੯. ਬ੍ਰਹ੍ਮਨਿਮਨ੍ਤਨਿਕਸੁਤ੍ਤਵਣ੍ਣਨਾ

੫੦੧. ਏਵਂ ਮੇ ਸੁਤਨ੍ਤਿ ਬ੍ਰਹ੍ਮਨਿਮਨ੍ਤਨਿਕਸੁਤ੍ਤਂ. ਤਤ੍ਥ ਪਾਪਕਂ ਦਿਟ੍ਠਿਗਤਨ੍ਤਿ ਲਾਮਕਾ ਸਸ੍ਸਤਦਿਟ੍ਠਿ. ਇਦਂ ਨਿਚ੍ਚਨ੍ਤਿ ਇਦਂ ਸਹ ਕਾਯੇਨ ਬ੍ਰਹ੍ਮਟ੍ਠਾਨਂ ਅਨਿਚ੍ਚਂ ‘‘ਨਿਚ੍ਚ’’ਨ੍ਤਿ ਵਦਤਿ. ਧੁਵਾਦੀਨਿ ਤਸ੍ਸੇਵ ਵੇਵਚਨਾਨਿ. ਤਤ੍ਥ ਧੁਵਨ੍ਤਿ ਥਿਰਂ. ਸਸ੍ਸਤਨ੍ਤਿ ਸਦਾ ਵਿਜ੍ਜਮਾਨਂ. ਕੇਵਲਨ੍ਤਿ ਅਖਣ੍ਡਂ ਸਕਲਂ. ਅਚਵਨਧਮ੍ਮਨ੍ਤਿ ਅਚਵਨਸਭਾਵਂ. ਇਦਞ੍ਹਿ ਨ ਜਾਯਤੀਤਿਆਦੀਸੁ ਇਮਸ੍ਮਿਂ ਠਾਨੇ ਕੋਚਿ ਜਾਯਨਕੋ ਵਾ ਜੀਯਨਕੋ ਵਾ ਮੀਯਨਕੋ ਵਾ ਚਵਨਕੋ ਵਾ ਉਪਪਜ੍ਜਨਕੋ ਵਾ ਨਤ੍ਥੀਤਿ ਸਨ੍ਧਾਯ ਵਦਤਿ. ਇਤੋ ਚ ਪਨਞ੍ਞਨ੍ਤਿ ਇਤੋ ਸਹ ਕਾਯਕਾ ਬ੍ਰਹ੍ਮਟ੍ਠਾਨਾ ਉਤ੍ਤਰਿ ਅਞ੍ਞਂ ਨਿਸ੍ਸਰਣਂ ਨਾਮ ਨਤ੍ਥੀਤਿ ਏਵਮਸ੍ਸ ਥਾਮਗਤਾ ਸਸ੍ਸਤਦਿਟ੍ਠਿ ਉਪ੍ਪਨ੍ਨਾ ਹੋਤਿ. ਏਵਂਵਾਦੀ ਪਨ ਸੋ ਉਪਰਿ ਤਿਸ੍ਸੋ ਝਾਨਭੂਮਿਯੋ ਚਤ੍ਤਾਰੋ ਮਗ੍ਗਾ ਚਤ੍ਤਾਰਿ ਫਲਾਨਿ ਨਿਬ੍ਬਾਨਨ੍ਤਿ ਸਬ੍ਬਂ ਪਟਿਬਾਹਤਿ. ਅਵਿਜ੍ਜਾਗਤੋਤਿ ਅਵਿਜ੍ਜਾਯ ਗਤੋ ਸਮਨ੍ਨਾਗਤੋ ਅਞ੍ਞਾਣੀ ਅਨ੍ਧੀਭੂਤੋ. ਯਤ੍ਰ ਹਿ ਨਾਮਾਤਿ ਯੋ ਨਾਮ.

੫੦੨. ਅਥ ਖੋ, ਭਿਕ੍ਖਵੇ, ਮਾਰੋ ਪਾਪਿਮਾਤਿ ਮਾਰੋ ਕਥਂ ਭਗਵਨ੍ਤਂ ਅਦ੍ਦਸ? ਸੋ ਕਿਰ ਅਤ੍ਤਨੋ ਭਵਨੇ ਨਿਸੀਦਿਤ੍ਵਾ ਕਾਲੇਨ ਕਾਲਂ ਸਤ੍ਥਾਰਂ ਆਵਜ੍ਜੇਤਿ – ‘‘ਅਜ੍ਜ ਸਮਣੋ ਗੋਤਮੋ ਕਤਰਸ੍ਮਿਂ ਗਾਮੇ ਵਾ ਨਿਗਮੇ ਵਾ ਵਸਤੀ’’ਤਿ. ਇਮਸ੍ਮਿਂ ਪਨ ਕਾਲੇ ਆਵਜ੍ਜਨ੍ਤੋ, ‘‘ਉਕ੍ਕਟ੍ਠਂ ਨਿਸ੍ਸਾਯ ਸੁਭਗਵਨੇ ਵਿਹਰਤੀ’’ਤਿ ਞਤ੍ਵਾ, ‘‘ਕਤ੍ਥ ਨੁ ਖੋ ਗਤੋ’’ਤਿ ਓਲੋਕੇਨ੍ਤੋ ਬ੍ਰਹ੍ਮਲੋਕਂ ਗਚ੍ਛਨ੍ਤਂ ਦਿਸ੍ਵਾ, ‘‘ਸਮਣੋ ਗੋਤਮੋ ਬ੍ਰਹ੍ਮਲੋਕਂ ਗਚ੍ਛਤਿ, ਯਾਵ ਤਤ੍ਥ ਧਮ੍ਮਕਥਂ ਕਥੇਤ੍ਵਾ ਬ੍ਰਹ੍ਮਗਣਂ ਮਮ ਵਿਸਯਾ ਨਾਤਿਕ੍ਕਮੇਤਿ, ਤਾਵ ਗਨ੍ਤ੍ਵਾ ਧਮ੍ਮਦੇਸਨਾਯਂ ਵਿਛਨ੍ਦਂ ਕਰਿਸ੍ਸਾਮੀ’’ਤਿ ਸਤ੍ਥੁ ਪਦਾਨੁਪਦਿਕੋ ਗਨ੍ਤ੍ਵਾ ਬ੍ਰਹ੍ਮਗਣਸ੍ਸ ਅਨ੍ਤਰੇ ਅਦਿਸ੍ਸਮਾਨੇਨ ਕਾਯੇਨ ਅਟ੍ਠਾਸਿ. ਸੋ, ‘‘ਸਤ੍ਥਾਰਾ ਬਕਬ੍ਰਹ੍ਮਾ ਅਪਸਾਦਿਤੋ’’ਤਿ ਞਤ੍ਵਾ ਬ੍ਰਹ੍ਮੁਨੋ ਉਪਤ੍ਥਮ੍ਭੋ ਹੁਤ੍ਵਾ ਅਟ੍ਠਾਸਿ. ਤੇਨ ਵੁਤ੍ਤਂ – ‘‘ਅਥ ਖੋ, ਭਿਕ੍ਖਵੇ, ਮਾਰੋ ਪਾਪਿਮਾ’’ਤਿ.

ਬ੍ਰਹ੍ਮਪਾਰਿਸਜ੍ਜਂ ਅਨ੍ਵਾਵਿਸਿਤ੍ਵਾਤਿ ਏਕਸ੍ਸ ਬ੍ਰਹ੍ਮਪਾਰਿਸਜ੍ਜਸ੍ਸ ਸਰੀਰਂ ਪਵਿਸਿਤ੍ਵਾ. ਮਹਾਬ੍ਰਹ੍ਮਾਨਂ ਪਨ ਬ੍ਰਹ੍ਮਪੁਰੋਹਿਤਾਨਂ ਵਾ ਅਨ੍ਵਾਵਿਸਿਤੁਂ ਨ ਸਕ੍ਕੋਤਿ. ਮੇਤਮਾਸਦੋਤਿ ਮਾ ਏਤਂ ਅਪਸਾਦਯਿਤ੍ਥ. ਅਭਿਭੂਤਿ ਅਭਿਭਵਿਤ੍ਵਾ ਠਿਤੋ ਜੇਟ੍ਠਕੋ. ਅਨਭਿਭੂਤੋਤਿ ਅਞ੍ਞੇਹਿ ਅਨਭਿਭੂਤੋ. ਅਞ੍ਞਦਤ੍ਥੂਤਿ ਏਕਂਸਵਚਨੇ ਨਿਪਾਤੋ. ਦਸ੍ਸਨਵਸੇਨ ਦਸੋ, ਸਬ੍ਬਂ ਪਸ੍ਸਤੀਤਿ ਦੀਪੇਤਿ. ਵਸਵਤ੍ਤੀਤਿ ਸਬ੍ਬਜਨਂ ਵਸੇ ਵਤ੍ਤੇਤਿ. ਇਸ੍ਸਰੋਤਿ ਲੋਕੇ ਇਸ੍ਸਰੋ. ਕਤ੍ਤਾ ਨਿਮ੍ਮਾਤਾਤਿ ਲੋਕਸ੍ਸ ਕਤ੍ਤਾ ਚ ਨਿਮ੍ਮਾਤਾ ਚ, ਪਥਵੀਹਿਮਵਨ੍ਤਸਿਨੇਰੁਚਕ੍ਕਵਾਲ਼ਮਹਾਸਮੁਦ੍ਦਚਨ੍ਦਿਮਸੂਰਿਯਾ ਚ ਇਮਿਨਾ ਨਿਮ੍ਮਿਤਾਤਿ ਦੀਪੇਤਿ.

