੭. ਚੂਲ਼ਤਣ੍ਹਾਸਙ੍ਖਯਸੁਤ੍ਤਵਣ੍ਣਨਾ

੩੯੦. ਏਵਂ ਮੇ ਸੁਤਨ੍ਤਿ ਚੂਲ਼ਤਣ੍ਹਾਸਙ੍ਖਯਸੁਤ੍ਤਂ. ਤਤ੍ਥ ਪੁਬ੍ਬਾਰਾਮੇ ਮਿਗਾਰਮਾਤੁਪਾਸਾਦੇਤਿ ਪੁਬ੍ਬਾਰਾਮਸਙ੍ਖਾਤੇ ਵਿਹਾਰੇ ਮਿਗਾਰਮਾਤੁਯਾ ਪਾਸਾਦੇ. ਤਤ੍ਰਾਯਂ ਅਨੁਪੁਬ੍ਬੀਕਥਾਅਤੀਤੇ ਸਤਸਹਸ੍ਸਕਪ੍ਪਮਤ੍ਥਕੇ ਏਕਾ ਉਪਾਸਿਕਾ ਪਦੁਮੁਤ੍ਤਰਂ ਭਗਵਨ੍ਤਂ ਨਿਮਨ੍ਤੇਤ੍ਵਾ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਸਤਸਹਸ੍ਸਂ ਦਾਨਂ ਦਤ੍ਵਾ ਭਗਵਤੋ ਪਾਦਮੂਲੇ ਨਿਪਜ੍ਜਿਤ੍ਵਾ, ‘‘ਅਨਾਗਤੇ ਤੁਮ੍ਹਾਦਿਸਸ੍ਸ ਬੁਦ੍ਧਸ੍ਸ ਅਗ੍ਗੁਪਟ੍ਠਾਯਿਕਾ ਹੋਮੀ’’ਤਿ ਪਤ੍ਥਨਮਕਾਸਿ. ਸਾ ਕਪ੍ਪਸਤਸਹਸ੍ਸਂ ਦੇਵੇਸੁ ਚੇਵ ਮਨੁਸ੍ਸੇਸੁ ਚ ਸਂਸਰਿਤ੍ਵਾ ਅਮ੍ਹਾਕਂ ਭਗਵਤੋ ਕਾਲੇ ਭਦ੍ਦਿਯਨਗਰੇ ਮੇਣ੍ਡਕਸੇਟ੍ਠਿਪੁਤ੍ਤਸ੍ਸ ਧਨਞ੍ਜਯਸ੍ਸ ਸੇਟ੍ਠਿਨੋ ਗਹੇ ਸੁਮਨਦੇਵਿਯਾ ਕੁਚ੍ਛਿਮ੍ਹਿ ਪਟਿਸਨ੍ਧਿਂ ਗਣ੍ਹਿ. ਜਾਤਕਾਲੇ ਚਸ੍ਸਾ ਵਿਸਾਖਾਤਿ ਨਾਮਂ ਅਕਂਸੁ. ਸਾ ਯਦਾ ਭਗਵਾ ਭਦ੍ਦਿਯਨਗਰਂ ਅਗਮਾਸਿ, ਤਦਾ ਪਞ੍ਚਹਿ ਦਾਰਿਕਾਸਤੇਹਿ ਸਦ੍ਧਿਂ ਭਗਵਤੋ ਪਚ੍ਚੁਗ੍ਗਮਨਂ ਕਤ੍ਵਾ ਪਠਮਦਸ੍ਸਨਮ੍ਹਿਯੇਵ ਸੋਤਾਪਨ੍ਨਾ ਅਹੋਸਿ. ਅਪਰਭਾਗੇ ਸਾਵਤ੍ਥਿਯਂ ਮਿਗਾਰਸੇਟ੍ਠਿਪੁਤ੍ਤਸ੍ਸ ਪੁਣ੍ਣਵਡ੍ਢਨਕੁਮਾਰਸ੍ਸ ਗੇਹਂ ਗਤਾ, ਤਤ੍ਥ ਨਂ ਮਿਗਾਰਸੇਟ੍ਠਿ ਮਾਤਿਟ੍ਠਾਨੇ ਠਪੇਸਿ, ਤਸ੍ਮਾ ਮਿਗਾਰਮਾਤਾਤਿ ਵੁਚ੍ਚਤਿ.

ਪਤਿਕੁਲਂ ਗਚ੍ਛਨ੍ਤਿਯਾ ਚਸ੍ਸਾ ਪਿਤਾ ਮਹਾਲਤਾਪਿਲ਼ਨ੍ਧਨਂ ਨਾਮ ਕਾਰਾਪੇਸਿ. ਤਸ੍ਮਿਂ ਪਿਲ਼ਨ੍ਧਨੇ ਚਤਸ੍ਸੋ ਵਜਿਰਨਾਲ਼ਿਯੋ ਉਪਯੋਗਂ ਅਗਮਂਸੁ, ਮੁਤ੍ਤਾਨਂ ਏਕਾਦਸ ਨਾਲ਼ਿਯੋ, ਪਵਾਲ਼ਾਨਂ ਦ੍ਵਾਵੀਸਤਿ ਨਾਲ਼ਿਯੋ, ਮਣੀਨਂ ਤੇਤ੍ਤਿਂਸ ਨਾਲ਼ਿਯੋ, ਇਤਿ ਏਤੇਹਿ ਚ ਅਞ੍ਞੇਹਿ ਚ ਸਤ੍ਤਵਣ੍ਣੇਹਿ ਰਤਨੇਹਿ ਨਿਟ੍ਠਾਨਂ ਅਗਮਾਸਿ. ਤਂ ਸੀਸੇ ਪਟਿਮੁਕ੍ਕਂ ਯਾਵ ਪਾਦਪਿਟ੍ਠਿਯਾ ਭਸ੍ਸਤਿ, ਪਞ੍ਚਨ੍ਨਂ ਹਤ੍ਥੀਨਂ ਬਲਂ ਧਾਰਯਮਾਨਾਵ ਨਂ ਇਤ੍ਥੀ ਧਾਰੇਤੁਂ ਸਕ੍ਕੋਤਿ. ਸਾ ਅਪਰਭਾਗੇ ਦਸਬਲਸ੍ਸ ਅਗ੍ਗੁਪਟ੍ਠਾਯਿਕਾ ਹੁਤ੍ਵਾ ਤਂ ਪਸਾਧਨਂ ਵਿਸ੍ਸਜ੍ਜੇਤ੍ਵਾ ਨਵਹਿ ਕੋਟੀਹਿ ਭਗਵਤੋ ਵਿਹਾਰਂ ਕਾਰਯਮਾਨਾ ਕਰੀਸਮਤ੍ਤੇ ਭੂਮਿਭਾਗੇ ਪਾਸਾਦਂ ਕਾਰੇਸਿ. ਤਸ੍ਸ ਉਪਰਿਭੂਮਿਯਂ ਪਞ੍ਚ ਗਬ੍ਭਸਤਾਨਿ ਹੋਨ੍ਤਿ, ਹੇਟ੍ਠਾਭੂਮਿਯਂ ਪਞ੍ਚਾਤਿ ਗਬ੍ਭਸਹਸ੍ਸਪ੍ਪਟਿਮਣ੍ਡਿਤੋ ਅਹੋਸਿ. ਸਾ ‘‘ਸੁਦ੍ਧਪਾਸਾਦੋਵ ਨ ਸੋਭਤੀ’’ਤਿ ਤਂ ਪਰਿਵਾਰੇਤ੍ਵਾ ਪਞ੍ਚ ਦ੍ਵਿਕੂਟਗੇਹਸਤਾਨਿ, ਪਞ੍ਚ ਚੂਲ਼ਪਾਸਾਦਸਤਾਨਿ, ਪਞ੍ਚ ਦੀਘਸਾਲਸਤਾਨਿ ਚ ਕਾਰਾਪੇਸਿ. ਵਿਹਾਰਮਹੋ ਚਤੂਹਿ ਮਾਸੇਹਿ ਨਿਟ੍ਠਾਨਂ ਅਗਮਾਸਿ.

