੧. ਕਕਚੂਪਮਸੁਤ੍ਤਵਣ੍ਣਨਾ

੨੨੨. ਏਵਂ ਮੇ ਸੁਤਨ੍ਤਿ ਕਕਚੂਪਮਸੁਤ੍ਤਂ. ਤਤ੍ਥ ਮੋਲ਼ਿਯਫਗ੍ਗੁਨੋਤਿ ਮੋਲ਼ੀਤਿ ਚੂਲ਼ਾ ਵੁਚ੍ਚਤਿ. ਯਥਾਹ –

‘‘ਛੇਤ੍ਵਾਨ ਮੋਲ਼ਿਂ ਵਰਗਨ੍ਧਵਾਸਿਤਂ,

ਵੇਹਾਯਸਂ ਉਕ੍ਖਿਪਿ ਸਕ੍ਯਪੁਙ੍ਗਵੋ;

ਰਤਨਚਙ੍ਕੋਟਵਰੇਨ ਵਾਸਵੋ,

ਸਹਸ੍ਸਨੇਤ੍ਤੋ ਸਿਰਸਾ ਪਟਿਗ੍ਗਹੀ’’ਤਿ.

ਸਾ ਤਸ੍ਸ ਗਿਹਿਕਾਲੇ ਮਹਤੀ ਅਹੋਸਿ, ਤੇਨਸ੍ਸ ਮੋਲ਼ਿਯਫਗ੍ਗੁਨੋਤਿ ਸਙ੍ਖਾ ਉਦਪਾਦਿ. ਪਬ੍ਬਜਿਤਮ੍ਪਿ ਨਂ ਤੇਨੇਵ ਨਾਮੇਨ ਸਞ੍ਜਾਨਨ੍ਤਿ. ਅਤਿਵੇਲਨ੍ਤਿ ਵੇਲਂ ਅਤਿਕ੍ਕਮਿਤ੍ਵਾ. ਤਤ੍ਥ ਕਾਲਵੇਲਾ, ਸੀਮਵੇਲਾ, ਸੀਲਵੇਲਾਤਿ ਤਿਵਿਧਾ ਵੇਲਾ. ‘‘ਤਾਯਂ ਵੇਲਾਯਂ ਇਮਂ ਉਦਾਨਂ ਉਦਾਨੇਸੀ’’ਤਿ (ਧਮ੍ਮਪਦੇ ਵਗ੍ਗਾਨਮੁਦ੍ਦਾਨਂ, ਗਾਥਾਨਮੁਦ੍ਦਾਨਂ; ਮਹਾਵ. ੧-੩) ਅਯਂ ਕਾਲਵੇਲਾ ਨਾਮ. ‘‘ਠਿਤਧਮ੍ਮੋ ਵੇਲਂ ਨਾਤਿਵਤ੍ਤਤੀ’’ਤਿ (ਚੂਲ਼ਵ. ੩੮੪; ਉਦਾ. ੪੫; ਅ. ਨਿ. ੮.੧੯) ਅਯਂ ਸੀਮਵੇਲਾ ਨਾਮ. ‘‘ਵੇਲਾਅਨਤਿਕ੍ਕਮੋ ਸੇਤੁਘਾਤੋ’’ਤਿ (ਧ. ਸ. ੨੯੯-੩੦੧) ਚ, ‘‘ਵੇਲਾ ਚੇਸਾ ਅਵੀਤਿਕ੍ਕਮਨਟ੍ਠੇਨਾ’’ਤਿ ਚ, ਅਯਂ ਸੀਲਵੇਲਾ ਨਾਮ. ਤਂ ਤਿਵਿਧਮ੍ਪਿ ਸੋ ਅਤਿਕ੍ਕਮਿਯੇਵ. ਭਿਕ੍ਖੁਨਿਯੋ ਹਿ ਓਵਦਿਤੁਂ ਕਾਲੋ ਨਾਮ ਅਤ੍ਥਿ, ਸੋ ਅਤ੍ਥਙ੍ਗਤੇਪਿ ਸੂਰਿਯੇ ਓਵਦਨ੍ਤੋ ਤਂ ਕਾਲਵੇਲਮ੍ਪਿ ਅਤਿਕ੍ਕਮਿ. ਭਿਕ੍ਖੁਨੀਨਂ ਓਵਾਦੇ ਪਮਾਣਂ ਨਾਮ ਅਤ੍ਥਿ ਸੀਮਾ ਮਰਿਯਾਦਾ. ਸੋ ਉਤ੍ਤਰਿਛਪ੍ਪਞ੍ਚਵਾਚਾਹਿ ਓਵਦਨ੍ਤੋ ਤਂ ਸੀਮਵੇਲਮ੍ਪਿ ਅਤਿਕ੍ਕਮਿ. ਕਥੇਨ੍ਤੋ ਪਨ ਦਵਸਹਗਤਂ ਕਤ੍ਵਾ ਦੁਟ੍ਠੁਲ੍ਲਾਪਤ੍ਤਿਪਹੋਨਕਂ ਕਥੇਤਿ, ਏਵਂ ਸੀਲਵੇਲਮ੍ਪਿ ਅਤਿਕ੍ਕਮਿ.

ਸਂਸਟ੍ਠੋਤਿ ਮਿਸ੍ਸੀਭੂਤੋ ਸਮਾਨਸੁਖਦੁਕ੍ਖੋ ਹੁਤ੍ਵਾ. ਸਮ੍ਮੁਖਾਤਿ ਪੁਰਤੋ. ਅਵਣ੍ਣਂ ਭਾਸਤੀਤਿ ਤਾ ਪਨ ਪਚਨਕੋਟ੍ਟਨਾਦੀਨਿ ਕਰੋਨ੍ਤਿਯੋ ਦਿਸ੍ਵਾ ਨਤ੍ਥਿ ਇਮਾਸਂ ਅਨਾਪਤ੍ਤਿ ਨਾਮ, ਇਮਾ ਭਿਕ੍ਖੁਨਿਯੋ ਅਨਾਚਾਰਾ ਦੁਬ੍ਬਚਾ ਪਗਬ੍ਭਾਤਿ ਅਗੁਣਂ ਕਥੇਤਿ. ਅਧਿਕਰਣਮ੍ਪਿ ਕਰੋਤੀਤਿ ਇਮੇਸਂ ਭਿਕ੍ਖੂਨਂ ਇਮਾ ਭਿਕ੍ਖੁਨਿਯੋ ਦਿਟ੍ਠਕਾਲਤੋ ਪਟ੍ਠਾਯ ਅਕ੍ਖੀਨਿ ਦਯ੍ਹਨ੍ਤਿ, ਇਮਸ੍ਮਿਂ ਵਿਹਾਰੇ ਪੁਪ੍ਫਪੂਜਾ ਵਾ ਆਸਨਧੋਵਨਪਰਿਭਣ੍ਡਕਰਣਾਦੀਨਿ ਵਾ ਇਮਾਸਂ ਵਸੇਨ ਵਤ੍ਤਨ੍ਤਿ. ਕੁਲਧੀਤਰੋ ਏਤਾ ਲਜ੍ਜਿਨਿਯੋ, ਤੁਮ੍ਹੇ ਇਮਾ ਇਦਞ੍ਚਿਦਞ੍ਚ ਵਦਥ, ਅਯਂ ਨਾਮ ਤੁਮ੍ਹਾਕਂ ਆਪਤ੍ਤਿ ਹੋਤਿ, ਵਿਨਯਧਰਾਨਂ ਸਨ੍ਤਿਕਂ ਆਗਨ੍ਤ੍ਵਾ ਵਿਨਿਚ੍ਛਯਂ ਮੇ ਦੇਥਾਤਿ ਅਧਿਕਰਣਂ ਆਕਡ੍ਢਤਿ.

