੨. ਮਹਾਗੋਸਿਙ੍ਗਸੁਤ੍ਤਵਣ੍ਣਨਾ
੩੩੨. ਏਵਂ ਮੇ ਸੁਤਨ੍ਤਿ ਮਹਾਗੋਸਿਙ੍ਗਸੁਤ੍ਤਂ. ਤਤ੍ਥ ਗੋਸਿਙ੍ਗਸਾਲਵਨਦਾਯੇਤਿ ਇਦਂ ਵਸਨਟ੍ਠਾਨਦਸ੍ਸਨਤ੍ਥਂ ਵੁਤ੍ਤਂ. ਅਞ੍ਞੇਸੁ ਹਿ ਸੁਤ੍ਤੇਸੁ, ‘‘ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ’’ਤਿ ਏਵਂ ਪਠਮਂ ਗੋਚਰਗਾਮਂ ਦਸ੍ਸੇਤ੍ਵਾ ਪਚ੍ਛਾ ਵਸਨਟ੍ਠਾਨਂ ਦਸ੍ਸੇਤਿ. ਇਮਸ੍ਮਿਂ ਪਨ ਮਹਾਗੋਸਿਙ੍ਗਸੁਤ੍ਤੇ ਭਗਵਤੋ ਗੋਚਰਗਾਮੋ ਅਨਿਬਨ੍ਧੋ, ਕੋਚਿਦੇਵ ਗੋਚਰਗਾਮੋ ਭਵਿਸ੍ਸਤਿ. ਤਸ੍ਮਾ ਵਸਨਟ੍ਠਾਨਮੇਵ ਪਰਿਦੀਪਿਤਂ. ਅਰਞ੍ਞਨਿਦਾਨਕਂ ਨਾਮੇਤਂ ਸੁਤ੍ਤਨ੍ਤਿ. ਸਮ੍ਬਹੁਲੇਹੀਤਿ ਬਹੁਕੇਹਿ. ਅਭਿਞ੍ਞਾਤੇਹਿ ਅਭਿਞ੍ਞਾਤੇਹੀਤਿ ਸਬ੍ਬਤ੍ਥ ਵਿਸ੍ਸੁਤੇਹਿ ਪਾਕਟੇਹਿ. ਥੇਰੇਹਿ ਸਾਵਕੇਹਿ ਸਦ੍ਧਿਨ੍ਤਿ ਪਾਤਿਮੋਕ੍ਖਸਂਵਰਾਦੀਹਿ ਥਿਰਕਾਰਕੇਹੇਵ ਧਮ੍ਮੇਹਿ ਸਮਨ੍ਨਾਗਤਤ੍ਤਾ ਥੇਰੇਹਿ, ਸਵਨਨ੍ਤੇ ਜਾਤਤ੍ਤਾ ਸਾਵਕੇਹਿ ਸਦ੍ਧਿਂ ਏਕਤੋ. ਇਦਾਨਿ ਤੇ ਥੇਰੇ ਸਰੂਪਤੋ ਦਸ੍ਸੇਨ੍ਤੋ, ਆਯਸ੍ਮਤਾ ਚ ਸਾਰਿਪੁਤ੍ਤੇਨਾਤਿਆਦਿਮਾਹ. ਤਤ੍ਥਾਯਸ੍ਮਾ ਸਾਰਿਪੁਤ੍ਤੋ ਅਤ੍ਤਨੋ ਸੀਲਾਦੀਹਿ ਗੁਣੇਹਿ ਬੁਦ੍ਧਸਾਸਨੇ ਅਭਿਞ੍ਞਾਤੋ. ਚਕ੍ਖੁਮਨ੍ਤਾਨਂ ਗਗਨਮਜ੍ਝੇ ਠਿਤੋ ਸੂਰਿਯੋ ਵਿਯ ਚਨ੍ਦੋ ਵਿਯ, ਸਮੁਦ੍ਦਤੀਰੇ ਠਿਤਾਨਂ ਸਾਗਰੋ ਵਿਯ ਚ ਪਾਕਟੋ ਪਞ੍ਞਾਤੋ. ਨ ਕੇਵਲਞ੍ਚਸ੍ਸ ਇਮਸ੍ਮਿਂ ਸੁਤ੍ਤੇ ਆਗਤਗੁਣਵਸੇਨੇਵ ਮਹਨ੍ਤਤਾ ਵੇਦਿਤਬ੍ਬਾ, ਇਤੋ ਅਞ੍ਞੇਸਂ ਧਮ੍ਮਦਾਯਾਦਸੁਤ੍ਤਂ ਅਨਙ੍ਗਣਸੁਤ੍ਤਂ ਸਮ੍ਮਾਦਿਟ੍ਠਿਸੁਤ੍ਤਂ ਸੀਹਨਾਦਸੁਤ੍ਤਂ ਰਥਵਿਨੀਤਂ ਮਹਾਹਤ੍ਥਿਪਦੋਪਮਂ ਮਹਾਵੇਦਲ੍ਲਂ ਚਾਤੁਮਸੁਤ੍ਤਂ ਦੀਘਨਖਂ ਅਨੁਪਦਸੁਤ੍ਤਂ ਸੇਵਿਤਬ੍ਬਾਸੇਵਿਤਬ੍ਬਸੁਤ੍ਤਂ ਸਚ੍ਚਵਿਭਙ੍ਗਸੁਤ੍ਤਂ ਪਿਣ੍ਡਪਾਤਪਾਰਿਸੁਦ੍ਧਿ ਸਮ੍ਪਸਾਦਨੀਯਂ ਸਙ੍ਗੀਤਿਸੁਤ੍ਤਂ ਦਸੁਤ੍ਤਰਸੁਤ੍ਤਂ ਪਵਾਰਣਾਸੁਤ੍ਤਂ (ਸਂ. ਨਿ. ੧.੨੧੫ ਆਦਯੋ) ਸੁਸਿਮਸੁਤ੍ਤਂ ਥੇਰਪਞ੍ਹਸੁਤ੍ਤਂ ਮਹਾਨਿਦ੍ਦੇਸੋ ਪਟਿਸਮ੍ਭਿਦਾਮਗ੍ਗੋ ਥੇਰਸੀਹਨਾਦਸੁਤ੍ਤਂ ਅਭਿਨਿਕ੍ਖਮਨਂ ਏਤਦਗ੍ਗਨ੍ਤਿ ਇਮੇਸਮ੍ਪਿ ਸੁਤ੍ਤਾਨਂ ਵਸੇਨ ਥੇਰਸ੍ਸ ਮਹਨ੍ਤਤਾ ਵੇਦਿਤਬ੍ਬਾ. ਏਤਦਗ੍ਗਸ੍ਮਿਞ੍ਹਿ, ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਮਹਾਪਞ੍ਞਾਨਂ ਯਦਿਦਂ ਸਾਰਿਪੁਤ੍ਤੋ’’ਤਿ (ਅ. ਨਿ. ੧.੧੮੮-੧੮੯) ਵੁਤ੍ਤਂ.
ਮਹਾਮੋਗ੍ਗਲ੍ਲਾਨੋਪਿ ਸੀਲਾਦਿਗੁਣੇਹਿ ਚੇਵ ਇਮਸ੍ਮਿਂ ਸੁਤ੍ਤੇ ਆਗਤਗੁਣੇਹਿ ਚ ਥੇਰੋ ਵਿਯ ਅਭਿਞ੍ਞਾਤੋ ਪਾਕਟੋ ਮਹਾ. ਅਪਿਚਸ੍ਸ ਅਨੁਮਾਨਸੁਤ੍ਤਂ, ਚੂਲ਼ਤਣ੍ਹਾਸਙ੍ਖਯਸੁਤ੍ਤਂ ਮਾਰਤਜ੍ਜਨਿਯਸੁਤ੍ਤਂ ਪਾਸਾਦਕਮ੍ਪਨਂ ਸਕਲਂ ਇਦ੍ਧਿਪਾਦਸਂਯੁਤ੍ਤਂ ਨਨ੍ਦੋਪਨਨ੍ਦਦਮਨਂ ਯਮਕਪਾਟਿਹਾਰਿਯਕਾਲੇ ਦੇਵਲੋਕਗਮਨਂ ਵਿਮਾਨਵਤ੍ਥੁ ਪੇਤਵਤ੍ਥੁ ਥੇਰਸ੍ਸ ਅਭਿਨਿਕ੍ਖਮਨਂ ਏਤਦਗ੍ਗਨ੍ਤਿ ਇਮੇਸਮ੍ਪਿ ਵਸੇਨ ਮਹਨ੍ਤਭਾਵੋ ਵੇਦਿਤਬ੍ਬੋ. ਏਤਦਗ੍ਗਸ੍ਮਿਞ੍ਹਿ, ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਇਦ੍ਧਿਮਨ੍ਤਾਨਂ ਯਦਿਦਂ ਮਹਾਮੋਗ੍ਗਲ੍ਲਾਨੋ’’ਤਿ (ਅ. ਨਿ. ੧.੧੯੦) ਵੁਤ੍ਤਂ.
ਮਹਾਕਸ੍ਸਪੋਪਿ ਸੀਲਾਦਿਗੁਣੇਹਿ ਚੇਵ ਇਮਸ੍ਮਿਂ ਸੁਤ੍ਤੇ ਆਗਤਗੁਣੇਹਿ ਚ ਥੇਰੋ ਵਿਯ ਅਭਿਞ੍ਞਾਤੋ ਪਾਕਟੋ ਮਹਾ. ਅਪਿਚਸ੍ਸ ਚੀਵਰਪਰਿਵਤ੍ਤਨਸੁਤ੍ਤਂ ਜਿਣ੍ਣਚੀਵਰਸੁਤ੍ਤਂ (ਸਂ. ਨਿ. ੨.੧੫੪ ਆਦਯੋ) ਚਨ੍ਦੋਪਮਂ ਸਕਲਂ ਕਸ੍ਸਪਸਂਯੁਤ੍ਤਂ ਮਹਾਅਰਿਯਵਂਸਸੁਤ੍ਤਂ ਥੇਰਸ੍ਸ ਅਭਿਨਿਕ੍ਖਮਨਂ ਏਤਦਗ੍ਗਨ੍ਤਿ ਇਮੇਸਮ੍ਪਿ ਵਸੇਨ ਮਹਨ੍ਤਭਾਵੋ ਵੇਦਿਤਬ੍ਬੋ. ਏਤਦਗ੍ਗਸ੍ਮਿਞ੍ਹਿ, ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਧੁਤਵਾਦਾਨਂ ਯਦਿਦਂ ਮਹਾਕਸ੍ਸਪੋ’’ਤਿ (ਅ. ਨਿ. ੧.੧੯੧) ਵੁਤ੍ਤਂ.
ਅਨੁਰੁਦ੍ਧਤ੍ਥੇਰੋਪਿ ਸੀਲਾਦਿਗੁਣੇਹਿ ਚੇਵ ਇਮਸ੍ਮਿਂ ਸੁਤ੍ਤੇ ਆਗਤਗੁਣੇਹਿ ਚ ਥੇਰੋ ਵਿਯ ਅਭਿਞ੍ਞਾਤੋ ਪਾਕਟੋ ਮਹਾ. ਅਪਿਚਸ੍ਸ ਚੂਲ਼ਗੋਸਿਙ੍ਗਸੁਤ੍ਤਂ ਨਲ਼ਕਪਾਨਸੁਤ੍ਤਂ ਅਨੁਤ੍ਤਰਿਯਸੁਤ੍ਤਂ ਉਪਕ੍ਕਿਲੇਸਸੁਤ੍ਤਂ ਅਨੁਰੁਦ੍ਧਸਂਯੁਤ੍ਤਂ ਮਹਾਪੁਰਿਸਵਿਤਕ੍ਕਸੁਤ੍ਤਂ ਥੇਰਸ੍ਸ ਅਭਿਨਿਕ੍ਖਮਨਂ ਏਤਦਗ੍ਗਨ੍ਤਿ ਇਮੇਸਮ੍ਪਿ ਵਸੇਨ ਮਹਨ੍ਤਭਾਵੋ ਵੇਦਿਤਬ੍ਬੋ. ਏਤਦਗ੍ਗਸ੍ਮਿਞ੍ਹਿ, ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਦਿਬ੍ਬਚਕ੍ਖੁਕਾਨਂ ਯਦਿਦਂ ਅਨੁਰੁਦ੍ਧੋ’’ਤਿ (ਅ. ਨਿ. ੧.੧੯੨) ਵੁਤ੍ਤਂ.
