਖਨ੍ਧਾਨਂ ਉਦਯਵਯਗਾਮਿਨਿਯਾ ਉਦਯਞ੍ਚ ਵਯਞ੍ਚ ਪਟਿਵਿਜ੍ਝਿਤੁਂ ਸਮਤ੍ਥਾਯ. ਅਰਿਯਾਯਾਤਿ ਵਿਕ੍ਖਮ੍ਭਨਵਸੇਨ ਚ ਸਮੁਚ੍ਛੇਦਵਸੇਨ ਚ ਕਿਲੇਸੇਹਿ ਆਰਕਾ ਠਿਤਾਯ ਪਰਿਸੁਦ੍ਧਾਯ. ਪਞ੍ਞਾਯ ਸਮਨ੍ਨਾਗਤੋਤਿ ਵਿਪਸ੍ਸਨਾਪਞ੍ਞਾਯ ਚੇਵ ਮਗ੍ਗਪਞ੍ਞਾਯ ਚ ਸਮਙ੍ਗੀਭੂਤੋ. ਨਿਬ੍ਬੇਧਿਕਾਯਾਤਿ ਸਾਯੇਵ ਨਿਬ੍ਬਿਜ੍ਝਨਤੋ ਨਿਬ੍ਬੇਧਿਕਾਤਿ ਵੁਚ੍ਚਤਿ, ਤਾਯ ਸਮਨ੍ਨਾਗਤੋਤਿ ਅਤ੍ਥੋ. ਤਤ੍ਥ ਮਗ੍ਗਪਞ੍ਞਾਯ ਸਮੁਚ੍ਛੇਦਵਸੇਨ ਅਨਿਬ੍ਬਿਦ੍ਧਪੁਬ੍ਬਂ ਅਪਦਾਲਿਤਪੁਬ੍ਬਂ ਲੋਭਕ੍ਖਨ੍ਧਂ ਦੋਸਕ੍ਖਨ੍ਧਂ ਮੋਹਕ੍ਖਨ੍ਧਂ ਨਿਬ੍ਬਿਜ੍ਝਤਿ ਪਦਾਲੇਤੀਤਿ ਨਿਬ੍ਬੇਧਿਕਾ. ਵਿਪਸ੍ਸਨਾਪਞ੍ਞਾਯ ਤਦਙ੍ਗਵਸੇਨ ਨਿਬ੍ਬੇਧਿਕਾਯ ਮਗ੍ਗਪਞ੍ਞਾਯ ਪਟਿਲਾਭਸਂਵਤ੍ਤਨਤੋ ਚਾਤਿ ਵਿਪਸ੍ਸਨਾ ‘‘ਨਿਬ੍ਬੇਧਿਕਾ’’ਤਿ ਵਤ੍ਤੁਂ ਵਟ੍ਟਤਿ. ਸਮ੍ਮਾ ਦੁਕ੍ਖਕ੍ਖਯਗਾਮਿਨਿਯਾਤਿ ਇਧਾਪਿ ਮਗ੍ਗਪਞ੍ਞਾ ‘‘ਸਮ੍ਮਾ ਹੇਤੁਨਾ ਨਯੇਨ ਵਟ੍ਟਦੁਕ੍ਖਂ ਖੇਪਯਮਾਨਾ ਗਚ੍ਛਤੀਤਿ ਸਮ੍ਮਾ ਦੁਕ੍ਖਕ੍ਖਯਗਾਮਿਨੀ ਨਾਮ. ਵਿਪਸ੍ਸਨਾ ਤਦਙ੍ਗਵਸੇਨ ਵਟ੍ਟਦੁਕ੍ਖਞ੍ਚ ਕਿਲੇਸਦੁਕ੍ਖਞ੍ਚ ਖੇਪਯਮਾਨਾ ਗਚ੍ਛਤੀਤਿ ਦੁਕ੍ਖਕ੍ਖਯਗਾਮਿਨੀ. ਦੁਕ੍ਖਕ੍ਖਯਗਾਮਿਨਿਯਾ ਵਾ ਮਗ੍ਗਪਞ੍ਞਾਯ ਪਟਿਲਾਭਸਂਵਤ੍ਤਨਤੋ ਏਸਾ ਦੁਕ੍ਖਕ੍ਖਯਗਾਮਿਨੀ’’ਤਿ ਵੇਦਿਤਬ੍ਬਾ.
੨੬. ਅਭਿਚੇਤਸਿਕਾਨਨ੍ਤਿ ਅਭਿਚਿਤ੍ਤਂ ਸੇਟ੍ਠਚਿਤ੍ਤਂ ਸਿਤਾਨਂ ਨਿਸ੍ਸਿਤਾਨਂ. ਦਿਟ੍ਠਧਮ੍ਮਸੁਖਵਿਹਾਰਾਨਨ੍ਤਿ ਅਪ੍ਪਿਤਪ੍ਪਿਤਕ੍ਖਣੇ ਸੁਖਪਟਿਲਾਭਹੇਤੂਨਂ. ਨਿਕਾਮਲਾਭੀਤਿ ਇਚ੍ਛਿਤਿਚ੍ਛਿਤਕ੍ਖਣੇ ਸਮਾਪਜ੍ਜਿਤਾ. ਅਕਿਚ੍ਛਲਾਭੀਤਿ ਨਿਦੁਕ੍ਖਲਾਭੀ. ਅਕਸਿਰਲਾਭੀਤਿ ਵਿਪੁਲਲਾਭੀ. ਪਗੁਣਭਾਵੇਨ ਏਕੋ ਇਚ੍ਛਿਤਿਚ੍ਛਿਤਕ੍ਖਣੇ ਸਮਾਪਜ੍ਜਿਤੁਂ ਸਕ੍ਕੋਤਿ, ਸਮਾਧਿਪਾਰਿਪਨ੍ਥਿਕਧਮ੍ਮੇ ਪਨ ਅਕਿਲਮਨ੍ਤੋ ਵਿਕ੍ਖਮ੍ਭੇਤੁਂ ਨ ਸਕ੍ਕੋਤਿ, ਸੋ ਅਤ੍ਤਨੋ ਅਨਿਚ੍ਛਾਯ ਖਿਪ੍ਪਮੇਵ ਵੁਟ੍ਠਾਤਿ, ਯਥਾਪਰਿਚ੍ਛੇਦਵਸੇਨ ਸਮਾਪਤ੍ਤਿਂ ਠਪੇਤੁਂ ਨ ਸਕ੍ਕੋਤਿ ਅਯਂ ਕਿਚ੍ਛਲਾਭੀ ਕਸਿਰਲਾਭੀ ਨਾਮ. ਏਕੋ ਇਚ੍ਛਿਤਿਚ੍ਛਿਤਕ੍ਖਣੇ ਚ ਸਮਾਪਜ੍ਜਿਤੁਂ ਸਕ੍ਕੋਤਿ, ਸਮਾਧਿਪਾਰਿਪਨ੍ਥਿਕਧਮ੍ਮੇ ਚ ਅਕਿਲਮਨ੍ਤੋ ਵਿਕ੍ਖਮ੍ਭੇਤਿ, ਸੋ ਯਥਾਪਰਿਚ੍ਛੇਦਵਸੇਨੇਵ ਵੁਟ੍ਠਾਤੁਂ ਸਕ੍ਕੋਤਿ, ਅਯਂ ਅਕਿਚ੍ਛਲਾਭੀ ਅਕਸਿਰਲਾਭੀ ਨਾਮ.
੨੭. ਅਯਂ ਵੁਚ੍ਚਤਿ ਮਹਾਨਾਮ ਅਰਿਯਸਾਵਕੋ ਸੇਖੋ ਪਾਟਿਪਦੋਤਿ ਮਹਾਨਾਮ ਅਰਿਯਸਾਵਕੋ ਸੇਖੋ ਪਾਟਿਪਦੋ ਵਿਪਸ੍ਸਨਾਗਬ੍ਭਾਯ ਵਡ੍ਢਮਾਨਕਪਟਿਪਦਾਯ ਸਮਨ੍ਨਾਗਤੋਤਿ ਵੁਚ੍ਚਤੀਤਿ ਦਸ੍ਸੇਤਿ. ਅਪੁਚ੍ਚਣ੍ਡਤਾਯਾਤਿ ਅਪੂਤਿਅਣ੍ਡਤਾਯ. ਭਬ੍ਬੋ ਅਭਿਨਿਬ੍ਭਿਦਾਯਾਤਿ ਵਿਪਸ੍ਸਨਾਦਿਞਾਣਪ੍ਪਭੇਦਾਯ ਭਬ੍ਬੋ. ਸਮ੍ਬੋਧਾਯਾਤਿ ਅਰਿਯਮਗ੍ਗਾਯ. ਅਨੁਤ੍ਤਰਸ੍ਸ ਯੋਗਕ੍ਖੇਮਸ੍ਸਾਤਿ ਅਰਹਤ੍ਤਂ ਅਨੁਤ੍ਤਰੋ ਯੋਗਕ੍ਖੇਮੋ ਨਾਮ, ਤਦਭਿਗਮਾਯ ਭਬ੍ਬੋਤਿ ਦਸ੍ਸੇਤਿ. ਯਾ ਪਨਾਯਮੇਤ੍ਥ ਅਤ੍ਥਦੀਪਨਤ੍ਥਂ ਉਪਮਾ ਆਹਟਾ, ਸਾ ਚੇਤੋਖਿਲਸੁਤ੍ਤੇ ਵੁਤ੍ਤਨਯੇਨੇਵ ਵੇਦਿਤਬ੍ਬਾ. ਕੇਵਲਞ੍ਹਿ ਤਤ੍ਥ ‘‘ਤਸ੍ਸਾ ਕੁਕ੍ਕੁਟਿਯਾ ਅਣ੍ਡੇਸੁ ਤਿਵਿਧਕਿਰਿਯਕਰਣਂ ਵਿਯ ਹਿ ਇਮਸ੍ਸ ਭਿਕ੍ਖੁਨੋ ਉਸ੍ਸੋਲ਼੍ਹਿਪਨ੍ਨਰਸੇਹਿ ਅਙ੍ਗੇਹਿ ਸਮਨ੍ਨਾਗਤਭਾਵੋ’’ਤਿ ਯਂ ਏਵਂ ਓਪਮ੍ਮਸਂਸਨ੍ਦਨਂ ਆਗਤਂ, ਤਂ ਇਧ ਏਵਂ ਸੀਲਸਮ੍ਪਨ੍ਨੋ ਹੋਤੀਤਿਆਦਿਵਚਨਤੋ ‘‘ਤਸ੍ਸਾ ਕੁਕ੍ਕੁਟਿਯਾ ਅਣ੍ਡੇਸੁ ਤਿਵਿਧਕਿਰਿਯਕਰਣਂ ਵਿਯ ਇਮਸ੍ਸ ਭਿਕ੍ਖੁਨੋ ਸੀਲਸਮ੍ਪਨ੍ਨਤਾਦੀਹਿ ਪਨ੍ਨਰਸੇਹਿ ਧਮ੍ਮੇਹਿ ਸਮਙ੍ਗਿਭਾਵੋ’’ਤਿ. ਏਵਂ ਯੋਜੇਤ੍ਵਾ ਵੇਦਿਤਬ੍ਬਂ. ਸੇਸਂ ਸਬ੍ਬਤ੍ਥ ਵੁਤ੍ਤਸਦਿਸਮੇਵ.
