੫. ਜੀਵਕਸੁਤ੍ਤਵਣ੍ਣਨਾ

੫੧. ਏਵਂ ਮੇ ਸੁਤਨ੍ਤਿ ਜੀਵਕਸੁਤ੍ਤਂ. ਤਤ੍ਥ ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਅਮ੍ਬਵਨੇਤਿ ਏਤ੍ਥ ਜੀਵਤੀਤਿ ਜੀਵਕੋ. ਕੁਮਾਰੇਨ ਭਤੋਤਿ ਕੋਮਾਰਭਚ੍ਚੋ. ਯਥਾਹ ‘‘ਕਿਂ ਏਤਂ ਭਣੇ ਕਾਕੇਹਿ ਸਮ੍ਪਰਿਕਿਣ੍ਣਨ੍ਤਿ? ਦਾਰਕੋ ਦੇਵਾਤਿ. ਜੀਵਤਿ ਭਣੇਤਿ? ਜੀਵਤਿ ਦੇਵਾਤਿ. ਤੇਨ ਹਿ ਭਣੇ ਤਂ ਦਾਰਕਂ ਅਮ੍ਹਾਕਂ ਅਨ੍ਤੇਪੁਰਂ ਨੇਤ੍ਵਾ ਧਾਤੀਨਂ ਦੇਥ ਪੋਸੇਤੁਨ੍ਤਿ. ਤਸ੍ਸ ਜੀਵਤੀਤਿ ਜੀਵਕੋਤਿ ਨਾਮਂ ਅਕਂਸੁ, ਕੁਮਾਰੇਨ ਪੋਸਾਪਿਤੋਤਿ ਕੋਮਾਰਭਚ੍ਚੋਤਿ ਨਾਮਂ ਅਕਂਸੂ’’ਤਿ (ਮਹਾਵ. ੩੨੮). ਅਯਮੇਤ੍ਥ ਸਙ੍ਖੇਪੋ. ਵਿਤ੍ਥਾਰੇਨ ਪਨ ਜੀਵਕਵਤ੍ਥੁ ਖਨ੍ਧਕੇ ਆਗਤਮੇਵ. ਵਿਨਿਚ੍ਛਯਕਥਾਪਿਸ੍ਸ ਸਮਨ੍ਤਪਾਸਾਦਿਕਾਯ ਵਿਨਯਟ੍ਠਕਥਾਯ ਵੁਤ੍ਤਾ.

ਅਯਂ ਪਨ ਜੀਵਕੋ ਏਕਸ੍ਮਿਂ ਸਮਯੇ ਭਗਵਤੋ ਦੋਸਾਭਿਸਨ੍ਨਂ ਕਾਯਂ ਵਿਰੇਚੇਤ੍ਵਾ ਸੀਵੇਯ੍ਯਕਂ ਦੁਸ੍ਸਯੁਗਂ ਦਤ੍ਵਾ ਵਤ੍ਥਾਨੁਮੋਦਨਪਰਿਯੋਸਾਨੇ ਸੋਤਾਪਤ੍ਤਿਫਲੇ ਪਤਿਟ੍ਠਾਯ ਚਿਨ੍ਤੇਸਿ – ‘‘ਮਯਾ ਦਿਵਸਸ੍ਸ ਦ੍ਵਤ੍ਤਿਕ੍ਖਤ੍ਤੁਂ ਬੁਦ੍ਧੁਪਟ੍ਠਾਨਂ ਗਨ੍ਤਬ੍ਬਂ, ਇਦਞ੍ਚ ਵੇਲ਼ੁਵਨਂ ਅਤਿਦੂਰੇ, ਮਯ੍ਹਂ ਉਯ੍ਯਾਨਂ ਅਮ੍ਬਵਨਂ ਆਸਨ੍ਨਤਰਂ, ਯਂਨੂਨਾਹਮੇਤ੍ਥ ਭਗਵਤੋ ਵਿਹਾਰਂ ਕਾਰੇਯ੍ਯ’’ਨ੍ਤਿ. ਸੋ ਤਸ੍ਮਿਂ ਅਮ੍ਬਵਨੇ ਰਤ੍ਤਿਟ੍ਠਾਨਦਿਵਾਟ੍ਠਾਨਲੇਣਕੁਟਿਮਣ੍ਡਪਾਦੀਨਿ ਸਮ੍ਪਾਦੇਤ੍ਵਾ ਭਗਵਤੋ ਅਨੁਚ੍ਛਵਿਕਂ ਗਨ੍ਧਕੁਟਿਂ ਕਾਰੇਤ੍ਵਾ ਅਮ੍ਬਵਨਂ ਅਟ੍ਠਾਰਸਹਤ੍ਥੁਬ੍ਬੇਧੇਨ ਤਮ੍ਬਪਟ੍ਟਵਣ੍ਣੇਨ ਪਾਕਾਰੇਨ ਪਰਿਕ੍ਖਿਪਾਪੇਤ੍ਵਾ ਬੁਦ੍ਧਪ੍ਪਮੁਖਂ ਭਿਕ੍ਖੁਸਙ੍ਘਂ ਚੀਵਰਭਤ੍ਤੇਨ ਸਨ੍ਤਪ੍ਪੇਤ੍ਵਾ ਦਕ੍ਖਿਣੋਦਕਂ ਪਾਤੇਤ੍ਵਾ ਵਿਹਾਰਂ ਨਿਯ੍ਯਾਤੇਸਿ. ਤਂ ਸਨ੍ਧਾਯ ਵੁਤ੍ਤਂ – ‘‘ਜੀਵਕਸ੍ਸ ਕੋਮਾਰਭਚ੍ਚਸ੍ਸ ਅਮ੍ਬਵਨੇ’’ਤਿ.