ਮਾਤੁਗਾਮਤ੍ਤਭਾਵੇ ਠਿਤਾਯ ਵਿਸਾਖਾਯ ਵਿਯ ਅਞ੍ਞਿਸ੍ਸਾ ਬੁਦ੍ਧਸਾਸਨੇ ਧਨਪਰਿਚ੍ਚਾਗੋ ਨਾਮ ਨਤ੍ਥਿ, ਪੁਰਿਸਤ੍ਤਭਾਵੇ ਠਿਤਸ੍ਸ ਚ ਅਨਾਥਪਿਣ੍ਡਿਕਸ੍ਸ ਵਿਯ ਅਞ੍ਞਸ੍ਸ ਬੁਦ੍ਧਸਾਸਨੇ ਧਨਪਰਿਚ੍ਚਾਗੋ ਨਾਮ ਨਤ੍ਥਿ. ਸੋ ਹਿ ਚਤੁਪਞ੍ਞਾਸਕੋਟਿਯੋ ਵਿਸ੍ਸਜ੍ਜੇਤ੍ਵਾ ਸਾਵਤ੍ਥਿਯਾ ਦਕ੍ਖਿਣਭਾਗੇ ਅਨੁਰਾਧਪੁਰਸ੍ਸ ਮਹਾਵਿਹਾਰਸਦਿਸੇ ਠਾਨੇ ਜੇਤਵਨਮਹਾਵਿਹਾਰਂ ਨਾਮ ਕਾਰੇਸਿ. ਵਿਸਾਖਾ, ਸਾਵਤ੍ਥਿਯਾ ਪਾਚੀਨਭਾਗੇ ਉਤ੍ਤਮਦੇਵੀਵਿਹਾਰਸਦਿਸੇ ਠਾਨੇ ਪੁਬ੍ਬਾਰਾਮਂ ਨਾਮ ਕਾਰੇਸਿ. ਭਗਵਾ ਇਮੇਸਂ ਦ੍ਵਿਨ੍ਨਂ ਕੁਲਾਨਂ ਅਨੁਕਮ੍ਪਾਯ ਸਾਵਤ੍ਥਿਂ ਨਿਸ੍ਸਾਯ ਵਿਹਰਨ੍ਤੋ ਇਮੇਸੁ ਦ੍ਵੀਸੁ ਵਿਹਾਰੇਸੁ ਨਿਬਦ੍ਧਵਾਸਂ ਵਸਿ. ਏਕਂ ਅਨ੍ਤੋਵਸ੍ਸਂ ਜੇਤਵਨੇ ਵਸਤਿ, ਏਕਂ ਪੁਬ੍ਬਾਰਾਮੇ, ਏਤਸ੍ਮਿਂ ਪਨ ਸਮਯੇ ਭਗਵਾ ਪੁਬ੍ਬਾਰਾਮੇ ਵਿਹਰਤਿ. ਤੇਨ ਵੁਤ੍ਤਂ – ‘‘ਪੁਬ੍ਬਾਰਾਮੇ ਮਿਗਾਰਮਾਤੁਪਾਸਾਦੇ’’ਤਿ.

ਕਿਤ੍ਤਾਵਤਾ ਨੁ ਖੋ, ਭਨ੍ਤੇਤਿ ਕਿਤ੍ਤਕੇਨ ਨੁ ਖੋ, ਭਨ੍ਤੇ. ਸਂਖਿਤ੍ਤੇਨ ਤਣ੍ਹਾਸਙ੍ਖਯਵਿਮੁਤ੍ਤੋ ਹੋਤੀਤਿ ਤਣ੍ਹਾਸਙ੍ਖਯੇ ਨਿਬ੍ਬਾਨੇ ਤਂ ਆਰਮ੍ਮਣਂ ਕਤ੍ਵਾ ਵਿਮੁਤ੍ਤਚਿਤ੍ਤਤਾਯ ਤਣ੍ਹਾਸਙ੍ਖਯਵਿਮੁਤ੍ਤੋ ਨਾਮ ਸਂਖਿਤ੍ਤੇਨ ਕਿਤ੍ਤਾਵਤਾ ਹੋਤਿ? ਯਾਯ ਪਟਿਪਤ੍ਤਿਯਾ ਤਣ੍ਹਾਸਙ੍ਖਯਵਿਮੁਤ੍ਤੋ ਹੋਤਿ, ਤਂ ਮੇ ਖੀਣਾਸਵਸ੍ਸ ਭਿਕ੍ਖੁਨੋ ਪੁਬ੍ਬਭਾਗਪ੍ਪਟਿਪਦਂ ਸਂਖਿਤ੍ਤੇਨ ਦੇਸੇਥਾਤਿ ਪੁਚ੍ਛਤਿ. ਅਚ੍ਚਨ੍ਤਨਿਟ੍ਠੋਤਿ ਖਯਵਯਸਙ੍ਖਾਤਂ ਅਨ੍ਤਂ ਅਤੀਤਾਤਿ ਅਚ੍ਚਨ੍ਤਾ. ਅਚ੍ਚਨ੍ਤਾ ਨਿਟ੍ਠਾ ਅਸ੍ਸਾਤਿ ਅਚ੍ਚਨ੍ਤਨਿਟ੍ਠੋ, ਏਕਨ੍ਤਨਿਟ੍ਠੋ ਸਤਤਨਿਟ੍ਠੋਤਿ ਅਤ੍ਥੋ. ਅਚ੍ਚਨ੍ਤਂ ਯੋਗਕ੍ਖੇਮੀਤਿ ਅਚ੍ਚਨ੍ਤਯੋਗਕ੍ਖੇਮੀ, ਨਿਚ੍ਚਯੋਗਕ੍ਖੇਮੀਤਿ ਅਤ੍ਥੋ. ਅਚ੍ਚਨ੍ਤਂ ਬ੍ਰਹ੍ਮਚਾਰੀਤਿ ਅਚ੍ਚਨ੍ਤਬ੍ਰਹ੍ਮਚਾਰੀ, ਨਿਚ੍ਚਬ੍ਰਹ੍ਮਚਾਰੀਤਿ ਅਤ੍ਥੋ. ਅਚ੍ਚਨ੍ਤਂ ਪਰਿਯੋਸਾਨਮਸ੍ਸਾਤਿ ਪੁਰਿਮਨਯੇਨੇਵ ਅਚ੍ਚਨ੍ਤਪਰਿਯੋਸਾਨੋ. ਸੇਟ੍ਠੋ ਦੇਵਮਨੁਸ੍ਸਾਨਨ੍ਤਿ ਦੇਵਾਨਞ੍ਚ ਮਨੁਸ੍ਸਾਨਞ੍ਚ ਸੇਟ੍ਠੋ ਉਤ੍ਤਮੋ. ਏਵਰੂਪੋ ਭਿਕ੍ਖੁ ਕਿਤ੍ਤਾਵਤਾ ਹੋਤਿ, ਖਿਪ੍ਪਮੇਤਸ੍ਸ ਸਙ੍ਖੇਪੇਨੇਵ ਪਟਿਪਤ੍ਤਿਂ ਕਥੇਥਾਤਿ ਭਗਵਨ੍ਤਂ ਯਾਚਤਿ. ਕਸ੍ਮਾ ਪਨੇਸ ਏਵਂ ਵੇਗਾਯਤੀਤਿ? ਕੀਲ਼ਂ ਅਨੁਭਵਿਤੁਕਾਮਤਾਯ.

ਅਯਂ ਕਿਰ ਉਯ੍ਯਾਨਕੀਲ਼ਂ ਆਣਾਪੇਤ੍ਵਾ ਚਤੂਹਿ ਮਹਾਰਾਜੂਹਿ ਚਤੂਸੁ ਦਿਸਾਸੁ ਆਰਕ੍ਖਂ ਗਾਹਾਪੇਤ੍ਵਾ ਦ੍ਵੀਸੁ ਦੇਵਲੋਕੇਸੁ ਦੇਵਸਙ੍ਘੇਨ ਪਰਿਵੁਤੋ ਅਡ੍ਢਤਿਯਾਹਿ ਨਾਟਕਕੋਟੀਹਿ ਸਦ੍ਧਿਂ ਏਰਾਵਣਂ ਆਰੁਯ੍ਹ ਉਯ੍ਯਾਨਦ੍ਵਾਰੇ ਠਿਤੋ ਇਮਂ ਪਞ੍ਹਂ ਸਲ੍ਲਕ੍ਖੇਸਿ – ‘‘ਕਿਤ੍ਤਕੇਨ ਨੁ ਖੋ ਤਣ੍ਹਾਸਙ੍ਖਯਵਿਮੁਤ੍ਤਸ੍ਸ ਖੀਣਾਸਵਸ੍ਸ ਸਙ੍ਖੇਪਤੋ ਆਗਮਨਿਯਪੁਬ੍ਬਭਾਗਪਟਿਪਦਾ ਹੋਤੀ’’ਤਿ. ਅਥਸ੍ਸ ਏਤਦਹੋਸਿ – ‘‘ਅਯਂ ਪਞ੍ਹੋ ਅਤਿਵਿਯ ਸਸ੍ਸਿਰਿਕੋ, ਸਚਾਹਂ ਇਮਂ ਪਞ੍ਹਂ ਅਨੁਗ੍ਗਣ੍ਹਿਤ੍ਵਾਵ ਉਯ੍ਯਾਨਂ ਪਵਿਸਿਸ੍ਸਾਮਿ, ਛਦ੍ਵਾਰਿਕੇਹਿ ਆਰਮ੍ਮਣੇਹਿ ਨਿਮ੍ਮਥਿਤੋ ਨ ਪੁਨ ਇਮਂ ਪਞ੍ਹਂ ਸਲ੍ਲਕ੍ਖੇਸ੍ਸਾਮਿ, ਤਿਟ੍ਠਤੁ ਤਾਵ ਉਯ੍ਯਾਨਕੀਲ਼ਾ, ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਇਮਂ ਪਞ੍ਹਂ ਪੁਚ੍ਛਿਤ੍ਵਾ ਉਗ੍ਗਹਿਤਪਞ੍ਹੋ ਉਯ੍ਯਾਨੇ ਕੀਲ਼ਿਸ੍ਸਾਮੀ’’ਤਿ ਹਤ੍ਥਿਕ੍ਖਨ੍ਧੇ ਅਨ੍ਤਰਹਿਤੋ ਭਗਵਤੋ ਸਨ੍ਤਿਕੇ ਪਾਤੁਰਹੋਸਿ. ਤੇਪਿ ਚਤ੍ਤਾਰੋ ਮਹਾਰਾਜਾਨੋ ਆਰਕ੍ਖਂ ਗਹੇਤ੍ਵਾ ਠਿਤਟ੍ਠਾਨੇਯੇਵ ਠਿਤਾ, ਪਰਿਚਾਰਿਕਦੇਵਸਙ੍ਘਾਪਿ ਨਾਟਕਾਨਿਪਿ ਏਰਾਵਣੋਪਿ ਨਾਗਰਾਜਾ ਤਤ੍ਥੇਵ ਉਯ੍ਯਾਨਦ੍ਵਾਰੇ ਅਟ੍ਠਾਸਿ, ਏਵਮੇਸ ਕੀਲ਼ਂ ਅਨੁਭਵਿਤੁਕਾਮਤਾਯ ਵੇਗਾਯਨ੍ਤੋ ਏਵਮਾਹ.

