੮. ਮਹਾਤਣ੍ਹਾਸਙ੍ਖਯਸੁਤ੍ਤਵਣ੍ਣਨਾ

੩੯੬. ਏਵਂ ਮੇ ਸੁਤਨ੍ਤਿ ਮਹਾਤਣ੍ਹਾਸਙ੍ਖਯਸੁਤ੍ਤਂ. ਤਤ੍ਥ ਦਿਟ੍ਠਿਗਤਨ੍ਤਿ ਅਲਗਦ੍ਦੂਪਮਸੁਤ੍ਤੇ ਲਦ੍ਧਿਮਤ੍ਤਂ ਦਿਟ੍ਠਿਗਤਨ੍ਤਿ ਵੁਤ੍ਤਂ, ਇਧ ਸਸ੍ਸਤਦਿਟ੍ਠਿ. ਸੋ ਚ ਭਿਕ੍ਖੁ ਬਹੁਸ੍ਸੁਤੋ, ਅਯਂ ਅਪ੍ਪਸ੍ਸੁਤੋ, ਜਾਤਕਭਾਣਕੋ ਭਗਵਨ੍ਤਂ ਜਾਤਕਂ ਕਥੇਤ੍ਵਾ, ‘‘ਅਹਂ, ਭਿਕ੍ਖਵੇ, ਤੇਨ ਸਮਯੇਨ ਵੇਸ੍ਸਨ੍ਤਰੋ ਅਹੋਸਿਂ, ਮਹੋਸਧੋ, ਵਿਧੁਰਪਣ੍ਡਿਤੋ, ਸੇਨਕਪਣ੍ਡਿਤੋ, ਮਹਾਜਨਕੋ ਰਾਜਾ ਅਹੋਸਿ’’ਨ੍ਤਿ ਸਮੋਧਾਨੇਨ੍ਤਂ ਸੁਣਾਤਿ. ਅਥਸ੍ਸ ਏਤਦਹੋਸਿ – ‘‘ਇਮੇ ਰੂਪਵੇਦਨਾਸਞ੍ਞਾਸਙ੍ਖਾਰਾ ਤਤ੍ਥ ਤਤ੍ਥੇਵ ਨਿਰੁਜ੍ਝਨ੍ਤਿ, ਵਿਞ੍ਞਾਣਂ ਪਨ ਇਧਲੋਕਤੋ ਪਰਲੋਕਂ, ਪਰਲੋਕਤੋ ਇਮਂ ਲੋਕਂ ਸਨ੍ਧਾਵਤਿ ਸਂਸਰਤੀ’’ਤਿ ਸਸ੍ਸਤਦਸ੍ਸਨਂ ਉਪ੍ਪਨ੍ਨਂ. ਤੇਨਾਹ – ‘‘ਤਦੇਵਿਦਂ ਵਿਞ੍ਞਾਣਂ ਸਨ੍ਧਾਵਤਿ ਸਂਸਰਤਿ ਅਨਞ੍ਞ’’ਨ੍ਤਿ.

ਸਮ੍ਮਾਸਮ੍ਬੁਦ੍ਧੇਨ ਪਨ, ‘‘ਵਿਞ੍ਞਾਣਂ ਪਚ੍ਚਯਸਮ੍ਭਵਂ, ਸਤਿ ਪਚ੍ਚਯੇ ਉਪ੍ਪਜ੍ਜਤਿ, ਵਿਨਾ ਪਚ੍ਚਯਂ ਨਤ੍ਥਿ ਵਿਞ੍ਞਾਣਸ੍ਸ ਸਮ੍ਭਵੋ’’ਤਿ ਵੁਤ੍ਤਂ. ਤਸ੍ਮਾ ਅਯਂ ਭਿਕ੍ਖੁ ਬੁਦ੍ਧੇਨ ਅਕਥਿਤਂ ਕਥੇਤਿ, ਜਿਨਚਕ੍ਕੇ ਪਹਾਰਂ ਦੇਤਿ, ਵੇਸਾਰਜ੍ਜਞਾਣਂ ਪਟਿਬਾਹਤਿ, ਸੋਤੁਕਾਮਂ ਜਨਂ ਵਿਸਂਵਾਦੇਤਿ, ਅਰਿਯਪਥੇ ਤਿਰਿਯਂ ਨਿਪਤਿਤ੍ਵਾ ਮਹਾਜਨਸ੍ਸ ਅਹਿਤਾਯ ਦੁਕ੍ਖਾਯ ਪਟਿਪਨ੍ਨੋ. ਯਥਾ ਨਾਮ ਰਞ੍ਞੋ ਰਜ੍ਜੇ ਮਹਾਚੋਰੋ ਉਪ੍ਪਜ੍ਜਮਾਨੋ ਮਹਾਜਨਸ੍ਸ ਅਹਿਤਾਯ ਦੁਕ੍ਖਾਯ ਉਪ੍ਪਜ੍ਜਤਿ, ਏਵਂ ਜਿਨਸਾਸਨੇ ਚੋਰੋ ਹੁਤ੍ਵਾ ਮਹਾਜਨਸ੍ਸ ਅਹਿਤਾਯ ਦੁਕ੍ਖਾਯ ਉਪ੍ਪਨ੍ਨੋਤਿ ਵੇਦਿਤਬ੍ਬੋ. ਸਮ੍ਬਹੁਲਾ ਭਿਕ੍ਖੂਤਿ ਜਨਪਦਵਾਸਿਨੋ ਪਿਣ੍ਡਪਾਤਿਕਭਿਕ੍ਖੂ. ਤੇਨੁਪਸਙ੍ਕਮਿਂਸੂਤਿ ਅਯਂ ਪਰਿਸਂ ਲਭਿਤ੍ਵਾ ਸਾਸਨਮ੍ਪਿ ਅਨ੍ਤਰਧਾਪੇਯ੍ਯ, ਯਾਵ ਪਕ੍ਖਂ ਨ ਲਭਤਿ, ਤਾਵਦੇਵ ਨਂ ਦਿਟ੍ਠਿਗਤਾ ਵਿਵੇਚੇਮਾਤਿ ਸੁਤਸੁਤਟ੍ਠਾਨਤੋਯੇਵ ਅਟ੍ਠਤ੍ਵਾ ਅਨਿਸੀਦਿਤ੍ਵਾ ਉਪਸਙ੍ਕਮਿਂਸੁ.

