੪. ਰਥਵਿਨੀਤਸੁਤ੍ਤਵਣ੍ਣਨਾ
੨੫੨. ਏਵਂ ਮੇ ਸੁਤਨ੍ਤਿ ਰਥਵਿਨੀਤਸੁਤ੍ਤਂ. ਤਤ੍ਥ ਰਾਜਗਹੇਤਿ ਏਵਂਨਾਮਕੇ ਨਗਰੇ, ਤਞ੍ਹਿ ਮਨ੍ਧਾਤੁਮਹਾਗੋਵਿਨ੍ਦਾਦੀਹਿ ਪਰਿਗ੍ਗਹਿਤਤ੍ਤਾ ਰਾਜਗਹਨ੍ਤਿ ਵੁਚ੍ਚਤਿ. ਅਞ੍ਞੇਪੇਤ੍ਥ ਪਕਾਰੇ ਵਣ੍ਣਯਨ੍ਤਿ. ਕਿਂ ਤੇਹਿ? ਨਾਮਮੇਤਂ ਤਸ੍ਸ ਨਗਰਸ੍ਸ. ਤਂ ਪਨੇਤਂ ਬੁਦ੍ਧਕਾਲੇ ਚ ਚਕ੍ਕਵਤ੍ਤਿਕਾਲੇ ਚ ਨਗਰਂ ਹੋਤਿ, ਸੇਸਕਾਲੇ ਸੁਞ੍ਞਂ ਹੋਤਿ ਯਕ੍ਖਪਰਿਗ੍ਗਹਿਤਂ, ਤੇਸਂ ਵਸਨ੍ਤਵਨਂ ਹੁਤ੍ਵਾ ਤਿਟ੍ਠਤਿ. ਵੇਲ਼ੁਵਨੇ ਕਲਨ੍ਦਕਨਿਵਾਪੇਤਿ ਵੇਲ਼ੁਵਨਨ੍ਤਿ ਤਸ੍ਸ ਉਯ੍ਯਾਨਸ੍ਸ ਨਾਮਂ, ਤਂ ਕਿਰ ਵੇਲ਼ੂਹਿ ਪਰਿਕ੍ਖਿਤ੍ਤਂ ਅਹੋਸਿ ਅਟ੍ਠਾਰਸਹਤ੍ਥੇਨ ਚ ਪਾਕਾਰੇਨ, ਗੋਪੁਰਟ੍ਟਾਲਕਯੁਤ੍ਤਂ ਨੀਲੋਭਾਸਂ ਮਨੋਰਮਂ, ਤੇਨ ਵੇਲ਼ੁਵਨਨ੍ਤਿ ਵੁਚ੍ਚਤਿ. ਕਲਨ੍ਦਕਾਨਞ੍ਚੇਤ੍ਥ ਨਿਵਾਪਂ ਅਦਂਸੁ, ਤੇਨ ਕਲਨ੍ਦਕਨਿਵਾਪੋਤਿ ਵੁਚ੍ਚਤਿ.
ਪੁਬ੍ਬੇ ਕਿਰ ਅਞ੍ਞਤਰੋ ਰਾਜਾ ਤਤ੍ਥ ਉਯ੍ਯਾਨਕੀਲ਼ਨਤ੍ਥਂ ਆਗਤੋ ਸੁਰਾਮਦੇਨ ਮਤ੍ਤੋ ਦਿਵਾਸੇਯ੍ਯਂ ਉਪਗਤੋ ਸੁਪਿ. ਪਰਿਜਨੋਪਿਸ੍ਸ, ‘‘ਸੁਤ੍ਤੋ ਰਾਜਾ’’ਤਿ ਪੁਪ੍ਫਫਲਾਦੀਹਿ ਪਲੋਭਿਯਮਾਨੋ ਇਤੋ ਚਿਤੋ ਚ ਪਕ੍ਕਾਮਿ, ਅਥ ਸੁਰਾਗਨ੍ਧੇਨ ਅਞ੍ਞਤਰਸ੍ਮਾ ਸੁਸਿਰਰੁਕ੍ਖਾ ਕਣ੍ਹਸਪ੍ਪੋ ਨਿਕ੍ਖਮਿਤ੍ਵਾ ਰਞ੍ਞਾਭਿਮੁਖੋ ਆਗਚ੍ਛਤਿ. ਤਂ ਦਿਸ੍ਵਾ ਰੁਕ੍ਖਦੇਵਤਾ, ‘‘ਰਞ੍ਞੋ ਜੀਵਿਤਂ ਦਮ੍ਮੀ’’ਤਿ ਕਾਲ਼ਕਵੇਸੇਨ ਆਗਨ੍ਤ੍ਵਾ ਕਣ੍ਣਮੂਲੇ ਸਦ੍ਦਮਕਾਸਿ. ਰਾਜਾ ਪਟਿਬੁਜ੍ਝਿ, ਕਣ੍ਹਸਪ੍ਪੋ ਨਿਵਤ੍ਤੋ. ਸੋ ਤਂ ਦਿਸ੍ਵਾ, ‘‘ਇਮਾਯ ਮਮ ਜੀਵਿਤਂ ਦਿਨ੍ਨ’’ਨ੍ਤਿ ਕਾਲ਼ਕਾਨਂ ਤਤ੍ਥ ਨਿਵਾਪਂ ਪਟ੍ਠਪੇਸਿ, ਅਭਯਘੋਸਨਞ੍ਚ ਘੋਸਾਪੇਸਿ. ਤਸ੍ਮਾ ਤਂ ਤਤੋ ਪਭੁਤਿ ਕਲਨ੍ਦਕਨਿਵਾਪਨ੍ਤਿ ਸਙ੍ਖ੍ਯਂ ਗਤਂ. ਕਲਨ੍ਦਕਾਤਿ ਕਾਲ਼ਕਾਨਂ ਨਾਮਂ.
ਜਾਤਿਭੂਮਿਕਾਤਿ ਜਾਤਿਭੂਮਿਵਾਸਿਨੋ. ਤਤ੍ਥ ਜਾਤਿਭੂਮੀਤਿ ਜਾਤਟ੍ਠਾਨਂ. ਤਂ ਖੋ ਪਨੇਤਂ ਨੇਵ ਕੋਸਲਮਹਾਰਾਜਾਦੀਨਂ ਨ ਚਙ੍ਕੀਬ੍ਰਾਹਮਣਾਦੀਨਂ ਨ ਸਕ੍ਕਸੁਯਾਮਸਨ੍ਤੁਸਿਤਾਦੀਨਂ ਨ ਅਸੀਤਿਮਹਾਸਾਵਕਾਦੀਨਂ ਨ ਅਞ੍ਞੇਸਂ ਸਤ੍ਤਾਨਂ ਜਾਤਟ੍ਠਾਨਂ ‘‘ਜਾਤਿਭੂਮੀ’’ਤਿ ਵੁਚ੍ਚਤਿ. ਯਸ੍ਸ ਪਨ ਜਾਤਦਿਵਸੇ ਦਸਸਹਸ੍ਸਿਲੋਕਧਾਤੁ ਏਕਦ੍ਧਜਮਾਲਾਵਿਪ੍ਪਕਿਣ੍ਣਕੁਸੁਮਵਾਸਚੁਣ੍ਣਗਨ੍ਧਸੁਗਨ੍ਧਾ ਸਬ੍ਬਪਾਲਿਫੁਲ੍ਲਮਿਵ ਨਨ੍ਦਨਵਨਂ ਵਿਰੋਚਮਾਨਾ ਪਦੁਮਿਨਿਪਣ੍ਣੇ ਉਦਕਬਿਨ੍ਦੁ ਵਿਯ ਅਕਮ੍ਪਿਤ੍ਥ, ਜਚ੍ਚਨ੍ਧਾਦੀਨਞ੍ਚ ਰੂਪਦਸ੍ਸਨਾਦੀਨਿ ਅਨੇਕਾਨਿ ਪਾਟਿਹਾਰਿਯਾਨਿ ਪਵਤ੍ਤਿਂਸੁ, ਤਸ੍ਸ ਸਬ੍ਬਞ੍ਞੁਬੋਧਿਸਤ੍ਤਸ੍ਸ ਜਾਤਟ੍ਠਾਨਸਾਕਿਯਜਨਪਦੋ ਕਪਿਲਵਤ੍ਥਾਹਾਰੋ, ਸਾ ‘‘ਜਾਤਿਭੂਮੀ’’ਤਿ ਵੁਚ੍ਚਤਿ.
ਧਮ੍ਮਗਰੁਭਾਵਵਣ੍ਣਨਾ
ਵਸ੍ਸਂਵੁਟ੍ਠਾਤਿ ਤੇਮਾਸਂ ਵਸ੍ਸਂਵੁਟ੍ਠਾ ਪਵਾਰਿਤਪਵਾਰਣਾ ਹੁਤ੍ਵਾ. ਭਗਵਾ ਏਤਦਵੋਚਾਤਿ ‘‘ਕਚ੍ਚਿ, ਭਿਕ੍ਖਵੇ, ਖਮਨੀਯ’’ਨ੍ਤਿਆਦੀਹਿ ਵਚਨੇਹਿ ਆਗਨ੍ਤੁਕਪਟਿਸਨ੍ਥਾਰਂ ਕਤ੍ਵਾ ਏਤਂ, ‘‘ਕੋ ਨੁ ਖੋ, ਭਿਕ੍ਖਵੇ’’ਤਿਆਦਿਵਚਨਮਵੋਚ. ਤੇ ਕਿਰ ਭਿਕ੍ਖੁ, – ‘‘ਕਚ੍ਚਿ, ਭਿਕ੍ਖਵੇ, ਖਮਨੀਯਂ ਕਚ੍ਚਿ ਯਾਪਨੀਯਂ, ਕਚ੍ਚਿਤ੍ਥ ਅਪ੍ਪਕਿਲਮਥੇਨ ਅਦ੍ਧਾਨਂ ਆਗਤਾ, ਨ ਚ ਪਿਣ੍ਡਕੇਨ ਕਿਲਮਿਤ੍ਥ, ਕੁਤੋ ਚ ਤੁਮ੍ਹੇ, ਭਿਕ੍ਖਵੇ, ਆਗਚ੍ਛਥਾ’’ਤਿ ਪਟਿਸਨ੍ਥਾਰਵਸੇਨ ਪੁਚ੍ਛਿਤਾ – ‘‘ਭਗਵਾ ਸਾਕਿਯਜਨਪਦੇ ਕਪਿਲਵਤ੍ਥਾਹਾਰਤੋ ਜਾਤਿਭੂਮਿਤੋ ਆਗਚ੍ਛਾਮਾ’’ਤਿ ਆਹਂਸੁ. ਅਥ ਭਗਵਾ ਨੇਵ ਸੁਦ੍ਧੋਦਨਮਹਾਰਾਜਸ੍ਸ, ਨ ਸਕ੍ਕੋਦਨਸ੍ਸ, ਨ ਸੁਕ੍ਕੋਦਨਸ੍ਸ, ਨ ਧੋਤੋਦਨਸ੍ਸ, ਨ ਅਮਿਤੋਦਨਸ੍ਸ, ਨ ਅਮਿਤ੍ਤਾਯ ਦੇਵਿਯਾ, ਨ ਮਹਾਪਜਾਪਤਿਯਾ, ਨ ਸਕਲਸ੍ਸ ਸਾਕਿਯਮਣ੍ਡਲਸ੍ਸ ਆਰੋਗ੍ਯਂ ਪੁਚ੍ਛਿ. ਅਥ ਖੋ ਅਤ੍ਤਨਾ ਚ ਦਸਕਥਾਵਤ੍ਥੁਲਾਭਿਂ ਪਰਞ੍ਚ ਤਤ੍ਥ ਸਮਾਦਪੇਤਾਰਂ ਪਟਿਪਤ੍ਤਿਸਮ੍ਪਨ੍ਨਂ ਭਿਕ੍ਖੁਂ ਪੁਚ੍ਛਨ੍ਤੋ ਇਦਂ – ‘‘ਕੋ ਨੁ ਖੋ, ਭਿਕ੍ਖਵੇ’’ਤਿਆਦਿਵਚਨਂ ਅਵੋਚ.
ਕਸ੍ਮਾ ਪਨ ਭਗਵਾ ਸੁਦ੍ਧੋਦਨਾਦੀਨਂ ਆਰੋਗ੍ਯਂ ਅਪੁਚ੍ਛਿਤ੍ਵਾ ਏਵਰੂਪਂ ਭਿਕ੍ਖੁਮੇਵ ਪੁਚ੍ਛਤਿ? ਪਿਯਤਾਯ. ਬੁਦ੍ਧਾਨਞ੍ਹਿ ਪਟਿਪਨ੍ਨਕਾ ਭਿਕ੍ਖੂ ਭਿਕ੍ਖੁਨਿਯੋ ਉਪਾਸਕਾ ਉਪਾਸਿਕਾਯੋ ਚ ਪਿਯਾ ਹੋਨ੍ਤਿ ਮਨਾਪਾ. ਕਿਂ ਕਾਰਣਾ? ਧਮ੍ਮਗਰੁਤਾਯ. ਧਮ੍ਮਗਰੁਨੋ ਹਿ ਤਥਾਗਤਾ, ਸੋ ਚ ਨੇਸਂ ਧਮ੍ਮਗਰੁਭਾਵੋ, ‘‘ਦੁਕ੍ਖਂ ਖੋ ਅਗਾਰਵੋ ਵਿਹਰਤਿ, ਅਪ੍ਪਤਿਸ੍ਸੋ’’ਤਿ (ਅ. ਨਿ. ੪.੨੧) ਇਮਿਨਾ ਅਜਪਾਲਨਿਗ੍ਰੋਧਮੂਲੇ ਉਪ੍ਪਨ੍ਨਜ੍ਝਾਸਯੇਨ ਵੇਦਿਤਬ੍ਬੋ. ਧਮ੍ਮਗਰੁਤਾਯੇਵ ਹਿ ਭਗਵਾ ਮਹਾਕਸ੍ਸਪਤ੍ਥੇਰਸ੍ਸ ਅਭਿਨਿਕ੍ਖਮਨਦਿਵਸੇ ਪਚ੍ਚੁਗ੍ਗਮਨਂ ਕਰੋਨ੍ਤੋ ਤਿਗਾਵੁਤਂ ਮਗ੍ਗਂ ਅਗਮਾਸਿ. ਅਤਿਰੇਕਤਿਯੋਜਨਸਤਂ ਮਗ੍ਗਂ ਗਨ੍ਤ੍ਵਾ ਗਙ੍ਗਾਤੀਰੇ ਧਮ੍ਮਂ ਦੇਸੇਤ੍ਵਾ ਮਹਾਕਪ੍ਪਿਨਂ ਸਪਰਿਸਂ ਅਰਹਤ੍ਤੇ ਪਤਿਟ੍ਠਪੇਸਿ. ਏਕਸ੍ਮਿਂ ਪਚ੍ਛਾਭਤ੍ਤੇ ਪਞ੍ਚਚਤ੍ਤਾਲੀਸਯੋਜਨਂ ਮਗ੍ਗਂ ਗਨ੍ਤ੍ਵਾ ਕੁਮ੍ਭਕਾਰਸ੍ਸ ਨਿਵੇਸਨੇ ਤਿਯਾਮਰਤ੍ਤਿਂ ਧਮ੍ਮਕਥਂ ਕਤ੍ਵਾ ਪੁਕ੍ਕੁਸਾਤਿਕੁਲਪੁਤ੍ਤਂ ਅਨਾਗਾਮਿਫਲੇ ਪਤਿਟ੍ਠਪੇਸਿ. ਵੀਸਯੋਜਨਸਤਂ ਗਨ੍ਤ੍ਵਾ ਵਨਵਾਸਿਸਾਮਣੇਰਸ੍ਸ ਅਨੁਗ੍ਗਹਂ ਅਕਾਸਿ. ਸਟ੍ਠਿਯੋਜਨਮਗ੍ਗਂ ਗਨ੍ਤ੍ਵਾ ਖਦਿਰਵਨਿਯਤ੍ਥੇਰਸ੍ਸ ਧਮ੍ਮਂ ਦੇਸੇਸਿ. ਅਨੁਰੁਦ੍ਧਤ੍ਥੇਰੋ ਪਾਚੀਨਵਂਸਦਾਯੇ ਨਿਸਿਨ੍ਨੋ ਮਹਾਪੁਰਿਸਵਿਤਕ੍ਕਂ ਵਿਤਕ੍ਕੇਤੀਤਿ ਞਤ੍ਵਾ ਤਤ੍ਥ ਆਕਾਸੇਨ ਗਨ੍ਤ੍ਵਾ ਥੇਰਸ੍ਸ ਪੁਰਤੋ ਓਰੁਯ੍ਹ ਸਾਧੁਕਾਰਮਦਾਸਿ. ਕੋਟਿਕਣ੍ਣਸੋਣਤ੍ਥੇਰਸ੍ਸ ਏਕਗਨ੍ਧਕੁਟਿਯਂ ਸੇਨਾਸਨਂ ਪਞ੍ਞਪਾਪੇਤ੍ਵਾ ਪਚ੍ਚੂਸਕਾਲੇ ਧਮ੍ਮਦੇਸਨਂ ਅਜ੍ਝੇਸਿਤ੍ਵਾ ਸਰਭਞ੍ਞਪਰਿਯੋਸਾਨੇ ਸਾਧੁਕਾਰਮਦਾਸਿ. ਤਿਗਾਵੁਤਂ ਮਗ੍ਗਂ ਗਨ੍ਤ੍ਵਾ ਤਿਣ੍ਣਂ ਕੁਲਪੁਤ੍ਤਾਨਂ ਵਸਨਟ੍ਠਾਨੇ ਗੋਸਿਙ੍ਗਸਾਲਵਨੇ ਸਾਮਗ੍ਗਿਰਸਾਨਿਸਂਸਂ ਕਥੇਸਿ. ਕਸ੍ਸਪੋਪਿ ਭਗਵਾ – ‘‘ਅਨਾਗਾਮਿਫਲੇ ਪਤਿਟ੍ਠਿਤੋ ਅਰਿਯਸਾਵਕੋ ਅਯ’’ਨ੍ਤਿ ਵਿਸ੍ਸਾਸਂ ਉਪ੍ਪਾਦੇਤ੍ਵਾ ਘਟਿਕਾਰਸ੍ਸ ਕੁਮ੍ਭਕਾਰਸ੍ਸ ਨਿਵੇਸਨਂ ਗਨ੍ਤ੍ਵਾ ਸਹਤ੍ਥਾ ਆਮਿਸਂ ਗਹੇਤ੍ਵਾ ਪਰਿਭੁਞ੍ਜਿ.
ਅਮ੍ਹਾਕਂਯੇਵ ਭਗਵਾ ਉਪਕਟ੍ਠਾਯ ਵਸ੍ਸੂਪਨਾਯਿਕਾਯ ਜੇਤਵਨਤੋ ਭਿਕ੍ਖੁਸਙ੍ਘਪਰਿਵੁਤੋ ਚਾਰਿਕਂ ਨਿਕ੍ਖਮਿ. ਕੋਸਲਮਹਾਰਾਜਅਨਾਥਪਿਣ੍ਡਿਕਾਦਯੋ ਨਿਵਤ੍ਤੇਤੁਂ ਨਾਸਕ੍ਖਿਂਸੁ. ਅਨਾਥਪਿਣ੍ਡਿਕੋ ਘਰਂ ਆਗਨ੍ਤ੍ਵਾ ਦੋਮਨਸ੍ਸਪ੍ਪਤ੍ਤੋ ਨਿਸੀਦਿ. ਅਥ ਨਂ ਪੁਣ੍ਣਾ ਨਾਮ ਦਾਸੀ ਦੋਮਨਸ੍ਸਪ੍ਪਤ੍ਤੋਸਿ ਸਾਮੀਤਿ ਆਹ. ‘‘ਆਮ ਜੇ, ਸਤ੍ਥਾਰਂ ਨਿਵਤ੍ਤੇਤੁਂ ਨਾਸਕ੍ਖਿਂ, ਅਥ ਮੇ ਇਮਂ ਤੇਮਾਸਂ ਧਮ੍ਮਂ ਵਾ ਸੋਤੁਂ, ਯਥਾਧਿਪ੍ਪਾਯਂ ਵਾ ਦਾਨਂ ਦਾਤੁਂ ਨ ਲਭਿਸ੍ਸਾਮੀ’’ਤਿ ਚਿਨ੍ਤਾ ਉਪ੍ਪਨ੍ਨਾਤਿ. ਅਹਮ੍ਪਿ ਸਾਮਿ ਸਤ੍ਥਾਰਂ ਨਿਵਤ੍ਤੇਸ੍ਸਾਮੀਤਿ. ਸਚੇ ਨਿਵਤ੍ਤੇਤੁਂ ਸਕ੍ਕੋਸਿ, ਭੁਜਿਸ੍ਸਾਯੇਵ ਤ੍ਵਨ੍ਤਿ. ਸਾ ਗਨ੍ਤ੍ਵਾ ਦਸਬਲਸ੍ਸ ਪਾਦਮੂਲੇ ਨਿਪਜ੍ਜਿਤ੍ਵਾ ‘‘ਨਿਵਤ੍ਤਥ ਭਗਵਾ’’ਤਿ ਆਹ. ਪੁਣ੍ਣੇ ਤ੍ਵਂ ਪਰਪਟਿਬਦ੍ਧਜੀਵਿਕਾ ਕਿਂ ਮੇ ਕਰਿਸ੍ਸਸੀਤਿ. ਭਗਵਾ ਮਯ੍ਹਂ ਦੇਯ੍ਯਧਮ੍ਮੋ ਨਤ੍ਥੀਤਿ ਤੁਮ੍ਹੇਪਿ ਜਾਨਾਥ, ਤੁਮ੍ਹਾਕਂ ਨਿਵਤ੍ਤਨਪਚ੍ਚਯਾ ਪਨਾਹਂ ਤੀਸੁ ਸਰਣੇਸੁ ਪਞ੍ਚਸੁ ਸੀਲੇਸੁ ਪਤਿਟ੍ਠਹਿਸ੍ਸਾਮੀਤਿ. ਭਗਵਾ ਸਾਧੁ ਸਾਧੁ ਪੁਣ੍ਣੇਤਿ ਸਾਧੁਕਾਰਂ ਕਤ੍ਵਾ ਨਿਵਤ੍ਤੇਤ੍ਵਾ ਜੇਤਵਨਮੇਵ ਪਵਿਟ੍ਠੋ. ਅਯਂ ਕਥਾ ਪਾਕਟਾ ਅਹੋਸਿ. ਸੇਟ੍ਠਿ ਸੁਤ੍ਵਾ ਪੁਣ੍ਣਾਯ ਕਿਰ ਭਗਵਾ ਨਿਵਤ੍ਤਿਤੋਤਿ ਤਂ ਭੁਜਿਸ੍ਸਂ ਕਤ੍ਵਾ ਧੀਤੁਟ੍ਠਾਨੇ ਠਪੇਸਿ. ਸਾ ਪਬ੍ਬਜ੍ਜਂ ਯਾਚਿਤ੍ਵਾ ਪਬ੍ਬਜਿ, ਪਬ੍ਬਜਿਤ੍ਵਾ ਵਿਪਸ੍ਸਨਂ ਆਰਭਿ. ਅਥਸ੍ਸਾ ਸਤ੍ਥਾ ਆਰਦ੍ਧਵਿਪਸ੍ਸਕਭਾਵਂ ਞਤ੍ਵਾ ਇਮਂ ਓਭਾਸਗਾਥਂ ਵਿਸ੍ਸਜ੍ਜੇਸਿ –
‘‘ਪੁਣ੍ਣੇ ਪੂਰੇਸਿ ਸਦ੍ਧਮ੍ਮਂ, ਚਨ੍ਦੋ ਪਨ੍ਨਰਸੋ ਯਥਾ;
ਪਰਿਪੁਣ੍ਣਾਯ ਪਞ੍ਞਾਯ, ਦੁਕ੍ਖਸ੍ਸਨ੍ਤਂ ਕਰਿਸ੍ਸਸੀ’’ਤਿ. (ਥੇਰੀਗਾ. ੩);
ਗਾਥਾਪਰਿਯੋਸਾਨੇ ਅਰਹਤ੍ਤਂ ਪਤ੍ਵਾ ਅਭਿਞ੍ਞਾਤਾ ਸਾਵਿਕਾ ਅਹੋਸੀਤਿ. ਏਵਂ ਧਮ੍ਮਗਰੁਨੋ ਤਥਾਗਤਾ.
ਨਨ੍ਦਕਤ੍ਥੇਰੇ ਉਪਟ੍ਠਾਨਸਾਲਾਯਂ ਧਮ੍ਮਂ ਦੇਸੇਨ੍ਤੇਪਿ ਭਗਵਾ ਅਨਹਾਤੋਵ ਗਨ੍ਤ੍ਵਾ ਤਿਯਾਮਰਤ੍ਤਿਂ ਠਿਤਕੋਵ ਧਮ੍ਮਕਥਂ ਸੁਤ੍ਵਾ ਦੇਸਨਾਪਰਿਯੋਸਾਨੇ ਸਾਧੁਕਾਰਮਦਾਸਿ. ਥੇਰੋ ਆਗਨ੍ਤ੍ਵਾ ਵਨ੍ਦਿਤ੍ਵਾ, ‘‘ਕਾਯ ਵੇਲਾਯ, ਭਨ੍ਤੇ, ਆਗਤਤ੍ਥਾ’’ਤਿ ਪੁਚ੍ਛਿ. ਤਯਾ ਸੁਤ੍ਤਨ੍ਤੇ ਆਰਦ੍ਧਮਤ੍ਤੇਤਿ. ਦੁਕ੍ਕਰਂ ਕਰਿਤ੍ਥ, ਭਨ੍ਤੇ, ਬੁਦ੍ਧਸੁਖੁਮਾਲਾ ਤੁਮ੍ਹੇਤਿ. ਸਚੇ ਤ੍ਵਂ, ਨਨ੍ਦ, ਕਪ੍ਪਂ ਦੇਸੇਤੁਂ ਸਕ੍ਕੁਣੇਯ੍ਯਾਸਿ, ਕਪ੍ਪਮਤ੍ਤਮ੍ਪਾਹਂ ਠਿਤਕੋਵ ਸੁਣੇਯ੍ਯਨ੍ਤਿ ਭਗਵਾ ਅਵੋਚ. ਏਵਂ ਧਮ੍ਮਗਰੁਨੋ ਤਥਾਗਤਾ. ਤੇਸਂ ਧਮ੍ਮਗਰੁਤਾਯ ਪਟਿਪਨ੍ਨਕਾ ਪਿਯਾ ਹੋਨ੍ਤਿ, ਤਸ੍ਮਾ ਪਟਿਪਨ੍ਨਕੇ ਪੁਚ੍ਛਿ. ਪਟਿਪਨ੍ਨਕੋ ਚ ਨਾਮ ਅਤ੍ਤਹਿਤਾਯ ਪਟਿਪਨ੍ਨੋ ਨੋ ਪਰਹਿਤਾਯ, ਪਰਹਿਤਾਯ ਪਟਿਪਨ੍ਨੋ ਨੋ ਅਤ੍ਤਹਿਤਾਯ, ਨੋ ਅਤ੍ਤਹਿਤਾਯ ਚ ਪਟਿਪਨ੍ਨੋ ਨੋ ਪਰਹਿਤਾਯ ਚ, ਅਤ੍ਤਹਿਤਾਯ ਚ ਪਟਿਪਨ੍ਨੋ ਪਰਹਿਤਾਯ ਚਾਤਿ ਚਤੁਬ੍ਬਿਧੋ ਹੋਤਿ.
