੫. ਚੂਲ਼ਸਚ੍ਚਕਸੁਤ੍ਤਵਣ੍ਣਨਾ
੩੫੩. ਏਵਂ ਮੇ ਸੁਤਨ੍ਤਿ ਚੂਲ਼ਸਚ੍ਚਕਸੁਤ੍ਤਂ. ਤਤ੍ਥ ਮਹਾਵਨੇ ਕੂਟਾਗਾਰਸਾਲਾਯਨ੍ਤਿ ਮਹਾਵਨਂ ਨਾਮ ਸਯਂਜਾਤਂ ਅਰੋਪਿਮਂ ਸਪਰਿਚ੍ਛੇਦਂ ਮਹਨ੍ਤਂ ਵਨਂ. ਕਪਿਲਵਤ੍ਥੁਸਾਮਨ੍ਤਾ ਪਨ ਮਹਾਵਨਂ ਹਿਮਵਨ੍ਤੇਨ ਸਹ ਏਕਾਬਦ੍ਧਂ ਅਪਰਿਚ੍ਛੇਦਂ ਹੁਤ੍ਵਾ ਮਹਾਸਮੁਦ੍ਦਂ ਆਹਚ੍ਚ ਠਿਤਂ. ਇਦਂ ਤਾਦਿਸਂ ਨ ਹੋਤਿ. ਸਪਰਿਚ੍ਛੇਦਂ ਮਹਨ੍ਤਂ ਵਨਨ੍ਤਿ ਮਹਾਵਨਂ. ਕੂਟਾਗਾਰਸਾਲਾ ਪਨ ਮਹਾਵਨਂ ਨਿਸ੍ਸਾਯ ਕਤੇ ਆਰਾਮੇ ਕੂਟਾਗਾਰਂ ਅਨ੍ਤੋਕਤ੍ਵਾ ਹਂਸਵਟ੍ਟਕਚ੍ਛਨ੍ਨੇਨ ਕਤਾ ਸਬ੍ਬਾਕਾਰਸਮ੍ਪਨ੍ਨਾ ਬੁਦ੍ਧਸ੍ਸ ਭਗਵਤੋ ਗਨ੍ਧਕੁਟਿ ਵੇਦਿਤਬ੍ਬਾ.
ਸਚ੍ਚਕੋ ਨਿਗਣ੍ਠਪੁਤ੍ਤੋਤਿ ਪੁਬ੍ਬੇ ਕਿਰ ਏਕੋ ਨਿਗਣ੍ਠੋ ਚ ਨਿਗਣ੍ਠੀ ਚ ਪਞ੍ਚ ਪਞ੍ਚ ਵਾਦਸਤਾਨਿ ਉਗ੍ਗਹੇਤ੍ਵਾ, ਵਾਦਂ ਆਰੋਪੇਸ੍ਸਾਮਾਤਿ ਜਮ੍ਬੁਦੀਪੇ ਵਿਚਰਨ੍ਤਾ ਵੇਸਾਲਿਯਂ ਸਮਾਗਤਾ. ਲਿਚ੍ਛਵਿਰਾਜਾਨੋ ਦਿਸ੍ਵਾ, – ‘‘ਤ੍ਵਂ ਕੋ, ਤ੍ਵਂ ਕਾ’’ਤਿ ਪੁਚ੍ਛਿਂਸੁ. ਨਿਗਣ੍ਠੋ – ‘‘ਅਹਂ ਵਾਦਂ ਆਰੋਪੇਸ੍ਸਾਮੀਤਿ ਜਮ੍ਬੁਦੀਪੇ ਵਿਚਰਾਮੀ’’ਤਿ ਆਹ. ਨਿਗਣ੍ਠੀਪਿ ਤਥਾ ਆਹ. ਲਿਚ੍ਛਵਿਨੋ, ‘‘ਇਧੇਵ ਅਞ੍ਞਮਞ੍ਞਂ ਵਾਦਂ ਆਰੋਪੇਥਾ’’ਤਿ ਆਹਂਸੁ. ਨਿਗਣ੍ਠੀ ਅਤ੍ਤਨਾ ਉਗ੍ਗਹਿਤਾਨਿ ਪਞ੍ਚਵਾਦਸਤਾਨਿ ਪੁਚ੍ਛਿ, ਨਿਗਣ੍ਠੋ ਕਥੇਸਿ. ਨਿਗਣ੍ਠੇਨ ਪੁਚ੍ਛਿਤੇਪਿ ਨਿਗਣ੍ਠੀ ਕਥੇਸਿਯੇਵ. ਏਕਸ੍ਸਪਿ ਨ ਜਯੋ, ਨ ਪਰਾਜਯੋ, ਉਭੋ ਸਮਸਮਾਵ ਅਹੇਸੁਂ. ਲਿਚ੍ਛਵਿਨੋ, – ‘‘ਤੁਮ੍ਹੇ ਉਭੋਪਿ ਸਮਸਮਾ ਆਹਿਣ੍ਡਿਤ੍ਵਾ ਕਿਂ ਕਰਿਸ੍ਸਥ, ਇਧੇਵ ਵਸਥਾ’’ਤਿ ਗੇਹਂ ਦਤ੍ਵਾ ਬਲਿਂ ਪਟ੍ਠਪੇਸੁਂ. ਤੇਸਂ ਸਂਵਾਸਮਨ੍ਵਾਯ ਚਤਸ੍ਸੋ ਧੀਤਰੋ ਜਾਤਾ, – ਏਕਾ ਸਚ੍ਚਾ ਨਾਮ, ਏਕਾ ਲੋਲਾ ਨਾਮ, ਏਕਾ ਪਟਾਚਾਰਾ ਨਾਮ, ਏਕਾ ਆਚਾਰਵਤੀ ਨਾਮ. ਤਾਪਿ ਪਣ੍ਡਿਤਾਵ ਅਹੇਸੁਂ, ਮਾਤਾਪਿਤੂਹਿ ਉਗ੍ਗਹਿਤਾਨਿ ਪਞ੍ਚ ਪਞ੍ਚ ਵਾਦਸਤਾਨਿ ਉਗ੍ਗਹੇਸੁਂ. ਤਾ ਵਯਪਤ੍ਤਾ ਮਾਤਾਪਿਤਰੋ ਅਵੋਚੁਂ – ‘‘ਅਮ੍ਹਾਕਂ ਅਮ੍ਮਾ ਕੁਲੇ ਦਾਰਿਕਾ ਨਾਮ ਹਿਰਞ੍ਞਸੁਵਣ੍ਣਾਦੀਨਿ ਦਤ੍ਵਾ ਕੁਲਘਰਂ ਪੇਸਿਤਪੁਬ੍ਬਾ ਨਾਮ ਨਤ੍ਥਿ. ਯੋ ਪਨ ਅਗਾਰਿਕੋ ਤਾਸਂ ਵਾਦਂ ਮਦ੍ਦਿਤੁਂ ਸਕ੍ਕੋਤਿ, ਤਸ੍ਸ ਪਾਦਪਰਿਚਾਰਿਕਾ ਹੋਨ੍ਤਿ. ਯੋ ਪਬ੍ਬਜਿਤੋ ਤਾਸਂ ਮਦ੍ਦਿਤੁਂ ਸਕ੍ਕੋਤਿ, ਤਸ੍ਸ ਸਨ੍ਤਿਕੇ ਪਬ੍ਬਜਨ੍ਤਿ. ਤੁਮ੍ਹੇ ਕਿਂ ਕਰਿਸ੍ਸਥਾ’’ਤਿ? ਮਯਮ੍ਪਿ ਏਵਮੇਵ ਕਰਿਸ੍ਸਾਮਾਤਿ. ਚਤਸ੍ਸੋਪਿ ਪਰਿਬ੍ਬਾਜਿਕਵੇਸਂ ਗਹੇਤ੍ਵਾ, ‘‘ਅਯਂ ਜਮ੍ਬੁਦੀਪੋ ਨਾਮ ਜਮ੍ਬੁਯਾ ਪਞ੍ਞਾਯਤੀ’’ਤਿ ਜਮ੍ਬੁਸਾਖਂ ਗਹੇਤ੍ਵਾ ਚਾਰਿਕਂ ਪਕ੍ਕਮਿਂਸੁ. ਯਂ ਗਾਮਂ ਪਾਪੁਣਨ੍ਤਿ, ਤਸ੍ਸ ਦ੍ਵਾਰੇ ਪਂਸੁਪੁਞ੍ਜੇ ਵਾ ਵਾਲਿਕਪੁਞ੍ਜੇ ਵਾ ਜਮ੍ਬੁਧਜਂ ਠਪੇਤ੍ਵਾ, – ‘‘ਯੋ ਵਾਦਂ ਆਰੋਪੇਤੁਂ ਸਕ੍ਕੋਤਿ, ਸੋ ਇਮਂ ਮਦ੍ਦਤੂ’’ਤਿ ਵਤ੍ਵਾ ਗਾਮਂ ਪਵਿਸਨ੍ਤਿ. ਏਵਂ ਗਾਮੇਨ ਗਾਮਂ ਵਿਚਰਨ੍ਤਿਯੋ ਸਾਵਤ੍ਥਿਂ ਪਾਪੁਣਿਤ੍ਵਾ ਤਥੇਵ ਗਾਮਦ੍ਵਾਰੇ ਜਮ੍ਬੁਧਜਂ ਠਪੇਤ੍ਵਾ ਸਮ੍ਪਤ੍ਤਮਨੁਸ੍ਸਾਨਂ ਆਰੋਚੇਤ੍ਵਾ ਅਨ੍ਤੋਨਗਰਂ ਪਵਿਟ੍ਠਾ.
ਤੇਨ ਸਮਯੇਨ ਭਗਵਾ ਸਾਵਤ੍ਥਿਂ ਨਿਸ੍ਸਾਯ ਜੇਤਵਨੇ ਵਿਹਰਤਿ. ਅਥਾਯਸ੍ਮਾ ਸਾਰਿਪੁਤ੍ਤੋ ਗਿਲਾਨੇ ਪੁਚ੍ਛਨ੍ਤੋ ਅਜਗ੍ਗਿਤਟ੍ਠਾਨਂ ਜਗ੍ਗਨ੍ਤੋ ਅਤ੍ਤਨੋ ਕਿਚ੍ਚਮਹਨ੍ਤਤਾਯ ਅਞ੍ਞੇਹਿ ਭਿਕ੍ਖੂਹਿ ਦਿਵਾਤਰਂ ਗਾਮਂ ਪਿਣ੍ਡਾਯ ਪਵਿਸਨ੍ਤੋ ਗਾਮਦ੍ਵਾਰੇ ਜਮ੍ਬੁਧਜਂ ਦਿਸ੍ਵਾ, – ‘‘ਕਿਮਿਦ’’ਨ੍ਤਿ ਦਾਰਕੇ ਪੁਚ੍ਛਿ. ਤੇ ਤਮਤ੍ਥਂ ਆਰੋਚੇਸੁਂ. ਤੇਨ ਹਿ ਮਦ੍ਦਥਾਤਿ. ਨ ਸਕ੍ਕੋਮ, ਭਨ੍ਤੇ, ਭਾਯਾਮਾਤਿ. ‘‘ਕੁਮਾਰਾ ਮਾ ਭਾਯਥ, ‘ਕੇਨ ਅਮ੍ਹਾਕਂ ਜਮ੍ਬੁਧਜੋ ਮਦ੍ਦਾਪਿਤੋ’ਤਿ ਵੁਤ੍ਤੇ, ਬੁਦ੍ਧਸਾਵਕੇਨ ਸਾਰਿਪੁਤ੍ਤਤ੍ਥੇਰੇਨ ਮਦ੍ਦਾਪਿਤੋ, ਵਾਦਂ ਆਰੋਪੇਤੁਕਾਮਾ ਜੇਤਵਨੇ ਥੇਰਸ੍ਸ ਸਨ੍ਤਿਕਂ ਗਚ੍ਛਥਾਤਿ ਵਦੇਯ੍ਯਾਥਾ’’ਤਿ ਆਹ. ਤੇ ਥੇਰਸ੍ਸ ਵਚਨਂ ਸੁਤ੍ਵਾ ਜਮ੍ਬੁਧਜਂ ਮਦ੍ਦਿਤ੍ਵਾ ਛਡ੍ਡੇਸੁਂ. ਥੇਰੋ ਪਿਣ੍ਡਾਯ ਚਰਿਤ੍ਵਾ ਵਿਹਾਰਂ ਗਤੋ. ਪਰਿਬ੍ਬਾਜਿਕਾਪਿ ਗਾਮਤੋ ਨਿਕ੍ਖਮਿਤ੍ਵਾ, ‘‘ਅਮ੍ਹਾਕਂ ਧਜੋ ਕੇਨ ਮਦ੍ਦਾਪਿਤੋ’’ਤਿ ਪੁਚ੍ਛਿਂਸੁ. ਦਾਰਕਾ ਤਮਤ੍ਥਂ ਆਰੋਚੇਸੁਂ. ਪਰਿਬ੍ਬਾਜਿਕਾ ਪੁਨ ਗਾਮਂ ਪਵਿਸਿਤ੍ਵਾ ਏਕੇਕਂ ਵੀਥਿਂ ਗਹੇਤ੍ਵਾ, – ‘‘ਬੁਦ੍ਧਸਾਵਕੋ ਕਿਰ ਸਾਰਿਪੁਤ੍ਤੋ ਨਾਮ ਅਮ੍ਹੇਹਿ ਸਦ੍ਧਿਂ ਵਾਦਂ ਕਰਿਸ੍ਸਤਿ, ਸੋਤੁਕਾਮਾ ਨਿਕ੍ਖਮਥਾ’’ਤਿ ਆਰੋਚੇਸੁਂ. ਮਹਾਜਨੋ ਨਿਕ੍ਖਮਿ, ਤੇਨ ਸਦ੍ਧਿਂ ਪਰਿਬ੍ਬਾਜਿਕਾ ਜੇਤਵਨਂ ਅਗਮਿਂਸੁ.
ਥੇਰੋ – ‘‘ਅਮ੍ਹਾਕਂ ਵਸਨਟ੍ਠਾਨੇ ਮਾਤੁਗਾਮਸ੍ਸ ਆਗਮਨਂ ਨਾਮ ਅਫਾਸੁਕ’’ਨ੍ਤਿ ਵਿਹਾਰਮਜ੍ਝੇ ਨਿਸੀਦਿ. ਪਰਿਬ੍ਬਾਜਿਕਾਯੋ ਗਨ੍ਤ੍ਵਾ ਥੇਰਂ ਪੁਚ੍ਛਿਂਸੁ – ‘‘ਤੁਮ੍ਹੇਹਿ ਅਮ੍ਹਾਕਂ ਧਜੋ ਮਦ੍ਦਾਪਿਤੋ’’ਤਿ? ਆਮ, ਮਯਾ ਮਦ੍ਦਾਪਿਤੋਤਿ. ਮਯਂ ਤੁਮ੍ਹੇਹਿ ਸਦ੍ਧਿਂ ਵਾਦਂ ਕਰਿਸ੍ਸਾਮਾਤਿ. ਸਾਧੁ ਕਰੋਥ, ਕਸ੍ਸ ਪੁਚ੍ਛਾ ਕਸ੍ਸ ਵਿਸ੍ਸਜ੍ਜਨਂ ਹੋਤੂਤਿ? ਪੁਚ੍ਛਾ ਨਾਮ ਅਮ੍ਹਾਕਂ ਪਤ੍ਤਾ, ਤੁਮ੍ਹੇ ਪਨ ਮਾਤੁਗਾਮਾ ਨਾਮ ਪਠਮਂ ਪੁਚ੍ਛਥਾਤਿ ਆਹ. ਤਾ ਚਤਸ੍ਸੋਪਿ ਚਤੂਸੁ ਦਿਸਾਸੁ ਠਤ੍ਵਾ ਮਾਤਾਪਿਤੂਨਂ ਸਨ੍ਤਿਕੇ ਉਗ੍ਗਹਿਤਂ ਵਾਦਸਹਸ੍ਸਂ ਪੁਚ੍ਛਿਂਸੁ. ਥੇਰੋ ਖਗ੍ਗੇਨ ਕੁਮੁਦਨਾਲ਼ਂ ਛਿਨ੍ਦਨ੍ਤੋ ਵਿਯ ਪੁਚ੍ਛਿਤਂ ਪੁਚ੍ਛਿਤਂ ਨਿਜ੍ਜਟਂ ਨਿਗ੍ਗਣ੍ਠਿਂ ਕਤ੍ਵਾ ਕਥੇਸਿ, ਕਥੇਤ੍ਵਾ ਪੁਨ ਪੁਚ੍ਛਥਾਤਿ ਆਹ. ਏਤ੍ਤਕਮੇਵ, ਭਨ੍ਤੇ, ਮਯਂ ਜਾਨਾਮਾਤਿ. ਥੇਰੋ ਆਹ – ‘‘ਤੁਮ੍ਹੇਹਿ ਵਾਦਸਹਸ੍ਸਂ ਪੁਚ੍ਛਿਤਂ ਮਯਾ ਕਥਿਤਂ, ਅਹਂ ਪਨ ਏਕਂ ਯੇਵ ਪਞ੍ਹਂ ਪੁਚ੍ਛਿਸ੍ਸਾਮਿ, ਤਂ ਤੁਮ੍ਹੇ ਕਥੇਥਾ’’ਤਿ. ਤਾ ਥੇਰਸ੍ਸ ਵਿਸਯਂ ਦਿਸ੍ਵਾ, ‘‘ਪੁਚ੍ਛਥ, ਭਨ੍ਤੇ, ਬ੍ਯਾਕਰਿਸ੍ਸਾਮਾ’’ਤਿ ਵਤ੍ਤੁਂ ਨਾਸਕ੍ਖਿਂਸੁ. ‘‘ਵਦ, ਭਨ੍ਤੇ, ਜਾਨਮਾਨਾ ਬ੍ਯਾਕਰਿਸ੍ਸਾਮਾ’’ਤਿ ਪੁਨ ਆਹਂਸੁ.
