੧. ਚੂਲ਼ਗੋਸਿਙ੍ਗਸੁਤ੍ਤਵਣ੍ਣਨਾ

੩੨੫. ਏਵਂ ਮੇ ਸੁਤਨ੍ਤਿ ਚੂਲ਼ਗੋਸਿਙ੍ਗਸੁਤ੍ਤਂ. ਤਤ੍ਥ ਨਾਤਿਕੇ ਵਿਹਰਤੀਤਿ ਨਾਤਿਕਾ ਨਾਮ ਏਕਂ ਤਲ਼ਾਕਂ ਨਿਸ੍ਸਾਯ ਦ੍ਵਿਨ੍ਨਂ ਚੂਲ਼ਪਿਤਿਮਹਾਪਿਤਿਪੁਤ੍ਤਾਨਂ ਦ੍ਵੇ ਗਾਮਾ, ਤੇਸੁ ਏਕਸ੍ਮਿਂ ਗਾਮੇ. ਗਿਞ੍ਜਕਾਵਸਥੇਤਿ ਇਟ੍ਠਕਾਮਯੇ ਆਵਸਥੇ. ਏਕਸ੍ਮਿਂ ਕਿਰ ਸਮਯੇ ਭਗਵਾ ਮਹਾਜਨਸਙ੍ਗਹਂ ਕਰੋਨ੍ਤੋ ਵਜ੍ਜਿਰਟ੍ਠੇ ਚਾਰਿਕਂ ਚਰਮਾਨੋ ਨਾਤਿਕਂ ਅਨੁਪ੍ਪਤ੍ਤੋ. ਨਾਤਿਕਵਾਸਿਨੋ ਮਨੁਸ੍ਸਾ ਭਗਵਤੋ ਮਹਾਦਾਨਂ ਦਤ੍ਵਾ ਧਮ੍ਮਕਥਂ ਸੁਤ੍ਵਾ ਪਸਨ੍ਨਹਦਯਾ, ‘‘ਸਤ੍ਥੁ ਵਸਨਟ੍ਠਾਨਂ ਕਰਿਸ੍ਸਾਮਾ’’ਤਿ ਮਨ੍ਤੇਤ੍ਵਾ ਇਟ੍ਠਕਾਹੇਵ ਭਿਤ੍ਤਿਸੋਪਾਨਤ੍ਥਮ੍ਭੇ ਵਾਲ਼ਰੂਪਾਦੀਨਿ ਦਸ੍ਸੇਨ੍ਤੋ ਪਾਸਾਦਂ ਕਤ੍ਵਾ ਸੁਧਾਯ ਲਿਮ੍ਪਿਤ੍ਵਾ ਮਾਲਾਕਮ੍ਮਲਤਾਕਮ੍ਮਾਦੀਨਿ ਨਿਟ੍ਠਾਪੇਤ੍ਵਾ ਭੁਮ੍ਮਤ੍ਥਰਣਮਞ੍ਚਪੀਠਾਦੀਨਿ ਪਞ੍ਞਪੇਤ੍ਵਾ ਸਤ੍ਥੁ ਨਿਯ੍ਯਾਤੇਸੁਂ. ਅਪਰਾਪਰਂ ਪਨੇਤ੍ਥ ਮਨੁਸ੍ਸਾ ਭਿਕ੍ਖੁਸਙ੍ਘਸ੍ਸ ਰਤ੍ਤਿਟ੍ਠਾਨਦਿਵਾਟ੍ਠਾਨਮਣ੍ਡਪਚਙ੍ਕਮਾਦੀਨਿ ਕਾਰਯਿਂਸੁ. ਇਤਿ ਸੋ ਵਿਹਾਰੋ ਮਹਾ ਅਹੋਸਿ. ਤਂ ਸਨ੍ਧਾਯ ਵੁਤ੍ਤਂ ‘‘ਗਿਞ੍ਜਕਾਵਸਥੇ’’ਤਿ.

ਗੋਸਿਙ੍ਗਸਾਲਵਨਦਾਯੇਤਿ ਤਤ੍ਥ ਏਕਸ੍ਸ ਜੇਟ੍ਠਕਰੁਕ੍ਖਸ੍ਸ ਖਨ੍ਧਤੋ ਗੋਸਿਙ੍ਗਸਣ੍ਠਾਨਂ ਹੁਤ੍ਵਾ ਵਿਟਪਂ ਉਟ੍ਠਹਿ, ਤਂ ਰੁਕ੍ਖਂ ਉਪਾਦਾਯ ਸਬ੍ਬਮ੍ਪਿ ਤਂ ਵਨਂ ਗੋਸਿਙ੍ਗਸਾਲਵਨਨ੍ਤਿ ਸਙ੍ਖਂ ਗਤਂ. ਦਾਯੋਤਿ ਅਵਿਸੇਸੇਨ ਅਰਞ੍ਞਸ੍ਸੇਤਂ ਨਾਮਂ. ਤਸ੍ਮਾ ਗੋਸਿਙ੍ਗਸਾਲਵਨਦਾਯੇਤਿ ਗੋਸਿਙ੍ਗਸਾਲਵਨਅਰਞ੍ਞੇਤਿ ਅਤ੍ਥੋ. ਵਿਹਰਨ੍ਤੀਤਿ ਸਾਮਗ੍ਗਿਰਸਂ ਅਨੁਭਵਮਾਨਾ ਵਿਹਰਨ੍ਤਿ. ਇਮੇਸਞ੍ਹਿ ਕੁਲਪੁਤ੍ਤਾਨਂ ਉਪਰਿਪਣ੍ਣਾਸਕੇ ਪੁਥੁਜ੍ਜਨਕਾਲੋ ਕਥਿਤੋ, ਇਧ ਖੀਣਾਸਵਕਾਲੋ. ਤਦਾ ਹਿ ਤੇ ਲਦ੍ਧਸ੍ਸਾਦਾ ਲਦ੍ਧਪਤਿਟ੍ਠਾ ਅਧਿਗਤਪਟਿਸਮ੍ਭਿਦਾ ਖੀਣਾਸਵਾ ਹੁਤ੍ਵਾ ਸਾਮਗ੍ਗਿਰਸਂ ਅਨੁਭਵਮਾਨਾ ਤਤ੍ਥ ਵਿਹਰਿਂਸੁ. ਤਂ ਸਨ੍ਧਾਯੇਤਂ ਵੁਤ੍ਤਂ.

ਯੇਨ ਗੋਸਿਙ੍ਗਸਾਲਵਨਦਾਯੋ ਤੇਨੁਪਸਙ੍ਕਮੀਤਿ ਧਮ੍ਮਸੇਨਾਪਤਿਮਹਾਮੋਗ੍ਗਲ੍ਲਾਨਤ੍ਥੇਰੇਸੁ ਵਾ ਅਸੀਤਿਮਹਾਸਾਵਕੇਸੁ ਵਾ, ਅਨ੍ਤਮਸੋ ਧਮ੍ਮਭਣ੍ਡਾਗਾਰਿਕਆਨਨ੍ਦਤ੍ਥੇਰਮ੍ਪਿ ਕਞ੍ਚਿ ਅਨਾਮਨ੍ਤੇਤ੍ਵਾ ਸਯਮੇਵ ਪਤ੍ਤਚੀਵਰਂ ਆਦਾਯ ਅਨੀਕਾ ਨਿਸ੍ਸਟੋ ਹਤ੍ਥੀ ਵਿਯ, ਯੂਥਾ ਨਿਸ੍ਸਟੋ ਕਾਲ਼ਸੀਹੋ ਵਿਯ, ਵਾਤਚ੍ਛਿਨ੍ਨੋ ਵਲਾਹਕੋ ਵਿਯ ਏਕਕੋਵ ਉਪਸਙ੍ਕਮਿ. ਕਸ੍ਮਾ ਪਨੇਤ੍ਥ ਭਗਵਾ ਸਯਂ ਅਗਮਾਸੀਤਿ? ਤਯੋ ਕੁਲਪੁਤ੍ਤਾ ਸਾਮਗ੍ਗਿਰਸਂ ਅਨੁਭਵਨ੍ਤਾ ਵਿਹਰਨ੍ਤਿ, ਤੇਸਂ ਪਗ੍ਗਣ੍ਹਨਤੋ, ਪਚ੍ਛਿਮਜਨਤਂ ਅਨੁਕਮ੍ਪਨਤੋ ਧਮ੍ਮਗਰੁਭਾਵਤੋ ਚ. ਏਵਂ ਕਿਰਸ੍ਸ ਅਹੋਸਿ – ‘‘ਅਹਂ ਇਮੇ ਕੁਲਪੁਤ੍ਤੇ ਪਗ੍ਗਣ੍ਹਿਤ੍ਵਾ ਉਕ੍ਕਂਸਿਤ੍ਵਾ ਪਟਿਸਨ੍ਥਾਰਂ ਕਤ੍ਵਾ ਧਮ੍ਮਂ ਨੇਸਂ ਦੇਸੇਸ੍ਸਾਮੀ’’ਤਿ. ਏਵਂ ਤਾਵ ਪਗ੍ਗਣ੍ਹਨਤੋ ਅਗਮਾਸਿ. ਅਪਰਮ੍ਪਿਸ੍ਸ ਅਹੋਸਿ – ‘‘ਅਨਾਗਤੇ ਕੁਲਪੁਤ੍ਤਾ ਸਮ੍ਮਾਸਮ੍ਬੁਦ੍ਧੋ ਸਮਗ੍ਗਵਾਸਂ ਵਸਨ੍ਤਾਨਂ ਸਨ੍ਤਿਕਂ ਸਯਂ ਗਨ੍ਤ੍ਵਾ ਪਟਿਸਨ੍ਥਾਰਂ ਕਤ੍ਵਾ ਧਮ੍ਮਂ ਕਥੇਤ੍ਵਾ ਤਯੋ ਕੁਲਪੁਤ੍ਤੇ ਪਗ੍ਗਣ੍ਹਿ, ਕੋ ਨਾਮ ਸਮਗ੍ਗਵਾਸਂ ਨ ਵਸੇਯ੍ਯਾਤਿ ਸਮਗ੍ਗਵਾਸਂ ਵਸਿਤਬ੍ਬਂ ਮਞ੍ਞਮਾਨਾ ਖਿਪ੍ਪਮੇਵ ਦੁਕ੍ਖਸ੍ਸਨ੍ਤਂ ਕਰਿਸ੍ਸਨ੍ਤੀ’’ਤਿ. ਏਵਂ ਪਚ੍ਛਿਮਜਨਤਂ ਅਨੁਕਮ੍ਪਨਤੋਪਿ ਅਗਮਾਸਿ. ਬੁਦ੍ਧਾ ਚ ਨਾਮ ਧਮ੍ਮਗਰੁਨੋ ਹੋਨ੍ਤਿ, ਸੋ ਚ ਨੇਸਂ ਧਮ੍ਮਗਰੁਭਾਵੋ ਰਥਵਿਨੀਤੇ ਆਵਿਕਤੋਵ. ਇਤਿ ਇਮਸ੍ਮਾ ਧਮ੍ਮਗਰੁਭਾਵਤੋਪਿ ਧਮ੍ਮਂ ਪਗ੍ਗਣ੍ਹਿਸ੍ਸਾਮੀਤਿ ਅਗਮਾਸਿ.

