੮. ਅਭਯਰਾਜਕੁਮਾਰਸੁਤ੍ਤਵਣ੍ਣਨਾ

੮੩. ਏਵਂ ਮੇ ਸੁਤਨ੍ਤਿ ਅਭਯਸੁਤ੍ਤਂ. ਤਤ੍ਥ ਅਭਯੋਤਿ ਤਸ੍ਸ ਨਾਮਂ. ਰਾਜਕੁਮਾਰੋਤਿ ਬਿਮ੍ਬਿਸਾਰਸ੍ਸ ਓਰਸਪੁਤ੍ਤੋ. ਵਾਦਂ ਆਰੋਪੇਹੀਤਿ ਦੋਸਂ ਆਰੋਪੇਹਿ. ਨੇਰਯਿਕੋਤਿ ਨਿਰਯੇ ਨਿਬ੍ਬਤ੍ਤਕੋ. ਕਪ੍ਪਟ੍ਠੋਤਿ ਕਪ੍ਪਟ੍ਠਿਤਿਕੋ. ਅਤੇਕਿਚ੍ਛੋਤਿ ਬੁਦ੍ਧਸਹਸ੍ਸੇਨਾਪਿ ਤਿਕਿਚ੍ਛਿਤੁਂ ਨ ਸਕ੍ਕਾ. ਉਗ੍ਗਿਲਿਤੁਨ੍ਤਿ ਦ੍ਵੇ ਅਨ੍ਤੇ ਮੋਚੇਤ੍ਵਾ ਕਥੇਤੁਂ ਅਸਕ੍ਕੋਨ੍ਤੋ ਉਗ੍ਗਿਲਿਤੁਂ ਬਹਿ ਨੀਹਰਿਤੁਂ ਨ ਸਕ੍ਖਿਤਿ. ਓਗਿਲਿਤੁਨ੍ਤਿ ਪੁਚ੍ਛਾਯ ਦੋਸਂ ਦਤ੍ਵਾ ਹਾਰੇਤੁਂ ਅਸਕ੍ਕੋਨ੍ਤੋ ਓਗਿਲਿਤੁਂ ਅਨ੍ਤੋ ਪਵੇਸੇਤੁਂ ਨ ਸਕ੍ਖਿਤਿ.

ਏਵਂ, ਭਨ੍ਤੇਤਿ ਨਿਗਣ੍ਠੋ ਕਿਰ ਚਿਨ੍ਤੇਸਿ – ‘‘ਸਮਣੋ ਗੋਤਮੋ ਮਯ੍ਹਂ ਸਾਵਕੇ ਭਿਨ੍ਦਿਤ੍ਵਾ ਗਣ੍ਹਾਤਿ, ਹਨ੍ਦਾਹਂ ਏਕਂ ਪਞ੍ਹਂ ਅਭਿਸਙ੍ਖਰੋਮਿ, ਯਂ ਪੁਟ੍ਠੋ ਸਮਣੋ ਗੋਤਮੋ ਉਕ੍ਕੁਟਿਕੋ ਹੁਤ੍ਵਾ ਨਿਸਿਨ੍ਨੋ ਉਟ੍ਠਾਤੁਂ ਨ ਸਕ੍ਖਿਸ੍ਸਤੀ’’ਤਿ. ਸੋ ਅਭਯਸ੍ਸ ਗੇਹਾ ਨੀਹਟਭਤ੍ਤੋ ਸਿਨਿਦ੍ਧਭੋਜਨਂ ਭੁਞ੍ਜਨ੍ਤੋ ਬਹੂ ਪਞ੍ਹੇ ਅਭਿਸਙ੍ਖਰਿਤ੍ਵਾ – ‘‘ਏਤ੍ਥ ਸਮਣੋ ਗੋਤਮੋ ਇਮਂ ਨਾਮ ਦੋਸਂ ਦਸ੍ਸੇਸ੍ਸਤਿ, ਏਤ੍ਥ ਇਮਂ ਨਾਮਾ’’ਤਿ ਸਬ੍ਬੇ ਪਹਾਯ ਚਾਤੁਮਾਸਮਤ੍ਥਕੇ ਇਮਂ ਪਞ੍ਹਂ ਅਦ੍ਦਸ. ਅਥਸ੍ਸ ਏਤਦਹੋਸਿ – ‘‘ਇਮਸ੍ਸ ਪਞ੍ਹਸ੍ਸ ਪੁਚ੍ਛਾਯ ਵਾ ਵਿਸ੍ਸਜ੍ਜਨੇ ਵਾ ਨ ਸਕ੍ਕਾ ਦੋਸੋ ਦਾਤੁਂ, ਓਵਟ੍ਟਿਕਸਾਰੋ ਅਯਂ, ਕੋ ਨੁ ਖੋ ਇਮਂ ਗਹੇਤ੍ਵਾ ਸਮਣਸ੍ਸ ਗੋਤਮਸ੍ਸ ਵਾਦਂ ਆਰੋਪੇਸ੍ਸਤੀ’’ਤਿ. ਤਤੋ ‘‘ਅਭਯੋ ਰਾਜਕੁਮਾਰੋ ਪਣ੍ਡਿਤੋ, ਸੋ ਸਕ੍ਖਿਸ੍ਸਤੀਤਿ ਤਂ ਉਗ੍ਗਣ੍ਹਾਪੇਮੀ’’ਤਿ ਨਿਟ੍ਠਂ ਗਨ੍ਤ੍ਵਾ ਉਗ੍ਗਣ੍ਹਾਪੇਸਿ. ਸੋ ਵਾਦਜ੍ਝਾਸਯਤਾਯ ਤਸ੍ਸ ਵਚਨਂ ਸਮ੍ਪਟਿਚ੍ਛਨ੍ਤੋ ‘‘ਏਵਂ, ਭਨ੍ਤੇ,’’ਤਿ ਆਹ.

੮੪. ਅਕਾਲੋ ਖੋ ਅਜ੍ਜਾਤਿ ਅਯਂ ਪਞ੍ਹੋ ਚਤੂਹਿ ਮਾਸੇਹਿ ਅਭਿਸਙ੍ਖਤੋ, ਤਤ੍ਥ ਇਦਂ ਗਹੇਤ੍ਵਾ ਇਦਂ ਵਿਸ੍ਸਜ੍ਜਿਯਮਾਨੇ ਦਿਵਸਭਾਗੋ ਨਪ੍ਪਹੋਸ੍ਸਤੀਤਿ ਮਞ੍ਞਨ੍ਤੋ ਏਵਂ ਚਿਨ੍ਤੇਸਿ. ਸੋ ਦਾਨੀਤਿ ਸ੍ਵੇ ਦਾਨਿ. ਅਤ੍ਤਚਤੁਤ੍ਥੋਤਿ ਕਸ੍ਮਾ ਬਹੂਹਿ ਸਦ੍ਧਿਂ ਨ ਨਿਮਨ੍ਤੇਸਿ? ਏਵਂ ਕਿਰਸ੍ਸ ਅਹੋਸਿ – ‘‘ਬਹੂਸੁ ਨਿਸਿਨ੍ਨੇਸੁ ਥੋਕਂ ਦਤ੍ਵਾ ਵਦਨ੍ਤਸ੍ਸ ਅਞ੍ਞਂ ਸੁਤ੍ਤਂ ਅਞ੍ਞਂ ਕਾਰਣਂ ਅਞ੍ਞਂ ਤਥਾਰੂਪਂ ਵਤ੍ਥੁਂ ਆਹਰਿਤ੍ਵਾ ਦਸ੍ਸੇਸ੍ਸਤਿ, ਏਵਂ ਸਨ੍ਤੇ ਕਲਹੋ ਵਾ ਕੋਲਾਹਲਮੇਵ ਵਾ ਭਵਿਸ੍ਸਤਿ. ਅਥਾਪਿ ਏਕਕਂਯੇਵ ਨਿਮਨ੍ਤੇਸ੍ਸਾਮਿ, ਏਵਮ੍ਪਿ ਮੇ ਗਰਹਾ ਉਪ੍ਪਜ੍ਜਿਸ੍ਸਤਿ ‘ਯਾਵਮਚ੍ਛਰੀ ਵਾਯਂ ਅਭਯੋ, ਭਗਵਨ੍ਤਂ ਦਿਵਸੇ ਦਿਵਸੇ ਭਿਕ੍ਖੂਨਂ ਸਤੇਨਪਿ ਸਹਸ੍ਸੇਨਪਿ ਸਦ੍ਧਿਂ ਚਰਨ੍ਤਂ ਦਿਸ੍ਵਾਪਿ ਏਕਕਂਯੇਵ ਨਿਮਨ੍ਤੇਸੀ’’’ਤਿ. ‘‘ਏਵਂ ਪਨ ਦੋਸੋ ਨ ਭਵਿਸ੍ਸਤੀ’’ਤਿ ਅਪਰੇਹਿ ਤੀਹਿ ਸਦ੍ਧਿਂ ਅਤ੍ਤਚਤੁਤ੍ਥਂ ਨਿਮਨ੍ਤੇਸਿ.