ਥੇਰੋ ਅਯਂ ਪਨ ਕੁਲਪੁਤ੍ਤੇ ਪਬ੍ਬਾਜੇਤ੍ਵਾ ਪਠਮਂ ਸਿਕ੍ਖਾਪੇਤਬ੍ਬਪਞ੍ਹੋਤਿ ਵਤ੍ਵਾ, – ‘‘ਏਕਂ ਨਾਮ ਕਿ’’ਨ੍ਤਿ ਪੁਚ੍ਛਿ. ਤਾ ਨੇਵ ਅਨ੍ਤਂ, ਨ ਕੋਟਿਂ ਅਦ੍ਦਸਂਸੁ. ਥੇਰੋ ਕਥੇਥਾਤਿ ਆਹ. ਨ ਪਸ੍ਸਾਮ, ਭਨ੍ਤੇਤਿ. ਤੁਮ੍ਹੇਹਿ ਵਾਦਸਹਸ੍ਸਂ ਪੁਚ੍ਛਿਤਂ ਮਯਾ ਕਥਿਤਂ, ਮਯ੍ਹਂ ਤੁਮ੍ਹੇ ਏਕਂ ਪਞ੍ਹਮ੍ਪਿ ਕਥੇਤੁਂ ਨ ਸਕ੍ਕੋਥ, ਏਵਂ ਸਨ੍ਤੇ ਕਸ੍ਸ ਜਯੋ ਕਸ੍ਸ ਪਰਾਜਯੋਤਿ? ਤੁਮ੍ਹਾਕਂ, ਭਨ੍ਤੇ, ਜਯੋ, ਅਮ੍ਹਾਕਂ ਪਰਾਜਯੋਤਿ. ਇਦਾਨਿ ਕਿਂ ਕਰਿਸ੍ਸਥਾਤਿ? ਤਾ ਮਾਤਾਪਿਤੂਹਿ ਵੁਤ੍ਤਵਚਨਂ ਆਰੋਚੇਤ੍ਵਾ, ‘‘ਤੁਮ੍ਹਾਕਂ ਸਨ੍ਤਿਕੇ ਪਬ੍ਬਜਿਸ੍ਸਾਮਾ’’ਤਿ ਆਹਂਸੁ. ਤੁਮ੍ਹੇ ਮਾਤੁਗਾਮਾ ਨਾਮ ਅਮ੍ਹਾਕਂ ਸਨ੍ਤਿਕੇ ਪਬ੍ਬਜਿਤੁਂ ਨ ਵਟ੍ਟਤਿ, ਅਮ੍ਹਾਕਂ ਪਨ ਸਾਸਨਂ ਗਹੇਤ੍ਵਾ ਭਿਕ੍ਖੁਨਿਉਪਸ੍ਸਯਂ ਗਨ੍ਤ੍ਵਾ ਪਬ੍ਬਜਥਾਤਿ. ਤਾ ਸਾਧੂਤਿ ਥੇਰਸ੍ਸ ਸਾਸਨਂ ਗਹੇਤ੍ਵਾ ਭਿਕ੍ਖੁਨਿਸਙ੍ਘਸ੍ਸ ਸਨ੍ਤਿਕਂ ਗਨ੍ਤ੍ਵਾ ਪਬ੍ਬਜਿਂਸੁ. ਪਬ੍ਬਜਿਤਾ ਚ ਪਨ ਅਪ੍ਪਮਤ੍ਤਾ ਆਤਾਪਿਨਿਯੋ ਹੁਤ੍ਵਾ ਨਚਿਰਸ੍ਸੇਵ ਅਰਹਤ੍ਤਂ ਪਾਪੁਣਿਂਸੁ.
ਅਯਂ ਸਚ੍ਚਕੋ ਤਾਸਂ ਚਤੁਨ੍ਨਮ੍ਪਿ ਕਨਿਟ੍ਠਭਾਤਿਕੋ. ਤਾਹਿ ਚਤੂਹਿਪਿ ਉਤ੍ਤਰਿਤਰਪਞ੍ਞੋ, ਮਾਤਾਪਿਤੂਨਮ੍ਪਿ ਸਨ੍ਤਿਕਾ ਵਾਦਸਹਸ੍ਸਂ, ਤਤੋ ਬਹੁਤਰਞ੍ਚ ਬਾਹਿਰਸਮਯਂ ਉਗ੍ਗਹੇਤ੍ਵਾ ਕਤ੍ਥਚਿ ਅਗਨ੍ਤ੍ਵਾ ਰਾਜਦਾਰਕੇ ਸਿਪ੍ਪਂ ਸਿਕ੍ਖਾਪੇਨ੍ਤੋ ਤਤ੍ਥੇਵ ਵੇਸਾਲਿਯਂ ਵਸਤਿ, ਪਞ੍ਞਾਯ ਅਤਿਪੂਰਿਤਤ੍ਤਾ ਕੁਚ੍ਛਿ ਮੇ ਭਿਜ੍ਜੇਯ੍ਯਾਤਿ ਭੀਤੋ ਅਯਪਟ੍ਟੇਨ ਕੁਚ੍ਛਿਂ ਪਰਿਕ੍ਖਿਪਿਤ੍ਵਾ ਚਰਤਿ, ਇਮਂ ਸਨ੍ਧਾਯ ਵੁਤ੍ਤਂ ‘‘ਸਚ੍ਚਕੋ ਨਿਗਣ੍ਠਪੁਤ੍ਤੋ’’ਤਿ.
ਭਸ੍ਸਪ੍ਪਵਾਦਕੋਤਿ ਭਸ੍ਸਂ ਵੁਚ੍ਚਤਿ ਕਥਾਮਗ੍ਗੋ, ਤਂ ਪਵਦਤਿ ਕਥੇਤੀਤਿ ਭਸ੍ਸਪ੍ਪਵਾਦਕੋ. ਪਣ੍ਡਿਤਵਾਦੋਤਿ ਅਹਂ ਪਣ੍ਡਿਤੋਤਿ ਏਵਂ ਵਾਦੋ. ਸਾਧੁਸਮ੍ਮਤੋ ਬਹੁਜਨਸ੍ਸਾਤਿ ਯਂ ਯਂ ਨਕ੍ਖਤ੍ਤਚਾਰੇਨ ਆਦਿਸਤਿ, ਤਂ ਤਂ ਯੇਭੁਯ੍ਯੇਨ ਤਥੇਵ ਹੋਤਿ, ਤਸ੍ਮਾ ਅਯਂ ਸਾਧੁਲਦ੍ਧਿਕੋ ਭਦ੍ਦਕੋਤਿ ਏਵਂ ਸਮ੍ਮਤੋ ਮਹਾਜਨਸ੍ਸ. ਵਾਦੇਨ ਵਾਦਂ ਸਮਾਰਦ੍ਧੋਤਿ ਕਥਾਮਗ੍ਗੇਨ ਦੋਸਂ ਆਰੋਪਿਤੋ. ਆਯਸ੍ਮਾ ਅਸ੍ਸਜੀਤਿ ਸਾਰਿਪੁਤ੍ਤਤ੍ਥੇਰਸ੍ਸ ਆਚਰਿਯੋ ਅਸ੍ਸਜਿਤ੍ਥੇਰੋ. ਜਙ੍ਘਾਵਿਹਾਰਂ ਅਨੁਚਙ੍ਕਮਮਾਨੋਤਿ ਤਤੋ ਤਤੋ ਲਿਚ੍ਛਵਿਰਾਜਗੇਹਤੋ ਤਂ ਤਂ ਗੇਹਂ ਗਮਨਤ੍ਥਾਯ ਅਨੁਚਙ੍ਕਮਮਾਨੋ. ਯੇਨਾਯਸ੍ਮਾ ਅਸ੍ਸਜਿ ਤੇਨੁਪਸਙ੍ਕਮੀਤਿ ਕਸ੍ਮਾ ਉਪਸਙ੍ਕਮਿ? ਸਮਯਜਾਨਨਤ੍ਥਂ.
ਏਵਂ ਕਿਰਸ੍ਸ ਅਹੋਸਿ – ‘‘ਅਹਂ ‘ਸਮਣਸ੍ਸ ਗੋਤਮਸ੍ਸ ਵਾਦਂ ਆਰੋਪੇਸ੍ਸਾਮੀ’ਤਿ ਆਹਿਣ੍ਡਾਮਿ, ‘ਸਮਯਂ ਪਨਸ੍ਸ ਨ ਜਾਨਾਮੀ’ਤਿ ਨ ਆਰੋਪੇਸਿਂ. ਪਰਸ੍ਸ ਹਿ ਸਮਯਂ ਞਤ੍ਵਾ ਆਰੋਪਿਤੋ ਵਾਦੋ ਸ੍ਵਾਰੋਪਿਤੋ ਨਾਮ ਹੋਤਿ. ਅਯਂ ਪਨ ਸਮਣਸ੍ਸ ਗੋਤਮਸ੍ਸ ਸਾਵਕੋ ਪਞ੍ਞਾਯਤਿ ਅਸ੍ਸਜਿਤ੍ਥੇਰੋ; ਸੋ ਅਤ੍ਤਨੋ ਸਤ੍ਥੁ ਸਮਯੇ ਕੋਵਿਦੋ, ਏਤਾਹਂ ਪੁਚ੍ਛਿਤ੍ਵਾ ਕਥਂ ਪਤਿਟ੍ਠਾਪੇਤ੍ਵਾ ਸਮਣਸ੍ਸ ਗੋਤਮਸ੍ਸ ਵਾਦਂ ਆਰੋਪੇਸ੍ਸਾਮੀ’’ਤਿ. ਤਸ੍ਮਾ ਉਪਸਙ੍ਕਮਿ. ਵਿਨੇਤੀਤਿ ਕਥਂ ਵਿਨੇਤਿ, ਕਥਂ ਸਿਕ੍ਖਾਪੇਤੀਤਿ ਪੁਚ੍ਛਤਿ. ਥੇਰੋ ਪਨ ਯਸ੍ਮਾ ਦੁਕ੍ਖਨ੍ਤਿ ਵੁਤ੍ਤੇ ਉਪਾਰਮ੍ਭਸ੍ਸ ਓਕਾਸੋ ਹੋਤਿ, ਮਗ੍ਗਫਲਾਨਿਪਿ ਪਰਿਯਾਯੇਨ ਦੁਕ੍ਖਨ੍ਤਿ ਆਗਤਾਨਿ, ਅਯਞ੍ਚ ਦੁਕ੍ਖਨ੍ਤਿ ਵੁਤ੍ਤੇ ਥੇਰਂ ਪੁਚ੍ਛੇਯ੍ਯ – ‘‘ਭੋ ਅਸ੍ਸਜਿ, ਕਿਮਤ੍ਥਂ ਤੁਮ੍ਹੇ ਪਬ੍ਬਜਿਤਾ’’ਤਿ. ਤਤੋ ‘‘ਮਗ੍ਗਫਲਤ੍ਥਾਯਾ’’ਤਿ ਵੁਤ੍ਤੇ, – ‘‘ਨਯਿਦਂ, ਭੋ ਅਸ੍ਸਜਿ, ਤੁਮ੍ਹਾਕਂ ਸਾਸਨਂ ਨਾਮ, ਮਹਾਆਘਾਤਨਂ ਨਾਮੇਤਂ, ਨਿਰਯੁਸ੍ਸਦੋ ਨਾਮੇਸ, ਨਤ੍ਥਿ ਤੁਮ੍ਹਾਕਂ ਸੁਖਾਸਾ, ਉਟ੍ਠਾਯੁਟ੍ਠਾਯ ਦੁਕ੍ਖਮੇਵ ਜਿਰਾਪੇਨ੍ਤਾ ਆਹਿਣ੍ਡਥਾ’’ਤਿ ਦੋਸਂ ਆਰੋਪੇਯ੍ਯ, ਤਸ੍ਮਾ ਪਰਵਾਦਿਸ੍ਸ ਪਰਿਯਾਯਕਥਂ ਕਾਤੁਂ ਨ ਵਟ੍ਟਤਿ. ਯਥਾ ਏਸ ਅਪ੍ਪਤਿਟ੍ਠੋ ਹੋਤਿ, ਏਵਮਸ੍ਸ ਨਿਪ੍ਪਰਿਯਾਯਕਥਂ ਕਥੇਸ੍ਸਾਮੀਤਿ ਚਿਨ੍ਤੇਤ੍ਵਾ, ‘‘ਰੂਪਂ, ਭਿਕ੍ਖਵੇ, ਅਨਿਚ੍ਚ’’ਨ੍ਤਿ ਇਮਂ ਅਨਿਚ੍ਚਾਨਤ੍ਤਵਸੇਨੇਵ ਕਥਂ ਕਥੇਤਿ. ਦੁਸ੍ਸੁਤਨ੍ਤਿ ਸੋਤੁਂ ਅਯੁਤ੍ਤਂ.
