੬. ਮਹਾਸਚ੍ਚਕਸੁਤ੍ਤਵਣ੍ਣਨਾ

੩੬੪. ਏਵਂ ਮੇ ਸੁਤਨ੍ਤਿ ਮਹਾਸਚ੍ਚਕਸੁਤ੍ਤਂ. ਤਤ੍ਥ ਏਕਂ ਸਮਯਨ੍ਤਿ ਚ ਤੇਨ ਖੋ ਪਨ ਸਮਯੇਨਾਤਿ ਚ ਪੁਬ੍ਬਣ੍ਹਸਮਯਨ੍ਤਿ ਚ ਤੀਹਿ ਪਦੇਹਿ ਏਕੋਵ ਸਮਯੋ ਵੁਤ੍ਤੋ. ਭਿਕ੍ਖੂਨਞ੍ਹਿ ਵਤ੍ਤਪਟਿਪਤ੍ਤਿਂ ਕਤ੍ਵਾ ਮੁਖਂ ਧੋਵਿਤ੍ਵਾ ਪਤ੍ਤਚੀਵਰਮਾਦਾਯ ਚੇਤਿਯਂ ਵਨ੍ਦਿਤ੍ਵਾ ਕਤਰਂ ਗਾਮਂ ਪਵਿਸਿਸ੍ਸਾਮਾਤਿ ਵਿਤਕ੍ਕਮਾਲ਼ਕੇ ਠਿਤਕਾਲੋ ਨਾਮ ਹੋਤਿ. ਭਗਵਾ ਏਵਰੂਪੇ ਸਮਯੇ ਰਤ੍ਤਦੁਪਟ੍ਟਂ ਨਿਵਾਸੇਤ੍ਵਾ ਕਾਯਬਨ੍ਧਨਂ ਬਨ੍ਧਿਤ੍ਵਾ ਪਂਸੁਕੂਲਚੀਵਰਂ ਏਕਂਸਂ ਪਾਰੁਪਿਤ੍ਵਾ ਗਨ੍ਧਕੁਟਿਤੋ ਨਿਕ੍ਖਮ੍ਮ ਭਿਕ੍ਖੁਸਙ੍ਘਪਰਿਵੁਤੋ ਗਨ੍ਧਕੁਟਿਪਮੁਖੇ ਅਟ੍ਠਾਸਿ. ਤਂ ਸਨ੍ਧਾਯ, – ‘‘ਏਕਂ ਸਮਯਨ੍ਤਿ ਚ ਤੇਨ ਖੋ ਪਨ ਸਮਯੇਨਾਤਿ ਚ ਪੁਬ੍ਬਣ੍ਹਸਮਯ’’ਨ੍ਤਿ ਚ ਵੁਤ੍ਤਂ. ਪਵਿਸਿਤੁਕਾਮੋਤਿ ਪਿਣ੍ਡਾਯ ਪਵਿਸਿਸ੍ਸਾਮੀਤਿ ਏਵਂ ਕਤਸਨ੍ਨਿਟ੍ਠਾਨੋ. ਤੇਨੁਪਸਙ੍ਕਮੀਤਿ ਕਸ੍ਮਾ ਉਪਸਙ੍ਕਮੀਤਿ? ਵਾਦਾਰੋਪਨਜ੍ਝਾਸਯੇਨ. ਏਵਂ ਕਿਰਸ੍ਸ ਅਹੋਸਿ – ‘‘ਪੁਬ੍ਬੇਪਾਹਂ ਅਪਣ੍ਡਿਤਤਾਯ ਸਕਲਂ ਵੇਸਾਲਿਪਰਿਸਂ ਗਹੇਤ੍ਵਾ ਸਮਣਸ੍ਸ ਗੋਤਮਸ੍ਸ ਸਨ੍ਤਿਕਂ ਗਨ੍ਤ੍ਵਾ ਪਰਿਸਮਜ੍ਝੇ ਮਙ੍ਕੁ ਜਾਤੋ. ਇਦਾਨਿ ਤਥਾ ਅਕਤ੍ਵਾ ਏਕਕੋਵ ਗਨ੍ਤ੍ਵਾ ਵਾਦਂ ਆਰੋਪੇਸ੍ਸਾਮਿ. ਯਦਿ ਸਮਣਂ ਗੋਤਮਂ ਪਰਾਜੇਤੁਂ ਸਕ੍ਖਿਸ੍ਸਾਮਿ, ਅਤ੍ਤਨੋ ਲਦ੍ਧਿਂ ਦੀਪੇਤ੍ਵਾ ਜਯਂ ਕਰਿਸ੍ਸਾਮਿ. ਯਦਿ ਸਮਣਸ੍ਸ ਗੋਤਮਸ੍ਸ ਜਯੋ ਭਵਿਸ੍ਸਤਿ, ਅਨ੍ਧਕਾਰੇ ਨਚ੍ਚਂ ਵਿਯ ਨ ਕੋਚਿ ਜਾਨਿਸ੍ਸਤੀ’’ਤਿ ਨਿਦ੍ਦਾਪਞ੍ਹਂ ਨਾਮ ਗਹੇਤ੍ਵਾ ਇਮਿਨਾ ਵਾਦਜ੍ਝਾਸਯੇਨ ਉਪਸਙ੍ਕਮਿ.

ਅਨੁਕਮ੍ਪਂ ਉਪਾਦਾਯਾਤਿ ਸਚ੍ਚਕਸ੍ਸ ਨਿਗਣ੍ਠਪੁਤ੍ਤਸ੍ਸ ਅਨੁਕਮ੍ਪਂ ਪਟਿਚ੍ਚ. ਥੇਰਸ੍ਸ ਕਿਰਸ੍ਸ ਏਵਂ ਅਹੋਸਿ – ‘‘ਭਗਵਤਿ ਮੁਹੁਤ੍ਤਂ ਨਿਸਿਨ੍ਨੇ ਬੁਦ੍ਧਦਸ੍ਸਨਂ ਧਮ੍ਮਸ੍ਸਵਨਞ੍ਚ ਲਭਿਸ੍ਸਤਿ. ਤਦਸ੍ਸ ਦੀਘਰਤ੍ਤਂ ਹਿਤਾਯ ਸੁਖਾਯ ਸਂਵਤ੍ਤਿਸ੍ਸਤੀ’’ਤਿ. ਤਸ੍ਮਾ ਭਗਵਨ੍ਤਂ ਯਾਚਿਤ੍ਵਾ ਪਂਸੁਕੂਲਚੀਵਰਂ ਚਤੁਗ੍ਗੁਣਂ ਪਞ੍ਞਪੇਤ੍ਵਾ ਨਿਸੀਦਤੁ ਭਗਵਾਤਿ ਆਹ. ‘‘ਕਾਰਣਂ ਆਨਨ੍ਦੋ ਵਦਤੀ’’ਤਿ ਸਲ੍ਲਕ੍ਖੇਤ੍ਵਾ ਨਿਸੀਦਿ ਭਗਵਾ ਪਞ੍ਞਤ੍ਤੇ ਆਸਨੇ. ਭਗਵਨ੍ਤਂ ਏਤਦਵੋਚਾਤਿ ਯਂ ਪਨ ਪਞ੍ਹਂ ਓਵਟ੍ਟਿਕਸਾਰਂ ਕਤ੍ਵਾ ਆਦਾਯ ਆਗਤੋ ਤਂ ਠਪੇਤ੍ਵਾ ਪਸ੍ਸੇਨ ਤਾਵ ਪਰਿਹਰਨ੍ਤੋ ਏਤਂ ਸਨ੍ਤਿ, ਭੋ ਗੋਤਮਾਤਿਆਦਿਵਚਨਂ ਅਵੋਚ.

੩੬੫. ਫੁਸਨ੍ਤਿ ਹਿ ਤੇ, ਭੋ ਗੋਤਮਾਤਿ ਤੇ ਸਮਣਬ੍ਰਾਹ੍ਮਣਾ ਸਰੀਰੇ ਉਪ੍ਪਨ੍ਨਂ ਸਾਰੀਰਿਕਂ ਦੁਕ੍ਖਂ ਵੇਦਨਂ ਫੁਸਨ੍ਤਿ ਲਭਨ੍ਤਿ, ਅਨੁਭਵਨ੍ਤੀਤਿ ਅਤ੍ਥੋ. ਊਰੁਕ੍ਖਮ੍ਭੋਤਿ ਖਮ੍ਭਕਤਊਰੁਭਾਵੋ, ਊਰੁਥਦ੍ਧਤਾਤਿ ਅਤ੍ਥੋ. ਵਿਮ੍ਹਯਤ੍ਥਵਸੇਨ ਪਨੇਤ੍ਥ ਭਵਿਸ੍ਸਤੀਤਿ ਅਨਾਗਤਵਚਨਂ ਕਤਂ. ਕਾਯਨ੍ਵਯਂ ਹੋਤੀਤਿ ਕਾਯਾਨੁਗਤਂ ਹੋਤਿ ਕਾਯਸ੍ਸ ਵਸਵਤ੍ਤਿ. ਕਾਯਭਾਵਨਾਤਿ ਪਨ ਵਿਪਸ੍ਸਨਾ ਵੁਚ੍ਚਤਿ, ਤਾਯ ਚਿਤ੍ਤਵਿਕ੍ਖੇਪਂ ਪਾਪੁਣਨ੍ਤੋ ਨਾਮ ਨਤ੍ਥਿ, ਇਤਿ ਨਿਗਣ੍ਠੋ ਅਸਨ੍ਤਂ ਅਭੂਤਂ ਯਂ ਨਤ੍ਥਿ, ਤਦੇਵਾਹ. ਚਿਤ੍ਤਭਾਵਨਾਤਿਪਿ ਸਮਥੋ ਵੁਚ੍ਚਤਿ, ਸਮਾਧਿਯੁਤ੍ਤਸ੍ਸ ਚ ਪੁਗ੍ਗਲਸ੍ਸ ਊਰੁਕ੍ਖਮ੍ਭਾਦਯੋ ਨਾਮ ਨਤ੍ਥਿ, ਇਤਿ ਨਿਗਣ੍ਠੋ ਇਦਂ ਅਭੂਤਮੇਵ ਆਹ. ਅਟ੍ਠਕਥਾਯਂ ਪਨ ਵੁਤ੍ਤਂ – ‘‘ਯਥੇਵ ‘ਭੂਤਪੁਬ੍ਬਨ੍ਤਿ ਵਤ੍ਵਾ ਊਰੁਕ੍ਖਮ੍ਭੋਪਿ ਨਾਮ ਭਵਿਸ੍ਸਤੀ’ਤਿਆਦੀਨਿ ਵਦਤੋ ਅਨਾਗਤਰੂਪਂ ਨ ਸਮੇਤਿ, ਤਥਾ ਅਤ੍ਥੋਪਿ ਨ ਸਮੇਤਿ, ਅਸਨ੍ਤਂ ਅਭੂਤਂ ਯਂ ਨਤ੍ਥਿ, ਤਂ ਕਥੇਤੀ’’ਤਿ.

ਨੋ ਕਾਯਭਾਵਨਨ੍ਤਿ ਪਞ੍ਚਾਤਪਤਪ੍ਪਨਾਦਿਂ ਅਤ੍ਤਕਿਲਮਥਾਨੁਯੋਗਂ ਸਨ੍ਧਾਯਾਹ. ਅਯਞ੍ਹਿ ਤੇਸਂ ਕਾਯਭਾਵਨਾ ਨਾਮ. ਕਿਂ ਪਨ ਸੋ ਦਿਸ੍ਵਾ ਏਵਮਾਹ? ਸੋ ਕਿਰ ਦਿਵਾਦਿਵਸ੍ਸ ਵਿਹਾਰਂ ਆਗਚ੍ਛਤਿ, ਤਸ੍ਮਿਂ ਖੋ ਪਨ ਸਮਯੇ ਭਿਕ੍ਖੂ ਪਤ੍ਤਚੀਵਰਂ ਪਟਿਸਾਮੇਤ੍ਵਾ ਅਤ੍ਤਨੋ ਅਤ੍ਤਨੋ ਰਤ੍ਤਿਟ੍ਠਾਨਦਿਵਾਟ੍ਠਾਨੇਸੁ ਪਟਿਸਲ੍ਲਾਨਂ ਉਪਗਚ੍ਛਨ੍ਤਿ. ਸੋ ਤੇ ਪਟਿਸਲ੍ਲੀਨੇ ਦਿਸ੍ਵਾ ਚਿਤ੍ਤਭਾਵਨਾਮਤ੍ਤਂ ਏਤੇ ਅਨੁਯੁਞ੍ਜਨ੍ਤਿ, ਕਾਯਭਾਵਨਾ ਪਨੇਤੇਸਂ ਨਤ੍ਥੀਤਿ ਮਞ੍ਞਮਾਨੋ ਏਵਮਾਹ.

