੪. ਚੂਲ਼ਗੋਪਾਲਕਸੁਤ੍ਤਵਣ੍ਣਨਾ

੩੫੦. ਏਵਂ ਮੇ ਸੁਤਨ੍ਤਿ ਚੂਲ਼ਗੋਪਾਲਕਸੁਤ੍ਤਂ. ਤਤ੍ਥ ਉਕ੍ਕਚੇਲਾਯਨ੍ਤਿ ਏਵਂਨਾਮਕੇ ਨਗਰੇ. ਤਸ੍ਮਿਂ ਕਿਰ ਮਾਪਿਯਮਾਨੇ ਰਤ੍ਤਿਂ ਗਙ੍ਗਾਸੋਤਤੋ ਮਚ੍ਛੋ ਥਲਂ ਪਤ੍ਤੋ. ਮਨੁਸ੍ਸਾ ਚੇਲਾਨਿ ਤੇਲਪਾਤਿਯਂ ਤੇਮੇਤ੍ਵਾ ਉਕ੍ਕਾ ਕਤ੍ਵਾ ਮਚ੍ਛਂ ਗਣ੍ਹਿਂਸੁ. ਨਗਰੇ ਨਿਟ੍ਠਿਤੇ ਤਸ੍ਸ ਨਾਮਂ ਕਰੋਨ੍ਤੇ ਅਮ੍ਹੇਹਿ ਨਗਰਟ੍ਠਾਨਸ੍ਸ ਗਹਿਤਦਿਵਸੇ ਚੇਲੁਕ੍ਕਾਹਿ ਮਚ੍ਛੋ ਗਹਿਤੋਤਿ ਉਕ੍ਕਚੇਲਾ-ਤ੍ਵੇਵਸ੍ਸ ਨਾਮਂ ਅਕਂਸੁ. ਭਿਕ੍ਖੂ ਆਮਨ੍ਤੇਸੀਤਿ ਯਸ੍ਮਿਂ ਠਾਨੇ ਨਿਸਿਨ੍ਨਸ੍ਸ ਸਬ੍ਬਾ ਗਙ੍ਗਾ ਪਾਕਟਾ ਹੁਤ੍ਵਾ ਪਞ੍ਞਾਯਤਿ, ਤਾਦਿਸੇ ਵਾਲਿਕੁਸ੍ਸਦੇ ਗਙ੍ਗਾਤਿਤ੍ਥੇ ਸਾਯਨ੍ਹਸਮਯੇ ਮਹਾਭਿਕ੍ਖੁਸਙ੍ਘਪਰਿਵੁਤੋ ਨਿਸੀਦਿਤ੍ਵਾ ਮਹਾਗਙ੍ਗਂ ਪਰਿਪੁਣ੍ਣਂ ਸਨ੍ਦਮਾਨਂ ਓਲੋਕੇਨ੍ਤੋ, – ‘‘ਅਤ੍ਥਿ ਨੁ ਖੋ ਇਮਂ ਗਙ੍ਗਂ ਨਿਸ੍ਸਾਯ ਕੋਚਿ ਪੁਬ੍ਬੇ ਵਡ੍ਢਿਪਰਿਹਾਨਿਂ ਪਤ੍ਤੋ’’ਤਿ ਆਵਜ੍ਜਿਤ੍ਵਾ, ਪੁਬ੍ਬੇ ਏਕਂ ਬਾਲਗੋਪਾਲਕਂ ਨਿਸ੍ਸਾਯ ਅਨੇਕਸਤਸਹਸ੍ਸਾ ਗੋਗਣਾ ਇਮਿਸ੍ਸਾ ਗਙ੍ਗਾਯ ਆਵਟ੍ਟੇ ਪਤਿਤ੍ਵਾ ਸਮੁਦ੍ਦਮੇਵ ਪਵਿਟ੍ਠਾ, ਅਪਰਂ ਪਨ ਪਣ੍ਡਿਤਗੋਪਾਲਕਂ ਨਿਸ੍ਸਾਯ ਅਨੇਕਸਤਸਹਸ੍ਸਗੋਗਣਸ੍ਸ ਸੋਤ੍ਥਿ ਜਾਤਾ ਵਡ੍ਢਿ ਜਾਤਾ ਆਰੋਗ੍ਯਂ ਜਾਤਨ੍ਤਿ ਅਦ੍ਦਸ. ਦਿਸ੍ਵਾ ਇਮਂ ਕਾਰਣਂ ਨਿਸ੍ਸਾਯ ਭਿਕ੍ਖੂਨਂ ਧਮ੍ਮਂ ਦੇਸੇਸ੍ਸਾਮੀਤਿ ਚਿਨ੍ਤੇਤ੍ਵਾ ਭਿਕ੍ਖੂ ਆਮਨ੍ਤੇਸਿ.

ਮਾਗਧਕੋਤਿ ਮਗਧਰਟ੍ਠਵਾਸੀ. ਦੁਪ੍ਪਞ੍ਞਜਾਤਿਕੋਤਿ ਨਿਪ੍ਪਞ੍ਞਸਭਾਵੋ ਦਨ੍ਧੋ ਮਹਾਜਲ਼ੋ. ਅਸਮਵੇਕ੍ਖਿਤ੍ਵਾਤਿ ਅਸਲ੍ਲਕ੍ਖੇਤ੍ਵਾ ਅਨੁਪਧਾਰੇਤ੍ਵਾ. ਪਤਾਰੇਸੀਤਿ ਤਾਰੇਤੁਂ ਆਰਭਿ. ਉਤ੍ਤਰਂ ਤੀਰਂ ਸੁਵਿਦੇਹਾਨਨ੍ਤਿ ਗਙ੍ਗਾਯ ਓਰਿਮੇ ਤੀਰੇ ਮਗਧਰਟ੍ਠਂ, ਪਾਰਿਮੇ ਤੀਰੇ ਵਿਦੇਹਰਟ੍ਠਂ, ਗਾਵੋ ਮਗਧਰਟ੍ਠਤੋ ਵਿਦੇਹਰਟ੍ਠਂ ਨੇਤ੍ਵਾ ਰਕ੍ਖਿਸ੍ਸਾਮੀਤਿ ਉਤ੍ਤਰਂ ਤੀਰਂ ਪਤਾਰੇਸਿ. ਤਂ ਸਨ੍ਧਾਯ ਵੁਤ੍ਤਂ – ‘‘ਉਤ੍ਤਰਂ ਤੀਰਂ ਸੁਵਿਦੇਹਾਨ’’ਨ੍ਤਿ. ਆਮਣ੍ਡਲਿਕਂ ਕਰਿਤ੍ਵਾਤਿ ਮਣ੍ਡਲਿਕਂ ਕਤ੍ਵਾ. ਅਨਯਬ੍ਯਸਨਂ ਆਪਜ੍ਜਿਂਸੂਤਿ ਅਵਡ੍ਢਿਂ ਵਿਨਾਸਂ ਪਾਪੁਣਿਂਸੁ, ਮਹਾਸਮੁਦ੍ਦਮੇਵ ਪਵਿਸਿਂਸੁ. ਤੇਨ ਹਿ ਗੋਪਾਲਕੇਨ ਗਾਵੋ ਓਤਾਰੇਨ੍ਤੇਨ ਗਙ੍ਗਾਯ ਓਰਿਮਤੀਰੇ ਸਮਤਿਤ੍ਥਞ੍ਚ ਵਿਸਮਤਿਤ੍ਥਞ੍ਚ ਓਲੋਕੇਤਬ੍ਬਂ ਅਸ੍ਸ, ਮਜ੍ਝੇ ਗਙ੍ਗਾਯ ਗੁਨ੍ਨਂ ਵਿਸ੍ਸਮਟ੍ਠਾਨਤ੍ਥਂ ਦ੍ਵੇ ਤੀਣਿ ਵਾਲਿਕਤ੍ਥਲਾਨਿ ਸਲ੍ਲਕ੍ਖੇਤਬ੍ਬਾਨਿ ਅਸ੍ਸੁ. ਤਥਾ ਪਾਰਿਮਤੀਰੇ ਤੀਣਿ ਚਤ੍ਤਾਰਿ ਤਿਤ੍ਥਾਨਿ, ਇਮਸ੍ਮਾ ਤਿਤ੍ਥਾ ਭਟ੍ਠਾ ਇਮਂ ਤਿਤ੍ਥਂ ਗਣ੍ਹਿਸ੍ਸਨ੍ਤਿ, ਇਮਸ੍ਮਾ ਭਟ੍ਠਾ ਇਮਨ੍ਤਿ. ਅਯਂ ਪਨ ਬਾਲਗੋਪਾਲਕੋ ਓਰਿਮਤੀਰੇ ਗੁਨ੍ਨਂ ਓਤਰਣਤਿਤ੍ਥਂ ਸਮਂ ਵਾ ਵਿਸਮਂ ਵਾ ਅਨੋਲੋਕੇਤ੍ਵਾਵ ਮਜ੍ਝੇ ਗਙ੍ਗਾਯ ਗੁਨ੍ਨਂ ਵਿਸ੍ਸਮਟ੍ਠਾਨਤ੍ਥਂ ਦ੍ਵੇ ਤੀਣਿ ਵਾਲਿਕਤ੍ਥਲਾਨਿਪਿ ਅਸਲ੍ਲਕ੍ਖੇਤ੍ਵਾਵ ਪਰਤੀਰੇ ਚਤ੍ਤਾਰਿ ਪਞ੍ਚ ਉਤ੍ਤਰਣਤਿਤ੍ਥਾਨਿ ਅਸਮਵੇਕ੍ਖਿਤ੍ਵਾਵ ਅਤਿਤ੍ਥੇਨੇਵ ਗਾਵੋ ਓਤਾਰੇਸਿ. ਅਥਸ੍ਸ ਮਹਾਉਸਭੋ ਜਵਨਸਮ੍ਪਨ੍ਨਤਾਯ ਚੇਵ ਥਾਮਸਮ੍ਪਨ੍ਨਤਾਯ ਚ ਤਿਰਿਯਂ ਗਙ੍ਗਾਯ ਸੋਤਂ ਛੇਤ੍ਵਾ ਪਾਰਿਮਂ ਤੀਰਂ ਪਤ੍ਵਾ ਛਿਨ੍ਨਤਟਞ੍ਚੇਵ ਕਣ੍ਟਕਗੁਮ੍ਬਗਹਨਞ੍ਚ ਦਿਸ੍ਵਾ, ‘‘ਦੁਬ੍ਬਿਨਿਵਿਟ੍ਠਮੇਤ’’ਨ੍ਤਿ ਞਤ੍ਵਾ ਧੁਰਗ੍ਗ-ਪਤਿਟ੍ਠਾਨੋਕਾਸਮ੍ਪਿ ਅਲਭਿਤ੍ਵਾ ਪਟਿਨਿਵਤ੍ਤਿ. ਗਾਵੋ ਮਹਾਉਸਭੋ ਨਿਵਤ੍ਤੋ ਮਯਮ੍ਪਿ ਨਿਵਤ੍ਤਿਸ੍ਸਾਮਾਤਿ ਨਿਵਤ੍ਤਾ. ਮਹਤੋ ਗੋਗਣਸ੍ਸ ਨਿਵਤ੍ਤਟ੍ਠਾਨੇ ਉਦਕਂ ਛਿਜ੍ਜਿਤ੍ਵਾ ਮਜ੍ਝੇ ਗਙ੍ਗਾਯ ਆਵਟ੍ਟਂ ਉਟ੍ਠਪੇਸਿ. ਗੋਗਣੋ ਆਵਟ੍ਟਂ ਪਵਿਸਿਤ੍ਵਾ ਸਮੁਦ੍ਦਮੇਵ ਪਤ੍ਤੋ. ਏਕੋਪਿ ਗੋਣੋ ਅਰੋਗੋ ਨਾਮ ਨਾਹੋਸਿ. ਤੇਨਾਹ – ‘‘ਤਤ੍ਥੇਵ ਅਨਯਬ੍ਯਸਨਂ ਆਪਜ੍ਜਿਂਸੂ’’ਤਿ.