ਮੋਲ਼ਿਯਫਗ੍ਗੁਨਸ੍ਸ ਅਵਣ੍ਣਂ ਭਾਸਤੀਤਿ ਨਤ੍ਥਿ ਇਮਸ੍ਸ ਭਿਕ੍ਖੁਨੋ ਅਨਾਪਤ੍ਤਿ ਨਾਮ. ਨਿਚ੍ਚਕਾਲਂ ਇਮਸ੍ਸ ਪਰਿਵੇਣਦ੍ਵਾਰਂ ਅਸੁਞ੍ਞਂ ਭਿਕ੍ਖੁਨੀਹੀਤਿ ਅਗੁਣਂ ਕਥੇਤਿ. ਅਧਿਕਰਣਮ੍ਪਿ ਕਰੋਨ੍ਤੀਤਿ ਇਮੇਸਂ ਭਿਕ੍ਖੂਨਂ ਮੋਲ਼ਿਯਫਗ੍ਗੁਨਤ੍ਥੇਰਸ੍ਸ ਦਿਟ੍ਠਕਾਲਤੋ ਪਟ੍ਠਾਯ ਅਕ੍ਖੀਨਿ ਦਯ੍ਹਨ੍ਤਿ. ਇਮਸ੍ਮਿਂ ਵਿਹਾਰੇ ਅਞ੍ਞੇਸਂ ਵਸਨਟ੍ਠਾਨਂ ਓਲੋਕੇਤੁਮ੍ਪਿ ਨ ਸਕ੍ਕਾ. ਵਿਹਾਰਂ ਆਗਤਭਿਕ੍ਖੁਨਿਯੋ ਓਵਾਦਂ ਵਾ ਪਟਿਸਨ੍ਥਾਰਂ ਵਾ ਉਦ੍ਦੇਸਪਦਂ ਵਾ ਥੇਰਮੇਵ ਨਿਸ੍ਸਾਯ ਲਭਨ੍ਤਿ, ਕੁਲਪੁਤ੍ਤਕੋ ਲਜ੍ਜੀ ਕੁਕ੍ਕੁਚ੍ਚਕੋ, ਏਵਰੂਪਂ ਨਾਮ ਤੁਮ੍ਹੇ ਇਦਞ੍ਚਿਦਞ੍ਚ ਵਦਥ, ਏਥ ਵਿਨਯਧਰਾਨਂ ਸਨ੍ਤਿਕੇ ਵਿਨਿਚ੍ਛਯਂ ਦੇਥਾਤਿ ਅਧਿਕਰਣਂ ਆਕਡ੍ਢਨ੍ਤਿ.

ਸੋ ਭਿਕ੍ਖੁ ਭਗਵਨ੍ਤਂ ਏਤਦਵੋਚਾਤਿ ਨੇਵ ਪਿਯਕਮ੍ਯਤਾਯ ਨ ਭੇਦਾਧਿਪ੍ਪਾਯੇਨ, ਅਤ੍ਥਕਾਮਤਾਯ ਅਵੋਚ. ਏਕਂ ਕਿਰਸ੍ਸ ਅਹੋਸਿ – ‘‘ਇਮਸ੍ਸ ਭਿਕ੍ਖੁਸ੍ਸ ਏਵਂ ਸਂਸਟ੍ਠਸ੍ਸ ਵਿਹਰਤੋ ਅਯਸੋ ਉਪ੍ਪਜ੍ਜਿਸ੍ਸਤਿ. ਸੋ ਸਾਸਨਸ੍ਸਾਪਿ ਅਵਣ੍ਣੋਯੇਵ. ਅਞ੍ਞੇਨ ਪਨ ਕਥਿਤੋ ਅਯਂ ਨ ਓਰਮਿਸ੍ਸਤਿ, ਭਗਵਤਾ ਧਮ੍ਮਂ ਦੇਸੇਤ੍ਵਾ ਓਵਦਿਤੋ ਓਰਮਿਸ੍ਸਤੀ’’ਤਿ ਤਸ੍ਸ ਅਤ੍ਥਕਾਮਤਾਯ ਭਗਵਨ੍ਤਂ ਏਤਂ, ‘‘ਆਯਸ੍ਮਾ, ਭਨ੍ਤੇ’’ਤਿਆਦਿਵਚਨਂ ਅਵੋਚ.

੨੨੩. ਆਮਨ੍ਤੇਹੀਤਿ ਜਾਨਾਪੇਹਿ. ਆਮਨ੍ਤੇਤੀਤਿ ਪਕ੍ਕੋਸਤਿ.

੨੨੪. ਸਦ੍ਧਾਤਿ ਸਦ੍ਧਾਯ. ਤਸ੍ਮਾਤਿ ਯਸ੍ਮਾ ਤ੍ਵਂ ਕੁਲਪੁਤ੍ਤੋ ਚੇਵ ਸਦ੍ਧਾਪਬ੍ਬਜਿਤੋ ਚ, ਯਸ੍ਮਾ ਵਾ ਤੇ ਏਤਾਹਿ ਸਦ੍ਧਿਂ ਸਂਸਟ੍ਠਸ੍ਸ ਵਿਹਰਤੋ ਯੇ ਤਾ ਅਕ੍ਕੋਸਿਸ੍ਸਨ੍ਤਿ ਵਾ, ਪਹਰਿਸ੍ਸਨ੍ਤਿ ਵਾ, ਤੇਸੁ ਦੋਮਨਸ੍ਸਂ ਉਪ੍ਪਜ੍ਜਿਸ੍ਸਤਿ, ਸਂਸਗ੍ਗੇ ਪਹੀਨੇ ਨੁਪ੍ਪਜ੍ਜਿਸ੍ਸਤਿ, ਤਸ੍ਮਾ. ਤਤ੍ਰਾਤਿ ਤਸ੍ਮਿਂ ਅਵਣ੍ਣਭਾਸਨੇ. ਗੇਹਸਿਤਾਤਿ ਪਞ੍ਚਕਾਮਗੁਣਨਿਸ੍ਸਿਤਾ. ਛਨ੍ਦਾਤਿ ਤਣ੍ਹਾਛਨ੍ਦਾਪਿ ਪਟਿਘਛਨ੍ਦਾਪਿ. ਵਿਪਰਿਣਤਨ੍ਤਿ ਰਤ੍ਤਮ੍ਪਿ ਚਿਤ੍ਤਂ ਵਿਪਰਿਣਤਂ. ਦੁਟ੍ਠਮ੍ਪਿ, ਮੂਲ਼੍ਹਮ੍ਪਿ ਚਿਤ੍ਤਂ ਵਿਪਰਿਣਤਂ. ਇਧ ਪਨ ਤਣ੍ਹਾਛਨ੍ਦਵਸੇਨ ਰਤ੍ਤਮ੍ਪਿ ਵਟ੍ਟਤਿ, ਪਟਿਘਛਨ੍ਦਵਸੇਨ ਦੁਟ੍ਠਮ੍ਪਿ ਵਟ੍ਟਤਿ. ਹਿਤਾਨੁਕਮ੍ਪੀਤਿ ਹਿਤੇਨ ਅਨੁਕਮ੍ਪਮਾਨੋ ਹਿਤੇਨ ਫਰਮਾਨੋ. ਨ ਦੋਸਨ੍ਤਰੋਤਿ ਨ ਦੋਸਚਿਤ੍ਤੋ ਭਵਿਸ੍ਸਾਮਿ.

