੬. ਮਹਾਧਮ੍ਮਸਮਾਦਾਨਸੁਤ੍ਤਵਣ੍ਣਨਾ

੪੭੩. ਏਵਂ ਮੇ ਸੁਤ੍ਤਨ੍ਤਿ ਮਹਾਧਮ੍ਮਸਮਾਦਾਨਸੁਤ੍ਤਂ. ਤਤ੍ਥ ਏਵਂਕਾਮਾਤਿ ਏਵਂਇਚ੍ਛਾ. ਏਵਂਛਨ੍ਦਾਤਿ ਏਵਂਅਜ੍ਝਾਸਯਾ. ਏਵਂਅਧਿਪ੍ਪਾਯਾਤਿ ਏਵਂਲਦ੍ਧਿਕਾ. ਤਤ੍ਰਾਤਿ ਤਸ੍ਮਿਂ ਅਨਿਟ੍ਠਵਡ੍ਢਨੇ ਚੇਵ ਇਟ੍ਠਪਰਿਹਾਨੇ ਚ. ਭਗਵਂਮੂਲਕਾਤਿ ਭਗਵਾ ਮੂਲਂ ਏਤੇਸਨ੍ਤਿ ਭਗਵਂਮੂਲਕਾ. ਇਦਂ ਵੁਤ੍ਤਂ ਹੋਤਿ – ਇਮੇ, ਭਨ੍ਤੇ, ਅਮ੍ਹਾਕਂ ਧਮ੍ਮਾ ਪੁਬ੍ਬੇ ਕਸ੍ਸਪਸਮ੍ਮਾਸਮ੍ਬੁਦ੍ਧੇਨ ਉਪ੍ਪਾਦਿਤਾ, ਤਸ੍ਮਿਂ ਪਰਿਨਿਬ੍ਬੁਤੇ ਏਕਂ ਬੁਦ੍ਧਨ੍ਤਰਂ ਅਞ੍ਞੋ ਸਮਣੋ ਵਾ ਬ੍ਰਾਹ੍ਮਣੋ ਵਾ ਇਮੇ ਧਮ੍ਮੇ ਉਪ੍ਪਾਦੇਤੁਂ ਸਮਤ੍ਥੋ ਨਾਮ ਨਾਹੋਸਿ, ਭਗਵਤਾ ਪਨ ਨੋ ਇਮੇ ਧਮ੍ਮਾ ਉਪ੍ਪਾਦਿਤਾ. ਭਗਵਨ੍ਤਞ੍ਹਿ ਨਿਸ੍ਸਾਯ ਮਯਂ ਇਮੇ ਧਮ੍ਮੇ ਆਜਾਨਾਮ ਪਟਿਵਿਜ੍ਝਾਮਾਤਿ ਏਵਂ ਭਗਵਂਮੂਲਕਾ ਨੋ, ਭਨ੍ਤੇ, ਧਮ੍ਮਾਤਿ. ਭਗਵਂਨੇਤ੍ਤਿਕਾਤਿ ਭਗਵਾ ਹਿ ਧਮ੍ਮਾਨਂ ਨੇਤਾ ਵਿਨੇਤਾ ਅਨੁਨੇਤਾਤਿ. ਯਥਾਸਭਾਵਤੋ ਪਾਟਿਯੇਕ੍ਕਂ ਪਾਟਿਯੇਕ੍ਕਂ ਨਾਮਂ ਗਹੇਤ੍ਵਾ ਦਸ੍ਸਿਤਾ ਧਮ੍ਮਾ ਭਗਵਂਨੇਤ੍ਤਿਕਾ ਨਾਮ ਹੋਨ੍ਤਿ. ਭਗਵਂਪਟਿਸਰਣਾਤਿ ਚਤੁਭੂਮਕਾ ਧਮ੍ਮਾ ਸਬ੍ਬਞ੍ਞੁਤਞ੍ਞਾਣਸ੍ਸ ਆਪਾਥਂ ਆਗਚ੍ਛਮਾਨਾ ਭਗਵਤਿ ਪਟਿਸਰਨ੍ਤਿ ਨਾਮਾਤਿ ਭਗਵਂਪਟਿਸਰਣਾ. ਪਟਿਸਰਨ੍ਤੀਤਿ ਓਸਰਨ੍ਤਿ ਸਮੋਸਰਨ੍ਤਿ. ਅਪਿਚ ਮਹਾਬੋਧਿਮਣ੍ਡੇ ਨਿਸਿਨ੍ਨਸ੍ਸ ਭਗਵਤੋ ਪਟਿਵੇਧਵਸੇਨ ਫਸ੍ਸੋ ਆਗਚ੍ਛਤਿ, ਅਹਂ ਭਗਵਾ ਕਿਨ੍ਨਾਮੋਤਿ? ਤ੍ਵਂ ਫੁਸਨਟ੍ਠੇਨ ਫਸ੍ਸੋ ਨਾਮ. ਵੇਦਨਾ, ਸਞ੍ਞਾ, ਸਙ੍ਖਾਰਾ, ਵਿਞ੍ਞਾਣਂ ਆਗਚ੍ਛਤਿ. ਅਹਂ ਭਗਵਾ ਕਿਨ੍ਨਾਮਨ੍ਤਿ? ਤ੍ਵਂ ਵਿਜਾਨਨਟ੍ਠੇਨ ਵਿਞ੍ਞਾਣਂ ਨਾਮਾਤਿ ਏਵਂ ਚਤੁਭੂਮਕਧਮ੍ਮਾਨਂ ਯਥਾਸਭਾਵਤੋ ਪਾਟਿਯੇਕ੍ਕਂ ਪਾਟਿਯੇਕ੍ਕਂ ਨਾਮਂ ਗਣ੍ਹਨ੍ਤੋ ਭਗਵਾ ਧਮ੍ਮੇ ਪਟਿਸਰਤੀਤਿਪਿ ਭਗਵਂਪਟਿਸਰਣਾ. ਭਗਵਨ੍ਤਞ੍ਞੇਵ ਪਟਿਭਾਤੂਤਿ ਭਗਵਤੋਯੇਵ ਏਤਸ੍ਸ ਭਾਸਿਤਸ੍ਸ ਅਤ੍ਥੋ ਉਪਟ੍ਠਾਤੁ, ਤੁਮ੍ਹੇਯੇਵ ਨੋ ਕਥੇਤ੍ਵਾ ਦੇਥਾਤਿ ਅਤ੍ਥੋ.

