੫. ਨਿਵਾਪਸੁਤ੍ਤਵਣ੍ਣਨਾ

੨੬੧. ਏਵਂ ਮੇ ਸੁਤਨ੍ਤਿ ਨਿਵਾਪਸੁਤ੍ਤਂ. ਤਤ੍ਥ ਨੇਵਾਪਿਕੋਤਿ ਯੋ ਮਿਗਾਨਂ ਗਹਣਤ੍ਥਾਯ ਅਰਞ੍ਞੇ ਤਿਣਬੀਜਾਨਿ ਵਪਤਿ ‘‘ਇਦਂ ਤਿਣਂ ਖਾਦਿਤੁਂ ਆਗਤੇ ਮਿਗੇ ਸੁਖਂ ਗਣ੍ਹਿਸ੍ਸਾਮੀ’’ਤਿ. ਨਿਵਾਪਨ੍ਤਿ ਵਪ੍ਪਂ. ਨਿਵੁਤ੍ਤਨ੍ਤਿ ਵਪਿਤਂ. ਮਿਗਜਾਤਾਤਿ ਮਿਗਘਟਾ. ਅਨੁਪਖਜ੍ਜਾਤਿ ਅਨੁਪਵਿਸਿਤ੍ਵਾ. ਮੁਚ੍ਛਿਤਾਤਿ ਤਣ੍ਹਾਮੁਚ੍ਛਨਾਯ ਮੁਚ੍ਛਿਤਾ, ਤਣ੍ਹਾਯ ਹਦਯਂ ਪਵਿਸਿਤ੍ਵਾ ਮੁਚ੍ਛਨਾਕਾਰਂ ਪਾਪਿਤਾਤਿ ਅਤ੍ਥੋ. ਮਦਂ ਆਪਜ੍ਜਿਸ੍ਸਨ੍ਤੀਤਿ ਮਾਨਮਦਂ ਆਪਜ੍ਜਿਸ੍ਸਨ੍ਤਿ. ਪਮਾਦਨ੍ਤਿ ਵਿਸ੍ਸਟ੍ਠਸਤਿਭਾਵਂ. ਯਥਾਕਾਮਕਰਣੀਯਾ ਭਵਿਸ੍ਸਨ੍ਤੀਤਿ ਯਥਾ ਇਚ੍ਛਿਸ੍ਸਾਮ, ਤਥਾ ਕਾਤਬ੍ਬਾ ਭਵਿਸ੍ਸਨ੍ਤਿ. ਇਮਸ੍ਮਿਂ ਨਿਵਾਪੇਤਿ ਇਮਸ੍ਮਿਂ ਨਿਵਾਪਟ੍ਠਾਨੇ. ਏਕਂ ਕਿਰ ਨਿਵਾਪਤਿਣਂ ਨਾਮ ਅਤ੍ਥਿ ਨਿਦਾਘਭਦ੍ਦਕਂ, ਤਂ ਯਥਾ ਯਥਾ ਨਿਦਾਘੋ ਹੋਤਿ, ਤਥਾ ਤਥਾ ਨੀਵਾਰਵਨਂ ਵਿਯ ਮੇਘਮਾਲਾ ਵਿਯ ਚ ਏਕਗ੍ਘਨਂ ਹੋਤਿ, ਤਂ ਲੁਦ੍ਦਕਾ ਏਕਸ੍ਮਿਂ ਉਦਕਫਾਸੁਕਟ੍ਠਾਨੇ ਕਸਿਤ੍ਵਾ ਵਪਿਤ੍ਵਾ ਵਤਿਂ ਕਤ੍ਵਾ ਦ੍ਵਾਰਂ ਯੋਜੇਤ੍ਵਾ ਰਕ੍ਖਨ੍ਤਿ. ਅਥ ਯਦਾ ਮਹਾਨਿਦਾਘੇ ਸਬ੍ਬਤਿਣਾਨਿ ਸੁਕ੍ਖਾਨਿ ਹੋਨ੍ਤਿ, ਜਿਵ੍ਹਾਤੇਮਨਮਤ੍ਤਮ੍ਪਿ ਉਦਕਂ ਦੁਲ੍ਲਭਂ ਹੋਤਿ, ਤਦਾ ਮਿਗਜਾਤਾ ਸੁਕ੍ਖਤਿਣਾਨਿ ਚੇਵ ਪੁਰਾਣਪਣ੍ਣਾਨਿ ਚ ਖਾਦਨ੍ਤਾ ਕਮ੍ਪਮਾਨਾ ਵਿਯ ਵਿਚਰਨ੍ਤਾ ਨਿਵਾਪਤਿਣਸ੍ਸ ਗਨ੍ਧਂ ਘਾਯਿਤ੍ਵਾ ਵਧਬਨ੍ਧਨਾਦੀਨਿ ਅਗਣਯਿਤ੍ਵਾ ਵਤਿਂ ਅਜ੍ਝੋਤ੍ਥਰਨ੍ਤਾ ਪਵਿਸਨ੍ਤਿ. ਤੇਸਞ੍ਹਿ ਨਿਵਾਪਤਿਣਂ ਅਤਿਵਿਯ ਪਿਯਂ ਹੋਤਿ ਮਨਾਪਂ. ਨੇਵਾਪਿਕੋ ਤੇ ਦਿਸ੍ਵਾ ਦ੍ਵੇ ਤੀਣਿ ਦਿਵਸਾਨਿ ਪਮਤ੍ਤੋ ਵਿਯ ਹੋਤਿ, ਦ੍ਵਾਰਂ ਵਿਵਰਿਤ੍ਵਾ ਤਿਟ੍ਠਤਿ. ਅਨ੍ਤੋਨਿਵਾਪਟ੍ਠਾਨੇ ਤਹਿਂ ਤਹਿਂ ਉਦਕਆਵਾਟਕਾਪਿ ਹੋਨ੍ਤਿ, ਮਿਗਾ ਵਿਵਟਦ੍ਵਾਰੇਨ ਪਵਿਸਿਤ੍ਵਾ ਖਾਦਿਤਮਤ੍ਤਕਂ ਪਿਵਿਤਮਤ੍ਤਕਮੇਵ ਕਤ੍ਵਾ ਪਕ੍ਕਮਨ੍ਤਿ, ਪੁਨਦਿਵਸੇ ਕਿਞ੍ਚਿ ਨ ਕਰੋਨ੍ਤੀਤਿ ਕਣ੍ਣੇ ਚਾਲਯਮਾਨਾ ਖਾਦਿਤ੍ਵਾ ਪਿਵਿਤ੍ਵਾ ਅਤਰਮਾਨਾ ਗਚ੍ਛਨ੍ਤਿ, ਪੁਨਦਿਵਸੇ ਕੋਚਿ ਕਿਞ੍ਚਿ ਕਤ੍ਤਾ ਨਤ੍ਥੀਤਿ ਯਾਵਦਤ੍ਥਂ ਖਾਦਿਤ੍ਵਾ ਪਿਵਿਤ੍ਵਾ ਮਣ੍ਡਲਗੁਮ੍ਬਂ ਪਵਿਸਿਤ੍ਵਾ ਨਿਪਜ੍ਜਨ੍ਤਿ. ਲੁਦ੍ਦਕਾ ਤੇਸਂ ਪਮਤ੍ਤਭਾਵਂ ਜਾਨਿਤ੍ਵਾ ਦ੍ਵਾਰਂ ਪਿਧਾਯ ਸਮ੍ਪਰਿਵਾਰੇਤ੍ਵਾ ਕੋਟਿਤੋ ਪਟ੍ਠਾਯ ਕੋਟ੍ਟੇਤ੍ਵਾ ਗਚ੍ਛਨ੍ਤਿ, ਏਵਂ ਤੇ ਤਸ੍ਮਿਂ ਨਿਵਾਪੇ ਨੇਵਾਪਿਕਸ੍ਸ ਯਥਾਕਾਮਕਰਣੀਯਾ ਭਵਨ੍ਤਿ.