ਆਰਭਨ੍ਤੀਤਿ ਘਾਤੇਨ੍ਤਿ. ਉਦ੍ਦਿਸ੍ਸਕਤਨ੍ਤਿ ਉਦ੍ਦਿਸਿਤ੍ਵਾ ਕਤਂ. ਪਟਿਚ੍ਚਕਮ੍ਮਨ੍ਤਿ ਅਤ੍ਤਾਨਂ ਪਟਿਚ੍ਚ ਕਤਂ. ਅਥ ਵਾ ਪਟਿਚ੍ਚਕਮ੍ਮਨ੍ਤਿ ਨਿਮਿਤ੍ਤਕਮ੍ਮਸ੍ਸੇਤਂ ਅਧਿਵਚਨਂ, ਤਂ ਪਟਿਚ੍ਚ ਕਮ੍ਮਮੇਤ੍ਥ ਅਤ੍ਥੀਤਿ ਮਂਸਂ ‘‘ਪਟਿਚ੍ਚਕਮ੍ਮ’’ਨ੍ਤਿ ਵੁਤ੍ਤਂ ਹੋਤਿ ਯੋ ਏਵਰੂਪਂ ਮਂਸਂ ਪਰਿਭੁਞ੍ਜਤਿ, ਸੋਪਿ ਤਸ੍ਸ ਕਮ੍ਮਸ੍ਸ ਦਾਯਾਦੋ ਹੋਤਿ, ਵਧਕਸ੍ਸ ਵਿਯ ਤਸ੍ਸਾਪਿ ਪਾਣਘਾਤਕਮ੍ਮਂ ਹੋਤੀਤਿ ਤੇਸਂ ਲਦ੍ਧਿ. ਧਮ੍ਮਸ੍ਸ ਚਾਨੁਧਮ੍ਮਂ ਬ੍ਯਾਕਰੋਨ੍ਤੀਤਿ ਭਗਵਤਾ ਵੁਤ੍ਤਕਾਰਣਸ੍ਸ ਅਨੁਕਾਰਣਂ ਕਥੇਨ੍ਤਿ. ਏਤ੍ਥ ਚ ਕਾਰਣਂ ਨਾਮ ਤਿਕੋਟਿਪਰਿਸੁਦ੍ਧਮਚ੍ਛਮਂਸਪਰਿਭੋਗੋ, ਅਨੁਕਾਰਣਂ ਨਾਮ ਮਹਾਜਨਸ੍ਸ ਤਥਾ ਬ੍ਯਾਕਰਣਂ. ਯਸ੍ਮਾ ਪਨ ਭਗਵਾ ਉਦ੍ਦਿਸ੍ਸਕਤਂ ਨ ਪਰਿਭੁਞ੍ਜਤਿ, ਤਸ੍ਮਾ ਨੇਵ ਤਂ ਕਾਰਣਂ ਹੋਤਿ, ਨ ਤਿਤ੍ਥਿਯਾਨਂ ਤਥਾ ਬ੍ਯਾਕਰਣਂ ਅਨੁਕਾਰਣਂ. ਸਹਧਮ੍ਮਿਕੋ ਵਾਦਾਨੁਵਾਦੋਤਿ ਪਰੇਹਿ ਵੁਤ੍ਤਕਾਰਣੇਨ ਸਕਾਰਣੋ ਹੁਤ੍ਵਾ ਤੁਮ੍ਹਾਕਂ ਵਾਦੋ ਵਾ ਅਨੁਵਾਦੋ ਵਾ ਵਿਞ੍ਞੂਹਿ ਗਰਹਿਤਬ੍ਬਕਾਰਣਂ ਕੋਚਿ ਅਪ੍ਪਮਤ੍ਤਕੋਪਿ ਕਿਂ ਨ ਆਗਚ੍ਛਤਿ. ਇਦਂ ਵੁਤ੍ਤਂ ਹੋਤਿ – ‘‘ਕਿਂ ਸਬ੍ਬਾਕਾਰੇਨਪਿ ਤੁਮ੍ਹਾਕਂ ਵਾਦੇ ਗਾਰਯ੍ਹਂ ਕਾਰਣਂ ਨਤ੍ਥੀ’’ਤਿ. ਅਬ੍ਭਾਚਿਕ੍ਖਨ੍ਤੀਤਿ ਅਭਿਭਵਿਤ੍ਵਾ ਆਚਿਕ੍ਖਨ੍ਤਿ.