੪੭੪. ਸੇਵਿਤਬ੍ਬੇਤਿ ਨਿਸ੍ਸਯਿਤਬ੍ਬੇ. ਭਜਿਤਬ੍ਬੇਤਿ ਉਪਗਨ੍ਤਬ੍ਬੇ. ਯਥਾ ਤਂ ਅਵਿਦ੍ਦਸੁਨੋਤਿ ਯਥਾ ਅਵਿਦੁਨੋ ਬਾਲਸ੍ਸ ਅਨ੍ਧਪੁਥੁਜ੍ਜਨਸ੍ਸ. ਯਥਾ ਤਂ ਵਿਦ੍ਦਸੁਨੋਤਿ ਯਥਾ ਵਿਦੁਨੋ ਮੇਧਾਵਿਨੋ ਪਣ੍ਡਿਤਸ੍ਸ.

੪੭੫. ਅਤ੍ਥਿ, ਭਿਕ੍ਖਵੇ, ਧਮ੍ਮਸਮਾਦਾਨਨ੍ਤਿ ਪੁਰਿਮਸੁਤ੍ਤੇ ਉਪ੍ਪਟਿਪਾਟਿਆਕਾਰੇਨ ਮਾਤਿਕਾ ਠਪਿਤਾ, ਇਧ ਪਨ ਯਥਾਧਮ੍ਮਰਸੇਨੇਵ ਸਤ੍ਥਾ ਮਾਤਿਕਂ ਠਪੇਸਿ. ਤਤ੍ਥ ਧਮ੍ਮਸਮਾਦਾਨਨ੍ਤਿ ਪਾਣਾਤਿਪਾਤਾਦੀਨਂ ਧਮ੍ਮਾਨਂ ਗਹਣਂ.

੪੭੬. ਅਵਿਜ੍ਜਾਗਤੋਤਿ ਅਵਿਜ੍ਜਾਯ ਸਮਨ੍ਨਾਗਤੋ.