ਤਤ੍ਥ ਯੋ ਸਯਂ ਦਸਨ੍ਨਂ ਕਥਾਵਤ੍ਥੂਨਂ ਲਾਭੀ ਹੋਤਿ, ਪਰਂ ਤਤ੍ਥ ਨ ਓਵਦਤਿ ਨ ਅਨੁਸਾਸਤਿ ਆਯਸ੍ਮਾ ਬਾਕੁਲੋ ਵਿਯ. ਅਯਂ ਅਤ੍ਤਹਿਤਾਯ ਪਟਿਪਨ੍ਨੋ ਨਾਮ ਨੋ ਪਰਹਿਤਾਯ ਪਟਿਪਨ੍ਨੋ, ਏਵਰੂਪਂ ਭਿਕ੍ਖੁਂ ਭਗਵਾ ਨ ਪੁਚ੍ਛਤਿ. ਕਸ੍ਮਾ? ਨ ਮਯ੍ਹਂ ਸਾਸਨਸ੍ਸ ਵਡ੍ਢਿਪਕ੍ਖੇ ਠਿਤੋਤਿ.
ਯੋ ਪਨ ਦਸਨ੍ਨਂ ਕਥਾਵਤ੍ਥੂਨਂ ਅਲਾਭੀ, ਪਰਂ ਤੇਹਿ ਓਵਦਤਿ ਤੇਨ ਕਤਵਤ੍ਤਸਾਦਿਯਨਤ੍ਥਂ ਉਪਨਨ੍ਦੋ ਸਕ੍ਯਪੁਤ੍ਤੋ ਵਿਯ, ਅਯਂ ਪਰਹਿਤਾਯ ਪਟਿਪਨ੍ਨੋ ਨਾਮ ਨੋ ਅਤ੍ਤਹਿਤਾਯ, ਏਵਰੂਪਮ੍ਪਿ ਨ ਪੁਚ੍ਛਤਿ. ਕਸ੍ਮਾ? ਅਸ੍ਸ ਤਣ੍ਹਾ ਮਹਾਪਚ੍ਛਿ ਵਿਯ ਅਪ੍ਪਹੀਨਾਤਿ.
ਯੋ ਅਤ੍ਤਨਾਪਿ ਦਸਨ੍ਨਂ ਕਥਾਵਤ੍ਥੂਨਂ ਅਲਾਭੀ, ਪਰਮ੍ਪਿ ਤੇਹਿ ਨ ਓਵਦਤਿ, ਲਾਲ਼ੁਦਾਯੀ ਵਿਯ, ਅਯਂ ਨੇਵ ਅਤ੍ਤਹਿਤਾਯ ਪਟਿਪਨ੍ਨੋ ਨ ਪਰਹਿਤਾਯ, ਏਵਰੂਪਮ੍ਪਿ ਨ ਪੁਚ੍ਛਤਿ. ਕਸ੍ਮਾ? ਅਸ੍ਸ ਅਨ੍ਤੋ ਕਿਲੇਸਾ ਫਰਸੁਛੇਜ੍ਜਾ ਵਿਯ ਮਹਨ੍ਤਾਤਿ.
ਯੋ ਪਨ ਸਯਂ ਦਸਨ੍ਨਂ ਕਥਾਵਤ੍ਥੂਨਂ ਲਾਭੀ, ਪਰਮ੍ਪਿ ਤੇਹਿ ਓਵਦਤਿ, ਅਯਂ ਅਤ੍ਤਹਿਤਾਯ ਚੇਵ ਪਰਹਿਤਾਯ ਚ ਪਟਿਪਨ੍ਨੋ ਨਾਮ ਸਾਰਿਪੁਤ੍ਤਮੋਗ੍ਗਲ੍ਲਾਨਮਹਾਕਸ੍ਸਪਾਦਯੋ ਅਸੀਤਿਮਹਾਥੇਰਾ ਵਿਯ, ਏਵਰੂਪਂ ਭਿਕ੍ਖੁਂ ਪੁਚ੍ਛਤਿ. ਕਸ੍ਮਾ? ਮਯ੍ਹਂ ਸਾਸਨਸ੍ਸ ਵੁਡ੍ਢਿਪਕ੍ਖੇ ਠਿਤੋਤਿ. ਇਧਾਪਿ ਏਵਰੂਪਮੇਵ ਪੁਚ੍ਛਨ੍ਤੋ – ‘‘ਕੋ ਨੁ ਖੋ, ਭਿਕ੍ਖਵੇ’’ਤਿਆਦਿਮਾਹ.
ਏਵਂ ਭਗਵਤਾ ਪੁਟ੍ਠਾਨਂ ਪਨ ਤੇਸਂ ਭਿਕ੍ਖੂਨਂ ਭਗਵਾ ਅਤ੍ਤਨੋ ਜਾਤਿਭੂਮਿਯਂ ਉਭਯਹਿਤਾਯ ਪਟਿਪਨ੍ਨਂ ਦਸਕਥਾਵਤ੍ਥੁਲਾਭਿਂ ਭਿਕ੍ਖੁਂ ਪੁਚ੍ਛਤਿ, ਕੋ ਨੁ ਖੋ ਤਤ੍ਥ ਏਵਰੂਪੋਤਿ ਨ ਅਞ੍ਞਮਞ੍ਞਂ ਚਿਨ੍ਤਨਾ ਵਾ ਸਮਨ੍ਤਨਾ ਵਾ ਅਹੋਸਿ. ਕਸ੍ਮਾ? ਆਯਸ੍ਮਾ ਹਿ ਮਨ੍ਤਾਣਿਪੁਤ੍ਤੋ ਤਸ੍ਮਿਂ ਜਨਪਦੇ ਆਕਾਸਮਜ੍ਝੇ ਠਿਤੋ ਚਨ੍ਦੋ ਵਿਯ ਸੂਰਿਯੋ ਵਿਯ ਚ ਪਾਕਟੋ ਪਞ੍ਞਾਤੋ. ਤਸ੍ਮਾ ਤੇ ਭਿਕ੍ਖੂ ਮੇਘਸਦ੍ਦਂ ਸੁਤ੍ਵਾ ਏਕਜ੍ਝਂ ਸਨ੍ਨਿਪਤਿਤਮੋਰਘਟਾ ਵਿਯ ਘਨਸਜ੍ਝਾਯਂ ਕਾਤੁਂ, ਆਰਦ੍ਧਭਿਕ੍ਖੂ ਵਿਯ ਚ ਅਤ੍ਤਨੋ ਆਚਰਿਯਂ ਪੁਣ੍ਣਤ੍ਥੇਰਂ ਭਗਵਤੋ ਆਰੋਚੇਨ੍ਤਾ ਥੇਰਸ੍ਸ ਚ ਗੁਣਂ ਭਾਸਿਤੁਂ ਅਪ੍ਪਹੋਨ੍ਤੇਹਿ ਮੁਖੇਹਿ ਏਕਪ੍ਪਹਾਰੇਨੇਵ ਪੁਣ੍ਣੋ ਨਾਮ, ਭਨ੍ਤੇ, ਆਯਸ੍ਮਾਤਿਆਦਿਮਾਹਂਸੁ. ਤਤ੍ਥ ਪੁਣ੍ਣੋਤਿ ਤਸ੍ਸ ਥੇਰਸ੍ਸ ਨਾਮਂ. ਮਨ੍ਤਾਣਿਯਾ ਪਨ ਸੋ ਪੁਤ੍ਤੋ, ਤਸ੍ਮਾ ਮਨ੍ਤਾਣਿਪੁਤ੍ਤੋਤਿ ਵੁਚ੍ਚਤਿ. ਸਮ੍ਭਾਵਿਤੋਤਿ ਗੁਣਸਮ੍ਭਾਵਨਾਯ ਸਮ੍ਭਾਵਿਤੋ.
ਅਪ੍ਪਿਚ੍ਛਤਾਦਿਵਣ੍ਣਨਾ
ਅਪ੍ਪਿਚ੍ਛੋਤਿ ਇਚ੍ਛਾਵਿਰਹਿਤੋ ਨਿਇਚ੍ਛੋ ਨਿਤ੍ਤਣ੍ਹੋ. ਏਤ੍ਥ ਹਿ ਬ੍ਯਞ੍ਜਨਂ ਸਾਵਸੇਸਂ ਵਿਯ, ਅਤ੍ਥੋ ਪਨ ਨਿਰਵਸੇਸੋ. ਨ ਹਿ ਤਸ੍ਸ ਅਨ੍ਤੋ ਅਣੁਮਤ੍ਤਾਪਿ ਪਾਪਿਕਾ ਇਚ੍ਛਾ ਨਾਮ ਅਤ੍ਥਿ. ਖੀਣਾਸਵੋ ਹੇਸ ਸਬ੍ਬਸੋ ਪਹੀਨਤਣ੍ਹੋ. ਅਪਿਚੇਤ੍ਥ ਅਤ੍ਰਿਚ੍ਛਤਾ ਪਾਪਿਚ੍ਛਤਾ ਮਹਿਚ੍ਛਤਾ ਅਪ੍ਪਿਚ੍ਛਤਾਤਿ ਅਯਂ ਭੇਦੋ ਵੇਦਿਤਬ੍ਬੋ.
ਤਤ੍ਥ ਸਕਲਾਭੇ ਅਤਿਤ੍ਤਸ੍ਸ ਪਰਲਾਭੇ ਪਤ੍ਥਨਾ ਅਤ੍ਰਿਚ੍ਛਤਾ ਨਾਮ. ਤਾਯ ਸਮਨ੍ਨਾਗਤਸ੍ਸ ਏਕਭਾਜੇਨ ਪਕ੍ਕਪੂਵੋਪਿ ਅਤ੍ਤਨੋ ਪਤ੍ਤੇ ਪਤਿਤੋ ਨ ਸੁਪਕ੍ਕੋ ਵਿਯ ਖੁਦ੍ਦਕੋ ਵਿਯ ਚ ਖਾਯਤਿ. ਸ੍ਵੇਵ ਪਰਸ੍ਸ ਪਤ੍ਤੇ ਪਕ੍ਖਿਤ੍ਤੋ ਸੁਪਕ੍ਕੋ ਵਿਯ ਮਹਨ੍ਤੋ ਵਿਯ ਚ ਖਾਯਤਿ. ਅਸਨ੍ਤਗੁਣਸਮ੍ਭਾਵਨਤਾ ਪਨ ਪਟਿਗ੍ਗਹਣੇ ਚ ਅਮਤ੍ਤਞ੍ਞੁਤਾ ਪਾਪਿਚ੍ਛਤਾ ਨਾਮ, ਸਾ, ‘‘ਇਧੇਕਚ੍ਚੋ ਅਸ੍ਸਦ੍ਧੋ ਸਮਾਨੋ ਸਦ੍ਧੋਤਿ ਮਂ ਜਨੋ ਜਾਨਾਤੂ’’ਤਿਆਦਿਨਾ ਨਯੇਨ ਅਭਿਧਮ੍ਮੇ ਆਗਤਾਯੇਵ, ਤਾਯ ਸਮਨ੍ਨਾਗਤੋ ਪੁਗ੍ਗਲੋ ਕੋਹਞ੍ਞੇ ਪਤਿਟ੍ਠਾਤਿ. ਸਨ੍ਤਗੁਣਸਮ੍ਭਾਵਨਾ ਪਨ ਪਟਿਗ੍ਗਹਣੇ ਚ ਅਮਤ੍ਤਞ੍ਞੁਤਾ ਮਹਿਚ੍ਛਤਾ ਨਾਮ. ਸਾਪਿ, ‘‘ਇਧੇਕਚ੍ਚੋ ਸਦ੍ਧੋ ਸਮਾਨੋ ਸਦ੍ਧੋਤਿ ਮਂ ਜਨੋ ਜਾਨਾਤੂਤਿ ਇਚ੍ਛਤਿ, ਸੀਲਵਾ ਸਮਾਨੋ ਸੀਲਵਾਤਿ ਮਂ ਜਨੋ ਜਾਨਾਤੂ’’ਤਿ (ਵਿਭ. ੮੫੧) ਇਮਿਨਾ ਨਯੇਨ ਆਗਤਾਯੇਵ, ਤਾਯ ਸਮਨ੍ਨਾਗਤੋ ਪੁਗ੍ਗਲੋ ਦੁਸ੍ਸਨ੍ਤਪ੍ਪਯੋ ਹੋਤਿ, ਵਿਜਾਤਮਾਤਾਪਿਸ੍ਸ ਚਿਤ੍ਤਂ ਗਹੇਤੁਂ ਨ ਸਕ੍ਕੋਤਿ. ਤੇਨੇਤਂ ਵੁਚ੍ਚਤਿ –
‘‘ਅਗ੍ਗਿਕ੍ਖਨ੍ਧੋ ਸਮੁਦ੍ਦੋ ਚ, ਮਹਿਚ੍ਛੋ ਚਾਪਿ ਪੁਗ੍ਗਲੋ;
ਸਕਟੇਨ ਪਚ੍ਚਯਂ ਦੇਤੁ, ਤਯੋਪੇਤੇ ਅਤਪ੍ਪਯਾ’’ਤਿ.
ਸਨ੍ਤਗੁਣਨਿਗੂਹਨਤਾ ਪਨ ਪਟਿਗ੍ਗਹਣੇ ਚ ਮਤ੍ਤਞ੍ਞੁਤਾ ਅਪ੍ਪਿਚ੍ਛਤਾ ਨਾਮ, ਤਾਯ ਸਮਨ੍ਨਾਗਤੋ ਪੁਗ੍ਗਲੋ ਅਤ੍ਤਨਿ ਵਿਜ੍ਜਮਾਨਮ੍ਪਿ ਗੁਣਂ ਪਟਿਚ੍ਛਾਦੇਤੁਕਾਮਤਾਯ, ‘‘ਸਦ੍ਧੋ ਸਮਾਨੋ ਸਦ੍ਧੋਤਿ ਮਂ ਜਨੋ ਜਾਨਾਤੂਤਿ ਨ ਇਚ੍ਛਤਿ. ਸੀਲਵਾ, ਪਵਿਵਿਤ੍ਤੋ, ਬਹੁਸ੍ਸੁਤੋ, ਆਰਦ੍ਧਵੀਰਿਯੋ, ਸਮਾਧਿਸਮ੍ਪਨ੍ਨੋ, ਪਞ੍ਞਵਾ, ਖੀਣਾਸਵੋ ਸਮਾਨੋ ਖੀਣਾਸਵੋਤਿ ਮਂ ਜਨੋ ਜਾਨਾਤੂ’’ਤਿ ਨ ਇਚ੍ਛਤਿ, ਸੇਯ੍ਯਥਾਪਿ ਮਜ੍ਝਨ੍ਤਿਕਤ੍ਥੇਰੋ.
ਥੇਰੋ ਕਿਰ ਮਹਾਖੀਣਾਸਵੋ ਅਹੋਸਿ, ਪਤ੍ਤਚੀਵਰਂ ਪਨਸ੍ਸ ਪਾਦਮਤ੍ਤਮੇਵ ਅਗ੍ਘਤਿ, ਸੋ ਅਸੋਕਸ੍ਸ ਧਮ੍ਮਰਞ੍ਞੋ ਵਿਹਾਰਮਹਦਿਵਸੇ ਸਙ੍ਘਤ੍ਥੇਰੋ ਅਹੋਸਿ. ਅਥਸ੍ਸ ਅਤਿਲੂਖਭਾਵਂ ਦਿਸ੍ਵਾ ਮਨੁਸ੍ਸਾ, ‘‘ਭਨ੍ਤੇ, ਥੋਕਂ ਬਹਿ ਹੋਥਾ’’ਤਿ ਆਹਂਸੁ. ਥੇਰੋ, ‘‘ਮਾਦਿਸੇ ਖੀਣਾਸਵੇ ਰਞ੍ਞੋ ਸਙ੍ਗਹਂ ਅਕਰੋਨ੍ਤੇ ਅਞ੍ਞੋ ਕੋ ਕਰਿਸ੍ਸਤੀ’’ਤਿ ਪਥਵਿਯਂ ਨਿਮੁਜ੍ਜਿਤ੍ਵਾ ਸਙ੍ਘਤ੍ਥੇਰਸ੍ਸ ਉਕ੍ਖਿਤ੍ਤਪਿਣ੍ਡਂ ਗਣ੍ਹਨ੍ਤੋਯੇਵ ਉਮ੍ਮੁਜ੍ਜਿ. ਏਵਂ ਖੀਣਾਸਵੋ ਸਮਾਨੋ, ‘‘ਖੀਣਾਸਵੋਤਿ ਮਂ ਜਨੋ ਜਾਨਾਤੂ’’ਤਿ ਨ ਇਚ੍ਛਤਿ. ਏਵਂ ਅਪ੍ਪਿਚ੍ਛੋ ਪਨ ਭਿਕ੍ਖੁ ਅਨੁਪ੍ਪਨ੍ਨਂ ਲਾਭਂ ਉਪ੍ਪਾਦੇਤਿ, ਉਪ੍ਪਨ੍ਨਂ ਲਾਭਂ ਥਾਵਰਂ ਕਰੋਤਿ, ਦਾਯਕਾਨਂ ਚਿਤ੍ਤਂ ਆਰਾਧੇਤਿ, ਯਥਾ ਯਥਾ ਹਿ ਸੋ ਅਤ੍ਤਨੋ ਅਪ੍ਪਿਚ੍ਛਤਾਯ ਅਪ੍ਪਂ ਗਣ੍ਹਾਤਿ, ਤਥਾ ਤਥਾ ਤਸ੍ਸ ਵਤ੍ਤੇ ਪਸਨ੍ਨਾ ਮਨੁਸ੍ਸਾ ਬਹੂ ਦੇਨ੍ਤਿ.
ਅਪਰੋਪਿ ਚਤੁਬ੍ਬਿਧੋ ਅਪ੍ਪਿਚ੍ਛੋ – ਪਚ੍ਚਯਅਪ੍ਪਿਚ੍ਛੋ ਧੁਤਙ੍ਗਅਪ੍ਪਿਚ੍ਛੋ ਪਰਿਯਤ੍ਤਿਅਪ੍ਪਿਚ੍ਛੋ ਅਧਿਗਮਅਪ੍ਪਿਚ੍ਛੋਤਿ. ਤਤ੍ਥ ਚਤੂਸੁ ਪਚ੍ਚਯੇਸੁ ਅਪ੍ਪਿਚ੍ਛੋ ਪਚ੍ਚਯਅਪ੍ਪਿਚ੍ਛੋ ਨਾਮ, ਸੋ ਦਾਯਕਸ੍ਸ ਵਸਂ ਜਾਨਾਤਿ, ਦੇਯ੍ਯਧਮ੍ਮਸ੍ਸ ਵਸਂ ਜਾਨਾਤਿ, ਅਤ੍ਤਨੋ ਥਾਮਂ ਜਾਨਾਤਿ. ਯਦਿ ਹਿ ਦੇਯ੍ਯਧਮ੍ਮੋ ਬਹੁ ਹੋਤਿ, ਦਾਯਕੋ ਅਪ੍ਪਂ ਦਾਤੁਕਾਮੋ, ਦਾਯਕਸ੍ਸ ਵਸੇਨ ਅਪ੍ਪਂ ਗਣ੍ਹਾਤਿ. ਦੇਯ੍ਯਧਮ੍ਮੋ ਅਪ੍ਪੋ, ਦਾਯਕੋ ਬਹੁਂ ਦਾਤੁਕਾਮੋ, ਦੇਯ੍ਯਧਮ੍ਮਸ੍ਸ ਵਸੇਨ ਅਪ੍ਪਂ ਗਣ੍ਹਾਤਿ. ਦੇਯ੍ਯਧਮ੍ਮੋਪਿ ਬਹੁ, ਦਾਯਕੋਪਿ ਬਹੁਂ ਦਾਤੁਕਾਮੋ, ਅਤ੍ਤਨੋ ਥਾਮਂ ਞਤ੍ਵਾ ਪਮਾਣੇਨੇਵ ਗਣ੍ਹਾਤਿ.
ਧੁਤਙ੍ਗਸਮਾਦਾਨਸ੍ਸ ਅਤ੍ਤਨਿ ਅਤ੍ਥਿਭਾਵਂ ਨਜਾਨਾਪੇਤੁਕਾਮੋ ਧੁਤਙ੍ਗਅਪ੍ਪਿਚ੍ਛੋ ਨਾਮ. ਤਸ੍ਸ ਵਿਭਾਵਨਤ੍ਥਂ ਇਮਾਨਿ ਵਤ੍ਥੂਨਿ – ਸੋਸਾਨਿਕਮਹਾਸੁਮਨਤ੍ਥੇਰੋ ਕਿਰ ਸਟ੍ਠਿ ਵਸ੍ਸਾਨਿ ਸੁਸਾਨੇ ਵਸਿ, ਅਞ੍ਞੋ ਏਕਭਿਕ੍ਖੁਪਿ ਨ ਅਞ੍ਞਾਸਿ, ਤੇਨੇਵਾਹ –
‘‘ਸੁਸਾਨੇ ਸਟ੍ਠਿ ਵਸ੍ਸਾਨਿ, ਅਬ੍ਬੋਕਿਣ੍ਣਂ ਵਸਾਮਹਂ;
ਦੁਤਿਯੋ ਮਂ ਨ ਜਾਨੇਯ੍ਯ, ਅਹੋ ਸੋਸਾਨਿਕੁਤ੍ਤਮੋ’’ਤਿ.
ਚੇਤਿਯਪਬ੍ਬਤੇ ਦ੍ਵੇਭਾਤਿਯਤ੍ਥੇਰਾ ਵਸਿਂਸੁ. ਤੇਸੁ ਕਨਿਟ੍ਠੋ ਉਪਟ੍ਠਾਕੇਨ ਪੇਸਿਤਾ ਉਚ੍ਛੁਖਣ੍ਡਿਕਾ ਗਹੇਤ੍ਵਾ ਜੇਟ੍ਠਸ੍ਸ ਸਨ੍ਤਿਕਂ ਅਗਮਾਸਿ. ਪਰਿਭੋਗਂ, ਭਨ੍ਤੇ, ਕਰੋਥਾਤਿ. ਥੇਰਸ੍ਸ ਚ ਭਤ੍ਤਕਿਚ੍ਚਂ ਕਤ੍ਵਾ ਮੁਖਂ ਵਿਕ੍ਖਾਲਨਕਾਲੋ ਅਹੋਸਿ. ਸੋ ਅਲਂ, ਆਵੁਸੋਤਿ ਆਹ. ਕਚ੍ਚਿ, ਭਨ੍ਤੇ, ਏਕਾਸਨਿਕਤ੍ਥਾਤਿ. ਆਹਰਾਵੁਸੋ, ਉਚ੍ਛੁਖਣ੍ਡਿਕਾਤਿ ਪਞ੍ਞਾਸ ਵਸ੍ਸਾਨਿ ਏਕਾਸਨਿਕੋ ਸਮਾਨੋਪਿ ਧੁਤਙ੍ਗਂ ਨਿਗੂਹਮਾਨੋ ਪਰਿਭੋਗਂ ਕਤ੍ਵਾ ਮੁਖਂ ਵਿਕ੍ਖਾਲੇਤ੍ਵਾ ਪੁਨ ਧੁਤਙ੍ਗਂ ਅਧਿਟ੍ਠਾਯ ਗਤੋ.
ਯੋ ਪਨ ਸਾਕੇਤਕਤਿਸ੍ਸਤ੍ਥੇਰੋ ਵਿਯ ਬਹੁਸ੍ਸੁਤਭਾਵਂ ਜਾਨਾਪੇਤੁਂ ਨ ਇਚ੍ਛਤਿ, ਅਯਂ ਪਰਿਯਤ੍ਤਿਅਪ੍ਪਿਚ੍ਛੋ ਨਾਮ. ਥੇਰੋ ਕਿਰ ਖਣੋ ਨਤ੍ਥੀਤਿ ਉਦ੍ਦੇਸਪਰਿਪੁਚ੍ਛਾਸੁ ਓਕਾਸਂ ਅਕਰੋਨ੍ਤੋ ਮਰਣਕ੍ਖਯਂ, ਭਨ੍ਤੇ, ਲਭਿਸ੍ਸਥਾਤਿ ਚੋਦਿਤੋ ਗਣਂ ਵਿਸ੍ਸਜ੍ਜੇਤ੍ਵਾ ਕਣਿਕਾਰਵਾਲਿਕਸਮੁਦ੍ਦਵਿਹਾਰਂ ਗਤੋ. ਤਤ੍ਥ ਅਨ੍ਤੋਵਸ੍ਸਂ ਥੇਰਨਵਮਜ੍ਝਿਮਾਨਂ ਉਪਕਾਰੋ ਹੁਤ੍ਵਾ ਮਹਾਪਵਾਰਣਾਯ ਉਪੋਸਥਦਿਵਸੇ ਧਮ੍ਮਕਥਾਯ ਜਨਤਂ ਖੋਭੇਤ੍ਵਾ ਗਤੋ.