ਸਬ੍ਬੇ ਧਮ੍ਮਾ ਨਾਲਂ ਅਭਿਨਿਵੇਸਾਯਾਤਿ ਏਤ੍ਥ ਸਬ੍ਬੇ ਧਮ੍ਮਾ ਨਾਮ ਪਞ੍ਚਕ੍ਖਨ੍ਧਾ ਦ੍ਵਾਦਸਾਯਤਨਾਨਿ ਅਟ੍ਠਾਰਸ ਧਾਤੁਯੋ. ਤੇ ਸਬ੍ਬੇਪਿ ਤਣ੍ਹਾਦਿਟ੍ਠਿਵਸੇਨ ਅਭਿਨਿਵੇਸਾਯ ਨਾਲਂ ਨ ਪਰਿਯਤ੍ਤਾ ਨ ਸਮਤ੍ਥਾ ਨ ਯੁਤ੍ਤਾ, ਕਸ੍ਮਾ? ਗਹਿਤਾਕਾਰੇਨ ਅਤਿਟ੍ਠਨਤੋ. ਤੇ ਹਿ ਨਿਚ੍ਚਾਤਿ ਗਹਿਤਾਪਿ ਅਨਿਚ੍ਚਾਵ ਸਮ੍ਪਜ੍ਜਨ੍ਤਿ, ਸੁਖਾਤਿ ਗਹਿਤਾਪਿ ਦੁਕ੍ਖਾਵ ਸਮ੍ਪਜ੍ਜਨ੍ਤਿ, ਅਤ੍ਤਾਤਿ ਗਹਿਤਾਪਿ ਅਨਤ੍ਤਾਵ ਸਮ੍ਪਜ੍ਜਨ੍ਤਿ, ਤਸ੍ਮਾ ਨਾਲਂ ਅਭਿਨਿਵੇਸਾਯ. ਅਭਿਜਾਨਾਤੀਤਿ ਅਨਿਚ੍ਚਂ ਦੁਕ੍ਖਂ ਅਨਤ੍ਤਾਤਿ ਞਾਤਪਰਿਞ੍ਞਾਯ ਅਭਿਜਾਨਾਤਿ. ਪਰਿਜਾਨਾਤੀਤਿ ਤਥੇਵ ਤੀਰਣਪਰਿਞ੍ਞਾਯ ਪਰਿਜਾਨਾਤਿ. ਯਂਕਿਞ੍ਚਿ ਵੇਦਨਨ੍ਤਿ ਅਨ੍ਤਮਸੋ ਪਞ੍ਚਵਿਞ੍ਞਾਣਸਮ੍ਪਯੁਤ੍ਤਮ੍ਪਿ ਯਂਕਿਞ੍ਚਿ ਅਪ੍ਪਮਤ੍ਤਕਮ੍ਪਿ ਵੇਦਨਂ ਅਨੁਭਵਤਿ. ਇਮਿਨਾ ਭਗਵਾ ਸਕ੍ਕਸ੍ਸ ਦੇਵਾਨਮਿਨ੍ਦਸ੍ਸ ਵੇਦਨਾਵਸੇਨ ਨਿਬ੍ਬਤ੍ਤੇਤ੍ਵਾ ਅਰੂਪਪਰਿਗ੍ਗਹਂ ਦਸ੍ਸੇਤਿ. ਸਚੇ ਪਨ ਵੇਦਨਾਕਮ੍ਮਟ੍ਠਾਨਂ ਹੇਟ੍ਠਾ ਨ ਕਥਿਤਂ ਭਵੇਯ੍ਯ, ਇਮਸ੍ਮਿਂ ਠਾਨੇ ਕਥੇਤਬ੍ਬਂ ਸਿਯਾ. ਹੇਟ੍ਠਾ ਪਨ ਕਥਿਤਂ, ਤਸ੍ਮਾ ਸਤਿਪਟ੍ਠਾਨੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਅਨਿਚ੍ਚਾਨੁਪਸ੍ਸੀਤਿ ਏਤ੍ਥ ਅਨਿਚ੍ਚਂ ਵੇਦਿਤਬ੍ਬਂ, ਅਨਿਚ੍ਚਾਨੁਪਸ੍ਸਨਾ ਵੇਦਿਤਬ੍ਬਾ, ਅਨਿਚ੍ਚਾਨੁਪਸ੍ਸੀ ਵੇਦਿਤਬ੍ਬੋ. ਤਤ੍ਥ ਅਨਿਚ੍ਚਨ੍ਤਿ ਪਞ੍ਚਕ੍ਖਨ੍ਧਾ, ਤੇ ਹਿ ਉਪ੍ਪਾਦਵਯਟ੍ਠੇਨ ਅਨਿਚ੍ਚਾ. ਅਨਿਚ੍ਚਾਨੁਪਸ੍ਸਨਾਤਿ ਪਞ੍ਚਕ੍ਖਨ੍ਧਾਨਂ ਖਯਤੋ ਵਯਤੋ ਦਸ੍ਸਨਞਾਣਂ. ਅਨਿਚ੍ਚਾਨੁਪਸ੍ਸੀਤਿ ਤੇਨ ਞਾਣੇਨ ਸਮਨ੍ਨਾਗਤੋ ਪੁਗ੍ਗਲੋ. ਤਸ੍ਮਾ ‘‘ਅਨਿਚ੍ਚਾਨੁਪਸ੍ਸੀ ਵਿਹਰਤੀ’’ਤਿ ਅਨਿਚ੍ਚਤੋ ਅਨੁਪਸ੍ਸਨ੍ਤੋ ਵਿਹਰਤੀਤਿ ਅਯਮੇਤ੍ਥ ਅਤ੍ਥੋ.