੩੫੪. ਸਨ੍ਥਾਗਾਰੇਤਿ ਰਾਜਕੁਲਾਨਂ ਅਤ੍ਥਾਨੁਸਾਸਨਸਨ੍ਥਾਗਾਰਸਾਲਾਯਂ. ਯੇਨ ਤੇ ਲਿਚ੍ਛਵੀ ਤੇਨੁਪਸਙ੍ਕਮੀਤਿ ਏਵਂ ਕਿਰਸ੍ਸ ਅਹੋਸਿ – ‘‘ਅਹਂ ਪੁਬ੍ਬੇ ਸਮਯਂ ਅਜਾਨਨਭਾਵੇਨ ਸਮਣਸ੍ਸ ਗੋਤਮਸ੍ਸ ਵਾਦਂ ਨ ਆਰੋਪੇਸਿਂ, ਇਦਾਨਿ ਪਨਸ੍ਸ ਮਹਾਸਾਵਕੇਨ ਕਥਿਤਂ ਸਮਯਂ ਜਾਨਾਮਿ, ਇਮੇ ਚ ਮਮ ਅਨ੍ਤੇਵਾਸਿਕਾ ਪਞ੍ਚਸਤਾ ਲਿਚ੍ਛਵੀ ਸਨ੍ਨਿਪਤਿਤਾ. ਏਤੇਹਿ ਸਦ੍ਧਿਂ ਗਨ੍ਤ੍ਵਾ ਸਮਣਸ੍ਸ ਗੋਤਮਸ੍ਸ ਵਾਦਂ ਆਰੋਪੇਸ੍ਸਾਮੀ’’ਤਿ ਤਸ੍ਮਾ ਉਪਸਙ੍ਕਮਿ. ਞਾਤਞ੍ਞਤਰੇਨਾਤਿ ਞਾਤੇਸੁ ਅਭਿਞ੍ਞਾਤੇਸੁ ਪਞ੍ਚਵਗ੍ਗਿਯਤ੍ਥੇਰੇਸੁ ਅਞ੍ਞਤਰੇਨ. ਪਤਿਟ੍ਠਿਤਨ੍ਤਿ ਯਥਾ ਤੇਨ ਪਤਿਟ੍ਠਿਤਂ. ਸਚੇ ਏਵਂ ਪਤਿਟ੍ਠਿਸ੍ਸਤਿ, ਅਥ ਪਨ ਅਞ੍ਞਦੇਵ ਵਕ੍ਖਤਿ, ਤਤ੍ਰ ਮਯਾ ਕਿਂ ਸਕ੍ਕਾ ਕਾਤੁਨ੍ਤਿ ਇਦਾਨੇਵ ਪਿਟ੍ਠਿਂ ਪਰਿਵਤ੍ਤੇਨ੍ਤੋ ਆਹ. ਆਕਡ੍ਢੇਯ੍ਯਾਤਿ ਅਤ੍ਤਨੋ ਅਭਿਮੁਖਂ ਕਡ੍ਢੇਯ੍ਯ. ਪਰਿਕਡ੍ਢੇਯ੍ਯਾਤਿ ਪੁਰਤੋ ਪਟਿਪਣਾਮੇਯ੍ਯ. ਸਮ੍ਪਰਿਕਡ੍ਢੇਯ੍ਯਾਤਿ ਕਾਲੇਨ ਆਕਡ੍ਢੇਯ੍ਯ, ਕਾਲੇਨ ਪਰਿਕਡ੍ਢੇਯ੍ਯ. ਸੋਣ੍ਡਿਕਾਕਿਲਞ੍ਜਨ੍ਤਿ ਸੁਰਾਘਰੇ ਪਿਟ੍ਠਕਿਲਞ੍ਜਂ. ਸੋਣ੍ਡਿਕਾਧੁਤ੍ਤੋਤਿ ਸੁਰਾਧੁਤ੍ਤੋ. ਵਾਲਂ ਕਣ੍ਣੇ ਗਹੇਤ੍ਵਾਤਿ ਸੁਰਾਪਰਿਸ੍ਸਾਵਨਤ੍ਥਵਿਕਂ ਧੋਵਿਤੁਕਾਮੋ ਕਸਟਨਿਧੁਨਨਤ੍ਥਂ ਉਭੋਸੁ ਕਣ੍ਣੇਸੁ ਗਹੇਤ੍ਵਾ. ਓਧੁਨੇਯ੍ਯਾਤਿ ਅਧੋਮੁਖਂ ਕਤ੍ਵਾ ਧੁਨੇਯ੍ਯ. ਨਿਦ੍ਧੁਨੇਯ੍ਯਾਤਿ ਉਦ੍ਧਂਮੁਖਂ ਕਤ੍ਵਾ ਧੁਨੇਯ੍ਯ. ਨਿਪ੍ਫੋਟੇਯ੍ਯਾਤਿ ਪੁਨਪ੍ਪੁਨਂ ਪਪ੍ਫੋਟੇਯ੍ਯ. ਸਾਣਧੋਵਿਕਂ ਨਾਮਾਤਿ ਏਤ੍ਥ ਮਨੁਸ੍ਸਾ ਸਾਣਸਾਟਕਕਰਣਤ੍ਥਂ ਸਾਣਵਾਕੇ ਗਹੇਤ੍ਵਾ ਮੁਟ੍ਠਿਂ ਮੁਟ੍ਠਿਂ ਬਨ੍ਧਿਤ੍ਵਾ ਉਦਕੇ ਪਕ੍ਖਿਪਨ੍ਤਿ. ਤੇ ਤਤਿਯਦਿਵਸੇ ਸੁਟ੍ਠੁ ਕਿਲਿਨ੍ਨਾ ਹੋਨ੍ਤਿ. ਅਥ ਮਨੁਸ੍ਸਾ ਅਮ੍ਬਿਲਯਾਗੁਸੁਰਾਦੀਨਿ ਆਦਾਯ ਤਤ੍ਥ ਗਨ੍ਤ੍ਵਾ ਸਾਣਮੁਟ੍ਠਿਂ ਗਹੇਤ੍ਵਾ, ਦਕ੍ਖਿਣਤੋ ਵਾਮਤੋ ਸਮ੍ਮੁਖਾ ਚਾਤਿ ਤੀਸੁ ਫਲਕੇਸੁ ਸਕਿਂ ਦਕ੍ਖਿਣਫਲਕੇ, ਸਕਿਂ ਵਾਮਫਲਕੇ, ਸਕਿਂ ਸਮ੍ਮੁਖਫਲਕੇ ਪਹਰਨ੍ਤਾ ਅਮ੍ਬਿਲਯਾਗੁਸੁਰਾਦੀਨਿ ਭੁਞ੍ਜਨ੍ਤਾ ਪਿਵਨ੍ਤਾ ਖਾਦਨ੍ਤਾ ਧੋਵਨ੍ਤਿ. ਮਹਨ੍ਤਾ ਕੀਲ਼ਾ ਹੋਤਿ. ਰਞ੍ਞੋ ਨਾਗੋ ਤਂ ਕੀਲ਼ਂ ਦਿਸ੍ਵਾ ਗਮ੍ਭੀਰਂ ਉਦਕਂ ਅਨੁਪਵਿਸਿਤ੍ਵਾ ਸੋਣ੍ਡਾਯ ਉਦਕਂ ਗਹੇਤ੍ਵਾ ਸਕਿਂ ਕੁਮ੍ਭੇ ਸਕਿਂ ਪਿਟ੍ਠਿਯਂ ਸਕਿਂ ਉਭੋਸੁ ਪਸ੍ਸੇਸੁ ਸਕਿਂ ਅਨ੍ਤਰਸਤ੍ਥਿਯਂ ਪਕ੍ਖਿਪਨ੍ਤੋ ਕੀਲ਼ਿਤ੍ਥ. ਤਦੁਪਾਦਾਯ ਤਂ ਕੀਲ਼ਿਤਜਾਤਂ ਸਾਣਧੋਵਿਕਂ ਨਾਮ ਵੁਚ੍ਚਤਿ, ਤਂ ਸਨ੍ਧਾਯ ਵੁਤ੍ਤਂ – ‘‘ਸਾਣਧੋਵਿਕਂ ਨਾਮ ਕੀਲ਼ਿਤਜਾਤਂ ਕੀਲ਼ਤੀ’’ਤਿ. ਕਿਂ ਸੋ ਭਵਮਾਨੋ ਸਚ੍ਚਕੋ ਨਿਗਣ੍ਠਪੁਤ੍ਤੋ, ਯੋ ਭਗਵਤੋ ਵਾਦਂ ਆਰੋਪੇਸ੍ਸਤੀਤਿ ਯੋ ਸਚ੍ਚਕੋ ਨਿਗਣ੍ਠਪੁਤ੍ਤੋ ਭਗਵਤੋ ਵਾਦਂ ਆਰੋਪੇਸ੍ਸਤਿ, ਸੋ ਕਿਂ ਭਵਮਾਨੋ ਕਿਂ ਯਕ੍ਖੋ ਭਵਮਾਨੋ ਉਦਾਹੁ ਇਨ੍ਦੋ, ਉਦਾਹੁ ਬ੍ਰਹ੍ਮਾ ਭਵਮਾਨੋ ਭਗਵਤੋ ਵਾਦਂ ਆਰੋਪੇਸ੍ਸਤਿ? ਨ ਹਿ ਸਕ੍ਕਾ ਪਕਤਿਮਨੁਸ੍ਸੇਨ ਭਗਵਤੋ ਵਾਦਂ ਆਰੋਪੇਤੁਨ੍ਤਿ ਅਯਮੇਤ੍ਥ ਅਧਿਪ੍ਪਾਯੋ.
੩੫੫. ਤੇਨ ਖੋ ਪਨ ਸਮਯੇਨਾਤਿ ਯਸ੍ਮਿਂ ਸਮਯੇ ਸਚ੍ਚਕੋ ਆਰਾਮਂ ਪਾਵਿਸਿ, ਤਸ੍ਮਿਂ. ਕਿਸ੍ਮਿਂ ਪਨ ਸਮਯੇ ਪਾਵਿਸੀਤਿ? ਮਹਾਮਜ੍ਝਨ੍ਹਿਕਸਮਯੇ. ਕਸ੍ਮਾ ਪਨ ਤਸ੍ਮਿਂ ਸਮਯੇ ਚਙ੍ਕਮਨ੍ਤੀਤਿ? ਪਣੀਤਭੋਜਨਪਚ੍ਚਯਸ੍ਸ ਥਿਨਮਿਦ੍ਧਸ੍ਸ ਵਿਨੋਦਨਤ੍ਥਂ. ਦਿਵਾਪਧਾਨਿਕਾ ਵਾ ਤੇ. ਤਾਦਿਸਾਨਞ੍ਹਿ ਪਚ੍ਛਾਭਤ੍ਤਂ ਚਙ੍ਕਮਿਤ੍ਵਾ ਨ੍ਹਤ੍ਵਾ ਸਰੀਰਂ ਉਤੁਂ ਗਣ੍ਹਾਪੇਤ੍ਵਾ ਨਿਸਜ੍ਜ ਸਮਣਧਮ੍ਮਂ ਕਰੋਨ੍ਤਾਨਂ ਚਿਤ੍ਤਂ ਏਕਗ੍ਗਂ ਹੋਤਿ. ਯੇਨ ਤੇ ਭਿਕ੍ਖੂਤਿ ਸੋ ਕਿਰ ਕੁਹਿਂ ਸਮਣੋ ਗੋਤਮੋਤਿ ਪਰਿਵੇਣਤੋ ਪਰਿਵੇਣਂ ਗਨ੍ਤ੍ਵਾ ਪੁਚ੍ਛਿਤ੍ਵਾ ਪਵਿਸਿਸ੍ਸਾਮੀਤਿ ਵਿਲੋਕੇਨ੍ਤੋ ਅਰਞ੍ਞੇ ਹਤ੍ਥੀ ਵਿਯ ਚਙ੍ਕਮੇ ਚਙ੍ਕਮਮਾਨੇ ਪਂਸੁਕੂਲਿਕਭਿਕ੍ਖੂ ਦਿਸ੍ਵਾ ਤੇਸਂ ਸਨ੍ਤਿਕਂ ਅਗਮਾਸਿ. ਤਂ ਸਨ੍ਧਾਯ, ‘‘ਯੇਨ ਤੇ ਭਿਕ੍ਖੂ’’ਤਿਆਦਿ ਵੁਤ੍ਤਂ. ਕਹਂ ਨੁ ਖੋ, ਭੋਤਿ ਕਤਰਸ੍ਮਿਂ ਆਵਾਸੇ ਵਾ ਮਣ੍ਡਪੇ ਵਾਤਿ ਅਤ੍ਥੋ. ਏਸ, ਅਗ੍ਗਿਵੇਸ੍ਸਨ, ਭਗਵਾਤਿ ਤਦਾ ਕਿਰ ਭਗਵਾ ਪਚ੍ਚੂਸਕਾਲੇ ਮਹਾਕਰੁਣਾ ਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਦਸਸਹਸ੍ਸਚਕ੍ਕਵਾਲ਼ੇ ਸਬ੍ਬਞ੍ਞੁਤਞ੍ਞਾਣਜਾਲਂ ਪਤ੍ਥਰਿਤ੍ਵਾ ਬੋਧਨੇਯ੍ਯਸਤ੍ਤਂ ਓਲੋਕੇਨ੍ਤੋ ਅਦ੍ਦਸ – ‘‘ਸ੍ਵੇ ਸਚ੍ਚਕੋ ਨਿਗਣ੍ਠਪੁਤ੍ਤੋ ਮਹਤਿਂ ਲਿਚ੍ਛਵਿਪਰਿਸਂ ਗਹੇਤ੍ਵਾ ਮਮ ਵਾਦਂ ਆਰੋਪੇਤੁਕਾਮੋ ਆਗਮਿਸ੍ਸਤੀ’’ਤਿ. ਤਸ੍ਮਾ ਪਾਤੋਵ ਸਰੀਰਪਟਿਜਗ੍ਗਨਂ ਕਤ੍ਵਾ ਭਿਕ੍ਖੁਸਙ੍ਘਪਰਿਵਾਰੋ ਵੇਸਾਲਿਯਂ ਪਿਣ੍ਡਾਯ ਚਰਿਤ੍ਵਾ ਪਿਣ੍ਡਪਾਤਪਟਿਕ੍ਕਨ੍ਤੋ ਮਹਾਪਰਿਸਾਯ ਨਿਸੀਦਿਤੁਂ ਸੁਖਟ੍ਠਾਨੇ ਨਿਸੀਦਿਸ੍ਸਾਮੀਤਿ ਗਨ੍ਧਕੁਟਿਂ ਅਪਵਿਸਿਤ੍ਵਾ ਮਹਾਵਨੇ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਦਿਵਾਵਿਹਾਰਂ ਨਿਸੀਦਿ. ਤੇ ਭਿਕ੍ਖੂ ਭਗਵਤੋ ਵਤ੍ਤਂ ਦਸ੍ਸੇਤ੍ਵਾ ਆਗਤਾ, ਸਚ੍ਚਕੇਨ ਪੁਟ੍ਠਾ ਦੂਰੇ ਨਿਸਿਨ੍ਨਂ ਭਗਵਨ੍ਤਂ ਦਸ੍ਸੇਨ੍ਤਾ, ‘‘ਏਸ ਅਗ੍ਗਿਵੇਸ੍ਸਨ ਭਗਵਾ’’ਤਿ ਆਹਂਸੁ.