ਆਯਸ੍ਮਤਾ ਚ ਰੇਵਤੇਨਾਤਿ ਏਤ੍ਥ ਪਨ ਦ੍ਵੇ ਰੇਵਤਾ ਖਦਿਰਵਨਿਯਰੇਵਤੋ ਚ ਕਙ੍ਖਾਰੇਵਤੋ ਚ. ਤਤ੍ਥ ਖਦਿਰਵਨਿਯਰੇਵਤੋ ਧਮ੍ਮਸੇਨਾਪਤਿਤ੍ਥੇਰਸ੍ਸ ਕਨਿਟ੍ਠਭਾਤਿਕੋ, ਨ ਸੋ ਇਧ ਅਧਿਪ੍ਪੇਤੋ. ‘‘ਅਕਪ੍ਪਿਯੋ ਗੁਲ਼ੋ, ਅਕਪ੍ਪਿਯਾ ਮੁਗ੍ਗਾ’’ਤਿ (ਮਹਾਵ. ੨੭੨) ਏਵਂ ਕਙ੍ਖਾਬਹੁਲੋ ਪਨ ਥੇਰੋ ਇਧ ਰੇਵਤੋਤਿ ਅਧਿਪ੍ਪੇਤੋ. ਸੋਪਿ ਸੀਲਾਦਿਗੁਣੇਹਿ ਚੇਵ ਇਮਸ੍ਮਿਂ ਸੁਤ੍ਤੇ ਆਗਤਗੁਣੇਹਿ ਚ ਥੇਰੋ ਵਿਯ ਅਭਿਞ੍ਞਾਤੋ ਪਾਕਟੋ ਮਹਾ. ਅਪਿਚਸ੍ਸ ਅਭਿਨਿਕ੍ਖਮਨੇਨਪਿ ਏਤਦਗ੍ਗੇਨਪਿ ਮਹਨ੍ਤਭਾਵੋ ਵੇਦਿਤਬ੍ਬੋ. ਏਤਦਗ੍ਗਸ੍ਮਿਞ੍ਹਿ, ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਝਾਯੀਨਂ ਯਦਿਦਂ ਕਙ੍ਖਾਰੇਵਤੋ’’ਤਿ (ਅ. ਨਿ. ੧.੨੦੪) ਵੁਤ੍ਤਂ.
ਆਨਨ੍ਦਤ੍ਥੇਰੋਪਿ ਸੀਲਾਦਿਗੁਣੇਹਿ ਚੇਵ ਇਮਸ੍ਮਿਂ ਸੁਤ੍ਤੇ ਆਗਤਗੁਣੇਹਿ ਚ ਥੇਰੋ ਵਿਯ ਅਭਿਞ੍ਞਾਤੋ ਪਾਕਟੋ ਮਹਾ. ਅਪਿਚਸ੍ਸ ਸੇਕ੍ਖਸੁਤ੍ਤਂ ਬਾਹਿਤਿਕਸੁਤ੍ਤਂ ਆਨੇਞ੍ਜਸਪ੍ਪਾਯਂ ਗੋਪਕਮੋਗ੍ਗਲ੍ਲਾਨਂ ਬਹੁਧਾਤੁਕਂ ਚੂਲ਼ਸੁਞ੍ਞਤਂ ਮਹਾਸੁਞ੍ਞਤਂ ਅਚ੍ਛਰਿਯਬ੍ਭੁਤਸੁਤ੍ਤਂ ਭਦ੍ਦੇਕਰਤ੍ਤਂ ਮਹਾਨਿਦਾਨਂ ਮਹਾਪਰਿਨਿਬ੍ਬਾਨਂ ਸੁਭਸੁਤ੍ਤਂ ਚੂਲ਼ਨਿਯਲੋਕਧਾਤੁਸੁਤ੍ਤਂ ਅਭਿਨਿਕ੍ਖਮਨਂ ਏਤਦਗ੍ਗਨ੍ਤਿ ਇਮੇਸਮ੍ਪਿ ਵਸੇਨ ਮਹਨ੍ਤਭਾਵੋ ਵੇਦਿਤਬ੍ਬੋ. ਏਤਦਗ੍ਗਸ੍ਮਿਞ੍ਹਿ, ‘‘ਏਤਦਗ੍ਗਂ, ਭਿਕ੍ਖਵੇ, ਮਮ ਸਾਵਕਾਨਂ ਭਿਕ੍ਖੂਨਂ ਬਹੁਸ੍ਸੁਤਾਨਂ ਯਦਿਦਂ ਆਨਨ੍ਦੋ’’ਤਿ (ਅ. ਨਿ. ੧.੨੧੯-੨੨੩) ਵੁਤ੍ਤਂ.
ਅਞ੍ਞੇਹਿ ਚ ਅਭਿਞ੍ਞਾਤੇਹਿ ਅਭਿਞ੍ਞਾਤੇਹੀਤਿ ਨ ਕੇਵਲਞ੍ਚ ਏਤੇਹੇਵ, ਅਞ੍ਞੇਹਿ ਚ ਮਹਾਗੁਣਤਾਯ ਪਾਕਟੇਹਿ ਅਭਿਞ੍ਞਾਤੇਹਿ ਬਹੂਹਿ ਥੇਰੇਹਿ ਸਾਵਕੇਹਿ ਸਦ੍ਧਿਂ ਭਗਵਾ ਗੋਸਿਙ੍ਗਸਾਲਵਨਦਾਯੇ ਵਿਹਰਤੀਤਿ ਅਤ੍ਥੋ. ਆਯਸ੍ਮਾ ਹਿ ਸਾਰਿਪੁਤ੍ਤੋ ਸਯਂ ਮਹਾਪਞ੍ਞੋ ਅਞ੍ਞੇਪਿ ਬਹੂ ਮਹਾਪਞ੍ਞੇ ਭਿਕ੍ਖੂ ਗਹੇਤ੍ਵਾ ਤਦਾ ਦਸਬਲਂ ਪਰਿਵਾਰੇਤ੍ਵਾ ਵਿਹਾਸਿ. ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਸਯਂ ਇਦ੍ਧਿਮਾ, ਆਯਸ੍ਮਾ ਮਹਾਕਸ੍ਸਪੋ ਸਯਂ ਧੁਤਵਾਦੋ, ਆਯਸ੍ਮਾ ਅਨੁਰੁਦ੍ਧੋ ਸਯਂ ਦਿਬ੍ਬਚਕ੍ਖੁਕੋ, ਆਯਸ੍ਮਾ ਰੇਵਤੋ ਸਯਂ ਝਾਨਾਭਿਰਤੋ, ਆਯਸ੍ਮਾ ਆਨਨ੍ਦੋ ਸਯਂ ਬਹੁਸ੍ਸੁਤੋ ਅਞ੍ਞੇਪਿ ਬਹੂ ਬਹੁਸ੍ਸੁਤੇ ਭਿਕ੍ਖੂ ਗਹੇਤ੍ਵਾ ਤਦਾ ਦਸਬਲਂ ਪਰਿਵਾਰੇਤ੍ਵਾ ਵਿਹਾਸਿ, ਏਵਂ ਤਦਾ ਏਤੇ ਚ ਅਞ੍ਞੇ ਚ ਅਭਿਞ੍ਞਾਤਾ ਮਹਾਥੇਰਾ ਤਿਂਸਸਹਸ੍ਸਮਤ੍ਤਾ ਭਿਕ੍ਖੂ ਦਸਬਲਂ ਪਰਿਵਾਰੇਤ੍ਵਾ ਵਿਹਰਿਂਸੂਤਿ ਵੇਦਿਤਬ੍ਬਾ.
ਪਟਿਸਲ੍ਲਾਨਾ ਵੁਟ੍ਠਿਤੋਤਿ ਫਲਸਮਾਪਤ੍ਤਿਵਿਵੇਕਤੋ ਵੁਟ੍ਠਿਤੋ. ਯੇਨਾਯਸ੍ਮਾ ਮਹਾਕਸ੍ਸਪੋ ਤੇਨੁਪਸਙ੍ਕਮੀਤਿ ਥੇਰੋ ਕਿਰ ਪਟਿਸਲ੍ਲਾਨਾ ਵੁਟ੍ਠਿਤੋ ਪਚ੍ਛਿਮਲੋਕਧਾਤੁਂ ਓਲੋਕੇਨ੍ਤੋ ਵਨਨ੍ਤੇ ਕੀਲ਼ਨ੍ਤਸ੍ਸ ਮਤ੍ਤਖਤ੍ਤਿਯਸ੍ਸ ਕਣ੍ਣਤੋ ਪਤਮਾਨਂ ਕੁਣ੍ਡਲਂ ਵਿਯ, ਸਂਹਰਿਤ੍ਵਾ ਸਮੁਗ੍ਗੇ ਪਕ੍ਖਿਪਮਾਨਂ ਰਤ੍ਤਕਮ੍ਬਲਂ ਵਿਯ, ਮਣਿਨਾਗਦਨ੍ਤਤੋ ਪਤਮਾਨਂ ਸਤਸਹਸ੍ਸਗ੍ਘਨਿਕਂ ਸੁਵਣ੍ਣਪਾਤਿਂ ਵਿਯ ਚ ਅਤ੍ਥਂ ਗਚ੍ਛਮਾਨਂ ਪਰਿਪੁਣ੍ਣਪਣ੍ਣਾਸਯੋਜਨਂ ਸੂਰਿਯਮਣ੍ਡਲਂ ਅਦ੍ਦਸ. ਤਦਨਨ੍ਤਰਂ ਪਾਚੀਨਲੋਕਧਾਤੁਂ ਓਲੋਕੇਨ੍ਤੋ ਨੇਮਿਯਂ ਗਹੇਤ੍ਵਾ ਪਰਿਵਤ੍ਤਯਮਾਨਂ ਰਜਤਚਕ੍ਕਂ ਵਿਯ, ਰਜਤਕੂਟਤੋ ਨਿਕ੍ਖਮਨ੍ਤਂ ਖੀਰਧਾਰਾਮਣ੍ਡਂ ਵਿਯ, ਸਪਕ੍ਖੇ ਪਪ੍ਫੋਟੇਤ੍ਵਾ ਗਗਨਤਲੇ ਪਕ੍ਖਨ੍ਦਮਾਨਂ ਸੇਤਹਂਸਂ ਵਿਯ ਚ ਮੇਘਵਣ੍ਣਾਯ ਸਮੁਦ੍ਦਕੁਚ੍ਛਿਤੋ ਉਗ੍ਗਨ੍ਤ੍ਵਾ ਪਾਚੀਨਚਕ੍ਕਵਾਲ਼ਪਬ੍ਬਤਮਤ੍ਥਕੇ ਸਸਲਕ੍ਖਣਪ੍ਪਟਿਮਣ੍ਡਿਤਂ ਏਕੂਨਪਣ੍ਣਾਸਯੋਜਨਂ ਚਨ੍ਦਮਣ੍ਡਲਂ ਅਦ੍ਦਸ. ਤਤੋ ਸਾਲਵਨਂ ਓਲੋਕੇਸਿ. ਤਸ੍ਮਿਞ੍ਹਿ ਸਮਯੇ ਸਾਲਰੁਕ੍ਖਾ ਮੂਲਤੋ ਪਟ੍ਠਾਯ ਯਾਵ ਅਗ੍ਗਾ ਸਬ੍ਬਪਾਲਿਫੁਲ੍ਲਾ ਦੁਕੂਲਪਾਰੁਤਾ ਵਿਯ, ਮੁਤ੍ਤਾਕਲਾਪਵਿਨਦ੍ਧਾ ਵਿਯ ਚ ਵਿਰੋਚਿਂਸੁ. ਭੂਮਿਤਲਂ ਪੁਪ੍ਫਸਨ੍ਥਰਪੂਜਾਯ ਪਟਿਮਣ੍ਡਿਤਂ ਵਿਯ, ਤਤ੍ਥ ਤਤ੍ਥ ਨਿਪਤਨ੍ਤੇਨ ਪੁਪ੍ਫਰੇਣੁਨਾ ਲਾਖਾਰਸੇਨ ਸਿਞ੍ਚਮਾਨਂ ਵਿਯ ਚ ਅਹੋਸਿ. ਭਮਰਮਧੁਕਰਗਣਾ ਕੁਸੁਮਰੇਣੁਮਦਮਤ੍ਤਾ ਉਪਗਾਯਮਾਨਾ ਵਿਯ ਵਨਨ੍ਤਰੇਸੁ ਵਿਚਰਨ੍ਤਿ. ਤਦਾ ਚ ਉਪੋਸਥਦਿਵਸੋਵ ਹੋਤਿ. ਅਥ ਥੇਰੋ, ‘‘ਕਾਯ ਨੁ ਖੋ ਅਜ੍ਜ ਰਤਿਯਾ ਵੀਤਿਨਾਮੇਸ੍ਸਾਮੀ’’ਤਿ ਚਿਨ੍ਤੇਸਿ, ਅਰਿਯਸਾਵਕਾ ਚ ਨਾਮ ਪਿਯਧਮ੍ਮਸ੍ਸਵਨਾ ਹੋਨ੍ਤਿ. ਅਥਸ੍ਸ ਏਤਦਹੋਸਿ – ‘‘ਅਜ੍ਜ ਮਯ੍ਹਂ ਜੇਟ੍ਠਭਾਤਿਕਸ੍ਸ ਧਮ੍ਮਸੇਨਾਪਤਿਤ੍ਥੇਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਧਮ੍ਮਰਤਿਯਾ ਵੀਤਿਨਾਮੇਸ੍ਸਾਮੀ’’ਤਿ. ਗਚ੍ਛਨ੍ਤੋ ਪਨ ਏਕਕੋਵ ਅਗਨ੍ਤ੍ਵਾ ‘‘ਮਯ੍ਹਂ ਪਿਯਸਹਾਯਂ ਮਹਾਕਸ੍ਸਪਤ੍ਥੇਰਂ ਗਹੇਤ੍ਵਾ ਗਮਿਸ੍ਸਾਮੀ’’ਤਿ ਨਿਸਿਨ੍ਨਟ੍ਠਾਨਤੋ ਵੁਟ੍ਠਾਯ ਚਮ੍ਮਖਣ੍ਡਂ ਪਪ੍ਫੋਟੇਤ੍ਵਾ ਯੇਨਾਯਸ੍ਮਾ ਮਹਾਕਸ੍ਸਪੋ ਤੇਨੁਪਸਙ੍ਕਮਿ.
ਏਵਮਾਵੁਸੋਤਿ ਖੋ ਆਯਸ੍ਮਾ ਮਹਾਕਸ੍ਸਪੋਤਿ ਥੇਰੋਪਿ ਯਸ੍ਮਾ ਪਿਯਧਮ੍ਮਸ੍ਸਵਨੋਵ ਅਰਿਯਸਾਵਕੋ, ਤਸ੍ਮਾ ਤਸ੍ਸ ਵਚਨਂ ਸੁਤ੍ਵਾ ਗਚ੍ਛਾਵੁਸੋ, ਤ੍ਵਂ, ਮਯ੍ਹਂ ਸੀਸਂ ਵਾ ਰੁਜ੍ਜਤਿ ਪਿਟ੍ਠਿ ਵਾਤਿ ਕਿਞ੍ਚਿ ਲੇਸਾਪਦੇਸਂ ਅਕਤ੍ਵਾ ਤੁਟ੍ਠਹਦਯੋਵ, ‘‘ਏਵਮਾਵੁਸੋ’’ਤਿਆਦਿਮਾਹ. ਪਟਿਸ੍ਸੁਤ੍ਵਾ ਚ ਨਿਸਿਨ੍ਨਟ੍ਠਾਨਤੋ ਵੁਟ੍ਠਾਯ ਚਮ੍ਮਖਣ੍ਡਂ ਪਪ੍ਫੋਟੇਤ੍ਵਾ ਮਹਾਮੋਗ੍ਗਲ੍ਲਾਨਂ ਅਨੁਬਨ੍ਧਿ. ਤਸ੍ਮਿਂ ਸਮਯੇ ਦ੍ਵੇ ਮਹਾਥੇਰਾ ਪਟਿਪਾਟਿਯਾ ਠਿਤਾਨਿ ਦ੍ਵੇ ਚਨ੍ਦਮਣ੍ਡਲਾਨਿ ਵਿਯ, ਦ੍ਵੇ ਸੂਰਿਯਮਣ੍ਡਲਾਨਿ ਵਿਯ, ਦ੍ਵੇ ਛਦ੍ਦਨ੍ਤਨਾਗਰਾਜਾਨੋ ਵਿਯ, ਦ੍ਵੇ ਸੀਹਾ ਵਿਯ, ਦ੍ਵੇ ਬ੍ਯਗ੍ਘਾ ਵਿਯ ਚ ਵਿਰੋਚਿਂਸੁ. ਅਨੁਰੁਦ੍ਧਤ੍ਥੇਰੋਪਿ ਤਸ੍ਮਿਂ ਸਮਯੇ ਦਿਵਾਟ੍ਠਾਨੇ ਨਿਸਿਨ੍ਨੋ ਦ੍ਵੇ ਮਹਾਥੇਰੇ ਸਾਰਿਪੁਤ੍ਤਤ੍ਥੇਰਸ੍ਸ ਸਨ੍ਤਿਕਂ ਗਚ੍ਛਨ੍ਤੇ ਦਿਸ੍ਵਾ ਪਚ੍ਛਿਮਲੋਕਧਾਤੁਂ ਓਲੋਕੇਨ੍ਤੋ ਸੂਰਿਯਂ ਵਨਨ੍ਤਂ ਪਵਿਸਨ੍ਤਂ ਵਿਯ, ਪਾਚੀਨਲੋਕਧਾਤੁਂ ਓਲੋਕੇਨ੍ਤੋ ਚਨ੍ਦਂ ਵਨਨ੍ਤਤੋ ਉਗ੍ਗਚ੍ਛਨ੍ਤਂ ਵਿਯ, ਸਾਲਵਨਂ ਓਲੋਕੇਨ੍ਤੋ ਸਬ੍ਬਪਾਲਿਫੁਲ੍ਲਮੇਵ ਸਾਲਵਨਞ੍ਚ ਦਿਸ੍ਵਾ ਅਜ੍ਜ ਉਪੋਸਥਦਿਵਸੋ, ਇਮੇ ਚ ਮੇ ਜੇਟ੍ਠਭਾਤਿਕਾ ਧਮ੍ਮਸੇਨਾਪਤਿਸ੍ਸ ਸਨ੍ਤਿਕਂ ਗਚ੍ਛਨ੍ਤਿ, ਮਹਨ੍ਤੇਨ ਧਮ੍ਮਸ੍ਸਵਨੇਨ ਭਵਿਤਬ੍ਬਂ, ਅਹਮ੍ਪਿ ਧਮ੍ਮਸ੍ਸਵਨਸ੍ਸ ਭਾਗੀ ਭਵਿਸ੍ਸਾਮੀਤਿ ਨਿਸਿਨ੍ਨਟ੍ਠਾਨਤੋ ਵੁਟ੍ਠਾਯ ਚਮ੍ਮਖਣ੍ਡਂ ਪਪ੍ਫੋਟੇਤ੍ਵਾ ਮਹਾਥੇਰਾਨਂ ਪਦਾਨੁਪਦਿਕੋ ਹੁਤ੍ਵਾ ਨਿਕ੍ਖਮਿ. ਤੇਨ ਵੁਤ੍ਤਂ – ‘‘ਅਥ ਖੋ ਆਯਸ੍ਮਾ ਚ ਮਹਾਮੋਗ੍ਗਲ੍ਲਾਨੋ ਆਯਸ੍ਮਾ ਚ ਮਹਾਕਸ੍ਸਪੋ ਆਯਸ੍ਮਾ ਚ ਅਨੁਰੁਦ੍ਧੋ ਯੇਨਾਯਸ੍ਮਾ ਸਾਰਿਪੁਤ੍ਤੋ ਤੇਨੁਪਸਙ੍ਕਮਿਂਸੂ’’ਤਿ. ਉਪਸਙ੍ਕਮਿਂਸੂਤਿ. ਪਟਿਪਾਟਿਯਾ ਠਿਤਾ ਤਯੋ ਚਨ੍ਦਾ ਵਿਯ, ਸੂਰਿਯਾ ਵਿਯ, ਸੀਹਾ ਵਿਯ ਚ ਵਿਰੋਚਮਾਨਾ ਉਪਸਙ੍ਕਮਿਂਸੁ.
੩੩੩. ਏਵਂ ਉਪਸਙ੍ਕਮਨ੍ਤੇ ਪਨ ਤੇ ਮਹਾਥੇਰੇ ਆਯਸ੍ਮਾ ਆਨਨ੍ਦੋ ਅਤ੍ਤਨੋ ਦਿਵਾਟ੍ਠਾਨੇ ਨਿਸਿਨ੍ਨੋਯੇਵ ਦਿਸ੍ਵਾ, ‘‘ਅਜ੍ਜ ਮਹਨ੍ਤਂ ਧਮ੍ਮਸ੍ਸਵਨਂ ਭਵਿਸ੍ਸਤਿ, ਮਯਾਪਿ ਤਸ੍ਸ ਭਾਗਿਨਾ ਭਵਿਤਬ੍ਬਂ, ਨ ਖੋ ਪਨ ਏਕਕੋਵ ਗਮਿਸ੍ਸਾਮਿ, ਮਯ੍ਹਂ ਪਿਯਸਹਾਯਮ੍ਪਿ ਰੇਵਤਤ੍ਥੇਰਂ ਗਹੇਤ੍ਵਾ ਗਮਿਸ੍ਸਾਮੀ’’ਤਿ ਸਬ੍ਬਂ ਮਹਾਮੋਗ੍ਗਲ੍ਲਾਨਸ੍ਸ ਮਹਾਕਸ੍ਸਪਸ੍ਸ ਅਨੁਰੁਦ੍ਧਸ੍ਸ ਉਪਸਙ੍ਕਮਨੇ ਵੁਤ੍ਤਨਯੇਨੇਵ ਵਿਤ੍ਥਾਰਤੋ ਵੇਦਿਤਬ੍ਬਂ. ਇਤਿ ਤੇ ਦ੍ਵੇ ਜਨਾ ਪਟਿਪਾਟਿਯਾ ਠਿਤਾ ਦ੍ਵੇ ਚਨ੍ਦਾ ਵਿਯ, ਸੂਰਿਯਾ ਵਿਯ, ਸੀਹਾ ਵਿਯ ਚ ਵਿਰੋਚਮਾਨਾ ਉਪਸਙ੍ਕਮਿਂਸੁ. ਤੇਨ ਵੁਤ੍ਤਂ – ‘‘ਅਦ੍ਦਸਾ ਖੋ ਆਯਸ੍ਮਾ ਸਾਰਿਪੁਤ੍ਤੋ’’ਤਿਆਦਿ. ਦਿਸ੍ਵਾਨ ਆਯਸ੍ਮਨ੍ਤਂ ਆਨਨ੍ਦਂ ਏਤਦਵੋਚਾਤਿ ਦੂਰਤੋਵ ਦਿਸ੍ਵਾ ਅਨੁਕ੍ਕਮੇਨ ਕਥਾਉਪਚਾਰਂ ਸਮ੍ਪਤ੍ਤਮੇਤਂ, ‘‘ਏਤੁ ਖੋ ਆਯਸ੍ਮਾ’’ਤਿਆਦਿਵਚਨਂ ਅਵੋਚ. ਰਮਣੀਯਂ, ਆਵੁਸੋਤਿ ਏਤ੍ਥ ਦੁਵਿਧਂ ਰਾਮਣੇਯ੍ਯਕਂ ਵਨਰਾਮਣੇਯ੍ਯਕਂ ਪੁਗ੍ਗਲਰਾਮਣੇਯ੍ਯਕਞ੍ਚ. ਤਤ੍ਥ ਵਨਂ ਨਾਮ ਨਾਗਸਲਲ਼ਸਾਲਚਮ੍ਪਕਾਦੀਹਿ ਸਞ੍ਛਨ੍ਨਂ ਹੋਤਿ ਬਹਲਚ੍ਛਾਯਂ ਪੁਪ੍ਫਫਲੂਪਗਂ ਵਿਵਿਧਰੁਕ੍ਖਂ ਉਦਕਸਮ੍ਪਨ੍ਨਂ ਗਾਮਤੋ ਨਿਸ੍ਸਟਂ, ਇਦਂ ਵਨਰਾਮਣੇਯ੍ਯਕਂ ਨਾਮ. ਯਂ ਸਨ੍ਧਾਯ ਵੁਤ੍ਤਂ –
‘‘ਰਮਣੀਯਾਨਿ ਅਰਞ੍ਞਾਨਿ, ਯਤ੍ਥ ਨ ਰਮਤੀ ਜਨੋ;
ਵੀਤਰਾਗਾ ਰਮਿਸ੍ਸਨ੍ਤਿ, ਨ ਤੇ ਕਾਮਗਵੇਸਿਨੋ’’ਤਿ. (ਧ. ਪ. ੯੯);
ਵਨਂ ਪਨ ਸਚੇਪਿ ਉਜ੍ਜਙ੍ਗਲੇ ਹੋਤਿ ਨਿਰੁਦਕਂ ਵਿਰਲਚ੍ਛਾਯਂ ਕਣ੍ਟਕਸਮਾਕਿਣ੍ਣਂ, ਬੁਦ੍ਧਾਦਯੋਪੇਤ੍ਥ ਅਰਿਯਾ ਵਿਹਰਨ੍ਤਿ, ਇਦਂ ਪੁਗ੍ਗਲਰਾਮਣੇਯ੍ਯਕਂ ਨਾਮ. ਯਂ ਸਨ੍ਧਾਯ ਵੁਤ੍ਤਂ –
‘‘ਗਾਮੇ ਵਾ ਯਦਿ ਵਾਰਞ੍ਞੇ, ਨਿਨ੍ਨੇ ਵਾ ਯਦਿ ਵਾ ਥਲੇ;
ਯਤ੍ਥ ਅਰਹਨ੍ਤੋ ਵਿਹਰਨ੍ਤਿ, ਤਂ ਭੂਮਿਰਾਮਣੇਯ੍ਯਕ’’ਨ੍ਤਿ. (ਧ. ਪ. ੯੮);
ਇਧ ਪਨ ਤਂ ਦੁਵਿਧਮ੍ਪਿ ਲਬ੍ਭਤਿ. ਤਦਾ ਹਿ ਗੋਸਿਙ੍ਗਸਾਲਵਨਂ ਸਬ੍ਬਪਾਲਿਫੁਲ੍ਲਂ ਹੋਤਿ ਕੁਸੁਮਗਨ੍ਧਸੁਗਨ੍ਧਂ, ਸਦੇਵਕੇ ਚੇਤ੍ਥ ਲੋਕੇ ਅਗ੍ਗਪੁਗ੍ਗਲੋ ਸਮ੍ਮਾਸਮ੍ਬੁਦ੍ਧੋ ਤਿਂਸਸਹਸ੍ਸਮਤ੍ਤੇਹਿ ਅਭਿਞ੍ਞਾਤਭਿਕ੍ਖੂਹਿ ਸਦ੍ਧਿਂ ਵਿਹਰਤਿ. ਤਂ ਸਨ੍ਧਾਯ ਵੁਤ੍ਤਂ – ‘‘ਰਮਣੀਯਂ, ਆਵੁਸੋ ਆਨਨ੍ਦ, ਗੋਸਿਙ੍ਗਸਾਲਵਨ’’ਨ੍ਤਿ.