੫੨. ਠਾਨੇਹੀਤਿ ਕਾਰਣੇਹਿ. ਦਿਟ੍ਠਾਦੀਸੁ ਦਿਟ੍ਠਂ ਨਾਮ ਭਿਕ੍ਖੂਨਂ ਅਤ੍ਥਾਯ ਮਿਗਮਚ੍ਛੇ ਵਧਿਤ੍ਵਾ ਗਯ੍ਹਮਾਨਂ ਦਿਟ੍ਠਂ. ਸੁਤਂ ਨਾਮ ਭਿਕ੍ਖੂਨਂ ਅਤ੍ਥਾਯ ਮਿਗਮਚ੍ਛੇ ਵਧਿਤ੍ਵਾ ਗਹਿਤਨ੍ਤਿ ਸੁਤਂ. ਪਰਿਸਙ੍ਕਿਤਂ ਨਾਮ ਦਿਟ੍ਠਪਰਿਸਙ੍ਕਿਤਂ ਸੁਤਪਰਿਸਙ੍ਕਿਤਂ ਤਦੁਭਯਵਿਮੁਤ੍ਤਪਰਿਸਙ੍ਕਿਤਨ੍ਤਿ ਤਿਵਿਧਂ ਹੋਤਿ.

ਤਤ੍ਰਾਯਂ ਸਬ੍ਬਸਙ੍ਗਾਹਕਵਿਨਿਚ੍ਛਯੋ – ਇਧ ਭਿਕ੍ਖੂ ਪਸ੍ਸਨ੍ਤਿ ਮਨੁਸ੍ਸੇ ਜਾਲਵਾਗੁਰਾਦਿਹਤ੍ਥੇ ਗਾਮਤੋ ਵਾ ਨਿਕ੍ਖਮਨ੍ਤੇ ਅਰਞ੍ਞੇ ਵਾ ਵਿਚਰਨ੍ਤੇ. ਦੁਤਿਯਦਿਵਸੇ ਚ ਨੇਸਂ ਤਂ ਗਾਮਂ ਪਿਣ੍ਡਾਯ ਪਵਿਟ੍ਠਾਨਂ ਸਮਚ੍ਛਮਂਸਂ ਪਿਣ੍ਡਪਾਤਂ ਅਭਿਹਰਨ੍ਤਿ. ਤੇ ਤੇਨ ਦਿਟ੍ਠੇਨ ਪਰਿਸਙ੍ਕਨ੍ਤਿ ‘‘ਭਿਕ੍ਖੂਨਂ ਨੁ ਖੋ ਅਤ੍ਥਾਯ ਕਤ’’ਨ੍ਤਿ, ਇਦਂ ਦਿਟ੍ਠਪਰਿਸਙ੍ਕਿਤਂ ਨਾਮ, ਏਤਂ ਗਹੇਤੁਂ ਨ ਵਟ੍ਟਤਿ. ਯਂ ਏਵਂ ਅਪਰਿਸਙ੍ਕਿਤਂ, ਤਂ ਵਟ੍ਟਤਿ. ਸਚੇ ਪਨ ਤੇ ਮਨੁਸ੍ਸਾ ‘‘ਕਸ੍ਮਾ, ਭਨ੍ਤੇ, ਨ ਗਣ੍ਹਥਾ’’ਤਿ ਪੁਚ੍ਛਿਤ੍ਵਾ ਤਮਤ੍ਥਂ ਸੁਤ੍ਵਾ ‘‘ਨਯਿਦਂ, ਭਨ੍ਤੇ, ਭਿਕ੍ਖੂਨਂ ਅਤ੍ਥਾਯ ਕਤਂ, ਅਮ੍ਹੇਹਿ ਅਤ੍ਤਨੋ ਅਤ੍ਥਾਯ ਵਾ ਰਾਜਯੁਤ੍ਤਾਦੀਨਂ ਅਤ੍ਥਾਯ ਵਾ ਕਤ’’ਨ੍ਤਿ ਵਦਨ੍ਤਿ, ਕਪ੍ਪਤਿ.

