੭. ਕੁਕ੍ਕੁਰਵਤਿਕਸੁਤ੍ਤਵਣ੍ਣਨਾ

੭੮. ਏਵਂ ਮੇ ਸੁਤਨ੍ਤਿ ਕੁਕ੍ਕੁਰਵਤਿਕਸੁਤ੍ਤਂ. ਤਤ੍ਥ ਕੋਲਿਯੇਸੂਤਿ ਏਵਂਨਾਮਕੇ ਜਨਪਦੇ. ਸੋ ਹਿ ਏਕੋਪਿ ਕੋਲਨਗਰੇ ਪਤਿਟ੍ਠਿਤਾਨਂ ਕੋਲਿਯਾਨਂ ਰਾਜਕੁਮਾਰਾਨਂ ਨਿਵਾਸਟ੍ਠਾਨਤ੍ਤਾ ਏਵਂ ਵੁਚ੍ਚਤਿ. ਤਸ੍ਮਿਂ ਕੋਲਿਯੇਸੁ ਜਨਪਦੇ. ਹਲਿਦ੍ਦਵਸਨਨ੍ਤਿ ਤਸ੍ਸ ਕਿਰ ਨਿਗਮਸ੍ਸ ਮਾਪਿਤਕਾਲੇ ਪੀਤਕਵਤ੍ਥਨਿਵਤ੍ਥਾ ਮਨੁਸ੍ਸਾ ਨਕ੍ਖਤ੍ਤਂ ਕੀਲ਼ਿਂਸੁ. ਤੇ ਨਕ੍ਖਤ੍ਤਕੀਲ਼ਾਵਸਾਨੇ ਨਿਗਮਸ੍ਸ ਨਾਮਂ ਆਰੋਪੇਨ੍ਤਾ ਹਲਿਦ੍ਦਵਸਨਨ੍ਤਿ ਨਾਮਂ ਅਕਂਸੁ. ਤਂ ਗੋਚਰਗਾਮਂ ਕਤ੍ਵਾ ਵਿਹਰਤੀਤਿ ਅਤ੍ਥੋ. ਵਿਹਾਰੋ ਪਨੇਤ੍ਥ ਕਿਞ੍ਚਾਪਿ ਨ ਨਿਯਾਮਿਤੋ, ਤਥਾਪਿ ਬੁਦ੍ਧਾਨਂ ਅਨੁਚ੍ਛਵਿਕੇ ਸੇਨਾਸਨੇਯੇਵ ਵਿਹਾਸੀਤਿ ਵੇਦਿਤਬ੍ਬੋ. ਗੋਵਤਿਕੋਤਿ ਸਮਾਦਿਨ੍ਨਗੋਵਤੋ, ਸੀਸੇ ਸਿਙ੍ਗਾਨਿ ਠਪੇਤ੍ਵਾ ਨਙ੍ਗੁਟ੍ਠਂ ਬਨ੍ਧਿਤ੍ਵਾ ਗਾਵੀਹਿ ਸਦ੍ਧਿਂ ਤਿਣਾਨਿ ਖਾਦਨ੍ਤੋ ਵਿਯ ਚਰਤਿ. ਅਚੇਲੋਤਿ ਨਗ੍ਗੋ ਨਿਚ੍ਚੇਲੋ. ਸੇਨਿਯੋਤਿ ਤਸ੍ਸ ਨਾਮਂ.

ਕੁਕ੍ਕੁਰਵਤਿਕੋਤਿ ਸਮਾਦਿਨ੍ਨਕੁਕ੍ਕੁਰਵਤੋ, ਸਬ੍ਬਂ ਸੁਨਖਕਿਰਿਯਂ ਕਰੋਤਿ. ਉਭੋਪੇਤੇ ਸਹਪਂਸੁਕੀਲ਼ਿਕਾ ਸਹਾਯਕਾ. ਕੁਕ੍ਕੁਰੋਵ ਪਲਿਕੁਜ੍ਜਿਤ੍ਵਾਤਿ ਸੁਨਖੋ ਨਾਮ ਸਾਮਿਕਸ੍ਸ ਸਨ੍ਤਿਕੇ ਨਿਸੀਦਨ੍ਤੋ ਦ੍ਵੀਹਿ ਪਾਦੇਹਿ ਭੂਮਿਯਂ ਵਿਲੇਖਿਤ੍ਵਾ ਕੁਕ੍ਕੁਰਕੂਜਿਤਂ ਕੂਜਨ੍ਤੋ ਨਿਸੀਦਤਿ, ਅਯਮ੍ਪਿ ‘‘ਕੁਕ੍ਕੁਰਕਿਰਿਯਂ ਕਰਿਸ੍ਸਾਮੀ’’ਤਿ ਭਗਵਤਾ ਸਦ੍ਧਿਂ ਸਮ੍ਮੋਦਿਤ੍ਵਾ ਦ੍ਵੀਹਿ ਹਤ੍ਥੇਹਿ ਭੂਮਿਯਂ ਵਿਲੇਖਿਤ੍ਵਾ ਸੀਸਂ ਵਿਧੁਨਨ੍ਤੋ ‘ਭੂ ਭੂ’ਤਿ ਕਤ੍ਵਾ ਹਤ੍ਥਪਾਦੇ ਸਮਿਞ੍ਜਿਤ੍ਵਾ ਸੁਨਖੋ ਵਿਯ ਨਿਸੀਦਿ. ਛਮਾਨਿਕ੍ਖਿਤ੍ਤਨ੍ਤਿ ਭੂਮਿਯਂ ਠਪਿਤਂ. ਸਮਤ੍ਤਂ ਸਮਾਦਿਨ੍ਨਨ੍ਤਿ ਪਰਿਪੁਣ੍ਣਂ ਕਤ੍ਵਾ ਗਹਿਤਂ. ਕਾ ਗਤੀਤਿ ਕਾ ਨਿਪ੍ਫਤ੍ਤਿ. ਕੋ ਅਭਿਸਮ੍ਪਰਾਯੋਤਿ ਅਭਿਸਮ੍ਪਰਾਯਮ੍ਹਿ ਕਤ੍ਥ ਨਿਬ੍ਬਤ੍ਤਿ. ਅਲਨ੍ਤਿ ਤਸ੍ਸ ਅਪ੍ਪਿਯਂ ਭਵਿਸ੍ਸਤੀਤਿ ਯਾਵਤਤਿਯਂ ਪਟਿਬਾਹਤਿ. ਕੁਕ੍ਕੁਰਵਤਨ੍ਤਿ ਕੁਕ੍ਕੁਰਵਤਸਮਾਦਾਨਂ.