ਸੇਟ੍ਠੋ ਸਜਿਤਾਤਿ ਅਯਂ ਲੋਕਸ੍ਸ ਉਤ੍ਤਮੋ ਚ ਸਜਿਤਾ ਚ. ‘‘ਤ੍ਵਂ ਖਤ੍ਤਿਯੋ ਨਾਮ ਹੋਹਿ, ਤ੍ਵਂ ਬ੍ਰਾਹ੍ਮਣੋ ਨਾਮ, ਵੇਸ੍ਸੋ ਨਾਮ, ਸੁਦ੍ਦੋ ਨਾਮ, ਗਹਟ੍ਠੋ ਨਾਮ, ਪਬ੍ਬਜਿਤੋ ਨਾਮ, ਅਨ੍ਤਮਸੋ ਓਟ੍ਠੋ ਹੋਹਿ, ਗੋਣੋ ਹੋਹੀ’’ਤਿ ਏਵਂ ਸਤ੍ਤਾਨਂ ਵਿਸਜ੍ਜੇਤਾ ਅਯਨ੍ਤਿ ਦਸ੍ਸੇਤਿ. ਵਸੀ ਪਿਤਾ ਭੂਤਭਬ੍ਯਾਨਨ੍ਤਿ ਅਯਂ ਚਿਣ੍ਣਵਸਿਤਾਯ ਵਸੀ, ਅਯਂ ਪਿਤਾ ਭੂਤਾਨਞ੍ਚ ਭਬ੍ਯਾਨਞ੍ਚਾਤਿ ਵਦਤਿ. ਤਤ੍ਥ ਅਣ੍ਡਜਜਲਾਬੁਜਾ ਸਤ੍ਤਾ ਅਨ੍ਤੋਅਣ੍ਡਕੋਸੇ ਚੇਵ ਅਨ੍ਤੋਵਤ੍ਥਿਮ੍ਹਿ ਚ ਭਬ੍ਯਾ ਨਾਮ, ਬਹਿ ਨਿਕ੍ਖਨ੍ਤਕਾਲਤੋ ਪਟ੍ਠਾਯ ਭੂਤਾ. ਸਂਸੇਦਜਾ ਪਠਮਚਿਤ੍ਤਕ੍ਖਣੇ ਭਬ੍ਯਾ, ਦੁਤਿਯਤੋ ਪਟ੍ਠਾਯ ਭੂਤਾ. ਓਪਪਾਤਿਕਾ ਪਠਮਇਰਿਯਾਪਥੇ ਭਬ੍ਯਾ, ਦੁਤਿਯਤੋ ਪਟ੍ਠਾਯ ਭੂਤਾਤਿ ਵੇਦਿਤਬ੍ਬਾ. ਤੇ ਸਬ੍ਬੇਪਿ ਏਤਸ੍ਸ ਪੁਤ੍ਤਾਤਿ ਸਞ੍ਞਾਯ, ‘‘ਪਿਤਾ ਭੂਤਭਬ੍ਯਾਨ’’ਨ੍ਤਿ ਆਹ.

ਪਥਵੀਗਰਹਕਾਤਿ ਯਥਾ ਤ੍ਵਂ ਏਤਰਹਿ, ‘‘ਅਨਿਚ੍ਚਾ ਦੁਕ੍ਖਾ ਅਨਤ੍ਤਾ’’ਤਿ ਪਥਵਿਂ ਗਰਹਸਿ ਜਿਗੁਚ੍ਛਸਿ, ਏਵਂ ਤੇਪਿ ਪਥਵੀਗਰਹਕਾ ਅਹੇਸੁਂ, ਨ ਕੇਵਲਂ ਤ੍ਵਂਯੇਵਾਤਿ ਦੀਪੇਤਿ. ਆਪਗਰਹਕਾਤਿਆਦੀਸੁਪਿ ਏਸੇਵ ਨਯੋ. ਹੀਨੇ ਕਾਯੇ ਪਤਿਟ੍ਠਿਤਾਤਿ ਚਤੂਸੁ ਅਪਾਯੇਸੁ ਨਿਬ੍ਬਤ੍ਤਾ. ਪਥਵੀਪਸਂਸਕਾਤਿ ਯਥਾ ਤ੍ਵਂ ਗਰਹਸਿ, ਏਵਂ ਅਗਰਹਿਤ੍ਵਾ, ‘‘ਨਿਚ੍ਚਾ ਧੁਵਾ ਸਸ੍ਸਤਾ ਅਚ੍ਛੇਜ੍ਜਾ ਅਭੇਜ੍ਜਾ ਅਕ੍ਖਯਾ’’ਤਿ ਏਵਂ ਪਥਵੀਪਸਂਸਕਾ ਪਥਵਿਯਾ ਵਣ੍ਣਵਾਦਿਨੋ ਅਹੇਸੁਨ੍ਤਿ ਵਦਤਿ. ਪਥਵਾਭਿਨਨ੍ਦਿਨੋਤਿ ਤਣ੍ਹਾਦਿਟ੍ਠਿਵਸੇਨ ਪਥਵਿਯਾ ਅਭਿਨਨ੍ਦਿਨੋ. ਸੇਸੇਸੁਪਿ ਏਸੇਵ ਨਯੋ. ਪਣੀਤੇ ਕਾਯੇ ਪਤਿਟ੍ਠਿਤਾਤਿ ਬ੍ਰਹ੍ਮਲੋਕੇ ਨਿਬ੍ਬਤ੍ਤਾ. ਤਂ ਤਾਹਨ੍ਤਿ ਤੇਨ ਕਾਰਣੇਨ ਤਂ ਅਹਂ. ਇਙ੍ਘਾਤਿ ਚੋਦਨਤ੍ਥੇ ਨਿਪਾਤੋ. ਉਪਾਤਿਵਤ੍ਤਿਤ੍ਥੋਤਿ ਅਤਿਕ੍ਕਮਿਤ੍ਥ. ‘‘ਉਪਾਤਿਵਤ੍ਤਿਤੋ’’ਤਿਪਿ ਪਾਠੋ, ਅਯਮੇਵਤ੍ਥੋ. ਦਣ੍ਡੇਨ ਪਟਿਪ੍ਪਣਾਮੇਯ੍ਯਾਤਿ ਚਤੁਹਤ੍ਥੇਨ ਮੁਗ੍ਗਰਦਣ੍ਡੇਨ ਪੋਥੇਤ੍ਵਾ ਪਲਾਪੇਯ੍ਯ. ਨਰਕਪਪਾਤੇਤਿ ਸਤਪੋਰਿਸੇ ਮਹਾਸੋਬ੍ਭੇ. ਵਿਰਾਧੇਯ੍ਯਾਤਿ ਹਤ੍ਥੇਨ ਗਹਣਯੁਤ੍ਤੇ ਵਾ ਪਾਦੇਨ ਪਤਿਟ੍ਠਾਨਯੁਤ੍ਤੇ ਵਾ ਠਾਨੇ ਗਹਣਪਤਿਟ੍ਠਾਨਾਨਿ ਕਾਤੁਂ ਨ ਸਕ੍ਕੁਣੇਯ੍ਯ. ਨਨੁ ਤ੍ਵਂ ਭਿਕ੍ਖੁ ਪਸ੍ਸਸੀਤਿ ਭਿਕ੍ਖੁ ਨਨੁ ਤ੍ਵਂ ਇਮਂ ਬ੍ਰਹ੍ਮਪਰਿਸਂ ਸਨ੍ਨਿਪਤਿਤਂ ਓਭਾਸਮਾਨਂ ਵਿਰੋਚਮਾਨਂ ਜੋਤਯਮਾਨਂ ਪਸ੍ਸਸੀਤਿ ਬ੍ਰਹ੍ਮੁਨੋ ਓਵਾਦੇ ਠਿਤਾਨਂ ਇਦ੍ਧਾਨੁਭਾਵਂ ਦਸ੍ਸੇਤਿ. ਇਤਿ ਖੋ ਮਂ, ਭਿਕ੍ਖਵੇ, ਮਾਰੋ ਪਾਪਿਮਾ ਬ੍ਰਹ੍ਮਪਰਿਸਂ ਉਪਨੇਸੀਤਿ, ਭਿਕ੍ਖਵੇ, ਮਾਰੋ ਪਾਪਿਮਾ ਨਨੁ ਤ੍ਵਂ ਭਿਕ੍ਖੁ ਪਸ੍ਸਸਿ ਬ੍ਰਹ੍ਮਪਰਿਸਂ ਯਸੇਨ ਚ ਸਿਰਿਯਾ ਚ ਓਭਾਸਮਾਨਂ ਵਿਰੋਚਮਾਨਂ ਜੋਤਯਮਾਨਂ, ਯਦਿ ਤ੍ਵਮ੍ਪਿ ਮਹਾਬ੍ਰਹ੍ਮੁਨੋ ਵਚਨਂ ਅਨਤਿਕ੍ਕਮਿਤ੍ਵਾ ਯਦੇਵ ਤੇ ਬ੍ਰਹ੍ਮਾ ਵਦਤਿ, ਤਂ ਕਰੇਯ੍ਯਾਸਿ, ਤ੍ਵਮ੍ਪਿ ਏਵਮੇਵਂ ਯਸੇਨ ਚ ਸਿਰਿਯਾ ਚ ਵਿਰੋਚੇਯ੍ਯਾਸੀਤਿ ਏਵਂ ਵਦਨ੍ਤੋ ਮਂ ਬ੍ਰਹ੍ਮਪਰਿਸਂ ਉਪਨੇਸਿ ਉਪਸਂਹਰਿ. ਮਾ ਤ੍ਵਂ ਮਞ੍ਞਿਤ੍ਥੋਤਿ ਮਾ ਤ੍ਵਂ ਮਞ੍ਞਿ. ਮਾਰੋ ਤ੍ਵਮਸਿ ਪਾਪਿਮਾਤਿ ਪਾਪਿਮ ਤ੍ਵਂ ਮਹਾਜਨਸ੍ਸ ਮਾਰਣਤੋ ਮਾਰੋ ਨਾਮ, ਪਾਪਕਂ ਲਾਮਕਂ ਮਹਾਜਨਸ੍ਸ ਅਯਸਂ ਕਰਣਤੋ ਪਾਪਿਮਾ ਨਾਮਾਤਿ ਜਾਨਾਮਿ.

੫੦੩. ਕਸਿਣਂ ਆਯੁਨ੍ਤਿ ਸਕਲਂ ਆਯੁਂ. ਤੇ ਖੋ ਏਵਂ ਜਾਨੇਯ੍ਯੁਨ੍ਤਿ ਤੇ ਏਵਂ ਮਹਨ੍ਤੇਨ ਤਪੋਕਮ੍ਮੇਨ ਸਮਨ੍ਨਾਗਤਾ, ਤ੍ਵਂ ਪਨ ਪੁਰਿਮਦਿਵਸੇ ਜਾਤੋ, ਕਿਂ ਜਾਨਿਸ੍ਸਸਿ, ਯਸ੍ਸ ਤੇ ਅਜ੍ਜਾਪਿ ਮੁਖੇ ਖੀਰਗਨ੍ਧੋ ਵਾਯਤੀਤਿ ਘਟ੍ਟੇਨ੍ਤੋ ਵਦਤਿ. ਪਥਵਿਂ ਅਜ੍ਝੋਸਿਸ੍ਸਸੀਤਿ ਪਥਵਿਂ ਅਜ੍ਝੋਸਾਯ ਗਿਲਿਤ੍ਵਾ ਪਰਿਨਿਟ੍ਠਪੇਤ੍ਵਾ ਤਣ੍ਹਾਮਾਨਦਿਟ੍ਠੀਹਿ ਗਣ੍ਹਿਸ੍ਸਸਿ. ਓਪਸਾਯਿਕੋ ਮੇ ਭਵਿਸ੍ਸਸੀਤਿ ਮਯ੍ਹਂ ਸਮੀਪਸਯੋ ਭਵਿਸ੍ਸਸਿ, ਮਂ ਗਚ੍ਛਨ੍ਤਂ ਅਨੁਗਚ੍ਛਿਸ੍ਸਸਿ, ਠਿਤਂ ਉਪਤਿਟ੍ਠਿਸ੍ਸਸਿ, ਨਿਸਿਨ੍ਨਂ ਉਪਨਿਸੀਦਿਸ੍ਸਸਿ, ਨਿਪਨ੍ਨਂ ਉਪਨਿਪਜ੍ਜਿਸ੍ਸਸੀਤਿ ਅਤ੍ਥੋ. ਵਤ੍ਥੁਸਾਯਿਕੋਤਿ ਮਮ ਵਤ੍ਥੁਸ੍ਮਿਂ ਸਯਨਕੋ. ਯਥਾਕਾਮਕਰਣੀਯੋ ਬਾਹਿਤੇਯ੍ਯੋਤਿ ਮਯਾ ਅਤ੍ਤਨੋ ਰੁਚਿਯਾ ਯਂ ਇਚ੍ਛਾਮਿ, ਤਂ ਕਤ੍ਤਬ੍ਬੋ, ਬਾਹਿਤ੍ਵਾ ਚ ਪਨ ਜਜ੍ਝਰਿਕਾਗੁਮ੍ਬਤੋਪਿ ਨੀਚਤਰੋ ਲਕੁਣ੍ਡਟਕਤਰੋ ਕਾਤਬ੍ਬੋ ਭਵਿਸ੍ਸਸੀਤਿ ਅਤ੍ਥੋ.