ਨ ਹੇਵ ਖੋ ਭਿਕ੍ਖੂ ਪਸ੍ਸਨ੍ਤਿ, ਅਪਿਚ ਸੁਣਨ੍ਤਿ ‘‘ਮਨੁਸ੍ਸਾ ਕਿਰ ਜਾਲਵਾਗੁਰਾਦਿਹਤ੍ਥਾ ਗਾਮਤੋ ਵਾ ਨਿਕ੍ਖਮਨ੍ਤਿ ਅਰਞ੍ਞੇ ਵਾ ਵਿਚਰਨ੍ਤੀ’’ਤਿ. ਦੁਤਿਯਦਿਵਸੇ ਚ ਨੇਸਂ ਤਂ ਗਾਮਂ ਪਿਣ੍ਡਾਯ ਪਵਿਟ੍ਠਾਨਂ ਸਮਚ੍ਛਮਂਸਂ ਪਿਣ੍ਡਪਾਤਂ ਅਭਿਹਰਨ੍ਤਿ. ਤੇ ਤੇਨ ਸੁਤੇਨ ਪਰਿਸਙ੍ਕਨ੍ਤਿ ‘‘ਭਿਕ੍ਖੂਨਂ ਨੁ ਖੋ ਅਤ੍ਥਾਯ ਕਤ’’ਨ੍ਤਿ, ਇਦਂ ਸੁਤਪਰਿਸਙ੍ਕਿਤਂ ਨਾਮ, ਏਤਂ ਗਹੇਤੁਂ ਨ ਵਟ੍ਟਤਿ. ਯਂ ਏਵਂ ਅਪਰਿਸਙ੍ਕਿਤਂ, ਤਂ ਵਟ੍ਟਤਿ. ਸਚੇ ਪਨ ਤੇ ਮਨੁਸ੍ਸਾ ‘‘ਕਸ੍ਮਾ, ਭਨ੍ਤੇ, ਨ ਗਣ੍ਹਥਾ’’ਤਿ ਪੁਚ੍ਛਿਤ੍ਵਾ ਤਮਤ੍ਥਂ ਸੁਤ੍ਵਾ ‘‘ਨਯਿਦਂ, ਭਨ੍ਤੇ, ਭਿਕ੍ਖੂਨਂ ਅਤ੍ਥਾਯ ਕਤਂ, ਅਮ੍ਹੇਹਿ ਅਤ੍ਤਨੋ ਅਤ੍ਥਾਯ ਵਾ ਰਾਜਯੁਤ੍ਤਾਦੀਨਂ ਅਤ੍ਥਾਯ ਵਾ ਕਤ’’ਨ੍ਤਿ ਵਦਨ੍ਤਿ, ਕਪ੍ਪਤਿ.

ਨ ਹੇਵ ਖੋ ਪਨ ਪਸ੍ਸਨ੍ਤਿ ਨ ਸੁਣਨ੍ਤਿ, ਅਪਿਚ ਤੇਸਂ ਗਾਮਂ ਪਿਣ੍ਡਾਯ ਪਵਿਟ੍ਠਾਨਂ ਪਤ੍ਤਂ ਗਹੇਤ੍ਵਾ ਸਮਚ੍ਛਮਂਸਂ ਪਿਣ੍ਡਪਾਤਂ ਅਭਿਸਙ੍ਖਰਿਤ੍ਵਾ ਅਭਿਹਰਨ੍ਤਿ. ਤੇ ਪਰਿਸਙ੍ਕਨ੍ਤਿ ‘‘ਭਿਕ੍ਖੂਨਂ ਨੁ ਖੋ ਅਤ੍ਥਾਯ ਕਤ’’ਨ੍ਤਿ, ਇਦਂ ਤਦੁਭਯਵਿਮੁਤ੍ਤਪਰਿਸਙ੍ਕਿਤਂ ਨਾਮ. ਏਤਮ੍ਪਿ ਗਹੇਤੁਂ ਨ ਵਟ੍ਟਤਿ. ਯਂ ਏਵਂ ਅਪਰਿਸਙ੍ਕਿਤਂ, ਤਂ ਵਟ੍ਟਤਿ. ਸਚੇ ਪਨ ਤੇ ਮਨੁਸ੍ਸਾ ‘‘ਕਸ੍ਮਾ, ਭਨ੍ਤੇ, ਨ ਗਣ੍ਹਥਾ’’ਤਿ ਪੁਚ੍ਛਿਤ੍ਵਾ ਤਮਤ੍ਥਂ ਸੁਤ੍ਵਾ ‘‘ਨਯਿਦਂ, ਭਨ੍ਤੇ, ਭਿਕ੍ਖੂਨਂ ਅਤ੍ਥਾਯ ਕਤਂ, ਅਮ੍ਹੇਹਿ ਅਤ੍ਤਨੋ ਅਤ੍ਥਾਯ ਵਾ ਰਾਜਯੁਤ੍ਤਾਦੀਨਂ ਅਤ੍ਥਾਯ ਵਾ ਕਤਂ, ਪਵਤ੍ਤਮਂਸਂ ਵਾ ਕਤਂ, ਕਪ੍ਪਿਯਮੇਵ ਲਭਿਤ੍ਵਾ ਭਿਕ੍ਖੂਨਂ ਅਤ੍ਥਾਯ ਸਮ੍ਪਾਦਿਤ’’ਨ੍ਤਿ ਵਦਨ੍ਤਿ, ਕਪ੍ਪਤਿ.