੨੮. ਇਮਂਯੇਵ ਅਨੁਤ੍ਤਰਂ ਉਪੇਕ੍ਖਾਸਤਿਪਾਰਿਸੁਦ੍ਧਿਨ੍ਤਿ ਇਮਂ ਪਠਮਾਦਿਜ੍ਝਾਨੇਹਿ ਅਸਦਿਸਂ ਉਤ੍ਤਮਂ ਚਤੁਤ੍ਥਜ੍ਝਾਨਿਕਂ ਉਪੇਕ੍ਖਾਸਤਿਪਾਰਿਸੁਦ੍ਧਿਂ. ਪਠਮਾਭਿਨਿਬ੍ਭਿਦਾਤਿ ਪਠਮੋ ਞਾਣਭੇਦੋ. ਦੁਤਿਯਾਦੀਸੁਪਿ ਏਸੇਵ ਨਯੋ. ਕੁਕ੍ਕੁਟਚ੍ਛਾਪਕੋ ਪਨ ਏਕਵਾਰਂ ਮਾਤੁਕੁਚ੍ਛਿਤੋ ਏਕਵਾਰਂ ਅਣ੍ਡਕੋਸਤੋਤਿ ਦ੍ਵੇ ਵਾਰੇ ਜਾਯਤਿ. ਅਰਿਯਸਾਵਕੋ ਤੀਹਿ ਵਿਜ੍ਜਾਹਿ ਤਾਯੋ ਵਾਰੇ ਜਾਯਤਿ. ਪੁਬ੍ਬੇਨਿਵਾਸਚ੍ਛਾਦਕਂ ਤਮਂ ਵਿਨੋਦੇਤ੍ਵਾ ਪੁਬ੍ਬੇਨਿਵਾਸਞਾਣੇਨ ਪਠਮਂ ਜਾਯਤਿ, ਸਤ੍ਤਾਨਂ ਚੁਤਿਪਟਿਸਨ੍ਧਿਚ੍ਛਾਦਕਂ ਤਮਂ ਵਿਨੋਦੇਤ੍ਵਾ ਦਿਬ੍ਬਚਕ੍ਖੁਞਾਣੇਨ ਦੁਤਿਯਂ ਜਾਯਤਿ, ਚਤੁਸਚ੍ਚਪਟਿਚ੍ਛਾਦਕਂ ਤਮਂ ਵਿਨੋਦੇਤ੍ਵਾ ਆਸਵਕ੍ਖਯਞਾਣੇਨ ਤਤਿਯਂ ਜਾਯਤਿ.
੨੯. ਇਦਮ੍ਪਿਸ੍ਸ ਹੋਤਿ ਚਰਣਸ੍ਮਿਨ੍ਤਿ ਇਦਮ੍ਪਿ ਸੀਲਂ ਅਸ੍ਸ ਭਿਕ੍ਖੁਨੋ ਚਰਣਂ ਨਾਮ ਹੋਤੀਤਿ ਅਤ੍ਥੋ. ਚਰਣਂ ਨਾਮ ਬਹੁ ਅਨੇਕਵਿਧਂ, ਸੀਲਾਦਯੋ ਪਨ੍ਨਰਸਧਮ੍ਮਾ, ਤਤ੍ਥ ਇਦਮ੍ਪਿ ਏਕਂ ਚਰਣਨ੍ਤਿ ਅਤ੍ਥੋ. ਪਦਤ੍ਥੋ ਪਨ ਚਰਤਿ ਤੇਨ ਅਗਤਪੁਬ੍ਬਂ ਦਿਸਂ ਗਚ੍ਛਤੀਤਿ ਚਰਣਂ. ਏਸ ਨਯੋ ਸਬ੍ਬਤ੍ਥ.
ਇਦਮ੍ਪਿਸ੍ਸ ਹੋਤਿ ਵਿਜ੍ਜਾਯਾਤਿ ਇਦਂ ਪੁਬ੍ਬੇਨਿਵਾਸਞਾਣਂ ਤਸ੍ਸ ਵਿਜ੍ਜਾ ਨਾਮ ਹੋਤੀਤਿ ਅਤ੍ਥੋ. ਵਿਜ੍ਜਾ ਨਾਮ ਬਹੁ ਅਨੇਕਵਿਧਾ, ਵਿਪਸ੍ਸਨਞਾਣਾਦੀਨਿ ਅਟ੍ਠ ਞਾਣਾਨਿ, ਤਤ੍ਥ ਇਦਮ੍ਪਿ ਞਾਣਂ ਏਕਾ ਵਿਜ੍ਜਾਤਿਪਿ ਅਤ੍ਥੋ. ਪਦਤ੍ਥੋ ਪਨ ਵਿਨਿਵਿਜ੍ਝਿਤ੍ਵਾ ਏਤਾਯ ਜਾਨਾਤੀਤਿ ਵਿਜ੍ਜਾ. ਏਸ ਨਯੋ ਸਬ੍ਬਤ੍ਥ. ਵਿਜ੍ਜਾਸਮ੍ਪਨ੍ਨੋ ਇਤਿਪੀਤਿ ਤੀਹਿ ਵਿਜ੍ਜਾਹਿ ਵਿਜ੍ਜਾਸਮ੍ਪਨ੍ਨੋ ਇਤਿਪਿ. ਚਰਣਸਮ੍ਪਨ੍ਨੋ ਇਤਿਪੀਤਿ ਪਞ੍ਚਦਸਹਿ ਧਮ੍ਮੇਹਿ ਚਰਣਸਮ੍ਪਨ੍ਨੋ ਇਤਿਪਿ. ਤਦੁਭਯੇਨ ਪਨ ਵਿਜ੍ਜਾਚਰਣਸਮ੍ਪਨ੍ਨੋ ਇਤਿਪੀਤਿ.
੩੦. ਸਨਙ੍ਕੁਮਾਰੇਨਾਤਿ ਪੋਰਾਣਕਕੁਮਾਰੇਨ, ਚਿਰਕਾਲਤੋ ਪਟ੍ਠਾਯ ਕੁਮਾਰੋਤਿ ਪਞ੍ਞਾਤੇਨ. ਸੋ ਕਿਰ ਮਨੁਸ੍ਸਪਥੇ ਪਞ੍ਚਚੂਲ਼ਕਕੁਮਾਰਕਕਾਲੇ ਝਾਨਂ ਨਿਬ੍ਬਤ੍ਤੇਤ੍ਵਾ ਅਪਰਿਹੀਨਜ੍ਝਾਨੋ ਬ੍ਰਹ੍ਮਲੋਕੇ ਨਿਬ੍ਬਤ੍ਤਿ, ਤਸ੍ਸ ਸੋ ਅਤ੍ਤਭਾਵੋ ਪਿਯੋ ਅਹੋਸਿ ਮਨਾਪੋ, ਤਸ੍ਮਾ ਤਾਦਿਸੇਨੇਵ ਅਤ੍ਤਭਾਵੇਨ ਚਰਤਿ, ਤੇਨ ਨਂ ਸਨਙ੍ਕੁਮਾਰੋਤਿ ਸਞ੍ਜਾਨਨ੍ਤਿ. ਜਨੇਤਸ੍ਮਿਨ੍ਤਿ ਜਨਿਤਸ੍ਮਿਂ, ਪਜਾਯਾਤਿ ਅਤ੍ਥੋ. ਯੇ ਗੋਤ੍ਤਪਟਿਸਾਰਿਨੋਤਿ ਯੇ ਜਨੇਤਸ੍ਮਿਂ ਗੋਤ੍ਤਂ ਪਟਿਸਰਨ੍ਤਿ ‘‘ਅਹਂ ਗੋਤਮੋ, ਅਹਂ ਕਸ੍ਸਪੋ’’ਤਿ, ਤੇਸੁ ਲੋਕੇ ਗੋਤ੍ਤਪਟਿਸਾਰੀਸੁ ਖਤ੍ਤਿਯੋ ਸੇਟ੍ਠੋ. ਅਨੁਮਤਾ ਭਗਵਤਾਤਿ ਮਮ ਪਞ੍ਹਬ੍ਯਾਕਰਣੇਨ ਸਦ੍ਧਿਂ ਸਂਸਨ੍ਦਿਤ੍ਵਾ ਦੇਸਿਤਾਤਿ ਅਮ੍ਬਟ੍ਠਸੁਤ੍ਤੇ ਬੁਦ੍ਧੇਨ ਭਗਵਤਾ ‘‘ਅਹਮ੍ਪਿ, ਅਮ੍ਬਟ੍ਠ, ਏਵਂ ਵਦਾਮਿ –
‘ਖਤ੍ਤਿਯੋ ਸੇਟ੍ਠੋ ਜਨੇਤਸ੍ਮਿਂ, ਯੇ ਗੋਤ੍ਤਪਟਿਸਾਰਿਨੋ;
ਵਿਜ੍ਜਾਚਰਣਸਮ੍ਪਨ੍ਨੋ, ਸੋ ਸੇਟ੍ਠੋ ਦੇਵਮਾਨੁਸੇ’ਤਿ’’. (ਦੀ. ਨਿ. ੧.੨੭੭) –
ਏਵਂ ਭਾਸਨ੍ਤੇਨ ਅਨੁਞ੍ਞਾਤਾ ਅਨੁਮੋਦਿਤਾ. ਸਾਧੁ ਸਾਧੁ ਆਨਨ੍ਦਾਤਿ, ਭਗਵਾ ਕਿਰ ਆਦਿਤੋ ਪਟ੍ਠਾਯ ਨਿਦ੍ਦਂ ਅਨੋਕ੍ਕਮਨ੍ਤੋਵ ਇਮਂ ਸੁਤ੍ਤਂ ਸੁਤ੍ਵਾ ਆਨਨ੍ਦੇਨ ਸੇਖਪਟਿਪਦਾਯ ਕੂਟਂ ਗਹਿਤਨ੍ਤਿ ਞਤ੍ਵਾ ਉਟ੍ਠਾਯ ਪਲ੍ਲਙ੍ਕਂ ਆਭੁਜਿਤ੍ਵਾ ਨਿਸਿਨ੍ਨੋ ਸਾਧੁਕਾਰਂ ਅਦਾਸਿ. ਏਤ੍ਤਾਵਤਾ ਚ ਪਨ ਇਦਂ ਸੁਤ੍ਤਂ ਜਿਨਭਾਸਿਤਂ ਨਾਮ ਜਾਤਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ
ਸੇਖਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੪. ਪੋਤਲਿਯਸੁਤ੍ਤਵਣ੍ਣਨਾ
੩੧. ਏਵਂ ਮੇ ਸੁਤਨ੍ਤਿ ਪੋਤਲਿਯਸੁਤ੍ਤਂ. ਤਤ੍ਥ ਅਙ੍ਗੁਤ੍ਤਰਾਪੇਸੂਤਿ ਅਙ੍ਗਾਯੇਵ ਸੋ ਜਨਪਦੋ, ਮਹਿਯਾ ਪਨਸ੍ਸ ਉਤ੍ਤਰੇਨ ਯਾ ਆਪੋ, ਤਾਸਂ ਅਵਿਦੂਰਤ੍ਤਾ ਉਤ੍ਤਰਾਪੋਤਿਪਿ ਵੁਚ੍ਚਤਿ. ਕਤਰਮਹਿਯਾ ਉਤ੍ਤਰੇਨ ਯਾ ਆਪੋਤਿ, ਮਹਾਮਹਿਯਾ. ਤਤ੍ਥਾਯਂ ਆਵਿਭਾਵਕਥਾ – ਅਯਂ ਕਿਰ ਜਮ੍ਬੁਦੀਪੋ ਦਸਸਹਸ੍ਸਯੋਜਨਪਰਿਮਾਣੋ. ਤਤ੍ਥ ਚ ਚਤੁਸਹਸ੍ਸਯੋਜਨਪ੍ਪਮਾਣੋ ਪਦੇਸੋ ਉਦਕੇਨ ਅਜ੍ਝੋਤ੍ਥਟੋ ਸਮੁਦ੍ਦੋਤਿ ਸਙ੍ਖਂ ਗਤੋ. ਤਿਸਹਸ੍ਸਯੋਜਨਪ੍ਪਮਾਣੇ ਮਨੁਸ੍ਸਾ ਵਸਨ੍ਤਿ. ਤਿਸਹਸ੍ਸਯੋਜਨਪ੍ਪਮਾਣੇ ਹਿਮਵਾ ਪਤਿਟ੍ਠਿਤੋ ਉਬ੍ਬੇਧੇਨ ਪਞ੍ਚਯੋਜਨਸਤਿਕੋ ਚਤੁਰਾਸੀਤਿਕੂਟਸਹਸ੍ਸਪਟਿਮਣ੍ਡਿਤੋ ਸਮਨ੍ਤਤੋ ਸਨ੍ਦਮਾਨਪਞ੍ਚਸਤਨਦੀਵਿਚਿਤ੍ਤੋ, ਯਤ੍ਥ ਆਯਾਮਵਿਤ੍ਥਾਰੇਨ ਚੇਵ ਗਮ੍ਭੀਰਤਾਯ ਚ ਪਣ੍ਣਾਸਪਣ੍ਣਾਸਯੋਜਨਾ ਦਿਯਡ੍ਢਯੋਜਨਸਤਪਰਿਮਣ੍ਡਲਾ ਅਨੋਤਤ੍ਤਦਹੋ ਕਣ੍ਣਮੁਣ੍ਡਦਹੋ ਰਥਕਾਰਦਹੋ ਛਦ੍ਦਨ੍ਤਦਹੋ ਕੁਣਾਲਦਹੋ ਮਨ੍ਦਾਕਿਨੀਦਹੋ ਸੀਹਪਪਾਤਦਹੋਤਿ ਸਤ੍ਤ ਮਹਾਸਰਾ ਪਤਿਟ੍ਠਿਤਾ. ਤੇਸੁ ਅਨੋਤਤ੍ਤਦਹੋ ਸੁਦਸ੍ਸਨਕੂਟਂ ਚਿਤ੍ਰਕੂਟਂ ਕਾਲ਼ਕੂਟਂ ਗਨ੍ਧਮਾਦਨਕੂਟਂ ਕੇਲਾਸਕੂਟਨ੍ਤਿ ਇਮੇਹਿ ਪਞ੍ਚਹਿ ਪਬ੍ਬਤੇਹਿ ਪਰਿਕ੍ਖਿਤ੍ਤੋ.
