੨. ਅਲਗਦ੍ਦੂਪਮਸੁਤ੍ਤਵਣ੍ਣਨਾ

੨੩੪. ਏਵਂ ਮੇ ਸੁਤਨ੍ਤਿ ਅਲਗਦ੍ਦੂਪਮਸੁਤ੍ਤਂ. ਤਤ੍ਥ ਗਦ੍ਧੇ ਬਾਧਯਿਂਸੂਤਿ ਗਦ੍ਧਬਾਧਿਨੋ, ਗਦ੍ਧਬਾਧਿਨੋ ਪੁਬ੍ਬਪੁਰਿਸਾ ਅਸ੍ਸਾਤਿ ਗਦ੍ਧਬਾਧਿਪੁਬ੍ਬੋ, ਤਸ੍ਸ ਗਦ੍ਧਬਾਧਿਪੁਬ੍ਬਸ੍ਸ, ਗਿਜ੍ਝਘਾਤਕਕੁਲਪ੍ਪਸੁਤਸ੍ਸਾਤਿ ਅਤ੍ਥੋ. ਸਗ੍ਗਮੋਕ੍ਖਾਨਂ ਅਨ੍ਤਰਾਯਂ ਕਰੋਨ੍ਤੀਤਿ ਅਨ੍ਤਰਾਯਿਕਾ. ਤੇ ਕਮ੍ਮਕਿਲੇਸਵਿਪਾਕਉਪਵਾਦਆਣਾਵੀਤਿਕ੍ਕਮਵਸੇਨ ਪਞ੍ਚਵਿਧਾ. ਤਤ੍ਥ ਪਞ੍ਚਾਨਨ੍ਤਰਿਯਧਮ੍ਮਾ ਕਮ੍ਮਨ੍ਤਰਾਯਿਕਾ ਨਾਮ. ਤਥਾ ਭਿਕ੍ਖੁਨੀਦੂਸਕਕਮ੍ਮਂ, ਤਂ ਪਨ ਮੋਕ੍ਖਸ੍ਸੇਵ ਅਨ੍ਤਰਾਯਂ ਕਰੋਤਿ, ਨ ਸਗ੍ਗਸ੍ਸ. ਨਿਯਤਮਿਚ੍ਛਾਦਿਟ੍ਠਿਧਮ੍ਮਾ ਕਿਲੇਸਨ੍ਤਰਾਯਿਕਾ ਨਾਮ. ਪਣ੍ਡਕਤਿਰਚ੍ਛਾਨਗਤਉਭਤੋਬ੍ਯਞ੍ਜਨਕਾਨਂ ਪਟਿਸਨ੍ਧਿਧਮ੍ਮਾ ਵਿਪਾਕਨ੍ਤਰਾਯਿਕਾ ਨਾਮ. ਅਰਿਯੂਪਵਾਦਧਮ੍ਮਾ ਉਪਵਾਦਨ੍ਤਰਾਯਿਕਾ ਨਾਮ, ਤੇ ਪਨ ਯਾਵ ਅਰਿਯੇ ਨ ਖਮਾਪੇਨ੍ਤਿ, ਤਾਵਦੇਵ, ਨ ਤਤੋ ਪਰਂ. ਸਞ੍ਚਿਚ੍ਚ ਵੀਤਿਕ੍ਕਨ੍ਤਾ ਸਤ੍ਤ ਆਪਤ੍ਤਿਕ੍ਖਨ੍ਧਾ ਆਣਾਵੀਤਿਕ੍ਕਮਨ੍ਤਰਾਯਿਕਾ ਨਾਮ. ਤੇਪਿ ਯਾਵ ਭਿਕ੍ਖੁਭਾਵਂ ਵਾ ਪਟਿਜਾਨਾਤਿ, ਨ ਵੁਟ੍ਠਾਤਿ ਵਾ, ਨ ਦੇਸੇਤਿ ਵਾ, ਤਾਵਦੇਵ, ਨ ਤਤੋ ਪਰਂ.

ਤਤ੍ਰਾਯਂ ਭਿਕ੍ਖੁ ਬਹੁਸ੍ਸੁਤੋ ਧਮ੍ਮਕਥਿਕੋ ਸੇਸਨ੍ਤਰਾਯਿਕੇ ਜਾਨਾਤਿ, ਵਿਨਯੇ ਪਨ ਅਕੋਵਿਦਤ੍ਤਾ ਪਣ੍ਣਤ੍ਤਿਵੀਤਿਕ੍ਕਮਨ੍ਤਰਾਯਿਕੇ ਨ ਜਾਨਾਤਿ, ਤਸ੍ਮਾ ਰਹੋਗਤੋ ਏਵਂ ਚਿਨ੍ਤੇਸਿ – ਇਮੇ ਆਗਾਰਿਕਾ ਪਞ੍ਚ ਕਾਮਗੁਣੇ ਪਰਿਭੁਞ੍ਜਨ੍ਤਾ ਸੋਤਾਪਨ੍ਨਾਪਿ ਸਕਦਾਗਾਮਿਨੋਪਿ ਅਨਾਗਾਮਿਨੋਪਿ ਹੋਨ੍ਤਿ. ਭਿਕ੍ਖੂਪਿ ਮਨਾਪਿਕਾਨਿ ਚਕ੍ਖੁਵਿਞ੍ਞੇਯ੍ਯਾਨਿ ਰੂਪਾਨਿ ਪਸ੍ਸਨ੍ਤਿ…ਪੇ… ਕਾਯਵਿਞ੍ਞੇਯ੍ਯੇ ਫੋਟ੍ਠਬ੍ਬੇ ਫੁਸਨ੍ਤਿ, ਮੁਦੁਕਾਨਿ ਅਤ੍ਥਰਣਪਾਵੁਰਣਾਦੀਨਿ ਪਰਿਭੁਞ੍ਜਨ੍ਤਿ, ਏਤਂ ਸਬ੍ਬਂ ਵਟ੍ਟਤਿ. ਕਸ੍ਮਾ ਇਤ੍ਥੀਨਂਯੇਵ ਰੂਪਸਦ੍ਦਗਨ੍ਧਰਸਫੋਟ੍ਠਬ੍ਬਾ ਨ ਵਟ੍ਟਨ੍ਤਿ? ਏਤੇਪਿ ਵਟ੍ਟਨ੍ਤੀਤਿ. ਏਵਂ ਰਸੇਨ ਰਸਂ ਸਂਸਨ੍ਦੇਤ੍ਵਾ ਸਚ੍ਛਨ੍ਦਰਾਗਪਰਿਭੋਗਞ੍ਚ ਨਿਚ੍ਛਨ੍ਦਰਾਗਪਰਿਭੋਗਞ੍ਚ ਏਕਂ ਕਤ੍ਵਾ ਥੂਲਵਾਕੇਹਿ ਸਦ੍ਧਿਂ ਅਤਿਸੁਖੁਮਸੁਤ੍ਤਂ ਉਪਨੇਨ੍ਤੋ ਵਿਯ, ਸਾਸਪੇਨ ਸਦ੍ਧਿਂ ਸਿਨੇਰੁਂ ਉਪਸਂਹਰਨ੍ਤੋ ਵਿਯ, ਪਾਪਕਂ ਦਿਟ੍ਠਿਗਤਂ ਉਪ੍ਪਾਦੇਤ੍ਵਾ, ‘‘ਕਿਂ ਭਗਵਤਾ ਮਹਾਸਮੁਦ੍ਦਂ ਬਨ੍ਧਨ੍ਤੇਨ ਵਿਯ ਮਹਤਾ ਉਸ੍ਸਾਹੇਨ ਪਠਮਪਾਰਾਜਿਕਂ ਪਞ੍ਞਤ੍ਤਂ, ਨਤ੍ਥਿ ਏਤ੍ਥ ਦੋਸੋ’’ਤਿ ਸਬ੍ਬਞ੍ਞੁਤਞ੍ਞਾਣੇਨ ਸਦ੍ਧਿਂ ਪਟਿਵਿਰੁਜ੍ਝਨ੍ਤੋ ਵੇਸਾਰਜ੍ਜਞਾਣਂ ਪਟਿਬਾਹਨ੍ਤੋ ਅਰਿਯਮਗ੍ਗੇ ਖਾਣੁਕਣ੍ਟਕਾਦੀਨਿ ਪਕ੍ਖਿਪਨ੍ਤੋ ਮੇਥੁਨਧਮ੍ਮੇ ਦੋਸੋ ਨਤ੍ਥੀਤਿ ਜਿਨਸ੍ਸ ਆਣਾਚਕ੍ਕੇ ਪਹਾਰਂ ਅਦਾਸਿ. ਤੇਨਾਹ – ‘‘ਤਥਾਹਂ ਭਗਵਤਾ ਧਮ੍ਮਂ ਦੇਸਿਤਂ ਆਜਾਨਾਮੀ’’ਤਿਆਦਿ.

ਏਵਂ ਬ੍ਯਾ ਖੋਤਿ ਏਵਂ ਵਿਯ ਖੋ. ਸਮਨੁਯੁਞ੍ਜਨ੍ਤੀਤਿਆਦੀਸੁ ਕਿਂ ਲਦ੍ਧਿਕੋ ਤ੍ਵਂ, ਲਦ੍ਧਿਂ ਵਦੇਹੀਤਿ ਪੁਚ੍ਛਮਾਨਾ ਸਮਨੁਯੁਞ੍ਜਨ੍ਤਿ ਨਾਮ. ਦਿਟ੍ਠਿਂ ਪਤਿਟ੍ਠਾਪੇਨ੍ਤਾ ਸਮਨੁਗ੍ਗਾਹਨ੍ਤਿ ਨਾਮ. ਕੇਨ ਕਾਰਣੇਨ ਏਵਂ ਵਦਸੀਤਿ ਕਾਰਣਂ ਪੁਚ੍ਛਨ੍ਤਾ ਸਮਨੁਭਾਸਨ੍ਤਿ ਨਾਮ. ਅਟ੍ਠਿਕਙ੍ਕਲੂਪਮਾਤਿਆਦੀਸੁ (ਮ. ਨਿ. ੨.੪੨-੪੮) ਅਟ੍ਠਿਕਙ੍ਕਲੂਪਮਾ ਅਪ੍ਪਸ੍ਸਾਦਟ੍ਠੇਨ. ਮਂਸਪੇਸੂਪਮਾ ਬਹੁਸਾਧਾਰਣਟ੍ਠੇਨ. ਤਿਣੁਕ੍ਕੂਪਮਾ ਅਨੁਦਹਨਟ੍ਠੇਨ. ਅਙ੍ਗਾਰਕਾਸੂਪਮਾ ਮਹਾਭਿਤਾਪਨਟ੍ਠੇਨ. ਸੁਪਿਨਕੂਪਮਾ ਇਤ੍ਤਰਪਚ੍ਚੁਪਟ੍ਠਾਨਟ੍ਠੇਨ. ਯਾਚਿਤਕੂਪਮਾ ਤਾਵਕਾਲਿਕਟ੍ਠੇਨ. ਰੁਕ੍ਖਫਲੂਪਮਾ ਸਬ੍ਬਙ੍ਗਪਚ੍ਚਙ੍ਗਪਲਿਭਞ੍ਜਨਟ੍ਠੇਨ. ਅਸਿਸੂਨੂਪਮਾ ਅਧਿਕੁਟ੍ਟਨਟ੍ਠੇਨ. ਸਤ੍ਤਿਸੂਲੂਪਮਾ ਵਿਨਿਵਿਜ੍ਝਨਟ੍ਠੇਨ. ਸਪ੍ਪਸਿਰੂਪਮਾ ਸਾਸਙ੍ਕਸਪ੍ਪਟਿਭਯਟ੍ਠੇਨ. ਥਾਮਸਾਤਿ ਦਿਟ੍ਠਿਥਾਮੇਨ. ਪਰਾਮਾਸਾਤਿ ਦਿਟ੍ਠਿਪਰਾਮਾਸੇਨ. ਅਭਿਨਿਵਿਸ੍ਸ ਵੋਹਰਤੀਤਿ ਅਧਿਟ੍ਠਹਿਤ੍ਵਾ ਵੋਹਰਤਿ ਦੀਪੇਤਿ ਵਾ.

੨੩੫. ਯਤੋ ਖੋ ਤੇ ਭਿਕ੍ਖੂਤਿ ਯਦਾ ਤੇ ਭਿਕ੍ਖੂ. ਏਵਂ ਬ੍ਯਾ ਖੋ ਅਹਂ, ਭਨ੍ਤੇ, ਭਗਵਤਾਤਿ ਇਦਂ ਏਸ ਅਤ੍ਤਨੋ ਅਜ੍ਝਾਸਯੇਨ ਨਤ੍ਥੀਤਿ ਵਤ੍ਤੁਕਾਮੋਪਿ ਭਗਵਤੋ ਆਨੁਭਾਵੇਨ ਸਮ੍ਪਟਿਚ੍ਛਤਿ, ਬੁਦ੍ਧਾਨਂ ਕਿਰ ਸਮ੍ਮੁਖਾ ਦ੍ਵੇ ਕਥਾ ਕਥੇਤੁਂ ਸਮਤ੍ਥੋ ਨਾਮ ਨਤ੍ਥਿ.

੨੩੬. ਕਸ੍ਸ ਖੋ ਨਾਮ ਤ੍ਵਂ ਮੋਘਪੁਰਿਸਾਤਿ ਤ੍ਵਂ ਮੋਘਪੁਰਿਸ ਕਸ੍ਸ ਖਤ੍ਤਿਯਸ੍ਸ ਵਾ ਬ੍ਰਾਹ੍ਮਣਸ੍ਸ ਵਾ ਵੇਸ੍ਸਸ੍ਸ ਵਾ ਸੁਦ੍ਦਸ੍ਸ ਵਾ ਗਹਟ੍ਠਸ੍ਸ ਵਾ ਪਬ੍ਬਜਿਤਸ੍ਸ ਵਾ ਦੇਵਸ੍ਸ ਵਾ ਮਨੁਸ੍ਸਸ੍ਸ ਵਾ ਮਯਾ ਏਵਂ ਧਮ੍ਮਂ ਦੇਸਿਤਂ ਆਜਾਨਾਸਿ. ਅਥ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸੀਤਿ ਅਯਂ ਪਾਟਿਯੇਕ੍ਕੋ ਅਨੁਸਨ੍ਧਿ. ਅਰਿਟ੍ਠੋ ਕਿਰ ਚਿਨ੍ਤੇਸਿ – ‘‘ਭਗਵਾ ਮਂ ਮੋਘਪੁਰਿਸੋਤਿ ਵਦਤਿ, ਨ ਖੋ ਪਨ ਮੋਘਪੁਰਿਸਾਤਿ ਵੁਤ੍ਤਮਤ੍ਤਕੇਨ ਮਗ੍ਗਫਲਾਨਂ ਉਪਨਿਸ੍ਸਯੋ ਨ ਹੋਤਿ. ਉਪਸੇਨਮ੍ਪਿ ਹਿ ਵਙ੍ਗਨ੍ਤਪੁਤ੍ਤਂ, ‘ਅਤਿਲਹੁਂ ਖੋ ਤ੍ਵਂ, ਮੋਘਪੁਰਿਸ, ਬਾਹੁਲ੍ਲਾਯ ਆਵਤ੍ਤੋ’ਤਿ (ਮਹਾਵ. ੭੫) ਭਗਵਾ ਮੋਘਪੁਰਿਸਵਾਦੇਨ ਓਵਦਿ. ਥੇਰੋ ਅਪਰਭਾਗੇ ਘਟੇਨ੍ਤੋ ਵਾਯਮਨ੍ਤੋ ਛ ਅਭਿਞ੍ਞਾ ਸਚ੍ਛਾਕਾਸਿ. ਅਹਮ੍ਪਿ ਤਥਾਰੂਪਂ ਵੀਰਿਯਂ ਪਗ੍ਗਣ੍ਹਿਤ੍ਵਾ ਮਗ੍ਗਫਲਾਨਿ ਨਿਬ੍ਬਤ੍ਤੇਸ੍ਸਾਮੀ’’ਤਿ. ਅਥਸ੍ਸ ਭਗਵਾ ਬਨ੍ਧਨਾ ਪਵੁਤ੍ਤਸ੍ਸ ਪਣ੍ਡੁਪਲਾਸਸ੍ਸ ਵਿਯ ਅਵਿਰੁਲ਼੍ਹਿਭਾਵਂ ਦਸ੍ਸੇਨ੍ਤੋ ਇਮਂ ਦੇਸਨਂ ਆਰਭਿ.

ਉਸ੍ਮੀਕਤੋਪੀਤਿ, ਭਿਕ੍ਖਵੇ, ਤੁਮ੍ਹੇ ਕਿਨ੍ਤਿ ਮਞ੍ਞਥ, ਅਯਂ ਅਰਿਟ੍ਠੋ ਏਵਂਲਦ੍ਧਿਕੋ ਸਬ੍ਬਞ੍ਞੁਤਞ੍ਞਾਣੇਨ ਪਟਿਵਿਰੁਜ੍ਝਿਤ੍ਵਾ ਵੇਸਾਰਜ੍ਜਞਾਣਂ ਪਟਿਬਾਹਿਤ੍ਵਾ ਤਥਾਗਤਸ੍ਸ ਆਣਾਚਕ੍ਕੇ ਪਹਾਰਂ ਦਦਮਾਨੋ ਅਪਿ ਨੁ ਇਮਸ੍ਮਿਂ ਧਮ੍ਮਵਿਨਯੇ ਉਸ੍ਮੀਕਤੋਪਿ? ਯਥਾ ਨਿਬ੍ਬੁਤੇਪਿ ਮਹਨ੍ਤੇ ਅਗ੍ਗਿਕ੍ਖਨ੍ਧੇ ਖਜ੍ਜੁਪਨਕਮਤ੍ਤਾਪਿ ਅਗ੍ਗਿਪਪਟਿਕਾ ਹੋਤਿਯੇਵ, ਯਂ ਨਿਸ੍ਸਾਯ ਪੁਨ ਮਹਾਅਗ੍ਗਿਕ੍ਖਨ੍ਧੋ ਭਵੇਯ੍ਯ. ਕਿਂ ਨੁ ਖੋ ਏਵਂ ਇਮਸ੍ਸ ਅਪ੍ਪਮਤ੍ਤਿਕਾਪਿ ਞਾਣੁਸ੍ਮਾ ਅਤ੍ਥਿ, ਯਂ ਨਿਸ੍ਸਾਯ ਵਾਯਮਨ੍ਤੋ ਮਗ੍ਗਫਲਾਨਿ ਨਿਬ੍ਬਤ੍ਤੇਯ੍ਯਾਤਿ? ਨੋ ਹੇਤਂ, ਭਨ੍ਤੇਤਿ, ਭਨ੍ਤੇ, ਏਵਂਲਦ੍ਧਿਕਸ੍ਸ ਕੁਤੋ ਏਵਰੂਪਾ ਞਾਣੁਸ੍ਮਾਤਿ? ਮਗ੍ਗਫਲਾਨਂ ਪਚ੍ਚਯਸਮਤ੍ਥਾਯ ਞਾਣੁਸ੍ਮਾਯ ਉਸ੍ਮੀਕਤਭਾਵਂ ਪਟਿਕ੍ਖਿਪਨ੍ਤਾ ਵਦਨ੍ਤਿ. ਮਙ੍ਕੁਭੂਤੋਤਿ ਨਿਤ੍ਤੇਜਭੂਤੋ. ਪਤ੍ਤਕ੍ਖਨ੍ਧੋਤਿ ਪਤਿਤਕ੍ਖਨ੍ਧੋ. ਅਪ੍ਪਟਿਭਾਨੋਤਿ ਕਿਞ੍ਚਿ ਪਟਿਭਾਨਂ ਅਪਸ੍ਸਨ੍ਤੋ ਭਿਨ੍ਨਪਟਿਭਾਨੋ ਏਵਰੂਪਮ੍ਪਿ ਨਾਮ ਨਿਯ੍ਯਾਨਿਕਸਾਸਨਂ ਲਭਿਤ੍ਵਾ ਅਵਿਰੁਲ਼੍ਹਿਧਮ੍ਮੋ ਕਿਰਮ੍ਹਿ ਸਮੁਗ੍ਘਾਤਿਤਪਚ੍ਚਯੋ ਜਾਤੋਤਿ ਅਤ੍ਤਨੋ ਅਭਬ੍ਬਤਂ ਪਚ੍ਚਵੇਕ੍ਖਨ੍ਤੋ ਪਾਦਙ੍ਗੁਟ੍ਠਕੇਨ ਭੂਮਿਂ ਖਣਮਾਨੋ ਨਿਸੀਦਿ.

