੯. ਦ੍ਵੇਧਾਵਿਤਕ੍ਕਸੁਤ੍ਤਵਣ੍ਣਨਾ

੨੦੬. ਮੇ ਸੁਤਨ੍ਤਿ ਦ੍ਵੇਧਾਵਿਤਕ੍ਕਸੁਤ੍ਤਂ. ਤਤ੍ਥ ਦ੍ਵਿਧਾ ਕਤ੍ਵਾ ਦ੍ਵਿਧਾ ਕਤ੍ਵਾਤਿ ਦ੍ਵੇ ਦ੍ਵੇ ਭਾਗੇ ਕਤ੍ਵਾ. ਕਾਮਵਿਤਕ੍ਕੋਤਿ ਕਾਮਪਟਿਸਂਯੁਤ੍ਤੋ ਵਿਤਕ੍ਕੋ. ਬ੍ਯਾਪਾਦਵਿਤਕ੍ਕੋਤਿ ਬ੍ਯਾਪਾਦਪਟਿਸਂਯੁਤ੍ਤੋ ਵਿਤਕ੍ਕੋ. ਵਿਹਿਂਸਾਵਿਤਕ੍ਕੋਤਿ ਵਿਹਿਂਸਾਪਟਿਸਂਯੁਤ੍ਤੋ ਵਿਤਕ੍ਕੋ. ਏਕਂ ਭਾਗਨ੍ਤਿ ਅਜ੍ਝਤ੍ਤਂ ਵਾ ਬਹਿਦ੍ਧਾ ਵਾ ਓਲ਼ਾਰਿਕੋ ਵਾ ਸੁਖੁਮੋ ਵਾ ਸਬ੍ਬੋ ਪਾਯਂ ਵਿਤਕ੍ਕੋ ਅਕੁਸਲਪਕ੍ਖਿਕੋਯੇਵਾਤਿ ਤਯੋਪਿ ਕਾਮਬ੍ਯਾਪਾਦਵਿਹਿਂਸਾਵਿਤਕ੍ਕੇ ਏਕਂ ਕੋਟ੍ਠਾਸਮਕਾਸਿਂ. ਕਾਮੇਹਿ ਨਿਸ੍ਸਟੋ ਨੇਕ੍ਖਮ੍ਮਪਟਿਸਂਯੁਤ੍ਤੋ ਵਿਤਕ੍ਕੋ ਨੇਕ੍ਖਮ੍ਮਵਿਤਕ੍ਕੋ ਨਾਮ, ਸੋ ਯਾਵ ਪਠਮਜ੍ਝਾਨਾ ਵਟ੍ਟਤਿ. ਅਬ੍ਯਾਪਾਦਪਟਿਸਂਯੁਤ੍ਤੋ ਵਿਤਕ੍ਕੋ ਅਬ੍ਯਾਪਾਦਵਿਤਕ੍ਕੋ, ਸੋ ਮੇਤ੍ਤਾਪੁਬ੍ਬਭਾਗਤੋ ਪਟ੍ਠਾਯ ਯਾਵ ਪਠਮਜ੍ਝਾਨਾ ਵਟ੍ਟਤਿ. ਅਵਿਹਿਂਸਾਪਟਿਸਂਯੁਤ੍ਤੋ ਵਿਤਕ੍ਕੋ ਅਵਿਹਿਂਸਾਵਿਤਕ੍ਕੋ, ਸੋ ਕਰੁਣਾਪੁਬ੍ਬਭਾਗਤੋ ਪਟ੍ਠਾਯ ਯਾਵ ਪਠਮਜ੍ਝਾਨਾ ਵਟ੍ਟਤਿ. ਦੁਤਿਯਂ ਭਾਗਨ੍ਤਿ ਸਬ੍ਬੋਪਾਯਂ ਕੁਸਲਪਕ੍ਖਿਕੋਯੇਵਾਤਿ ਦੁਤਿਯਂ ਕੋਟ੍ਠਾਸਮਕਾਸਿਂ. ਇਮਿਨਾ ਬੋਧਿਸਤ੍ਤਸ੍ਸ ਵਿਤਕ੍ਕਨਿਗ੍ਗਹਣਕਾਲੋ ਕਥਿਤੋ.