੨੬੨. ਤਤ੍ਰ, ਭਿਕ੍ਖਵੇਤਿ, ਭਿਕ੍ਖਵੇ, ਤੇਸੁ ਮਿਗਜਾਤੇਸੁ. ਪਠਮਾ ਮਿਗਜਾਤਾਤਿ, ਮਿਗਜਾਤਾ ਪਠਮਦੁਤਿਯਾ ਨਾਮ ਨਤ੍ਥਿ. ਭਗਵਾ ਪਨ ਆਗਤਪਟਿਪਾਟਿਵਸੇਨ ਕਪ੍ਪੇਤ੍ਵਾ ਪਠਮਾ, ਦੁਤਿਯਾ, ਤਤਿਯਾ, ਚਤੁਤ੍ਥਾਤਿ ਨਾਮਂ ਆਰੋਪੇਤ੍ਵਾ ਦਸ੍ਸੇਸਿ. ਇਦ੍ਧਾਨੁਭਾਵਾਤਿ ਯਥਾਕਾਮਂ ਕਤ੍ਤਬ੍ਬਭਾਵਤੋ; ਵਸੀਭਾਵੋਯੇਵ ਹਿ ਏਤ੍ਥ ਇਦ੍ਧੀਤਿ ਚ ਆਨੁਭਾਵੋਤਿ ਚ ਅਧਿਪ੍ਪੇਤੋ.

੨੬੩. ਭਯਭੋਗਾਤਿ ਭਯੇਨ ਭੋਗਤੋ. ਬਲਵੀਰਿਯਨ੍ਤਿ ਅਪਰਾਪਰਂ ਸਞ੍ਚਰਣਵਾਯੋਧਾਤੁ, ਸਾ ਪਰਿਹਾਯੀਤਿ ਅਤ੍ਥੋ.

੨੬੪. ਉਪਨਿਸ੍ਸਾਯ ਆਸਯਂ ਕਪ੍ਪੇਯ੍ਯਾਮਾਤਿ ਅਨ੍ਤੋ ਨਿਪਜ੍ਜਿਤ੍ਵਾ ਖਾਦਨ੍ਤਾਨਮ੍ਪਿ ਭਯਮੇਵ, ਬਾਹਿਰਤੋ ਆਗਨ੍ਤ੍ਵਾ ਖਾਦਨ੍ਤਾਨਮ੍ਪਿ ਭਯਮੇਵ, ਮਯਂ ਪਨ ਅਮੁਂ ਨਿਵਾਪਟ੍ਠਾਨਂ ਨਿਸ੍ਸਾਯ ਏਕਮਨ੍ਤੇ ਆਸਯਂ ਕਪ੍ਪੇਯ੍ਯਾਮਾਤਿ ਚਿਨ੍ਤਯਿਂਸੁ. ਉਪਨਿਸ੍ਸਾਯ ਆਸਯਂ ਕਪ੍ਪਯਿਂਸੂਤਿ ਲੁਦ੍ਦਕਾ ਨਾਮ ਨ ਸਬ੍ਬਕਾਲਂ ਅਪ੍ਪਮਤ੍ਤਾ ਹੋਨ੍ਤਿ. ਮਯਂ ਤਤ੍ਥ ਤਤ੍ਥ ਮਣ੍ਡਲਗੁਮ੍ਬੇਸੁ ਚੇਵ ਵਤਿਪਾਦੇਸੁ ਚ ਨਿਪਜ੍ਜਿਤ੍ਵਾ ਏਤੇਸੁ ਮੁਖਧੋਵਨਤ੍ਥਂ ਵਾ ਆਹਾਰਕਿਚ੍ਚਕਰਣਤ੍ਥਂ ਵਾ ਪਕ੍ਕਨ੍ਤੇਸੁ ਨਿਵਾਪਵਤ੍ਥੁਂ ਪਵਿਸਿਤ੍ਵਾ ਖਾਦਿਤਮਤ੍ਤਂ ਕਤ੍ਵਾ ਅਮ੍ਹਾਕਂ ਵਸਨਟ੍ਠਾਨਂ ਪਵਿਸਿਸ੍ਸਾਮਾਤਿ ਨਿਵਾਪਵਤ੍ਥੁਂ ਉਪਨਿਸ੍ਸਾਯ ਗਹਨੇਸੁ ਗੁਮ੍ਬਵਤਿਪਾਦਾਦੀਸੁ ਆਸਯਂ ਕਪ੍ਪਯਿਂਸੁ. ਭੁਞ੍ਜਿਂਸੂਤਿ ਵੁਤ੍ਤਨਯੇਨ ਲੁਦ੍ਦਕਾਨਂ ਪਮਾਦਕਾਲਂ ਞਤ੍ਵਾ ਸੀਘਂ ਸੀਘਂ ਪਵਿਸਿਤ੍ਵਾ ਭੁਞ੍ਜਿਂਸੁ. ਕੇਤਬਿਨੋਤਿ ਸਿਕ੍ਖਿਤਕੇਰਾਟਿਕਾ. ਇਦ੍ਧਿਮਨ੍ਤਾਤਿ ਇਦ੍ਧਿਮਨ੍ਤੋ ਵਿਯ. ਪਰਜਨਾਤਿ ਯਕ੍ਖਾ. ਇਮੇ ਨ ਮਿਗਜਾਤਾਤਿ. ਆਗਤਿਂ ਵਾ ਗਤਿਂ ਵਾਤਿ ਇਮਿਨਾ ਨਾਮ ਠਾਨੇਨ ਆਗਚ੍ਛਨ੍ਤਿ, ਅਮੁਤ੍ਰ ਗਚ੍ਛਨ੍ਤੀਤਿ ਇਦਂ ਨੇਸਂ ਨ ਜਾਨਾਮ. ਦਣ੍ਡਵਾਕਰਾਹੀਤਿ ਦਣ੍ਡਵਾਕਰਜਾਲੇਹਿ. ਸਮਨ੍ਤਾ ਸਪ੍ਪਦੇਸਂ ਅਨੁਪਰਿਵਾਰੇਸੁਨ੍ਤਿ ਅਤਿਮਾਯਾਵਿਨੋ ਏਤੇ, ਨ ਦੂਰਂ ਗਮਿਸ੍ਸਨ੍ਤਿ, ਸਨ੍ਤਿਕੇਯੇਵ ਨਿਪਨ੍ਨਾ ਭਵਿਸ੍ਸਨ੍ਤੀਤਿ ਨਿਵਾਪਕ੍ਖੇਤ੍ਤਸ੍ਸ ਸਮਨ੍ਤਾ ਸਪ੍ਪਦੇਸਂ ਮਹਨ੍ਤਂ ਓਕਾਸਂ ਅਨੁਪਰਿਵਾਰੇਸੁਂ. ਅਦ੍ਦਸਂਸੂਤਿ ਏਵਂ ਪਰਿਵਾਰੇਤ੍ਵਾ ਵਾਕਰਜਾਲਂ ਸਮਨ੍ਤਤੋ ਚਾਲੇਤ੍ਵਾ ਓਲੋਕੇਨ੍ਤਾ ਅਦ੍ਦਸਂਸੁ. ਯਤ੍ਥ ਤੇਤਿ ਯਸ੍ਮਿਂ ਠਾਨੇ ਤੇ ਗਾਹਂ ਅਗਮਂਸੁ, ਤਂ ਠਾਨਂ ਅਦ੍ਦਸਂਸੂਤਿ ਅਤ੍ਥੋ.