ਪਞ੍ਞਾਯਿਸ੍ਸਸਿ ਖੋਤਿ ਅਯਮ੍ਪਿ ਪਾਟਿਯੇਕ੍ਕੋ ਅਨੁਸਨ੍ਧਿ. ਅਰਿਟ੍ਠੋ ਕਿਰ ਚਿਨ੍ਤੇਸਿ – ‘‘ਭਗਵਾ ਮਯ੍ਹਂ ਮਗ੍ਗਫਲਾਨਂ ਉਪਨਿਸ੍ਸਯੋ ਪਚ੍ਛਿਨ੍ਨੋਤਿ ਵਦਤਿ, ਨ ਖੋ ਪਨ ਬੁਦ੍ਧਾ ਸਉਪਨਿਸ੍ਸਯਾਨਂਯੇਵ ਧਮ੍ਮਂ ਦੇਸੇਨ੍ਤਿ, ਅਨੁਪਨਿਸ੍ਸਯਾਨਮ੍ਪਿ ਦੇਸੇਨ੍ਤਿ, ਅਹਂ ਸਤ੍ਥੁ ਸਨ੍ਤਿਕਾ ਸੁਗਤੋਵਾਦਂ ਲਭਿਤ੍ਵਾ ਅਤ੍ਤਨੋ ਸਮ੍ਪਤ੍ਤੂਪਗਂ ਕੁਸਲਂ ਕਰਿਸ੍ਸਾਮੀ’’ਤਿ. ਅਥਸ੍ਸ ਭਗਵਾ ਓਵਾਦਂ ਪਟਿਪਸ੍ਸਮ੍ਭੇਨ੍ਤੋ ‘‘ਪਞ੍ਞਾਯਿਸ੍ਸਸੀ’’ਤਿਆਦਿਮਾਹ. ਤਸ੍ਸਤ੍ਥੋ, ਤ੍ਵਂਯੇਵ, ਮੋਘਪੁਰਿਸ, ਇਮਿਨਾ ਪਾਪਕੇਨ ਦਿਟ੍ਠਿਗਤੇਨ ਨਿਰਯਾਦੀਸੁ ਪਞ੍ਞਾਯਿਸ੍ਸਸਿ, ਮਮ ਸਨ੍ਤਿਕਾ ਤੁਯ੍ਹਂ ਸੁਗਤੋਵਾਦੋ ਨਾਮ ਨਤ੍ਥਿ, ਨ ਮੇ ਤਯਾ ਅਤ੍ਥੋ, ਇਧਾਹਂ ਭਿਕ੍ਖੂ ਪਟਿਪੁਚ੍ਛਿਸ੍ਸਾਮੀਤਿ.

੨੩੭. ਅਥ ਖੋ ਭਗਵਾਤਿ ਅਯਮ੍ਪਿ ਪਾਟਿਯੇਕ੍ਕੋ ਅਨੁਸਨ੍ਧਿ. ਇਮਸ੍ਮਿਞ੍ਹਿ ਠਾਨੇ ਭਗਵਾ ਪਰਿਸਂ ਸੋਧੇਤਿ, ਅਰਿਟ੍ਠਂ ਗਣਤੋ ਨਿਸ੍ਸਾਰੇਤਿ. ਸਚੇ ਹਿ ਪਰਿਸਗਤਾਨਂ ਕਸ੍ਸਚਿ ਏਵਂ ਭਵੇਯ੍ਯ – ‘‘ਅਯਂ ਅਰਿਟ੍ਠੋ ਭਗਵਤਾ ਅਕਥਿਤਂ ਕਥੇਤੁਂ ਕਿਂ ਸਕ੍ਖਿਸ੍ਸਤਿ, ਕਚ੍ਚਿ ਨੁ ਖੋ ਪਰਿਸਮਜ੍ਝੇ ਭਗਵਤਾ ਕਥਾਯ ਸਮਾਰਦ੍ਧਾਯ ਸਹਸਾ ਕਥਿਤ’’ਨ੍ਤਿ. ਏਵਂ ਕਥਿਤਂ ਪਨ ਨ ਅਰਿਟ੍ਠੋਵ ਸੁਣਾਤਿ, ਅਞ੍ਞੇਨਪਿ ਸੁਤਂ ਭਵਿਸ੍ਸਤਿ. ਅਥਾਪਿਸ੍ਸ ਸਿਯਾ ‘‘ਯਥਾ ਸਤ੍ਥਾ ਅਰਿਟ੍ਠਂ ਨਿਗ੍ਗਣ੍ਹਾਤਿ, ਮਮ੍ਪਿ ਏਵਂ ਨਿਗ੍ਗਣ੍ਹੇਯ੍ਯਾਤਿ ਸੁਤ੍ਵਾਪਿ ਤੁਣ੍ਹੀਭਾਵਂ ਆਪਜ੍ਜੇਯ੍ਯਾ’’ਤਿ. ‘‘ਤਂ ਸਬ੍ਬਂ ਨ ਕਰਿਸ੍ਸਨ੍ਤੀ’’ਤਿ. ਮਯਾਪਿ ਨ ਕਥਿਤਂ, ਅਞ੍ਞੇਨ ਸੁਤਮ੍ਪਿ ਨਤ੍ਥੀਤਿ ‘‘ਤੁਮ੍ਹੇਪਿਮੇ, ਭਿਕ੍ਖਵੇ’’ਤਿਆਦਿਨਾ ਪਰਿਸਾਯ ਲਦ੍ਧਿਂ ਸੋਧੇਤਿ. ਪਰਿਸਾਯ ਪਨ ਲਦ੍ਧਿਸੋਧਨੇਨੇਵ ਅਰਿਟ੍ਠੋ ਗਣਤੋ ਨਿਸ੍ਸਾਰਿਤੋ ਨਾਮ ਹੋਤਿ.

ਇਦਾਨਿ ਅਰਿਟ੍ਠਸ੍ਸ ਲਦ੍ਧਿਂ ਪਕਾਸੇਨ੍ਤੋ ਸੋ ਵਤ, ਭਿਕ੍ਖਵੇਤਿਆਦਿਮਾਹ. ਤਤ੍ਥ ਅਞ੍ਞਤ੍ਰੇਵ ਕਾਮੇਹੀਤਿਆਦੀਸੁ ਯੋ ਸੋ, ਭਿਕ੍ਖਵੇ, ਭਿਕ੍ਖੁ ‘‘ਤੇ ਪਟਿਸੇਵਤੋ ਨਾਲਂ ਅਨ੍ਤਰਾਯਾਯਾ’’ਤਿ ਏਵਂਲਦ੍ਧਿਕੋ, ਸੋ ਵਤ ਕਿਲੇਸਕਾਮੇਹਿ ਚੇਵ ਕਿਲੇਸਕਾਮਸਮ੍ਪਯੁਤ੍ਤੇਹਿ ਸਞ੍ਞਾਵਿਤਕ੍ਕੇਹਿ ਚ ਅਞ੍ਞਤ੍ਰ, ਏਤੇ ਧਮ੍ਮੇ ਪਹਾਯ, ਵਿਨਾ ਏਤੇਹਿ ਧਮ੍ਮੇਹਿ, ਵਤ੍ਥੁਕਾਮੇ ਪਟਿਸੇਵਿਸ੍ਸਤਿ, ਮੇਥੁਨਸਮਾਚਾਰਂ ਸਮਾਚਰਿਸ੍ਸਤੀਤਿ ਨੇਤਂ ਠਾਨਂ ਵਿਜ੍ਜਤਿ. ਇਦਂ ਕਾਰਣਂ ਨਾਮ ਨਤ੍ਥਿ, ਅਟ੍ਠਾਨਮੇਤਂ ਅਨਵਕਾਸੋਤਿ.

੨੩੮. ਏਵਂ ਭਗਵਾ ਅਯਂ ਅਰਿਟ੍ਠੋ ਯਥਾ ਨਾਮ ਰਜਕੋ ਸੁਗਨ੍ਧਾਨਿਪਿ ਦੁਗ੍ਗਨ੍ਧਾਨਿਪਿ ਜਿਣ੍ਣਾਨਿਪਿ ਨਵਾਨਿਪਿ ਸੁਦ੍ਧਾਨਿਪਿ ਅਸੁਦ੍ਧਾਨਿਪਿ ਵਤ੍ਥਾਨਿ ਏਕਤੋ ਭਣ੍ਡਿਕਂ ਕਰੋਤਿ, ਏਵਮੇਵ ਭਿਕ੍ਖੂਨਂ ਨਿਚ੍ਛਨ੍ਦਰਾਗਪਣੀਤਚੀਵਰਾਦਿਪਰਿਭੋਗਞ੍ਚ ਅਨਿਬਦ੍ਧਸੀਲਾਨਂ ਗਹਟ੍ਠਾਨਂ ਅਨ੍ਤਰਾਯਕਰਂ ਸਚ੍ਛਨ੍ਦਰਾਗਪਰਿਭੋਗਞ੍ਚ ਨਿਬਦ੍ਧਸੀਲਾਨਂ ਭਿਕ੍ਖੂਨਂ ਆਵਰਣਕਰਂ ਸਚ੍ਛਨ੍ਦਰਾਗਪਰਿਭੋਗਞ੍ਚ ਸਬ੍ਬਂ ਏਕਸਦਿਸਂ ਕਰੋਤੀਤਿ ਅਰਿਟ੍ਠਸ੍ਸ ਲਦ੍ਧਿਂ ਪਕਾਸੇਤ੍ਵਾ ਇਦਾਨਿ ਦੁਗ੍ਗਹਿਤਾਯ ਪਰਿਯਤ੍ਤਿਯਾ ਦੋਸਂ ਦਸ੍ਸੇਨ੍ਤੋ ਇਧ, ਭਿਕ੍ਖਵੇ, ਏਕਚ੍ਚੇਤਿਆਦਿਮਾਹ. ਤਤ੍ਥ ਪਰਿਯਾਪੁਣਨ੍ਤੀਤਿ ਉਗ੍ਗਣ੍ਹਨ੍ਤਿ. ਸੁਤ੍ਤਨ੍ਤਿਆਦੀਸੁ ਉਭਤੋਵਿਭਙ੍ਗਨਿਦ੍ਦੇਸਖਨ੍ਧਕਪਰਿਵਾਰਾ, ਸੁਤ੍ਤਨਿਪਾਤੇ ਮਙ੍ਗਲਸੁਤ੍ਤਰਤਨਸੁਤ੍ਤਨਾਲਕਸੁਆਤੁਵਟ੍ਟਕਸੁਤ੍ਤਾਨਿ, ਅਞ੍ਞਮ੍ਪਿ ਚ ਸੁਤ੍ਤਨਾਮਕਂ ਤਥਾਗਤਵਚਨਂ ਸੁਤ੍ਤਨ੍ਤਿ ਵੇਦਿਤਬ੍ਬਂ. ਸਬ੍ਬਮ੍ਪਿ ਸਗਾਥਕਂ ਸੁਤ੍ਤਂ ਗੇਯ੍ਯਨ੍ਤਿ ਵੇਦਿਤਬ੍ਬਂ, ਵਿਸੇਸੇਨ ਸਂਯੁਤ੍ਤਕੇ ਸਕਲੋਪਿ ਸਗਾਥਾਵਗ੍ਗੋ. ਸਕਲਂ ਅਭਿਧਮ੍ਮਪਿਟਕਂ, ਨਿਗ੍ਗਾਥਕਂ ਸੁਤ੍ਤਂ, ਯਞ੍ਚ ਅਞ੍ਞਮ੍ਪਿ ਅਟ੍ਠਹਿ ਅਙ੍ਗੇਹਿ ਅਸਙ੍ਗਹਿਤਂ ਬੁਦ੍ਧਵਚਨਂ, ਤਂ ਵੇਯ੍ਯਾਕਰਣਨ੍ਤਿ ਵੇਦਿਤਬ੍ਬਂ. ਧਮ੍ਮਪਦਂ, ਥੇਰਗਾਥਾ, ਥੇਰਿਗਾਥਾ, ਸੁਤ੍ਤਨਿਪਾਤੇ ਨੋਸੁਤ੍ਤਨਾਮਿਕਾ ਸੁਦ੍ਧਿਕਗਾਥਾ ਚ ਗਾਥਾਤਿ ਵੇਦਿਤਬ੍ਬਾ. ਸੋਮਨਸ੍ਸਞਾਣਮਯਿਕਗਾਥਾਪਟਿਸਂਯੁਤ੍ਤਾ ਦ੍ਵੇਅਸੀਤਿਸੁਤ੍ਤਨ੍ਤਾ ਉਦਾਨਨ੍ਤਿ ਵੇਦਿਤਬ੍ਬਾ. ‘‘ਵੁਤ੍ਤਞ੍ਹੇਤਂ ਭਗਵਤਾ’’ਤਿਆਦਿਨਯਪ੍ਪਵਤ੍ਤਾ (ਇਤਿਵੁ. ੧,੨) ਦਸੁਤ੍ਤਰਸਤਸੁਤ੍ਤਨ੍ਤਾ ਇਤਿਵੁਤ੍ਤਕਨ੍ਤਿ ਵੇਦਿਤਬ੍ਬਾ. ਅਪਣ੍ਣਕਜਾਤਕਾਦੀਨਿ ਪਣ੍ਣਾਸਾਧਿਕਾਨਿ ਪਞ੍ਚਜਾਤਕਸਤਾਨਿ ਜਾਤਕਨ੍ਤਿ ਵੇਦਿਤਬ੍ਬਾਨਿ. ‘‘ਚਤ੍ਤਾਰੋਮੇ, ਭਿਕ੍ਖਵੇ, ਅਚ੍ਛਰਿਯਾ ਅਬ੍ਭੁਤਾ ਧਮ੍ਮਾ ਆਨਨ੍ਦੇ’’ਤਿਆਦਿਨਯਪ੍ਪਵਤ੍ਤਾ (ਅ. ਨਿ. ੪.੧੨੯) ਸਬ੍ਬੇਪਿ ਅਚ੍ਛਰਿਯਅਬ੍ਭੁਤਧਮ੍ਮਪ੍ਪਟਿਸਂਯੁਤ੍ਤਾ ਸੁਤ੍ਤਨ੍ਤਾ ਅਬ੍ਭੁਤਧਮ੍ਮਨ੍ਤਿ ਵੇਦਿਤਬ੍ਬਾ. ਚੂਲ਼ਵੇਦਲ੍ਲਮਹਾਵੇਦਲ੍ਲਸਮ੍ਮਾਦਿਟ੍ਠਿਸਕ੍ਕਪਞ੍ਹਸਙ੍ਖਾਰਭਾਜਨਿਯਮਹਾਪੁਣ੍ਣਮਸੁਤ੍ਤਾਦਯੋ ਸਬ੍ਬੇਪਿ ਵੇਦਞ੍ਚ ਤੁਟ੍ਠਿਞ੍ਚ ਲਦ੍ਧਾ ਲਦ੍ਧਾ ਪੁਚ੍ਛਿਤਸੁਤ੍ਤਨ੍ਤਾ ਵੇਦਲ੍ਲਨ੍ਤਿ ਵੇਦਿਤਬ੍ਬਾ.