ਬੋਧਿਸਤ੍ਤਸ੍ਸ ਹਿ ਛਬ੍ਬਸ੍ਸਾਨਿ ਪਧਾਨਂ ਪਦਹਨ੍ਤਸ੍ਸ ਨੇਕ੍ਖਮ੍ਮਵਿਤਕ੍ਕਾਦਯੋ ਪੁਞ੍ਜਪੁਞ੍ਜਾ ਮਹਾਨਦਿਯਂ ਓਘਾ ਵਿਯ ਪਵਤ੍ਤਿਂਸੁ. ਸਤਿਸਮ੍ਮੋਸੇਨ ਪਨ ਸਹਸਾ ਕਾਮਵਿਤਕ੍ਕਾਦਯੋ ਉਪ੍ਪਜ੍ਜਿਤ੍ਵਾ ਕੁਸਲਵਾਰਂ ਪਚ੍ਛਿਨ੍ਦਿਤ੍ਵਾ ਸਯਂ ਅਕੁਸਲਜਵਨਵਾਰਾ ਹੁਤ੍ਵਾ ਤਿਟ੍ਠਨ੍ਤਿ. ਤਤੋ ਬੋਧਿਸਤ੍ਤੋ ਚਿਨ੍ਤੇਸਿ – ‘‘ਮਯ੍ਹਂ ਇਮੇ ਕਾਮਵਿਤਕ੍ਕਾਦਯੋ ਕੁਸਲਵਾਰਂ ਪਚ੍ਛਿਨ੍ਦਿਤ੍ਵਾ ਤਿਟ੍ਠਨ੍ਤਿ, ਹਨ੍ਦਾਹਂ ਇਮੇ ਵਿਤਕ੍ਕੇ ਦ੍ਵੇ ਭਾਗੇ ਕਤ੍ਵਾ ਵਿਹਰਾਮੀ’’ਤਿ ਕਾਮਵਿਤਕ੍ਕਾਦਯੋ ਅਕੁਸਲਪਕ੍ਖਿਕਾਤਿ ਏਕਂ ਭਾਗਂ ਕਰੋਤਿ ਨੇਕ੍ਖਮ੍ਮਵਿਤਕ੍ਕਾਦਯੋ ਕੁਸਲਪਕ੍ਖਿਕਾਤਿ ਏਕਂ. ਅਥ ਪੁਨ ਚਿਨ੍ਤੇਸਿ – ‘‘ਅਕੁਸਲਪਕ੍ਖਤੋ ਆਗਤਂ ਵਿਤਕ੍ਕਂ ਮਨ੍ਤੇਨ ਕਣ੍ਹਸਪ੍ਪਂ ਉਪ੍ਪੀਲ਼ੇਤ੍ਵਾ ਗਣ੍ਹਨ੍ਤੋ ਵਿਯ ਅਮਿਤ੍ਤਂ ਗੀਵਾਯ ਅਕ੍ਕਮਨ੍ਤੋ ਵਿਯ ਚ ਨਿਗ੍ਗਹੇਸ੍ਸਾਮਿ, ਨਾਸ੍ਸ ਵਡ੍ਢਿਤੁਂ ਦਸ੍ਸਾਮਿ. ਕੁਸਲਪਕ੍ਖਤੋ ਆਗਤਂ ਵਿਤਕ੍ਕਂ ਮੇਘਸਮਯੇ ਮੇਘਂ ਵਿਯ ਸੁਖੇਤ੍ਤੇ ਸਾਲਕਲ੍ਯਾਣਿਪੋਤਕਂ ਵਿਯ ਚ ਸੀਘਂ ਵਡ੍ਢੇਸ੍ਸਾਮੀ’’ਤਿ. ਸੋ ਤਥਾ ਕਤ੍ਵਾ ਅਕੁਸਲਵਿਤਕ੍ਕੇ ਨਿਗ੍ਗਣ੍ਹਿ, ਕੁਸਲਵਿਤਕ੍ਕੇ ਵਡ੍ਢੇਸਿ. ਏਵਂ ਇਮਿਨਾ ਬੋਧਿਸਤ੍ਤਸ੍ਸ ਵਿਤਕ੍ਕਨਿਗ੍ਗਹਣਨਕਾਲੋ ਕਥਿਤੋਤਿ ਵੇਦਿਤਬ੍ਬੋ.

੨੦੭. ਇਦਾਨਿ ਯਥਾਸ੍ਸ ਤੇ ਵਿਤਕ੍ਕਾ ਉਪ੍ਪਜ੍ਜਿਂਸੁ, ਯਥਾ ਚ ਨੇ ਨਿਗ੍ਗਹੇਸਿ, ਤਂ ਦਸ੍ਸੇਨ੍ਤੋ ਤਸ੍ਸ ਮਯ੍ਹਂ, ਭਿਕ੍ਖਵੇਤਿਆਦਿਮਾਹ. ਤਤ੍ਥ ਅਪ੍ਪਮਤ੍ਤਸ੍ਸਾਤਿ ਸਤਿਯਾ ਅਵਿਪ੍ਪਵਾਸੇ ਠਿਤਸ੍ਸ. ਆਤਾਪਿਨੋਤਿ ਆਤਾਪਵੀਰਿਯਵਨ੍ਤਸ੍ਸ. ਪਹਿਤਤ੍ਤਸ੍ਸਾਤਿ ਪੇਸਿਤਚਿਤ੍ਤਸ੍ਸ. ਉਪ੍ਪਜ੍ਜਤਿ ਕਾਮਵਿਤਕ੍ਕੋਤਿ ਬੋਧਿਸਤ੍ਤਸ੍ਸ ਛਬ੍ਬਸ੍ਸਾਨਿ ਪਧਾਨਂ ਪਦਹਤੋ ਰਜ੍ਜਸੁਖਂ ਵਾ ਆਰਬ੍ਭ, ਪਾਸਾਦੇ ਵਾ ਨਾਟਕਾਨਿ ਵਾ ਓਰੋਧੇ ਵਾ ਕਿਞ੍ਚਿਦੇਵ ਵਾ ਸਮ੍ਪਤ੍ਤਿਂ ਆਰਬ੍ਭ ਕਾਮਵਿਤਕ੍ਕੋ ਨਾਮ ਨ ਉਪ੍ਪਨ੍ਨਪੁਬ੍ਬੋ. ਦੁਕ੍ਕਰਕਾਰਿਕਾਯ ਪਨਸ੍ਸ ਆਹਾਰੂਪਚ੍ਛੇਦੇਨ ਅਧਿਮਤ੍ਤਕਸਿਮਾਨਂ ਪਤ੍ਤਸ੍ਸ ਏਤਦਹੋਸਿ – ‘‘ਨ ਸਕ੍ਕਾ ਆਹਾਰੂਪਚ੍ਛੇਦੇਨ ਵਿਸੇਸਂ ਨਿਬ੍ਬਤ੍ਤੇਤੁਂ, ਯਂਨੂਨਾਹਂ ਓਲ਼ਾਰਿਕਂ ਆਹਾਰਂ ਆਹਾਰੇਯ੍ਯ’’ਨ੍ਤਿ. ਸੋ ਉਰੁਵੇਲਂ ਪਿਣ੍ਡਾਯ ਪਾਵਿਸਿ. ਮਨੁਸ੍ਸਾ – ‘‘ਮਹਾਪੁਰਿਸੋ ਪੁਬ੍ਬੇ ਆਹਰਿਤ੍ਵਾ ਦਿਨ੍ਨਮ੍ਪਿ ਨ ਗਣ੍ਹਿ, ਅਦ੍ਧਾਸ੍ਸ ਇਦਾਨਿ ਮਨੋਰਥੋ ਮਤ੍ਥਕਂ ਪਤ੍ਤੋ, ਤਸ੍ਮਾ ਸਯਮੇਵ ਆਗਤੋ’’ਤਿ ਪਣੀਤਪਣੀਤਂ ਆਹਾਰਂ ਉਪਹਰਿਂਸੁ. ਬੋਧਿਸਤ੍ਤਸ੍ਸ ਅਤ੍ਤਭਾਵੋ ਨਚਿਰਸ੍ਸੇਵ ਪਾਕਤਿਕੋ ਅਹੋਸਿ. ਜਰਾਜਿਣ੍ਣਤ੍ਤਭਾਵੋ ਹਿ ਸਪ੍ਪਾਯਭੋਜਨਂ ਲਭਿਤ੍ਵਾਪਿ ਪਾਕਤਿਕੋ ਨ ਹੋਤਿ. ਬੋਧਿਸਤ੍ਤੋ ਪਨ ਦਹਰੋ. ਤੇਨਸ੍ਸ ਸਪ੍ਪਾਯਭੋਜਨਂ ਭੁਞ੍ਜਤੋ ਅਤ੍ਤਭਾਵੋ ਨ ਚਿਰਸ੍ਸੇਵ ਪਾਕਤਿਕੋ ਜਾਤੋ, ਵਿਪ੍ਪਸਨ੍ਨਾਨਿ ਇਨ੍ਦ੍ਰਿਯਾਨਿ, ਪਰਿਸੁਦ੍ਧੋ ਛਵਿਵਣ੍ਣੋ, ਸਮੁਗ੍ਗਤਤਾਰਾਗਣਂ ਵਿਯ ਨਭਂ ਪਰਿਪੁਣ੍ਣਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਪ੍ਪਟਿਮਣ੍ਡਿਤਸਰੀਰਂ ਅਹੋਸਿ. ਸੋ ਤਂ ਓਲੋਕੇਤ੍ਵਾ ‘‘ਤਾਵ ਕਿਲਨ੍ਤੋ ਨਾਮ ਅਤ੍ਤਭਾਵੋ ਏਵਂ ਪਟਿਪਾਕਤਿਕੋ ਜਾਤੋ’’ਤਿ ਚਿਨ੍ਤੇਤ੍ਵਾ ਅਤ੍ਤਨੋ ਪਞ੍ਞਾਮਹਨ੍ਤਤਾਯ ਏਵਂ ਪਰਿਤ੍ਤਕਮ੍ਪਿ ਵਿਤਕ੍ਕਂ ਗਹੇਤ੍ਵਾ ਕਾਮਵਿਤਕ੍ਕੋਤਿ ਅਕਾਸਿ.

ਪਣ੍ਣਸਾਲਾਯ ਪੁਰਤੋ ਨਿਸਿਨ੍ਨੋ ਚਮਰਪਸਦਗਵਯਰੋਹਿਤਮਿਗਾਦਿਕੇ ਮਗਗਣੇ ਮਨੁਞ੍ਞਸਦ੍ਦਰਵਨੇ ਮੋਰਵਨਕੁਕ੍ਕੁਟਾਦਿਕੇ ਪਕ੍ਖਿਗਣੇ ਨੀਲੁਪ੍ਪਲਕੁਮੁਦਕਮਲਾਦਿਸਞ੍ਛਨ੍ਨਾਨਿ ਪਲ੍ਲਲਾਨਿ ਨਾਨਾਕੁਸੁਮਸਞ੍ਛਨ੍ਨਵਿਟਪਾ ਵਨਰਾਜਿਯੋ ਮਣਿਕ੍ਖਨ੍ਧਨਿਮ੍ਮਲਜਲਪਵਾਹਞ੍ਚ ਨਦਿਂ ਨੇਰਞ੍ਜਰਂ ਪਸ੍ਸਤਿ. ਤਸ੍ਸ ਏਵਂ ਹੋਤਿ ‘‘ਸੋਭਨਾ ਵਤਿਮੇ ਮਿਗਜਾਤਾ ਪਕ੍ਖਿਗਣਾ ਪਲ੍ਲਲਾਨਿ ਵਨਰਾਜਿਯੋ ਨਦੀ ਨੇਰਞ੍ਜਰਾ’’ਤਿ. ਸੋ ਤਮ੍ਪਿ ਏਵਂ ਪਰਿਤ੍ਤਕਂ ਵਿਤਕ੍ਕਂ ਗਹੇਤ੍ਵਾ ਕਾਮਵਿਤਕ੍ਕਮਕਾਸਿ, ਤੇਨਾਹ ‘‘ਉਪ੍ਪਜ੍ਜਤਿ ਕਾਮਵਿਤਕ੍ਕੋ’’ਤਿ.