੩੯੮. ਕਤਮਂ ਤਂ ਸਾਤਿ ਵਿਞ੍ਞਾਣਨ੍ਤਿ ਸਾਤਿ ਯਂ ਤ੍ਵਂ ਵਿਞ੍ਞਾਣਂ ਸਨ੍ਧਾਯ ਵਦੇਸਿ, ਕਤਮਂ ਤਂ ਵਿਞ੍ਞਾਣਨ੍ਤਿ? ਯ੍ਵਾਯਂ, ਭਨ੍ਤੇ, ਵਦੋ ਵੇਦੇਯ੍ਯੋ ਤਤ੍ਰ ਤਤ੍ਰ ਕਲ੍ਯਾਣਪਾਪਕਾਨਂ ਕਮ੍ਮਾਨਂ ਵਿਪਾਕਂ ਪਟਿਸਂਵੇਦੇਤੀਤਿ, ਭਨ੍ਤੇ, ਯੋ ਅਯਂ ਵਦਤਿ ਵੇਦਯਤਿ, ਯੋ ਚਾਯਂ ਤਹਿਂ ਤਹਿਂ ਕੁਸਲਾਕੁਸਲਕਮ੍ਮਾਨਂ ਵਿਪਾਕਂ ਪਚ੍ਚਨੁਭੋਤਿ. ਇਦਂ, ਭਨ੍ਤੇ, ਵਿਞ੍ਞਾਣਂ, ਯਮਹਂ ਸਨ੍ਧਾਯ ਵਦੇਮੀਤਿ. ਕਸ੍ਸ ਨੁ ਖੋ ਨਾਮਾਤਿ ਕਸ੍ਸ ਖਤ੍ਤਿਯਸ੍ਸ ਵਾ ਬ੍ਰਾਹ੍ਮਣਸ੍ਸ ਵਾ ਵੇਸ੍ਸਸੁਦ੍ਦਗਹਟ੍ਠਪਬ੍ਬਜਿਤਦੇਵਮਨੁਸ੍ਸਾਨਂ ਵਾ ਅਞ੍ਞਤਰਸ੍ਸ.

੩੯੯. ਅਥ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸੀਤਿ ਕਸ੍ਮਾ ਆਮਨ੍ਤੇਸਿ? ਸਾਤਿਸ੍ਸ ਕਿਰ ਏਵਂ ਅਹੋਸਿ – ‘‘ਸਤ੍ਥਾ ਮਂ ‘ਮੋਘਪੁਰਿਸੋ’ਤਿ ਵਦਤਿ, ਨ ਚ ਮੋਘਪੁਰਿਸੋਤਿ ਵੁਤ੍ਤਮਤ੍ਤੇਨੇਵ ਮਗ੍ਗਫਲਾਨਂ ਉਪਨਿਸ੍ਸਯੋ ਨ ਹੋਤਿ. ਉਪਸੇਨਮ੍ਪਿ ਹਿ ਵਙ੍ਗਨ੍ਤਪੁਤ੍ਤਂ, ‘ਅਤਿਲਹੁਂ ਖੋ ਤ੍ਵਂ ਮੋਘਪੁਰਿਸ ਬਾਹੁਲ੍ਲਾਯ ਆਵਤ੍ਤੋ’ਤਿ (ਮਹਾਵ. ੭੫) ਭਗਵਾ ਮੋਘਪੁਰਿਸਵਾਦੇਨ ਓਵਦਿ. ਥੇਰੋ ਅਪਰਭਾਗੇ ਘਟੇਨ੍ਤੋ ਵਾਯਮਨ੍ਤੋ ਛ ਅਭਿਞ੍ਞਾ ਸਚ੍ਛਾਕਾਸਿ. ਅਹਮ੍ਪਿ ਤਥਾਰੂਪਂ ਵੀਰਿਯਂ ਪਗ੍ਗਣ੍ਹਿਤ੍ਵਾ ਮਗ੍ਗਫਲਾਨਿ ਨਿਬ੍ਬਤ੍ਤੇਸ੍ਸਾਮੀ’’ਤਿ. ਅਥਸ੍ਸ ਭਗਵਾ ਛਿਨ੍ਨਪਚ੍ਚਯੋ ਅਯਂ ਸਾਸਨੇ ਅਵਿਰੁਲ਼੍ਹਧਮ੍ਮੋਤਿ ਦਸ੍ਸੇਨ੍ਤੋ ਭਿਕ੍ਖੂ ਆਮਨ੍ਤੇਸਿ. ਉਸ੍ਮੀਕਤੋਤਿਆਦਿ ਹੇਟ੍ਠਾ ਵੁਤ੍ਤਾਧਿਪ੍ਪਾਯਮੇਵ. ਅਥ ਖੋ ਭਗਵਾਤਿ ਅਯਮ੍ਪਿ ਪਾਟਿਯੇਕ੍ਕੋ ਅਨੁਸਨ੍ਧਿ. ਸਾਤਿਸ੍ਸ ਕਿਰ ਏਤਦਹੋਸਿ – ‘‘ਭਗਵਾ ਮਯ੍ਹਂ ਮਗ੍ਗਫਲਾਨਂ ਉਪਨਿਸ੍ਸਯੋ ਨਤ੍ਥੀਤਿ ਵਦਤਿ, ਕਿਂ ਸਕ੍ਕਾ ਉਪਨਿਸ੍ਸਯੇ ਅਸਤਿ ਕਾਤੁਂ? ਨ ਹਿ ਤਥਾਗਤਾ ਸਉਪਨਿਸ੍ਸਯਸ੍ਸੇਵ ਧਮ੍ਮਂ ਦੇਸੇਨ੍ਤਿ, ਯਸ੍ਸ ਕਸ੍ਸਚਿ ਦੇਸੇਨ੍ਤਿਯੇਵ. ਅਹਂ ਬੁਦ੍ਧਸ੍ਸ ਸਨ੍ਤਿਕਾ ਸੁਗਤੋਵਾਦਂ ਲਭਿਤ੍ਵਾ ਸਗ੍ਗਸਮ੍ਪਤ੍ਤੂਪਗਂ ਕੁਸਲਂ ਕਰਿਸ੍ਸਾਮੀ’’ਤਿ. ਅਥਸ੍ਸ ਭਗਵਾ, ‘‘ਨਾਹਂ, ਮੋਘਪੁਰਿਸ, ਤੁਯ੍ਹਂ ਓਵਾਦਂ ਵਾ ਅਨੁਸਾਸਨਿਂ ਵਾ ਦੇਮੀ’’ਤਿ ਸੁਗਤੋਵਾਦਂ ਪਟਿਪ੍ਪਸ੍ਸਮ੍ਭੇਨ੍ਤੋ ਇਮਂ ਦੇਸਨਂ ਆਰਭਿ. ਤਸ੍ਸਤ੍ਥੋ ਹੇਟ੍ਠਾ ਵੁਤ੍ਤਨਯੇਨੇਵ ਵੇਦਿਤਬ੍ਬੋ. ਇਦਾਨਿ ਪਰਿਸਾਯ ਲਦ੍ਧਿਂ ਸੋਧੇਨ੍ਤੋ, ‘‘ਇਧਾਹਂ ਭਿਕ੍ਖੂ ਪਟਿਪੁਚ੍ਛਿਸ੍ਸਾਮੀ’’ਤਿਆਦਿਮਾਹ. ਤਂ ਸਬ੍ਬਮ੍ਪਿ ਹੇਟ੍ਠਾ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.