ਯੋ ਪਨ ਸੋਤਾਪਨ੍ਨਾਦੀਸੁ ਅਞ੍ਞਤਰੋ ਹੁਤ੍ਵਾ ਸੋਤਾਪਨ੍ਨਾਦਿਭਾਵਂ ਜਾਨਾਪੇਤੁਂ ਨ ਇਚ੍ਛਤਿ, ਅਯਂ ਅਧਿਗਮਅਪ੍ਪਿਚ੍ਛੋ ਨਾਮ, ਤਯੋ ਕੁਲਪੁਤ੍ਤਾ ਵਿਯ ਘਟਿਕਾਰਕੁਮ੍ਭਕਾਰੋ ਵਿਯ ਚ.
ਆਯਸ੍ਮਾ ਪਨ ਪੁਣ੍ਣੋ ਅਤ੍ਰਿਚ੍ਛਤਂ ਪਾਪਿਚ੍ਛਤਂ ਮਹਿਚ੍ਛਤਞ੍ਚ ਪਹਾਯ ਸਬ੍ਬਸੋ ਇਚ੍ਛਾਪਟਿਪਕ੍ਖਭੂਤਾਯ ਅਲੋਭਸਙ੍ਖਾਤਾਯ ਪਰਿਸੁਦ੍ਧਾਯ ਅਪ੍ਪਿਚ੍ਛਤਾਯ ਸਮਨ੍ਨਾਗਤਤ੍ਤਾ ਅਪ੍ਪਿਚ੍ਛੋ ਨਾਮ ਅਹੋਸਿ. ਭਿਕ੍ਖੂਨਮ੍ਪਿ, ‘‘ਆਵੁਸੋ, ਅਤ੍ਰਿਚ੍ਛਤਾ ਪਾਪਿਚ੍ਛਤਾ ਮਹਿਚ੍ਛਤਾਤਿ ਇਮੇ ਧਮ੍ਮਾ ਪਹਾਤਬ੍ਬਾ’’ਤਿ ਤੇਸੁ ਆਦੀਨਵਂ ਦਸ੍ਸੇਤ੍ਵਾ ਏਵਰੂਪਂ ਅਪ੍ਪਿਚ੍ਛਤਂ ਸਮਾਦਾਯ ਵਤ੍ਤਿਤਬ੍ਬਨ੍ਤਿ ਅਪ੍ਪਿਚ੍ਛਕਥਂ ਕਥੇਸਿ. ਤੇਨ ਵੁਤ੍ਤਂ ‘‘ਅਤ੍ਤਨਾ ਚ ਅਪ੍ਪਿਚ੍ਛੋ ਅਪ੍ਪਿਚ੍ਛਕਥਞ੍ਚ ਭਿਕ੍ਖੂਨਂ ਕਤ੍ਤਾ’’ਤਿ.
ਦ੍ਵਾਦਸਵਿਧਸਨ੍ਤੋਸਵਣ੍ਣਨਾ
ਇਦਾਨਿ ਅਤ੍ਤਨਾ ਚ ਸਨ੍ਤੁਟ੍ਠੋਤਿਆਦੀਸੁ ਵਿਸੇਸਤ੍ਥਮੇਵ ਦੀਪਯਿਸ੍ਸਾਮ. ਯੋਜਨਾ ਪਨ ਵੁਤ੍ਤਨਯੇਨੇਵ ਵੇਦਿਤਬ੍ਬਾ. ਸਨ੍ਤੁਟ੍ਠੋਤਿ ਇਤਰੀਤਰਪਚ੍ਚਯਸਨ੍ਤੋਸੇਨ ਸਮਨ੍ਨਾਗਤੋ. ਸੋ ਪਨੇਸ ਸਨ੍ਤੋਸੋ ਦ੍ਵਾਦਸਵਿਧੋ ਹੋਤਿ. ਸੇਯ੍ਯਥਿਦਂ, ਚੀਵਰੇ ਯਥਾਲਾਭਸਨ੍ਤੋਸੋ ਯਥਾਬਲਸਨ੍ਤੋਸੋ ਯਥਸਾਰੁਪ੍ਪਸਨ੍ਤੋਸੋਤਿ ਤਿਵਿਧੋ, ਏਵਂ ਪਿਣ੍ਡਪਾਤਾਦੀਸੁ. ਤਸ੍ਸਾਯਂ ਪਭੇਦਸਂਵਣ੍ਣਨਾ.
ਇਧ ਭਿਕ੍ਖੁ ਚੀਵਰਂ ਲਭਤਿ ਸੁਨ੍ਦਰਂ ਵਾ ਅਸੁਨ੍ਦਰਂ ਵਾ. ਸੋ ਤੇਨੇਵ ਯਾਪੇਤਿ ਅਞ੍ਞਂ ਨ ਪਤ੍ਥੇਤਿ, ਲਭਨ੍ਤੋਪਿ ਨ ਗਣ੍ਹਾਤਿ, ਅਯਮਸ੍ਸ ਚੀਵਰੇ ਯਥਾਲਾਭਸਨ੍ਤੋਸੋ. ਅਥ ਯੋ ਪਕਤਿਦੁਬ੍ਬਲੋ ਵਾ ਹੋਤਿ ਆਬਾਧਜਰਾਭਿਭੂਤੋ ਵਾ, ਗਰੁਚੀਵਰਂ ਪਾਰੁਪਨ੍ਤੋ ਕਿਲਮਤਿ, ਸੋ ਸਭਾਗੇਨ ਭਿਕ੍ਖੁਨਾ ਸਦ੍ਧਿਂ ਤਂ ਪਰਿਵਤ੍ਤੇਤ੍ਵਾ ਲਹੁਕੇਨ ਯਾਪੇਨ੍ਤੋਪਿ ਸਨ੍ਤੁਟ੍ਠੋਵ ਹੋਤਿ, ਅਯਮਸ੍ਸ ਚੀਵਰੇ ਯਥਾਬਲਸਨ੍ਤੋਸੋ. ਅਪਰੋ ਪਣੀਤਪਚ੍ਚਯਲਾਭੀ ਹੋਤਿ, ਸੋ ਪਟ੍ਟਚੀਵਰਾਦੀਨਂ ਅਞ੍ਞਤਰਂ ਮਹਗ੍ਘਚੀਵਰਂ ਬਹੂਨਿ ਵਾ ਪਨ ਚੀਵਰਾਨਿ ਲਭਿਤ੍ਵਾ ਇਦਂ ਥੇਰਾਨਂ ਚਿਰਪਬ੍ਬਜਿਤਾਨਂ ਇਦਂ ਬਹੁਸ੍ਸੁਤਾਨਂ ਅਨੁਰੂਪਂ, ਇਦਂ ਗਿਲਾਨਾਨਂ ਇਦਂ ਅਪ੍ਪਲਾਭਾਨਂ ਹੋਤੂਤਿ ਦਤ੍ਵਾ ਤੇਸਂ ਪੁਰਾਣਚੀਵਰਂ ਵਾ ਸਙ੍ਕਾਰਕੂਟਾਦਿਤੋ ਵਾ ਨਨ੍ਤਕਾਨਿ ਉਚ੍ਚਿਨਿਤ੍ਵਾ ਤੇਹਿ ਸਙ੍ਘਾਟਿਂ ਕਤ੍ਵਾ ਧਾਰੇਨ੍ਤੋਪਿ ਸਨ੍ਤੁਟ੍ਠੋਵ ਹੋਤਿ, ਅਯਮਸ੍ਸ ਚੀਵਰੇ ਯਥਾਸਾਰੁਪ੍ਪਸਨ੍ਤੋਸੋ.
ਇਧ ਪਨ ਭਿਕ੍ਖੁ ਪਿਣ੍ਡਪਾਤਂ ਲਭਤਿ ਲੂਖਂ ਵਾ ਪਣੀਤਂ ਵਾ, ਸੋ ਤੇਨੇਵ ਯਾਪੇਤਿ, ਅਞ੍ਞਂ ਨ ਪਤ੍ਥੇਤਿ, ਲਭਨ੍ਤੋਪਿ ਨ ਗਣ੍ਹਾਤਿ, ਅਯਮਸ੍ਸ ਪਿਣ੍ਡਪਾਤੇ ਯਥਾਲਾਭਸਨ੍ਤੋਸੋ. ਯੋ ਪਨ ਅਤ੍ਤਨੋ ਪਕਤਿਵਿਰੁਦ੍ਧਂ ਵਾ ਬ੍ਯਾਧਿਵਿਰੁਦ੍ਧਂ ਵਾ ਪਿਣ੍ਡਪਾਤਂ ਲਭਤਿ, ਯੇਨਸ੍ਸ ਪਰਿਭੁਤ੍ਤੇਨ ਅਫਾਸੁ ਹੋਤਿ, ਸੋ ਸਭਾਗਸ੍ਸ ਭਿਕ੍ਖੁਨੋ ਤਂ ਦਤ੍ਵਾ ਤਸ੍ਸ ਹਤ੍ਥਤੋ ਸਪ੍ਪਾਯਭੋਜਨਂ ਭੁਞ੍ਜਿਤ੍ਵਾ ਸਮਣਧਮ੍ਮਂ ਕਰੋਨ੍ਤੋਪਿ ਸਨ੍ਤੁਟ੍ਠੋਵ ਹੋਤਿ, ਅਯਮਸ੍ਸ ਪਿਣ੍ਡਪਾਤੇ ਯਥਾਬਲਸਨ੍ਤੋਸੋ. ਅਪਰੋ ਬਹੁਂ ਪਣੀਤਂ ਪਿਣ੍ਡਪਾਤਂ ਲਭਤਿ, ਸੋ ਤਂ ਚੀਵਰਂ ਵਿਯ ਚਿਰਪਬ੍ਬਜਿਤਬਹੁਸ੍ਸੁਤਅਪ੍ਪਲਾਭਿਗਿਲਾਨਾਨਂ ਦਤ੍ਵਾ ਤੇਸਂ ਵਾ ਸੇਸਕਂ ਪਿਣ੍ਡਾਯ ਵਾ ਚਰਿਤ੍ਵਾ ਮਿਸ੍ਸਕਾਹਾਰਂ ਭੁਞ੍ਜਨ੍ਤੋਪਿ ਸਨ੍ਤੁਟ੍ਠੋਵ ਹੋਤਿ, ਅਯਮਸ੍ਸ ਪਿਣ੍ਡਪਾਤੇ ਯਥਾਸਾਰੁਪ੍ਪਸਨ੍ਤੋਸੋ.
ਇਧ ਪਨ ਭਿਕ੍ਖੁ ਸੇਨਾਸਨਂ ਲਭਤਿ ਮਨਾਪਂ ਵਾ ਅਮਨਾਪਂ ਵਾ, ਸੋ ਤੇਨ ਨੇਵ ਸੋਮਨਸ੍ਸਂ ਨ ਪਟਿਘਂ ਉਪ੍ਪਾਦੇਤਿ, ਅਨ੍ਤਮਸੋ ਤਿਣਸਨ੍ਥਾਰਕੇਨਾਪਿ ਯਥਾਲਦ੍ਧੇਨੇਵ ਤੁਸ੍ਸਤਿ, ਅਯਮਸ੍ਸ ਸੇਨਾਸਨੇ ਯਥਾਲਾਭਸਨ੍ਤੋਸੋ. ਯੋ ਪਨ ਅਤ੍ਤਨੋ ਪਕਤਿਵਿਰੁਦ੍ਧਂ ਵਾ ਬ੍ਯਾਧਿਵਿਰੁਦ੍ਧਂ ਵਾ ਸੇਨਾਸਨਂ ਲਭਤਿ, ਯਤ੍ਥਸ੍ਸ ਵਸਤੋ ਅਫਾਸੁ ਹੋਤਿ, ਸੋ ਤਂ ਸਭਾਗਸ੍ਸ ਭਿਕ੍ਖੁਨੋ ਦਤ੍ਵਾ ਤਸ੍ਸ ਸਨ੍ਤਕੇ ਸਪ੍ਪਾਯਸੇਨਾਸਨੇ ਵਸਨ੍ਤੋਪਿ ਸਨ੍ਤੁਟ੍ਠੋਵ ਹੋਤਿ, ਅਯਮਸ੍ਸ ਸੇਨਾਸਨੇ ਯਥਾਬਲਸਨ੍ਤੋਸੋ. ਅਪਰੋ ਮਹਾਪੁਞ੍ਞੋ ਲੇਣਮਣ੍ਡਪਕੂਟਾਗਾਰਾਦੀਨਿ ਬਹੂਨਿ ਪਣੀਤਸੇਨਾਸਨਾਨਿ ਲਭਤਿ, ਸੋ ਤਾਨਿ ਚੀਵਰਾਦੀਨਿ ਵਿਯ ਚਿਰਪਬ੍ਬਜਿਤਬਹੁਸ੍ਸੁਤਅਪ੍ਪਲਾਭਿਗਿਲਾਨਾਨਂ ਦਤ੍ਵਾ ਯਤ੍ਥ ਕਤ੍ਥਚਿ ਵਸਨ੍ਤੋਪਿ ਸਨ੍ਤੁਟ੍ਠੋਵ ਹੋਤਿ, ਅਯਮਸ੍ਸ ਸੇਨਾਸਨੇ ਯਥਾਸਾਰੁਪ੍ਪਸਨ੍ਤੋਸੋ. ਯੋਪਿ, ‘‘ਉਤ੍ਤਮਸੇਨਾਸਨਂ ਨਾਮ ਪਮਾਦਟ੍ਠਾਨਂ, ਤਤ੍ਥ ਨਿਸਿਨ੍ਨਸ੍ਸ ਥਿਨਮਿਦ੍ਧਂ ਓਕ੍ਕਮਤਿ, ਨਿਦ੍ਦਾਭਿਭੂਤਸ੍ਸ ਪੁਨ ਪਟਿਬੁਜ੍ਝਤੋ ਪਾਪਵਿਤਕ੍ਕਾ ਪਾਤੁਭਵਨ੍ਤੀ’’ਤਿ ਪਟਿਸਞ੍ਚਿਕ੍ਖਿਤ੍ਵਾ ਤਾਦਿਸਂ ਸੇਨਾਸਨਂ ਪਤ੍ਤਮ੍ਪਿ ਨ ਸਮ੍ਪਟਿਚ੍ਛਤਿ, ਸੋ ਤਂ ਪਟਿਕ੍ਖਿਪਿਤ੍ਵਾ ਅਬ੍ਭੋਕਾਸਰੁਕ੍ਖਮੂਲਾਦੀਸੁ ਵਸਨ੍ਤੋਪਿ ਸਨ੍ਤੁਟ੍ਠੋਵ ਹੋਤਿ, ਅਯਮ੍ਪਿਸ੍ਸ ਸੇਨਾਸਨੇ ਯਥਾਸਾਰੁਪ੍ਪਸਨ੍ਤੋਸੋ.
ਇਧ ਪਨ ਭਿਕ੍ਖੁ ਭੇਸਜ੍ਜਂ ਲਭਤਿ ਲੂਖਂ ਵਾ ਪਣੀਤਂ ਵਾ, ਸੋ ਯਂ ਲਭਤਿ, ਤੇਨੇਵ ਸਨ੍ਤੁਸ੍ਸਤਿ, ਅਞ੍ਞਂ ਨ ਪਤ੍ਥੇਤਿ, ਲਭਨ੍ਤੋਪਿ ਨ ਗਣ੍ਹਾਤਿ, ਅਯਮਸ੍ਸ ਗਿਲਾਨਪਚ੍ਚਯੇ ਯਥਾਲਾਭਸਨ੍ਤੋਸੋ. ਯੋ ਪਨ ਤੇਲੇਨ ਅਤ੍ਥਿਕੋ ਫਾਣਿਤਂ ਲਭਤਿ, ਸੋ ਤਂ ਸਭਾਗਸ੍ਸ ਭਿਕ੍ਖੁਨੋ ਦਤ੍ਵਾ ਤਸ੍ਸ ਹਤ੍ਥਤੋ ਤੇਲਂ ਗਹੇਤ੍ਵਾ ਅਞ੍ਞਦੇਵ ਵਾ ਪਰਿਯੇਸਿਤ੍ਵਾ ਤੇਹਿ ਭੇਸਜ੍ਜਂ ਕਰੋਨ੍ਤੋਪਿ ਸਨ੍ਤੁਟ੍ਠੋਵ ਹੋਤਿ, ਅਯਮਸ੍ਸ ਗਿਲਾਨਪਚ੍ਚਯੇ ਯਥਾਬਲਸਨ੍ਤੋਸੋ. ਅਪਰੋ ਮਹਾਪੁਞ੍ਞੋ ਬਹੁਂ ਤੇਲਮਧੁਫਾਣਿਤਾਦਿਪਣੀਤਭੇਸਜ੍ਜਂ ਲਭਤਿ, ਸੋ ਤਂ ਚੀਵਰਂ ਵਿਯ ਚਿਰਪਬ੍ਬਜਿਤਬਹੁਸ੍ਸੁਤਅਪ੍ਪਲਾਭਿਗਿਲਾਨਾਨਂ ਦਤ੍ਵਾ ਤੇਸਂ ਆਭਤਕੇਨ ਯੇਨ ਕੇਨਚਿ ਯਾਪੇਨ੍ਤੋਪਿ ਸਨ੍ਤੁਟ੍ਠੋਵ ਹੋਤਿ. ਯੋ ਪਨ ਏਕਸ੍ਮਿਂ ਭਾਜਨੇ ਮੁਤ੍ਤਹਰੀਤਕਂ ਠਪੇਤ੍ਵਾ ਏਕਸ੍ਮਿਂ ਚਤੁਮਧੁਰਂ, ‘‘ਗਣ੍ਹ, ਭਨ੍ਤੇ, ਯਦਿਚ੍ਛਸੀ’’ਤਿ ਵੁਚ੍ਚਮਾਨੋ ਸਚਸ੍ਸ ਤੇਸੁ ਅਞ੍ਞਤਰੇਨਪਿ ਰੋਗੋ ਵੂਪਸਮ੍ਮਤਿ, ਅਥ ਮੁਤ੍ਤਹਰੀਤਕਂ ਨਾਮ ਬੁਦ੍ਧਾਦੀਹਿ ਵਣ੍ਣਿਤਨ੍ਤਿ ਚਤੁਮਧੁਰਂ ਪਟਿਕ੍ਖਿਪਿਤ੍ਵਾ ਮੁਤ੍ਤਹਰੀਤਕੇਨੇਵ ਭੇਸਜ੍ਜਂ ਕਰੋਨ੍ਤੋ ਪਰਮਸਨ੍ਤੁਟ੍ਠੋਵ ਹੋਤਿ, ਅਯਮਸ੍ਸ ਗਿਲਾਨਪਚ੍ਚਯੇ ਯਥਾਸਾਰੁਪ੍ਪਸਨ੍ਤੋਸੋ.
ਇਮੇਸਂ ਪਨ ਪਚ੍ਚੇਕਂ ਪਚ੍ਚਯੇਸੁ ਤਿਣ੍ਣਂ ਤਿਣ੍ਣਂ ਸਨ੍ਤੋਸਾਨਂ ਯਥਾਸਾਰੁਪ੍ਪਸਨ੍ਤੋਸੋਵ ਅਗ੍ਗੋ. ਆਯਸ੍ਮਾ ਪੁਣ੍ਣੋ ਏਕੇਕਸ੍ਮਿਂ ਪਚ੍ਚਯੇ ਇਮੇਹਿ ਤੀਹਿ ਸਨ੍ਤੋਸੇਹਿ ਸਨ੍ਤੁਟ੍ਠੋ ਅਹੋਸਿ. ਸਨ੍ਤੁਟ੍ਠਿਕਥਞ੍ਚਾਤਿ ਭਿਕ੍ਖੂਨਮ੍ਪਿ ਚ ਇਮਂ ਸਨ੍ਤੁਟ੍ਠਿਕਥਂ ਕਤ੍ਤਾਵ ਅਹੋਸਿ.
ਤਿਵਿਧਪਵਿਵੇਕਵਣ੍ਣਨਾ
ਪਵਿਵਿਤ੍ਤੋਤਿ ਕਾਯਪਵਿਵੇਕੋ ਚਿਤ੍ਤਪਵਿਵੇਕੋ ਉਪਧਿਪਵਿਵੇਕੋਤਿ ਇਮੇਹਿ ਤੀਹਿ ਪਵਿਵੇਕੇਹਿ ਸਮਨ੍ਨਾਗਤੋ. ਤਤ੍ਥ ਏਕੋ ਗਚ੍ਛਤਿ, ਏਕੋ ਤਿਟ੍ਠਤਿ, ਏਕੋ ਨਿਸੀਦਤਿ, ਏਕੋ ਸੇਯ੍ਯਂ ਕਪ੍ਪੇਤਿ, ਏਕੋ ਗਾਮਂ ਪਿਣ੍ਡਾਯ ਪਵਿਸਤਿ, ਏਕੋ ਪਟਿਕ੍ਕਮਤਿ, ਏਕੋ ਚਙ੍ਕਮਮਧਿਟ੍ਠਾਤਿ, ਏਕੋ ਚਰਤਿ, ਏਕੋ ਵਿਹਰਤੀਤਿ ਅਯਂ ਕਾਯਪਵਿਵੇਕੋ ਨਾਮ. ਅਟ੍ਠ ਸਮਾਪਤ੍ਤਿਯੋ ਪਨ ਚਿਤ੍ਤਪਵਿਵੇਕੋ ਨਾਮ. ਨਿਬ੍ਬਾਨਂ ਉਪਧਿਪਵਿਵੇਕੋ ਨਾਮ. ਵੁਤ੍ਤਮ੍ਪਿ ਹੇਤਂ – ‘‘ਕਾਯਪਵਿਵੇਕੋ ਚ ਵਿਵੇਕਟ੍ਠਕਾਯਾਨਂ ਨੇਕ੍ਖਮ੍ਮਾਭਿਰਤਾਨਂ. ਚਿਤ੍ਤਪਵਿਵੇਕੋ ਚ ਪਰਿਸੁਦ੍ਧਚਿਤ੍ਤਾਨਂ ਪਰਮਵੋਦਾਨਪ੍ਪਤ੍ਤਾਨਂ. ਉਪਧਿਵਿਵੇਕੋ ਚ ਨਿਰੁਪਧੀਨਂ ਪੁਗ੍ਗਲਾਨਂ ਵਿਸਙ੍ਖਾਰਗਤਾਨ’’ਨ੍ਤਿ (ਮਹਾਨਿ. ੫੭). ਪਵਿਵੇਕਕਥਨ੍ਤਿ ਭਿਕ੍ਖੂਨਮ੍ਪਿ ਚ ਇਮਂ ਪਵਿਵੇਕਕਥਂ ਕਤ੍ਤਾ.