ਦੋਸਿਨਾਤਿ ਦੋਸਾਪਗਤਾ, ਅਬ੍ਭਂ ਮਹਿਕਾ ਧੂਮੋ ਰਜੋ ਰਾਹੂਤਿ ਇਮੇਹਿ ਪਞ੍ਚਹਿ ਉਪਕ੍ਕਿਲੇਸੇਹਿ ਵਿਰਹਿਤਾਤਿ ਵੁਤ੍ਤਂ ਹੋਤਿ. ਸਬ੍ਬਪਾਲਿਫੁਲ੍ਲਾਤਿ ਸਬ੍ਬਤ੍ਥ ਪਾਲਿਫੁਲ੍ਲਾ, ਮੂਲਤੋ ਪਟ੍ਠਾਯ ਯਾਵ ਅਗ੍ਗਾ ਅਪੁਪ੍ਫਿਤਟ੍ਠਾਨਂ ਨਾਮ ਨਤ੍ਥਿ. ਦਿਬ੍ਬਾ ਮਞ੍ਞੇ ਗਨ੍ਧਾ ਸਮ੍ਪਵਨ੍ਤੀਤਿ ਦਿਬ੍ਬਾ ਮਨ੍ਦਾਰਪੁਪ੍ਫਕੋਵਿਲ਼ਾਰਪਾਰਿਚ੍ਛਤ੍ਤਕਚਨ੍ਦਨਚੁਣ੍ਣਗਨ੍ਧਾ ਵਿਯ ਸਮਨ੍ਤਾ ਪਵਾਯਨ੍ਤਿ, ਸਕ੍ਕਸੁਯਾਸਨ੍ਤੁਸਿਤਨਿਮ੍ਮਾਨਰਤਿਪਰਨਿਮ੍ਮਿਤਮਹਾਬ੍ਰਹ੍ਮਾਨਂ ਓਤਿਣ੍ਣਟ੍ਠਾਨਂ ਵਿਯ ਵਾਯਨ੍ਤੀਤਿ ਵੁਤ੍ਤਂ ਹੋਤਿ.
ਕਥਂਰੂਪੇਨ, ਆਵੁਸੋ ਆਨਨ੍ਦਾਤਿ ਆਨਨ੍ਦਤ੍ਥੇਰੋ ਤੇਸਂ ਪਞ੍ਚਨ੍ਨਂ ਥੇਰਾਨਂ ਸਙ੍ਘਨਵਕੋਵ. ਕਸ੍ਮਾ ਥੇਰੋ ਤਂਯੇਵ ਪਠਮਂ ਪੁਚ੍ਛਤੀਤਿ? ਮਮਾਯਿਤਤ੍ਤਾ. ਤੇ ਹਿ ਦ੍ਵੇ ਥੇਰਾ ਅਞ੍ਞਮਞ੍ਞਂ ਮਮਾਯਿਂਸੁ. ਸਾਰਿਪੁਤ੍ਤਤ੍ਥੇਰੋ, ‘‘ਮਯਾ ਕਤ੍ਤਬ੍ਬਂ ਸਤ੍ਥੁ ਉਪਟ੍ਠਾਨਂ ਕਰੋਤੀ’’ਤਿ ਆਨਨ੍ਦਤ੍ਥੇਰਂ ਮਮਾਯਿ. ਆਨਨ੍ਦਤ੍ਥੇਰੋ ਭਗਵਤੋ ਸਾਵਕਾਨਂ ਅਗ੍ਗੋਤਿ ਸਾਰਿਪੁਤ੍ਤਤ੍ਥੇਰਂ ਮਮਾਯਿ, ਕੁਲਦਾਰਕੇ ਪਬ੍ਬਾਜੇਤ੍ਵਾ ਸਾਰਿਪੁਤ੍ਤਤ੍ਥੇਰਸ੍ਸ ਸਨ੍ਤਿਕੇ ਉਪਜ੍ਝਂ ਗਣ੍ਹਾਪੇਸਿ. ਸਾਰਿਪੁਤ੍ਤਤ੍ਥੇਰੋਪਿ ਤਥੇਵ ਅਕਾਸਿ. ਏਵਂ ਏਕਮੇਕੇਨ ਅਤ੍ਤਨੋ ਪਤ੍ਤਚੀਵਰਂ ਦਤ੍ਵਾ ਪਬ੍ਬਾਜੇਤ੍ਵਾ ਉਪਜ੍ਝਂ ਗਣ੍ਹਾਪਿਤਾਨਿ ਪਞ੍ਚ ਭਿਕ੍ਖੁਸਤਾਨਿ ਅਹੇਸੁਂ. ਆਯਸ੍ਮਾ ਆਨਨ੍ਦੋ ਪਣੀਤਾਨਿ ਚੀਵਰਾਦੀਨਿਪਿ ਲਭਿਤ੍ਵਾ ਥੇਰਸ੍ਸੇਵ ਦੇਤਿ.
ਏਕੋ ਕਿਰ ਬ੍ਰਾਹ੍ਮਣੋ ਚਿਨ੍ਤੇਸਿ – ‘‘ਬੁਦ੍ਧਰਤਨਸ੍ਸ ਚ ਸਙ੍ਘਰਤਨਸ੍ਸ ਚ ਪੂਜਾ ਪਞ੍ਞਾਯਤਿ, ਕਥਂ ਨੁ ਖੋ ਧਮ੍ਮਰਤਨਂ ਪੂਜਿਤਂ ਨਾਮ ਹੋਤੀ’’ਤਿ? ਸੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਏਤਮਤ੍ਥਂ ਪੁਚ੍ਛਿ. ਭਗਵਾ ਆਹ – ‘‘ਸਚੇਸਿ, ਬ੍ਰਾਹ੍ਮਣ, ਧਮ੍ਮਰਤਨਂ ਪੂਜਿਤੁਕਾਮੋ, ਏਕਂ ਬਹੁਸ੍ਸੁਤਂ ਪੂਜੇਹੀ’’ਤਿ ਬਹੁਸ੍ਸੁਤਂ, ਭਨ੍ਤੇ, ਆਚਿਕ੍ਖਥਾਤਿ ਭਿਕ੍ਖੁਸਙ੍ਘਂ ਪੁਚ੍ਛਤਿ. ਸੋ ਭਿਕ੍ਖੁਸਙ੍ਘਂ ਉਪਸਙ੍ਕਮਿਤ੍ਵਾ ਬਹੁਸ੍ਸੁਤਂ, ਭਨ੍ਤੇ, ਆਚਿਕ੍ਖਥਾਤਿ ਆਹ. ਆਨਨ੍ਦਤ੍ਥੇਰੋ ਬ੍ਰਾਹ੍ਮਣਾਤਿ. ਬ੍ਰਾਹ੍ਮਣੋ ਥੇਰਂ ਸਹਸ੍ਸਗ੍ਘਨਿਕੇਨ ਚੀਵਰੇਨ ਪੂਜੇਸਿ. ਥੇਰੋ ਤਂ ਗਹੇਤ੍ਵਾ ਭਗਵਤੋ ਸਨ੍ਤਿਕਂ ਅਗਮਾਸਿ. ਭਗਵਾ ‘‘ਕੁਤੋ, ਆਨਨ੍ਦ, ਲਦ੍ਧ’’ਨ੍ਤਿ ਆਹ. ਏਕੇਨ, ਭਨ੍ਤੇ, ਬ੍ਰਾਹ੍ਮਣੇਨ ਦਿਨ੍ਨਂ, ਇਦਂ ਪਨਾਹਂ ਆਯਸ੍ਮਤੋ ਸਾਰਿਪੁਤ੍ਤਸ੍ਸ ਦਾਤੁਕਾਮੋਤਿ. ਦੇਹਿ, ਆਨਨ੍ਦਾਤਿ. ਚਾਰਿਕਂ ਪਕ੍ਕਨ੍ਤੋ, ਭਨ੍ਤੇਤਿ. ਆਗਤਕਾਲੇ ਦੇਹੀਤਿ. ਸਿਕ੍ਖਾਪਦਂ, ਭਨ੍ਤੇ, ਪਞ੍ਞਤ੍ਤਨ੍ਤਿ. ਕਦਾ ਪਨ ਸਾਰਿਪੁਤ੍ਤੋ ਆਗਮਿਸ੍ਸਤੀਤਿ? ਦਸਾਹਮਤ੍ਤੇਨ, ਭਨ੍ਤੇਤਿ. ‘‘ਅਨੁਜਾਨਾਮਿ, ਆਨਨ੍ਦ, ਦਸਾਹਪਰਮਂ ਅਤਿਰੇਕਚੀਵਰਂ ਨਿਕ੍ਖਿਪਿਤੁ’’ਨ੍ਤਿ (ਪਾਰਾ. ੪੬੧; ਮਹਾਵ. ੩੪੭) ਸਿਕ੍ਖਾਪਦਂ ਪਞ੍ਞਪੇਸਿ. ਸਾਰਿਪੁਤ੍ਤਤ੍ਥੇਰੋਪਿ ਤਥੇਵ ਯਂਕਿਞ੍ਚਿ ਮਨਾਪਂ ਲਭਤਿ, ਤਂ ਆਨਨ੍ਦਤ੍ਥੇਰਸ੍ਸ ਦੇਤਿ. ਏਵਂ ਤੇ ਥੇਰਾ ਅਞ੍ਞਮਞ੍ਞਂ ਮਮਾਯਿਂਸੁ, ਇਤਿ ਮਮਾਯਿਤਤ੍ਤਾ ਪਠਮਂ ਪੁਚ੍ਛਿ.
