੧੦. ਮਾਰਤਜ੍ਜਨੀਯਸੁਤ੍ਤਵਣ੍ਣਨਾ

੫੦੬. ਏਵਂ ਮੇ ਸੁਤਨ੍ਤਿ ਮਾਰਤਜ੍ਜਨੀਯਸੁਤ੍ਤਂ. ਤਤ੍ਥ ਕੋਟ੍ਠਮਨੁਪਵਿਟ੍ਠੋਤਿ ਕੁਚ੍ਛਿਂ ਪਵਿਸਿਤ੍ਵਾ ਅਨ੍ਤਾਨਂ ਅਨ੍ਤੋ ਅਨੁਪਵਿਟ੍ਠੋ, ਪਕ੍ਕਾਸਯਟ੍ਠਾਨੇ ਨਿਸਿਨ੍ਨੋ. ਗਰੁਗਰੋ ਵਿਯਾਤਿ ਗਰੁਕਗਰੁਕੋ ਵਿਯ ਥਦ੍ਧੋ ਪਾਸਾਣਪੁਞ੍ਜਸਦਿਸੋ. ਮਾਸਾਚਿਤਂ ਮਞ੍ਞੇਤਿ ਮਾਸਭਤ੍ਤਂ ਭੁਤ੍ਤਸ੍ਸ ਕੁਚ੍ਛਿ ਵਿਯ ਮਾਸਪੂਰਿਤਪਸਿਬ੍ਬਕੋ ਵਿਯ ਤਿਨ੍ਤਮਾਸੋ ਵਿਯ ਚਾਤਿ ਅਤ੍ਥੋ. ਵਿਹਾਰਂ ਪਵਿਸਿਤ੍ਵਾਤਿ ਸਚੇ ਆਹਾਰਦੋਸੇਨ ਏਸ ਗਰੁਭਾਵੋ, ਅਬ੍ਭੋਕਾਸੇ ਚਙ੍ਕਮਿਤੁਂ ਨ ਸਪ੍ਪਾਯਨ੍ਤਿ ਚਙ੍ਕਮਾ ਓਰੋਹਿਤ੍ਵਾ ਪਣ੍ਣਸਾਲਂ ਪਵਿਸਿਤ੍ਵਾ ਪਕਤਿਪਞ੍ਞਤ੍ਤੇ ਆਸਨੇ ਨਿਸੀਦਿ. ਪਚ੍ਚਤ੍ਤਂ ਯੋਨਿਸੋ ਮਨਸਾਕਾਸੀਤਿ, ‘‘ਕਿਂ ਨੁ ਖੋ ਏਤ’’ਨ੍ਤਿ ਆਵਜ੍ਜਮਾਨੋ ਅਤ੍ਤਨੋਯੇਵ ਉਪਾਯੇਨ ਮਨਸਿ ਅਕਾਸਿ. ਸਚੇ ਪਨ ਥੇਰੋ ਅਤ੍ਤਨੋ ਸੀਲਂ ਆਵਜ੍ਜੇਤ੍ਵਾ, ‘‘ਯਂ ਹਿਯ੍ਯੋ ਵਾ ਪਰੇ ਵਾ ਪਰਸੁਵੇ ਵਾ ਪਰਿਭੁਤ੍ਤਂ ਅਵਿਪਕ੍ਕਮਤ੍ਥਿ, ਅਞ੍ਞੋ ਵਾ ਕੋਚਿ ਵਿਸਭਾਗਦੋਸੋ, ਸਬ੍ਬਂ ਜੀਰਤੁ ਫਾਸੁਕਂ ਹੋਤੂ’’ਤਿ ਹਤ੍ਥੇਨ ਕੁਚ੍ਛਿਂ ਪਰਾਮਸਿਸ੍ਸ, ਮਾਰੋ ਪਾਪਿਮਾ ਵਿਲੀਯਿਤ੍ਵਾ ਅਗਮਿਸ੍ਸ. ਥੇਰੋ ਪਨ ਤਥਾ ਅਕਤ੍ਵਾ ਯੋਨਿਸੋ ਮਨਸਿ ਅਕਾਸਿ. ਮਾ ਤਥਾਗਤਂ ਵਿਹੇਸੇਸੀਤਿ ਯਥਾ ਹਿ ਪੁਤ੍ਤੇਸੁ ਵਿਹੇਸਿਤੇਸੁ ਮਾਤਾਪਿਤਰੋ ਵਿਹੇਸਿਤਾਵ ਹੋਨ੍ਤਿ, ਸਦ੍ਧਿਵਿਹਾਰਿਕਅਨ੍ਤੇਵਾਸਿਕੇਸੁ ਵਿਹੇਸਿਤੇਸੁ ਆਚਰਿਯੁਪਜ੍ਝਾਯਾ ਵਿਹੇਸਿਤਾਵ, ਜਨਪਦੇ ਵਿਹੇਸਿਤੇ ਰਾਜਾ ਵਿਹੇਸਿਤੋਵ ਹੋਤਿ, ਏਵਂ ਤਥਾਗਤਸਾਵਕੇ ਵਿਹੇਸਿਤੇ ਤਥਾਗਤੋ ਵਿਹੇਸਿਤੋਵ ਹੋਤਿ. ਤੇਨਾਹ – ‘‘ਮਾ ਤਥਾਗਤਂ ਵਿਹੇਸੇਸੀ’’ਤਿ.

ਪਚ੍ਚਗ੍ਗਲ਼ੇ ਅਟ੍ਠਾਸੀਤਿ ਪਤਿਅਗ੍ਗਲ਼ੇਵ ਅਟ੍ਠਾਸਿ. ਅਗ੍ਗਲ਼ਂ ਵੁਚ੍ਚਤਿ ਕਵਾਟਂ, ਮੁਖੇਨ ਉਗ੍ਗਨ੍ਤ੍ਵਾ ਪਣ੍ਣਸਾਲਤੋ ਨਿਕ੍ਖਮਿਤ੍ਵਾ ਬਹਿਪਣ੍ਣਸਾਲਾਯ ਕਵਾਟਂ ਨਿਸ੍ਸਾਯ ਅਟ੍ਠਾਸੀਤਿ ਅਤ੍ਥੋ.

੫੦੭. ਭੂਤਪੁਬ੍ਬਾਹਂ ਪਾਪਿਮਾਤਿ ਕਸ੍ਮਾ ਇਦਂ ਦੇਸਨਂ ਆਰਭਿ? ਥੇਰੋ ਕਿਰ ਚਿਨ੍ਤੇਸਿ – ‘‘ਆਕਾਸਟ੍ਠਕਦੇਵਤਾਨਂ ਤਾਵ ਮਨੁਸ੍ਸਗਨ੍ਧੋ ਯੋਜਨਸਤੇ ਠਿਤਾਨਂ ਆਬਾਧਂ ਕਰੋਤਿ. ਵੁਤ੍ਤਞ੍ਹੇਤਂ – ‘ਯੋਜਨਸਤਂ ਖੋ ਰਾਜਞ੍ਞ ਮਨੁਸ੍ਸਗਨ੍ਧੋ ਦੇਵੇ ਉਬ੍ਬਾਧਤੀ’ਤਿ (ਦੀ. ਨਿ. ੨.੪੧੫). ਅਯਂ ਪਨ ਮਾਰੋ ਨਾਗਰਿਕੋ ਪਰਿਚੋਕ੍ਖੋ ਮਹੇਸਕ੍ਖੋ ਆਨੁਭਾਵਸਮ੍ਪਨ੍ਨੋ ਦੇਵਰਾਜਾ ਸਮਾਨੋ ਮਮ ਕੁਚ੍ਛਿਯਂ ਪਵਿਸਿਤ੍ਵਾ ਅਨ੍ਤਾਨਂ ਅਨ੍ਤੋ ਪਕ੍ਕਾਸਯੋਕਾਸੇ ਨਿਸਿਨ੍ਨੋ ਅਤਿਵਿਯ ਪਦੁਟ੍ਠੋ ਭਵਿਸ੍ਸਤਿ. ਏਵਰੂਪਂ ਨਾਮ ਜੇਗੁਚ੍ਛਂ ਪਟਿਕੂਲਂ ਓਕਾਸਂ ਪਵਿਸਿਤ੍ਵਾ ਨਿਸੀਦਿਤੁਂ ਸਕ੍ਕੋਨ੍ਤਸ੍ਸ ਕਿਮਞ੍ਞਂ ਅਕਰਣੀਯਂ ਭਵਿਸ੍ਸਤਿ, ਕਿਂ ਅਞ੍ਞਂ ਲਜ੍ਜਿਸ੍ਸਤਿ, ਤ੍ਵਂ ਮਮ ਞਾਤਿਕੋਤਿ ਪਨ ਵੁਤ੍ਤੇ ਮੁਦੁਭਾਵਂ ਅਨਾਪਜ੍ਜਮਾਨੋ ਨਾਮ ਨਤ੍ਥਿ, ਹਨ੍ਦਸ੍ਸ ਞਾਤਿਕੋਟਿਂ ਪਟਿਵਿਜ੍ਝਿਤ੍ਵਾ ਮੁਦੁਕੇਨੇਵ ਨਂ ਉਪਾਯੇਨ ਵਿਸ੍ਸਜ੍ਜੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਇਮਂ ਦੇਸਨਮਾਰਭਿ.

ਸੋ ਮੇ ਤ੍ਵਂ ਭਾਗਿਨੇਯ੍ਯੋ ਹੋਸੀਤਿ ਸੋ ਤ੍ਵਂ ਤਸ੍ਮਿਂ ਕਾਲੇ ਮਯ੍ਹਂ ਭਾਗਿਨੇਯ੍ਯੋ ਹੋਸਿ. ਇਦਂ ਪਵੇਣਿਵਸੇਨ ਵੁਤ੍ਤਂ. ਦੇਵਲੋਕਸ੍ਮਿਂ ਪਨ ਮਾਰਸ੍ਸ ਪਿਤੁ ਵਂਸੋ ਪਿਤਾਮਹਸ੍ਸ ਵਂਸੋ ਰਜ੍ਜਂ ਕਰੋਨ੍ਤੋ ਨਾਮ ਨਤ੍ਥਿ, ਪੁਞ੍ਞਵਸੇਨ ਦੇਵਲੋਕੇ ਦੇਵਰਾਜਾ ਹੁਤ੍ਵਾ ਨਿਬ੍ਬਤ੍ਤੋ, ਯਾਵਤਾਯੁਕਂ ਠਤ੍ਵਾ ਚਵਤਿ. ਅਞ੍ਞੋ ਏਕੋ ਅਤ੍ਤਨਾ ਕਤੇਨ ਕਮ੍ਮੇਨ ਤਸ੍ਮਿਂ ਠਾਨੇ ਅਧਿਪਤਿ ਹੁਤ੍ਵਾ ਨਿਬ੍ਬਤ੍ਤਤਿ. ਇਤਿ ਅਯਂ ਮਾਰੋਪਿ ਤਦਾ ਤਤੋ ਚਵਿਤ੍ਵਾ ਪੁਨ ਕੁਸਲਂ ਕਤ੍ਵਾ ਇਮਸ੍ਮਿਂ ਕਾਲੇ ਤਸ੍ਮਿਂ ਅਧਿਪਤਿਟ੍ਠਾਨੇ ਨਿਬ੍ਬਤ੍ਤੋਤਿ ਵੇਦਿਤਬ੍ਬੋ.

ਵਿਧੁਰੋਤਿ ਵਿਗਤਧੁਰੋ, ਅਞ੍ਞੇਹਿ ਸਦ੍ਧਿਂ ਅਸਦਿਸੋਤਿ ਅਤ੍ਥੋ. ਅਪ੍ਪਕਸਿਰੇਨਾਤਿ ਅਪ੍ਪਦੁਕ੍ਖੇਨ. ਪਸੁਪਾਲਕਾਤਿ ਅਜੇਲ਼ਕਪਾਲਕਾ. ਪਥਾਵਿਨੋਤਿ ਮਗ੍ਗਪਟਿਪਨ੍ਨਾ. ਕਾਯੇ ਉਪਚਿਨਿਤ੍ਵਾਤਿ ਸਮਨ੍ਤਤੋ ਚਿਤਕਂ ਬਨ੍ਧਿਤ੍ਵਾ. ਅਗ੍ਗਿਂ ਦਤ੍ਵਾ ਪਕ੍ਕਮਿਂਸੂਤਿ ਏਤ੍ਤਕੇਨ ਸਰੀਰਂ ਪਰਿਯਾਦਾਨਂ ਗਮਿਸ੍ਸਤੀਤਿ ਚਿਤਕਸ੍ਸ ਪਮਾਣਂ ਸਲ੍ਲਕ੍ਖੇਤ੍ਵਾ ਚਤੂਸੁ ਦਿਸਾਸੁ ਅਗ੍ਗਿਂ ਦਤ੍ਵਾ ਪਕ੍ਕਮਿਂਸੁ. ਚਿਤਕੋ ਪਦੀਪਸਿਖਾ ਵਿਯ ਪਜ੍ਜਲਿ, ਥੇਰਸ੍ਸ ਉਦਕਲੇਣਂ ਪਵਿਸਿਤ੍ਵਾ ਨਿਸਿਨ੍ਨਕਾਲੋ ਵਿਯ ਅਹੋਸਿ. ਚੀਵਰਾਨਿ ਪਪ੍ਫੋਟੇਤ੍ਵਾਤਿ ਸਮਾਪਤ੍ਤਿਤੋ ਵੁਟ੍ਠਾਯ ਵਿਗਤਧੂਮੇ ਕਿਂਸੁਕਵਣ੍ਣੇ ਅਙ੍ਗਾਰੇ ਮਦ੍ਦਮਾਨੋ ਚੀਵਰਾਨਿ ਵਿਧੁਨਿਤ੍ਵਾ. ਸਰੀਰੇ ਪਨਸ੍ਸ ਉਸੁਮਮਤ੍ਤਮ੍ਪਿ ਨਾਹੋਸਿ, ਚੀਵਰੇਸੁ ਅਂਸੁਮਤ੍ਤਮ੍ਪਿ ਨਜ੍ਝਾਯਿ, ਸਮਾਪਤ੍ਤਿਫਲਂ ਨਾਮੇਤਂ.