੨੨੫. ਅਥ ਖੋ ਭਗਵਾਤਿ ਕਸ੍ਮਾ ਆਰਭਿ? ਫਗ੍ਗੁਨਸ੍ਸ ਕਿਰ ਏਤ੍ਤਕਂ ਓਵਾਦਂ ਸੁਤ੍ਵਾਪਿ, ‘‘ਭਿਕ੍ਖੁਨਿਸਂਸਗ੍ਗਤੋ ਓਰਮਿਸ੍ਸਾਮਿ ਵਿਰਮਿਸ੍ਸਾਮੀ’’ਤਿ ਚਿਤ੍ਤਮ੍ਪਿ ਨ ਉਪ੍ਪਨ੍ਨਂ, ਭਗਵਤਾ ਪਨ ਸਦ੍ਧਿਂ ਪਟਾਣੀ ਵਿਯ ਪਟਿਵਿਰੁਦ੍ਧੋ ਅਟ੍ਠਾਸਿ, ਅਥਸ੍ਸ ਭਗਵਤੋ ਯਥਾ ਨਾਮ ਜਿਘਚ੍ਛਿਤਸ੍ਸ ਭੋਜਨੇ, ਪਿਪਾਸਿਤਸ੍ਸ ਪਾਨੀਯੇ, ਸੀਤੇਨ ਫੁਟ੍ਠਸ੍ਸ ਉਣ੍ਹੇ ਦੁਕ੍ਖਿਤਸ੍ਸ ਸੁਖੇ ਪਤ੍ਥਨਾ ਉਪ੍ਪਜ੍ਜਤਿ. ਏਵਮੇਵ ਇਮਂ ਦੁਬ੍ਬਚਂ ਭਿਕ੍ਖੁਂ ਦਿਸ੍ਵਾ ਪਠਮਬੋਧਿਯਂ ਸੁਬ੍ਬਚਾ ਭਿਕ੍ਖੂ ਆਪਾਥਂ ਆਗਮਿਂਸੁ. ਅਥ ਤੇਸਂ ਵਣ੍ਣਂ ਕਥੇਤੁਕਾਮੋ ਹੁਤ੍ਵਾ ਇਮਂ ਦੇਸਨਂ ਆਰਭਿ.

ਤਤ੍ਥ ਆਰਾਧਯਿਂਸੂਤਿ ਗਣ੍ਹਿਂਸੁ ਪੂਰਯਿਂਸੁ. ਏਕਂ ਸਮਯਨ੍ਤਿ ਏਕਸ੍ਮਿਂ ਸਮਯੇ. ਏਕਾਸਨਭੋਜਨਨ੍ਤਿ ਏਕਂ ਪੁਰੇਭਤ੍ਤਭੋਜਨਂ. ਸੂਰਿਯੁਗ੍ਗਮਨਤੋ ਹਿ ਯਾਵ ਮਜ੍ਝਨ੍ਹਿਕਾ ਸਤ੍ਤਕ੍ਖਤ੍ਤੁਂ ਭੁਤ੍ਤਭੋਜਨਮ੍ਪਿ ਇਧ ਏਕਾਸਨਭੋਜਨਨ੍ਤੇਵ ਅਧਿਪ੍ਪੇਤਂ. ਅਪ੍ਪਾਬਾਧਤਨ੍ਤਿ ਨਿਰਾਬਾਧਤਂ. ਅਪ੍ਪਾਤਙ੍ਕਤਨ੍ਤਿ ਨਿਦ੍ਦੁਕ੍ਖਤਂ. ਲਹੁਟ੍ਠਾਨਨ੍ਤਿ ਸਰੀਰਸ੍ਸ ਸਲ੍ਲਹੁਕਂ ਉਟ੍ਠਾਨਂ. ਬਲਨ੍ਤਿ ਕਾਯਬਲਂ. ਫਾਸੁਵਿਹਾਰਨ੍ਤਿ ਕਾਯਸ੍ਸ ਸੁਖਵਿਹਾਰਂ. ਇਮਿਨਾ ਕਿਂ ਕਥਿਤਂ? ਦਿਵਾ ਵਿਕਾਲਭੋਜਨਂ ਪਜਹਾਪਿਤਕਾਲੋ ਕਥਿਤੋ. ਭਦ੍ਦਾਲਿਸੁਤ੍ਤੇ ਪਨ ਰਤ੍ਤਿਂ ਵਿਕਾਲਭੋਜਨਂ ਪਜਹਾਪਿਤਕਾਲੋ ਕਥਿਤੋ. ਇਮਾਨਿ ਹਿ ਦ੍ਵੇ ਭੋਜਨਾਨਿ ਭਗਵਾ ਨ ਏਕਪ੍ਪਹਾਰੇਨ ਪਜਹਾਪੇਸਿ. ਕਸ੍ਮਾ? ਇਮਾਨੇਵ ਹਿ ਦ੍ਵੇ ਭੋਜਨਾਨਿ ਵਟ੍ਟੇ ਸਤ੍ਤਾਨਂ ਆਚਿਣ੍ਣਾਨਿ. ਸਨ੍ਤਿ ਕੁਲਪੁਤ੍ਤਾ ਸੁਖੁਮਾਲਾ, ਤੇ ਏਕਤੋ ਦ੍ਵੇਪਿ ਭੋਜਨਾਨਿ ਪਜਹਨ੍ਤਾ ਕਿਲਮਨ੍ਤਿ. ਤਸ੍ਮਾ ਏਕਤੋ ਅਪਜਹਾਪੇਤ੍ਵਾ ਏਕਸ੍ਮਿਂ ਕਾਲੇ ਦਿਵਾ ਵਿਕਾਲਭੋਜਨਂ, ਏਕਸ੍ਮਿਂ ਰਤ੍ਤਿਂ ਵਿਕਾਲਭੋਜਨਨ੍ਤਿ ਵਿਸੁਂ ਪਜਹਾਪੇਸਿ. ਤੇਸੁ ਇਧ ਦਿਵਾ ਵਿਕਾਲਭੋਜਨਂ ਪਜਹਾਪਿਤਕਾਲੋ ਕਥਿਤੋ. ਤਤ੍ਥ ਯਸ੍ਮਾ ਬੁਦ੍ਧਾ ਨ ਭਯਂ ਦਸ੍ਸੇਤ੍ਵਾ ਤਜ੍ਜੇਤ੍ਵਾ ਪਜਹਾਪੇਨ੍ਤਿ, ਆਨਿਸਂਸਂ ਪਨ ਦਸ੍ਸੇਤ੍ਵਾ ਪਜਹਾਪੇਨ੍ਤਿ, ਏਵਞ੍ਹਿ ਸਤ੍ਤਾ ਸੁਖੇਨ ਪਜਹਨ੍ਤਿ. ਤਸ੍ਮਾ ਆਨਿਸਂਸਂ ਦਸ੍ਸੇਨ੍ਤੋ ਇਮੇ ਪਞ੍ਚ ਗੁਣੇ ਦਸ੍ਸੇਸਿ. ਅਨੁਸਾਸਨੀ ਕਰਣੀਯਾਤਿ ਪੁਨਪ੍ਪੁਨਂ ਸਾਸਨੇ ਕਤ੍ਤਬ੍ਬਂ ਨਾਹੋਸਿ. ‘‘ਇਦਂ ਕਰੋਥ, ਇਦਂ ਮਾ ਕਰੋਥਾ’’ਤਿ ਸਤੁਪ੍ਪਾਦਕਰਣੀਯਮਤ੍ਤਮੇਵ ਅਹੋਸਿ. ਤਾਵਤ੍ਤਕੇਨੇਵ ਤੇ ਕਤ੍ਤਬ੍ਬਂ ਅਕਂਸੁ, ਪਹਾਤਬ੍ਬਂ ਪਜਹਿਂਸੁ, ਪਠਮਬੋਧਿਯਂ, ਭਿਕ੍ਖਵੇ, ਸੁਬ੍ਬਚਾ ਭਿਕ੍ਖੂ ਅਹੇਸੁਂ ਅਸ੍ਸਵਾ ਓਵਾਦਪਟਿਕਰਾਤਿ.