੨੬੫. ਯਂਨੂਨ ਮਯਂ ਯਤ੍ਥ ਅਗਤੀਤਿ ਤੇ ਕਿਰ ਏਵਂ ਚਿਨ੍ਤਯਿਂਸੁ – ‘‘ਅਨ੍ਤੋ ਨਿਪਜ੍ਜਿਤ੍ਵਾ ਅਨ੍ਤੋ ਖਾਦਨ੍ਤਾਨਮ੍ਪਿ ਭਯਮੇਵ, ਬਾਹਿਰਤੋ ਆਗਨ੍ਤ੍ਵਾ ਖਾਦਨ੍ਤਾਨਮ੍ਪਿ ਸਨ੍ਤਿਕੇ ਵਸਿਤ੍ਵਾ ਖਾਦਨ੍ਤਾਨਮ੍ਪਿ ਭਯਮੇਵ, ਤੇਪਿ ਹਿ ਵਾਕਰਜਾਲੇਨ ਪਰਿਕ੍ਖਿਪਿਤ੍ਵਾ ਗਹਿਤਾਯੇਵਾ’’ਤਿ, ਤੇਨ ਤੇਸਂ ਏਤਦਹੋਸਿ – ‘‘ਯਂਨੂਨ ਮਯਂ ਯਤ੍ਥ ਨੇਵਾਪਿਕਸ੍ਸ ਚ ਨੇਵਾਪਿਕਪਰਿਸਾਯ ਚ ਅਗਤਿ ਅਵਿਸਯੋ, ਤਤ੍ਥ ਤਤ੍ਥ ਸੇਯ੍ਯਂ ਕਪ੍ਪੇਯ੍ਯਾਮਾ’’ਤਿ. ਅਞ੍ਞੇ ਘਟ੍ਟੇਸ੍ਸਨ੍ਤੀਤਿ ਤਤੋ ਤਤੋ ਦੂਰਤਰਵਾਸਿਨੋ ਅਞ੍ਞੇ ਘਟ੍ਟੇਸ੍ਸਨ੍ਤਿ. ਤੇ ਘਟ੍ਟਿਤਾ ਅਞ੍ਞੇਤਿ ਤੇਪਿ ਘਟ੍ਟਿਤਾ ਅਞ੍ਞੇ ਤਤੋ ਦੂਰਤਰਵਾਸਿਨੋ ਘਟ੍ਟੇਸ੍ਸਨ੍ਤਿ. ਏਵਂ ਇਮਂ ਨਿਵਾਪਂ ਨਿਵੁਤ੍ਤਂ ਸਬ੍ਬਸੋ ਮਿਗਜਾਤਾ ਪਰਿਮੁਚ੍ਚਿਸ੍ਸਨ੍ਤੀਤਿ ਏਵਂ ਇਮਂ ਅਮ੍ਹੇਹਿ ਨਿਵੁਤ੍ਤਂ ਨਿਵਾਪਂ ਸਬ੍ਬੇ ਮਿਗਘਟਾ ਮਿਗਸਙ੍ਘਾ ਵਿਸ੍ਸਜ੍ਜੇਸ੍ਸਨ੍ਤਿ ਪਰਿਚ੍ਚਜਿਸ੍ਸਨ੍ਤਿ. ਅਜ੍ਝੁਪੇਕ੍ਖੇਯ੍ਯਾਮਾਤਿ ਤੇਸਂ ਗਹਣੇ ਅਬ੍ਯਾਵਟਾ ਭਵੇਯ੍ਯਾਮਾਤਿ; ਯਥਾ ਤਥਾ ਆਗਚ੍ਛਨ੍ਤੇਸੁ ਹਿ ਤਰੁਣਪੋਤਕੋ ਵਾ ਮਹਲ੍ਲਕੋ ਵਾ ਦੁਬ੍ਬਲੋ ਵਾ ਯੂਥਪਰਿਹੀਨੋ ਵਾ ਸਕ੍ਕਾ ਹੋਨ੍ਤਿ ਲਦ੍ਧੁਂ, ਅਨਾਗਚ੍ਛਨ੍ਤੇਸੁ ਕਿਞ੍ਚਿ ਨਤ੍ਥਿ. ਅਜ੍ਝੁਪੇਕ੍ਖਿਂਸੁ ਖੋ, ਭਿਕ੍ਖਵੇਤਿ ਏਵਂ ਚਿਨ੍ਤੇਤ੍ਵਾ ਅਬ੍ਯਾਵਟਾਵ ਅਹੇਸੁਂ.