੭੯. ਭਾਵੇਤੀਤਿ ਵਡ੍ਢੇਤਿ. ਪਰਿਪੁਣ੍ਣਨ੍ਤਿ ਅਨੂਨਂ. ਅਬ੍ਬੋਕਿਣ੍ਣਨ੍ਤਿ ਨਿਰਨ੍ਤਰਂ. ਕੁਕ੍ਕੁਰਸੀਲਨ੍ਤਿ ਕੁਕ੍ਕੁਰਾਚਾਰਂ. ਕੁਕ੍ਕੁਰਚਿਤ੍ਤਨ੍ਤਿ ‘‘ਅਜ੍ਜ ਪਟ੍ਠਾਯ ਕੁਕ੍ਕੁਰੇਹਿ ਕਾਤਬ੍ਬਂ ਕਰਿਸ੍ਸਾਮੀ’’ਤਿ ਏਵਂ ਉਪ੍ਪਨ੍ਨਚਿਤ੍ਤਂ. ਕੁਕ੍ਕੁਰਾਕਪ੍ਪਨ੍ਤਿ ਕੁਕ੍ਕੁਰਾਨਂ ਗਮਨਾਕਾਰੋ ਅਤ੍ਥਿ, ਤਿਟ੍ਠਨਾਕਾਰੋ ਅਤ੍ਥਿ, ਨਿਸੀਦਨਾਕਾਰੋ ਅਤ੍ਥਿ, ਸਯਨਾਕਾਰੋ ਅਤ੍ਥਿ, ਉਚ੍ਚਾਰਪਸ੍ਸਾਵਕਰਣਾਕਾਰੋ ਅਤ੍ਥਿ, ਅਞ੍ਞੇ ਕੁਕ੍ਕੁਰੇ ਦਿਸ੍ਵਾ ਦਨ੍ਤੇ ਵਿਵਰਿਤ੍ਵਾ ਗਮਨਾਕਾਰੋ ਅਤ੍ਥਿ, ਅਯਂ ਕੁਕ੍ਕੁਰਾਕਪ੍ਪੋ ਨਾਮ, ਤਂ ਭਾਵੇਤੀਤਿ ਅਤ੍ਥੋ. ਇਮਿਨਾਹਂ ਸੀਲੇਨਾਤਿਆਦੀਸੁ ਅਹਂ ਇਮਿਨਾ ਆਚਾਰੇਨ ਵਾ ਵਤਸਮਾਦਾਨੇਨ ਵਾ ਦੁਕ੍ਕਰਤਪਚਰਣੇਨ ਵਾ ਮੇਥੁਨਵਿਰਤਿਬ੍ਰਹ੍ਮਚਰਿਯੇਨ ਵਾਤਿ ਅਤ੍ਥੋ. ਦੇਵੋਤਿ ਸਕ੍ਕਸੁਯਾਮਾਦੀਸੁ ਅਞ੍ਞਤਰੋ. ਦੇਵਞ੍ਞਤਰੋਤਿ ਤੇਸਂ ਦੁਤਿਯਤਤਿਯਟ੍ਠਾਨਾਦੀਸੁ ਅਞ੍ਞਤਰਦੇਵੋ. ਮਿਚ੍ਛਾਦਿਟ੍ਠੀਤਿ ਅਦੇਵਲੋਕਗਾਮਿਮਗ੍ਗਮੇਵ ਦੇਵਲੋਕਗਾਮਿਮਗ੍ਗੋਤਿ ਗਹੇਤ੍ਵਾ ਉਪ੍ਪਨ੍ਨਤਾਯ ਸਾ ਅਸ੍ਸ ਮਿਚ੍ਛਾਦਿਟ੍ਠਿ ਨਾਮ ਹੋਤਿ. ਅਞ੍ਞਤਰਂ ਗਤਿਂ ਵਦਾਮੀਤਿ ਤਸ੍ਸ ਹਿ ਨਿਰਯਤੋ ਵਾ ਤਿਰਚ੍ਛਾਨਯੋਨਿਤੋ ਵਾ ਅਞ੍ਞਾ ਗਤਿ ਨਤ੍ਥਿ, ਤਸ੍ਮਾ ਏਵਮਾਹ. ਸਮ੍ਪਜ੍ਜਮਾਨਨ੍ਤਿ ਦਿਟ੍ਠਿਯਾ ਅਸਮ੍ਮਿਸ੍ਸਂ ਹੁਤ੍ਵਾ ਨਿਪਜ੍ਜਮਾਨਂ.