੪੭੭. ਵਿਜ੍ਜਾਗਤੋਤਿ ਵਿਜ੍ਜਾਯ ਸਮਨ੍ਨਾਗਤੋ ਪਞ੍ਞਵਾ.

੪੭੮. ਸਹਾਪਿ ਦੁਕ੍ਖੇਨਾਤਿ ਏਤ੍ਥ ਮਿਚ੍ਛਾਚਾਰੋ ਅਭਿਜ੍ਝਾ ਮਿਚ੍ਛਾਦਿਟ੍ਠੀਤਿ ਇਮੇ ਤਾਵ ਤਯੋ ਪੁਬ੍ਬਚੇਤਨਾਯ ਚ ਅਪਰਚੇਤਨਾਯ ਚਾਤਿ ਦ੍ਵਿਨ੍ਨਂ ਚੇਤਨਾਨਂ ਵਸੇਨ ਦੁਕ੍ਖਵੇਦਨਾ ਹੋਨ੍ਤਿ. ਸਨ੍ਨਿਟ੍ਠਾਪਕਚੇਤਨਾ ਪਨ ਸੁਖਸਮ੍ਪਯੁਤ੍ਤਾ ਵਾ ਉਪੇਕ੍ਖਾਸਮ੍ਪਯੁਤ੍ਤਾ ਵਾ ਹੋਤਿ. ਸੇਸਾ ਪਾਣਾਤਿਪਾਤਾਦਯੋ ਸਤ੍ਤ ਤਿਸ੍ਸਨ੍ਨਮ੍ਪਿ ਚੇਤਨਾਨਂ ਵਸੇਨ ਦੁਕ੍ਖਵੇਦਨਾ ਹੋਨ੍ਤਿ. ਇਦਂ ਸਨ੍ਧਾਯ ਵੁਤ੍ਤਂ – ‘‘ਸਹਾਪਿ ਦੁਕ੍ਖੇਨ ਸਹਾਪਿ ਦੋਮਨਸ੍ਸੇਨਾ’’ਤਿ. ਦੋਮਨਸ੍ਸਮੇਵ ਚੇਤ੍ਥ ਦੁਕ੍ਖਨ੍ਤਿ ਵੇਦਿਤਬ੍ਬਂ. ਪਰਿਯੇਟ੍ਠਿਂ ਵਾ ਆਪਜ੍ਜਨ੍ਤਸ੍ਸ ਪੁਬ੍ਬਭਾਗਪਰਭਾਗੇਸੁ ਕਾਯਿਕਂ ਦੁਕ੍ਖਮ੍ਪਿ ਵਟ੍ਟਤਿਯੇਵ.

੪੭੯. ਸਹਾਪਿ ਸੁਖੇਨਾਤਿ ਏਤ੍ਥ ਪਾਣਾਤਿਪਾਤੋ ਫਰੁਸਵਾਚਾ ਬ੍ਯਾਪਾਦੋਤਿ ਇਮੇ ਤਾਵ ਤਯੋ ਪੁਬ੍ਬਚੇਤਨਾਯ ਚ ਅਪਰਚੇਤਨਾਯ ਚਾਤਿ ਦ੍ਵਿਨ੍ਨਂ ਚੇਤਨਾਨਂ ਵਸੇਨ ਸੁਖਵੇਦਨਾ ਹੋਨ੍ਤਿ. ਸਨ੍ਨਿਟ੍ਠਾਪਕਚੇਤਨਾ ਪਨ ਦੁਕ੍ਖਸਮ੍ਪਯੁਤ੍ਤਾਵ ਹੋਤਿ. ਸੇਸਾ ਸਤ੍ਤ ਤਿਸ੍ਸਨ੍ਨਮ੍ਪਿ ਚੇਤਨਾਨਂ ਵਸੇਨ ਸੁਖਵੇਦਨਾ ਹੋਨ੍ਤਿਯੇਵ. ਸਹਾਪਿ ਸੋਮਨਸ੍ਸੇਨਾਤਿ ਸੋਮਨਸ੍ਸਮੇਵ ਚੇਤ੍ਥ ਸੁਖਨ੍ਤਿ ਵੇਦਿਤਬ੍ਬਂ. ਇਟ੍ਠਫੋਟ੍ਠਬ੍ਬਸਮਙ੍ਗਿਨੋ ਵਾ ਪੁਬ੍ਬਭਾਗਪਰਭਾਗੇਸੁ ਕਾਯਿਕਂ ਸੁਖਮ੍ਪਿ ਵਟ੍ਟਤਿਯੇਵ.