ਅਪਿਚ ਅਨੁਮਤਿਪੁਚ੍ਛਾ ਨਾਮੇਸਾ ਖੁਦ੍ਦਕਤੋ ਪਟ੍ਠਾਯ ਪੁਚ੍ਛਿਤਬ੍ਬਾ ਹੋਤਿ. ਤਸ੍ਮਾ ਥੇਰੋ ਚਿਨ੍ਤੇਸਿ – ‘‘ਅਹਂ ਪਠਮਂ ਆਨਨ੍ਦਂ ਪੁਚ੍ਛਿਸ੍ਸਾਮਿ, ਆਨਨ੍ਦੋ ਅਤ੍ਤਨੋ ਪਟਿਭਾਨਂ ਬ੍ਯਾਕਰਿਸ੍ਸਤਿ. ਤਤੋ ਰੇਵਤਂ, ਅਨੁਰੁਦ੍ਧਂ, ਮਹਾਕਸ੍ਸਪਂ, ਮਹਾਮੋਗ੍ਗਲ੍ਲਾਨਂ ਪੁਚ੍ਛਿਸ੍ਸਾਮਿ. ਮਹਾਮੋਗ੍ਗਲ੍ਲਾਨੋ ਅਤ੍ਤਨੋ ਪਟਿਭਾਨਂ ਬ੍ਯਾਕਰਿਸ੍ਸਤਿ. ਤਤੋ ਪਞ੍ਚਪਿ ਥੇਰਾ ਮਂ ਪੁਚ੍ਛਿਸ੍ਸਨ੍ਤਿ, ਅਹਮ੍ਪਿ ਅਤ੍ਤਨੋ ਪਟਿਭਾਨਂ ਬ੍ਯਾਕਰਿਸ੍ਸਾਮੀ’’ਤਿ. ਏਤ੍ਤਾਵਤਾਪਿ ਅਯਂ ਧਮ੍ਮਦੇਸਨਾ ਸਿਖਾਪ੍ਪਤ੍ਤਾ ਵੇਪੁਲ੍ਲਪ੍ਪਤ੍ਤਾ ਨ ਭਵਿਸ੍ਸਤਿ, ਅਥ ਮਯਂ ਸਬ੍ਬੇਪਿ ਦਸਬਲਂ ਉਪਸਙ੍ਕਮਿਤ੍ਵਾ ਪੁਚ੍ਛਿਸ੍ਸਾਮ, ਸਤ੍ਥਾ ਸਬ੍ਬਞ੍ਞੁਤਞ੍ਞਾਣੇਨ ਬ੍ਯਾਕਰਿਸ੍ਸਤਿ. ਏਤ੍ਤਾਵਤਾ ਅਯਂ ਧਮ੍ਮਦੇਸਨਾ ਸਿਖਾਪ੍ਪਤ੍ਤਾ ਵੇਪੁਲ੍ਲਪ੍ਪਤ੍ਤਾ ਭਵਿਸ੍ਸਤਿ. ਯਥਾ ਹਿ ਜਨਪਦਮ੍ਹਿ ਉਪ੍ਪਨ੍ਨੋ ਅਟ੍ਟੋ ਗਾਮਭੋਜਕਂ ਪਾਪੁਣਾਤਿ, ਤਸ੍ਮਿਂ ਨਿਚ੍ਛਿਤੁਂ ਅਸਕ੍ਕੋਨ੍ਤੇ ਜਨਪਦਭੋਜਕਂ ਪਾਪੁਣਾਤਿ, ਤਸ੍ਮਿਂ ਅਸਕ੍ਕੋਨ੍ਤੇ ਮਹਾਵਿਨਿਚ੍ਛਯਅਮਚ੍ਚਂ, ਤਸ੍ਮਿਂ ਅਸਕ੍ਕੋਨ੍ਤੇ ਸੇਨਾਪਤਿਂ, ਤਸ੍ਮਿਂ ਅਸਕ੍ਕੋਨ੍ਤੇ ਉਪਰਾਜਂ, ਤਸ੍ਮਿਂ ਵਿਨਿਚ੍ਛਿਤੁਂ ਅਸਕ੍ਕੋਨ੍ਤੇ ਰਾਜਾਨਂ ਪਾਪੁਣਾਤਿ, ਰਞ੍ਞਾ ਵਿਨਿਚ੍ਛਿਤਕਾਲਤੋ ਪਟ੍ਠਾਯ ਅਟ੍ਟੋ ਅਪਰਾਪਰਂ ਨ ਸਞ੍ਚਰਤਿ, ਰਾਜਵਚਨੇਨੇਵ ਛਿਜ੍ਜਤਿ. ਏਵਮੇਵਂ ਅਹਞ੍ਹਿ ਪਠਮਂ ਆਨਨ੍ਦਂ ਪੁਚ੍ਛਿਸ੍ਸਾਮਿ…ਪੇ… ਅਥ ਮਯਂ ਸਬ੍ਬੇਪਿ ਦਸਬਲਂ ਉਪਸਙ੍ਕਮਿਤ੍ਵਾ ਪੁਚ੍ਛਿਸ੍ਸਾਮ, ਸਤ੍ਥਾ ਸਬ੍ਬਞ੍ਞੁਤਞ੍ਞਾਣੇਨ ਬ੍ਯਾਕਰਿਸ੍ਸਤਿ. ਏਤ੍ਤਾਵਤਾ ਅਯਂ ਧਮ੍ਮਦੇਸਨਾ ਸਿਖਾਪ੍ਪਤ੍ਤਾ ਵੇਪੁਲ੍ਲਪ੍ਪਤ੍ਤਾ ਭਵਿਸ੍ਸਤਿ. ਏਵਂ ਅਨੁਮਤਿਪੁਚ੍ਛਂ ਪੁਚ੍ਛਨ੍ਤੋ ਥੇਰੋ ਪਠਮਂ ਆਨਨ੍ਦਤ੍ਥੇਰਂ ਪੁਚ੍ਛਿ.
ਬਹੁਸ੍ਸੁਤੋ ਹੋਤੀਤਿ ਬਹੁ ਅਸ੍ਸ ਸੁਤਂ ਹੋਤਿ, ਨਵਙ੍ਗਂ ਸਤ੍ਥੁਸਾਸਨਂ ਪਾਲ਼ਿਅਨੁਸਨ੍ਧਿਪੁਬ੍ਬਾਪਰਵਸੇਨ ਉਗ੍ਗਹਿਤਂ ਹੋਤੀਤਿ ਅਤ੍ਥੋ. ਸੁਤਧਰੋਤਿ ਸੁਤਸ੍ਸ ਆਧਾਰਭੂਤੋ. ਯਸ੍ਸ ਹਿ ਇਤੋ ਗਹਿਤਂ ਇਤੋ ਪਲਾਯਤਿ, ਛਿਦ੍ਦਘਟੇ ਉਦਕਂ ਵਿਯ ਨ ਤਿਟ੍ਠਤਿ, ਪਰਿਸਮਜ੍ਝੇ ਏਕਂ ਸੁਤ੍ਤਂ ਵਾ ਜਾਤਕਂ ਵਾ ਕਥੇਤੁਂ ਵਾ ਵਾਚੇਤੁਂ ਵਾ ਨ ਸਕ੍ਕੋਤਿ, ਅਯਂ ਨ ਸੁਤਧਰੋ ਨਾਮ. ਯਸ੍ਸ ਪਨ ਉਗ੍ਗਹਿਤਂ ਬੁਦ੍ਧਵਚਨਂ ਉਗ੍ਗਹਿਤਕਾਲਸਦਿਸਮੇਵ ਹੋਤਿ, ਦਸਪਿ ਵੀਸਤਿਪਿ ਵਸ੍ਸਾਨਿ ਸਜ੍ਝਾਯਂ ਅਕਰੋਨ੍ਤਸ੍ਸ ਨ ਨਸ੍ਸਤਿ, ਅਯਂ ਸੁਤਧਰੋ ਨਾਮ. ਸੁਤਸਨ੍ਨਿਚਯੋਤਿ ਸੁਤਸ੍ਸ ਸਨ੍ਨਿਚਯਭੂਤੋ. ਯਥਾ ਹਿ ਸੁਤਂ ਹਦਯਮਞ੍ਜੂਸਾਯ ਸਨ੍ਨਿਚਿਤਂ ਸਿਲਾਯਂ ਲੇਖਾ ਵਿਯ, ਸੁਵਣ੍ਣਘਟੇ ਪਕ੍ਖਿਤ੍ਤਸੀਹਵਸਾ ਵਿਯ ਚ ਅਜ੍ਝੋਸਾਯ ਤਿਟ੍ਠਤਿ, ਅਯਂ ਸੁਤਸਨ੍ਨਿਚਯੋ ਨਾਮ. ਧਾਤਾਤਿ ਠਿਤਾ ਪਗੁਣਾ. ਏਕਚ੍ਚਸ੍ਸ ਹਿ ਉਗ੍ਗਹਿਤਂ ਬੁਦ੍ਧਵਚਨਂ ਧਾਤਂ ਪਗੁਣਂ ਨਿਚ੍ਚਲਿਤਂ ਨ ਹੋਤਿ, ਅਸੁਕਸੁਤ੍ਤਂ ਵਾ ਜਾਤਕਂ ਵਾ ਕਥੇਹੀਤਿ ਵੁਤ੍ਤੇ ਸਜ੍ਝਾਯਿਤ੍ਵਾ ਸਂਸਨ੍ਦਿਤ੍ਵਾ ਸਮਨੁਗ੍ਗਾਹਿਤ੍ਵਾ ਜਾਨਿਸ੍ਸਾਮੀਤਿ ਵਦਤਿ. ਏਕਚ੍ਚਸ੍ਸ ਧਾਤਂ ਪਗੁਣਂ ਭਵਙ੍ਗਸੋਤਸਦਿਸਂ ਹੋਤਿ, ਅਸੁਕਸੁਤ੍ਤਂ ਵਾ ਜਾਤਕਂ ਵਾ ਕਥੇਹੀਤਿ ਵੁਤ੍ਤੇ ਉਦ੍ਧਰਿਤ੍ਵਾ ਤਮੇਵ ਕਥੇਤਿ. ਤਂ ਸਨ੍ਧਾਯ ਵੁਤ੍ਤਂ ‘‘ਧਾਤਾ’’ਤਿ.