ਨਾਹਂ, ਭਨ੍ਤੇ, ਏਤਂ ਰੋਦਾਮਿ, ਯਂ ਮਂ ਭਗਵਾ ਏਵਮਾਹਾਤਿ ਯਂ ਮਂ, ਭਨ੍ਤੇ, ਭਗਵਾ ਏਵਮਾਹ, ਅਹਮੇਤਂ ਭਗਵਤੋ ਬ੍ਯਾਕਰਣਂ ਨ ਰੋਦਾਮਿ ਨ ਪਰਿਦੇਵਾਮਿ, ਨ ਅਨੁਤ੍ਥੁਨਾਮੀਤਿ ਅਤ੍ਥੋ. ਏਵਂ ਸਕਮ੍ਮਕਵਸੇਨੇਤ੍ਥ ਅਤ੍ਥੋ ਵੇਦਿਤਬ੍ਬੋ, ਨ ਅਸ੍ਸੁਮੁਞ੍ਚਨਮਤ੍ਤੇਨ.

‘‘ਮਤਂ ਵਾ ਅਮ੍ਮ ਰੋਦਨ੍ਤਿ, ਯੋ ਵਾ ਜੀਵਂ ਨ ਦਿਸ੍ਸਤਿ;

ਜੀਵਨ੍ਤਂ ਅਮ੍ਮ ਪਸ੍ਸਨ੍ਤੀ, ਕਸ੍ਮਾ ਮਂ ਅਮ੍ਮ ਰੋਦਸੀ’’ਤਿ. (ਸਂ. ਨਿ. ੧.੨੩੯) –

ਅਯਞ੍ਚੇਤ੍ਥ ਪਯੋਗੋ. ਅਪਿਚ ਮੇ ਇਦਂ, ਭਨ੍ਤੇਤਿ ਅਪਿਚ ਖੋ ਮੇ ਇਦਂ, ਭਨ੍ਤੇ, ਕੁਕ੍ਕੁਰਵਤਂ ਦੀਘਰਤ੍ਤਂ ਸਮਾਦਿਨ੍ਨਂ, ਤਸ੍ਮਿਂ ਸਮ੍ਪਜ੍ਜਨ੍ਤੇਪਿ ਵੁਦ੍ਧਿ ਨਤ੍ਥਿ, ਵਿਪਜ੍ਜਨ੍ਤੇਪਿ. ਇਤਿ ‘‘ਏਤ੍ਤਕਂ ਕਾਲਂ ਮਯਾ ਕਤਕਮ੍ਮਂ ਮੋਘਂ ਜਾਤ’’ਨ੍ਤਿ ਅਤ੍ਤਨੋ ਵਿਪਤ੍ਤਿਂ ਪਚ੍ਚਵੇਕ੍ਖਮਾਨੋ ਰੋਦਾਮਿ, ਭਨ੍ਤੇਤਿ.

੮੦. ਗੋਵਤਨ੍ਤਿਆਦੀਨਿ ਕੁਕ੍ਕੁਰਵਤਾਦੀਸੁ ਵੁਤ੍ਤਨਯੇਨੇਵ ਵੇਦਿਤਬ੍ਬਾਨਿ. ਗਵਾਕਪ੍ਪਨ੍ਤਿ ਗੋਆਕਪ੍ਪਂ. ਸੇਸਂ ਕੁਕ੍ਕੁਰਾਕਪ੍ਪੇ ਵੁਤ੍ਤਸਦਿਸਮੇਵ. ਯਥਾ ਪਨ ਤਤ੍ਥ ਅਞ੍ਞੇ ਕੁਕ੍ਕੁਰੇ ਦਿਸ੍ਵਾ ਦਨ੍ਤੇ ਵਿਵਰਿਤ੍ਵਾ ਗਮਨਾਕਾਰੋ, ਏਵਮਿਧ ਅਞ੍ਞੇ ਗਾਵੋ ਦਿਸ੍ਵਾ ਕਣ੍ਣੇ ਉਕ੍ਖਿਪਿਤ੍ਵਾ ਗਮਨਾਕਾਰੋ ਵੇਦਿਤਬ੍ਬੋ. ਸੇਸਂ ਤਾਦਿਸਮੇਵ.

੮੧. ਚਤ੍ਤਾਰਿਮਾਨਿ ਪੁਣ੍ਣ ਕਮ੍ਮਾਨੀਤਿ ਕਸ੍ਮਾ ਇਮਂ ਦੇਸਨਂ ਆਰਭਿ? ਅਯਞ੍ਹਿ ਦੇਸਨਾ ਏਕਚ੍ਚਕਮ੍ਮਕਿਰਿਯਵਸੇਨ ਆਗਤਾ, ਇਮਸ੍ਮਿਞ੍ਚ ਕਮ੍ਮਚਤੁਕ੍ਕੇ ਕਥਿਤੇ ਇਮੇਸਂ ਕਿਰਿਯਾ ਪਾਕਟਾ ਭਵਿਸ੍ਸਤੀਤਿ ਇਮਂ ਦੇਸਨਂ ਆਰਭਿ. ਅਪਿਚ ਇਮਂ ਕਮ੍ਮਚਤੁਕ੍ਕਮੇਵ ਦੇਸਿਯਮਾਨਂ ਇਮੇ ਸਞ੍ਜਾਨਿਸ੍ਸਨ੍ਤਿ, ਤਤੋ ਏਕੋ ਸਰਣਂ ਗਮਿਸ੍ਸਤਿ, ਏਕੋ ਪਬ੍ਬਜਿਤ੍ਵਾ ਅਰਹਤ੍ਤਂ ਪਾਪੁਣਿਸ੍ਸਤੀਤਿ ਅਯਮੇਵ ਏਤੇਸਂ ਸਪ੍ਪਾਯਾਤਿ ਞਤ੍ਵਾਪਿ ਇਮਂ ਦੇਸਨਂ ਆਰਭਿ.