੮੫. ਨ ਖ੍ਵੇਤ੍ਥ, ਰਾਜਕੁਮਾਰ, ਏਕਂਸੇਨਾਤਿ ਨ ਖੋ, ਰਾਜਕੁਮਾਰ, ਏਤ੍ਥ ਪਞ੍ਹੇ ਏਕਂਸੇਨ ਵਿਸ੍ਸਜ੍ਜਨਂ ਹੋਤਿ. ਏਵਰੂਪਞ੍ਹਿ ਵਾਚਂ ਤਥਾਗਤੋ ਭਾਸੇਯ੍ਯਾਪਿ ਨ ਭਾਸੇਯ੍ਯਾਪਿ. ਭਾਸਿਤਪਚ੍ਚਯੇਨ ਅਤ੍ਥਂ ਪਸ੍ਸਨ੍ਤੋ ਭਾਸੇਯ੍ਯ, ਅਪਸ੍ਸਨ੍ਤੋ ਨ ਭਾਸੇਯ੍ਯਾਤਿ ਅਤ੍ਥੋ. ਇਤਿ ਭਗਵਾ ਮਹਾਨਿਗਣ੍ਠੇਨ ਚਤੂਹਿ ਮਾਸੇਹਿ ਅਭਿਸਙ੍ਖਤਂ ਪਞ੍ਹਂ ਅਸਨਿਪਾਤੇਨ ਪਬ੍ਬਤਕੂਟਂ ਵਿਯ ਏਕਵਚਨੇਨੇਵ ਸਂਚੁਣ੍ਣੇਸਿ. ਅਨਸ੍ਸੁਂ ਨਿਗਣ੍ਠਾਤਿ ਨਟ੍ਠਾ ਨਿਗਣ੍ਠਾ.

੮੬. ਅਙ੍ਕੇ ਨਿਸਿਨ੍ਨੋ ਹੋਤੀਤਿ ਊਰੂਸੁ ਨਿਸਿਨ੍ਨੋ ਹੋਤਿ. ਲੇਸਵਾਦਿਨੋ ਹਿ ਵਾਦਂ ਪਟ੍ਠਪੇਨ੍ਤਾ ਕਿਞ੍ਚਿਦੇਵ ਫਲਂ ਵਾ ਪੁਪ੍ਫਂ ਵਾ ਪੋਤ੍ਥਕਂ ਵਾ ਗਹੇਤ੍ਵਾ ਨਿਸੀਦਨ੍ਤਿ. ਤੇ ਅਤ੍ਤਨੋ ਜਯੇ ਸਤਿ ਪਰਂ ਅਜ੍ਝੋਤ੍ਥਰਨ੍ਤਿ, ਪਰਸ੍ਸ ਜਯੇ ਸਤਿ ਫਲਂ ਖਾਦਨ੍ਤਾ ਵਿਯ ਪੁਪ੍ਫਂ ਘਾਯਨ੍ਤਾ ਵਿਯ ਪੋਤ੍ਥਕਂ ਵਾਚੇਨ੍ਤਾ ਵਿਯ ਵਿਕ੍ਖੇਪਂ ਦਸ੍ਸੇਨ੍ਤਿ. ਅਯਂ ਪਨ ਚਿਨ੍ਤੇਸਿ – ‘‘ਸਮ੍ਮਾਸਮ੍ਬੁਦ੍ਧੋ ਏਸ ਓਸਟਸਙ੍ਗਾਮੋ ਪਰਵਾਦਮਦ੍ਦਨੋ. ਸਚੇ ਮੇ ਜਯੋ ਭਵਿਸ੍ਸਤਿ, ਇਚ੍ਚੇਤਂ ਕੁਸਲਂ. ਨੋ ਚੇ ਭਵਿਸ੍ਸਤਿ, ਦਾਰਕਂ ਵਿਜ੍ਝਿਤ੍ਵਾ ਰੋਦਾਪੇਸ੍ਸਾਮਿ. ਤਤੋ ਪਸ੍ਸਥ, ਭੋ, ਅਯਂ ਦਾਰਕੋ ਰੋਦਤਿ, ਉਟ੍ਠਹਥ ਤਾਵ, ਪਚ੍ਛਾਪਿ ਜਾਨਿਸ੍ਸਾਮਾ’’ਤਿ ਤਸ੍ਮਾ ਦਾਰਕਂ ਗਹੇਤ੍ਵਾ ਨਿਸੀਦਿ. ਭਗਵਾ ਪਨ ਰਾਜਕੁਮਾਰਤੋ ਸਹਸ੍ਸਗੁਣੇਨਪਿ ਸਤਸਹਸ੍ਸਗੁਣੇਨਪਿ ਵਾਦੀਵਰਤਰੋ, ‘‘ਇਮਮੇਵਸ੍ਸ ਦਾਰਕਂ ਉਪਮਂ ਕਤ੍ਵਾ ਵਾਦਂ ਭਿਨ੍ਦਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ‘‘ਤਂ ਕਿਂ ਮਞ੍ਞਸਿ ਰਾਜਕੁਮਾਰਾ’’ਤਿਆਦਿਮਾਹ.

ਤਤ੍ਥ ਮੁਖੇ ਆਹਰੇਯ੍ਯਾਤਿ ਮੁਖੇ ਠਪੇਯ੍ਯ. ਆਹਰੇਯ੍ਯਸ੍ਸਾਹਨ੍ਤਿ ਅਪਨੇਯ੍ਯਂ ਅਸ੍ਸ ਅਹਂ. ਆਦਿਕੇਨੇਵਾਤਿ ਪਠਮਪਯੋਗੇਨੇਵ. ਅਭੂਤਨ੍ਤਿ ਅਭੂਤਤ੍ਥਂ. ਅਤਚ੍ਛਨ੍ਤਿ ਨ ਤਚ੍ਛਂ. ਅਨਤ੍ਥਸਂਹਿਤਨ੍ਤਿ ਨ ਅਤ੍ਥਸਂਹਿਤਂ ਨ ਵਡ੍ਢਿਨਿਸ੍ਸਿਤਂ. ਅਪ੍ਪਿਯਾ ਅਮਨਾਪਾਤਿ ਨੇਵ ਪਿਯਾ ਨ ਮਨਾਪਾ. ਇਮਿਨਾ ਨਯੇਨੇਵ ਸਬ੍ਬਤ੍ਥ ਅਤ੍ਥੋ ਦਟ੍ਠਬ੍ਬੋ.

ਤਤ੍ਥ ਅਪ੍ਪਿਯਪਕ੍ਖੇ ਪਠਮਵਾਚਾ ਅਚੋਰਂਯੇਵ ਚੋਰੋਤਿ, ਅਦਾਸਂਯੇਵ ਦਾਸੋਤਿ, ਅਦੁਪ੍ਪਯੁਤ੍ਤਂਯੇਵ ਦੁਪ੍ਪਯੁਤ੍ਤੋਤਿ ਪਵਤ੍ਤਾ. ਨ ਤਂ ਤਥਾਗਤੋ ਭਾਸਤਿ. ਦੁਤਿਯਵਾਚਾ ਚੋਰਂਯੇਵ ਚੋਰੋ ਅਯਨ੍ਤਿਆਦਿਵਸੇਨ ਪਵਤ੍ਤਾ. ਤਮ੍ਪਿ ਤਥਾਗਤੋ ਨ ਭਾਸਤਿ. ਤਤਿਯਵਾਚਾ ‘‘ਇਦਾਨਿ ਅਕਤਪੁਞ੍ਞਤਾਯ ਦੁਗ੍ਗਤੋ ਦੁਬ੍ਬਣ੍ਣੋ ਅਪ੍ਪੇਸਕ੍ਖੋ, ਇਧ ਠਤ੍ਵਾਪਿ ਪੁਨ ਪੁਞ੍ਞਂ ਨ ਕਰੋਸਿ, ਦੁਤਿਯਚਿਤ੍ਤਵਾਰੇ ਕਥਂ ਚਤੂਹਿ ਅਪਾਯੇਹਿ ਨ ਮੁਚ੍ਚਿਸ੍ਸਸੀ’’ਤਿ ਏਵਂ ਮਹਾਜਨਸ੍ਸ ਅਤ੍ਥਪੁਰੇਕ੍ਖਾਰੇਨ ਧਮ੍ਮਪੁਰੇਕ੍ਖਾਰੇਨ ਅਨੁਸਾਸਨੀਪੁਰੇਕ੍ਖਾਰੇਨ ਚ ਵਤ੍ਤਬ੍ਬਵਾਚਾ. ਤਤ੍ਰ ਕਾਲਞ੍ਞੂ ਤਥਾਗਤੋਤਿ ਤਸ੍ਮਿਂ ਤਤਿਯਬ੍ਯਾਕਰਣੇ ਤਸ੍ਸਾ ਵਾਚਾਯ ਬ੍ਯਾਕਰਣਤ੍ਥਾਯ ਤਥਾਗਤੋ ਕਾਲਞ੍ਞੂ ਹੋਤਿ, ਮਹਾਜਨਸ੍ਸ ਆਦਾਨਕਾਲਂ ਗਹਣਕਾਲਂ ਜਾਨਿਤ੍ਵਾਵ ਬ੍ਯਾਕਰੋਤੀਤਿ ਅਤ੍ਥੋ.

ਪਿਯਪਕ੍ਖੇ ਪਠਮਵਾਚਾ ਅਟ੍ਠਾਨਿਯਕਥਾ ਨਾਮ. ਸਾ ਏਵਂ ਵੇਦਿਤਬ੍ਬਾ – ਏਵਂ ਕਿਰ ਗਾਮਵਾਸਿਮਹਲ੍ਲਕਂ ਨਗਰਂ ਆਗਨ੍ਤ੍ਵਾ ਪਾਨਾਗਾਰੇ ਪਿਵਨ੍ਤਂ ਵਞ੍ਚੇਤੁਕਾਮਾ ਸਮ੍ਬਹੁਲਾ ਧੁਤ੍ਤਾ ਪੀਤਟ੍ਠਾਨੇ ਠਤ੍ਵਾ ਤੇਨ ਸਦ੍ਧਿਂ ਸੁਰਂ ਪਿਵਨ੍ਤਾ ‘‘ਇਮਸ੍ਸ ਨਿਵਾਸਨਪਾਵੁਰਣਮ੍ਪਿ ਹਤ੍ਥੇ ਭਣ੍ਡਕਮ੍ਪਿ ਸਬ੍ਬਂ ਗਣ੍ਹਿਸ੍ਸਾਮਾ’’ਤਿ ਚਿਨ੍ਤੇਤ੍ਵਾ ਕਤਿਕਂ ਅਕਂਸੁ – ‘‘ਏਕੇਕਂ ਅਤ੍ਤਪਚ੍ਚਕ੍ਖਕਥਂ ਕਥੇਮ, ਯੋ ‘ਅਭੂਤ’ਨ੍ਤਿ ਕਥੇਸਿ, ਕਥਿਤਂ ਵਾ ਨ ਸਦ੍ਦਹਤਿ, ਤਂ ਦਾਸਂ ਕਤ੍ਵਾ ਗਣ੍ਹਿਸ੍ਸਾਮਾ’’ਤਿ. ਤਮ੍ਪਿ ਮਹਲ੍ਲਕਂ ਪੁਚ੍ਛਿਂਸੁ ‘‘ਤੁਮ੍ਹਾਕਮ੍ਪਿ ਤਾਤ ਰੁਚ੍ਚਤੀ’’ਤਿ. ਏਵਂ ਹੋਤੁ ਤਾਤਾਤਿ.