ਤਤ੍ਥ ਸੁਦਸ੍ਸਨਕੂਟਂ ਸੋਵਣ੍ਣਮਯਂ ਦ੍ਵਿਯੋਜਨਸਤੁਬ੍ਬੇਧਂ ਅਨ੍ਤੋਵਙ੍ਕਂ ਕਾਕਮੁਖਸਣ੍ਠਾਨਂ ਤਮੇਵ ਸਰਂ ਪਟਿਚ੍ਛਾਦੇਤ੍ਵਾ ਠਿਤਂ. ਚਿਤ੍ਰਕੂਟਂ ਸਬ੍ਬਰਤਨਮਯਂ. ਕਾਲ਼ਕੂਟਂ ਅਞ੍ਜਨਮਯਂ. ਗਨ੍ਧਮਾਦਨਕੂਟਂ ਸਾਨੁਮਯਂ ਅਬ੍ਭਨ੍ਤਰੇ ਮੁਗ੍ਗਵਣ੍ਣਂ, ਮੂਲਗਨ੍ਧੋ ਸਾਰਗਨ੍ਧੋ ਫੇਗ੍ਗੁਗਨ੍ਧੋ ਤਚਗਨ੍ਧੋ ਪਪਟਿਕਗਨ੍ਧੋ ਰਸਗਨ੍ਧੋ ਪਤ੍ਤਗਨ੍ਧੋ ਪੁਪ੍ਫਗਨ੍ਧੋ ਫਲਗਨ੍ਧੋ ਗਨ੍ਧਗਨ੍ਧੋਤਿ ਇਮੇਹਿ ਦਸਹਿ ਗਨ੍ਧੇਹਿ ਉਸ੍ਸਨ੍ਨਂ ਨਾਨਪ੍ਪਕਾਰਓਸਧਸਞ੍ਛਨ੍ਨਂ, ਕਾਲ਼ਪਕ੍ਖਉਪੋਸਥਦਿਵਸੇ ਆਦਿਤ੍ਤਮਿਵ ਅਙ੍ਗਾਰਂ ਜਲਨ੍ਤਂ ਤਿਟ੍ਠਤਿ. ਕੇਲਾਸਕੂਟਂ ਰਜਤਮਯਂ. ਸਬ੍ਬਾਨਿ ਸੁਦਸ੍ਸਨੇਨ ਸਮਾਨੁਬ੍ਬੇਧਸਣ੍ਠਾਨਾਨਿ, ਤਮੇਵ ਸਰਂ ਪਟਿਚ੍ਛਾਦੇਤ੍ਵਾ ਠਿਤਾਨਿ. ਤਾਨਿ ਸਬ੍ਬਾਨਿ ਦੇਵਾਨੁਭਾਵੇਨ ਨਾਗਾਨੁਭਾਵੇਨ ਚ ਵਸ੍ਸਨ੍ਤਿ, ਨਦਿਯੋ ਚ ਤੇਸੁ ਸਨ੍ਦਨ੍ਤਿ. ਤਂ ਸਬ੍ਬਮ੍ਪਿ ਉਦਕਂ ਅਨੋਤਤ੍ਤਮੇਵ ਪਵਿਸਤਿ. ਚਨ੍ਦਿਮਸੂਰਿਯਾ ਦਕ੍ਖਿਣੇਨ ਵਾ ਉਤ੍ਤਰੇਨ ਵਾ ਗਚ੍ਛਨ੍ਤਾ ਪਬ੍ਬਤਨ੍ਤਰੇਨ ਤਤ੍ਥ ਓਭਾਸਂ ਕਰੋਨ੍ਤਿ, ਉਜੁਂ ਗਚ੍ਛਨ੍ਤਾ ਨ ਕਰੋਨ੍ਤਿ, ਤੇਨੇਵਸ੍ਸ ਅਨੋਤਤ੍ਤਨ੍ਤਿ ਸਙ੍ਖਾ ਉਦਪਾਦਿ.
ਤਤ੍ਥ ਮਨੋਹਰਸਿਲਾਤਲਾਨਿ ਨਿਮ੍ਮਚ੍ਛਕਚ੍ਛਪਾਨਿ ਫਲਿਕਸਦਿਸਨਿਮ੍ਮਲੁਦਕਾਨਿ ਨ੍ਹਾਨਤਿਤ੍ਥਾਨਿ ਸੁਪਟਿਯਤ੍ਤਾਨਿ ਹੋਨ੍ਤਿ, ਯੇਸੁ ਬੁਦ੍ਧਪਚ੍ਚੇਕਬੁਦ੍ਧਖੀਣਾਸਵਾ ਚ ਇਦ੍ਧਿਮਨ੍ਤੋ ਚ ਇਸਯੋ ਨ੍ਹਾਯਨ੍ਤਿ, ਦੇਵਯਕ੍ਖਾਦਯੋ ਉਯ੍ਯਾਨਕੀਲ਼ਕਂ ਕੀਲ਼ਨ੍ਤਿ.
ਤਸ੍ਸ ਚਤੂਸੁ ਪਸ੍ਸੇਸੁ ਸੀਹਮੁਖਂ ਹਤ੍ਥਿਮੁਖਂ ਅਸ੍ਸਮੁਖਂ ਉਸਭਮੁਖਨ੍ਤਿ ਚਤ੍ਤਾਰਿ ਮੁਖਾਨਿ ਹੋਨ੍ਤਿ, ਯੇਹਿ ਚਤਸ੍ਸੋ ਨਦਿਯੋ ਸਨ੍ਦਨ੍ਤਿ. ਸੀਹਮੁਖੇਨ ਨਿਕ੍ਖਨ੍ਤਨਦੀਤੀਰੇ ਸੀਹਾ ਬਹੁਤਰਾ ਹੋਨ੍ਤਿ. ਹਤ੍ਥਿਮੁਖਾਦੀਹਿ ਹਤ੍ਥਿਅਸ੍ਸਉਸਭਾ. ਪੁਰਤ੍ਥਿਮਦਿਸਤੋ ਨਿਕ੍ਖਨ੍ਤਨਦੀ ਅਨੋਤਤ੍ਤਂ ਤਿਕ੍ਖਤ੍ਤੁਂ ਪਦਕ੍ਖਿਣਂ ਕਤ੍ਵਾ ਇਤਰਾ ਤਿਸ੍ਸੋ ਨਦਿਯੋ ਅਨੁਪਗਮ੍ਮ ਪਾਚੀਨਹਿਮਵਨ੍ਤੇਨੇਵ ਅਮਨੁਸ੍ਸਪਥਂ ਗਨ੍ਤ੍ਵਾ ਮਹਾਸਮੁਦ੍ਦਂ ਪਵਿਸਤਿ. ਪਚ੍ਛਿਮਦਿਸਤੋ ਚ ਉਤ੍ਤਰਦਿਸਤੋ ਚ ਨਿਕ੍ਖਨ੍ਤਨਦਿਯੋਪਿ ਤਥੇਵ ਪਦਕ੍ਖਿਣਂ ਕਤ੍ਵਾ ਪਚ੍ਛਿਮਹਿਮਵਨ੍ਤੇਨੇਵ ਉਤ੍ਤਰਹਿਮਵਨ੍ਤੇਨੇਵ ਚ ਅਮਨੁਸ੍ਸਪਥਂ ਗਨ੍ਤ੍ਵਾ ਮਹਾਸਮੁਦ੍ਦਂ ਪਵਿਸਨ੍ਤਿ. ਦਕ੍ਖਿਣਦਿਸਤੋ ਨਿਕ੍ਖਨ੍ਤਨਦੀ ਪਨ ਤਂ ਤਿਕ੍ਖਤ੍ਤੁਂ ਪਦਕ੍ਖਿਣਂ ਕਤ੍ਵਾ ਦਕ੍ਖਿਣੇਨ ਉਜੁਕਂ ਪਾਸਾਣਪਿਟ੍ਠੇਨੇਵ ਸਟ੍ਠਿਯੋਜਨਾਨਿ ਗਨ੍ਤ੍ਵਾ ਪਬ੍ਬਤਂ ਪਹਰਿਤ੍ਵਾ ਵੁਟ੍ਠਾਯ ਪਰਿਕ੍ਖੇਪੇਨ ਤਿਗਾਵੁਤਪ੍ਪਮਾਣਾ ਉਦਕਧਾਰਾ ਚ ਹੁਤ੍ਵਾ ਆਕਾਸੇਨ ਸਟ੍ਠਿਯੋਜਨਾਨਿ ਗਨ੍ਤ੍ਵਾ ਤਿਯਗ੍ਗਲ਼ੇ ਨਾਮ ਪਾਸਾਣੇ ਪਤਿਤਾ, ਪਾਸਾਣੋ ਉਦਕਧਾਰਾਵੇਗੇਨ ਭਿਨ੍ਨੋ. ਤਤ੍ਥ ਪਞ੍ਞਾਸਯੋਜਨਪ੍ਪਮਾਣਾ ਤਿਯਗ੍ਗਲ਼ਾ ਨਾਮ ਪੋਕ੍ਖਰਣੀ ਜਾਤਾ, ਪੋਕ੍ਖਰਣਿਯਾ ਕੂਲਂ ਭਿਨ੍ਦਿਤ੍ਵਾ ਪਾਸਾਣਂ ਪਵਿਸਿਤ੍ਵਾ ਸਟ੍ਠਿਯੋਜਨਾਨਿ ਗਤਾ. ਤਤੋ ਘਨਪਥਵਿਂ ਭਿਨ੍ਦਿਤ੍ਵਾ ਉਮਙ੍ਗੇਨ ਸਟ੍ਠਿਯੋਜਨਾਨਿ ਗਨ੍ਤ੍ਵਾ ਵਿਞ੍ਝੁਂ ਨਾਮ ਤਿਰਚ੍ਛਾਨਪਬ੍ਬਤਂ ਪਹਰਿਤ੍ਵਾ ਹਤ੍ਥਤਲੇ ਪਞ੍ਚਙ੍ਗੁਲਿਸਦਿਸਾ ਪਞ੍ਚਧਾਰਾ ਹੁਤ੍ਵਾ ਪਵਤ੍ਤਨ੍ਤਿ. ਸਾ ਤਿਕ੍ਖਤ੍ਤੁਂ ਅਨੋਤਤ੍ਤਂ ਪਦਕ੍ਖਿਣਂ ਕਤ੍ਵਾ ਗਤਟ੍ਠਾਨੇ ਆਵਟ੍ਟਗਙ੍ਗਾਤਿ ਵੁਚ੍ਚਤਿ. ਉਜੁਕਂ ਪਾਸਾਣਪਿਟ੍ਠੇਨ ਸਟ੍ਠਿਯੋਜਨਾਨਿ ਗਤਟ੍ਠਾਨੇ ਕਣ੍ਹਗਙ੍ਗਾਤਿ, ਆਕਾਸੇਨ ਸਟ੍ਠਿਯੋਜਨਾਨਿ ਗਤਟ੍ਠਾਨੇ ਆਕਾਸਗਙ੍ਗਾਤਿ, ਤਿਯਗ੍ਗਲ਼ਪਾਸਾਣੇ ਪਞ੍ਞਾਸਯੋਜਨੋਕਾਸੇ ਠਿਤਾ ਤਿਯਗ੍ਗਲ਼ਪੋਕ੍ਖਰਣੀਤਿ, ਕੂਲਂ ਭਿਨ੍ਦਿਤ੍ਵਾ ਪਾਸਾਣਂ ਪਵਿਸਿਤ੍ਵਾ ਸਟ੍ਠਿਯੋਜਨਾਨਿ ਗਤਟ੍ਠਾਨੇ ਬਹਲਗਙ੍ਗਾਤਿ, ਉਮਙ੍ਗੇਨ ਸਟ੍ਠਿਯੋਜਨਾਨਿ ਗਤਟ੍ਠਾਨੇ ਉਮਙ੍ਗਗਙ੍ਗਾਤਿ ਵੁਚ੍ਚਤਿ. ਵਿਞ੍ਝੁਂ ਨਾਮ ਤਿਰਚ੍ਛਾਨਪਬ੍ਬਤਂ ਪਹਰਿਤ੍ਵਾ ਪਞ੍ਚਧਾਰਾ ਹੁਤ੍ਵਾ ਪਵਤ੍ਤਟ੍ਠਾਨੇ ਪਨ ਗਙ੍ਗਾ ਯਮੁਨਾ ਅਚਿਰਵਤੀ ਸਰਭੂ ਮਹੀਤਿ ਪਞ੍ਚਧਾ ਸਙ੍ਖਂ ਗਤਾ. ਏਵਮੇਤਾ ਪਞ੍ਚ ਮਹਾਨਦਿਯੋ ਹਿਮਵਨ੍ਤਤੋ ਪਭਵਨ੍ਤਿ. ਤਾਸੁ ਯਾ ਅਯਂ ਪਞ੍ਚਮੀ ਮਹੀ ਨਾਮ, ਸਾ ਇਧ ਮਹਾਮਹੀਤਿ ਅਧਿਪ੍ਪੇਤਾ. ਤਸ੍ਸਾ ਉਤ੍ਤਰੇਨ ਯਾ ਆਪੋ, ਤਾਸਂ ਅਵਿਦੂਰਤ੍ਤਾ ਸੋ ਜਨਪਦੋ ਅਙ੍ਗੁਤ੍ਤਰਾਪੋਤਿ ਵੇਦਿਤਬ੍ਬੋ. ਤਸ੍ਮਿਂ ਅਙ੍ਗੁਤ੍ਤਰਾਪੇਸੁ ਜਨਪਦੇ.
ਆਪਣਂ ਨਾਮਾਤਿ ਤਸ੍ਮਿਂ ਕਿਰ ਨਿਗਮੇ ਵੀਸਤਿ ਆਪਣਮੁਖਸਹਸ੍ਸਾਨਿ ਵਿਭਤ੍ਤਾਨਿ ਅਹੇਸੁਂ. ਇਤਿ ਸੋ ਆਪਣਾਨਂ ਉਸ੍ਸਨ੍ਨਤ੍ਤਾ ਆਪਣਨ੍ਤ੍ਵੇਵ ਸਙ੍ਖਂ ਗਤੋ. ਤਸ੍ਸ ਚ ਨਿਗਮਸ੍ਸ ਅਵਿਦੂਰੇ ਨਦੀਤੀਰੇ ਘਨਚ੍ਛਾਯੋ ਰਮਣੀਯੋ ਭੂਮਿਭਾਗੋ ਮਹਾਵਨਸਣ੍ਡੋ, ਤਸ੍ਮਿਂ ਭਗਵਾ ਵਿਹਰਤਿ. ਤੇਨੇਵੇਤ੍ਥ ਵਸਨਟ੍ਠਾਨਂ ਨ ਨਿਯਾਮਿਤਨ੍ਤਿ ਵੇਦਿਤਬ੍ਬਂ. ਯੇਨਞ੍ਞਤਰੋ ਵਨਸਣ੍ਡੋ ਤੇਨੁਪਸਙ੍ਕਮੀਤਿ ਭਿਕ੍ਖੁਸਙ੍ਘਂ ਵਸਨਟ੍ਠਾਨਂ ਪੇਸੇਤ੍ਵਾ ਏਕਕੋਵ ਉਪਸਙ੍ਕਮਿ ਪੋਤਲਿਯਂ ਗਹਪਤਿਂ ਸਨ੍ਧਾਯ. ਪੋਤਲਿਯੋਪਿ ਖੋ ਗਹਪਤੀਤਿ ਪੋਤਲਿਯੋਤਿ ਏਵਂਨਾਮਕੋ ਗਹਪਤਿ. ਸਮ੍ਪਨ੍ਨਨਿਵਾਸਨਪਾਵੁਰਣੋਤਿ ਪਰਿਪੁਣ੍ਣਨਿਵਾਸਨਪਾਵੁਰਣੋ, ਏਕਂ ਦੀਘਦਸਂ ਸਾਟਕਂ ਨਿਵਤ੍ਥੋ ਏਕਂ ਪਾਰੁਤੋਤਿ ਅਤ੍ਥੋ. ਛਤ੍ਤੁਪਾਹਨਾਹੀਤਿ ਛਤ੍ਤਂ ਗਹੇਤ੍ਵਾ ਉਪਾਹਨਾ ਆਰੁਯ੍ਹਾਤਿ ਅਤ੍ਥੋ. ਆਸਨਾਨੀਤਿ ਪਲ੍ਲਙ੍ਕਪੀਠਪਲਾਲਪੀਠਕਾਦੀਨਿ. ਅਨ੍ਤਮਸੋ ਸਾਖਾਭਙ੍ਗਮ੍ਪਿ ਹਿ ਆਸਨਨ੍ਤੇਵ ਵੁਚ੍ਚਤਿ. ਗਹਪਤਿਵਾਦੇਨਾਤਿ ਗਹਪਤੀਤਿ ਇਮਿਨਾ ਵਚਨੇਨ. ਸਮੁਦਾਚਰਤੀਤਿ ਵੋਹਰਤਿ.
ਭਗਵਨ੍ਤਂ ਏਤਦਵੋਚਾਤਿ ਤਤਿਯਂ ਗਹਪਤੀਤਿ ਵਚਨਂ ਅਧਿਵਾਸੇਤੁਂ ਅਸਕ੍ਕੋਨ੍ਤੋ ਭਗਵਨ੍ਤਮੇਤਂ ‘‘ਤਯਿਦਂ, ਭੋ, ਗੋਤਮਾ’’ਤਿਆਦਿਵਚਨਂ ਅਵੋਚ. ਤਤ੍ਥ ਨਚ੍ਛਨ੍ਨਨ੍ਤਿ ਨ ਅਨੁਚ੍ਛਵਿਕਂ. ਨਪ੍ਪਤਿਰੂਪਨ੍ਤਿ ਨ ਸਾਰੁਪ੍ਪਂ. ਆਕਾਰਾਤਿਆਦੀਨਿ ਸਬ੍ਬਾਨੇਵ ਕਾਰਣਵੇਵਚਨਾਨਿ. ਦੀਘਦਸਵਤ੍ਥਧਾਰਣ-ਕੇਸਮਸ੍ਸੁਨਖਠਪਨਾਦੀਨਿ ਹਿ ਸਬ੍ਬਾਨੇਵ ਗਿਹਿਬ੍ਯਞ੍ਜਨਾਨਿ ਤਸ੍ਸ ਗਿਹਿਭਾਵਂ ਪਾਕਟਂ ਕਰੋਨ੍ਤੀਤਿ ਆਕਾਰਾ, ਗਿਹਿਸਣ੍ਠਾਨੇਨ ਸਣ੍ਠਿਤਤ੍ਤਾ ਲਿਙ੍ਗਾ, ਗਿਹਿਭਾਵਸ੍ਸ ਸਞ੍ਜਾਨਨਨਿਮਿਤ੍ਤਤਾਯ ਨਿਮਿਤ੍ਤਾਤਿ ਵੁਤ੍ਤਾ. ਯਥਾ ਤਂ ਗਹਪਤਿਸ੍ਸਾਤਿ ਯਥਾ ਗਹਪਤਿਸ੍ਸ ਆਕਾਰਲਿਙ੍ਗਨਿਮਿਤ੍ਤਾ ਭਵੇਯ੍ਯੁਂ, ਤਥੇਵ ਤੁਯ੍ਹਂ. ਤੇਨ ਤਾਹਂ ਏਵਂ ਸਮੁਦਾਚਰਾਮੀਤਿ ਦਸ੍ਸੇਤਿ. ਅਥ ਸੋ ਯੇਨ ਕਾਰਣੇਨ ਗਹਪਤਿਵਾਦਂ ਨਾਧਿਵਾਸੇਤਿ, ਤਂ ਪਕਾਸੇਨ੍ਤੋ ‘‘ਤਥਾ ਹਿ ਪਨ ਮੇ’’ਤਿਆਦਿਮਾਹ.