ਇਮਿਨਾ ਏਸ ਭਗਵਨ੍ਤਂ ਉਪਲਾਪੇਤਿ ਵਾ ਅਪਸਾਦੇਤਿ ਵਾ. ਉਪਲਾਪੇਤਿ ਨਾਮ ਸਚੇ ਖੋ ਤ੍ਵਂ, ਭਿਕ੍ਖੁ, ਤਣ੍ਹਾਦੀਹਿ ਪਥਵਿਂ ਅਜ੍ਝੋਸਿਸ੍ਸਸਿ, ਓਪਸਾਯਿਕੋ ਮੇ ਭਵਿਸ੍ਸਸਿ, ਮਯਿ ਗਚ੍ਛਨ੍ਤੇ ਗਮਿਸ੍ਸਸਿ, ਤਿਟ੍ਠਨ੍ਤੇ ਠਸ੍ਸਸਿ, ਨਿਸਿਨ੍ਨੇ ਨਿਸੀਦਿਸ੍ਸਸਿ, ਨਿਪਨ੍ਨੇ ਨਿਪਜ੍ਜਿਸ੍ਸਸਿ, ਅਹਂ ਤਂ ਸੇਸਜਨਂ ਪਟਿਬਾਹਿਤ੍ਵਾ ਵਿਸ੍ਸਾਸਿਕਂ ਅਬ੍ਭਨ੍ਤਰਿਕਂ ਕਰਿਸ੍ਸਾਮੀਤਿ ਏਵਂ ਤਾਵ ਉਪਲਾਪੇਤਿ ਨਾਮ. ਸੇਸਪਦੇਹਿ ਪਨ ਅਪਸਾਦੇਤਿ ਨਾਮ. ਅਯਞ੍ਹੇਤ੍ਥ ਅਧਿਪ੍ਪਾਯੋ – ਸਚੇ ਤ੍ਵਂ ਪਥਵਿਂ ਅਜ੍ਝੋਸਿਸ੍ਸਸਿ, ਵਤ੍ਥੁਸਾਯਿਕੋ ਮੇ ਭਵਿਸ੍ਸਸਿ, ਮਮ ਗਮਨਾਦੀਨਿ ਆਗਮੇਤ੍ਵਾ ਗਮਿਸ੍ਸਸਿ ਵਾ ਠਸ੍ਸਸਿ ਵਾ ਨਿਸੀਦਿਸ੍ਸਸਿ ਵਾ ਨਿਪਜ੍ਜਿਸ੍ਸਸਿ ਵਾ, ਮਮ ਵਤ੍ਥੁਸ੍ਮਿਂ ਮਯ੍ਹਂ ਆਰਕ੍ਖਂ ਗਣ੍ਹਿਸ੍ਸਸਿ, ਅਹਂ ਪਨ ਤਂ ਯਥਾਕਾਮਂ ਕਰਿਸ੍ਸਾਮਿ ਬਾਹਿਤ੍ਵਾ ਚ ਜਜ੍ਝਰਿਕਾਗੁਮ੍ਬਤੋਪਿ ਲਕੁਣ੍ਡਕਤਰਨ੍ਤਿ ਏਵਂ ਅਪਸਾਦੇਤਿ ਨਾਮ. ਅਯਂ ਪਨ ਬ੍ਰਹ੍ਮਾ ਮਾਨਨਿਸ੍ਸਿਤੋ, ਤਸ੍ਮਾ ਇਧ ਅਪਸਾਦਨਾਵ ਅਧਿਪ੍ਪੇਤਾ. ਆਪਾਦੀਸੁਪਿ ਏਸੇਵ ਨਯੋ.

ਅਪਿਚ ਤੇ ਅਹਂ ਬ੍ਰਹ੍ਮੇਤਿ ਇਦਾਨਿ ਭਗਵਾ, ‘‘ਅਯਂ ਬ੍ਰਹ੍ਮਾ ਮਾਨਨਿਸ੍ਸਿਤੋ ‘ਅਹਂ ਜਾਨਾਮੀ’ਤਿ ਮਞ੍ਞਤਿ, ਅਤ੍ਤਨੋ ਯਸੇਨ ਸਮ੍ਮਤ੍ਤੋ ਸਰੀਰਂ ਫੁਸਿਤੁਮ੍ਪਿ ਸਮਤ੍ਥਂ ਕਿਞ੍ਚਿ ਨ ਪਸ੍ਸਤਿ, ਥੋਕਂ ਨਿਗ੍ਗਹੇਤੁਂ ਵਟ੍ਟਤੀ’’ਤਿ ਚਿਨ੍ਤੇਤ੍ਵਾ ਇਮਂ ਦੇਸਨਂ ਆਰਭਿ. ਤਤ੍ਥ ਗਤਿਞ੍ਚ ਪਜਾਨਾਮੀਤਿ ਨਿਪ੍ਫਤ੍ਤਿਞ੍ਚ ਪਜਾਨਾਮਿ. ਜੁਤਿਞ੍ਚਾਤਿ ਆਨੁਭਾਵਞ੍ਚ ਪਜਾਨਾਮਿ. ਏਵਂ ਮਹੇਸਕ੍ਖੋਤਿ ਏਵਂ ਮਹਾਯਸੋ ਮਹਾਪਰਿਵਾਰੋ.

ਯਾਵਤਾ ਚਨ੍ਦਿਮਸੂਰਿਯਾ ਪਰਿਹਰਨ੍ਤੀਤਿ ਯਤ੍ਤਕੇ ਠਾਨੇ ਚਨ੍ਦਿਮਸੂਰਿਯਾ ਵਿਚਰਨ੍ਤਿ. ਦਿਸਾ ਭਨ੍ਤਿ ਵਿਰੋਚਨਾਤਿ ਦਿਸਾਸੁ ਵਿਰੋਚਮਾਨਾ ਓਭਾਸਨ੍ਤਿ, ਦਿਸਾ ਵਾ ਤੇਹਿ ਵਿਰੋਚਮਾਨਾ ਓਭਾਸਨ੍ਤਿ. ਤਾਵ ਸਹਸ੍ਸਧਾ ਲੋਕੋਤਿ ਤਤ੍ਤਕੇਨ ਪਮਾਣੇਨ ਸਹਸ੍ਸਧਾ ਲੋਕੋ, ਇਮਿਨਾ ਚਕ੍ਕਵਾਲ਼ੇਨ ਸਦ੍ਧਿਂ ਚਕ੍ਕਵਾਲ਼ਸਹਸ੍ਸਨ੍ਤਿ ਅਤ੍ਥੋ. ਏਤ੍ਥ ਤੇ ਵਤ੍ਤਤੇ ਵਸੋਤਿ ਏਤ੍ਥ ਚਕ੍ਕਵਾਲ਼ਸਹਸ੍ਸੇ ਤੁਯ੍ਹਂ ਵਸੋ ਵਤ੍ਤਤਿ. ਪਰੋਪਰਞ੍ਚ ਜਾਨਾਸੀਤਿ ਏਤ੍ਥ ਚਕ੍ਕਵਾਲ਼ਸਹਸ੍ਸੇ ਪਰੋਪਰੇ ਉਚ੍ਚਨੀਚੇ ਹੀਨਪ੍ਪਣੀਤੇ ਸਤ੍ਤੇ ਜਾਨਾਸਿ. ਅਥੋ ਰਾਗਵਿਰਾਗਿਨਨ੍ਤਿ ਨ ਕੇਵਲਂ, ‘‘ਅਯਂ ਇਦ੍ਧੋ ਅਯਂ ਪਕਤਿਮਨੁਸ੍ਸੋ’’ਤਿ ਪਰੋਪਰਂ, ‘‘ਅਯਂ ਪਨ ਸਰਾਗੋ ਅਯਂ ਵੀਤਰਾਗੋ’’ਤਿ ਏਵਂ ਰਾਗਵਿਰਾਗਿਨਮ੍ਪਿ ਜਨਂ ਜਾਨਾਸਿ. ਇਤ੍ਥਂਭਾਵਞ੍ਞਥਾਭਾਵਨ੍ਤਿ ਇਤ੍ਥਂਭਾਵੋਤਿ ਇਦਂ ਚਕ੍ਕਵਾਲ਼ਂ. ਅਞ੍ਞਥਾਭਾਵੋਤਿ ਇਤੋ ਸੇਸਂ ਏਕੂਨਸਹਸ੍ਸਂ. ਸਤ੍ਤਾਨਂ ਆਗਤਿਂ ਗਤਿਨ੍ਤਿ ਏਤ੍ਥ ਚਕ੍ਕਵਾਲ਼ਸਹਸ੍ਸੇ ਪਟਿਸਨ੍ਧਿਵਸੇਨ ਸਤ੍ਤਾਨਂ ਆਗਤਿਂ, ਚੁਤਿਵਸੇਨ ਗਤਿਂ ਚ ਜਾਨਾਸਿ. ਤੁਯ੍ਹਂ ਪਨ ਅਤਿਮਹਨ੍ਤੋਹਮਸ੍ਮੀਤਿ ਸਞ੍ਞਾ ਹੋਤਿ, ਸਹਸ੍ਸਿਬ੍ਰਹ੍ਮਾ ਨਾਮ ਤ੍ਵਂ, ਅਞ੍ਞੇਸਂ ਪਨ ਤਯਾ ਉਤ੍ਤਰਿ ਦ੍ਵਿਸਹਸ੍ਸਾਨਂ ਤਿਸਹਸ੍ਸਾਨਂ ਚਤੁਸਹਸ੍ਸਾਨਂ ਪਞ੍ਚਸਹਸ੍ਸਾਨਂ ਦਸਸਹਸ੍ਸਾਨਂ ਸਤਸਹਸ੍ਸਾਨਞ੍ਚ ਬ੍ਰਹ੍ਮਾਨਂ ਪਮਾਣਂ ਨਤ੍ਥਿ, ਚਤੁਹਤ੍ਥਾਯ ਪਿਲੋਤਿਕਾਯ ਪਟਪ੍ਪਮਾਣਂ ਕਾਤੁਂ ਵਾਯਮਨ੍ਤੋ ਵਿਯ ਮਹਨ੍ਤੋਸ੍ਮੀਤਿ ਸਞ੍ਞਂ ਕਰੋਸੀਤਿ ਨਿਗ੍ਗਣ੍ਹਾਤਿ.