ਮਹਤਿਯਾ ਲਿਚ੍ਛਵਿਪਰਿਸਾਯ ਸਦ੍ਧਿਨ੍ਤਿ ਹੇਟ੍ਠਾ ਪਞ੍ਚਮਤ੍ਤੇਹਿ ਲਿਚ੍ਛਵਿਸਤੇਹਿ ਪਰਿਵੁਤੋਤਿ ਵੁਤ੍ਤਂ. ਤੇ ਏਤਸ੍ਸ ਅਨ੍ਤੇਵਾਸਿਕਾਯੇਵ, ਅਨ੍ਤੋਵੇਸਾਲਿਯਂ ਪਨ ਸਚ੍ਚਕੋ ਪਞ੍ਚਮਤ੍ਤਾਨਿ ਲਿਚ੍ਛਵਿਰਾਜਸਤਾਨਿ ਗਹੇਤ੍ਵਾ, ‘‘ਵਾਦਤ੍ਥਿਕੋ ਭਗਵਨ੍ਤਂ ਉਪਸਙ੍ਕਮਨ੍ਤੋ’’ਤਿ ਸੁਤ੍ਵਾ ਦ੍ਵਿਨ੍ਨਂ ਪਣ੍ਡਿਤਾਨਂ ਕਥਾਸਲ੍ਲਾਪਂ ਸੋਸ੍ਸਾਮਾਤਿ ਯੇਭੁਯ੍ਯੇਨ ਮਨੁਸ੍ਸਾ ਨਿਕ੍ਖਨ੍ਤਾ, ਏਵਂ ਸਾ ਪਰਿਸਾ ਮਹਤੀ ਅਪਰਿਚ੍ਛਿਨ੍ਨਗਣਨਾ ਅਹੋਸਿ. ਤਂ ਸਨ੍ਧਾਯੇਤਂ ਵੁਤ੍ਤਂ. ਅਞ੍ਜਲਿਂ ਪਣਾਮੇਤ੍ਵਾਤਿ ਏਤੇ ਉਭਤੋਪਕ੍ਖਿਕਾ, ਤੇ ਏਵਂ ਚਿਨ੍ਤੇਸੁਂ – ‘‘ਸਚੇ ਨੋ ਮਿਚ੍ਛਾਦਿਟ੍ਠਿਕਾ ਚੋਦੇਸ੍ਸਨ੍ਤਿ, ‘ਕਸ੍ਮਾ ਤੁਮ੍ਹੇ ਸਮਣਂ ਗੋਤਮਂ ਵਨ੍ਦਿਤ੍ਥਾ’ਤਿ, ਤੇਸਂ, ‘ਕਿਂ ਅਞ੍ਜਲਿਮਤ੍ਤਕਰਣੇਨਪਿ ਵਨ੍ਦਿਤਂ ਹੋਤੀ’ਤਿ ਵਕ੍ਖਾਮ. ਸਚੇ ਨੋ ਸਮ੍ਮਾਦਿਟ੍ਠਿਕਾ ਚੋਦੇਸ੍ਸਨ੍ਤਿ, ‘ਕਸ੍ਮਾ ਭਗਵਨ੍ਤਂ ਨ ਵਨ੍ਦਿਤ੍ਥਾ’ਤਿ, ‘ਕਿਂ ਸੀਸੇਨ ਭੂਮਿਂ ਪਹਰਨ੍ਤੇਨੇਵ ਵਨ੍ਦਿਤਂ ਹੋਤਿ, ਨਨੁ ਅਞ੍ਜਲਿਕਮ੍ਮਮ੍ਪਿ ਵਨ੍ਦਨਾ ਏਵਾ’ਤਿ ਵਕ੍ਖਾਮਾ’’ਤਿ. ਨਾਮ ਗੋਤ੍ਤਨ੍ਤਿ, ਭੋ ਗੋਤਮ, ਅਹਂ ਅਸੁਕਸ੍ਸ ਪੁਤ੍ਤੋ ਦਤ੍ਤੋ ਨਾਮ ਮਿਤ੍ਤੋ ਨਾਮ ਇਧ ਆਗਤੋਤਿ ਵਦਨ੍ਤਾ ਨਾਮਂ ਸਾਵੇਨ੍ਤਿ ਨਾਮ. ਭੋ ਗੋਤਮ, ਅਹਂ ਵਾਸਿਟ੍ਠੋ ਨਾਮ ਕਚ੍ਚਾਨੋ ਨਾਮ ਇਧ ਆਗਤੋਤਿ ਵਦਨ੍ਤਾ ਗੋਤ੍ਤਂ ਸਾਵੇਨ੍ਤਿ ਨਾਮ. ਏਤੇ ਕਿਰ ਦਲਿਦ੍ਦਾ ਜਿਣ੍ਣਕੁਲਪੁਤ੍ਤਾ ਪਰਿਸਮਜ੍ਝੇ ਨਾਮਗੋਤ੍ਤਵਸੇਨ ਪਾਕਟਾ ਭਵਿਸ੍ਸਾਮਾਤਿ ਏਵਂ ਅਕਂਸੁ. ਯੇ ਪਨ ਤੁਣ੍ਹੀਭੂਤਾ ਨਿਸੀਦਿਂਸੁ, ਤੇ ਕੇਰਾਟਿਕਾ ਚੇਵ ਅਨ੍ਧਬਾਲਾ ਚ. ਤਤ੍ਥ ਕੇਰਾਟਿਕਾ, ‘‘ਏਕਂ ਦ੍ਵੇ ਕਥਾਸਲ੍ਲਾਪੇ ਕਰੋਨ੍ਤੋ ਵਿਸ੍ਸਾਸਿਕੋ ਹੋਤਿ, ਅਥ ਵਿਸ੍ਸਾਸੇ ਸਤਿ ਏਕਂ ਦ੍ਵੇ ਭਿਕ੍ਖਾ ਅਦਾਤੁਂ ਨ ਯੁਤ੍ਤ’’ਨ੍ਤਿ ਤਤੋ ਅਤ੍ਤਾਨਂ ਮੋਚੇਨ੍ਤਾ ਤੁਣ੍ਹੀ ਨਿਸੀਦਨ੍ਤਿ. ਅਨ੍ਧਬਾਲਾ ਅਞ੍ਞਾਣਤਾਯੇਵ ਅਵਕ੍ਖਿਤ੍ਤਮਤ੍ਤਿਕਾਪਿਣ੍ਡੋ ਵਿਯ ਯਤ੍ਥ ਕਤ੍ਥਚਿ ਤੁਣ੍ਹੀਭੂਤਾ ਨਿਸੀਦਨ੍ਤਿ.
੩੫੬. ਕਿਞ੍ਚਿਦੇਵ ਦੇਸਨ੍ਤਿ ਕਞ੍ਚਿ ਓਕਾਸਂ ਕਿਞ੍ਚਿ ਕਾਰਣਂ, ਅਥਸ੍ਸ ਭਗਵਾ ਪਞ੍ਹਪੁਚ੍ਛਨੇ ਉਸ੍ਸਾਹਂ ਜਨੇਨ੍ਤੋ ਆਹ – ਪੁਚ੍ਛ, ਅਗ੍ਗਿਵੇਸ੍ਸਨ, ਯਦਾਕਙ੍ਖਸੀਤਿ. ਤਸ੍ਸਤ੍ਥੋ – ‘‘ਪੁਚ੍ਛ ਯਦਿ ਆਕਙ੍ਖਸਿ, ਨ ਮੇ ਪਞ੍ਹਵਿਸ੍ਸਜ੍ਜਨੇ ਭਾਰੋ ਅਤ੍ਥਿ’’. ਅਥ ਵਾ ‘‘ਪੁਚ੍ਛ ਯਂ ਆਕਙ੍ਖਸਿ, ਸਬ੍ਬਂ ਤੇ ਵਿਸ੍ਸਜ੍ਜੇਸ੍ਸਾਮੀ’’ਤਿ ਸਬ੍ਬਞ੍ਞੁਪਵਾਰਣਂ ਪਵਾਰੇਸਿ ਅਸਾਧਾਰਣਂ ਪਚ੍ਚੇਕਬੁਦ੍ਧਅਗ੍ਗਸਾਵਮਹਾਸਾਵਕੇਹਿ. ਤੇ ਹਿ ਯਦਾਕਙ੍ਖਸੀਤਿ ਨ ਵਦਨ੍ਤਿ, ਸੁਤ੍ਵਾ ਵੇਦਿਸ੍ਸਾਮਾਤਿ ਵਦਨ੍ਤਿ. ਬੁਦ੍ਧਾ ਪਨ ‘‘ਪੁਚ੍ਛਾਵੁਸੋ, ਯਦਾਕਙ੍ਖਸੀ’’ਤਿ (ਸਂ. ਨਿ. ੧.੨੩੭) ਵਾ, ‘‘ਪੁਚ੍ਛ, ਮਹਾਰਾਜ, ਯਦਾਕਙ੍ਖਸੀ’’ਤਿ (ਦੀ. ਨਿ. ੧.੧੬੨) ਵਾ,
‘‘ਪੁਚ੍ਛ ਵਾਸਵ ਮਂ ਪਞ੍ਹਂ, ਯਂ ਕਿਞ੍ਚਿ ਮਨਸਿਚ੍ਛਸਿ;
ਤਸ੍ਸ ਤਸ੍ਸੇਵ ਪਞ੍ਹਸ੍ਸ, ਅਹਂ ਅਨ੍ਤਂ ਕਰੋਮਿ ਤੇ’’ ਇਤਿ. (ਦੀ. ਨਿ. ੨.੩੫੬) ਵਾ,
‘‘ਤੇਨ ਹਿ ਤ੍ਵਂ, ਭਿਕ੍ਖੁ, ਸਕੇ ਆਸਨੇ ਨਿਸੀਦਿਤ੍ਵਾ ਪੁਚ੍ਛ ਯਦਾਕਙ੍ਖਸੀ’’ਤਿ (ਮ. ਨਿ. ੩.੮੫) ਵਾ,
‘‘ਬਾਵਰਿਸ੍ਸ ਚ ਤੁਯ੍ਹਂ ਵਾ, ਸਬ੍ਬੇਸਂ ਸਬ੍ਬਸਂਸਯਂ;
ਕਤਾਵਕਾਸਾ ਪੁਚ੍ਛਵ੍ਹੋ, ਯਂ ਕਿਞ੍ਚਿ ਮਨਸਿਚ੍ਛਥਾ’’ਤਿ. (ਸੁ. ਨਿ. ੧੦੩੬) ਵਾ,
‘‘ਪੁਚ੍ਛ ਮਂ ਸਭਿਯ ਪਞ੍ਹਂ, ਯਂ ਕਿਞ੍ਚਿ ਮਨਸਿਚ੍ਛਸਿ;
ਤਸ੍ਸ ਤਸ੍ਸੇਵ ਪਞ੍ਹਸ੍ਸ, ਅਹਂ ਅਨ੍ਤਂ ਕਰੋਮਿ ਤੇ’’ ਇਤਿ. (ਸੁ. ਨਿ. ੫੧੭) ਵਾ –
ਤੇਸਂ ਤੇਸਂ ਯਕ੍ਖਨਰਿਨ੍ਦਦੇਵਸਮਣਬ੍ਰਾਹ੍ਮਣਪਰਿਬ੍ਬਾਜਕਾਨਂ ਸਬ੍ਬਞ੍ਞੁਪਵਾਰਣਂ ਪਵਾਰੇਨ੍ਤਿ. ਅਨਚ੍ਛਰਿਯਞ੍ਚੇਤਂ, ਯਂ ਭਗਵਾ ਬੁਦ੍ਧਭੂਮਿਂ ਪਤ੍ਵਾ ਏਤਂ ਪਵਾਰਣਂ ਪਵਾਰੇਯ੍ਯ. ਯੋ ਬੋਧਿਸਤ੍ਤਭੂਮਿਯਂ ਪਦੇਸਞਾਣੇਪਿ ਠਿਤੋ
‘‘ਕੋਣ੍ਡਞ੍ਞ ਪਞ੍ਹਾਨਿ ਵਿਯਾਕਰੋਹਿ,
ਯਾਚਨ੍ਤਿ ਤਂ ਇਸਯੋ ਸਾਧੁਰੂਪਾ;
ਕੋਣ੍ਡਞ੍ਞ ਏਸੋ ਮਨੁਜੇਸੁ ਧਮ੍ਮੋ,
ਯਂ ਵੁਦ੍ਧਮਾਗਚ੍ਛਤਿ ਏਸ ਭਾਰੋ’’ਤਿ. (ਜਾ. ੨.੧੭.੬੦) –
ਏਵਂ ਸਕ੍ਕਾਦੀਨਂ ਅਤ੍ਥਾਯ ਇਸੀਹਿ ਯਾਚਿਤੋ
‘‘ਕਤਾਵਕਾਸਾ ਪੁਚ੍ਛਨ੍ਤੁ ਭੋਨ੍ਤੋ,
ਯਂ ਕਿਞ੍ਚਿ ਪਞ੍ਹਂ ਮਨਸਾਭਿਪਤ੍ਥਿਤਂ;
ਅਹਞ੍ਹਿ ਤਂ ਤਂ ਵੋ ਵਿਯਾਕਰਿਸ੍ਸਂ,
ਞਤ੍ਵਾ ਸਯਂ ਲੋਕਮਿਮਂ ਪਰਞ੍ਚਾ’’ਤਿ. (ਜਾ. ੨.੧੭.੬੧);
ਏਵਂ ਸਰਭਙ੍ਗਕਾਲੇ, ਸਮ੍ਭਵਜਾਤਕੇ ਚ ਸਕਲਜਮ੍ਬੁਦੀਪਂ ਤਿਕ੍ਖਤ੍ਤੁਂ ਵਿਚਰਿਤ੍ਵਾ ਪਞ੍ਹਾਨਂ ਅਨ੍ਤਕਰਂ ਅਦਿਸ੍ਵਾ ਸੁਚਿਰਤੇਨ ਬ੍ਰਾਹ੍ਮਣੇਨ ਪਞ੍ਹਂ ਪੁਟ੍ਠੋ ਓਕਾਸੇ ਕਾਰਿਤੇ, ਜਾਤਿਯਾ ਸਤ੍ਤਵਸ੍ਸੋ ਰਥਿਕਾਯਂ ਪਂਸੁਂ ਕੀਲ਼ਨ੍ਤੋ ਪਲ੍ਲਙ੍ਕਂ ਆਭੁਜਿਤ੍ਵਾ ਅਨ੍ਤਰਵੀਥਿਯਂ ਨਿਸਿਨ੍ਨੋਵ –
‘‘ਤਗ੍ਘ ਤੇ ਅਹਮਕ੍ਖਿਸ੍ਸਂ, ਯਥਾਪਿ ਕੁਸਲੋ ਤਥਾ;
ਰਾਜਾ ਚ ਖੋ ਤਂ ਜਾਨਾਤਿ, ਯਦਿ ਕਾਹਤਿ ਵਾ ਨ ਵਾ’’ਤਿ. (ਜਾ. ੧.੧੬.੧੭੨) –
ਸਬ੍ਬਞ੍ਞੁਪਵਾਰਣਂ ਪਵਾਰੇਸਿ.
ਏਵਂ ਭਗਵਤਾ ਸਬ੍ਬਞ੍ਞੁਪਵਾਰਣਾਯ ਪਵਾਰਿਤਾਯ ਅਤ੍ਤਮਨੋ ਪਞ੍ਹਂ ਪੁਚ੍ਛਨ੍ਤੋ, ‘‘ਕਥਂ ਪਨ, ਭੋ ਗੋਤਮਾ’’ਤਿਆਦਿਮਾਹ.