ਵਿਰਾਗਾਨੁਪਸ੍ਸੀਤਿ ਏਤ੍ਥ ਦ੍ਵੇ ਵਿਰਾਗਾ ਖਯਵਿਰਾਗੋ ਚ ਅਚ੍ਚਨ੍ਤਵਿਰਾਗੋ ਚ. ਤਤ੍ਥ ਸਙ੍ਖਾਰਾਨਂ ਖਯਵਯਤੋ ਅਨੁਪਸ੍ਸਨਾਪਿ, ਅਚ੍ਚਨ੍ਤਵਿਰਾਗਂ ਨਿਬ੍ਬਾਨਂ ਵਿਰਾਗਤੋ ਦਸ੍ਸਨਮਗ੍ਗਞਾਣਮ੍ਪਿ ਵਿਰਾਗਾਨੁਪਸ੍ਸਨਾ. ਤਦੁਭਯਸਮਾਙ੍ਗੀਪੁਗ੍ਗਲੋ ਵਿਰਾਗਾਨੁਪਸ੍ਸੀ ਨਾਮ, ਤਂ ਸਨ੍ਧਾਯ ਵੁਤ੍ਤਂ ‘‘ਵਿਰਾਗਾਨੁਪਸ੍ਸੀ’’ਤਿ, ਵਿਰਾਗਤੋ ਅਨੁਪਸ੍ਸਨ੍ਤੋਤਿ ਅਤ੍ਥੋ. ਨਿਰੋਧਾਨੁਪਸ੍ਸਿਮ੍ਹਿਪਿ ਏਸੇਵ ਨਯੋ, ਨਿਰੋਧੋਪਿ ਹਿ ਖਯਨਿਰੋਧੋ ਚ ਅਚ੍ਚਨ੍ਤਨਿਰੋਧੋ ਚਾਤਿ ਦੁਵਿਧੋਯੇਵ. ਪਟਿਨਿਸ੍ਸਗ੍ਗਾਨੁਪਸ੍ਸੀਤਿ ਏਤ੍ਥ ਪਟਿਨਿਸ੍ਸਗ੍ਗੋ ਵੁਚ੍ਚਤਿ ਵੋਸ੍ਸਗ੍ਗੋ, ਸੋ ਚ ਪਰਿਚ੍ਚਾਗਵੋਸ੍ਸਗ੍ਗੋ ਪਕ੍ਖਨ੍ਦਨਵੋਸ੍ਸਗ੍ਗੋਤਿ ਦੁਵਿਧੋ ਹੋਤਿ. ਤਤ੍ਥ ਪਰਿਚ੍ਚਾਗਵੋਸ੍ਸਗ੍ਗੋਤਿ ਵਿਪਸ੍ਸਨਾ, ਸਾ ਹਿ ਤਦਙ੍ਗਵਸੇਨ ਕਿਲੇਸੇ ਚ ਖਨ੍ਧੇ ਚ ਵੋਸ੍ਸਜ੍ਜਤਿ. ਪਕ੍ਖਨ੍ਦਨਵੋਸ੍ਸਗ੍ਗੋਤਿ ਮਗ੍ਗੋ, ਸੋ ਹਿ ਨਿਬ੍ਬਾਨਂ ਆਰਮ੍ਮਣਂ ਆਰਮ੍ਮਣਤੋ ਪਕ੍ਖਨ੍ਦਤਿ. ਦ੍ਵੀਹਿਪਿ ਵਾ ਕਾਰਣੇਹਿ ਵੋਸ੍ਸਗ੍ਗੋਯੇਵ, ਸਮੁਚ੍ਛੇਦਵਸੇਨ ਖਨ੍ਧਾਨਂ ਕਿਲੇਸਾਨਞ੍ਚ ਵੋਸ੍ਸਜ੍ਜਨਤੋ, ਨਿਬ੍ਬਾਨਞ੍ਚ ਪਕ੍ਖਨ੍ਦਨਤੋ. ਤਸ੍ਮਾ ਕਿਲੇਸੇ ਚ ਖਨ੍ਧੇ ਚ ਪਰਿਚ੍ਚਜਤੀਤਿ ਪਰਿਚ੍ਚਾਗਵੋਸ੍ਸਗ੍ਗੋ, ਨਿਰੋਧੇ ਨਿਬ੍ਬਾਨਧਾਤੁਯਾ ਚਿਤ੍ਤਂ ਪਕ੍ਖਨ੍ਦਤੀਤਿ ਪਕ੍ਖਨ੍ਦਨਵੋਸ੍ਸਗ੍ਗੋਤਿ ਉਭਯਮ੍ਪੇਤਂ ਮਗ੍ਗੇ ਸਮੇਤਿ. ਤਦੁਭਯਸਮਙ੍ਗੀਪੁਗ੍ਗਲੋ ਇਮਾਯ ਪਟਿਨਿਸ੍ਸਗ੍ਗਾਨੁਪਸ੍ਸਨਾਯ ਸਮਨ੍ਨਾਗਤਤ੍ਤਾ ਪਟਿਨਿਸ੍ਸਗ੍ਗਾਨੁਪਸ੍ਸੀ ਨਾਮ ਹੋਤਿ. ਤਂ ਸਨ੍ਧਾਯ ਵੁਤ੍ਤਂ ‘‘ਪਟਿਨਿਸ੍ਸਗ੍ਗਾਨੁਪਸ੍ਸੀ’’ਤਿ. ਨ ਕਿਞ੍ਚਿ ਲੋਕੇ ਉਪਾਦਿਯਤੀਤਿ ਕਿਞ੍ਚਿ ਏਕਮ੍ਪਿ ਸਙ੍ਖਾਰਗਤਂ ਤਣ੍ਹਾਵਸੇਨ ਨ ਉਪਾਦਿਯਤਿ ਨ ਗਣ੍ਹਾਤਿ ਨ ਪਰਾਮਸਤਿ. ਅਨੁਪਾਦਿਯਂ ਨ ਪਰਿਤਸ੍ਸਤੀਤਿ ਅਗ੍ਗਣ੍ਹਨ੍ਤੋ ਤਣ੍ਹਾਪਰਿਤਸ੍ਸਨਾਯ ਨ ਪਰਿਤਸ੍ਸਤਿ. ਪਚ੍ਚਤ੍ਤਞ੍ਞੇਵ ਪਰਿਨਿਬ੍ਬਾਯਤੀਤਿ ਸਯਮੇਵ ਕਿਲੇਸਪਰਿਨਿਬ੍ਬਾਨੇਨ ਪਰਿਨਿਬ੍ਬਾਯਤਿ. ਖੀਣਾ ਜਾਤੀਤਿਆਦਿਨਾ ਪਨਸ੍ਸ ਪਚ੍ਚਵੇਕ੍ਖਣਾਵ ਦਸ੍ਸਿਤਾ. ਇਤਿ ਭਗਵਾ ਸਕ੍ਕਸ੍ਸ ਦੇਵਾਨਮਿਨ੍ਦਸ੍ਸ ਸਂਖਿਤ੍ਤੇਨ ਖੀਣਾਸਵਸ੍ਸ ਪੁਬ੍ਬਭਾਗਪ੍ਪਟਿਪਦਂ ਪੁਚ੍ਛਿਤੋ ਸਲ੍ਲਹੁਕਂ ਕਤ੍ਵਾ ਸਂਖਿਤ੍ਤੇਨੇਵ ਖਿਪ੍ਪਂ ਕਥੇਸਿ.

੩੯੧. ਅਵਿਦੂਰੇ ਨਿਸਿਨ੍ਨੋ ਹੋਤੀਤਿ ਅਨਨ੍ਤਰੇ ਕੂਟਾਗਾਰੇ ਨਿਸਿਨ੍ਨੋ ਹੋਤਿ. ਅਭਿਸਮੇਚ੍ਚਾਤਿ ਞਾਣੇਨ ਅਭਿਸਮਾਗਨ੍ਤ੍ਵਾ, ਜਾਨਿਤ੍ਵਾਤਿ ਅਤ੍ਥੋ. ਇਦਂ ਵੁਤ੍ਤਂ ਹੋਤਿ – ਕਿਂ ਨੁ ਖੋ ਏਸ ਜਾਨਿਤ੍ਵਾ ਅਨੁਮੋਦਿ, ਉਦਾਹੁ ਅਜਾਨਿਤ੍ਵਾ ਵਾਤਿ. ਕਸ੍ਮਾ ਪਨਸ੍ਸ ਏਵਮਹੋਸੀਤਿ? ਥੇਰੋ ਕਿਰ ਨ ਭਗਵਤੋ ਪਞ੍ਹਵਿਸ੍ਸਜ੍ਜਨਸਦ੍ਦਂ ਅਸ੍ਸੋਸਿ, ਸਕ੍ਕਸ੍ਸ ਪਨ ਦੇਵਰਞ੍ਞੋ, ‘‘ਏਵਮੇਤਂ ਭਗਵਾ ਏਵਮੇਤਂ ਸੁਗਤਾ’’ਤਿ ਅਨੁਮੋਦਨਸਦ੍ਦਂ ਅਸ੍ਸੋਸਿ. ਸਕ੍ਕੋ ਕਿਰ ਦੇਵਰਾਜਾ ਮਹਤਾ ਸਦ੍ਦੇਨ ਅਨੁਮੋਦਿ. ਅਥ ਕਸ੍ਮਾ ਨ ਭਗਵਤੋ ਸਦ੍ਦਂ ਅਸ੍ਸੋਸੀਤਿ? ਯਥਾਪਰਿਸਵਿਞ੍ਞਾਪਕਤ੍ਤਾ. ਬੁਦ੍ਧਾਨਞ੍ਹਿ ਧਮ੍ਮਂ ਕਥੇਨ੍ਤਾਨਂ ਏਕਾਬਦ੍ਧਾਯ ਚਕ੍ਕਵਾਲ਼ਪਰਿਯਨ੍ਤਾਯਪਿ ਪਰਿਸਾਯ ਸਦ੍ਦੋ ਸੁਯ੍ਯਤਿ, ਪਰਿਯਨ੍ਤਂ ਪਨ ਮੁਞ੍ਚਿਤ੍ਵਾ ਅਙ੍ਗੁਲਿਮਤ੍ਤਮ੍ਪਿ ਬਹਿਦ੍ਧਾ ਨ ਨਿਚ੍ਛਰਤਿ. ਕਸ੍ਮਾ? ਏਵਰੂਪਾ ਮਧੁਰਕਥਾ ਮਾ ਨਿਰਤ੍ਥਕਾ ਅਗਮਾਸੀਤਿ. ਤਦਾ ਭਗਵਾ ਮਿਗਾਰਮਾਤੁਪਾਸਾਦੇ ਸਤ੍ਤਰਤਨਮਯੇ ਕੂਟਾਗਾਰੇ ਸਿਰਿਗਬ੍ਭਮ੍ਹਿ ਨਿਸਿਨ੍ਨੋ ਹੋਤਿ, ਤਸ੍ਸ ਦਕ੍ਖਿਣਪਸ੍ਸੇ ਸਾਰਿਪੁਤ੍ਤਤ੍ਥੇਰਸ੍ਸ ਵਸਨਕੂਟਾਗਾਰਂ, ਵਾਮਪਸ੍ਸੇ ਮਹਾਮੋਗ੍ਗਲ੍ਲਾਨਸ੍ਸ, ਅਨ੍ਤਰੇ ਛਿਦ੍ਦਵਿਵਰੋਕਾਸੋ ਨਤ੍ਥਿ, ਤਸ੍ਮਾ ਥੇਰੋ ਨ ਭਗਵਤੋ ਸਦ੍ਦਂ ਅਸ੍ਸੋਸਿ, ਸਕ੍ਕਸ੍ਸੇਵ ਅਸ੍ਸੋਸੀਤਿ.