ਦਾਯਪਾਲੋਤਿ ਅਰਞ੍ਞਪਾਲੋ. ਸੋ ਤਂ ਅਰਞ੍ਞਂ ਯਥਾ ਇਚ੍ਛਿਤਿਚ੍ਛਿਤਪ੍ਪਦੇਸੇਨ ਮਨੁਸ੍ਸਾ ਪਵਿਸਿਤ੍ਵਾ ਤਤ੍ਥ ਪੁਪ੍ਫਂ ਵਾ ਫਲਂ ਵਾ ਨਿਯ੍ਯਾਸਂ ਵਾ ਦਬ੍ਬਸਮ੍ਭਾਰਂ ਵਾ ਨ ਹਰਨ੍ਤਿ, ਏਵਂ ਵਤਿਯਾ ਪਰਿਕ੍ਖਿਤ੍ਤਸ੍ਸ ਤਸ੍ਸ ਅਰਞ੍ਞਸ੍ਸ ਯੋਜਿਤੇ ਦ੍ਵਾਰੇ ਨਿਸੀਦਿਤ੍ਵਾ ਤਂ ਅਰਞ੍ਞਂ ਰਕ੍ਖਤਿ, ਪਾਲੇਤਿ. ਤਸ੍ਮਾ ‘‘ਦਾਯਪਾਲੋ’’ਤਿ ਵੁਤ੍ਤੋ. ਅਤ੍ਤਕਾਮਰੂਪਾਤਿ ਅਤ੍ਤਨੋ ਹਿਤਂ ਕਾਮਯਮਾਨਸਭਾਵਾ ਹੁਤ੍ਵਾ ਵਿਹਰਨ੍ਤਿ. ਯੋ ਹਿ ਇਮਸ੍ਮਿਂ ਸਾਸਨੇ ਪਬ੍ਬਜਿਤ੍ਵਾਪਿ ਵੇਜ੍ਜਕਮ੍ਮਦੂਤਕਮ੍ਮਪਹਿਣਗਮਨਾਦੀਨਂ ਵਸੇਨ ਏਕਵੀਸਤਿਅਨੇਸਨਾਹਿ ਜੀਵਿਕਂ ਕਪ੍ਪੇਤਿ, ਅਯਂ ਨ ਅਤ੍ਤਕਾਮਰੂਪੋ ਨਾਮ. ਯੋ ਪਨ ਇਮਸ੍ਮਿਂ ਸਾਸਨੇ ਪਬ੍ਬਜਿਤ੍ਵਾ ਏਕਵੀਸਤਿਅਨੇਸਨਂ ਪਹਾਯ ਚਤੁਪਾਰਿਸੁਦ੍ਧਿਸੀਲੇ ਪਤਿਟ੍ਠਾਯ ਬੁਦ੍ਧਵਚਨਂ ਉਗ੍ਗਣ੍ਹਿਤ੍ਵਾ ਸਪ੍ਪਾਯਧੁਤਙ੍ਗਂ ਅਧਿਟ੍ਠਾਯ ਅਟ੍ਠਤਿਂਸਾਯ ਆਰਮ੍ਮਣੇਸੁ ਚਿਤ੍ਤਰੁਚਿਯਂ ਕਮ੍ਮਟ੍ਠਾਨਂ ਗਹੇਤ੍ਵਾ ਗਾਮਨ੍ਤਂ ਪਹਾਯ ਅਰਞ੍ਞਂ ਪਵਿਸਿਤ੍ਵਾ ਸਮਾਪਤ੍ਤਿਯੋ ਨਿਬ੍ਬਤ੍ਤੇਤ੍ਵਾ ਵਿਪਸ੍ਸਨਾਯ ਕਮ੍ਮਂ ਕੁਰੁਮਾਨੋ ਵਿਹਰਤਿ, ਅਯਂ ਅਤ੍ਤਕਾਮੋ ਨਾਮ. ਤੇਪਿ ਤਯੋ ਕੁਲਪੁਤ੍ਤਾ ਏਵਰੂਪਾ ਅਹੇਸੁਂ. ਤੇਨ ਵੁਤ੍ਤਂ – ‘‘ਅਤ੍ਤਕਾਮਰੂਪਾ ਵਿਹਰਨ੍ਤੀ’’ਤਿ.

ਮਾ ਤੇਸਂ ਅਫਾਸੁਮਕਾਸੀਤਿ ਤੇਸਂ ਮਾ ਅਫਾਸੁਕਂ ਅਕਾਸੀਤਿ ਭਗਵਨ੍ਤਂ ਵਾਰੇਸਿ. ਏਵਂ ਕਿਰਸ੍ਸ ਅਹੋਸਿ – ‘‘ਇਮੇ ਕੁਲਪੁਤ੍ਤਾ ਸਮਗ੍ਗਾ ਵਿਹਰਨ੍ਤਿ, ਏਕਚ੍ਚਸ੍ਸ ਚ ਗਤਟ੍ਠਾਨੇ ਭਣ੍ਡਨਕਲਹਵਿਵਾਦਾ ਵਤ੍ਤਨ੍ਤਿ, ਤਿਖਿਣਸਿਙ੍ਗੋ ਚਣ੍ਡਗੋਣੋ ਵਿਯ ਓਵਿਜ੍ਝਨ੍ਤੋ ਵਿਚਰਤਿ, ਅਥੇਕਮਗ੍ਗੇਨ ਦ੍ਵਿਨ੍ਨਂ ਗਮਨਂ ਨ ਹੋਤਿ, ਕਦਾਚਿ ਅਯਮ੍ਪਿ ਏਵਂ ਕਰੋਨ੍ਤੋ ਇਮੇਸਂ ਕੁਲਪੁਤ੍ਤਾਨਂ ਸਮਗ੍ਗਵਾਸਂ ਭਿਨ੍ਦੇਯ੍ਯ. ਪਾਸਾਦਿਕੋ ਚ ਪਨੇਸ ਸੁਵਣ੍ਣਵਣ੍ਣੋ ਸੁਰਸਗਿਦ੍ਧੋ ਮਞ੍ਞੇ, ਗਤਕਾਲਤੋ ਪਟ੍ਠਾਯ ਪਣੀਤਦਾਯਕਾਨਂ ਅਤ੍ਤਨੋ ਉਪਟ੍ਠਾਕਾਨਞ੍ਚ ਵਣ੍ਣਕਥਨਾਦੀਹਿ ਇਮੇਸਂ ਕੁਲਪੁਤ੍ਤਾਨਂ ਅਪ੍ਪਮਾਦਵਿਹਾਰਂ ਭਿਨ੍ਦੇਯ੍ਯ. ਵਸਨਟ੍ਠਾਨਾਨਿ ਚਾਪਿ ਏਤੇਸਂ ਕੁਲਪੁਤ੍ਤਾਨਂ ਨਿਬਦ੍ਧਾਨਿ ਪਰਿਚ੍ਛਿਨ੍ਨਾਨਿ ਤਿਸ੍ਸੋ ਚ ਪਣ੍ਣਸਾਲਾ ਤਯੋ ਚਙ੍ਕਮਾ ਤੀਣਿ ਦਿਵਾਟ੍ਠਾਨਾਨਿ ਤੀਣਿ ਮਞ੍ਚਪੀਠਾਨਿ. ਅਯਂ ਪਨ ਸਮਣੋ ਮਹਾਕਾਯੋ ਵੁਡ੍ਢਤਰੋ ਮਞ੍ਞੇ ਭਵਿਸ੍ਸਤਿ. ਸੋ ਅਕਾਲੇ ਇਮੇ ਕੁਲਪੁਤ੍ਤੇ ਸੇਨਾਸਨਾ ਵੁਟ੍ਠਾਪੇਸ੍ਸਤਿ. ਏਵਂ ਸਬ੍ਬਥਾਪਿ ਏਤੇਸਂ ਅਫਾਸੁ ਭਵਿਸ੍ਸਤੀ’’ਤਿ. ਤਂ ਅਨਿਚ੍ਛਨ੍ਤੋ, ‘‘ਮਾ ਤੇਸਂ ਅਫਾਸੁਕਮਕਾਸੀ’’ਤਿ ਭਗਵਨ੍ਤਂ ਵਾਰੇਸਿ.

ਕਿਂ ਪਨੇਸ ਜਾਨਨ੍ਤੋ ਵਾਰੇਸਿ, ਅਜਾਨਨ੍ਤੋਤਿ? ਅਜਾਨਨ੍ਤੋ. ਕਿਞ੍ਚਾਪਿ ਹਿ ਤਥਾਗਤਸ੍ਸ ਪਟਿਸਨ੍ਧਿਗ੍ਗਹਣਤੋ ਪਟ੍ਠਾਯ ਦਸਸਹਸ੍ਸਚਕ੍ਕਵਾਲ਼ਕਮ੍ਪਨਾਦੀਨਿ ਪਾਟਿਹਾਰਿਯਾਨਿ ਪਵਤ੍ਤਿਂਸੁ, ਅਰਞ੍ਞਵਾਸਿਨੋ ਪਨ ਦੁਬ੍ਬਲਮਨੁਸ੍ਸਾ ਸਕਮ੍ਮਪ੍ਪਸੁਤਾ ਤਾਨਿ ਸਲ੍ਲਕ੍ਖੇਤੁਂ ਨ ਸਕ੍ਕੋਨ੍ਤਿ. ਸਮ੍ਮਾਸਮ੍ਬੁਦ੍ਧੋ ਚ ਨਾਮ ਯਦਾ ਅਨੇਕਭਿਕ੍ਖੁਸਹਸ੍ਸਪਰਿਵਾਰੋ ਬ੍ਯਾਮਪ੍ਪਭਾਯ ਅਸੀਤਿਅਨੁਬ੍ਯਞ੍ਜਨੇਹਿ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਸਿਰਿਯਾ ਚ ਬੁਦ੍ਧਾਨੁਭਾਵਂ ਦਸ੍ਸੇਨ੍ਤੋ ਵਿਚਰਤਿ, ਤਦਾ ਕੋ ਏਸੋਤਿ ਅਪੁਚ੍ਛਿਤ੍ਵਾਵ ਜਾਨਿਤਬ੍ਬੋ ਹੋਤਿ. ਤਦਾ ਪਨ ਭਗਵਾ ਸਬ੍ਬਮ੍ਪਿ ਤਂ ਬੁਦ੍ਧਾਨੁਭਾਵਂ ਚੀਵਰਗਬ੍ਭੇਨ ਪਟਿਚ੍ਛਾਦੇਤ੍ਵਾ ਵਲਾਹਕਗਬ੍ਭੇਨ ਪਟਿਚ੍ਛਨ੍ਨੋ ਪੁਣ੍ਣਚਨ੍ਦੋ ਵਿਯ ਸਯਮੇਵ ਪਤ੍ਤਚੀਵਰਮਾਦਾਯ ਅਞ੍ਞਾਤਕਵੇਸੇਨ ਅਗਮਾਸਿ. ਇਤਿ ਨਂ ਅਜਾਨਨ੍ਤੋਵ ਦਾਯਪਾਲੋ ਨਿਵਾਰੇਸਿ.