੩੬੬. ਅਥ ਨਂ ਭਗਵਾ ਅਨੁਯੁਞ੍ਜਨ੍ਤੋ ਕਿਨ੍ਤਿ ਪਨ ਤੇ, ਅਗ੍ਗਿਵੇਸ੍ਸਨ, ਕਾਯਭਾਵਨਾ ਸੁਤਾਤਿ ਆਹ. ਸੋ ਤਂ ਵਿਤ੍ਥਾਰੇਨ੍ਤੋ ਸੇਯ੍ਯਥਿਦਂ, ਨਨ੍ਦੋ ਵਚ੍ਛੋਤਿਆਦਿਮਾਹ. ਤਤ੍ਥ ਨਨ੍ਦੋਤਿ ਤਸ੍ਸ ਨਾਮਂ. ਵਚ੍ਛੋਤਿ ਗੋਤ੍ਤਂ. ਕਿਸੋਤਿ ਨਾਮਂ. ਸਂਕਿਚ੍ਚੋਤਿ ਗੋਤ੍ਤਂ. ਮਕ੍ਖਲਿਗੋਸਾਲੋ ਹੇਟ੍ਠਾ ਆਗਤੋਵ. ਏਤੇਤਿ ਏਤੇ ਤਯੋ ਜਨਾ, ਤੇ ਕਿਰ ਕਿਲਿਟ੍ਠਤਪਾਨਂ ਮਤ੍ਥਕਪਤ੍ਤਾ ਅਹੇਸੁਂ. ਉਲ਼ਾਰਾਨਿ ਉਲ਼ਾਰਾਨੀਤਿ ਪਣੀਤਾਨਿ ਪਣੀਤਾਨਿ. ਗਾਹੇਨ੍ਤਿ ਨਾਮਾਤਿ ਬਲਂ ਗਣ੍ਹਾਪੇਨ੍ਤਿ ਨਾਮ. ਬ੍ਰੂਹੇਨ੍ਤੀਤਿ ਵਡ੍ਢੇਨ੍ਤਿ. ਮੇਦੇਨ੍ਤੀਤਿ ਜਾਤਮੇਦਂ ਕਰੋਨ੍ਤਿ. ਪੁਰਿਮਂ ਪਹਾਯਾਤਿ ਪੁਰਿਮਂ ਦੁਕ੍ਕਰਕਾਰਂ ਪਹਾਯ. ਪਚ੍ਛਾ ਉਪਚਿਨਨ੍ਤੀਤਿ ਪਚ੍ਛਾ ਉਲ਼ਾਰਖਾਦਨੀਯਾਦੀਹਿ ਸਨ੍ਤਪ੍ਪੇਨ੍ਤਿ, ਵਡ੍ਢੇਨ੍ਤਿ. ਆਚਯਾਪਚਯੋ ਹੋਤੀਤਿ ਵਡ੍ਢਿ ਚ ਅਵਡ੍ਢਿ ਚ ਹੋਤਿ, ਇਤਿ ਇਮਸ੍ਸ ਕਾਯਸ੍ਸ ਕਾਲੇਨ ਵਡ੍ਢਿ, ਕਾਲੇਨ ਪਰਿਹਾਨੀਤਿ ਵਡ੍ਢਿਪਰਿਹਾਨਿਮਤ੍ਤਮੇਵ ਪਞ੍ਞਾਯਤਿ, ਕਾਯਭਾਵਨਾ ਪਨ ਨ ਪਞ੍ਞਾਯਤੀਤਿ ਦੀਪੇਤ੍ਵਾ ਚਿਤ੍ਤਭਾਵਨਂ ਪੁਚ੍ਛਨ੍ਤੋ, ‘‘ਕਿਨ੍ਤਿ ਪਨ ਤੇ, ਅਗ੍ਗਿਵੇਸ੍ਸਨ, ਚਿਤ੍ਤਭਾਵਨਾ ਸੁਤਾ’’ਤਿ ਆਹ. ਨ ਸਮ੍ਪਾਯਾਸੀਤਿ ਸਮ੍ਪਾਦੇਤ੍ਵਾ ਕਥੇਤੁਂ ਨਾਸਕ੍ਖਿ, ਯਥਾ ਤਂ ਬਾਲਪੁਥੁਜ੍ਜਨੋ.

੩੬੭. ਕੁਤੋ ਪਨ ਤ੍ਵਨ੍ਤਿ ਯੋ ਤ੍ਵਂ ਏਵਂ ਓਲ਼ਾਰਿਕਂ ਦੁਬ੍ਬਲਂ ਕਾਯਭਾਵਨਂ ਨ ਜਾਨਾਸਿ? ਸੋ ਤ੍ਵਂ ਕੁਤੋ ਸਣ੍ਹਂ ਸੁਖੁਮਂ ਚਿਤ੍ਤਭਾਵਨਂ ਜਾਨਿਸ੍ਸਸੀਤਿ. ਇਮਸ੍ਮਿਂ ਪਨ ਠਾਨੇ ਚੋਦਨਾਲਯਤ੍ਥੇਰੋ, ‘‘ਅਬੁਦ੍ਧਵਚਨਂ ਨਾਮੇਤਂ ਪਦ’’ਨ੍ਤਿ ਬੀਜਨਿਂ ਠਪੇਤ੍ਵਾ ਪਕ੍ਕਮਿਤੁਂ ਆਰਭਿ. ਅਥ ਨਂ ਮਹਾਸੀਵਤ੍ਥੇਰੋ ਆਹ – ‘‘ਦਿਸ੍ਸਤਿ, ਭਿਕ੍ਖਵੇ, ਇਮਸ੍ਸ ਚਾਤੁਮਹਾਭੂਤਿਕਸ੍ਸ ਕਾਯਸ੍ਸ ਆਚਯੋਪਿ ਅਪਚਯੋਪਿ ਆਦਾਨਮ੍ਪਿ ਨਿਕ੍ਖੇਪਨਮ੍ਪੀ’’ਤਿ (ਸਂ. ਨਿ. ੨.੬੨). ਤਂ ਸੁਤ੍ਵਾ ਸਲ੍ਲਕ੍ਖੇਸਿ – ‘‘ਓਲ਼ਾਰਿਕਂ ਕਾਯਂ ਪਰਿਗ੍ਗਣ੍ਹਨ੍ਤਸ੍ਸ ਉਪ੍ਪਨ੍ਨਵਿਪਸ੍ਸਨਾ ਓਲ਼ਾਰਿਕਾਤਿ ਵਤ੍ਤੁਂ ਵਟ੍ਟਤੀ’’ਤਿ.

੩੬੮. ਸੁਖਸਾਰਾਗੀਤਿ ਸੁਖਸਾਰਾਗੇਨ ਸਮਨ੍ਨਾਗਤੋ. ਸੁਖਾਯ ਵੇਦਨਾਯ ਨਿਰੋਧਾ ਉਪ੍ਪਜ੍ਜਤਿ ਦੁਕ੍ਖਾ ਵੇਦਨਾਤਿ ਨ ਅਨਨ੍ਤਰਾਵ ਉਪ੍ਪਜ੍ਜਤਿ, ਸੁਖਦੁਕ੍ਖਾਨਞ੍ਹਿ ਅਨਨ੍ਤਰਪਚ੍ਚਯਤਾ ਪਟ੍ਠਾਨੇ (ਪਟ੍ਠਾ. ੧.੨.੪੫-੪੬) ਪਟਿਸਿਦ੍ਧਾ. ਯਸ੍ਮਾ ਪਨ ਸੁਖੇ ਅਨਿਰੁਦ੍ਧੇ ਦੁਕ੍ਖਂ ਨੁਪ੍ਪਜ੍ਜਤਿ, ਤਸ੍ਮਾ ਇਧ ਏਵਂ ਵੁਤ੍ਤਂ. ਪਰਿਯਾਦਾਯ ਤਿਟ੍ਠਤੀਤਿ ਖੇਪੇਤ੍ਵਾ ਗਣ੍ਹਿਤ੍ਵਾ ਤਿਟ੍ਠਤਿ. ਉਭਤੋਪਕ੍ਖਨ੍ਤਿ ਸੁਖਂ ਏਕਂ ਪਕ੍ਖਂ ਦੁਕ੍ਖਂ ਏਕਂ ਪਕ੍ਖਨ੍ਤਿ ਏਵਂ ਉਭਤੋਪਕ੍ਖਂ ਹੁਤ੍ਵਾ.

੩੬੯. ਉਪ੍ਪਨ੍ਨਾਪਿ ਸੁਖਾ ਵੇਦਨਾ ਚਿਤ੍ਤਂ ਨ ਪਰਿਯਾਦਾਯ ਤਿਟ੍ਠਤਿ, ਭਾਵਿਤਤ੍ਤਾ ਕਾਯਸ੍ਸ. ਉਪ੍ਪਨ੍ਨਾਪਿ ਦੁਕ੍ਖਾ ਵੇਦਨਾ ਚਿਤ੍ਤਂ ਨ ਪਰਿਯਾਦਾਯ ਤਿਟ੍ਠਤਿ, ਭਾਵਿਤਤ੍ਤਾ ਚਿਤ੍ਤਸ੍ਸਾਤਿ ਏਤ੍ਥ ਕਾਯਭਾਵਨਾ ਵਿਪਸ੍ਸਨਾ, ਚਿਤ੍ਤਭਾਵਨਾ ਸਮਾਧਿ. ਵਿਪਸ੍ਸਨਾ ਚ ਸੁਖਸ੍ਸ ਪਚ੍ਚਨੀਕਾ, ਦੁਕ੍ਖਸ੍ਸ ਆਸਨ੍ਨਾ. ਸਮਾਧਿ ਦੁਕ੍ਖਸ੍ਸ ਪਚ੍ਚਨੀਕੋ, ਸੁਖਸ੍ਸ ਆਸਨ੍ਨੋ. ਕਥਂ? ਵਿਪਸ੍ਸਨਂ ਪਟ੍ਠਪੇਤ੍ਵਾ ਨਿਸਿਨ੍ਨਸ੍ਸ ਹਿ ਅਦ੍ਧਾਨੇ ਗਚ੍ਛਨ੍ਤੇ ਗਚ੍ਛਨ੍ਤੇ ਤਤ੍ਥ ਤਤ੍ਥ ਅਗ੍ਗਿਉਟ੍ਠਾਨਂ ਵਿਯ ਹੋਤਿ, ਕਚ੍ਛੇਹਿ ਸੇਦਾ ਮੁਚ੍ਚਨ੍ਤਿ, ਮਤ੍ਥਕਤੋ ਉਸੁਮਵਟ੍ਟਿਉਟ੍ਠਾਨਂ ਵਿਯ ਹੋਤੀਤਿ ਚਿਤ੍ਤਂ ਹਞ੍ਞਤਿ ਵਿਹਞ੍ਞਤਿ ਵਿਪ੍ਫਨ੍ਦਤਿ. ਏਵਂ ਤਾਵ ਵਿਪਸ੍ਸਨਾ ਸੁਖਸ੍ਸ ਪਚ੍ਚਨੀਕਾ, ਦੁਕ੍ਖਸ੍ਸ ਆਸਨ੍ਨਾ. ਉਪ੍ਪਨ੍ਨੇ ਪਨ ਕਾਯਿਕੇ ਵਾ ਚੇਤਸਿਕੇ ਵਾ ਦੁਕ੍ਖੇ ਤਂ ਦੁਕ੍ਖਂ ਵਿਕ੍ਖਮ੍ਭੇਤ੍ਵਾ ਸਮਾਪਤ੍ਤਿਂ ਸਮਾਪਨ੍ਨਸ੍ਸ ਸਮਾਪਤ੍ਤਿਕ੍ਖਣੇ ਦੁਕ੍ਖਂ ਦੂਰਾਪਗਤਂ ਹੋਤਿ, ਅਨਪ੍ਪਕਂ ਸੁਖਂ ਓਕ੍ਕਮਤਿ. ਏਵਂ ਸਮਾਧਿ ਦੁਕ੍ਖਸ੍ਸ ਪਚ੍ਚਨੀਕੋ, ਸੁਖਸ੍ਸ ਆਸਨ੍ਨੋ. ਯਥਾ ਵਿਪਸ੍ਸਨਾ ਸੁਖਸ੍ਸ ਪਚ੍ਚਨੀਕਾ, ਦੁਕ੍ਖਸ੍ਸ ਆਸਨ੍ਨਾ, ਨ ਤਥਾ ਸਮਾਧਿ. ਯਥਾ ਸਮਾਧਿ ਦੁਕ੍ਖਸ੍ਸ ਪਚ੍ਚਨੀਕੋ, ਸੁਖਸ੍ਸ ਆਸਨ੍ਨੋ, ਨ ਚ ਤਥਾ ਵਿਪਸ੍ਸਨਾਤਿ. ਤੇਨ ਵੁਤ੍ਤਂ – ‘‘ਉਪ੍ਪਨ੍ਨਾਪਿ ਸੁਖਾ ਵੇਦਨਾ ਚਿਤ੍ਤਂ ਨ ਪਰਿਯਾਦਾਯ ਤਿਟ੍ਠਤਿ, ਭਾਵਿਤਤ੍ਤਾ ਕਾਯਸ੍ਸ. ਉਪ੍ਪਨ੍ਨਾਪਿ ਦੁਕ੍ਖਾ ਵੇਦਨਾ ਚਿਤ੍ਤਂ ਨ ਪਰਿਯਾਦਾਯ ਤਿਟ੍ਠਤਿ, ਭਾਵਿਤਤ੍ਤਾ ਚਿਤ੍ਤਸ੍ਸਾ’’ਤਿ.

੩੭੦. ਆਸਜ੍ਜ ਉਪਨੀਯਾਤਿ ਗੁਣੇ ਘਟ੍ਟੇਤ੍ਵਾ ਚੇਵ ਉਪਨੇਤ੍ਵਾ ਚ. ਤਂ ਵਤ ਮੇਤਿ ਤਂ ਵਤ ਮਮ ਚਿਤ੍ਤਂ.

੩੭੧. ਕਿਞ੍ਹਿ ਨੋ ਸਿਯਾ, ਅਗ੍ਗਿਵੇਸ੍ਸਨਾਤਿ, ਅਗ੍ਗਿਵੇਸ੍ਸਨ, ਕਿਂ ਨ ਭਵਿਸ੍ਸਤਿ, ਭਵਿਸ੍ਸਤੇਵ, ਮਾ ਏਵਂ ਸਞ੍ਞੀ ਹੋਹਿ, ਉਪ੍ਪਜ੍ਜਿਯੇਵ ਮੇ ਸੁਖਾਪਿ ਦੁਕ੍ਖਾਪਿ ਵੇਦਨਾ, ਉਪ੍ਪਨ੍ਨਾਯ ਪਨਸ੍ਸਾ ਅਹਂ ਚਿਤ੍ਤਂ ਪਰਿਯਾਦਾਯ ਠਾਤੁਂ ਨ ਦੇਮਿ. ਇਦਾਨਿਸ੍ਸ ਤਮਤ੍ਥਂ ਪਕਾਸੇਤੁਂ ਉਪਰਿ ਪਸਾਦਾਵਹਂ ਧਮ੍ਮਦੇਸਨਂ ਦੇਸੇਤੁਕਾਮੋ ਮੂਲਤੋ ਪਟ੍ਠਾਯ ਮਹਾਭਿਨਿਕ੍ਖਮਨਂ ਆਰਭਿ. ਤਤ੍ਥ ਇਧ ਮੇ, ਅਗ੍ਗਿਵੇਸ੍ਸਨ, ਪੁਬ੍ਬੇਵ ਸਮ੍ਬੋਧਾ…ਪੇ… ਤਤ੍ਥੇਵ ਨਿਸੀਦਿਂ, ਅਲਮਿਦਂ ਪਧਾਨਾਯਾਤਿ ਇਦਂ ਸਬ੍ਬਂ ਹੇਟ੍ਠਾ ਪਾਸਰਾਸਿਸੁਤ੍ਤੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਅਯਂ ਪਨ ਵਿਸੇਸੋ, ਤਤ੍ਥ ਬੋਧਿਪਲ੍ਲਙ੍ਕੇ ਨਿਸਜ੍ਜਾ, ਇਧ ਦੁਕ੍ਕਰਕਾਰਿਕਾ.

੩੭੪. ਅਲ੍ਲਕਟ੍ਠਨ੍ਤਿ ਅਲ੍ਲਂ ਉਦੁਮ੍ਬਰਕਟ੍ਠਂ. ਸਸ੍ਨੇਹਨ੍ਤਿ ਸਖੀਰਂ. ਕਾਮੇਹੀਤਿ ਵਤ੍ਥੁਕਾਮੇਹਿ. ਅਵੂਪਕਟ੍ਠਾਤਿ ਅਨਪਗਤਾ. ਕਾਮਚ੍ਛਨ੍ਦੋਤਿਆਦੀਸੁ ਕਿਲੇਸਕਾਮੋਵ ਛਨ੍ਦਕਰਣਵਸੇਨ ਛਨ੍ਦੋ. ਸਿਨੇਹਕਰਣਵਸੇਨ ਸ੍ਨੇਹੋ. ਮੁਚ੍ਛਾਕਰਣਵਸੇਨ ਮੁਚ੍ਛਾ. ਪਿਪਾਸਾਕਰਣਵਸੇਨ ਪਿਪਾਸਾ. ਅਨੁਦਹਨਵਸੇਨ ਪਰਿਲ਼ਾਹੋਤਿ ਵੇਦਿਤਬ੍ਬੋ. ਓਪਕ੍ਕਮਿਕਾਤਿ ਉਪਕ੍ਕਮਨਿਬ੍ਬਤ੍ਤਾ. ਞਾਣਾਯ ਦਸ੍ਸਨਾਯ ਅਨੁਤ੍ਤਰਾਯ ਸਮ੍ਬੋਧਾਯਾਤਿ ਸਬ੍ਬਂ ਲੋਕੁਤ੍ਤਰਮਗ੍ਗਵੇਵਚਨਮੇਵ.

ਇਦਂ ਪਨੇਤ੍ਥ ਓਪਮ੍ਮਸਂਸਨ੍ਦਨਂ – ਅਲ੍ਲਂ ਸਖੀਰਂ ਉਦੁਮ੍ਬਰਕਟ੍ਠਂ ਵਿਯ ਹਿ ਕਿਲੇਸਕਾਮੇਨ ਵਤ੍ਥੁਕਾਮਤੋ ਅਨਿਸ੍ਸਟਪੁਗ੍ਗਲਾ. ਉਦਕੇ ਪਕ੍ਖਿਤ੍ਤਭਾਵੋ ਵਿਯ ਕਿਲੇਸਕਾਮੇਨ ਤਿਨ੍ਤਤਾ; ਮਨ੍ਥਨੇਨਾਪਿ ਅਗ੍ਗਿਨੋ ਅਨਭਿਨਿਬ੍ਬਤ੍ਤਨਂ ਵਿਯ ਕਿਲੇਸਕਾਮੇਨ ਵਤ੍ਥੁਕਾਮਤੋ ਅਨਿਸ੍ਸਟਾਨਂ ਓਪਕ੍ਕਮਿਕਾਹਿ ਵੇਦਨਾਹਿ ਲੋਕੁਤ੍ਤਰਮਗ੍ਗਸ੍ਸ ਅਨਧਿਗਮੋ. ਅਮਨ੍ਥਨੇਨਾਪਿ ਅਗ੍ਗਿਨੋ ਅਨਭਿਨਿਬ੍ਬਤ੍ਤਨਂ ਵਿਯ ਤੇਸਂ ਪੁਗ੍ਗਲਾਨਂ ਵਿਨਾਪਿ ਓਪਕ੍ਕਮਿਕਾਹਿ ਵੇਦਨਾਹਿ ਲੋਕੁਤ੍ਤਰਮਗ੍ਗਸ੍ਸ ਅਨਧਿਗਮੋ. ਦੁਤਿਯਉਪਮਾਪਿ ਇਮਿਨਾਵ ਨਯੇਨ ਵੇਦਿਤਬ੍ਬਾ. ਅਯਂ ਪਨ ਵਿਸੇਸੋ, ਪੁਰਿਮਾ ਸਪੁਤ੍ਤਭਰਿਯਪਬ੍ਬਜ੍ਜਾਯ ਉਪਮਾ; ਪਚ੍ਛਿਮਾ ਬ੍ਰਾਹ੍ਮਣਧਮ੍ਮਿਕਪਬ੍ਬਜ੍ਜਾਯ.

੩੭੬. ਤਤਿਯਉਪਮਾਯ ਕੋਲ਼ਾਪਨ੍ਤਿ ਛਿਨ੍ਨਸਿਨੇਹਂ ਨਿਰਾਪਂ. ਥਲੇ ਨਿਕ੍ਖਿਤ੍ਤਨ੍ਤਿ ਪਬ੍ਬਤਥਲੇ ਵਾ ਭੂਮਿਥਲੇ ਵਾ ਨਿਕ੍ਖਿਤ੍ਤਂ. ਏਤ੍ਥਾਪਿ ਇਦਂ ਓਪਮ੍ਮਸਂਸਨ੍ਦਨਂ – ਸੁਕ੍ਖਕੋਲ਼ਾਪਕਟ੍ਠਂ ਵਿਯ ਹਿ ਕਿਲੇਸਕਾਮੇਨ ਵਤ੍ਥੁਕਾਮਤੋ ਨਿਸ੍ਸਟਪੁਗ੍ਗਲਾ, ਆਰਕਾ ਉਦਕਾ ਥਲੇ ਨਿਕ੍ਖਿਤ੍ਤਭਾਵੋ ਵਿਯ ਕਿਲੇਸਕਾਮੇਨ ਅਤਿਨ੍ਤਤਾ. ਮਨ੍ਥਨੇਨਾਪਿ ਅਗ੍ਗਿਨੋ ਅਭਿਨਿਬ੍ਬਤ੍ਤਨਂ ਵਿਯ ਕਿਲੇਸਕਾਮੇਨ ਵਤ੍ਥੁਕਾਮਤੋ ਨਿਸ੍ਸਟਾਨਂ ਅਬ੍ਭੋਕਾਸਿਕਨੇਸਜ੍ਜਿਕਾਦਿਵਸੇਨ ਓਪਕ੍ਕਮਿਕਾਹਿਪਿ ਵੇਦਨਾਹਿ ਲੋਕੁਤ੍ਤਰਮਗ੍ਗਸ੍ਸ ਅਧਿਗਮੋ. ਅਞ੍ਞਸ੍ਸ ਰੁਕ੍ਖਸ੍ਸ ਸੁਕ੍ਖਸਾਖਾਯ ਸਦ੍ਧਿਂ ਘਂਸਨਮਤ੍ਤੇਨੇਵ ਅਗ੍ਗਿਨੋ ਅਭਿਨਿਬ੍ਬਤ੍ਤਨਂ ਵਿਯ ਵਿਨਾਪਿ ਓਪਕ੍ਕਮਿਕਾਹਿ ਵੇਦਨਾਹਿ ਸੁਖਾਯੇਵ ਪਟਿਪਦਾਯ ਲੋਕੁਤ੍ਤਰਮਗ੍ਗਸ੍ਸ ਅਧਿਗਮੋਤਿ. ਅਯਂ ਉਪਮਾ ਭਗਵਤਾ ਅਤ੍ਤਨੋ ਅਤ੍ਥਾਯ ਆਹਟਾ.