੪੮੦. ਤਤਿਯਧਮ੍ਮਸਮਾਦਾਨੇ ਇਧੇਕਚ੍ਚੋ ਮਚ੍ਛਬਨ੍ਧੋ ਵਾ ਹੋਤਿ, ਮਾਗਵਿਕੋ ਵਾ, ਪਾਣੁਪਘਾਤਂਯੇਵ ਨਿਸ੍ਸਾਯ ਜੀਵਿਕਂ ਕਪ੍ਪੇਤਿ. ਤਸ੍ਸ ਗਰੁਟ੍ਠਾਨਿਯੋ ਭਿਕ੍ਖੁ ਅਕਾਮਕਸ੍ਸੇਵ ਪਾਣਾਤਿਪਾਤੇ ਆਦੀਨਵਂ, ਪਾਣਾਤਿਪਾਤਵਿਰਤਿਯਾ ਚ ਆਨਿਸਂਸਂ ਕਥੇਤ੍ਵਾ ਸਿਕ੍ਖਾਪਦਂ ਦੇਤਿ. ਸੋ ਗਣ੍ਹਨ੍ਤੋਪਿ ਦੁਕ੍ਖਿਤੋ ਦੋਮਨਸ੍ਸਿਤੋਵ ਹੁਤ੍ਵਾ ਗਣ੍ਹਾਤਿ. ਅਪਰਭਾਗੇ ਕਤਿਪਾਹਂ ਵੀਤਿਨਾਮੇਤ੍ਵਾ ਰਕ੍ਖਿਤੁਂ ਅਸਕ੍ਕੋਨ੍ਤੋਪਿ ਦੁਕ੍ਖਿਤੋਵ ਹੋਤਿ, ਤਸ੍ਸ ਪੁਬ੍ਬਾਪਰਚੇਤਨਾ ਦੁਕ੍ਖਸਹਗਤਾਵ ਹੋਨ੍ਤਿ. ਸਨ੍ਨਿਟ੍ਠਾਪਕਚੇਤਨਾ ਪਨ ਸੁਖਸਹਗਤਾ ਵਾ ਉਪੇਕ੍ਖਾਸਹਗਤਾ ਵਾਤਿ ਏਵਂ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ. ਇਤਿ ਪੁਬ੍ਬਭਾਗਪਰਭਾਗਚੇਤਨਾਵ ਸਨ੍ਧਾਯ ਇਦਂ ਵੁਤ੍ਤਂ – ‘‘ਸਹਾਪਿ ਦੁਕ੍ਖੇਨ ਸਹਾਪਿ ਦੋਮਨਸ੍ਸੇਨਾ’’ਤਿ. ਦੋਮਨਸ੍ਸਮੇਵ ਚੇਤ੍ਥ ਦੁਕ੍ਖਨ੍ਤਿ ਵੇਦਿਤਬ੍ਬਂ.

੪੮੧. ਚਤੁਤ੍ਥਧਮ੍ਮਸਮਾਦਾਨੇ ਦਸਸੁਪਿ ਪਦੇਸੁ ਤਿਸ੍ਸੋਪਿ ਪੁਬ੍ਬਭਾਗਾਪਰਭਾਗਸਨ੍ਨਿਟ੍ਠਾਪਕਚੇਤਨਾ ਸੁਖਸਮ੍ਪਯੁਤ੍ਤਾ ਹੋਨ੍ਤਿਯੇਵ, ਤਂ ਸਨ੍ਧਾਯ ਇਦਂ ਵੁਤ੍ਤਂ – ‘‘ਸਹਾਪਿ ਸੁਖੇਨ ਸਹਾਪਿ ਸੋਮਨਸ੍ਸੇਨਾ’’ਤਿ. ਸੋਮਨਸ੍ਸਮੇਵ ਚੇਤ੍ਥ ਸੁਖਨ੍ਤਿ ਵੇਦਿਤਬ੍ਬਂ.