ਏਤਦਵੋਚਾਤਿ ਥੇਰੋ ਕਿਰ ਮਾ ਸਮਣਾਤਿ ਦਾਯਪਾਲਸ੍ਸ ਕਥਂ ਸੁਤ੍ਵਾਵ ਚਿਨ੍ਤੇਸਿ – ‘‘ਮਯਂ ਤਯੋ ਜਨਾ ਇਧ ਵਿਹਰਾਮ, ਅਞ੍ਞੇ ਪਬ੍ਬਜਿਤਾ ਨਾਮ ਨਤ੍ਥਿ, ਅਯਞ੍ਚ ਦਾਯਪਾਲੋ ਪਬ੍ਬਜਿਤੇਨ ਵਿਯ ਸਦ੍ਧਿਂ ਕਥੇਤਿ, ਕੋ ਨੁ ਖੋ ਭਵਿਸ੍ਸਤੀ’’ਤਿ ਦਿਵਾਟ੍ਠਾਨਤੋ ਵੁਟ੍ਠਾਯ ਦ੍ਵਾਰੇ ਠਤ੍ਵਾ ਮਗ੍ਗਂ ਓਲੋਕੇਨ੍ਤੋ ਭਗਵਨ੍ਤਂ ਅਦ੍ਦਸ. ਭਗਵਾਪਿ ਥੇਰਸ੍ਸ ਸਹ ਦਸ੍ਸਨੇਨੇਵ ਸਰੀਰੋਭਾਸਂ ਮੁਞ੍ਚਿ, ਅਸੀਤਿਅਨੁਬ੍ਯਞ੍ਜਨਵਿਰਾਜਿਤਾ ਬ੍ਯਾਮਪ੍ਪਭਾ ਪਸਾਰਿਤਸੁਵਣ੍ਣਪਟੋ ਵਿਯ ਵਿਰੋਚਿਤ੍ਥ. ਥੇਰੋ, ‘‘ਅਯਂ ਦਾਯਪਾਲੋ ਫਣਕਤਂ ਆਸਿਵਿਸਂ ਗੀਵਾਯ ਗਹੇਤੁਂ ਹਤ੍ਥਂ ਪਸਾਰੇਨ੍ਤੋ ਵਿਯ ਲੋਕੇ ਅਗ੍ਗਪੁਗ੍ਗਲੇਨ ਸਦ੍ਧਿਂ ਕਥੇਨ੍ਤੋਵ ਨ ਜਾਨਾਤਿ, ਅਞ੍ਞਤਰਭਿਕ੍ਖੁਨਾ ਵਿਯ ਸਦ੍ਧਿਂ ਕਥੇਤੀ’’ਤਿ ਨਿਵਾਰੇਨ੍ਤੋ ਏਤਂ, ‘‘ਮਾ, ਆਵੁਸੋ ਦਾਯਪਾਲਾ’’ਤਿਆਦਿਵਚਨਂ ਅਵੋਚ.

ਤੇਨੁਪਸਙ੍ਕਮੀਤਿ ਕਸ੍ਮਾ ਭਗਵਤੋ ਪਚ੍ਚੁਗ੍ਗਮਨਂ ਅਕਤ੍ਵਾ ਉਪਸਙ੍ਕਮਿ? ਏਵਂ ਕਿਰਸ੍ਸ ਅਹੋਸਿ – ‘‘ਮਯਂ ਤਯੋ ਜਨਾ ਸਮਗ੍ਗਵਾਸਂ ਵਸਾਮ, ਸਚਾਹਂ ਏਕਕੋਵ ਪਚ੍ਚੁਗ੍ਗਮਨਂ ਕਰਿਸ੍ਸਾਮਿ, ਸਮਗ੍ਗਵਾਸੋ ਨਾਮ ਨ ਭਵਿਸ੍ਸਤੀ’’ਤਿ ਪਿਯਮਿਤ੍ਤੇ ਗਹੇਤ੍ਵਾਵ ਪਚ੍ਚੁਗ੍ਗਮਨਂ ਕਰਿਸ੍ਸਾਮਿ. ਯਥਾ ਚ ਭਗਵਾ ਮਯ੍ਹਂ ਪਿਯੋ, ਏਵਂ ਸਹਾਯਾਨਮ੍ਪਿ ਮੇ ਪਿਯੋਤਿ, ਤੇਹਿ ਸਦ੍ਧਿਂ ਪਚ੍ਚੁਗ੍ਗਮਨਂ ਕਾਤੁਕਾਮੋ ਸਯਂ ਅਕਤ੍ਵਾਵ ਉਪਸਙ੍ਕਮਿ. ਕੇਚਿ ਪਨ ਤੇਸਂ ਥੇਰਾਨਂ ਪਣ੍ਣਸਾਲਦ੍ਵਾਰੇ ਚਙ੍ਕਮਨਕੋਟਿਯਾ ਭਗਵਤੋ ਆਗਮਨਮਗ੍ਗੋ ਹੋਤਿ, ਤਸ੍ਮਾ ਥੇਰੋ ਤੇਸਂ ਸਞ੍ਞਂ ਦਦਮਾਨੋਵ ਗਤੋਤਿ. ਅਭਿਕ੍ਕਮਥਾਤਿ ਇਤੋ ਆਗਚ੍ਛਥ. ਪਾਦੇ ਪਕ੍ਖਾਲੇਸੀਤਿ ਵਿਕਸਿਤਪਦੁਮਸਨ੍ਨਿਭੇਹਿ ਜਾਲਹਤ੍ਥੇਹਿ ਮਣਿਵਣ੍ਣਂ ਉਦਕਂ ਗਹੇਤ੍ਵਾ ਸੁਵਣ੍ਣਵਣ੍ਣੇਸੁ ਪਿਟ੍ਠਿਪਾਦੇਸੁ ਉਦਕਮਭਿਸਿਞ੍ਚਿਤ੍ਵਾ ਪਾਦੇਨ ਪਾਦਂ ਘਂਸਨ੍ਤੋ ਪਕ੍ਖਾਲੇਸਿ. ਬੁਦ੍ਧਾਨਂ ਕਾਯੇ ਰਜੋਜਲ੍ਲਂ ਨਾਮ ਨ ਉਪਲਿਮ੍ਪਤਿ, ਕਸ੍ਮਾ ਪਕ੍ਖਾਲੇਸੀਤਿ? ਸਰੀਰਸ੍ਸ ਉਤੁਗ੍ਗਹਣਤ੍ਥਂ, ਤੇਸਞ੍ਚ ਚਿਤ੍ਤਸਮ੍ਪਹਂਸਨਤ੍ਥਂ. ਅਮ੍ਹੇਹਿ ਅਭਿਹਟੇਨ ਉਦਕੇਨ ਭਗਵਾ ਪਾਦੇ ਪਕ੍ਖਾਲੇਸਿ, ਪਰਿਭੋਗਂ ਅਕਾਸੀਤਿ ਤੇਸਂ ਭਿਕ੍ਖੂਨਂ ਬਲਵਸੋਮਨਸ੍ਸਵਸੇਨ ਚਿਤ੍ਤਂ ਪੀਣਿਤਂ ਹੋਤਿ, ਤਸ੍ਮਾ ਪਕ੍ਖਾਲੇਸਿ. ਆਯਸ੍ਮਨ੍ਤਂ ਅਨੁਰੁਦ੍ਧਂ ਭਗਵਾ ਏਤਦਵੋਚਾਤਿ ਸੋ ਕਿਰ ਤੇਸਂ ਵੁਡ੍ਢਤਰੋ.