੪੦੦. ਇਦਾਨਿ ਵਿਞ੍ਞਾਣਸ੍ਸ ਸਪ੍ਪਚ੍ਚਯਭਾਵਂ ਦਸ੍ਸੇਤੁਂ ਯਂ ਯਦੇਵ, ਭਿਕ੍ਖਵੇਤਿਆਦਿਮਾਹ. ਤਤ੍ਥ ਮਨਞ੍ਚ ਪਟਿਚ੍ਚ ਧਮ੍ਮੇ ਚਾਤਿ ਸਹਾਵਜ੍ਜਨੇਨ ਭਵਙ੍ਗਮਨਞ੍ਚ ਤੇਭੂਮਕਧਮ੍ਮੇ ਚ ਪਟਿਚ੍ਚ. ਕਟ੍ਠਞ੍ਚ ਪਟਿਚ੍ਚਾਤਿਆਦਿ ਓਪਮ੍ਮਨਿਦਸ੍ਸਨਤ੍ਥਂ ਵੁਤ੍ਤਂ. ਤੇਨ ਕਿਂ ਦੀਪੇਤਿ? ਦ੍ਵਾਰਸਙ੍ਕਨ੍ਤਿਯਾ ਅਭਾਵਂ. ਯਥਾ ਹਿ ਕਟ੍ਠਂ ਪਟਿਚ੍ਚ ਜਲਮਾਨੋ ਅਗ੍ਗਿ ਉਪਾਦਾਨਪਚ੍ਚਯੇ ਸਤਿਯੇਵ ਜਲਤਿ, ਤਸ੍ਮਿਂ ਅਸਤਿ ਪਚ੍ਚਯਵੇਕਲ੍ਲੇਨ ਤਤ੍ਥੇਵ ਵੂਪਸਮ੍ਮਤਿ, ਨ ਸਕਲਿਕਾਦੀਨਿ ਸਙ੍ਕਮਿਤ੍ਵਾ ਸਕਲਿਕਗ੍ਗੀਤਿਆਦਿਸਙ੍ਖ੍ਯਂ ਗਚ੍ਛਤਿ, ਏਵਮੇਵ ਚਕ੍ਖੁਞ੍ਚ ਪਟਿਚ੍ਚ ਰੂਪੇ ਚ ਉਪ੍ਪਨ੍ਨਂ ਵਿਞ੍ਞਾਣਂ ਤਸ੍ਮਿਂ ਦ੍ਵਾਰੇ ਚਕ੍ਖੁਰੂਪਆਲੋਕਮਨਸਿਕਾਰਸਙ੍ਖਾਤੇ ਪਚ੍ਚਯਮ੍ਹਿ ਸਤਿਯੇਵ ਉਪ੍ਪਜ੍ਜਤਿ, ਤਸ੍ਮਿਂ ਅਸਤਿ ਪਚ੍ਚਯਵੇਕਲ੍ਲੇਨ ਤਤ੍ਥੇਵ ਨਿਰੁਜ੍ਝਤਿ, ਨ ਸੋਤਾਦੀਨਿ ਸਙ੍ਕਮਿਤ੍ਵਾ ਸੋਤਵਿਞ੍ਞਾਣਨ੍ਤਿਆਦਿਸਙ੍ਖ੍ਯਂ ਗਚ੍ਛਤਿ. ਏਸ ਨਯੋ ਸਬ੍ਬਵਾਰੇਸੁ. ਇਤਿ ਭਗਵਾ ਨਾਹਂ ਵਿਞ੍ਞਾਣਪ੍ਪਵਤ੍ਤੇ ਦ੍ਵਾਰਸਙ੍ਕਨ੍ਤਿਮਤ੍ਤਮ੍ਪਿ ਵਦਾਮਿ, ਅਯਂ ਪਨ ਸਾਤਿ ਮੋਘਪੁਰਿਸੋ ਭਵਸਙ੍ਕਨ੍ਤਿਂ ਵਦਤੀਤਿ ਸਾਤਿਂ ਨਿਗ੍ਗਹੇਸਿ.

੪੦੧. ਏਵਂ ਵਿਞ੍ਞਾਣਸ੍ਸ ਸਪ੍ਪਚ੍ਚਯਭਾਵਂ ਦਸ੍ਸੇਤ੍ਵਾ ਇਦਾਨਿ ਪਨ ਪਞ੍ਚਨ੍ਨਮ੍ਪਿ ਖਨ੍ਧਾਨਂ ਸਪ੍ਪਚ੍ਚਯਭਾਵਂ ਦਸ੍ਸੇਨ੍ਤੋ, ਭੂਤਮਿਦਨ੍ਤਿਆਦਿਮਾਹ. ਤਤ੍ਥ ਭੂਤਮਿਦਨ੍ਤਿ ਇਦਂ ਖਨ੍ਧਪਞ੍ਚਕਂ ਜਾਤਂ ਭੂਤਂ ਨਿਬ੍ਬਤ੍ਤਂ, ਤੁਮ੍ਹੇਪਿ ਤਂ ਭੂਤਮਿਦਨ੍ਤਿ, ਭਿਕ੍ਖਵੇ, ਪਸ੍ਸਥਾਤਿ. ਤਦਾਹਾਰਸਮ੍ਭਵਨ੍ਤਿ ਤਂ ਪਨੇਤਂ ਖਨ੍ਧਪਞ੍ਚਕਂ ਆਹਾਰਸਮ੍ਭਵਂ ਪਚ੍ਚਯਸਮ੍ਭਵਂ, ਸਤਿ ਪਚ੍ਚਯੇ ਉਪ੍ਪਜ੍ਜਤਿ ਏਵਂ ਪਸ੍ਸਥਾਤਿ ਪੁਚ੍ਛਤਿ. ਤਦਾਹਾਰਨਿਰੋਧਾਤਿ ਤਸ੍ਸ ਪਚ੍ਚਯਸ੍ਸ ਨਿਰੋਧਾ. ਭੂਤਮਿਦਂ ਨੋਸ੍ਸੂਤਿ ਭੂਤਂ ਨੁ ਖੋ ਇਦਂ, ਨ ਨੁ ਖੋ ਭੂਤਨ੍ਤਿ. ਤਦਾਹਾਰਸਮ੍ਭਵਂ ਨੋਸ੍ਸੂਤਿ ਤਂ ਭੂਤਂ ਖਨ੍ਧਪਞ੍ਚਕਂ ਪਚ੍ਚਯਸਮ੍ਭਵਂ ਨੁ ਖੋ, ਨ ਨੁ ਖੋਤਿ. ਤਦਾਹਾਰਨਿਰੋਧਾਤਿ ਤਸ੍ਸ ਪਚ੍ਚਯਸ੍ਸ ਨਿਰੋਧਾ. ਨਿਰੋਧਧਮ੍ਮਂ ਨੋਸ੍ਸੂਤਿ ਤਂ ਧਮ੍ਮਂ ਨਿਰੋਧਧਮ੍ਮਂ ਨੁ ਖੋ, ਨ ਨੁ ਖੋਤਿ. ਸਮ੍ਮਪ੍ਪਞ੍ਞਾਯ ਪਸ੍ਸਤੋਤਿ ਇਦਂ ਖਨ੍ਧਪਞ੍ਚਕਂ ਜਾਤਂ ਭੂਤਂ ਨਿਬ੍ਬਤ੍ਤਨ੍ਤਿ ਯਾਥਾਵਸਰਸਲਕ੍ਖਣਤੋ ਵਿਪਸ੍ਸਨਾਪਞ੍ਞਾਯ ਸਮ੍ਮਾ ਪਸ੍ਸਨ੍ਤਸ੍ਸ. ਪਞ੍ਞਾਯ ਸੁਦਿਟ੍ਠਨ੍ਤਿ ਵੁਤ੍ਤਨਯੇਨੇਵ ਵਿਪਸ੍ਸਨਾਪਞ੍ਞਾਯ ਸੁਟ੍ਠੁ ਦਿਟ੍ਠਂ. ਏਵਂ ਯੇ ਯੇ ਤਂ ਪੁਚ੍ਛਂ ਸਲ੍ਲਕ੍ਖੇਸੁਂ, ਤੇਸਂ ਤੇਸਂ ਪਟਿਞ੍ਞਂ ਗਣ੍ਹਨ੍ਤੋ ਪਞ੍ਚਨ੍ਨਂ ਖਨ੍ਧਾਨਂ ਸਪ੍ਪਚ੍ਚਯਭਾਵਂ ਦਸ੍ਸੇਤਿ.