੩੭੭. ਇਦਾਨਿ ਅਤ੍ਤਨੋ ਦੁਕ੍ਕਰਕਾਰਿਕਂ ਦਸ੍ਸੇਨ੍ਤੋ, ਤਸ੍ਸ ਮਯ੍ਹਨ੍ਤਿਆਦਿਮਾਹ. ਕਿਂ ਪਨ ਭਗਵਾ ਦੁਕ੍ਕਰਂ ਅਕਤ੍ਵਾ ਬੁਦ੍ਧੋ ਭਵਿਤੁਂ ਨ ਸਮਤ੍ਥੋਤਿ? ਕਤ੍ਵਾਪਿ ਅਕਤ੍ਵਾਪਿ ਸਮਤ੍ਥੋਵ. ਅਥ ਕਸ੍ਮਾ ਅਕਾਸੀਤਿ? ਸਦੇਵਕਸ੍ਸ ਲੋਕਸ੍ਸ ਅਤ੍ਤਨੋ ਪਰਕ੍ਕਮਂ ਦਸ੍ਸੇਸ੍ਸਾਮਿ. ਸੋ ਚ ਮਂ ਵੀਰਿਯਨਿਮ੍ਮਥਨਗੁਣੋ ਹਾਸੇਸ੍ਸਤੀਤਿ. ਪਾਸਾਦੇ ਨਿਸਿਨ੍ਨੋਯੇਵ ਹਿ ਪਵੇਣਿਆਗਤਂ ਰਜ੍ਜਂ ਲਭਿਤ੍ਵਾਪਿ ਖਤ੍ਤਿਯੋ ਨ ਤਥਾਪਮੁਦਿਤੋ ਹੋਤਿ, ਯਥਾ ਬਲਕਾਯਂ ਗਹੇਤ੍ਵਾ ਸਙ੍ਗਾਮੇ ਦ੍ਵੇ ਤਯੋ ਸਮ੍ਪਹਾਰੇ ਦਤ੍ਵਾ ਅਮਿਤ੍ਤਮਥਨਂ ਕਤ੍ਵਾ ਪਤ੍ਤਰਜ੍ਜੋ. ਏਵਂ ਪਤ੍ਤਰਜ੍ਜਸ੍ਸ ਹਿ ਰਜ੍ਜਸਿਰਿਂ ਅਨੁਭਵਨ੍ਤਸ੍ਸ ਪਰਿਸਂ ਓਲੋਕੇਤ੍ਵਾ ਅਤ੍ਤਨੋ ਪਰਕ੍ਕਮਂ ਅਨੁਸ੍ਸਰਿਤ੍ਵਾ, ‘‘ਅਸੁਕਟ੍ਠਾਨੇ ਅਸੁਕਕਮ੍ਮਂ ਕਤ੍ਵਾ ਅਸੁਕਞ੍ਚ ਅਸੁਕਞ੍ਚ ਅਮਿਤ੍ਤਂ ਏਵਂ ਵਿਜ੍ਝਿਤ੍ਵਾ ਏਵਂ ਪਹਰਿਤ੍ਵਾ ਇਮਂ ਰਜ੍ਜਸਿਰਿਂ ਪਤ੍ਤੋਸ੍ਮੀ’’ਤਿ ਚਿਨ੍ਤਯਤੋ ਬਲਵਸੋਮਨਸ੍ਸਂ ਉਪ੍ਪਜ੍ਜਤਿ. ਏਵਮੇਵਂ ਭਗਵਾਪਿ ਸਦੇਵਕਸ੍ਸ ਲੋਕਸ੍ਸ ਪਰਕ੍ਕਮਂ ਦਸ੍ਸੇਸ੍ਸਾਮਿ, ਸੋ ਹਿ ਮਂ ਪਰਕ੍ਕਮੋ ਅਤਿਵਿਯ ਹਾਸੇਸ੍ਸਤਿ, ਸੋਮਨਸ੍ਸਂ ਉਪ੍ਪਾਦੇਸ੍ਸਤੀਤਿ ਦੁਕ੍ਕਰਮਕਾਸਿ.

ਅਪਿਚ ਪਚ੍ਛਿਮਂ ਜਨਤਂ ਅਨੁਕਮ੍ਪਮਾਨੋਪਿ ਅਕਾਸਿਯੇਵ, ਪਚ੍ਛਿਮਾ ਹਿ ਜਨਤਾ ਸਮ੍ਮਾਸਮ੍ਬੁਦ੍ਧੋ ਕਪ੍ਪਸਤਸਹਸ੍ਸਾਧਿਕਾਨਿ ਚਤ੍ਤਾਰਿ ਅਸਙ੍ਖ੍ਯੇਯ੍ਯਾਨਿ ਪਾਰਮਿਯੋ ਪੂਰੇਤ੍ਵਾਪਿ ਪਧਾਨਂ ਪਦਹਿਤ੍ਵਾਵ ਸਬ੍ਬਞ੍ਞੁਤਞ੍ਞਾਣਂ ਪਤ੍ਤੋ, ਕਿਮਙ੍ਗਂ ਪਨ ਮਯਨ੍ਤਿ ਪਧਾਨਵੀਰਿਯਂ ਕਤ੍ਤਬ੍ਬਂ ਮਞ੍ਞਿਸ੍ਸਤਿ; ਏਵਂ ਸਨ੍ਤੇ ਖਿਪ੍ਪਮੇਵ ਜਾਤਿਜਰਾਮਰਣਸ੍ਸ ਅਨ੍ਤਂ ਕਰਿਸ੍ਸਤੀਤਿ ਪਚ੍ਛਿਮਂ ਜਨਤਂ ਅਨੁਕਮ੍ਪਮਾਨੋ ਅਕਾਸਿਯੇਵ.

ਦਨ੍ਤੇਭਿਦਨ੍ਤਮਾਧਾਯਾਤਿ ਹੇਟ੍ਠਾਦਨ੍ਤੇ ਉਪਰਿਦਨ੍ਤਂ ਠਪੇਤ੍ਵਾ. ਚੇਤਸਾ ਚਿਤ੍ਤਨ੍ਤਿ ਕੁਸਲਚਿਤ੍ਤੇਨ ਅਕੁਸਲਚਿਤ੍ਤਂ. ਅਭਿਨਿਗ੍ਗਣ੍ਹੇਯ੍ਯਨ੍ਤਿ ਨਿਗ੍ਗਣ੍ਹੇਯ੍ਯਂ. ਅਭਿਨਿਪ੍ਪੀਲ਼ੇਯ੍ਯਨ੍ਤਿ ਨਿਪ੍ਪੀਲ਼ੇਯ੍ਯਂ. ਅਭਿਸਨ੍ਤਾਪੇਯ੍ਯਨ੍ਤਿ ਤਾਪੇਤ੍ਵਾ ਵੀਰਿਯਨਿਮ੍ਮਥਨਂ ਕਰੇਯ੍ਯਂ. ਸਾਰਦ੍ਧੋਤਿ ਸਦਰਥੋ. ਪਧਾਨਾਭਿਤੁਨ੍ਨਸ੍ਸਾਤਿ ਪਧਾਨੇਨ ਅਭਿਤੁਨ੍ਨਸ੍ਸ, ਵਿਦ੍ਧਸ੍ਸ ਸਤੋਤਿ ਅਤ੍ਥੋ.

੩੭੮. ਅਪ੍ਪਾਣਕਨ੍ਤਿ ਨਿਰਸ੍ਸਾਸਕਂ. ਕਮ੍ਮਾਰਗਗ੍ਗਰਿਯਾਤਿ ਕਮ੍ਮਾਰਸ੍ਸ ਗਗ੍ਗਰਨਾਲ਼ਿਯਾ. ਸੀਸਵੇਦਨਾ ਹੋਨ੍ਤੀਤਿ ਕੁਤੋਚਿ ਨਿਕ੍ਖਮਿਤੁਂ ਅਲਭਮਾਨੇਹਿ ਵਾਤੇਹਿ ਸਮੁਟ੍ਠਾਪਿਤਾ ਬਲਵਤਿਯੋ ਸੀਸਵੇਦਨਾ ਹੋਨ੍ਤਿ. ਸੀਸਵੇਠਂ ਦਦੇਯ੍ਯਾਤਿ ਸੀਸਵੇਠਨਂ ਦਦੇਯ੍ਯ. ਦੇਵਤਾਤਿ ਬੋਧਿਸਤ੍ਤਸ੍ਸ ਚਙ੍ਕਮਨਕੋਟਿਯਂ ਪਣ੍ਣਸਾਲਪਰਿਵੇਣਸਾਮਨ੍ਤਾ ਚ ਅਧਿਵਤ੍ਥਾ ਦੇਵਤਾ.

ਤਦਾ ਕਿਰ ਬੋਧਿਸਤ੍ਤਸ੍ਸ ਅਧਿਮਤ੍ਤੇ ਕਾਯਦਾਹੇ ਉਪ੍ਪਨ੍ਨੇ ਮੁਚ੍ਛਾ ਉਦਪਾਦਿ. ਸੋ ਚਙ੍ਕਮੇਵ ਨਿਸਿਨ੍ਨੋ ਹੁਤ੍ਵਾ ਪਪਤਿ. ਤਂ ਦਿਸ੍ਵਾ ਦੇਵਤਾ ਏਵਮਾਹਂਸੁ – ‘‘ਵਿਹਾਰੋਤ੍ਵੇਵ ਸੋ ਅਰਹਤੋ’’ਤਿ, ‘‘ਅਰਹਨ੍ਤੋ ਨਾਮ ਏਵਰੂਪਾ ਹੋਨ੍ਤਿ ਮਤਕਸਦਿਸਾ’’ਤਿ ਲਦ੍ਧਿਯਾ ਵਦਨ੍ਤਿ. ਤਤ੍ਥ ਯਾ ਦੇਵਤਾ ‘‘ਕਾਲਙ੍ਕਤੋ’’ਤਿ ਆਹਂਸੁ, ਤਾ ਗਨ੍ਤ੍ਵਾ ਸੁਦ੍ਧੋਦਨਮਹਾਰਾਜਸ੍ਸ ਆਰੋਚੇਸੁਂ – ‘‘ਤੁਮ੍ਹਾਕਂ ਪੁਤ੍ਤੋ ਕਾਲਙ੍ਕਤੋ’’ਤਿ. ਮਮ ਪੁਤ੍ਤੋ ਬੁਦ੍ਧੋ ਹੁਤ੍ਵਾ ਕਾਲਙ੍ਕਤੋ, ਨੋ ਅਹੁਤ੍ਵਾਤਿ? ਬੁਦ੍ਧੋ ਭਵਿਤੁਂ ਨਾਸਕ੍ਖਿ, ਪਧਾਨਭੂਮਿਯਂਯੇਵ ਪਤਿਤ੍ਵਾ ਕਾਲਙ੍ਕਤੋਤਿ. ਨਾਹਂ ਸਦ੍ਦਹਾਮਿ, ਮਮ ਪੁਤ੍ਤਸ੍ਸ ਬੋਧਿਂ ਅਪਤ੍ਵਾ ਕਾਲਙ੍ਕਿਰਿਯਾ ਨਾਮ ਨਤ੍ਥੀਤਿ.

ਅਪਰਭਾਗੇ ਸਮ੍ਮਾਸਮ੍ਬੁਦ੍ਧਸ੍ਸ ਧਮ੍ਮਚਕ੍ਕਂ ਪਵਤ੍ਤੇਤ੍ਵਾ ਅਨੁਪੁਬ੍ਬੇਨ ਰਾਜਗਹਂ ਗਨ੍ਤ੍ਵਾ ਕਪਿਲਵਤ੍ਥੁਂ ਅਨੁਪ੍ਪਤ੍ਤਸ੍ਸ ਸੁਦ੍ਧੋਦਨਮਹਾਰਾਜਾ ਪਤ੍ਤਂ ਗਹੇਤ੍ਵਾ ਪਾਸਾਦਂ ਆਰੋਪੇਤ੍ਵਾ ਯਾਗੁਖਜ੍ਜਕਂ ਦਤ੍ਵਾ ਅਨ੍ਤਰਾਭਤ੍ਤਸਮਯੇ ਏਤਮਤ੍ਥਂ ਆਰੋਚੇਸਿ – ਤੁਮ੍ਹਾਕਂ ਭਗਵਾ ਪਧਾਨਕਰਣਕਾਲੇ ਦੇਵਤਾ ਆਗਨ੍ਤ੍ਵਾ, ‘‘ਪੁਤ੍ਤੋ ਤੇ, ਮਹਾਰਾਜ, ਕਾਲਙ੍ਕਤੋ’’ਤਿ ਆਹਂਸੂਤਿ. ਕਿਂ ਸਦ੍ਦਹਸਿ ਮਹਾਰਾਜਾਤਿ? ਨ ਭਗਵਾ ਸਦ੍ਦਹਿਨ੍ਤਿ. ਇਦਾਨਿ, ਮਹਾਰਾਜ, ਸੁਪਿਨਪ੍ਪਟਿਗ੍ਗਹਣਤੋ ਪਟ੍ਠਾਯ ਅਚ੍ਛਰਿਯਾਨਿ ਪਸ੍ਸਨ੍ਤੋ ਕਿਂ ਸਦ੍ਦਹਿਸ੍ਸਸਿ? ਅਹਮ੍ਪਿ ਬੁਦ੍ਧੋ ਜਾਤੋ, ਤ੍ਵਮ੍ਪਿ ਬੁਦ੍ਧਪਿਤਾ ਜਾਤੋ, ਪੁਬ੍ਬੇ ਪਨ ਮਯ੍ਹਂ ਅਪਰਿਪਕ੍ਕੇ ਞਾਣੇ ਬੋਧਿਚਰਿਯਂ ਚਰਨ੍ਤਸ੍ਸ ਧਮ੍ਮਪਾਲਕੁਮਾਰਕਾਲੇਪਿ ਸਿਪ੍ਪਂ ਉਗ੍ਗਹੇਤੁਂ ਗਤਸ੍ਸ, ‘‘ਤੁਮ੍ਹਾਕਂ ਪੁਤ੍ਤੋ ਧਮ੍ਮਪਾਲਕੁਮਾਰੋ ਕਾਲਙ੍ਕਤੋ, ਇਦਮਸ੍ਸ ਅਟ੍ਠੀ’’ਤਿ ਏਲ਼ਕਟ੍ਠਿਂ ਆਹਰਿਤ੍ਵਾ ਦਸ੍ਸੇਸੁਂ, ਤਦਾਪਿ ਤੁਮ੍ਹੇ, ‘‘ਮਮ ਪੁਤ੍ਤਸ੍ਸ ਅਨ੍ਤਰਾਮਰਣਂ ਨਾਮ ਨਤ੍ਥਿ, ਨਾਹਂ ਸਦ੍ਦਹਾਮੀ’’ਤਿ ਅਵੋਚੁਤ੍ਥ, ਮਹਾਰਾਜਾਤਿ ਇਮਿਸ੍ਸਾ ਅਟ੍ਠੁਪ੍ਪਤ੍ਤਿਯਾ ਭਗਵਾ ਮਹਾਧਮ੍ਮਪਾਲਜਾਤਕਂ ਕਥੇਸਿ.