੫੦੮. ਅਕ੍ਕੋਸਥਾਤਿ ਦਸਹਿ ਅਕ੍ਕੋਸਵਤ੍ਥੂਹਿ ਅਕ੍ਕੋਸਥ. ਪਰਿਭਾਸਥਾਤਿ ਵਾਚਾਯ ਪਰਿਭਾਸਥ. ਰੋਸੇਥਾਤਿ ਘਟ੍ਟੇਥ. ਵਿਹੇਸੇਥਾਤਿ ਦੁਕ੍ਖਾਪੇਥ. ਸਬ੍ਬਮੇਤਂ ਵਾਚਾਯ ਘਟ੍ਟਨਸ੍ਸੇਵ ਅਧਿਵਚਨਂ. ਯਥਾ ਤਂ ਦੂਸੀ ਮਾਰੋਤਿ ਯਥਾ ਏਤੇਸਂ ਦੂਸੀ ਮਾਰੋ. ਲਭੇਥ ਓਤਾਰਨ੍ਤਿ ਲਭੇਥ ਛਿਦ੍ਦਂ, ਕਿਲੇਸੁਪ੍ਪਤ੍ਤਿਯਾ ਆਰਮ੍ਮਣਂ ਪਚ੍ਚਯਂ ਲਭੇਯ੍ਯਾਤਿ ਅਤ੍ਥੋ. ਮੁਣ੍ਡਕਾਤਿਆਦੀਸੁ ਮੁਣ੍ਡੇ ਮੁਣ੍ਡਾਤਿ ਸਮਣੇ ਚ ਸਮਣਾਤਿ ਵਤ੍ਤੁਂ ਵਟ੍ਟੇਯ੍ਯ, ਇਮੇ ਪਨ ਹੀਲ਼ੇਨ੍ਤਾ ਮੁਣ੍ਡਕਾ ਸਮਣਕਾਤਿ ਆਹਂਸੁ. ਇਬ੍ਭਾਤਿ ਗਹਪਤਿਕਾ. ਕਿਣ੍ਹਾਤਿ ਕਣ੍ਹਾ, ਕਾਲ਼ਕਾਤਿ ਅਤ੍ਥੋ. ਬਨ੍ਧੁਪਾਦਾਪਚ੍ਚਾਤਿ ਏਤ੍ਥ ਬਨ੍ਧੂਤਿ ਬ੍ਰਹ੍ਮਾ ਅਧਿਪ੍ਪੇਤੋ. ਤਞ੍ਹਿ ਬ੍ਰਾਹ੍ਮਣਾ ਪਿਤਾਮਹੋਤਿ ਵੋਹਰਨ੍ਤਿ. ਪਾਦਾਨਂ ਅਪਚ੍ਚਾ ਪਾਦਾਪਚ੍ਚਾ, ਬ੍ਰਹ੍ਮੁਨੋ ਪਿਟ੍ਠਿਪਾਦਤੋ ਜਾਤਾਤਿ ਅਧਿਪ੍ਪਾਯੋ. ਤੇਸਂ ਕਿਰ ਅਯਂ ਲਦ੍ਧਿ – ‘‘ਬ੍ਰਾਹ੍ਮਣਾ ਬ੍ਰਹ੍ਮੁਨੋ ਮੁਖਤੋ ਨਿਕ੍ਖਨ੍ਤਾ, ਖਤ੍ਤਿਯਾ ਉਰਤੋ, ਵੇਸ੍ਸਾ ਨਾਭਿਤੋ, ਸੁਦ੍ਦਾ ਜਾਣੁਤੋ, ਸਮਣਾ ਪਿਟ੍ਠਿਪਾਦਤੋ’’ਤਿ.

ਝਾਯਿਨੋਸ੍ਮਾ ਝਾਯਿਨੋਸ੍ਮਾਤਿ ਝਾਯਿਨੋ ਮਯਂ ਝਾਯਿਨੋ ਮਯਨ੍ਤਿ. ਮਧੁਰਕਜਾਤਾਤਿ ਆਲਸਿਯਜਾਤਾ. ਝਾਯਨ੍ਤੀਤਿ ਚਿਨ੍ਤਯਨ੍ਤਿ. ਪਜ੍ਝਾਯਨ੍ਤੀਤਿਆਦੀਨਿ ਉਪਸਗ੍ਗਵਸੇਨ ਵਡ੍ਢਿਤਾਨਿ. ਮੂਸਿਕਂ ਮਗ੍ਗਯਮਾਨੋਤਿ ਸਾਯਂ ਗੋਚਰਤ੍ਥਾਯ ਸੁਸਿਰਰੁਕ੍ਖਤੋ ਨਿਕ੍ਖਨ੍ਤਂ ਰੁਕ੍ਖਸਾਖਾਯ ਮੂਸਿਕਂ ਪਰਿਯੇਸਨ੍ਤੋ. ਸੋ ਕਿਰ ਉਪਸਨ੍ਤੂਪਸਨ੍ਤੋ ਵਿਯ ਨਿਚ੍ਚਲੋਵ ਤਿਟ੍ਠਤਿ, ਸਮ੍ਪਤ੍ਤਕਾਲੇ ਮੂਸਿਕਂ ਸਹਸਾ ਗਣ੍ਹਾਤਿ. ਕੋਤ੍ਥੂਤਿ ਸਿਙ੍ਗਾਲੋ, ਸੋਣੋਤਿਪਿ ਵਦਨ੍ਤਿ. ਸਨ੍ਧਿਸਮਲਸਙ੍ਕਟਿਰੇਤਿ ਸਨ੍ਧਿਮ੍ਹਿ ਚ ਸਮਲੇ ਚ ਸਙ੍ਕਟਿਰੇ ਚ. ਤਤ੍ਥ ਸਨ੍ਧਿ ਨਾਮ ਘਰਸਨ੍ਧਿ. ਸਮਲੋ ਨਾਮ ਗੂਥਨਿਦ੍ਧਮਨਪਨਾਲ਼ਿ. ਸਙ੍ਕਟਿਰਂ ਨਾਮ ਸਙ੍ਕਾਰਟ੍ਠਾਨਂ. ਵਹਚ੍ਛਿਨ੍ਨੋਤਿ ਕਨ੍ਤਾਰਤੋ ਨਿਕ੍ਖਨ੍ਤੋ ਛਿਨ੍ਨਵਹੋ. ਸਨ੍ਧਿਸਮਲਸਙ੍ਕਟਿਰੇਤਿ ਸਨ੍ਧਿਮ੍ਹਿ ਵਾ ਸਮਲੇ ਵਾ ਸਙ੍ਕਟਿਰੇ ਵਾ. ਸੋਪਿ ਹਿ ਬਦ੍ਧਗਤ੍ਤੋ ਵਿਯ ਨਿਚ੍ਚਲੋ ਝਾਯਤਿ.