ਨਿਯ੍ਯਾਤਨ੍ਤਿ ਨਿਯ੍ਯਾਤਿਤਂ. ਅਨੋਵਾਦੀ ਅਨੁਪਵਾਦੀਤਿ ‘‘ਤਾਤਾ, ਕਸਥ, ਵਪਥ, ਵਣਿਪ੍ਪਥਂ ਪਯੋਜੇਥਾ’’ਤਿਆਦਿਨਾ ਹਿ ਨਯੇਨ ਓਵਦਨ੍ਤੋ ਓਵਾਦੀ ਨਾਮ ਹੋਤਿ. ‘‘ਤੁਮ੍ਹੇ ਨ ਕਸਥ, ਨ ਵਪਥ, ਨ ਵਣਿਪ੍ਪਥਂ ਪਯੋਜੇਥ, ਕਥਂ ਜੀਵਿਸ੍ਸਥ, ਪੁਤ੍ਤਦਾਰਂ ਵਾ ਭਰਿਸ੍ਸਥਾ’’ਤਿਆਦਿਨਾ ਨਯੇਨ ਪਨ ਉਪਵਦਨ੍ਤੋ ਉਪਵਾਦੀ ਨਾਮ ਹੋਤਿ. ਅਹਂ ਪਨ ਉਭਯਮ੍ਪਿ ਤਂ ਨ ਕਰੋਮਿ. ਤੇਨਾਹਂ ਤਤ੍ਥ ਅਨੋਵਾਦੀ ਅਨੁਪਵਾਦੀਤਿ ਦਸ੍ਸੇਤਿ. ਘਾਸਚ੍ਛਾਦਨਪਰਮੋ ਵਿਹਰਾਮੀਤਿ ਘਾਸਮਤ੍ਤਞ੍ਚੇਵ ਅਚ੍ਛਾਦਨਮਤ੍ਤਞ੍ਚ ਪਰਮਂ ਕਤ੍ਵਾ ਵਿਹਰਾਮਿ, ਤਤੋ ਪਰਂ ਨਤ੍ਥਿ, ਨ ਚ ਪਤ੍ਥੇਮੀਤਿ ਦੀਪੇਤਿ.
੩੨. ਗਿਦ੍ਧਿਲੋਭੋ ਪਹਾਤਬ੍ਬੋਤਿ ਗੇਧਭੂਤੋ ਲੋਭੋ ਪਹਾਤਬ੍ਬੋ. ਅਨਿਨ੍ਦਾਰੋਸਨ੍ਤਿ ਅਨਿਨ੍ਦਾਭੂਤਂ ਅਘਟ੍ਟਨਂ. ਨਿਨ੍ਦਾਰੋਸੋਤਿ ਨਿਨ੍ਦਾਘਟ੍ਟਨਾ. ਵੋਹਾਰਸਮੁਚ੍ਛੇਦਾਯਾਤਿ ਏਤ੍ਥ ਵੋਹਾਰੋਤਿ ਬ੍ਯਵਹਾਰਵੋਹਾਰੋਪਿ ਪਣ੍ਣਤ੍ਤਿਪਿ ਵਚਨਮ੍ਪਿ ਚੇਤਨਾਪਿ. ਤਤ੍ਥ –
‘‘ਯੋ ਹਿ ਕੋਚਿ ਮਨੁਸ੍ਸੇਸੁ, ਵੋਹਾਰਂ ਉਪਜੀਵਤਿ;
ਏਵਂ ਵਾਸੇਟ੍ਠ ਜਾਨਾਹਿ, ਵਾਣਿਜੋ ਸੋ ਨ ਬ੍ਰਾਹ੍ਮਣੋ’’ਤਿ. (ਮ. ਨਿ. ੨.੪੫੭) –
ਅਯਂ ਬ੍ਯਵਹਾਰਵੋਹਾਰੋ ਨਾਮ. ‘‘ਸਙ੍ਖਾ ਸਮਞ੍ਞਾ ਪਞ੍ਞਤ੍ਤਿ ਵੋਹਾਰੋ’’ਤਿ (ਧ. ਸ. ੧੩੧੩-੧੩੧੫) ਅਯਂ ਪਣ੍ਣਤ੍ਤਿਵੋਹਾਰੋ ਨਾਮ. ‘‘ਤਥਾ ਤਥਾ ਵੋਹਰਤਿ ਅਪਰਾਮਸ’’ਨ੍ਤਿ (ਮ. ਨਿ. ੩.੩੩੨) ਅਯਂ ਵਚਨਵੋਹਾਰੋ ਨਾਮ. ‘‘ਅਟ੍ਠ ਅਰਿਯਵੋਹਾਰਾ ਅਟ੍ਠ ਅਨਰਿਯਵੋਹਰਾ’’ਤਿ (ਅ. ਨਿ. ੮.੬੭) ਅਯਂ ਚੇਤਨਾਵੋਹਾਰੋ ਨਾਮ, ਅਯਮਿਧਾਧਿਪ੍ਪੇਤੋ. ਯਸ੍ਮਾ ਵਾ ਪਬ੍ਬਜਿਤਕਾਲਤੋ ਪਟ੍ਠਾਯ ਗਿਹੀਤਿ ਚੇਤਨਾ ਨਤ੍ਥਿ, ਸਮਣੋਤਿ ਚੇਤਨਾ ਹੋਤਿ. ਗਿਹੀਤਿ ਵਚਨਂ ਨਤ੍ਥਿ, ਸਮਣੋਤਿ ਵਚਨਂ ਹੋਤਿ. ਗਿਹੀਤਿ ਪਣ੍ਣਤ੍ਤਿ ਨਤ੍ਥਿ, ਸਮਣੋਤਿ ਪਣ੍ਣਤ੍ਤਿ ਹੋਤਿ. ਗਿਹੀਤਿ ਬ੍ਯਵਹਾਰੋ ਨਤ੍ਥਿ, ਸਮਣੋਤਿ ਵਾ ਪਬ੍ਬਜਿਤੋਤਿ ਵਾ ਬ੍ਯਵਹਾਰੋ ਹੋਤਿ. ਤਸ੍ਮਾ ਸਬ੍ਬੇਪੇਤੇ ਲਬ੍ਭਨ੍ਤਿ.
੩੩. ਯੇਸਂ ਖੋ ਅਹਂ ਸਂਯੋਜਨਾਨਂ ਹੇਤੁ ਪਾਣਾਤਿਪਾਤੀਤਿ ਏਤ੍ਥ ਪਾਣਾਤਿਪਾਤੋਵ ਸਂਯੋਜਨਂ. ਪਾਣਾਤਿਪਾਤਸ੍ਸੇਵ ਹਿ ਹੇਤੁ ਪਾਣਾਤਿਪਾਤਪਚ੍ਚਯਾ ਪਾਣਾਤਿਪਾਤੀ ਨਾਮ ਹੋਤਿ. ਪਾਣਾਤਿਪਾਤਾਨਂ ਪਨ ਬਹੁਤਾਯ ‘‘ਯੇਸਂ ਖੋ ਅਹ’’ਨ੍ਤਿ ਵੁਤ੍ਤਂ. ਤੇਸਾਹਂ ਸਂਯੋਜਨਾਨਨ੍ਤਿ ਤੇਸਂ ਅਹਂ ਪਾਣਾਤਿਪਾਤਬਨ੍ਧਨਾਨਂ. ਪਹਾਨਾਯ ਸਮੁਚ੍ਛੇਦਾਯ ਪਟਿਪਨ੍ਨੋਤਿ ਇਮਿਨਾ ਅਪਾਣਾਤਿਪਾਤਸਙ੍ਖਾਤੇਨ ਕਾਯਿਕਸੀਲਸਂਵਰੇਨ ਪਹਾਨਤ੍ਥਾਯ ਸਮੁਚ੍ਛੇਦਨਤ੍ਥਾਯ ਪਟਿਪਨ੍ਨੋ. ਅਤ੍ਤਾਪਿ ਮਂ ਉਪਵਦੇਯ੍ਯਾਤਿ ਕੁਨ੍ਥਕਿਪਿਲ੍ਲਿਕਮ੍ਪਿ ਨਾਮ ਜੀਵਿਤਾ ਅਵੋਰੋਪਨਕਸਾਸਨੇ ਪਬ੍ਬਜਿਤ੍ਵਾ ਪਾਣਾਤਿਪਾਤਮਤ੍ਤਤੋਪਿ ਓਰਮਿਤੁਂ ਨ ਸਕ੍ਕੋਮਿ, ਕਿਂ ਮਯ੍ਹਂ ਪਬ੍ਬਜ੍ਜਾਯਾਤਿ ਏਵਂ ਅਤ੍ਤਾਪਿ ਮਂ ਉਪਵਦੇਯ੍ਯ. ਅਨੁਵਿਚ੍ਚਾਪਿ ਮਂ ਵਿਞ੍ਞੂ ਗਰਹੇਯ੍ਯੁਨ੍ਤਿ ਏਵਰੂਪੇ ਨਾਮ ਸਾਸਨੇ ਪਬ੍ਬਜਿਤ੍ਵਾ ਪਾਣਾਤਿਪਾਤਮਤ੍ਤਤੋਪਿ ਓਰਮਿਤੁਂ ਨ ਸਕ੍ਕੋਤਿ, ਕਿਂ ਏਤਸ੍ਸ ਪਬ੍ਬਜ੍ਜਾਯਾਤਿ ਏਵਂ ਅਨੁਵਿਚ੍ਚ ਤੁਲਯਿਤ੍ਵਾ ਪਰਿਯੋਗਾਹੇਤ੍ਵਾ ਅਞ੍ਞੇਪਿ ਵਿਞ੍ਞੂ ਪਣ੍ਡਿਤਾ ਗਰਹੇਯ੍ਯੁਂ. ਏਤਦੇਵ ਖੋ ਪਨ ਸਂਯੋਜਨਮੇਤਂ ਨੀਵਰਣਨ੍ਤਿ ਦਸਸੁ ਸਂਯੋਜਨੇਸੁ ਪਞ੍ਚਸੁ ਚ ਨੀਵਰਣੇਸੁ ਅਪਰਿਯਾਪਨ੍ਨਮ੍ਪਿ ‘‘ਅਟ੍ਠ ਨੀਵਰਣਾ’’ਤਿ ਦੇਸਨਾਵਸੇਨੇਤਂ ਵੁਤ੍ਤਂ. ਵਟ੍ਟਬਨ੍ਧਨਟ੍ਠੇਨ ਹਿ ਹਿਤਪਟਿਚ੍ਛਾਦਨਟ੍ਠੇਨ ਚ ਸਂਯੋਜਨਨ੍ਤਿਪਿ ਨੀਵਰਣਨ੍ਤਿਪਿ ਵੁਤ੍ਤਂ. ਆਸਵਾਤਿ ਪਾਣਾਤਿਪਾਤਕਾਰਣਾ ਏਕੋ ਅਵਿਜ੍ਜਾਸਵੋ ਉਪ੍ਪਜ੍ਜਤਿ. ਵਿਘਾਤਪਰਿਲ਼ਾਹਾਤਿ ਵਿਘਾਤਾ ਚ ਪਰਿਲ਼ਾਹਾ ਚ. ਤਤ੍ਥ ਵਿਘਾਤਗ੍ਗਹਣੇਨ ਕਿਲੇਸਦੁਕ੍ਖਞ੍ਚ ਵਿਪਾਕਦੁਕ੍ਖਞ੍ਚ ਗਹਿਤਂ, ਪਰਿਲ਼ਾਹਗ੍ਗਹਣੇਨਪਿ ਕਿਲੇਸਪਰਿਲ਼ਾਹੋ ਚ ਵਿਪਾਕਪਰਿਲ਼ਾਹੋ ਚ ਗਹਿਤੋ. ਇਮਿਨਾ ਉਪਾਯੇਨ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ.