ਮਤਾਨਂ ਪੇਤਕਿਚ੍ਚਤ੍ਥਾਯ ਮਙ੍ਗਲਾਦੀਨਂ ਵਾ ਅਤ੍ਥਾਯ ਕਤੇਪਿ ਏਸੇਵ ਨਯੋ. ਯਂ ਯਞ੍ਹਿ ਭਿਕ੍ਖੂਨਂਯੇਵ ਅਤ੍ਥਾਯ ਅਕਤਂ, ਯਤ੍ਥ ਚ ਨਿਬ੍ਬੇਮਤਿਕਾ ਹੋਨ੍ਤਿ, ਤਂ ਸਬ੍ਬਂ ਕਪ੍ਪਤਿ. ਸਚੇ ਪਨ ਏਕਸ੍ਮਿਂ ਵਿਹਾਰੇ ਭਿਕ੍ਖੂ ਉਦ੍ਦਿਸ੍ਸ ਕਤਂ ਹੋਤਿ, ਤੇ ਚ ਅਤ੍ਤਨੋ ਅਤ੍ਥਾਯ ਕਤਭਾਵਂ ਨ ਜਾਨਨ੍ਤਿ, ਅਞ੍ਞੇ ਜਾਨਨ੍ਤਿ. ਯੇ ਜਾਨਨ੍ਤਿ, ਤੇਸਂ ਨ ਵਟ੍ਟਤਿ, ਇਤਰੇਸਂ ਵਟ੍ਟਤਿ. ਅਞ੍ਞੇ ਨ ਜਾਨਨ੍ਤਿ, ਤੇਯੇਵ ਜਾਨਨ੍ਤਿ, ਤੇਸਂਯੇਵ ਨ ਵਟ੍ਟਤਿ, ਅਞ੍ਞੇਸਂ ਵਟ੍ਟਤਿ. ਤੇਪਿ ‘‘ਅਮ੍ਹਾਕਂ ਅਤ੍ਥਾਯ ਕਤਂ’’ਤਿ ਜਾਨਨ੍ਤਿ ਅਞ੍ਞੇਪਿ ‘‘ਏਤੇਸਂ ਅਤ੍ਥਾਯ ਕਤ’’ਨ੍ਤਿ ਜਾਨਨ੍ਤਿ, ਸਬ੍ਬੇਸਮ੍ਪਿ ਤਂ ਨ ਵਟ੍ਟਤਿ. ਸਬ੍ਬੇ ਨ ਜਾਨਨ੍ਤਿ, ਸਬ੍ਬੇਸਂ ਵਟ੍ਟਤਿ. ਪਞ੍ਚਸੁ ਹਿ ਸਹਧਮ੍ਮਿਕੇਸੁ ਯਸ੍ਸ ਕਸ੍ਸਚਿ ਵਾ ਅਤ੍ਥਾਯ ਉਦ੍ਦਿਸ੍ਸ ਕਤਂ ਸਬ੍ਬੇਸਂ ਨ ਕਪ੍ਪਤਿ.

ਸਚੇ ਪਨ ਕੋਚਿ ਏਕਂ ਭਿਕ੍ਖੁਂ ਉਦ੍ਦਿਸ੍ਸ ਪਾਣਂ ਵਧਿਤ੍ਵਾ ਤਸ੍ਸ ਪਤ੍ਤਂ ਪੂਰੇਤ੍ਵਾ ਦੇਤਿ, ਸੋ ਚੇ ਅਤ੍ਤਨੋ ਅਤ੍ਥਾਯ ਕਤਭਾਵਂ ਜਾਨਂਯੇਵ ਗਹੇਤ੍ਵਾ ਅਞ੍ਞਸ੍ਸ ਭਿਕ੍ਖੁਨੋ ਦੇਤਿ, ਸੋ ਤਸ੍ਸ ਸਦ੍ਧਾਯ ਪਰਿਭੁਞ੍ਜਤਿ. ਕਸ੍ਸਾਪਤ੍ਤੀਤਿ? ਦ੍ਵਿਨ੍ਨਮ੍ਪਿ ਅਨਾਪਤ੍ਤਿ. ਯਞ੍ਹਿ ਉਦ੍ਦਿਸ੍ਸ ਕਤਂ, ਤਸ੍ਸ ਅਭੁਤ੍ਤਤਾਯ ਅਨਾਪਤ੍ਤਿ, ਇਤਰਸ੍ਸ ਅਜਾਨਨਤਾਯ. ਕਪ੍ਪਿਯਮਂਸਸ੍ਸ ਹਿ ਪਟਿਗ੍ਗਹਣੇ ਆਪਤ੍ਤਿ ਨਤ੍ਥਿ. ਉਦ੍ਦਿਸ੍ਸਕਤਞ੍ਚ ਅਜਾਨਿਤ੍ਵਾ ਭੁਤ੍ਤਸ੍ਸ ਪਚ੍ਛਾ ਞਤ੍ਵਾ ਆਪਤ੍ਤਿਦੇਸਨਾਕਿਚ੍ਚਂ ਨਾਮ ਨਤ੍ਥਿ. ਅਕਪ੍ਪਿਯਮਂਸਂ ਪਨ ਅਜਾਨਿਤ੍ਵਾ ਭੁਤ੍ਤੇਨ ਪਚ੍ਛਾ ਞਤ੍ਵਾਪਿ ਆਪਤ੍ਤਿ ਦੇਸੇਤਬ੍ਬਾ. ਉਦ੍ਦਿਸ੍ਸਕਤਞ੍ਹਿ ਞਤ੍ਵਾ ਭੁਞ੍ਜਤੋਵ ਆਪਤ੍ਤਿ, ਅਕਪ੍ਪਿਯਮਂਸਂ ਅਜਾਨਿਤ੍ਵਾ ਭੁਤ੍ਤਸ੍ਸਾਪਿ ਆਪਤ੍ਤਿਯੇਵ. ਤਸ੍ਮਾ ਆਪਤ੍ਤਿਭੀਰੁਕੇਨ ਰੂਪਂ ਸਲ੍ਲਕ੍ਖੇਨ੍ਤੇਨਾਪਿ ਪੁਚ੍ਛਿਤ੍ਵਾਵ ਮਂਸਂ ਪਟਿਗ੍ਗਹੇਤਬ੍ਬਂ, ਪਰਿਭੋਗਕਾਲੇ ਪੁਚ੍ਛਿਤ੍ਵਾ ਪਰਿਭੁਞ੍ਜਿਸ੍ਸਾਮੀਤਿ ਵਾ ਗਹੇਤ੍ਵਾ ਪੁਚ੍ਛਿਤ੍ਵਾਵ ਪਰਿਭੁਞ੍ਜਿਤਬ੍ਬਂ. ਕਸ੍ਮਾ? ਦੁਵਿਞ੍ਞੇਯ੍ਯਤ੍ਤਾ. ਅਚ੍ਛਮਂਸਞ੍ਹਿ ਸੂਕਰਮਂਸਸਦਿਸਂ ਹੋਤਿ, ਦੀਪਿਮਂਸਾਦੀਨਿ ਚ ਮਿਗਮਂਸਸਦਿਸਾਨਿ, ਤਸ੍ਮਾ ਪੁਚ੍ਛਿਤ੍ਵਾ ਗਹਣਮੇਵ ਵਟ੍ਟਤੀਤਿ ਵਦਨ੍ਤਿ.

ਅਦਿਟ੍ਠਨ੍ਤਿ ਭਿਕ੍ਖੂਨਂ ਅਤ੍ਥਾਯ ਵਧਿਤ੍ਵਾ ਗਯ੍ਹਮਾਨਂ ਅਦਿਟ੍ਠਂ. ਅਸੁਤਨ੍ਤਿ ਭਿਕ੍ਖੂਨਂ ਅਤ੍ਥਾਯ ਵਧਿਤ੍ਵਾ ਗਹਿਤਨ੍ਤਿ ਅਸੁਤਂ. ਅਪਰਿਸਙ੍ਕਿਤਨ੍ਤਿ ਦਿਟ੍ਠਪਰਿਸਙ੍ਕਿਤਾਦਿਵਸੇਨ ਅਪਰਿਸਙ੍ਕਿਤਂ. ਪਰਿਭੋਗਨ੍ਤਿ ਵਦਾਮੀਤਿ ਇਮੇਹਿ ਤੀਹਿ ਕਾਰਣੇਹਿ ਪਰਿਸੁਦ੍ਧਂ ਤਿਕੋਟਿਪਰਿਸੁਦ੍ਧਂ ਨਾਮ ਹੋਤਿ, ਤਸ੍ਸ ਪਰਿਭੋਗੋ ਅਰਞ੍ਞੇ ਜਾਤਸੂਪੇਯ੍ਯਸਾਕਪਰਿਭੋਗਸਦਿਸੋ ਹੋਤਿ, ਤਥਾਰੂਪਂ ਪਰਿਭੁਞ੍ਜਨ੍ਤਸ੍ਸ ਮੇਤ੍ਤਾਵਿਹਾਰਿਸ੍ਸ ਭਿਕ੍ਖੁਨੋ ਦੋਸੋ ਵਾ ਵਜ੍ਜਂ ਵਾ ਨਤ੍ਥਿ, ਤਸ੍ਮਾ ਤਂ ਪਰਿਭੁਞ੍ਜਿਤਬ੍ਬਨ੍ਤਿ ਵਦਾਮੀਤਿ ਅਤ੍ਥੋ.