ਅਤ੍ਥਂ ਨ ਉਪਪਰਿਕ੍ਖਨ੍ਤੀਤਿ ਅਤ੍ਥਤ੍ਥਂ ਕਾਰਣਤ੍ਥਂ ਨ ਪਸ੍ਸਨ੍ਤਿ ਨ ਪਰਿਗ੍ਗਣ੍ਹਨ੍ਤਿ. ਅਨੁਪਪਰਿਕ੍ਖਤਨ੍ਤਿ ਅਨੁਪਪਰਿਕ੍ਖਨ੍ਤਾਨਂ. ਨ ਨਿਜ੍ਝਾਨਂ ਖਮਨ੍ਤੀਤਿ ਨ ਉਪਟ੍ਠਹਨ੍ਤਿ ਨ ਆਪਾਥਂ ਆਗਚ੍ਛਨ੍ਤਿ, ਇਮਸ੍ਮਿਂ ਠਾਨੇ ਸੀਲਂ ਸਮਾਧਿ ਵਿਪਸ੍ਸਨਾ ਮਗ੍ਗੋ ਫਲਂ ਵਟ੍ਟਂ ਵਿਵਟ੍ਟਂ ਕਥਿਤਨ੍ਤਿ ਏਵਂ ਜਾਨਿਤੁਂ ਨ ਸਕ੍ਕਾ ਹੋਨ੍ਤੀਤਿ ਅਤ੍ਥੋ. ਤੇ ਉਪਾਰਮ੍ਭਾਨਿਸਂਸਾ ਚੇਵਾਤਿ ਤੇ ਪਰੇਸਂ ਵਾਦੇ ਦੋਸਾਰੋਪਨਾਨਿਸਂਸਾ ਹੁਤ੍ਵਾ ਪਰਿਯਾਪੁਣਨ੍ਤੀਤਿ ਅਤ੍ਥੋ. ਇਤਿਵਾਦਪ੍ਪਮੋਕ੍ਖਾਨਿਸਂਸਾ ਚਾਤਿ ਏਵਂ ਵਾਦਪਮੋਕ੍ਖਾਨਿਸਂਸਾ, ਪਰੇਹਿ ਸਕਵਾਦੇ ਦੋਸੇ ਆਰੋਪਿਤੇ ਤਂ ਦੋਸਂ ਏਵਂ ਮੋਚੇਸ੍ਸਾਮਾਤਿ ਇਮਿਨਾਵ ਕਾਰਣੇਨ ਪਰਿਯਾਪੁਣਨ੍ਤੀਤਿ ਅਤ੍ਥੋ. ਤਞ੍ਚਸ੍ਸ ਅਤ੍ਥਂ ਨਾਨੁਭੋਨ੍ਤੀਤਿ ਯਸ੍ਸ ਚ ਮਗ੍ਗਸ੍ਸ ਵਾ ਫਲਸ੍ਸ ਵਾ ਅਤ੍ਥਾਯ ਕੁਲਪੁਤ੍ਤਾ ਧਮ੍ਮਂ ਪਰਿਯਾਪੁਣਨ੍ਤਿ, ਤਞ੍ਚਸ੍ਸ ਧਮ੍ਮਸ੍ਸ ਅਤ੍ਥਂ ਏਤੇ ਦੁਗ੍ਗਹਿਤਗ੍ਗਾਹਿਨੋ ਨਾਨੁਭੋਨ੍ਤਿ. ਅਪਿਚ ਪਰਸ੍ਸ ਵਾਦੇ ਉਪਾਰਮ੍ਭਂ ਆਰੋਪੇਤੁਂ ਅਤ੍ਤਨੋ ਵਾਦਂ ਮੋਚੇਤੁਂ ਅਸਕ੍ਕੋਨ੍ਤਾਪਿ ਤਞ੍ਚ ਅਤ੍ਥਂ ਨਾਨੁਭੋਨ੍ਤਿਯੇਵ.

੨੩੯. ਅਲਗਦ੍ਦਤ੍ਥਿਕੋਤਿ ਆਸਿਵਿਸਅਤ੍ਥਿਕੋ. ਗਦੋਤਿ ਹਿ ਵਿਸਸ੍ਸ ਨਾਮਂ, ਤਂ ਤਸ੍ਸ ਅਲਂ ਪਰਿਪੁਣ੍ਣਂ ਅਤ੍ਥੀਤਿ ਅਲਗਦ੍ਦੋ. ਭੋਗੇਤਿ ਸਰੀਰੇ. ਇਧ ਪਨ, ਭਿਕ੍ਖਵੇ, ਏਕਚ੍ਚੇ ਕੁਲਪੁਤ੍ਤਾ ਧਮ੍ਮਂ ਪਰਿਯਾਪੁਣਨ੍ਤੀਤਿ ਨਿਤ੍ਥਰਣਪਰਿਯਤ੍ਤਿਵਸੇਨ ਉਗ੍ਗਣ੍ਹਨ੍ਤਿ. ਤਿਸ੍ਸੋ ਹਿ ਪਰਿਯਤ੍ਤਿਯੋ ਅਲਗਦ੍ਦਪਰਿਯਤ੍ਤਿ ਨਿਤ੍ਥਰਣਪਰਿਯਤ੍ਤਿ ਭਣ੍ਡਾਗਾਰਿਕਪਰਿਯਤ੍ਤੀਤਿ.

ਤਤ੍ਥ ਯੋ ਬੁਦ੍ਧਵਚਨਂ ਉਗ੍ਗਹੇਤ੍ਵਾ ਏਵਂ ਚੀਵਰਾਦੀਨਿ ਵਾ ਲਭਿਸ੍ਸਾਮਿ, ਚਤੁਪਰਿਸਮਜ੍ਝੇ ਵਾ ਮਂ ਜਾਨਿਸ੍ਸਨ੍ਤੀਤਿ ਲਾਭਸਕ੍ਕਾਰਹੇਤੁ ਪਰਿਯਾਪੁਣਾਤਿ, ਤਸ੍ਸ ਸਾ ਪਰਿਯਤ੍ਤਿ ਅਲਗਦ੍ਦਪਰਿਯਤ੍ਤਿ ਨਾਮ. ਏਵਂ ਪਰਿਯਾਪੁਣਤੋ ਹਿ ਬੁਦ੍ਧਵਚਨਂ ਅਪਰਿਯਾਪੁਣਿਤ੍ਵਾ ਨਿਦ੍ਦੋਕ੍ਕਮਨਂ ਵਰਤਰਂ.

ਯੋ ਪਨ ਬੁਦ੍ਧਵਚਨਂ ਉਗ੍ਗਣ੍ਹਿਤ੍ਵਾ ਸੀਲਸ੍ਸ ਆਗਤਟ੍ਠਾਨੇ ਸੀਲਂ ਪੂਰੇਤ੍ਵਾ ਸਮਾਧਿਸ੍ਸ ਆਗਤਟ੍ਠਾਨੇ ਸਮਾਧਿਗਬ੍ਭਂ ਗਣ੍ਹਾਪੇਤ੍ਵਾ ਵਿਪਸ੍ਸਨਾਯ ਆਗਤਟ੍ਠਾਨੇ ਵਿਪਸ੍ਸਨਂ ਪਟ੍ਠਪੇਤ੍ਵਾ ਮਗ੍ਗਫਲਾਨਂ ਆਗਤਟ੍ਠਾਨੇ ਮਗ੍ਗਂ ਭਾਵੇਸ੍ਸਾਮਿ ਫਲਂ ਸਚ੍ਛਿਕਰਿਸ੍ਸਾਮੀਤਿ ਉਗ੍ਗਣ੍ਹਾਤਿ, ਤਸ੍ਸ ਸਾ ਪਰਿਯਤ੍ਤਿ ਨਿਤ੍ਥਰਣਪਰਿਯਤ੍ਤਿ ਨਾਮ ਹੋਤਿ.

ਖੀਣਾਸਵਸ੍ਸ ਪਨ ਪਰਿਯਤ੍ਤਿ ਭਣ੍ਡਾਗਾਰਿਕਪਰਿਯਤ੍ਤਿ ਨਾਮ. ਤਸ੍ਸ ਹਿ ਅਪਰਿਞ੍ਞਾਤਂ ਅਪ੍ਪਹੀਨਂ ਅਭਾਵਿਤਂ ਅਸਚ੍ਛਿਕਤਂ ਵਾ ਨਤ੍ਥਿ. ਸੋ ਹਿ ਪਰਿਞ੍ਞਾਤਕ੍ਖਨ੍ਧੋ ਪਹੀਨਕਿਲੇਸੋ ਭਾਵਿਤਮਗ੍ਗੋ ਸਚ੍ਛਿਕਤਫਲੋ, ਤਸ੍ਮਾ ਬੁਦ੍ਧਵਚਨਂ ਪਰਿਯਾਪੁਣਨ੍ਤੋ ਤਨ੍ਤਿਧਾਰਕੋ ਪਵੇਣਿਪਾਲਕੋ ਵਂਸਾਨੁਰਕ੍ਖਕੋਵ ਹੁਤ੍ਵਾ ਉਗ੍ਗਣ੍ਹਾਤਿ. ਇਤਿਸ੍ਸ ਸਾ ਪਰਿਯਤ੍ਤਿ ਭਣ੍ਡਾਗਾਰਿਕਪਰਿਯਤ੍ਤਿ ਨਾਮ ਹੋਤਿ.

ਯੋ ਪਨ ਪੁਥੁਜ੍ਜਨੋ ਛਾਤਭਯਾਦੀਸੁ ਗਨ੍ਥਧਰੇਸੁ ਏਕਸ੍ਮਿਂ ਠਾਨੇ ਵਸਿਤੁਂ ਅਸਕ੍ਕੋਨ੍ਤੇਸੁ ਸਯਂ ਭਿਕ੍ਖਾਚਾਰੇਨ ਅਕਿਲਮਮਾਨੋ ਅਤਿਮਧੁਰਂ ਬੁਦ੍ਧਵਚਨਂ ਮਾ ਨਸ੍ਸਤੁ, ਤਨ੍ਤਿਂ ਧਾਰੇਸ੍ਸਾਮਿ, ਵਂਸਂ ਠਪੇਸ੍ਸਾਮਿ, ਪਵੇਣਿਂ ਪਾਲੇਸ੍ਸਾਮੀਤਿ ਪਰਿਯਾਪੁਣਾਤਿ, ਤਸ੍ਸ ਪਰਿਯਤ੍ਤਿ ਭਣ੍ਡਾਗਾਰਿਕਪਰਿਯਤ੍ਤਿ ਹੋਤਿ, ਨ ਹੋਤੀਤਿ? ਨ ਹੋਤਿ. ਕਸ੍ਮਾ? ਨ ਅਤ੍ਤਨੋ ਠਾਨੇ ਠਤ੍ਵਾ ਪਰਿਯਾਪੁਤਤ੍ਤਾ. ਪੁਥੁਜ੍ਜਨਸ੍ਸ ਹਿ ਪਰਿਯਤ੍ਤਿ ਨਾਮ ਅਲਗਦ੍ਦਾ ਵਾ ਹੋਤਿ ਨਿਤ੍ਥਰਣਾ ਵਾ, ਸਤ੍ਤਨ੍ਨਂ ਸੇਕ੍ਖਾਨਂ ਨਿਤ੍ਥਰਣਾਵ, ਖੀਣਾਸਵਸ੍ਸ ਭਣ੍ਡਾਗਾਰਿਕਪਰਿਯਤ੍ਤਿਯੇਵ. ਇਮਸ੍ਮਿਂ ਪਨ ਠਾਨੇ ਨਿਤ੍ਥਰਣਪਰਿਯਤ੍ਤਿ ਅਧਿਪ੍ਪੇਤਾ.

ਨਿਜ੍ਝਾਨਂ ਖਮਨ੍ਤੀਤਿ ਸੀਲਾਦੀਨਂ ਆਗਤਟ੍ਠਾਨੇਸੁ ਇਧ ਸੀਲਂ ਕਥਿਤਂ, ਇਧ ਸਮਾਧਿ, ਇਧ ਵਿਪਸ੍ਸਨਾ, ਇਧ ਮਗ੍ਗੋ, ਇਧ ਫਲਂ, ਇਧ ਵਟ੍ਟਂ, ਇਧ ਵਿਵਟ੍ਟਨ੍ਤਿ ਆਪਾਥਂ ਆਗਚ੍ਛਨ੍ਤਿ. ਤਞ੍ਚਸ੍ਸ ਅਤ੍ਥਂ ਅਨੁਭੋਨ੍ਤੀਤਿ ਯੇਸਂ ਮਗ੍ਗਫਲਾਨਂ ਅਤ੍ਥਾਯ ਪਰਿਯਾਪੁਣਨ੍ਤਿ. ਸੁਗ੍ਗਹਿਤਪਰਿਯਤ੍ਤਿਂ ਨਿਸ੍ਸਾਯ ਮਗ੍ਗਂ ਭਾਵੇਤ੍ਵਾ ਫਲਂ ਸਚ੍ਛਿਕਰੋਨ੍ਤਾ ਤਞ੍ਚਸ੍ਸ ਧਮ੍ਮਸ੍ਸ ਅਤ੍ਥਂ ਅਨੁਭਵਨ੍ਤਿ. ਪਰਵਾਦੇ ਉਪਾਰਮ੍ਭਂ ਆਰੋਪੇਤੁਂ ਸਕ੍ਕੋਨ੍ਤਾਪਿ ਸਕਵਾਦੇ ਆਰੋਪਿਤਂ ਦੋਸਂ ਇਚ੍ਛਿਤਿਚ੍ਛਿਤਟ੍ਠਾਨਂ ਗਹੇਤ੍ਵਾ ਮੋਚੇਤੁਂ ਸਕ੍ਕੋਨ੍ਤਾਪਿ ਅਨੁਭੋਨ੍ਤਿਯੇਵ. ਦੀਘਰਤ੍ਤਂ ਹਿਤਾਯ ਸੁਖਾਯ ਸਂਵਤ੍ਤਨ੍ਤੀਤਿ ਸੀਲਾਦੀਨਂ ਆਗਤਟ੍ਠਾਨੇ ਸੀਲਾਦੀਨਿ ਪੂਰੇਨ੍ਤਾਨਮ੍ਪਿ, ਪਰੇਸਂ ਵਾਦੇ ਸਹਧਮ੍ਮੇਨ ਉਪਾਰਮ੍ਭਂ ਆਰੋਪੇਨ੍ਤਾਨਮ੍ਪਿ, ਸਕਵਾਦਤੋ ਦੋਸਂ ਹਰਨ੍ਤਾਨਮ੍ਪਿ, ਅਰਹਤ੍ਤਂ ਪਤ੍ਵਾ ਪਰਿਸਮਜ੍ਝੇ ਧਮ੍ਮਂ ਦੇਸੇਤ੍ਵਾ ਧਮ੍ਮਦੇਸਨਾਯ ਪਸਨ੍ਨੇਹਿ ਉਪਨੀਤੇ ਚਤ੍ਤਾਰੋ ਪਚ੍ਚਯੇ ਪਰਿਭੁਞ੍ਜਨ੍ਤਾਨਮ੍ਪਿ ਦੀਘਰਤ੍ਤਂ ਹਿਤਾਯ ਸੁਖਾਯ ਸਂਵਤ੍ਤਨ੍ਤਿ.

ਏਵਂ ਸੁਗ੍ਗਹਿਤੇ ਬੁਦ੍ਧਵਚਨੇ ਆਨਿਸਂਸਂ ਦਸ੍ਸੇਤ੍ਵਾ ਇਦਾਨਿ ਤਤ੍ਥੇਵ ਨਿਯੋਜੇਨ੍ਤੋ ਤਸ੍ਮਾ ਤਿਹ, ਭਿਕ੍ਖਵੇਤਿਆਦਿਮਾਹ. ਤਤ੍ਥ ਤਸ੍ਮਾਤਿ ਯਸ੍ਮਾ ਦੁਗ੍ਗਹਿਤਪਰਿਯਤ੍ਤਿ ਦੁਗ੍ਗਹਿਤਅਲਗਦ੍ਦੋ ਵਿਯ ਦੀਘਰਤ੍ਤਂ ਅਹਿਤਾਯ ਦੁਕ੍ਖਾਯ ਸਂਵਤ੍ਤਤਿ, ਸੁਗ੍ਗਹਿਤਪਰਿਯਤ੍ਤਿ ਸੁਗ੍ਗਹਿਤਅਲਗਦ੍ਦੋ ਵਿਯ ਦੀਘਰਤ੍ਤਂ ਹਿਤਾਯ ਸੁਖਾਯ ਸਂਵਤ੍ਤਤਿ, ਤਸ੍ਮਾਤਿ ਅਤ੍ਥੋ. ਤਥਾ ਨਂ ਧਾਰੇਯ੍ਯਾਥਾਤਿ ਤਥੇਵ ਨਂ ਧਾਰੇਯ੍ਯਾਥ, ਤੇਨੇਵ ਅਤ੍ਥੇਨ ਗਣ੍ਹੇਯ੍ਯਾਥ. ਯੇ ਵਾ ਪਨਾਸ੍ਸੁ ਵਿਯਤ੍ਤਾ ਭਿਕ੍ਖੂਤਿ ਯੇ ਵਾ ਪਨ ਅਞ੍ਞੇ ਸਾਰਿਪੁਤ੍ਤਮੋਗ੍ਗਲ੍ਲਾਨਮਹਾਕਸ੍ਸਪਮਹਾਕਚ੍ਚਾਨਾਦਿਕਾ ਬ੍ਯਤ੍ਤਾ ਪਣ੍ਡਿਤਾ ਭਿਕ੍ਖੂ ਅਸ੍ਸੁ, ਤੇ ਪੁਚ੍ਛਿਤਬ੍ਬਾ. ਅਰਿਟ੍ਠੇਨ ਵਿਯ ਪਨ ਮਮ ਸਾਸਨੇ ਨ ਕਲਲਂ ਵਾ ਕਚਵਰਂ ਵਾ ਪਕ੍ਖਿਪਿਤਬ੍ਬਂ.