ਤਤ੍ਥ ਕਣ੍ਹਨ੍ਤਿ ਕਾਲ਼ਕਂ ਦਸਅਕੁਸਲਕਮ੍ਮਪਥਕਮ੍ਮਂ. ਕਣ੍ਹਵਿਪਾਕਨ੍ਤਿ ਅਪਾਯੇ ਨਿਬ੍ਬਤ੍ਤਨਤੋ ਕਾਲ਼ਕਵਿਪਾਕਂ. ਸੁਕ੍ਕਨ੍ਤਿ ਪਣ੍ਡਰਂ ਦਸਕੁਸਲਕਮ੍ਮਪਥਕਮ੍ਮਂ. ਸੁਕ੍ਕਵਿਪਾਕਨ੍ਤਿ ਸਗ੍ਗੇ ਨਿਬ੍ਬਤ੍ਤਨਤੋ ਪਣ੍ਡਰਵਿਪਾਕਂ. ਕਣ੍ਹਸੁਕ੍ਕਨ੍ਤਿ ਵੋਮਿਸ੍ਸਕਕਮ੍ਮਂ. ਕਣ੍ਹਸੁਕ੍ਕਵਿਪਾਕਨ੍ਤਿ ਸੁਖਦੁਕ੍ਖਵਿਪਾਕਂ. ਮਿਸ੍ਸਕਕਮ੍ਮਞ੍ਹਿ ਕਤ੍ਵਾ ਅਕੁਸਲੇਨ ਤਿਰਚ੍ਛਾਨਯੋਨਿਯਂ ਮਙ੍ਗਲਹਤ੍ਥਿਟ੍ਠਾਨਾਦੀਸੁ ਉਪ੍ਪਨ੍ਨੋ ਕੁਸਲੇਨ ਪਵਤ੍ਤੇ ਸੁਖਂ ਵੇਦਿਯਤਿ. ਕੁਸਲੇਨ ਰਾਜਕੁਲੇਪਿ ਨਿਬ੍ਬਤ੍ਤੋ ਅਕੁਸਲੇਨ ਪਵਤ੍ਤੇ ਦੁਕ੍ਖਂ ਵੇਦਿਯਤਿ. ਅਕਣ੍ਹਂ ਅਸੁਕ੍ਕਨ੍ਤਿ ਕਮ੍ਮਕ੍ਖਯਕਰਂ ਚਤੁਮਗ੍ਗਚੇਤਨਾਕਮ੍ਮਂ ਅਧਿਪ੍ਪੇਤਂ. ਤਞ੍ਹਿ ਯਦਿ ਕਣ੍ਹਂ ਭਵੇਯ੍ਯ, ਕਣ੍ਹਵਿਪਾਕਂ ਦਦੇਯ੍ਯ. ਯਦਿ ਸੁਕ੍ਕਂ ਭਵੇਯ੍ਯ, ਸੁਕ੍ਕਵਿਪਾਕਂ ਦਦੇਯ੍ਯ. ਉਭਯਵਿਪਾਕਸ੍ਸ ਪਨ ਅਦਾਨਤੋ ਅਕਣ੍ਹਾਸੁਕ੍ਕਵਿਪਾਕਤ੍ਤਾ ‘‘ਅਕਣ੍ਹਂ ਅਸੁਕ੍ਕ’’ਨ੍ਤਿ ਵੁਤ੍ਤਂ. ਅਯਂ ਤਾਵ ਉਦ੍ਦੇਸੇ ਅਤ੍ਥੋ.