ਅਤ੍ਤਬ੍ਯਾਬਾਧਾਯਪੀਤਿ ਅਤ੍ਤਦੁਕ੍ਖਾਯਪਿ. ਏਸੇਵਨਯੋ ਸਬ੍ਬਤ੍ਥ. ਕਿਂ ਪਨ ਮਹਾਸਤ੍ਤਸ੍ਸ ਉਭਯਦੁਕ੍ਖਾਯ ਸਂਵਤ੍ਤਨਕਵਿਤਕ੍ਕੋ ਨਾਮ ਅਤ੍ਥੀਤਿ? ਨਤ੍ਥਿ. ਅਪਰਿਞ੍ਞਾਯਂ ਠਿਤਸ੍ਸ ਪਨ ਵਿਤਕ੍ਕੋ ਯਾਵ ਉਭਯਬ੍ਯਾਬਾਧਾਯ ਸਂਵਤ੍ਤਤੀਤਿ ਏਤਾਨਿ ਤੀਣਿ ਨਾਮਾਨਿ ਲਭਤਿ, ਤਸ੍ਮਾ ਏਵਮਾਹ. ਪਞ੍ਞਾਨਿਰੋਧਿਕੋਤਿ ਅਨੁਪ੍ਪਨ੍ਨਾਯ ਲੋਕਿਯਲੋਕੁਤ੍ਤਰਾਯ ਪਞ੍ਞਾਯ ਉਪ੍ਪਜ੍ਜਿਤੁਂ ਨ ਦੇਤਿ, ਲੋਕਿਯਪਞ੍ਞਂ ਪਨ ਅਟ੍ਠਸਮਾਪਤ੍ਤਿਪਞ੍ਚਾਭਿਞ੍ਞਾਵਸੇਨ ਉਪ੍ਪਨ੍ਨਮ੍ਪਿ ਸਮੁਚ੍ਛਿਨ੍ਦਿਤ੍ਵਾ ਖਿਪਤੀਤਿ ਪਞ੍ਞਾਨਿਰੋਧਿਕੋ. ਵਿਘਾਤਪਕ੍ਖਿਕੋਤਿ ਦੁਕ੍ਖਕੋਟ੍ਠਾਸਿਕੋ. ਅਸਙ੍ਖਤਂ ਨਿਬ੍ਬਾਨਂ ਨਾਮ, ਤਂ ਪਚ੍ਚਕ੍ਖਂ ਕਾਤੁਂ ਨ ਦੇਤੀਤਿ ਅਨਿਬ੍ਬਾਨਸਂਵਤ੍ਤਨਿਕੋ. ਅਬ੍ਭਤ੍ਥਂ ਗਚ੍ਛਤੀਤਿ ਖਯਂ ਨਤ੍ਥਿਭਾਵਂ ਗਚ੍ਛਤਿ. ਉਦਕਪੁਪ੍ਫੁਲ਼ਕੋ ਵਿਯ ਨਿਰੁਜ੍ਝਤਿ. ਪਜਹਮੇਵਾਤਿ ਪਜਹਿਮੇਵ. ਵਿਨੋਦਮੇਵਾਤਿ ਨੀਹਰਿਮੇਵ. ਬ੍ਯਨ੍ਤਮੇਵ ਨਂ ਅਕਾਸਿਨ੍ਤਿ ਵਿਗਤਨ੍ਤਂ ਨਿਸ੍ਸੇਸਂ ਪਰਿਵਟੁਮਂ ਪਰਿਚ੍ਛਿਨ੍ਨਮੇਵ ਨਂ ਅਕਾਸਿਂ.

੨੦੮. ਬ੍ਯਾਪਾਦਵਿਤਕ੍ਕੋਤਿ ਨ ਬੋਧਿਸਤ੍ਤਸ੍ਸ ਪਰੂਪਘਾਤਪ੍ਪਟਿਸਂਯੁਤ੍ਤੋ ਨਾਮ ਵਿਤਕ੍ਕੋ ਚਿਤ੍ਤੇ ਉਪ੍ਪਜ੍ਜਤਿ, ਅਥਸ੍ਸ ਅਤਿਵਸ੍ਸਅਚ੍ਚੁਣ੍ਹਅਤਿਸੀਤਾਦੀਨਿ ਪਨ ਪਟਿਚ੍ਚ ਚਿਤ੍ਤਵਿਪਰਿਣਾਮਭਾਵੋ ਹੋਤਿ, ਤਂ ਸਨ੍ਧਾਯ ‘‘ਬ੍ਯਾਪਾਦਵਿਤਕ੍ਕੋ’’ਤਿ ਆਹ. ਵਿਹਿਂਸਾਵਿਤਕ੍ਕੋਤਿ ਨ ਮਹਾਸਤ੍ਤਸ੍ਸ ਪਰੇਸਂ ਦੁਕ੍ਖੁਪ੍ਪਾਦਨਪ੍ਪਟਿਸਂਯੁਤ੍ਤੋ ਵਿਤਕ੍ਕੋ ਉਪ੍ਪਜ੍ਜਤਿ, ਚਿਤ੍ਤੇ ਪਨ ਉਦ੍ਧਤਾਕਾਰੋ ਅਨੇਕਗ੍ਗਤਾਕਾਰੋ ਹੋਤਿ, ਤਂ ਗਹੇਤ੍ਵਾ ਵਿਹਿਂਸਾਵਿਤਕ੍ਕਮਕਾਸਿ. ਪਣ੍ਣਸਾਲਾਦ੍ਵਾਰੇ ਨਿਸਿਨ੍ਨੋ ਹਿ ਸੀਹਬ੍ਯਗ੍ਘਾਦਿਕੇ ਵਾਲ਼ਮਿਗੇ ਸੂਕਰਾਦਯੋ ਖੁਦ੍ਦਮਿਗੇ ਵਿਹਿਂਸਨ੍ਤੇ ਪਸ੍ਸਤਿ. ਅਥ ਬੋਧਿਸਤ੍ਤੋ ਇਮਸ੍ਮਿਮ੍ਪਿ ਨਾਮ ਅਕੁਤੋਭਯੇ ਅਰਞ੍ਞੇ ਇਮੇਸਂ ਤਿਰਚ੍ਛਾਨਗਤਾਨਂ ਪਚ੍ਚਤ੍ਥਿਕਾ ਉਪ੍ਪਜ੍ਜਨ੍ਤਿ, ਬਲਵਨ੍ਤੋ ਦੁਬ੍ਬਲੇ ਖਾਦਨ੍ਤਿ, ਬਲਵਨ੍ਤਖਾਦਿਤਾ ਵਤ੍ਤਨ੍ਤੀਤਿ ਕਾਰੁਞ੍ਞਂ ਉਪ੍ਪਾਦੇਤਿ. ਅਞ੍ਞੇਪਿ ਬਿਲ਼ਾਰਾਦਯੋ ਕੁਕ੍ਕੁਟਮੂਸਿਕਾਦੀਨਿ ਖਾਦਨ੍ਤੇ ਪਸ੍ਸਤਿ, ਗਾਮਂ ਪਿਣ੍ਡਾਯ ਪਵਿਟ੍ਠੋ ਮਨੁਸ੍ਸੇ ਰਾਜਕਮ੍ਮਿਕੇਹਿ ਉਪਦ੍ਦੁਤੇ ਵਧਬਨ੍ਧਾਦੀਨਿ ਅਨੁਭਵਨ੍ਤੇ ਅਤ੍ਤਨੋ ਕਸਿਵਣਿਜ੍ਜਾਦੀਨਿ ਕਮ੍ਮਾਨਿ ਕਤ੍ਵਾ ਜੀਵਿਤੁਂ ਨ ਲਭਨ੍ਤੀਤਿ ਕਾਰੁਞ੍ਞਂ ਉਪ੍ਪਾਦੇਤਿ, ਤਂ ਸਨ੍ਧਾਯ ‘‘ਉਪ੍ਪਜ੍ਜਤਿ ਵਿਹਿਂਸਾਵਿਤਕ੍ਕੋ’’ਤਿ ਆਹ. ਤਥਾ ਤਥਾਤਿ ਤੇਨ ਤੇਨ ਆਕਾਰੇਨ. ਇਦਂ ਵੁਤ੍ਤਂ ਹੋਤਿ – ਕਾਮਵਿਤਕ੍ਕਾਦੀਸੁ ਯਂ ਯਂ ਵਿਤਕ੍ਕੇਤਿ, ਯਂ ਯਂ ਵਿਤਕ੍ਕਂ ਪਵਤ੍ਤੇਤਿ, ਤੇਨ ਤੇਨੇ ਚਸ੍ਸਾਕਾਰੇਨ ਕਾਮਵਿਤਕ੍ਕਾਦਿਭਾਵੋ ਚੇਤਸੋ ਨ ਹਿ ਹੋਤੀਤਿ. ਪਹਾਸਿ ਨੇਕ੍ਖਮ੍ਮਵਿਤਕ੍ਕਨ੍ਤਿ ਨੇਕ੍ਖਮ੍ਮਵਿਤਕ੍ਕਂ ਪਜਹਤਿ. ਬਹੁਲਮਕਾਸੀਤਿ ਬਹੁਲਂ ਕਰੋਤਿ. ਤਸ੍ਸ ਤਂ ਕਾਮਵਿਤਕ੍ਕਾਯ ਚਿਤ੍ਤਨ੍ਤਿ ਤਸ੍ਸ ਤਂ ਚਿਤ੍ਤਂ ਕਾਮਵਿਤਕ੍ਕਤ੍ਥਾਯ. ਯਥਾ ਕਾਮਵਿਤਕ੍ਕਸਮ੍ਪਯੁਤ੍ਤਂ ਹੋਤਿ, ਏਵਮੇਵਂ ਨਮਤੀਤਿ ਅਤ੍ਥੋ. ਸੇਸਪਦੇਸੁਪਿ ਏਸੇਵ ਨਯੋ.