੩੭੯. ਮਾ ਖੋ ਤ੍ਵਂ ਮਾਰਿਸਾਤਿ ਸਮ੍ਪਿਯਾਯਮਾਨਾ ਆਹਂਸੁ. ਦੇਵਤਾਨਂ ਕਿਰਾਯਂ ਪਿਯਮਨਾਪਵੋਹਾਰੋ, ਯਦਿਦਂ ਮਾਰਿਸਾਤਿ. ਅਜਜ੍ਜਿਤਨ੍ਤਿ ਅਭੋਜਨਂ. ਹਲਨ੍ਤਿ ਵਦਾਮੀਤਿ ਅਲਨ੍ਤਿ ਵਦਾਮਿ, ਅਲਂ ਇਮਿਨਾ ਏਵਂ ਮਾ ਕਰਿਤ੍ਥ, ਯਾਪੇਸ੍ਸਾਮਹਨ੍ਤਿ ਏਵਂ ਪਟਿਸੇਧੇਮੀਤਿ ਅਤ੍ਥੋ.

੩੮੦-੧. ਮਙ੍ਗੁਰਚ੍ਛਵੀਤਿ ਮਙ੍ਗੁਰਮਚ੍ਛਚ੍ਛਵਿ. ਏਤਾਵ ਪਰਮਨ੍ਤਿ ਤਾਸਮ੍ਪਿ ਵੇਦਨਾਨਮੇਤਂਯੇਵ ਪਰਮਂ, ਉਤ੍ਤਮਂ ਪਮਾਣਂ. ਪਿਤੁ ਸਕ੍ਕਸ੍ਸ ਕਮ੍ਮਨ੍ਤੇ…ਪੇ… ਪਠਮਂ ਝਾਨਂ ਉਪਸਮ੍ਪਜ੍ਜ ਵਿਹਰਿਤਾਤਿ ਰਞ੍ਞੋ ਕਿਰ ਵਪ੍ਪਮਙ੍ਗਲਦਿਵਸੋ ਨਾਮ ਹੋਤਿ, ਤਦਾ ਅਨੇਕਪ੍ਪਕਾਰਂ ਖਾਦਨੀਯਂ ਭੋਜਨੀਯਂ ਪਟਿਯਾਦੇਨ੍ਤਿ. ਨਗਰਵੀਥਿਯੋ ਸੋਧਾਪੇਤ੍ਵਾ ਪੁਣ੍ਣਘਟੇ ਠਪਾਪੇਤ੍ਵਾ ਧਜਪਟਾਕਾਦਯੋ ਉਸ੍ਸਾਪੇਤ੍ਵਾ ਸਕਲਨਗਰਂ ਦੇਵਵਿਮਾਨਂ ਵਿਯ ਅਲਙ੍ਕਰੋਨ੍ਤਿ. ਸਬ੍ਬੇ ਦਾਸਕਮ੍ਮਕਰਾਦਯੋ ਅਹਤਵਤ੍ਥਨਿਵਤ੍ਥਾ ਗਨ੍ਧਮਾਲਾਦਿਪਟਿਮਣ੍ਡਿਤਾ ਰਾਜਕੁਲੇ ਸਨ੍ਨਿਪਤਨ੍ਤਿ. ਰਞ੍ਞੋ ਕਮ੍ਮਨ੍ਤੇ ਨਙ੍ਗਲਸਤਸਹਸ੍ਸਂ ਯੋਜੀਯਤਿ. ਤਸ੍ਮਿਂ ਪਨ ਦਿਵਸੇ ਏਕੇਨ ਊਨਂ ਅਟ੍ਠਸਤਂ ਯੋਜੇਨ੍ਤਿ. ਸਬ੍ਬਨਙ੍ਗਲਾਨਿ ਸਦ੍ਧਿਂ ਬਲਿਬਦ੍ਦਰਸ੍ਮਿਯੋਤ੍ਤੇਹਿ ਜਾਣੁਸ੍ਸੋਣਿਸ੍ਸ ਰਥੋ ਵਿਯ ਰਜਤਪਰਿਕ੍ਖਿਤ੍ਤਾਨਿ ਹੋਨ੍ਤਿ. ਰਞ੍ਞੋ ਆਲਮ੍ਬਨਨਙ੍ਗਲਂ ਰਤ੍ਤਸੁਵਣ੍ਣਪਰਿਕ੍ਖਿਤ੍ਤਂ ਹੋਤਿ. ਬਲਿਬਦ੍ਦਾਨਂ ਸਿਙ੍ਗਾਨਿਪਿ ਰਸ੍ਮਿਪਤੋਦਾਪਿ ਸੁਵਣ੍ਣਪਰਿਕ੍ਖਿਤ੍ਤਾ ਹੋਨ੍ਤਿ. ਰਾਜਾ ਮਹਾਪਰਿਵਾਰੇਨ ਨਿਕ੍ਖਮਨ੍ਤੋ ਪੁਤ੍ਤਂ ਗਹੇਤ੍ਵਾ ਅਗਮਾਸਿ.

ਕਮ੍ਮਨ੍ਤਟ੍ਠਾਨੇ ਏਕੋ ਜਮ੍ਬੁਰੁਕ੍ਖੋ ਬਹਲਪਤ੍ਤਪਲਾਸੋ ਸਨ੍ਦਚ੍ਛਾਯੋ ਅਹੋਸਿ. ਤਸ੍ਸ ਹੇਟ੍ਠਾ ਕੁਮਾਰਸ੍ਸ ਸਯਨਂ ਪਞ੍ਞਪੇਤ੍ਵਾ ਉਪਰਿ ਸੁਵਣ੍ਣਤਾਰਕਖਚਿਤਂ ਵਿਤਾਨਂ ਬਨ੍ਧਾਪੇਤ੍ਵਾ ਸਾਣਿਪਾਕਾਰੇਨ ਪਰਿਕ੍ਖਿਪਾਪੇਤ੍ਵਾ ਆਰਕ੍ਖਂ ਠਪੇਤ੍ਵਾ ਰਾਜਾ ਸਬ੍ਬਾਲਙ੍ਕਾਰਂ ਅਲਙ੍ਕਰਿਤ੍ਵਾ ਅਮਚ੍ਚਗਣਪਰਿਵੁਤੋ ਨਙ੍ਗਲਕਰਣਟ੍ਠਾਨਂ ਅਗਮਾਸਿ. ਤਤ੍ਥ ਰਾਜਾ ਸੁਵਣ੍ਣਨਙ੍ਗਲਂ ਗਣ੍ਹਾਤਿ. ਅਮਚ੍ਚਾ ਏਕੇਨੂਨਅਟ੍ਠਸਤਰਜਤਨਙ੍ਗਲਾਨਿ ਗਹੇਤ੍ਵਾ ਇਤੋ ਚਿਤੋ ਚ ਕਸਨ੍ਤਿ. ਰਾਜਾ ਪਨ ਓਰਤੋ ਪਾਰਂ ਗਚ੍ਛਤਿ, ਪਾਰਤੋ ਵਾ ਓਰਂ ਗਚ੍ਛਤਿ. ਏਤਸ੍ਮਿਂ ਠਾਨੇ ਮਹਾਸਮ੍ਪਤ੍ਤਿ ਹੋਤਿ, ਬੋਧਿਸਤ੍ਤਂ ਪਰਿਵਾਰੇਤ੍ਵਾ ਨਿਸਿਨ੍ਨਾ ਧਾਤਿਯੋ ਰਞ੍ਞੋ ਸਮ੍ਪਤ੍ਤਿਂ ਪਸ੍ਸਿਸ੍ਸਾਮਾਤਿ ਅਨ੍ਤੋਸਾਣਿਤੋ ਬਹਿ ਨਿਕ੍ਖਨ੍ਤਾ. ਬੋਧਿਸਤ੍ਤੋ ਇਤੋ ਚਿਤੋ ਚ ਓਲੋਕੇਨ੍ਤੋ ਕਞ੍ਚਿ ਅਦਿਸ੍ਵਾ ਵੇਗੇਨ ਉਟ੍ਠਾਯ ਪਲ੍ਲਙ੍ਕਂ ਆਭੁਜਿਤ੍ਵਾ ਆਨਾਪਾਨੇ ਪਰਿਗ੍ਗਹੇਤ੍ਵਾ ਪਠਮਜ੍ਝਾਨਂ ਨਿਬ੍ਬਤ੍ਤੇਸਿ. ਧਾਤਿਯੋ ਖਜ੍ਜਭੋਜ੍ਜਨ੍ਤਰੇ ਵਿਚਰਮਾਨਾ ਥੋਕਂ ਚਿਰਾਯਿਂਸੁ, ਸੇਸਰੁਕ੍ਖਾਨਂ ਛਾਯਾ ਨਿਵਤ੍ਤਾ, ਤਸ੍ਸ ਪਨ ਰੁਕ੍ਖਸ੍ਸ ਪਰਿਮਣ੍ਡਲਾ ਹੁਤ੍ਵਾ ਅਟ੍ਠਾਸਿ. ਧਾਤਿਯੋ ਅਯ੍ਯਪੁਤ੍ਤੋ ਏਕਕੋਤਿ ਵੇਗੇਨ ਸਾਣਿਂ ਉਕ੍ਖਿਪਿਤ੍ਵਾ ਅਨ੍ਤੋ ਪਵਿਸਮਾਨਾ ਬੋਧਿਸਤ੍ਤਂ ਸਯਨੇ ਪਲ੍ਲਙ੍ਕੇਨ ਨਿਸਿਨ੍ਨਂ ਤਞ੍ਚ ਪਾਟਿਹਾਰਿਯਂ ਦਿਸ੍ਵਾ ਗਨ੍ਤ੍ਵਾ ਰਞ੍ਞੋ ਆਰੋਚਯਿਂਸੁ – ‘‘ਕੁਮਾਰੋ ਦੇਵ, ਏਵਂ ਨਿਸਿਨ੍ਨੋ ਅਞ੍ਞੇਸਂ ਰੁਕ੍ਖਾਨਂ ਛਾਯਾ ਨਿਵਤ੍ਤਾ, ਜਮ੍ਬੁਰੁਕ੍ਖਸ੍ਸ ਪਰਿਮਣ੍ਡਲਾ ਠਿਤਾ’’ਤਿ. ਰਾਜਾ ਵੇਗੇਨਾਗਨ੍ਤ੍ਵਾ ਪਾਟਿਹਾਰਿਯਂ ਦਿਸ੍ਵਾ, ‘‘ਇਦਂ ਤੇ, ਤਾਤ, ਦੁਤਿਯਂ ਵਨ੍ਦਨ’’ਨ੍ਤਿ ਪੁਤ੍ਤਂ ਵਨ੍ਦਿ. ਇਦਮੇਤਂ ਸਨ੍ਧਾਯ ਵੁਤ੍ਤਂ – ‘‘ਪਿਤੁ ਸਕ੍ਕਸ੍ਸ ਕਮ੍ਮਨ੍ਤੇ…ਪੇ… ਪਠਮਜ੍ਝਾਨਂ ਉਪਸਮ੍ਪਜ੍ਜ ਵਿਹਰਿਤਾ’’ਤਿ. ਸਿਯਾ ਨੁ ਖੋ ਏਸੋ ਮਗ੍ਗੋ ਬੋਧਾਯਾਤਿ ਭਵੇਯ੍ਯ ਨੁ ਖੋ ਏਤਂ ਆਨਾਪਾਨਸ੍ਸਤਿਪਠਮਜ੍ਝਾਨਂ ਬੁਜ੍ਝਨਤ੍ਥਾਯ ਮਗ੍ਗੋਤਿ. ਸਤਾਨੁਸਾਰਿਵਿਞ੍ਞਾਣਨ੍ਤਿ ਨਯਿਦਂ ਬੋਧਾਯ ਮਗ੍ਗੋ ਭਵਿਸ੍ਸਤਿ, ਆਨਾਪਾਨਸ੍ਸਤਿਪਠਮਜ੍ਝਾਨਂ ਪਨ ਭਵਿਸ੍ਸਤੀਤਿ ਏਵਂ ਏਕਂ ਦ੍ਵੇ ਵਾਰੇ ਉਪ੍ਪਨ੍ਨਸਤਿਯਾ ਅਨਨ੍ਤਰਂ ਉਪ੍ਪਨ੍ਨਵਿਞ੍ਞਾਣਂ ਸਤਾਨੁਸਾਰਿਵਿਞ੍ਞਾਣਂ ਨਾਮ. ਯਂ ਤਂ ਸੁਖਨ੍ਤਿ ਯਂ ਤਂ ਆਨਾਪਾਨਸ੍ਸਤਿਪਠਮਜ੍ਝਾਨਸੁਖਂ.