੩੨੬. ਤਸ੍ਸ ਸਙ੍ਗਹੇ ਕਤੇ ਸੇਸਾਨਂ ਕਤੋਵ ਹੋਤੀਤਿ ਥੇਰਞ੍ਞੇਵ ਏਤਂ ਕਚ੍ਚਿ ਵੋ ਅਨੁਰੁਦ੍ਧਾਤਿਆਦਿਵਚਨਂ ਅਵੋਚ. ਤਤ੍ਥ ਕਚ੍ਚੀਤਿ ਪੁਚ੍ਛਨਤ੍ਥੇ ਨਿਪਾਤੋ. ਵੋਤਿ ਸਾਮਿਵਚਨਂ. ਇਦਂ ਵੁਤ੍ਤਂ ਹੋਤਿ – ਕਚ੍ਚਿ ਅਨੁਰੁਦ੍ਧਾ ਤੁਮ੍ਹਾਕਂ ਖਮਨੀਯਂ, ਇਰਿਯਾਪਥੋ ਵੋ ਖਮਤਿ? ਕਚ੍ਚਿ ਯਾਪਨੀਯਂ, ਕਚ੍ਚਿ ਵੋ ਜੀਵਿਤਂ ਯਾਪੇਤਿ ਘਟਿਯਤਿ? ਕਚ੍ਚਿ ਪਿਣ੍ਡਕੇਨ ਨ ਕਿਲਮਥ, ਕਚ੍ਚਿ ਤੁਮ੍ਹਾਕਂ ਸੁਲਭਪਿਣ੍ਡਂ, ਸਮ੍ਪਤ੍ਤੇ ਵੋ ਦਿਸ੍ਵਾ ਮਨੁਸ੍ਸਾ ਉਲ਼ੁਙ੍ਕਯਾਗੁਂ ਵਾ ਕਟਚ੍ਛੁਭਿਕ੍ਖਂ ਵਾ ਦਾਤਬ੍ਬਂ ਮਞ੍ਞਨ੍ਤੀਤਿ ਭਿਕ੍ਖਾਚਾਰਵਤ੍ਤਂ ਪੁਚ੍ਛਤਿ. ਕਸ੍ਮਾ? ਪਚ੍ਚਯੇਨ ਅਕਿਲਮਨ੍ਤੇਨ ਹਿ ਸਕ੍ਕਾ ਸਮਣਧਮ੍ਮੋ ਕਾਤੁਂ, ਵਤ੍ਤਮੇਵ ਵਾ ਏਤਂ ਪਬ੍ਬਜਿਤਾਨਂ. ਅਥ ਤੇਨ ਪਟਿਵਚਨੇ ਦਿਨ੍ਨੇ, ‘‘ਅਨੁਰੁਦ੍ਧਾ, ਤੁਮ੍ਹੇ ਰਾਜਪਬ੍ਬਜਿਤਾ ਮਹਾਪੁਞ੍ਞਾ, ਮਨੁਸ੍ਸਾ ਤੁਮ੍ਹਾਕਂ ਅਰਞ੍ਞੇ ਵਸਨ੍ਤਾਨਂ ਅਦਤ੍ਵਾ ਕਸ੍ਸ ਅਞ੍ਞਸ੍ਸ ਦਾਤਬ੍ਬਂ ਮਞ੍ਞਿਸ੍ਸਨ੍ਤਿ, ਤੁਮ੍ਹੇ ਪਨ ਏਤਂ ਭੁਞ੍ਜਿਤ੍ਵਾ ਕਿਂ ਨੁ ਖੋ ਮਿਗਪੋਤਕਾ ਵਿਯ ਅਞ੍ਞਮਞ੍ਞਂ ਸਙ੍ਘਟ੍ਟੇਨ੍ਤਾ ਵਿਹਰਥ, ਉਦਾਹੁ ਸਾਮਗ੍ਗਿਭਾਵੋ ਵੋ ਅਤ੍ਥੀ’’ਤਿ ਸਾਮਗ੍ਗਿਰਸਂ ਪੁਚ੍ਛਨ੍ਤੋ, ਕਚ੍ਚਿ ਪਨ ਵੋ, ਅਨੁਰੁਦ੍ਧਾ, ਸਮਗ੍ਗਾਤਿਆਦਿਮਾਹ.

ਤਤ੍ਥ ਖੀਰੋਦਕੀਭੂਤਾਤਿ ਯਥਾ ਖੀਰਞ੍ਚ ਉਦਕਞ੍ਚ ਅਞ੍ਞਮਞ੍ਞਂ ਸਂਸਨ੍ਦਤਿ, ਵਿਸੁਂ ਨ ਹੋਤਿ, ਏਕਤ੍ਤਂ ਵਿਯ ਉਪੇਤਿ, ਕਚ੍ਚਿ ਏਵਂ ਸਾਮਗ੍ਗਿਵਸੇਨ ਏਕਤ੍ਤੂਪਗਤਚਿਤ੍ਤੁਪ੍ਪਾਦਾ ਵਿਹਰਥਾਤਿ ਪੁਚ੍ਛਤਿ. ਪਿਯਚਕ੍ਖੂਹੀਤਿ ਮੇਤ੍ਤਚਿਤ੍ਤਂ ਪਚ੍ਚੁਪਟ੍ਠਪੇਤ੍ਵਾ ਓਲੋਕਨਚਕ੍ਖੂਨਿ ਪਿਯਚਕ੍ਖੂਨਿ ਨਾਮ. ਕਚ੍ਚਿ ਤਥਾਰੂਪੇਹਿ ਚਕ੍ਖੂਹਿ ਅਞ੍ਞਮਞ੍ਞਂ ਸਮ੍ਪਸ੍ਸਨ੍ਤਾ ਵਿਹਰਥਾਤਿ ਪੁਚ੍ਛਤਿ. ਤਗ੍ਘਾਤਿ ਏਕਂਸਤ੍ਥੇ ਨਿਪਾਤੋ. ਏਕਂਸੇਨ ਮਯਂ, ਭਨ੍ਤੇਤਿ ਵੁਤ੍ਤਂ ਹੋਤਿ. ਯਥਾ ਕਥਂ ਪਨਾਤਿ ਏਤ੍ਥ ਯਥਾਤਿ ਨਿਪਾਤਮਤ੍ਤਂ. ਕਥਨ੍ਤਿ ਕਾਰਣਪੁਚ੍ਛਾ. ਕਥਂ ਪਨ ਤੁਮ੍ਹੇ ਏਵਂ ਵਿਹਰਥ, ਕੇਨ ਕਾਰਣੇਨ ਵਿਹਰਥ, ਤਂ ਮੇ ਕਾਰਣਂ ਬ੍ਰੂਥਾਤਿ ਵੁਤ੍ਤਂ ਹੋਤਿ. ਮੇਤ੍ਤਂ ਕਾਯਕਮ੍ਮਨ੍ਤਿ ਮੇਤ੍ਤਚਿਤ੍ਤਵਸੇਨ ਪਵਤ੍ਤਂ ਕਾਯਕਮ੍ਮਂ. ਆਵਿ ਚੇਵ ਰਹੋ ਚਾਤਿ ਸਮ੍ਮੁਖਾ ਚੇਵ ਪਰਮ੍ਮੁਖਾ ਚ. ਇਤਰੇਸੁਪਿ ਏਸੇਵ ਨਯੋ.

ਤਤ੍ਥ ਸਮ੍ਮੁਖਾ ਕਾਯਵਚੀਕਮ੍ਮਾਨਿ ਸਹਵਾਸੇ ਲਬ੍ਭਨ੍ਤਿ, ਇਤਰਾਨਿ ਵਿਪ੍ਪਵਾਸੇ. ਮਨੋਕਮ੍ਮਂ ਸਬ੍ਬਤ੍ਥ ਲਬ੍ਭਤਿ. ਯਞ੍ਹਿ ਸਹਵਸਨ੍ਤੇਸੁ ਏਕੇਨ ਮਞ੍ਚਪੀਠਂ ਵਾ ਦਾਰੁਭਣ੍ਡਂ ਵਾ ਮਤ੍ਤਿਕਾਭਣ੍ਡਂ ਵਾ ਬਹਿ ਦੁਨ੍ਨਿਕ੍ਖਿਤ੍ਤਂ ਹੋਤਿ, ਤਂ ਦਿਸ੍ਵਾ ਕੇਨਿਦਂ ਵਲ਼ਞ੍ਜਿਤਨ੍ਤਿ ਅਵਞ੍ਞਂ ਅਕਤ੍ਵਾ ਅਤ੍ਤਨਾ ਦੁਨ੍ਨਿਕ੍ਖਿਤ੍ਤਂ ਵਿਯ ਗਹੇਤ੍ਵਾ ਪਟਿਸਾਮੇਨ੍ਤਸ੍ਸ ਪਟਿਜਗ੍ਗਿਤਬ੍ਬਯੁਤ੍ਤਂ ਵਾ ਪਨ ਠਾਨਂ ਪਟਿਜਗ੍ਗਨ੍ਤਸ੍ਸ ਸਮ੍ਮੁਖਾ ਮੇਤ੍ਤਂ ਕਾਯਕਮ੍ਮਂ ਨਾਮ ਹੋਤਿ. ਏਕਸ੍ਮਿਂ ਪਕ੍ਕਨ੍ਤੇ ਤੇਨ ਦੁਨ੍ਨਿਕ੍ਖਿਤ੍ਤਂ ਸੇਨਾਸਨਪਰਿਕ੍ਖਾਰਂ ਤਥੇਵ ਨਿਕ੍ਖਿਪਨ੍ਤਸ੍ਸ ਪਟਿਜਗ੍ਗਿਤਬ੍ਬਯੁਤ੍ਤਟ੍ਠਾਨਂ ਵਾ ਪਨ ਪਟਿਜਗ੍ਗਨ੍ਤਸ੍ਸ ਪਰਮ੍ਮੁਖਾ ਮੇਤ੍ਤਂ ਕਾਯਕਮ੍ਮਂ ਨਾਮ ਹੋਤਿ. ਸਹਵਸਨ੍ਤਸ੍ਸ ਪਨ ਤੇਹਿ ਸਦ੍ਧਿਂ ਮਧੁਰਂ ਸਮ੍ਮੋਦਨੀਯਂ ਕਥਂ ਪਟਿਸਨ੍ਥਾਰਕਥਂ ਸਾਰਣੀਯਕਥਂ ਧਮ੍ਮੀਕਥਂ ਸਰਭਞ੍ਞਂ ਸਾਕਚ੍ਛਂ ਪਞ੍ਹਪੁਚ੍ਛਨਂ ਪਞ੍ਹਵਿਸ੍ਸਜ੍ਜਨਨ੍ਤਿ ਏਵਮਾਦਿਕਰਣੇ ਸਮ੍ਮੁਖਾ ਮੇਤ੍ਤਂ ਵਚੀਕਮ੍ਮਂ ਨਾਮ ਹੋਤਿ. ਥੇਰੇਸੁ ਪਨ ਪਕ੍ਕਨ੍ਤੇਸੁ ਮਯ੍ਹਂ ਪਿਯਸਹਾਯੋ ਨਨ੍ਦਿਯਤ੍ਥੇਰੋ ਕਿਮਿਲਤ੍ਥੇਰੋ ਏਵਂ ਸੀਲਸਮ੍ਪਨ੍ਨੋ, ਏਵਂ ਆਚਾਰਸਮ੍ਪਨ੍ਨੋਤਿਆਦਿਗੁਣਕਥਨਂ ਪਰਮ੍ਮੁਖਾ ਮੇਤ੍ਤਂ ਵਚੀਕਮ੍ਮਂ ਨਾਮ ਹੋਤਿ. ਮਯ੍ਹਂ ਪਿਯਮਿਤ੍ਤੋ ਨਨ੍ਦਿਯਤ੍ਥੇਰੋ ਕਿਮਿਲਤ੍ਥੇਰੋ ਅਵੇਰੋ ਹੋਤੁ, ਅਬ੍ਯਾਪਜ੍ਜੋ ਸੁਖੀ ਹੋਤੂਤਿ ਏਵਂ ਸਮਨ੍ਨਾਹਰਤੋ ਪਨ ਸਮ੍ਮੁਖਾਪਿ ਪਰਮ੍ਮੁਖਾਪਿ ਮੇਤ੍ਤਂ ਮਨੋਕਮ੍ਮਂ ਹੋਤਿਯੇਵ.