ਨਿਦ੍ਦੇਸੇ ਪਨ ਸਬ੍ਯਾਬਜ੍ਝਨ੍ਤਿ ਸਦੁਕ੍ਖਂ. ਕਾਯਸਙ੍ਖਾਰਾਦੀਸੁ ਕਾਯਦ੍ਵਾਰੇ ਗਹਣਾਦਿਵਸੇਨ ਚੋਪਨਪ੍ਪਤ੍ਤਾ ਦ੍ਵਾਦਸ ਅਕੁਸਲਚੇਤਨਾ ਸਬ੍ਯਾਬਜ੍ਝਕਾਯਸਙ੍ਖਾਰੋ ਨਾਮ. ਵਚੀਦ੍ਵਾਰੇ ਹਨੁਸਞ੍ਚੋਪਨਵਸੇਨ ਵਚੀਭੇਦਪਵਤ੍ਤਿਕਾ ਤਾਯੇਵ ਦ੍ਵਾਦਸ ਵਚੀਸਙ੍ਖਾਰੋ ਨਾਮ. ਉਭਯਚੋਪਨਂ ਅਪ੍ਪਤ੍ਤਾ ਰਹੋ ਚਿਨ੍ਤਯਨ੍ਤਸ੍ਸ ਮਨੋਦ੍ਵਾਰੇ ਪਵਤ੍ਤਾ ਮਨੋਸਙ੍ਖਾਰੋ ਨਾਮ. ਇਤਿ ਤੀਸੁਪਿ ਦ੍ਵਾਰੇਸੁ ਕਾਯਦੁਚ੍ਚਰਿਤਾਦਿਭੇਦਾ ਅਕੁਸਲਚੇਤਨਾਵ ਸਙ੍ਖਾਰਾਤਿ ਵੇਦਿਤਬ੍ਬਾ. ਇਮਸ੍ਮਿਞ੍ਹਿ ਸੁਤ੍ਤੇ ਚੇਤਨਾ ਧੁਰਂ, ਉਪਾਲਿਸੁਤ੍ਤੇ ਕਮ੍ਮਂ. ਅਭਿਸਙ੍ਖਰਿਤ੍ਵਾਤਿ ਸਙ੍ਕਡ੍ਢਿਤ੍ਵਾ, ਪਿਣ੍ਡਂ ਕਤ੍ਵਾਤਿ ਅਤ੍ਥੋ. ਸਬ੍ਯਾਬਜ੍ਝਂ ਲੋਕਨ੍ਤਿ ਸਦੁਕ੍ਖਂ ਲੋਕਂ ਉਪਪਜ੍ਜਨ੍ਤਿ. ਸਬ੍ਯਾਬਜ੍ਝਾ ਫਸ੍ਸਾ ਫੁਸਨ੍ਤੀਤਿ ਸਦੁਕ੍ਖਾ ਵਿਪਾਕਫਸ੍ਸਾ ਫੁਸਨ੍ਤਿ. ਏਕਨ੍ਤਦੁਕ੍ਖਨ੍ਤਿ ਨਿਰਨ੍ਤਰਦੁਕ੍ਖਂ. ਭੂਤਾਤਿ ਹੇਤ੍ਵਤ੍ਥੇ ਨਿਸ੍ਸਕ੍ਕਵਚਨਂ, ਭੂਤਕਮ੍ਮਤੋ ਭੂਤਸ੍ਸ ਸਤ੍ਤਸ੍ਸ ਉਪ੍ਪਤ੍ਤਿ ਹੋਤਿ. ਇਦਂ ਵੁਤ੍ਤਂ ਹੋਤਿ – ਯਥਾਭੂਤਂ ਕਮ੍ਮਂ ਸਤ੍ਤਾ ਕਰੋਨ੍ਤਿ, ਤਥਾਭੂਤੇਨ ਕਮ੍ਮੇਨ ਕਮ੍ਮਸਭਾਗਵਸੇਨ ਤੇਸਂ ਉਪਪਤ੍ਤਿ ਹੋਤਿ. ਤੇਨੇਵਾਹ ‘‘ਯਂ ਕਰੋਤਿ ਤੇਨ ਉਪਪਜ੍ਜਤੀ’’ਤਿ. ਏਤ੍ਥ ਚ ਤੇਨਾਤਿ ਕਮ੍ਮੇਨ ਵਿਯ ਵੁਤ੍ਤਾ, ਉਪਪਤ੍ਤਿ ਚ ਨਾਮ ਵਿਪਾਕੇਨ ਹੋਤਿ. ਯਸ੍ਮਾ ਪਨ ਵਿਪਾਕਸ੍ਸ ਕਮ੍ਮਂ ਹੇਤੁ, ਤਸ੍ਮਾ ਤੇਨ ਮੂਲਹੇਤੁਭੂਤੇਨ ਕਮ੍ਮੇਨ ਨਿਬ੍ਬਤ੍ਤਤੀਤਿ ਅਯਮੇਤ੍ਥ ਅਤ੍ਥੋ. ਫਸ੍ਸਾ ਫੁਸਨ੍ਤੀਤਿ ਯੇਨ ਕਮ੍ਮਵਿਪਾਕੇਨ ਨਿਬ੍ਬਤ੍ਤੋ, ਤਂਕਮ੍ਮਵਿਪਾਕਫਸ੍ਸਾ ਫੁਸਨ੍ਤਿ. ਕਮ੍ਮਦਾਯਾਦਾਤਿ ਕਮ੍ਮਦਾਯਜ੍ਜਾ ਕਮ੍ਮਮੇਵ ਨੇਸਂ ਦਾਯਜ੍ਜਂ ਸਨ੍ਤਕਨ੍ਤਿ ਵਦਾਮਿ.

ਅਬ੍ਯਾਬਜ੍ਝਨ੍ਤਿ ਨਿਦ੍ਦੁਕ੍ਖਂ. ਇਮਸ੍ਮਿਂ ਵਾਰੇ ਕਾਯਦ੍ਵਾਰੇ ਪਵਤ੍ਤਾ ਅਟ੍ਠ ਕਾਮਾਵਚਰਕੁਸਲਚੇਤਨਾ ਕਾਯਸਙ੍ਖਾਰੋ ਨਾਮ. ਤਾਯੇਵ ਵਚੀਦ੍ਵਾਰੇ ਪਵਤ੍ਤਾ ਵਚੀਸਙ੍ਖਾਰੋ ਨਾਮ. ਮਨੋਦ੍ਵਾਰੇ ਪਵਤ੍ਤਾ ਤਾਯੇਵ ਅਟ੍ਠ, ਤਿਸ੍ਸੋ ਚ ਹੇਟ੍ਠਿਮਝਾਨਚੇਤਨਾ ਅਬ੍ਯਾਬਜ੍ਝਮਨੋਸਙ੍ਖਾਰੋ ਨਾਮ. ਝਾਨਚੇਤਨਾ ਤਾਵ ਹੋਤੁ, ਕਾਮਾਵਚਰਾ ਕਿਨ੍ਤਿ ਅਬ੍ਯਾਬਜ੍ਝਮਨੋਸਙ੍ਖਾਰੋ ਨਾਮ ਜਾਤਾਤਿ. ਕਸਿਣਸਜ੍ਜਨਕਾਲੇ ਚ ਕਸਿਣਾਸੇਵਨਕਾਲੇ ਚ ਲਬ੍ਭਨ੍ਤਿ. ਕਾਮਾਵਚਰਚੇਤਨਾ ਪਠਮਜ੍ਝਾਨਚੇਤਨਾਯ ਘਟਿਤਾ, ਚਤੁਤ੍ਥਜ੍ਝਾਨਚੇਤਨਾ ਤਤਿਯਜ੍ਝਾਨਚੇਤਨਾਯ ਘਟਿਤਾ. ਇਤਿ ਤੀਸੁਪਿ ਦ੍ਵਾਰੇਸੁ ਕਾਯਸੁਚਰਿਤਾਦਿਭੇਦਾ ਕੁਸਲਚੇਤਨਾਵ ਸਙ੍ਖਾਰਾਤਿ ਵੇਦਿਤਬ੍ਬੋ. ਤਤਿਯਵਾਰੋ ਉਭਯਮਿਸ੍ਸਕਵਸੇਨ ਵੇਦਿਤਬ੍ਬਾ.

ਸੇਯ੍ਯਥਾਪਿ ਮਨੁਸ੍ਸਾਤਿਆਦੀਸੁ ਮਨੁਸ੍ਸਾਨਂ ਤਾਵ ਕਾਲੇਨ ਸੁਖਂ ਕਾਲੇਨ ਦੁਕ੍ਖਂ ਪਾਕਟਮੇਵ, ਦੇਵੇਸੁ ਪਨ ਭੁਮ੍ਮਦੇਵਤਾਨਂ, ਵਿਨਿਪਾਤਿਕੇਸੁ ਵੇਮਾਨਿਕਪੇਤਾਨਂ ਕਾਲੇਨ ਸੁਖਂ ਕਾਲੇਨ ਦੁਕ੍ਖਂ ਹੋਤੀਤਿ ਵੇਦਿਤਬ੍ਬਂ. ਹਤ੍ਥਿਆਦੀਸੁ ਤਿਰਚ੍ਛਾਨੇਸੁਪਿ ਲਬ੍ਭਤਿਯੇਵ.

ਤਤ੍ਰਾਤਿ ਤੇਸੁ ਤੀਸੁ ਕਮ੍ਮੇਸੁ. ਤਸ੍ਸ ਪਹਾਨਾਯ ਯਾ ਚੇਤਨਾਤਿ ਤਸ੍ਸ ਪਹਾਨਤ੍ਥਾਯ ਮਗ੍ਗਚੇਤਨਾ. ਕਮ੍ਮਂ ਪਤ੍ਵਾਵ ਮਗ੍ਗਚੇਤਨਾਯ ਅਞ੍ਞੋ ਪਣ੍ਡਰਤਰੋ ਧਮ੍ਮੋ ਨਾਮ ਨਤ੍ਥਿ. ਇਦਂ ਪਨ ਕਮ੍ਮਚਤੁਕ੍ਕਂ ਪਤ੍ਵਾ ਦ੍ਵਾਦਸ ਅਕੁਸਲਚੇਤਨਾ ਕਣ੍ਹਾ ਨਾਮ, ਤੇਭੂਮਕਕੁਸਲਚੇਤਨਾ ਸੁਕ੍ਕਾ ਨਾਮ, ਮਗ੍ਗਚੇਤਨਾ ਅਕਣ੍ਹਾ ਅਸੁਕ੍ਕਾਤਿ ਆਗਤਾ.

੮੨. ‘‘ਲਭੇਯ੍ਯਾਹਂ, ਭਨ੍ਤੇ’’ਤਿ ਇਦਂ ਸੋ ‘‘ਚਿਰਂ ਵਤ ਮੇ ਅਨਿਯ੍ਯਾਨਿਕਪਕ੍ਖੇ ਯੋਜੇਤ੍ਵਾ ਅਤ੍ਤਾ ਕਿਲਮਿਤੋ, ‘ਸੁਕ੍ਖਨਦੀਤੀਰੇ ਨ੍ਹਾਯਿਸ੍ਸਾਮੀ’ਤਿ ਸਮ੍ਪਰਿਵਤ੍ਤੇਨ੍ਤੇਨ ਵਿਯ ਥੁਸੇ ਕੋਟ੍ਟੇਨ੍ਤੇਨ ਵਿਯ ਚ ਨ ਕੋਚਿ ਅਤ੍ਥੋ ਨਿਪ੍ਫਾਦਿਤੋ, ਹਨ੍ਦਾਹਂ ਅਤ੍ਤਾਨਂ ਯੋਗੇ ਯੋਜੇਮੀ’’ਤਿ ਚਿਨ੍ਤੇਤ੍ਵਾ ਆਹ. ਅਥ ਭਗਵਾ ਯੋਨੇਨ ਖਨ੍ਧਕੇ ਤਿਤ੍ਥਿਯਪਰਿਵਾਸੋ ਪਞ੍ਞਤ੍ਤੋ, ਯਂ ਅਞ੍ਞਤਿਤ੍ਥਿਯਪੁਬ੍ਬੋ ਸਾਮਣੇਰਭੂਮਿਯਂ ਠਿਤੋ – ‘‘ਅਹਂ, ਭਨ੍ਤੇ, ਇਤ੍ਥਨ੍ਨਾਮੋ ਅਞ੍ਞਤਿਤ੍ਥਿਯਪੁਬ੍ਬੋ ਇਮਸ੍ਮਿਂ ਧਮ੍ਮਵਿਨਯੇ ਆਕਙ੍ਖਾਮਿ ਉਪਸਮ੍ਪਦਂ, ਸ੍ਵਾਹਂ, ਭਨ੍ਤੇ, ਸਙ੍ਘਂ ਚਤ੍ਤਾਰੋ ਮਾਸੇ ਪਰਿਵਾਸਂ ਯਾਚਾਮੀ’’ਤਿਆਦਿਨਾ (ਮਹਾਵ. ੮੬) ਨਯੇਨ ਸਮਾਦਿਯਿਤ੍ਵਾ ਪਰਿਵਸਤਿ, ਤਂ ਸਨ੍ਧਾਯ ‘‘ਯੋ ਖੋ, ਸੇਨਿਯ, ਅਞ੍ਞਤਿਤ੍ਥਿਯਪੁਬ੍ਬੋ’’ਤਿਆਦਿਮਾਹ.