ਇਦਾਨਿ ਨੇਸਂ ਸੁਬ੍ਬਚਭਾਵਦੀਪਿਕਂ ਉਪਮਂ ਆਹਰਨ੍ਤੋ ਸੇਯ੍ਯਥਾਪੀਤਿਆਦਿਮਾਹ. ਤਤ੍ਥ ਸੁਭੂਮਿਯਨ੍ਤਿ ਸਮਭੂਮਿਯਂ. ‘‘ਸੁਭੂਮ੍ਯਂ ਸੁਖੇਤ੍ਤੇ ਵਿਹਤਖਾਣੁਕੇ ਬੀਜਾਨਿ ਪਤਿਟ੍ਠਪੇਯ੍ਯਾ’’ਤਿ (ਦੀ. ਨਿ. ੨.੪੩੮) ਏਤ੍ਥ ਪਨ ਮਣ੍ਡਭੂਮਿ ਸੁਭੂਮੀਤਿ ਆਗਤਾ. ਚਤੁਮਹਾਪਥੇਤਿ ਦ੍ਵਿਨ੍ਨਂ ਮਹਾਮਗ੍ਗਾਨਂ ਵਿਨਿਵਿਜ੍ਝਿਤ੍ਵਾ ਗਤਟ੍ਠਾਨੇ. ਆਜਞ੍ਞਰਥੋਤਿ ਵਿਨੀਤਅਸ੍ਸਰਥੋ. ਓਧਸ੍ਤਪਤੋਦੋਤਿ ਯਥਾ ਰਥਂ ਅਭਿਰੁਹਿਤ੍ਵਾ ਠਿਤੇਨ ਸਕ੍ਕਾ ਹੋਤਿ ਗਣ੍ਹਿਤੁਂ, ਏਵਂ ਆਲਮ੍ਬਨਂ ਨਿਸ੍ਸਾਯ ਤਿਰਿਯਤੋ ਠਪਿਤਪਤੋਦੋ. ਯੋਗ੍ਗਾਚਰਿਯੋਤਿ ਅਸ੍ਸਾਚਰਿਯੋ. ਸ੍ਵੇਵ ਅਸ੍ਸਦਮ੍ਮੇ ਸਾਰੇਤੀਤਿ ਅਸ੍ਸਦਮ੍ਮਸਾਰਥਿ. ਯੇਨਿਚ੍ਛਕਨ੍ਤਿ ਯੇਨ ਯੇਨ ਮਗ੍ਗੇਨ ਇਚ੍ਛਤਿ. ਯਦਿਚ੍ਛਕਨ੍ਤਿ ਯਂ ਯਂ ਗਤਿਂ ਇਚ੍ਛਤਿ. ਸਾਰੇਯ੍ਯਾਤਿ ਉਜੁਕਂ ਪੁਰਤੋ ਪੇਸੇਯ੍ਯ. ਪਚ੍ਚਾਸਾਰੇਯ੍ਯਾਤਿ ਪਟਿਨਿਵਤ੍ਤੇਯ੍ਯ.

ਏਵਮੇਵ ਖੋਤਿ ਯਥਾ ਹਿ ਸੋ ਯੋਗ੍ਗਾਚਰਿਯੋ ਯੇਨ ਯੇਨ ਮਗ੍ਗੇਨ ਗਮਨਂ ਇਚ੍ਛਤਿ, ਤਂ ਤਂ ਅਸ੍ਸਾ ਆਰੁਲ਼੍ਹਾਵ ਹੋਨ੍ਤਿ. ਯਾਯ ਯਾਯ ਚ ਗਤਿਯਾ ਇਚ੍ਛਤਿ, ਸਾ ਸਾ ਗਤਿ ਗਹਿਤਾਵ ਹੋਤਿ. ਰਥਂ ਪੇਸੇਤ੍ਵਾ ਅਸ੍ਸਾ ਨੇਵ ਵਾਰੇਤਬ੍ਬਾ ਨ ਵਿਜ੍ਝਿਤਬ੍ਬਾ ਹੋਨ੍ਤਿ. ਕੇਵਲਂ ਤੇਸਂ ਸਮੇ ਭੂਮਿਭਾਗੇ ਖੁਰੇਸੁ ਨਿਮਿਤ੍ਤਂ ਠਪੇਤ੍ਵਾ ਗਮਨਮੇਵ ਪਸ੍ਸਿਤਬ੍ਬਂ ਹੋਤਿ. ਏਵਂ ਮਯ੍ਹਮ੍ਪਿ ਤੇਸੁ ਭਿਕ੍ਖੂਸੁ ਪੁਨਪ੍ਪੁਨਂ ਵਤ੍ਤਬ੍ਬਂ ਨਾਹੋਸਿ. ਇਦਂ ਕਰੋਥ ਇਦਂ ਮਾ ਕਰੋਥਾਤਿ ਸਤੁਪ੍ਪਾਦਨਮਤ੍ਤਮੇਵ ਕਤ੍ਤਬ੍ਬਂ ਹੋਤਿ. ਤੇਹਿਪਿ ਤਾਵਦੇਵ ਕਤ੍ਤਬ੍ਬਂ ਕਤਮੇਵ ਹੋਤਿ, ਅਕਤ੍ਤਬ੍ਬਂ ਜਹਿਤਮੇਵ. ਤਸ੍ਮਾਤਿ ਯਸ੍ਮਾ ਸੁਬ੍ਬਚਾ ਯੁਤ੍ਤਯਾਨਪਟਿਭਾਗਾ ਹੁਤ੍ਵਾ ਸਤੁਪ੍ਪਾਦਨਮਤ੍ਤੇਨੇਵ ਪਜਹਿਂਸੁ, ਤਸ੍ਮਾ ਤੁਮ੍ਹੇਪਿ ਪਜਹਥਾਤਿ ਅਤ੍ਥੋ. ਏਲਣ੍ਡੇਹੀਤਿ ਏਲਣ੍ਡਾ ਕਿਰ ਸਾਲਦੂਸਨਾ ਹੋਨ੍ਤਿ, ਤਸ੍ਮਾ ਏਵਮਾਹ. ਵਿਸੋਧੇਯ੍ਯਾਤਿ ਏਲਣ੍ਡੇ ਚੇਵ ਅਞ੍ਞਾ ਚ ਵਲ੍ਲਿਯੋ ਛਿਨ੍ਦਿਤ੍ਵਾ ਬਹਿ ਨੀਹਰਣੇਨ ਸੋਧੇਯ੍ਯ. ਸੁਜਾਤਾਤਿ ਸੁਸਣ੍ਠਿਤਾ. ਸਮ੍ਮਾ ਪਰਿਹਰੇਯ੍ਯਾਤਿ ਮਰਿਯਾਦਂ ਬਨ੍ਧਿਤ੍ਵਾ ਉਦਕਾਸਿਞ੍ਚਨੇਨਪਿ ਕਾਲੇਨਕਾਲਂ ਮੂਲਮੂਲੇ ਖਣਨੇਨਪਿ ਵਲ੍ਲਿਗੁਮ੍ਬਾਦਿਚ੍ਛੇਦਨੇਨਪਿ ਕਿਪਿਲ੍ਲਪੂਟਕਹਰਣੇਨਪਿ ਮਕ੍ਕਟਕਜਾਲਸੁਕ੍ਖਦਣ੍ਡਕਹਰਣੇਨਪਿ ਸਮ੍ਮਾ ਵਡ੍ਢੇਤ੍ਵਾ ਪੋਸੇਯ੍ਯ. ਵੁਦ੍ਧਿਆਦੀਨਿ ਵੁਤ੍ਤਤ੍ਥਾਨੇਵ.