੫੦੪. ਇਧੂਪਪਨ੍ਨੋਤਿ ਇਧ ਪਠਮਜ੍ਝਾਨਭੂਮਿਯਂ ਉਪਪਨ੍ਨੋ. ਤੇਨ ਤਂ ਤ੍ਵਂ ਨ ਜਾਨਾਸੀਤਿ ਤੇਨ ਕਾਰਣੇਨ ਤਂ ਕਾਯਂ ਤ੍ਵਂ ਨ ਜਾਨਾਸਿ. ਨੇਵ ਤੇ ਸਮਸਮੋਤਿ ਜਾਨਿਤਬ੍ਬਟ੍ਠਾਨਂ ਪਤ੍ਵਾਪਿ ਤਯਾ ਸਮਸਮੋ ਨ ਹੋਮਿ. ਅਭਿਞ੍ਞਾਯਾਤਿ ਅਞ੍ਞਾਯ. ਕੁਤੋ ਨੀਚੇਯ੍ਯਨ੍ਤਿ ਤਯਾ ਨੀਚਤਰਭਾਵੋ ਪਨ ਮਯ੍ਹਂ ਕੁਤੋ.

ਹੇਟ੍ਠੂਪਪਤ੍ਤਿਕੋ ਕਿਰੇਸ ਬ੍ਰਹ੍ਮਾ ਅਨੁਪ੍ਪਨ੍ਨੇ ਬੁਦ੍ਧੁਪ੍ਪਾਦੇ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਕਸਿਣਪਰਿਕਮ੍ਮਂ ਕਤ੍ਵਾ ਸਮਾਪਤ੍ਤਿਯੋ ਨਿਬ੍ਬਤ੍ਤੇਤ੍ਵਾ ਅਪਰਿਹੀਨਜ੍ਝਾਨੋ ਕਾਲਂ ਕਤ੍ਵਾ ਚਤੁਤ੍ਥਜ੍ਝਾਨਭੂਮਿਯਂ ਵੇਹਪ੍ਫਲਬ੍ਰਹ੍ਮਲੋਕੇ ਪਞ੍ਚਕਪ੍ਪਸਤਿਕਂ ਆਯੁਂ ਗਹੇਤ੍ਵਾ ਨਿਬ੍ਬਤ੍ਤਿ. ਤਤ੍ਥ ਯਾਵਤਾਯੁਕਂ ਠਤ੍ਵਾ ਹੇਟ੍ਟੂਪਪਤ੍ਤਿਕਂ ਕਤ੍ਵਾ ਤਤਿਯਜ੍ਝਾਨਂ ਪਣੀਤਂ ਭਾਵੇਤ੍ਵਾ ਸੁਭਕਿਣ੍ਹਬ੍ਰਹ੍ਮਲੋਕੇ ਚਤੁਸਟ੍ਠਿਕਪ੍ਪਂ ਆਯੁਂ ਗਹੇਤ੍ਵਾ ਨਿਬ੍ਬਤ੍ਤਿ. ਤਤ੍ਥ ਦੁਤਿਯਜ੍ਝਾਨਂ ਭਾਵੇਤ੍ਵਾ ਆਭਸ੍ਸਰੇਸੁ ਅਟ੍ਠਕਪ੍ਪਂ ਆਯੁਂ ਗਹੇਤ੍ਵਾ ਨਿਬ੍ਬਤ੍ਤਿ. ਤਤ੍ਥ ਪਠਮਜ੍ਝਾਨਂ ਭਾਵੇਤ੍ਵਾ ਪਠਮਜ੍ਝਾਨਭੂਮਿਯਂ ਕਪ੍ਪਾਯੁਕੋ ਹੁਤ੍ਵਾ ਨਿਬ੍ਬਤ੍ਤਿ, ਸੋ ਪਠਮਕਾਲੇ ਅਤ੍ਤਨਾ ਕਤਕਮ੍ਮਞ੍ਚ ਨਿਬ੍ਬਤ੍ਤਟ੍ਠਾਨਞ੍ਚ ਅਞ੍ਞਾਸਿ, ਕਾਲੇ ਪਨ ਗਚ੍ਛਨ੍ਤੇ ਉਭਯਂ ਪਮੁਸ੍ਸਿਤ੍ਵਾ ਸਸ੍ਸਤਦਿਟ੍ਠਿਂ ਉਪ੍ਪਾਦੇਸਿ. ਤੇਨ ਨਂ ਭਗਵਾ, ‘‘ਤੇਨ ਤਂ ਤ੍ਵਂ ਨ ਜਾਨਾਸਿ…ਪੇ… ਕੁਤੋ ਨੀਚੇਯ੍ਯ’’ਨ੍ਤਿ ਆਹ.

ਅਥ ਬ੍ਰਹ੍ਮਾ ਚਿਨ੍ਤੇਸਿ – ‘‘ਸਮਣੋ ਗੋਤਮੋ ਮਯ੍ਹਂ ਆਯੁਞ੍ਚ ਨਿਬ੍ਬਤ੍ਤਟ੍ਠਾਨਞ੍ਚ ਪੁਬ੍ਬੇਕਤਕਮ੍ਮਞ੍ਚ ਜਾਨਾਤਿ, ਹਨ੍ਦ ਨਂ ਪੁਬ੍ਬੇ ਕਤਕਮ੍ਮਂ ਪੁਚ੍ਛਾਮੀ’’ਤਿ ਸਤ੍ਥਾਰਂ ਅਤ੍ਤਨੋ ਪੁਬ੍ਬੇਕਤਕਮ੍ਮਂ ਪੁਚ੍ਛਿ. ਸਤ੍ਥਾ ਕਥੇਸਿ.

ਪੁਬ੍ਬੇ ਕਿਰੇਸ ਕੁਲਘਰੇ ਨਿਬ੍ਬਤ੍ਤਿਤ੍ਵਾ ਕਾਮੇਸੁ ਆਦੀਨਵਂ ਦਿਸ੍ਵਾ, ‘‘ਜਾਤਿਜਰਾਬ੍ਯਾਧਿਮਰਣਸ੍ਸ ਅਨ੍ਤਂ ਕਰਿਸ੍ਸਾਮੀ’’ਤਿ ਨਿਕ੍ਖਮ੍ਮ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਸਮਾਪਤ੍ਤਿਯੋ ਨਿਬ੍ਬਤ੍ਤੇਤ੍ਵਾ ਅਭਿਞ੍ਞਾਪਾਦਕਜ੍ਝਾਨਲਾਭੀ ਹੁਤ੍ਵਾ ਗਙ੍ਗਾਤੀਰੇ ਪਣ੍ਣਸਾਲਂ ਕਾਰੇਤ੍ਵਾ ਝਾਨਰਤਿਯਾ ਵੀਤਿਨਾਮੇਤਿ. ਤਦਾ ਚ ਕਾਲੇਨ ਕਾਲਂ ਸਤ੍ਥਵਾਹਾ ਪਞ੍ਚਹਿ ਸਕਟਸਤੇਹਿ ਮਰੁਕਨ੍ਤਾਰਂ ਪਟਿਪਜ੍ਜਨ੍ਤਿ. ਮਰੁਕਨ੍ਤਾਰੇ ਪਨ ਦਿਵਾ ਨ ਸਕ੍ਕਾ ਗਨ੍ਤੁਂ, ਰਤ੍ਤਿਂ ਗਮਨਂ ਹੋਤਿ. ਅਥ ਪੁਰਿਮਸਕਟਸ੍ਸ ਅਗ੍ਗਯੁਗੇ ਯੁਤ੍ਤਬਲਿਬਦ੍ਦਾ ਗਚ੍ਛਨ੍ਤਾ ਨਿਵਤ੍ਤਿਤ੍ਵਾ ਆਗਤਮਗ੍ਗਾਭਿਮੁਖਾਵ ਅਹੇਸੁਂ. ਇਤਰਸਕਟਾਨਿ ਤਥੇਵ ਨਿਵਤ੍ਤਿਤ੍ਵਾ ਅਰੁਣੇ ਉਗ੍ਗਤੇ ਨਿਵਤ੍ਤਿਤਭਾਵਂ ਜਾਨਿਂਸੁ. ਤੇਸਞ੍ਚ ਤਦਾ ਕਨ੍ਤਾਰਂ ਅਤਿਕ੍ਕਮਨਦਿਵਸੋ ਅਹੋਸਿ. ਸਬ੍ਬਂ ਦਾਰੁਦਕਂ ਪਰਿਕ੍ਖੀਣਂ, ਤਸ੍ਮਾ, ‘‘ਨਤ੍ਥਿ ਦਾਨਿ ਅਮ੍ਹਾਕਂ ਜੀਵਿਤ’’ਨ੍ਤਿ ਚਿਨ੍ਤੇਤ੍ਵਾ ਗੋਣੇ ਚਕ੍ਕੇਸੁ ਬਨ੍ਧਿਤ੍ਵਾ ਮਨੁਸ੍ਸਾ ਸਕਟਪਚ੍ਛਾਯਾਯਂ ਪਵਿਸਿਤ੍ਵਾ ਨਿਪਜ੍ਜਿਂਸੁ. ਤਾਪਸੋਪਿ ਕਾਲਸ੍ਸੇਵ ਪਣ੍ਣਸਾਲਤੋ ਨਿਕ੍ਖਮਿਤ੍ਵਾ ਪਣ੍ਣਸਾਲਦ੍ਵਾਰੇ ਨਿਸਿਨ੍ਨੋ ਗਙ੍ਗਂ ਓਲੋਕਯਮਾਨੋ ਅਦ੍ਦਸ ਗਙ੍ਗਂ ਮਹਤਾ ਉਦਕੋਘੇਨ ਵੁਯ੍ਹਮਾਨਂ ਪਵਤ੍ਤਿਤਮਣਿਕ੍ਖਨ੍ਧਂ ਵਿਯ ਆਗਚ੍ਛਨ੍ਤਿਂ. ਦਿਸ੍ਵਾ ਚਿਨ੍ਤੇਸਿ – ‘‘ਅਤ੍ਥਿ ਨੁ ਖੋ ਇਮਸ੍ਮਿਂ ਲੋਕੇ ਏਵਰੂਪਸ੍ਸ ਮਧੁਰੋਦਕਸ੍ਸ ਅਲਾਭੇਨ ਕਿਲਿਸ੍ਸਮਾਨਾ ਸਤ੍ਤਾ’’ਤਿ. ਸੋ ਏਵਂ ਆਵਜ੍ਜਨ੍ਤੋ ਮਰੁਕਨ੍ਤਾਰੇ ਤਂ ਸਤ੍ਥਂ ਦਿਸ੍ਵਾ, ‘‘ਇਮੇ ਸਤ੍ਤਾ ਮਾ ਨਸ੍ਸਨ੍ਤੂ’’ਤਿ, ‘‘ਇਤੋ ਮਹਾ ਉਦਕਕ੍ਖਨ੍ਧੋ ਛਿਜ੍ਜਿਤ੍ਵਾ ਮਰੁਕਨ੍ਤਾਰੇ ਸਤ੍ਥਾਭਿਮੁਖੋ ਗਚ੍ਛਤੂ’’ਤਿ ਅਭਿਞ੍ਞਾਚਿਤ੍ਤੇਨ ਅਧਿਟ੍ਠਾਸਿ. ਸਹਚਿਤ੍ਤੁਪ੍ਪਾਦੇਨ ਮਾਤਿਕਾਰੁਲ਼੍ਹਂ ਵਿਯ ਉਦਕਂ ਤਤ੍ਥ ਅਗਮਾਸਿ. ਮਨੁਸ੍ਸਾ ਉਦਕਸਦ੍ਦੇਨ ਵੁਟ੍ਠਾਯ ਉਦਕਂ ਦਿਸ੍ਵਾ ਹਤ੍ਥਤੁਟ੍ਠਾ ਨ੍ਹਾਯਿਤ੍ਵਾ ਪਿਵਿਤ੍ਵਾ ਗੋਣੇਪਿ ਪਾਯੇਤ੍ਵਾ ਸੋਤ੍ਥਿਨਾ ਇਚ੍ਛਿਤਟ੍ਠਾਨਂ ਅਗਮਂਸੁ. ਸਤ੍ਥਾ ਤਂ ਬ੍ਰਹ੍ਮੁਨੋ ਪੁਬ੍ਬਕਮ੍ਮਂ ਦਸ੍ਸੇਨ੍ਤੋ –