ਤਤ੍ਥ ਪਬ੍ਬਜ੍ਜਨ੍ਤਿ ਵਚਨਸਿਲਿਟ੍ਠਤਾਵਸੇਨੇਵ ਵੁਤ੍ਤਂ. ਅਪਰਿਵਸਿਤ੍ਵਾਯੇਵ ਹਿ ਪਬ੍ਬਜ੍ਜਂ ਲਭਤਿ. ਉਪਸਮ੍ਪਦਤ੍ਥਿਕੇਨ ਪਨ ਨਾਤਿਕਾਲੇਨ ਗਾਮਪ੍ਪਵੇਸਨਾਦੀਨਿ ਅਟ੍ਠ ਵਤ੍ਤਾਨਿ ਪੂਰੇਨ੍ਤੇਨ ਪਰਿਵਸਿਤਬ੍ਬਂ. ਆਰਦ੍ਧਚਿਤ੍ਤਾਤਿ ਅਟ੍ਠਵਤ੍ਤਪੂਰਣੇਨ ਤੁਟ੍ਠਚਿਤ੍ਤਾ. ਅਯਮੇਤ੍ਥ ਸਙ੍ਖੇਪੋ. ਵਿਤ੍ਥਾਰਤੋ ਪਨੇਸ ਤਿਤ੍ਥਿਯਪਰਿਵਾਸੋ ਸਮਨ੍ਤਪਾਸਾਦਿਕਾਯ ਵਿਨਯਟ੍ਠਕਥਾਯ ਪਬ੍ਬਜ੍ਜਖਨ੍ਧਕਵਣ੍ਣਨਾਯਂ (ਮਹਾਵ. ਅਟ੍ਠ. ੮੬) ਵੁਤ੍ਤਨਯੇਨੇਵ ਵੇਦਿਤਬ੍ਬੋ. ਅਪਿਚ ਮੇਤ੍ਥਾਤਿ ਅਪਿਚ ਮੇ ਏਤ੍ਥ. ਪੁਗ੍ਗਲਵੇਮਤ੍ਤਤਾ ਵਿਦਿਤਾਤਿ ਪੁਗ੍ਗਲਨਾਨਤ੍ਤਂ ਵਿਦਿਤਂ. ਅਯਂ ਪੁਗ੍ਗਲੋ ਪਰਿਵਾਸਾਰਹੋ, ਅਯਂ ਨ ਪਰਿਵਾਸਾਰਹੋਤਿ ਇਦਂ ਮਯ੍ਹਂ ਪਾਕਟਨ੍ਤਿ ਦਸ੍ਸੇਤਿ.

ਤਤੋ ਸੇਨਿਯੋ ਚਿਨ੍ਤੇਸਿ – ‘‘ਅਹੋ ਅਚ੍ਛਰਿਯਂ ਬੁਦ੍ਧਸਾਸਨਂ, ਯਤ੍ਥ ਏਵਂ ਘਂਸਿਤ੍ਵਾ ਕੋਟ੍ਟੇਤ੍ਵਾ ਯੁਤ੍ਤਮੇਵ ਗਣ੍ਹਨ੍ਤਿ, ਅਯੁਤ੍ਤਂ ਛਡ੍ਡੇਨ੍ਤੀ’’ਤਿ. ਤਤੋ ਸੁਟ੍ਠੁਤਰਂ ਪਬ੍ਬਜ੍ਜਾਯ ਸਞ੍ਜਾਤੁਸ੍ਸਾਹੋ ਸਚੇ, ਭਨ੍ਤੇਤਿਆਦਿਮਾਹ. ਅਥ ਭਗਵਾ ਤਸ੍ਸ ਤਿਬ੍ਬਚ੍ਛਨ੍ਦਤਂ ਵਿਦਿਤ੍ਵਾ ਨ ਸੇਨਿਯੋ ਪਰਿਵਾਸਂ ਅਰਹਤੀਤਿ ਅਞ੍ਞਤਰਂ ਭਿਕ੍ਖੁਂ ਆਮਨ੍ਤੇਸਿ – ‘‘ਗਚ੍ਛ ਤ੍ਵਂ, ਭਿਕ੍ਖੁ, ਸੇਨਿਯਂ ਨ੍ਹਾਪੇਤ੍ਵਾ ਪਬ੍ਬਾਜੇਤ੍ਵਾ ਆਨੇਹੀ’’ਤਿ. ਸੋ ਤਥਾ ਕਤ੍ਵਾ ਤਂ ਪਬ੍ਬਾਜੇਤ੍ਵਾ ਭਗਵਤੋ ਸਨ੍ਤਿਕਂ ਆਨਯਿ. ਭਗਵਾ ਗਣੇ ਨਿਸੀਦਿਤ੍ਵਾ ਉਪਸਮ੍ਪਾਦੇਸਿ. ਤੇਨ ਵੁਤ੍ਤਂ – ‘‘ਅਲਤ੍ਥ ਖੋ ਅਚੇਲੋ ਸੇਨਿਯੋ ਭਗਵਤੋ ਸਨ੍ਤਿਕੇ ਪਬ੍ਬਜ੍ਜਂ ਅਲਤ੍ਥ ਉਪਸਮ੍ਪਦ’’ਨ੍ਤਿ.