੨੨੬. ਇਦਾਨਿ ਅਕ੍ਖਨ੍ਤਿਯਾ ਦੋਸਂ ਦਸ੍ਸੇਨ੍ਤੋ ਭੂਤਪੁਬ੍ਬਨ੍ਤਿਆਦਿਮਾਹ. ਤਤ੍ਥ ਵੇਦੇਹਿਕਾਤਿ ਵਿਦੇਹਰਟ੍ਠਵਾਸਿਕਸ੍ਸ ਧੀਤਾ. ਅਥ ਵਾ ਵੇਦੋਤਿ ਪਞ੍ਞਾ ਵੁਚ੍ਚਤਿ, ਵੇਦੇਨ ਈਹਤਿ ਇਰਿਯਤੀਤਿ ਵੇਦੇਹਿਕਾ, ਪਣ੍ਡਿਤਾਤਿ ਅਤ੍ਥੋ. ਗਹਪਤਾਨੀਤਿ ਘਰਸਾਮਿਨੀ. ਕਿਤ੍ਤਿਸਦ੍ਦੋਤਿ ਕਿਤ੍ਤਿਘੋਸੋ. ਸੋਰਤਾਤਿ ਸੋਰਚ੍ਚੇਨ ਸਮਨ੍ਨਾਗਤਾ. ਨਿਵਾਤਾਤਿ ਨਿਵਾਤਵੁਤ੍ਤਿ. ਉਪਸਨ੍ਤਾਤਿ ਨਿਬ੍ਬੁਤਾ. ਦਕ੍ਖਾਤਿ ਭਤ੍ਤਪਚਨਸਯਨਤ੍ਥਰਣਦੀਪੁਜ੍ਜਲਨਾਦਿਕਮ੍ਮੇਸੁ ਛੇਕਾ. ਅਨਲਸਾਤਿ ਉਟ੍ਠਾਹਿਕਾ, ਸੁਸਂਵਿਹਿਤਕਮ੍ਮਨ੍ਤਾਤਿ ਸੁਟ੍ਠੁ ਸਂਵਿਹਿਤਕਮ੍ਮਨ੍ਤਾ. ਏਕਾ ਅਨਲਸਾ ਹੋਤਿ, ਯਂ ਯਂ ਪਨ ਭਾਜਨਂ ਗਣ੍ਹਾਤਿ, ਤਂ ਤਂ ਭਿਨ੍ਦਤਿ ਵਾ ਛਿਦ੍ਦਂ ਵਾ ਕਰੋਤਿ, ਅਯਂ ਨ ਤਾਦਿਸਾਤਿ ਦਸ੍ਸੇਤਿ.

ਦਿਵਾ ਉਟ੍ਠਾਸੀਤਿ ਪਾਤੋਵ ਕਤ੍ਤਬ੍ਬਾਨਿ ਧੇਨੁਦੁਹਨਾਦਿਕਮ੍ਮਾਨਿ ਅਕਤ੍ਵਾ ਉਸ੍ਸੂਰੇ ਉਟ੍ਠਿਤਾ. ਹੇ ਜੇ ਕਾਲ਼ੀਤਿ ਅਰੇ ਕਾਲ਼ਿ. ਕਿਂ ਜੇ ਦਿਵਾ ਉਟ੍ਠਾਸੀਤਿ ਕਿਂ ਤੇ ਕਿਞ੍ਚਿ ਅਫਾਸੁਕਂ ਅਤ੍ਥਿ, ਕਿਂ ਦਿਵਾ ਉਟ੍ਠਾਸੀਤਿ? ਨੋ ਵਤ ਰੇ ਕਿਞ੍ਚੀਤਿ ਅਰੇ ਯਦਿ ਤੇ ਨ ਕਿਞ੍ਚਿ ਅਫਾਸੁਕਂ ਅਤ੍ਥਿ, ਨੇਵ ਸੀਸਂ ਰੁਜ੍ਝਤਿ, ਨ ਪਿਟ੍ਠਿ, ਅਥ ਕਸ੍ਮਾ ਪਾਪਿ ਦਾਸਿ ਦਿਵਾ ਉਟ੍ਠਾਸੀਤਿ ਕੁਪਿਤਾ ਅਨਤ੍ਤਮਨਾ ਭਾਕੁਟਿਮਕਾਸਿ. ਦਿਵਾਤਰਂ ਉਟ੍ਠਾਸੀਤਿ ਪੁਨਦਿਵਸੇ ਉਸ੍ਸੂਰਤਰਂ ਉਟ੍ਠਾਸਿ. ਅਨਤ੍ਤਮਨਵਾਚਨ੍ਤਿ ਅਰੇ ਪਾਪਿ ਦਾਸਿ ਅਤ੍ਤਨੋ ਪਮਾਣਂ ਨ ਜਾਨਾਸਿ; ਕਿਂ ਅਗ੍ਗਿਂ ਸੀਤੋਤਿ ਮਞ੍ਞਸਿ, ਇਦਾਨਿ ਤਂ ਸਿਕ੍ਖਾਪੇਸ੍ਸਾਮੀਤਿਆਦੀਨਿ ਵਦਮਾਨਾ ਕੁਪਿਤਵਚਨਂ ਨਿਚ੍ਛਾਰੇਸਿ.

ਪਟਿਵਿਸਕਾਨਨ੍ਤਿ ਸਾਮਨ੍ਤਗੇਹਵਾਸੀਨਂ. ਉਜ੍ਝਾਪੇਸੀਤਿ ਅਵਜਾਨਾਪੇਸਿ. ਚਣ੍ਡੀਤਿ ਅਸੋਰਤਾ ਕਿਬ੍ਬਿਸਾ. ਇਤਿ ਯਤ੍ਤਕਾ ਗੁਣਾ, ਤਤੋ ਦਿਗੁਣਾ ਦੋਸਾ ਉਪ੍ਪਜ੍ਜਿਂਸੁ. ਗੁਣਾ ਨਾਮ ਸਣਿਕਂ ਸਣਿਕਂ ਆਗਚ੍ਛਨ੍ਤਿ; ਦੋਸਾ ਏਕਦਿਵਸੇਨੇਵ ਪਤ੍ਥਟਾ ਹੋਨ੍ਤਿ. ਸੋਰਤਸੋਰਤੋਤਿ ਅਤਿਵਿਯ ਸੋਰਤੋ, ਸੋਤਾਪਨ੍ਨੋ ਨੁ ਖੋ, ਸਕਦਾਗਾਮੀ ਅਨਾਗਾਮੀ ਅਰਹਾ ਨੁ ਖੋਤਿ ਵਤ੍ਤਬ੍ਬਤਂ ਆਪਜ੍ਜਤਿ. ਫੁਸਨ੍ਤੀਤਿ ਫੁਸਨ੍ਤਾ ਘਟ੍ਟੇਨ੍ਤਾ ਆਪਾਥਂ ਆਗਚ੍ਛਨ੍ਤਿ.