‘‘ਯਂ ਤ੍ਵਂ ਅਪਾਯੇਸਿ ਬਹੂ ਮਨੁਸ੍ਸੇ,

ਪਿਪਾਸਿਤੇ ਘਮ੍ਮਨਿ ਸਮ੍ਪਰੇਤੇ;

ਤਂ ਤੇ ਪੁਰਾਣਂ ਵਤਸੀਲਵਤ੍ਤਂ,

ਸੁਤ੍ਤਪ੍ਪਬੁਦ੍ਧੋਵ ਅਨੁਸ੍ਸਰਾਮੀ’’ਤਿ. (ਜਾ. ੧.੭.੭੧) –

ਇਮਂ ਗਾਥਮਾਹ.

ਅਪਰਸ੍ਮਿਂ ਸਮਯੇ ਤਾਪਸੋ ਗਙ੍ਗਾਤੀਰੇ ਪਣ੍ਣਸਾਲਂ ਮਾਪੇਤ੍ਵਾ ਆਰਞ੍ਞਕਂ ਗਾਮਂ ਨਿਸ੍ਸਾਯ ਵਸਤਿ. ਤੇਨ ਚ ਸਮਯੇਨ ਚੋਰਾ ਤਂ ਗਾਮਂ ਪਹਰਿਤ੍ਵਾ ਹਤ੍ਥਸਾਰਂ ਗਹੇਤ੍ਵਾ ਗਾਵਿਯੋ ਚ ਕਰਮਰੇ ਚ ਗਹੇਤ੍ਵਾ ਗਚ੍ਛਨ੍ਤਿ. ਗਾਵੋਪਿ ਸੁਨਖਾਪਿ ਮਨੁਸ੍ਸਾਪਿ ਮਹਾਵਿਰਵਂ ਵਿਰਵਨ੍ਤਿ. ਤਾਪਸੋ ਤਂ ਸਦ੍ਦਂ ਸੁਤ੍ਵਾ ‘‘ਕਿਂ ਨੁ ਖੋ ਏਤ’’ਨ੍ਤਿ ਆਵਜ੍ਜਨ੍ਤੋ, ‘‘ਮਨੁਸ੍ਸਾਨਂ ਭਯਂ ਉਪ੍ਪਨ੍ਨ’’ਨ੍ਤਿ ਞਤ੍ਵਾ, ‘‘ਮਯਿ ਪਸ੍ਸਨ੍ਤੇ ਇਮੇ ਸਤ੍ਤਾ ਮਾ ਨਸ੍ਸਨ੍ਤੂ’’ਤਿ ਅਭਿਞ੍ਞਾਪਾਦਕਜ੍ਝਾਨਂ ਸਮਾਪਜ੍ਜਿਤ੍ਵਾ ਵੁਟ੍ਠਾਯ ਅਭਿਞ੍ਞਾਚਿਤ੍ਤੇਨ ਚੋਰਾਨਂ ਪਟਿਪਥੇ ਚਤੁਰਙ੍ਗਿਨਿਸੇਨਂ ਮਾਪੇਸਿ ਕਮ੍ਮਸਜ੍ਜਂ ਆਗਚ੍ਛਨ੍ਤਿਂ. ਚੋਰਾ ਦਿਸ੍ਵਾ, ‘‘ਰਾਜਾ’’ਤਿ ਤੇ ਮਞ੍ਞਮਾਨਾ ਵਿਲੋਪਂ ਛਡ੍ਡੇਤ੍ਵਾ ਪਕ੍ਕਮਿਂਸੁ. ਤਾਪਸੋ ‘‘ਯਂ ਯਸ੍ਸ ਸਨ੍ਤਕਂ, ਤਂ ਤਸ੍ਸੇਵ ਹੋਤੂ’’ਤਿ ਅਧਿਟ੍ਠਾਸਿ, ਤਂ ਤਥੇਵ ਅਹੋਸਿ. ਮਹਾਜਨੋ ਸੋਤ੍ਥਿਭਾਵਂ ਪਾਪੁਣਿ. ਸਤ੍ਥਾ ਇਦਮ੍ਪਿ ਤਸ੍ਸ ਪੁਬ੍ਬਕਮ੍ਮਂ ਦਸ੍ਸੇਨ੍ਤੋ –

‘‘ਯਂ ਏਣਿਕੂਲਸ੍ਮਿਂ ਜਨਂ ਗਹੀਤਂ,

ਅਮੋਚਯੀ ਗਯ੍ਹਕ ਨੀਯਮਾਨਂ;

ਤਂ ਤੇ ਪੁਰਾਣਂ ਵਤਸੀਲਵਤ੍ਤਂ,

ਸੁਤ੍ਤਪ੍ਪਬੁਦ੍ਧੋਵ ਅਨੁਸ੍ਸਰਾਮੀ’’ਤਿ. (ਜਾ. ੧.੭.੭੨) –

ਇਮਂ ਗਾਥਮਾਹ. ਏਤ੍ਥ ਏਣਿਕੂਲਸ੍ਮਿਨ੍ਤਿ ਗਙ੍ਗਾਤੀਰੇ.

ਪੁਨ ਏਕਸ੍ਮਿਂ ਸਮਯੇ ਉਪਰਿਗਙ੍ਗਾਵਾਸਿਕਂ ਕੁਲਂ ਹੇਟ੍ਠਾਗਙ੍ਗਾਵਾਸਿਕੇਨ ਕੁਲੇਨ ਸਦ੍ਧਿਂ ਮਿਤ੍ਤਸਨ੍ਥਵਂ ਕਤ੍ਵਾ ਨਾਵਾਸਙ੍ਘਾਟਂ ਬਨ੍ਧਿਤ੍ਵਾ ਬਹੁਂ ਖਾਦਨੀਯਭੋਜਨੀਯਞ੍ਚੇਵ ਗਨ੍ਧਮਾਲਾਦੀਨਿ ਚ ਆਰੋਪੇਤ੍ਵਾ ਗਙ੍ਗਾਸੋਤੇਨ ਆਗਚ੍ਛਤਿ. ਮਨੁਸ੍ਸਾ ਖਾਦਮਾਨਾ ਭੁਞ੍ਜਮਾਨਾ ਨਚ੍ਚਨ੍ਤਾ ਗਾਯਨ੍ਤਾ ਦੇਵਵਿਮਾਨੇਨ ਗਚ੍ਛਨ੍ਤਾ ਵਿਯ ਬਲਵਸੋਮਨਸ੍ਸਾ ਅਹੇਸੁਂ. ਗਙ੍ਗੇਯ੍ਯਕੋ ਨਾਗੋ ਦਿਸ੍ਵਾ ਕੁਪਿਤੋ, ‘‘ਇਮੇ ਮਯਿ ਸਞ੍ਞਮ੍ਪਿ ਨ ਕਰੋਨ੍ਤਿ, ਇਦਾਨਿ ਨੇ ਸਮੁਦ੍ਦਮੇਵ ਪਾਪੇਸ੍ਸਾਮੀ’’ਤਿ ਮਹਨ੍ਤਂ ਅਤ੍ਤਭਾਵਂ ਮਾਪੇਤ੍ਵਾ ਉਦਕਂ ਦ੍ਵਿਧਾ ਭਿਨ੍ਦਿਤ੍ਵਾ ਉਟ੍ਠਾਯ ਫਣਂ ਕਤ੍ਵਾ ਸੁਸ੍ਸੂਕਾਰਂ ਕਰੋਨ੍ਤੋ ਅਟ੍ਠਾਸਿ. ਮਹਾਜਨੋ ਦਿਸ੍ਵਾ ਭੀਤੋ ਵਿਸ੍ਸਰਮਕਾਸਿ. ਤਾਪਸੋ ਪਣ੍ਣਸਾਲਾਯ ਨਿਸਿਨ੍ਨੋ ਸੁਤ੍ਵਾ, ‘‘ਇਮੇ ਗਾਯਨ੍ਤਾ ਨਚ੍ਚਨ੍ਤਾ ਸੋਮਨਸ੍ਸਜਾਤਾ ਆਗਚ੍ਛਨ੍ਤਿ, ਇਦਾਨਿ ਪਨ ਭਯਰਵਂ ਰਵਿਂਸੁ, ਕਿਂ ਨੁ ਖੋ’’ਤਿ ਆਵਜ੍ਜਨ੍ਤੋ ਨਾਗਰਾਜਂ ਦਿਸ੍ਵਾ, ‘‘ਮਯਿ ਪਸ੍ਸਨ੍ਤੇ ਇਮੇ ਸਤ੍ਤਾ ਮਾ ਨਸ੍ਸਨ੍ਤੂ’’ਤਿ ਅਭਿਞ੍ਞਾਪਾਦਕਜ੍ਝਾਨਂ ਸਮਾਪਜ੍ਜਿਤ੍ਵਾ ਅਤ੍ਤਭਾਵਂ ਵਿਜਹਿਤ੍ਵਾ ਸੁਪਣ੍ਣਵਣ੍ਣਂ ਮਾਪੇਤ੍ਵਾ ਨਾਗਰਾਜਸ੍ਸ ਦਸ੍ਸੇਸਿ. ਨਾਗਰਾਜਾ ਭੀਤੋ ਫਣਂ ਸਂਹਰਿਤ੍ਵਾ ਉਦਕਂ ਪਵਿਟ੍ਠੋ. ਮਹਾਜਨੋ ਸੋਤ੍ਥਿਭਾਵਂ ਪਾਪੁਣਿ. ਸਤ੍ਥਾ ਇਦਮ੍ਪਿ ਤਸ੍ਸ ਪੁਬ੍ਬਕਮ੍ਮਂ ਦਸ੍ਸੇਨ੍ਤੋ –