੪੮੨. ਤਿਤ੍ਤਕਾਲਾਬੂਤਿ ਤਿਤ੍ਤਕਰਸਅਲਾਬੁ. ਵਿਸੇਨ ਸਂਸਟ੍ਠੋਤਿ ਹਲਾਹਲਵਿਸੇਨ ਸਮ੍ਪਯੁਤ੍ਤੋ ਮਿਸ੍ਸਿਤੋ ਲੁਲ਼ਿਤੋ. ਨਚ੍ਛਾਦੇਸ੍ਸਤੀਤਿ ਨ ਰੁਚ੍ਚਿਸ੍ਸਤਿ ਨ ਤੁਟ੍ਠਿਂ ਕਰਿਸ੍ਸਤਿ. ਨਿਗਚ੍ਛਸੀਤਿ ਗਮਿਸ੍ਸਸਿ. ਅਪ੍ਪਟਿਸਙ੍ਖਾਯ ਪਿਵੇਯ੍ਯਾਤਿ ਤਂ ਅਪ੍ਪਚ੍ਚਵੇਕ੍ਖਿਤ੍ਵਾ ਪਿਵੇਯ੍ਯ.

੪੮੩. ਆਪਾਨੀਯਕਂਸੋਤਿ ਆਪਾਨੀਯਸ੍ਸ ਮਧੁਰਪਾਨਕਸ੍ਸ ਭਰਿਤਕਂਸੋ. ਵਣ੍ਣਸਮ੍ਪਨ੍ਨੋਤਿ ਪਾਨਕਵਣ੍ਣਾਦੀਹਿ ਸਮ੍ਪਨ੍ਨਵਣ੍ਣੋ, ਕਂਸੇ ਪਕ੍ਖਿਤ੍ਤਪਾਨਕਵਸੇਨ ਪਾਨਕਕਂਸੋਪਿ ਏਵਂ ਵੁਤ੍ਤੋ. ਛਾਦੇਸ੍ਸਤੀਤਿ ਤਞ੍ਹਿ ਹਲਾਹਲਵਿਸਂ ਯਤ੍ਥ ਯਤ੍ਥ ਪਕ੍ਖਿਤ੍ਤਂ ਹੋਤਿ, ਤਸ੍ਸ ਤਸ੍ਸੇਵ ਰਸਂ ਦੇਤਿ. ਤੇਨ ਵੁਤ੍ਤਂ ‘‘ਛਾਦੇਸ੍ਸਤੀ’’ਤਿ.

੪੮੪. ਪੂਤਿਮੁਤ੍ਤਨ੍ਤਿ ਮੁਤ੍ਤਮੇਵ. ਯਥਾ ਹਿ ਮਨੁਸ੍ਸਭਾਵੋ ਸੁਵਣ੍ਣਵਣ੍ਣੋ ਪੂਤਿਕਾਯੋਤ੍ਵੇਵ, ਤਦਹੁਜਾਤਾਪਿ ਗਲੋਚਿਲਤਾ ਪੂਤਿਲਤਾਤ੍ਵੇਵ ਵੁਚ੍ਚਤਿ. ਏਵਂ ਤਙ੍ਖਣਂ ਗਹਿਤਂ ਤਰੁਣਮ੍ਪਿ ਮੁਤ੍ਤਂ ਪੂਤਿਮੁਤ੍ਤਮੇਵ. ਨਾਨਾਭੇਸਜ੍ਜੇਹੀਤਿ ਹਰੀਤਕਾਮਲਕਾਦੀਹਿ ਨਾਨੋਸਧੇਹਿ. ਸੁਖੀ ਅਸ੍ਸਾਤਿ ਅਰੋਗੋ ਸੁਵਣ੍ਣਵਣ੍ਣੋ ਸੁਖੀ ਭਵੇਯ੍ਯ.