ਇਦਾਨਿ ਯਾਯ ਪਞ੍ਞਾਯ ਤੇਹਿ ਤਂ ਸਪ੍ਪਚ੍ਚਯਂ ਸਨਿਰੋਧਂ ਖਨ੍ਧਪਞ੍ਚਕਂ ਸੁਦਿਟ੍ਠਂ, ਤਤ੍ਥ ਨਿਤ੍ਤਣ੍ਹਭਾਵਂ ਪੁਚ੍ਛਨ੍ਤੋ ਇਮਂ ਚੇ ਤੁਮ੍ਹੇਤਿਆਦਿਮਾਹ. ਤਤ੍ਥ ਦਿਟ੍ਠਿਨ੍ਤਿ ਵਿਪਸ੍ਸਨਾਸਮ੍ਮਾਦਿਟ੍ਠਿਂ. ਸਭਾਵਦਸ੍ਸਨੇਨ ਪਰਿਸੁਦ੍ਧਂ. ਪਚ੍ਚਯਦਸ੍ਸਨੇਨ ਪਰਿਯੋਦਾਤਂ. ਅਲ੍ਲੀਯੇਥਾਤਿ ਤਣ੍ਹਾਦਿਟ੍ਠੀਹਿ ਅਲ੍ਲੀਯਿਤ੍ਵਾ ਵਿਹਰੇਯ੍ਯਾਥ. ਕੇਲਾਯੇਥਾਤਿ ਤਣ੍ਹਾਦਿਟ੍ਠੀਹਿ ਕੀਲ਼ਮਾਨਾ ਵਿਹਰੇਯ੍ਯਾਥ. ਧਨਾਯੇਥਾਤਿ ਧਨਂ ਵਿਯ ਇਚ੍ਛਨ੍ਤਾ ਗੇਧਂ ਆਪਜ੍ਜੇਯ੍ਯਾਥ. ਮਮਾਯੇਥਾਤਿ ਤਣ੍ਹਾਦਿਟ੍ਠੀਹਿ ਮਮਤ੍ਤਂ ਉਪ੍ਪਾਦੇਯ੍ਯਾਥ. ਨਿਤ੍ਥਰਣਤ੍ਥਾਯ ਨੋ ਗਹਣਤ੍ਥਾਯਾਤਿ ਯੋ ਸੋ ਮਯਾ ਚਤੁਰੋਘਨਿਤ੍ਥਰਣਤ੍ਥਾਯ ਕੁਲ੍ਲੂਪਮੋ ਧਮ੍ਮੋ ਦੇਸਿਤੋ, ਨੋ ਨਿਕਨ੍ਤਿਵਸੇਨ ਗਹਣਤ੍ਥਾਯ. ਅਪਿ ਨੁ ਤਂ ਤੁਮ੍ਹੇ ਆਜਾਨੇਯ੍ਯਾਥਾਤਿ. ਵਿਪਰਿਯਾਯੇਨ ਸੁਕ੍ਕਪਕ੍ਖੋ ਵੇਦਿਤਬ੍ਬੋ.

੪੦੨. ਇਦਾਨਿ ਤੇਸਂ ਖਨ੍ਧਾਨਂ ਪਚ੍ਚਯਂ ਦਸ੍ਸੇਨ੍ਤੋ, ਚਤ੍ਤਾਰੋਮੇ, ਭਿਕ੍ਖਵੇ, ਆਹਾਰਾਤਿਆਦਿਮਾਹ, ਤਮ੍ਪਿ ਵੁਤ੍ਤਤ੍ਥਮੇਵ. ਯਥਾ ਪਨ ਏਕੋ ਇਮਂ ਜਾਨਾਸੀਤਿ ਵੁਤ੍ਤੋ, ‘‘ਨ ਕੇਵਲਂ ਇਮਂ, ਮਾਤਰਮ੍ਪਿਸ੍ਸ ਜਾਨਾਮਿ, ਮਾਤੁ ਮਾਤਰਮ੍ਪੀ’’ਤਿ ਏਵਂ ਪਵੇਣਿਵਸੇਨ ਜਾਨਨ੍ਤੋ ਸੁਟ੍ਠੁ ਜਾਨਾਤਿ ਨਾਮ. ਏਵਮੇਵਂ ਭਗਵਾ ਨ ਕੇਵਲਂ ਖਨ੍ਧਮਤ੍ਤਮੇਵ ਜਾਨਾਤਿ, ਖਨ੍ਧਾਨਂ ਪਚ੍ਚਯਮ੍ਪਿ ਤੇਸਮ੍ਪਿ ਪਚ੍ਚਯਾਨਂ ਪਚ੍ਚਯਨ੍ਤਿ ਏਵਂ ਸਬ੍ਬਪਚ੍ਚਯਪਰਮ੍ਪਰਂ ਜਾਨਾਤਿ. ਸੋ ਤਂ, ਬੁਦ੍ਧਬਲਂ ਦੀਪੇਨ੍ਤੋ ਇਦਾਨਿ ਪਚ੍ਚਯਪਰਮ੍ਪਰਂ ਦਸ੍ਸੇਤੁਂ, ਇਮੇ ਚ, ਭਿਕ੍ਖਵੇ, ਚਤ੍ਤਾਰੋ ਆਹਾਰਾਤਿਆਦਿਮਾਹ. ਤਂ ਵੁਤ੍ਤਤ੍ਥਮੇਵ. ਇਤਿ ਖੋ, ਭਿਕ੍ਖਵੇ, ਅਵਿਜ੍ਜਾਪਚ੍ਚਯਾ ਸਙ੍ਖਾਰਾ…ਪੇ… ਦੁਕ੍ਖਕ੍ਖਨ੍ਧਸ੍ਸ ਸਮੁਦਯੋ ਹੋਤੀਤਿ ਏਤ੍ਥ ਪਨ ਪਟਿਚ੍ਚਸਮੁਪ੍ਪਾਦਕਥਾ ਵਿਤ੍ਥਾਰੇਤਬ੍ਬਾ ਭਵੇਯ੍ਯ, ਸਾ ਵਿਸੁਦ੍ਧਿਮਗ੍ਗੇ ਵਿਤ੍ਥਾਰਿਤਾਵ.