ਵਚਸਾ ਪਰਿਚਿਤਾਤਿ ਸੁਤ੍ਤਦਸਕ-ਵਗ੍ਗਦਸਕ-ਪਣ੍ਣਾਸਦਸਕਾਨਂ ਵਸੇਨ ਵਾਚਾਯ ਸਜ੍ਝਾਯਿਤਾ. ਮਨਸਾਨੁਪੇਕ੍ਖਿਤਾਤਿ ਚਿਤ੍ਤੇਨ ਅਨੁਪੇਕ੍ਖਿਤਾ, ਯਸ੍ਸ ਵਾਚਾਯ ਸਜ੍ਝਾਯਿਤਂ ਬੁਦ੍ਧਵਚਨਂ ਮਨਸਾ ਚਿਨ੍ਤੇਨ੍ਤਸ੍ਸ ਤਤ੍ਥ ਤਤ੍ਥ ਪਾਕਟਂ ਹੋਤਿ. ਮਹਾਦੀਪਂ ਜਾਲੇਤ੍ਵਾ ਠਿਤਸ੍ਸ ਰੂਪਗਤਂ ਵਿਯ ਪਞ੍ਞਾਯਤਿ. ਤਂ ਸਨ੍ਧਾਯ ਵੁਤ੍ਤਂ – ‘‘ਵਚਸਾ ਪਰਿਚਿਤਾ ਮਨਸਾਨੁਪੇਕ੍ਖਿਤਾ’’ਤਿ. ਦਿਟ੍ਠਿਯਾ ਸੁਪ੍ਪਟਿਵਿਦ੍ਧਾਤਿ ਅਤ੍ਥਤੋ ਚ ਕਾਰਣਤੋ ਚ ਪਞ੍ਞਾਯ ਸੁਪ੍ਪਟਿਵਿਦ੍ਧਾ. ਪਰਿਮਣ੍ਡਲੇਹਿ ਪਦਬ੍ਯਞ੍ਜਨੇਹੀਤਿ ਏਤ੍ਥ ਪਦਮੇਵ ਅਤ੍ਥਸ੍ਸ ਬ੍ਯਞ੍ਜਨਤੋ ਪਦਬ੍ਯਞ੍ਜਨਂ, ਤਂ ਅਕ੍ਖਰਪਾਰਿਪੂਰਿਂ ਕਤ੍ਵਾ ਦਸਵਿਧਬ੍ਯਞ੍ਜਨਬੁਦ੍ਧਿਯੋ ਅਪਰਿਹਾਪੇਤ੍ਵਾ ਵੁਤ੍ਤਂ ਪਰਿਮਣ੍ਡਲਂ ਨਾਮ ਹੋਤਿ, ਏਵਰੂਪੇਹਿ ਪਦਬ੍ਯਞ੍ਜਨੇਹੀਤਿ ਅਤ੍ਥੋ. ਅਪਿਚ ਯੋ ਭਿਕ੍ਖੁ ਪਰਿਸਤਿ ਧਮ੍ਮਂ ਦੇਸੇਨ੍ਤੋ ਸੁਤ੍ਤਂ ਵਾ ਜਾਤਕਂ ਵਾ ਨਿਕ੍ਖਪਿਤ੍ਵਾ ਅਞ੍ਞਂ ਉਪਾਰਮ੍ਭਕਰਂ ਸੁਤ੍ਤਂ ਆਹਰਤਿ, ਤਸ੍ਸ ਉਪਮਂ ਕਥੇਤਿ, ਤਦਤ੍ਥਂ ਓਹਾਰੇਤਿ, ਏਵਮਿਦਂ ਗਹੇਤ੍ਵਾ ਏਤ੍ਥ ਖਿਪਨ੍ਤੋ ਏਕਪਸ੍ਸੇਨੇਵ ਪਰਿਹਰਨ੍ਤੋ ਕਾਲਂ ਞਤ੍ਵਾ ਵੁਟ੍ਠਹਤਿ. ਨਿਕ੍ਖਿਤ੍ਤਸੁਤ੍ਤਂ ਪਨ ਨਿਕ੍ਖਤ੍ਤਮਤ੍ਤਮੇਵ ਹੋਤਿ, ਤਸ੍ਸ ਕਥਾ ਅਪਰਿਮਣ੍ਡਲਾ ਨਾਮ ਹੋਤਿ. ਯੋ ਪਨ ਸੁਤ੍ਤਂ ਵਾ ਜਾਤਕਂ ਵਾ ਨਿਕ੍ਖਿਪਿਤ੍ਵਾ ਬਹਿ ਏਕਪਦਮ੍ਪਿ ਅਗਨ੍ਤ੍ਵਾ ਪਾਲ਼ਿਯਾ ਅਨੁਸਨ੍ਧਿਞ੍ਚ ਪੁਬ੍ਬਾਪਰਞ੍ਚ ਅਮਕ੍ਖੇਨ੍ਤੋ ਆਚਰਿਯੇਹਿ ਦਿਨ੍ਨਨਯੇ ਠਤ੍ਵਾ ਤੁਲਿਕਾਯ ਪਰਿਚ੍ਛਿਨ੍ਦਨ੍ਤੋ ਵਿਯ, ਗਮ੍ਭੀਰਮਾਤਿਕਾਯ ਉਦਕਂ ਪੇਸੇਨ੍ਤੋ ਵਿਯ, ਪਦਂ ਕੋਟ੍ਟੇਨ੍ਤੋ ਸਿਨ੍ਧਵਾਜਾਨੀਯੋ ਵਿਯ ਗਚ੍ਛਤਿ, ਤਸ੍ਸ ਕਥਾ ਪਰਿਮਣ੍ਡਲਾ ਨਾਮ ਹੋਤਿ. ਏਵਰੂਪਿਂ ਕਥਂ ਸਨ੍ਧਾਯ – ‘‘ਪਰਿਮਣ੍ਡਲੇਹਿ ਪਦਬ੍ਯਞ੍ਜਨੇਹੀ’’ਤਿ ਵੁਤ੍ਤਂ.
ਅਨੁਪ੍ਪਬਨ੍ਧੇਹੀਤਿ ਏਤ੍ਥ ਯੋ ਭਿਕ੍ਖੁ ਧਮ੍ਮਂ ਕਥੇਨ੍ਤੋ ਸੁਤ੍ਤਂ ਵਾ ਜਾਤਕਂ ਵਾ ਆਰਭਿਤ੍ਵਾ ਆਰਦ੍ਧਕਾਲਤੋ ਪਟ੍ਠਾਯ ਤੁਰਿਤਤੁਰਿਤੋ ਅਰਣਿਂ ਮਨ੍ਥੇਨ੍ਤੋ ਵਿਯ, ਉਣ੍ਹਖਾਦਨੀਯਂ ਖਾਦਨ੍ਤੋ ਵਿਯ, ਪਾਲ਼ਿਯਾ ਅਨੁਸਨ੍ਧਿਪੁਬ੍ਬਾਪਰੇਸੁ ਗਹਿਤਂ ਗਹਿਤਮੇਵ ਅਗ੍ਗਹਿਤਂ ਅਗ੍ਗਹਿਤਮੇਵ ਚ ਕਤ੍ਵਾ ਪੁਰਾਣਪਣ੍ਣਨ੍ਤਰੇਸੁ ਚਰਮਾਨਂ ਗੋਧਂ ਉਟ੍ਠਪੇਨ੍ਤੋ ਵਿਯ ਤਤ੍ਥ ਤਤ੍ਥ ਪਹਰਨ੍ਤੋ ਓਸਾਪੇਨ੍ਤੋ ਓਹਾਯ ਗਚ੍ਛਤਿ. ਯੋਪਿ ਧਮ੍ਮਂ ਕਥੇਨ੍ਤੋ ਕਾਲੇਨ ਸੀਘਂ ਕਾਲੇਨ ਦਨ੍ਧਂ ਕਾਲੇਨ ਮਹਾਸਦ੍ਦਂ ਕਾਲੇਨ ਖੁਦ੍ਦਕਸਦ੍ਦਂ ਕਰੋਤਿ. ਯਥਾ ਪੇਤਗ੍ਗਿ ਕਾਲੇਨ ਜਲਤਿ, ਕਾਲੇਨ ਨਿਬ੍ਬਾਯਤਿ, ਏਵਮੇਵ ਇਧ ਪੇਤਗ੍ਗਿਧਮ੍ਮਕਥਿਕੋ ਨਾਮ ਹੋਤਿ, ਪਰਿਸਾਯ ਉਟ੍ਠਾਤੁਕਾਮਾਯ ਪੁਨਪ੍ਪੁਨਂ ਆਰਭਤਿ. ਯੋਪਿ ਕਥੇਨ੍ਤੋ ਤਤ੍ਥ ਤਤ੍ਥ ਵਿਤ੍ਥਾਯਤਿ, ਨਿਤ੍ਥੁਨਨ੍ਤੋ ਕਨ੍ਦਨ੍ਤੋ ਵਿਯ ਕਥੇਤਿ, ਇਮੇਸਂ ਸਬ੍ਬੇਸਮ੍ਪਿ ਕਥਾ ਅਪ੍ਪਬਨ੍ਧਾ ਨਾਮ ਹੋਤਿ. ਯੋ ਪਨ ਸੁਤ੍ਤਂ ਆਰਭਿਤ੍ਵਾ ਆਚਰਿਯੇਹਿ ਦਿਨ੍ਨਨਯੇ ਠਿਤੋ ਅਚ੍ਛਿਨ੍ਨਧਾਰਂ ਕਤ੍ਵਾ ਨਦੀਸੋਤਂ ਵਿਯ ਪਵਤ੍ਤੇਤਿ, ਆਕਾਸਗਙ੍ਗਤੋ ਭਸ੍ਸਮਾਨਂ ਉਦਕਂ ਵਿਯ ਨਿਰਨ੍ਤਰਂ ਕਥਂ ਪਵਤ੍ਤੇਤਿ, ਤਸ੍ਸ ਕਥਾ ਅਨੁਪ੍ਪਬਨ੍ਧਾ ਹੋਤਿ. ਤਂ ਸਨ੍ਧਾਯ ਵੁਤ੍ਤਂ ‘‘ਅਨੁਪ੍ਪਬਨ੍ਧੇਹੀ’’ਤਿ. ਅਨੁਸਯਸਮੁਗ੍ਘਾਤਾਯਾਤਿ ਸਤ੍ਤਨ੍ਨਂ ਅਨੁਸਯਾਨਂ ਸਮੁਗ੍ਘਾਤਤ੍ਥਾਯ. ਏਵਰੂਪੇਨਾਤਿ ਏਵਰੂਪੇਨ ਬਹੁਸ੍ਸੁਤੇਨ ਭਿਕ੍ਖੁਨਾ ਤਥਾਰੂਪੇਨੇਵ ਭਿਕ੍ਖੁਸਤੇਨ ਭਿਕ੍ਖੁਸਹਸ੍ਸੇਨ ਵਾ ਸਙ੍ਘਾਟਿਕਣ੍ਣੇਨ ਵਾ ਸਙ੍ਘਾਟਿਕਣ੍ਣਂ, ਪਲ੍ਲਙ੍ਕੇਨ ਵਾ ਪਲ੍ਲਙ੍ਕਂ ਆਹਚ੍ਚ ਨਿਸਿਨ੍ਨੇਨ ਗੋਸਿਙ੍ਗਸਾਲਵਨਂ ਸੋਭੇਯ੍ਯ. ਇਮਿਨਾ ਨਯੇਨ ਸਬ੍ਬਵਾਰੇਸੁ ਅਤ੍ਥੋ ਵੇਦਿਤਬ੍ਬੋ.
੩੩੪. ਪਟਿਸਲ੍ਲਾਨਂ ਅਸ੍ਸ ਆਰਾਮੋਤਿ ਪਟਿਸਲ੍ਲਾਨਾਰਾਮੋ. ਪਟਿਸਲ੍ਲਾਨੇ ਰਤੋਤਿ ਪਟਿਸਲ੍ਲਾਨਰਤੋ.
੩੩੫. ਸਹਸ੍ਸਂ ਲੋਕਾਨਨ੍ਤਿ ਸਹਸ੍ਸਂ ਲੋਕਧਾਤੂਨਂ. ਏਤ੍ਤਕਞ੍ਹਿ ਥੇਰਸ੍ਸ ਧੁਵਸੇਵਨਂ ਆਵਜ੍ਜਨਪਟਿਬਦ੍ਧਂ, ਆਕਙ੍ਖਮਾਨੋ ਪਨ ਥੇਰੋ ਅਨੇਕਾਨਿਪਿ ਚਕ੍ਕਵਾਲ਼ਸਹਸ੍ਸਾਨਿ ਵੋਲੋਕੇਤਿਯੇਵ. ਉਪਰਿਪਾਸਾਦਵਰਗਤੋਤਿ ਸਤ੍ਤਭੂਮਕਸ੍ਸ ਵਾ ਨਵਭੂਮਕਸ੍ਸ ਵਾ ਪਾਸਾਦਵਰਸ੍ਸ ਉਪਰਿ ਗਤੋ. ਸਹਸ੍ਸਂ ਨੇਮਿਮਣ੍ਡਲਾਨਂ ਵੋਲੋਕੇਯ੍ਯਾਤਿ ਪਾਸਾਦਪਰਿਵੇਣੇ ਨਾਭਿਯਾ ਪਤਿਟ੍ਠਿਤਾਨਂ ਨੇਮਿਵਟ੍ਟਿਯਾ ਨੇਮਿਵਟ੍ਟਿਂ ਆਹਚ੍ਚ ਠਿਤਾਨਂ ਨੇਮਿਮਣ੍ਡਲਾਨਂ ਸਹਸ੍ਸਂ ਵਾਤਪਾਨਂ ਵਿਵਰਿਤ੍ਵਾ ਓਲੋਕੇਯ੍ਯ, ਤਸ੍ਸ ਨਾਭਿਯੋਪਿ ਪਾਕਟਾ ਹੋਨ੍ਤਿ, ਅਰਾਪਿ ਅਰਨ੍ਤਰਾਨਿਪਿ ਨੇਮਿਯੋਪਿ. ਏਵਮੇਵ ਖੋ, ਆਵੁਸੋਤਿ, ਆਵੁਸੋ, ਏਵਂ ਅਯਮ੍ਪਿ ਦਿਬ੍ਬਚਕ੍ਖੁਕੋ ਭਿਕ੍ਖੁ ਦਿਬ੍ਬੇਨ ਚਕ੍ਖੁਨਾ ਅਤਿਕ੍ਕਨ੍ਤਮਾਨੁਸਕੇਨ ਸਹਸ੍ਸਂ ਲੋਕਾਨਂ ਵੋਲੋਕੇਤਿ. ਤਸ੍ਸ ਪਾਸਾਦੇ ਠਿਤਪੁਰਿਸਸ੍ਸ ਚਕ੍ਕਨਾਭਿਯੋ ਵਿਯ ਚਕ੍ਕਵਾਲ਼ਸਹਸ੍ਸੇ ਸਿਨੇਰੁਸਹਸ੍ਸਂ ਪਾਕਟਂ ਹੋਤਿ. ਅਰਾ ਵਿਯ ਦੀਪਾ ਪਾਕਟਾ ਹੋਨ੍ਤਿ. ਅਰਨ੍ਤਰਾਨਿ ਵਿਯ ਦੀਪਟ੍ਠਿਤਮਨੁਸ੍ਸਾ ਪਾਕਟਾ ਹੋਨ੍ਤਿ. ਨੇਮਿਯੋ ਵਿਯ ਚਕ੍ਕਵਾਲ਼ਪਬ੍ਬਤਾ ਪਾਕਟਾ ਹੋਨ੍ਤਿ.