ਅਥਸ੍ਸ ਭਗਵਾ, ‘‘ਪਸ੍ਸਥ, ਭੋ, ਅਞ੍ਞਂ ਸਾਵਕੇਨ ਕਥਿਤਂ, ਅਞ੍ਞਂ ਸਤ੍ਥਾ ਕਥੇਤਿ, ਨਨੁ ਮਯਾ ਪਟਿਕਚ੍ਚੇਵ ਵੁਤ੍ਤਂ, ‘ਸਚੇ ਤਥਾ ਪਤਿਟ੍ਠਿਸ੍ਸਤਿ, ਯਥਾਸ੍ਸ ਸਾਵਕੇਨ ਪਤਿਟ੍ਠਿਤਂ, ਏਵਾਹਂ ਵਾਦਂ ਆਰੋਪੇਸ੍ਸਾਮੀ’ਤਿ. ਅਯਂ ਪਨ ਅਞ੍ਞਮੇਵ ਕਥੇਤਿ, ਤਤ੍ਥ ਕਿਂ ਮਯਾ ਸਕ੍ਕਾ ਕਾਤੁ’’ਨ੍ਤਿ ਏਵਂ ਨਿਗਣ੍ਠਸ੍ਸ ਵਚਨੋਕਾਸੋ ਮਾ ਹੋਤੂਤਿ ਹੇਟ੍ਠਾ ਅਸ੍ਸਜਿਤ੍ਥੇਰੇਨ ਕਥਿਤਨਿਯਾਮੇਨੇਵ ਕਥੇਨ੍ਤੋ, ਏਵਂ ਖੋ ਅਹਂ, ਅਗ੍ਗਿਵੇਸ੍ਸਨਾਤਿਆਦਿਮਾਹ. ਉਪਮਾ ਮਂ, ਭੋ ਗੋਤਮ, ਪਟਿਭਾਤੀਤਿ, ਭੋ ਗੋਤਮ, ਮਯ੍ਹਂ ਏਕਾ ਉਪਮਾ ਉਪਟ੍ਠਾਤਿ, ਆਹਰਾਮਿ ਤਂ ਉਪਮਨ੍ਤਿ ਵਦਤਿ. ਪਟਿਭਾਤੁ ਤਂ, ਅਗ੍ਗਿਵੇਸ੍ਸਨਾਤਿ ਉਪਟ੍ਠਾਤੁ ਤੇ, ਅਗ੍ਗਿਵੇਸ੍ਸਨ, ਆਹਰ ਤਂ ਉਪਮਂ ਵਿਸਤ੍ਥੋਤਿ ਭਗਵਾ ਅਵੋਚ. ਬਲਕਰਣੀਯਾਤਿ ਬਾਹੁਬਲੇਨ ਕਤ੍ਤਬ੍ਬਾ ਕਸਿਵਾਣਿਜ੍ਜਾਦਿਕਾ ਕਮ੍ਮਨ੍ਤਾ. ਰੂਪਤ੍ਤਾਯਂ ਪੁਰਿਸਪੁਗ੍ਗਲੋਤਿ ਰੂਪਂ ਅਤ੍ਤਾ ਅਸ੍ਸਾਤਿ ਰੂਪਤ੍ਤਾ, ਰੂਪਂ ਅਤ੍ਤਾਤਿ ਗਹੇਤ੍ਵਾ ਠਿਤਪੁਗ੍ਗਲਂ ਦੀਪੇਤਿ. ਰੂਪੇ ਪਤਿਟ੍ਠਾਯਾਤਿ ਤਸ੍ਮਿਂ ਅਤ੍ਤਾਤਿ ਗਹਿਤਰੂਪੇ ਪਤਿਟ੍ਠਹਿਤ੍ਵਾ. ਪੁਞ੍ਞਂ ਵਾ ਅਪੁਞ੍ਞਂ ਵਾ ਪਸਵਤੀਤਿ ਕੁਸਲਂ ਵਾ ਅਕੁਸਲਂ ਵਾ ਪਟਿਲਭਤਿ. ਵੇਦਨਤ੍ਤਾਦੀਸੁਪਿ ਏਸੇਵ ਨਯੋ. ਇਮਿਨਾ ਕਿਂ ਦੀਪੇਤਿ? ਇਮੇ ਪਞ੍ਚਕ੍ਖਨ੍ਧਾ ਇਮੇਸਂ ਸਤ੍ਤਾਨਂ ਪਥਵੀ ਵਿਯ ਪਤਿਟ੍ਠਾ, ਤੇ ਇਮੇਸੁ ਪਞ੍ਚਸੁ ਖਨ੍ਧੇਸੁ ਪਤਿਟ੍ਠਾਯ ਕੁਸਲਾਕੁਸਲਕਮ੍ਮਂ ਨਾਮ ਆਯੂਹਨ੍ਤਿ. ਤੁਮ੍ਹੇ ਏਵਰੂਪਂ ਵਿਜ੍ਜਮਾਨਮੇਵ ਅਤ੍ਤਾਨਂ ਪਟਿਸੇਧੇਨ੍ਤੋ ਪਞ੍ਚਕ੍ਖਨ੍ਧਾ ਅਨਤ੍ਤਾਤਿ ਦੀਪੇਥਾਤਿ ਅਤਿਵਿਯ ਸਕਾਰਣਂ ਕਤ੍ਵਾ ਉਪਮਂ ਆਹਰਿ. ਇਮਿਨਾ ਚ ਨਿਗਣ੍ਠੇਨ ਆਹਟਓਪਮ੍ਮਂ ਨਿਯਤਮੇਵ, ਸਬ੍ਬਞ੍ਞੁਬੁਦ੍ਧਤੋ ਅਞ੍ਞੋ ਤਸ੍ਸ ਕਥਂ ਛਿਨ੍ਦਿਤ੍ਵਾ ਵਾਦੇ ਦੋਸਂ ਦਾਤੁਂ ਸਮਤ੍ਥੋ ਨਾਮ ਨਤ੍ਥਿ. ਦੁਵਿਧਾ ਹਿ ਪੁਗ੍ਗਲਾ ਬੁਦ੍ਧਵੇਨੇਯ੍ਯਾ ਚ ਸਾਵਕਵੇਨੇਯ੍ਯਾ ਚ. ਸਾਵਕਵੇਨੇਯ੍ਯੇ ਸਾਵਕਾਪਿ ਵਿਨੇਨ੍ਤਿ ਬੁਦ੍ਧਾਪਿ. ਬੁਦ੍ਧਵੇਨੇਯ੍ਯੇ ਪਨ ਸਾਵਕਾ ਵਿਨੇਤੁਂ ਨ ਸਕ੍ਕੋਨ੍ਤਿ, ਬੁਦ੍ਧਾਵ ਵਿਨੇਨ੍ਤਿ. ਅਯਮ੍ਪਿ ਨਿਗਣ੍ਠੋ ਬੁਦ੍ਧਵੇਨੇਯ੍ਯੋ, ਤਸ੍ਮਾ ਏਤਸ੍ਸ ਵਾਦਂ ਛਿਨ੍ਦਿਤ੍ਵਾ ਅਞ੍ਞੋ ਦੋਸਂ ਦਾਤੁਂ ਸਮਤ੍ਥੋ ਨਾਮ ਨਤ੍ਥਿ. ਤੇਨਸ੍ਸ ਭਗਵਾ ਸਯਮੇਵ ਵਾਦੇ ਦੋਸਦਸ੍ਸਨਤ੍ਥਂ ਨਨੁ ਤ੍ਵਂ, ਅਗ੍ਗਿਵੇਸ੍ਸਨਾਤਿਆਦਿਮਾਹ.
ਅਥ ਨਿਗਣ੍ਠੋ ਚਿਨ੍ਤੇਸਿ – ‘‘ਅਤਿਵਿਯ ਸਮਣੋ ਗੋਤਮੋ ਮਮ ਵਾਦਂ ਪਤਿਟ੍ਠਪੇਤਿ, ਸਚੇ ਉਪਰਿ ਕੋਚਿ ਦੋਸੋ ਭਵਿਸ੍ਸਤਿ, ਮਮਂ ਏਕਕਂਯੇਵ ਨਿਗ੍ਗਣ੍ਹਿਸ੍ਸਤਿ. ਹਨ੍ਦਾਹਂ ਇਮਂ ਵਾਦਂ ਮਹਾਜਨਸ੍ਸਾਪਿ ਮਤ੍ਥਕੇ ਪਕ੍ਖਿਪਾਮੀ’’ਤਿ, ਤਸ੍ਮਾ ਏਵਮਾਹ – ਅਹਮ੍ਪਿ, ਭੋ ਗੋਤਮ, ਏਵਂ ਵਦਾਮਿ ਰੂਪਂ ਮੇ ਅਤ੍ਤਾ…ਪੇ… ਵਿਞ੍ਞਾਣਂ ਮੇ ਅਤ੍ਤਾਤਿ, ਅਯਞ੍ਚ ਮਹਤੀ ਜਨਤਾਤਿ. ਭਗਵਾ ਪਨ ਨਿਗਣ੍ਠਤੋ ਸਤਗੁਣੇਨਪਿ ਸਹਸ੍ਸਗੁਣੇਨਪਿ ਸਤਸਹਸ੍ਸਗੁਣੇਨਪਿ ਵਾਦੀਵਰਤਰੋ, ਤਸ੍ਮਾ ਚਿਨ੍ਤੇਸਿ – ‘‘ਅਯਂ ਨਿਗਣ੍ਠੋ ਅਤ੍ਤਾਨਂ ਮੋਚੇਤ੍ਵਾ ਮਹਾਜਨਸ੍ਸ ਮਤ੍ਥਕੇ ਵਾਦਂ ਪਕ੍ਖਿਪਤਿ, ਨਾਸ੍ਸ ਅਤ੍ਤਾਨਂ ਮੋਚੇਤੁਂ ਦਸ੍ਸਾਮਿ, ਮਹਾਜਨਤੋ ਨਿਵਤ੍ਤੇਤ੍ਵਾ ਏਕਕਂਯੇਵ ਨਂ ਨਿਗ੍ਗਣ੍ਹਿਸ੍ਸਾਮੀ’’ਤਿ. ਅਥ ਨਂ ਕਿਞ੍ਹਿ ਤੇ, ਅਗ੍ਗਿਵੇਸ੍ਸਨਾਤਿਆਦਿਮਾਹ. ਤਸ੍ਸਤ੍ਥੋ – ਨਾਯਂ ਜਨਤਾ ਮਮ ਵਾਦਂ ਆਰੋਪੇਤੁਂ ਆਗਤਾ, ਤ੍ਵਂਯੇਵ ਸਕਲਂ ਵੇਸਾਲਿਂ ਸਂਵਟ੍ਟਿਤ੍ਵਾ ਮਮ ਵਾਦਂ ਆਰੋਪੇਤੁਂ ਆਗਤੋ, ਤਸ੍ਮਾ ਤ੍ਵਂ ਸਕਮੇਵ ਵਾਦਂ ਨਿਵੇਠੇਹਿ, ਮਾ ਮਹਾਜਨਸ੍ਸ ਮਤ੍ਥਕੇ ਪਕ੍ਖਿਪਸੀਤਿ. ਸੋ ਪਟਿਜਾਨਨ੍ਤੋ ਅਹਞ੍ਹਿ, ਭੋ ਗੋਤਮਾਤਿਆਦਿਮਾਹ.
੩੫੭. ਇਤਿ ਭਗਵਾ ਨਿਗਣ੍ਠਸ੍ਸ ਵਾਦਂ ਪਤਿਟ੍ਠਪੇਤ੍ਵਾ, ਤੇਨ ਹਿ, ਅਗ੍ਗਿਵੇਸ੍ਸਨਾਤਿ ਪੁਚ੍ਛਂ ਆਰਭਿ. ਤਤ੍ਥ ਤੇਨ ਹੀਤਿ ਕਾਰਣਤ੍ਥੇ ਨਿਪਾਤੋ. ਯਸ੍ਮਾ ਤ੍ਵਂ ਪਞ੍ਚਕ੍ਖਨ੍ਧੇ ਅਤ੍ਤਤੋ ਪਟਿਜਾਨਾਸਿ, ਤਸ੍ਮਾਤਿ ਅਤ੍ਥੋ. ਸਕਸ੍ਮਿਂ ਵਿਜਿਤੇਤਿ ਅਤ੍ਤਨੋ ਰਟ੍ਠੇ. ਘਾਤੇਤਾਯਂ ਵਾ ਘਾਤੇਤੁਨ੍ਤਿ ਘਾਤਾਰਹਂ ਘਾਤੇਤਬ੍ਬਯੁਤ੍ਤਕਂ ਘਾਤੇਤੁਂ. ਜਾਪੇਤਾਯਂ ਵਾ ਜਾਪੇਤੁਨ੍ਤਿ ਧਨਜਾਨਿਰਹਂ ਜਾਪੇਤਬ੍ਬਯੁਤ੍ਤਂ ਜਾਪੇਤੁਂ ਜਿਣ੍ਣਧਨਂ ਕਾਤੁਂ. ਪਬ੍ਬਾਜੇਤਾਯਂ ਵਾ ਪਬ੍ਬਾਜੇਤੁਨ੍ਤਿ ਸਕਰਟ੍ਠਤੋ ਪਬ੍ਬਾਜਨਾਰਹਂ ਪਬ੍ਬਾਜੇਤੁਂ, ਨੀਹਰਿਤੁਂ. ਵਤ੍ਤਿਤੁਞ੍ਚ ਅਰਹਤੀਤਿ ਵਤ੍ਤਤਿ ਚੇਵ ਵਤ੍ਤਿਤੁਞ੍ਚ ਅਰਹਤਿ. ਵਤ੍ਤਿਤੁਂ ਯੁਤ੍ਤੋਤਿ ਦੀਪੇਤਿ. ਇਤਿ ਨਿਗਣ੍ਠੋ ਅਤ੍ਤਨੋ ਵਾਦਭੇਦਨਤ੍ਥਂ ਆਹਟਕਾਰਣਮੇਵ ਅਤ੍ਤਨੋ ਮਾਰਣਤ੍ਥਾਯ ਆਵੁਧਂ ਤਿਖਿਣਂ ਕਰੋਨ੍ਤੋ ਵਿਯ ਵਿਸੇਸੇਤ੍ਵਾ ਦੀਪੇਤਿ, ਯਥਾ ਤਂ ਬਾਲੋ. ਏਵਂ ਮੇ ਰੂਪਂ ਹੋਤੂਤਿ ਮਮ ਰੂਪਂ ਏਵਂਵਿਧਂ ਹੋਤੁ, ਪਾਸਾਦਿਕਂ ਅਭਿਰੂਪਂ ਅਲਙ੍ਕਤਪ੍ਪਟਿਯਤ੍ਤਂ ਸੁਵਣ੍ਣਤੋਰਣਂ ਵਿਯ ਸੁਸਜ੍ਜਿਤਚਿਤ੍ਤਪਟੋ ਵਿਯ ਚ ਮਨਾਪਦਸ੍ਸਨਨ੍ਤਿ. ਏਵਂ ਮੇ ਰੂਪਂ ਮਾ ਅਹੋਸੀਤਿ ਮਮ ਰੂਪਂ ਏਵਂਵਿਧਂ ਮਾ ਹੋਤੁ, ਦੁਬ੍ਬਣ੍ਣਂ ਦੁਸ੍ਸਣ੍ਠਿਤਂ ਵਲਿਤਪਲਿਤਂ ਤਿਲਕਸਮਾਕਿਣ੍ਣਨ੍ਤਿ.
ਤੁਣ੍ਹੀ ਅਹੋਸੀਤਿ ਨਿਗਣ੍ਠੋ ਇਮਸ੍ਮਿਂ ਠਾਨੇ ਵਿਰਦ੍ਧਭਾਵਂ ਞਤ੍ਵਾ, ‘‘ਸਮਣੋ ਗੋਤਮੋ ਮਮ ਵਾਦਂ ਭਿਨ੍ਦਨਤ੍ਥਾਯ ਕਾਰਣਂ ਆਹਰਿ, ਅਹਂ ਬਾਲਤਾਯ ਤਮੇਵ ਵਿਸੇਸੇਤ੍ਵਾ ਦੀਪੇਸਿਂ, ਇਦਾਨਿ ਨਟ੍ਠੋਮ੍ਹਿ, ਸਚੇ ਵਤ੍ਤਤੀਤਿ ਵਕ੍ਖਾਮਿ, ਇਮੇ ਰਾਜਾਨੋ ਉਟ੍ਠਹਿਤ੍ਵਾ, ‘ਅਗ੍ਗਿਵੇਸ੍ਸਨ, ਤ੍ਵਂ ਮਮ ਰੂਪੇ ਵਸੋ ਵਤ੍ਤਤੀਤਿ ਵਦਸਿ, ਯਦਿ ਤੇ ਰੂਪੇ ਵਸੋ ਵਤ੍ਤਤਿ, ਕਸ੍ਮਾ ਤ੍ਵਂ ਯਥਾ ਇਮੇ ਲਿਚ੍ਛਵਿਰਾਜਾਨੋ ਤਾਵਤਿਂਸਦੇਵਸਦਿਸੇਹਿ ਅਤ੍ਤਭਾਵੇਹਿ ਵਿਰੋਚਨ੍ਤਿ ਅਭਿਰੂਪਾ ਪਾਸਾਦਿਕਾ, ਏਵਂ ਨ ਵਿਰੋਚਸੀ’ਤਿ. ਸਚੇ ਨ ਵਤ੍ਤਤੀਤਿ ਵਕ੍ਖਾਮਿ, ਸਮਣੋ ਗੋਤਮੋ ਉਟ੍ਠਹਿਤ੍ਵਾ, ‘ਅਗ੍ਗਿਵੇਸ੍ਸਨ, ਤ੍ਵਂ ਪੁਬ੍ਬੇ ਵਤ੍ਤਤਿ ਮੇ ਰੂਪਸ੍ਮਿਂ ਵਸੋਤਿ ਵਤ੍ਵਾ ਇਦਾਨਿ ਪਟਿਕ੍ਖਿਪਸੀ’ਤਿ ਵਾਦਂ ਆਰੋਪੇਸ੍ਸਤਿ. ਇਤਿ ਵਤ੍ਤਤੀਤਿ ਵੁਤ੍ਤੇਪਿ ਏਕੋ ਦੋਸੋ, ਨ ਵਤ੍ਤਤੀਤਿ ਵੁਤ੍ਤੇਪਿ ਏਕੋ ਦੋਸੋ’’ਤਿ ਤੁਣ੍ਹੀ ਅਹੋਸਿ. ਦੁਤਿਯਮ੍ਪਿ ਭਗਵਾ ਪੁਚ੍ਛਿ, ਦੁਤਿਯਮ੍ਪਿ ਤੁਣ੍ਹੀ ਅਹੋਸਿ. ਯਸ੍ਮਾ ਪਨ ਯਾਵਤਤਿਯਂ ਭਗਵਤਾ ਪੁਚ੍ਛਿਤੇ ਅਬ੍ਯਾਕਰੋਨ੍ਤਸ੍ਸ ਸਤ੍ਤਧਾ ਮੁਦ੍ਧਾ ਫਲਤਿ, ਬੁਦ੍ਧਾ ਚ ਨਾਮ ਸਤ੍ਤਾਨਂਯੇਵ ਅਤ੍ਥਾਯ ਕਪ੍ਪਸਤਸਹਸ੍ਸਾਧਿਕਾਨਿ ਚਤ੍ਤਾਰਿ ਅਸਙ੍ਖ੍ਯੇਯ੍ਯਾਨਿ ਪਾਰਮੀਨਂ ਪੂਰਿਤਤ੍ਤਾ ਸਤ੍ਤੇਸੁ ਬਲਵਅਨੁਦ੍ਦਯਾ ਹੋਨ੍ਤਿ. ਤਸ੍ਮਾ ਯਾਵਤਤਿਯਂ ਅਪੁਚ੍ਛਿਤ੍ਵਾ ਅਥ ਖੋ ਭਗਵਾ ਸਚ੍ਚਕਂ ਨਿਗਣ੍ਠਪੁਤ੍ਤਂ ਏਤਦਵੋਚ – ਏਤਂ ‘‘ਬ੍ਯਾਕਰੋਹੀ ਦਾਨੀ’’ਤਿਆਦਿਵਚਨਂ ਅਵੋਚ.