ਅਥ ਭਿਕ੍ਖੁ ਸੋਰਤੋਤਿ ਵੇਦਿਤਬ੍ਬੋਤਿ ਅਥ ਅਧਿਵਾਸਨਕ੍ਖਨ੍ਤਿਯਂ ਠਿਤੋ ਭਿਕ੍ਖੁ ਸੋਰਤੋਤਿ ਵੇਦਿਤਬ੍ਬੋ. ਯੋ ਚੀਵਰ…ਪੇ… ਪਰਿਕ੍ਖਾਰਹੇਤੂਤਿ ਯੋ ਏਤਾਨਿ ਚੀਵਰਾਦੀਨਿ ਪਣੀਤਪਣੀਤਾਨਿ ਲਭਨ੍ਤੋ ਪਾਦਪਰਿਕਮ੍ਮਪਿਟ੍ਠਿਪਰਿਕਮ੍ਮਾਦੀਨਿ ਏਕਵਚਨੇਨੇਵ ਕਰੋਤਿ. ਅਲਭਮਾਨੋਤਿ ਯਥਾ ਪੁਬ੍ਬੇ ਲਭਤਿ, ਏਵਂ ਅਲਭਨ੍ਤੋ. ਧਮ੍ਮਞ੍ਞੇਵ ਸਕ੍ਕਰੋਨ੍ਤੋਤਿ ਧਮ੍ਮਂਯੇਵ ਸਕ੍ਕਾਰਂ ਸੁਕਤਕਾਰਂ ਕਰੋਨ੍ਤੋ. ਗਰੁਂ ਕਰੋਨ੍ਤੋਤਿ ਗਰੁਭਾਰਿਯਂ ਕਰੋਨ੍ਤੋ. ਮਾਨੇਨ੍ਤੋਤਿ ਮਨੇਨ ਪਿਯਂ ਕਰੋਨ੍ਤੋ. ਪੂਜੇਨ੍ਤੋਤਿ ਪਚ੍ਚਯਪੂਜਾਯ ਪੂਜੇਨ੍ਤੋ. ਅਪਚਾਯਮਾਨੋਤਿ ਧਮ੍ਮਂਯੇਵ ਅਪਚਾਯਮਾਨੋ ਅਪਚਿਤਿਂ ਨੀਚਵੁਤ੍ਤਿਂ ਦਸ੍ਸੇਨ੍ਤੋ.

੨੨੭. ਏਵਂ ਅਕ੍ਖਨ੍ਤਿਯਾ ਦੋਸਂ ਦਸ੍ਸੇਤ੍ਵਾ ਇਦਾਨਿ ਯੇ ਅਧਿਵਾਸੇਨ੍ਤਿ, ਤੇ ਏਵਂ ਅਧਿਵਾਸੇਨ੍ਤੀਤਿ ਪਞ੍ਚ ਵਚਨਪਥੇ ਦਸ੍ਸੇਨ੍ਤੋ ਪਞ੍ਚਿਮੇ, ਭਿਕ੍ਖਵੇਤਿਆਦਿਮਾਹ. ਤਤ੍ਥ ਕਾਲੇਨਾਤਿ ਯੁਤ੍ਤਪਤ੍ਤਕਾਲੇਨ. ਭੂਤੇਨਾਤਿ ਸਤਾ ਵਿਜ੍ਜਮਾਨੇਨ. ਸਣ੍ਹੇਨਾਤਿ ਸਮ੍ਮਟ੍ਠੇਨ. ਅਤ੍ਥਸਞ੍ਹਿਤੇਨਾਤਿ ਅਤ੍ਥਨਿਸ੍ਸਿਤੇਨ ਕਾਰਣਨਿਸ੍ਸਿਤੇਨ. ਅਕਾਲੇਨਾਤਿਆਦੀਨਿ ਤੇਸਂਯੇਵ ਪਟਿਪਕ੍ਖਵਸੇਨ ਵੇਦਿਤਬ੍ਬਾਨਿ. ਮੇਤ੍ਤਚਿਤ੍ਤਾਤਿ ਉਪ੍ਪਨ੍ਨਮੇਤ੍ਤਚਿਤ੍ਤਾ ਹੁਤ੍ਵਾ. ਦੋਸਨ੍ਤਰਾਤਿ ਦੁਟ੍ਠਚਿਤ੍ਤਾ, ਅਬ੍ਭਨ੍ਤਰੇ ਉਪ੍ਪਨ੍ਨਦੋਸਾ ਹੁਤ੍ਵਾ. ਤਤ੍ਰਾਤਿ ਤੇਸੁ ਵਚਨਪਥੇਸੁ. ਫਰਿਤ੍ਵਾਤਿ ਅਧਿਮੁਚ੍ਚਿਤ੍ਵਾ. ਤਦਾਰਮ੍ਮਣਞ੍ਚਾਤਿ ਕਥਂ ਤਦਾਰਮ੍ਮਣਂ ਸਬ੍ਬਾਵਨ੍ਤਂ ਲੋਕਂ ਕਰੋਤਿ? ਪਞ੍ਚ ਵਚਨਪਥੇ ਗਹੇਤ੍ਵਾ ਆਗਤਂ ਪੁਗ੍ਗਲਂ ਮੇਤ੍ਤਚਿਤ੍ਤਸ੍ਸ ਆਰਮ੍ਮਣਂ ਕਤ੍ਵਾ ਪੁਨ ਤਸ੍ਸੇਵ ਮੇਤ੍ਤਚਿਤ੍ਤਸ੍ਸ ਅਵਸੇਸਸਤ੍ਤੇ ਆਰਮ੍ਮਣਂ ਕਰੋਨ੍ਤੋ ਸਬ੍ਬਾਵਨ੍ਤਂ ਲੋਕਂ ਤਦਾਰਮ੍ਮਣਂ ਕਰੋਤਿ ਨਾਮ. ਤਤ੍ਰਾਯਂ ਵਚਨਤ੍ਥੋ. ਤਦਾਰਮ੍ਮਣਞ੍ਚਾਤਿ ਤਸ੍ਸੇਵ ਮੇਤ੍ਤਚਿਤ੍ਤਸ੍ਸ ਆਰਮ੍ਮਣਂ ਕਤ੍ਵਾ. ਸਬ੍ਬਾਵਨ੍ਤਨ੍ਤਿ ਸਬ੍ਬਸਤ੍ਤਵਨ੍ਤਂ. ਲੋਕਨ੍ਤਿ ਸਤ੍ਤਲੋਕਂ. ਵਿਪੁਲੇਨਾਤਿ ਅਨੇਕਸਤ੍ਤਾਰਮ੍ਮਣੇਨ. ਮਹਗ੍ਗਤੇਨਾਤਿ ਮਹਗ੍ਗਤਭੂਮਿਕੇਨ. ਅਪ੍ਪਮਾਣੇਨਾਤਿ ਸੁਭਾਵਿਤੇਨ. ਅਵੇਰੇਨਾਤਿ ਨਿਦ੍ਦੋਸੇਨ. ਅਬ੍ਯਾਬਜ੍ਝੇਨਾਤਿ ਨਿਦ੍ਦੁਕ੍ਖੇਨ. ਫਰਿਤ੍ਵਾ ਵਿਹਰਿਸ੍ਸਾਮਾਤਿ ਏਵਰੂਪੇਨ ਮੇਤ੍ਤਾਸਹਗਤੇਨ ਚੇਤਸਾ ਤਞ੍ਚ ਪੁਗ੍ਗਲਂ ਸਬ੍ਬਞ੍ਚ ਲੋਕਂ ਤਸ੍ਸ ਚਿਤ੍ਤਸ੍ਸ ਆਰਮ੍ਮਣਂ ਕਤ੍ਵਾ ਅਧਿਮੁਚ੍ਚਿਤ੍ਵਾ ਵਿਹਰਿਸ੍ਸਾਮ.