ਨਾਨਾ ਹਿ ਖੋ ਨੋ, ਭਨ੍ਤੇ, ਕਾਯਾਤਿ ਕਾਯਞ੍ਹਿ ਪਿਟ੍ਠਂ ਵਿਯ ਮਤ੍ਤਿਕਾ ਵਿਯ ਚ ਓਮਦ੍ਦਿਤ੍ਵਾ ਏਕਤੋ ਕਾਤੁਂ ਨ ਸਕ੍ਕਾ. ਏਕਞ੍ਚ ਪਨ ਮਞ੍ਞੇ ਚਿਤ੍ਤਨ੍ਤਿ ਚਿਤ੍ਤਂ ਪਨ ਨੋ ਹਿਤਟ੍ਠੇਨ ਨਿਰਨ੍ਤਰਟ੍ਠੇਨ ਅਵਿਗ੍ਗਹਟ੍ਠੇਨ ਸਮਗ੍ਗਟ੍ਠੇਨ ਏਕਮੇਵਾਤਿ ਦਸ੍ਸੇਤਿ. ਕਥਂ ਪਨੇਤਂ ਸਕਂ ਚਿਤ੍ਤਂ ਨਿਕ੍ਖਿਪਿਤ੍ਵਾ ਇਤਰੇਸਂ ਚਿਤ੍ਤਵਸੇਨ ਵਤ੍ਤਿਂਸੂਤਿ? ਏਕਸ੍ਸ ਪਤ੍ਤੇ ਮਲਂ ਉਟ੍ਠਹਤਿ, ਏਕਸ੍ਸ ਚੀਵਰਂ ਕਿਲਿਟ੍ਠਂ ਹੋਤਿ, ਏਕਸ੍ਸ ਪਰਿਭਣ੍ਡਕਮ੍ਮਂ ਹੋਤਿ. ਤਤ੍ਥ ਯਸ੍ਸ ਪਤ੍ਤੇ ਮਲਂ ਉਟ੍ਠਿਤਂ, ਤੇਨ ਮਮਾਵੁਸੋ, ਪਤ੍ਤੇ ਮਲਂ ਉਟ੍ਠਿਤਂ ਪਚਿਤੁਂ ਵਟ੍ਟਤੀਤਿ ਵੁਤ੍ਤੇ ਇਤਰੇ ਮਯ੍ਹਂ ਚੀਵਰਂ ਕਿਲਿਟ੍ਠਂ ਧੋਵਿਤਬ੍ਬਂ, ਮਯ੍ਹਂ ਪਰਿਭਣ੍ਡਂ ਕਾਤਬ੍ਬਨ੍ਤਿ ਅਵਤ੍ਵਾ ਅਰਞ੍ਞਂ ਪਵਿਸਿਤ੍ਵਾ ਦਾਰੂਨਿ ਆਹਰਿਤ੍ਵਾ ਛਿਨ੍ਦਿਤ੍ਵਾ ਪਤ੍ਤਕਟਾਹੇ ਪਰਿਭਣ੍ਡਂ ਕਤ੍ਵਾ ਤਤੋ ਪਰਂ ਚੀਵਰਂ ਵਾ ਧੋਵਨ੍ਤਿ, ਪਰਿਭਣ੍ਡਂ ਵਾ ਕਰੋਨ੍ਤਿ. ਮਮਾਵੁਸੋ, ਚੀਵਰਂ ਕਿਲਿਟ੍ਠਂ ਧੋਵਿਤੁਂ ਵਟ੍ਟਤਿ, ਮਮ ਪਣ੍ਣਸਾਲਾ ਉਕ੍ਲਾਪਾ ਪਰਿਭਣ੍ਡਂ ਕਾਤੁਂ ਵਟ੍ਟਤੀਤਿ ਪਠਮਤਰਂ ਆਰੋਚਿਤੇਪਿ ਏਸੇਵ ਨਯੋ.

੩੨੭. ਸਾਧੁ ਸਾਧੁ, ਅਨੁਰੁਦ੍ਧਾਤਿ ਭਗਵਾ ਹੇਟ੍ਠਾ ਨ ਚ ਮਯਂ, ਭਨ੍ਤੇ, ਪਿਣ੍ਡਕੇਨ ਕਿਲਮਿਮ੍ਹਾਤਿ ਵੁਤ੍ਤੇ ਨ ਸਾਧੁਕਾਰਮਦਾਸਿ. ਕਸ੍ਮਾ? ਅਯਞ੍ਹਿ ਕਬਲ਼ੀਕਾਰੋ ਆਹਾਰੋ ਨਾਮ ਇਮੇਸਂ ਸਤ੍ਤਾਨਂ ਅਪਾਯਲੋਕੇਪਿ ਦੇਵਮਨੁਸ੍ਸਲੋਕੇਪਿ ਆਚਿਣ੍ਣਸਮਾਚਿਣ੍ਣੋਵ. ਅਯਂ ਪਨ ਲੋਕਸਨ੍ਨਿਵਾਸੋ ਯੇਭੁਯ੍ਯੇਨ ਵਿਵਾਦਪਕ੍ਖਨ੍ਦੋ, ਅਪਾਯਲੋਕੇ ਦੇਵਮਨੁਸ੍ਸਲੋਕੇਪਿ ਇਮੇ ਸਤ੍ਤਾ ਪਟਿਵਿਰੁਦ੍ਧਾ ਏਵ, ਏਤੇਸਂ ਸਾਮਗ੍ਗਿਕਾਲੋ ਦੁਲ੍ਲਭੋ, ਕਦਾਚਿਦੇਵ ਹੋਤੀਤਿ ਸਮਗ੍ਗਵਾਸਸ੍ਸ ਦੁਲ੍ਲਭਤ੍ਤਾ ਇਧ ਭਗਵਾ ਸਾਧੁਕਾਰਮਦਾਸਿ. ਇਦਾਨਿ ਤੇਸਂ ਅਪ੍ਪਮਾਦਲਕ੍ਖਣਂ ਪੁਚ੍ਛਨ੍ਤੋ ਕਚ੍ਚਿ ਪਨ ਵੋ, ਅਨੁਰੁਦ੍ਧਾਤਿਆਦਿਮਾਹ. ਤਤ੍ਥ ਵੋਤਿ ਨਿਪਾਤਮਤ੍ਤਂ ਪਚ੍ਚਤ੍ਤਵਚਨਂ ਵਾ, ਕਚ੍ਚਿ ਤੁਮ੍ਹੇਤਿ ਅਤ੍ਥੋ. ਅਮ੍ਹਾਕਨ੍ਤਿ ਅਮ੍ਹੇਸੁ ਤੀਸੁ ਜਨੇਸੁ. ਪਿਣ੍ਡਾਯ ਪਟਿਕ੍ਕਮਤੀਤਿ ਗਾਮੇ ਪਿਣ੍ਡਾਯ ਚਰਿਤ੍ਵਾ ਪਚ੍ਚਾਗਚ੍ਛਤਿ. ਅਵਕ੍ਕਾਰਪਾਤਿਨ੍ਤਿ ਅਤਿਰੇਕਪਿਣ੍ਡਪਾਤਂ ਅਪਨੇਤ੍ਵਾ ਠਪਨਤ੍ਥਾਯ ਏਕਂ ਸਮੁਗ੍ਗਪਾਤਿਂ ਧੋਵਿਤ੍ਵਾ ਠਪੇਤਿ.