ਤਤ੍ਥ ਸਹਧਮ੍ਮਿਕਨ੍ਤਿ ਸਹੇਤੁਕਂ ਸਕਾਰਣਂ. ਵਜਿਰਂ ਪਾਣਿਮ੍ਹਿ ਅਸ੍ਸਾਤਿ ਵਜਿਰਪਾਣਿ. ਯਕ੍ਖੋਤਿ ਨ ਯੋ ਵਾ ਸੋ ਵਾ ਯਕ੍ਖੋ, ਸਕ੍ਕੋ ਦੇਵਰਾਜਾਤਿ ਵੇਦਿਤਬ੍ਬੋ. ਆਦਿਤ੍ਤਨ੍ਤਿ ਅਗ੍ਗਿਵਣ੍ਣਂ. ਸਮ੍ਪਜ੍ਜਲਿਤਨ੍ਤਿ ਸੁਟ੍ਠੁ ਪਜ੍ਜਲਿਤਂ. ਸਜੋਤਿਭੂਤਨ੍ਤਿ ਸਮਨ੍ਤਤੋ ਜੋਤਿਭੂਤਂ, ਏਕਗ੍ਗਿਜਾਲਭੂਤਨ੍ਤਿ ਅਤ੍ਥੋ. ਠਿਤੋ ਹੋਤੀਤਿ ਮਹਨ੍ਤਂ ਸੀਸਂ, ਕਨ੍ਦਲਮਕੁਲਸਦਿਸਾ ਦਾਠਾ, ਭਯਾਨਕਾਨਿ ਅਕ੍ਖਿਨਾਸਾਦੀਨੀਤਿ ਏਵਂ ਵਿਰੂਪਰੂਪਂ ਮਾਪੇਤ੍ਵਾ ਠਿਤੋ. ਕਸ੍ਮਾ ਪਨੇਸ ਆਗਤੋਤਿ? ਦਿਟ੍ਠਿਵਿਸ੍ਸਜ੍ਜਾਪਨਤ੍ਥਂ. ਅਪਿਚ, ‘‘ਅਹਞ੍ਚੇਵ ਖੋ ਪਨ ਧਮ੍ਮਂ ਦੇਸੇਯ੍ਯਂ, ਪਰੇ ਚ ਮੇ ਨ ਆਜਾਨੇਯ੍ਯੁ’’ਨ੍ਤਿ ਏਵਂ ਧਮ੍ਮਦੇਸਨਾਯ ਅਪ੍ਪੋਸ੍ਸੁਕ੍ਕਭਾਵਂ ਆਪਨ੍ਨੇ ਭਗਵਤਿ ਸਕ੍ਕੋ ਮਹਾਬ੍ਰਹ੍ਮੁਨਾ ਸਦ੍ਧਿਂ ਆਗਨ੍ਤ੍ਵਾ, ‘‘ਭਗਵਾ ਧਮ੍ਮਂ ਦੇਸੇਥ, ਤੁਮ੍ਹਾਕਂ ਆਣਾਯ ਅਵਤ੍ਤਮਾਨੇ ਮਯਂ ਵਤ੍ਤਾਪੇਸ੍ਸਾਮ, ਤੁਮ੍ਹਾਕਂ ਧਮ੍ਮਚਕ੍ਕਂ ਹੋਤੁ, ਅਮ੍ਹਾਕਂ ਆਣਾਚਕ੍ਕ’’ਨ੍ਤਿ ਪਟਿਞ੍ਞਮਕਾਸਿ. ਤਸ੍ਮਾ ‘‘ਅਜ੍ਜ ਸਚ੍ਚਕਂ ਤਾਸੇਤ੍ਵਾ ਪਞ੍ਹਂ ਵਿਸ੍ਸਜ੍ਜਾਪੇਸ੍ਸਾਮੀ’’ਤਿ ਆਗਤੋ.
ਭਗਵਾ ਚੇਵ ਪਸ੍ਸਤਿ, ਸਚ੍ਚਕੋ ਚ ਨਿਗਣ੍ਠਪੁਤ੍ਤੋਤਿ ਯਦਿ ਹਿ ਤਂ ਅਞ੍ਞੇਪਿ ਪਸ੍ਸੇਯ੍ਯੁਂ. ਤਂ ਕਾਰਣਂ ਅਗਰੁ ਅਸ੍ਸ, ‘‘ਸਮਣੋ ਗੋਤਮੋ ਸਚ੍ਚਕਂ ਅਤ੍ਤਨੋ ਵਾਦੇ ਅਨੋਤਰਨ੍ਤਂ ਞਤ੍ਵਾ ਯਕ੍ਖਂ ਆਵਾਹੇਤ੍ਵਾ ਦਸ੍ਸੇਸਿ, ਤਤੋ ਸਚ੍ਚਕੋ ਭਯੇਨ ਕਥੇਸੀ’’ਤਿ ਵਦੇਯ੍ਯੁਂ. ਤਸ੍ਮਾ ਭਗਵਾ ਚੇਵ ਪਸ੍ਸਤਿ ਸਚ੍ਚਕੋ ਚ. ਤਸ੍ਸ ਤਂ ਦਿਸ੍ਵਾਵ ਸਕਲਸਰੀਰਤੋ ਸੇਦਾ ਮੁਚ੍ਚਿਂਸੁ, ਅਨ੍ਤੋਕੁਚ੍ਛਿ ਵਿਪਰਿਵਤ੍ਤਮਾਨਾ ਮਹਾਰਵਂ ਰਵਿ. ਸੋ ‘‘ਅਞ੍ਞੇਪਿ ਨੁ ਖੋ ਪਸ੍ਸਨ੍ਤੀ’’ਤਿ ਓਲੋਕੇਨ੍ਤੋ ਕਸ੍ਸਚਿ ਲੋਮਹਂਸਮਤ੍ਤਮ੍ਪਿ ਨ ਅਦ੍ਦਸ. ਤਤੋ – ‘‘ਇਦਂ ਭਯਂ ਮਮੇਵ ਉਪ੍ਪਨ੍ਨਂ. ਸਚਾਹਂ ਯਕ੍ਖੋਤਿ ਵਕ੍ਖਾਮਿ, ‘ਕਿਂ ਤੁਯ੍ਹਮੇਵ ਅਕ੍ਖੀਨਿ ਅਤ੍ਥਿ, ਤ੍ਵਮੇਵ ਯਕ੍ਖਂ ਪਸ੍ਸਸਿ, ਪਠਮਂ ਯਕ੍ਖਂ ਅਦਿਸ੍ਵਾ ਸਮਣੇਨ ਗੋਤਮੇਨ ਵਾਦਸਙ੍ਘਾਟੇ ਖਿਤ੍ਤੋਵ ਯਕ੍ਖਂ ਪਸ੍ਸਸੀ’ਤਿ ਵਦੇਯ੍ਯੁ’’ਨ੍ਤਿ ਚਿਨ੍ਤੇਤ੍ਵਾ – ‘‘ਨ ਦਾਨਿ ਮੇ ਇਧ ਅਞ੍ਞਂ ਪਟਿਸਰਣਂ ਅਤ੍ਥਿ, ਅਞ੍ਞਤ੍ਰ ਸਮਣਾ ਗੋਤਮਾ’’ਤਿ ਮਞ੍ਞਮਾਨੋ, ਅਥ ਖੋ ਸਚ੍ਚਕੋ ਨਿਗਣ੍ਠਪੁਤ੍ਤੋ…ਪੇ… ਭਗਵਨ੍ਤਂ ਏਤਦਵੋਚ. ਤਾਣਂ ਗਵੇਸੀਤਿ ਤਾਣਨ੍ਤਿ ਗਵੇਸਮਾਨੋ. ਲੇਣਂ ਗਵੇਸੀਤਿ ਲੇਣਨ੍ਤਿ ਗਵੇਸਮਾਨੋ. ਸਰਣਂ ਗਵੇਸੀਤਿ ਸਰਣਨ੍ਤਿ ਗਵੇਸਮਾਨੋ. ਏਤ੍ਥ ਚ ਤਾਯਤਿ ਰਕ੍ਖਤੀਤਿ ਤਾਣਂ. ਨਿਲੀਯਨ੍ਤਿ ਏਤ੍ਥਾਤਿ ਲੇਣਂ. ਸਰਤੀਤਿ ਸਰਣਂ, ਭਯਂ ਹਿਂਸਤਿ ਵਿਦ੍ਧਂਸੇਤੀਤਿ ਅਤ੍ਥੋ.
੩੫੮. ਮਨਸਿ ਕਰਿਤ੍ਵਾਤਿ ਮਨਮ੍ਹਿ ਕਤ੍ਵਾ ਪਚ੍ਚਵੇਕ੍ਖਿਤ੍ਵਾ ਉਪਧਾਰੇਤ੍ਵਾ. ਏਵਂ ਮੇ ਵੇਦਨਾ ਹੋਤੂਤਿ ਕੁਸਲਾਵ ਹੋਤੁ, ਸੁਖਾਵ ਹੋਤੁ. ਏਵਂ ਮੇ ਸਞ੍ਞਾ ਹੋਤੂਤਿ ਕੁਸਲਾਵ ਹੋਤੁ, ਸੁਖਾਵ ਹੋਤੁ, ਸੋਮਨਸ੍ਸਸਮ੍ਪਯੁਤ੍ਤਾਵ ਹੋਤੂਤਿ. ਸਙ੍ਖਾਰਵਿਞ੍ਞਾਣੇਸੁਪਿ ਏਸੇਵ ਨਯੋ. ਮਾ ਅਹੋਸੀਤਿ ਏਤ੍ਥ ਪਨ ਵੁਤ੍ਤਵਿਪਰਿਯਾਯੇਨ ਅਤ੍ਥੋ ਵੇਦਿਤਬ੍ਬੋ. ਕਲ੍ਲਂ ਨੂਤਿ ਯੁਤ੍ਤਂ ਨੁ. ਸਮਨੁਪਸ੍ਸਿਤੁਨ੍ਤਿ ‘‘ਏਤਂ ਮਮ ਏਸੋਹਮਸ੍ਮਿ ਏਸੋ ਮੇ ਅਤ੍ਤਾ’’ਤਿ ਏਵਂ ਤਣ੍ਹਾਮਾਨਦਿਟ੍ਠਿਵਸੇਨ ਪਸ੍ਸਿਤੁਂ. ਨੋ ਹਿਦਂ, ਭੋ ਗੋਤਮਾਤਿ ਨ ਯੁਤ੍ਤਮੇਤਂ, ਭੋ ਗੋਤਮ. ਇਤਿ ਭਗਵਾ ਯਥਾ ਨਾਮ ਛੇਕੋ ਅਹਿਤੁਣ੍ਡਿਕੋ ਸਪ੍ਪਦਟ੍ਠਵਿਸਂ ਤੇਨੇਵ ਸਪ੍ਪੇਨ ਪੁਨ ਡਂਸਾਪੇਤ੍ਵਾ ਉਬ੍ਬਾਹੇਯ੍ਯ, ਏਵਂ ਤਸ੍ਸਂਯੇਵ ਪਰਿਸਤਿ ਸਚ੍ਚਕਂ ਨਿਗਣ੍ਠਪੁਤ੍ਤਂ ਤੇਨੇਵ ਮੁਖੇਨ ਪਞ੍ਚਕ੍ਖਨ੍ਧਾ ਅਨਿਚ੍ਚਾ ਦੁਕ੍ਖਾ ਅਨਤ੍ਤਾਤਿ ਵਦਾਪੇਸਿ. ਦੁਕ੍ਖਂ ਅਲ੍ਲੀਨੋਤਿ ਇਮਂ ਪਞ੍ਚਕ੍ਖਨ੍ਧਦੁਕ੍ਖਂ ਤਣ੍ਹਾਦਿਟ੍ਠੀਹਿ ਅਲ੍ਲੀਨੋ. ਉਪਗਤੋ ਅਜ੍ਝੋਸਿਤੋਤਿਪਿ ਤਣ੍ਹਾਦਿਟ੍ਠਿਵਸੇਨੇਵ ਵੇਦਿਤਬ੍ਬੋ. ਦੁਕ੍ਖਂ ਏਤਂ ਮਮਾਤਿਆਦੀਸੁ ਪਞ੍ਚਕ੍ਖਨ੍ਧਦੁਕ੍ਖਂ ਤਣ੍ਹਾਮਾਨਦਿਟ੍ਠਿਵਸੇਨ ਸਮਨੁਪਸ੍ਸਤੀਤਿ ਅਤ੍ਥੋ. ਪਰਿਜਾਨੇਯ੍ਯਾਤਿ ਅਨਿਚ੍ਚਂ ਦੁਕ੍ਖਂ ਅਨਤ੍ਤਾਤਿ ਤੀਰਣਪਰਿਞ੍ਞਾਯ ਪਰਿਤੋ ਜਾਨੇਯ੍ਯ. ਪਰਿਕ੍ਖੇਪੇਤ੍ਵਾਤਿ ਖਯਂ ਵਯਂ ਅਨੁਪ੍ਪਾਦਂ ਉਪਨੇਤ੍ਵਾ.
੩੫੯. ਨਵਨ੍ਤਿ ਤਰੁਣਂ. ਅਕੁਕ੍ਕੁਕਜਾਤਨ੍ਤਿ ਪੁਪ੍ਫਗ੍ਗਹਣਕਾਲੇ ਅਨ੍ਤੋ ਅਙ੍ਗੁਟ੍ਠਪ੍ਪਮਾਣੋ ਏਕੋ ਘਨਦਣ੍ਡਕੋ ਨਿਬ੍ਬਤ੍ਤਤਿ, ਤੇਨ ਵਿਰਹਿਤਨ੍ਤਿ ਅਤ੍ਥੋ. ਰਿਤ੍ਤੋਤਿ ਸੁਞ੍ਞੋ ਅਨ੍ਤੋਸਾਰਵਿਰਹਿਤੋ. ਰਿਤ੍ਤਤ੍ਤਾਵ ਤੁਚ੍ਛੋ. ਅਪਰਦ੍ਧੋਤਿ ਪਰਾਜਿਤੋ. ਭਾਸਿਤਾ ਖੋ ਪਨ ਤੇਤਿ ਇਦਂ ਭਗਵਾ ਤਸ੍ਸ ਮੁਖਰਭਾਵਂ ਪਕਾਸੇਤ੍ਵਾ ਨਿਗ੍ਗਣ੍ਹਨ੍ਤੋ ਆਹ. ਸੋ ਕਿਰ ਪੁਬ੍ਬੇ ਪੂਰਣਾਦਯੋ ਛ ਸਤ੍ਥਾਰੋ ਉਪਸਙ੍ਕਮਿਤ੍ਵਾ ਪਞ੍ਹਂ ਪੁਚ੍ਛਤਿ. ਤੇ ਵਿਸ੍ਸਜ੍ਜੇਤੁਂ ਨ ਸਕ੍ਕੋਨ੍ਤਿ. ਅਥ ਨੇਸਂ ਪਰਿਸਮਜ੍ਝੇ ਮਹਨ੍ਤਂ ਵਿਪ੍ਪਕਾਰਂ ਆਰੋਪੇਤ੍ਵਾ ਉਟ੍ਠਾਯ ਜਯਂ ਪਵੇਦੇਨ੍ਤੋ ਗਚ੍ਛਤਿ. ਸੋ ਸਮ੍ਮਾਸਮ੍ਬੁਦ੍ਧਮ੍ਪਿ ਤਥੇਵ ਵਿਹੇਠੇਸ੍ਸਾਮੀਤਿ ਸਞ੍ਞਾਯ ਉਪਸਙ੍ਕਮਿਤ੍ਵਾ –
‘‘ਅਮ੍ਭੋ ਕੋ ਨਾਮ ਯਂ ਰੁਕ੍ਖੋ, ਸਿਨ੍ਨਪਤ੍ਤੋ ਸਕਣ੍ਟਕੋ;
ਯਤ੍ਥ ਏਕਪ੍ਪਹਾਰੇਨ, ਉਤ੍ਤਮਙ੍ਗਂ ਵਿਭਿਜ੍ਜਿਤ’’ਨ੍ਤਿ.