ਪਞ੍ਚਵਿਧਸਂਸਗ੍ਗਵਣ੍ਣਨਾ
ਅਸਂਸਟ੍ਠੋਤਿ ਪਞ੍ਚਵਿਧੇਨ ਸਂਸਗ੍ਗੇਨ ਵਿਰਹਿਤੋ. ਸਵਨਸਂਸਗ੍ਗੋ ਦਸ੍ਸਨਸਂਸਗ੍ਗੋ ਸਮੁਲ੍ਲਪਨਸਂਸਗ੍ਗੋ ਸਮ੍ਭੋਗਸਂਸਗ੍ਗੋ ਕਾਯਸਂਸਗ੍ਗੋਤਿ ਪਞ੍ਚਵਿਧੋ ਸਂਸਗ੍ਗੋ. ਤੇਸੁ ਇਧ ਭਿਕ੍ਖੁ ਸੁਣਾਤਿ, ‘‘ਅਸੁਕਸ੍ਮਿਂ ਗਾਮੇ ਵਾ ਨਿਗਮੇ ਵਾ ਇਤ੍ਥੀ ਵਾ ਕੁਮਾਰਿਕਾ ਵਾ ਅਭਿਰੂਪਾ ਦਸ੍ਸਨੀਯਾ ਪਾਸਾਦਿਕਾ ਪਰਮਾਯ ਵਣ੍ਣਪੋਕ੍ਖਰਤਾਯ ਸਮਨ੍ਨਾਗਤਾ’’ਤਿ. ਸੋ ਤਂ ਸੁਤ੍ਵਾ ਸਂਸੀਦਤਿ ਵਿਸੀਦਤਿ ਨ ਸਕ੍ਕੋਤਿ ਬ੍ਰਹ੍ਮਚਰਿਯਂ ਸਨ੍ਧਾਰੇਤੁਂ, ਸਿਕ੍ਖਾਦੁਬ੍ਬਲ੍ਯਂ ਅਨਾਵਿਕਤ੍ਵਾ ਹੀਨਾਯਾਵਤ੍ਤਤੀਤਿ ਏਵਂ ਪਰੇਹਿ ਵਾ ਕਥੀਯਮਾਨਂ ਰੂਪਾਦਿਸਮ੍ਪਤ੍ਤਿਂ ਅਤ੍ਤਨਾ ਵਾ ਹਸਿਤਲਪਿਤਗੀਤਸਦ੍ਦਂ ਸੁਣਨ੍ਤਸ੍ਸ ਸੋਤਵਿਞ੍ਞਾਣਵੀਥਿਵਸੇਨ ਉਪ੍ਪਨ੍ਨੋ ਰਾਗੋ ਸਵਨਸਂਸਗ੍ਗੋ ਨਾਮ. ਸੋ ਅਨਿਤ੍ਥਿਗਨ੍ਧਪਚ੍ਚੇਕਬੋਧਿਸਤ੍ਤਸ੍ਸ ਚ ਪਞ੍ਚਗ੍ਗਲ਼ਲੇਣਵਾਸੀਤਿਸ੍ਸਦਹਰਸ੍ਸ ਚ ਵਸੇਨ ਵੇਦਿਤਬ੍ਬੋ –
ਦਹਰੋ ਕਿਰ ਆਕਾਸੇਨ ਗਚ੍ਛਨ੍ਤੋ ਗਿਰਿਗਾਮਵਾਸਿਕਮ੍ਮਾਰਧੀਤਾਯ ਪਞ੍ਚਹਿ ਕੁਮਾਰੀਹਿ ਸਦ੍ਧਿਂ ਪਦੁਮਸਰਂ ਗਨ੍ਤ੍ਵਾ ਨ੍ਹਤ੍ਵਾ ਪਦੁਮਾਨਿ ਚ ਪਿਲਨ੍ਧਿਤ੍ਵਾ ਮਧੁਰਸ੍ਸਰੇਨ ਗਾਯਨ੍ਤਿਯਾ ਸਦ੍ਦਂ ਸੁਤ੍ਵਾ ਕਾਮਰਾਗੇਨ ਵਿਦ੍ਧੋ ਵਿਸੇਸਾ ਪਰਿਹਾਯਿਤ੍ਵਾ ਅਨਯਬ੍ਯਸਨਂ ਪਾਪੁਣਿ. ਇਧ ਭਿਕ੍ਖੁ ਨ ਹੇਵ ਖੋ ਸੁਣਾਤਿ, ਅਪਿਚ ਖੋ ਸਾਮਂ ਪਸ੍ਸਤਿ ਇਤ੍ਥਿਂ ਵਾ ਕੁਮਾਰਿਂ ਵਾ ਅਭਿਰੂਪਂ ਦਸ੍ਸਨੀਯਂ ਪਾਸਾਦਿਕਂ ਪਰਮਾਯ ਵਣ੍ਣਪੋਕ੍ਖਰਤਾਯ ਸਮਨ੍ਨਾਗਤਂ. ਸੋ ਤਂ ਦਿਸ੍ਵਾ ਸਂਸੀਦਤਿ ਵਿਸੀਦਤਿ ਨ ਸਕ੍ਕੋਤਿ ਬ੍ਰਹ੍ਮਚਰਿਯਂ ਸਨ੍ਧਾਰੇਤੁਂ, ਸਿਕ੍ਖਾਦੁਬ੍ਬਲ੍ਯਂ ਅਨਾਵਿਕਤ੍ਵਾ ਹੀਨਾਯਾਵਤ੍ਤਤੀਤਿ ਏਵਂ ਵਿਸਭਾਗਰੂਪਂ ਓਲੋਕੇਨ੍ਤਸ੍ਸ ਪਨ ਚਕ੍ਖੁਵਿਞ੍ਞਾਣਵੀਥਿਵਸੇਨ ਉਪ੍ਪਨ੍ਨਰਾਗੋ ਦਸ੍ਸਨਸਂਸਗ੍ਗੋ ਨਾਮ. ਸੋ ਏਵਂ ਵੇਦਿਤਬ੍ਬੋ –
ਏਕੋ ਕਿਰ ਦਹਰੋ ਕਾਲਦੀਘਵਾਪਿਦ੍ਵਾਰਵਿਹਾਰਂ ਉਦ੍ਦੇਸਤ੍ਥਾਯ ਗਤੋ. ਆਚਰਿਯੋ ਤਸ੍ਸ ਅਨ੍ਤਰਾਯਂ ਦਿਸ੍ਵਾ ਓਕਾਸਂ ਨ ਕਰੋਤਿ. ਸੋ ਪੁਨਪ੍ਪੁਨ੍ਨਂ ਅਨੁਬਨ੍ਧਤਿ. ਆਚਰਿਯੋ ਸਚੇ ਅਨ੍ਤੋਗਾਮੇ ਨ ਚਰਿਸ੍ਸਸਿ. ਦਸ੍ਸਾਮਿ ਤੇ ਉਦ੍ਦੇਸਨ੍ਤਿ ਆਹ. ਸੋ ਸਾਧੂਤਿ ਸਮ੍ਪਟਿਚ੍ਛਿਤ੍ਵਾ ਉਦ੍ਦੇਸੇ ਨਿਟ੍ਠਿਤੇ ਆਚਰਿਯਂ ਵਨ੍ਦਿਤ੍ਵਾ ਗਚ੍ਛਨ੍ਤੋ ਆਚਰਿਯੋ ਮੇ ਇਮਸ੍ਮਿਂ ਗਾਮੇ ਚਰਿਤੁਂ ਨ ਦੇਤਿ, ਕਿਂ ਨੁ ਖੋ ਕਾਰਣਨ੍ਤਿ ਚੀਵਰਂ ਪਾਰੁਪਿਤ੍ਵਾ ਗਾਮਂ ਪਾਵਿਸਿ, ਏਕਾ ਕੁਲਧੀਤਾ ਪੀਤਕਵਤ੍ਥਂ ਨਿਵਾਸੇਤ੍ਵਾ ਗੇਹੇ ਠਿਤਾ ਦਹਰਂ ਦਿਸ੍ਵਾ ਸਞ੍ਜਾਤਰਾਗਾ ਉਲ਼ੁਙ੍ਕੇਨ ਯਾਗੁਂ ਆਹਰਿਤ੍ਵਾ ਤਸ੍ਸ ਪਤ੍ਤੇ ਪਕ੍ਖਿਪਿਤ੍ਵਾ ਨਿਵਤ੍ਤਿਤ੍ਵਾ ਮਞ੍ਚਕੇ ਨਿਪਜ੍ਜਿ. ਅਥ ਨਂ ਮਾਤਾਪਿਤਰੋ ਕਿਂ ਅਮ੍ਮਾਤਿ ਪੁਚ੍ਛਿਂਸੁ, ਦ੍ਵਾਰੇਨ ਗਤਂ ਦਹਰਂ ਲਭਮਾਨਾ ਜੀਵਿਸ੍ਸਾਮਿ, ਅਲਭਮਾਨਾ ਮਰਿਸ੍ਸਾਮੀਤਿ. ਮਾਤਾਪਿਤਰੋ ਵੇਗੇਨ ਗਨ੍ਤ੍ਵਾ ਗਾਮਦ੍ਵਾਰੇ ਦਹਰਂ ਪਤ੍ਵਾ ਵਨ੍ਦਿਤ੍ਵਾ, ‘‘ਨਿਵਤ੍ਤਥ, ਭਨ੍ਤੇ, ਭਿਕ੍ਖਂ ਗਣ੍ਹਾਹੀ’’ਤਿ ਆਹਂਸੁ. ਦਹਰੋ ਅਲਂ ਗਚ੍ਛਾਮੀਤਿ. ਤੇ, ‘‘ਇਦਂ ਨਾਮ, ਭਨ੍ਤੇ, ਕਾਰਣ’’ਨ੍ਤਿ ਯਾਚਿਤ੍ਵਾ – ‘‘ਅਮ੍ਹਾਕਂ, ਭਨ੍ਤੇ, ਗੇਹੇ ਏਤ੍ਤਕਂ ਨਾਮ ਧਨਂ ਅਤ੍ਥਿ, ਏਕਾਯੇਵ ਨੋ ਧੀਤਾ, ਤ੍ਵਂ ਨੋ ਜੇਟ੍ਠਪੁਤ੍ਤਟ੍ਠਾਨੇ ਠਸ੍ਸਸਿ, ਸੁਖੇਨ ਸਕ੍ਕਾ ਜੀਵਿਤੁ’’ਨ੍ਤਿ ਆਹਂਸੁ. ਦਹਰੋ, ‘‘ਨ ਮਯ੍ਹਂ ਇਮਿਨਾ ਪਲਿਬੋਧੇਨ ਅਤ੍ਥੋ’’ਤਿ ਅਨਾਦਿਯਿਤ੍ਵਾਵ ਪਕ੍ਕਨ੍ਤੋ.
ਮਾਤਾਪਿਤਰੋ ਗਨ੍ਤ੍ਵਾ, ‘‘ਅਮ੍ਮ, ਨਾਸਕ੍ਖਿਮ੍ਹਾ ਦਹਰਂ ਨਿਵਤ੍ਤੇਤੁਂ, ਯਂ ਅਞ੍ਞਂ ਸਾਮਿਕਂ ਇਚ੍ਛਸਿ, ਤਂ ਲਭਿਸ੍ਸਸਿ, ਉਟ੍ਠੇਹਿ ਖਾਦ ਚ ਪਿਵ ਚਾ’’ਤਿ ਆਹਂਸੁ. ਸਾ ਅਨਿਚ੍ਛਨ੍ਤੀ ਸਤ੍ਤਾਹਂ ਨਿਰਾਹਾਰਾ ਹੁਤ੍ਵਾ ਕਾਲਮਕਾਸਿ. ਮਾਤਾਪਿਤਰੋ ਤਸ੍ਸਾ ਸਰੀਰਕਿਚ੍ਚਂ ਕਤ੍ਵਾ ਤਂ ਪੀਤਕਵਤ੍ਥਂ ਧੁਰਵਿਹਾਰੇ ਭਿਕ੍ਖੁਸਙ੍ਘਸ੍ਸ ਅਦਂਸੁ, ਭਿਕ੍ਖੂ ਵਤ੍ਥਂ ਖਣ੍ਡਾਖਣ੍ਡਂ ਕਤ੍ਵਾ ਭਾਜਯਿਂਸੁ. ਏਕੋ ਮਹਲ੍ਲਕੋ ਅਤ੍ਤਨੋ ਕੋਟ੍ਠਾਸਂ ਗਹੇਤ੍ਵਾ ਕਲ੍ਯਾਣੀਵਿਹਾਰਂ ਆਗਤੋ. ਸੋਪਿ ਦਹਰੋ ਚੇਤਿਯਂ ਵਨ੍ਦਿਸ੍ਸਾਮੀਤਿ ਤਤ੍ਥੇਵ ਗਨ੍ਤ੍ਵਾ ਦਿਵਾਟ੍ਠਾਨੇ ਨਿਸੀਦਿ. ਮਹਲ੍ਲਕੋ ਤਂ ਵਤ੍ਥਖਣ੍ਡਂ ਗਹੇਤ੍ਵਾ, ‘‘ਇਮਿਨਾ ਮੇ ਪਰਿਸ੍ਸਾਵਨਂ ਵਿਚਾਰੇਥਾ’’ਤਿ ਦਹਰਂ ਅਵੋਚ. ਦਹਰੋ ਮਹਾਥੇਰ ‘‘ਕੁਹਿਂ ਲਦ੍ਧ’’ਨ੍ਤਿ ਆਹ. ਸੋ ਸਬ੍ਬਂ ਪਵਤ੍ਤਿਂ ਕਥੇਸਿ. ਸੋ ਤਂ ਸੁਤ੍ਵਾਵ, ‘‘ਏਵਰੂਪਾਯ ਨਾਮ ਸਦ੍ਧਿਂ ਸਂਵਾਸਂ ਨਾਲਤ੍ਥ’’ਨ੍ਤਿ ਰਾਗਗ੍ਗਿਨਾ ਦਡ੍ਢੋ ਤਤ੍ਥੇਵ ਕਾਲਮਕਾਸਿ.
ਅਞ੍ਞਮਞ੍ਞਂ ਆਲਾਪਸਲ੍ਲਾਪਵਸੇਨ ਉਪ੍ਪਨ੍ਨਰਾਗੋ ਪਨ ਸਮੁਲ੍ਲਪਨਸਂਸਗ੍ਗੋ ਨਾਮ. ਭਿਕ੍ਖੁਨੋ ਭਿਕ੍ਖੁਨਿਯਾ ਸਨ੍ਤਕਂ, ਭਿਕ੍ਖੁਨਿਯਾ ਵਾ ਭਿਕ੍ਖੁਸ੍ਸ ਸਨ੍ਤਕਂ ਗਹੇਤ੍ਵਾ ਪਰਿਭੋਗਕਰਣਵਸੇਨ ਉਪ੍ਪਨ੍ਨਰਾਗੋ ਸਮ੍ਭੋਗਸਂਸਗ੍ਗੋ ਨਾਮ. ਸੋ ਏਵਂ ਵੇਦਿਤਬ੍ਬੋ – ਮਰਿਚਵਟ੍ਟਿਵਿਹਾਰਮਹੇ ਕਿਰ ਭਿਕ੍ਖੂਨਂ ਸਤਸਹਸ੍ਸਂ ਭਿਕ੍ਖੁਨੀਨਂ ਨਵੁਤਿਸਹਸ੍ਸਾਨਿ ਏਵ ਅਹੇਸੁਂ. ਏਕੋ ਸਾਮਣੇਰੋ ਉਣ੍ਹਯਾਗੁਂ ਗਹੇਤ੍ਵਾ ਗਚ੍ਛਨ੍ਤੋ ਸਕਿਂ ਚੀਵਰਕਣ੍ਣੇ ਠਪੇਸਿ, ਸਕਿਂ ਭੂਮਿਯਂ. ਏਕਾ ਸਾਮਣੇਰੀ ਦਿਸ੍ਵਾ ਏਤ੍ਥ ਪਤ੍ਤਂ ਠਪੇਤ੍ਵਾ ਯਾਹੀਤਿ ਥਾਲਕਂ ਅਦਾਸਿ. ਤੇ ਅਪਰਭਾਗੇ ਏਕਸ੍ਮਿਂ ਭਯੇ ਉਪ੍ਪਨ੍ਨੇ ਪਰਸਮੁਦ੍ਦਂ ਅਗਮਂਸੁ. ਤੇਸੁ ਭਿਕ੍ਖੁਨੀ ਪੁਰੇਤਰਂ ਅਗਮਾਸਿ. ਸਾ, ‘‘ਏਕੋ ਕਿਰ ਸੀਹਲ਼ਭਿਕ੍ਖੁ ਆਗਤੋ’’ਤਿ ਸੁਤ੍ਵਾ ਥੇਰਸ੍ਸ ਸਨ੍ਤਿਕਂ ਗਨ੍ਤ੍ਵਾ ਪਟਿਸਨ੍ਥਾਰਂ ਕਤ੍ਵਾ ਨਿਸਿਨ੍ਨਾ, – ‘‘ਭਨ੍ਤੇ, ਮਰਿਚਵਟ੍ਟਿਵਿਹਾਰਮਹਕਾਲੇ ਤੁਮ੍ਹੇ ਕਤਿਵਸ੍ਸਾ’’ਤਿ ਪੁਚ੍ਛਿ. ਤਦਾਹਂ ਸਤ੍ਤਵਸ੍ਸਿਕਸਾਮਣੇਰੋ. ਤ੍ਵਂ ਪਨ ਕਤਿਵਸ੍ਸਾਤਿ? ਅਹਂ ਸਤ੍ਤਵਸ੍ਸਿਕਸਾਮਣੇਰੀਯੇਵ ਏਕਸ੍ਸ ਸਾਮਣੇਰਸ੍ਸ ਉਣ੍ਹਯਾਗੁਂ ਗਹੇਤ੍ਵਾ ਗਚ੍ਛਨ੍ਤਸ੍ਸ ਪਤ੍ਤਠਪਨਤ੍ਥਂ ਥਾਲਕਮਦਾਸਿਨ੍ਤਿ. ਥੇਰੋ, ‘‘ਅਹਂ ਸੋ’’ਤਿ ਵਤ੍ਵਾ ਥਾਲਕਂ ਨੀਹਰਿਤ੍ਵਾ ਦਸ੍ਸੇਸਿ. ਤੇ ਏਤ੍ਤਕੇਨੇਵ ਸਂਸਗ੍ਗੇਨ ਬ੍ਰਹ੍ਮਚਰਿਯਂ ਸਨ੍ਧਾਰੇਤੁਂ ਅਸਕ੍ਕੋਨ੍ਤਾ ਦ੍ਵੇਪਿ ਸਟ੍ਠਿਵਸ੍ਸਕਾਲੇ ਵਿਬ੍ਭਮਿਂਸੁ.
ਹਤ੍ਥਗਾਹਾਦਿਵਸੇਨ ਪਨ ਉਪ੍ਪਨ੍ਨਰਾਗੋ ਕਾਯਸਂਸਗ੍ਗੋ ਨਾਮ. ਤਤ੍ਰਿਦਂ ਵਤ੍ਥੁ – ਮਹਾਚੇਤਿਯਙ੍ਗਣੇ ਕਿਰ ਦਹਰਭਿਕ੍ਖੂ ਸਜ੍ਝਾਯਂ ਗਣ੍ਹਨ੍ਤਿ. ਤੇਸਂ ਪਿਟ੍ਠਿਪਸ੍ਸੇ ਦਹਰਭਿਕ੍ਖੁਨਿਯੋ ਧਮ੍ਮਂ ਸੁਣਨ੍ਤਿ. ਤਤ੍ਰੇਕੋ ਦਹਰੋ ਹਤ੍ਥਂ ਪਸਾਰੇਨ੍ਤੋ ਏਕਿਸ੍ਸਾ ਦਹਰਭਿਕ੍ਖੁਨਿਯਾ ਕਾਯਂ ਛੁਪਿ. ਸਾ ਤਂ ਹਤ੍ਥਂ ਗਹੇਤ੍ਵਾ ਅਤ੍ਤਨੋ ਉਰਸ੍ਮਿਂ ਠਪੇਸਿ, ਏਤ੍ਤਕੇਨ ਸਂਸਗ੍ਗੇਨ ਦ੍ਵੇਪਿ ਵਿਬ੍ਭਮਿਤ੍ਵਾ ਗਿਹਿਭਾਵਂ ਪਤ੍ਤਾ.
ਗਾਹਗਾਹਕਾਦਿਵਣ੍ਣਨਾ
ਇਮੇਸੁ ਪਨ ਪਞ੍ਚਸੁ ਸਂਸਗ੍ਗੇਸੁ ਭਿਕ੍ਖੁਨੋ ਭਿਕ੍ਖੂਹਿ ਸਦ੍ਧਿਂ ਸਵਨਦਸ੍ਸਨਸਮੁਲ੍ਲਪਨਸਮ੍ਭੋਗਕਾਯਪਰਾਮਾਸਾ ਨਿਚ੍ਚਮ੍ਪਿ ਹੋਨ੍ਤਿਯੇਵ, ਭਿਕ੍ਖੁਨੀਹਿ ਸਦ੍ਧਿਂ ਠਪੇਤ੍ਵਾ ਕਾਯਸਂਸਗ੍ਗਂ ਸੇਸਾ ਕਾਲੇਨ ਕਾਲਂ ਹੋਨ੍ਤਿ; ਤਥਾ ਉਪਾਸਕਉਪਾਸਿਕਾਹਿ ਸਦ੍ਧਿਂ ਸਬ੍ਬੇਪਿ ਕਾਲੇਨ ਕਾਲਂ ਹੋਨ੍ਤਿ. ਤੇਸੁ ਹਿ ਕਿਲੇਸੁਪ੍ਪਤ੍ਤਿਤੋ ਚਿਤ੍ਤਂ ਰਕ੍ਖਿਤਬ੍ਬਂ. ਏਕੋ ਹਿ ਭਿਕ੍ਖੁ ਗਾਹਗਾਹਕੋ ਹੋਤਿ, ਏਕੋ ਗਾਹਮੁਤ੍ਤਕੋ, ਏਕੋ ਮੁਤ੍ਤਗਾਹਕੋ, ਏਕੋ ਮੁਤ੍ਤਮੁਤ੍ਤਕੋ.
ਤਤ੍ਥ ਯਂ ਭਿਕ੍ਖੁਂ ਮਨੁਸ੍ਸਾਪਿ ਆਮਿਸੇਨ ਉਪਲਾਪੇਤ੍ਵਾ ਗਹਣਵਸੇਨ ਉਪਸਙ੍ਕਮਨ੍ਤਿ, ਭਿਕ੍ਖੁਪਿ ਪੁਪ੍ਫਫਲਾਦੀਹਿ ਉਪਲਾਪੇਤ੍ਵਾ ਗਹਣਵਸੇਨ ਉਪਸਙ੍ਕਮਤਿ, ਅਯਂ ਗਾਹਗਾਹਕੋ ਨਾਮ. ਯਂ ਪਨ ਮਨੁਸ੍ਸਾ ਵੁਤ੍ਤਨਯੇਨ ਉਪਸਙ੍ਕਮਨ੍ਤਿ, ਭਿਕ੍ਖੁ ਦਕ੍ਖਿਣੇਯ੍ਯਵਸੇਨ ਉਪਸਙ੍ਕਮਤਿ, ਅਯਂ ਗਾਹਮੁਤ੍ਤਕੋ ਨਾਮ. ਯਸ੍ਸ ਮਨੁਸ੍ਸਾ ਦਕ੍ਖਿਣੇਯ੍ਯਵਸੇਨ ਚਤ੍ਤਾਰੋ ਪਚ੍ਚਯੇ ਦੇਨ੍ਤਿ, ਭਿਕ੍ਖੁ ਪੁਪ੍ਫਫਲਾਦੀਹਿ ਉਪਲਾਪੇਤ੍ਵਾ ਗਹਣਵਸੇਨ ਉਪਸਙ੍ਕਮਤਿ, ਅਯਂ ਮੁਤ੍ਤਗਾਹਕੋ ਨਾਮ. ਯਸ੍ਸ ਮਨੁਸ੍ਸਾਪਿ ਦਕ੍ਖਿਣੇਯ੍ਯਵਸੇਨ ਚਤ੍ਤਾਰੋ ਪਚ੍ਚਯੇ ਦੇਨ੍ਤਿ, ਭਿਕ੍ਖੁਪਿ ਚੂਲ਼ਪਿਣ੍ਡਪਾਤਿਯਤਿਸ੍ਸਤ੍ਥੇਰੋ ਵਿਯ ਦਕ੍ਖਿਣੇਯ੍ਯਵਸੇਨ ਪਰਿਭੁਞ੍ਜਤਿ, ਅਯਂ ਮੁਤ੍ਤਮੁਤ੍ਤਕੋ ਨਾਮ.
ਥੇਰਂ ਕਿਰ ਏਕਾ ਉਪਾਸਿਕਾ ਦ੍ਵਾਦਸ ਵਸ੍ਸਾਨਿ ਉਪਟ੍ਠਹਿ. ਏਕਦਿਵਸਂ ਤਸ੍ਮਿਂ ਗਾਮੇ ਅਗ੍ਗਿ ਉਟ੍ਠਹਿਤ੍ਵਾ ਗੇਹਾਨਿ ਝਾਪੇਸਿ. ਅਞ੍ਞੇਸਂ ਕੁਲੂਪਕਭਿਕ੍ਖੂ ਆਗਨ੍ਤ੍ਵਾ – ‘‘ਕਿਂ ਉਪਾਸਿਕੇ, ਅਪਿ ਕਿਞ੍ਚਿ ਭਣ੍ਡਕਂ ਅਰੋਗਂ ਕਾਤੁਂ ਅਸਕ੍ਖਿਤ੍ਥਾ’’ਤਿ ਪਟਿਸਨ੍ਥਾਰਂ ਅਕਂਸੁ. ਮਨੁਸ੍ਸਾ, ‘‘ਅਮ੍ਹਾਕਂ ਮਾਤੁ ਕੁਲੂਪਕਤ੍ਥੇਰੋ ਭੁਞ੍ਜਨਵੇਲਾਯਮੇਵ ਆਗਮਿਸ੍ਸਤੀ’’ਤਿ ਆਹਂਸੁ. ਥੇਰੋਪਿ ਪੁਨਦਿਵਸੇ ਭਿਕ੍ਖਾਚਾਰਵੇਲਂ ਸਲ੍ਲਕ੍ਖੇਤ੍ਵਾਵ ਆਗਤੋ. ਉਪਾਸਿਕਾ ਕੋਟ੍ਠਚ੍ਛਾਯਾਯ ਨਿਸੀਦਾਪੇਤ੍ਵਾ ਭਿਕ੍ਖਂ ਸਮ੍ਪਾਦੇਤ੍ਵਾ ਅਦਾਸਿ. ਥੇਰੇ ਭਤ੍ਤਕਿਚ੍ਚਂ ਕਤ੍ਵਾ ਪਕ੍ਕਨ੍ਤੇ ਮਨੁਸ੍ਸਾ ਆਹਂਸੁ – ‘‘ਅਮ੍ਹਾਕਂ ਮਾਤੁ ਕੁਲੂਪਕਤ੍ਥੇਰੋ ਭੁਞ੍ਜਨਵੇਲਾਯਮੇਵ ਆਗਤੋ’’ਤਿ. ਉਪਾਸਿਕਾ, ‘‘ਤੁਮ੍ਹਾਕਂ ਕੁਲੂਪਕਾ ਤੁਮ੍ਹਾਕਂਯੇਵ ਅਨੁਚ੍ਛਵਿਕਾ, ਮਯ੍ਹਂ ਥੇਰੋ ਮਯ੍ਹੇਵ ਅਨੁਚ੍ਛਵਿਕੋ’’ਤਿ ਆਹ. ਆਯਸ੍ਮਾ ਪਨ ਮਨ੍ਤਾਣਿਪੁਤ੍ਤੋ ਇਮੇਹਿ ਪਞ੍ਚਹਿ ਸਂਸਗ੍ਗੇਹਿ ਚਤੂਹਿਪਿ ਪਰਿਸਾਹਿ ਸਦ੍ਧਿਂ ਅਸਂਸਟ੍ਠੋ ਗਾਹਮੁਤ੍ਤਕੋ ਚੇਵ ਮੁਤ੍ਤਮੁਤ੍ਤਕੋ ਚ ਅਹੋਸਿ. ਯਥਾ ਚ ਸਯਂ ਅਸਂਸਟ੍ਠੋ, ਏਵਂ ਭਿਕ੍ਖੂਨਮ੍ਪਿ ਤਂ ਅਸਂਸਗ੍ਗਕਥਂ ਕਤ੍ਤਾ ਅਹੋਸਿ.
ਆਰਦ੍ਧਵੀਰਿਯੋਤਿ ਪਗ੍ਗਹਿਤਵੀਰਿਯੋ, ਪਰਿਪੁਣ੍ਣਕਾਯਿਕਚੇਤਸਿਕਵੀਰਿਯੋਤਿ ਅਤ੍ਥੋ. ਯੋ ਹਿ ਭਿਕ੍ਖੁ ਗਮਨੇ ਉਪ੍ਪਨ੍ਨਕਿਲੇਸਂ ਠਾਨਂ ਪਾਪੁਣਿਤੁਂ ਨ ਦੇਤਿ, ਠਾਨੇ ਉਪ੍ਪਨ੍ਨਕਿਲੇਸਂ ਨਿਸਜ੍ਜਂ, ਨਿਸਜ੍ਜਾਯ ਉਪ੍ਪਨ੍ਨਕਿਲੇਸਂ ਸਯਨਂ ਪਾਪੁਣਿਤੁਂ ਨ ਦੇਤਿ, ਮਨ੍ਤੇਨ ਕਣ੍ਹਸਪ੍ਪਂ ਉਪ੍ਪੀਲ਼ੇਤ੍ਵਾ ਗਣ੍ਹਨ੍ਤੋ ਵਿਯ, ਅਮਿਤ੍ਤਂ ਗੀਵਾਯ ਅਕ੍ਕਮਨ੍ਤੋ ਵਿਯ ਚ ਵਿਚਰਤਿ, ਅਯਂ ਆਰਦ੍ਧਵੀਰਿਯੋ ਨਾਮ. ਥੇਰੋ ਚ ਤਾਦਿਸੋ ਅਹੋਸਿ. ਭਿਕ੍ਖੂਨਮ੍ਪਿ ਤਥੇਵ ਵੀਰਿਯਾਰਮ੍ਭਕਥਂ ਕਤ੍ਤਾ ਅਹੋਸਿ.