ਨਿਰਯਂ ਉਪਪਜ੍ਜਨ੍ਤੀਤਿ ਸਚੇ ਮਾਰੋ ਮਨੁਸ੍ਸਾਨਂ ਸਰੀਰੇ ਅਧਿਮੁਚ੍ਚਿਤ੍ਵਾ ਏਵਂ ਕਰੇਯ੍ਯ, ਮਨੁਸ੍ਸਾਨਂ ਅਕੁਸਲਂ ਨ ਭਵੇਯ੍ਯ, ਮਾਰਸ੍ਸੇਵ ਭਵੇਯ੍ਯ. ਸਰੀਰੇ ਪਨ ਅਨਧਿਮੁਚ੍ਚਿਤ੍ਵਾ ਵਿਸਭਾਗਵਤ੍ਥੁਂ ਵਿਪ੍ਪਟਿਸਾਰਾਰਮ੍ਮਣਂ ਦਸ੍ਸੇਤਿ, ਤਦਾ ਕਿਰ ਸੋ ਭਿਕ੍ਖੂ ਖਿਪ੍ਪਂ ਗਹੇਤ੍ਵਾ ਮਚ੍ਛੇ ਅਜ੍ਝੋਤ੍ਥਰਨ੍ਤੇ ਵਿਯ, ਜਾਲਂ ਗਹੇਤ੍ਵਾ ਮਚ੍ਛੇ ਗਣ੍ਹਨ੍ਤੇ ਵਿਯ, ਲੇਪਯਟ੍ਠਿਂ ਓਡ੍ਡੇਤ੍ਵਾ ਸਕੁਣੇ ਬਨ੍ਧਨ੍ਤੇ ਵਿਯ, ਸੁਨਖੇਹਿ ਸਦ੍ਧਿਂ ਅਰਞ੍ਞੇ ਮਿਗਵਂ ਚਰਨ੍ਤੇ ਵਿਯ, ਮਾਤੁਗਾਮੇ ਗਹੇਤ੍ਵਾ ਆਪਾਨਭੂਮਿਯਂ ਨਿਸਿਨ੍ਨੇ ਵਿਯ, ਨਚ੍ਚਨ੍ਤੇ ਵਿਯ, ਗਾਯਨ੍ਤੇ ਵਿਯ, ਭਿਕ੍ਖੁਨੀਨਂ ਰਤ੍ਤਿਟ੍ਠਾਨਦਿਵਾਟ੍ਠਾਨੇਸੁ ਵਿਸਭਾਗਮਨੁਸ੍ਸੇ ਨਿਸਿਨ੍ਨੇ ਵਿਯ, ਠਿਤੇ ਵਿਯ ਚ ਕਤ੍ਵਾ ਦਸ੍ਸੇਸਿ. ਮਨੁਸ੍ਸਾ ਅਰਞ੍ਞਗਤਾਪਿ ਵਨਗਤਾਪਿ ਵਿਹਾਰਗਤਾਪਿ ਵਿਪ੍ਪਟਿਸਾਰਾਰਮ੍ਮਣਂ ਪਸ੍ਸਿਤ੍ਵਾ ਆਗਨ੍ਤ੍ਵਾ ਅਞ੍ਞੇਸਂ ਕਥੇਨ੍ਤਿ – ‘‘ਸਮਣਾ ਏਵਰੂਪਂ ਅਸ੍ਸਮਣਕਂ ਅਨਨੁਚ੍ਛਵਿਕਂ ਕਰੋਨ੍ਤਿ, ਏਤੇਸਂ ਦਿਨ੍ਨੇ ਕੁਤੋ ਕੁਸਲਂ, ਮਾ ਏਤੇਸਂ ਕਿਞ੍ਚਿ ਅਦਤ੍ਥਾ’’ਤਿ. ਏਵਂ ਤੇ ਮਨੁਸ੍ਸਾ ਦਿਟ੍ਠਦਿਟ੍ਠਟ੍ਠਾਨੇ ਸੀਲਵਨ੍ਤੇ ਅਕ੍ਕੋਸਨ੍ਤਾ ਅਪੁਞ੍ਞਂ ਪਸਵਿਤ੍ਵਾ ਅਪਾਯਪੂਰਕਾ ਅਹੇਸੁਂ. ਤੇਨ ਵੁਤ੍ਤਂ ‘‘ਨਿਰਯਂ ਉਪਪਜ੍ਜਨ੍ਤੀ’’ਤਿ.

੫੦੯. ਅਨ੍ਵਾਵਿਟ੍ਠਾਤਿ ਆਵਟ੍ਟਿਤਾ. ਫਰਿਤ੍ਵਾ ਵਿਹਰਿਂਸੂਤਿ ਨ ਕੇਵਲਂ ਫਰਿਤ੍ਵਾ ਵਿਹਰਿਂਸੁ. ਕਕੁਸਨ੍ਧਸ੍ਸ ਪਨ ਭਗਵਤੋ ਓਵਾਦੇ ਠਤ੍ਵਾ ਇਮੇ ਚਤ੍ਤਾਰੋ ਬ੍ਰਹ੍ਮਵਿਹਾਰੇ ਨਿਬ੍ਬਤ੍ਤੇਤ੍ਵਾ ਝਾਨਪਦਟ੍ਠਾਨਂ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤੇ ਪਤਿਟ੍ਠਹਿਂਸੁ.

੫੧੦. ਆਗਤਿਂ ਵਾ ਗਤਿਂ ਵਾਤਿ ਪਟਿਸਨ੍ਧਿਵਸੇਨ ਆਗਮਨਟ੍ਠਾਨਂ ਵਾ, ਚੁਤਿਵਸੇਨ ਗਮਨਟ੍ਠਾਨਂ ਵਾ ਨ ਜਾਨਾਮਿ. ਸਿਯਾ ਚਿਤ੍ਤਸ੍ਸ ਅਞ੍ਞਥਤ੍ਤਨ੍ਤਿ ਸੋਮਨਸ੍ਸਵਸੇਨ ਅਞ੍ਞਥਤ੍ਤਂ ਭਵੇਯ੍ਯ. ਸਗ੍ਗਂ ਲੋਕਂ ਉਪਪਜ੍ਜਨ੍ਤੀਤਿ ਇਧਾਪਿ ਪੁਰਿਮਨਯੇਨੇਵ ਅਤ੍ਥੋ ਵੇਦਿਤਬ੍ਬੋ. ਯਥਾ ਹਿ ਪੁਬ੍ਬੇ ਵਿਪ੍ਪਟਿਸਾਰਕਰਂ ਆਰਮ੍ਮਣਂ ਦਸ੍ਸੇਤਿ, ਏਵਮਿਧਾਪਿ ਪਸਾਦਕਰਂ. ਸੋ ਕਿਰ ਤਦਾ ਮਨੁਸ੍ਸਾਨਂ ਦਸ੍ਸਨਟ੍ਠਾਨੇ ਭਿਕ੍ਖੂ ਆਕਾਸੇ ਗਚ੍ਛਨ੍ਤੇ ਵਿਯ, ਠਿਤੇ ਵਿਯ ਪਲ੍ਲਙ੍ਕੇਨ ਨਿਸਿਨ੍ਨੇ ਵਿਯ, ਆਕਾਸੇ ਸੂਚਿਕਮ੍ਮਂ ਕਰੋਨ੍ਤੇ ਵਿਯ, ਪੋਤ੍ਥਕਂ ਵਾਚੇਨ੍ਤੇ ਵਿਯ, ਆਕਾਸੇ ਚੀਵਰਂ ਪਸਾਰੇਤ੍ਵਾ ਕਾਯਂ ਉਤੁਂ ਗਣ੍ਹਾਪੇਨ੍ਤੇ ਵਿਯ, ਨਵਪਬ੍ਬਜਿਤੇ ਆਕਾਸੇਨ ਚਰਨ੍ਤੇ ਵਿਯ, ਤਰੁਣਸਾਮਣੇਰੇ ਆਕਾਸੇ ਠਤ੍ਵਾ ਪੁਪ੍ਫਾਨਿ ਓਚਿਨਨ੍ਤੇ ਵਿਯ ਕਤ੍ਵਾ ਦਸ੍ਸੇਸਿ. ਮਨੁਸ੍ਸਾ ਅਰਞ੍ਞਗਤਾਪਿ ਵਨਗਤਾਪਿ ਵਿਹਾਰਗਤਾਪਿ ਪਬ੍ਬਜਿਤਾਨਂ ਤਂ ਪਟਿਪਤ੍ਤਿਂ ਦਿਸ੍ਵਾ ਆਗਨ੍ਤ੍ਵਾ ਅਞ੍ਞੇਸਂ ਕਥੇਨ੍ਤਿ – ‘‘ਭਿਕ੍ਖੂਸੁ ਅਨ੍ਤਮਸੋ ਸਾਮਣੇਰਾਪਿ ਏਵਂਮਹਿਦ੍ਧਿਕੋ ਮਹਾਨੁਭਾਵਾ, ਏਤੇਸਂ ਦਿਨ੍ਨਂ ਮਹਪ੍ਫਲਂ ਨਾਮ ਹੋਤਿ, ਏਤੇਸਂ ਦੇਥ ਸਕ੍ਕਰੋਥਾ’’ਤਿ. ਤਤੋ ਮਨੁਸ੍ਸਾ ਭਿਕ੍ਖੁਸਙ੍ਘਂ ਚਤੂਹਿ ਪਚ੍ਚਯੇਹਿ ਸਕ੍ਕਰੋਨ੍ਤਾ ਬਹੁਂ ਪੁਞ੍ਞਂ ਕਤ੍ਵਾ ਸਗ੍ਗਪਥਪੂਰਕਾ ਅਹੇਸੁਂ. ਤੇਨ ਵੁਤ੍ਤਂ ‘‘ਸਗ੍ਗਂ ਲੋਕਂ ਉਪਪਜ੍ਜਨ੍ਤੀ’’ਤਿ.

੫੧੧. ਏਥ ਤੁਮ੍ਹੇ, ਭਿਕ੍ਖਵੇ, ਅਸੁਭਾਨੁਪਸ੍ਸਿਨੋ ਕਾਯੇ ਵਿਹਰਥਾਤਿ ਭਗਵਾ ਸਕਲਜਮ੍ਬੁਦੀਪਂ ਆਹਿਣ੍ਡਨ੍ਤੋ ਅਨ੍ਤਮਸੋ ਦ੍ਵਿਨ੍ਨਮ੍ਪਿ ਤਿਣ੍ਣਮ੍ਪਿ ਭਿਕ੍ਖੂਨਂ ਵਸਨਟ੍ਠਾਨਂ ਗਨ੍ਤ੍ਵਾ –

‘‘ਅਸੁਭਸਞ੍ਞਾਪਰਿਚਿਤੇਨ, ਭਿਕ੍ਖਵੇ, ਭਿਕ੍ਖੁਨੋ ਚੇਤਸਾ ਬਹੁਲਂ ਵਿਹਰਤੋ ਮੇਥੁਨਧਮ੍ਮਸਮਾਪਤ੍ਤਿਯਾ ਚਿਤ੍ਤਂ ਪਤਿਲੀਯਤਿ ਪਤਿਕੁਟਤਿ ਪਤਿਵਤ੍ਤਤਿ ਨ ਸਮ੍ਪਸਾਰਿਯਤਿ, ਉਪੇਕ੍ਖਾ ਵਾ ਪਾਟਿਕੁਲ੍ਯਤਾ ਵਾ ਸਣ੍ਠਾਤਿ.

ਆਹਾਰੇ ਪਟਿਕੂਲਸਞ੍ਞਾਪਰਿਚਿਤੇਨ, ਭਿਕ੍ਖਵੇ, ਭਿਕ੍ਖੁਨੋ ਚੇਤਸਾ ਬਹੁਲਂ ਵਿਹਰਤੋ ਰਸਤਣ੍ਹਾਯ ਚਿਤ੍ਤਂ ਪਤਿਲੀਯਤਿ ਪਤਿਕੁਟਤਿ ਪਤਿਵਤ੍ਤਤਿ ਨ ਸਮ੍ਪਸਾਰਿਯਤਿ, ਉਪੇਕ੍ਖਾ ਵਾ ਪਾਟਿਕੁਲ੍ਯਤਾ ਵਾ ਸਣ੍ਠਾਤਿ.

ਸਬ੍ਬਲੋਕੇ ਅਨਭਿਰਤਿਸਞ੍ਞਾਪਰਿਚਿਤੇਨ, ਭਿਕ੍ਖਵੇ, ਭਿਕ੍ਖੁਨੋ ਚੇਤਸਾ ਬਹੁਲਂ ਵਿਹਰਤੋ ਲੋਕਚਿਤ੍ਰੇਸੁ ਚਿਤ੍ਤਂ ਪਤਿਲੀਯਤਿ ਪਤਿਕੁਟਤਿ ਪਤਿਵਤ੍ਤਤਿ ਨ ਸਮ੍ਪਸਾਰਿਯਤਿ, ਉਪੇਕ੍ਖਾ ਵਾ ਪਾਟਿਕੁਲ੍ਯਤਾ ਵਾ ਸਣ੍ਠਾਤਿ.

ਅਨਿਚ੍ਚਸਞ੍ਞਾਪਰਿਚਿਤੇਨ, ਭਿਕ੍ਖਵੇ, ਭਿਕ੍ਖੁਨੋ ਚੇਤਸਾ ਬਹੁਲਂ ਵਿਹਰਤੋ ਲਾਭਸਕ੍ਕਾਰਸਿਲੋਕੇ ਚਿਤ੍ਤਂ ਪਤਿਲੀਯਤਿ ਪਤਿਕੁਟਤਿ ਪਤਿਵਤ੍ਤਤਿ ਨ ਸਮ੍ਪਸਾਰਿਯਤਿ, ਉਪੇਕ੍ਖਾ ਵਾ ਪਾਟਿਕੁਲ੍ਯਤਾ ਵਾ ਸਣ੍ਠਾਤੀ’’ਤਿ (ਅ. ਨਿ. ੭.੪੯) ਏਵਂ ਆਨਿਸਂਸਂ ਦਸ੍ਸੇਤ੍ਵਾ –

ਏਥ ਤੁਮ੍ਹੇ, ਭਿਕ੍ਖਵੇ, ਅਸੁਭਾਨੁਪਸ੍ਸੀ ਕਾਯੇ ਵਿਹਰਥ, ਆਹਾਰੇ ਪਟਿਕੂਲਸਞ੍ਞਿਨੋ ਸਬ੍ਬਲੋਕੇ ਅਨਭਿਰਤਿਸਞ੍ਞਿਨੋ ਸਬ੍ਬਸਙ੍ਖਾਰੇਸੁ ਅਨਿਚ੍ਚਾਨੁਪਸ੍ਸਿਨੋਤਿ. ਇਮਾਨਿ ਚਤ੍ਤਾਰਿ ਕਮ੍ਮਟ੍ਠਾਨਾਨਿ ਕਥੇਸਿ. ਤੇਪਿ ਭਿਕ੍ਖੂ ਇਮੇਸੁ ਚਤੂਸੁ ਕਮ੍ਮਟ੍ਠਾਨੇਸੁ ਕਮ੍ਮਂ ਕਰੋਨ੍ਤਾ ਵਿਪਸ੍ਸਨਂ ਵਡ੍ਢੇਤ੍ਵਾ ਸਬ੍ਬਾਸਵੇ ਖੇਪੇਤ੍ਵਾ ਅਰਹਤ੍ਤੇ ਪਤਿਟ੍ਠਹਿਂਸੁ, ਇਮਾਨਿਪਿ ਚਤ੍ਤਾਰਿ ਕਮ੍ਮਟ੍ਠਾਨਾਨਿ ਰਾਗਸਨ੍ਤਾਨਿ ਦੋਸਮੋਹਸਨ੍ਤਾਨਿ ਰਾਗਪਟਿਘਾਤਾਨਿ ਦੋਸਮੋਹਪਟਿਘਾਤਾਨਿ ਚਾਤਿ.

੫੧੨. ਸਕ੍ਖਰਂ ਗਹੇਤ੍ਵਾਤਿ ਅਨ੍ਤੋਮੁਟ੍ਠਿਯਂ ਤਿਟ੍ਠਨਪਮਾਣਂ ਪਾਸਾਣਂ ਗਹੇਤ੍ਵਾ. ਅਯਞ੍ਹਿ ਬ੍ਰਾਹ੍ਮਣਗਹਪਤਿਕੇਹਿ ਭਿਕ੍ਖੂ ਅਕ੍ਕੋਸਾਪੇਤ੍ਵਾਪਿ, ਬ੍ਰਾਹ੍ਮਣਗਹਪਤਿਕਾਨਂ ਵਸੇਨ ਭਿਕ੍ਖੁਸਙ੍ਘਸ੍ਸ ਲਾਭਸਕ੍ਕਾਰਂ ਉਪ੍ਪਾਦਾਪੇਤ੍ਵਾਪਿ, ਓਤਾਰਂ ਅਲਭਨ੍ਤੋ ਇਦਾਨਿ ਸਹਤ੍ਥਾ ਉਪਕ੍ਕਮਿਤੁਕਾਮੋ ਅਞ੍ਞਤਰਸ੍ਸ ਕੁਮਾਰਸ੍ਸ ਸਰੀਰੇ ਅਧਿਮੁਚ੍ਚਿਤ੍ਵਾ ਏਵਰੂਪਂ ਪਾਸਾਣਂ ਅਗ੍ਗਹੇਸਿ. ਤਂ ਸਨ੍ਧਾਯ ਵੁਤ੍ਤਂ ‘‘ਸਕ੍ਖਰਂ ਗਹੇਤ੍ਵਾ’’ਤਿ.