ਏਕੋ ਧੁਤ੍ਤੋ ਆਹ – ਮਯ੍ਹਂ, ਭੋ ਮਾਤੁ, ਮਯਿ ਕੁਚ੍ਛਿਗਤੇ ਕਪਿਟ੍ਠਫਲਦੋਹਲੋ ਅਹੋਸਿ. ਸਾ ਅਞ੍ਞਂ ਕਪਿਟ੍ਠਹਾਰਕਂ ਅਲਬ੍ਭਮਾਨਾ ਮਂਯੇਵ ਪੇਸੇਸਿ. ਅਹਂ ਗਨ੍ਤ੍ਵਾ ਰੁਕ੍ਖਂ ਅਭਿਰੁਹਿਤੁਂ ਅਸਕ੍ਕੋਨ੍ਤੋ ਅਤ੍ਤਨਾਵ ਅਤ੍ਤਾਨਂ ਪਾਦੇ ਗਹੇਤ੍ਵਾ ਮੁਗ੍ਗਰਂ ਵਿਯ ਰੁਕ੍ਖਸ੍ਸ ਉਪਰਿ ਖਿਪਿਂ; ਅਥ ਸਾਖਤੋ ਸਾਖਂ ਵਿਚਰਨ੍ਤੋ ਫਲਾਨਿ ਗਹੇਤ੍ਵਾ ਓਤਰਿਤੁਂ ਅਸਕ੍ਕੋਨ੍ਤੋ ਘਰਂ ਗਨ੍ਤ੍ਵਾ ਨਿਸ੍ਸੇਣਿਂ ਆਹਰਿਤ੍ਵਾ ਓਰੁਯ੍ਹ ਮਾਤੁ ਸਨ੍ਤਿਕਂ ਗਨ੍ਤ੍ਵਾ ਫਲਾਨਿ ਮਾਤੁਯਾ ਅਦਾਸਿਂ; ਤਾਨਿ ਪਨ ਮਹਨ੍ਤਾਨਿ ਹੋਨ੍ਤਿ ਚਾਟਿਪ੍ਪਮਾਣਾਨਿ. ਤਤੋ ਮੇ ਮਾਤਰਾ ਏਕਾਸਨੇ ਨਿਸਿਨ੍ਨਾਯ ਸਮਸਟ੍ਠਿਫਲਾਨਿ ਖਾਦਿਤਾਨਿ. ਮਯਾ ਏਕੁਚ੍ਛਙ੍ਗੇਨ ਆਨੀਤਫਲੇਸੁ ਸੇਸਕਾਨਿ ਕੁਲਸਨ੍ਤਕੇ ਗਾਮੇ ਖੁਦ੍ਦਕਮਹਲ੍ਲਕਾਨਂ ਅਹੇਸੁਂ. ਅਮ੍ਹਾਕਂ ਘਰਂ ਸੋਲ਼ਸਹਤ੍ਥਂ, ਸੇਸਪਰਿਕ੍ਖਾਰਭਣ੍ਡਕਂ ਅਪਨੇਤ੍ਵਾ ਕਪਿਟ੍ਠਫਲੇਹੇਵ ਯਾਵ ਛਦਨਂ ਪੂਰਿਤਂ. ਤਤੋ ਅਤਿਰੇਕਾਨਿ ਗਹੇਤ੍ਵਾ ਗੇਹਦ੍ਵਾਰੇ ਰਾਸਿਂ ਅਕਂਸੁ. ਸੋ ਅਸੀਤਿਹਤ੍ਥੁਬ੍ਬੇਧੋ ਪਬ੍ਬਤੋ ਵਿਯ ਅਹੋਸਿ. ਕਿਂ ਈਦਿਸਂ, ਭੋ ਸਕ੍ਕਾ, ਸਦ੍ਦਹਿਤੁਨ੍ਤਿ?