ਪਞ੍ਚਹਿ ਤੂਰਿਯਸਤੇਹੀਤਿ ਪਞ੍ਚਙ੍ਗਿਕਾਨਂ ਤੂਰਿਯਾਨਂ ਪਞ੍ਚਹਿ ਸਤੇਹਿ. ਪਞ੍ਚਙ੍ਗਿਕਂ ਤੂਰਿਯਂ ਨਾਮ ਆਤਤਂ ਵਿਤਤਂ ਆਤਤਵਿਤਤਂ ਸੁਸਿਰਂ ਘਨਨ੍ਤਿ ਇਮੇਹਿ ਪਞ੍ਚਹਿ ਅਙ੍ਗੇਹਿ ਸਮਨ੍ਨਾਗਤਂ. ਤਤ੍ਥ ਆਤਤਂ ਨਾਮ ਚਮ੍ਮਪਰਿਯੋਨਦ੍ਧੇਸੁ ਭੇਰਿਆਦੀਸੁ ਏਕਤਲਤੂਰਿਯਂ. ਵਿਤਤਂ ਨਾਮ ਉਭਯਤਲਂ. ਆਤਤਵਿਤਤਂ ਨਾਮ ਤਨ੍ਤਿਬਦ੍ਧਪਣਵਾਦਿ. ਸੁਸਿਰਂ ਵਂਸਾਦਿ. ਘਨਂ ਸਮ੍ਮਾਦਿ. ਸਮਪ੍ਪਿਤੋਤਿ ਉਪਗਤੋ. ਸਮਙ੍ਗੀਭੂਤੋਤਿ ਤਸ੍ਸੇਵ ਵੇਵਚਨਂ. ਪਰਿਚਾਰੇਤੀਤਿ ਤਂ ਸਮ੍ਪਤ੍ਤਿਂ ਅਨੁਭਵਨ੍ਤੋ ਤਤੋ ਤਤੋ ਇਨ੍ਦ੍ਰਿਯਾਨਿ ਚਾਰੇਤਿ. ਇਦਂ ਵੁਤ੍ਤਂ ਹੋਤਿ – ਪਰਿਵਾਰੇਤ੍ਵਾ ਵਜ੍ਜਮਾਨੇਹਿ ਪਞ੍ਚਹਿ ਤੂਰਿਯਸਤੇਹਿ ਸਮਨ੍ਨਾਗਤੋ ਹੁਤ੍ਵਾ ਦਿਬ੍ਬਸਮ੍ਪਤ੍ਤਿਂ ਅਨੁਭਵਤੀ. ਪਟਿਪਣਾਮੇਤ੍ਵਾਤਿ ਅਪਨੇਤ੍ਵਾ, ਨਿਸ੍ਸਦ੍ਦਾਨਿ ਕਾਰਾਪੇਤ੍ਵਾਤਿ ਅਤ੍ਥੋ. ਯਥੇਵ ਹਿ ਇਦਾਨਿ ਸਦ੍ਧਾ ਰਾਜਾਨੋ ਗਰੁਭਾਵਨਿਯਂ ਭਿਕ੍ਖੁਂ ਦਿਸ੍ਵਾ – ‘‘ਅਸੁਕੋ ਨਾਮ ਅਯ੍ਯੋ ਆਗਚ੍ਛਤਿ, ਮਾ, ਤਾਤਾ, ਗਾਯਥ, ਮਾ ਵਾਦੇਥ, ਮਾ ਨਚ੍ਚਥਾ’’ਤਿ ਨਾਟਕਾਨਿ ਪਟਿਵਿਨੇਨ੍ਤਿ, ਸਕ੍ਕੋਪਿ ਥੇਰਂ ਦਿਸ੍ਵਾ ਏਵਮਕਾਸਿ. ਚਿਰਸ੍ਸਂ ਖੋ, ਮਾਰਿਸ ਮੋਗ੍ਗਲ੍ਲਾਨ, ਇਮਂ ਪਰਿਯਾਯਮਕਾਸੀਤਿ ਏਵਰੂਪਂ ਲੋਕੇ ਪਕਤਿਯਾ ਪਿਯਸਮੁਦਾਹਾਰਵਚਨਂ ਹੋਤਿ, ਲੋਕਿਯਾ ਹਿ ਚਿਰਸ੍ਸਂ ਆਗਤਮ੍ਪਿ ਅਨਾਗਤਪੁਬ੍ਬਮ੍ਪਿ ਮਨਾਪਜਾਤਿਯਂ ਆਗਤਂ ਦਿਸ੍ਵਾ, – ‘‘ਕੁਤੋ ਭਵਂ ਆਗਤੋ, ਚਿਰਸ੍ਸਂ ਭਵਂ ਆਗਤੋ, ਕਥਂ ਤੇ ਇਧਾਗਮਨਮਗ੍ਗੋ ਞਾਤੋ ਮਗ੍ਗਮੂਲ਼੍ਹੋਸੀ’’ਤਿਆਦੀਨਿ ਵਦਨ੍ਤਿ. ਅਯਂ ਪਨ ਆਗਤਪੁਬ੍ਬਤ੍ਤਾਯੇਵ ਏਵਮਾਹ. ਥੇਰੋ ਹਿ ਕਾਲੇਨ ਕਾਲਂ ਦੇਵਚਾਰਿਕਂ ਗਚ੍ਛਤਿਯੇਵ. ਤਤ੍ਥ ਪਰਿਯਾਯਮਕਾਸੀਤਿ ਵਾਰਮਕਾਸਿ. ਯਦਿਦਂ ਇਧਾਗਮਨਾਯਾਤਿ ਯੋ ਅਯਂ ਇਧਾਗਮਨਾਯ ਵਾਰੋ, ਤਂ, ਭਨ੍ਤੇ, ਚਿਰਸ੍ਸਮਕਾਸੀਤਿ ਵੁਤ੍ਤਂ ਹੋਤਿ. ਇਦਮਾਸਨਂ ਪਞ੍ਞਤ੍ਤਨ੍ਤਿ ਯੋਜਨਿਕਂ ਮਣਿਪਲ੍ਲਙ੍ਕਂ ਪਞ੍ਞਪਾਪੇਤ੍ਵਾ ਏਵਮਾਹ.

੩੯੨. ਬਹੁਕਿਚ੍ਚਾ ਬਹੁਕਰਣੀਯਾਤਿ ਏਤ੍ਥ ਯੇਸਂ ਬਹੂਨਿ ਕਿਚ੍ਚਾਨਿ, ਤੇ ਬਹੁਕਿਚ੍ਚਾ. ਬਹੁਕਰਣੀਯਾਤਿ ਤਸ੍ਸੇਵ ਵੇਵਚਨਂ. ਅਪ੍ਪੇਵ ਸਕੇਨ ਕਰਣੀਯੇਨਾਤਿ ਸਕਰਣੀਯਮੇਵ ਅਪ੍ਪਂ ਮਨ੍ਦਂ, ਨ ਬਹੁ, ਦੇਵਾਨਂ ਕਰਣੀਯਂ ਪਨ ਬਹੁ, ਪਥਵਿਤੋ ਪਟ੍ਠਾਯ ਹਿ ਕਪ੍ਪਰੁਕ੍ਖਮਾਤੁਗਾਮਾਦੀਨਂ ਅਤ੍ਥਾਯ ਅਟ੍ਟਾ ਸਕ੍ਕਸ੍ਸ ਸਨ੍ਤਿਕੇ ਛਿਜ੍ਜਨ੍ਤਿ, ਤਸ੍ਮਾ ਨਿਯਮੇਨ੍ਤੋ ਆਹ – ਅਪਿਚ ਦੇਵਾਨਂਯੇਵ ਤਾਵਤਿਂਸਾਨਂ ਕਰਣੀਯੇਨਾਤਿ. ਦੇਵਾਨਞ੍ਹਿ ਧੀਤਾ ਚ ਪੁਤ੍ਤਾ ਚ ਅਙ੍ਕੇ ਨਿਬ੍ਬਤ੍ਤਨ੍ਤਿ, ਪਾਦਪਰਿਚਾਰਿਕਾ ਇਤ੍ਥਿਯੋ ਸਯਨੇ ਨਿਬ੍ਬਤ੍ਤਨ੍ਤਿ, ਤਾਸਂ ਮਣ੍ਡਨਪਸਾਧਨਕਾਰਿਕਾ ਦੇਵਧੀਤਾ ਸਯਨਂ ਪਰਿਵਾਰੇਤ੍ਵਾ ਨਿਬ੍ਬਤ੍ਤਨ੍ਤਿ, ਵੇਯ੍ਯਾਵਚ੍ਚਕਰਾ ਅਨ੍ਤੋਵਿਮਾਨੇ ਨਿਬ੍ਬਤ੍ਤਨ੍ਤਿ, ਏਤੇਸਂ ਅਤ੍ਥਾਯ ਅਟ੍ਟਕਰਣਂ ਨਤ੍ਥਿ. ਯੇ ਪਨ ਸੀਮਨ੍ਤਰੇ ਨਿਬ੍ਬਤ੍ਤਨ੍ਤਿ, ਤੇ ‘‘ਮਮ ਸਨ੍ਤਕਾ ਤਵ ਸਨ੍ਤਕਾ’’ਤਿ ਨਿਚ੍ਛੇਤੁਂ ਅਸਕ੍ਕੋਨ੍ਤਾ ਅਟ੍ਟਂ ਕਰੋਨ੍ਤਿ, ਸਕ੍ਕਂ ਦੇਵਰਾਜਾਨਂ ਪੁਚ੍ਛਨ੍ਤਿ, ਸੋ ਯਸ੍ਸ ਵਿਮਾਨਂ ਆਸਨ੍ਨਤਰਂ, ਤਸ੍ਸ ਸਨ੍ਤਕੋਤਿ ਵਦਤਿ. ਸਚੇ ਦ੍ਵੇਪਿ ਸਮਟ੍ਠਾਨੇ ਹੋਨ੍ਤਿ, ਯਸ੍ਸ ਵਿਮਾਨਂ ਓਲੋਕੇਨ੍ਤੋ ਠਿਤੋ, ਤਸ੍ਸ ਸਨ੍ਤਕੋਤਿ ਵਦਤਿ. ਸਚੇ ਏਕਮ੍ਪਿ ਨ ਓਲੋਕੇਤਿ, ਤਂ ਉਭਿਨ੍ਨਂ ਕਲਹੁਪਚ੍ਛੇਦਨਤ੍ਥਂ ਅਤ੍ਤਨੋ ਸਨ੍ਤਕਂ ਕਰੋਤਿ. ਤਂ ਸਨ੍ਧਾਯ, ‘‘ਦੇਵਾਨਂਯੇਵ ਤਾਵਤਿਂਸਾਨਂ ਕਰਣੀਯੇਨਾ’’ਤਿ ਆਹ. ਅਪਿਚਸ੍ਸ ਏਵਰੂਪਂ ਕੀਲ਼ਾਕਿਚ੍ਚਮ੍ਪਿ ਕਰਣੀਯਮੇਵ.