ਇਦਾਨਿ ਅਤ੍ਥਦੀਪਿਕਂ ਉਪਮਂ ਦਸ੍ਸੇਨ੍ਤੋ ਸੇਯ੍ਯਥਾਪੀ ਤਿਆਦਿਮਾਹ. ਤਤ੍ਥ ਕਿਟ੍ਠਸਮ੍ਬਾਧੇਤਿ ਸਸ੍ਸਸਮ੍ਬਾਧੇ. ਆਕੋਟੇਯ੍ਯਾਤਿ ਉਜੁਕਂ ਪਿਟ੍ਠਿਯਂ ਪਹਰੇਯ੍ਯ. ਪਟਿਕੋਟੇਯ੍ਯਾਤਿ ਤਿਰਿਯਂ ਫਾਸੁਕਾਸੁ ਪਹਰੇਯ੍ਯ. ਸਨ੍ਨਿਰੁਨ੍ਧੇਯ੍ਯਾਤਿ ਆਵਰਿਤ੍ਵਾ ਤਿਟ੍ਠੇਯ੍ਯ. ਸਨ੍ਨਿਵਾਰੇਯ੍ਯਾਤਿ ਇਤੋ ਚਿਤੋ ਚ ਗਨ੍ਤੁਂ ਨ ਦਦੇਯ੍ਯ. ਤਤੋਨਿਦਾਨਨ੍ਤਿ ਤੇਨ ਕਾਰਣੇਨ, ਏਵਂ ਅਰਕ੍ਖਿਤਾਨਂ ਗੁਨ੍ਨਂ ਪਰੇਸਂ ਸਸ੍ਸਖਾਦਨਕਾਰਣੇਨਾਤਿ ਅਤ੍ਥੋ. ਬਾਲੋ ਹਿ ਗੋਪਾਲੋਕੋ ਏਵਂ ਗਾਵੋ ਅਰਕ੍ਖਮਾਨੋ ‘‘ਅਯਂ ਅਮ੍ਹਾਕਂ ਭਤ੍ਤਵੇਤਨਂ ਖਾਦਤਿ, ਉਜੁਂ ਗਾਵੋ ਰਕ੍ਖਿਤੁਮ੍ਪਿ ਨ ਸਕ੍ਕੋਤਿ, ਕੁਲੇਹਿ ਸਦ੍ਧਿਂ ਵੇਰਂ ਗਣ੍ਹਾਪੇਤੀ’’ਤਿ ਗੋਸਾਮਿਕਾਨਮ੍ਪਿ ਸਨ੍ਤਿਕਾ ਵਧਾਦੀਨਿ ਪਾਪੁਣਾਤਿ, ਕਿਟ੍ਠਸਾਮਿਕਾਨਮ੍ਪਿ. ਪਣ੍ਡਿਤੋ ਪਨ ਇਮਾਨਿ ਚਤ੍ਤਾਰਿ ਭਯਾਨਿ ਸਮ੍ਪਸ੍ਸਨ੍ਤੋ ਗਾਵੋ ਸਾਧੁਕਂ ਰਕ੍ਖਤਿ, ਤਂ ਸਨ੍ਧਾਯੇਤਂ ਵੁਤ੍ਤਂ. ਆਦੀਨਵਨ੍ਤਿ ਉਪਦ੍ਦਵਂ. ਓਕਾਰਨ੍ਤਿ ਲਾਮਕਂ, ਖਨ੍ਧੇਸੁ ਵਾ ਓਤਾਰਂ. ਸਂਕਿਲੇਸਨ੍ਤਿ ਕਿਲਿਟ੍ਠਭਾਵਂ. ਨੇਕ੍ਖਮ੍ਮੇਤਿ ਨੇਕ੍ਖਮ੍ਮਮ੍ਹਿ. ਆਨਿਸਂਸਨ੍ਤਿ ਵਿਸੁਦ੍ਧਿਪਕ੍ਖਂ. ਵੋਦਾਨਪਕ੍ਖਨ੍ਤਿ ਇਦਂ ਤਸ੍ਸੇਵ ਵੇਵਚਨਂ, ਕੁਸਲਾਨਂ ਧਮ੍ਮਾਨਂ ਨੇਕ੍ਖਮ੍ਮਮ੍ਹਿ ਵਿਸੁਦ੍ਧਿਪਕ੍ਖਂ ਅਦ੍ਦਸਨ੍ਤਿ ਅਤ੍ਥੋ.

੨੦੯. ਨੇਕ੍ਖਮ੍ਮਨ੍ਤਿ ਚ ਕਾਮੇਹਿ ਨਿਸ੍ਸਟਂ ਸਬ੍ਬਕੁਸਲਂ, ਏਕਧਮ੍ਮੇ ਸਙ੍ਗਯ੍ਹਮਾਨੇ ਨਿਬ੍ਬਾਨਮੇਵ. ਤਤ੍ਰਿਦਂ ਓਪਮ੍ਮਸਂਸਨ੍ਦਨਂ – ਕਿਟ੍ਠਸਮ੍ਬਾਧਂ ਵਿਯ ਹਿ ਰੂਪਾਦਿਆਰਮ੍ਮਣਂ, ਕੂਟਗਾਵੋ ਵਿਯ ਕੂਟਚਿਤ੍ਤਂ, ਪਣ੍ਡਿਤਗੋਪਾਲਕੋ ਵਿਯ ਬੋਧਿਸਤ੍ਤੋ, ਚਤੁਬ੍ਬਿਧਭਯਂ ਵਿਯ ਅਤ੍ਤਪਰੂਭਯਬ੍ਯਾਬਾਧਾਯ ਸਂਵਤ੍ਤਨਵਿਤਕ੍ਕੋ, ਪਣ੍ਡਿਤਗੋਪਾਲਕਸ੍ਸ ਚਤੁਬ੍ਬਿਧਂ ਭਯਂ ਦਿਸ੍ਵਾ ਕਿਟ੍ਠਸਮ੍ਬਾਧੇ ਅਪ੍ਪਮਾਦੇਨ ਗੋਰਕ੍ਖਣਂ ਵਿਯ ਬੋਧਿਸਤ੍ਤਸ੍ਸ ਛਬ੍ਬਸ੍ਸਾਨਿ ਪਧਾਨਂ ਪਦਹਤੋ ਅਤ੍ਤਬ੍ਯਾਬਾਧਾਦਿਭਯਂ ਦਿਸ੍ਵਾ ਰੂਪਾਦੀਸੁ ਆਰਮ੍ਮਣੇਸੁ ਯਥਾ ਕਾਮਵਿਤਕ੍ਕਾਦਯੋ ਨ ਉਪ੍ਪਜ੍ਜਨ੍ਤਿ, ਏਵਂ ਚਿਤ੍ਤਰਕ੍ਖਣਂ. ਪਞ੍ਞਾਵੁਦ੍ਧਿਕੋਤਿਆਦੀਸੁ ਅਨੁਪ੍ਪਨ੍ਨਾਯ ਲੋਕਿਯਲੋਕੁਤ੍ਤਰਪਞ੍ਞਾਯ ਉਪ੍ਪਾਦਾਯ, ਉਪ੍ਪਨ੍ਨਾਯ ਚ ਵੁਦ੍ਧਿਯਾ ਸਂਵਤ੍ਤਤੀਤਿ ਪਞ੍ਞਾਵੁਦ੍ਧਿਕੋ. ਨ ਦੁਕ੍ਖਕੋਟ੍ਠਾਸਾਯ ਸਂਵਤ੍ਤਤੀਤਿ ਅਵਿਘਾਤਪਕ੍ਖਿਕੋ. ਨਿਬ੍ਬਾਨਧਾਤੁਸਚ੍ਛਿਕਿਰਿਯਾਯ ਸਂਵਤ੍ਤਤੀਤਿ ਨਿਬ੍ਬਾਨਸਂਵਤ੍ਤਨਿਕੋ. ਰਤ੍ਤਿਂ ਚੇਪਿ ਨਂ, ਭਿਕ੍ਖਵੇ, ਅਨੁਵਿਤਕ੍ਕੇਯ੍ਯਨ੍ਤਿ ਸਕਲਰਤ੍ਤਿਂ ਚੇਪਿ ਤਂ ਵਿਤਕ੍ਕਂ ਪਵਤ੍ਤੇਯ੍ਯਂ. ਤਤੋਨਿਦਾਨਨ੍ਤਿ ਤਂਮੂਲਕਂ. ਓਹਞ੍ਞੇਯ੍ਯਾਤਿ ਉਗ੍ਘਾਤੀਯੇਯ੍ਯ, ਉਦ੍ਧਚ੍ਚਾਯ ਸਂਵਤ੍ਤੇਯ੍ਯਾਤਿ ਅਤ੍ਥੋ. ਆਰਾਤਿ ਦੂਰੇ. ਸਮਾਧਿਮ੍ਹਾਤਿ ਉਪਚਾਰਸਮਾਧਿਤੋਪਿ ਅਪ੍ਪਨਾਸਮਾਧਿਤੋਪਿ. ਸੋ ਖੋ ਅਹਂ, ਭਿਕ੍ਖਵੇ, ਅਜ੍ਝਤ੍ਤਮੇਵ ਚਿਤ੍ਤਨ੍ਤਿ ਸੋ ਅਹਂ, ਭਿਕ੍ਖਵੇ, ਮਾ ਮੇ ਚਿਤ੍ਤਂ ਸਮਾਧਿਮ੍ਹਾ ਦੂਰੇ ਹੋਤੂਤਿ ਅਜ੍ਝਤ੍ਤਮੇਵ ਚਿਤ੍ਤਂ ਸਣ੍ਠਪੇਮਿ, ਗੋਚਰਜ੍ਝਤ੍ਤੇ ਠਪੇਮੀਤਿ ਅਤ੍ਥੋ. ਸਨ੍ਨਿਸਾਦੇਮੀਤਿ ਤਤ੍ਥੇਵ ਚ ਨਂ ਸਨ੍ਨਿਸੀਦਾਪੇਮਿ. ਏਕੋਦਿਂ ਕਰੋਮੀਤਿ ਏਕਗ੍ਗਂ ਕਰੋਮਿ. ਸਮਾਦਹਾਮੀਤਿ ਸਮ੍ਮਾ ਆਦਹਾਮਿ, ਸੁਟ੍ਠੁ ਆਰੋਪੇਮੀਤਿ ਅਤ੍ਥੋ. ਮਾ ਮੇ ਚਿਤ੍ਤਂ ਊਹਞ੍ਞੀਤਿ ਮਾ ਮਯ੍ਹਂ ਚਿਤ੍ਤਂ ਉਗ੍ਘਾਤੀਯਿਤ੍ਥ, ਮਾ ਉਦ੍ਧਚ੍ਚਾਯ ਸਂਵਤ੍ਤਤੂਤਿ ਅਤ੍ਥੋ.

੨੧੦. ਉਪ੍ਪਜ੍ਜਤਿ ਅਬ੍ਯਾਪਾਦਵਿਤਕ੍ਕੋ…ਪੇ… ਅਵਿਹਿਂਸਾਵਿਤਕ੍ਕੋਤਿ ਏਤ੍ਥ ਯੋ ਸੋ ਇਮਾਯ ਹੇਟ੍ਠਾ ਵੁਤ੍ਤਤਰੁਣਵਿਪਸ੍ਸਨਾਯ ਸਦ੍ਧਿਂ ਉਪ੍ਪਨ੍ਨਵਿਤਕ੍ਕੋ ਕਾਮਪਚ੍ਚਨੀਕਟ੍ਠੇਨ ਨੇਕ੍ਖਮ੍ਮਵਿਤਕ੍ਕੋਤਿ ਵੁਤ੍ਤੋ. ਸੋਯੇਵ ਬ੍ਯਾਪਾਦਪਚ੍ਚਨੀਕਟ੍ਠੇਨ ਅਬ੍ਯਾਪਾਦਵਿਤਕ੍ਕੋਤਿ ਚ ਵਿਹਿਂਸਾਪਚ੍ਚਨੀਕਟ੍ਠੇਨ ਅਵਿਹਿਂਸਾਵਿਤਕ੍ਕੋਤਿ ਚ ਵੁਤ੍ਤੋ.