ਸੀਸਂ ਵੋ ਭਿਨ੍ਦੀਤਿ ਸੀਸਂ ਭਿਨ੍ਦਿ, ਮਹਾਚਮ੍ਮਂ ਛਿਜ੍ਜਿਤ੍ਵਾ ਮਂਸਂ ਦ੍ਵੇਧਾ ਅਹੋਸਿ. ਸਕ੍ਖਰਾ ਪਨਸ੍ਸ ਸੀਸਕਟਾਹਂ ਅਭਿਨ੍ਦਿਤ੍ਵਾ ਅਟ੍ਠਿਂ ਆਹਚ੍ਚੇਵ ਨਿਵਤ੍ਤਾ. ਨਾਗਾਪਲੋਕਿਤਂ ਅਪਲੋਕੇਸੀਤਿ ਪਹਾਰਸਦ੍ਦਂ ਸੁਤ੍ਵਾ ਯਥਾ ਨਾਮ ਹਤ੍ਥਿਨਾਗੋ ਇਤੋ ਵਾ ਏਤ੍ਤੋ ਵਾ ਅਪਲੋਕੇਤੁਕਾਮੋ ਗੀਵਂ ਅਪਰਿਵਤ੍ਤੇਤ੍ਵਾ ਸਕਲਸਰੀਰੇਨੇਵ ਨਿਵਤ੍ਤਿਤ੍ਵਾ ਅਪਲੋਕੇਤਿ. ਏਵਂ ਸਕਲਸਰੀਰੇਨੇਵ ਨਿਵਤ੍ਤਿਤ੍ਵਾ ਅਪਲੋਕੇਸਿ. ਯਥਾ ਹਿ ਮਹਾਜਨਸ੍ਸ ਅਟ੍ਠੀਨਿ ਕੋਟਿਯਾ ਕੋਟਿਂ ਆਹਚ੍ਚ ਠਿਤਾਨਿ, ਪਚ੍ਚੇਕਬੁਦ੍ਧਾਨਂ ਅਙ੍ਕੁਸਲਗ੍ਗਾਨਿ, ਨ ਏਵਂ ਬੁਦ੍ਧਾਨਂ. ਬੁਦ੍ਧਾਨਂ ਪਨ ਸਙ੍ਖਲਿਕਾਨਿ ਵਿਯ ਏਕਾਬਦ੍ਧਾਨਿ ਹੁਤ੍ਵਾ ਠਿਤਾਨਿ, ਤਸ੍ਮਾ ਪਚ੍ਛਤੋ ਅਪਲੋਕਨਕਾਲੇ ਨ ਸਕ੍ਕਾ ਹੋਤਿ ਗੀਵਂ ਪਰਿਵਤ੍ਤੇਤੁਂ. ਯਥਾ ਪਨ ਹਤ੍ਥਿਨਾਗੋ ਪਚ੍ਛਾਭਾਗਂ ਅਪਲੋਕੇਤੁਕਾਮੋ ਸਕਲਸਰੀਰੇਨੇਵ ਪਰਿਵਤ੍ਤਤਿ, ਏਵਂ ਪਰਿਵਤ੍ਤਿਤਬ੍ਬਂ ਹੋਤਿ. ਤਸ੍ਮਾ ਭਗਵਾ ਯਨ੍ਤੇਨ ਪਰਿਵਤ੍ਤਿਤਾ ਸੁਵਣ੍ਣਪਟਿਮਾ ਵਿਯ ਸਕਲਸਰੀਰੇਨੇਵ ਨਿਵਤ੍ਤਿਤ੍ਵਾ ਅਪਲੋਕੇਸਿ, ਅਪਲੋਕੇਤ੍ਵਾ ਠਿਤੋ ਪਨ, ‘‘ਨ ਵਾਯਂ ਦੂਸੀ ਮਾਰੋ ਮਤ੍ਤਮਞ੍ਞਾਸੀ’’ਤਿ ਆਹ. ਤਸ੍ਸਤ੍ਥੋ, ਅਯਂ ਦੂਸੀ ਮਾਰੋ ਪਾਪਂ ਕਰੋਨ੍ਤੋ ਨੇਵ ਪਮਾਣਂ ਅਞ੍ਞਾਸਿ, ਪਮਾਣਾਤਿਕ੍ਕਨ੍ਤਮਕਾਸੀਤਿ.

ਸਹਾਪਲੋਕਨਾਯਾਤਿ ਕਕੁਸਨ੍ਧਸ੍ਸ ਭਗਵਤੋ ਅਪਲੋਕਨੇਨੇਵ ਸਹ ਤਙ੍ਖਣਞ੍ਞੇਵ. ਤਮ੍ਹਾ ਚ ਠਾਨਾ ਚਵੀਤਿ ਤਮ੍ਹਾ ਚ ਦੇਵਟ੍ਠਾਨਾ ਚੁਤੋ, ਮਹਾਨਿਰਯਂ ਉਪਪਨ੍ਨੋਤਿ ਅਤ੍ਥੋ. ਚਵਮਾਨੋ ਹਿ ਨ ਯਤ੍ਥ ਕਤ੍ਥਚਿ ਠਿਤੋ ਚਵਤਿ, ਤਸ੍ਮਾ ਵਸਵਤ੍ਤਿਦੇਵਲੋਕਂ ਆਗਨ੍ਤ੍ਵਾ ਚੁਤੋ, ‘‘ਸਹਾਪਲੋਕਨਾਯਾ’’ਤਿ ਚ ਵਚਨਤੋ ਨ ਭਗਵਤੋ ਅਪਲੋਕਿਤਤ੍ਤਾ ਚੁਤੋਤਿ ਵੇਦਿਤਬ੍ਬੋ, ਚੁਤਿਕਾਲਦਸ੍ਸਨਮਤ੍ਤਮੇਵ ਹੇਤਂ. ਉਲ਼ਾਰੇ ਪਨ ਮਹਾਸਾਵਕੇ ਵਿਰਦ੍ਧਤ੍ਤਾ ਕੁਦਾਰਿਯਾ ਪਹਟਂ ਵਿਯਸ੍ਸ ਆਯੁ ਤਤ੍ਥੇਵ ਛਿਜ੍ਜਿਤ੍ਵਾ ਗਤਨ੍ਤਿ ਵੇਦਿਤਬ੍ਬਂ. ਤਯੋ ਨਾਮਧੇਯ੍ਯਾ ਹੋਨ੍ਤੀਤਿ ਤੀਣਿ ਨਾਮਾਨਿ ਹੋਨ੍ਤਿ. ਛਫਸ੍ਸਾਯਤਨਿਕੋਤਿ ਛਸੁ ਫਸ੍ਸਾਯਤਨੇਸੁ ਪਾਟਿਯੇਕ੍ਕਾਯ ਵੇਦਨਾਯ ਪਚ੍ਚਯੋ.