ਸੀਲਸਮ੍ਪਨ੍ਨੋਤਿਆਦੀਸੁ ਸੀਲਨ੍ਤਿ ਚਤੁਪਾਰਿਸੁਦ੍ਧਿਸੀਲਂ. ਸਮਾਧੀਤਿ ਵਿਪਸ੍ਸਨਾਪਾਦਕਾ ਅਟ੍ਠ ਸਮਾਪਤ੍ਤਿਯੋ. ਪਞ੍ਞਾਤਿ ਲੋਕਿਯਲੋਕੁਤ੍ਤਰਞਾਣਂ. ਵਿਮੁਤ੍ਤੀਤਿ ਅਰਿਯਫਲਂ. ਵਿਮੁਤ੍ਤਿਞਾਣਦਸ੍ਸਨਨ੍ਤਿ ਏਕੂਨਵੀਸਤਿਵਿਧਂ ਪਚ੍ਚਵੇਕ੍ਖਣਞਾਣਂ. ਥੇਰੋ ਸਯਮ੍ਪਿ ਸੀਲਾਦੀਹਿ ਸਮ੍ਪਨ੍ਨੋ ਅਹੋਸਿ ਭਿਕ੍ਖੂਨਮ੍ਪਿ ਸੀਲਾਦਿਕਥਂ ਕਤ੍ਤਾ. ਸ੍ਵਾਯਂ ਦਸਹਿ ਕਥਾਵਤ੍ਥੂਹਿ ਓਵਦਤੀਤਿ ਓਵਾਦਕੋ. ਯਥਾ ਪਨ ਏਕੋ ਓਵਦਤਿਯੇਵ, ਸੁਖੁਮਂ ਅਤ੍ਥਂ ਪਰਿਵਤ੍ਤੇਤ੍ਵਾ ਜਾਨਾਪੇਤੁਂ ਨ ਸਕ੍ਕੋਤਿ. ਨ ਏਵਂ ਥੇਰੋ. ਥੇਰੋ ਪਨ ਤਾਨਿ ਦਸ ਕਥਾਵਤ੍ਥੂਨਿ ਵਿਞ੍ਞਾਪੇਤੀਤਿ ਵਿਞ੍ਞਾਪਕੋ. ਏਕੋ ਵਿਞ੍ਞਾਪੇਤੁਂ ਸਕ੍ਕੋਤਿ, ਕਾਰਣਂ ਦਸ੍ਸੇਤੁਂ ਨ ਸਕ੍ਕੋਤਿ. ਥੇਰੋ ਕਾਰਣਮ੍ਪਿ ਸਨ੍ਦਸ੍ਸੇਤੀਤਿ ਸਨ੍ਦਸ੍ਸਕੋ. ਏਕੋ ਵਿਜ੍ਜਮਾਨਂ ਕਾਰਣਂ ਦਸ੍ਸੇਤਿ, ਗਾਹੇਤੁਂ ਪਨ ਨ ਸਕ੍ਕੋਤਿ. ਥੇਰੋ ਗਾਹੇਤੁਮ੍ਪਿ ਸਕ੍ਕੋਤੀਤਿ ਸਮਾਦਪਕੋ. ਏਵਂ ਸਮਾਦਪੇਤ੍ਵਾ ਪਨ ਤੇਸੁ ਕਥਾਵਤ੍ਥੂਸੁ ਉਸ੍ਸਾਹਜਨਨਵਸੇਨ ਭਿਕ੍ਖੂ ਸਮੁਤ੍ਤੇਜੇਤੀਤਿ ਸਮੁਤ੍ਤੇਜਕੋ. ਉਸ੍ਸਾਹਜਾਤੇ ਵਣ੍ਣਂ ਵਤ੍ਵਾ ਸਮ੍ਪਹਂਸੇਤੀਤਿ ਸਮ੍ਪਹਂਸਕੋ.
ਪਞ੍ਚਲਾਭਵਣ੍ਣਨਾ
੨੫੩. ਸੁਲਦ੍ਧਲਾਭਾਤਿ ਅਞ੍ਞੇਸਮ੍ਪਿ ਮਨੁਸ੍ਸਤ੍ਤਭਾਵਪਬ੍ਬਜ੍ਜਾਦਿਗੁਣਲਾਭਾ ਨਾਮ ਹੋਨ੍ਤਿ. ਆਯਸ੍ਮਤੋ ਪਨ ਪੁਣ੍ਣਸ੍ਸ ਸੁਲਦ੍ਧਲਾਭਾ ਏਤੇ, ਯਸ੍ਸ ਸਤ੍ਥੁ ਸਮ੍ਮੁਖਾ ਏਵਂ ਵਣ੍ਣੋ ਅਬ੍ਭੁਗ੍ਗਤੋਤਿ ਅਤ੍ਥੋ. ਅਪਿਚ ਅਪਣ੍ਡਿਤੇਹਿ ਵਣ੍ਣਕਥਨਂ ਨਾਮ ਨ ਤਥਾ ਲਾਭੋ, ਪਣ੍ਡਿਤੇਹਿ ਵਣ੍ਣਕਥਨਂ ਪਨ ਲਾਭੋ. ਗਿਹੀ ਹਿ ਵਾ ਵਣ੍ਣਕਥਨਂ ਨ ਤਥਾ ਲਾਭੋ, ਗਿਹੀ ਹਿ ‘‘ਵਣ੍ਣਂ ਕਥੇਸ੍ਸਾਮੀ’’ਤਿ, ‘‘ਅਮ੍ਹਾਕਂ ਅਯ੍ਯੋ ਸਣ੍ਹੋ ਸਖਿਲੋ ਸੁਖਸਮ੍ਭਾਸੋ, ਵਿਹਾਰਂ ਆਗਤਾਨਂ ਯਾਗੁਭਤ੍ਤਫਾਣਿਤਾਦੀਹਿ ਸਙ੍ਗਹਂ ਕਰੋਤੀ’’ਤਿ ਕਥੇਨ੍ਤੋ ਅਵਣ੍ਣਮੇਵ ਕਥੇਤਿ. ‘‘ਅਵਣ੍ਣਂ ਕਥੇਸ੍ਸਾਮੀ’’ਤਿ ‘‘ਅਯਂ ਥੇਰੋ ਮਨ੍ਦਮਨ੍ਦੋ ਵਿਯ ਅਬਲਬਲੋ ਵਿਯ ਭਾਕੁਟਿਕਭਾਕੁਟਿਕੋ ਵਿਯ ਨਤ੍ਥਿ ਇਮਿਨਾ ਸਦ੍ਧਿਂ ਵਿਸ੍ਸਾਸੋ’’ਤਿ ਕਥੇਨ੍ਤੋ ਵਣ੍ਣਮੇਵ ਕਥੇਤਿ. ਸਬ੍ਰਹ੍ਮਚਾਰੀਹਿਪਿ ਸਤ੍ਥੁ ਪਰਮ੍ਮੁਖਾ ਵਣ੍ਣਕਥਨਂ ਨ ਤਥਾ ਲਾਭੋ, ਸਤ੍ਥੁ ਸਮ੍ਮੁਖਾ ਪਨ ਅਤਿਲਾਭੋਤਿ ਇਮਮ੍ਪਿ ਅਤ੍ਥਵਸਂ ਪਟਿਚ੍ਚ ‘‘ਸੁਲਦ੍ਧਲਾਭਾ’’ਤਿ ਆਹ. ਅਨੁਮਸ੍ਸ ਅਨੁਮਸ੍ਸਾਤਿ ਦਸ ਕਥਾਵਤ੍ਥੂਨਿ ਅਨੁਪਵਿਸਿਤ੍ਵਾ ਅਨੁਪਵਿਸਿਤ੍ਵਾ. ਤਞ੍ਚ ਸਤ੍ਥਾ ਅਬ੍ਭਨੁਮੋਦਤੀਤਿ ਤਞ੍ਚਸ੍ਸ ਵਣ੍ਣਂ ਏਵਮੇਤਂ ਅਪ੍ਪਿਚ੍ਛੋ ਚ ਸੋ ਭਿਕ੍ਖੁ ਸਨ੍ਤੁਟ੍ਠੋ ਚ ਸੋ ਭਿਕ੍ਖੂਤਿ ਅਨੁਮੋਦਤਿ. ਇਤਿ ਵਿਞ੍ਞੂਹਿ ਵਣ੍ਣਭਾਸਨਂ ਏਕੋ ਲਾਭੋ, ਸਬ੍ਰਹ੍ਮਚਾਰੀਹਿ ਏਕੋ, ਸਤ੍ਥੁ ਸਮ੍ਮੁਖਾ ਏਕੋ, ਅਨੁਮਸ੍ਸ ਅਨੁਮਸ੍ਸ ਏਕੋ, ਸਤ੍ਥਾਰਾ ਅਬ੍ਭਨੁਮੋਦਨਂ ਏਕੋਤਿ ਇਮੇ ਪਞ੍ਚ ਲਾਭੇ ਸਨ੍ਧਾਯ ‘‘ਸੁਲਦ੍ਧਲਾਭਾ’’ਤਿ ਆਹ. ਕਦਾਚੀਤਿ ਕਿਸ੍ਮਿਞ੍ਚਿਦੇਵ ਕਾਲੇ. ਕਰਹਚੀਤਿ ਤਸ੍ਸੇਵ ਵੇਵਚਨਂ. ਅਪ੍ਪੇਵ ਨਾਮ ਸਿਯਾ ਕੋਚਿਦੇਵ ਕਥਾਸਲ੍ਲਾਪੋਤਿ ਅਪਿ ਨਾਮ ਕੋਚਿ ਕਥਾਸਮੁਦਾਚਾਰੋਪਿ ਭਵੇਯ੍ਯ. ਥੇਰੇਨ ਕਿਰ ਆਯਸ੍ਮਾ ਪੁਣ੍ਣੋ ਨੇਵ ਦਿਟ੍ਠਪੁਬ੍ਬੋ, ਨਸ੍ਸ ਧਮ੍ਮਕਥਾ ਸੁਤਪੁਬ੍ਬਾ. ਇਤਿ ਸੋ ਤਸ੍ਸ ਦਸ੍ਸਨਮ੍ਪਿ ਧਮ੍ਮਕਥਮ੍ਪਿ ਪਤ੍ਥਯਮਾਨੋ ਏਵਮਾਹ.
ਚਾਰਿਕਾਦਿਵਣ੍ਣਨਾ
੨੫੪. ਯਥਾਭਿਰਨ੍ਤਨ੍ਤਿ ਯਥਾਅਜ੍ਝਾਸਯਂ ਵਿਹਰਿਤ੍ਵਾ. ਬੁਦ੍ਧਾਨਞ੍ਹਿ ਏਕਸ੍ਮਿਂ ਠਾਨੇ ਵਸਨ੍ਤਾਨਂ ਛਾਯੂਦਕਾਦਿਵਿਪਤ੍ਤਿਂ ਵਾ ਅਪ੍ਫਾਸੁਕਸੇਨਾਸਨਂ ਵਾ, ਮਨੁਸ੍ਸਾਨਂ ਅਸ੍ਸਦ੍ਧਾਦਿਭਾਵਂ ਵਾ ਆਗਮ੍ਮ ਅਨਭਿਰਤਿ ਨਾਮ ਨਤ੍ਥਿ. ਤੇਸਂ ਸਮ੍ਪਤ੍ਤਿਯਾ ‘‘ਇਧ ਫਾਸੁ ਵਿਹਰਾਮਾ’’ਤਿ ਅਭਿਰਮਿਤ੍ਵਾ ਚਿਰਵਿਹਾਰੋਪਿ ਨਤ੍ਥਿ. ਯਤ੍ਥ ਪਨ ਤਥਾਗਤੇ ਵਿਹਰਨ੍ਤੇ ਸਤ੍ਤਾ ਸਰਣੇਸੁ ਵਾ ਪਤਿਟ੍ਠਹਨ੍ਤਿ, ਸੀਲਾਨਿ ਵਾ ਸਮਾਦਿਯਨ੍ਤਿ, ਪਬ੍ਬਜਨ੍ਤਿ ਵਾ, ਤਤੋ ਸੋਤਾਪਤ੍ਤਿਮਗ੍ਗਾਦੀਨਂ ਵਾ ਪਨ ਤੇਸਂ ਉਪਨਿਸ੍ਸਯੋ ਹੋਤਿ. ਤਤ੍ਥ ਬੁਦ੍ਧਾ ਸਤ੍ਤੇ ਤਾਸੁ ਸਮ੍ਪਤ੍ਤੀਸੁ ਪਤਿਟ੍ਠਾਪਨਅਜ੍ਝਾਸਯੇਨ ਵਸਨ੍ਤਿ; ਤਾਸਂ ਅਭਾਵੇ ਪਕ੍ਕਮਨ੍ਤਿ. ਤੇਨ ਵੁਤ੍ਤਂ – ‘‘ਯਥਾਅਜ੍ਝਾਸਯਂ ਵਿਹਰਿਤ੍ਵਾ’’ਤਿ. ਚਾਰਿਕਂ ਚਰਮਾਨੋਤਿ ਅਦ੍ਧਾਨਗਮਨਂ ਗਚ੍ਛਨ੍ਤੋ. ਚਾਰਿਕਾ ਚ ਨਾਮੇਸਾ ਭਗਵਤੋ ਦੁਵਿਧਾ ਹੋਤਿ ਤੁਰਿਤਚਾਰਿਕਾ ਚ, ਅਤੁਰਿਤਚਾਰਿਕਾ ਚ.
ਤਤ੍ਥ ਦੂਰੇਪਿ ਬੋਧਨੇਯ੍ਯਪੁਗ੍ਗਲਂ ਦਿਸ੍ਵਾ ਤਸ੍ਸ ਬੋਧਨਤ੍ਥਾਯ ਸਹਸਾ ਗਮਨਂ ਤੁਰਿਤਚਾਰਿਕਾ ਨਾਮ. ਸਾ ਮਹਾਕਸ੍ਸਪਪਚ੍ਚੁਗ੍ਗਮਨਾਦੀਸੁ ਦਟ੍ਠਬ੍ਬਾ. ਭਗਵਾ ਹਿ ਮਹਾਕਸ੍ਸਪਂ ਪਚ੍ਚੁਗ੍ਗਚ੍ਛਨ੍ਤੋ ਮੁਹੁਤ੍ਤੇਨ ਤਿਗਾਵੁਤਂ ਮਗ੍ਗਂ ਅਗਮਾਸਿ, ਆਲ਼ਵਕਸ੍ਸਤ੍ਥਾਯ ਤਿਂਸਯੋਜਨਂ, ਤਥਾ ਅਙ੍ਗੁਲਿਮਾਲਸ੍ਸ. ਪੁਕ੍ਕੁਸਾਤਿਸ੍ਸ ਪਨ ਪਞ੍ਚਚਤ੍ਤਾਲੀਸਯੋਜਨਂ, ਮਹਾਕਪ੍ਪਿਨਸ੍ਸ ਵੀਸਯੋਜਨਸਤਂ, ਖਦਿਰਵਨਿਯਸ੍ਸਤ੍ਥਾਯ ਸਤ੍ਤ ਯੋਜਨਸਤਾਨਿ ਅਗਮਾਸਿ; ਧਮ੍ਮਸੇਨਾਪਤਿਨੋ ਸਦ੍ਧਿਵਿਹਾਰਿਕਸ੍ਸ ਵਨਵਾਸੀਤਿਸ੍ਸਸਾਮਣੇਰਸ੍ਸ ਤਿਗਾਵੁਤਾਧਿਕਂ ਵੀਸਯੋਜਨਸਤਂ.
ਏਕਦਿਵਸਂ ਕਿਰ ਥੇਰੋ, ‘‘ਤਿਸ੍ਸਸਾਮਣੇਰਸ੍ਸ ਸਨ੍ਤਿਕਂ, ਭਨ੍ਤੇ, ਗਚ੍ਛਾਮੀ’’ਤਿ ਆਹ. ਭਗਵਾ, ‘‘ਅਹਮ੍ਪਿ ਗਮਿਸ੍ਸਾਮੀ’’ਤਿ ਵਤ੍ਵਾ ਆਯਸ੍ਮਨ੍ਤਂ ਆਨਨ੍ਦਂ ਆਮਨ੍ਤੇਸਿ – ‘‘ਆਨਨ੍ਦ, ਵੀਸਤਿਸਹਸ੍ਸਾਨਂ ਛਲ਼ਭਿਞ੍ਞਾਨਂ ਆਰੋਚੇਹਿ – ‘ਭਗਵਾ ਵਨਵਾਸੀਤਿਸ੍ਸਸਾਮਣੇਰਸ੍ਸ ਸਨ੍ਤਿਕਂ ਗਮਿਸ੍ਸਤੀ’’’ਤਿ. ਤਤੋ ਦੁਤਿਯਦਿਵਸੇ ਵੀਸਤਿਸਹਸ੍ਸਖੀਣਾਸਵਪਰਿਵੁਤੋ ਆਕਾਸੇ ਉਪ੍ਪਤਿਤ੍ਵਾ ਵੀਸਯੋਜਨਸਤਮਤ੍ਥਕੇ ਤਸ੍ਸ ਗੋਚਰਗਾਮਦ੍ਵਾਰੇ ਓਤਰਿਤ੍ਵਾ ਚੀਵਰਂ ਪਾਰੁਪਿ. ਕਮ੍ਮਨ੍ਤਂ ਗਚ੍ਛਮਾਨਾ ਮਨੁਸ੍ਸਾ ਦਿਸ੍ਵਾ, ‘‘ਸਤ੍ਥਾ, ਭੋ, ਆਗਤੋ, ਮਾ ਕਮ੍ਮਨ੍ਤਂ ਅਗਮਿਤ੍ਥਾ’’ਤਿ ਵਤ੍ਵਾ ਆਸਨਾਨਿ ਪਞ੍ਞਪੇਤ੍ਵਾ ਯਾਗੁਂ ਦਤ੍ਵਾ ਪਾਨਵਤ੍ਤਂ ਕਰੋਨ੍ਤਾ, ‘‘ਕੁਹਿਂ, ਭਨ੍ਤੇ, ਭਗਵਾ ਗਚ੍ਛਤੀ’’ਤਿ ਦਹਰਭਿਕ੍ਖੂ ਪੁਚ੍ਛਿਂਸੁ. ਉਪਾਸਕਾ, ਨ ਭਗਵਾ ਅਞ੍ਞਤ੍ਥ ਗਚ੍ਛਤਿ, ਇਧੇਵ ਤਿਸ੍ਸਸਾਮਣੇਰਸ੍ਸ ਦਸ੍ਸਨਤ੍ਥਾਯ ਆਗਤੋਤਿ. ਤੇ ‘‘ਅਮ੍ਹਾਕਂ ਕਿਰ ਕੁਲੂਪਕਤ੍ਥੇਰਸ੍ਸ ਦਸ੍ਸਨਤ੍ਥਾਯ ਸਤ੍ਥਾ ਆਗਤੋ, ਨੋ ਵਤ ਨੋ ਥੇਰੋ ਓਰਮਤ੍ਤਕੋ’’ਤਿ ਸੋਮਨਸ੍ਸਜਾਤਾ ਅਹੇਸੁਂ.
ਅਥ ਭਗਵਤੋ ਭਤ੍ਤਕਿਚ੍ਚਪਰਿਯੋਸਾਨੇ ਸਾਮਣੇਰੋ ਗਾਮਂ ਪਿਣ੍ਡਾਯ ਚਰਿਤ੍ਵਾ ‘‘ਉਪਾਸਕਾ ਮਹਾ ਭਿਕ੍ਖੁਸਙ੍ਘੋ’’ਤਿ ਪੁਚ੍ਛਿ. ਅਥਸ੍ਸ ਤੇ, ‘‘ਸਤ੍ਥਾ, ਭਨ੍ਤੇ, ਆਗਤੋ’’ਤਿ ਆਰੋਚੇਸੁਂ, ਸੋ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਪਿਣ੍ਡਪਾਤੇਨ ਆਪੁਚ੍ਛਿ. ਸਤ੍ਥਾ ਤਸ੍ਸ ਪਤ੍ਤਂ ਹਤ੍ਥੇਨ ਗਹੇਤ੍ਵਾ, ‘‘ਅਲਂ, ਤਿਸ੍ਸ, ਨਿਟ੍ਠਿਤਂ ਭਤ੍ਤਕਿਚ੍ਚ’’ਨ੍ਤਿ ਆਹ. ਤਤੋ ਉਪਜ੍ਝਾਯਂ ਆਪੁਚ੍ਛਿਤ੍ਵਾ ਅਤ੍ਤਨੋ ਪਤ੍ਤਾਸਨੇ ਨਿਸੀਦਿਤ੍ਵਾ ਭਤ੍ਤਕਿਚ੍ਚਮਕਾਸਿ. ਅਥਸ੍ਸ ਭਤ੍ਤਕਿਚ੍ਚਪਰਿਯੋਸਾਨੇ ਸਤ੍ਥਾ ਮਙ੍ਗਲਂ ਵਤ੍ਵਾ ਨਿਕ੍ਖਮਿਤ੍ਵਾ ਗਾਮਦ੍ਵਾਰੇ ਠਤ੍ਵਾ, ‘‘ਕਤਰੋ ਤੇ, ਤਿਸ੍ਸ, ਵਸਨਟ੍ਠਾਨਂ ਗਮਨਮਗ੍ਗੋ’’ਤਿ ਆਹ. ‘‘ਅਯਂ ਭਗਵਾ’’ਤਿ. ਮਗ੍ਗਂ ਦੇਸਯਮਾਨੋ ਪੁਰਤੋ ਯਾਹਿ ਤਿਸ੍ਸਾਤਿ. ਭਗਵਾ ਕਿਰ ਸਦੇਵਕਸ੍ਸ ਲੋਕਸ੍ਸ ਮਗ੍ਗਦੇਸਕੋ ਸਮਾਨੋਪਿ ‘‘ਸਕਲਤਿਗਾਵੁਤੇ ਮਗ੍ਗੇ ਸਾਮਣੇਰਂ ਦਟ੍ਠੁਂ ਲਚ੍ਛਾਮੀ’’ਤਿ ਤਂ ਮਗ੍ਗਦੇਸਕਮਕਾਸਿ.
ਸੋ ਅਤ੍ਤਨੋ ਵਸਨਟ੍ਠਾਨਂ ਗਨ੍ਤ੍ਵਾ ਭਗਵਤੋ ਵਤ੍ਤਮਕਾਸਿ. ਅਥ ਨਂ ਭਗਵਾ, ‘‘ਕਤਰੋ ਤੇ, ਤਿਸ੍ਸ, ਚਙ੍ਕਮੋ’’ਤਿ ਪੁਚ੍ਛਿਤ੍ਵਾ ਤਤ੍ਥ ਗਨ੍ਤ੍ਵਾ ਸਾਮਣੇਰਸ੍ਸ ਨਿਸੀਦਨਪਾਸਾਣੇ ਨਿਸੀਦਿਤ੍ਵਾ, ‘‘ਤਿਸ੍ਸ, ਇਮਸ੍ਮਿਂ ਠਾਨੇ ਸੁਖਂ ਵਸਸੀ’’ਤਿ ਪੁਚ੍ਛਿ. ਸੋ ਆਹ – ‘‘ਆਮ, ਭਨ੍ਤੇ, ਇਮਸ੍ਮਿਂ ਮੇ ਠਾਨੇ ਵਸਨ੍ਤਸ੍ਸ ਸੀਹਬ੍ਯਗ੍ਘਹਤ੍ਥਿਮਿਗਮੋਰਾਦੀਨਂ ਸਦ੍ਦਂ ਸੁਣਤੋ ਅਰਞ੍ਞਸਞ੍ਞਾ ਉਪ੍ਪਜ੍ਜਤਿ, ਤਾਯ ਸੁਖਂ ਵਸਾਮੀ’’ਤਿ. ਅਥ ਨਂ ਭਗਵਾ, ‘‘ਤਿਸ੍ਸ, ਭਿਕ੍ਖੁਸਙ੍ਘਂ ਸਨ੍ਨਿਪਾਤੇਹਿ, ਬੁਦ੍ਧਦਾਯਜ੍ਜਂ ਤੇ ਦਸ੍ਸਾਮੀ’’ਤਿ ਵਤ੍ਵਾ ਸਨ੍ਨਿਪਤਿਤੇ ਭਿਕ੍ਖੁਸਙ੍ਘੇ ਉਪਸਮ੍ਪਾਦੇਤ੍ਵਾ ਅਤ੍ਤਨੋ ਵਸਨਟ੍ਠਾਨਮੇਵ ਅਗਮਾਸੀਤਿ. ਅਯਂ ਤੁਰਿਤਚਾਰਿਕਾ ਨਾਮ.