ਗਾਮਿਕਮਹਲ੍ਲਕੋ ਤੁਣ੍ਹੀ ਨਿਸੀਦਿਤ੍ਵਾ ਸਬ੍ਬੇਸਂ ਕਥਾਪਰਿਯੋਸਾਨੇ ਪੁਚ੍ਛਿਤੋ ਆਹ – ‘‘ਏਵਂ ਭਵਿਸ੍ਸਤਿ ਤਾਤਾ, ਮਹਨ੍ਤਂ ਰਟ੍ਠਂ, ਰਟ੍ਠਮਹਨ੍ਤਤਾਯ ਸਕ੍ਕਾ ਸਦ੍ਦਹਿਤੁ’’ਨ੍ਤਿ. ਯਥਾ ਚ ਤੇਨ, ਏਵਂ ਸੇਸੇਹਿਪਿ ਤਥਾਰੂਪਾਸੁ ਨਿਕ੍ਕਾਰਣਕਥਾਸੁ ਕਥਿਤਾਸੁ ਆਹ – ਮਯ੍ਹਮ੍ਪਿ ਤਾਤਾ ਸੁਣਾਥ, ਨ ਤੁਮ੍ਹਾਕਂਯੇਵ ਕੁਲਾਨਿ, ਅਮ੍ਹਾਕਮ੍ਪਿ ਕੁਲਂ ਮਹਾਕੁਲਂ, ਅਮ੍ਹਾਕਂ ਪਨ ਅਵਸੇਸਖੇਤ੍ਤੇਹਿ ਕਪ੍ਪਾਸਖੇਤ੍ਤਂ ਮਹਨ੍ਤਤਰਂ. ਤਸ੍ਸ ਅਨੇਕਕਰੀਸਸਤਸ੍ਸ ਕਪ੍ਪਾਸਖੇਤ੍ਤਸ੍ਸ ਮਜ੍ਝੇ ਏਕੋ ਕਪ੍ਪਾਸਰੁਕ੍ਖੋ ਮਹਾ ਅਸੀਤਿਹਤ੍ਥੁਬ੍ਬੇਧੋ ਅਹੋਸਿ. ਤਸ੍ਸ ਪਞ੍ਚ ਸਾਖਾ, ਤਾਸੁ ਅਵਸੇਸਸਾਖਾ ਫਲਂ ਨ ਗਣ੍ਹਿਂਸੁ, ਪਾਚੀਨਸਾਖਾਯ ਏਕਮੇਵ ਮਹਾਚਾਟਿਮਤ੍ਤਂ ਫਲਂ ਅਹੋਸਿ. ਤਸ੍ਸ ਛ ਅਂਸਿਯੋ, ਛਸੁ ਅਂਸੀਸੁ ਛ ਕਪ੍ਪਾਸਪਿਣ੍ਡਿਯੋ ਪੁਪ੍ਫਿਤਾ. ਅਹਂ ਮਸ੍ਸੁਂ ਕਾਰੇਤ੍ਵਾ ਨ੍ਹਾਤਵਿਲਿਤ੍ਤੋ ਖੇਤ੍ਤਂ ਗਨ੍ਤ੍ਵਾ ਤਾ ਕਪ੍ਪਾਸਪਿਣ੍ਡਿਯੋ ਪੁਪ੍ਫਿਤਾ ਦਿਸ੍ਵਾ ਠਿਤਕੋਵ ਹਤ੍ਥਂ ਪਸਾਰੇਤ੍ਵਾ ਗਣ੍ਹਿਂ. ਤਾ ਕਪ੍ਪਾਸਪਿਣ੍ਡਿਯੋ ਥਾਮਸਮ੍ਪਨ੍ਨਾ ਛ ਦਾਸਾ ਅਹੇਸੁਂ. ਤੇ ਸਬ੍ਬੇ ਮਂ ਏਕਕਂ ਓਹਾਯ ਪਲਾਤਾ. ਏਤ੍ਤਕੇ ਅਦ੍ਧਾਨੇ ਤੇ ਨ ਪਸ੍ਸਾਮਿ, ਅਜ੍ਜ ਦਿਟ੍ਠਾ, ਤੁਮ੍ਹੇ ਤੇ ਛ ਜਨਾ. ਤ੍ਵਂ ਨਨ੍ਦੋ ਨਾਮ, ਤ੍ਵਂ ਪੁਣ੍ਣੋ ਨਾਮ, ਤ੍ਵਂ ਵਡ੍ਢਮਾਨੋ ਨਾਮ, ਤ੍ਵਂ ਚਿਤ੍ਤੋ ਨਾਮ ਤ੍ਵਂ ਮਙ੍ਗਲੋ ਨਾਮ, ਤ੍ਵਂ ਪੋਟ੍ਠਿਯੋ ਨਾਮਾਤਿ ਵਤ੍ਵਾ ਉਟ੍ਠਾਯ ਨਿਸਿਨ੍ਨਕੇਯੇਵ ਚੂਲ਼ਾਸੁ ਗਹੇਤ੍ਵਾ ਅਟ੍ਠਾਸਿ. ਤੇ ‘‘ਨ ਮਯਂ ਦਾਸਾ’’ਤਿਪਿ ਵਤ੍ਤੁਂ ਨਾਸਕ੍ਖਿਂਸੁ. ਅਥ ਨੇ ਕਡ੍ਢਨ੍ਤੋ ਵਿਨਿਚ੍ਛਯਂ ਨੇਤ੍ਵਾ ਲਕ੍ਖਣਂ ਆਰੋਪੇਤ੍ਵਾ ਯਾਵਜੀਵਂ ਦਾਸੇ ਕਤ੍ਵਾ ਪਰਿਭੁਞ੍ਜਿ. ਏਵਰੂਪਿਂ ਕਥਂ ਤਥਾਗਤੋ ਨ ਭਾਸਤਿ.