ਅਚਿਰੂਪਸਮ੍ਪਨ੍ਨੋਤਿ ਉਪਸਮ੍ਪਨ੍ਨੋ ਹੁਤ੍ਵਾ ਨਚਿਰਮੇਵ. ਵੂਪਕਟ੍ਠੋਤਿ ਵਤ੍ਥੁਕਾਮਕਿਲੇਸਕਾਮੇਹਿ ਕਾਯੇਨ ਚ ਚਿਤ੍ਤੇਨ ਚ ਵੂਪਕਟ੍ਠੋ. ਅਪ੍ਪਮਤ੍ਤੋਤਿ ਕਮ੍ਮਟ੍ਠਾਨੇ ਸਤਿਂ ਅਵਿਜਹਨ੍ਤੋ. ਆਤਾਪੀਤਿ ਕਾਯਿਕਚੇਤਸਿਕਸਙ੍ਖਾਤੇਨ ਵੀਰਿਯਾਤਾਪੇਨ ਆਤਾਪੀ. ਪਹਿਤਤ੍ਤੋਤਿ ਕਾਯੇ ਚ ਜੀਵਿਤੇ ਚ ਅਨਪੇਕ੍ਖਤਾਯ ਪੇਸਿਤਤ੍ਤੋ ਵਿਸ੍ਸਟ੍ਠਅਤ੍ਤਭਾਵੋ. ਯਸ੍ਸਤ੍ਥਾਯਾਤਿ ਯਸ੍ਸ ਅਤ੍ਥਾਯ. ਕੁਲਪੁਤ੍ਤਾਤਿ ਆਚਾਰਕੁਲਪੁਤ੍ਤਾ. ਸਮ੍ਮਦੇਵਾਤਿ ਹੇਤੁਨਾਵ ਕਾਰਣੇਨੇਵ. ਤਦਨੁਤ੍ਤਰਨ੍ਤਿ ਤਂ ਅਨੁਤ੍ਤਰਂ. ਬ੍ਰਹ੍ਮਚਰਿਯਪਰਿਯੋਸਾਨਨ੍ਤਿ ਮਗ੍ਗਬ੍ਰਹ੍ਮਚਰਿਯਪਰਿਯੋਸਾਨਭੂਤਂ ਅਰਹਤ੍ਤਫਲਂ. ਤਸ੍ਸ ਹਿ ਅਤ੍ਥਾਯ ਕੁਲਪੁਤ੍ਤਾ ਪਬ੍ਬਜਨ੍ਤਿ. ਦਿਟ੍ਠੇਵ ਧਮ੍ਮੇਤਿ ਇਮਸ੍ਮਿਂਯੇਵ ਅਤ੍ਤਭਾਵੇ. ਸਯਂ ਅਭਿਞ੍ਞਾ ਸਚ੍ਛਿਕਤ੍ਵਾਤਿ ਅਤ੍ਤਨਾਯੇਵ ਪਞ੍ਞਾਯ ਪਚ੍ਚਕ੍ਖਂ ਕਤ੍ਵਾ, ਅਪਰਪ੍ਪਚ੍ਚਯਂ ਞਤ੍ਵਾਤਿ ਅਤ੍ਥੋ. ਉਪਸਮ੍ਪਜ੍ਜ ਵਿਹਾਸੀਤਿ ਪਾਪੁਣਿਤ੍ਵਾ ਸਮ੍ਪਾਦੇਤ੍ਵਾ ਵਿਹਾਸਿ. ਏਵਂ ਵਿਹਰਨ੍ਤੋਵ ਖੀਣਾ ਜਾਤਿ…ਪੇ… ਅਬ੍ਭਞ੍ਞਾਸਿ.

ਏਵਮਸ੍ਸ ਪਚ੍ਚਵੇਕ੍ਖਣਭੂਮਿਂ ਦਸ੍ਸੇਤ੍ਵਾ ਅਰਹਤ੍ਤਨਿਕੂਟੇਨੇਵ ਦੇਸਨਂ ਨਿਟ੍ਠਾਪੇਤੁਂ ‘‘ਅਞ੍ਞਤਰੋ ਖੋ ਪਨਾਯਸ੍ਮਾ ਸੇਨਿਯੋ ਅਰਹਤਂ ਅਹੋਸੀ’’ਤਿ ਵੁਤ੍ਤਂ. ਤਤ੍ਥ ਅਞ੍ਞਤਰੋਤਿ ਏਕੋ. ਅਰਹਤਨ੍ਤਿ ਅਰਹਨ੍ਤਾਨਂ, ਭਗਵਤੋ ਸਾਵਕਾਨਂ ਅਰਹਨ੍ਤਾਨਂ ਅਬ੍ਭਨ੍ਤਰੋ ਅਹੋਸੀਤਿ ਅਯਮੇਵਤ੍ਥ ਅਧਿਪ੍ਪਾਯੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਕੁਕ੍ਕੁਰਵਤਿਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.