੩੮੨. ਪਚ੍ਚੁਪਟ੍ਠਿਤਾ ਹੋਨ੍ਤੀਤਿ ਪਣ੍ਣਸਾਲਪਰਿਵੇਣਸਮ੍ਮਜ੍ਜਨਾਦਿਵਤ੍ਤਕਰਣੇਨ ਉਪਟ੍ਠਿਤਾ ਹੋਨ੍ਤਿ. ਬਾਹੁਲ੍ਲਿਕੋਤਿ ਪਚ੍ਚਯਬਾਹੁਲ੍ਲਿਕੋ. ਆਵਤ੍ਤੋ ਬਾਹੁਲ੍ਲਾਯਾਤਿ ਰਸਗਿਦ੍ਧੋ ਹੁਤ੍ਵਾ ਪਣੀਤਪਿਣ੍ਡਪਾਤਾਦੀਨਂ ਅਤ੍ਥਾਯ ਆਵਤ੍ਤੋ. ਨਿਬ੍ਬਿਜ੍ਜ ਪਕ੍ਕਮਿਂਸੂਤਿ ਉਕ੍ਕਣ੍ਠਿਤ੍ਵਾ ਧਮ੍ਮਨਿਯਾਮੇਨੇਵ ਪਕ੍ਕਨ੍ਤਾ ਬੋਧਿਸਤ੍ਤਸ੍ਸ ਸਮ੍ਬੋਧਿਂ ਪਤ੍ਤਕਾਲੇ ਕਾਯਵਿਵੇਕਸ੍ਸ ਓਕਾਸਦਾਨਤ੍ਥਂ ਧਮ੍ਮਤਾਯ ਗਤਾ. ਗਚ੍ਛਨ੍ਤਾ ਚ ਅਞ੍ਞਟ੍ਠਾਨਂ ਅਗਨ੍ਤ੍ਵਾ ਬਾਰਾਣਸਿਮੇਵ ਅਗਮਂਸੁ. ਬੋਧਿਸਤ੍ਤੋ ਤੇਸੁ ਗਤੇਸੁ ਅਦ੍ਧਮਾਸਂ ਕਾਯਵਿਵੇਕਂ ਲਭਿਤ੍ਵਾ ਬੋਧਿਮਣ੍ਡੇ ਅਪਰਾਜਿਤਪਲ੍ਲਙ੍ਕੇ ਨਿਸੀਦਿਤ੍ਵਾ ਸਬ੍ਬਞ੍ਞੁਤਞ੍ਞਾਣਂ ਪਟਿਵਿਜ੍ਝਿ.

੩੮੩. ਵਿਵਿਚ੍ਚੇਵ ਕਾਮੇਹੀਤਿਆਦਿ ਭਯਭੇਰਵੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.

੩੮੭. ਅਭਿਜਾਨਾਮਿ ਖੋ ਪਨਾਹਨ੍ਤਿ ਅਯਂ ਪਾਟਿਯੇਕ੍ਕੋ ਅਨੁਸਨ੍ਧਿ. ਨਿਗਣ੍ਠੋ ਕਿਰ ਚਿਨ੍ਤੇਸਿ – ‘‘ਅਹਂ ਸਮਣਂ ਗੋਤਮਂ ਏਕਂ ਪਞ੍ਹਂ ਪੁਚ੍ਛਿਂ. ਸਮਣੋ ਗੋਤਮੋ ‘ਅਪਰਾਪਿ ਮਂ, ਅਗ੍ਗਿਵੇਸ੍ਸਨ, ਅਪਰਾਪਿ ਮਂ, ਅਗ੍ਗਿਵੇਸ੍ਸਨਾ’ਤਿ ਪਰਿਯੋਸਾਨਂ ਅਦਸ੍ਸੇਨ੍ਤੋ ਕਥੇਤਿਯੇਵ. ਕੁਪਿਤੋ ਨੁ ਖੋ’’ਤਿ? ਅਥ ਭਗਵਾ, ਅਗ੍ਗਿਵੇਸ੍ਸਨ, ਤਥਾਗਤੇ ਅਨੇਕਸਤਾਯ ਪਰਿਸਾਯ ਧਮ੍ਮਂ ਦੇਸੇਨ੍ਤੇ ਕੁਪਿਤੋ ਸਮਣੋ ਗੋਤਮੋਤਿ ਏਕੋਪਿ ਵਤ੍ਤਾ ਨਤ੍ਥਿ, ਪਰੇਸਂ ਬੋਧਨਤ੍ਥਾਯ ਪਟਿਵਿਜ੍ਝਨਤ੍ਥਾਯ ਏਵ ਤਥਾਗਤੋ ਧਮ੍ਮਂ ਦੇਸੇਤੀਤਿ ਦਸ੍ਸੇਨ੍ਤੋ ਇਮਂ ਧਮ੍ਮਦੇਸਨਂ ਆਰਭਿ. ਤਤ੍ਥ ਆਰਬ੍ਭਾਤਿ ਸਨ੍ਧਾਯ. ਯਾਵਦੇਵਾਤਿ ਪਯੋਜਨਵਿਧਿ ਪਰਿਚ੍ਛੇਦਨਿਯਮਨਂ. ਇਦਂ ਵੁਤ੍ਤਂ ਹੋਤਿ – ਪਰੇਸਂ ਵਿਞ੍ਞਾਪਨਮੇਵ ਤਥਾਗਤਸ੍ਸ ਧਮ੍ਮਦੇਸਨਾਯ ਪਯੋਜਨਂ, ਤਸ੍ਮਾ ਨ ਏਕਸ੍ਸੇਵ ਦੇਸੇਤਿ, ਯਤ੍ਤਕਾ ਵਿਞ੍ਞਾਤਾਰੋ ਅਤ੍ਥਿ, ਸਬ੍ਬੇਸਂ ਦੇਸੇਤੀਤਿ. ਤਸ੍ਮਿਂਯੇਵ ਪੁਰਿਮਸ੍ਮਿਨ੍ਤਿ ਇਮਿਨਾ ਕਿਂ ਦਸ੍ਸੇਤੀਤਿ? ਸਚ੍ਚਕੋ ਕਿਰ ਚਿਨ੍ਤੇਸਿ – ‘‘ਸਮਣੋ ਗੋਤਮੋ ਅਭਿਰੂਪੋ ਪਾਸਾਦਿਕੋ ਸੁਫੁਸਿਤਂ ਦਨ੍ਤਾਵਰਣਂ, ਜਿਵ੍ਹਾ ਮੁਦੁਕਾ, ਮਧੁਰਂ ਵਾਕ੍ਕਰਣਂ, ਪਰਿਸਂ ਰਞ੍ਜੇਨ੍ਤੋ ਮਞ੍ਞੇ ਵਿਚਰਤਿ, ਅਨ੍ਤੋ ਪਨਸ੍ਸ ਚਿਤ੍ਤੇਕਗ੍ਗਤਾ ਨਤ੍ਥੀ’’ਤਿ. ਅਥ ਭਗਵਾ, ਅਗ੍ਗਿਵੇਸ੍ਸਨ, ਨ ਤਥਾਗਤੋ ਪਰਿਸਂ ਰਞ੍ਜੇਨ੍ਤੋ ਵਿਚਰਤਿ, ਚਕ੍ਕਵਾਲ਼ਪਰਿਯਨ੍ਤਾਯਪਿ ਪਰਿਸਾਯ ਤਥਾਗਤੋ ਧਮ੍ਮਂ ਦੇਸੇਤਿ, ਅਸਲ੍ਲੀਨੋ ਅਨੁਪਲਿਤ੍ਤੋ ਏਤ੍ਤਕਂ ਏਕਵਿਹਾਰੀ, ਸੁਞ੍ਞਤਫਲਸਮਾਪਤ੍ਤਿਂ ਅਨੁਯੁਤ੍ਤੋਤਿ ਦਸ੍ਸੇਤੁਂ ਏਵਮਾਹ.

ਅਜ੍ਝਤ੍ਤਮੇਵਾਤਿ ਗੋਚਰਜ੍ਝਤ੍ਤਮੇਵ. ਸਨ੍ਨਿਸਾਦੇਮੀਤਿ ਸਨ੍ਨਿਸੀਦਾਪੇਮਿ, ਤਥਾਗਤੋ ਹਿ ਯਸ੍ਮਿਂ ਖਣੇ ਪਰਿਸਾ ਸਾਧੁਕਾਰਂ ਦੇਤਿ, ਤਸ੍ਮਿਂ ਖਣੇ ਪੁਬ੍ਬਾਭੋਗੇਨ ਪਰਿਚ੍ਛਿਨ੍ਦਿਤ੍ਵਾ ਫਲਸਮਾਪਤ੍ਤਿਂ ਸਮਾਪਜ੍ਜਤਿ, ਸਾਧੁਕਾਰਸਦ੍ਦਸ੍ਸ ਨਿਗ੍ਘੋਸੇ ਅਵਿਚ੍ਛਿਨ੍ਨੇਯੇਵ ਸਮਾਪਤ੍ਤਿਤੋ ਵੁਟ੍ਠਾਯ ਠਿਤਟ੍ਠਾਨਤੋ ਪਟ੍ਠਾਯ ਧਮ੍ਮਂ ਦੇਸੇਤਿ, ਬੁਦ੍ਧਾਨਞ੍ਹਿ ਭਵਙ੍ਗਪਰਿਵਾਸੋ ਲਹੁਕੋ ਹੋਤੀਤਿ ਅਸ੍ਸਾਸਵਾਰੇ ਪਸ੍ਸਾਸਵਾਰੇ ਸਮਾਪਤ੍ਤਿਂ ਸਮਾਪਜ੍ਜਨ੍ਤਿ. ਯੇਨ ਸੁਦਂ ਨਿਚ੍ਚਕਪ੍ਪਨ੍ਤਿ ਯੇਨ ਸੁਞ੍ਞੇਨ ਫਲਸਮਾਧਿਨਾ ਨਿਚ੍ਚਕਾਲਂ ਵਿਹਰਾਮਿ, ਤਸ੍ਮਿਂ ਸਮਾਧਿਨਿਮਿਤ੍ਤੇ ਚਿਤ੍ਤਂ ਸਣ੍ਠਪੇਮਿ ਸਮਾਦਹਾਮੀਤਿ ਦਸ੍ਸੇਤਿ.

ਓਕਪ੍ਪਨਿਯਮੇਤਨ੍ਤਿ ਸਦ੍ਦਹਨਿਯਮੇਤਂ. ਏਵਂ ਭਗਵਤੋ ਏਕਗ੍ਗਚਿਤ੍ਤਤਂ ਸਮ੍ਪਟਿਚ੍ਛਿਤ੍ਵਾ ਇਦਾਨਿ ਅਤ੍ਤਨੋ ਓਵਟ੍ਟਿਕਸਾਰਂ ਕਤ੍ਵਾ ਆਨੀਤਪਞ੍ਹਂ ਪੁਚ੍ਛਨ੍ਤੋ ਅਭਿਜਾਨਾਤਿ ਖੋ ਪਨ ਭਵਂ ਗੋਤਮੋ ਦਿਵਾ ਸੁਪਿਤਾਤਿ ਆਹ. ਯਥਾ ਹਿ ਸੁਨਖੋ ਨਾਮ ਅਸਮ੍ਭਿਨ੍ਨਖੀਰਪਕ੍ਕਪਾਯਸਂ ਸਪ੍ਪਿਨਾ ਯੋਜੇਤ੍ਵਾ ਉਦਰਪੂਰਂ ਭੋਜਿਤੋਪਿ ਗੂਥਂ ਦਿਸ੍ਵਾ ਅਖਾਦਿਤ੍ਵਾ ਗਨ੍ਤੁਂ ਨ ਸਕ੍ਕਾ, ਅਖਾਦਮਾਨੋ ਘਾਯਿਤ੍ਵਾਪਿ ਗਚ੍ਛਤਿ, ਅਘਾਯਿਤ੍ਵਾਵ ਗਤਸ੍ਸ ਕਿਰਸ੍ਸ ਸੀਸਂ ਰੁਜ੍ਜਤਿ; ਏਵਮੇਵਂ ਇਮਸ੍ਸਪਿ ਸਤ੍ਥਾ ਅਸਮ੍ਭਿਨ੍ਨਖੀਰਪਕ੍ਕਪਾਯਸਸਦਿਸਂ ਅਭਿਨਿਕ੍ਖਮਨਤੋ ਪਟ੍ਠਾਯ ਯਾਵ ਆਸਵਕ੍ਖਯਾ ਪਸਾਦਨੀਯਂ ਧਮ੍ਮਦੇਸਨਂ ਦੇਸੇਤਿ. ਏਤਸ੍ਸ ਪਨ ਏਵਰੂਪਂ ਧਮ੍ਮਦੇਸਨਂ ਸੁਤ੍ਵਾ ਸਤ੍ਥਰਿ ਪਸਾਦਮਤ੍ਤਮ੍ਪਿ ਨ ਉਪ੍ਪਨ੍ਨਂ, ਤਸ੍ਮਾ ਓਵਟ੍ਟਿਕਸਾਰਂ ਕਤ੍ਵਾ ਆਨੀਤਪਞ੍ਹਂ ਅਪੁਚ੍ਛਿਤ੍ਵਾ ਗਨ੍ਤੁਂ ਅਸਕ੍ਕੋਨ੍ਤੋ ਏਵਮਾਹ. ਤਤ੍ਥ ਯਸ੍ਮਾ ਥਿਨਮਿਦ੍ਧਂ ਸਬ੍ਬਖੀਣਾਸਵਾਨਂ ਅਰਹਤ੍ਤਮਗ੍ਗੇਨੇਵ ਪਹੀਯਤਿ, ਕਾਯਦਰਥੋ ਪਨ ਉਪਾਦਿਨ੍ਨਕੇਪਿ ਹੋਤਿ ਅਨੁਪਾਦਿਨ੍ਨਕੇਪਿ. ਤਥਾ ਹਿ ਕਮਲੁਪ੍ਪਲਾਦੀਨਿ ਏਕਸ੍ਮਿਂ ਕਾਲੇ ਵਿਕਸਨ੍ਤਿ, ਏਕਸ੍ਮਿਂ ਮਕੁਲਾਨਿ ਹੋਨ੍ਤਿ, ਸਾਯਂ ਕੇਸਞ੍ਚਿ ਰੁਕ੍ਖਾਨਮ੍ਪਿ ਪਤ੍ਤਾਨਿ ਪਤਿਲੀਯਨ੍ਤਿ, ਪਾਤੋ ਵਿਪ੍ਫਾਰਿਕਾਨਿ ਹੋਨ੍ਤਿ. ਏਵਂ ਉਪਾਦਿਨ੍ਨਕਸ੍ਸ ਕਾਯਸ੍ਸ ਦਰਥੋਯੇਵ ਦਰਥਵਸੇਨ ਭਵਙ੍ਗਸੋਤਞ੍ਚ ਇਧ ਨਿਦ੍ਦਾਤਿ ਅਧਿਪ੍ਪੇਤਂ, ਤਂ ਖੀਣਾਸਵਾਨਮ੍ਪਿ ਹੋਤਿ. ਤਂ ਸਨ੍ਧਾਯ, ‘‘ਅਭਿਜਾਨਾਮਹ’’ਨ੍ਤਿਆਦਿਮਾਹ. ਸਮ੍ਮੋਹਵਿਹਾਰਸ੍ਮਿਂ ਵਦਨ੍ਤੀਤਿ ਸਮ੍ਮੋਹਵਿਹਾਰੋਤਿ ਵਦਨ੍ਤਿ.

੩੮੯. ਆਸਜ੍ਜ ਆਸਜ੍ਜਾਤਿ ਘਟ੍ਟੇਤ੍ਵਾ ਘਟ੍ਟੇਤ੍ਵਾ. ਉਪਨੀਤੇਹੀਤਿ ਉਪਨੇਤ੍ਵਾ ਕਥਿਤੇਹਿ. ਵਚਨਪ੍ਪਥੇਹੀਤਿ ਵਚਨੇਹਿ. ਅਭਿਨਨ੍ਦਿਤ੍ਵਾ ਅਨੁਮੋਦਿਤ੍ਵਾਤਿ ਅਲਨ੍ਤਿ ਚਿਤ੍ਤੇਨ ਸਮ੍ਪਟਿਚ੍ਛਨ੍ਤੋ ਅਭਿਨਨ੍ਦਿਤ੍ਵਾ ਵਾਚਾਯਪਿ ਪਸਂਸਨ੍ਤੋ ਅਨੁਮੋਦਿਤ੍ਵਾ. ਭਗਵਤਾ ਇਮਸ੍ਸ ਨਿਗਣ੍ਠਸ੍ਸ ਦ੍ਵੇ ਸੁਤ੍ਤਾਨਿ ਕਥਿਤਾਨਿ. ਪੁਰਿਮਸੁਤ੍ਤਂ ਏਕੋ ਭਾਣਵਾਰੋ, ਇਦਂ ਦਿਯਡ੍ਢੋ, ਇਤਿ ਅਡ੍ਢਤਿਯੇ ਭਾਣਵਾਰੇ ਸੁਤ੍ਵਾਪਿ ਅਯਂ ਨਿਗਣ੍ਠੋ ਨੇਵ ਅਭਿਸਮਯਂ ਪਤ੍ਤੋ, ਨ ਪਬ੍ਬਜਿਤੋ, ਨ ਸਰਣੇਸੁ ਪਤਿਟ੍ਠਿਤੋ. ਕਸ੍ਮਾ ਏਤਸ੍ਸ ਭਗਵਾ ਧਮ੍ਮਂ ਦੇਸੇਸੀਤਿ? ਅਨਾਗਤੇ ਵਾਸਨਤ੍ਥਾਯ. ਪਸ੍ਸਤਿ ਹਿ ਭਗਵਾ, ‘‘ਇਮਸ੍ਸ ਇਦਾਨਿ ਉਪਨਿਸ੍ਸਯੋ ਨਤ੍ਥਿ, ਮਯ੍ਹਂ ਪਨ ਪਰਿਨਿਬ੍ਬਾਨਤੋ ਸਮਧਿਕਾਨਂ ਦ੍ਵਿਨ੍ਨਂ ਵਸ੍ਸਸਤਾਨਂ ਅਚ੍ਚਯੇਨ ਤਮ੍ਬਪਣ੍ਣਿਦੀਪੇ ਸਾਸਨਂ ਪਤਿਟ੍ਠਹਿਸ੍ਸਤਿ. ਤਤ੍ਰਾਯਂ ਕੁਲਘਰੇ ਨਿਬ੍ਬਤ੍ਤਿਤ੍ਵਾ ਸਮ੍ਪਤ੍ਤੇ ਕਾਲੇ ਪਬ੍ਬਜਿਤ੍ਵਾ ਤੀਣਿ ਪਿਟਕਾਨਿ ਉਗ੍ਗਹੇਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਤ੍ਵਾ ਕਾਲ਼ਬੁਦ੍ਧਰਕ੍ਖਿਤੋ ਨਾਮ ਮਹਾਖੀਣਾਸਵੋ ਭਵਿਸ੍ਸਤੀ’’ਤਿ. ਇਦਂ ਦਿਸ੍ਵਾ ਅਨਾਗਤੇ ਵਾਸਨਤ੍ਥਾਯ ਧਮ੍ਮਂ ਦੇਸੇਸਿ.

ਸੋਪਿ ਤਤ੍ਥੇਵ ਤਮ੍ਬਪਣ੍ਣਿਦੀਪਮ੍ਹਿ ਸਾਸਨੇ ਪਤਿਟ੍ਠਿਤੇ ਦੇਵਲੋਕਤੋ ਚਵਿਤ੍ਵਾ ਦਕ੍ਖਿਣਗਿਰਿਵਿਹਾਰਸ੍ਸ ਭਿਕ੍ਖਾਚਾਰਗਾਮੇ ਏਕਸ੍ਮਿਂ ਅਮਚ੍ਚਕੁਲੇ ਨਿਬ੍ਬਤ੍ਤੋ ਪਬ੍ਬਜ੍ਜਾਸਮਤ੍ਥਯੋਬ੍ਬਨੇ ਪਬ੍ਬਜਿਤ੍ਵਾ ਤੇਪਿਟਕਂ ਬੁਦ੍ਧਵਚਨਂ ਉਗ੍ਗਹੇਤ੍ਵਾ ਗਣਂ ਪਰਿਹਰਨ੍ਤੋ ਮਹਾਭਿਕ੍ਖੁਸਙ੍ਘਪਰਿਵੁਤੋ ਉਪਜ੍ਝਾਯਂ ਪਸ੍ਸਿਤੁਂ ਅਗਮਾਸਿ. ਅਥਸ੍ਸ ਉਪਜ੍ਝਾਯੋ ਸਦ੍ਧਿਵਿਹਾਰਿਕਂ ਚੋਦੇਸ੍ਸਾਮੀਤਿ ਤੇਪਿਟਕਂ ਬੁਦ੍ਧਵਚਨਂ ਉਗ੍ਗਹੇਤ੍ਵਾ ਆਗਤੇਨ ਤੇਨ ਸਦ੍ਧਿਂ ਮੁਖਂ ਦਤ੍ਵਾ ਕਥਾਮਤ੍ਤਮ੍ਪਿ ਨ ਅਕਾਸਿ. ਸੋ ਪਚ੍ਚੂਸਸਮਯੇ ਵੁਟ੍ਠਾਯ ਥੇਰਸ੍ਸ ਸਨ੍ਤਿਕਂ ਗਨ੍ਤ੍ਵਾ, – ‘‘ਤੁਮ੍ਹੇ, ਭਨ੍ਤੇ, ਮਯਿ ਗਨ੍ਥਕਮ੍ਮਂ ਕਤ੍ਵਾ ਤੁਮ੍ਹਾਕਂ ਸਨ੍ਤਿਕਂ ਆਗਤੇ ਮੁਖਂ ਦਤ੍ਵਾ ਕਥਾਮਤ੍ਤਮ੍ਪਿ ਨ ਕਰਿਤ੍ਥ, ਕੋ ਮਯ੍ਹਂ ਦੋਸੋ’’ਤਿ ਪੁਚ੍ਛਿ. ਥੇਰੋ ਆਹ – ‘‘ਤ੍ਵਂ, ਆਵੁਸੋ, ਬੁਦ੍ਧਰਕ੍ਖਿਤ ਏਤ੍ਤਕੇਨੇਵ ‘ਪਬ੍ਬਜ੍ਜਾਕਿਚ੍ਚਂ ਮੇ ਮਤ੍ਥਕਂ ਪਤ੍ਤ’ਨ੍ਤਿ ਸਞ੍ਞਂ ਕਰੋਸੀ’’ਤਿ. ਕਿਂ ਕਰੋਮਿ, ਭਨ੍ਤੇਤਿ? ਗਣਂ ਵਿਨੋਦੇਤ੍ਵਾ ਤ੍ਵਂ ਪਪਞ੍ਚਂ ਛਿਨ੍ਦਿਤ੍ਵਾ ਚੇਤਿਯਪਬ੍ਬਤਵਿਹਾਰਂ ਗਨ੍ਤ੍ਵਾ ਸਮਣਧਮ੍ਮਂ ਕਰੋਹੀਤਿ. ਸੋ ਉਪਜ੍ਝਾਯਸ੍ਸ ਓਵਾਦੇ ਠਤ੍ਵਾ ਸਹ ਪਟਿਸਮ੍ਭਿਦਾਹਿ ਅਰਹਤ੍ਤਂ ਪਤ੍ਵਾ ਪੁਞ੍ਞਵਾ ਰਾਜਪੂਜਿਤੋ ਹੁਤ੍ਵਾ ਮਹਾਭਿਕ੍ਖੁਸਙ੍ਘਪਰਿਵਾਰੋ ਚੇਤਿਯਪਬ੍ਬਤਵਿਹਾਰੇ ਵਸਿ.