ਦੁਤਿਯਵਾਚਾ ਆਮਿਸਹੇਤੁਚਾਟੁਕਮ੍ਯਤਾਦਿਵਸੇਨ ਨਾਨਪ੍ਪਕਾਰਾ ਪਰੇਸਂ ਥੋਮਨਵਾਚਾ ਚੇਵ, ਚੋਰਕਥਂ ਰਾਜਕਥਨ੍ਤਿ ਆਦਿਨਯਪ੍ਪਵਤ੍ਤਾ ਤਿਰਚ੍ਛਾਨਕਥਾ ਚ. ਤਮ੍ਪਿ ਤਥਾਗਤੋ ਨ ਭਾਸਤਿ. ਤਤਿਯਵਾਚਾ ਅਰਿਯਸਚ੍ਚਸਨ੍ਨਿਸ੍ਸਿਤਕਥਾ, ਯਂ ਵਸ੍ਸਸਤਮ੍ਪਿ ਸੁਣਨ੍ਤਾ ਪਣ੍ਡਿਤਾ ਨੇਵ ਤਿਤ੍ਤਿਂ ਗਚ੍ਛਨ੍ਤਿ. ਇਤਿ ਤਥਾਗਤੋ ਨੇਵ ਸਬ੍ਬਮ੍ਪਿ ਅਪ੍ਪਿਯਵਾਚਂ ਭਾਸਤਿ ਨ ਪਿਯਵਾਚਂ. ਤਤਿਯਂ ਤਤਿਯਮੇਵ ਪਨ ਭਾਸਿਤਬ੍ਬਕਾਲਂ ਅਨਤਿਕ੍ਕਮਿਤ੍ਵਾ ਭਾਸਤਿ. ਤਤ੍ਥ ਤਤਿਯਂ ਅਪ੍ਪਿਯਵਾਚਂ ਸਨ੍ਧਾਯ ਹੇਟ੍ਠਾ ਦਹਰਕੁਮਾਰਉਪਮਾ ਆਗਤਾਤਿ ਵੇਦਿਤਬ੍ਬਂ.

੮੭. ਉਦਾਹੁ ਠਾਨਸੋਵੇਤਨ੍ਤਿ ਉਦਾਹੁ ਠਾਨੁਪ੍ਪਤ੍ਤਿਕਞਾਣੇਨ ਤਙ੍ਖਣਂਯੇਵ ਤਂ ਤਥਾਗਤਸ੍ਸ ਉਪਟ੍ਠਾਤੀਤਿ ਪੁਚ੍ਛਤਿ. ਸਞ੍ਞਾਤੋਤਿ ਞਾਤੋ ਪਞ੍ਞਾਤੋ ਪਾਕਟੋ. ਧਮ੍ਮਧਾਤੂਤਿ ਧਮ੍ਮਸਭਾਵੋ. ਸਬ੍ਬਞ੍ਞੁਤਞ੍ਞਾਣਸ੍ਸੇਤਂ ਅਧਿਵਚਨਂ. ਤਂ ਭਗਵਤਾ ਸੁਪ੍ਪਟਿਵਿਦ੍ਧਂ, ਹਤ੍ਥਗਤਂ ਭਗਵਤੋ. ਤਸ੍ਮਾ ਸੋ ਯਂ ਯਂ ਇਚ੍ਛਤਿ, ਤਂ ਤਂ ਸਬ੍ਬਂ ਠਾਨਸੋਵ ਪਟਿਭਾਤੀਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵ. ਅਯਂ ਪਨ ਧਮ੍ਮਦੇਸਨਾ ਨੇਯ੍ਯਪੁਗ੍ਗਲਵਸੇਨ ਪਰਿਨਿਟ੍ਠਿਤਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਅਭਯਰਾਜਕੁਮਾਰਸੁਤ੍ਤਵਣ੍ਣਨਾ ਨਿਟ੍ਠਿਤਾ.