ਯੋ ਪਚ੍ਛਾਤਿ ਤੇ ਕਿਰ ਥੇਰਾ ਨ ਏਕਤੋਵ ਭਿਕ੍ਖਾਚਾਰਂ ਪਵਿਸਨ੍ਤਿ, ਫਲਸਮਾਪਤ੍ਤਿਰਤਾ ਹੇਤੇ. ਪਾਤੋਵ ਸਰੀਰਪ੍ਪਟਿਜਗ੍ਗਨਂ ਕਤ੍ਵਾ ਵਤ੍ਤਪ੍ਪਟਿਪਤ੍ਤਿਂ ਪੂਰੇਤ੍ਵਾ ਸੇਨਾਸਨਂ ਪਵਿਸਿਤ੍ਵਾ ਕਾਲਪਰਿਚ੍ਛੇਦਂ ਕਤ੍ਵਾ ਫਲਸਮਾਪਤ੍ਤਿਂ ਅਪ੍ਪੇਤ੍ਵਾ ਨਿਸੀਦਨ੍ਤਿ. ਤੇਸੁ ਯੋ ਪਠਮਤਰਂ ਨਿਸਿਨ੍ਨੋ ਅਤ੍ਤਨੋ ਕਾਲਪਰਿਚ੍ਛੇਦਵਸੇਨ ਪਠਮਤਰਂ ਉਟ੍ਠਾਤਿ; ਸੋ ਪਿਣ੍ਡਾਯ ਚਰਿਤ੍ਵਾ ਪਟਿਨਿਵਤ੍ਤੋ ਭਤ੍ਤਕਿਚ੍ਚਟ੍ਠਾਨਂ ਆਗਨ੍ਤ੍ਵਾ ਜਾਨਾਤਿ – ‘‘ਦ੍ਵੇ ਭਿਕ੍ਖੂ ਪਚ੍ਛਾ, ਅਹਂ ਪਠਮਤਰਂ ਆਗਤੋ’’ਤਿ. ਅਥ ਪਤ੍ਤਂ ਪਿਦਹਿਤ੍ਵਾ ਆਸਨਪਞ੍ਞਾਪਨਾਦੀਨਿ ਕਤ੍ਵਾ ਯਦਿ ਪਤ੍ਤੇ ਪਟਿਵਿਸਮਤ੍ਤਮੇਵ ਹੋਤਿ, ਨਿਸੀਦਿਤ੍ਵਾ ਭੁਞ੍ਜਤਿ. ਯਦਿ ਅਤਿਰੇਕਂ ਹੋਤਿ, ਅਵਕ੍ਕਾਰਪਾਤਿਯਂ ਪਕ੍ਖਿਪਿਤ੍ਵਾ ਪਾਤਿਂ ਪਿਧਾਯ ਭੁਞ੍ਜਤਿ. ਕਤਭਤ੍ਤਕਿਚ੍ਚੋ ਪਤ੍ਤਂ ਧੋਵਿਤ੍ਵਾ ਵੋਦਕਂ ਕਤ੍ਵਾ ਥਵਿਕਾਯ ਓਸਾਪੇਤ੍ਵਾ ਪਤ੍ਤਚੀਵਰਂ ਗਹੇਤ੍ਵਾ ਅਤ੍ਤਨੋ ਵਸਨਟ੍ਠਾਨਂ ਪਵਿਸਤਿ. ਦੁਤਿਯੋਪਿ ਆਗਨ੍ਤ੍ਵਾਵ ਜਾਨਾਤਿ – ‘‘ਏਕੋ ਪਠਮਂ ਆਗਤੋ, ਏਕੋ ਪਚ੍ਛਤੋ’’ਤਿ. ਸੋ ਸਚੇ ਪਤ੍ਤੇ ਭਤ੍ਤਂ ਪਮਾਣਮੇਵ ਹੋਤਿ, ਭੁਞ੍ਜਤਿ. ਸਚੇ ਮਨ੍ਦਂ, ਅਵਕ੍ਕਾਰਪਾਤਿਤੋ ਗਹੇਤ੍ਵਾ ਭੁਞ੍ਜਤਿ. ਸਚੇ ਅਤਿਰੇਕਂ ਹੋਤਿ, ਅਵਕ੍ਕਾਰਪਾਤਿਯਂ ਪਕ੍ਖਿਪਿਤ੍ਵਾ ਪਮਾਣਮੇਵ ਭੁਞ੍ਜਿਤ੍ਵਾ ਪੁਰਿਮਤ੍ਥੇਰੋ ਵਿਯ ਵਸਨਟ੍ਠਾਨਂ ਪਵਿਸਤਿ. ਤਤਿਯੋਪਿ ਆਗਨ੍ਤ੍ਵਾਵ ਜਾਨਾਤਿ – ‘‘ਦ੍ਵੇ ਪਠਮਂ ਆਗਤਾ, ਅਹਂ ਪਚ੍ਛਤੋ’’ਤਿ. ਸੋਪਿ ਦੁਤਿਯਤ੍ਥੇਰੋ ਵਿਯ ਭੁਞ੍ਜਿਤ੍ਵਾ ਕਤਭਤ੍ਤਕਿਚ੍ਚੋ ਪਤ੍ਤਂ ਧੋਵਿਤ੍ਵਾ ਵੋਦਕਂ ਕਤ੍ਵਾ ਥਵਿਕਾਯ ਓਸਾਪੇਤ੍ਵਾ ਆਸਨਾਨਿ ਉਕ੍ਖਿਪਿਤ੍ਵਾ ਪਟਿਸਾਮੇਤਿ; ਪਾਨੀਯਘਟੇ ਵਾ ਪਰਿਭੋਜਨੀਯਘਟੇ ਵਾ ਅਵਸੇਸਂ ਉਦਕਂ ਛਡ੍ਡੇਤ੍ਵਾ ਘਟੇ ਨਿਕੁਜ੍ਜਿਤ੍ਵਾ ਅਵਕ੍ਕਾਰਪਾਤਿਯਂ ਸਚੇ ਅਵਸੇਸਭਤ੍ਤਂ ਹੋਤਿ, ਤਂ ਵੁਤ੍ਤਨਯੇਨ ਜਹਿਤ੍ਵਾ ਪਾਤਿਂ ਧੋਵਿਤ੍ਵਾ ਪਟਿਸਾਮੇਤਿ; ਭਤ੍ਤਗ੍ਗਂ ਸਮ੍ਮਜ੍ਜਤਿ. ਤਤੋ ਕਚਵਰਂ ਛਡ੍ਡੇਤ੍ਵਾ ਸਮ੍ਮਜ੍ਜਨਿਂ ਉਕ੍ਖਿਪਿਤ੍ਵਾ ਉਪਚਿਕਾਹਿ ਮੁਤ੍ਤਟ੍ਠਾਨੇ ਠਪੇਤ੍ਵਾ ਪਤ੍ਤਚੀਵਰਮਾਦਾਯ ਵਸਨਟ੍ਠਾਨਂ ਪਵਿਸਤਿ. ਇਦਂ ਥੇਰਾਨਂ ਬਹਿਵਿਹਾਰੇ ਅਰਞ੍ਞੇ ਭਤ੍ਤਕਿਚ੍ਚਕਰਣਟ੍ਠਾਨੇ ਭੋਜਨਸਾਲਾਯਂ ਵਤ੍ਤਂ. ਇਦਂ ਸਨ੍ਧਾਯ, ‘‘ਯੋ ਪਚ੍ਛਾ’’ਤਿਆਦਿ ਵੁਤ੍ਤਂ.

ਯੋ ਪਸ੍ਸਤੀਤਿਆਦਿ ਪਨ ਨੇਸਂ ਅਨ੍ਤੋਵਿਹਾਰੇ ਵਤ੍ਤਨ੍ਤਿ ਵੇਦਿਤਬ੍ਬਂ. ਤਤ੍ਥ ਵਚ੍ਚਘਟਨ੍ਤਿ ਆਚਮਨਕੁਮ੍ਭਿਂ. ਰਿਤ੍ਤਨ੍ਤਿ ਰਿਤ੍ਤਕਂ. ਤੁਚ੍ਛਨ੍ਤਿ ਤਸ੍ਸੇਵ ਵੇਵਚਨਂ. ਅਵਿਸਯ੍ਹਨ੍ਤਿ ਉਕ੍ਖਿਪਿਤੁਂ ਅਸਕ੍ਕੁਣੇਯ੍ਯਂ, ਅਤਿਭਾਰਿਯਂ. ਹਤ੍ਥਵਿਕਾਰੇਨਾਤਿ ਹਤ੍ਥਸਞ੍ਞਾਯ. ਤੇ ਕਿਰ ਪਾਨੀਯਘਟਾਦੀਸੁ ਯਂਕਿਞ੍ਚਿ ਤੁਚ੍ਛਕਂ ਗਹੇਤ੍ਵਾ ਪੋਕ੍ਖਰਣਿਂ ਗਨ੍ਤ੍ਵਾ ਅਨ੍ਤੋ ਚ ਬਹਿ ਚ ਧੋਵਿਤ੍ਵਾ ਉਦਕਂ ਪਰਿਸ੍ਸਾਵੇਤ੍ਵਾ ਤੀਰੇ ਠਪੇਤ੍ਵਾ ਅਞ੍ਞਂ ਭਿਕ੍ਖੁਂ ਹਤ੍ਥਵਿਕਾਰੇਨ ਆਮਨ੍ਤੇਨ੍ਤਿ, ਓਦਿਸ੍ਸ ਵਾ ਅਨੋਦਿਸ੍ਸ ਵਾ ਸਦ੍ਦਂ ਨ ਕਰੋਨ੍ਤਿ. ਕਸ੍ਮਾ ਓਦਿਸ੍ਸ ਸਦ੍ਦਂ ਨ ਕਰੋਨ੍ਤਿ? ਤਂ ਭਿਕ੍ਖੁਂ ਸਦ੍ਦੋ ਬਾਧੇਯ੍ਯਾਤਿ. ਕਸ੍ਮਾ ਅਨੋਦਿਸ੍ਸ ਸਦ੍ਦਂ ਨ ਕਰੋਨ੍ਤਿ? ਅਨੋਦਿਸ੍ਸ ਸਦ੍ਦੇ ਦਿਨ੍ਨੇ, ‘‘ਅਹਂ ਪੁਰੇ, ਅਹਂ ਪੁਰੇ’’ਤਿ ਦ੍ਵੇਪਿ ਨਿਕ੍ਖਮੇਯ੍ਯੁਂ, ਤਤੋ ਦ੍ਵੀਹਿ ਕਤ੍ਤਬ੍ਬਕਮ੍ਮੇ ਤਤਿਯਸ੍ਸ ਕਮ੍ਮਚ੍ਛੇਦੋ ਭਵੇਯ੍ਯ. ਸਂਯਤਪਦਸਦ੍ਦੋ ਪਨ ਹੁਤ੍ਵਾ ਅਪਰਸ੍ਸ ਭਿਕ੍ਖੁਨੋ ਦਿਵਾਟ੍ਠਾਨਸਨ੍ਤਿਕਂ ਗਨ੍ਤ੍ਵਾ ਤੇਨ ਦਿਟ੍ਠਭਾਵਂ ਞਤ੍ਵਾ ਹਤ੍ਥਸਞ੍ਞਂ ਕਰੋਤਿ, ਤਾਯ ਸਞ੍ਞਾਯ ਇਤਰੋ ਆਗਚ੍ਛਤਿ, ਤਤੋ ਦ੍ਵੇ ਜਨਾ ਹਤ੍ਥੇਨ ਹਤ੍ਥਂ ਸਂਸਿਬ੍ਬਨ੍ਤਾ ਦ੍ਵੀਸੁ ਹਤ੍ਥੇਸੁ ਠਪੇਤ੍ਵਾ ਉਪਟ੍ਠਪੇਨ੍ਤਿ. ਤਂ ਸਨ੍ਧਾਯਾਹ – ‘‘ਹਤ੍ਥਵਿਕਾਰੇਨ ਦੁਤਿਯਂ ਆਮਨ੍ਤੇਤ੍ਵਾ ਹਤ੍ਥਵਿਲਙ੍ਘਕੇਨ ਉਪਟ੍ਠਪੇਮਾ’’ਤਿ.