੪੮੫. ਦਧਿ ਚ ਮਧੁ ਚਾਤਿ ਸੁਪਰਿਸੁਦ੍ਧਂ ਦਧਿ ਚ ਸੁਮਧੁਰਂ ਮਧੁ ਚ. ਏਕਜ੍ਝਂ ਸਂਸਟ੍ਠਨ੍ਤਿ ਏਕਤੋ ਕਤ੍ਵਾ ਮਿਸ੍ਸਿਤਂ ਆਲੁਲ਼ਿਤਂ. ਤਸ੍ਸ ਤਨ੍ਤਿ ਤਸ੍ਸ ਤਂ ਚਤੁਮਧੁਰਭੇਸਜ੍ਜਂ ਪਿਵਤੋ ਰੁਚ੍ਚੇਯ੍ਯ. ਇਦਞ੍ਚ ਯਂ ਭਗਨ੍ਦਰਸਂਸਟ੍ਠਂ ਲੋਹਿਤਂ ਪਕ੍ਖਨ੍ਦਤਿ, ਨ ਤਸ੍ਸ ਭੇਸਜ੍ਜਂ, ਆਹਾਰਂ ਥਮ੍ਭੇਤ੍ਵਾ ਮਗ੍ਗਂ ਅਵਲਞ੍ਜਂ ਕਰੋਤਿ. ਯਂ ਪਨ ਪਿਤ੍ਤਸਂਸਟ੍ਠਂ ਲੋਹਿਤਂ, ਤਸ੍ਸੇਤਂ ਭੇਸਜ੍ਜਂ ਸੀਤਲਕਿਰਿਯਾਯ ਪਰਿਯਤ੍ਤਭੂਤਂ.

੪੮੬. ਵਿਦ੍ਧੇਤਿ ਉਬ੍ਬਿਦ੍ਧੇ. ਮੇਘਵਿਗਮੇਨ ਦੂਰੀਭੂਤੇਤਿ ਅਤ੍ਥੋ. ਵਿਗਤਵਲਾਹਕੇਤਿ ਅਪਗਤਮੇਘੇ, ਦੇਵੇਤਿ ਆਕਾਸੇ. ਆਕਾਸਗਤਂ ਤਮਗਤਨ੍ਤਿ ਆਕਾਸਗਤਂ ਤਮਂ. ਪੁਥੁਸਮਣਬ੍ਰਾਹ੍ਮਣਪਰਪ੍ਪਵਾਦੇਤਿ ਪੁਥੂਨਂ ਸਮਣਬ੍ਰਾਹ੍ਮਣਸਙ੍ਖਾਤਾਨਂ ਪਰੇਸਂ ਵਾਦੇ. ਅਭਿਵਿਹਚ੍ਚਾਤਿ ਅਭਿਹਨ੍ਤ੍ਵਾ. ਭਾਸਤੇ ਚ ਤਪਤੇ ਚ ਵਿਰੋਚਤੇ ਚਾਤਿ ਸਰਦਕਾਲੇ ਮਜ੍ਝਨ੍ਹਿਕਸਮਯੇ ਆਦਿਚ੍ਚੋਵ ਓਭਾਸਂ ਮੁਞ੍ਚਤਿ ਤਪਤਿ ਵਿਜ੍ਜੋਤਤੀਤਿ.