੫੩. ਇਦਾਨਿ ਤਾਦਿਸਸ੍ਸ ਪਰਿਭੋਗੇ ਮੇਤ੍ਤਾਵਿਹਾਰਿਨੋਪਿ ਅਨਵਜ੍ਜਤਂ ਦਸ੍ਸੇਤੁਂ ਇਧ, ਜੀਵਕ, ਭਿਕ੍ਖੂਤਿਆਦਿਮਾਹ. ਤਤ੍ਥ ਕਿਞ੍ਚਾਪਿ ਅਨਿਯਮੇਤ੍ਵਾ ਭਿਕ੍ਖੂਤਿ ਵੁਤ੍ਤਂ, ਅਥ ਖੋ ਅਤ੍ਤਾਨਮੇਵ ਸਨ੍ਧਾਯ ਏਤਂ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਭਗਵਤਾ ਹਿ ਮਹਾਵਚ੍ਛਗੋਤ੍ਤਸੁਤ੍ਤੇ, ਚਙ੍ਕੀਸੁਤ੍ਤੇ, ਇਮਸ੍ਮਿਂ ਸੁਤ੍ਤੇਤਿ ਤੀਸੁ ਠਾਨੇਸੁ ਅਤ੍ਤਾਨਂਯੇਵ ਸਨ੍ਧਾਯ ਦੇਸਨਾ ਕਤਾ. ਪਣੀਤੇਨ ਪਿਣ੍ਡਪਾਤੇਨਾਤਿ ਹੇਟ੍ਠਾ ਅਨਙ੍ਗਣਸੁਤ੍ਤੇ ਯੋ ਕੋਚਿ ਮਹਗ੍ਘੋ ਪਿਣ੍ਡਪਾਤੋ ਪਣੀਤਪਿਣ੍ਡਪਾਤੋਤਿ ਅਧਿਪ੍ਪੇਤੋ, ਇਧ ਪਨ ਮਂਸੂਪਸੇਚਨੋਵ ਅਧਿਪ੍ਪੇਤੋ. ਅਗਥਿਤੋਤਿ ਤਣ੍ਹਾਯ ਅਗਥਿਤੋ. ਅਮੁਚ੍ਛਿਤੋਤਿ ਤਣ੍ਹਾਮੁਚ੍ਛਨਾਯ ਅਮੁਚ੍ਛਿਤੋ. ਅਨਜ੍ਝੋਪਨ੍ਨੋਤਿ ਨ ਅਧਿਓਪਨ੍ਨੋ, ਸਬ੍ਬਂ ਆਲੁਮ੍ਪਿਤ੍ਵਾ ਏਕਪ੍ਪਹਾਰੇਨੇਵ ਗਿਲਿਤੁਕਾਮੋ ਕਾਕੋ ਵਿਯ ਨ ਹੋਤੀਤਿ ਅਤ੍ਥੋ. ਆਦੀਨਵਦਸ੍ਸਾਵੀਤਿ ਏਕਰਤ੍ਤਿਵਾਸੇਨ ਉਦਰਪਟਲਂ ਪਵਿਸਿਤ੍ਵਾ ਨਵਹਿ ਵਣਮੁਖੇਹਿ ਨਿਕ੍ਖਮਿਸ੍ਸਤੀਤਿਆਦਿਨਾ ਨਯੇਨ ਆਦੀਨਵਂ ਪਸ੍ਸਨ੍ਤੋ. ਨਿਸ੍ਸਰਣਪਞ੍ਞੋ ਪਰਿਭੁਞ੍ਜਤੀਤਿ ਇਦਮਤ੍ਥਮਾਹਾਰਪਰਿਭੋਗੋਤਿ ਪਞ੍ਞਾਯ ਪਰਿਚ੍ਛਿਨ੍ਦਿਤ੍ਵਾ ਪਰਿਭੁਞ੍ਜਤਿ. ਅਤ੍ਤਬ੍ਯਾਬਾਧਾਯ ਵਾ ਚੇਤੇਤੀਤਿ ਅਤ੍ਤਦੁਕ੍ਖਾਯ ਵਾ ਚਿਤੇਤਿ. ਸੁਤਮੇਤਨ੍ਤਿ ਸੁਤਂ ਮਯਾ ਏਤਂ ਪੁਬ੍ਬੇ, ਏਤਂ ਮਯ੍ਹਂ ਸਵਨਮਤ੍ਤਮੇਵਾਤਿ ਦਸ੍ਸੇਤਿ. ਸਚੇ ਖੋ ਤੇ, ਜੀਵਕ, ਇਦਂ ਸਨ੍ਧਾਯ ਭਾਸਿਤਨ੍ਤਿ, ਜੀਵਕ, ਮਹਾਬ੍ਰਹ੍ਮੁਨਾ ਵਿਕ੍ਖਮ੍ਭਨਪ੍ਪਹਾਨੇਨ ਬ੍ਯਾਪਾਦਾਦਯੋ ਪਹੀਨਾ, ਤੇਨ ਸੋ ਮੇਤ੍ਤਾਵਿਹਾਰੀ ਮਯ੍ਹਂ ਸਮੁਚ੍ਛੇਦਪ੍ਪਹਾਨੇਨ, ਸਚੇ ਤੇ ਇਦਂ ਸਨ੍ਧਾਯ ਭਾਸਿਤਂ, ਏਵਂ ਸਨ੍ਤੇ ਤਵ ਇਦਂ ਵਚਨਂ ਅਨੁਜਾਨਾਮੀਤਿ ਅਤ੍ਥੋ. ਸੋ ਸਮ੍ਪਟਿਚ੍ਛਿ.

੫੪. ਅਥਸ੍ਸ ਭਗਵਾ ਸੇਸਬ੍ਰਹ੍ਮਵਿਹਾਰਵਸੇਨਾਪਿ ਉਤ੍ਤਰਿ ਦੇਸਨਂ ਵਡ੍ਢੇਨ੍ਤੋ ‘‘ਇਧ, ਜੀਵਕ, ਭਿਕ੍ਖੂ’’ਤਿਆਦਿਮਾਹ. ਤਂ ਉਤ੍ਤਾਨਤ੍ਥਮੇਵ.