੨੨੮. ਇਦਾਨਿ ਤਦਤ੍ਥਦੀਪਿਕਂ ਉਪਮਂ ਆਹਰਨ੍ਤੋ ਸੇਯ੍ਯਥਾਪੀਤਿਆਦਿਮਾਹ. ਤਤ੍ਥ ਅਪਥਵਿਨ੍ਤਿ ਨਿਪ੍ਪਥਵਿਂ ਕਰਿਸ੍ਸਾਮੀਤਿ ਅਤ੍ਥੋ. ਤਤ੍ਰ ਤਤ੍ਰਾਤਿ ਤਸ੍ਮਿਂ ਤਸ੍ਮਿਂ ਠਾਨੇ. ਵਿਕਿਰੇਯ੍ਯਾਤਿ ਪਚ੍ਛਿਯਾ ਪਂਸੁਂ ਉਦ੍ਧਰਿਤ੍ਵਾ ਬੀਜਾਨਿ ਵਿਯ ਵਿਕਿਰੇਯ੍ਯ. ਓਟ੍ਠੁਭੇਯ੍ਯਾਤਿ ਖੇਲ਼ਂ ਪਾਤੇਯ੍ਯ. ਅਪਥਵਿਂ ਕਰੇਯ੍ਯਾਤਿ ਏਵਂ ਕਾਯੇਨ ਚ ਵਾਚਾਯ ਚ ਪਯੋਗਂ ਕਤ੍ਵਾਪਿ ਸਕ੍ਕੁਣੇਯ੍ਯ ਅਪਥਵਿਂ ਕਾਤੁਨ੍ਤਿ? ਗਮ੍ਭੀਰਾਤਿ ਬਹਲਤ੍ਤੇਨ ਦ੍ਵਿਯੋਜਨਸਤਸਹਸ੍ਸਾਨਿ ਚਤ੍ਤਾਰਿ ਚ ਨਹੁਤਾਨਿ ਗਮ੍ਭੀਰਾ. ਅਪ੍ਪਮੇਯ੍ਯਾਤਿ ਤਿਰਿਯਂ ਪਨ ਅਪਰਿਚ੍ਛਿਨ੍ਨਾ. ਏਵਮੇਵ ਖੋਤਿ ਏਤ੍ਥ ਇਦਂ ਓਪਮ੍ਮਸਂਸਨ੍ਦਨਂ – ਪਥਵੀ ਵਿਯ ਹਿ ਮੇਤ੍ਤਚਿਤ੍ਤਂ ਦਟ੍ਠਬ੍ਬਂ. ਕੁਦਾਲਪਿਟਕਂ ਗਹੇਤ੍ਵਾ ਆਗਤਪੁਰਿਸੋ ਵਿਯ ਪਞ੍ਚ ਵਚਨਪਥੇ ਗਹੇਤ੍ਵਾ ਆਗਤਪੁਗ੍ਗਲੋ. ਯਥਾ ਸੋ ਕੁਦਾਲਪਿਟਕੇਨ ਮਹਾਪਥਵਿਂ ਅਪਥਵਿਂ ਕਾਤੁਂ ਨ ਸਕ੍ਕੋਤਿ, ਏਵਂ ਵੋ ਪਞ੍ਚ ਵਚਨਪਥੇ ਗਹੇਤ੍ਵਾ ਆਗਤਪੁਗ੍ਗਲੋ ਮੇਤ੍ਤਚਿਤ੍ਤਸ੍ਸ ਅਞ੍ਞਥਤ੍ਤਂ ਕਾਤੁਂ ਨ ਸਕ੍ਖਿਸ੍ਸਤੀਤਿ.

੨੨੯. ਦੁਤਿਯਉਪਮਾਯਂ ਹਲਿਦ੍ਦਿਨ੍ਤਿ ਯਂਕਿਞ੍ਚਿ ਪੀਤਕਵਣ੍ਣਂ. ਨੀਲਨ੍ਤਿ ਕਂਸਨੀਲਂ ਵਾ ਪਲਾਸਨੀਲਂ ਵਾ. ਅਰੂਪੀਤਿ ਅਰੂਪੋ. ਨਨੁ ਚ, ਦ੍ਵਿਨ੍ਨਂ ਕਟ੍ਠਾਨਂ ਵਾ ਦ੍ਵਿਨ੍ਨਂ ਰੁਕ੍ਖਾਨਂ ਵਾ ਦ੍ਵਿਨ੍ਨਂ ਸੇਯ੍ਯਾਨਂ ਵਾ ਦ੍ਵਿਨ੍ਨਂ ਸੇਲਾਨਂ ਵਾ ਅਨ੍ਤਰਂ ਪਰਿਚ੍ਛਿਨ੍ਨਾਕਾਸਰੂਪਨ੍ਤਿ ਆਗਤਂ, ਕਸ੍ਮਾ ਇਧ ਅਰੂਪੀਤਿ ਵੁਤ੍ਤੋਤਿ? ਸਨਿਦਸ੍ਸਨਭਾਵਪਟਿਕ੍ਖੇਪਤੋ. ਤੇਨੇਵਾਹ ‘‘ਅਨਿਦਸ੍ਸਨੋ’’ਤਿ. ਤਸ੍ਮਿਞ੍ਹਿ ਰੂਪਂ ਲਿਖਿਤੁਂ, ਰੂਪਪਾਤੁਭਾਵਂ ਦਸ੍ਸੇਤੁਂ ਨ ਸਕ੍ਕਾ, ਤਸ੍ਮਾ ‘‘ਅਰੂਪੀ’’ਤਿ ਵੁਤ੍ਤੋ. ਅਨਿਦਸ੍ਸਨੋਤਿ ਦਸ੍ਸਨਸ੍ਸ ਚਕ੍ਖੁਵਿਞ੍ਞਾਣਸ੍ਸ ਅਨਾਪਾਥੋ. ਉਪਮਾਸਂਸਨ੍ਦਨੇ ਪਨੇਤ੍ਥ ਆਕਾਸੋ ਵਿਯ ਮੇਤ੍ਤਚਿਤ੍ਤਂ. ਤੁਲਿਕਪਞ੍ਚਮਾ ਚਤ੍ਤਾਰੋ ਰਙ੍ਗਜਾਤਾ ਵਿਯ ਪਞ੍ਚ ਵਚਨਪਥਾ, ਤੁਲਿਕਪਞ੍ਚਮੇ ਰਙ੍ਗੇ ਗਹੇਤ੍ਵਾ ਆਗਤਪੁਰਿਸੋ ਵਿਯ ਪਞ੍ਚ ਵਚਨਪਥੇ ਗਹੇਤ੍ਵਾ ਆਗਤਪੁਗ੍ਗਲੋ. ਯਥਾ ਸੋ ਤੁਲਿਕਪਞ੍ਚਮੇਹਿ ਰਙ੍ਗੇਹਿ ਆਕਾਸੇ ਰੂਪਪਾਤੁਭਾਵਂ ਕਾਤੁਂ ਨ ਸਕ੍ਕੋਤਿ, ਏਵਂ ਵੋ ਪਞ੍ਚ ਵਚਨਪਥੇ ਗਹੇਤ੍ਵਾ ਆਗਤਪੁਗ੍ਗਲੋ ਮੇਤ੍ਤਚਿਤ੍ਤਸ੍ਸ ਅਞ੍ਞਥਤ੍ਤਂ ਕਤ੍ਵਾ ਦੋਸੁਪ੍ਪਤ੍ਤਿਂ ਦਸ੍ਸੇਤੁਂ ਨ ਸਕ੍ਖਿਸ੍ਸਤੀਤਿ.