੩੪-੪੦. ਅਯਂ ਪਨ ਵਿਸੇਸੋ – ਤੇਸਾਹਂ ਸਂਯੋਜਨਾਨਂ ਪਹਾਨਾਯਾਤਿ ਇਮਸ੍ਮਿਂ ਪਦੇ ਇਮਿਨਾ ਦਿਨ੍ਨਾਦਾਨਸਙ੍ਖਾਤੇਨ ਕਾਯਿਕਸੀਲਸਂਵਰੇਨ, ਸਚ੍ਚਵਾਚਾਸਙ੍ਖਾਤੇਨ ਵਾਚਸਿਕਸੀਲਸਂਵਰੇਨ, ਅਪਿਸੁਣਾਵਾਚਾਸਙ੍ਖਾਤੇਨ ਵਾਚਸਿਕਸੀਲਸਂਵਰੇਨ, ਅਗਿਦ੍ਧਿਲੋਭਸਙ੍ਖਾਤੇਨ ਮਾਨਸਿਕਸੀਲਸਂਵਰੇਨ, ਅਨਿਨ੍ਦਾਰੋਸਸਙ੍ਖਾਤੇਨ ਕਾਯਿਕਵਾਚਸਿਕਸੀਲਸਂਵਰੇਨ, ਅਕੋਧੁਪਾਯਾਸਸਙ੍ਖਾਤੇਨ ਮਾਨਸਿਕਸੀਲਸਂਵਰੇਨ, ਅਨਤਿਮਾਨਸਙ੍ਖਾਤੇਨ ਮਾਨਸਿਕਸੀਲਸਂਵਰੇਨ ਪਹਾਨਤ੍ਥਾਯ ਸਮੁਚ੍ਛੇਦਨਤ੍ਥਾਯ ਪਟਿਪਨ੍ਨੋਤਿ ਏਵਂ ਸਬ੍ਬਵਾਰੇਸੁ ਯੋਜਨਾ ਕਾਤਬ੍ਬਾ.
ਅਤ੍ਤਾਪਿ ਮਂ ਉਪਵਦੇਯ੍ਯ ਅਨੁਵਿਚ੍ਚਾਪਿ ਮਂ ਵਿਞ੍ਞੂ ਗਰਹੇਯ੍ਯੁਨ੍ਤਿ ਇਮੇਸੁ ਪਨ ਪਦੇਸੁ ਤਿਣਸਲਾਕਮ੍ਪਿ ਨਾਮ ਉਪਾਦਾਯ ਅਦਿਨ੍ਨਂ ਅਗ੍ਗਹਣਸਾਸਨੇ ਪਬ੍ਬਜਿਤ੍ਵਾ ਅਦਿਨ੍ਨਾਦਾਨਮਤ੍ਤਤੋਪਿ ਵਿਰਮਿਤੁਂ ਨ ਸਕ੍ਕੋਮਿ, ਕਿਂ ਮਯ੍ਹਂ ਪਬ੍ਬਜ੍ਜਾਯਾਤਿ ਏਵਂ ਅਤ੍ਤਾਪਿ ਮਂ ਉਪਵਦੇਯ੍ਯ. ਏਵਰੂਪੇ ਨਾਮ ਸਾਸਨੇ ਪਬ੍ਬਜਿਤ੍ਵਾ ਅਦਿਨ੍ਨਾਦਾਨਮਤ੍ਤਤੋਪਿ ਓਰਮਿਤੁਂ ਨ ਸਕ੍ਕੋਤਿ, ਕਿਂ ਇਮਸ੍ਸ ਪਬ੍ਬਜ੍ਜਾਯਾਤਿ ਏਵਂ ਅਨੁਵਿਚ੍ਚਾਪਿ ਮਂ ਵਿਞ੍ਞੂ ਗਰਹੇਯ੍ਯੁਂ? ਹਸਾਪੇਕ੍ਖਤਾਯਪਿ ਨਾਮ ਦਵਕਮ੍ਯਤਾਯ ਵਾ ਮੁਸਾਵਾਦਂ ਅਕਰਣਸਾਸਨੇ ਪਬ੍ਬਜਿਤ੍ਵਾ. ਸਬ੍ਬਾਕਾਰੇਨ ਪਿਸੁਣਂ ਅਕਰਣਸਾਸਨੇ ਨਾਮ ਪਬ੍ਬਜਿਤ੍ਵਾ. ਅਪ੍ਪਮਤ੍ਤਕਮ੍ਪਿ ਗਿਦ੍ਧਿਲੋਭਂ ਅਕਰਣਸਾਸਨੇ ਨਾਮ ਪਬ੍ਬਜਿਤ੍ਵਾਪਿ. ਕਕਚੇਨ ਅਙ੍ਗੇਸੁ ਓਕ੍ਕਨ੍ਤਿਯਮਾਨੇਸੁਪਿ ਨਾਮ ਪਰੇਸਂ ਨਿਨ੍ਦਾਰੋਸਂ ਅਕਰਣਸਾਸਨੇ ਪਬ੍ਬਜਿਤ੍ਵਾ. ਛਿਨ੍ਨਖਾਣੁਕਣ੍ਟਕਾਦੀਸੁਪਿ ਨਾਮ ਕੋਧੁਪਾਯਾਸਂ ਅਕਰਣਸਾਸਨੇ ਪਬ੍ਬਜਿਤ੍ਵਾ. ਅਧਿਮਾਨਮਤ੍ਤਮ੍ਪਿ ਨਾਮ ਮਾਨਂ ਅਕਰਣਸਾਸਨੇ ਪਬ੍ਬਜਿਤ੍ਵਾ ਅਤਿਮਾਨਮਤ੍ਤਮ੍ਪਿ ਪਜਹਿਤੁਂ ਨ ਸਕ੍ਕੋਮਿ, ਕਿਂ ਮਯ੍ਹਂ ਪਬ੍ਬਜ੍ਜਾਯਾਤਿ ਏਵਂ ਅਤ੍ਤਾਪਿ ਮਂ ਉਪਵਦੇਯ੍ਯ. ਏਵਰੂਪੇ ਨਾਮ ਸਾਸਨੇ ਪਬ੍ਬਜਿਤ੍ਵਾ ਅਤਿਮਾਨਮਤ੍ਤਮ੍ਪਿ ਪਜਹਿਤੁਂ ਨ ਸਕ੍ਕੋਤਿ, ਕਿਂ ਇਮਸ੍ਸ ਪਬ੍ਬਜ੍ਜਾਯਾਤਿ ਏਵਂ ਅਨੁਵਿਚ੍ਚਾਪਿ ਮਂ ਵਿਞ੍ਞੂ ਗਰਹੇਯ੍ਯੁਨ੍ਤਿ ਏਵਂ ਸਬ੍ਬਵਾਰੇਸੁ ਯੋਜਨਾ ਕਾਤਬ੍ਬਾ.
ਆਸਵਾਤਿ ਇਮਸ੍ਮਿਂ ਪਨ ਪਦੇ ਅਦਿਨ੍ਨਾਦਾਨਕਾਰਣਾ ਕਾਮਾਸਵੋ ਦਿਟ੍ਠਾਸਵੋ ਅਵਿਜ੍ਜਾਸਵੋਤਿ ਤਯੋ ਆਸਵਾ ਉਪ੍ਪਜ੍ਜਨ੍ਤਿ, ਤਥਾ ਮੁਸਾਵਾਦਕਾਰਣਾ ਪਿਸੁਣਾਵਾਚਾਕਾਰਣਾ ਚ, ਗਿਦ੍ਧਿਲੋਭਕਾਰਣਾ ਦਿਟ੍ਠਾਸਵੋ ਅਵਿਜ੍ਜਾਸਵੋ ਚ, ਨਿਨ੍ਦਾਰੋਸਕਾਰਣਾ ਅਵਿਜ੍ਜਾਸਵੋਵ, ਤਥਾ ਕੋਧੁਪਾਯਾਸਕਾਰਣਾ, ਅਤਿਮਾਨਕਾਰਣਾ ਭਵਾਸਵੋ ਅਵਿਜ੍ਜਾਸਵੋ ਚਾਤਿ ਦ੍ਵੇਵ ਆਸਵਾ ਉਪ੍ਪਜ੍ਜਨ੍ਤੀਤਿ ਏਵਂ ਆਸਵੁਪ੍ਪਤ੍ਤਿ ਵੇਦਿਤਬ੍ਬਾ.
ਇਮੇਸੁ ਪਨ ਅਟ੍ਠਸੁਪਿ ਵਾਰੇਸੁ ਅਸਮ੍ਮੋਹਤ੍ਥਂ ਪੁਨ ਅਯਂ ਸਙ੍ਖੇਪਵਿਨਿਚ੍ਛਯੋ – ਪੁਰਿਮੇਸੁ ਤਾਵ ਚਤੂਸੁ ਵਿਰਮਿਤੁਂ ਨ ਸਕ੍ਕੋਮੀਤਿ ਵਤ੍ਤਬ੍ਬਂ, ਪਚ੍ਛਿਮੇਸੁ ਪਜਹਿਤੁਂ ਨ ਸਕ੍ਕੋਮੀਤਿ. ਪਾਣਾਤਿਪਾਤਨਿਨ੍ਦਾਰੋਸਕੋਧੁਪਾਯਾਸੇਸੁ ਚ ਏਕੋ ਅਵਿਜ੍ਜਾਸਵੋਵ ਹੋਤਿ, ਅਦਿਨ੍ਨਾਦਾਨਮੁਸਾਵਾਦਪਿਸੁਣਾਵਾਚਾਸੁ ਕਾਮਾਸਵੋ ਦਿਟ੍ਠਾਸਵੋ ਅਵਿਜ੍ਜਾਸਵੋ, ਗਿਦ੍ਧਿਲੋਭੇ ਦਿਟ੍ਠਾਸਵੋ ਅਵਿਜ੍ਜਾਸਵੋ, ਅਤਿਮਾਨੇ ਭਵਾਸਵੋ ਅਵਿਜ੍ਜਾਸਵੋ, ਅਪਾਣਾਤਿਪਾਤਂ ਦਿਨ੍ਨਾਦਾਨਂ ਕਾਯਿਕਂ ਸੀਲਂ, ਅਮੁਸਾ ਅਪਿਸੁਣਂ ਵਾਚਸਿਕਸੀਲਂ, ਠਪੇਤ੍ਵਾ ਅਨਿਨ੍ਦਾਰੋਸਂ ਸੇਸਾਨਿ ਤੀਣਿ ਮਾਨਸਿਕਸੀਲਾਨਿ. ਯਸ੍ਮਾ ਪਨ ਕਾਯੇਨਪਿ ਘਟ੍ਟੇਤਿ ਰੋਸੇਤਿ ਵਾਚਾਯਪਿ, ਤਸ੍ਮਾ ਅਨਿਨ੍ਦਾਰੋਸੋ ਦ੍ਵੇ ਠਾਨਾਨਿ ਯਾਤਿ, ਕਾਯਿਕਸੀਲਮ੍ਪਿ ਹੋਤਿ ਵਾਚਸਿਕਸੀਲਮ੍ਪਿ. ਏਤ੍ਤਾਵਤਾ ਕਿਂ ਕਥਿਤਂ? ਪਾਤਿਮੋਕ੍ਖਸਂਵਰਸੀਲਂ. ਪਾਤਿਮੋਕ੍ਖਸਂਵਰਸੀਲੇ ਠਿਤਸ੍ਸ ਚ ਭਿਕ੍ਖੁਨੋ ਪਟਿਸਙ੍ਖਾਪਹਾਨਵਸੇਨ ਗਿਹਿਵੋਹਾਰਸਮੁਚ੍ਛੇਦੋ ਕਥਿਤੋਤਿ ਵੇਦਿਤਬ੍ਬੋ.