ਅਯਂ ਖਦਿਰਂ ਆਹਚ੍ਚ ਅਸਾਰਕਰੁਕ੍ਖਪਰਿਚਿਤੋ ਮੁਦੁਤੁਣ੍ਡਸਕੁਣੋ ਵਿਯ ਸਬ੍ਬਞ੍ਞੁਤਞ੍ਞਾਣਸਾਰਂ ਆਹਚ੍ਚ ਞਾਣਤੁਣ੍ਡਭੇਦਂ ਪਤ੍ਤੋ ਸਬ੍ਬਞ੍ਞੁਤਞ੍ਞਾਣਸ੍ਸ ਥਦ੍ਧਭਾਵਂ ਅਞ੍ਞਾਸਿ. ਤਦਸ੍ਸ ਪਰਿਸਮਜ੍ਝੇ ਪਕਾਸੇਨ੍ਤੋ ਭਾਸਿਤਾ ਖੋ ਪਨ ਤੇਤਿਆਦਿਮਾਹ. ਨਤ੍ਥਿ ਏਤਰਹੀਤਿ ਉਪਾਦਿਨ੍ਨਕਸਰੀਰੇ ਸੇਦੋ ਨਾਮ ਨਤ੍ਥੀਤਿ ਨ ਵਤ੍ਤਬ੍ਬਂ, ਏਤਰਹਿ ਪਨ ਨਤ੍ਥੀਤਿ ਵਦਤਿ. ਸੁਵਣ੍ਣਵਣ੍ਣਂ ਕਾਯਂ ਵਿਵਰੀਤਿ ਨ ਸਬ੍ਬਂ ਕਾਯਂ ਵਿਵਰਿ. ਬੁਦ੍ਧਾ ਨਾਮ ਗਣ੍ਠਿਕਂ ਪਟਿਮੁਞ੍ਚਿਤ੍ਵਾ ਪਟਿਚ੍ਛਨ੍ਨਸਰੀਰਾ ਪਰਿਸਤਿ ਧਮ੍ਮਂ ਦੇਸੇਨ੍ਤਿ. ਅਥ ਭਗਵਾ ਗਲਵਾਟਕਸਮ੍ਮੁਖਟ੍ਠਾਨੇ ਚੀਵਰਂ ਗਹੇਤ੍ਵਾ ਚਤੁਰਙ੍ਗੁਲਮਤ੍ਤਂ ਓਤਾਰੇਸਿ. ਓਤਾਰਿਤਮਤ੍ਤੇ ਪਨ ਤਸ੍ਮਿਂ ਸੁਵਣ੍ਣਵਣ੍ਣਾ ਰਸ੍ਮਿਯੋ ਪੁਞ੍ਜਪੁਞ੍ਜਾ ਹੁਤ੍ਵਾ ਸੁਵਣ੍ਣਘਟਤੋ ਰਤ੍ਤਸੁਵਣ੍ਣਰਸਧਾਰਾ ਵਿਯ, ਰਤ੍ਤਵਣ੍ਣਵਲਾਹਕਤੋ ਵਿਜ੍ਜੁਲਤਾ ਵਿਯ ਚ ਨਿਕ੍ਖਮਿਤ੍ਵਾ ਸੁਵਣ੍ਣਮੁਰਜਸਦਿਸਂ ਮਹਾਖਨ੍ਧਂ ਉਤ੍ਤਮਸਿਰਂ ਪਦਕ੍ਖਿਣਂ ਕੁਰੁਮਾਨਾ ਆਕਾਸੇ ਪਕ੍ਖਨ੍ਦਿਂਸੁ. ਕਸ੍ਮਾ ਪਨ ਭਗਵਾ ਏਵਮਕਾਸੀਤਿ? ਮਹਾਜਨਸ੍ਸ ਕਙ੍ਖਾਵਿਨੋਦਨਤ੍ਥਂ. ਮਹਾਜਨੋ ਹਿ ਸਮਣੋ ਗੋਤਮੋ ਮਯ੍ਹਂ ਸੇਦੋ ਨਤ੍ਥੀਤਿ ਵਦਤਿ, ਸਚ੍ਚਕਸ੍ਸ ਤਾਵ ਨਿਗਣ੍ਠਪੁਤ੍ਤਸ੍ਸ ਯਨ੍ਤਾਰੁਲ਼੍ਹਸ੍ਸ ਵਿਯ ਸੇਦਾ ਪਗ੍ਘਰਨ੍ਤਿ. ਸਮਣੋ ਪਨ ਗੋਤਮੋ ਘਨਦੁਪਟ੍ਟਚੀਵਰਂ ਪਾਰੁਪਿਤ੍ਵਾ ਨਿਸਿਨ੍ਨੋ, ਅਨ੍ਤੋ ਸੇਦਸ੍ਸ ਅਤ੍ਥਿਤਾ ਵਾ ਨਤ੍ਥਿਤਾ ਵਾ ਕਥਂ ਸਕ੍ਕਾ ਞਾਤੁਨ੍ਤਿ ਕਙ੍ਖਂ ਕਰੇਯ੍ਯ, ਤਸ੍ਸ ਕਙ੍ਖਾਵਿਨੋਦਨਤ੍ਥਂ ਏਵਮਕਾਸਿ. ਮਙ੍ਕੁਭੂਤੋਤਿ ਨਿਤ੍ਤੇਜਭੂਤੋ. ਪਤ੍ਤਕ੍ਖਨ੍ਧੋਤਿ ਪਤਿਤਕ੍ਖਨ੍ਧੋ. ਅਪ੍ਪਟਿਭਾਨੋਤਿ ਉਤ੍ਤਰਿ ਅਪ੍ਪਸ੍ਸਨ੍ਤੋ. ਨਿਸੀਦੀਤਿ ਪਾਦਙ੍ਗੁਟ੍ਠਕੇਨ ਭੂਮਿਂ ਕਸਮਾਨੋ ਨਿਸੀਦਿ.
੩੬੦. ਦੁਮ੍ਮੁਖੋਤਿ ਨ ਵਿਰੂਪਮੁਖੋ, ਅਭਿਰੂਪੋ ਹਿ ਸੋ ਪਾਸਾਦਿਕੋ. ਨਾਮਂ ਪਨਸ੍ਸ ਏਤਂ. ਅਭਬ੍ਬੋ ਤਂ ਪੋਕ੍ਖਰਣਿਂ ਪੁਨ ਓਤਰਿਤੁਨ੍ਤਿ ਸਬ੍ਬੇਸਂ ਅਲ਼ਾਨਂ ਭਗ੍ਗਤ੍ਤਾ ਪਚ੍ਛਿਨ੍ਨਗਮਨੋ ਓਤਰਿਤੁਂ ਅਭਬ੍ਬੋ, ਤਤ੍ਥੇਵ ਕਾਕਕੁਲਲਾਦੀਨਂ ਭਤ੍ਤਂ ਹੋਤੀਤਿ ਦਸ੍ਸੇਤਿ. ਵਿਸੂਕਾਯਿਕਾਨੀਤਿ ਦਿਟ੍ਠਿਵਿਸੂਕਾਨਿ. ਵਿਸੇਵਿਤਾਨੀਤਿ ਦਿਟ੍ਠਿਸਞ੍ਚਰਿਤਾਨਿ. ਵਿਪ੍ਫਨ੍ਦਿਤਾਨੀਤਿ ਦਿਟ੍ਠਿਵਿਪ੍ਫਨ੍ਦਿਤਾਨਿ. ਯਦਿਦਂ ਵਾਦਾਧਿਪ੍ਪਾਯੋਤਿ ਏਤ੍ਥ ਯਦਿਦਨ੍ਤਿ ਨਿਪਾਤਮਤ੍ਤਂ; ਵਾਦਾਧਿਪ੍ਪਾਯੋ ਹੁਤ੍ਵਾ ਵਾਦਂ ਆਰੋਪੇਸ੍ਸਾਮੀਤਿ ਅਜ੍ਝਾਸਯੇਨ ਉਪਸਙ੍ਕਮਿਤੁਂ ਅਭਬ੍ਬੋ; ਧਮ੍ਮਸ੍ਸਵਨਾਯ ਪਨ ਉਪਸਙ੍ਕਮੇਯ੍ਯਾਤਿ ਦਸ੍ਸੇਤਿ. ਦੁਮ੍ਮੁਖਂ ਲਿਚ੍ਛਵਿਪੁਤ੍ਤਂ ਏਤਦਵੋਚਾਤਿ ਕਸ੍ਮਾ ਅਵੋਚ? ਦੁਮ੍ਮੁਖਸ੍ਸ ਕਿਰਸ੍ਸ ਉਪਮਾਹਰਣਕਾਲੇ ਸੇਸ ਲਿਚ੍ਛਵਿਕੁਮਾਰਾਪਿ ਚਿਨ੍ਤੇਸੁਂ – ‘‘ਇਮਿਨਾ ਨਿਗਣ੍ਠੇਨ ਅਮ੍ਹਾਕਂ ਸਿਪ੍ਪੁਗ੍ਗਹਣਟ੍ਠਾਨੇ ਚਿਰਂ ਅਵਮਾਨੋ ਕਤੋ, ਅਯਂ ਦਾਨਿ ਅਮਿਤ੍ਤਸ੍ਸ ਪਿਟ੍ਠਿਂ ਪਸ੍ਸਿਤੁਂ ਕਾਲੋ. ਮਯਮ੍ਪਿ ਏਕੇਕਂ ਉਪਮਂ ਆਹਰਿਤ੍ਵਾ ਪਾਣਿਪ੍ਪਹਾਰੇਨ ਪਤਿਤਂ ਮੁਗ੍ਗਰੇਨ ਪੋਥੇਨ੍ਤੋ ਵਿਯ ਤਥਾ ਨਂ ਕਰਿਸ੍ਸਾਮ, ਯਥਾ ਨ ਪੁਨ ਪਰਿਸਮਜ੍ਝੇ ਸੀਸਂ ਉਕ੍ਖਿਪਿਤੁਂ ਸਕ੍ਖਿਸ੍ਸਤੀ’’ਤਿ, ਤੇ ਓਪਮ੍ਮਾਨਿ ਕਰਿਤ੍ਵਾ ਦੁਮ੍ਮੁਖਸ੍ਸ ਕਥਾਪਰਿਯੋਸਾਨਂ ਆਗਮਯਮਾਨਾ ਨਿਸੀਦਿਂਸੁ. ਸਚ੍ਚਕੋ ਤੇਸਂ ਅਧਿਪ੍ਪਾਯਂ ਞਤ੍ਵਾ, ਇਮੇ ਸਬ੍ਬੇਵ ਗੀਵਂ ਉਕ੍ਖਿਪਿਤ੍ਵਾ ਓਟ੍ਠੇਹਿ ਚਲਮਾਨੇਹਿ ਠਿਤਾ; ਸਚੇ ਪਚ੍ਚੇਕਾ ਉਪਮਾ ਹਰਿਤੁਂ ਲਭਿਸ੍ਸਨ੍ਤਿ, ਪੁਨ ਮਯਾ ਪਰਿਸਮਜ੍ਝੇ ਸੀਸਂ ਉਕ੍ਖਿਪਿਤੁਂ ਨ ਸਕ੍ਕਾ ਭਵਿਸ੍ਸਤਿ, ਹਨ੍ਦਾਹਂ ਦੁਮ੍ਮੁਖਂ ਅਪਸਾਦੇਤ੍ਵਾ ਯਥਾ ਅਞ੍ਞਸ੍ਸ ਓਕਾਸੋ ਨ ਹੋਤਿ, ਏਵਂ ਕਥਾਵਾਰਂ ਪਚ੍ਛਿਨ੍ਦਿਤ੍ਵਾ ਸਮਣਂ ਗੋਤਮਂ ਪਞ੍ਹਂ ਪੁਚ੍ਛਿਸ੍ਸਾਮੀਤਿ ਤਸ੍ਮਾ ਏਤਦਵੋਚ. ਤਤ੍ਥ ਆਗਮੇਹੀਤਿ ਤਿਟ੍ਠ, ਮਾ ਪੁਨ ਭਣਾਹੀਤਿ ਅਤ੍ਥੋ.
੩੬੧. ਤਿਟ੍ਠਤੇਸਾ, ਭੋ ਗੋਤਮਾਤਿ, ਭੋ ਗੋਤਮ, ਏਸਾ ਅਮ੍ਹਾਕਞ੍ਚੇਵ ਅਞ੍ਞੇਸਞ੍ਚ ਪੁਥੁਸਮਣਬ੍ਰਾਹ੍ਮਣਾਨਂ ਵਾਚਾ ਤਿਟ੍ਠਤੁ. ਵਿਲਾਪਂ ਵਿਲਪਿਤਂ ਮਞ੍ਞੇਤਿ ਏਤਞ੍ਹਿ ਵਚਨਂ ਵਿਲਪਿਤਂ ਵਿਯ ਹੋਤਿ, ਵਿਪ੍ਪਲਪਿਤਮਤ੍ਤਂ ਹੋਤੀਤਿ ਅਤ੍ਥੋ. ਅਥ ਵਾ ਤਿਟ੍ਠਤੇਸਾਤਿ ਏਤ੍ਥ ਕਥਾਤਿ ਆਹਰਿਤ੍ਵਾ ਵਤ੍ਤਬ੍ਬਾ. ਵਾਚਾਵਿਲਾਪਂ ਵਿਲਪਿਤਂ ਮਞ੍ਞੇਤਿ ਏਤ੍ਥ ਪਨਿਦਂ ਵਾਚਾਨਿਚ੍ਛਾਰਣਂ ਵਿਲਪਿਤਮਤ੍ਤਂ ਮਞ੍ਞੇ ਹੋਤੀਤਿ ਅਤ੍ਥੋ.