੫੫. ਯੋ ਖੋ ਜੀਵਕਾਤਿ ਅਯਂ ਪਾਟਿਏਕ੍ਕੋ ਅਨੁਸਨ੍ਧਿ. ਇਮਸ੍ਮਿਞ੍ਹਿ ਠਾਨੇ ਭਗਵਾ ਦ੍ਵਾਰਂ ਥਕੇਤਿ, ਸਤ੍ਤਾਨੁਦ੍ਦਯਂ ਦਸ੍ਸੇਤਿ. ਸਚੇ ਹਿ ਕਸ੍ਸਚਿ ਏਵਮਸ੍ਸ ‘‘ਏਕਂ ਰਸਪਿਣ੍ਡਪਾਤਂ ਦਤ੍ਵਾ ਕਪ੍ਪਸਤਸਹਸ੍ਸਂ ਸਗ੍ਗਸਮ੍ਪਤ੍ਤਿਂ ਪਟਿਲਭਨ੍ਤਿ, ਯਂਕਿਞ੍ਚਿ ਕਤ੍ਵਾ ਪਰਂ ਮਾਰੇਤ੍ਵਾਪਿ ਰਸਪਿਣ੍ਡਪਾਤੋਵ ਦਾਤਬ੍ਬੋ’’ਤਿ, ਤਂ ਪਟਿਸੇਧੇਨ੍ਤੋ ‘‘ਯੋ ਖੋ, ਜੀਵਕ, ਤਥਾਗਤਂ ਵਾ’’ਤਿਆਦਿਮਾਹ.

ਤਤ੍ਥ ਇਮਿਨਾ ਪਠਮੇਨ ਠਾਨੇਨਾਤਿ ਇਮਿਨਾ ਆਣਤ੍ਤਿਮਤ੍ਤੇਨੇਵ ਤਾਵ ਪਠਮੇਨ ਕਾਰਣੇਨ. ਗਲਪ੍ਪਵੇਧਕੇਨਾਤਿ ਯੋਤ੍ਤੇਨ ਗਲੇ ਬਨ੍ਧਿਤ੍ਵਾ ਕਡ੍ਢਿਤੋ ਗਲੇਨ ਪਵੇਧੇਨ੍ਤੇਨ. ਆਰਭਿਯਮਾਨੋਤਿ ਮਾਰਿਯਮਾਨੋ. ਅਕਪ੍ਪਿਯੇਨ ਆਸਾਦੇਤੀਤਿ ਅਚ੍ਛਮਂਸਂ ਸੂਕਰਮਂਸਨ੍ਤਿ, ਦੀਪਿਮਂਸਂ ਵਾ ਮਿਗਮਂਸਨ੍ਤਿ ਖਾਦਾਪੇਤ੍ਵਾ – ‘‘ਤ੍ਵਂ ਕਿਂ ਸਮਣੋ ਨਾਮ, ਅਕਪ੍ਪਿਯਮਂਸਂ ਤੇ ਖਾਦਿਤ’’ਨ੍ਤਿ ਘਟ੍ਟੇਤਿ. ਯੇ ਪਨ ਦੁਬ੍ਭਿਕ੍ਖਾਦੀਸੁ ਵਾ ਬ੍ਯਾਧਿਨਿਗ੍ਗਹਣਤ੍ਥਂ ਵਾ ‘‘ਅਚ੍ਛਮਂਸਂ ਨਾਮ ਸੂਕਰਮਂਸਸਦਿਸਂ, ਦੀਪਿਮਂਸਂ ਮਿਗਮਂਸਸਦਿਸ’’ਨ੍ਤਿ ਜਾਨਨ੍ਤਾ ‘‘ਸੂਕਰਮਂਸਂ ਇਦਂ, ਮਿਗਮਂਸਂ ਇਦ’’ਨ੍ਤਿ ਵਤ੍ਵਾ ਹਿਤਜ੍ਝਾਸਯੇਨ ਖਾਦਾਪੇਨ੍ਤਿ, ਨ ਤੇ ਸਨ੍ਧਾਯੇਤਂ ਵੁਤ੍ਤਂ. ਤੇਸਞ੍ਹਿ ਬਹੁਪੁਞ੍ਞਮੇਵ ਹੋਤਿ. ਏਸਾਹਂ, ਭਨ੍ਤੇ, ਭਗਵਨ੍ਤਂ ਸਰਣਂ ਗਚ੍ਛਾਮਿ ਧਮ੍ਮਞ੍ਚ ਭਿਕ੍ਖੁਸਙ੍ਘਞ੍ਚਾਤਿ ਅਯਂ ਆਗਤਫਲੋ ਵਿਞ੍ਞਾਤਸਾਸਨੋ ਦਿਟ੍ਠਸਚ੍ਚੋ ਅਰਿਯਸਾਵਕੋ. ਇਮਂ ਪਨ ਧਮ੍ਮਦੇਸਨਂ ਓਗਾਹਨ੍ਤੋ ਪਸਾਦਂ ਉਪ੍ਪਾਦੇਤ੍ਵਾ ਧਮ੍ਮਕਥਾਯ ਥੁਤਿਂ ਕਰੋਨ੍ਤੋ ਏਵਮਾਹ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਜੀਵਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.