ਪਞ੍ਚਾਹਿਕਂ ਖੋ ਪਨਾਤਿ ਚਾਤੁਦ੍ਦਸੇ ਪਨ੍ਨਰਸੇ ਅਟ੍ਠਮਿਯਨ੍ਤਿ ਇਦਂ ਤਾਵ ਪਕਤਿਧਮ੍ਮਸ੍ਸਵਨਮੇਵ, ਤਂ ਅਖਣ੍ਡਂ ਕਤ੍ਵਾ ਪਞ੍ਚਮੇ ਪਞ੍ਚਮੇ ਦਿਵਸੇ ਦ੍ਵੇ ਥੇਰਾ ਨਾਤਿਵਿਕਾਲੇ ਨ੍ਹਾਯਿਤ੍ਵਾ ਅਨੁਰੁਦ੍ਧਤ੍ਥੇਰਸ੍ਸ ਵਸਨਟ੍ਠਾਨਂ ਗਚ੍ਛਨ੍ਤਿ. ਤਤ੍ਥ ਤਯੋਪਿ ਨਿਸੀਦਿਤ੍ਵਾ ਤਿਣ੍ਣਂ ਪਿਟਕਾਨਂ ਅਞ੍ਞਤਰਸ੍ਮਿਂ ਅਞ੍ਞਮਞ੍ਞਂ ਪਞ੍ਹਂ ਪੁਚ੍ਛਨ੍ਤਿ, ਅਞ੍ਞਮਞ੍ਞਂ ਵਿਸ੍ਸਜ੍ਜੇਨ੍ਤਿ, ਤੇਸਂ ਏਵਂ ਕਰੋਨ੍ਤਾਨਂਯੇਵ ਅਰੁਣਂ ਉਗ੍ਗਚ੍ਛਤਿ. ਤਂ ਸਨ੍ਧਾਯੇਤਂ ਵੁਤ੍ਤਂ. ਏਤ੍ਤਾਵਤਾ ਥੇਰੇਨ ਭਗਵਤਾ ਅਪ੍ਪਮਾਦਲਕ੍ਖਣਂ ਪੁਚ੍ਛਿਤੇਨ ਪਮਾਦਟ੍ਠਾਨੇਸੁਯੇਵ ਅਪ੍ਪਮਾਦਲਕ੍ਖਣਂ ਵਿਸ੍ਸਜ੍ਜਿਤਂ ਹੋਤਿ. ਅਞ੍ਞੇਸਞ੍ਹਿ ਭਿਕ੍ਖੂਨਂ ਭਿਕ੍ਖਾਚਾਰਂ ਪਵਿਸਨਕਾਲੋ, ਨਿਕ੍ਖਮਨਕਾਲੋ, ਨਿਵਾਸਨਪਰਿਵਤ੍ਤਨਂ, ਚੀਵਰਪਾਰੁਪਨਂ, ਅਨ੍ਤੋਗਾਮੇ ਪਿਣ੍ਡਾਯ ਚਰਣਂ ਧਮ੍ਮਕਥਨਂ, ਅਨੁਮੋਦਨਂ, ਗਾਮਤੋ ਨਿਕ੍ਖਮਿਤ੍ਵਾ ਭਤ੍ਤਕਿਚ੍ਚਕਰਣਂ, ਪਤ੍ਤਧੋਵਨਂ, ਪਤ੍ਤਓਸਾਪਨਂ, ਪਤ੍ਤਚੀਵਰਪਟਿਸਾਮਨਨ੍ਤਿ ਪਪਞ੍ਚਕਰਣਟ੍ਠਾਨਾਨਿ ਏਤਾਨਿ. ਤਸ੍ਮਾ ਥੇਰੋ ਅਮ੍ਹਾਕਂ ਏਤ੍ਤਕਂ ਠਾਨਂ ਮੁਞ੍ਚਿਤ੍ਵਾ ਪਮਾਦਕਾਲੋ ਨਾਮ ਨਤ੍ਥੀਤਿ ਦਸ੍ਸੇਨ੍ਤੋ ਪਮਾਦਟ੍ਠਾਨੇਸੁਯੇਵ ਅਪ੍ਪਮਾਦਲਕ੍ਖਣਂ ਵਿਸ੍ਸਜ੍ਜੇਸਿ.

੩੨੮. ਅਥਸ੍ਸ ਭਗਵਾ ਸਾਧੁਕਾਰਂ ਦਤ੍ਵਾ ਪਠਮਜ੍ਝਾਨਂ ਪੁਚ੍ਛਨ੍ਤੋ ਪੁਨ ਅਤ੍ਥਿ ਪਨ ਵੋਤਿਆਦਿਮਾਹ. ਤਤ੍ਥ ਉਤ੍ਤਰਿ ਮਨੁਸ੍ਸਧਮ੍ਮਾਤਿ ਮਨੁਸ੍ਸਧਮ੍ਮਤੋ ਉਤ੍ਤਰਿ. ਅਲਮਰਿਯਞਾਣਦਸ੍ਸਨਵਿਸੇਸੋਤਿ ਅਰਿਯਭਾਵਕਰਣਸਮਤ੍ਥੋ ਞਾਣਵਿਸੇਸੋ. ਕਿਞ੍ਹਿ ਨੋ ਸਿਯਾ, ਭਨ੍ਤੇਤਿ ਕਸ੍ਮਾ, ਭਨ੍ਤੇ, ਨਾਧਿਗਤੋ ਭਵਿਸ੍ਸਤਿ, ਅਧਿਗਤੋਯੇਵਾਤਿ. ਯਾਵ ਦੇਵਾਤਿ ਯਾਵ ਏਵ.

੩੨੯. ਏਵਂ ਪਠਮਜ੍ਝਾਨਾਧਿਗਮੇ ਬ੍ਯਾਕਤੇ ਦੁਤਿਯਜ੍ਝਾਨਾਦੀਨਿ ਪੁਚ੍ਛਨ੍ਤੋ ਏਤਸ੍ਸ ਪਨ ਵੋਤਿਆਦਿਮਾਹ. ਤਤ੍ਥ ਸਮਤਿਕ੍ਕਮਾਯਾਤਿ ਸਮਤਿਕ੍ਕਮਤ੍ਥਾਯ. ਪਟਿਪ੍ਪਸ੍ਸਦ੍ਧਿਯਾਤਿ ਪਟਿਪ੍ਪਸ੍ਸਦ੍ਧਤ੍ਥਾਯ. ਸੇਸਂ ਸਬ੍ਬਤ੍ਥ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਪਚ੍ਛਿਮਪਞ੍ਹੇ ਪਨ ਲੋਕੁਤ੍ਤਰਞਾਣਦਸ੍ਸਨਵਸੇਨ ਅਧਿਗਤਂ ਨਿਰੋਧਸਮਾਪਤ੍ਤਿਂ ਪੁਚ੍ਛਨ੍ਤੋ ਅਲਮਰਿਯਞਾਣਦਸ੍ਸਨਵਿਸੇਸੋਤਿ ਆਹ. ਥੇਰੋਪਿ ਪੁਚ੍ਛਾਨੁਰੂਪੇਨੇਵ ਬ੍ਯਾਕਾਸਿ. ਤਤ੍ਥ ਯਸ੍ਮਾ ਵੇਦਯਿਤਸੁਖਤੋ ਅਵੇਦਯਿਤਸੁਖਂ ਸਨ੍ਤਤਰਂ ਪਣੀਤਤਰਂ ਹੋਤਿ, ਤਸ੍ਮਾ ਅਞ੍ਞਂ ਫਾਸੁਵਿਹਾਰਂ ਉਤ੍ਤਰਿਤਰਂ ਵਾ ਪਣੀਤਤਰਂ ਵਾ ਨ ਸਮਨੁਪਸ੍ਸਾਮਾਤਿ ਆਹ.

੩੩੦. ਧਮ੍ਮਿਯਾ ਕਥਾਯਾਤਿ ਸਾਮਗ੍ਗਿਰਸਾਨਿਸਂਸਪ੍ਪਟਿਸਂਯੁਤ੍ਤਾਯ ਧਮ੍ਮਿਯਾ ਕਥਾਯ. ਸਬ੍ਬੇਪਿ ਤੇ ਚਤੂਸੁ ਸਚ੍ਚੇਸੁ ਪਰਿਨਿਟ੍ਠਿਤਕਿਚ੍ਚਾ, ਤੇਨ ਤੇਸਂ ਪਟਿਵੇਧਤ੍ਥਾਯ ਕਿਞ੍ਚਿ ਕਥੇਤਬ੍ਬਂ ਨਤ੍ਥਿ. ਸਾਮਗ੍ਗਿਰਸੇਨ ਪਨ ਅਯਞ੍ਚ ਅਯਞ੍ਚ ਆਨਿਸਂਸੋਤਿ ਸਾਮਗ੍ਗਿਰਸਾਨਿਸਂਸਮੇਵ ਨੇਸਂ ਭਗਵਾ ਕਥੇਸਿ. ਭਗਵਨ੍ਤਂ ਅਨੁਸਂਯਾਯਿਤ੍ਵਾਤਿ ਅਨੁਗਨ੍ਤ੍ਵਾ. ਤੇ ਕਿਰ ਭਗਵਤੋ ਪਤ੍ਤਚੀਵਰਂ ਗਹੇਤ੍ਵਾ ਥੋਕਂ ਅਗਮਂਸੁ, ਅਥ ਭਗਵਾ ਵਿਹਾਰਸ੍ਸ ਪਰਿਵੇਣਪਰਿਯਨ੍ਤਂ ਗਤਕਾਲੇ, ‘‘ਆਹਰਥ ਮੇ ਪਤ੍ਤਚੀਵਰਂ, ਤੁਮ੍ਹੇ ਇਧੇਵ ਤਿਟ੍ਠਥਾ’’ਤਿ ਪਕ੍ਕਾਮਿ. ਤਤੋ ਪਟਿਨਿਵਤ੍ਤਿਤ੍ਵਾਤਿ ਤਤੋ ਠਿਤਟ੍ਠਾਨਤੋ ਨਿਵਤ੍ਤਿਤ੍ਵਾ. ਕਿਂ ਨੁ ਖੋ ਮਯਂ ਆਯਸ੍ਮਤੋਤਿ ਭਗਵਨ੍ਤਂ ਨਿਸ੍ਸਾਯ ਪਬ੍ਬਜ੍ਜਾਦੀਨਿ ਅਧਿਗਨ੍ਤ੍ਵਾਪਿ ਅਤ੍ਤਨੋ ਗੁਣਕਥਾਯ ਅਟ੍ਟਿਯਮਾਨਾ ਅਧਿਗਮਪ੍ਪਿਚ੍ਛਤਾਯ ਆਹਂਸੁ. ਇਮਾਸਞ੍ਚ ਇਮਾਸਞ੍ਚਾਤਿ ਪਠਮਜ੍ਝਾਨਾਦੀਨਂ ਲੋਕਿਯਲੋਕੁਤ੍ਤਰਾਨਂ. ਚੇਤਸਾ ਚੇਤੋ ਪਰਿਚ੍ਚ ਵਿਦਿਤੋਤਿ ਅਜ੍ਜ ਮੇ ਆਯਸ੍ਮਨ੍ਤੋ ਲੋਕਿਯਸਮਾਪਤ੍ਤਿਯਾ ਵੀਤਿਨਾਮੇਸੁਂ, ਅਜ੍ਜ ਲੋਕੁਤ੍ਤਰਾਯਾਤਿ ਏਵਂ ਚਿਤ੍ਤੇਨ ਚਿਤ੍ਤਂ ਪਰਿਚ੍ਛਿਨ੍ਦਿਤ੍ਵਾ ਵਿਦਿਤਂ. ਦੇਵਤਾਪਿ ਮੇਤਿ, ਭਨ੍ਤੇ ਅਨੁਰੁਦ੍ਧ, ਅਜ੍ਜ ਅਯ੍ਯੋ ਨਨ੍ਦਿਯਤ੍ਥੇਰੋ, ਅਜ੍ਜ ਅਯ੍ਯੋ ਕਿਮਿਲਤ੍ਥੇਰੋ ਇਮਾਯ ਚ ਇਮਾਯ ਚ ਸਮਾਪਤ੍ਤਿਯਾ ਵੀਤਿਨਾਮੇਸੀਤਿ ਏਵਮਾਰੋਚੇਸੁਨ੍ਤਿ ਅਤ੍ਥੋ. ਪਞ੍ਹਾਭਿਪੁਟ੍ਠੇਨਾਤਿ ਤਮ੍ਪਿ ਮਯਾ ਸਯਂ ਵਿਦਿਤਨ੍ਤਿ ਵਾ ਦੇਵਤਾਹਿ ਆਰੋਚਿਤਨ੍ਤਿ ਵਾ ਏਤ੍ਤਕੇਨੇਵ ਮੁਖਂ ਮੇ ਸਜ੍ਜਨ੍ਤਿ ਕਥਂ ਸਮੁਟ੍ਠਾਪੇਤ੍ਵਾ ਅਪੁਟ੍ਠੇਨੇਵ ਮੇ ਨ ਕਥਿਤਂ. ਭਗਵਤਾ ਪਨ ਪਞ੍ਹਾਭਿਪੁਟ੍ਠੇਨ ਪਞ੍ਹਂ ਅਭਿਪੁਚ੍ਛਿਤੇਨ ਸਤਾ ਬ੍ਯਾਕਤਂ, ਤਤ੍ਰ ਮੇ ਕਿਂ ਨ ਰੋਚਥਾਤਿ ਆਹ.