ਸਙ੍ਕੁਸਮਾਹਤੋਤਿ ਅਯਸੂਲੇਹਿ ਸਮਾਹਤੋ. ਪਚ੍ਚਤ੍ਤਵੇਦਨਿਯੋਤਿ ਸਯਮੇਵ ਵੇਦਨਾਜਨਕੋ. ਸਙ੍ਕੁਨਾ ਸਙ੍ਕੁ ਹਦਯੇ ਸਮਾਗਚ੍ਛੇਯ੍ਯਾਤਿ ਅਯਸੂਲੇਨ ਸਦ੍ਧਿਂ ਅਯਸੂਲਂ ਹਦਯਮਜ੍ਝੇ ਸਮਾਗਚ੍ਛੇਯ੍ਯ. ਤਸ੍ਮਿਂ ਕਿਰ ਨਿਰਯੇ ਉਪਪਨ੍ਨਾਨਂ ਤਿਗਾਵੁਤੋ ਅਤ੍ਤਭਾਵੋ ਹੋਤਿ, ਥੇਰਸ੍ਸਾਪਿ ਤਾਦਿਸੋ ਅਹੋਸਿ. ਅਥਸ੍ਸ ਹਿ ਨਿਰਯਪਾਲਾ ਤਾਲਕ੍ਖਨ੍ਧਪਮਾਣਾਨਿ ਅਯਸੂਲਾਨਿ ਆਦਿਤ੍ਤਾਨਿ ਸਮ੍ਪਜ੍ਜਲਿਤਾਨਿ ਸਜੋਤਿਭੂਤਾਨਿ ਸਯਮੇਵ ਗਹੇਤ੍ਵਾ ਪੁਨਪ੍ਪੁਨਂ ਨਿਵਤ੍ਤਮਾਨਾ, – ‘‘ਇਮਿਨਾ ਤੇ ਠਾਨੇਨ ਚਿਨ੍ਤੇਤ੍ਵਾ ਪਾਪਂ ਕਤ’’ਨ੍ਤਿ ਪੂਵਦੋਣਿਯਂ ਪੂਵਂ ਕੋਟ੍ਟੇਨ੍ਤੋ ਵਿਯ ਹਦਯਮਜ੍ਝਂ ਕੋਟ੍ਟੇਤ੍ਵਾ, ਪਣ੍ਣਾਸ ਜਨਾ ਪਾਦਾਭਿਮੁਖਾ ਪਣ੍ਣਾਸ ਜਨਾ ਸੀਸਾਭਿਮੁਖਾ ਕੋਟ੍ਟੇਤ੍ਵਾ ਗਚ੍ਛਨ੍ਤਿ, ਏਵਂ ਗਚ੍ਛਨ੍ਤਾ ਪਞ੍ਚਹਿ ਵਸ੍ਸਸਤੇਹਿ ਉਭੋ ਅਨ੍ਤੇ ਪਤ੍ਵਾ ਪੁਨ ਨਿਵਤ੍ਤਮਾਨਾ ਪਞ੍ਚਹਿ ਵਸ੍ਸਸਤੇਹਿ ਹਦਯਮਜ੍ਝਂ ਆਗਚ੍ਛਨ੍ਤਿ. ਤਂ ਸਨ੍ਧਾਯ ਏਵਂ ਵੁਤ੍ਤਂ.

ਵੁਟ੍ਠਾਨਿਮਨ੍ਤਿ ਵਿਪਾਕਵੁਟ੍ਠਾਨਵੇਦਨਂ. ਸਾ ਕਿਰ ਮਹਾਨਿਰਯੇ ਵੇਦਨਾਤੋ ਦੁਕ੍ਖਤਰਾ ਹੋਤਿ, ਯਥਾ ਹਿ ਸਿਨੇਹਪਾਨਸਤ੍ਤਾਹਤੋ ਪਰਿਹਾਰਸਤ੍ਤਾਹਂ ਦੁਕ੍ਖਤਰਂ, ਏਵਂ ਮਹਾਨਿਰਯਦੁਕ੍ਖਤੋ ਉਸ੍ਸਦੇ ਵਿਪਾਕਵੁਟ੍ਠਾਨਵੇਦਨਾ ਦੁਕ੍ਖਤਰਾਤਿ ਵਦਨ੍ਤਿ. ਸੇਯ੍ਯਥਾਪਿ ਮਚ੍ਛਸ੍ਸਾਤਿ ਪੁਰਿਸਸੀਸਞ੍ਹਿ ਵਟ੍ਟਂ ਹੋਤਿ, ਸੂਲੇਨ ਪਹਰਨ੍ਤਸ੍ਸ ਪਹਾਰੋ ਠਾਨਂ ਨ ਲਭਤਿ ਪਰਿਗਲਤਿ, ਮਚ੍ਛਸੀਸਂ ਆਯਤਂ ਪੁਥੁਲਂ, ਪਹਾਰੋ ਠਾਨਂ ਲਭਤਿ, ਅਵਿਰਜ੍ਝਿਤ੍ਵਾ ਕਮ੍ਮਕਾਰਣਾ ਸੁਕਰਾ ਹੋਤਿ, ਤਸ੍ਮਾ ਏਵਰੂਪਂ ਸੀਸਂ ਹੋਤਿ.

੫੧੩. ਵਿਧੁਰਂ ਸਾਵਕਮਾਸਜ੍ਜਾਤਿ ਵਿਧੁਰਂ ਸਾਵਕਂ ਘਟ੍ਟਯਿਤ੍ਵਾ. ਪਚ੍ਚਤ੍ਤਵੇਦਨਾਤਿ ਸਯਮੇਵ ਪਾਟਿਯੇਕ੍ਕਵੇਦਨਾਜਨਕਾ. ਈਦਿਸੋ ਨਿਰਯੋ ਆਸੀਤਿ ਇਮਸ੍ਮਿਂ ਠਾਨੇ ਨਿਰਯੋ ਦੇਵਦੂਤਸੁਤ੍ਤੇਨ ਦੀਪੇਤਬ੍ਬੋ. ਕਣ੍ਹ-ਦੁਕ੍ਖਂ ਨਿਗਚ੍ਛਸੀਤਿ ਕਾਲ਼ਕ-ਮਾਰ, ਦੁਕ੍ਖਂ ਵਿਨ੍ਦਿਸ੍ਸਸਿ. ਮਜ੍ਝੇ ਸਰਸ੍ਸਾਤਿ ਮਹਾਸਮੁਦ੍ਦਸ੍ਸ ਮਜ੍ਝੇ ਉਦਕਂ ਵਤ੍ਥੁਂ ਕਤ੍ਵਾ ਨਿਬ੍ਬਤ੍ਤਵਿਮਾਨਾਨਿ ਕਪ੍ਪਟ੍ਠਿਤਿਕਾਨਿ ਹੋਨ੍ਤਿ, ਤੇਸਂ ਵੇਲ਼ੁਰਿਯਸ੍ਸ ਵਿਯ ਵਣ੍ਣੋ ਹੋਤਿ, ਪਬ੍ਬਤਮਤ੍ਥਕੇ ਜਲਿਤਨਲ਼ਗ੍ਗਿਕ੍ਖਨ੍ਧੋ ਵਿਯ ਚ ਨੇਸਂ ਅਚ੍ਚਿਯੋ ਜੋਤਨ੍ਤਿ, ਪਭਸ੍ਸਰਾ ਪਭਾਸਮ੍ਪਨ੍ਨਾ ਹੋਨ੍ਤਿ, ਤੇਸੁ ਵਿਮਾਨੇਸੁ ਨੀਲਭੇਦਾਦਿਵਸੇਨ ਨਾਨਤ੍ਤਵਣ੍ਣਾ ਅਚ੍ਛਰਾ ਨਚ੍ਚਨ੍ਤਿ. ਯੋ ਏਤਮਭਿਜਾਨਾਤੀਤਿ ਯੋ ਏਤਂ ਵਿਮਾਨਵਤ੍ਥੁਂ ਜਾਨਾਤੀਤਿ ਅਤ੍ਥੋ. ਏਵਮੇਤ੍ਥ ਵਿਮਾਨਪੇਤਵਤ੍ਥੁਕੇਨੇਵ ਅਤ੍ਥੋ ਵੇਦਿਤਬ੍ਬੋ. ਪਾਦਙ੍ਗੁਟ੍ਠੇਨ ਕਮ੍ਪਯੀਤਿ ਇਦਂ ਪਾਸਾਦਕਮ੍ਪਨਸੁਤ੍ਤੇਨ ਦੀਪੇਤਬ੍ਬਂ. ਯੋ ਵੇਜਯਨ੍ਤਂ ਪਾਸਾਦਨ੍ਤਿ ਇਦਂ ਚੂਲ਼ਤਣ੍ਹਾਸਙ੍ਖਯਵਿਮੁਤ੍ਤਿਸੁਤ੍ਤੇਨ ਦੀਪੇਤਬ੍ਬਂ. ਸਕ੍ਕਂ ਸੋ ਪਰਿਪੁਚ੍ਛਤੀਤਿ ਇਦਮ੍ਪਿ ਤੇਨੇਵ ਦੀਪੇਤਬ੍ਬਂ. ਸੁਧਮ੍ਮਾਯਾਭਿਤੋ ਸਭਨ੍ਤਿ ਸੁਧਮ੍ਮਸਭਾਯ ਸਮੀਪੇ, ਅਯਂ ਪਨ ਬ੍ਰਹ੍ਮਲੋਕੇ ਸੁਧਮ੍ਮਸਭਾਵ, ਨ ਤਾਵਤਿਂਸਭਵਨੇ. ਸੁਧਮ੍ਮਸਭਾਵਿਰਹਿਤੋ ਹਿ ਦੇਵਲੋਕੋ ਨਾਮ ਨਤ੍ਥਿ.