‘‘ਗਙ੍ਗਾਯ ਸੋਤਸ੍ਮਿਂ ਗਹੀਤਨਾਵਂ,

ਲੁਦ੍ਦੇਨ ਨਾਗੇਨ ਮਨੁਸ੍ਸਕਪ੍ਪਾ;

ਅਮੋਚਯਿਤ੍ਥ ਬਲਸਾ ਪਸਯ੍ਹ,

ਤਂ ਤੇ ਪੁਰਾਣਂ ਵਤਸੀਲਵਤ੍ਤਂ;

ਸੁਤ੍ਤਪ੍ਪਬੁਦ੍ਧੋਵ ਅਨੁਸ੍ਸਰਾਮੀ’’ਤਿ. (ਜਾ. ੧.੭.੭੩) –

ਇਮਂ ਗਾਥਮਾਹ.

ਅਪਰਸ੍ਮਿਂ ਸਮਯੇ ਏਸ ਇਸਿਪਬ੍ਬਜ੍ਜਂ ਪਬ੍ਬਜਿਤ੍ਵਾ ਕੇਸਵੋ ਨਾਮ ਤਾਪਸੋ ਅਹੋਸਿ. ਤੇਨ ਸਮਯੇਨ ਅਮ੍ਹਾਕਂ ਬੋਧਿਸਤ੍ਤੋ ਕਪ੍ਪੋ ਨਾਮ ਮਾਣਵੋ ਕੇਸਵਸ੍ਸ ਬਦ੍ਧਚਰੋ ਅਨ੍ਤੇਵਾਸਿਕੋ ਹੁਤ੍ਵਾ ਆਚਰਿਯਸ੍ਸ ਕਿਂਕਾਰਪਟਿਸ੍ਸਾਵੀ ਮਨਾਪਚਾਰੀ ਬੁਦ੍ਧਿਸਮ੍ਪਨ੍ਨੋ ਅਤ੍ਥਚਰੋ ਅਹੋਸਿ. ਕੇਸਵੋ ਤਂ ਵਿਨਾ ਵਤ੍ਤਿਤੁਂ ਨਾਸਕ੍ਖਿ, ਤਂ ਨਿਸ੍ਸਾਯੇਵ ਜੀਵਿਕਂ ਕਪ੍ਪੇਸਿ. ਸਤ੍ਥਾ ਇਦਮ੍ਪਿ ਤਸ੍ਸ ਪੁਬ੍ਬਕਮ੍ਮਂ ਦਸ੍ਸੇਨ੍ਤੋ –

‘‘ਕਪ੍ਪੋ ਚ ਤੇ ਬਦ੍ਧਚਰੋ ਅਹੋਸਿ,

ਸਮ੍ਬੁਦ੍ਧਿਮਨ੍ਤਂ ਵਤਿਨਂ ਅਮਞ੍ਞਿ;

ਤਂ ਤੇ ਪੁਰਾਣਂ ਵਤਸੀਲਵਤ੍ਤਂ,

ਸੁਤ੍ਤਪ੍ਪਬੁਦ੍ਧੋਵ ਅਨੁਸ੍ਸਰਾਮੀ’’ਤਿ. (ਜਾ. ੧.੭.੭੪) –

ਇਮਂ ਗਾਥਮਾਹ.

ਏਵਂ ਬ੍ਰਹ੍ਮੁਨੋ ਨਾਨਤ੍ਤਭਾਵੇਸੁ ਕਤਕਮ੍ਮਂ ਸਤ੍ਥਾ ਪਕਾਸੇਸਿ. ਸਤ੍ਥਰਿ ਕਥੇਨ੍ਤੇਯੇਵ ਬ੍ਰਹ੍ਮਾ ਸਲ੍ਲਕ੍ਖੇਸਿ, ਦੀਪਸਹਸ੍ਸੇ ਉਜ੍ਜਲਿਤੇ ਰੂਪਾਨਿ ਵਿਯ ਸਬ੍ਬਕਮ੍ਮਾਨਿਸ੍ਸ ਪਾਕਟਾਨਿ ਅਹੇਸੁਂ. ਸੋ ਪਸਨ੍ਨਚਿਤ੍ਤੋ ਇਮਂ ਗਾਥਮਾਹ –

‘‘ਅਦ੍ਧਾ ਪਜਾਨਾਸਿ ਮਮੇਤਮਾਯੁਂ,

ਅਞ੍ਞਮ੍ਪਿ ਜਾਨਾਸਿ ਤਥਾ ਹਿ ਬੁਦ੍ਧੋ;

ਤਥਾ ਹਿ ਤਾਯਂ ਜਲਿਤਾਨੁਭਾਵੋ,

ਓਭਾਸਯਂ ਤਿਟ੍ਠਤਿ ਬ੍ਰਹ੍ਮਲੋਕ’’ਨ੍ਤਿ. (ਜਾ. ੧.੭.੭੫);

ਅਥਸ੍ਸ ਭਗਵਾ ਉਤ੍ਤਰਿ ਅਸਮਸਮਤਂ ਪਕਾਸੇਨ੍ਤੋ ਪਥਵਿਂ ਖੋ ਅਹਂ ਬ੍ਰਹ੍ਮੇਤਿਆਦਿਮਾਹ. ਤਤ੍ਥ ਪਥਵਿਯਾ ਪਥਵਤ੍ਤੇਨ ਅਨਨੁਭੂਤਨ੍ਤਿ ਪਥਵਿਯਾ ਪਥਵਿਸਭਾਵੇਨ ਅਨਨੁਭੂਤਂ ਅਪ੍ਪਤ੍ਤਂ. ਕਿਂ ਪਨ ਤਨ੍ਤਿ? ਨਿਬ੍ਬਾਨਂ. ਤਞ੍ਹਿ ਸਬ੍ਬਸ੍ਮਾ ਸਙ੍ਖਤਾ ਨਿਸ੍ਸਟਤ੍ਤਾ ਪਥਵਿਸਭਾਵੇਨ ਅਪ੍ਪਤ੍ਤਂ ਨਾਮ. ਤਦਭਿਞ੍ਞਾਯਾਤਿ ਤਂ ਨਿਬ੍ਬਾਨਂ ਜਾਨਿਤ੍ਵਾ ਸਚ੍ਛਿਕਤ੍ਵਾ. ਪਥਵਿਂ ਨਾਪਹੋਸਿਨ੍ਤਿ ਪਥਵਿਂ ਤਣ੍ਹਾਦਿਟ੍ਠਿਮਾਨਗਾਹੇਹਿ ਨ ਗਣ੍ਹਿਂ. ਆਪਾਦੀਸੁਪਿ ਏਸੇਵ ਨਯੋ. ਵਿਤ੍ਥਾਰੋ ਪਨ ਮੂਲਪਰਿਯਾਯੇ ਵੁਤ੍ਤਨਯੇਨੇਵ ਵੇਦਿਤਬ੍ਬੋ.

ਸਚੇ ਖੋ ਤੇ, ਮਾਰਿਸ, ਸਬ੍ਬਸ੍ਸ ਸਬ੍ਬਤ੍ਤੇਨਾਤਿ ਇਦਮੇਵ ਬ੍ਰਹ੍ਮਾ ਅਤ੍ਤਨੋ ਵਾਦਿਤਾਯ ਸਬ੍ਬਨ੍ਤਿ ਅਕ੍ਖਰਂ ਨਿਦ੍ਦਿਸਿਤ੍ਵਾ ਅਕ੍ਖਰੇ ਦੋਸਂ ਗਣ੍ਹਨ੍ਤੋ ਆਹ. ਸਤ੍ਥਾ ਪਨ ਸਕ੍ਕਾਯਂ ਸਨ੍ਧਾਯ ‘‘ਸਬ੍ਬ’’ਨ੍ਤਿ ਵਦਤਿ, ਬ੍ਰਹ੍ਮਾ ਸਬ੍ਬਸਬ੍ਬਂ ਸਨ੍ਧਾਯ. ਤ੍ਵਂ ‘‘ਸਬ੍ਬ’’ਨ੍ਤਿ ਵਦਸਿ, ‘‘ਸਬ੍ਬਸ੍ਸ ਸਬ੍ਬਤ੍ਤੇਨ ਅਨਨੁਭੂਤ’’ਨ੍ਤਿ ਵਦਸਿ, ਯਦਿ ਸਬ੍ਬਂ ਅਨਨੁਭੂਤਂ ਨਤ੍ਥਿ, ਅਥਸ੍ਸ ਅਨਨੁਭੂਤਂ ਅਤ੍ਥਿ. ਮਾ ਹੇਵ ਤੇ ਰਿਤ੍ਤਕਮੇਵ ਅਹੋਸਿ ਤੁਚ੍ਛਕਮੇਵ ਅਹੋਸੀਤਿ ਤੁਯ੍ਹਂ ਵਚਨਂ ਰਿਤ੍ਤਕਂ ਮਾ ਹੋਤੁ, ਤੁਚ੍ਛਕਂ ਮਾ ਹੋਤੂਤਿ ਸਤ੍ਥਾਰਂ ਮੁਸਾਵਾਦੇਨ ਨਿਗ੍ਗਣ੍ਹਾਤਿ.