ਯਂ ਪਨ ਗਾਮਨਿਗਮਪਟਿਪਾਟਿਯਾ ਦੇਵਸਿਕਂ ਯੋਜਨਡ੍ਢਯੋਜਨਵਸੇਨ ਪਿਣ੍ਡਪਾਤਚਰਿਯਾਦੀਹਿ ਲੋਕਂ ਅਨੁਗ੍ਗਣ੍ਹਨ੍ਤਸ੍ਸ ਗਮਨਂ, ਅਯਂ ਅਤੁਰਿਤਚਾਰਿਕਾ ਨਾਮ. ਇਮਂ ਪਨ ਚਾਰਿਕਂ ਚਰਨ੍ਤੋ ਭਗਵਾ ਮਹਾਮਣ੍ਡਲਂ ਮਜ੍ਝਿਮਮਣ੍ਡਲਂ ਅਨ੍ਤਿਮਮਣ੍ਡਲਨ੍ਤਿ ਇਮੇਸਂ ਤਿਣ੍ਣਂ ਮਣ੍ਡਲਾਨਂ ਅਞ੍ਞਤਰਸ੍ਮਿਂ ਚਰਤਿ. ਤਤ੍ਥ ਮਹਾਮਣ੍ਡਲਂ ਨਵਯੋਜਨਸਤਿਕਂ, ਮਜ੍ਝਿਮਮਣ੍ਡਲਂ ਛਯੋਜਨਸਤਿਕਂ, ਅਨ੍ਤਿਮਮਣ੍ਡਲਂ ਤਿਯੋਜਨਸਤਿਕਂ. ਯਦਾ ਮਹਾਮਣ੍ਡਲੇ ਚਾਰਿਕਂ ਚਰਿਤੁਕਾਮੋ ਹੋਤਿ, ਮਹਾਪਵਾਰਣਾਯ ਪਵਾਰੇਤ੍ਵਾ ਪਾਟਿਪਦਦਿਵਸੇ ਮਹਾਭਿਕ੍ਖੁਸਙ੍ਘਪਰਿਵਾਰੋ ਨਿਕ੍ਖਮਤਿ. ਸਮਨ੍ਤਾ ਯੋਜਨਸਤਂ ਏਕਕੋਲਾਹਲਂ ਅਹੋਸਿ, ਪੁਰਿਮਂ ਪੁਰਿਮਂ ਆਗਤਾ ਨਿਮਨ੍ਤੇਤੁਂ ਲਭਨ੍ਤਿ; ਇਤਰੇਸੁ ਦ੍ਵੀਸੁ ਮਣ੍ਡਲੇਸੁ ਸਕ੍ਕਾਰੋ ਮਹਾਮਣ੍ਡਲੇ ਓਸਰਤਿ. ਤਤ੍ਰ ਭਗਵਾ ਤੇਸੁ ਤੇਸੁ ਗਾਮਨਿਗਮੇਸੁ ਏਕਾਹਂ ਦ੍ਵੀਹਂ ਵਸਨ੍ਤੋ ਮਹਾਜਨਂ ਆਮਿਸਪਟਿਗ੍ਗਹੇਨ ਅਨੁਗ੍ਗਣ੍ਹਨ੍ਤੋ ਧਮ੍ਮਦਾਨੇਨ ਚਸ੍ਸ ਵਿਵਟ੍ਟੂਪਨਿਸ੍ਸਿਤਂ ਕੁਸਲਂ ਵਡ੍ਢੇਨ੍ਤੋ ਨਵਹਿ ਮਾਸੇਹਿ ਚਾਰਿਕਂ ਪਰਿਯੋਸਾਪੇਤਿ.
ਸਚੇ ਪਨ ਅਨ੍ਤੋਵਸ੍ਸੇ ਭਿਕ੍ਖੂਨਂ ਸਮਥਵਿਪਸ੍ਸਨਾ ਤਰੁਣਾ ਹੋਤਿ, ਮਹਾਪਵਾਰਣਾਯ ਅਪਵਾਰੇਤ੍ਵਾ ਪਵਾਰਣਾਸਙ੍ਗਹਂ ਦਤ੍ਵਾ ਕਤ੍ਤਿਕਪੁਣ੍ਣਮਾਯ ਪਵਾਰੇਤ੍ਵਾ ਮਿਗਸਿਰਸ੍ਸ ਪਠਮਦਿਵਸੇ ਮਹਾਭਿਕ੍ਖੁਸਙ੍ਘਪਰਿਵਾਰੋ ਨਿਕ੍ਖਮਿਤ੍ਵਾ ਮਜ੍ਝਿਮਮਣ੍ਡਲਂ ਓਸਰਤਿ. ਅਞ੍ਞੇਨਪਿ ਕਾਰਣੇਨ ਮਜ੍ਝਿਮਮਣ੍ਡਲੇ ਚਾਰਿਕਂ ਚਰਿਤੁਕਾਮੋ ਚਤੁਮਾਸਂ ਵਸਿਤ੍ਵਾਵ ਨਿਕ੍ਖਮਤਿ. ਵੁਤ੍ਤਨਯੇਨੇਵ ਇਤਰੇਸੁ ਦ੍ਵੀਸੁ ਮਣ੍ਡਲੇਸੁ ਸਕ੍ਕਾਰੋ ਮਜ੍ਝਿਮਮਣ੍ਡਲੇ ਓਸਰਤਿ. ਭਗਵਾ ਪੁਰਿਮਨਯੇਨੇਵ ਲੋਕਂ ਅਨੁਗ੍ਗਣ੍ਹਨ੍ਤੋ ਅਟ੍ਠਹਿ ਮਾਸੇਹਿ ਚਾਰਿਕਂ ਪਰਿਯੋਸਾਪੇਤਿ.
ਸਚੇ ਪਨ ਚਤੁਮਾਸਂ ਵੁਟ੍ਠਵਸ੍ਸਸ੍ਸਾਪਿ ਭਗਵਤੋ ਵੇਨੇਯ੍ਯਸਤ੍ਤਾ ਅਪਰਿਪਕ੍ਕਿਨ੍ਦ੍ਰਿਯਾ ਹੋਨ੍ਤਿ, ਤੇਸਂ ਇਨ੍ਦ੍ਰਿਯਪਰਿਪਾਕਂ ਆਗਮਯਮਾਨੋ ਅਪਰਮ੍ਪਿ ਏਕਂ ਮਾਸਂ ਵਾ ਦ੍ਵਿਤਿਚਤੁਮਾਸਂ ਵਾ ਤਤ੍ਥੇਵ ਵਸਿਤ੍ਵਾ ਮਹਾਭਿਕ੍ਖੁਸਙ੍ਘਪਰਿਵਾਰੋ ਨਿਕ੍ਖਮਤਿ. ਵੁਤ੍ਤਨਯੇਨੇਵ ਇਤਰੇਸੁ ਦ੍ਵੀਸੁ ਮਣ੍ਡਲੇਸੁ ਸਕ੍ਕਾਰੋ ਅਨ੍ਤੋਮਣ੍ਡਲੇ ਓਸਰਤਿ. ਭਗਵਾ ਪੁਰਿਮਨਯੇਨੇਵ ਲੋਕਂ ਅਨੁਗ੍ਗਣ੍ਹਨ੍ਤੋ ਸਤ੍ਤਹਿ ਵਾ ਛਹਿ ਵਾ ਪਞ੍ਚਹਿ ਵਾ ਚਤੂਹਿ ਵਾ ਮਾਸੇਹਿ ਚਾਰਿਕਂ ਪਰਿਯੋਸਾਪੇਤਿ. ਇਤਿ ਇਮੇਸੁ ਤੀਸੁ ਮਣ੍ਡਲੇਸੁ ਯਤ੍ਥ ਕਤ੍ਥਚਿ ਚਾਰਿਕਂ ਚਰਨ੍ਤੋ ਨ ਚੀਵਰਾਦਿਹੇਤੁ ਚਰਤਿ. ਅਥ ਖੋ ਯੇ ਦੁਗ੍ਗਤਾ ਬਾਲਾ ਜਿਣ੍ਣਾ ਬ੍ਯਾਧਿਤਾ, ਤੇ ਕਦਾ ਤਥਾਗਤਂ ਆਗਨ੍ਤ੍ਵਾ ਪਸ੍ਸਿਸ੍ਸਨ੍ਤਿ? ਮਯਿ ਪਨ ਚਾਰਿਕਂ ਚਰਨ੍ਤੇ ਮਹਾਜਨੋ ਤਥਾਗਤਦਸ੍ਸਨਂ ਲਭਿਸ੍ਸਤਿ, ਤਤ੍ਥ ਕੇਚਿ ਚਿਤ੍ਤਾਨਿ ਪਸਾਦੇਸ੍ਸਨ੍ਤਿ, ਕੇਚਿ ਮਾਲਾਦੀਹਿ ਪੂਜੇਸ੍ਸਨ੍ਤਿ, ਕੇਚਿ ਕਟਚ੍ਛੁਭਿਕ੍ਖਂ ਦਸ੍ਸਨ੍ਤਿ, ਕੇਚਿ ਮਿਚ੍ਛਾਦਸ੍ਸਨਂ ਪਹਾਯ ਸਮ੍ਮਾਦਿਟ੍ਠਿਕਾ ਭਵਿਸ੍ਸਨ੍ਤਿ, ਤਂ ਤੇਸਂ ਭਵਿਸ੍ਸਤਿ ਦੀਘਰਤ੍ਤਂ ਹਿਤਾਯ ਸੁਖਾਯਾਤਿ ਏਵਂ ਲੋਕਾਨੁਕਮ੍ਪਾਯ ਚਾਰਿਕਂ ਚਰਤਿ.
ਅਪਿਚ ਚਤੂਹਿ ਕਾਰਣੇਹਿ ਬੁਦ੍ਧਾ ਭਗਵਨ੍ਤੋ ਚਾਰਿਕਂ ਚਰਨ੍ਤਿ – ਜਙ੍ਘਾਵਿਹਾਰਵਸੇਨ ਸਰੀਰਫਾਸੁਕਤ੍ਥਾਯ, ਅਤ੍ਥੁਪ੍ਪਤ੍ਤਿਕਾਲਂ ਅਭਿਕਙ੍ਖਨਤ੍ਥਾਯ, ਭਿਖੂਨਂ ਸਿਕ੍ਖਾਪਦਂ ਪਞ੍ਞਾਪਨਤ੍ਥਾਯ, ਤਤ੍ਥ ਤਤ੍ਥ ਪਰਿਪਾਕਗਤਿਨ੍ਦ੍ਰਿਯੇ ਬੋਧਨੇਯ੍ਯਸਤ੍ਤੇ ਬੋਧਨਤ੍ਥਾਯਾਤਿ. ਅਪਰੇਹਿਪਿ ਚਤੂਹਿ ਕਾਰਣੇਹਿ ਬੁਦ੍ਧਾ ਭਗਵਨ੍ਤੋ ਚਾਰਿਕਂ ਚਰਨ੍ਤਿ – ਬੁਦ੍ਧਂ ਸਰਣਂ ਗਚ੍ਛਿਸ੍ਸਨ੍ਤੀਤਿ ਵਾ, ਧਮ੍ਮਂ ਸਰਣਂ ਗਚ੍ਛਿਸ੍ਸਨ੍ਤੀਤਿ ਵਾ, ਸਙ੍ਘਂ ਸਰਣਂ ਗਚ੍ਛਿਸ੍ਸਨ੍ਤੀਤਿ ਵਾ, ਮਹਤਾ ਧਮ੍ਮਵਸ੍ਸੇਨ ਚਤਸ੍ਸੋ ਪਰਿਸਾ ਸਨ੍ਤਪ੍ਪੇਸ੍ਸਾਮੀਤਿ ਵਾਤਿ. ਅਪਰੇਹਿ ਪਞ੍ਚਹਿ ਕਾਰਣੇਹਿ ਬੁਦ੍ਧਾ ਭਗਵਨ੍ਤੋ ਚਾਰਿਕਂ ਚਰਨ੍ਤਿ – ਪਾਣਾਤਿਪਾਤਾ ਵਿਰਮਿਸ੍ਸਨ੍ਤੀਤਿ ਵਾ, ਅਦਿਨ੍ਨਾਦਾਨਾ… ਕਾਮੇਸੁਮਿਚ੍ਛਾਚਾਰਾ… ਮੁਸਾਵਾਦਾ… ਸੁਰਾਮੇਰਯਮਜ੍ਜਪਮਾਦਟ੍ਠਾਨਾ ਵਿਰਮਿਸ੍ਸਨ੍ਤੀਤਿ ਵਾਤਿ. ਅਪਰੇਹਿ ਅਟ੍ਠਹਿ ਕਾਰਣੇਹਿ ਬੁਦ੍ਧਾ ਭਗਵਨ੍ਤੋ ਚਾਰਿਕਂ ਚਰਨ੍ਤਿ – ਪਠਮਜ੍ਝਾਨਂ ਪਟਿਲਭਿਸ੍ਸਨ੍ਤੀਤਿ ਵਾ, ਦੁਤਿਯਂ…ਪੇ… ਨੇਵਸਞ੍ਞਾਨਾਸਞ੍ਞਾਯਤਨਸਮਾਪਤ੍ਤਿਂ ਪਟਿਲਭਿਸ੍ਸਨ੍ਤੀਤਿ ਵਾਤਿ. ਅਪਰੇਹਿ ਅਟ੍ਠਹਿ ਕਾਰਣੇਹਿ ਬੁਦ੍ਧਾ ਭਗਵਨ੍ਤੋ ਚਾਰਿਕਂ ਚਰਨ੍ਤਿ – ਸੋਤਾਪਤ੍ਤਿਮਗ੍ਗਂ ਅਧਿਗਮਿਸ੍ਸਨ੍ਤੀਤਿ ਵਾ, ਸੋਤਾਪਤ੍ਤਿਫਲਂ…ਪੇ… ਅਰਹਤ੍ਤਫਲਂ ਸਚ੍ਛਿਕਰਿਸ੍ਸਨ੍ਤੀਤਿ ਵਾਤਿ. ਅਯਂ ਅਤੁਰਿਤਚਾਰਿਕਾ, ਸਾ ਇਧ ਅਧਿਪ੍ਪੇਤਾ. ਸਾ ਪਨੇਸਾ ਦੁਵਿਧਾ ਹੋਤਿ ਨਿਬਦ੍ਧਚਾਰਿਕਾ, ਅਨਿਬਦ੍ਧਚਾਰਿਕਾ ਚ. ਤਤ੍ਥ ਯਂ ਏਕਸ੍ਸੇਵ ਬੋਧਨੇਯ੍ਯਸਤ੍ਤਸ੍ਸ ਅਤ੍ਥਾਯ ਗਚ੍ਛਤਿ, ਅਯਂ ਨਿਬਦ੍ਧਚਾਰਿਕਾ ਨਾਮ. ਯਂ ਪਨ ਗਾਮਨਿਗਮਨਗਰਪਟਿਪਾਟਿਵਸੇਨ ਚਰਤਿ, ਅਯਂ ਅਨਿਬਦ੍ਧਚਾਰਿਕਾ ਨਾਮ. ਏਸਾ ਇਧ ਅਧਿਪ੍ਪੇਤਾ.
ਸੇਨਾਸਨਂ ਸਂਸਾਮੇਤ੍ਵਾਤਿ ਸੇਨਾਸਨਂ ਪਟਿਸਾਮੇਤ੍ਵਾ. ਤਂ ਪਨ ਪਟਿਸਾਮੇਨ੍ਤੋ ਥੇਰੋ ਨ ਚੂਲ਼ਪਤ੍ਤਮਹਾਪਤ੍ਤ-ਚੂਲ਼ਥਾਲਕਮਹਾਥਾਲਕ-ਪਟ੍ਟੁਣ੍ਣਚੀਵਰ-ਦੁਕੂਲਚੀਵਰਾਦੀਨਂ ਭਣ੍ਡਿਕਂ ਕਤ੍ਵਾ ਸਪ੍ਪਿਤੇਲਾਦੀਨਂ ਵਾ ਪਨ ਘਟੇ ਪੂਰਾਪੇਤ੍ਵਾ ਗਬ੍ਭੇ ਨਿਦਹਿਤ੍ਵਾ ਦ੍ਵਾਰਂ ਪਿਧਾਯ ਕੁਞ੍ਚਿਕਮੁਦ੍ਦਿਕਾਦੀਨਿ ਯੋਜਾਪੇਸਿ. ‘‘ਸਚੇ ਨ ਹੋਤਿ ਭਿਕ੍ਖੁ ਵਾ ਸਾਮਣੇਰੋ ਵਾ ਆਰਾਮਿਕੋ ਵਾ ਉਪਾਸਕੋ ਵਾ, ਚਤੂਸੁ ਪਾਸਾਣੇਸੁ ਮਞ੍ਚੇ ਮਞ੍ਚਂ ਆਰੋਪੇਤ੍ਵਾ ਪੀਠੇ ਪੀਠਂ ਆਰੋਪੇਤ੍ਵਾ ਚੀਵਰਵਂਸੇ ਵਾ ਚੀਵਰਰਜ੍ਜੁਯਾ ਵਾ ਉਪਰਿ ਪੁਞ੍ਜਂ ਕਤ੍ਵਾ ਦ੍ਵਾਰਵਾਤਪਾਨਂ ਥਕੇਤ੍ਵਾ ਪਕ੍ਕਮਿਤਬ੍ਬ’’ਨ੍ਤਿ (ਚੂਲ਼ਵ. ੩੬੧) ਵਚਨਤੋ ਪਨ ਨੇਵਾਸਿਕਂ ਭਿਕ੍ਖੁਂ ਆਪੁਚ੍ਛਨਮਤ੍ਤਕੇਨੇਵ ਪਟਿਸਾਮੇਸਿ.
ਯੇਨ ਸਾਵਤ੍ਥਿ ਤੇਨ ਚਾਰਿਕਂ ਪਕ੍ਕਾਮੀਤਿ ਸਤ੍ਥੁ ਦਸ੍ਸਨਕਾਮੋ ਹੁਤ੍ਵਾ ਯੇਨ ਦਿਸਾਭਾਗੇਨ ਸਾਵਤ੍ਥਿ ਤੇਨ ਪਕ੍ਕਾਮਿ. ਪਕ੍ਕਮਨ੍ਤੋ ਚ ਨ ਸੁਦ੍ਧੋਦਨਮਹਾਰਾਜਸ੍ਸ ਆਰੋਚਾਪੇਤ੍ਵਾ ਸਪ੍ਪਿਤੇਲਮਧੁਫਾਣਿਤਾਦੀਨਿ ਗਾਹਾਪੇਤ੍ਵਾ ਪਕ੍ਕਨ੍ਤੋ. ਯੂਥਂ ਪਹਾਯ ਨਿਕ੍ਖਨ੍ਤੋ ਪਨ ਮਤ੍ਤਹਤ੍ਥੀ ਵਿਯ, ਅਸਹਾਯਕਿਚ੍ਚੋ ਸੀਹੋ ਵਿਯ, ਪਤ੍ਤਚੀਵਰਮਤ੍ਤਂ ਆਦਾਯ ਏਕਕੋਵ ਪਕ੍ਕਾਮਿ. ਕਸ੍ਮਾ ਪਨੇਸ ਪਞ੍ਚਸਤੇਹਿ ਅਤ੍ਤਨੋ ਅਨ੍ਤੇਵਾਸਿਕੇਹਿ ਸਦ੍ਧਿਂ ਰਾਜਗਹਂ ਅਗਨ੍ਤ੍ਵਾ ਇਦਾਨਿ ਨਿਕ੍ਖਨ੍ਤੋਤਿ? ਰਾਜਗਹਂ ਕਪਿਲਵਤ੍ਥੁਤੋ ਦੂਰਂ ਸਟ੍ਠਿਯੋਜਨਾਨਿ, ਸਾਵਤ੍ਥਿ ਪਨ ਪਞ੍ਚਦਸ. ਸਤ੍ਥਾ ਰਾਜਗਹਤੋ ਪਞ੍ਚਚਤ੍ਤਾਲੀਸਯੋਜਨਂ ਆਗਨ੍ਤ੍ਵਾ ਸਾਵਤ੍ਥਿਯਂ ਵਿਹਰਤਿ, ਇਦਾਨਿ ਆਸਨ੍ਨੋ ਜਾਤੋਤਿ ਸੁਤ੍ਵਾ ਨਿਕ੍ਖਮੀਤਿ ਅਕਾਰਣਮੇਤਂ. ਬੁਦ੍ਧਾਨਂ ਸਨ੍ਤਿਕਂ ਗਚ੍ਛਨ੍ਤੋ ਹਿ ਏਸ ਯੋਜਨਸਹਸ੍ਸਮ੍ਪਿ ਗਚ੍ਛੇਯ੍ਯ, ਤਦਾ ਪਨ ਕਾਯਵਿਵੇਕੋ ਨ ਸਕ੍ਕਾ ਲਦ੍ਧੁਨ੍ਤਿ. ਬਹੂਹਿ ਸਦ੍ਧਿਂ ਗਮਨਕਾਲੇ ਹਿ ਏਕਸ੍ਮਿਂ ਗਚ੍ਛਾਮਾਤਿ ਵਦਨ੍ਤੇ ਏਕੋ ਇਧੇਵ ਵਸਾਮਾਤਿ ਵਦਤਿ. ਏਕਸ੍ਮਿਂ ਵਸਾਮਾਤਿ ਵਦਨ੍ਤੇ ਏਕੋ ਗਚ੍ਛਾਮਾਤਿ ਵਦਤਿ. ਤਸ੍ਮਾ ਇਚ੍ਛਿਤਿਚ੍ਛਿਤਕ੍ਖਣੇ ਸਮਾਪਤ੍ਤਿਂ ਅਪ੍ਪੇਤ੍ਵਾ ਨਿਸੀਦਿਤੁਂ ਵਾ ਫਾਸੁਕਸੇਨਾਸਨੇ ਕਾਯਵਿਵੇਕਂ ਲਦ੍ਧੁਂ ਵਾ ਨ ਸਕ੍ਕਾ ਹੋਤਿ, ਏਕਕਸ੍ਸ ਪਨ ਤਂ ਸਬ੍ਬਂ ਸੁਲਭਂ ਹੋਤੀਤਿ ਤਦਾ ਅਗਨ੍ਤ੍ਵਾ ਇਦਾਨਿ ਪਕ੍ਕਾਮਿ.
ਚਾਰਿਕਂ ਚਰਮਾਨੋਤਿ ਏਤ੍ਥ ਕਿਞ੍ਚਾਪਿ ਅਯਂ ਚਾਰਿਕਾ ਨਾਮ ਮਹਾਜਨਸਙ੍ਗਹਤ੍ਥਂ ਬੁਦ੍ਧਾਨਂਯੇਵ ਲਬ੍ਭਤਿ, ਬੁਦ੍ਧੇ ਉਪਾਦਾਯ ਪਨ ਰੁਲ਼੍ਹੀਸਦ੍ਦੇਨ ਸਾਵਕਾਨਮ੍ਪਿ ਵੁਚ੍ਚਤਿ ਕਿਲਞ੍ਜਾਦੀਹਿ ਕਤਂ ਬੀਜਨਮ੍ਪਿ ਤਾਲਵਣ੍ਟਂ ਵਿਯ. ਯੇਨ ਭਗਵਾਤਿ ਸਾਵਤ੍ਥਿਯਾ ਅਵਿਦੂਰੇ ਏਕਸ੍ਮਿਂ ਗਾਮਕੇ ਪਿਣ੍ਡਾਯ ਚਰਿਤ੍ਵਾ ਕਤਭਤ੍ਤਕਿਚ੍ਚੋ ਜੇਤਵਨਂ ਪਵਿਸਿਤ੍ਵਾ ਸਾਰਿਪੁਤ੍ਤਤ੍ਥੇਰਸ੍ਸ ਵਾ ਮਹਾਮੋਗ੍ਗਲ੍ਲਾਨਤ੍ਥੇਰਸ੍ਸ ਵਾ ਵਸਨਟ੍ਠਾਨਂ ਗਨ੍ਤ੍ਵਾ ਪਾਦੇ ਧੋਵਿਤ੍ਵਾ ਮਕ੍ਖੇਤ੍ਵਾ ਪਾਨੀਯਂ ਵਾ ਪਾਨਕਂ ਵਾ ਪਿਵਿਤ੍ਵਾ ਥੋਕਂ ਵਿਸ੍ਸਮਿਤ੍ਵਾ ਸਤ੍ਥਾਰਂ ਪਸ੍ਸਿਸ੍ਸਾਮੀਤਿ ਚਿਤ੍ਤਮ੍ਪਿ ਅਨੁਪ੍ਪਾਦੇਤ੍ਵਾ ਉਜੁਕਂ ਗਨ੍ਧਕੁਟਿਪਰਿਵੇਣਮੇਵ ਅਗਮਾਸਿ. ਥੇਰਸ੍ਸ ਹਿ ਸਤ੍ਥਾਰਂ ਦਟ੍ਠੁਕਾਮਸ੍ਸ ਅਞ੍ਞੇਨ ਭਿਕ੍ਖੁਨਾ ਕਿਚ੍ਚਂ ਨਤ੍ਥਿ. ਤਸ੍ਮਾ ਰਾਹੁਲਂ ਵਾ ਆਨਨ੍ਦਂ ਵਾ ਗਹੇਤ੍ਵਾ ਓਕਾਸਂ ਕਾਰੇਤ੍ਵਾ ਸਤ੍ਥਾਰਂ ਪਸ੍ਸਿਸ੍ਸਾਮੀਤਿ ਏਵਮ੍ਪਿ ਚਿਤ੍ਤਂ ਨ ਉਪ੍ਪਾਦੇਸਿ.