ਯਂ ਨੋ ਖਿਪ੍ਪਮੇਵ ਅਨ੍ਤਰਧਾਯਤੀਤਿ ਯਂ ਅਮ੍ਹਾਕਂ ਸੀਘਮੇਵ ਅਨ੍ਧਕਾਰੇ ਰੂਪਗਤਂ ਵਿਯ ਨ ਦਿਸ੍ਸਤਿ. ਇਮਿਨਾ – ‘‘ਅਹਂ, ਭਨ੍ਤੇ, ਤਂ ਪਞ੍ਹਵਿਸ੍ਸਜ੍ਜਨਂ ਨ ਸਲ੍ਲਕ੍ਖੇਮੀ’’ਤਿ ਦੀਪੇਤਿ. ਥੇਰੋ – ‘‘ਕਸ੍ਮਾ ਨੁ ਖੋ ਅਯਂ ਯਕ੍ਖੋ ਅਸਲ੍ਲਕ੍ਖਣਭਾਵਂ ਦੀਪੇਤਿ, ਪਸ੍ਸੇਨ ਪਰਿਹਰਤੀ’’ਤਿ ਆਵਜ੍ਜਨ੍ਤੋ – ‘‘ਦੇਵਾ ਨਾਮ ਮਹਾਮੂਲ਼੍ਹਾ ਹੋਨ੍ਤਿ. ਛਦ੍ਵਾਰਿਕੇਹਿ ਆਰਮ੍ਮਣੇਹਿ ਨਿਮ੍ਮਥੀਯਮਾਨਾ ਅਤ੍ਤਨੋ ਭੁਤ੍ਤਾਭੁਤ੍ਤਭਾਵਮ੍ਪਿ ਪੀਤਾਪੀਤਭਾਵਮ੍ਪਿ ਨ ਜਾਨਨ੍ਤਿ, ਇਧ ਕਤਮੇਤ੍ਥ ਪਮੁਸ੍ਸਨ੍ਤੀ’’ਤਿ ਅਞ੍ਞਾਸਿ. ਕੇਚਿ ਪਨਾਹੁ – ‘‘ਥੇਰੋ ਏਤਸ੍ਸ ਗਰੁ ਭਾਵਨਿਯੋ, ਤਸ੍ਮਾ ‘ਇਦਾਨੇਵ ਲੋਕੇ ਅਗ੍ਗਪੁਗ੍ਗਲਸ੍ਸ ਸਨ੍ਤਿਕੇ ਪਞ੍ਹਂ ਉਗ੍ਗਹੇਤ੍ਵਾ ਆਗਤੋ, ਇਦਾਨੇਵ ਨਾਟਕਾਨਂ ਅਨ੍ਤਰਂ ਪਵਿਟ੍ਠੋਤਿ ਏਵਂ ਮਂ ਥੇਰੋ ਤਜ੍ਜੇਯ੍ਯਾ’ਤਿ ਭਯੇਨ ਏਵਮਾਹਾ’’ਤਿ. ਏਤਂ ਪਨ ਕੋਹਞ੍ਞਂ ਨਾਮ ਹੋਤਿ, ਨ ਅਰਿਯਸਾਵਕਸ੍ਸ ਏਵਰੂਪਂ ਕੋਹਞ੍ਞਂ ਨਾਮ ਹੋਤਿ, ਤਸ੍ਮਾ ਮੂਲ਼੍ਹਭਾਵੇਨੇਵ ਨ ਸਲ੍ਲਕ੍ਖੇਸੀਤਿ ਵੇਦਿਤਬ੍ਬਂ. ਉਪਰਿ ਕਸ੍ਮਾ ਸਲ੍ਲਕ੍ਖੇਸੀਤਿ? ਥੇਰੋ ਤਸ੍ਸ ਸੋਮਨਸ੍ਸਸਂਵੇਗਂ ਜਨਯਿਤ੍ਵਾ ਤਮਂ ਨੀਹਰਿ, ਤਸ੍ਮਾ ਸਲ੍ਲਕ੍ਖੇਸੀਤਿ.

ਇਦਾਨਿ ਸਕ੍ਕੋ ਪੁਬ੍ਬੇ ਅਤ੍ਤਨੋ ਏਵਂ ਭੂਤਕਾਰਣਂ ਥੇਰਸ੍ਸ ਆਰੋਚੇਤੁਂ ਭੂਤਪੁਬ੍ਬਨ੍ਤਿਆਦਿਮਾਹ. ਤਤ੍ਥ ਸਮੁਪਬ੍ਯੂਲ਼੍ਹੋਤਿ ਸਨ੍ਨਿਪਤਿਤੋ ਰਾਸਿਭੂਤੋ. ਅਸੁਰਾ ਪਰਾਜਿਨਿਂਸੂਤਿ ਅਸੁਰਾ ਪਰਾਜਯਂ ਪਾਪੁਣਿਂਸੁ. ਕਦਾ ਪਨੇਤੇ ਪਰਾਜਿਤਾਤਿ? ਸਕ੍ਕਸ੍ਸ ਨਿਬ੍ਬਤ੍ਤਕਾਲੇ. ਸਕ੍ਕੋ ਕਿਰ ਅਨਨ੍ਤਰੇ ਅਤ੍ਤਭਾਵੇ ਮਗਧਰਟ੍ਠੇ ਮਚਲਗਾਮੇ ਮਘੋ ਨਾਮ ਮਾਣਵੋ ਅਹੋਸਿ, ਪਣ੍ਡਿਤੋ ਬ੍ਯਤ੍ਤੋ, ਬੋਧਿਸਤ੍ਤਚਰਿਯਾ ਵਿਯਸ੍ਸ ਚਰਿਯਾ ਅਹੋਸਿ. ਸੋ ਤੇਤ੍ਤਿਂਸ ਪੁਰਿਸੇ ਗਹੇਤ੍ਵਾ ਕਲ੍ਯਾਣਮਕਾਸਿ. ਏਕਦਿਵਸਂ ਅਤ੍ਤਨੋਵ ਪਞ੍ਞਾਯ ਉਪਪਰਿਕ੍ਖਿਤ੍ਵਾ ਗਾਮਮਜ੍ਝੇ ਮਹਾਜਨਸ੍ਸ ਸਨ੍ਨਿਪਤਿਤਟ੍ਠਾਨੇ ਕਚਵਰਂ ਉਭਯਤੋ ਅਪਬ੍ਬਹਿਤ੍ਵਾ ਤਂ ਠਾਨਂ ਅਤਿਰਮਣੀਯਮਕਾਸਿ, ਪੁਨ ਤਤ੍ਥੇਵ ਮਣ੍ਡਪਂ ਕਾਰੇਸਿ, ਪੁਨ ਗਚ੍ਛਨ੍ਤੇ ਕਾਲੇ ਸਾਲਂ ਕਾਰੇਸਿ. ਗਾਮਤੋ ਚ ਨਿਕ੍ਖਮਿਤ੍ਵਾ ਗਾਵੁਤਮ੍ਪਿ ਅਡ੍ਢਯੋਜਨਮ੍ਪਿ ਤਿਗਾਵੁਤਮ੍ਪਿ ਯੋਜਨਮ੍ਪਿ ਵਿਚਰਿਤ੍ਵਾ ਤੇਹਿ ਸਹਾਯੇਹਿ ਸਦ੍ਧਿਂ ਵਿਸਮਂ ਸਮਂ ਅਕਾਸਿ. ਤੇ ਸਬ੍ਬੇਪਿ ਏਕਚ੍ਛਨ੍ਦਾ ਤਤ੍ਥ ਤਤ੍ਥ ਸੇਤੁਯੁਤ੍ਤਟ੍ਠਾਨੇਸੁ ਸੇਤੁਂ, ਮਣ੍ਡਪਸਾਲਾਪੋਕ੍ਖਰਣੀਮਾਲਾਗਚ੍ਛਰੋਪਨਾਦੀਨਂ ਯੁਤ੍ਤਟ੍ਠਾਨੇਸੁ ਮਣ੍ਡਪਾਦੀਨਿ ਕਰੋਨ੍ਤਾ ਬਹੁਂ ਪੁਞ੍ਞਮਕਂਸੁ. ਮਘੋ ਸਤ੍ਤ ਵਤਪਦਾਨਿ ਪੂਰੇਤ੍ਵਾ ਕਾਯਸ੍ਸ ਭੇਦਾ ਸਦ੍ਧਿਂ ਸਹਾਯੇਹਿ ਤਾਵਤਿਂਸਭਵਨੇ ਨਿਬ੍ਬਤ੍ਤਿ.