੪੦੪. ਇਮਸ੍ਮਿਂ ਸਤਿ ਇਦਂ ਹੋਤੀਤਿ ਇਮਸ੍ਮਿਂ ਅਵਿਜ੍ਜਾਦਿਕੇ ਪਚ੍ਚਯੇ ਸਤਿ ਇਦਂ ਸਙ੍ਖਾਰਾਦਿਕਂ ਫਲਂ ਹੋਤਿ. ਇਮਸ੍ਸੁਪ੍ਪਾਦਾ ਇਦਂ ਉਪ੍ਪਜ੍ਜਤੀਤਿ ਇਮਸ੍ਸ ਅਵਿਜ੍ਜਾਦਿਕਸ੍ਸ ਪਚ੍ਚਯਸ੍ਸ ਉਪ੍ਪਾਦਾ ਇਦਂ ਸਙ੍ਖਾਰਾਦਿਕਂ ਫਲਂ ਉਪ੍ਪਜ੍ਜਤਿ, ਤੇਨੇਵਾਹ – ‘‘ਯਦਿਦਂ ਅਵਿਜ੍ਜਾਪਚ੍ਚਯਾ ਸਙ੍ਖਾਰਾ…ਪੇ… ਸਮੁਦਯੋ ਹੋਤੀ’’ਤਿ. ਏਵਂ ਵਟ੍ਟਂ ਦਸ੍ਸੇਤ੍ਵਾ ਇਦਾਨਿ ਵਿਵਟ੍ਟਂ ਦਸ੍ਸੇਨ੍ਤੋ, ਅਵਿਜ੍ਜਾਯ ਤ੍ਵੇਵ ਅਸੇਸਵਿਰਾਗਨਿਰੋਧਾਤਿਆਦਿਮਾਹ. ਤਤ੍ਥ ਅਵਿਜ੍ਜਾਯ ਤ੍ਵੇਵਾਤਿ ਅਵਿਜ੍ਜਾਯ ਏਵ ਤੁ. ਅਸੇਸਵਿਰਾਗਨਿਰੋਧਾਤਿ ਵਿਰਾਗਸਙ੍ਖਾਤੇਨ ਮਗ੍ਗੇਨ ਅਸੇਸਨਿਰੋਧਾ ਅਨੁਪ੍ਪਾਦਨਿਰੋਧਾ. ਸਙ੍ਖਾਰਨਿਰੋਧੋਤਿ ਸਙ੍ਖਾਰਾਨਂ ਅਨੁਪ੍ਪਾਦਨਿਰੋਧੋ ਹੋਤਿ, ਏਵਂ ਨਿਰੁਦ੍ਧਾਨਂ ਪਨ ਸਙ੍ਖਾਰਾਨਂ ਨਿਰੋਧਾ ਵਿਞ੍ਞਾਣਨਿਰੋਧੋ ਹੋਤਿ, ਵਿਞ੍ਞਾਣਾਦੀਨਞ੍ਚ ਨਿਰੋਧਾ ਨਾਮਰੂਪਾਦੀਨਿ ਨਿਰੁਦ੍ਧਾਨਿਯੇਵ ਹੋਨ੍ਤੀਤਿ ਦਸ੍ਸੇਤੁਂ ਸਙ੍ਖਾਰਨਿਰੋਧਾ ਵਿਞ੍ਞਾਣਨਿਰੋਧੋਤਿਆਦਿਂ ਵਤ੍ਵਾ ਏਵਮੇਤਸ੍ਸ ਕੇਵਲਸ੍ਸ ਦੁਕ੍ਖਕ੍ਖਨ੍ਧਸ੍ਸ ਨਿਰੋਧੋ ਹੋਤੀਤਿ ਵੁਤ੍ਤਂ. ਤਤ੍ਥ ਕੇਵਲਸ੍ਸਾਤਿ ਸਕਲਸ੍ਸ, ਸੁਦ੍ਧਸ੍ਸ ਵਾ, ਸਤ੍ਤਵਿਰਹਿਤਸ੍ਸਾਤਿ ਅਤ੍ਥੋ. ਦੁਕ੍ਖਕ੍ਖਨ੍ਧਸ੍ਸਾਤਿ ਦੁਕ੍ਖਰਾਸਿਸ੍ਸ. ਨਿਰੋਧੋ ਹੋਤੀਤਿ ਅਨੁਪ੍ਪਾਦੋ ਹੋਤਿ.

੪੦੬. ਇਮਸ੍ਮਿਂ ਅਸਤੀਤਿਆਦਿ ਵੁਤ੍ਤਪਟਿਪਕ੍ਖਨਯੇਨ ਵੇਦਿਤਬ੍ਬਂ.

੪੦੭. ਏਵਂ ਵਟ੍ਟਵਿਵਟ੍ਟਂ ਕਥੇਤ੍ਵਾ ਇਦਾਨਿ ਇਮਂ ਦ੍ਵਾਦਸਙ੍ਗਪਚ੍ਚਯਵਟ੍ਟਂ ਸਹ ਵਿਪਸ੍ਸਨਾਯ ਮਗ੍ਗੇਨ ਜਾਨਨ੍ਤਸ੍ਸ ਯਾ ਪਟਿਧਾਵਨਾ ਪਹੀਯਤਿ, ਤਸ੍ਸਾ ਅਭਾਵਂ ਪੁਚ੍ਛਨ੍ਤੋ ਅਪਿ ਨੁ ਤੁਮ੍ਹੇ, ਭਿਕ੍ਖਵੇਤਿਆਦਿਮਾਹ. ਤਤ੍ਥ ਏਵਂ ਜਾਨਨ੍ਤਾਤਿ ਏਵਂ ਸਹਵਿਪਸ੍ਸਨਾਯ ਮਗ੍ਗੇਨ ਜਾਨਨ੍ਤਾ. ਏਵਂ ਪਸ੍ਸਨ੍ਤਾਤਿ ਤਸ੍ਸੇਵ ਵੇਵਚਨਂ. ਪੁਬ੍ਬਨ੍ਤਨ੍ਤਿ ਪੁਰਿਮਕੋਟ੍ਠਾਸਂ, ਅਤੀਤਖਨ੍ਧਧਾਤੁਆਯਤਨਾਨੀਤਿ ਅਤ੍ਥੋ. ਪਟਿਧਾਵੇਯ੍ਯਾਥਾਤਿ ਤਣ੍ਹਾਦਿਟ੍ਠਿਵਸੇਨ ਪਟਿਧਾਵੇਯ੍ਯਾਥ. ਸੇਸਂ ਸਬ੍ਬਾਸਵਸੁਤ੍ਤੇ ਵਿਤ੍ਥਾਰਿਤਮੇਵ.