੨੪੦. ਕੁਲ੍ਲੂਪਮਨ੍ਤਿ ਕੁਲ੍ਲਸਦਿਸਂ. ਨਿਤ੍ਥਰਣਤ੍ਥਾਯਾਤਿ ਚਤੁਰੋਘਨਿਤ੍ਥਰਣਤ੍ਥਾਯ. ਉਦਕਣ੍ਣਵਨ੍ਤਿ ਯਞ੍ਹਿ ਉਦਕਂ ਗਮ੍ਭੀਰਂ ਨ ਪੁਥੁਲਂ. ਪੁਥੁਲਂ ਵਾ ਪਨ ਨ ਗਮ੍ਭੀਰਂ, ਨ ਤਂ ਅਣ੍ਣਵੋਤਿ ਵੁਚ੍ਚਤਿ. ਯਂ ਪਨ ਗਮ੍ਭੀਰਞ੍ਚੇਵ ਪੁਥੁਲਞ੍ਚ, ਤਂ ਅਣ੍ਣਵੋਤਿ ਵੁਚ੍ਚਤਿ. ਤਸ੍ਮਾ ਮਹਨ੍ਤਂ ਉਦਕਣ੍ਣਵਨ੍ਤਿ ਮਹਨ੍ਤਂ ਪੁਥੁਲਂ ਗਮ੍ਭੀਰਂ ਉਦਕਨ੍ਤਿ ਅਯਮੇਤ੍ਥ ਅਤ੍ਥੋ. ਸਾਸਙ੍ਕਂ ਨਾਮ ਯਤ੍ਥ ਚੋਰਾਨਂ ਨਿਵੁਤ੍ਥੋਕਾਸੋ ਦਿਸ੍ਸਤਿ. ਠਿਤੋਕਾਸੋ, ਨਿਸਿਨ੍ਨੋਕਾਸੋ, ਨਿਪਨ੍ਨੋਕਾਸੋ ਦਿਸ੍ਸਤਿ. ਸਪ੍ਪਟਿਭਯਂ ਨਾਮ ਯਤ੍ਥ ਚੋਰੇਹਿ ਮਨੁਸ੍ਸਾ ਹਤਾ ਦਿਸ੍ਸਨ੍ਤਿ, ਵਿਲੁਤ੍ਤਾ ਦਿਸ੍ਸਨ੍ਤਿ, ਆਕੋਟਿਤਾ ਦਿਸ੍ਸਨ੍ਤਿ. ਉਤ੍ਤਰਸੇਤੂਤਿ ਉਦਕਣ੍ਣਵਸ੍ਸ ਉਪਰਿ ਬਦ੍ਧੋ ਸੇਤੁ. ਕੁਲ੍ਲਂ ਬਨ੍ਧਿਤ੍ਵਾਤਿ ਕੁਲ੍ਲੋ ਨਾਮ ਤਰਣਤ੍ਥਾਯ ਕਲਾਪਂ ਕਤ੍ਵਾ ਬਦ੍ਧੋ. ਪਤ੍ਥਰਿਤ੍ਵਾ ਬਦ੍ਧਾ ਪਨ ਪਦਰਚਾਟਿਆਦਯੋ ਉਲ਼ੁਮ੍ਪੋਤਿ ਵੁਚ੍ਚਨ੍ਤਿ. ਉਚ੍ਚਾਰੇਤ੍ਵਾਤਿ ਠਪੇਤ੍ਵਾ. ਕਿਚ੍ਚਕਾਰੀਤਿ ਪਤ੍ਤਕਾਰੀ ਯੁਤ੍ਤਕਾਰੀ, ਪਤਿਰੂਪਕਾਰੀਤਿ ਅਤ੍ਥੋ. ਧਮ੍ਮਾਪਿ ਵੋ ਪਹਾਤਬ੍ਬਾਤਿ ਏਤ੍ਥ ਧਮ੍ਮਾਤਿ ਸਮਥਵਿਪਸ੍ਸਨਾ. ਭਗਵਾ ਹਿ ਸਮਥੇਪਿ ਛਨ੍ਦਰਾਗਂ ਪਜਹਾਪੇਸਿ, ਵਿਪਸ੍ਸਨਾਯਪਿ. ਸਮਥੇ ਛਨ੍ਦਰਾਗਂ ਕਤ੍ਥ ਪਜਹਾਪੇਸਿ? ‘‘ਇਤਿ ਖੋ, ਉਦਾਯਿ, ਨੇਵਸਞ੍ਞਾਨਾਸਞ੍ਞਾਯਤਨਸ੍ਸਪਿ ਪਹਾਨਂ ਵਦਾਮਿ, ਪਸ੍ਸਸਿ ਨੋ ਤ੍ਵਂ, ਉਦਾਯਿ, ਤਂ ਸਂਯੋਜਨਂ ਅਣੁਂ ਵਾ ਥੂਲਂ ਵਾ, ਯਸ੍ਸਾਹਂ ਨੋ ਪਹਾਨਂ ਵਦਾਮੀ’’ਤਿ (ਮ. ਨਿ. ੨.੧੫੬) ਏਤ੍ਥ ਸਮਥੇ ਛਨ੍ਦਰਾਗਂ ਪਜਹਾਪੇਸਿ. ‘‘ਇਮਂ ਚੇ ਤੁਮ੍ਹੇ, ਭਿਕ੍ਖਵੇ, ਦਿਟ੍ਠਿਂ ਏਵਂ ਪਰਿਸੁਦ੍ਧਂ ਏਵਂ ਪਰਿਯੋਦਾਤਂ ਨ ਅਲ੍ਲੀਯੇਥ ਨ ਕੇਲਾਯੇਥ ਨ ਧਨਾਯੇਥਾ’’ਤਿ (ਮ. ਨਿ. ੧.੪੦੧) ਏਤ੍ਥ ਵਿਪਸ੍ਸਨਾਯ ਛਨ੍ਦਰਾਗਂ ਪਜਹਾਪੇਸਿ. ਇਧ ਪਨ ਉਭਯਤ੍ਥ ਪਜਹਾਪੇਨ੍ਤੋ ‘‘ਧਮ੍ਮਾਪਿ ਵੋ ਪਹਾਤਬ੍ਬਾ, ਪਗੇਵ ਅਧਮ੍ਮਾ’’ਤਿ ਆਹ.

ਤਤ੍ਰਾਯਂ ਅਧਿਪ੍ਪਾਯੋ – ਭਿਕ੍ਖਵੇ, ਅਹਂ ਏਵਰੂਪੇਸੁ ਸਨ੍ਤਪ੍ਪਣੀਤੇਸੁ ਧਮ੍ਮੇਸੁ ਛਨ੍ਦਰਾਗਪ੍ਪਹਾਨਂ ਵਦਾਮਿ, ਕਿਂ ਪਨ ਇਮਸ੍ਮਿਂ ਅਸਦ੍ਧਮ੍ਮੇ ਗਾਮਧਮ੍ਮੇ ਵਸਲਧਮ੍ਮੇ ਦੁਟ੍ਠੁਲ੍ਲੇ ਓਦਕਨ੍ਤਿਕੇ, ਯਤ੍ਥ ਅਯਂ ਅਰਿਟ੍ਠੋ ਮੋਘਪੁਰਿਸੋ ਨਿਦ੍ਦੋਸਸਞ੍ਞੀ ਪਞ੍ਚਸੁ ਕਾਮਗੁਣੇਸੁ ਛਨ੍ਦਰਾਗਂ ਨਾਲਂ ਅਨ੍ਤਰਾਯਾਯਾਤਿ ਵਦਤਿ. ਅਰਿਟ੍ਠੇਨ ਵਿਯ ਨ ਤੁਮ੍ਹੇਹਿ ਮਯ੍ਹਂ ਸਾਸਨੇ ਕਲਲਂ ਵਾ ਕਚਵਰਂ ਵਾ ਪਕ੍ਖਿਪਿਤਬ੍ਬਨ੍ਤਿ ਏਵਂ ਭਗਵਾ ਇਮਿਨਾਪਿ ਓਵਾਦੇਨ ਅਰਿਟ੍ਠਂਯੇਵ ਨਿਗ੍ਗਣ੍ਹਾਤਿ.

੨੪੧. ਇਦਾਨਿ ਯੋ ਪਞ੍ਚਸੁ ਖਨ੍ਧੇਸੁ ਤਿਵਿਧਗ੍ਗਾਹਵਸੇਨ ਅਹਂ ਮਮਨ੍ਤਿ ਗਣ੍ਹਾਤਿ, ਸੋ ਮਯ੍ਹਂ ਸਾਸਨੇ ਅਯਂ ਅਰਿਟ੍ਠੋ ਵਿਯ ਕਲਲਂ ਕਚਵਰਂ ਪਕ੍ਖਿਪਤੀਤਿ ਦਸ੍ਸੇਨ੍ਤੋ ਛਯਿਮਾਨਿ, ਭਿਕ੍ਖਵੇਤਿਆਦਿਮਾਹ. ਤਤ੍ਥ ਦਿਟ੍ਠਿਟ੍ਠਾਨਾਨੀਤਿ ਦਿਟ੍ਠਿਪਿ ਦਿਟ੍ਠਿਟ੍ਠਾਨਂ, ਦਿਟ੍ਠਿਯਾ ਆਰਮ੍ਮਣਮ੍ਪਿ ਦਿਟ੍ਠਿਟ੍ਠਾਨਂ, ਦਿਟ੍ਠਿਯਾ ਪਚ੍ਚਯੋਪਿ. ਰੂਪਂ ਏਤਂ ਮਮਾਤਿਆਦੀਸੁ ਏਤਂ ਮਮਾਤਿ ਤਣ੍ਹਾਗ੍ਗਾਹੋ. ਏਸੋਹਮਸ੍ਮੀਤਿ ਮਾਨਗ੍ਗਾਹੋ. ਏਸੋ ਮੇ ਅਤ੍ਤਾਤਿ ਦਿਟ੍ਠਿਗ੍ਗਾਹੋ. ਏਵਂ ਰੂਪਾਰਮ੍ਮਣਾ ਤਣ੍ਹਾਮਾਨਦਿਟ੍ਠਿਯੋ ਕਥਿਤਾ ਹੋਨ੍ਤਿ. ਰੂਪਂ ਪਨ ਅਤ੍ਤਾਤਿ ਨ ਵਤ੍ਤਬ੍ਬਂ. ਵੇਦਨਾਦੀਸੁਪਿ ਏਸੇਵ ਨਯੋ. ਦਿਟ੍ਠਂ ਰੂਪਾਯਤਨਂ, ਸੁਤਂ ਸਦ੍ਦਾਯਤਨਂ, ਮੁਤਂ ਗਨ੍ਧਾਯਤਨਂ ਰਸਾਯਤਨਂ ਫੋਟ੍ਠਬ੍ਬਾਯਤਨਂ, ਤਞ੍ਹਿ ਪਤ੍ਵਾ ਗਹੇਤਬ੍ਬਤੋ ਮੁਤਨ੍ਤਿ ਵੁਤ੍ਤਂ. ਅਵਸੇਸਾਨਿ ਸਤ੍ਤਾਯਤਨਾਨਿ ਵਿਞ੍ਞਾਤਂ ਨਾਮ. ਪਤ੍ਤਨ੍ਤਿ ਪਰਿਯੇਸਿਤ੍ਵਾ ਵਾ ਅਪਰਿਯੇਸਿਤ੍ਵਾ ਵਾ ਪਤ੍ਤਂ. ਪਰਿਯੇਸਿਤਨ੍ਤਿ ਪਤ੍ਤਂ ਵਾ ਅਪ੍ਪਤ੍ਤਂ ਵਾ ਪਰਿਯੇਸਿਤਂ. ਅਨੁਵਿਚਰਿਤਂ ਮਨਸਾਤਿ ਚਿਤ੍ਤੇਨ ਅਨੁਸਞ੍ਚਰਿਤਂ. ਲੋਕਸ੍ਮਿਞ੍ਹਿ ਪਰਿਯੇਸਿਤ੍ਵਾ ਪਤ੍ਤਮ੍ਪਿ ਅਤ੍ਥਿ, ਪਰਿਯੇਸਿਤ੍ਵਾ ਨੋਪਤ੍ਤਮ੍ਪਿ. ਅਪਰਿਯੇਸਿਤ੍ਵਾ ਪਤ੍ਤਮ੍ਪਿ ਅਤ੍ਥਿ, ਅਪਰਿਯੇਸਿਤ੍ਵਾ ਨੋਪਤ੍ਤਮ੍ਪਿ. ਤਤ੍ਥ ਪਰਿਯੇਸਿਤ੍ਵਾ ਪਤ੍ਤਂ ਪਤ੍ਤਂ ਨਾਮ. ਪਰਿਯੇਸਿਤ੍ਵਾ ਨੋਪਤ੍ਤਂ ਪਰਿਯੇਸਿਤਂ ਨਾਮ. ਅਪਰਿਯੇਸਿਤ੍ਵਾ ਪਤ੍ਤਞ੍ਚ, ਅਪਰਿਯੇਸਿਤ੍ਵਾ ਨੋਪਤ੍ਤਞ੍ਚ ਮਨਸਾਨੁਵਿਚਰਿਤਂ ਨਾਮ.

ਅਥ ਵਾ ਪਰਿਯੇਸਿਤ੍ਵਾ ਪਤ੍ਤਮ੍ਪਿ ਅਪਰਿਯੇਸਿਤ੍ਵਾ ਪਤ੍ਤਮ੍ਪਿ ਪਤ੍ਤਟ੍ਠੇਨ ਪਤ੍ਤਂ ਨਾਮ. ਪਰਿਯੇਸਿਤ੍ਵਾ ਨੋਪਤ੍ਤਂ ਪਰਿਯੇਸਿਤਂ ਨਾਮ. ਅਪਰਿਯੇਸਿਤ੍ਵਾ ਨੋਪਤ੍ਤਂ ਮਨਸਾਨੁਵਿਚਰਿਤਂ ਨਾਮ. ਸਬ੍ਬਂ ਵਾ ਏਤਂ ਮਨਸਾ ਅਨੁਵਿਚਰਿਤਤ੍ਤਾ ਮਨਸਾਨੁਵਿਚਰਿਤਂ ਨਾਮ. ਇਮਿਨਾ ਵਿਞ੍ਞਾਣਾਰਮ੍ਮਣਾ ਤਣ੍ਹਾਮਾਨਦਿਟ੍ਠਿਯੋ ਕਥਿਤਾ, ਦੇਸਨਾਵਿਲਾਸੇਨ ਹੇਟ੍ਠਾ ਦਿਟ੍ਠਾਦਿਆਰਮ੍ਮਣਵਸੇਨ ਵਿਞ੍ਞਾਣਂ ਦਸ੍ਸਿਤਂ. ਯਮ੍ਪਿ ਤਂ ਦਿਟ੍ਠਿਟ੍ਠਾਨਨ੍ਤਿ ਯਮ੍ਪਿ ਏਤਂ ਸੋ ਲੋਕੋਤਿਆਦਿਨਾ ਨਯੇਨ ਪਵਤ੍ਤਂ ਦਿਟ੍ਠਿਟ੍ਠਾਨਂ.

ਸੋ ਲੋਕੋ ਸੋ ਅਤ੍ਤਾਤਿ ਯਾ ਏਸਾ ‘‘ਰੂਪਂ ਅਤ੍ਤਤੋ ਸਮਨੁਪਸ੍ਸਤੀ’’ਤਿਆਦਿਨਾ ਨਯੇਨ ਪਵਤ੍ਤਾ ਦਿਟ੍ਠਿ ਲੋਕੋ ਚ ਅਤ੍ਤਾ ਚਾਤਿ ਗਣ੍ਹਾਤਿ, ਤਂ ਸਨ੍ਧਾਯ ਵੁਤ੍ਤਂ. ਸੋ ਪੇਚ੍ਚ ਭਵਿਸ੍ਸਾਮੀਤਿ ਸੋ ਅਹਂ ਪਰਲੋਕਂ ਗਨ੍ਤ੍ਵਾ ਨਿਚ੍ਚੋ ਭਵਿਸ੍ਸਾਮਿ, ਧੁਵੋ ਸਸ੍ਸਤੋ ਅਵਿਪਰਿਣਾਮਧਮ੍ਮੋ ਭਵਿਸ੍ਸਾਮਿ, ਸਿਨੇਰੁਮਹਾਪਥਵੀਮਹਾਸਮੁਦ੍ਦਾਦੀਹਿ ਸਸ੍ਸਤੀਹਿ ਸਮਂ ਤਥੇਵ ਠਸ੍ਸਾਮਿ. ਤਮ੍ਪਿ ਏਤਂ ਮਮਾਤਿ ਤਮ੍ਪਿ ਦਸ੍ਸਨਂ ਏਤਂ ਮਮ, ਏਸੋਹਮਸ੍ਮਿ, ਏਸੋ ਮੇ ਅਤ੍ਤਾਤਿ ਸਮਨੁਪਸ੍ਸਤਿ. ਇਮਿਨਾ ਦਿਟ੍ਠਾਰਮ੍ਮਣਾ ਤਣ੍ਹਾਮਾਨਦਿਟ੍ਠਿਯੋ ਕਥਿਤਾ. ਵਿਪਸ੍ਸਨਾਯ ਪਟਿਵਿਪਸ੍ਸਨਾਕਾਲੇ ਵਿਯ ਪਚ੍ਛਿਮਦਿਟ੍ਠਿਯਾ ਪੁਰਿਮਦਿਟ੍ਠਿਗ੍ਗਹਣਕਾਲੇ ਏਵਂ ਹੋਤਿ.

ਸੁਕ੍ਕਪਕ੍ਖੇ ਰੂਪਂ ਨੇਤਂ ਮਮਾਤਿ ਰੂਪੇ ਤਣ੍ਹਾਮਾਨਦਿਟ੍ਠਿਗ੍ਗਾਹਾ ਪਟਿਕ੍ਖਿਤ੍ਤਾ. ਵੇਦਨਾਦੀਸੁਪਿ ਏਸੇਵ ਨਯੋ. ਸਮਨੁਪਸ੍ਸਤੀਤਿ ਇਮਸ੍ਸ ਪਨ ਪਦਸ੍ਸ ਤਣ੍ਹਾਸਮਨੁਪਸ੍ਸਨਾ ਮਾਨਸਮਨੁਪਸ੍ਸਨਾ ਦਿਟ੍ਠਿਸਮਨੁਪਸ੍ਸਨਾ ਞਾਣਸਮਨੁਪਸ੍ਸਨਾਤਿ ਚਤਸ੍ਸੋ ਸਮਨੁਪਸ੍ਸਨਾਤਿ ਅਤ੍ਥੋ. ਤਾ ਕਣ੍ਹਪਕ੍ਖੇ ਤਿਸ੍ਸਨ੍ਨਂ ਸਮਨੁਪਸ੍ਸਨਾਨਂ, ਸੁਕ੍ਕਪਕ੍ਖੇ ਞਾਣਸਮਨੁਪਸ੍ਸਨਾਯ ਵਸੇਨ ਵੇਦਿਤਬ੍ਬਾ. ਅਸਤਿ ਨ ਪਰਿਤਸ੍ਸਤੀਤਿ ਅਵਿਜ੍ਜਮਾਨੇ ਭਯਪਰਿਤਸ੍ਸਨਾਯ ਤਣ੍ਹਾਪਰਿਤਸ੍ਸਨਾਯ ਵਾ ਨ ਪਰਿਤਸ੍ਸਤਿ. ਇਮਿਨਾ ਭਗਵਾ ਅਜ੍ਝਤ੍ਤਕ੍ਖਨ੍ਧਵਿਨਾਸੇ ਅਪਰਿਤਸ੍ਸਮਾਨਂ ਖੀਣਾਸਵਂ ਦਸ੍ਸੇਨ੍ਤੋ ਦੇਸਨਂ ਮਤ੍ਥਕਂ ਪਾਪੇਸਿ.

੨੪੨. ਏਵਂ ਵੁਤ੍ਤੇ ਅਞ੍ਞਤਰੋ ਭਿਕ੍ਖੂਤਿ ਏਵਂ ਭਗਵਤਾ ਵੁਤ੍ਤੇ ਅਞ੍ਞਤਰੋ ਅਨੁਸਨ੍ਧਿਕੁਸਲੋ ਭਿਕ੍ਖੁ – ‘‘ਭਗਵਤਾ ਅਜ੍ਝਤ੍ਤਕ੍ਖਨ੍ਧਵਿਨਾਸੇ ਅਪਰਿਤਸ੍ਸਨ੍ਤਂ ਖੀਣਾਸਵਂ ਦਸ੍ਸੇਤ੍ਵਾ ਦੇਸਨਾ ਨਿਟ੍ਠਾਪਿਤਾ, ਅਜ੍ਝਤ੍ਤਂ ਅਪਰਿਤਸ੍ਸਨ੍ਤੇ ਖੋ ਪਨ ਸਤਿ ਅਜ੍ਝਤ੍ਤਂ ਪਰਿਤਸ੍ਸਕੇਨ ਬਹਿਦ੍ਧਾ ਪਰਿਕ੍ਖਾਰਵਿਨਾਸੇ ਪਰਿਤਸ੍ਸਕੇਨ ਅਪਰਿਤਸ੍ਸਕੇਨ ਚਾਪਿ ਭਵਿਤਬ੍ਬਂ. ਇਤਿ ਇਮੇਹਿ ਚਤੂਹਿ ਕਾਰਣੇਹਿ ਅਯਂ ਪਞ੍ਹੋ ਪੁਚ੍ਛਿਤਬ੍ਬੋ’’ਤਿ ਚਿਨ੍ਤੇਤ੍ਵਾ ਏਕਂਸਂ ਚੀਵਰਂ ਕਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ਭਗਵਨ੍ਤਂ ਏਤਦਵੋਚ. ਬਹਿਦ੍ਧਾ ਅਸਤੀਤਿ ਬਹਿਦ੍ਧਾ ਪਰਿਕ੍ਖਾਰਵਿਨਾਸੇ. ਅਹੁ ਵਤ ਮੇਤਿ ਅਹੋਸਿ ਵਤ ਮੇ ਭਦ੍ਦਕਂ ਯਾਨਂ ਵਾਹਨਂ ਹਿਰਞ੍ਞਂ ਸੁਵਣ੍ਣਨ੍ਤਿ ਅਤ੍ਥੋ. ਤਂ ਵਤ ਮੇ ਨਤ੍ਥੀਤਿ ਤਂ ਵਤ ਇਦਾਨਿ ਮਯ੍ਹਂ ਨਤ੍ਥਿ, ਰਾਜੂਹਿ ਵਾ ਚੋਰੇਹਿ ਵਾ ਹਟਂ, ਅਗ੍ਗਿਨਾ ਵਾ ਦਡ੍ਢਂ, ਉਦਕੇਨ ਵਾ ਵੁਲ਼੍ਹਂ, ਪਰਿਭੋਗੇਨ ਵਾ ਜਿਣ੍ਣਂ. ਸਿਯਾ ਵਤ ਮੇਤਿ ਭਵੇਯ੍ਯ ਵਤ ਮਯ੍ਹਂ ਯਾਨਂ ਵਾਹਨਂ ਹਿਰਞ੍ਞਂ ਸੁਵਣ੍ਣਂ ਸਾਲਿ ਵੀਹਿ ਯਵੋ ਗੋਧੁਮੋ. ਤਂ ਵਤਾਹਂ ਨ ਲਭਾਮੀਤਿ ਤਮਹਂ ਅਲਭਮਾਨੋ ਤਦਨੁਚ੍ਛਵਿਕਂ ਕਮ੍ਮਂ ਅਕਤ੍ਵਾ ਨਿਸਿਨ੍ਨਤ੍ਤਾ ਇਦਾਨਿ ਨ ਲਭਾਮੀਤਿ ਸੋਚਤਿ, ਅਯਂ ਅਗਾਰਿਯਸੋਚਨਾ, ਅਨਗਾਰਿਯਸ੍ਸ ਪਤ੍ਤਚੀਵਰਾਦੀਨਂ ਵਸੇਨ ਵੇਦਿਤਬ੍ਬਾ.

ਅਪਰਿਤਸ੍ਸਨਾਵਾਰੇ ਨ ਏਵਂ ਹੋਤੀਤਿ ਯੇਹਿ ਕਿਲੇਸੇਹਿ ਏਵਂ ਭਵੇਯ੍ਯ, ਤੇਸਂ ਪਹੀਨਤ੍ਤਾ ਨ ਏਵਂ ਹੋਤਿ. ਦਿਟ੍ਠਿਟ੍ਠਾਨਾਧਿਟ੍ਠਾਨਪਰਿਯੁਟ੍ਠਾਨਾਭਿਨਿਵੇਸਾਨੁਸਯਾਨਨ੍ਤਿ ਦਿਟ੍ਠੀਨਞ੍ਚ ਦਿਟ੍ਠਿਟ੍ਠਾਨਾਨਞ੍ਚ ਦਿਟ੍ਠਾਧਿਟ੍ਠਾਨਾਨਞ੍ਚ ਦਿਟ੍ਠਿਪਰਿਯੁਟ੍ਠਾਨਾਨਞ੍ਚ ਅਭਿਨਿਵੇਸਾਨੁਸਯਾਨਞ੍ਚ. ਸਬ੍ਬਸਙ੍ਖਾਰਸਮਥਾਯਾਤਿ ਨਿਬ੍ਬਾਨਤ੍ਥਾਯ. ਨਿਬ੍ਬਾਨਞ੍ਹਿ ਆਗਮ੍ਮ ਸਬ੍ਬਸਙ੍ਖਾਰਾਇਞ੍ਜਿਤਾਨਿ, ਸਬ੍ਬਸਙ੍ਖਾਰਚਲਨਾਨਿ ਸਬ੍ਬਸਙ੍ਖਾਰਵਿਪ੍ਫਨ੍ਦਿਤਾਨਿ ਸਮ੍ਮਨ੍ਤਿ ਵੂਪਸਮ੍ਮਨ੍ਤਿ, ਤਸ੍ਮਾ ਤਂ, ‘‘ਸਬ੍ਬਸਙ੍ਖਾਰਸਮਥੋ’’ਤਿ ਵੁਚ੍ਚਤਿ. ਤਦੇਵ ਚ ਆਗਮ੍ਮ ਖਨ੍ਧੂਪਧਿ ਕਿਲੇਸੂਪਧਿ ਅਭਿਸਙ੍ਖਾਰੂਪਧਿ, ਪਞ੍ਚਕਾਮਗੁਣੂਪਧੀਤਿ ਇਮੇ ਉਪਧਯੋ ਪਟਿਨਿਸ੍ਸਜ੍ਜਿਯਨ੍ਤਿ, ਤਣ੍ਹਾ ਖੀਯਤਿ ਵਿਰਜ੍ਜਤਿ ਨਿਰੁਜ੍ਝਤਿ, ਤਸ੍ਮਾ ਤਂ, ‘‘ਸਬ੍ਬੂਪਧਿਪਟਿਨਿਸ੍ਸਗ੍ਗੋ ਤਣ੍ਹਾਕ੍ਖਯੋ ਵਿਰਾਗੋ ਨਿਰੋਧੋ’’ਤਿ ਵੁਚ੍ਚਤਿ. ਨਿਬ੍ਬਾਨਾਯਾਤਿ ਅਯਂ ਪਨਸ੍ਸ ਸਰੂਪਨਿਦ੍ਦੇਸੋ, ਇਤਿ ਸਬ੍ਬੇਹੇਵ ਇਮੇਹਿ ਪਦੇਹਿ ਨਿਬ੍ਬਾਨਸ੍ਸ ਸਚ੍ਛਿਕਿਰਿਯਤ੍ਥਾਯ ਧਮ੍ਮਂ ਦੇਸੇਨ੍ਤਸ੍ਸਾਤਿ ਅਯਮਤ੍ਥੋ ਦੀਪਿਤੋ. ਤਸ੍ਸੇਵਂ ਹੋਤੀਤਿ ਤਸ੍ਸ ਦਿਟ੍ਠਿਗਤਿਕਸ੍ਸ ਉਚ੍ਛਿਜ੍ਜਿਸ੍ਸਾਮਿ ਨਾਮਸ੍ਸੁ, ਵਿਨਸ੍ਸਿਸ੍ਸਾਮਿ ਨਾਮਸ੍ਸੁ, ਨਾਸ੍ਸੁ ਨਾਮ ਭਵਿਸ੍ਸਾਮੀਤਿ ਏਵਂ ਹੋਤਿ. ਦਿਟ੍ਠਿਗਤਿਕਸ੍ਸ ਹਿ ਤਿਲਕ੍ਖਣਂ ਆਰੋਪੇਤ੍ਵਾ ਸੁਞ੍ਞਤਾਪਟਿਸਂਯੁਤ੍ਤਂ ਕਤ੍ਵਾ ਦੇਸਿਯਮਾਨਂ ਧਮ੍ਮਂ ਸੁਣਨ੍ਤਸ੍ਸ ਤਾਸੋ ਉਪ੍ਪਜ੍ਜਤਿ. ਵੁਤ੍ਤਞ੍ਹੇਤਂ – ‘‘ਤਾਸੋ ਹੇਸੋ, ਭਿਕ੍ਖਵੇ, ਅਸੁਤਵਤੋ ਪੁਥੁਜ੍ਜਨਸ੍ਸ ਨੋ ਚਸ੍ਸਂ, ਨੋ ਚ ਮੇ ਸਿਯਾ’’ਤਿ (ਸਂ. ਨਿ. ੩.੫੫).

੨੪੩. ਏਤ੍ਤਾਵਤਾ ਬਹਿਦ੍ਧਾਪਰਿਕ੍ਖਾਰਵਿਨਾਸੇ ਤਸ੍ਸਨਕਸ੍ਸ ਚ ਨੋਤਸ੍ਸਨਕਸ੍ਸ ਚ ਅਜ੍ਝਤ੍ਤਕ੍ਖਨ੍ਧਵਿਨਾਸੇ ਤਸ੍ਸਨਕਸ੍ਸ ਚ ਨੋਤਸ੍ਸਨਕਸ੍ਸ ਚਾਤਿ ਇਮੇਸਂ ਵਸੇਨ ਚਤੁਕ੍ਕੋਟਿਕਾ ਸੁਞ੍ਞਤਾ ਕਥਿਤਾ. ਇਦਾਨਿ ਬਹਿਦ੍ਧਾ ਪਰਿਕ੍ਖਾਰਂ ਪਰਿਗ੍ਗਹਂ ਨਾਮ ਕਤ੍ਵਾ, ਵੀਸਤਿਵਤ੍ਥੁਕਂ ਸਕ੍ਕਾਯਦਿਟ੍ਠਿਂ ਅਤ੍ਤਵਾਦੁਪਾਦਾਨਂ ਨਾਮ ਕਤ੍ਵਾ, ਸਕ੍ਕਾਯਦਿਟ੍ਠਿਪਮੁਖਾ ਦ੍ਵਾਸਟ੍ਠਿ ਦਿਟ੍ਠਿਯੋ ਦਿਟ੍ਠਿਨਿਸ੍ਸਯਂ ਨਾਮ ਕਤ੍ਵਾ ਤਿਕੋਟਿਕਂ ਸੁਞ੍ਞਤਂ ਦਸ੍ਸੇਤੁਂ ਤਂ, ਭਿਕ੍ਖਵੇ, ਪਰਿਗ੍ਗਹਨ੍ਤਿਆਦਿਮਾਹ. ਤਤ੍ਥ ਪਰਿਗ੍ਗਹਨ੍ਤਿ ਬਹਿਦ੍ਧਾ ਪਰਿਕ੍ਖਾਰਂ. ਪਰਿਗ੍ਗਣ੍ਹੇਯ੍ਯਾਥਾਤਿ ਯਥਾ ਵਿਞ੍ਞੂ ਮਨੁਸ੍ਸੋ ਪਰਿਗ੍ਗਣ੍ਹੇਯ੍ਯ. ਅਹਮ੍ਪਿ ਖੋ ਤਂ, ਭਿਕ੍ਖਵੇਤਿ, ਭਿਕ੍ਖਵੇ, ਤੁਮ੍ਹੇਪਿ ਨ ਪਸ੍ਸਥ, ਅਹਮ੍ਪਿ ਨ ਪਸ੍ਸਾਮਿ, ਇਤਿ ਏਵਰੂਪੋ ਪਰਿਗ੍ਗਹੋ ਨਤ੍ਥੀਤਿ ਦਸ੍ਸੇਤਿ. ਏਵਂ ਸਬ੍ਬਤ੍ਥ ਅਤ੍ਥੋ ਵੇਦਿਤਬ੍ਬੋ.

੨੪੪. ਏਵਂ ਤਿਕੋਟਿਕਂ ਸੁਞ੍ਞਤਂ ਦਸ੍ਸੇਤ੍ਵਾ ਇਦਾਨਿ ਅਜ੍ਝਤ੍ਤਕ੍ਖਨ੍ਧੇ ਅਤ੍ਤਾਤਿ ਬਹਿਦ੍ਧਾ ਪਰਿਕ੍ਖਾਰੇ ਅਤ੍ਤਨਿਯਨ੍ਤਿ ਕਤ੍ਵਾ ਦ੍ਵਿਕੋਟਿਕਂ ਦਸ੍ਸੇਨ੍ਤੋ ਅਤ੍ਤਨਿ ਵਾ, ਭਿਕ੍ਖਵੇ, ਸਤੀਤਿਆਦਿਮਾਹ. ਤਤ੍ਥ ਅਯਂ ਸਙ੍ਖੇਪਤ੍ਥੋ, ਭਿਕ੍ਖਵੇ, ਅਤ੍ਤਨਿ ਵਾ ਸਤਿ ਇਦਂ ਮੇ ਪਰਿਕ੍ਖਾਰਜਾਤਂ ਅਤ੍ਤਨਿਯਨ੍ਤਿ ਅਸ੍ਸ, ਅਤ੍ਤਨਿਯੇਵ ਵਾ ਪਰਿਕ੍ਖਾਰੇ ਸਤਿ ਅਯਂ ਮੇ ਅਤ੍ਤਾ ਇਮਸ੍ਸ ਪਰਿਕ੍ਖਾਰਸ੍ਸ ਸਾਮੀਤਿ, ਏਵਂ ਅਹਨ੍ਤਿ. ਸਤਿ ਮਮਾਤਿ, ਮਮਾਤਿ ਸਤਿ ਅਹਨ੍ਤਿ ਯੁਤ੍ਤਂ ਭਵੇਯ੍ਯ. ਸਚ੍ਚਤੋਤਿ ਭੂਤਤੋ, ਥੇਤਤੋਤਿ ਤਥਤੋ ਥਿਰਤੋ ਵਾ.

ਇਦਾਨਿ ਇਮੇ ਪਞ੍ਚਕ੍ਖਨ੍ਧੇ ਅਨਿਚ੍ਚਂ ਦੁਕ੍ਖਂ ਅਨਤ੍ਤਾਤਿ ਏਵਂ ਤਿਪਰਿਵਟ੍ਟਵਸੇਨ ਅਗ੍ਗਣ੍ਹਨ੍ਤੋ ਅਯਂ ਅਰਿਟ੍ਠੋ ਵਿਯ ਮਯ੍ਹਂ ਸਾਸਨੇ ਕਲਲਂ ਕਚਵਰਂ ਪਕ੍ਖਿਪਤੀਤਿ ਦਸ੍ਸੇਨ੍ਤੋ ਤਂ ਕਿਂ ਮਞ੍ਞਥ, ਭਿਕ੍ਖਵੇ, ਰੂਪਂ ਨਿਚ੍ਚਂ ਵਾਤਿਆਦਿਮਾਹ. ਤਤ੍ਥ ਅਨਿਚ੍ਚਂ, ਭਨ੍ਤੇਤਿ, ਭਨ੍ਤੇ, ਯਸ੍ਮਾ ਹੁਤ੍ਵਾ ਨ ਹੋਤਿ, ਤਸ੍ਮਾ ਅਨਿਚ੍ਚਂ. ਉਪ੍ਪਾਦਵਯਵਤ੍ਤਿਤੋ ਵਿਪਰਿਣਾਮਤਾਵਕਾਲਿਕਨਿਚ੍ਚਪਟਿਕ੍ਖੇਪਟ੍ਠੇਨ ਵਾਤਿ ਚਤੂਹਿ ਕਾਰਣੇਹਿ ਅਨਿਚ੍ਚਂ. ਦੁਕ੍ਖਂ, ਭਨ੍ਤੇਤਿ, ਭਨ੍ਤੇ, ਪਟਿਪੀਲ਼ਨਾਕਾਰੇਨ ਦੁਕ੍ਖਂ, ਸਨ੍ਤਾਪਦੁਕ੍ਖਮਦੁਕ੍ਖਵਤ੍ਥੁਕਸੁਖਪਟਿਕ੍ਖੇਪਟ੍ਠੇਨ ਵਾਤਿ ਚਤੂਹਿ ਕਾਰਣੇਹਿ ਦੁਕ੍ਖਂ. ਵਿਪਰਿਣਾਮਧਮ੍ਮਨ੍ਤਿ ਭਵਸਙ੍ਕਨ੍ਤਿਉਪਗਮਨਸਭਾਵਂ ਪਕਤਿਭਾਵਵਿਜਹਨਸਭਾਵਂ. ਕਲ੍ਲਂ ਨੁ ਤਂ ਸਮਨੁਪਸ੍ਸਿਤੁਂ ਏਤਂ ਮਮ, ਏਸੋਹਮਸ੍ਮਿ, ਏਸੋ ਮੇ ਅਤ੍ਤਾਤਿ ਯੁਤ੍ਤਂ ਨੁ ਖੋ ਤਂ ਇਮੇਸਂ ਤਿਣ੍ਣਂ ਤਣ੍ਹਾਮਾਨਦਿਟ੍ਠਿਗ੍ਗਾਹਾਨਂ ਵਸੇਨ ਅਹਂ ਮਮਾਤਿ ਏਵਂ ਗਹੇਤੁਂ. ਨੋ ਹੇਤਂ, ਭਨ੍ਤੇਤਿ ਇਮਿਨਾ ਤੇ ਭਿਕ੍ਖੂ ਅਵਸਵਤ੍ਤਨਾਕਾਰੇਨ ਰੂਪਂ, ਭਨ੍ਤੇ, ਅਨਤ੍ਤਾਤਿ ਪਟਿਜਾਨਨ੍ਤਿ. ਸੁਞ੍ਞਅਸ੍ਸਾਮਿਕਅਨਿਸ੍ਸਰਅਤ੍ਤਪਟਿਕ੍ਖੇਪਟ੍ਠੇਨ ਵਾਤਿ ਚਤੂਹਿ ਕਾਰਣੇਹਿ ਅਨਤ੍ਤਾ.

ਭਗਵਾ ਹਿ ਕਤ੍ਥਚਿ ਅਨਿਚ੍ਚਵਸੇਨ ਅਨਤ੍ਤਤ੍ਤਂ ਦਸ੍ਸੇਤਿ, ਕਤ੍ਥਚਿ ਦੁਕ੍ਖਵਸੇਨ, ਕਤ੍ਥਚਿ ਉਭਯਵਸੇਨ. ‘‘ਚਕ੍ਖੁ ਅਤ੍ਤਾਤਿ ਯੋ ਵਦੇਯ੍ਯ, ਤਂ ਨ ਉਪਪਜ੍ਜਤਿ, ਚਕ੍ਖੁਸ੍ਸ ਉਪ੍ਪਾਦੋਪਿ ਵਯੋਪਿ ਪਞ੍ਞਾਯਤਿ. ਯਸ੍ਸ ਖੋ ਪਨ ਉਪ੍ਪਾਦੋਪਿ ਵਯੋਪਿ ਪਞ੍ਞਾਯਤਿ, ਅਤ੍ਤਾ ਮੇ ਉਪ੍ਪਜ੍ਜਤਿ ਚ ਵੇਤਿ ਚਾਤਿ ਇਚ੍ਚਸ੍ਸ ਏਵਮਾਗਤਂ ਹੋਤਿ, ਤਸ੍ਮਾ ਤਂ ਨ ਉਪਪਜ੍ਜਤਿ ਚਕ੍ਖੁ ਅਤ੍ਤਾਤਿ ਯੋ ਵਦੇਯ੍ਯ, ਇਤਿ ਚਕ੍ਖੁ ਅਨਤ੍ਤਾ’’ਤਿ (ਮ. ਨਿ. ੩.੪੨੨) ਇਮਸ੍ਮਿਞ੍ਹਿ ਛਛਕ੍ਕਸੁਤ੍ਤੇ ਅਨਿਚ੍ਚਵਸੇਨ ਅਨਤ੍ਤਤਂ ਦਸ੍ਸੇਤਿ. ‘‘ਰੂਪਞ੍ਚ ਹਿਦਂ, ਭਿਕ੍ਖਵੇ, ਅਤ੍ਤਾ ਅਭਵਿਸ੍ਸ, ਨਯਿਦਂ ਰੂਪਂ ਆਬਾਧਾਯ ਸਂਵਤ੍ਤੇਯ੍ਯ, ਲਬ੍ਭੇਥ ਚ ਰੂਪੇ ‘ਏਵਂ ਮੇ ਰੂਪਂ ਹੋਤੁ, ਏਵਂ ਮੇ ਰੂਪਂ ਮਾ ਅਹੋਸੀ’ਤਿ. ਯਸ੍ਮਾ ਚ ਖੋ, ਭਿਕ੍ਖਵੇ, ਰੂਪਂ ਅਨਤ੍ਤਾ, ਤਸ੍ਮਾ ਰੂਪਂ ਆਬਾਧਾਯ ਸਂਵਤ੍ਤਤਿ, ਨ ਚ ਲਬ੍ਭਤਿ ਰੂਪੇ ‘ਏਵਂ ਮੇ ਰੂਪਂ ਹੋਤੁ, ਏਵਂ ਮੇ ਰੂਪਂ ਮਾ ਅਹੋਸੀ’’’ਤਿ (ਮਹਾਵ. ੨੦; ਸਂ. ਨਿ. ੩.੫੯) ਇਮਸ੍ਮਿਂ ਅਨਤ੍ਤਲਕ੍ਖਣਸੁਤ੍ਤੇ ਦੁਕ੍ਖਵਸੇਨ ਅਨਤ੍ਤਤਂ ਦਸ੍ਸੇਤਿ. ‘‘ਰੂਪਂ, ਭਿਕ੍ਖਵੇ, ਅਨਿਚ੍ਚਂ, ਯਦਨਿਚ੍ਚਂ ਤਂ ਦੁਕ੍ਖਂ, ਯਂ ਦੁਕ੍ਖਂ ਤਦਨਤ੍ਤਾ, ਯਦਨਤ੍ਤਾ ਤਂ ‘ਨੇਤਂ ਮਮ, ਨੇਸੋਹਮਸ੍ਮਿ, ਨ ਮੇਸੋ ਅਤ੍ਤਾ’ਤਿ ਏਵਮੇਤਂ ਯਥਾਭੂਤਂ ਸਮ੍ਮਪ੍ਪਞ੍ਞਾਯ ਦਟ੍ਠਬ੍ਬ’’ਨ੍ਤਿ (ਸਂ. ਨਿ. ੩.੭੬) ਇਮਸ੍ਮਿਂ ਅਰਹਤ੍ਤਸੁਤ੍ਤੇ ਉਭਯਵਸੇਨ ਅਨਤ੍ਤਤਂ ਦਸ੍ਸੇਤਿ. ਕਸ੍ਮਾ? ਅਨਿਚ੍ਚਂ ਦੁਕ੍ਖਞ੍ਚ ਪਾਕਟਂ. ਅਨਤ੍ਤਾਤਿ ਨ ਪਾਕਟਂ.

ਪਰਿਭੋਗਭਾਜਨਾਦੀਸੁ ਹਿ ਭਿਨ੍ਨੇਸੁ ਅਹੋ ਅਨਿਚ੍ਚਨ੍ਤਿ ਵਦਨ੍ਤਿ, ਅਹੋ ਅਨਤ੍ਤਾਤਿ ਵਤ੍ਤਾ ਨਾਮ ਨਤ੍ਥਿ. ਸਰੀਰੇ ਗਣ੍ਡਪਿਲ਼ਕਾਦੀਸੁ ਵਾ ਉਟ੍ਠਿਤਾਸੁ ਕਣ੍ਟਕੇਨ ਵਾ ਵਿਦ੍ਧਾ ਅਹੋ ਦੁਕ੍ਖਨ੍ਤਿ ਵਦਨ੍ਤਿ, ਅਹੋ ਅਨਤ੍ਤਾਤਿ ਪਨ ਵਤ੍ਤਾ ਨਾਮ ਨਤ੍ਥਿ. ਕਸ੍ਮਾ? ਇਦਞ੍ਹਿ ਅਨਤ੍ਤਲਕ੍ਖਣਂ ਨਾਮ ਅਵਿਭੂਤਂ ਦੁਦ੍ਦਸਂ ਦੁਪ੍ਪਞ੍ਞਾਪਨਂ. ਤੇਨ ਤਂ ਭਗਵਾ ਅਨਿਚ੍ਚਵਸੇਨ ਵਾ ਦੁਕ੍ਖਵਸੇਨ ਵਾ ਉਭਯਵਸੇਨ ਵਾ ਦਸ੍ਸੇਤਿ. ਤਯਿਦਂ ਇਮਸ੍ਮਿਮ੍ਪਿ ਤੇਪਰਿਵਟ੍ਟੇ ਅਨਿਚ੍ਚਦੁਕ੍ਖਵਸੇਨੇਵ ਦਸ੍ਸਿਤਂ. ਵੇਦਨਾਦੀਸੁਪਿ ਏਸੇਵ ਨਯੋ.

ਤਸ੍ਮਾ ਤਿਹ, ਭਿਕ੍ਖਵੇਤਿ, ਭਿਕ੍ਖਵੇ, ਯਸ੍ਮਾ ਏਤਰਹਿ ਅਞ੍ਞਦਾਪਿ ਰੂਪਂ ਅਨਿਚ੍ਚਂ ਦੁਕ੍ਖਂ ਅਨਤ੍ਤਾ, ਤਸ੍ਮਾਤਿ ਅਤ੍ਥੋ. ਯਂਕਿਞ੍ਚਿ ਰੂਪਨ੍ਤਿਆਦੀਨਿ ਵਿਸੁਦ੍ਧਿਮਗ੍ਗੇ ਖਨ੍ਧਨਿਦ੍ਦੇਸੇ ਵਿਤ੍ਥਾਰਿਤਾਨੇਵ.

੨੪੫. ਨਿਬ੍ਬਿਨ੍ਦਤੀਤਿ ਉਕ੍ਕਣ੍ਠਤਿ. ਏਤ੍ਥ ਚ ਨਿਬ੍ਬਿਦਾਤਿ ਵੁਟ੍ਠਾਨਗਾਮਿਨੀਵਿਪਸ੍ਸਨਾ ਅਧਿਪ੍ਪੇਤਾ. ਵੁਟ੍ਠਾਨਗਾਮਿਨੀਵਿਪਸ੍ਸਨਾਯ ਹਿ ਬਹੂਨਿ ਨਾਮਾਨਿ. ਏਸਾ ਹਿ ਕਤ੍ਥਚਿ ਸਞ੍ਞਗ੍ਗਨ੍ਤਿ ਵੁਤ੍ਤਾ. ਕਤ੍ਥਚਿ ਧਮ੍ਮਟ੍ਠਿਤਿਞਾਣਨ੍ਤਿ. ਕਤ੍ਥਚਿ ਪਾਰਿਸੁਦ੍ਧਿਪਧਾਨਿਯਙ੍ਗਨ੍ਤਿ. ਕਤ੍ਥਚਿ ਪਟਿਪਦਾਞਾਣਦਸ੍ਸਨਵਿਸੁਦ੍ਧੀਤਿ. ਕਤ੍ਥਚਿ ਤਮ੍ਮਯਤਾਪਰਿਯਾਦਾਨਨ੍ਤਿ. ਕਤ੍ਥਚਿ ਤੀਹਿ ਨਾਮੇਹਿ. ਕਤ੍ਥਚਿ ਦ੍ਵੀਹੀਤਿ.

ਤਤ੍ਥ ਪੋਟ੍ਠਪਾਦਸੁਤ੍ਤੇ ਤਾਵ ‘‘ਸਞ੍ਞਾ ਖੋ, ਪੋਟ੍ਠਪਾਦ, ਪਠਮਂ ਉਪ੍ਪਜ੍ਜਤਿ, ਪਚ੍ਛਾ ਞਾਣ’’ਨ੍ਤਿ (ਦੀ. ਨਿ. ੧.੪੧੬) ਏਵਂ ਸਞ੍ਞਗ੍ਗਨ੍ਤਿ ਵੁਤ੍ਤਾ. ਸੁਸਿਮਸੁਤ੍ਤੇ ‘‘ਪੁਬ੍ਬੇ ਖੋ, ਸੁਸਿਮ, ਧਮ੍ਮਟ੍ਠਿਤਿਞਾਣਂ, ਪਚ੍ਛਾ ਨਿਬ੍ਬਾਨੇ ਞਾਣ’’ਨ੍ਤਿ (ਸਂ. ਨਿ. ੨.੭੦) ਏਵਂ ਧਮ੍ਮਟ੍ਠਿਤਿਞਾਣਨ੍ਤਿ ਵੁਤ੍ਤਾ. ਦਸੁਤ੍ਤਰਸੁਤ੍ਤੇ ‘‘ਪਟਿਪਦਾਞਾਣਦਸ੍ਸਨਵਿਸੁਦ੍ਧਿਪਧਾਨਿਯਙ੍ਗ’’ਨ੍ਤਿ (ਦੀ. ਨਿ. ੩.੩੫੯) ਏਵਂ ਪਾਰਿਸੁਦ੍ਧਿਪਦਾਨਿਯਙ੍ਗਨ੍ਤਿ ਵੁਤ੍ਤਾ. ਰਥਵਿਨੀਤੇ ‘‘ਕਿਂ ਨੁ ਖੋ, ਆਵੁਸੋ, ਪਟਿਪਦਾਞਾਣਦਸ੍ਸਨਵਿਸੁਦ੍ਧਤ੍ਥਂ ਭਗਵਤਿ ਬ੍ਰਹ੍ਮਚਰਿਯਂ ਵੁਸ੍ਸਤੀ’’ਤਿ (ਮ. ਨਿ. ੧.੨੫੭) ਏਵਂ ਪਟਿਪਦਾਞਾਣਦਸ੍ਸਨਵਿਸੁਦ੍ਧੀਤਿ ਵੁਤ੍ਤਾ. ਸਲ਼ਾਯਤਨਵਿਭਙ੍ਗੇ ‘‘ਅਤਮ੍ਮਯਤਂ, ਭਿਕ੍ਖਵੇ, ਨਿਸ੍ਸਾਯ ਅਤਮ੍ਮਯਤਂ ਆਗਮ੍ਮ ਯਾਯਂ ਉਪੇਕ੍ਖਾ ਨਾਨਤ੍ਤਾ ਨਾਨਤ੍ਤਸਿਤਾ, ਤਂ ਅਭਿਨਿਵਜ੍ਜੇਤ੍ਵਾ ਯਾਯਂ ਉਪੇਕ੍ਖਾ ਏਕਤ੍ਤਾ ਏਕਤ੍ਤਸਿਤਾ, ਤਂ ਨਿਸ੍ਸਾਯ ਤਂ ਆਗਮ੍ਮ ਏਵਮੇਤਿਸ੍ਸਾ ਪਹਾਨਂ ਹੋਤਿ, ਏਵਮੇਤਿਸ੍ਸਾ ਸਮਤਿਕ੍ਕਮੋ ਹੋਤੀ’’ਤਿ (ਦੀ. ਨਿ. ੩.੩੧੦) ਏਵਂ ਤਮ੍ਮਯਤਾਪਰਿਯਾਦਾਨਨ੍ਤਿ ਵੁਤ੍ਤਾ. ਪਟਿਸਮ੍ਭਿਦਾਮਗ੍ਗੇ ‘‘ਯਾ ਚ ਮੁਞ੍ਚਿਤੁਕਮ੍ਯਤਾ, ਯਾ ਚ ਪਟਿਸਙ੍ਖਾਨੁਪਸ੍ਸਨਾ, ਯਾ ਚ ਸਙ੍ਖਾਰੁਪੇਕ੍ਖਾ, ਇਮੇ ਧਮ੍ਮਾ ਏਕਤ੍ਥਾ ਬ੍ਯਞ੍ਜਨਮੇਵ ਨਾਨ’’ਨ੍ਤਿ (ਪਟਿ. ਮ. ੧.੫੪) ਏਵਂ ਤੀਹਿ ਨਾਮੇਹਿ ਵੁਤ੍ਤਾ. ਪਟ੍ਠਾਨੇ ‘‘ਅਨੁਲੋਮਂ ਗੋਤ੍ਰਭੁਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ, ਅਨੁਲੋਮਂ ਵੋਦਾਨਸ੍ਸ ਅਨਨ੍ਤਰਪਚ੍ਚਯੇਨ ਪਚ੍ਚਯੋ’’ਤਿ (ਪਟ੍ਠਾ. ੧.੧.੪੧੭) ਏਵਂ ਦ੍ਵੀਹਿ ਨਾਮੇਹਿ ਵੁਤ੍ਤਾ. ਇਮਸ੍ਮਿਂ ਪਨ ਅਲਗਦ੍ਦਸੁਤ੍ਤੇ ਨਿਬ੍ਬਿਨ੍ਦਤੀਤਿ ਨਿਬ੍ਬਿਦਾਨਾਮੇਨ ਆਗਤਾ.

ਨਿਬ੍ਬਿਦਾ ਵਿਰਜ੍ਜਤੀਤਿ ਏਤ੍ਥ ਵਿਰਾਗੋਤਿ ਮਗ੍ਗੋ ਵਿਰਾਗਾ ਵਿਮੁਚ੍ਚਤੀਤਿ ਏਤ੍ਥ ਵਿਰਾਗੇਨ ਮਗ੍ਗੇਨ ਵਿਮੁਚ੍ਚਤੀਤਿ ਫਲਂ ਕਥਿਤਂ. ਵਿਮੁਤ੍ਤਸ੍ਮਿਂ ਵਿਮੁਤ੍ਤਮਿਤਿ ਞਾਣਂ ਹੋਤੀਤਿ ਇਧ ਪਚ੍ਚਵੇਕ੍ਖਣਾ ਕਥਿਤਾ.

ਏਵਂ ਵਿਮੁਤ੍ਤਚਿਤ੍ਤਂ ਮਹਾਖੀਣਾਸਵਂ ਦਸ੍ਸੇਤ੍ਵਾ ਇਦਾਨਿ ਤਸ੍ਸ ਯਥਾਭੂਤੇਹਿ ਪਞ੍ਚਹਿ ਕਾਰਣੇਹਿ ਨਾਮਂ ਗਣ੍ਹਨ੍ਤੋ ਅਯਂ ਵੁਚ੍ਚਤਿ, ਭਿਕ੍ਖਵੇਤਿਆਦਿਮਾਹ. ਅਵਿਜ੍ਜਾਤਿ ਵਟ੍ਟਮੂਲਿਕਾ ਅਵਿਜ੍ਜਾ. ਅਯਞ੍ਹਿ ਦੁਰੁਕ੍ਖਿਪਨਟ੍ਠੇਨ ਪਲਿਘੋਤਿ ਵੁਚ੍ਚਤਿ. ਤੇਨੇਸ ਤਸ੍ਸ ਉਕ੍ਖਿਤ੍ਤਤ੍ਤਾ ਉਕ੍ਖਿਤ੍ਤਪਲਿਘੋਤਿ ਵੁਤ੍ਤੋ. ਤਾਲਾਵਤ੍ਥੁਕਤਾਤਿ ਸੀਸਚ੍ਛਿਨ੍ਨਤਾਲੋ ਵਿਯ ਕਤਾ, ਸਮੂਲਂ ਵਾ ਤਾਲਂ ਉਦ੍ਧਰਿਤ੍ਵਾ ਤਾਲਸ੍ਸ ਵਤ੍ਥੁ ਵਿਯ ਕਤਾ, ਯਥਾ ਤਸ੍ਮਿਂ ਵਤ੍ਥੁਸ੍ਮਿਂ ਪੁਨ ਸੋ ਤਾਲੋ ਨ ਪਞ੍ਞਾਯਤਿ, ਏਵਂ ਪੁਨ ਅਪਞ੍ਞਤ੍ਤਿਭਾਵਂ ਨੀਤਾਤਿ ਅਤ੍ਥੋ. ਪੋਨੋਬ੍ਭਵਿਕੋਤਿ ਪੁਨਬ੍ਭਵਦਾਯਕੋ. ਜਾਤਿਸਂਸਾਰੋਤਿਆਦੀਸੁ ਜਾਯਨਵਸੇਨ ਚੇਵ ਸਂਸਰਣਵਸੇਨ ਚ ਏਵਂ ਲਦ੍ਧਨਾਮਾਨਂ ਪੁਨਬ੍ਭਵਖਨ੍ਧਾਨਂ ਪਚ੍ਚਯੋ ਕਮ੍ਮਾਭਿਸਙ੍ਖਾਰੋ. ਸੋ ਹਿ ਪੁਨਪ੍ਪੁਨਂ ਉਪ੍ਪਤ੍ਤਿਕਰਣਵਸੇਨ ਪਰਿਕ੍ਖਿਪਿਤ੍ਵਾ ਠਿਤਤ੍ਤਾ ਪਰਿਕ੍ਖਾਤਿ ਵੁਚ੍ਚਤਿ, ਤੇਨੇਸ ਤਸ੍ਸਾ ਸਂਕਿਣ੍ਣਤ੍ਤਾ ਵਿਕਿਣ੍ਣਤ੍ਤਾ ਸਂਕਿਣ੍ਣਪਰਿਕ੍ਖੋਤਿ ਵੁਤ੍ਤੋ. ਤਣ੍ਹਾਤਿ ਵਟ੍ਟਮੂਲਿਕਾ ਤਣ੍ਹਾ. ਅਯਞ੍ਹਿ ਗਮ੍ਭੀਰਾਨੁਗਤਟ੍ਠੇਨ ਏਸਿਕਾਤਿ ਵੁਚ੍ਚਤਿ. ਤੇਨੇਸ ਤਸ੍ਸਾ ਅਬ੍ਬੂਲ਼੍ਹਤ੍ਤਾ ਲੁਞ੍ਚਿਤ੍ਵਾ ਛਡ੍ਡਿਤਤ੍ਤਾ ਅਬ੍ਬੂਲ਼੍ਹੇਸਿਕੋਤਿ ਵੁਤ੍ਤੋ. ਓਰਮ੍ਭਾਗਿਯਾਨੀਤਿ ਓਰਂ ਭਜਨਕਾਨਿ ਕਾਮਭਵੇ ਉਪਪਤ੍ਤਿਪਚ੍ਚਯਾਨਿ. ਏਤਾਨਿ ਹਿ ਕਵਾਟਂ ਵਿਯ ਨਗਰਦ੍ਵਾਰਂ ਚਿਤ੍ਤਂ ਪਿਦਹਿਤ੍ਵਾ ਠਿਤਤ੍ਤਾ ਅਗ੍ਗਲ਼ਾਤਿ ਵੁਚ੍ਚਨ੍ਤਿ. ਤੇਨੇਸ ਤੇਸਂ ਨਿਰਾਕਤਤ੍ਤਾ ਭਿਨ੍ਨਤ੍ਤਾ ਨਿਰਗ੍ਗਲ਼ੋਤਿ ਵੁਤ੍ਤੋ. ਅਰਿਯੋਤਿ ਨਿਕ੍ਕਿਲੇਸੋ ਪਰਿਸੁਦ੍ਧੋ. ਪਨ੍ਨਦ੍ਧਜੋਤਿ ਪਤਿਤਮਾਨਦ੍ਧਜੋ. ਪਨ੍ਨਭਾਰੋਤਿ ਖਨ੍ਧਭਾਰਕਿਲੇਸਭਾਰਅਭਿਸਙ੍ਖਾਰਭਾਰਪਞ੍ਚਕਾਮਗੁਣਭਾਰਾ ਪਨ੍ਨਾ ਓਰੋਹਿਤਾ ਅਸ੍ਸਾਤਿ ਪਨ੍ਨਭਾਰੋ. ਅਪਿਚ ਇਧ ਮਾਨਭਾਰਸ੍ਸੇਵ ਓਰੋਪਿਤਤ੍ਤਾ ਪਨ੍ਨਭਾਰੋਤਿ ਅਧਿਪ੍ਪੇਤੋ. ਵਿਸਂਯੁਤ੍ਤੋਤਿ ਚਤੂਹਿ ਯੋਗੇਹਿ ਸਬ੍ਬਕਿਲੇਸੇਹਿ ਚ ਵਿਸਂਯੁਤ੍ਤੋ. ਇਧ ਪਨ ਮਾਨਸਂਯੋਗੇਨੇਵ ਵਿਸਂਯੁਤ੍ਤਤ੍ਤਾ ਵਿਸਂਯੁਤ੍ਤੋਤਿ ਅਧਿਪ੍ਪੇਤੋ. ਅਸ੍ਮਿਮਾਨੋਤਿ ਰੂਪੇ ਅਸ੍ਮੀਤਿ ਮਾਨੋ, ਵੇਦਨਾਯ… ਸਞ੍ਞਾਯ… ਸਙ੍ਖਾਰੇਸੁ… ਵਿਞ੍ਞਾਣੇ ਅਸ੍ਮੀਤਿ ਮਾਨੋ.