ਤਸ੍ਮਿਞ੍ਹਿ ਕਾਲੇ ਤਿਸ੍ਸਮਹਾਰਾਜਾ ਉਪੋਸਥਕਮ੍ਮਂ ਕਰੋਨ੍ਤੋ ਚੇਤਿਯਪਬ੍ਬਤੇ ਰਾਜਲੇਣੇ ਵਸਤਿ. ਸੋ ਥੇਰਸ੍ਸ ਉਪਟ੍ਠਾਕਭਿਕ੍ਖੁਨੋ ਸਞ੍ਞਂ ਅਦਾਸਿ – ‘‘ਯਦਾ ਮਯ੍ਹਂ ਅਯ੍ਯੋ ਪਞ੍ਹਂ ਵਿਸ੍ਸਜ੍ਜੇਤਿ, ਧਮ੍ਮਂ ਵਾ ਕਥੇਤਿ, ਤਦਾ ਮੇ ਸਞ੍ਞਂ ਦਦੇਯ੍ਯਾਥਾ’’ਤਿ. ਥੇਰੋਪਿ ਏਕਸ੍ਮਿਂ ਧਮ੍ਮਸ੍ਸਵਨਦਿਵਸੇ ਭਿਕ੍ਖੁਸਙ੍ਘਪਰਿਵਾਰੋ ਕਣ੍ਟਕਚੇਤਿਯਙ੍ਗਣਂ ਆਰੁਯ੍ਹ ਚੇਤਿਯਂ ਵਨ੍ਦਿਤ੍ਵਾ ਕਾਲ਼ਤਿਮ੍ਬਰੁਰੁਕ੍ਖਮੂਲੇ ਅਟ੍ਠਾਸਿ. ਅਥ ਨਂ ਏਕੋ ਪਿਣ੍ਡਪਾਤਿਕਤ੍ਥੇਰੋ ਕਾਲ਼ਕਾਰਾਮਸੁਤ੍ਤਨ੍ਤੇ ਪਞ੍ਹਂ ਪੁਚ੍ਛਿ. ਥੇਰੋ ਨਨੁ, ਆਵੁਸੋ, ਅਜ੍ਜ ਧਮ੍ਮਸ੍ਸਵਨਦਿਵਸੋਤਿ ਆਹ. ਆਮ, ਭਨ੍ਤੇ, ਧਮ੍ਮਸ੍ਸਵਨਦਿਵਸੋਤਿ. ਤੇਨ ਹਿ ਪੀਠਕਂ ਆਨੇਥ, ਇਧੇਵ ਨਿਸਿਨ੍ਨਾ ਧਮ੍ਮਸ੍ਸਵਨਂ ਕਰਿਸ੍ਸਾਮਾਤਿ. ਅਥਸ੍ਸ ਰੁਕ੍ਖਮੂਲੇ ਆਸਨਂ ਪਞ੍ਞਪੇਤ੍ਵਾ ਅਦਂਸੁ. ਥੇਰੋ ਪੁਬ੍ਬਗਾਥਾ ਵਤ੍ਵਾ ਕਾਲ਼ਕਾਰਾਮਸੁਤ੍ਤਂ ਆਰਭਿ. ਸੋਪਿਸ੍ਸ ਉਪਟ੍ਠਾਕਦਹਰੋ ਰਞ੍ਞੋ ਸਞ੍ਞਂ ਦਾਪੇਸਿ. ਰਾਜਾ ਪੁਬ੍ਬਗਾਥਾਸੁ ਅਨਿਟ੍ਠਿਤਾਸੁਯੇਵ ਪਾਪੁਣਿ. ਪਤ੍ਵਾ ਚ ਅਞ੍ਞਾਤਕਵੇਸੇਨੇਵ ਪਰਿਸਨ੍ਤੇ ਠਤ੍ਵਾ ਤਿਯਾਮਰਤ੍ਤਿਂ ਠਿਤਕੋਵ ਧਮ੍ਮਂ ਸੁਤ੍ਵਾ ਥੇਰਸ੍ਸ, ਇਦਮਵੋਚ ਭਗਵਾਤਿ ਵਚਨਕਾਲੇ ਸਾਧੁਕਾਰਂ ਅਦਾਸਿ. ਥੇਰੋ ਞਤ੍ਵਾ, ਕਦਾ ਆਗਤੋਸਿ, ਮਹਾਰਾਜਾਤਿ ਪੁਚ੍ਛਿ. ਪੁਬ੍ਬਗਾਥਾ ਓਸਾਰਣਕਾਲੇਯੇਵ, ਭਨ੍ਤੇਤਿ. ਦੁਕ੍ਕਰਂ ਤੇ ਮਹਾਰਾਜ, ਕਤਨ੍ਤਿ. ਨਯਿਦਂ, ਭਨ੍ਤੇ, ਦੁਕ੍ਕਰਂ, ਯਦਿ ਪਨ ਮੇ ਅਯ੍ਯਸ੍ਸ ਧਮ੍ਮਕਥਂ ਆਰਦ੍ਧਕਾਲਤੋ ਪਟ੍ਠਾਯ ਏਕਪਦੇਪਿ ਅਞ੍ਞਵਿਹਿਤਭਾਵੋ ਅਹੋਸਿ, ਤਮ੍ਬਪਣ੍ਣਿਦੀਪਸ੍ਸ ਪਤੋਦਯਟ੍ਠਿਨਿਤੁਦਨਮਤ੍ਤੇਪਿ ਠਾਨੇ ਸਾਮਿਭਾਵੋ ਨਾਮ ਮੇ ਮਾ ਹੋਤੂਤਿ ਸਪਥਮਕਾਸਿ.

ਤਸ੍ਮਿਂ ਪਨ ਸੁਤ੍ਤੇ ਬੁਦ੍ਧਗੁਣਾ ਪਰਿਦੀਪਿਤਾ, ਤਸ੍ਮਾ ਰਾਜਾ ਪੁਚ੍ਛਿ – ‘‘ਏਤ੍ਤਕਾਵ, ਭਨ੍ਤੇ, ਬੁਦ੍ਧਗੁਣਾ, ਉਦਾਹੁ ਅਞ੍ਞੇਪਿ ਅਤ੍ਥੀ’’ਤਿ. ਮਯਾ ਕਥਿਤਤੋ, ਮਹਾਰਾਜ, ਅਕਥਿਤਮੇਵ ਬਹੁ ਅਪ੍ਪਮਾਣਨ੍ਤਿ. ਉਪਮਂ, ਭਨ੍ਤੇ, ਕਰੋਥਾਤਿ. ਯਥਾ, ਮਹਾਰਾਜ, ਕਰੀਸਸਹਸ੍ਸਮਤ੍ਤੇ ਸਾਲਿਕ੍ਖੇਤ੍ਤੇ ਏਕਸਾਲਿਸੀਸਤੋ ਅਵਸੇਸਸਾਲੀਯੇਵ ਬਹੂ, ਏਵਂ ਮਯਾ ਕਥਿਤਗੁਣਾ ਅਪ੍ਪਾ, ਅਵਸੇਸਾ ਬਹੂਤਿ. ਅਪਰਮ੍ਪਿ, ਭਨ੍ਤੇ, ਉਪਮਂ ਕਰੋਥਾਤਿ. ਯਥਾ, ਮਹਾਰਾਜ, ਮਹਾਗਙ੍ਗਾਯ ਓਘਪੁਣ੍ਣਾਯ ਸੂਚਿਪਾਸਂ ਸਮ੍ਮੁਖਂ ਕਰੇਯ੍ਯ, ਸੂਚਿਪਾਸੇਨ ਗਤਉਦਕਂ ਅਪ੍ਪਂ, ਸੇਸਂ ਬਹੁ, ਏਵਮੇਵ ਮਯਾ ਕਥਿਤਗੁਣਾ ਅਪ੍ਪਾ, ਅਵਸੇਸਾ ਬਹੂਤਿ. ਅਪਰਮ੍ਪਿ, ਭਨ੍ਤੇ, ਉਪਮਂ ਕਰੋਥਾਤਿ. ਇਧ, ਮਹਾਰਾਜ, ਚਾਤਕਸਕੁਣਾ ਨਾਮ ਆਕਾਸੇ ਕੀਲ਼ਨ੍ਤਾ ਵਿਚਰਨ੍ਤਿ. ਖੁਦ੍ਦਕਾ ਸਾ ਸਕੁਣਜਾਤਿ, ਕਿਂ ਨੁ ਖੋ ਤਸ੍ਸ ਸਕੁਣਸ੍ਸ ਆਕਾਸੇ ਪਕ੍ਖਪਸਾਰਣਟ੍ਠਾਨਂ ਬਹੁ, ਅਵਸੇਸੋ ਆਕਾਸੋ ਅਪ੍ਪੋਤਿ? ਕਿਂ, ਭਨ੍ਤੇ, ਵਦਥ, ਅਪ੍ਪੋ ਤਸ੍ਸ ਪਕ੍ਖਪਸਾਰਣੋਕਾਸੋ, ਅਵਸੇਸੋਵ ਬਹੂਤਿ. ਏਵਮੇਵ, ਮਹਾਰਾਜ, ਅਪ੍ਪਕਾ ਮਯਾ ਬੁਦ੍ਧਗੁਣਾ ਕਥਿਤਾ, ਅਵਸੇਸਾ ਬਹੂ ਅਨਨ੍ਤਾ ਅਪ੍ਪਮੇਯ੍ਯਾਤਿ. ਸੁਕਥਿਤਂ, ਭਨ੍ਤੇ, ਅਨਨ੍ਤਾ ਬੁਦ੍ਧਗੁਣਾ ਅਨਨ੍ਤੇਨੇਵ ਆਕਾਸੇਨ ਉਪਮਿਤਾ. ਪਸਨ੍ਨਾ ਮਯਂ ਅਯ੍ਯਸ੍ਸ, ਅਨੁਚ੍ਛਵਿਕਂ ਪਨ ਕਾਤੁਂ ਨ ਸਕ੍ਕੋਮ. ਅਯਂ ਮੇ ਦੁਗ੍ਗਤਪਣ੍ਣਾਕਾਰੋ ਇਮਸ੍ਮਿਂ ਤਮ੍ਬਪਣ੍ਣਿਦੀਪੇ ਇਮਂ ਤਿਯੋਜਨਸਤਿਕਂ ਰਜ੍ਜਂ ਅਯ੍ਯਸ੍ਸ ਦੇਮਾਤਿ. ਤੁਮ੍ਹੇਹਿ, ਮਹਾਰਾਜ, ਅਤ੍ਤਨੋ ਪਸਨ੍ਨਾਕਾਰੋ ਕਤੋ, ਮਯਂ ਪਨ ਅਮ੍ਹਾਕਂ ਦਿਨ੍ਨਂ ਰਜ੍ਜਂ ਤੁਮ੍ਹਾਕਂਯੇਵ ਦੇਮ, ਧਮ੍ਮੇਨ ਸਮੇਨ ਰਜ੍ਜਂ ਕਾਰੇਹਿ ਮਹਾਰਾਜਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਮਹਾਸਚ੍ਚਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.