ਕਾਮਾਦੀਨਵਕਥਾਵਣ੍ਣਨਾ
੪੨. ਵਿਤ੍ਥਾਰਦੇਸਨਾਯਂ ਤਮੇਨਂ ਦਕ੍ਖੋਤਿ ਪਦਸ੍ਸ ਉਪਸੁਮ੍ਭੇਯ੍ਯਾਤਿ ਇਮਿਨਾ ਸਦ੍ਧਿਂ ਸਮ੍ਬਨ੍ਧੋ ਵੇਦਿਤਬ੍ਬੋ. ਇਦਂ ਵੁਤ੍ਤਂ ਹੋਤਿ, ਤਮੇਨਂ ਕੁਕ੍ਕੁਰਂ ਉਪਸੁਮ੍ਭੇਯ੍ਯ, ਤਸ੍ਸ ਸਮੀਪੇ ਖਿਪੇਯ੍ਯਾਤਿ ਅਤ੍ਥੋ. ਅਟ੍ਠਿਕਙ੍ਕਲਨ੍ਤਿ ਉਰਟ੍ਠਿਂ ਵਾ ਪਿਟ੍ਠਿਕਣ੍ਟਕਂ ਵਾ ਸੀਸਟ੍ਠਿਂ ਵਾ. ਤਞ੍ਹਿ ਨਿਮ੍ਮਂਸਤ੍ਤਾ ਕਙ੍ਕਲਨ੍ਤਿ ਵੁਚ੍ਚਤਿ. ਸੁਨਿਕ੍ਕਨ੍ਤਂ ਨਿਕ੍ਕਨ੍ਤਨ੍ਤਿ ਯਥਾ ਸੁਨਿਕ੍ਕਨ੍ਤਂ ਹੋਤਿ, ਏਵਂ ਨਿਕ੍ਕਨ੍ਤਂ ਨਿਲ੍ਲਿਖਿਤਂ, ਯਦੇਤ੍ਥ ਅਲ੍ਲੀਨਮਂਸਂ ਅਤ੍ਥਿ, ਤਂ ਸਬ੍ਬਂ ਨਿਲ੍ਲਿਖਿਤ੍ਵਾ ਅਟ੍ਠਿਮਤ੍ਤਮੇਵ ਕਤਨ੍ਤਿ ਅਤ੍ਥੋ. ਤੇਨੇਵਾਹ ‘‘ਨਿਮ੍ਮਂਸ’’ਨ੍ਤਿ. ਲੋਹਿਤਂ ਪਨ ਮਕ੍ਖਿਤ੍ਵਾ ਤਿਟ੍ਠਤਿ, ਤੇਨ ਵੁਤ੍ਤਂ ‘‘ਲੋਹਿਤਮਕ੍ਖਿਤ’’ਨ੍ਤਿ.
ਬਹੁਦੁਕ੍ਖਾ ਬਹੁਪਾਯਾਸਾਤਿ ਦਿਟ੍ਠਧਮ੍ਮਿਕਸਮ੍ਪਰਾਯਿਕੇਹਿ ਦੁਕ੍ਖੇਹਿ ਬਹੁਦੁਕ੍ਖਾ, ਉਪਾਯਾਸਸਂਕਿਲੇਸੇਹਿ ਬਹੁਪਾਯਾਸਾ. ਯਾਯਂ ਉਪੇਕ੍ਖਾ ਨਾਨਤ੍ਤਾ ਨਾਨਤ੍ਤਸਿਤਾਤਿ ਯਾ ਅਯਂ ਪਞ੍ਚਕਾਮਗੁਣਾਰਮ੍ਮਣਵਸੇਨ ਨਾਨਾਸਭਾਵਾ, ਤਾਨੇਵ ਚ ਆਰਮ੍ਮਣਾਨਿ ਨਿਸ੍ਸਿਤਤ੍ਤਾ ‘‘ਨਾਨਤ੍ਤਸਿਤਾ’’ਤਿ ਵੁਚ੍ਚਤਿ ਪਞ੍ਚਕਾਮਗੁਣੂਪੇਕ੍ਖਾ, ਤਂ ਅਭਿਨਿਵਜ੍ਜੇਤ੍ਵਾ. ਏਕਤ੍ਤਾ ਏਕਤ੍ਤਸਿਤਾਤਿ ਚਤੁਤ੍ਥਜ੍ਝਾਨੁਪੇਕ੍ਖਾ, ਸਾ ਹਿ ਦਿਵਸਮ੍ਪਿ ਏਕਸ੍ਮਿਂ ਆਰਮ੍ਮਣੇ ਉਪ੍ਪਜ੍ਜਨਤੋ ਏਕਸਭਾਵਾ, ਤਦੇਵ ਏਕਂ ਆਰਮ੍ਮਣਂ ਨਿਸ੍ਸਿਤਤ੍ਤਾ ਏਕਤ੍ਤਸਿਤਾ ਨਾਮ. ਯਤ੍ਥ ਸਬ੍ਬਸੋ ਲੋਕਾਮਿਸੂਪਾਦਾਨਾ ਅਪਰਿਸੇਸਾ ਨਿਰੁਜ੍ਝਨ੍ਤੀਤਿ ਯਤ੍ਥ ਚਤੁਤ੍ਥਜ੍ਝਾਨੁਪੇਕ੍ਖਾਯਂ ਯਂ ਉਪੇਕ੍ਖਂ ਆਗਮ੍ਮ ਯਂ ਪਟਿਚ੍ਚ ਸਬ੍ਬੇਨ ਸਬ੍ਬਂ ਅਪਰਿਸੇਸਾ ਲੋਕਾਮਿਸਸਙ੍ਖਾਤਾ ਪਞ੍ਚਕਾਮਗੁਣਾਮਿਸਾ ਨਿਰੁਜ੍ਝਨ੍ਤਿ. ਪਞ੍ਚਕਾਮਗੁਣਾਮਿਸਾਤਿ ਚ ਕਾਮਗੁਣਾਰਮ੍ਮਣਛਨ੍ਦਰਾਗਾ, ਗਹਣਟ੍ਠੇਨ ਤੇਯੇਵ ਚ ਉਪਾਦਾਨਾਤਿਪਿ ਵੁਤ੍ਤਾ. ਤਮੇਵੂਪੇਕ੍ਖਂ ਭਾਵੇਤੀਤਿ ਤਂ ਲੋਕਾਮਿਸੂਪਾਦਾਨਾਨਂ ਪਟਿਪਕ੍ਖਭੂਤਂ ਚਤੁਤ੍ਥਜ੍ਝਾਨੁਪੇਕ੍ਖਮੇਵ ਵਡ੍ਢੇਤਿ.
੪੩. ਉਡ੍ਡੀਯੇਯ੍ਯਾਤਿ ਉਪ੍ਪਤਿਤ੍ਵਾ ਗਚ੍ਛੇਯ੍ਯ. ਅਨੁਪਤਿਤ੍ਵਾਤਿ ਅਨੁਬਨ੍ਧਿਤ੍ਵਾ. ਵਿਤਚ੍ਛੇਯ੍ਯੁਨ੍ਤਿ ਮੁਖਤੁਣ੍ਡਕੇਨ ਡਂਸਨ੍ਤਾ ਤਚ੍ਛੇਯ੍ਯੁਂ. ਵਿਸ੍ਸਜ੍ਜੇਯ੍ਯੁਨ੍ਤਿ ਮਂਸਪੇਸਿਂ ਨਖੇਹਿ ਕਡ੍ਢਿਤ੍ਵਾ ਪਾਤੇਯ੍ਯੁਂ.
੪੭. ਯਾਨਂ ਵਾ ਪੋਰਿਸੇਯ੍ਯਨ੍ਤਿ ਪੁਰਿਸਾਨੁਚ੍ਛਵਿਕਂ ਯਾਨਂ. ਪਵਰਮਣਿਕੁਣ੍ਡਲਨ੍ਤਿ ਨਾਨਪ੍ਪਕਾਰਂ ਉਤ੍ਤਮਮਣਿਞ੍ਚ ਕੁਣ੍ਡਲਞ੍ਚ. ਸਾਨਿ ਹਰਨ੍ਤੀਤਿ ਅਤ੍ਤਨੋ ਭਣ੍ਡਕਾਨਿ ਗਣ੍ਹਨ੍ਤਿ.
੪੮. ਸਮ੍ਪਨ੍ਨਫਲਨ੍ਤਿ ਮਧੁਰਫਲਂ. ਉਪਪਨ੍ਨਫਲਨ੍ਤਿ ਫਲੂਪਪਨ੍ਨਂ ਬਹੁਫਲਂ.
੪੯. ਅਨੁਤ੍ਤਰਨ੍ਤਿ ਉਤ੍ਤਮਂ ਪਭਸ੍ਸਰਂ ਨਿਰੁਪਕ੍ਕਿਲੇਸਂ.
੫੦. ਆਰਕਾ ਅਹਂ, ਭਨ੍ਤੇਤਿ ਪਥਵਿਤੋ ਨਭਂ ਵਿਯ ਸਮੁਦ੍ਦਸ੍ਸ ਓਰਿਮਤੀਰਤੋ ਪਰਤੀਰਂ ਵਿਯ ਚ ਸੁਵਿਦੂਰਵਿਦੂਰੇ ਅਹਂ. ਅਨਾਜਾਨੀਯੇਤਿ ਗਿਹਿਵੋਹਾਰਸਮੁਚ੍ਛੇਦਨਸ੍ਸ ਕਾਰਣਂ ਅਜਾਨਨਕੇ. ਆਜਾਨੀਯਭੋਜਨਨ੍ਤਿ ਕਾਰਣਂ ਜਾਨਨ੍ਤੇਹਿ ਭੁਞ੍ਜਿਤਬ੍ਬਂ ਭੋਜਨਂ. ਅਨਾਜਾਨੀਯਭੋਜਨਨ੍ਤਿ ਕਾਰਣਂ ਅਜਾਨਨ੍ਤੇਹਿ ਭੁਞ੍ਜਿਤਬ੍ਬਂ ਭੋਜਨਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.
ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ
ਪੋਤਲਿਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੫. ਜੀਵਕਸੁਤ੍ਤਵਣ੍ਣਨਾ
੫੧. ਏਵਂ ਮੇ ਸੁਤਨ੍ਤਿ ਜੀਵਕਸੁਤ੍ਤਂ. ਤਤ੍ਥ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਅਮ੍ਬਵਨੇਤਿ ਏਤ੍ਥ ਜੀਵਤੀਤਿ ਜੀਵਕੋ. ਕੁਮਾਰੇਨ ਭਤੋਤਿ ਕੋਮਾਰਭਚ੍ਚੋ. ਯਥਾਹ ‘‘ਕਿਂ ਏਤਂ ਭਣੇ ਕਾਕੇਹਿ ਸਮ੍ਪਰਿਕਿਣ੍ਣਨ੍ਤਿ? ਦਾਰਕੋ ਦੇਵਾਤਿ. ਜੀਵਤਿ ਭਣੇਤਿ? ਜੀਵਤਿ ਦੇਵਾਤਿ. ਤੇਨ ਹਿ ਭਣੇ ਤਂ ਦਾਰਕਂ ਅਮ੍ਹਾਕਂ ਅਨ੍ਤੇਪੁਰਂ ਨੇਤ੍ਵਾ ਧਾਤੀਨਂ ਦੇਥ ਪੋਸੇਤੁਨ੍ਤਿ. ਤਸ੍ਸ ਜੀਵਤੀਤਿ ਜੀਵਕੋਤਿ ਨਾਮਂ ਅਕਂਸੁ, ਕੁਮਾਰੇਨ ਪੋਸਾਪਿਤੋਤਿ ਕੋਮਾਰਭਚ੍ਚੋਤਿ ਨਾਮਂ ਅਕਂਸੂ’’ਤਿ (ਮਹਾਵ. ੩੨੮). ਅਯਮੇਤ੍ਥ ਸਙ੍ਖੇਪੋ. ਵਿਤ੍ਥਾਰੇਨ ਪਨ ਜੀਵਕਵਤ੍ਥੁ ਖਨ੍ਧਕੇ ਆਗਤਮੇਵ. ਵਿਨਿਚ੍ਛਯਕਥਾਪਿਸ੍ਸ ਸਮਨ੍ਤਪਾਸਾਦਿਕਾਯ ਵਿਨਯਟ੍ਠਕਥਾਯ ਵੁਤ੍ਤਾ.