ਇਦਾਨਿ ਪਞ੍ਹਂ ਪੁਚ੍ਛਨ੍ਤੋ ਕਿਤ੍ਤਾਵਤਾਤਿਆਦਿਮਾਹ. ਤਤ੍ਥ ਵੇਸਾਰਜ੍ਜਪਤ੍ਤੋਤਿ ਞਾਣਪਤ੍ਤੋ. ਅਪਰਪ੍ਪਚ੍ਚਯੋਤਿ ਅਪਰਪ੍ਪਤ੍ਤਿਯੋ. ਅਥਸ੍ਸ ਭਗਵਾ ਪਞ੍ਹਂ ਵਿਸ੍ਸਜ੍ਜੇਨ੍ਤੋ ਇਧ, ਅਗ੍ਗਿਵੇਸ੍ਸਨਾਤਿਆਦਿਮਾਹ, ਤਂ ਉਤ੍ਤਾਨਤ੍ਥਮੇਵ. ਯਸ੍ਮਾ ਪਨੇਤ੍ਥ ਪਸ੍ਸਤੀਤਿ ਵੁਤ੍ਤਤ੍ਤਾ ਸੇਕ੍ਖਭੂਮਿ ਦਸ੍ਸਿਤਾ. ਤਸ੍ਮਾ ਉਤ੍ਤਰਿ ਅਸੇਕ੍ਖਭੂਮਿਂ ਪੁਚ੍ਛਨ੍ਤੋ ਦੁਤਿਯਂ ਪਞ੍ਹਂ ਪੁਚ੍ਛਿ, ਤਮ੍ਪਿਸ੍ਸ ਭਗਵਾ ਬ੍ਯਾਕਾਸਿ. ਤਤ੍ਥ ਦਸ੍ਸਨਾਨੁਤ੍ਤਰਿਯੇਨਾਤਿਆਦੀਸੁ ਦਸ੍ਸਨਾਨੁਤ੍ਤਰਿਯਨ੍ਤਿ ਲੋਕਿਯਲੋਕੁਤ੍ਤਰਾ ਪਞ੍ਞਾ. ਪਟਿਪਦਾਨੁਤ੍ਤਰਿਯਨ੍ਤਿ ਲੋਕਿਯਲੋਕੁਤ੍ਤਰਾ ਪਟਿਪਦਾ. ਵਿਮੁਤ੍ਤਾਨੁਤ੍ਤਰਿਯਨ੍ਤਿ ਲੋਕਿਯਲੋਕੁਤ੍ਤਰਾ ਵਿਮੁਤ੍ਤਿ. ਸੁਦ੍ਧਲੋਕੁਤ੍ਤਰਮੇਵ ਵਾ ਗਹੇਤ੍ਵਾ ਦਸ੍ਸਨਾਨੁਤ੍ਤਰਿਯਨ੍ਤਿ ਅਰਹਤ੍ਤਮਗ੍ਗਸਮ੍ਮਾਦਿਟ੍ਠਿ. ਪਟਿਪਦਾਨੁਤ੍ਤਰਿਯਨ੍ਤਿ ਸੇਸਾਨਿ ਮਗ੍ਗਙ੍ਗਾਨਿ. ਵਿਮੁਤ੍ਤਾਨੁਤ੍ਤਰਿਯਨ੍ਤਿ ਅਗ੍ਗਫਲਵਿਮੁਤ੍ਤਿ. ਖੀਣਾਸਵਸ੍ਸ ਵਾ ਨਿਬ੍ਬਾਨਦਸ੍ਸਨਂ ਦਸ੍ਸਨਾਨੁਤ੍ਤਰਿਯਂ ਨਾਮ. ਮਗ੍ਗਙ੍ਗਾਨਿ ਪਟਿਪਦਾਨੁਤ੍ਤਰਿਯਂ. ਅਗ੍ਗਫਲਂ ਵਿਮੁਤ੍ਤਾਨੁਤ੍ਤਰਿਯਨ੍ਤਿ ਵੇਦਿਤਬ੍ਬਂ. ਬੁਦ੍ਧੋ ਸੋ ਭਗਵਾਤਿ ਸੋ ਭਗਵਾ ਸਯਮ੍ਪਿ ਚਤ੍ਤਾਰਿ ਸਚ੍ਚਾਨਿ ਬੁਦ੍ਧੋ. ਬੋਧਾਯਾਤਿ ਪਰੇਸਮ੍ਪਿ ਚਤੁਸਚ੍ਚਬੋਧਾਯ ਧਮ੍ਮਂ ਦੇਸੇਤਿ. ਦਨ੍ਤੋਤਿਆਦੀਸੁ ਦਨ੍ਤੋਤਿ ਨਿਬ੍ਬਿਸੇਵਨੋ. ਦਮਥਾਯਾਤਿ ਨਿਬ੍ਬਿਸੇਵਨਤ੍ਥਾਯ. ਸਨ੍ਤੋਤਿ ਸਬ੍ਬਕਿਲੇਸਵੂਪਸਮੇਨ ਸਨ੍ਤੋ. ਸਮਥਾਯਾਤਿ ਕਿਲੇਸਵੂਪਸਮਾਯ. ਤਿਣ੍ਣੋਤਿ ਚਤੁਰੋਘਤਿਣ੍ਣੋ. ਤਰਣਾਯਾਤਿ ਚਤੁਰੋਘਤਰਣਾਯ. ਪਰਿਨਿਬ੍ਬੁਤੋਤਿ ਕਿਲੇਸਪਰਿਨਿਬ੍ਬਾਨੇਨ ਪਰਿਨਿਬ੍ਬੁਤੋ. ਪਰਿਨਿਬ੍ਬਾਨਾਯਾਤਿ ਕਿਲੇਸਪਰਿਨਿਬ੍ਬਾਨਤ੍ਥਾਯ.
੩੬੨. ਧਂਸੀਤਿ ਗੁਣਧਂਸਕਾ. ਪਗਬ੍ਬਾਤਿ ਵਾਚਾਪਾਗਬ੍ਬਿਯੇਨ ਸਮਨ੍ਨਾਗਤਾ. ਆਸਾਦੇਤਬ੍ਬਨ੍ਤਿ ਘਟ੍ਟੇਤਬ੍ਬਂ. ਆਸਜ੍ਜਾਤਿ ਘਟ੍ਟੇਤ੍ਵਾ. ਨਤ੍ਵੇਵ ਭਵਨ੍ਤਂ ਗੋਤਮਨ੍ਤਿ ਭਵਨ੍ਤਂ ਗੋਤਮਂ ਆਸਜ੍ਜ ਕਸ੍ਸਚਿ ਅਤ੍ਤਨੋ ਵਾਦਂ ਅਨੁਪਹਤਂ ਸਕਲਂ ਆਦਾਯ ਪਕ੍ਕਮਿਤੁਂ ਥਾਮੋ ਨਤ੍ਥੀਤਿ ਦਸ੍ਸੇਤਿ. ਨ ਹਿ ਭਗਵਾ ਹਤ੍ਥਿਆਦਯੋ ਵਿਯ ਕਸ੍ਸਚਿ ਜੀਵਿਤਨ੍ਤਰਾਯਂ ਕਰੋਤਿ. ਅਯਂ ਪਨ ਨਿਗਣ੍ਠੋ ਇਮਾ ਤਿਸ੍ਸੋ ਉਪਮਾ ਨ ਭਗਵਤੋ ਉਕ੍ਕਂਸਨਤ੍ਥਂ ਆਹਰਿ, ਅਤ੍ਤੁਕ੍ਕਂਸਨਤ੍ਥਮੇਵ ਆਹਰਿ. ਯਥਾ ਹਿ ਰਾਜਾ ਕਞ੍ਚਿ ਪਚ੍ਚਤ੍ਥਿਕਂ ਘਾਤੇਤ੍ਵਾ ਏਵਂ ਨਾਮ ਸੂਰੋ ਏਵਂ ਥਾਮਸਮ੍ਪਨ੍ਨੋ ਪੁਰਿਸੋ ਭਵਿਸ੍ਸਤੀਤਿ ਪਚ੍ਚਤ੍ਥਿਕਂ ਥੋਮੇਨ੍ਤੋਪਿ ਅਤ੍ਤਾਨਮੇਵ ਥੋਮੇਤਿ. ਏਵਮੇਵ ਸੋਪਿ ਸਿਯਾ ਹਿ, ਭੋ ਗੋਤਮ, ਹਤ੍ਥਿਂ ਪਭਿਨ੍ਨਨ੍ਤਿਆਦੀਹਿ ਭਗਵਨ੍ਤਂ ਉਕ੍ਕਂਸੇਨ੍ਤੋਪਿ ਮਯਮੇਵ ਸੂਰਾ ਮਯਂ ਪਣ੍ਡਿਤਾ ਮਯਂ ਬਹੁਸ੍ਸੁਤਾਯੇਵ ਏਵਂ ਪਭਿਨ੍ਨਹਤ੍ਥਿਂ ਵਿਯ, ਜਲਿਤਅਗ੍ਗਿਕ੍ਖਨ੍ਧਂ ਵਿਯ, ਫਣਕਤਆਸੀਵਿਸਂ ਵਿਯ ਚ ਵਾਦਤ੍ਥਿਕਾ ਸਮ੍ਮਾਸਮ੍ਬੁਦ੍ਧਂ ਉਪਸਙ੍ਕਮਿਮ੍ਹਾਤਿ ਅਤ੍ਤਾਨਂਯੇਵ ਉਕ੍ਕਂਸੇਤਿ. ਏਵਂ ਅਤ੍ਤਾਨਂ ਉਕ੍ਕਂਸੇਤ੍ਵਾ ਭਗਵਨ੍ਤਂ ਨਿਮਨ੍ਤਯਮਾਨੋ ਅਧਿਵਾਸੇਤੁ ਮੇਤਿਆਦਿਮਾਹ. ਤਤ੍ਥ ਅਧਿਵਾਸੇਤੂਤਿ ਸਮ੍ਪਟਿਚ੍ਛਤੁ. ਸ੍ਵਾਤਨਾਯਾਤਿ ਯਂ ਮੇ ਤੁਮ੍ਹੇਸੁ ਕਾਰਂ ਕਰੋਤੋ ਸ੍ਵੇ ਭਵਿਸ੍ਸਤਿ ਪੁਞ੍ਞਞ੍ਚ ਪੀਤਿਪਾਮੋਜ੍ਜਞ੍ਚ, ਤਦਤ੍ਥਾਯ. ਅਧਿਵਾਸੇਸਿ ਭਗਵਾ ਤੁਣ੍ਹੀਭਾਵੇਨਾਤਿ ਭਗਵਾ ਕਾਯਙ੍ਗਂ ਵਾ ਵਾਚਙ੍ਗਂ ਵਾ ਅਚੋਪੇਤ੍ਵਾ ਅਬ੍ਭਨ੍ਤਰੇਯੇਵ ਖਨ੍ਤਿਂ ਧਾਰੇਨ੍ਤੋ ਤੁਣ੍ਹੀਭਾਵੇਨ ਅਧਿਵਾਸੇਸਿ. ਸਚ੍ਚਕਸ੍ਸ ਅਨੁਗ੍ਗਹਕਰਣਤ੍ਥਂ ਮਨਸਾਵ ਸਮ੍ਪਟਿਚ੍ਛੀਤਿ ਵੁਤ੍ਤਂ ਹੋਤਿ.
੩੬੩. ਯਮਸ੍ਸ ਪਤਿਰੂਪਂ ਮਞ੍ਞੇਯ੍ਯਾਥਾਤਿ ਤੇ ਕਿਰ ਲਿਚ੍ਛਵੀ ਤਸ੍ਸ ਪਞ੍ਚਥਾਲਿਪਾਕਸਤਾਨਿ ਨਿਚ੍ਚਭਤ੍ਤਂ ਆਹਰਨ੍ਤਿ. ਤਦੇਵ ਸਨ੍ਧਾਯ ਏਸ ਸ੍ਵੇ ਤੁਮ੍ਹੇ ਯਂ ਅਸ੍ਸ ਸਮਣਸ੍ਸ ਗੋਤਮਸ੍ਸ ਪਤਿਰੂਪਂ ਕਪ੍ਪਿਯਨ੍ਤਿ ਮਞ੍ਞੇਯ੍ਯਾਥ, ਤਂ ਆਹਰੇਯ੍ਯਾਥ; ਸਮਣਸ੍ਸ ਹਿ ਗੋਤਮਸ੍ਸ ਤੁਮ੍ਹੇ ਪਰਿਚਾਰਕਾ ਕਪ੍ਪਿਯਾਕਪ੍ਪਿਯਂ ਯੁਤ੍ਤਾਯੁਤ੍ਤਂ ਜਾਨਾਥਾਤਿ ਵਦਤਿ. ਭਤ੍ਤਾਭਿਹਾਰਂ ਅਭਿਹਰਿਂਸੂਤਿ ਅਭਿਹਰਿਤਬ੍ਬਂ ਭਤ੍ਤਂ ਅਭਿਹਰਿਂਸੁ. ਪਣੀਤੇਨਾਤਿ ਉਤ੍ਤਮੇਨ. ਸਹਤ੍ਥਾਤਿ ਸਹਤ੍ਥੇਨ. ਸਨ੍ਤਪ੍ਪੇਤ੍ਵਾਤਿ ਸੁਟ੍ਠੁ ਤਪ੍ਪੇਤ੍ਵਾ, ਪਰਿਪੁਣ੍ਣਂ ਸੁਹਿਤਂ ਯਾਵਦਤ੍ਥਂ ਕਤ੍ਵਾ. ਸਮ੍ਪਵਾਰੇਤ੍ਵਾਤਿ ਸੁਟ੍ਠੁ ਪਵਾਰੇਤ੍ਵਾ, ਅਲਂ ਅਲਨ੍ਤਿ ਹਤ੍ਥਸਞ੍ਞਾਯ ਪਟਿਕ੍ਖਿਪਾਪੇਤ੍ਵਾ. ਭੁਤ੍ਤਾਵਿਨ੍ਤਿ ਭੁਤ੍ਤਵਨ੍ਤਂ. ਓਨੀਤਪਤ੍ਤਪਾਣਿਨ੍ਤਿ ਪਤ੍ਤਤੋ ਓਨੀਤਪਾਣਿਂ, ਅਪਨੀਤਹਤ੍ਥਨ੍ਤਿ ਵੁਤ੍ਤਂ ਹੋਤਿ. ‘‘ਓਨਿਤ੍ਤਪਤ੍ਤਪਾਣਿ’’ਨ੍ਤਿਪਿ ਪਾਠੋ, ਤਸ੍ਸਤ੍ਥੋ, ਓਨਿਤ੍ਤਂ ਨਾਨਾਭੂਤਂ ਪਤ੍ਤਂ ਪਾਣਿਤੋ ਅਸ੍ਸਾਤਿ ਓਨਿਤ੍ਤਪਤ੍ਤਪਾਣੀ. ਤਂ ਓਨਿਤ੍ਤਪਤ੍ਤਪਾਣਿਂ, ਹਤ੍ਥੇ ਚ ਪਤ੍ਤਞ੍ਚ ਧੋਵਿਤ੍ਵਾ ਏਕਮਨ੍ਤੇ ਪਤ੍ਤਂ ਨਿਕ੍ਖਿਪਿਤ੍ਵਾ ਨਿਸਿਨ੍ਨਨ੍ਤਿ ਅਤ੍ਥੋ. ਏਕਮਨ੍ਤਂ ਨਿਸੀਦੀਤਿ ਭਗਵਨ੍ਤਂ ਏਵਂਭੂਤਂ ਞਤ੍ਵਾ ਏਕਸ੍ਮਿਂ ਓਕਾਸੇ ਨਿਸੀਦੀਤਿ ਅਤ੍ਥੋ. ਪੁਞ੍ਞਞ੍ਚਾਤਿ ਯਂ ਇਮਸ੍ਮਿਂ ਦਾਨੇ ਪੁਞ੍ਞਂ, ਆਯਤਿਂ ਵਿਪਾਕਕ੍ਖਨ੍ਧਾਤਿ ਅਤ੍ਥੋ. ਪੁਞ੍ਞਮਹੀਤਿ ਵਿਪਾਕਕ੍ਖਨ੍ਧਾਨਂਯੇਵ ਪਰਿਵਾਰੋ. ਤਂ ਦਾਯਕਾਨਂ ਸੁਖਾਯ ਹੋਤੂਤਿ ਤਂ ਇਮੇਸਂ ਲਿਚ੍ਛਵੀਨਂ ਸੁਖਤ੍ਥਾਯ ਹੋਤੁ. ਇਦਂ ਕਿਰ ਸੋ ਅਹਂ ਪਬ੍ਬਜਿਤੋ ਨਾਮ, ਪਬ੍ਬਜਿਤੇਨ ਚ ਨ ਯੁਤ੍ਤਂ ਅਤ੍ਤਨੋ ਦਾਨਂ ਨਿਯ੍ਯਾਤੇਤੁਨ੍ਤਿ ਤੇਸਂ ਨਿਯ੍ਯਾਤੇਨ੍ਤੋ ਏਵਮਾਹ. ਅਥ ਭਗਵਾ ਯਸ੍ਮਾ ਲਿਚ੍ਛਵੀਹਿ ਸਚ੍ਚਕਸ੍ਸ ਦਿਨ੍ਨਂ, ਨ ਭਗਵਤੋ. ਸਚ੍ਚਕੇਨ ਪਨ ਭਗਵਤੋ ਦਿਨ੍ਨਂ, ਤਸ੍ਮਾ ਤਮਤ੍ਥਂ ਦੀਪੇਨ੍ਤੋ ਯਂ ਖੋ, ਅਗ੍ਗਿਵੇਸ੍ਸਨਾਤਿਆਦਿਮਾਹ. ਇਤਿ ਭਗਵਾ ਨਿਗਣ੍ਠਸ੍ਸ ਮਤੇਨ ਵਿਨਾਯੇਵ ਅਤ੍ਤਨੋ ਦਿਨ੍ਨਂ ਦਕ੍ਖਿਣਂ ਨਿਗਣ੍ਠਸ੍ਸ ਨਿਯ੍ਯਾਤੇਸਿ, ਸਾ ਚਸ੍ਸ ਅਨਾਗਤੇ ਵਾਸਨਾ ਭਵਿਸ੍ਸਤੀਤਿ.
ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ
ਚੂਲ਼ਸਚ੍ਚਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.