੨੬੭. ਅਮੁਂ ਨਿਵਾਪਂ ਨਿਵੁਤ੍ਤਂ ਮਾਰਸ੍ਸ ਅਮੂਨਿ ਚ ਲੋਕਾਮਿਸਾਨੀਤਿ ਏਤ੍ਥ ਨਿਵਾਪੋਤਿ ਵਾ ਲੋਕਾਮਿਸਾਨੀਤਿ ਵਾ ਵਟ੍ਟਾਮਿਸਭੂਤਾਨਂ ਪਞ੍ਚਨ੍ਨਂ ਕਾਮਗੁਣਾਨਮੇਤਂ ਅਧਿਵਚਨਂ. ਮਾਰੋ ਨ ਚ ਬੀਜਾਨਿ ਵਿਯ ਕਾਮਗੁਣੇ ਵਪੇਨ੍ਤੋ ਆਹਿਣ੍ਡਤਿ, ਕਾਮਗੁਣਗਿਦ੍ਧਾਨਂ ਪਨ ਉਪਰਿ ਵਸਂ ਵਤ੍ਤੇਤਿ, ਤਸ੍ਮਾ ਕਾਮਗੁਣਾ ਮਾਰਸ੍ਸ ਨਿਵਾਪਾ ਨਾਮ ਹੋਨ੍ਤਿ. ਤੇਨ ਵੁਤ੍ਤਂ – ‘‘ਅਮੁਂ ਨਿਵਾਪਂ ਨਿਵੁਤ੍ਤਂ ਮਾਰਸ੍ਸਾ’’ਤਿ. ਨ ਪਰਿਮੁਚ੍ਚਿਂਸੁ ਮਾਰਸ੍ਸ ਇਦ੍ਧਾਨੁਭਾਵਾਤਿ ਮਾਰਸ੍ਸ ਵਸਂ ਗਤਾ ਅਹੇਸੁਂ, ਯਥਾਕਾਮਕਰਣੀਯਾ. ਅਯਂ ਸਪੁਤ੍ਤਭਰਿਯਪਬ੍ਬਜ੍ਜਾਯ ਆਗਤਉਪਮਾ.

੨੬੮. ਚੇਤੋਵਿਮੁਤ੍ਤਿ ਪਰਿਹਾਯੀਤਿ ਏਤ੍ਥ ਚੇਤੋਵਿਮੁਤ੍ਤਿ ਨਾਮ ਅਰਞ੍ਞੇ ਵਸਿਸ੍ਸਾਮਾਤਿ ਉਪ੍ਪਨ੍ਨਅਜ੍ਝਾਸਯੋ; ਸੋ ਪਰਿਹਾਯੀਤਿ ਅਤ੍ਥੋ. ਤਥੂਪਮੇ ਅਹਂ ਇਮੇ ਦੁਤਿਯੇਤਿ ਅਯਂ ਬ੍ਰਾਹ੍ਮਣਧਮ੍ਮਿਕਪਬ੍ਬਜ੍ਜਾਯ ਉਪਮਾ. ਬ੍ਰਾਹ੍ਮਣਾ ਹਿ ਅਟ੍ਠਚਤ੍ਤਾਲੀਸਵਸ੍ਸਾਨਿ ਕੋਮਾਰਬ੍ਰਹ੍ਮਚਰਿਯਂ ਚਰਿਤ੍ਵਾ ਵਟ੍ਟੁਪਚ੍ਛੇਦਭਯੇਨ ਪਵੇਣਿਂ ਘਟਯਿਸ੍ਸਾਮਾਤਿ ਧਨਂ ਪਰਿਯੇਸਿਤ੍ਵਾ ਭਰਿਯਂ ਗਹੇਤ੍ਵਾ ਅਗਾਰਮਜ੍ਝੇ ਵਸਨ੍ਤਾ ਏਕਸ੍ਮਿਂ ਪੁਤ੍ਤੇ ਜਾਤੇ ‘‘ਅਮ੍ਹਾਕਂ ਪੁਤ੍ਤੋ ਜਾਤੋ ਵਟ੍ਟਂ ਨ ਉਚ੍ਛਿਨ੍ਨਂ ਪਵੇਣਿ ਘਟਿਤਾ’’ਤਿ ਪੁਨ ਨਿਕ੍ਖਮਿਤ੍ਵਾ ਪਬ੍ਬਜਨ੍ਤਿ ਵਾ ਤਮੇਵ ਵਾ ਸ’ਕਲਤ੍ਤਵਾਸਂ ਵਸਨ੍ਤਿ.