ਏਤ੍ਤਾਵਤਾ ਭਗਵਤਾ ਮਗ੍ਗੇਨ ਕਿਲੇਸੇ ਖੇਪੇਤ੍ਵਾ ਨਿਰੋਧਸਯਨਵਰਗਤਸ੍ਸ ਨਿਬ੍ਬਾਨਾਰਮ੍ਮਣਂ ਫਲਸਮਾਪਤ੍ਤਿਂ ਅਪ੍ਪੇਤ੍ਵਾ ਵਿਹਰਤੋ ਖੀਣਾਸਵਸ੍ਸ ਕਾਲੋ ਦਸ੍ਸਿਤੋ. ਯਥਾ ਹਿ ਦ੍ਵੇ ਨਗਰਾਨਿ ਏਕਂ ਚੋਰਨਗਰਂ, ਏਕਂ ਖੇਮਨਗਰਂ. ਅਥ ਏਕਸ੍ਸ ਮਹਾਯੋਧਸ੍ਸ ਏਵਂ ਭਵੇਯ੍ਯ – ‘‘ਯਾਵਿਮਂ ਚੋਰਨਗਰਂ ਤਿਟ੍ਠਤਿ, ਤਾਵ ਖੇਮਨਗਰਂ ਭਯਤੋ ਨ ਮੁਚ੍ਚਤਿ, ਚੋਰਨਗਰਂ ਅਨਗਰਂ ਕਰਿਸ੍ਸਾਮੀ’’ਤਿ ਸਨ੍ਨਾਹਂ ਕਤ੍ਵਾ ਖਗ੍ਗਂ ਗਹੇਤ੍ਵਾ ਚੋਰਨਗਰਂ ਉਪਸਙ੍ਕਮਿਤ੍ਵਾ ਨਗਰਦ੍ਵਾਰੇ ਉਸ੍ਸਾਪਿਤੇ ਏਸਿਕਤ੍ਥਮ੍ਭੇ ਖਗ੍ਗੇਨ ਛਿਨ੍ਦਿਤ੍ਵਾ ਸਦ੍ਵਾਰਬਾਹਕਂ ਕਵਾਟਂ ਛਿਨ੍ਦਿਤ੍ਵਾ ਪਲਿਘਂ ਉਕ੍ਖਿਪਿਤ੍ਵਾ ਪਾਕਾਰਂ ਭਿਨ੍ਦਨ੍ਤੋ ਪਰਿਕ੍ਖਂ ਸਂਕਿਰਿਤ੍ਵਾ ਨਗਰਸੋਭਨਤ੍ਥਾਯ ਉਸ੍ਸਿਤੇ ਧਜੇ ਪਾਤੇਤ੍ਵਾ ਨਗਰਂ ਅਗ੍ਗਿਨਾ ਝਾਪੇਤ੍ਵਾ ਖੇਮਨਗਰਂ ਪਵਿਸਿਤ੍ਵਾ ਪਾਸਾਦਂ ਅਭਿਰੁਯ੍ਹ ਞਾਤਿਗਣਪਰਿਵੁਤੋ ਸੁਰਸਭੋਜਨਂ ਭੁਞ੍ਜੇਯ੍ਯ, ਏਵਂ ਚੋਰਨਗਰਂ ਵਿਯ ਸਕ੍ਕਾਯੋ, ਖੇਮਨਗਰਂ ਵਿਯ ਨਿਬ੍ਬਾਨਂ, ਮਹਾਯੋਧੋ ਵਿਯ ਯੋਗਾਵਚਰੋ. ਤਸ੍ਸੇਵਂ ਹੋਤਿ, ‘‘ਯਾਵ ਸਕ੍ਕਾਯਵਟ੍ਟਂ ਵਤ੍ਤਤਿ, ਤਾਵ ਦ੍ਵਤ੍ਤਿਂਸਕਮ੍ਮਕਾਰਣਅਟ੍ਠਨਵੁਤਿਰੋਗਪਞ੍ਚਵੀਸਤਿਮਹਾਭਯੇਹਿ ਪਰਿਮੁਚ੍ਚਨਂ ਨਤ੍ਥੀ’’ਤਿ. ਸੋ ਮਹਾਯੋਧੋ ਵਿਯ ਸਨ੍ਨਾਹਂ ਸੀਲਸਨ੍ਨਾਹਂ ਕਤ੍ਵਾ, ਪਞ੍ਞਾਖਗ੍ਗਂ ਗਹੇਤ੍ਵਾ ਖਗ੍ਗੇਨ ਏਸਿਕਤ੍ਥਮ੍ਭੇ ਵਿਯ ਅਰਹਤ੍ਤਮਗ੍ਗੇਨ ਤਣ੍ਹੇਸਿਕਂ ਲੁਞ੍ਚਿਤ੍ਵਾ, ਸੋ ਯੋਧੋ ਸਦ੍ਵਾਰਬਾਹਕਂ ਨਗਰਕਵਾਟਂ ਵਿਯ ਪਞ੍ਚੋਰਮ੍ਭਾਗਿਯਸਂਯੋਜਨਗ੍ਗਲ਼ਂ ਉਗ੍ਘਾਟੇਤ੍ਵਾ, ਸੋ ਯੋਧੋ ਪਲਿਘਂ ਵਿਯ, ਅਵਿਜ੍ਜਾਪਲਿਘਂ ਉਕ੍ਖਿਪਿਤ੍ਵਾ, ਸੋ ਯੋਧੋ ਪਾਕਾਰਂ ਭਿਨ੍ਦਨ੍ਤੋ ਪਰਿਕ੍ਖਂ ਵਿਯ ਕਮ੍ਮਾਭਿਸਙ੍ਖਾਰਂ ਭਿਨ੍ਦਨ੍ਤੋ ਜਾਤਿਸਂਸਾਰਪਰਿਕ੍ਖਂ ਸਂਕਿਰਿਤ੍ਵਾ, ਸੋ ਯੋਧੋ ਨਗਰਸੋਭਨਤ੍ਥਾਯ ਉਸ੍ਸਾਪਿਤੇ ਧਜੇ ਵਿਯ ਮਾਨਦ੍ਧਜੇ ਪਾਤੇਤ੍ਵਾ ਸਕ੍ਕਾਯਨਗਰਂ ਝਾਪੇਤ੍ਵਾ, ਸੋ ਯੋਧੋ ਖੇਮਨਗਰੇ ਉਪਰਿਪਾਸਾਦੇ ਸੁਰਸਭੋਜਨਂ ਵਿਯ ਕਿਲੇਸਨਿਬ੍ਬਾਨਂ ਨਗਰਂ ਪਵਿਸਿਤ੍ਵਾ ਅਮਤਨਿਰੋਧਾਰਮ੍ਮਣਂ ਫਲਸਮਾਪਤ੍ਤਿਸੁਖਂ ਅਨੁਭਵਮਾਨੋ ਕਾਲਂ ਵੀਤਿਨਾਮੇਤਿ.

੨੪੬. ਇਦਾਨਿ ਏਵਂ ਵਿਮੁਤ੍ਤਚਿਤ੍ਤਸ੍ਸ ਖੀਣਾਸਵਸ੍ਸ ਪਰੇਹਿ ਅਨਧਿਗਮਨੀਯਵਿਞ੍ਞਾਣਤਂ ਦਸ੍ਸੇਨ੍ਤੋ ਏਵਂ ਵਿਮੁਤ੍ਤਚਿਤ੍ਤਂ ਖੋਤਿਆਦਿਮਾਹ. ਤਤ੍ਥ ਅਨ੍ਵੇਸਨ੍ਤਿ ਅਨ੍ਵੇਸਨ੍ਤਾ ਗਵੇਸਨ੍ਤਾ. ਇਦਂ ਨਿਸ੍ਸਿਤਨ੍ਤਿ ਇਦਂ ਨਾਮ ਨਿਸ੍ਸਿਤਂ. ਤਥਾਗਤਸ੍ਸਾਤਿ ਏਤ੍ਥ ਸਤ੍ਤੋਪਿ ਤਥਾਗਤੋਤਿ ਅਧਿਪ੍ਪੇਤੋ, ਉਤ੍ਤਮਪੁਗ੍ਗਲੋ ਖੀਣਾਸਵੋਪਿ. ਅਨਨੁਵਿਜ੍ਜੋਤਿ ਅਸਂਵਿਜ੍ਜਮਾਨੋ ਵਾ ਅਵਿਨ੍ਦੇਯ੍ਯੋ ਵਾ. ਤਥਾਗਤੋਤਿ ਹਿ ਸਤ੍ਤੇ ਗਹਿਤੇ ਅਸਂਵਿਜ੍ਜਮਾਨੋਤਿ ਅਤ੍ਥੋ ਵਟ੍ਟਤਿ, ਖੀਣਾਸਵੇ ਗਹਿਤੇ ਅਵਿਨ੍ਦੇਯ੍ਯੋਤਿ ਅਤ੍ਥੋ ਵਟ੍ਟਤਿ.

ਤਤ੍ਥ ਪੁਰਿਮਨਯੇ ਅਯਮਧਿਪ੍ਪਾਯੋ – ਭਿਕ੍ਖਵੇ, ਅਹਂ ਦਿਟ੍ਠੇਵ ਧਮ੍ਮੇ ਧਰਮਾਨਕਂਯੇਵ ਖੀਣਾਸਵਂ ਤਥਾਗਤੋ ਸਤ੍ਤੋ ਪੁਗ੍ਗਲੋਤਿ ਨ ਪਞ੍ਞਪੇਮਿ. ਅਪ੍ਪਟਿਸਨ੍ਧਿਕਂ ਪਨ ਪਰਿਨਿਬ੍ਬੁਤਂ ਖੀਣਾਸਵਂ ਸਤ੍ਤੋਤਿ ਵਾ ਪੁਗ੍ਗਲੋਤਿ ਵਾ ਕਿਂ ਪਞ੍ਞਪੇਸ੍ਸਾਮਿ? ਅਨਨੁਵਿਜ੍ਜੋ ਤਥਾਗਤੋ. ਨ ਹਿ ਪਰਮਤ੍ਥਤੋ ਸਤ੍ਤੋ ਨਾਮ ਕੋਚਿ ਅਤ੍ਥਿ, ਤਸ੍ਸ ਅਵਿਜ੍ਜਮਾਨਸ੍ਸ ਇਦਂ ਨਿਸ੍ਸਿਤਂ ਵਿਞ੍ਞਾਣਨ੍ਤਿ ਅਨ੍ਵੇਸਨ੍ਤਾਪਿ ਕਿਂ ਅਧਿਗਚ੍ਛਿਸ੍ਸਨ੍ਤਿ? ਕਥਂ ਪਟਿਲਭਿਸ੍ਸਨ੍ਤੀਤਿ ਅਤ੍ਥੋ. ਦੁਤਿਯਨਯੇ ਅਯਮਧਿਪ੍ਪਾਯੋ – ਭਿਕ੍ਖਵੇ, ਅਹਂ ਦਿਟ੍ਠੇਵ ਧਮ੍ਮੇ ਧਰਮਾਨਕਂਯੇਵ ਖੀਣਾਸਵਂ ਵਿਞ੍ਞਾਣਵਸੇਨ ਇਨ੍ਦਾਦੀਹਿ ਅਵਿਨ੍ਦਿਯਂ ਵਦਾਮਿ. ਨ ਹਿ ਸਇਨ੍ਦਾ ਦੇਵਾ ਸਬ੍ਰਹ੍ਮਕਾ ਸਪਜਾਪਤਿਕਾ ਅਨ੍ਵੇਸਨ੍ਤਾਪਿ ਖੀਣਾਸਵਸ੍ਸ ਵਿਪਸ੍ਸਨਾਚਿਤ੍ਤਂ ਵਾ ਮਗ੍ਗਚਿਤ੍ਤਂ ਵਾ ਫਲਚਿਤ੍ਤਂ ਵਾ, ਇਦਂ ਨਾਮ ਆਰਮ੍ਮਣਂ ਨਿਸ੍ਸਾਯ ਵਤ੍ਤਤੀਤਿ ਜਾਨਿਤੁਂ ਸਕ੍ਕੋਨ੍ਤਿ. ਤੇ ਅਪ੍ਪਟਿਸਨ੍ਧਿਕਸ੍ਸ ਪਰਿਨਿਬ੍ਬੁਤਸ੍ਸ ਕਿਂ ਜਾਨਿਸ੍ਸਨ੍ਤੀਤਿ?

ਅਸਤਾਤਿ ਅਸਨ੍ਤੇਨ. ਤੁਚ੍ਛਾਤਿ ਤੁਚ੍ਛਕੇਨ. ਮੁਸਾਤਿ ਮੁਸਾਵਾਦੇਨ. ਅਭੂਤੇਨਾਤਿ ਯਂ ਨਤ੍ਥਿ, ਤੇਨ. ਅਬ੍ਭਾਚਿਕ੍ਖਨ੍ਤੀਤਿ ਅਭਿਆਚਿਕ੍ਖਨ੍ਤਿ, ਅਭਿਭਵਿਤ੍ਵਾ ਵਦਨ੍ਤਿ. ਵੇਨਯਿਕੋਤਿ ਵਿਨਯਤਿ ਵਿਨਾਸੇਤੀਤਿ ਵਿਨਯੋ, ਸੋ ਏਵ ਵੇਨਯਿਕੋ, ਸਤ੍ਤਵਿਨਾਸਕੋਤਿ ਅਧਿਪ੍ਪਾਯੋ. ਯਥਾ ਚਾਹਂ ਨ, ਭਿਕ੍ਖਵੇਤਿ, ਭਿਕ੍ਖਵੇ, ਯੇਨ ਵਾਕਾਰੇਨ ਅਹਂ ਨ ਸਤ੍ਤਵਿਨਾਸਕੋ. ਯਥਾ ਚਾਹਂ ਨ ਵਦਾਮੀਤਿ ਯੇਨ ਵਾ ਕਾਰਣੇਨ ਅਹਂ ਸਤ੍ਤਵਿਨਾਸਂ ਨ ਪਞ੍ਞਪੇਮਿ. ਇਦਂ ਵੁਤ੍ਤਂ ਹੋਤਿ – ਯਥਾਹਂ ਨ ਸਤ੍ਤਵਿਨਾਸਕੋ, ਯਥਾ ਚ ਨ ਸਤ੍ਤਵਿਨਾਸਂ ਪਞ੍ਞਪੇਮਿ, ਤਥਾ ਮਂ ਤੇ ਭੋਨ੍ਤੋ ਸਮਣਬ੍ਰਾਹ੍ਮਣਾ ‘‘ਵੇਨਯਿਕੋ ਸਮਣੋ ਗੋਤਮੋ’’ਤਿ ਵਦਨ੍ਤਾ ਸਤ੍ਤਵਿਨਾਸਕੋ ਸਮਣੋ ਗੋਤਮੋਤਿ ਚ, ‘‘ਸਤੋ ਸਤ੍ਤਸ੍ਸ ਉਚ੍ਛੇਦਂ ਵਿਨਾਸਂ ਵਿਭਵਂ ਪਞ੍ਞਪੇਤੀ’’ਤਿ ਵਦਨ੍ਤਾ ਸਤ੍ਤਵਿਨਾਸਂ ਪਞ੍ਞਪੇਤੀਤਿ ਚ ਅਸਤਾ ਤੁਚ੍ਛਾ ਮੁਸਾ ਅਭੂਤੇਨ ਅਬ੍ਭਾਚਿਕ੍ਖਨ੍ਤੀਤਿ.