ਇਦਾਨਿ ਨੇਸਂ ਤਤ੍ਥ ਨਿਚ੍ਚਲਭਾਵਂ ਪੁਚ੍ਛਨ੍ਤੋ, ਅਪਿ ਨੁ ਤੁਮ੍ਹੇ, ਭਿਕ੍ਖਵੇ, ਏਵਂ ਜਾਨਨ੍ਤਾ ਏਵਂ ਪਸ੍ਸਨ੍ਤਾ ਏਵਂ ਵਦੇਯ੍ਯਾਥ, ਸਤ੍ਥਾ ਨੋ ਗਰੂਤਿਆਦਿਮਾਹ. ਤਤ੍ਥ ਗਰੂਤਿ ਭਾਰਿਕੋ ਅਕਾਮਾ ਅਨੁਵਤ੍ਤਿਤਬ੍ਬੋ. ਸਮਣੋਤਿ ਬੁਦ੍ਧਸਮਣੋ. ਅਞ੍ਞਂ ਸਤ੍ਥਾਰਂ ਉਦ੍ਦਿਸੇਯ੍ਯਾਥਾਤਿ ਅਯਂ ਸਤ੍ਥਾ ਅਮ੍ਹਾਕਂ ਕਿਚ੍ਚਂ ਸਾਧੇਤੁਂ ਨ ਸਕ੍ਕੋਤੀਤਿ ਅਪਿ ਨੁ ਏਵਂਸਞ੍ਞਿਨੋ ਹੁਤ੍ਵਾ ਅਞ੍ਞਂ ਬਾਹਿਰਕਂ ਸਤ੍ਥਾਰਂ ਉਦ੍ਦਿਸੇਯ੍ਯਾਥ. ਪੁਥੁਸਮਣਬ੍ਰਾਹ੍ਮਣਾਨਨ੍ਤਿ ਏਵਂਸਞ੍ਞਿਨੋ ਹੁਤ੍ਵਾ ਪੁਥੂਨਂ ਤਿਤ੍ਥਿਯਸਮਣਾਨਂ ਚੇਵ ਬ੍ਰਾਹ੍ਮਣਾਨਞ੍ਚ. ਵਤਕੋਤੂਹਲਮਙ੍ਗਲਾਨੀਤਿ ਵਤਸਮਾਦਾਨਾਨਿ ਚ ਦਿਟ੍ਠਿਕੁਤੂਹਲਾਨਿ ਚ ਦਿਟ੍ਠਸੁਤਮੁਤਮਙ੍ਗਲਾਨਿ ਚ. ਤਾਨਿ ਸਾਰਤੋ ਪਚ੍ਚਾਗਚ੍ਛੇਯ੍ਯਾਥਾਤਿ ਏਤਾਨਿ ਸਾਰਨ੍ਤਿ ਏਵਂਸਞ੍ਞਿਨੋ ਹੁਤ੍ਵਾ ਪਟਿਆਗਚ੍ਛੇਯ੍ਯਾਥ. ਏਵਂ ਨਿਸ੍ਸਟ੍ਠਾਨਿ ਚ ਪੁਨ ਗਣ੍ਹੇਯ੍ਯਾਥਾਤਿ ਅਤ੍ਥੋ. ਸਾਮਂ ਞਾਤਨ੍ਤਿ ਸਯਂ ਞਾਣੇਨ ਞਾਤਂ. ਸਾਮਂ ਦਿਟ੍ਠਨ੍ਤਿ ਸਯਂ ਪਞ੍ਞਾਚਕ੍ਖੁਨਾ ਦਿਟ੍ਠਂ. ਸਾਮਂ ਵਿਦਿਤਨ੍ਤਿ ਸਯਂ ਵਿਭਾਵਿਤਂ ਪਾਕਟਂ ਕਤਂ. ਉਪਨੀਤਾ ਖੋ ਮੇ ਤੁਮ੍ਹੇਤਿ ਮਯਾ, ਭਿਕ੍ਖਵੇ, ਤੁਮ੍ਹੇ ਇਮਿਨਾ ਸਨ੍ਦਿਟ੍ਠਿਕਾਦਿਸਭਾਵੇਨ ਧਮ੍ਮੇਨ ਨਿਬ੍ਬਾਨਂ ਉਪਨੀਤਾ, ਪਾਪਿਤਾਤਿ ਅਤ੍ਥੋ. ਸਨ੍ਦਿਟ੍ਠਿਕੋਤਿਆਦੀਨਮਤ੍ਥੋ ਵਿਸੁਦ੍ਧਿਮਗ੍ਗੇ ਵਿਤ੍ਥਾਰਿਤੋ. ਇਦਮੇਤਂ ਪਟਿਚ੍ਚ ਵੁਤ੍ਤਨ੍ਤਿ ਏਤਂ ਵਚਨਮਿਦਂ ਤੁਮ੍ਹੇਹਿ ਸਾਮਂ ਞਾਤਾਦਿਭਾਵਂ ਪਟਿਚ੍ਚ ਵੁਤ੍ਤਂ.

੪੦੮. ਤਿਣ੍ਣਂ ਖੋ ਪਨ, ਭਿਕ੍ਖਵੇਤਿ ਕਸ੍ਮਾ ਆਰਭਿ? ਨਨੁ ਹੇਟ੍ਠਾ ਵਟ੍ਟਵਿਵਟ੍ਟਵਸੇਨ ਦੇਸਨਾ ਮਤ੍ਥਕਂ ਪਾਪਿਤਾਤਿ? ਆਮ ਪਾਪਿਤਾ. ਅਯਂ ਪਨ ਪਾਟਿਏਕ੍ਕੋ ਅਨੁਸਨ੍ਧਿ, ‘‘ਅਯਞ੍ਹਿ ਲੋਕਸਨ੍ਨਿਵਾਸੋ ਪਟਿਸਨ੍ਧਿਸਮ੍ਮੂਲ਼੍ਹੋ, ਤਸ੍ਸ ਸਮ੍ਮੋਹਟ੍ਠਾਨਂ ਵਿਦ੍ਧਂਸੇਤ੍ਵਾ ਪਾਕਟਂ ਕਰਿਸ੍ਸਾਮੀ’’ਤਿ ਇਮਂ ਦੇਸਨਂ ਆਰਭਿ. ਅਪਿਚ ਵਟ੍ਟਮੂਲਂ ਅਵਿਜ੍ਜਾ, ਵਿਵਟ੍ਟਮੂਲਂ ਬੁਦ੍ਧੁਪ੍ਪਾਦੋ, ਇਤਿ ਵਟ੍ਟਮੂਲਂ ਅਵਿਜ੍ਜਂ ਵਿਵਟ੍ਟਮੂਲਞ੍ਚ ਬੁਦ੍ਧੁਪ੍ਪਾਦਂ ਦਸ੍ਸੇਤ੍ਵਾਪਿ, ‘‘ਪੁਨ ਏਕਵਾਰਂ ਵਟ੍ਟਵਿਵਟ੍ਟਵਸੇਨ ਦੇਸਨਂ ਮਤ੍ਥਕਂ ਪਾਪੇਸ੍ਸਾਮੀ’’ਤਿ ਇਮਂ ਦੇਸਨਂ ਆਰਭਿ. ਤਤ੍ਥ ਸਨ੍ਨਿਪਾਤਾਤਿ ਸਮੋਧਾਨੇਨ ਪਿਣ੍ਡਭਾਵੇਨ. ਗਬ੍ਭਸ੍ਸਾਤਿ ਗਬ੍ਭੇ ਨਿਬ੍ਬਤ੍ਤਨਕਸਤ੍ਤਸ੍ਸ. ਅਵਕ੍ਕਨ੍ਤਿ ਹੋਤੀਤਿ ਨਿਬ੍ਬਤ੍ਤਿ ਹੋਤਿ. ਕਤ੍ਥਚਿ ਹਿ ਗਬ੍ਭੋਤਿ ਮਾਤੁਕੁਚ੍ਛਿ ਵੁਤ੍ਤੋ. ਯਥਾਹ –

‘‘ਯਮੇਕਰਤ੍ਤਿਂ ਪਠਮਂ, ਗਬ੍ਭੇ ਵਸਤਿ ਮਾਣਵੋ;