੨੩੦. ਤਤਿਯਉਪਮਾਯਂ ਆਦਿਤ੍ਤਨ੍ਤਿ ਪਜ੍ਜਲਿਤਂ. ਗਮ੍ਭੀਰਾ ਅਪ੍ਪਮੇਯ੍ਯਾਤਿ ਇਮਿਸ੍ਸਾ ਗਙ੍ਗਾਯ ਗਮ੍ਭੀਰਟ੍ਠਾਨਂ ਗਾਵੁਤਮ੍ਪਿ ਅਤ੍ਥਿ, ਅਡ੍ਢਯੋਜਨਮ੍ਪਿ, ਯੋਜਨਮ੍ਪਿ. ਪੁਥੁਲਂ ਪਨਸ੍ਸਾ ਏਵਰੂਪਂਯੇਵ, ਦੀਘਤੋ ਪਨ ਪਞ੍ਚਯੋਜਨਸਤਾਨਿ. ਸਾ ਕਥਂ ਗਮ੍ਭੀਰਾ ਅਪ੍ਪਮੇਯ੍ਯਾਤਿ? ਏਤੇਨ ਪਯੋਗੇਨ ਪਰਿਵਤ੍ਤੇਤ੍ਵਾ ਉਦ੍ਧਨੇ ਉਦਕਂ ਵਿਯ ਤਾਪੇਤੁਂ ਅਸਕ੍ਕੁਣੇਯ੍ਯਤੋ. ਠਿਤੋਦਕਂ ਪਨ ਕੇਨਚਿ ਉਪਾਯੇਨ ਅਙ੍ਗੁਲਮਤ੍ਤਂ ਵਾ ਅਡ੍ਢਙ੍ਗੁਲਮਤ੍ਤਂ ਵਾ ਏਵਂ ਤਾਪੇਤੁਂ ਸਕ੍ਕਾ ਭਵੇਯ੍ਯ, ਅਯਂ ਪਨ ਨ ਸਕ੍ਕਾ, ਤਸ੍ਮਾ ਏਵਂ ਵੁਤ੍ਤਂ. ਉਪਮਾਸਂਸਨ੍ਦਨੇ ਪਨੇਤ੍ਥ ਗਙ੍ਗਾ ਵਿਯ ਮੇਤ੍ਤਚਿਤ੍ਤਂ, ਤਿਣੁਕ੍ਕਂ ਆਦਾਯ ਆਗਤਪੁਰਿਸੋ ਵਿਯ ਪਞ੍ਚ ਵਚਨਪਥੇ ਗਹੇਤ੍ਵਾ ਆਗਤਪੁਗ੍ਗਲੋ. ਯਥਾ ਸੋ ਆਦਿਤ੍ਤਾਯ ਤਿਣੁਕ੍ਕਾਯ ਗਙ੍ਗਂ ਤਾਪੇਤੁਂ ਨ ਸਕ੍ਕੋਤਿ, ਏਵਂ ਵੋ ਪਞ੍ਚ ਵਚਨਪਥੇ ਗਹੇਤ੍ਵਾ ਆਗਤਪੁਗ੍ਗਲੋ ਮੇਤ੍ਤਚਿਤ੍ਤਸ੍ਸ ਅਞ੍ਞਥਤ੍ਤਂ ਕਾਤੁਂ ਨ ਸਕ੍ਖਿਸ੍ਸਤੀਤਿ.

੨੩੧. ਚਤੁਤ੍ਥਉਪਮਾਯਂ ਬਿਲ਼ਾਰਭਸ੍ਤਾਤਿ ਬਿਲ਼ਾਰਚਮ੍ਮਪਸਿਬ੍ਬਕਾ. ਸੁਮਦ੍ਦਿਤਾਤਿ ਸੁਟ੍ਠੁ ਮਦ੍ਦਿਤਾ. ਸੁਪਰਿਮਦ੍ਦਿਤਾਤਿ ਅਨ੍ਤੋ ਚ ਬਹਿ ਚ ਸਮਨ੍ਤਤੋ ਸੁਪਰਿਮਦ੍ਦਿਤਾ. ਤੂਲਿਨੀਤਿ ਸਿਮ੍ਬਲਿਤੂਲਲਤਾਤੂਲਸਮਾਨਾ. ਛਿਨ੍ਨਸਸ੍ਸਰਾਤਿ ਛਿਨ੍ਨਸਸ੍ਸਰਸਦ੍ਦਾ. ਛਿਨ੍ਨਭਬ੍ਭਰਾਤਿ ਛਿਨ੍ਨਭਬ੍ਭਰਸਦ੍ਦਾ. ਉਪਮਾਸਂਸਨ੍ਦਨੇ ਪਨੇਤ੍ਥ ਬਿਲ਼ਾਰਭਸ੍ਤਾ ਵਿਯ ਮੇਤ੍ਤਚਿਤ੍ਤਂ, ਕਟ੍ਠਕਠਲਂ ਆਦਾਯ ਆਗਤਪੁਰਿਸੋ ਵਿਯ ਪਞ੍ਚ ਵਚਨਪਥੇ ਗਹੇਤ੍ਵਾ ਆਗਤਪੁਗ੍ਗਲੋ. ਯਥਾ ਸੋ ਕਟ੍ਠੇਨ ਵਾ ਕਠਲੇਨ ਵਾ ਬਿਲ਼ਾਰਭਸ੍ਤਂ ਸਰਸਰਂ ਭਰਭਰਂ ਸਦ੍ਦਂ ਕਾਤੁਂ ਨ ਸਕ੍ਕੋਤਿ, ਏਵਂ ਵੋ ਪਞ੍ਚ ਵਚਨਪਥੇ ਗਹੇਤ੍ਵਾ ਆਗਤਪੁਗ੍ਗਲੋ ਮੇਤ੍ਤਚਿਤ੍ਤਸ੍ਸ ਅਞ੍ਞਥਤ੍ਤਂ ਕਤ੍ਵਾ ਦੋਸਾਨੁਗਤਭਾਵਂ ਕਾਤੁਂ ਨ ਸਕ੍ਖਿਸ੍ਸਤੀਤਿ.

੨੩੨. ਓਚਰਕਾਤਿ ਅਵਚਰਕਾ ਹੇਟ੍ਠਾਚਰਕਾ, ਨੀਚਕਮ੍ਮਕਾਰਕਾਤਿ ਅਤ੍ਥੋ. ਯੋ ਮਨੋ ਪਦੂਸੇਯ੍ਯਾਤਿ ਯੋ ਭਿਕ੍ਖੁ ਵਾ ਭਿਕ੍ਖੁਨੀ ਵਾ ਮਨੋ ਪਦੂਸੇਯ੍ਯ, ਤਂ ਕਕਚੇਨ ਓਕਨ੍ਤਨਂ ਨਾਧਿਵਾਸੇਯ੍ਯ. ਨ ਮੇ ਸੋ ਤੇਨ ਸਾਸਨਕਰੋਤਿ ਸੋ ਤੇਨ ਅਨਧਿਵਾਸਨੇਨ ਮਯ੍ਹਂ ਓਵਾਦਕਰੋ ਨ ਹੋਤਿ. ਆਪਤ੍ਤਿ ਪਨੇਤ੍ਥ ਨਤ੍ਥਿ.

੨੩੩. ਅਣੁਂ ਵਾ ਥੂਲਂ ਵਾਤਿ ਅਪ੍ਪਸਾਵਜ੍ਜਂ ਵਾ ਮਹਾਸਾਵਜ੍ਜਂ ਵਾ. ਯਂ ਤੁਮ੍ਹੇ ਨਾਧਿਵਾਸੇਯ੍ਯਾਥਾਤਿ ਯੋ ਤੁਮ੍ਹੇਹਿ ਅਧਿਵਾਸੇਤਬ੍ਬੋ ਨ ਭਵੇਯ੍ਯਾਤਿ ਅਤ੍ਥੋ. ਨੋ ਹੇਤਂ, ਭਨ੍ਤੇਤਿ, ਭਨ੍ਤੇ, ਅਨਧਿਵਾਸੇਤਬ੍ਬਂ ਨਾਮ ਵਚਨਪਥਂ ਨ ਪਸ੍ਸਾਮਾਤਿ ਅਧਿਪ੍ਪਾਯੋ. ਦੀਘਰਤ੍ਤਂ ਹਿਤਾਯ ਸੁਖਾਯਾਤਿ ਇਤਿ ਭਗਵਾ ਅਰਹਤ੍ਤੇਨ ਕੂਟਂ ਗਣ੍ਹਨ੍ਤੋ ਯਥਾਨੁਸਨ੍ਧਿਨਾ ਦੇਸਨਂ ਨਿਟ੍ਠਪੇਸੀਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਕਕਚੂਪਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.