ਥੇਰੋ ਹਿ ਸਯਮੇਵ ਬੁਦ੍ਧਸਾਸਨੇ ਵਲ੍ਲਭੋ ਰਞ੍ਞੋ ਸਙ੍ਗਾਮਵਿਜਯਮਹਾਯੋਧੋ ਵਿਯ. ਯਥਾ ਹਿ ਤਾਦਿਸਸ੍ਸ ਯੋਧਸ੍ਸ ਰਾਜਾਨਂ ਦਟ੍ਠੁਕਾਮਸ੍ਸ ਅਞ੍ਞਂ ਸੇਵਿਤ੍ਵਾ ਦਸ੍ਸਨਕਮ੍ਮਂ ਨਾਮ ਨਤ੍ਥਿ; ਵਲ੍ਲਭਤਾਯ ਸਯਮੇਵ ਪਸ੍ਸਤਿ. ਏਵਂ ਥੇਰੋਪਿ ਬੁਦ੍ਧਸਾਸਨੇ ਵਲ੍ਲਭੋ, ਤਸ੍ਸ ਅਞ੍ਞਂ ਸੇਵਿਤ੍ਵਾ ਸਤ੍ਥੁਦਸ੍ਸਨਕਿਚ੍ਚਂ ਨਤ੍ਥੀਤਿ ਪਾਦੇ ਧੋਵਿਤ੍ਵਾ ਪਾਦਪੁਞ੍ਛਨਮ੍ਹਿ ਪੁਞ੍ਛਿਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ. ਭਗਵਾਪਿ ‘‘ਪਚ੍ਚੂਸਕਾਲੇਯੇਵ ਮਨ੍ਤਾਣਿਪੁਤ੍ਤੋ ਆਗਮਿਸ੍ਸਤੀ’’ਤਿ ਅਦ੍ਦਸ. ਤਸ੍ਮਾ ਗਨ੍ਧਕੁਟਿਂ ਪਵਿਸਿਤ੍ਵਾ ਸੂਚਿਘਟਿਕਂ ਅਦਤ੍ਵਾਵ ਦਰਥਂ ਪਟਿਪ੍ਪਸ੍ਸਮ੍ਭੇਤ੍ਵਾ ਉਟ੍ਠਾਯ ਨਿਸੀਦਿ. ਥੇਰੋ ਕਵਾਟਂ ਪਣਾਮੇਤ੍ਵਾ ਗਨ੍ਧਕੁਟਿਂ ਪਵਿਸਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਧਮ੍ਮਿਯਾ ਕਥਾਯਾਤਿ ਭਗਵਾ ਧਮ੍ਮਿਂ ਕਥਂ ਕਥੇਨ੍ਤੋ ਚੂਲ਼ਗੋਸਿਙ੍ਗਸੁਤ੍ਤੇ (ਮ. ਨਿ. ੧.੩੨੫ ਆਦਯੋ) ਤਿਣ੍ਣਂ ਕੁਲਪੁਤ੍ਤਾਨਂ ਸਾਮਗ੍ਗਿਰਸਾਨਿਸਂਸਂ ਕਥੇਸਿ; ਸੇਕ੍ਖਸੁਤ੍ਤੇ (ਮ. ਨਿ. ੨.੨੨ ਆਦਯੋ) ਆਵਸਥਾਨਿਸਂਸਂ, ਘਟਿਕਾਰਸੁਤ੍ਤੇ (ਮ. ਨਿ. ੨.੨੮੨ ਆਦਯੋ) ਸਤਿਪਟਿਲਾਭਿਕਂ ਪੁਬ੍ਬੇਨਿਵਾਸਪ੍ਪਟਿਸਂਯੁਤ੍ਤਕਥਂ; ਰਟ੍ਠਪਾਲਸੁਤ੍ਤੇ (ਮ. ਨਿ. ੨.੩੦੪) ਚਤ੍ਤਾਰੋ ਧਮ੍ਮੁਦ੍ਦੇਸੇ, ਸੇਲਸੁਤ੍ਤੇ (ਮ. ਨਿ. ੨.੩੯੬ ਆਦਯੋ) ਪਾਨਕਾਨਿਸਂਸਕਥਂ, ਉਪਕ੍ਕਿਲੇਸਸੁਤ੍ਤੇ (ਮ. ਨਿ. ੩.੨੩੬ ਆਦਯੋ) ਭਗੁਤ੍ਥੇਰਸ੍ਸ ਧਮ੍ਮਕਥਂ ਕਥੇਨ੍ਤੋ ਏਕੀਭਾਵੇ ਆਨਿਸਂਸਂ ਕਥੇਸਿ. ਇਮਸ੍ਮਿਂ ਪਨ ਰਥਵਿਨੀਤੇ ਆਯਸ੍ਮਤੋ ਪੁਣ੍ਣਸ੍ਸ ਕਥੇਨ੍ਤੋ ਦਸਕਥਾਵਤ੍ਥੁਨਿਸ੍ਸਯਂ ਅਨਨ੍ਤਨਯਂ ਨਾਮ ਦਸ੍ਸੇਸਿ ਪੁਣ੍ਣ, ਅਯਮ੍ਪਿ ਅਪ੍ਪਿਚ੍ਛਕਥਾਯੇਵ ਸਨ੍ਤੋਸਕਥਾਯੇਵਾਤਿ. ਪਟਿਸਮ੍ਭਿਦਾਪਤ੍ਤਸ੍ਸ ਸਾਵਕਸ੍ਸ ਵੇਲਨ੍ਤੇ ਠਤ੍ਵਾ ਮਹਾਸਮੁਦ੍ਦੇ ਹਤ੍ਥਪ੍ਪਸਾਰਣਂ ਵਿਯ ਅਹੋਸਿ.
ਯੇਨ ਅਨ੍ਧਵਨਨ੍ਤਿ ਤਦਾ ਕਿਰ ਪਚ੍ਛਾਭਤ੍ਤੇ ਜੇਤਵਨਂ ਆਕਿਣ੍ਣਂ ਹੋਤਿ, ਬਹੂ ਖਤ੍ਤਿਯਬ੍ਰਾਹ੍ਮਣਾਦਯੋ ਜੇਤਵਨਂ ਓਸਰਨ੍ਤਿ; ਰਞ੍ਞੋ ਚਕ੍ਕਵਤ੍ਤਿਸ੍ਸ ਖਨ੍ਧਾਵਾਰਟ੍ਠਾਨਂ ਵਿਯ ਹੋਤਿ, ਨ ਸਕ੍ਕਾ ਪਵਿਵੇਕਂ ਲਭਿਤੁਂ. ਅਨ੍ਧਵਨਂ ਪਨ ਪਧਾਨਘਰਸਦਿਸਂ ਪਵਿਵਿਤ੍ਤਂ, ਤਸ੍ਮਾ ਯੇਨਨ੍ਧਵਨਂ ਤੇਨੁਪਸਙ੍ਕਮਿ. ਕਸ੍ਮਾ ਪਨ ਮਹਾਥੇਰੇ ਨ ਅਦ੍ਦਸ? ਏਵਂ ਕਿਰਸ੍ਸ ਅਹੋਸਿ – ‘‘ਸਾਯਨ੍ਹਸਮਯੇ ਆਗਨ੍ਤ੍ਵਾ ਮਹਾਥੇਰੇ ਦਿਸ੍ਵਾ ਪੁਨ ਦਸਬਲਂ ਪਸ੍ਸਿਸ੍ਸਾਮਿ, ਏਵਂ ਮਹਾਥੇਰਾਨਂ ਏਕਂ ਉਪਟ੍ਠਾਨਂ ਭਵਿਸ੍ਸਤਿ, ਸਤ੍ਥੁ ਦ੍ਵੇ ਭਵਿਸ੍ਸਨ੍ਤਿ, ਤਤੋ ਸਤ੍ਥਾਰਂ ਵਨ੍ਦਿਤ੍ਵਾ ਮਮ ਵਸਨਟ੍ਠਾਨਮੇਵ ਗਮਿਸ੍ਸਾਮੀ’’ਤਿ.
ਸਤ੍ਤਵਿਸੁਦ੍ਧਿਪਞ੍ਹਵਣ੍ਣਨਾ
੨੫੬. ਅਭਿਣ੍ਹਂ ਕਿਤ੍ਤਯਮਾਨੋ ਅਹੋਸੀਤਿ ਪੁਨਪ੍ਪੁਨਂ ਵਣ੍ਣਂ ਕਿਤ੍ਤਯਮਾਨੋ ਵਿਹਾਸਿ. ਥੇਰੋ ਕਿਰ ਤਤੋ ਪਟ੍ਠਾਯ ਦਿਵਸੇ ਦਿਵਸੇ ਸਙ੍ਘਮਜ੍ਝੇ ‘‘ਪੁਣ੍ਣੋ ਕਿਰ ਨਾਮ ਮਨ੍ਤਾਣਿਪੁਤ੍ਤੋ ਚਤੂਹਿ ਪਰਿਸਾਹਿ ਸਦ੍ਧਿਂ ਅਸਂਸਟ੍ਠੋ, ਸੋ ਦਸਬਲਸ੍ਸ ਦਸ੍ਸਨਤ੍ਥਾਯ ਆਗਮਿਸ੍ਸਤਿ; ਕਚ੍ਚਿ ਨੁ ਖੋ ਮਂ ਅਦਿਸ੍ਵਾਵ ਗਮਿਸ੍ਸਤੀ’’ਤਿ ਥੇਰਨਵਮਜ੍ਝਿਮਾਨਂ ਸਤਿਕਰਣਤ੍ਥਂ ਆਯਸ੍ਮਤੋ ਪੁਣ੍ਣਸ੍ਸ ਗੁਣਂ ਭਾਸਤਿ. ਏਵਂ ਕਿਰਸ੍ਸ ਅਹੋਸਿ – ‘‘ਮਹਲ੍ਲਕਭਿਕ੍ਖੂ ਨਾਮ ਨ ਸਬ੍ਬਕਾਲਂ ਅਨ੍ਤੋਵਿਹਾਰੇ ਹੋਨ੍ਤਿ; ਗੁਣਕਥਾਯ ਪਨਸ੍ਸ ਕਥਿਤਾਯ ਯੋ ਚ ਨਂ ਭਿਕ੍ਖੁਂ ਪਸ੍ਸਿਸ੍ਸਤਿ; ਸੋ ਆਗਨ੍ਤ੍ਵਾ ਆਰੋਚੇਸ੍ਸਤੀ’’ਤਿ. ਅਥਾਯਂ ਥੇਰਸ੍ਸੇਵ ਸਦ੍ਧਿਵਿਹਾਰਿਕੋ ਤਂ ਆਯਸ੍ਮਨ੍ਤਂ ਮਨ੍ਤਾਣਿਪੁਤ੍ਤਂ ਪਤ੍ਤਚੀਵਰਮਾਦਾਯ ਗਨ੍ਧਕੁਟਿਂ ਪਵਿਸਨ੍ਤਂ ਅਦ੍ਦਸ. ਕਥਂ ਪਨ ਨਂ ਏਸ ਅਞ੍ਞਾਸੀਤਿ? ਪੁਣ੍ਣ, ਪੁਣ੍ਣਾਤਿ ਵਤ੍ਵਾ ਕਥੇਨ੍ਤਸ੍ਸ ਭਗਵਤੋ ਧਮ੍ਮਕਥਾਯ ਅਞ੍ਞਾਸਿ – ‘‘ਅਯਂ ਸੋ ਥੇਰੋ, ਯਸ੍ਸ ਮੇ ਉਪਜ੍ਝਾਯੋ ਅਭਿਣ੍ਹਂ ਕਿਤ੍ਤਯਮਾਨੋ ਹੋਤੀ’’ਤਿ. ਇਤਿ ਸੋ ਆਗਨ੍ਤ੍ਵਾ ਥੇਰਸ੍ਸ ਆਰੋਚੇਸਿ. ਨਿਸੀਦਨਂ ਆਦਾਯਾਤਿ ਨਿਸੀਦਨਂ ਨਾਮ ਸਦਸਂ ਵੁਚ੍ਚਤਿ ਅਵਾਯਿਮਂ. ਥੇਰੋ ਪਨ ਚਮ੍ਮਖਣ੍ਡਂ ਗਹੇਤ੍ਵਾ ਅਗਮਾਸਿ. ਪਿਟ੍ਠਿਤੋ ਪਿਟ੍ਠਿਤੋਤਿ ਪਚ੍ਛਤੋ ਪਚ੍ਛਤੋ. ਸੀਸਾਨੁਲੋਕੀਤਿ ਯੋ ਉਨ੍ਨਤਟ੍ਠਾਨੇ ਪਿਟ੍ਠਿਂ ਪਸ੍ਸਨ੍ਤੋ ਨਿਨ੍ਨਟ੍ਠਾਨੇ ਸੀਸਂ ਪਸ੍ਸਨ੍ਤੋ ਗਚ੍ਛਤਿ, ਅਯਮ੍ਪਿ ਸੀਸਾਨੁਲੋਕੀਤਿ ਵੁਚ੍ਚਤਿ. ਤਾਦਿਸੋ ਹੁਤ੍ਵਾ ਅਨੁਬਨ੍ਧਿ. ਥੇਰੋ ਹਿ ਕਿਞ੍ਚਾਪਿ ਸਂਯਤਪਦਸਦ੍ਦਤਾਯ ਅਚ੍ਚਾਸਨ੍ਨੋ ਹੁਤ੍ਵਾ ਗਚ੍ਛਨ੍ਤੋਪਿ ਪਦਸਦ੍ਦੇਨ ਨ ਬਾਧਤਿ, ‘‘ਨਾਯਂ ਸਮ੍ਮੋਦਨਕਾਲੋ’’ਤਿ ਞਤ੍ਵਾ ਪਨ ਨ ਅਚ੍ਚਾਸਨ੍ਨੋ, ਅਨ੍ਧਵਨਂ ਨਾਮ ਮਹਨ੍ਤਂ, ਏਕਸ੍ਮਿਂ ਠਾਨੇ ਨਿਲੀਨਂ ਅਪਸ੍ਸਨ੍ਤੇਨ, ਆਵੁਸੋ ਪੁਣ੍ਣ, ਪੁਣ੍ਣਾਤਿ ਅਫਾਸੁਕਸਦ੍ਦੋ ਕਾਤਬ੍ਬੋ ਹੋਤੀਤਿ ਨਿਸਿਨ੍ਨਟ੍ਠਾਨਜਾਨਨਤ੍ਥਂ ਨਾਤਿਦੂਰੇ ਹੁਤ੍ਵਾ ਸੀਸਾਨੁਲੋਕੀ ਅਗਮਾਸਿ. ਦਿਵਾਵਿਹਾਰਂ ਨਿਸੀਦੀਤਿ ਦਿਵਾਵਿਹਾਰਤ੍ਥਾਯ ਨਿਸੀਦਿ.
ਤਤ੍ਥ ਆਯਸ੍ਮਾਪਿ ਪੁਣ੍ਣੋ ਉਦਿਚ੍ਚਬ੍ਰਾਹ੍ਮਣਜਚ੍ਚੋ, ਸਾਰਿਪੁਤ੍ਤਤ੍ਥੇਰੋਪਿ. ਪੁਣ੍ਣਤ੍ਥੇਰੋਪਿ ਸੁਵਣ੍ਣਵਣ੍ਣੋ, ਸਾਰਿਪੁਤ੍ਤਤ੍ਥੇਰੋਪਿ. ਪੁਣ੍ਣਤ੍ਥੇਰੋਪਿ ਅਰਹਤ੍ਤਫਲਸਮਾਪਤ੍ਤਿਸਮਾਪਨ੍ਨੋ, ਸਾਰਿਪੁਤ੍ਤਤ੍ਥੇਰੋਪਿ. ਪੁਣ੍ਣਤ੍ਥੇਰੋਪਿ ਕਪ੍ਪਸਤਸਹਸ੍ਸਂ ਅਭਿਨੀਹਾਰਸਮ੍ਪਨ੍ਨੋ, ਸਾਰਿਪੁਤ੍ਤਤ੍ਥੇਰੋਪਿ ਕਪ੍ਪਸਤਸਹਸ੍ਸਾਧਿਕਂ ਏਕਮਸਙ੍ਖ੍ਯੇਯ੍ਯਂ. ਪੁਣ੍ਣਤ੍ਥੇਰੋਪਿ ਪਟਿਸਮ੍ਭਿਦਾਪਤ੍ਤੋ ਮਹਾਖੀਣਾਸਵੋ, ਸਾਰਿਪੁਤ੍ਤਤ੍ਥੇਰੋਪਿ. ਇਤਿ ਏਕਂ ਕਨਕਗੁਹਂ ਪਵਿਟ੍ਠਾ ਦ੍ਵੇ ਸੀਹਾ ਵਿਯ, ਏਕਂ ਵਿਜਮ੍ਭਨਭੂਮਿਂ ਓਤਿਣ੍ਣਾ ਦ੍ਵੇ ਬ੍ਯਗ੍ਘਾ ਵਿਯ, ਏਕਂ ਸੁਪੁਪ੍ਫਿਤਸਾਲਵਨਂ ਪਵਿਟ੍ਠਾ ਦ੍ਵੇ ਛਦ੍ਦਨ੍ਤਨਾਗਰਾਜਾਨੋ ਵਿਯ, ਏਕਂ ਸਿਮ੍ਬਲਿਵਨਂ ਪਵਿਟ੍ਠਾ ਦ੍ਵੇ ਸੁਪਣ੍ਣਰਾਜਾਨੋ ਵਿਯ, ਏਕਂ ਨਰਵਾਹਨਯਾਨਂ ਅਭਿਰੁਲ਼੍ਹਾ ਦ੍ਵੇ ਵੇਸ੍ਸਵਣਾ ਵਿਯ, ਏਕਂ ਪਣ੍ਡੁਕਮ੍ਬਲਸਿਲਂ ਅਭਿਨਿਸਿਨ੍ਨਾ ਦ੍ਵੇ ਸਕ੍ਕਾ ਵਿਯ, ਏਕਵਿਮਾਨਬ੍ਭਨ੍ਤਰਗਤਾ ਦ੍ਵੇ ਹਾਰਿਤਮਹਾਬ੍ਰਹ੍ਮਾਨੋ ਵਿਯ ਚ ਤੇ ਦ੍ਵੇਪਿ ਬ੍ਰਾਹ੍ਮਣਜਚ੍ਚਾ ਦ੍ਵੇਪਿ ਸੁਵਣ੍ਣਵਣ੍ਣਾ ਦ੍ਵੇਪਿ ਸਮਾਪਤ੍ਤਿਲਾਭਿਨੋ ਦ੍ਵੇਪਿ ਅਭਿਨੀਹਾਰਸਮ੍ਪਨ੍ਨਾ ਦ੍ਵੇਪਿ ਪਟਿਸਮ੍ਭਿਦਾਪਤ੍ਤਾ ਮਹਾਖੀਣਾਸਵਾ ਏਕਂ ਵਨਸਣ੍ਡਂ ਅਨੁਪਵਿਟ੍ਠਾ ਤਂ ਵਨਟ੍ਠਾਨਂ ਸੋਭਯਿਂਸੁ.
ਭਗਵਤਿ ਨੋ, ਆਵੁਸੋ, ਬ੍ਰਹ੍ਮਚਰਿਯਂ ਵੁਸ੍ਸਤੀਤਿ, ਆਵੁਸੋ, ਕਿਂ ਅਮ੍ਹਾਕਂ ਭਗਵਤੋ ਸਨ੍ਤਿਕੇ ਆਯਸ੍ਮਤਾ ਬ੍ਰਹ੍ਮਚਰਿਯਂ ਵੁਸ੍ਸਤੀਤਿ? ਇਦਂ ਆਯਸ੍ਮਾ ਸਾਰਿਪੁਤ੍ਤੋ ਤਸ੍ਸ ਭਗਵਤਿ ਬ੍ਰਹ੍ਮਚਰਿਯਵਾਸਂ ਜਾਨਨ੍ਤੋਪਿ ਕਥਾਸਮੁਟ੍ਠਾਪਨਤ੍ਥਂ ਪੁਚ੍ਛਿ. ਪੁਰਿਮਕਥਾਯ ਹਿ ਅਪ੍ਪਤਿਟ੍ਠਿਤਾਯ ਪਚ੍ਛਿਮਕਥਾ ਨ ਜਾਯਤਿ, ਤਸ੍ਮਾ ਏਵਂ ਪੁਚ੍ਛਿ. ਥੇਰੋ ਅਨੁਜਾਨਨ੍ਤੋ ‘‘ਏਵਮਾਵੁਸੋ’’ਤਿ ਆਹ. ਅਥਸ੍ਸ ਪਞ੍ਹਵਿਸ੍ਸਜ੍ਜਨਂ ਸੋਤੁਕਾਮੋ ਆਯਸ੍ਮਾ ਸਾਰਿਪੁਤ੍ਤੋ ‘‘ਕਿਂ ਨੁ ਖੋ ਆਵੁਸੋ ਸੀਲਵਿਸੁਦ੍ਧਤ੍ਥਂ ਭਗਵਤਿ ਬ੍ਰਹ੍ਮਚਰਿਯਂ ਵੁਸ੍ਸਤੀ’’ਤਿ ਪਟਿਪਾਟਿਯਾ ਸਤ੍ਤ ਵਿਸੁਦ੍ਧਿਯੋ ਪੁਚ੍ਛਿ. ਤਾਸਂ ਵਿਤ੍ਥਾਰਕਥਾ ਵਿਸੁਦ੍ਧਿਮਗ੍ਗੇ ਵੁਤ੍ਤਾ. ਆਯਸ੍ਮਾ ਪਨ ਪੁਣ੍ਣੋ ਯਸ੍ਮਾ ਚਤੁਪਾਰਿਸੁਦ੍ਧਿਸੀਲਾਦੀਸੁ ਠਿਤਸ੍ਸਾਪਿ ਬ੍ਰਹ੍ਮਚਰਿਯਵਾਸੋ ਮਤ੍ਥਕਂ ਨ ਪਾਪੁਣਾਤਿ, ਤਸ੍ਮਾ, ‘‘ਨੋ ਹਿਦਂ, ਆਵੁਸੋ’’ਤਿ ਸਬ੍ਬਂ ਪਟਿਕ੍ਖਿਪਿ.
ਕਿਮਤ੍ਥਂ ਚਰਹਾਵੁਸੋਤਿ ਯਦਿ ਸੀਲਵਿਸੁਦ੍ਧਿਆਦੀਨਂ ਅਤ੍ਥਾਯ ਬ੍ਰਹ੍ਮਚਰਿਯਂ ਨ ਵੁਸ੍ਸਤਿ, ਅਥ ਕਿਮਤ੍ਥਂ ਵੁਸ੍ਸਤੀਤਿ ਪੁਚ੍ਛਿ. ਅਨੁਪਾਦਾਪਰਿਨਿਬ੍ਬਾਨਤ੍ਥਂ ਖੋ, ਆਵੁਸੋਤਿ ਏਤ੍ਥ ਅਨੁਪਾਦਾਪਰਿਨਿਬ੍ਬਾਨਂ ਨਾਮ ਅਪ੍ਪਚ੍ਚਯਪਰਿਨਿਬ੍ਬਾਨਂ. ਦ੍ਵੇਧਾ ਉਪਾਦਾਨਾਨਿ ਗਹਣੂਪਾਦਾਨਞ੍ਚ ਪਚ੍ਚਯੂਪਾਦਾਨਞ੍ਚ. ਗਹਣੂਪਾਦਾਨਂ ਨਾਮ ਕਾਮੁਪਾਦਾਨਾਦਿਕਂ ਚਤੁਬ੍ਬਿਧਂ, ਪਚ੍ਚਯੂਪਾਦਾਨਂ ਨਾਮ ਅਵਿਜ੍ਜਾਪਚ੍ਚਯਾ ਸਙ੍ਖਾਰਾਤਿ ਏਵਂ ਵੁਤ੍ਤਪਚ੍ਚਯਾ. ਤਤ੍ਥ ਗਹਣੂਪਾਦਾਨਵਾਦਿਨੋ ਆਚਰਿਯਾ ਅਨੁਪਾਦਾਪਰਿਨਿਬ੍ਬਾਨਨ੍ਤਿ ਚਤੂਸੁ ਉਪਾਦਾਨੇਸੁ ਅਞ੍ਞਤਰੇਨਾਪਿ ਕਞ੍ਚਿ ਧਮ੍ਮਂ ਅਗ੍ਗਹੇਤ੍ਵਾ ਪਵਤ੍ਤਂ ਅਰਹਤ੍ਤਫਲਂ ਅਨੁਪਾਦਾਪਰਿਨਿਬ੍ਬਾਨਨ੍ਤਿ ਕਥੇਨ੍ਤਿ. ਤਞ੍ਹਿ ਨ ਚ ਉਪਾਦਾਨਸਮ੍ਪਯੁਤ੍ਤਂ ਹੁਤ੍ਵਾ ਕਞ੍ਚਿ ਧਮ੍ਮਂ ਉਪਾਦਿਯਤਿ, ਕਿਲੇਸਾਨਞ੍ਚ ਪਰਿਨਿਬ੍ਬੁਤਨ੍ਤੇ ਜਾਤਤ੍ਤਾ ਪਰਿਨਿਬ੍ਬਾਨਨ੍ਤਿ ਵੁਚ੍ਚਤਿ. ਪਚ੍ਚਯੂਪਾਦਾਨਵਾਦਿਨੋ ਪਨ ਅਨੁਪਾਦਾਪਰਿਨਿਬ੍ਬਾਨਨ੍ਤਿ ਅਪ੍ਪਚ੍ਚਯਪਰਿਨਿਬ੍ਬਾਨਂ. ਪਚ੍ਚਯਵਸੇਨ ਅਨੁਪ੍ਪਨ੍ਨਂ ਅਸਙ੍ਖਤਂ ਅਮਤਧਾਤੁਮੇਵ ਅਨੁਪਾਦਾਪਰਿਨਿਬ੍ਬਾਨਨ੍ਤਿ ਕਥੇਨ੍ਤਿ. ਅਯਂ ਅਨ੍ਤੋ, ਅਯਂ ਕੋਟਿ, ਅਯਂ ਨਿਟ੍ਠਾ. ਅਪ੍ਪਚ੍ਚਯਪਰਿਨਿਬ੍ਬਾਨਂ ਪਤ੍ਤਸ੍ਸ ਹਿ ਬ੍ਰਹ੍ਮਚਰਿਯਵਾਸੋ ਮਤ੍ਥਕਂ ਪਤ੍ਤੋ ਨਾਮ ਹੋਤਿ, ਤਸ੍ਮਾ ਥੇਰੋ ‘‘ਅਨੁਪਾਦਾਪਰਿਨਿਬ੍ਬਾਨਤ੍ਥ’’ਨ੍ਤਿ ਆਹ. ਅਥ ਨਂ ਅਨੁਯੁਞ੍ਜਨ੍ਤੋ ਆਯਸ੍ਮਾ ਸਾਰਿਪੁਤ੍ਤੋ ‘‘ਕਿਂ ਨੁ ਖੋ, ਆਵੁਸੋ, ਸੀਲਵਿਸੁਦ੍ਧਿ ਅਨੁਪਾਦਾਪਰਿਨਿਬ੍ਬਾਨ’’ਨ੍ਤਿ ਪੁਨ ਪੁਚ੍ਛਂ ਆਰਭਿ.