੩੩੬. ਆਰਞ੍ਞਿਕੋਤਿ ਸਮਾਦਿਣ੍ਣਅਰਞ੍ਞਧੁਤਙ੍ਗੋ. ਸੇਸਪਦੇਸੁਪਿ ਏਸੇਵ ਨਯੋ.
੩੩੭. ਨੋ ਚ ਸਂਸਾਦੇਨ੍ਤੀਤਿ ਨ ਓਸਾਦੇਨ੍ਤਿ. ਸਹੇਤੁਕਞ੍ਹਿ ਸਕਾਰਣਂ ਕਤ੍ਵਾ ਪਞ੍ਹਂ ਪੁਚ੍ਛਿਤੁਂ ਵਿਸ੍ਸਜ੍ਜਿਤੁਮ੍ਪਿ ਅਸਕ੍ਕੋਨ੍ਤੋ ਸਂਸਾਦੇਤਿ ਨਾਮ. ਏਵਂ ਨ ਕਰੋਨ੍ਤੀਤਿ ਅਤ੍ਥੋ. ਪਵਤ੍ਤਿਨੀ ਹੋਤੀਤਿ ਨਦੀਸੋਤੋਦਕਂ ਵਿਯ ਪਵਤ੍ਤਤਿ.
੩੩੮. ਯਾਯ ਵਿਹਾਰਸਮਾਪਤ੍ਤਿਯਾਤਿ ਯਾਯ ਲੋਕਿਯਾਯ ਵਿਹਾਰਸਮਾਪਤ੍ਤਿਯਾ, ਯਾਯ ਲੋਕੁਤ੍ਤਰਾਯ ਵਿਹਾਰਸਮਾਪਤ੍ਤਿਯਾ.
੩੩੯. ਸਾਧੁ ਸਾਧੁ ਸਾਰਿਪੁਤ੍ਤਾਤਿ ਅਯਂ ਸਾਧੁਕਾਰੋ ਆਨਨ੍ਦਤ੍ਥੇਰਸ੍ਸ ਦਿਨ੍ਨੋ. ਸਾਰਿਪੁਤ੍ਤਤ੍ਥੇਰੇਨ ਪਨ ਸਦ੍ਧਿਂ ਭਗਵਾ ਆਲਪਤਿ. ਏਸ ਨਯੋ ਸਬ੍ਬਤ੍ਥ. ਯਥਾ ਤਂ ਆਨਨ੍ਦੋਵਾਤਿ ਯਥਾ ਆਨਨ੍ਦੋਵ ਸਮ੍ਮਾ ਬ੍ਯਾਕਰਣਮਾਨੋ ਬ੍ਯਾਕਰੇਯ੍ਯ, ਏਵਂ ਬ੍ਯਾਕਤਂ ਆਨਨ੍ਦੇਨ ਅਤ੍ਤਨੋ ਅਨੁਚ੍ਛਵਿਕਮੇਵ, ਅਜ੍ਝਾਸਯਾਨੁਰੂਪਮੇਵ ਬ੍ਯਾਕਤਨ੍ਤਿ ਅਤ੍ਥੋ. ਆਨਨ੍ਦਤ੍ਥੇਰੋ ਹਿ ਅਤ੍ਤਨਾਪਿ ਬਹੁਸ੍ਸੁਤੋ, ਅਜ੍ਝਾਸਯੋਪਿਸ੍ਸ ਏਵਂ ਹੋਤਿ – ‘‘ਅਹੋ ਵਤ ਸਾਸਨੇ ਸਬ੍ਰਹ੍ਮਚਾਰੀ ਬਹੁਸ੍ਸੁਤਾ ਭਵੇਯ੍ਯੁ’’ਨ੍ਤਿ. ਕਸ੍ਮਾ? ਬਹੁਸ੍ਸੁਤਸ੍ਸ ਹਿ ਕਪ੍ਪਿਯਾਕਪ੍ਪਿਯਂ ਸਾਵਜ੍ਜਾਨਵਜ੍ਜਂ, ਗਰੁਕਲਹੁਕਂ ਸਤੇਕਿਚ੍ਛਾਤੇਕਿਚ੍ਛਂ ਪਾਕਟਂ ਹੋਤਿ. ਬਹੁਸ੍ਸੁਤੋ ਉਗ੍ਗਹਿਤਬੁਦ੍ਧਵਚਨਂ ਆਵਜ੍ਜਿਤ੍ਵਾ ਇਮਸ੍ਮਿਂ ਠਾਨੇ ਸੀਲਂ ਕਥਿਤਂ, ਇਮਸ੍ਮਿਂ ਸਮਾਧਿ, ਇਮਸ੍ਮਿਂ ਵਿਪਸ੍ਸਨਾ, ਇਮਸ੍ਮਿਂ ਮਗ੍ਗਫਲਨਿਬ੍ਬਾਨਾਨੀਤਿ ਸੀਲਸ੍ਸ ਆਗਤਟ੍ਠਾਨੇ ਸੀਲਂ ਪੂਰੇਤ੍ਵਾ, ਸਮਾਧਿਸ੍ਸ ਆਗਤਟ੍ਠਾਨੇ ਸਮਾਧਿਂ ਪੂਰੇਤ੍ਵਾ ਵਿਪਸ੍ਸਨਾਯ ਆਗਤਟ੍ਠਾਨੇ ਵਿਪਸ੍ਸਨਾਗਬ੍ਭਂ ਗਣ੍ਹਾਪੇਤ੍ਵਾ ਮਗ੍ਗਂ ਭਾਵੇਤ੍ਵਾ ਫਲਂ ਸਚ੍ਛਿਕਰੋਤਿ. ਤਸ੍ਮਾ ਥੇਰਸ੍ਸ ਏਵਂ ਅਜ੍ਝਾਸਯੋ ਹੋਤਿ – ‘‘ਅਹੋ ਵਤ ਸਬ੍ਰਹ੍ਮਚਾਰੀ ਏਕਂ ਵਾ ਦ੍ਵੇ ਵਾ ਤਯੋ ਵਾ ਚਤ੍ਤਾਰੋ ਵਾ ਪਞ੍ਚ ਵਾ ਨਿਕਾਯੇ ਉਗ੍ਗਹੇਤ੍ਵਾ ਆਵਜ੍ਜਨ੍ਤਾ ਸੀਲਾਦੀਨਂ ਆਗਤਟ੍ਠਾਨੇਸੁ ਸੀਲਾਦੀਨਿ ਪਰਿਪੂਰੇਤ੍ਵਾ ਅਨੁਕ੍ਕਮੇਨ ਮਗ੍ਗਫਲਨਿਬ੍ਬਾਨਾਨਿ ਸਚ੍ਛਿਕਰੇਯ੍ਯੁ’’ਨ੍ਤਿ. ਸੇਸਵਾਰੇਸੁਪਿ ਏਸੇਵ ਨਯੋ.
੩੪੦. ਆਯਸ੍ਮਾ ਹਿ ਰੇਵਤੋ ਝਾਨਜ੍ਝਾਸਯੋ ਝਾਨਾਭਿਰਤੋ, ਤਸ੍ਮਾਸ੍ਸ ਏਵਂ ਹੋਤਿ – ‘‘ਅਹੋ ਵਤ ਸਬ੍ਰਹ੍ਮਚਾਰੀ ਏਕਿਕਾ ਨਿਸੀਦਿਤ੍ਵਾ ਕਸਿਣਪਰਿਕਮ੍ਮਂ ਕਤ੍ਵਾ ਅਟ੍ਠ ਸਮਾਪਤ੍ਤਿਯੋ ਨਿਬ੍ਬਤ੍ਤੇਤ੍ਵਾ ਝਾਨਪਦਟ੍ਠਾਨਂ ਵਿਪਸ੍ਸਨਂ ਵਡ੍ਢੇਤ੍ਵਾ ਲੋਕੁਤ੍ਤਰਧਮ੍ਮਂ ਸਚ੍ਛਿਕਰੇਯ੍ਯੁ’’ਨ੍ਤਿ. ਤਸ੍ਮਾ ਏਵਂ ਬ੍ਯਾਕਾਸਿ.
੩੪੧. ਆਯਸ੍ਮਾ ਅਨੁਰੁਦ੍ਧੋ ਦਿਬ੍ਬਚਕ੍ਖੁਕੋ, ਤਸ੍ਸ ਏਵਂ ਹੋਤਿ – ‘‘ਅਹੋ ਵਤ ਸਬ੍ਰਹ੍ਮਚਾਰੀ ਆਲੋਕਂ ਵਡ੍ਢੇਤ੍ਵਾ ਦਿਬ੍ਬੇਨ ਚਕ੍ਖੁਨਾ ਅਨੇਕੇਸੁ ਚਕ੍ਕਵਾਲ਼ਸਹਸ੍ਸੇਸੁ ਚਵਮਾਨੇ ਚ ਉਪਪਜ੍ਜਮਾਨੇ ਚ ਸਤ੍ਤੇ ਦਿਸ੍ਵਾ ਵਟ੍ਟਭਯੇਨ ਚਿਤ੍ਤਂ ਸਂਵੇਜੇਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਲੋਕੁਤ੍ਤਰਧਮ੍ਮਂ ਸਚ੍ਛਿਕਰੇਯ੍ਯੁ’’ਨ੍ਤਿ. ਤਸ੍ਮਾ ਏਵਂ ਬ੍ਯਾਕਾਸਿ.
੩੪੨. ਆਯਸ੍ਮਾ ਮਹਾਕਸ੍ਸਪੋ ਧੁਤਵਾਦੋ, ਤਸ੍ਸ ਏਵਂ ਹੋਤਿ – ‘‘ਅਹੋ ਵਤ ਸਬ੍ਰਹ੍ਮਚਾਰੀ ਧੁਤਵਾਦਾ ਹੁਤ੍ਵਾ ਧੁਤਙ੍ਗਾਨੁਭਾਵੇਨ ਪਚ੍ਚਯਤਣ੍ਹਂ ਮਿਲਾਪੇਤ੍ਵਾ ਅਪਰੇਪਿ ਨਾਨਪ੍ਪਕਾਰੇ ਕਿਲੇਸੇ ਧੁਨਿਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਲੋਕੁਤ੍ਤਰਧਮ੍ਮਂ ਸਚ੍ਛਿਕਰੇਯ੍ਯੁ’’ਨ੍ਤਿ. ਤਸ੍ਮਾ ਏਵਂ ਬ੍ਯਾਕਾਸਿ.