ਅਯਂ ਪਨ ਜੀਵਕੋ ਏਕਸ੍ਮਿਂ ਸਮਯੇ ਭਗਵਤੋ ਦੋਸਾਭਿਸਨ੍ਨਂ ਕਾਯਂ ਵਿਰੇਚੇਤ੍ਵਾ ਸੀਵੇਯ੍ਯਕਂ ਦੁਸ੍ਸਯੁਗਂ ਦਤ੍ਵਾ ਵਤ੍ਥਾਨੁਮੋਦਨਪਰਿਯੋਸਾਨੇ ਸੋਤਾਪਤ੍ਤਿਫਲੇ ਪਤਿਟ੍ਠਾਯ ਚਿਨ੍ਤੇਸਿ – ‘‘ਮਯਾ ਦਿਵਸਸ੍ਸ ਦ੍ਵਤ੍ਤਿਕ੍ਖਤ੍ਤੁਂ ਬੁਦ੍ਧੁਪਟ੍ਠਾਨਂ ਗਨ੍ਤਬ੍ਬਂ, ਇਦਞ੍ਚ ਵੇਲ਼ੁਵਨਂ ਅਤਿਦੂਰੇ, ਮਯ੍ਹਂ ਉਯ੍ਯਾਨਂ ਅਮ੍ਬਵਨਂ ਆਸਨ੍ਨਤਰਂ, ਯਂਨੂਨਾਹਮੇਤ੍ਥ ਭਗਵਤੋ ਵਿਹਾਰਂ ਕਾਰੇਯ੍ਯ’’ਨ੍ਤਿ. ਸੋ ਤਸ੍ਮਿਂ ਅਮ੍ਬਵਨੇ ਰਤ੍ਤਿਟ੍ਠਾਨਦਿਵਾਟ੍ਠਾਨਲੇਣਕੁਟਿਮਣ੍ਡਪਾਦੀਨਿ ਸਮ੍ਪਾਦੇਤ੍ਵਾ ਭਗਵਤੋ ਅਨੁਚ੍ਛਵਿਕਂ ਗਨ੍ਧਕੁਟਿਂ ਕਾਰੇਤ੍ਵਾ ਅਮ੍ਬਵਨਂ ਅਟ੍ਠਾਰਸਹਤ੍ਥੁਬ੍ਬੇਧੇਨ ਤਮ੍ਬਪਟ੍ਟਵਣ੍ਣੇਨ ਪਾਕਾਰੇਨ ਪਰਿਕ੍ਖਿਪਾਪੇਤ੍ਵਾ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਚੀਵਰਭਤ੍ਤੇਨ ਸਨ੍ਤਪ੍ਪੇਤ੍ਵਾ ਦਕ੍ਖਿਣੋਦਕਂ ਪਾਤੇਤ੍ਵਾ ਵਿਹਾਰਂ ਨਿਯ੍ਯਾਤੇਸਿ. ਤਂ ਸਨ੍ਧਾਯ ਵੁਤ੍ਤਂ – ‘‘ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਅਮ੍ਬਵਨੇ’’ਤਿ.
ਆਰਭਨ੍ਤੀਤਿ ਘਾਤੇਨ੍ਤਿ. ਉਦ੍ਦਿਸ੍ਸਕਤਨ੍ਤਿ ਉਦ੍ਦਿਸਿਤ੍ਵਾ ਕਤਂ. ਪਟਿਚ੍ਚਕਮ੍ਮਨ੍ਤਿ ਅਤ੍ਤਾਨਂ ਪਟਿਚ੍ਚ ਕਤਂ. ਅਥ ਵਾ ਪਟਿਚ੍ਚਕਮ੍ਮਨ੍ਤਿ ਨਿਮਿਤ੍ਤਕਮ੍ਮਸ੍ਸੇਤਂ ਅਧਿਵਚਨਂ, ਤਂ ਪਟਿਚ੍ਚ ਕਮ੍ਮਮੇਤ੍ਥ ਅਤ੍ਥੀਤਿ ਮਂਸਂ ‘‘ਪਟਿਚ੍ਚਕਮ੍ਮ’’ਨ੍ਤਿ ਵੁਤ੍ਤਂ ਹੋਤਿ ਯੋ ਏਵਰੂਪਂ ਮਂਸਂ ਪਰਿਭੁਞ੍ਜਤਿ, ਸੋਪਿ ਤਸ੍ਸ ਕਮ੍ਮਸ੍ਸ ਦਾਯਾਦੋ ਹੋਤਿ, ਵਧਕਸ੍ਸ ਵਿਯ ਤਸ੍ਸਾਪਿ ਪਾਣਘਾਤਕਮ੍ਮਂ ਹੋਤੀਤਿ ਤੇਸਂ ਲਦ੍ਧਿ. ਧਮ੍ਮਸ੍ਸ ਚਾਨੁਧਮ੍ਮਂ ਬ੍ਯਾਕਰੋਨ੍ਤੀਤਿ ਭਗਵਤਾ ਵੁਤ੍ਤਕਾਰਣਸ੍ਸ ਅਨੁਕਾਰਣਂ ਕਥੇਨ੍ਤਿ. ਏਤ੍ਥ ਚ ਕਾਰਣਂ ਨਾਮ ਤਿਕੋਟਿਪਰਿਸੁਦ੍ਧਮਚ੍ਛਮਂਸਪਰਿਭੋਗੋ, ਅਨੁਕਾਰਣਂ ਨਾਮ ਮਹਾਜਨਸ੍ਸ ਤਥਾ ਬ੍ਯਾਕਰਣਂ. ਯਸ੍ਮਾ ਪਨ ਭਗਵਾ ਉਦ੍ਦਿਸ੍ਸਕਤਂ ਨ ਪਰਿਭੁਞ੍ਜਤਿ, ਤਸ੍ਮਾ ਨੇਵ ਤਂ ਕਾਰਣਂ ਹੋਤਿ, ਨ ਤਿਤ੍ਥਿਯਾਨਂ ਤਥਾ ਬ੍ਯਾਕਰਣਂ ਅਨੁਕਾਰਣਂ. ਸਹਧਮ੍ਮਿਕੋ ਵਾਦਾਨੁਵਾਦੋਤਿ ਪਰੇਹਿ ਵੁਤ੍ਤਕਾਰਣੇਨ ਸਕਾਰਣੋ ਹੁਤ੍ਵਾ ਤੁਮ੍ਹਾਕਂ ਵਾਦੋ ਵਾ ਅਨੁਵਾਦੋ ਵਾ ਵਿਞ੍ਞੂਹਿ ਗਰਹਿਤਬ੍ਬਕਾਰਣਂ ਕੋਚਿ ਅਪ੍ਪਮਤ੍ਤਕੋਪਿ ਕਿਂ ਨ ਆਗਚ੍ਛਤਿ. ਇਦਂ ਵੁਤ੍ਤਂ ਹੋਤਿ – ‘‘ਕਿਂ ਸਬ੍ਬਾਕਾਰੇਨਪਿ ਤੁਮ੍ਹਾਕਂ ਵਾਦੇ ਗਾਰਯ੍ਹਂ ਕਾਰਣਂ ਨਤ੍ਥੀ’’ਤਿ. ਅਬ੍ਭਾਚਿਕ੍ਖਨ੍ਤੀਤਿ ਅਭਿਭਵਿਤ੍ਵਾ ਆਚਿਕ੍ਖਨ੍ਤਿ.
੫੨. ਠਾਨੇਹੀਤਿ ਕਾਰਣੇਹਿ. ਦਿਟ੍ਠਾਦੀਸੁ ਦਿਟ੍ਠਂ ਨਾਮ ਭਿਕ੍ਖੂਨਂ ਅਤ੍ਥਾਯ ਮਿਗਮਚ੍ਛੇ ਵਧਿਤ੍ਵਾ ਗਯ੍ਹਮਾਨਂ ਦਿਟ੍ਠਂ. ਸੁਤਂ ਨਾਮ ਭਿਕ੍ਖੂਨਂ ਅਤ੍ਥਾਯ ਮਿਗਮਚ੍ਛੇ ਵਧਿਤ੍ਵਾ ਗਹਿਤਨ੍ਤਿ ਸੁਤਂ. ਪਰਿਸਙ੍ਕਿਤਂ ਨਾਮ ਦਿਟ੍ਠਪਰਿਸਙ੍ਕਿਤਂ ਸੁਤਪਰਿਸਙ੍ਕਿਤਂ ਤਦੁਭਯਵਿਮੁਤ੍ਤਪਰਿਸਙ੍ਕਿਤਨ੍ਤਿ ਤਿਵਿਧਂ ਹੋਤਿ.
ਤਤ੍ਰਾਯਂ ਸਬ੍ਬਸਙ੍ਗਾਹਕਵਿਨਿਚ੍ਛਯੋ – ਇਧ ਭਿਕ੍ਖੂ ਪਸ੍ਸਨ੍ਤਿ ਮਨੁਸ੍ਸੇ ਜਾਲਵਾਗੁਰਾਦਿਹਤ੍ਥੇ ਗਾਮਤੋ ਵਾ ਨਿਕ੍ਖਮਨ੍ਤੇ ਅਰਞ੍ਞੇ ਵਾ ਵਿਚਰਨ੍ਤੇ. ਦੁਤਿਯਦਿਵਸੇ ਚ ਨੇਸਂ ਤਂ ਗਾਮਂ ਪਿਣ੍ਡਾਯ ਪਵਿਟ੍ਠਾਨਂ ਸਮਚ੍ਛਮਂਸਂ ਪਿਣ੍ਡਪਾਤਂ ਅਭਿਹਰਨ੍ਤਿ. ਤੇ ਤੇਨ ਦਿਟ੍ਠੇਨ ਪਰਿਸਙ੍ਕਨ੍ਤਿ ‘‘ਭਿਕ੍ਖੂਨਂ ਨੁ ਖੋ ਅਤ੍ਥਾਯ ਕਤ’’ਨ੍ਤਿ, ਇਦਂ ਦਿਟ੍ਠਪਰਿਸਙ੍ਕਿਤਂ ਨਾਮ, ਏਤਂ ਗਹੇਤੁਂ ਨ ਵਟ੍ਟਤਿ. ਯਂ ਏਵਂ ਅਪਰਿਸਙ੍ਕਿਤਂ, ਤਂ ਵਟ੍ਟਤਿ. ਸਚੇ ਪਨ ਤੇ ਮਨੁਸ੍ਸਾ ‘‘ਕਸ੍ਮਾ, ਭਨ੍ਤੇ, ਨ ਗਣ੍ਹਥਾ’’ਤਿ ਪੁਚ੍ਛਿਤ੍ਵਾ ਤਮਤ੍ਥਂ ਸੁਤ੍ਵਾ ‘‘ਨਯਿਦਂ, ਭਨ੍ਤੇ, ਭਿਕ੍ਖੂਨਂ ਅਤ੍ਥਾਯ ਕਤਂ, ਅਮ੍ਹੇਹਿ ਅਤ੍ਤਨੋ ਅਤ੍ਥਾਯ ਵਾ ਰਾਜਯੁਤ੍ਤਾਦੀਨਂ ਅਤ੍ਥਾਯ ਵਾ ਕਤ’’ਨ੍ਤਿ ਵਦਨ੍ਤਿ, ਕਪ੍ਪਤਿ.