ਅਕੁਸਲਾ ਇਮਸ੍ਸ ਲੋਕਸ੍ਸਾਤਿ ਇਧ ਲੋਕੇ ਖਨ੍ਧਧਾਤਾਯਤਨੇਸੁ ਅਕੁਸਲਾ ਅਛੇਕਾ, ਪਰਲੋਕੇਪਿ ਏਸੇਵ ਨਯੋ. ਮਾਰਧੇਯ੍ਯਂ ਵੁਚ੍ਚਤਿ ਤੇਭੂਮਕਧਮ੍ਮਾ. ਅਮਾਰਧੇਯ੍ਯਂ ਨਵ ਲੋਕੁਤ੍ਤਰਧਮ੍ਮਾ. ਮਚ੍ਚੁਧੇਯ੍ਯਮ੍ਪਿ ਤੇਭੂਮਕਧਮ੍ਮਾਵ. ਅਮਚ੍ਚੁਧੇਯ੍ਯਂ ਨਵ ਲੋਕੁਤ੍ਤਰਧਮ੍ਮਾ. ਤਤ੍ਥ ਅਕੁਸਲਾ ਅਛੇਕਾ. ਵਚਨਤ੍ਥਤੋ ਪਨ ਮਾਰਸ੍ਸ ਧੇਯ੍ਯਂ ਮਾਰਧੇਯ੍ਯਂ. ਧੇਯ੍ਯਨ੍ਤਿ ਠਾਨਂ ਵਤ੍ਥੁ ਨਿਵਾਸੋ ਗੋਚਰੋ. ਮਚ੍ਚੁਧੇਯ੍ਯੇਪਿ ਏਸੇਵ ਨਯੋ. ਤੇਸਨ੍ਤਿ ਤੇਸਂ ਏਵਰੂਪਾਨਂ ਸਮਣਬ੍ਰਾਹ੍ਮਣਾਨਂ, ਇਮਿਨਾ ਛ ਸਤ੍ਥਾਰੋ ਦਸ੍ਸਿਤਾਤਿ ਵੇਦਿਤਬ੍ਬਾ.

੩੫੧. ਏਵਂ ਕਣ੍ਹਪਕ੍ਖਂ ਨਿਟ੍ਠਪੇਤ੍ਵਾ ਸੁਕ੍ਕਪਕ੍ਖਂ ਦਸ੍ਸੇਨ੍ਤੋ ਭੂਤਪੁਬ੍ਬਂ, ਭਿਕ੍ਖਵੇਤਿਆਦਿਮਾਹ. ਤਤ੍ਥ ਬਲਵਗਾਵੋਤਿ ਦਨ੍ਤਗੋਣੇ ਚੇਵ ਧੇਨੁਯੋ ਚ. ਦਮ੍ਮਗਾਵੋਤਿ ਦਮੇਤਬ੍ਬਗੋਣੇ ਚੇਵ ਅਵਿਜਾਤਗਾਵੋ ਚ. ਵਚ੍ਛਤਰੇਤਿ ਵਚ੍ਛਭਾਵਂ ਤਰਿਤ੍ਵਾ ਠਿਤੇ ਬਲਵਵਚ੍ਛੇ. ਵਚ੍ਛਕੇਤਿ ਧੇਨੁਪਕੇ ਤਰੁਣਵਚ੍ਛਕੇ. ਕਿਸਾਬਲਕੇਤਿ ਅਪ੍ਪਮਂਸਲੋਹਿਤੇ ਮਨ੍ਦਥਾਮੇ. ਤਾਵਦੇਵ ਜਾਤਕੋਤਿ ਤਂਦਿਵਸੇ ਜਾਤਕੋ. ਮਾਤੁਗੋਰਵਕੇਨ ਵੁਯ੍ਹਮਾਨੋਤਿ ਮਾਤਾ ਪੁਰਤੋ ਪੁਰਤੋ ਹੁਂਹੁਨ੍ਤਿ ਗੋਰਵਂ ਕਤ੍ਵਾ ਸਞ੍ਞਂ ਦਦਮਾਨਾ ਉਰੇਨ ਉਦਕਂ ਛਿਨ੍ਦਮਾਨਾ ਗਚ੍ਛਤਿ, ਵਚ੍ਛਕੋ ਤਾਯ ਗੋਰਵਸਞ੍ਞਾਯ ਧੇਨੁਯਾ ਵਾ ਉਰੇਨ ਛਿਨ੍ਨੋਦਕੇਨ ਗਚ੍ਛਮਾਨੋ ‘‘ਮਾਤੁਗੋਰਵਕੇਨ ਵੁਯ੍ਹਮਾਨੋ’’ਤਿ ਵੁਚ੍ਚਤਿ.

੩੫੨. ਮਾਰਸ੍ਸ ਸੋਤਂ ਛੇਤ੍ਵਾਤਿ ਅਰਹਤ੍ਤਮਗ੍ਗੇਨ ਮਾਰਸ੍ਸ ਤਣ੍ਹਾਸੋਤਂ ਛੇਤ੍ਵਾ. ਪਾਰਂ ਗਤਾਤਿ ਮਹਾਉਸਭਾ ਨਦੀਪਾਰਂ ਵਿਯ ਸਂਸਾਰਪਾਰਂ ਨਿਬ੍ਬਾਨਂ ਗਤਾ. ਪਾਰਂ ਅਗਮਂਸੂਤਿ ਮਹਾਉਸਭਾਨਂ ਪਾਰਙ੍ਗਤਕ੍ਖਣੇ ਗਙ੍ਗਾਯ ਸੋਤਸ੍ਸ ਤਯੋ ਕੋਟ੍ਠਾਸੇ ਅਤਿਕ੍ਕਮ੍ਮ ਠਿਤਾ ਮਹਾਉਸਭੇ ਪਾਰਂ ਪਤ੍ਤੇ ਦਿਸ੍ਵਾ ਤੇਸਂ ਗਤਮਗ੍ਗਂ ਪਟਿਪਜ੍ਜਿਤ੍ਵਾ ਪਾਰਂ ਅਗਮਂਸੁ. ਪਾਰਂ ਗਮਿਸ੍ਸਨ੍ਤੀਤਿ ਚਤੁਮਗ੍ਗਵਜ੍ਝਾਨਂ ਕਿਲੇਸਾਨਂ ਤਯੋ ਕੋਟ੍ਠਾਸੇ ਖੇਪੇਤ੍ਵਾ ਠਿਤਾ ਇਦਾਨਿ ਅਰਹਤ੍ਤਮਗ੍ਗੇਨ ਅਵਸੇਸਂ ਤਣ੍ਹਾਸੋਤਂ ਛੇਤ੍ਵਾ ਬਲਵਗਾਵੋ ਵਿਯ ਨਦੀਪਾਰਂ ਸਂਸਾਰਪਾਰਂ ਨਿਬ੍ਬਾਨਂ ਗਮਿਸ੍ਸਨ੍ਤੀਤਿ. ਇਮਿਨਾ ਨਯੇਨ ਸਬ੍ਬਵਾਰੇਸੁ ਅਤ੍ਥੋ ਵੇਦਿਤਬ੍ਬੋ. ਧਮ੍ਮਾਨੁਸਾਰਿਨੋ, ਸਦ੍ਧਾਨੁਸਾਰਿਨੋਤਿ ਇਮੇ ਦ੍ਵੇ ਪਠਮਮਗ੍ਗਸਮਙ੍ਗਿਨੋ.

ਜਾਨਤਾਤਿ ਸਬ੍ਬਧਮ੍ਮੇ ਜਾਨਨ੍ਤੇਨ ਬੁਦ੍ਧੇਨ. ਸੁਪ੍ਪਕਾਸਿਤੋਤਿ ਸੁਕਥਿਤੋ. ਵਿਵਟਨ੍ਤਿ ਵਿਵਰਿਤਂ. ਅਮਤਦ੍ਵਾਰਨ੍ਤਿ ਅਰਿਯਮਗ੍ਗੋ. ਨਿਬ੍ਬਾਨਪਤ੍ਤਿਯਾਤਿ ਤਦਤ੍ਥਾਯ ਵਿਵਟਂ. ਵਿਨਲ਼ੀਕਤਨ੍ਤਿ ਵਿਗਤਮਾਨਨਲ਼ਂ ਕਤਂ. ਖੇਮਂ ਪਤ੍ਥੇਥਾਤਿ ਕਤ੍ਤੁਕਮ੍ਯਤਾਛਨ੍ਦੇਨ ਅਰਹਤ੍ਤਂ ਪਤ੍ਥੇਥ, ਕਤ੍ਤੁਕਾਮਾ ਨਿਬ੍ਬਤ੍ਤੇਤੁਕਾਮਾ ਹੋਥਾਤਿ ਅਤ੍ਥੋ. ‘‘ਪਤ੍ਤ’ਤ੍ਥਾ’’ਤਿਪਿ ਪਾਠੋ. ਏਵਰੂਪਂ ਸਤ੍ਥਾਰਂ ਲਭਿਤ੍ਵਾ ਤੁਮ੍ਹੇ ਪਤ੍ਤਾਯੇਵ ਨਾਮਾਤਿ ਅਤ੍ਥੋ. ਸੇਸਂ ਸਬ੍ਬਤ੍ਥ ਉਤ੍ਤਾਨਮੇਵ. ਭਗਵਾ ਪਨ ਯਥਾਨੁਸਨ੍ਧਿਨਾਵ ਦੇਸਨਂ ਨਿਟ੍ਠਪੇਸੀਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਚੂਲ਼ਗੋਪਾਲਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.