ਅਬ੍ਭੁਟ੍ਠਿਤੋਵ ਸੋ ਯਾਤਿ, ਸ ਗਚ੍ਛਂ ਨ ਨਿਵਤ੍ਤਤੀ’’ਤਿ. (ਜਾ. ੧.੧੫.੩੬੩);

ਕਤ੍ਥਚਿ ਗਬ੍ਭੇ ਨਿਬ੍ਬਤ੍ਤਨਸਤ੍ਤੋ. ਯਥਾਹ – ‘‘ਯਥਾ ਖੋ, ਪਨਾਨਨ੍ਦ, ਅਞ੍ਞਾ ਇਤ੍ਥਿਕਾ ਨਵ ਵਾ ਦਸ ਵਾ ਮਾਸੇ ਗਬ੍ਭਂ ਕੁਚ੍ਛਿਨਾ ਪਰਿਹਰਿਤ੍ਵਾ ਵਿਜਾਯਨ੍ਤੀ’’ਤਿ (ਮ. ਨਿ. ੩.੨੦੫). ਇਧ ਸਤ੍ਤੋ ਅਧਿਪ੍ਪੇਤੋ, ਤਂ ਸਨ੍ਧਾਯ ਵੁਤ੍ਤਂ ‘‘ਗਬ੍ਭਸ੍ਸ ਅਵਕ੍ਕਨ੍ਤਿ ਹੋਤੀ’’ਤਿ.

ਇਧਾਤਿ ਇਮਸ੍ਮਿਂ ਸਤ੍ਤਲੋਕੇ. ਮਾਤਾ ਚ ਉਤੁਨੀ ਹੋਤੀਤਿ ਇਦਂ ਉਤੁਸਮਯਂ ਸਨ੍ਧਾਯ ਵੁਤ੍ਤਂ. ਮਾਤੁਗਾਮਸ੍ਸ ਕਿਰ ਯਸ੍ਮਿਂ ਓਕਾਸੇ ਦਾਰਕੋ ਨਿਬ੍ਬਤ੍ਤਤਿ, ਤਤ੍ਥ ਮਹਤੀ ਲੋਹਿਤਪੀਲ਼ਕਾ ਸਣ੍ਠਹਿਤ੍ਵਾ ਭਿਜ੍ਜਿਤ੍ਵਾ ਪਗ੍ਘਰਤਿ, ਵਤ੍ਥੁ ਸੁਦ੍ਧਂ ਹੋਤਿ, ਸੁਦ੍ਧੇ ਵਤ੍ਥੁਮ੍ਹਿ ਮਾਤਾਪਿਤੂਸੁ ਏਕਵਾਰਂ ਸਨ੍ਨਿਪਤਿਤੇਸੁ ਯਾਵ ਸਤ੍ਤ ਦਿਵਸਾਨਿ ਖੇਤ੍ਤਮੇਵ ਹੋਤਿ. ਤਸ੍ਮਿਂ ਸਮਯੇ ਹਤ੍ਥਗ੍ਗਾਹਵੇਣਿਗ੍ਗਾਹਾਦਿਨਾ ਅਙ੍ਗਪਰਾਮਸਨੇਨਪਿ ਦਾਰਕੋ ਨਿਬ੍ਬਤ੍ਤਤਿਯੇਵ. ਗਨ੍ਧਬ੍ਬੋਤਿ ਤਤ੍ਰੂਪਗਸਤ੍ਤੋ. ਪਚ੍ਚੁਪਟ੍ਠਿਤੋ ਹੋਤੀਤਿ ਨ ਮਾਤਾਪਿਤੂਨਂ ਸਨ੍ਨਿਪਾਤਂ ਓਲੋਕਯਮਾਨੋ ਸਮੀਪੇ ਠਿਤੋ ਪਚ੍ਚੁਪਟ੍ਠਿਤੋ ਨਾਮ ਹੋਤਿ. ਕਮ੍ਮਯਨ੍ਤਯਨ੍ਤਿਤੋ ਪਨ ਏਕੋ ਸਤ੍ਤੋ ਤਸ੍ਮਿਂ ਓਕਾਸੇ ਨਿਬ੍ਬਤ੍ਤਨਕੋ ਹੋਤੀਤਿ ਅਯਮੇਤ੍ਥ ਅਧਿਪ੍ਪਾਯੋ. ਸਂਸਯੇਨਾਤਿ ‘‘ਅਰੋਗੋ ਨੁ ਖੋ ਭਵਿਸ੍ਸਾਮਿ ਅਹਂ ਵਾ, ਪੁਤ੍ਤੋ ਵਾ ਮੇ’’ਤਿ ਏਵਂ ਮਹਨ੍ਤੇਨ ਜੀਵਿਤਸਂਸਯੇਨ. ਲੋਹਿਤਞ੍ਹੇਤਂ, ਭਿਕ੍ਖਵੇਤਿ ਤਦਾ ਕਿਰ ਮਾਤੁਲੋਹਿਤਂ ਤਂ ਠਾਨਂ ਸਮ੍ਪਤ੍ਤਂ ਪੁਤ੍ਤਸਿਨੇਹੇਨ ਪਣ੍ਡਰਂ ਹੋਤਿ. ਤਸ੍ਮਾ ਏਵਮਾਹ. ਵਙ੍ਕਕਨ੍ਤਿ ਗਾਮਦਾਰਕਾਨਂ ਕੀਲ਼ਨਕਂ ਖੁਦ੍ਦਕਨਙ੍ਗਲਂ. ਘਟਿਕਾ ਵੁਚ੍ਚਤਿ ਦੀਘਦਣ੍ਡੇਨ ਰਸ੍ਸਦਣ੍ਡਕਂ ਪਹਰਣਕੀਲ਼ਾ. ਮੋਕ੍ਖਚਿਕਨ੍ਤਿ ਸਮ੍ਪਰਿਵਤ੍ਤਕਕੀਲ਼ਾ, ਆਕਾਸੇ ਵਾ ਦਣ੍ਡਕਂ ਗਹੇਤ੍ਵਾ ਭੂਮਿਯਂ ਵਾ ਸੀਸਂ ਠਪੇਤ੍ਵਾ ਹੇਟ੍ਠੁਪਰਿਯਭਾਵੇਨ ਪਰਿਵਤ੍ਤਨਕੀਲ਼ਨਨ੍ਤਿ ਵੁਤ੍ਤਂ ਹੋਤਿ. ਚਿਙ੍ਗੁਲਕਂ ਵੁਚ੍ਚਤਿ ਤਾਲਪਣ੍ਣਾਦੀਹਿ ਕਤਂ ਵਾਤਪ੍ਪਹਾਰੇਨ ਪਰਿਬ੍ਭਮਨਚਕ੍ਕਂ. ਪਤ੍ਤਾਲ਼੍ਹਕਂ ਵੁਚ੍ਚਤਿ ਪਣ੍ਣਨਾਲ਼ਿਕਾ, ਤਾਯ ਵਾਲਿਕਾਦੀਨਿ ਮਿਨਨ੍ਤਾ ਕੀਲ਼ਨ੍ਤਿ. ਰਥਕਨ੍ਤਿ ਖੁਦ੍ਦਕਰਥਂ. ਧਨੁਕਮ੍ਪਿ ਖੁਦ੍ਦਕਧਨੁਮੇਵ.