੨੫੮. ਥੇਰੋਪਿ ਸਬ੍ਬਪਰਿਵਤ੍ਤੇਸੁ ਤਥੇਵ ਪਟਿਕ੍ਖਿਪਿਤ੍ਵਾ ਪਰਿਯੋਸਾਨੇ ਦੋਸਂ ਦਸ੍ਸੇਨ੍ਤੋ ਸੀਲਵਿਸੁਦ੍ਧਿਂ ਚੇ, ਆਵੁਸੋਤਿਆਦਿਮਾਹ. ਤਤ੍ਥ ਪਞ੍ਞਪੇਯ੍ਯਾਤਿ ਯਦਿ ਪਞ੍ਞਪੇਯ੍ਯ. ਸਉਪਾਦਾਨਂਯੇਵ ਸਮਾਨਂ ਅਨੁਪਾਦਾਪਰਿਨਿਬ੍ਬਾਨਂ ਪਞ੍ਞਪੇਯ੍ਯਾਤਿ ਸਙ੍ਗਹਣਧਮ੍ਮਮੇਵ ਨਿਗ੍ਗਹਣਧਮ੍ਮਂ ਸਪ੍ਪਚ੍ਚਯਧਮ੍ਮਮੇਵ ਅਪ੍ਪਚ੍ਚਯਧਮ੍ਮਂ ਸਙ੍ਖਤਧਮ੍ਮਮੇਵ ਅਸਙ੍ਖਤਧਮ੍ਮਨ੍ਤਿ ਪਞ੍ਞਪੇਯ੍ਯਾਤਿ ਅਤ੍ਥੋ. ਞਾਣਦਸ੍ਸਨਵਿਸੁਦ੍ਧਿਯਂ ਪਨ ਸਪ੍ਪਚ੍ਚਯਧਮ੍ਮਮੇਵ ਅਪ੍ਪਚ੍ਚਯਧਮ੍ਮਂ ਸਙ੍ਖਤਧਮ੍ਮਮੇਵ ਅਸਙ੍ਖਤਧਮ੍ਮਨ੍ਤਿ ਪਞ੍ਞਪੇਯ੍ਯਾਤਿ ਅਯਮੇਵ ਅਤ੍ਥੋ ਗਹੇਤਬ੍ਬੋ. ਪੁਥੁਜ੍ਜਨੋ ਹਿ, ਆਵੁਸੋਤਿ ਏਤ੍ਥ ਵਟ੍ਟਾਨੁਗਤੋ ਲੋਕਿਯਬਾਲਪੁਥੁਜ੍ਜਨੋ ਦਟ੍ਠਬ੍ਬੋ. ਸੋ ਹਿ ਚਤੁਪਾਰਿਸੁਦ੍ਧਿਸੀਲਮਤ੍ਤਸ੍ਸਾਪਿ ਅਭਾਵਤੋ ਸਬ੍ਬਸੋ ਅਞ੍ਞਤ੍ਰ ਇਮੇਹਿ ਧਮ੍ਮੇਹਿ. ਤੇਨ ਹੀਤਿ ਯੇਨ ਕਾਰਣੇਨ ਏਕਚ੍ਚੇ ਪਣ੍ਡਿਤਾ ਉਪਮਾਯ ਅਤ੍ਥਂ ਜਾਨਨ੍ਤਿ, ਤੇਨ ਕਾਰਣੇਨ ਉਪਮਂ ਤੇ ਕਰਿਸ੍ਸਾਮੀਤਿ ਅਤ੍ਥੋ.
ਸਤ੍ਤਰਥਵਿਨੀਤਵਣ੍ਣਨਾ
੨੫੯. ਸਤ੍ਤ ਰਥਵਿਨੀਤਾਨੀਤਿ ਵਿਨੀਤਅਸ੍ਸਾਜਾਨਿਯਯੁਤ੍ਤੇ ਸਤ੍ਤ ਰਥੇ. ਯਾਵਦੇਵ, ਚਿਤ੍ਤਵਿਸੁਦ੍ਧਤ੍ਥਾਤਿ, ਆਵੁਸੋ, ਅਯਂ ਸੀਲਵਿਸੁਦ੍ਧਿ ਨਾਮ, ਯਾਵਦੇਵ, ਚਿਤ੍ਤਵਿਸੁਦ੍ਧਤ੍ਥਾ. ਚਿਤ੍ਤਵਿਸੁਦ੍ਧਤ੍ਥਾਤਿ ਨਿਸ੍ਸਕ੍ਕਵਚਨਮੇਤਂ. ਅਯਂ ਪਨੇਤ੍ਥ ਅਤ੍ਥੋ, ਯਾਵਦੇਵ, ਚਿਤ੍ਤਵਿਸੁਦ੍ਧਿਸਙ੍ਖਾਤਾ ਅਤ੍ਥਾ, ਤਾਵ ਅਯਂ ਸੀਲਵਿਸੁਦ੍ਧਿ ਨਾਮ ਇਚ੍ਛਿਤਬ੍ਬਾ. ਯਾ ਪਨ ਅਯਂ ਚਿਤ੍ਤਵਿਸੁਦ੍ਧਿ, ਏਸਾ ਸੀਲਵਿਸੁਦ੍ਧਿਯਾ ਅਤ੍ਥੋ, ਅਯਂ ਕੋਟਿ, ਇਦਂ ਪਰਿਯੋਸਾਨਂ, ਚਿਤ੍ਤਵਿਸੁਦ੍ਧਿਯਂ ਠਿਤਸ੍ਸ ਹਿ ਸੀਲਵਿਸੁਦ੍ਧਿਕਿਚ੍ਚਂ ਕਤਂ ਨਾਮ ਹੋਤੀਤਿ. ਏਸ ਨਯੋ ਸਬ੍ਬਪਦੇਸੁ.
ਇਦਂ ਪਨੇਤ੍ਥ ਓਪਮ੍ਮਸਂਸਨ੍ਦਨਂ – ਰਾਜਾ ਪਸੇਨਦਿ ਕੋਸਲੋ ਵਿਯ ਹਿ ਜਰਾਮਰਣਭੀਰੁਕੋ ਯੋਗਾਵਚਰੋ ਦਟ੍ਠਬ੍ਬੋ. ਸਾਵਤ੍ਥਿਨਗਰਂ ਵਿਯ ਸਕ੍ਕਾਯਨਗਰਂ, ਸਾਕੇਤਨਗਰਂ ਵਿਯ ਨਿਬ੍ਬਾਨਨਗਰਂ, ਰਞ੍ਞੋ ਸਾਕੇਤੇ ਵਡ੍ਢਿਆਵਹਸ੍ਸ ਸੀਘਂ ਗਨ੍ਤ੍ਵਾ ਪਾਪੁਣਿਤਬ੍ਬਸ੍ਸ ਅਚ੍ਚਾਯਿਕਸ੍ਸ ਕਿਚ੍ਚਸ੍ਸ ਉਪ੍ਪਾਦਕਾਲੋ ਵਿਯ ਯੋਗਿਨੋ ਅਨਭਿਸਮੇਤਾਨਂ ਚਤੁਨ੍ਨਂ ਅਰਿਯਸਚ੍ਚਾਨਂ ਅਭਿਸਮਯਕਿਚ੍ਚਸ੍ਸ ਉਪ੍ਪਾਦਕਾਲੋ. ਸਤ੍ਤ ਰਥਵਿਨੀਤਾਨਿ ਵਿਯ ਸਤ੍ਤ ਵਿਸੁਦ੍ਧਿਯੋ, ਪਠਮਂ ਰਥਵਿਨੀਤਂ ਆਰੁਲ਼੍ਹਕਾਲੋ ਵਿਯ ਸੀਲਵਿਸੁਦ੍ਧਿਯਂ ਠਿਤਕਾਲੋ, ਪਠਮਰਥਵਿਨੀਤਾਦੀਹਿ ਦੁਤਿਯਾਦੀਨਿ ਆਰੁਲ਼੍ਹਕਾਲੋ ਵਿਯ ਸੀਲਵਿਸੁਦ੍ਧਿਆਦੀਹਿ ਚਿਤ੍ਤਵਿਸੁਦ੍ਧਿਆਦੀਸੁ ਠਿਤਕਾਲੋ. ਸਤ੍ਤਮੇਨ ਰਥਵਿਨੀਤੇਨ ਸਾਕੇਤੇ ਅਨ੍ਤੇਪੁਰਦ੍ਵਾਰੇ ਓਰੁਯ੍ਹ ਉਪਰਿਪਾਸਾਦੇ ਞਾਤਿਮਿਤ੍ਤਗਣਪਰਿਵੁਤਸ੍ਸ ਸੁਰਸਭੋਜਨਪਰਿਭੋਗਕਾਲੋ ਵਿਯ ਯੋਗਿਨੋ ਞਾਣਦਸ੍ਸਨਵਿਸੁਦ੍ਧਿਯਾ ਸਬ੍ਬਕਿਲੇਸੇ ਖੇਪੇਤ੍ਵਾ ਧਮ੍ਮਵਰਪਾਸਾਦਂ ਆਰੁਯ੍ਹ ਪਰੋਪਣ੍ਣਾਸਕੁਸਲਧਮ੍ਮਪਰਿਵਾਰਸ੍ਸ ਨਿਬ੍ਬਾਨਾਰਮ੍ਮਣਂ ਫਲਸਮਾਪਤ੍ਤਿਂ ਅਪ੍ਪੇਤ੍ਵਾ ਨਿਰੋਧਸਯਨੇ ਨਿਸਿਨ੍ਨਸ੍ਸ ਲੋਕੁਤ੍ਤਰਸੁਖਾਨੁਭਵਨਕਾਲੋ ਦਟ੍ਠਬ੍ਬੋ.
ਇਤਿ ਆਯਸ੍ਮਨ੍ਤਂ ਪੁਣ੍ਣਂ ਦਸਕਥਾਵਤ੍ਥੁਲਾਭਿਂ ਧਮ੍ਮਸੇਨਾਪਤਿਸਾਰਿਪੁਤ੍ਤਤ੍ਥੇਰੋ ਸਤ੍ਤ ਵਿਸੁਦ੍ਧਿਯੋ ਪੁਚ੍ਛਿ. ਆਯਸ੍ਮਾ ਪੁਣ੍ਣੋ ਦਸ ਕਥਾਵਤ੍ਥੂਨਿ ਵਿਸ੍ਸਜ੍ਜੇਸਿ. ਏਵਂ ਪੁਚ੍ਛਨ੍ਤੋ ਪਨ ਧਮ੍ਮਸੇਨਾਪਤਿ ਕਿਂ ਜਾਨਿਤ੍ਵਾ ਪੁਚ੍ਛਿ, ਉਦਾਹੁ ਅਜਾਨਿਤ੍ਵਾ? ਤਿਤ੍ਥਕੁਸਲੋ ਵਾ ਪਨ ਹੁਤ੍ਵਾ ਵਿਸਯਸ੍ਮਿਂ ਪੁਚ੍ਛਿ, ਉਦਾਹੁ ਅਤਿਤ੍ਥਕੁਸਲੋ ਹੁਤ੍ਵਾ ਅਵਿਸਯਸ੍ਮਿਂ? ਪੁਣ੍ਣਤ੍ਥੇਰੋਪਿ ਚ ਕਿਂ ਜਾਨਿਤ੍ਵਾ ਵਿਸ੍ਸਜ੍ਜੇਸਿ, ਉਦਾਹੁ ਅਜਾਨਿਤ੍ਵਾ? ਤਿਤ੍ਥਕੁਸਲੋ ਵਾ ਪਨ ਹੁਤ੍ਵਾ ਵਿਸਯਸ੍ਮਿਂ ਵਿਸ੍ਸਜ੍ਜੇਸਿ, ਉਦਾਹੁ ਅਤਿਤ੍ਥਕੁਸਲੋ ਹੁਤ੍ਵਾ ਅਵਿਸਯੇਤਿ? ਜਾਨਿਤ੍ਵਾ ਤਿਤ੍ਥਕੁਸਲੋ ਹੁਤ੍ਵਾ ਵਿਸਯੇ ਪੁਚ੍ਛੀਤਿ ਹਿ ਵਦਮਾਨੋ ਧਮ੍ਮਸੇਨਾਪਤਿਂਯੇਵ ਵਦੇਯ੍ਯ. ਜਾਨਿਤ੍ਵਾ ਤਿਤ੍ਥਕੁਸਲੋ ਹੁਤ੍ਵਾ ਵਿਸਯੇ ਵਿਸ੍ਸਜ੍ਜੇਸੀਤਿ ਵਦਮਾਨੋ ਪੁਣ੍ਣਤ੍ਥੇਰਂਯੇਵ ਵਦੇਯ੍ਯ. ਯਞ੍ਹਿ ਵਿਸੁਦ੍ਧੀਸੁ ਸਂਖਿਤ੍ਤਂ, ਤਂ ਕਥਾਵਤ੍ਥੂਸੁ ਵਿਤ੍ਥਿਣ੍ਣਂ. ਯਂ ਕਥਾਵਤ੍ਥੂਸੁ ਸਂਖਿਤ੍ਤਂ, ਤਂ ਵਿਸੁਦ੍ਧੀਸੁ ਵਿਤ੍ਥਿਣ੍ਣਂ. ਤਦਮਿਨਾ ਨਯੇਨ ਵੇਦਿਤਬ੍ਬਂ.
ਵਿਸੁਦ੍ਧੀਸੁ ਹਿ ਏਕਾ ਸੀਲਵਿਸੁਦ੍ਧਿ ਚਤ੍ਤਾਰਿ ਕਥਾਵਤ੍ਥੂਨਿ ਹੁਤ੍ਵਾ ਆਗਤਾ ਅਪ੍ਪਿਚ੍ਛਕਥਾ ਸਨ੍ਤੁਟ੍ਠਿਕਥਾ ਅਸਂਸਗ੍ਗਕਥਾ, ਸੀਲਕਥਾਤਿ. ਏਕਾ ਚਿਤ੍ਤਵਿਸੁਦ੍ਧਿ ਤੀਣਿ ਕਥਾਵਤ੍ਥੂਨਿ ਹੁਤ੍ਵਾ ਆਗਤਾ – ਪਵਿਵੇਕਕਥਾ, ਵੀਰਿਯਾਰਮ੍ਭਕਥਾ, ਸਮਾਧਿਕਥਾਤਿ, ਏਵਂ ਤਾਵ ਯਂ ਵਿਸੁਦ੍ਧੀਸੁ ਸਂਖਿਤ੍ਤਂ, ਤਂ ਕਥਾਵਤ੍ਥੂਸੁ ਵਿਤ੍ਥਿਣ੍ਣਂ. ਕਥਾਵਤ੍ਥੂਸੁ ਪਨ ਏਕਾ ਪਞ੍ਞਾਕਥਾ ਪਞ੍ਚ ਵਿਸੁਦ੍ਧਿਯੋ ਹੁਤ੍ਵਾ ਆਗਤਾ – ਦਿਟ੍ਠਿਵਿਸੁਦ੍ਧਿ, ਕਙ੍ਖਾਵਿਤਰਣਵਿਸੁਦ੍ਧਿ, ਮਗ੍ਗਾਮਗ੍ਗਞਾਣਦਸ੍ਸਨਵਿਸੁਦ੍ਧਿ, ਪਟਿਪਦਾਞਾਣਦਸ੍ਸਨਵਿਸੁਦ੍ਧਿ, ਞਾਣਦਸ੍ਸਨਵਿਸੁਦ੍ਧੀਤਿ, ਏਵਂ ਯਂ ਕਥਾਵਤ੍ਥੂਸੁ ਸਂਖਿਤ੍ਤਂ, ਤਂ ਵਿਸੁਦ੍ਧੀਸੁ ਵਿਤ੍ਥਿਣ੍ਣਂ. ਤਸ੍ਮਾ ਸਾਰਿਪੁਤ੍ਤਤ੍ਥੇਰੋ ਸਤ੍ਤ ਵਿਸੁਦ੍ਧਿਯੋ ਪੁਚ੍ਛਨ੍ਤੋ ਨ ਅਞ੍ਞਂ ਪੁਚ੍ਛਿ, ਦਸ ਕਥਾਵਤ੍ਥੂਨਿਯੇਵ ਪੁਚ੍ਛਿ. ਪੁਣ੍ਣਤ੍ਥੇਰੋਪਿ ਸਤ੍ਤ ਵਿਸੁਦ੍ਧਿਯੋ ਵਿਸ੍ਸਜ੍ਜੇਨ੍ਤੋ ਨ ਅਞ੍ਞਂ ਵਿਸ੍ਸਜ੍ਜੇਸਿ, ਦਸ ਕਥਾਵਤ੍ਥੂਨਿਯੇਵ ਵਿਸ੍ਸਜ੍ਜੇਸੀਤਿ. ਇਤਿ ਉਭੋਪੇਤੇ ਜਾਨਿਤ੍ਵਾ ਤਿਤ੍ਥਕੁਸਲਾ ਹੁਤ੍ਵਾ ਵਿਸਯੇਵ ਪਞ੍ਹਂ ਪੁਚ੍ਛਿਂਸੁ ਚੇਵ ਵਿਸ੍ਸਜ੍ਜੇਸੁਂ ਚਾਤਿ ਵੇਦਿਤਬ੍ਬੋ.
੨੬੦. ਕੋ ਨਾਮੋ ਆਯਸ੍ਮਾਤਿ ਨ ਥੇਰੋ ਤਸ੍ਸ ਨਾਮਂ ਨ ਜਾਨਾਤਿ. ਜਾਨਨ੍ਤੋਯੇਵ ਪਨ ਸਮ੍ਮੋਦਿਤੁਂ ਲਭਿਸ੍ਸਾਮੀਤਿ ਪੁਚ੍ਛਿ. ਕਥਞ੍ਚ ਪਨਾਯਸ੍ਮਨ੍ਤਨ੍ਤਿ ਇਦਂ ਪਨ ਥੇਰੋ ਸਮ੍ਮੋਦਮਾਨੋ ਆਹ. ਮਨ੍ਤਾਣਿਪੁਤ੍ਤੋਤਿ ਮਨ੍ਤਾਣਿਯਾ ਬ੍ਰਾਹ੍ਮਣਿਯਾ ਪੁਤ੍ਤੋ. ਯਥਾ ਤਨ੍ਤਿ ਏਤ੍ਥ ਤਨ੍ਤਿ ਨਿਪਾਤਮਤ੍ਤਂ, ਯਥਾ ਸੁਤਵਤਾ ਸਾਵਕੇਨ ਬ੍ਯਾਕਾਤਬ੍ਬਾ, ਏਵਮੇਵ ਬ੍ਯਾਕਤਾਤਿ ਅਯਮੇਤ੍ਥ ਸਙ੍ਖੇਪਤ੍ਥੋ. ਅਨੁਮਸ੍ਸ ਅਨੁਮਸ੍ਸਾਤਿ ਦਸ ਕਥਾਵਤ੍ਥੂਨਿ ਓਗਾਹੇਤ੍ਵਾ ਅਨੁਪਵਿਸਿਤ੍ਵਾ. ਚੇਲਣ੍ਡੁਪਕੇਨਾਤਿ ਏਤ੍ਥ ਚੇਲਂ ਵੁਚ੍ਚਤਿ ਵਤ੍ਥਂ, ਅਣ੍ਡੁਪਕਂ ਚੁਮ੍ਬਟਕਂ. ਵਤ੍ਥਚੁਮ੍ਬਟਕਂ ਸੀਸੇ ਕਤ੍ਵਾ ਆਯਸ੍ਮਨ੍ਤਂ ਤਤ੍ਥ ਨਿਸੀਦਾਪੇਤ੍ਵਾ ਪਰਿਹਰਨ੍ਤਾਪਿ ਸਬ੍ਰਹ੍ਮਚਾਰੀ ਦਸ੍ਸਨਾਯ ਲਭੇਯ੍ਯੁਂ, ਏਵਂ ਲਦ੍ਧਦਸ੍ਸਨਮ੍ਪਿ ਤੇਸਂ ਲਾਭਾਯੇਵਾਤਿ ਅਟ੍ਠਾਨਪਰਿਕਪ੍ਪੇਨ ਅਭਿਣ੍ਹਦਸ੍ਸਨਸ੍ਸ ਉਪਾਯਂ ਦਸ੍ਸੇਸਿ. ਏਵਂ ਅਪਰਿਹਰਨ੍ਤੇਨ ਹਿ ਪਞ੍ਹਂ ਵਾ ਪੁਚ੍ਛਿਤੁਕਾਮੇਨ ਧਮ੍ਮਂ ਵਾ ਸੋਤੁਕਾਮੇਨ ‘‘ਥੇਰੋ ਕਤ੍ਥ ਠਿਤੋ ਕਤ੍ਥ ਨਿਸਿਨ੍ਨੋ’’ਤਿ ਪਰਿਯੇਸਨ੍ਤੇਨ ਚਰਿਤਬ੍ਬਂ ਹੋਤਿ. ਏਵਂ ਪਰਿਹਰਨ੍ਤਾ ਪਨ ਇਚ੍ਛਿਤਿਚ੍ਛਿਤਕ੍ਖਣੇਯੇਵ ਸੀਸਤੋ ਓਰੋਪੇਤ੍ਵਾ ਮਹਾਰਹੇ ਆਸਨੇ ਨਿਸੀਦਾਪੇਤ੍ਵਾ ਸਕ੍ਕਾ ਹੋਨ੍ਤਿ ਪਞ੍ਹਂ ਵਾ ਪੁਚ੍ਛਿਤੁਂ ਧਮ੍ਮਂ ਵਾ ਸੋਤੁਂ. ਇਤਿ ਅਟ੍ਠਾਨਪਰਿਕਪ੍ਪੇਨ ਅਭਿਣ੍ਹਦਸ੍ਸਨਸ੍ਸ ਉਪਾਯਂ ਦਸ੍ਸੇਸਿ.
ਸਾਰਿਪੁਤ੍ਤੋਤਿ ਚ ਪਨ ਮਨ੍ਤਿ ਸਾਰਿਯਾ ਬ੍ਰਾਹ੍ਮਣਿਯਾ ਪੁਤ੍ਤੋਤਿ ਚ ਪਨ ਏਵਂ ਮਂ ਸਬ੍ਰਹ੍ਮਚਾਰੀ ਜਾਨਨ੍ਤਿ. ਸਤ੍ਥੁਕਪ੍ਪੇਨਾਤਿ ਸਤ੍ਥੁਸਦਿਸੇਨ. ਇਤਿ ਏਕਪਦੇਨੇਵ ਆਯਸ੍ਮਾ ਪੁਣ੍ਣੋ ਸਾਰਿਪੁਤ੍ਤਤ੍ਥੇਰਂ ਚਨ੍ਦਮਣ੍ਡਲਂ ਆਹਚ੍ਚ ਠਪੇਨ੍ਤੋ ਵਿਯ ਉਕ੍ਖਿਪਿ. ਥੇਰਸ੍ਸ ਹਿ ਇਮਸ੍ਮਿਂ ਠਾਨੇ ਏਕਨ੍ਤਧਮ੍ਮਕਥਿਕਭਾਵੋ ਪਾਕਟੋ ਅਹੋਸਿ. ਅਮਚ੍ਚਞ੍ਹਿ ਪੁਰੋਹਿਤਂ ਮਹਨ੍ਤੋਤਿ ਵਦਮਾਨੋ ਰਾਜਸਦਿਸੋਤਿ ਵਦੇਯ੍ਯ, ਗੋਣਂ ਹਤ੍ਥਿਪ੍ਪਮਾਣੋਤਿ, ਵਾਪਿਂ ਸਮੁਦ੍ਦਪ੍ਪਮਾਣੋਤਿ, ਆਲੋਕਂ ਚਨ੍ਦਿਮਸੂਰਿਯਾਲੋਕਪ੍ਪਮਾਣੋਤਿ, ਇਤੋ ਪਰਂ ਏਤੇਸਂ ਮਹਨ੍ਤਭਾਵਕਥਾ ਨਾਮ ਨਤ੍ਥਿ. ਸਾਵਕਮ੍ਪਿ ਮਹਾਤਿ ਵਦਨ੍ਤੋ ਸਤ੍ਥੁਪਟਿਭਾਗੋਤਿ ਵਦੇਯ੍ਯ, ਇਤੋ ਪਰਂ ਤਸ੍ਸ ਮਹਨ੍ਤਭਾਵਕਥਾ ਨਾਮ ਨਤ੍ਥਿ. ਇਚ੍ਚਾਯਸ੍ਮਾ ਪੁਣ੍ਣੋ ਏਕਪਦੇਨੇਵ ਥੇਰਂ ਚਨ੍ਦਮਣ੍ਡਲਂ ਆਹਚ੍ਚ ਠਪੇਨ੍ਤੋ ਵਿਯ ਉਕ੍ਖਿਪਿ.
ਏਤ੍ਤਕਮ੍ਪਿ ਨੋ ਨਪ੍ਪਟਿਭਾਸੇਯ੍ਯਾਤਿ ਪਟਿਸਮ੍ਭਿਦਾਪਤ੍ਤਸ੍ਸ ਅਪ੍ਪਟਿਭਾਨਂ ਨਾਮ ਨਤ੍ਥਿ. ਯਾ ਪਨਾਯਂ ਉਪਮਾ ਆਹਟਾ, ਤਂ ਨ ਆਹਰੇਯ੍ਯਾਮ, ਅਤ੍ਥਮੇਵ ਕਥੇਯ੍ਯਾਮ. ਉਪਮਾ ਹਿ ਅਜਾਨਨ੍ਤਾਨਂ ਆਹਰੀਯਤੀਤਿ ਅਯਮੇਤ੍ਥ ਅਧਿਪ੍ਪਾਯੋ. ਅਟ੍ਠਕਥਾਯਂ ਪਨ ਇਦਮ੍ਪਿ ਪਟਿਕ੍ਖਿਪਿਤ੍ਵਾ ਉਪਮਾ ਨਾਮ ਬੁਦ੍ਧਾਨਮ੍ਪਿ ਸਨ੍ਤਿਕੇ ਆਹਰੀਯਤਿ, ਥੇਰਂ ਪਨੇਸ ਅਪਚਾਯਮਾਨੋ ਏਵਮਾਹਾਤਿ.
ਅਨੁਮਸ੍ਸ ਅਨੁਮਸ੍ਸ ਪੁਚ੍ਛਿਤਾਤਿ ਦਸ ਕਥਾਵਤ੍ਥੂਨਿ ਓਗਾਹੇਤ੍ਵਾ ਓਗਾਹੇਤ੍ਵਾ ਪੁਚ੍ਛਿਤਾ. ਕਿਂ ਪਨ ਪਞ੍ਹਸ੍ਸ ਪੁਚ੍ਛਨਂ ਭਾਰਿਯਂ, ਉਦਾਹੁ ਵਿਸ੍ਸਜ੍ਜਨਨ੍ਤਿ? ਉਗ੍ਗਹੇਤ੍ਵਾ ਪੁਚ੍ਛਨਂ ਨੋ ਭਾਰਿਯਂ, ਵਿਸ੍ਸਜ੍ਜਨਂ ਪਨ ਭਾਰਿਯਂ. ਸਹੇਤੁਕਂ ਵਾ ਸਕਾਰਣਂ ਕਤ੍ਵਾ ਪੁਚ੍ਛਨਮ੍ਪਿ ਵਿਸ੍ਸਜ੍ਜਨਮ੍ਪਿ ਭਾਰਿਯਮੇਵ. ਸਮਨੁਮੋਦਿਂਸੂਤਿ ਸਮਚਿਤ੍ਤਾ ਹੁਤ੍ਵਾ ਅਨੁਮੋਦਿਂਸੁ. ਇਤਿ ਯਥਾਨੁਸਨ੍ਧਿਨਾਵ ਦੇਸਨਾ ਨਿਟ੍ਠਿਤਾਤਿ.
ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ
ਰਥਵਿਨੀਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.