ਬ੍ਰਹ੍ਮਲੋਕੇ ਪਭਸ੍ਸਰਨ੍ਤਿ ਬ੍ਰਹ੍ਮਲੋਕੇ ਮਹਾਮੋਗ੍ਗਲ੍ਲਾਨਮਹਾਕਸ੍ਸਪਾਦੀਹਿ ਸਾਵਕੇਹਿ ਸਦ੍ਧਿਂ ਤਸ੍ਸ ਤੇਜੋਧਾਤੁਂ ਸਮਾਪਜ੍ਜਿਤ੍ਵਾ ਨਿਸਿਨ੍ਨਸ੍ਸ ਭਗਵਤੋ ਓਭਾਸਂ. ਏਕਸ੍ਮਿਞ੍ਹਿ ਸਮਯੇ ਭਗਵਾ ਬ੍ਰਹ੍ਮਲੋਕੇ ਸੁਧਮ੍ਮਾਯ ਦੇਵਸਭਾਯ ਸਨ੍ਨਿਪਤਿਤ੍ਵਾ, – ‘‘ਅਤ੍ਥਿ ਨੁ ਖੋ ਕੋਚਿ ਸਮਣੋ ਵਾ ਬ੍ਰਾਹ੍ਮਣੋ ਵਾ ਏਵਂਮਹਿਦ੍ਧਿਕੋ. ਯੋ ਇਧ ਆਗਨ੍ਤੁਂ ਸਕ੍ਕੁਣੇਯ੍ਯਾ’’ਤਿ ਚਿਨ੍ਤੇਨ੍ਤਸ੍ਸੇਵ ਬ੍ਰਹ੍ਮਗਣਸ੍ਸ ਚਿਤ੍ਤਮਞ੍ਞਾਯ ਤਤ੍ਥ ਗਨ੍ਤ੍ਵਾ ਬ੍ਰਹ੍ਮਗਣਸ੍ਸ ਮਤ੍ਥਕੇ ਨਿਸਿਨ੍ਨੋ ਤੇਜੋਧਾਤੁਂ ਸਮਾਪਜ੍ਜਿਤ੍ਵਾ ਮਹਾਮੋਗ੍ਗਲ੍ਲਾਨਾਦੀਨਂ ਆਗਮਨਂ ਚਿਨ੍ਤੇਸਿ. ਤੇਪਿ ਗਨ੍ਤ੍ਵਾ ਸਤ੍ਥਾਰਂ ਵਨ੍ਦਿਤ੍ਵਾ ਤੇਜੋਧਾਤੁਂ ਸਮਾਪਜ੍ਜਿਤ੍ਵਾ ਪਚ੍ਚੇਕਂ ਦਿਸਾਸੁ ਨਿਸੀਦਿਂਸੁ, ਸਕਲਬ੍ਰਹ੍ਮਲੋਕੋ ਏਕੋਭਾਸੋ ਅਹੋਸਿ. ਸਤ੍ਥਾ ਚਤੁਸਚ੍ਚਪ੍ਪਕਾਸਨਂ ਧਮ੍ਮਂ ਦੇਸੇਸਿ, ਦੇਸਨਾਪਰਿਯੋਸਾਨੇ ਅਨੇਕਾਨਿ ਬ੍ਰਹ੍ਮਸਹਸ੍ਸਾਨਿ ਮਗ੍ਗਫਲੇਸੁ ਪਤਿਟ੍ਠਹਿਂਸੁ. ਤਂ ਸਨ੍ਧਾਯਿਮਾ ਗਾਥਾ ਵੁਤ੍ਤਾ, ਸੋ ਪਨਾਯਮਤ੍ਥੋ ਅਞ੍ਞਤਰਬ੍ਰਹ੍ਮਸੁਤ੍ਤੇਨ ਦੀਪੇਤਬ੍ਬੋ.

ਵਿਮੋਕ੍ਖੇਨ ਅਫਸ੍ਸਯੀਤਿ ਝਾਨਵਿਮੋਕ੍ਖੇਨ ਫੁਸਿ. ਵਨਨ੍ਤਿ ਜਮ੍ਬੁਦੀਪਂ. ਪੁਬ੍ਬਵਿਦੇਹਾਨਨ੍ਤਿ ਪੁਬ੍ਬਵਿਦੇਹਾਨਞ੍ਚ ਦੀਪਂ. ਯੇ ਚ ਭੂਮਿਸਯਾ ਨਰਾਤਿ ਭੂਮਿਸਯਾ ਨਰਾ ਨਾਮ ਅਪਰਗੋਯਾਨਕਾ ਚ ਉਤ੍ਤਰਕੁਰੁਕਾ ਚ. ਤੇਪਿ ਸਬ੍ਬੇ ਫੁਸੀਤਿ ਵੁਤ੍ਤਂ ਹੋਤਿ. ਅਯਂ ਪਨ ਅਤ੍ਥੋ ਨਨ੍ਦੋਪਨਨ੍ਦਦਮਨੇਨ ਦੀਪੇਤਬ੍ਬੋ. ਵਤ੍ਥੁ ਵਿਸੁਦ੍ਧਿਮਗ੍ਗੇ ਇਦ੍ਧਿਕਥਾਯ ਵਿਤ੍ਥਾਰਿਤਂ. ਅਪੁਞ੍ਞਂ ਪਸਵੀਤਿ ਅਪੁਞ੍ਞਂ ਪਟਿਲਭਿ. ਆਸਂ ਮਾ ਅਕਾਸਿ ਭਿਕ੍ਖੂਸੂਤਿ ਭਿਕ੍ਖੂ ਵਿਹੇਸੇਮੀਤਿ ਏਤਂ ਆਸਂ ਮਾ ਅਕਾਸਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਮਾਰਤਜ੍ਜਨੀਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਪਞ੍ਚਮਵਗ੍ਗਵਣ੍ਣਨਾ ਨਿਟ੍ਠਿਤਾ.