ਇਦਂ ਪਨ ਸੁਤ੍ਤਂ ਦੇਵਤਾਨਂ ਅਤਿਵਿਯ ਪਿਯਂ ਮਨਾਪਂ. ਤਤ੍ਰਿਦਂ ਵਤ੍ਥੁ – ਦਕ੍ਖਿਣਦਿਸਾਯਂ ਕਿਰ ਹਤ੍ਥਿਭੋਗਜਨਪਦੇ ਸਙ੍ਗਰਵਿਹਾਰੋ ਨਾਮ ਅਤ੍ਥਿ. ਤਸ੍ਸ ਭੋਜਨਸਾਲਦ੍ਵਾਰੇ ਸਙ੍ਗਰਰੁਕ੍ਖੇ ਅਧਿਵਤ੍ਥਾ ਦੇਵਤਾ ਰਤ੍ਤਿਭਾਗੇ ਏਕਸ੍ਸ ਦਹਰਸ੍ਸ ਸਰਭਞ੍ਞਵਸੇਨ ਇਦਂ ਸੁਤ੍ਤਂ ਓਸਾਰੇਨ੍ਤਸ੍ਸ ਸੁਤ੍ਵਾ ਸਾਧੁਕਾਰਂ ਅਦਾਸਿ. ਦਹਰੋ ਕਿਂ ਏਸੋਤਿ ਆਹ. ਅਹਂ, ਭਨ੍ਤੇ, ਇਮਸ੍ਮਿਂ ਰੁਕ੍ਖੇ ਅਧਿਵਤ੍ਥਾ ਦੇਵਤਾਤਿ. ਕਸ੍ਮਿਂ ਦੇਵਤੇ ਪਸਨ੍ਨਾਸਿ, ਕਿਂ ਸਦ੍ਦੇ, ਉਦਾਹੁ ਸੁਤ੍ਤੇਤਿ? ਸਦ੍ਦੋ ਨਾਮ, ਭਨ੍ਤੇ, ਯਸ੍ਸ ਕਸ੍ਸਚਿ ਹੋਤਿਯੇਵ, ਸੁਤ੍ਤੇ ਪਸਨ੍ਨਾਮ੍ਹਿ. ਸਤ੍ਥਾਰਾ ਜੇਤਵਨੇ ਨਿਸੀਦਿਤ੍ਵਾ ਕਥਿਤਦਿਵਸੇ ਚ ਅਜ੍ਜ ਚ ਏਕਬ੍ਯਞ੍ਜਨੇਪਿ ਨਾਨਂ ਨਤ੍ਥੀਤਿ. ਅਸ੍ਸੋਸਿ ਤ੍ਵਂ ਦੇਵਤੇ ਸਤ੍ਥਾਰਾ ਕਥਿਤਦਿਵਸੇਤਿ? ਆਮ, ਭਨ੍ਤੇ. ਕਤ੍ਥ ਠਿਤਾ ਅਸ੍ਸੋਸੀਤਿ? ਜੇਤਵਨਂ, ਭਨ੍ਤੇ, ਗਤਾਮ੍ਹਿ, ਮਹੇਸਕ੍ਖਾਸੁ ਪਨ ਦੇਵਤਾਸੁ ਆਗਚ੍ਛਨ੍ਤੀਸੁ ਤਤ੍ਥ ਓਕਾਸਂ ਅਲਭਿਤ੍ਵਾ ਇਧੇਵ ਠਤ੍ਵਾ ਅਸ੍ਸੋਸਿਨ੍ਤਿ. ਏਤ੍ਥ ਠਿਤਾਯ ਸਕ੍ਕਾ ਸੁਤ੍ਥੁ ਸਦ੍ਦੋ ਸੋਤੁਨ੍ਤਿ? ਤ੍ਵਂ ਪਨ, ਭਨ੍ਤੇ, ਮਯ੍ਹਂ ਸਦ੍ਦਂ ਸੁਣਸੀਤਿ? ਆਮ ਦੇਵਤੇਤਿ. ਦਕ੍ਖਿਣਕਣ੍ਣਪਸ੍ਸੇ ਨਿਸੀਦਿਤ੍ਵਾ ਕਥਨਕਾਲੋ ਵਿਯ, ਭਨ੍ਤੇ, ਹੋਤੀਤਿ. ਕਿਂ ਪਨ ਦੇਵਤੇ ਸਤ੍ਥੁ ਰੂਪਂ ਪਸ੍ਸਸੀਤਿ? ਸਤ੍ਥਾ ਮਮੇਵ ਓਲੋਕੇਤੀਤਿ ਮਞ੍ਞਮਾਨਾ ਸਣ੍ਠਾਤੁਂ ਨ ਸਕ੍ਕੋਮਿ, ਭਨ੍ਤੇਤਿ. ਵਿਸੇਸਂ ਪਨ ਨਿਬ੍ਬਤ੍ਤੇਤੁਂ ਅਸਕ੍ਖਿਤ੍ਥ ਦੇਵਤੇਤਿ. ਦੇਵਤਾ ਤਤ੍ਥੇਵ ਅਨ੍ਤਰਧਾਯਿ. ਤਂ ਦਿਵਸਂ ਕਿਰੇਸ ਦੇਵਪੁਤ੍ਤੋ ਸੋਤਾਪਤ੍ਤਿਫਲੇ ਪਤਿਟ੍ਠਿਤੋ. ਏਵਮਿਦਂ ਸੁਤ੍ਤਂ ਦੇਵਤਾਨਂ ਪਿਯਂ ਮਨਾਪਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਮਹਾਧਮ੍ਮਸਮਾਦਾਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.