ਤਸ੍ਮਿਂ ਕਾਲੇ ਅਸੁਰਗਣਾ ਤਾਵਤਿਂਸਦੇਵਲੋਕੇ ਪਟਿਵਸਨ੍ਤਿ. ਸਬ੍ਬੇ ਤੇ ਦੇਵਾਨਂ ਸਮਾਨਾਯੁਕਾ ਸਮਾਨਵਣ੍ਣਾ ਚ ਹੋਨ੍ਤਿ, ਤੇ ਸਕ੍ਕਂ ਸਪਰਿਸਂ ਦਿਸ੍ਵਾ ਅਧੁਨਾ ਨਿਬ੍ਬਤ੍ਤਾ ਨਵਕਦੇਵਪੁਤ੍ਤਾ ਆਗਤਾਤਿ ਮਹਾਪਾਨਂ ਸਜ੍ਜਯਿਂਸੁ. ਸਕ੍ਕੋ ਦੇਵਪੁਤ੍ਤਾਨਂ ਸਞ੍ਞਂ ਅਦਾਸਿ – ‘‘ਅਮ੍ਹੇਹਿ ਕੁਸਲਂ ਕਰੋਨ੍ਤੇਹਿ ਨ ਪਰੇਹਿ ਸਦ੍ਧਿਂ ਸਾਧਾਰਣਂ ਕਤਂ, ਤੁਮ੍ਹੇ ਗਣ੍ਡਪਾਨਂ ਮਾ ਪਿਵਿਤ੍ਥ ਪੀਤਮਤ੍ਤਮੇਵ ਕਰੋਥਾ’’ਤਿ. ਤੇ ਤਥਾ ਅਕਂਸੁ. ਬਾਲਅਸੁਰਾ ਗਣ੍ਡਪਾਨਂ ਪਿਵਿਤ੍ਵਾ ਮਤ੍ਤਾ ਨਿਦ੍ਦਂ ਓਕ੍ਕਮਿਂਸੁ. ਸਕ੍ਕੋ ਦੇਵਾਨਂ ਸਞ੍ਞਂ ਦਤ੍ਵਾ ਤੇ ਪਾਦੇਸੁ ਗਾਹਾਪੇਤ੍ਵਾ ਸਿਨੇਰੁਪਾਦੇ ਖਿਪਾਪੇਸਿ, ਸਿਨੇਰੁਸ੍ਸ ਹੇਟ੍ਠਿਮਤਲੇ ਅਸੁਰਭਵਨਂ ਨਾਮ ਅਤ੍ਥਿ, ਤਾਵਤਿਂਸਦੇਵਲੋਕਪ੍ਪਮਾਣਮੇਵ. ਤਤ੍ਥ ਅਸੁਰਾ ਵਸਨ੍ਤਿ. ਤੇਸਮ੍ਪਿ ਚਿਤ੍ਤਪਾਟਲਿ ਨਾਮ ਰੁਕ੍ਖੋ ਅਤ੍ਥਿ. ਤੇ ਤਸ੍ਸ ਪੁਪ੍ਫਨਕਾਲੇ ਜਾਨਨ੍ਤਿ – ‘‘ਨਾਯਂ ਤਾਵਤਿਂਸਾ, ਸਕ੍ਕੇਨ ਵਞ੍ਚਿਤਾ ਮਯ’’ਨ੍ਤਿ. ਤੇ ਗਣ੍ਹਥ ਨਨ੍ਤਿ ਵਤ੍ਵਾ ਸਿਨੇਰੁਂ ਪਰਿਹਰਮਾਨਾ ਦੇਵੇ ਵੁਟ੍ਠੇ ਵਮ੍ਮਿਕਪਾਦਤੋ ਵਮ੍ਮਿਕਮਕ੍ਖਿਕਾ ਵਿਯ ਅਭਿਰੁਹਿਂਸੁ. ਤਤ੍ਥ ਕਾਲੇਨ ਦੇਵਾ ਜਿਨਨ੍ਤਿ, ਕਾਲੇਨ ਅਸੁਰਾ. ਯਦਾ ਦੇਵਾਨਂ ਜਯੋ ਹੋਤਿ, ਅਸੁਰੇ ਯਾਵ ਸਮੁਦ੍ਦਪਿਟ੍ਠਾ ਅਨੁਬਨ੍ਧਨ੍ਤਿ. ਯਦਾ ਅਸੁਰਾਨਂ ਜਯੋ ਹੋਤਿ, ਦੇਵੇ ਯਾਵ ਵੇਦਿਕਪਾਦਾ ਅਨੁਬਨ੍ਧਨ੍ਤਿ. ਤਸ੍ਮਿਂ ਪਨ ਸਙ੍ਗਾਮੇ ਦੇਵਾਨਂ ਜਯੋ ਅਹੋਸਿ, ਦੇਵਾ ਅਸੁਰੇ ਯਾਵ ਸਮੁਦ੍ਦਪਿਟ੍ਠਾ ਅਨੁਬਨ੍ਧਿਂਸੁ. ਸਕ੍ਕੋ ਅਸੁਰੇ ਪਲਾਪੇਤ੍ਵਾ ਪਞ੍ਚਸੁ ਠਾਨੇਸੁ ਆਰਕ੍ਖਂ ਠਪੇਸਿ. ਏਵਂ ਆਰਕ੍ਖਂ ਦਤ੍ਵਾ ਵੇਦਿਕਪਾਦੇ ਵਜਿਰਹਤ੍ਥਾ ਇਨ੍ਦਪਟਿਮਾਯੋ ਠਪੇਸਿ. ਅਸੁਰਾ ਕਾਲੇਨ ਕਾਲਂ ਉਟ੍ਠਹਿਤ੍ਵਾ ਤਾ ਪਟਿਮਾਯੋ ਦਿਸ੍ਵਾ, ‘‘ਸਕ੍ਕੋ ਅਪ੍ਪਮਤ੍ਤੋ ਤਿਟ੍ਠਤੀ’’ਤਿ ਤਤੋਵ ਨਿਵਤ੍ਤਨ੍ਤਿ. ਤਤੋ ਪਟਿਨਿਵਤ੍ਤਿਤ੍ਵਾਤਿ ਵਿਜਿਤਟ੍ਠਾਨਤੋ ਨਿਵਤ੍ਤਿਤ੍ਵਾ. ਪਰਿਚਾਰਿਕਾਯੋਤਿ ਮਾਲਾਗਨ੍ਧਾਦਿਕਮ੍ਮਕਾਰਿਕਾਯੋ.

੩੯੩. ਵੇਸ੍ਸਵਣੋ ਚ ਮਹਾਰਾਜਾਤਿ ਸੋ ਕਿਰ ਸਕ੍ਕਸ੍ਸ ਵਲ੍ਲਭੋ, ਬਲਵਵਿਸ੍ਸਾਸਿਕੋ, ਤਸ੍ਮਾ ਸਕ੍ਕੇਨ ਸਦ੍ਧਿਂ ਅਗਮਾਸਿ. ਪੁਰਕ੍ਖਤ੍ਵਾਤਿ ਪੁਰਤੋ ਕਤ੍ਵਾ. ਪਵਿਸਿਂਸੂਤਿ ਪਵਿਸਿਤ੍ਵਾ ਪਨ ਉਪਡ੍ਢਪਿਹਿਤਾਨਿ ਦ੍ਵਾਰਾਨਿ ਕਤ੍ਵਾ ਓਲੋਕਯਮਾਨਾ ਅਟ੍ਠਂਸੁ. ਇਦਮ੍ਪਿ, ਮਾਰਿਸ ਮੋਗ੍ਗਲ੍ਲਾਨ, ਪਸ੍ਸ ਵੇਜਯਨ੍ਤਸ੍ਸ ਪਾਸਾਦਸ੍ਸ ਰਾਮਣੇਯ੍ਯਕਨ੍ਤਿ, ਮਾਰਿਸ ਮੋਗ੍ਗਲ੍ਲਾਨ, ਇਦਮ੍ਪਿ ਵੇਜਯਨ੍ਤਸ੍ਸ ਪਾਸਾਦਸ੍ਸ ਰਾਮਣੇਯ੍ਯਕਂ ਪਸ੍ਸ, ਸੁਵਣ੍ਣਤ੍ਥਮ੍ਭੇ ਪਸ੍ਸ, ਰਜਤਤ੍ਥਮ੍ਭੇ ਮਣਿਤ੍ਥਮ੍ਭੇ ਪਵਾਲ਼ਤ੍ਥਮ੍ਭੇ ਲੋਹਿਤਙ੍ਗਤ੍ਥਮ੍ਭੇ ਮਸਾਰਗਲ੍ਲਤ੍ਥਮ੍ਭੇ ਮੁਤ੍ਤਤ੍ਥਮ੍ਭੇ ਸਤ੍ਤਰਤਨਤ੍ਥਮ੍ਭੇ, ਤੇਸਂਯੇਵ ਸੁਵਣ੍ਣਾਦਿਮਯੇ ਘਟਕੇ ਵਾਲ਼ਰੂਪਕਾਨਿ ਚ ਪਸ੍ਸਾਤਿ ਏਵਂ ਥਮ੍ਭਪਨ੍ਤਿਯੋ ਆਦਿਂ ਕਤ੍ਵਾ ਰਾਮਣੇਯ੍ਯਕਂ ਦਸ੍ਸੇਨ੍ਤੋ ਏਵਮਾਹ. ਯਥਾ ਤਂ ਪੁਬ੍ਬੇਕਤਪੁਞ੍ਞਸ੍ਸਾਤਿ ਯਥਾ ਪੁਬ੍ਬੇ ਕਤਪੁਞ੍ਞਸ੍ਸ ਉਪਭੋਗਟ੍ਠਾਨੇਨ ਸੋਭਿਤਬ੍ਬਂ, ਏਵਮੇਵਂ ਸੋਭਤੀਤਿ ਅਤ੍ਥੋ. ਅਤਿਬਾਲ਼੍ਹਂ ਖੋ ਅਯਂ ਯਕ੍ਖੋ ਪਮਤ੍ਤੋ ਵਿਹਰਤੀਤਿ ਅਤ੍ਤਨੋ ਪਾਸਾਦੇ ਨਾਟਕਪਰਿਵਾਰੇਨ ਸਮ੍ਪਤ੍ਤਿਯਾ ਵਸੇਨ ਅਤਿਵਿਯ ਮਤ੍ਤੋ.