੩੩੧. ਦੀਘੋਤਿ ‘‘ਮਣਿ ਮਾਣਿਵਰੋ ਦੀਘੋ, ਅਥੋ ਸੇਰੀਸਕੋ ਸਹਾ’’ਤਿ (ਦੀ. ਨਿ. ੩.੨੯੩) ਏਵਂ ਆਗਤੋ ਅਟ੍ਠਵੀਸਤਿਯਾ ਯਕ੍ਖਸੇਨਾਪਤੀਨਂ ਅਬ੍ਭਨ੍ਤਰੋ ਏਕੋ ਦੇਵਰਾਜਾ. ਪਰਜਨੋਤਿ ਤਸ੍ਸੇਵ ਯਕ੍ਖਸ੍ਸ ਨਾਮਂ. ਯੇਨ ਭਗਵਾ ਤੇਨੁਪਸਙ੍ਕਮੀਤਿ ਸੋ ਕਿਰ ਵੇਸ੍ਸਵਣੇਨ ਪੇਸਿਤੋ ਏਤਂ ਠਾਨਂ ਗਚ੍ਛਨ੍ਤੋ ਭਗਵਨ੍ਤਂ ਸਯਂ ਪਤ੍ਤਚੀਵਰਂ ਗਹੇਤ੍ਵਾ ਗਿਞ੍ਜਕਾਵਸਥਤੋ ਗੋਸਿਙ੍ਗਸਾਲਵਨਸ੍ਸ ਅਨ੍ਤਰੇ ਦਿਸ੍ਵਾ ਭਗਵਾ ਅਤ੍ਤਨਾ ਪਤ੍ਤਚੀਵਰਂ ਗਹੇਤ੍ਵਾ ਗੋਸਿਙ੍ਗਸਾਲਵਨੇ ਤਿਣ੍ਣਂ ਕੁਲਪੁਤ੍ਤਾਨਂ ਸਨ੍ਤਿਕਂ ਗਚ੍ਛਤਿ. ਅਜ੍ਜ ਮਹਤੀ ਧਮ੍ਮਦੇਸਨਾ ਭਵਿਸ੍ਸਤਿ. ਮਯਾਪਿ ਤਸ੍ਸਾ ਦੇਸਨਾਯ ਭਾਗਿਨਾ ਭਵਿਤਬ੍ਬਨ੍ਤਿ ਅਦਿਸ੍ਸਮਾਨੇਨ ਕਾਯੇਨ ਸਤ੍ਥੁ ਪਦਾਨੁਪਦਿਕੋ ਗਨ੍ਤ੍ਵਾ ਅਵਿਦੂਰੇ ਠਤ੍ਵਾ ਧਮ੍ਮਂ ਸੁਤ੍ਵਾ ਸਤ੍ਥਰਿ ਗਚ੍ਛਨ੍ਤੇਪਿ ਨ ਗਤੋ, – ‘‘ਇਮੇ ਥੇਰਾ ਕਿਂ ਕਰਿਸ੍ਸਨ੍ਤੀ’’ਤਿ ਦਸ੍ਸਨਤ੍ਥਂ ਪਨ ਤਤ੍ਥੇਵ ਠਿਤੋ. ਅਥ ਤੇ ਦ੍ਵੇ ਥੇਰੇ ਅਨੁਰੁਦ੍ਧਤ੍ਥੇਰਂ ਪਲਿਵੇਠੇਨ੍ਤੇ ਦਿਸ੍ਵਾ, – ‘‘ਇਮੇ ਥੇਰਾ ਭਗਵਨ੍ਤਂ ਨਿਸ੍ਸਾਯ ਪਬ੍ਬਜ੍ਜਾਦਯੋ ਸਬ੍ਬਗੁਣੇ ਅਧਿਗਨ੍ਤ੍ਵਾਪਿ ਭਗਵਤੋਵ ਮਚ੍ਛਰਾਯਨ੍ਤਿ, ਨ ਸਹਨ੍ਤਿ, ਅਤਿਵਿਯ ਨਿਲੀਯਨ੍ਤਿ ਪਟਿਚ੍ਛਾਦੇਨ੍ਤਿ, ਨ ਦਾਨਿ ਤੇਸਂ ਪਟਿਚ੍ਛਾਦੇਤੁਂ ਦਸ੍ਸਾਮਿ, ਪਥਵਿਤੋ ਯਾਵ ਬ੍ਰਹ੍ਮਲੋਕਾ ਏਤੇਸਂ ਗੁਣੇ ਪਕਾਸੇਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ.

ਲਾਭਾ ਵਤ, ਭਨ੍ਤੇਤਿ ਯੇ, ਭਨ੍ਤੇ, ਵਜ੍ਜਿਰਟ੍ਠਵਾਸਿਨੋ ਭਗਵਨ੍ਤਞ੍ਚ ਇਮੇ ਚ ਤਯੋ ਕੁਲਪੁਤ੍ਤੇ ਪਸ੍ਸਿਤੁਂ ਲਭਨ੍ਤਿ, ਵਨ੍ਦਿਤੁਂ ਲਭਨ੍ਤਿ, ਦੇਯ੍ਯਧਮ੍ਮਂ ਦਾਤੁਂ ਲਭਨ੍ਤਿ, ਧਮ੍ਮਂ ਸੋਤੁਂ ਲਭਨ੍ਤਿ, ਤੇਸਂ ਲਾਭਾ, ਭਨ੍ਤੇ, ਵਜ੍ਜੀਨਨ੍ਤਿ ਅਤ੍ਥੋ. ਸਦ੍ਦਂ ਸੁਤ੍ਵਾਤਿ ਸੋ ਕਿਰ ਅਤ੍ਤਨੋ ਯਕ੍ਖਾਨੁਭਾਵੇਨ ਮਹਨ੍ਤਂ ਸਦ੍ਦਂ ਕਤ੍ਵਾ ਸਕਲਂ ਵਜ੍ਜਿਰਟ੍ਠਂ ਅਜ੍ਝੋਤ੍ਥਰਨ੍ਤੋ ਤਂ ਵਾਚਂ ਨਿਚ੍ਛਾਰੇਸਿ. ਤੇਨ ਚਸ੍ਸ ਤੇਸੁ ਰੁਕ੍ਖਪਬ੍ਬਤਾਦੀਸੁ ਅਧਿਵਤ੍ਥਾ ਭੁਮ੍ਮਾ ਦੇਵਤਾ ਸਦ੍ਦਂ ਅਸ੍ਸੋਸੁਂ. ਤਂ ਸਨ੍ਧਾਯ ਵੁਤ੍ਤਂ – ‘‘ਸਦ੍ਦਂ ਸੁਤ੍ਵਾ’’ਤਿ. ਅਨੁਸ੍ਸਾਵੇਸੁਨ੍ਤਿ ਮਹਨ੍ਤਂ ਸਦ੍ਦਂ ਸੁਤ੍ਵਾ ਸਾਵੇਸੁਂ. ਏਸ ਨਯੋ ਸਬ੍ਬਤ੍ਥ. ਯਾਵ ਬ੍ਰਹ੍ਮਲੋਕਾਤਿ ਯਾਵ ਅਕਨਿਟ੍ਠਬ੍ਰਹ੍ਮਲੋਕਾ. ਤਞ੍ਚੇਪਿ ਕੁਲਨ੍ਤਿ, ‘‘ਅਮ੍ਹਾਕਂ ਕੁਲਤੋ ਨਿਕ੍ਖਮਿਤ੍ਵਾ ਇਮੇ ਕੁਲਪੁਤ੍ਤਾ ਪਬ੍ਬਜਿਤਾ ਏਵਂ ਸੀਲਵਨ੍ਤੋ ਗੁਣਵਨ੍ਤੋ ਆਚਾਰਸਮ੍ਪਨ੍ਨਾ ਕਲ੍ਯਾਣਧਮ੍ਮਾ’’ਤਿ ਏਵਂ ਤਞ੍ਚੇਪਿ ਕੁਲਂ ਏਤੇ ਤਯੋ ਕੁਲਪੁਤ੍ਤੇ ਪਸਨ੍ਨਚਿਤ੍ਤਂ ਅਨੁਸ੍ਸਰੇਯ੍ਯਾਤਿ ਏਵਂ ਸਬ੍ਬਤ੍ਥ ਅਤ੍ਥੋ ਦਟ੍ਠਬ੍ਬੋ. ਇਤਿ ਭਗਵਾ ਯਥਾਨੁਸਨ੍ਧਿਨਾਵ ਦੇਸਨਂ ਨਿਟ੍ਠਪੇਸੀਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਚੂਲ਼ਗੋਸਿਙ੍ਗਸੁਤ੍ਤਵਣ੍ਣਨਾ ਨਿਟ੍ਠਿਤਾ.