੪੦੯. ਸਾਰਜ੍ਜਤੀਤਿ ਰਾਗਂ ਉਪ੍ਪਾਦੇਤਿ. ਬ੍ਯਾਪਜ੍ਜਤੀਤਿ ਬ੍ਯਾਪਾਦਂ ਉਪ੍ਪਾਦੇਤਿ. ਅਨੁਪਟ੍ਠਿਤਕਾਯਸਤੀਤਿ ਕਾਯੇ ਸਤਿ ਕਾਯਸਤਿ, ਤਂ ਅਨੁਪਟ੍ਠਪੇਤ੍ਵਾਤਿ ਅਤ੍ਥੋ. ਪਰਿਤ੍ਤਚੇਤਸੋਤਿ ਅਕੁਸਲਚਿਤ੍ਤੋ. ਯਤ੍ਥਸ੍ਸ ਤੇ ਪਾਪਕਾਤਿ ਯਸ੍ਸਂ ਫਲਸਮਾਪਤ੍ਤਿਯਂ ਏਤੇ ਨਿਰੁਜ੍ਝਨ੍ਤਿ, ਤਂ ਨ ਜਾਨਾਤਿ ਨਾਧਿਗਚ੍ਛਤੀਤਿ ਅਤ੍ਥੋ. ਅਨੁਰੋਧਵਿਰੋਧਨ੍ਤਿ ਰਾਗਞ੍ਚੇਵ ਦੋਸਞ੍ਚ. ਅਭਿਨਨ੍ਦਤੀਤਿ ਤਣ੍ਹਾਵਸੇਨ ਅਭਿਨਨ੍ਦਤਿ, ਤਣ੍ਹਾਵਸੇਨੇਵ ਅਹੋ ਸੁਖਨ੍ਤਿਆਦੀਨਿ ਵਦਨ੍ਤੋ ਅਭਿਵਦਤਿ. ਅਜ੍ਝੋਸਾਯ ਤਿਟ੍ਠਤੀਤਿ ਤਣ੍ਹਾਅਜ੍ਝੋਸਾਨਗਹਣੇਨ ਗਿਲਿਤ੍ਵਾ ਪਰਿਨਿਟ੍ਠਪੇਤ੍ਵਾ ਗਣ੍ਹਾਤਿ. ਸੁਖਂ ਵਾ ਅਦੁਕ੍ਖਮਸੁਖਂ ਵਾ ਅਭਿਨਨ੍ਦਤੁ, ਦੁਕ੍ਖਂ ਕਥਂ ਅਭਿਨਨ੍ਦਤੀਤਿ? ‘‘ਅਹਂ ਦੁਕ੍ਖਿਤੋ ਮਮ ਦੁਕ੍ਖ’’ਨ੍ਤਿ ਗਣ੍ਹਨ੍ਤੋ ਅਭਿਨਨ੍ਦਤਿ ਨਾਮ. ਉਪ੍ਪਜ੍ਜਤਿ ਨਨ੍ਦੀਤਿ ਤਣ੍ਹਾ ਉਪ੍ਪਜ੍ਜਤਿ. ਤਦੁਪਾਦਾਨਨ੍ਤਿ ਸਾਵ ਤਣ੍ਹਾ ਗਹਣਟ੍ਠੇਨ ਉਪਾਦਾਨਂ ਨਾਮ. ਤਸ੍ਸ ਉਪਾਦਾਨਪਚ੍ਚਯਾ ਭਵੋ…ਪੇ… ਸਮੁਦਯੋ ਹੋਤੀਤਿ, ਇਦਞ੍ਹਿ ਭਗਵਤਾ ਪੁਨ ਏਕਵਾਰਂ ਦ੍ਵਿਸਨ੍ਧਿ ਤਿਸਙ੍ਖੇਪਂ ਪਚ੍ਚਯਾਕਾਰਵਟ੍ਟਂ ਦਸ੍ਸਿਤਂ.

੪੧੦-੪. ਇਦਾਨਿ ਵਿਵਟ੍ਟਂ ਦਸ੍ਸੇਤੁਂ ਇਧ, ਭਿਕ੍ਖਵੇ, ਤਥਾਗਤੋ ਲੋਕੇ ਉਪ੍ਪਜ੍ਜਤੀਤਿਆਦਿਮਾਹ. ਤਤ੍ਥ ਅਪ੍ਪਮਾਣਚੇਤਸੋਤਿ ਅਪ੍ਪਮਾਣਂ ਲੋਕੁਤ੍ਤਰਂ ਚੇਤੋ ਅਸ੍ਸਾਤਿ ਅਪ੍ਪਮਾਣਚੇਤਸੋ, ਮਗ੍ਗਚਿਤ੍ਤਸਮਙ੍ਗੀਤਿ ਅਤ੍ਥੋ. ਇਮਂ ਖੋ ਮੇ ਤੁਮ੍ਹੇ, ਭਿਕ੍ਖਵੇ, ਸਂਖਿਤ੍ਤੇਨ ਤਣ੍ਹਾਸਙ੍ਖਯਵਿਮੁਤ੍ਤਿਂ ਧਾਰੇਥਾਤਿ, ਭਿਕ੍ਖਵੇ, ਇਮਂ ਸਂਖਿਤ੍ਤੇਨ ਦੇਸਿਤਂ ਮਯ੍ਹਂ, ਤਣ੍ਹਾਸਙ੍ਖਯਵਿਮੁਤ੍ਤਿਦੇਸਨਂ ਤੁਮ੍ਹੇ ਨਿਚ੍ਚਕਾਲਂ ਧਾਰੇਯ੍ਯਾਥ ਮਾ ਪਮਜ੍ਜੇਯ੍ਯਾਥ. ਦੇਸਨਾ ਹਿ ਏਤ੍ਥ ਵਿਮੁਤ੍ਤਿਪਟਿਲਾਭਹੇਤੁਤੋ ਵਿਮੁਤ੍ਤੀਤਿ ਵੁਤ੍ਤਾ. ਮਹਾਤਣ੍ਹਾਜਾਲਤਣ੍ਹਾਸਙ੍ਘਾਟਪਟਿਮੁਕ੍ਕਨ੍ਤਿ ਤਣ੍ਹਾਵ ਸਂਸਿਬ੍ਬਿਤਟ੍ਠੇਨ ਮਹਾਤਣ੍ਹਾਜਾਲਂ, ਸਙ੍ਘਟਿਤਟ੍ਠੇਨ ਸਙ੍ਘਾਟਨ੍ਤਿ ਵੁਚ੍ਚਤਿ; ਇਤਿ ਇਮਸ੍ਮਿਂ ਮਹਾਤਣ੍ਹਾਜਾਲੇ ਤਣ੍ਹਾਸਙ੍ਘਾਟੇ ਚ ਇਮਂ ਸਾਤਿਂ ਭਿਕ੍ਖੁਂ ਕੇਵਟ੍ਟਪੁਤ੍ਤਂ ਪਟਿਮੁਕ੍ਕਂ ਧਾਰੇਥ. ਅਨੁਪਵਿਟ੍ਠੋ ਅਨ੍ਤੋਗਧੋਤਿ ਨਂ ਧਾਰੇਥਾਤਿ ਅਤ੍ਥੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਮਹਾਤਣ੍ਹਾਸਙ੍ਖਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.