ਇਦ੍ਧਾਭਿਸਙ੍ਖਾਰਂ ਅਭਿਸਙ੍ਖਾਸੀਤਿ ਇਦ੍ਧਿਮਕਾਸਿ. ਆਪੋਕਸਿਣਂ ਸਮਾਪਜ੍ਜਿਤ੍ਵਾ ਪਾਸਾਦਪਤਿਟ੍ਠਿਤੋਕਾਸਂ ਉਦਕਂ ਹੋਤੂਤਿ ਇਦ੍ਧਿਂ ਅਧਿਟ੍ਠਾਯ ਪਾਸਾਦਕਣ੍ਣਿਕੇ ਪਾਦਙ੍ਗੁਟ੍ਠਕੇਨ ਪਹਰਿ. ਸੋ ਪਾਸਾਦੋ ਯਥਾ ਨਾਮ ਉਦਕਪਿਟ੍ਠੇ ਠਪਿਤਪਤ੍ਤਂ ਮੁਖਵਟ੍ਟਿਯਂ ਅਙ੍ਗੁਲਿਯਾ ਪਹਟਂ ਅਪਰਾਪਰਂ ਕਮ੍ਪਤਿ ਚਲਤਿ ਨ ਸਨ੍ਤਿਟ੍ਠਤਿ. ਏਵਮੇਵਂ ਸਂਕਮ੍ਪਿ ਸਮ੍ਪਕਮ੍ਪਿ ਸਮ੍ਪਵੇਧਿ, ਥਮ੍ਭਪਿਟ੍ਠਸਙ੍ਘਾਟਕਣ੍ਣਿਕਗੋਪਾਨਸਿਆਦੀਨਿ ਕਰਕਰਾਤਿ ਸਦ੍ਦਂ ਮੁਞ੍ਚਨ੍ਤਾਨਿ ਪਤਿਤੁਂ ਵਿਯ ਆਰਦ੍ਧਾਨਿ. ਤੇਨ ਵੁਤ੍ਤਂ – ‘‘ਸਙ੍ਕਮ੍ਪੇਸਿ ਸਮ੍ਪਕਮ੍ਪੇਸਿ ਸਮ੍ਪਵੇਧੇਸੀ’’ਤਿ. ਅਚ੍ਛਰਿਯਬ੍ਭੁਤਚਿਤ੍ਤਜਾਤਾਤਿ ਅਹੋ ਅਚ੍ਛਰਿਯਂ, ਅਹੋ ਅਬ੍ਭੁਤਨ੍ਤਿ ਏਵਂ ਸਞ੍ਜਾਤਅਚ੍ਛਰਿਯਅਬ੍ਭੁਤਾ ਚੇਵ ਸਞ੍ਜਾਤਤੁਟ੍ਠਿਨੋ ਚ ਅਹੇਸੁਂ ਉਪ੍ਪਨ੍ਨਬਲਵਸੋਮਨਸ੍ਸਾ. ਸਂਵਿਗ੍ਗਨ੍ਤਿ ਉਬ੍ਬਿਗ੍ਗਂ. ਲੋਮਹਟ੍ਠਜਾਤਨ੍ਤਿ ਜਾਤਲੋਮਹਂਸਂ, ਕਞ੍ਚਨਭਿਤ੍ਤਿਯਂ ਠਪਿਤਮਣਿਨਾਗਦਨ੍ਤੇਹਿ ਵਿਯ ਉਦ੍ਧਗ੍ਗੇਹਿ ਲੋਮੇਹਿ ਆਕਿਣ੍ਣਸਰੀਰਨ੍ਤਿ ਅਤ੍ਥੋ. ਲੋਮਹਂਸੋ ਚ ਨਾਮੇਸ ਸੋਮਨਸ੍ਸੇਨਪਿ ਹੋਤਿ ਦੋਮਨਸ੍ਸੇਨਪਿ, ਇਧ ਪਨ ਸੋਮਨਸ੍ਸੇਨ ਜਾਤੋ. ਥੇਰੋ ਹਿ ਸਕ੍ਕਸ੍ਸ ਸੋਮਨਸ੍ਸਵੇਗੇਨ ਸਂਵੇਜੇਤੁਂ ਤਂ ਪਾਟਿਹਾਰਿਯਮਕਾਸਿ. ਤਸ੍ਮਾ ਸੋਮਨਸ੍ਸਵੇਗੇਨ ਸਂਵਿਗ੍ਗਲੋਮਹਟ੍ਠਂ ਵਿਦਿਤ੍ਵਾਤਿ ਅਤ੍ਥੋ.

੩੯੪. ਇਧਾਹਂ, ਮਾਰਿਸਾਤਿ ਇਦਾਨਿਸ੍ਸ ਯਸ੍ਮਾ ਥੇਰੇਨ ਸੋਮਨਸ੍ਸਸਂਵੇਗਂ ਜਨਯਿਤ੍ਵਾ ਤਮਂ ਵਿਨੋਦਿਤਂ, ਤਸ੍ਮਾ ਸਲ੍ਲਕ੍ਖੇਤ੍ਵਾ ਏਵਮਾਹ. ਏਸੋ ਨੁ ਤੇ, ਮਾਰਿਸ, ਸੋ ਭਗਵਾ ਸਤ੍ਥਾਤਿ, ਮਾਰਿਸ, ਤ੍ਵਂ ਕੁਹਿਂ ਗਤੋਸੀਤਿ ਵੁਤ੍ਤੇ ਮਯ੍ਹਂ ਸਤ੍ਥੁ ਸਨ੍ਤਿਕਨ੍ਤਿ ਵਦੇਸਿ, ਇਮਸ੍ਮਿਂ ਦੇਵਲੋਕੇ ਏਕਪਾਦਕੇਨ ਵਿਯ ਤਿਟ੍ਠਸਿ, ਯਂ ਤ੍ਵਂ ਏਵਂ ਵਦੇਸਿ, ਏਸੋ ਨੁ ਤੇ, ਮਾਰਿਸ, ਸੋ ਭਗਵਾ ਸਤ੍ਥਾਤਿ ਪੁਚ੍ਛਿਂਸੁ. ਸਬ੍ਰਹ੍ਮਚਾਰੀ ਮੇ ਏਸੋਤਿ ਏਤ੍ਥ ਕਿਞ੍ਚਾਪਿ ਥੇਰੋ ਅਨਗਾਰਿਯੋ ਅਭਿਨੀਹਾਰਸਮ੍ਪਨ੍ਨੋ ਅਗ੍ਗਸਾਵਕੋ, ਸਕ੍ਕੋ ਅਗਾਰਿਯੋ, ਮਗ੍ਗਬ੍ਰਹ੍ਮਚਰਿਯਵਸੇਨ ਪਨੇਤੇ ਸਬ੍ਰਹ੍ਮਚਾਰਿਨੋ ਹੋਨ੍ਤਿ, ਤਸ੍ਮਾ ਏਵਮਾਹ. ਅਹੋ ਨੂਨ ਤੇ ਸੋ ਭਗਵਾ ਸਤ੍ਥਾਤਿ ਸਬ੍ਰਹ੍ਮਚਾਰੀ ਤਾਵ ਤੇ ਏਵਂਮਹਿਦ੍ਧਿਕੋ, ਸੋ ਪਨ ਤੇ ਭਗਵਾ ਸਤ੍ਥਾ ਅਹੋ ਨੂਨ ਮਹਿਦ੍ਧਿਕੋਤਿ ਸਤ੍ਥੁ ਇਦ੍ਧਿਪਾਟਿਹਾਰਿਯਦਸ੍ਸਨੇ ਜਾਤਾਭਿਲਾਪਾ ਹੁਤ੍ਵਾ ਏਵਮਾਹਂਸੁ.

੩੯੫. ਞਾਤਞ੍ਞਤਰਸ੍ਸਾਤਿ ਪਞ੍ਞਾਤਞ੍ਞਤਰਸ੍ਸ, ਸਕ੍ਕੋ ਹਿ ਪਞ੍ਞਾਤਾਨਂ ਅਞ੍ਞਤਰੋ. ਸੇਸਂ ਸਬ੍ਬਤ੍ਥ ਪਾਕਟਮੇਵ, ਦੇਸਨਂ ਪਨ ਭਗਵਾ ਯਥਾਨੁਸਨ੍ਧਿਨਾਵ ਨਿਟ੍ਠਾਪੇਸੀਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਚੂਲ਼ਤਣ੍ਹਾਸਙ੍ਖਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.