ਸਤ੍ਥਾ ਪਨ ਏਤਸ੍ਮਾ ਬ੍ਰਹ੍ਮੁਨਾ ਸਤਗੁਣੇਨ ਸਹਸ੍ਸਗੁਣੇਨ ਸਤਸਹਸ੍ਸਗੁਣੇਨ ਵਾਦੀਤਰੋ, ਤਸ੍ਮਾ ਅਹਂ ਸਬ੍ਬਞ੍ਚ ਵਕ੍ਖਾਮਿ, ਅਨਨੁਭੂਤਞ੍ਚ ਵਕ੍ਖਾਮਿ, ਸੁਣਾਹਿ ਮੇਤਿ ਤਸ੍ਸ ਵਾਦਮਦ੍ਦਨਤ੍ਥਂ ਕਾਰਣਂ ਆਹਰਨ੍ਤੋ ਵਿਞ੍ਞਾਣਨ੍ਤਿਆਦਿਮਾਹ. ਤਤ੍ਥ ਵਿਞ੍ਞਾਣਨ੍ਤਿ ਵਿਜਾਨਿਤਬ੍ਬਂ. ਅਨਿਦਸ੍ਸਨਨ੍ਤਿ ਚਕ੍ਖੁਵਿਞ੍ਞਾਣਸ੍ਸ ਆਪਾਥਂ ਅਨੁਪਗਮਨਤੋ ਅਨਿਦਸ੍ਸਨਂ ਨਾਮ, ਪਦਦ੍ਵਯੇਨਪਿ ਨਿਬ੍ਬਾਨਮੇਵ ਵੁਤ੍ਤਂ. ਅਨਨ੍ਤਨ੍ਤਿ ਤਯਿਦਂ ਉਪ੍ਪਾਦਵਯਅਨ੍ਤਰਹਿਤਤ੍ਤਾ ਅਨਨ੍ਤਂ ਨਾਮ. ਵੁਤ੍ਤਮ੍ਪਿ ਹੇਤਂ –

‘‘ਅਨ੍ਤਵਨ੍ਤਾਨਿ ਭੂਤਾਨਿ, ਅਸਮ੍ਭੂਤਂ ਅਨਨ੍ਤਕਂ;

ਭੂਤੇ ਅਨ੍ਤਾਨਿ ਦਿਸ੍ਸਨ੍ਤਿ, ਭੂਤੇ ਅਨ੍ਤਾ ਪਕਾਸਿਤਾ’’ਤਿ.

ਸਬ੍ਬਤੋਪਭਨ੍ਤਿ ਸਬ੍ਬਸੋ ਪਭਾਸਮ੍ਪਨ੍ਨਂ. ਨਿਬ੍ਬਾਨਤੋ ਹਿ ਅਞ੍ਞੋ ਧਮ੍ਮੋ ਸਪਭਤਰੋ ਵਾ ਜੋਤਿਵਨ੍ਤਤਰੋ ਵਾ ਪਰਿਸੁਦ੍ਧਤਰੋ ਵਾ ਪਣ੍ਡਰਤਰੋ ਵਾ ਨਤ੍ਥਿ. ਸਬ੍ਬਤੋ ਵਾ ਤਥਾ ਪਭੂਤਮੇਵ, ਨ ਕਤ੍ਥਚਿ ਨਤ੍ਥੀਤਿ ਸਬ੍ਬਤੋਪਭਂ. ਪੁਰਤ੍ਥਿਮਦਿਸਾਦੀਸੁ ਹਿ ਅਸੁਕਦਿਸਾਯ ਨਾਮ ਨਿਬ੍ਬਾਨਂ ਨਤ੍ਥੀਤਿ ਨ ਵਤ੍ਤਬ੍ਬਂ. ਅਥ ਵਾ ਪਭਨ੍ਤਿ ਤਿਤ੍ਥਸ੍ਸ ਨਾਮਂ, ਸਬ੍ਬਤੋ ਪਭਮਸ੍ਸਾਤਿ ਸਬ੍ਬਤੋਪਭਂ. ਨਿਬ੍ਬਾਨਸ੍ਸ ਕਿਰ ਯਥਾ ਮਹਾਸਮੁਦ੍ਦਸ੍ਸ ਯਤੋ ਯਤੋ ਓਤਰਿਤੁਕਾਮਾ ਹੋਨ੍ਤਿ, ਤਂ ਤਦੇਵ ਤਿਤ੍ਥਂ, ਅਤਿਤ੍ਥਂ ਨਾਮ ਨਤ੍ਥਿ. ਏਵਮੇਵਂ ਅਟ੍ਠਤਿਂਸਾਯ ਕਮ੍ਮਟ੍ਠਾਨੇਸੁ ਯੇਨ ਯੇਨ ਮੁਖੇਨ ਨਿਬ੍ਬਾਨਂ ਓਤਰਿਤੁਕਾਮਾ ਹੋਨ੍ਤਿ, ਤਂ ਤਦੇਵ ਤਿਤ੍ਥਂ. ਨਿਬ੍ਬਾਨਸ੍ਸ ਅਤਿਤ੍ਥਂ ਨਾਮ ਕਮ੍ਮਟ੍ਠਾਨਂ ਨਤ੍ਥਿ. ਤੇਨ ਵੁਤ੍ਤਂ ਸਬ੍ਬਤੋਪਭਨ੍ਤਿ. ਤਂ ਪਥਵਿਯਾ ਪਥਵਤ੍ਤੇਨਾਤਿ ਤਂ ਨਿਬ੍ਬਾਨਂ ਪਥਵਿਯਾ ਪਥਵੀਸਭਾਵੇਨ ਤਤੋ ਪਰੇਸਂ ਆਪਾਦੀਨਂ ਆਪਾਦਿਸਭਾਵੇਨ ਚ ਅਨਨੁਭੂਤਂ. ਇਤਿ ਯਂ ਤੁਮ੍ਹਾਦਿਸਾਨਂ ਵਿਸਯਭੂਤਂ ਸਬ੍ਬਤੇਭੂਮਕਧਮ੍ਮਜਾਤਂ ਤਸ੍ਸ ਸਬ੍ਬਤ੍ਤੇਨ ਤਂ ਵਿਞ੍ਞਾਣਂ ਅਨਿਦਸ੍ਸਨਂ ਅਨਨ੍ਤਂ ਸਬ੍ਬਤੋਪਤਂ ਅਨਨੁਭੂਤਨ੍ਤਿ ਵਾਦਂ ਪਤਿਟ੍ਠਪੇਸਿ.

ਤਤੋ ਬ੍ਰਹ੍ਮਾ ਗਹਿਤਗਹਿਤਂ ਸਤ੍ਥਾਰਾ ਵਿਸ੍ਸਜ੍ਜਾਪਿਤੋ ਕਿਞ੍ਚਿ ਗਹੇਤਬ੍ਬਂ ਅਦਿਸ੍ਵਾ ਲਲ਼ਿਤਕਂ ਕਾਤੁਕਾਮੋ ਹਨ੍ਦ ਚਰਹਿ ਤੇ, ਮਾਰਿਸ, ਅਨ੍ਤਰਧਾਯਾਮੀਤਿ ਆਹ. ਤਤ੍ਥ ਅਨ੍ਤਰਧਾਯਾਮੀਤਿ ਅਦਿਸ੍ਸਮਾਨਕਪਾਟਿਹਾਰਿਯਂ ਕਰੋਮੀਤਿ ਆਹ. ਸਚੇ ਵਿਸਹਸੀਤਿ ਯਦਿ ਸਕ੍ਕੋਸਿ ਮਯ੍ਹਂ ਅਨ੍ਤਰਧਾਯਿਤੁਂ, ਅਨ੍ਤਰਧਾਯਸਿ, ਪਾਟਿਹਾਰਿਯਂ ਕਰੋਹੀਤਿ. ਨੇਵਸ੍ਸੁ ਮੇ ਸਕ੍ਕੋਤਿ ਅਨ੍ਤਰਧਾਯਿਤੁਨ੍ਤਿ ਮਯ੍ਹਂ ਅਨ੍ਤਰਧਾਯਿਤੁਂ ਨੇਵ ਸਕ੍ਕੋਤਿ. ਕਿਂ ਪਨੇਸ ਕਾਤੁਕਾਮੋ ਅਹੋਸੀਤਿ? ਮੂਲਪਟਿਸਨ੍ਧਿਂ ਗਨ੍ਤੁਕਾਮੋ ਅਹੋਸਿ. ਬ੍ਰਹ੍ਮਾਨਞ੍ਹਿ ਮੂਲਪਟਿਸਨ੍ਧਿਕਅਤ੍ਤਭਾਵੋ ਸੁਖੁਮੋ, ਅਞ੍ਞੇਸਂ ਅਨਾਪਾਥੋ, ਅਭਿਸਙ੍ਖਤਕਾਯੇਨੇਵ ਤਿਟ੍ਠਨ੍ਤਿ. ਸਤ੍ਥਾ ਤਸ੍ਸ ਮੂਲਪਟਿਸਨ੍ਧਿਂ ਗਨ੍ਤੁਂ ਨ ਅਦਾਸਿ. ਮੂਲਪਟਿਸਨ੍ਧਿਂ ਵਾ ਅਗਨ੍ਤ੍ਵਾਪਿ ਯੇਨ ਤਮੇਨ ਅਤ੍ਤਾਨਂ ਅਨ੍ਤਰਧਾਪੇਤ੍ਵਾ ਅਦਿਸ੍ਸਮਾਨਕੋ ਭਵੇਯ੍ਯ, ਸਤ੍ਥਾ ਤਂ ਤਮਂ ਵਿਨੋਦੇਸਿ, ਤਸ੍ਮਾ ਅਨ੍ਤਰਧਾਯਿਤੁਂ ਨਾਸਕ੍ਖਿ. ਸੋ ਅਸਕ੍ਕੋਨ੍ਤੋ ਵਿਮਾਨੇ ਨਿਲੀਯਤਿ, ਕਪ੍ਪਰੁਕ੍ਖੇ ਨਿਲੀਯਤਿ, ਉਕ੍ਕੁਟਿਕੋ ਨਿਸੀਦਤਿ. ਬ੍ਰਹ੍ਮਗਣੋ ਕੇਲ਼ਿਮਕਾਸਿ – ‘‘ਏਸ ਖੋ ਬਕੋ ਬ੍ਰਹ੍ਮਾ ਵਿਮਾਨੇ ਨਿਲੀਯਤਿ, ਕਪ੍ਪਰੁਕ੍ਖੇ ਨਿਲੀਯਤਿ, ਉਕ੍ਕੁਟਿਕੋ ਨਿਸੀਦਤਿ, ਬ੍ਰਹ੍ਮੇ ਤ੍ਵਂ ਅਨ੍ਤਰਹਿਤੋਮ੍ਹੀ’’ਤਿ ਸਞ੍ਞਂ ਉਪ੍ਪਾਦੇਸਿ ਨਾਮਾਤਿ. ਸੋ ਬ੍ਰਹ੍ਮਗਣੇਨ ਉਪ੍ਪਣ੍ਡਿਤੋ ਮਙ੍ਕੁ ਅਹੋਸਿ.