੩੪੩. ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਸਮਾਧਿਪਾਰਮਿਯਾ ਮਤ੍ਥਕਂ ਪਤ੍ਤੋ, ਸੁਖੁਮਂ ਪਨ ਚਿਤ੍ਤਨ੍ਤਰਂ ਖਨ੍ਧਨ੍ਤਰਂ ਧਾਤ੍ਵਨ੍ਤਰਂ ਆਯਤਨਨ੍ਤਰਂ ਝਾਨੋਕ੍ਕਨ੍ਤਿਕਂ ਆਰਮ੍ਮਣੋਕ੍ਕਨ੍ਤਿਕਂ ਅਙ੍ਗਵਵਤ੍ਥਾਨਂ ਆਰਮ੍ਮਣਵਵਤ੍ਥਾਨਂ ਅਙ੍ਗਸਙ੍ਕਨ੍ਤਿ ਆਰਮ੍ਮਣਸਙ੍ਕਨ੍ਤਿ ਏਕਤੋਵਡ੍ਢਨਂ ਉਭਤੋਵਡ੍ਢਨਨ੍ਤਿ ਆਭਿਧਮ੍ਮਿਕਧਮ੍ਮਕਥਿਕਸ੍ਸੇਵ ਪਾਕਟਂ. ਅਨਾਭਿਧਮ੍ਮਿਕੋ ਹਿ ਧਮ੍ਮਂ ਕਥੇਨ੍ਤੋ – ‘‘ਅਯਂ ਸਕਵਾਦੋ ਅਯਂ ਪਰਵਾਦੋ’’ਤਿ ਨ ਜਾਨਾਤਿ. ਸਕਵਾਦਂ ਦੀਪੇਸ੍ਸਾਮੀਤਿ ਪਰਵਾਦਂ ਦੀਪੇਤਿ, ਪਰਵਾਦਂ ਦੀਪੇਸ੍ਸਾਮੀਤਿ ਸਕਵਾਦਂ ਦੀਪੇਤਿ, ਧਮ੍ਮਨ੍ਤਰਂ ਵਿਸਂਵਾਦੇਤਿ. ਆਭਿਧਮ੍ਮਿਕੋ ਸਕਵਾਦਂ ਸਕਵਾਦਨਿਯਾਮੇਨੇਵ, ਪਰਵਾਦਂ ਪਰਵਾਦਨਿਯਾਮੇਨੇਵ ਦੀਪੇਤਿ, ਧਮ੍ਮਨ੍ਤਰਂ ਨ ਵਿਸਂਵਾਦੇਤਿ. ਤਸ੍ਮਾ ਥੇਰਸ੍ਸ ਏਵਂ ਹੋਤਿ – ‘‘ਅਹੋ ਵਤ ਸਬ੍ਰਹ੍ਮਚਾਰੀ ਆਭਿਧਮ੍ਮਿਕਾ ਹੁਤ੍ਵਾ ਸੁਖੁਮੇਸੁ ਠਾਨੇਸੁ ਞਾਣਂ ਓਤਾਰੇਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਲੋਕੁਤ੍ਤਰਧਮ੍ਮਂ ਸਚ੍ਛਿਕਰੇਯ੍ਯੁ’’ਨ੍ਤਿ. ਤਸ੍ਮਾ ਏਵਂ ਬ੍ਯਾਕਾਸਿ.
੩੪੪. ਆਯਸ੍ਮਾ ਸਾਰਿਪੁਤ੍ਤੋ ਪਞ੍ਞਾਪਾਰਮਿਯਾ ਮਤ੍ਥਕਂ ਪਤ੍ਤੋ, ਪਞ੍ਞਵਾਯੇਵ ਚ ਚਿਤ੍ਤਂ ਅਤ੍ਤਨੋ ਵਸੇ ਵਤ੍ਤੇਤੁਂ ਸਕ੍ਕੋਤਿ, ਨ ਦੁਪ੍ਪਞ੍ਞੋ. ਦੁਪ੍ਪਞ੍ਞੋ ਹਿ ਉਪ੍ਪਨ੍ਨਸ੍ਸ ਚਿਤ੍ਤਸ੍ਸ ਵਸੇ ਵਤ੍ਤੇਤ੍ਵਾ ਇਤੋ ਚਿਤੋ ਚ ਵਿਪ੍ਫਨ੍ਦਿਤ੍ਵਾਪਿ ਕਤਿਪਾਹੇਨੇਵ ਗਿਹਿਭਾਵਂ ਪਤ੍ਵਾ ਅਨਯਬ੍ਯਸਨਂ ਪਾਪੁਣਾਤਿ. ਤਸ੍ਮਾ ਥੇਰਸ੍ਸ ਏਵਂ ਹੋਤਿ – ‘‘ਅਹੋ ਵਤ ਸਬ੍ਰਹ੍ਮਚਾਰੀ ਅਚਿਤ੍ਤਵਸਿਕਾ ਹੁਤ੍ਵਾ ਚਿਤ੍ਤਂ ਅਤ੍ਤਨੋ ਵਸੇ ਵਤ੍ਤੇਤ੍ਵਾ ਸਬ੍ਬਾਨਸ੍ਸ ਵਿਸੇਵਿਤਵਿਪ੍ਫਨ੍ਦਿਤਾਨਿ ਭਞ੍ਜਿਤ੍ਵਾ ਈਸਕਮ੍ਪਿ ਬਹਿ ਨਿਕ੍ਖਮਿਤੁਂ ਅਦੇਨ੍ਤਾ ਵਿਪਸ੍ਸਨਂ ਵਡ੍ਢੇਤ੍ਵਾ ਲੋਕੁਤ੍ਤਰਧਮ੍ਮਂ ਸਚ੍ਛਿਕਰੇਯ੍ਯੁ’’ਨ੍ਤਿ. ਤਸ੍ਮਾ ਏਵਂ ਬ੍ਯਾਕਾਸਿ.
੩੪੫. ਸਬ੍ਬੇਸਂ ਵੋ, ਸਾਰਿਪੁਤ੍ਤ, ਸੁਭਾਸਿਤਂ ਪਰਿਯਾਯੇਨਾਤਿ ਸਾਰਿਪੁਤ੍ਤ, ਯਸ੍ਮਾ ਸਙ੍ਘਾਰਾਮਸ੍ਸ ਨਾਮ ਬਹੁਸ੍ਸੁਤਭਿਕ੍ਖੂਹਿਪਿ ਸੋਭਨਕਾਰਣਂ ਅਤ੍ਥਿ, ਝਾਨਾਭਿਰਤੇਹਿਪਿ, ਦਿਬ੍ਬਚਕ੍ਖੁਕੇਹਿਪਿ, ਧੁਤਵਾਦੇਹਿਪਿ, ਆਭਿਧਮ੍ਮਿਕੇਹਿਪਿ, ਅਚਿਤ੍ਤਵਸਿਕੇਹਿਪਿ ਸੋਭਨਕਾਰਣਂ ਅਤ੍ਥਿ. ਤਸ੍ਮਾ ਸਬ੍ਬੇਸਂ ਵੋ ਸੁਭਾਸਿਤਂ ਪਰਿਯਾਯੇਨ, ਤੇਨ ਤੇਨ ਕਾਰਣੇਨ ਸੁਭਾਸਿਤਮੇਵ, ਨੋ ਦੁਬ੍ਭਾਸਿਤਂ. ਅਪਿਚ ਮਮਪਿ ਸੁਣਾਥਾਤਿ ਅਪਿਚ ਮਮਪਿ ਵਚਨਂ ਸੁਣਾਥ. ਨ ਤਾਵਾਹਂ ਇਮਂ ਪਲ੍ਲਙ੍ਕਂ ਭਿਨ੍ਦਿਸ੍ਸਾਮੀਤਿ ਨ ਤਾਵ ਅਹਂ ਇਮਂ ਚਤੁਰਙ੍ਗਵੀਰਿਯਂ ਅਧਿਟ੍ਠਾਯ ਆਭੁਜਿਤਂ ਪਲ੍ਲਙ੍ਕਂ ਭਿਨ੍ਦਿਸ੍ਸਾਮਿ, ਨ ਮੋਚੇਸ੍ਸਾਮੀਤਿ ਅਤ੍ਥੋ. ਇਦਂ ਕਿਰ ਭਗਵਾ ਪਰਿਪਾਕਗਤੇ ਞਾਣੇ ਰਜ੍ਜਸਿਰਿਂ ਪਹਾਯ ਕਤਾਭਿਨਿਕ੍ਖਮਨੋ ਅਨੁਪੁਬ੍ਬੇਨ ਬੋਧਿਮਣ੍ਡਂ ਆਰੁਯ੍ਹ ਚਤੁਰਙ੍ਗਵੀਰਿਯਂ ਅਧਿਟ੍ਠਾਯ ਅਪਰਾਜਿਤਪਲ੍ਲਙ੍ਕਂ ਆਭੁਜਿਤ੍ਵਾ ਦਲ਼੍ਹਸਮਾਦਾਨੋ ਹੁਤ੍ਵਾ ਨਿਸਿਨ੍ਨੋ ਤਿਣ੍ਣਂ ਮਾਰਾਨਂ ਮਤ੍ਥਕਂ ਭਿਨ੍ਦਿਤ੍ਵਾ ਪਚ੍ਚੂਸਸਮਯੇ ਦਸਸਹਸ੍ਸਿਲੋਕਧਾਤੁਂ ਉਨ੍ਨਾਦੇਨ੍ਤੋ ਸਬ੍ਬਞ੍ਞੁਤਞ੍ਞਾਣਂ ਪਟਿਵਿਜ੍ਝਿ, ਤਂ ਅਤ੍ਤਨੋ ਮਹਾਬੋਧਿਪਲ੍ਲਙ੍ਕਂ ਸਨ੍ਧਾਯ ਏਵਮਾਹ. ਅਪਿਚ ਪਚ੍ਛਿਮਂ ਜਨਤਂ ਅਨੁਕਮ੍ਪਮਾਨੋਪਿ ਪਟਿਪਤ੍ਤਿਸਾਰਂ ਪੁਥੁਜ੍ਜਨਕਲ੍ਯਾਣਕਂ ਦਸ੍ਸੇਨ੍ਤੋ ਏਵਮਾਹ. ਪਸ੍ਸਤਿ ਹਿ ਭਗਵਾ – ‘‘ਅਨਾਗਤੇ ਏਵਂ ਅਜ੍ਝਾਸਯਾ ਕੁਲਪੁਤ੍ਤਾ ਇਤਿ ਪਟਿਸਞ੍ਚਿਕ੍ਖਿਸ੍ਸਨ੍ਤਿ, ‘ਭਗਵਾ ਮਹਾਗੋਸਿਙ੍ਗਸੁਤ੍ਤਂ ਕਥੇਨ੍ਤੋ ਇਧ, ਸਾਰਿਪੁਤ੍ਤ, ਭਿਕ੍ਖੁ ਪਚ੍ਛਾਭਤ੍ਤਂ…ਪੇ… ਏਵਰੂਪੇਨ ਖੋ, ਸਾਰਿਪੁਤ੍ਤ, ਭਿਕ੍ਖੁਨਾ ਗੋਸਿਙ੍ਗਸਾਲਵਨਂ ਸੋਭੇਯ੍ਯਾਤਿ ਆਹ, ਮਯਂ ਭਗਵਤੋ ਅਜ੍ਝਾਸਯਂ ਗਣ੍ਹਿਸ੍ਸਾਮਾ’ਤਿ ਪਚ੍ਛਾਭਤ੍ਤਂ ਪਿਣ੍ਡਪਾਤਪਟਿਕ੍ਕਨ੍ਤਾ ਚਤੁਰਙ੍ਗਵੀਰਿਯਂ ਅਧਿਟ੍ਠਾਯ ਦਲ਼੍ਹਸਮਾਦਾਨਾ ਹੁਤ੍ਵਾ ‘ਅਰਹਤ੍ਤਂ ਅਪ੍ਪਤ੍ਵਾ ਇਮਂ ਪਲ੍ਲਙ੍ਕਂ ਨ ਭਿਨ੍ਦਿਸ੍ਸਾਮਾ’ਤਿ ਸਮਣਧਮ੍ਮਂ ਕਾਤਬ੍ਬਂ ਮਞ੍ਞਿਸ੍ਸਨ੍ਤਿ, ਤੇ ਏਵਂ ਪਟਿਪਨ੍ਨਾ ਕਤਿਪਾਹੇਨੇਵ ਜਾਤਿਜਰਾਮਰਣਸ੍ਸ ਅਨ੍ਤਂ ਕਰਿਸ੍ਸਨ੍ਤੀ’’ਤਿ, ਇਮਂ ਪਚ੍ਛਿਮਂ ਜਨਤਂ ਅਨੁਕਮ੍ਪਮਾਨੋ ਪਟਿਪਤ੍ਤਿਸਾਰਂ ਪੁਥੁਜ੍ਜਨਕਲ੍ਯਾਣਕਂ ਦਸ੍ਸੇਨ੍ਤੋ ਏਵਮਾਹ. ਏਵਰੂਪੇਨ ਖੋ, ਸਾਰਿਪੁਤ੍ਤ, ਭਿਕ੍ਖੁਨਾ ਗੋਸਿਙ੍ਗਸਾਲਵਨਂ ਸੋਭੇਯ੍ਯਾਤਿ, ਸਾਰਿਪੁਤ੍ਤ, ਏਵਰੂਪੇਨ ਭਿਕ੍ਖੁਨਾ ਨਿਪ੍ਪਰਿਯਾਯੇਨੇਵ ਗੋਸਿਙ੍ਗਸਾਲਵਨਂ ਸੋਭੇਯ੍ਯਾਤਿ ਯਥਾਨੁਸਨ੍ਧਿਨਾਵ ਦੇਸਨਂ ਨਿਟ੍ਠਪੇਸੀਤਿ.
ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ
ਮਹਾਗੋਸਿਙ੍ਗਸੁਤ੍ਤਵਣ੍ਣਨਾ ਨਿਟ੍ਠਿਤਾ.