ਪੁਬ੍ਬੇ ਚਾਤਿ ਪੁਬ੍ਬੇ ਮਹਾਬੋਧਿਮਣ੍ਡਮ੍ਹਿਯੇਵ ਚ. ਏਤਰਹਿ ਚਾਤਿ ਏਤਰਹਿ ਧਮ੍ਮਦੇਸਨਾਯਞ੍ਚ. ਦੁਕ੍ਖਞ੍ਚੇਵ ਪਞ੍ਞਪੇਮਿ, ਦੁਕ੍ਖਸ੍ਸ ਚ ਨਿਰੋਧਨ੍ਤਿ ਧਮ੍ਮਚਕ੍ਕਂ ਅਪ੍ਪਵਤ੍ਤੇਤ੍ਵਾ ਬੋਧਿਮਣ੍ਡੇ ਵਿਹਰਨ੍ਤੋਪਿ ਧਮ੍ਮਚਕ੍ਕਪ੍ਪਵਤ੍ਤਨਤੋ ਪਟ੍ਠਾਯ ਧਮ੍ਮਂ ਦੇਸੇਨ੍ਤੋਪਿ ਚਤੁਸਚ੍ਚਮੇਵ ਪਞ੍ਞਪੇਮੀਤਿ ਅਤ੍ਥੋ. ਏਤ੍ਥ ਹਿ ਦੁਕ੍ਖਗ੍ਗਹਣੇਨ ਤਸ੍ਸ ਮੂਲਭੂਤੋ ਸਮੁਦਯੋ, ਨਿਰੋਧਗ੍ਗਹਣੇਨ ਤਂਸਮ੍ਪਾਪਕੋ ਮਗ੍ਗੋ ਗਹਿਤੋਵ ਹੋਤੀਤਿ ਵੇਦਿਤਬ੍ਬੋ. ਤਤ੍ਰ ਚੇਤਿ ਤਸ੍ਮਿਂ ਚਤੁਸਚ੍ਚਪ੍ਪਕਾਸਨੇ. ਪਰੇਤਿ ਸਚ੍ਚਾਨਿ ਆਜਾਨਿਤੁਂ ਪਟਿਵਿਜ੍ਝਿਤੁਂ ਅਸਮਤ੍ਥਪੁਗ੍ਗਲਾ. ਅਕ੍ਕੋਸਨ੍ਤੀਤਿ ਦਸਹਿ ਅਕ੍ਕੋਸਵਤ੍ਥੂਹਿ ਅਕ੍ਕੋਸਨ੍ਤਿ. ਪਰਿਭਾਸਨ੍ਤੀਤਿ ਵਾਚਾਯ ਪਰਿਭਾਸਨ੍ਤਿ. ਰੋਸੇਨ੍ਤਿ ਵਿਹੇਸੇਨ੍ਤੀਤਿ ਰੋਸੇਸ੍ਸਾਮ ਵਿਹੇਸੇਸ੍ਸਾਮਾਤਿ ਅਧਿਪ੍ਪਾਯੇਨ ਘਟ੍ਟੇਨ੍ਤਿ ਦੁਕ੍ਖਾਪੇਨ੍ਤਿ. ਤਤ੍ਰਾਤਿ ਤੇਸੁ ਅਕ੍ਕੋਸਾਦੀਸੁ, ਤੇਸੁ ਵਾ ਪਰਪੁਗ੍ਗਲੇਸੁ. ਆਘਾਤੋਤਿ ਕੋਪੋ. ਅਪ੍ਪਚ੍ਚਯੋਤਿ ਦੋਮਨਸ੍ਸਂ. ਅਨਭਿਰਦ੍ਧੀਤਿ ਅਤੁਟ੍ਠਿ.

ਤਤ੍ਰ ਚੇਤਿ ਚਤੁਸਚ੍ਚਪ੍ਪਕਾਸਨੇਯੇਵ. ਪਰੇਤਿ ਚਤੁਸਚ੍ਚਪ੍ਪਕਾਸਨਂ ਆਜਾਨਿਤੁਂ ਪਟਿਵਿਜ੍ਝਿਤੁਂ ਸਮਤ੍ਥਪੁਗ੍ਗਲਾ. ਆਨਨ੍ਦੋਤਿ ਆਨਨ੍ਦਪੀਤਿ. ਉਪ੍ਪਿਲਾਵਿਤਤ੍ਤਨ੍ਤਿ ਉਪ੍ਪਿਲਾਪਨਪੀਤਿ. ਤਤ੍ਰ ਚੇਤਿ ਚਤੁਸਚ੍ਚਪ੍ਪਕਾਸਨਮ੍ਹਿਯੇਵ. ਤਤ੍ਰਾਤਿ ਸਕ੍ਕਾਰਾਦੀਸੁ. ਯਂ ਖੋ ਇਦਂ ਪੁਬ੍ਬੇ ਪਰਿਞ੍ਞਾਤਨ੍ਤਿ ਇਦਂ ਖਨ੍ਧਪਞ੍ਚਕਂ ਪੁਬ੍ਬੇ ਬੋਧਿਮਣ੍ਡੇ ਤੀਹਿ ਪਰਿਞ੍ਞਾਹਿ ਪਰਿਞ੍ਞਾਤਂ. ਤਤ੍ਥਮੇਤਿ ਤਸ੍ਮਿਂ ਖਨ੍ਧਪਞ੍ਚਕੇ ਇਮੇ. ਕਿਂ ਵੁਤ੍ਤਂ ਹੋਤਿ? ਤਤ੍ਰਾਪਿ ਤਥਾਗਤਸ੍ਸ ਇਮੇ ਸਕ੍ਕਾਰਾ ਮਯਿ ਕਰੀਯਨ੍ਤੀਤਿ ਵਾ ਅਹਂ ਏਤੇ ਅਨੁਭਵਾਮੀਤਿ ਵਾ ਨ ਹੋਤਿ. ਪੁਬ੍ਬੇ ਪਰਿਞ੍ਞਾਤਕ੍ਖਨ੍ਧਪਞ੍ਚਕਂਯੇਵ ਏਤੇ ਸਕ੍ਕਾਰੇ ਅਨੁਭੋਤੀਤਿ ਏਤ੍ਤਕਮੇਵ ਹੋਤੀਤਿ. ਤਸ੍ਮਾਤਿ ਯਸ੍ਮਾ ਸਚ੍ਚਾਨਿ ਪਟਿਵਿਜ੍ਝਿਤੁਂ ਅਸਮਤ੍ਥਾ ਤਥਾਗਤਮ੍ਪਿ ਅਕ੍ਕੋਸਨ੍ਤਿ, ਤਸ੍ਮਾ. ਸੇਸਂ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.

੨੪੭. ਤਸ੍ਮਾ ਤਿਹ, ਭਿਕ੍ਖਵੇ, ਯਂ ਨ ਤੁਮ੍ਹਾਕਨ੍ਤਿ ਯਸ੍ਮਾ ਅਤ੍ਤਨਿਯੇਪਿ ਛਨ੍ਦਰਾਗਪ੍ਪਹਾਨਂ ਦੀਘਰਤ੍ਤਂ ਹਿਤਾਯ ਸੁਖਾਯ ਸਂਵਤ੍ਤਤਿ, ਤਸ੍ਮਾ ਯਂ ਨ ਤੁਮ੍ਹਾਕਂ, ਤਂ ਪਜਹਥਾਤਿ ਅਤ੍ਥੋ. ਯਥਾਪਚ੍ਚਯਂ ਵਾ ਕਰੇਯ੍ਯਾਤਿ ਯਥਾ ਯਥਾ ਇਚ੍ਛੇਯ੍ਯ ਤਥਾ ਤਥਾ ਕਰੇਯ੍ਯ. ਨ ਹਿ ਨੋ ਏਤਂ, ਭਨ੍ਤੇ, ਅਤ੍ਤਾ ਵਾਤਿ, ਭਨ੍ਤੇ, ਏਤਂ ਤਿਣਕਟ੍ਠਸਾਖਾਪਲਾਸਂ ਅਮ੍ਹਾਕਂ ਨੇਵ ਅਤ੍ਤਾ ਨ ਅਮ੍ਹਾਕਂ ਰੂਪਂ ਨ ਵਿਞ੍ਞਾਣਨ੍ਤਿ ਵਦਨ੍ਤਿ. ਅਤ੍ਤਨਿਯਂ ਵਾਤਿ ਅਮ੍ਹਾਕਂ ਚੀਵਰਾਦਿਪਰਿਕ੍ਖਾਰੋਪਿ ਨ ਹੋਤੀਤਿ ਅਤ੍ਥੋ. ਏਵਮੇਵ ਖੋ, ਭਿਕ੍ਖਵੇ, ਯਂ ਨ ਤੁਮ੍ਹਾਕਂ ਤਂ ਪਜਹਥਾਤਿ ਭਗਵਾ, ਖਨ੍ਧਪਞ੍ਚਕਂਯੇਵ ਨ ਤੁਮ੍ਹਾਕਨ੍ਤਿ ਦਸ੍ਸੇਤ੍ਵਾ ਪਜਹਾਪੇਤਿ, ਤਞ੍ਚ ਖੋ ਨ ਉਪ੍ਪਾਟੇਤ੍ਵਾ, ਲੁਞ੍ਚਿਤ੍ਵਾ ਵਾ. ਛਨ੍ਦਰਾਗਵਿਨਯੇਨ ਪਨੇਤਂ ਪਜਹਾਪੇਤਿ.

੨੪੮. ਏਵਂ ਸ੍ਵਾਕ੍ਖਾਤੋਤਿ ਏਤ੍ਥ ਤਿਪਰਿਵਟ੍ਟਤੋ ਪਟ੍ਠਾਯ ਯਾਵ ਇਮਂ ਠਾਨਂ ਆਹਰਿਤੁਮ੍ਪਿ ਵਟ੍ਟਤਿ, ਪਟਿਲੋਮੇਨ ਪੇਮਮਤ੍ਤਕੇਨ ਸਗ੍ਗਪਰਾਯਣਤੋ ਪਟ੍ਠਾਯ ਯਾਵ ਇਮਂ ਠਾਨਂ ਆਹਰਿਤੁਮ੍ਪਿ ਵਟ੍ਟਤਿ. ਸ੍ਵਾਕ੍ਖਾਤੋਤਿ ਸੁਕਥਿਤੋ. ਸੁਕਥਿਤਤ੍ਤਾ ਏਵ ਉਤ੍ਤਾਨੋ ਵਿਵਟੋ ਪਕਾਸਿਤੋ. ਛਿਨ੍ਨਪਿਲੋਤਿਕੋਤਿ ਪਿਲੋਤਿਕਾ ਵੁਚ੍ਚਤਿ ਛਿਨ੍ਨਂ ਭਿਨ੍ਨਂ ਤਤ੍ਥ ਤਤ੍ਥ ਸਿਬ੍ਬਿਤਂ ਗਣ੍ਠਿਕਤਂ ਜਿਣ੍ਣਂ ਵਤ੍ਥਂ, ਤਂ ਯਸ੍ਸ ਨਤ੍ਥਿ, ਅਟ੍ਠਹਤ੍ਥਂ ਵਾ ਨਵਹਤ੍ਥਂ ਵਾ ਅਹਤਸਾਟਕਂ ਨਿਵਤ੍ਥੋ, ਸੋ ਛਿਨ੍ਨਪਿਲੋਤਿਕੋ ਨਾਮ. ਅਯਮ੍ਪਿ ਧਮ੍ਮੋ ਤਾਦਿਸੋ, ਨ ਹੇਤ੍ਥ ਕੋਹਞ੍ਞਾਦਿਵਸੇਨ ਛਿਨ੍ਨਭਿਨ੍ਨਸਿਬ੍ਬਿਤਗਣ੍ਠਿਕਤਭਾਵੋ ਅਤ੍ਥਿ. ਅਪਿਚ ਕਚਵਰੋ ਪਿਲੋਤਿਕੋਤਿ ਵੁਚ੍ਚਤਿ. ਇਮਸ੍ਮਿਞ੍ਚ ਸਾਸਨੇ ਸਮਣਕਚਵਰਂ ਨਾਮ ਪਤਿਟ੍ਠਾਤੁਂ ਨ ਲਭਤਿ. ਤੇਨੇਵਾਹ –

‘‘ਕਾਰਣ੍ਡਵਂ ਨਿਦ੍ਧਮਥ, ਕਸਮ੍ਬੁਞ੍ਚਾਪਕਸ੍ਸਥ;

ਤਤੋ ਪਲਾਪੇ ਵਾਹੇਥ, ਅਸ੍ਸਮਣੇ ਸਮਣਮਾਨਿਨੇ.

ਨਿਦ੍ਧਮਿਤ੍ਵਾਨ ਪਾਪਿਚ੍ਛੇ, ਪਾਪਆਚਾਰਗੋਚਰੇ;

ਸੁਦ੍ਧਾ ਸੁਦ੍ਧੇਹਿ ਸਂਵਾਸਂ, ਕਪ੍ਪਯਵ੍ਹੋ ਪਤਿਸ੍ਸਤਾ;

ਤਤੋ ਸਮਗ੍ਗਾ ਨਿਪਕਾ, ਦੁਕ੍ਖਸ੍ਸਨ੍ਤਂ ਕਰਿਸ੍ਸਥਾ’’ਤਿ. (ਸੁ. ਨਿ. ੨੮੩-੨੮੫);

ਇਤਿ ਸਮਣਕਚਵਰਸ੍ਸ ਛਿਨ੍ਨਤ੍ਤਾਪਿ ਅਯਂ ਧਮ੍ਮੋ ਛਿਨ੍ਨਪਿਲੋਤਿਕੋ ਨਾਮ ਹੋਤਿ. ਵਟ੍ਟਂ ਤੇਸਂ ਨਤ੍ਥਿ ਪਞ੍ਞਾਪਨਾਯਾਤਿ ਤੇਸਂ ਵਟ੍ਟਂ ਅਪਞ੍ਞਤ੍ਤਿਭਾਵਂ ਗਤਂ ਨਿਪ੍ਪਞ੍ਞਤ੍ਤਿਕਂ ਜਾਤਂ. ਏਵਰੂਪੋ ਮਹਾਖੀਣਾਸਵੋ ਏਵਂ ਸ੍ਵਾਕ੍ਖਾਤੇ ਸਾਸਨੇਯੇਵ ਉਪ੍ਪਜ੍ਜਤਿ. ਯਥਾ ਚ ਖੀਣਾਸਵੋ, ਏਵਂ ਅਨਾਗਾਮਿਆਦਯੋਪਿ.

ਤਤ੍ਥ ਧਮ੍ਮਾਨੁਸਾਰਿਨੋ ਸਦ੍ਧਾਨੁਸਾਰਿਨੋਤਿ ਇਮੇ ਦ੍ਵੇ ਸੋਤਾਪਤ੍ਤਿਮਗ੍ਗਟ੍ਠਾ ਹੋਨ੍ਤਿ. ਯਥਾਹ – ‘‘ਕਤਮੋ ਚ ਪੁਗ੍ਗਲੋ ਧਮ੍ਮਾਨੁਸਾਰੀ? ਯਸ੍ਸ ਪੁਗ੍ਗਲਸ੍ਸ ਸੋਤਾਪਤ੍ਤਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨਸ੍ਸ ਪਞ੍ਞਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ, ਪਞ੍ਞਾਵਾਹਿਂ ਪਞ੍ਞਾਪੁਬ੍ਬਙ੍ਗਮਂ ਅਰਿਯਮਗ੍ਗਂ ਭਾਵੇਤਿ. ਅਯਂ ਵੁਚ੍ਚਤਿ ਪੁਗ੍ਗਲੋ ਧਮ੍ਮਾਨੁਸਾਰੀ. ਸੋਤਾਪਤ੍ਤਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨੋ ਪੁਗ੍ਗਲੋ ਧਮ੍ਮਾਨੁਸਾਰੀ, ਫਲੇ ਠਿਤੋ ਦਿਟ੍ਠਿਪ੍ਪਤ੍ਤੋ. ਕਤਮੋ ਚ ਪੁਗ੍ਗਲੋ ਸਦ੍ਧਾਨੁਸਾਰੀ? ਯਸ੍ਸ ਪੁਗ੍ਗਲਸ੍ਸ ਸੋਤਾਪਤ੍ਤਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨਸ੍ਸ ਸਦ੍ਧਿਨ੍ਦ੍ਰਿਯਂ ਅਧਿਮਤ੍ਤਂ ਹੋਤਿ, ਸਦ੍ਧਾਵਾਹਿਂ ਸਦ੍ਧਾਪੁਬ੍ਬਙ੍ਗਮਂ ਅਰਿਯਮਗ੍ਗਂ ਭਾਵੇਤਿ. ਅਯਂ ਵੁਚ੍ਚਤਿ ਪੁਗ੍ਗਲੋ ਸਦ੍ਧਾਨੁਸਾਰੀ. ਸੋਤਾਪਤ੍ਤਿਫਲਸਚ੍ਛਿਕਿਰਿਯਾਯ ਪਟਿਪਨ੍ਨੋ ਪੁਗ੍ਗਲੋ ਸਦ੍ਧਾਨੁਸਾਰੀ, ਫਲੇ ਠਿਤੋ ਸਦ੍ਧਾਵਿਮੁਤ੍ਤੋ’’ਤਿ (ਪੁ. ਪ. ੩੦). ਯੇਸਂ ਮਯਿ ਸਦ੍ਧਾਮਤ੍ਤਂ ਪੇਮਮਤ੍ਤਨ੍ਤਿ ਇਮਿਨਾ ਯੇਸਂ ਅਞ੍ਞੋ ਅਰਿਯਧਮ੍ਮੋ ਨਤ੍ਥਿ, ਤਥਾਗਤੇ ਪਨ ਸਦ੍ਧਾਮਤ੍ਤਂ ਪੇਮਮਤ੍ਤਮੇਵ ਹੋਤਿ. ਤੇ ਵਿਪਸ੍ਸਕਪੁਗ੍ਗਲਾ ਅਧਿਪ੍ਪੇਤਾ. ਵਿਪਸ੍ਸਕਭਿਕ੍ਖੂਨਞ੍ਹਿ ਏਵਂ ਵਿਪਸ੍ਸਨਂ ਪਟ੍ਠਪੇਤ੍ਵਾ ਨਿਸਿਨ੍ਨਾਨਂ ਦਸਬਲੇ ਏਕਾ ਸਦ੍ਧਾ ਏਕਂ ਪੇਮਂ ਉਪ੍ਪਜ੍ਜਤਿ. ਤਾਯ ਸਦ੍ਧਾਯ ਤੇਨ ਪੇਮੇਨ ਹਤ੍ਥੇ ਗਹੇਤ੍ਵਾ ਸਗ੍ਗੇ ਠਪਿਤਾ ਵਿਯ ਹੋਨ੍ਤਿ, ਨਿਯਤਗਤਿਕਾ ਕਿਰ ਏਤੇ. ਪੋਰਾਣਕਤ੍ਥੇਰਾ ਪਨ ਏਵਰੂਪਂ ਭਿਕ੍ਖੁਂ ਚੂਲ਼ਸੋਤਾਪਨ੍ਨੋਤਿ ਵਦਨ੍ਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਅਲਗਦ੍ਦੂਪਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.