ਏਵਂ ਵੁਤ੍ਤੇ ਅਹਂ, ਭਿਕ੍ਖਵੇਤਿ, ਭਿਕ੍ਖਵੇ, ਏਤੇਨ ਬ੍ਰਹ੍ਮੁਨਾ, ‘‘ਹਨ੍ਦ ਚਰਹਿ ਤੇ, ਮਾਰਿਸ, ਅਨ੍ਤਰਧਾਯਾਮੀ’’ਤਿ ਏਵਂ ਵੁਤ੍ਤੇ ਤਂ ਅਨ੍ਤਰਧਾਯਿਤੁਂ ਅਸਕ੍ਕੋਨ੍ਤਂ ਦਿਸ੍ਵਾ ਅਹਂ ਏਤਦਵੋਚਂ. ਇਮਂ ਗਾਥਮਭਾਸਿਨ੍ਤਿ ਕਸ੍ਮਾ ਭਗਵਾ ਗਾਥਮਭਾਸੀਤਿ? ਸਮਣਸ੍ਸ ਗੋਤਮਸ੍ਸ ਇਮਸ੍ਮਿਂ ਠਾਨੇ ਅਤ੍ਥਿਭਾਵੋ ਵਾ ਨਤ੍ਥਿਭਾਵੋ ਵਾ ਕਥਂ ਸਕ੍ਕਾ ਜਾਨਿਤੁਨ੍ਤਿ ਏਵਂ ਬ੍ਰਹ੍ਮਗਣਸ੍ਸ ਵਚਨੋਕਾਸੋ ਮਾ ਹੋਤੂਤਿ ਅਨ੍ਤਰਹਿਤੋਵ ਗਾਥਮਭਾਸਿ.

ਤਤ੍ਥ ਭਵੇਵਾਹਂ ਭਯਂ ਦਿਸ੍ਵਾਤਿ ਅਹਂ ਭਵੇ ਭਯਂ ਦਿਸ੍ਵਾਯੇਵ. ਭਵਞ੍ਚ ਵਿਭਵੇਸਿਨਨ੍ਤਿ ਇਮਞ੍ਚ ਕਾਮਭਵਾਦਿਤਿਵਿਧਮ੍ਪਿ ਸਤ੍ਤਭਵਂ ਵਿਭਵੇਸਿਨਂ ਵਿਭਵਂ ਗਵੇਸਮਾਨਂ ਪਰਿਯੇਸਮਾਨਮ੍ਪਿ ਪੁਨਪ੍ਪੁਨਂ ਭਵੇਯੇਵ ਦਿਸ੍ਵਾ. ਭਵਂ ਨਾਭਿਵਦਿਨ੍ਤਿ ਤਣ੍ਹਾਦਿਟ੍ਠਿਵਸੇਨ ਕਿਞ੍ਚਿ ਭਵਂ ਨ ਅਭਿਵਦਿਂ, ਨ ਗਵੇਸਿਨ੍ਤਿ ਅਤ੍ਥੋ. ਨਨ੍ਦਿਞ੍ਚ ਨ ਉਪਾਦਿਯਿਨ੍ਤਿ ਭਵਤਣ੍ਹਂ ਨ ਉਪਗਞ੍ਛਿਂ, ਨ ਅਗ੍ਗਹੇਸਿਨ੍ਤਿ ਅਤ੍ਥੋ. ਇਤਿ ਚਤ੍ਤਾਰਿ ਸਚ੍ਚਾਨਿ ਪਕਾਸੇਨ੍ਤੋ ਸਤ੍ਥਾ ਧਮ੍ਮਂ ਦੇਸੇਸਿ. ਦੇਸਨਾਪਰਿਯੋਸਾਨੇ ਦੇਸਨਾਨੁਸਾਰੇਨ ਵਿਪਸ੍ਸਨਾਗਬ੍ਭਂ ਗਾਹਾਪੇਤ੍ਵਾ ਦਸਮਤ੍ਤਾਨਿ ਬ੍ਰਹ੍ਮਸਹਸ੍ਸਾਨਿ ਮਗ੍ਗਫਲਾਮਤਪਾਨਂ ਪਿਵਿਂਸੁ.

ਅਚ੍ਛਰਿਯਬ੍ਭੁਤਚਿਤ੍ਤਜਾਤਾਤਿ ਅਚ੍ਛਰਿਯਜਾਤਾ ਅਬ੍ਭੁਤਜਾਤਾ ਤੁਟ੍ਠਿਜਾਤਾ ਚ ਅਹੇਸੁਂ. ਸਮੂਲਂ ਭਵਂ ਉਦਬ੍ਬਹੀਤਿ ਬੋਧਿਮਣ੍ਡੇ ਅਤ੍ਤਨੋ ਤਾਯ ਤਾਯ ਦੇਸਨਾਯ ਅਞ੍ਞੇਸਮ੍ਪਿ ਬਹੂਨਂ ਦੇਵਮਨੁਸ੍ਸਾਨਂ ਸਮੂਲਕਂ ਭਵਂ ਉਦਬ੍ਬਹਿ, ਉਦ੍ਧਰਿ ਉਪ੍ਪਾਟੇਸੀਤਿ ਅਤ੍ਥੋ.

੫੦੫. ਤਸ੍ਮਿਂ ਪਨ ਸਮਯੇ ਮਾਰੋ ਪਾਪਿਮਾ ਕੋਧਾਭਿਭੂਤੋ ਹੁਤ੍ਵਾ, ‘‘ਮਯਿ ਵਿਚਰਨ੍ਤੇਯੇਵ ਸਮਣੇਨ ਗੋਤਮੇਨ ਧਮ੍ਮਕਥਂ ਕਥੇਤ੍ਵਾ ਦਸਮਤ੍ਤਾਨਿ ਬ੍ਰਹ੍ਮਸਹਸ੍ਸਾਨਿ ਮਮ ਵਸਂ ਅਤਿਵਤ੍ਤਿਤਾਨੀ’’ਤਿ ਕੋਧਾਭਿਭੂਤਤਾਯ ਅਞ੍ਞਤਰਸ੍ਸ ਬ੍ਰਹ੍ਮਪਾਰਿਸਜ੍ਜਸ੍ਸ ਸਰੀਰੇ ਅਧਿਮੁਚ੍ਚਿ, ਤਂ ਦਸ੍ਸੇਤੁਂ ਅਥ ਖੋ, ਭਿਕ੍ਖਵੇਤਿਆਦਿਮਾਹ. ਤਤ੍ਥ ਸਚੇ ਤ੍ਵਂ ਏਵਂ ਅਨੁਬੁਦ੍ਧੋਤਿ ਸਚੇ ਤ੍ਵਂ ਏਵਂ ਅਤ੍ਤਨਾਵ ਚਤ੍ਤਾਰਿ ਸਚ੍ਚਾਨਿ ਅਨੁਬੁਦ੍ਧੋ. ਮਾ ਸਾਵਕੇ ਉਪਨੇਸੀਤਿ ਗਿਹਿਸਾਵਕੇ ਵਾ ਪਬ੍ਬਜਿਤਸਾਵਕੇ ਵਾ ਤਂ ਧਮ੍ਮਂ ਮਾ ਉਪਨਯਸਿ. ਹੀਨੇ ਕਾਯੇ ਪਤਿਟ੍ਠਿਤਾਤਿ ਚਤੂਸੁ ਅਪਾਯੇਸੁ ਪਤਿਟ੍ਠਿਤਾ. ਪਣੀਤੇ ਕਾਯੇ ਪਤਿਟ੍ਠਿਤਾਤਿ ਬ੍ਰਹ੍ਮਲੋਕੇ ਪਤਿਟ੍ਠਿਤਾ. ਇਦਂ ਕੇ ਸਨ੍ਧਾਯ ਵਦਤਿ? ਬਾਹਿਰਪਬ੍ਬਜ੍ਜਂ ਪਬ੍ਬਜਿਤੇ ਤਾਪਸਪਰਿਬ੍ਬਾਜਕੇ. ਅਨੁਪ੍ਪਨ੍ਨੇ ਹਿ ਬੁਦ੍ਧੁਪ੍ਪਾਦੇ ਕੁਲਪੁਤ੍ਤਾ ਤਾਪਸਪਬ੍ਬਜ੍ਜਂ ਪਬ੍ਬਜਿਤ੍ਵਾ ਕਸ੍ਸਚਿ ਕਿਞ੍ਚਿ ਅਵਿਚਾਰੇਤ੍ਵਾ ਏਕਚਰਾ ਹੁਤ੍ਵਾ ਸਮਾਪਤ੍ਤਿਯੋ ਨਿਬ੍ਬਤ੍ਤੇਤ੍ਵਾ ਬ੍ਰਹ੍ਮਲੋਕੇ ਉਪ੍ਪਜ੍ਜਿਂਸੁ, ਤੇ ਸਨ੍ਧਾਯ ਏਵਮਾਹ. ਅਨਕ੍ਖਾਤਂ ਕੁਸਲਞ੍ਹਿ ਮਾਰਿਸਾਤਿ ਪਰੇਸਂ ਅਨਕ੍ਖਾਤਂ ਅਨੋਵਦਨਂ ਧਮ੍ਮਕਥਾਯ ਅਕਥਨਂ ਕੁਸਲਂ ਏਤਂ ਸੇਯ੍ਯੋ. ਮਾ ਪਰਂ ਓਵਦਾਹੀਤਿ ਕਾਲੇਨ ਮਨੁਸ੍ਸਲੋਕਂ, ਕਾਲੇਨ ਦੇਵਲੋਕਂ, ਕਾਲੇਨ ਬ੍ਰਹ੍ਮਲੋਕਂ, ਕਾਲੇਨ ਨਾਗਲੋਕਂ ਆਹਿਣ੍ਡਨ੍ਤੋ ਮਾ ਵਿਚਰਿ, ਏਕਸ੍ਮਿਂ ਠਾਨੇ ਨਿਸਿਨ੍ਨੋ ਝਾਨਮਗ੍ਗਫਲਸੁਖੇਨ ਵੀਤਿਨਾਮੇਹੀਤਿ. ਅਨਾਲਪਨਤਾਯਾਤਿ ਅਨੁਲ੍ਲਪਨਤਾਯ. ਬ੍ਰਹ੍ਮੁਨੋ ਚ ਅਭਿਨਿਮਨ੍ਤਨਤਾਯਾਤਿ ਬਕਬ੍ਰਹ੍ਮੁਨੋ ਚ ਇਦਞ੍ਹਿ, ਮਾਰਿਸ, ਨਿਚ੍ਚਨ੍ਤਿਆਦਿਨਾ ਨਯੇਨ ਸਹ ਕਾਯਕੇਨ ਬ੍ਰਹ੍ਮਟ੍ਠਾਨੇਨ ਨਿਮਨ੍ਤਨਵਚਨੇਨ. ਤਸ੍ਮਾਤਿ ਤੇਨ ਕਾਰਣੇਨ. ਇਮਸ੍ਸ ਵੇਯ੍ਯਾਕਰਣਸ੍ਸ ਬ੍ਰਹ੍ਮਨਿਮਨ੍ਤਨਿਕਂਤ੍ਵੇਵ ਅਧਿਵਚਨਂ ਸਙ੍ਖਾ ਸਮਞ੍ਞਾ ਪਞ੍ਞਤ੍ਤਿ ਜਾਤਾ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਬ੍ਰਹ੍ਮਨਿਮਨ੍ਤਨਿਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.