੨੬੯. ਏਵਞ੍ਹਿ ਤੇ, ਭਿਕ੍ਖਵੇ, ਤਤਿਯਾਪਿ ਸਮਣਬ੍ਰਾਹ੍ਮਣਾ ਨ ਪਰਿਮੁਚ੍ਚਿਂਸੂਤਿ ਪੁਰਿਮਾ ਵਿਯ ਤੇਪਿ ਮਾਰਸ੍ਸ ਇਦ੍ਧਾਨੁਭਾਵਾ ਨ ਮੁਚ੍ਚਿਂਸੁ; ਯਥਾਕਾਮਕਰਣੀਯਾਵ ਅਹੇਸੁਂ. ਕਿਂ ਪਨ ਤੇ ਅਕਂਸੂਤਿ? ਗਾਮਨਿਗਮਰਾਜਧਾਨਿਯੋ ਓਸਰਿਤ੍ਵਾ ਤੇਸੁ ਤੇਸੁ ਆਰਾਮਉਯ੍ਯਾਨਟ੍ਠਾਨੇਸੁ ਅਸ੍ਸਮਂ ਮਾਪੇਤ੍ਵਾ ਨਿਵਸਨ੍ਤਾ ਕੁਲਦਾਰਕੇ ਹਤ੍ਥਿਅਸ੍ਸਰਥਸਿਪ੍ਪਾਦੀਨਿ ਨਾਨਪ੍ਪਕਾਰਾਨਿ ਸਿਪ੍ਪਾਨਿ ਸਿਕ੍ਖਾਪੇਸੁਂ. ਇਤਿ ਤੇ ਵਾਕਰਜਾਲੇਨ ਤਤਿਯਾ ਮਿਗਜਾਤਾ ਵਿਯ ਮਾਰਸ੍ਸ ਪਾਪਿਮਤੋ ਦਿਟ੍ਠਿਜਾਲੇਨ ਪਰਿਕ੍ਖਿਪਿਤ੍ਵਾ ਯਥਾਕਾਮਕਰਣੀਯਾ ਅਹੇਸੁਂ.

੨੭੦. ਤਥੂਪਮੇ ਅਹਂ ਇਮੇ ਚਤੁਤ੍ਥੇਤਿ ਅਯਂ ਇਮਸ੍ਸ ਸਾਸਨਸ੍ਸ ਉਪਮਾ ਆਹਟਾ.

੨੭੧. ਅਨ੍ਧਮਕਾਸਿ ਮਾਰਨ੍ਤਿ ਨ ਮਾਰਸ੍ਸ ਅਕ੍ਖੀਨਿ ਭਿਨ੍ਦਿ. ਵਿਪਸ੍ਸਨਾਪਾਦਕਜ੍ਝਾਨਂ ਸਮਾਪਨ੍ਨਸ੍ਸ ਪਨ ਭਿਕ੍ਖੁਨੋ ਇਮਂ ਨਾਮ ਆਰਮ੍ਮਣਂ ਨਿਸ੍ਸਾਯ ਚਿਤ੍ਤਂ ਵਤ੍ਤਤੀਤਿ ਮਾਰੋ ਪਸ੍ਸਿਤੁਂ ਨ ਸਕ੍ਕੋਤਿ. ਤੇਨ ਵੁਤ੍ਤਂ – ‘‘ਅਨ੍ਧਮਕਾਸਿ ਮਾਰ’’ਨ੍ਤਿ. ਅਪਦਂ ਵਧਿਤ੍ਵਾ ਮਾਰਚਕ੍ਖੁਨ੍ਤਿ ਤੇਨੇਵ ਪਰਿਯਾਯੇਨ ਯਥਾ ਮਾਰਸ੍ਸ ਚਕ੍ਖੁ ਅਪਦਂ ਹੋਤਿ ਨਿਪ੍ਪਦਂ, ਅਪ੍ਪਤਿਟ੍ਠਂ, ਨਿਰਾਰਮ੍ਮਣਂ, ਏਵਂ ਵਧਿਤ੍ਵਾਤਿ ਅਤ੍ਥੋ. ਅਦਸ੍ਸਨਂ ਗਤੋ ਪਾਪਿਮਤੋਤਿ ਤੇਨੇਵ ਪਰਿਯਾਯੇਨ ਮਾਰਸ੍ਸ ਪਾਪਿਮਤੋ ਅਦਸ੍ਸਨਂ ਗਤੋ. ਨ ਹਿ ਸੋ ਅਤ੍ਤਨੋ ਮਂਸਚਕ੍ਖੁਨਾ ਤਸ੍ਸ ਵਿਪਸ੍ਸਨਾਪਾਦਕਜ੍ਝਾਨਂ ਸਮਾਪਨ੍ਨਸ੍ਸ ਭਿਕ੍ਖੁਨੋ ਞਾਣਸਰੀਰਂ ਦਟ੍ਠੁਂ ਸਕ੍ਕੋਤਿ. ਪਞ੍ਞਾਯ ਚਸ੍ਸ ਦਿਸ੍ਵਾ ਆਸਵਾ ਪਰਿਕ੍ਖੀਣਾ ਹੋਨ੍ਤੀਤਿ ਮਗ੍ਗਪਞ੍ਞਾਯ ਚਤ੍ਤਾਰਿ ਅਰਿਯਸਚ੍ਚਾਨਿ ਦਿਸ੍ਵਾ ਚਤ੍ਤਾਰੋ ਆਸਵਾ ਪਰਿਕ੍ਖੀਣਾ ਹੋਨ੍ਤਿ. ਤਿਣ੍ਣੋ ਲੋਕੇ ਵਿਸਤ੍ਤਿਕਨ੍ਤਿ ਲੋਕੇ ਸਤ੍ਤਵਿਸਤ੍ਤਭਾਵੇਨ ਵਿਸਤ੍ਤਿਕਾਤਿ ਏਵਂ ਸਙ੍ਖਂ ਗਤਂ. ਅਥ ਵਾ ‘‘ਵਿਸਤ੍ਤਿਕਾਤਿ ਕੇਨਟ੍ਠੇਨ ਵਿਸਤ੍ਤਿਕਾ? ਵਿਸਤਾਤਿ ਵਿਸਤ੍ਤਿਕਾ ਵਿਸਟਾਤਿ ਵਿਸਤ੍ਤਿਕਾ, ਵਿਪੁਲਾਤਿ ਵਿਸਤ੍ਤਿਕਾ, ਵਿਸਾਲਾਤਿ ਵਿਸਤ੍ਤਿਕਾ, ਵਿਸਮਾਤਿ ਵਿਸਤ੍ਤਿਕਾ, ਵਿਸਕ੍ਕਤੀਤਿ ਵਿਸਤ੍ਤਿਕਾ, ਵਿਸਂ ਹਰਤੀਤਿ ਵਿਸਤ੍ਤਿਕਾ, ਵਿਸਂਵਾਦਿਕਾਤਿ ਵਿਸਤ੍ਤਿਕਾ, ਵਿਸਮੂਲਾਤਿ ਵਿਸਤ੍ਤਿਕਾ, ਵਿਸਫਲਾਤਿ ਵਿਸਤ੍ਤਿਕਾ, ਵਿਸਪਰਿਭੋਗਾਤਿ ਵਿਸਤ੍ਤਿਕਾ, ਵਿਸਾਲਾ ਵਾ ਪਨ ਸਾ ਤਣ੍ਹਾ ਰੂਪੇ ਸਦ੍ਦੇ ਗਨ੍ਧੇ ਰਸੇ ਫੋਟ੍ਠਬ੍ਬੇ’’ਤਿ (ਮਹਾਨਿ. ੩; ਚੂਲ਼ਨਿ. ਮੇਤ੍ਤਗੂਮਾਣਵਪੁਚ੍ਛਾਨਿਦ੍ਦੇਸ ੨੨, ਖਗ੍ਗਵਿਸਾਣਸੁਤ੍ਤਨਿਦ੍ਦੇਸ ੧੨੪) ਵਿਸਤ੍ਤਿਕਾ. ਏਵਂ ਵਿਸਤ੍ਤਿਕਾਤਿ ਸਙ੍ਖਂ ਗਤਂ ਤਣ੍ਹਂ ਤਿਣ੍ਣੋ ਨਿਤ੍ਤਿਣ੍ਣੋ ਉਤ੍ਤਿਣ੍ਣੋ. ਤੇਨ ਵੁਚ੍ਚਤਿ – ‘‘ਤਿਣ੍ਣੋ ਲੋਕੇ ਵਿਸਤ੍ਤਿਕ’’ਨ੍ਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਨਿਵਾਪਸੁਤ੍ਤਵਣ੍ਣਨਾ ਨਿਟ੍ਠਿਤਾ.