ਏਤ੍ਤਾਵਤਾ ਬੋਧਿਸਤ੍ਤਸ੍ਸ ਸਮਾਪਤ੍ਤਿਂ ਨਿਸ੍ਸਾਯ ਵਿਪਸ੍ਸਨਾਪਟ੍ਠਪਨਕਾਲੋ ਕਥਿਤੋ. ਯਸ੍ਸ ਹਿ ਸਮਾਧਿਪਿ ਤਰੁਣੋ, ਵਿਪਸ੍ਸਨਾਪਿ. ਤਸ੍ਸ ਵਿਪਸ੍ਸਨਂ ਪਟ੍ਠਪੇਤ੍ਵਾ ਅਤਿਚਿਰਂ ਨਿਸਿਨ੍ਨਸ੍ਸ ਕਾਯੋ ਕਿਲਮਤਿ, ਅਨ੍ਤੋ ਅਗ੍ਗਿ ਵਿਯ ਉਟ੍ਠਹਤਿ, ਕਚ੍ਛੇਹਿ ਸੇਦਾ ਮੁਚ੍ਚਨ੍ਤਿ, ਮਤ੍ਥਕਤੋ ਉਸੁਮਵਟ੍ਟਿ ਵਿਯ ਉਟ੍ਠਹਤਿ, ਚਿਤ੍ਤਂ ਹਞ੍ਞਤਿ ਵਿਹਞ੍ਞਤਿ ਵਿਪ੍ਫਨ੍ਦਤਿ. ਸੋ ਪੁਨ ਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਤਂ ਪਰਿਦਮੇਤ੍ਵਾ ਮੁਦੁਕਂ ਕਤ੍ਵਾ ਸਮਸ੍ਸਾਸੇਤ੍ਵਾ ਪੁਨ ਵਿਪਸ੍ਸਨਂ ਪਟ੍ਠਪੇਤਿ. ਤਸ੍ਸ ਪੁਨ ਅਤਿਚਿਰਂ ਨਿਸਿਨ੍ਨਸ੍ਸ ਤਥੇਵ ਹੋਤਿ. ਸੋ ਪੁਨ ਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਤਥੇਵ ਕਰੋਤਿ. ਵਿਪਸ੍ਸਨਾਯ ਹਿ ਬਹੂਪਕਾਰਾ ਸਮਾਪਤ੍ਤਿ.

ਯਥਾ ਯੋਧਸ੍ਸ ਫਲਕਕੋਟ੍ਠਕੋ ਨਾਮ ਬਹੂਪਕਾਰੋ ਹੋਤਿ, ਸੋ ਤਂ ਨਿਸ੍ਸਾਯ ਸਙ੍ਗਾਮਂ ਪਵਿਸਤਿ, ਤਤ੍ਥ ਹਤ੍ਥੀਹਿਪਿ ਅਸ੍ਸੇਹਿਪਿ ਯੋਧੇਹਿਪਿ ਸਦ੍ਧਿਂ ਕਮ੍ਮਂ ਕਤ੍ਵਾ ਆਵੁਧੇਸੁ ਵਾ ਖੀਣੇਸੁ ਭੁਞ੍ਜਿਤੁਕਾਮਤਾਦਿਭਾਵੇ ਵਾ ਸਤਿ ਨਿਵਤ੍ਤਿਤ੍ਵਾ ਫਲਕਕੋਟ੍ਠਕਂ ਪਵਿਸਿਤ੍ਵਾ ਆਵੁਧਾਨਿਪਿ ਗਣ੍ਹਾਤਿ, ਵਿਸ੍ਸਮਤਿਪਿ, ਭੁਞ੍ਜਤਿਪਿ, ਪਾਨੀਯਮ੍ਪਿ ਪਿਵਤਿ, ਸਨ੍ਨਾਹਮ੍ਪਿ ਪਟਿਸਨ੍ਨਯ੍ਹਤਿ, ਤਂ ਤਂ ਕਤ੍ਵਾ ਪੁਨ ਸਙ੍ਗਾਮਂ ਪਵਿਸਤਿ, ਤਤ੍ਥ ਕਮ੍ਮਂ ਕਤ੍ਵਾ ਪੁਨ ਉਚ੍ਚਾਰਾਦਿਪੀਲ਼ਿਤੋ ਵਾ ਕੇਨਚਿਦੇਵ ਵਾ ਕਰਣੀਯੇਨ ਫਲਕਕੋਟ੍ਠਕਂ ਪਵਿਸਤਿ. ਤਤ੍ਥ ਸਨ੍ਥਮ੍ਭਿਤ੍ਵਾ ਪੁਨ ਸਙ੍ਗਾਮਂ ਪਵਿਸਤਿ, ਏਵਂ ਯੋਧਸ੍ਸ ਫਲਕਕੋਟ੍ਠਕੋ ਵਿਯ ਵਿਪਸ੍ਸਨਾਯ ਬਹੂਪਕਾਰਾ ਸਮਾਪਤ੍ਤਿ.

ਸਮਾਪਤ੍ਤਿਯਾ ਪਨ ਸਙ੍ਗਾਮਨਿਤ੍ਥਰਣਕਯੋਧਸ੍ਸ ਫਲਕਕੋਟ੍ਠਕਤੋਪਿ ਵਿਪਸ੍ਸਨਾ ਬਹੂਪਕਾਰਤਰਾ. ਕਿਞ੍ਚਾਪਿ ਹਿ ਸਮਾਪਤ੍ਤਿਂ ਨਿਸ੍ਸਾਯ ਵਿਪਸ੍ਸਨਂ ਪਟ੍ਠਪੇਤਿ, ਵਿਪਸ੍ਸਨਾ ਪਨ ਥਾਮਜਾਤਾ ਸਮਾਪਤ੍ਤਿਮ੍ਪਿ ਰਕ੍ਖਤਿ. ਥਾਮਜਾਤਂ ਕਰੋਤਿ.

ਯਥਾ ਹਿ ਥਲੇ ਨਾਵਮ੍ਪਿ ਨਾਵਾਯ ਭਣ੍ਡਮ੍ਪਿ ਸਕਟਭਾਰਂ ਕਰੋਨ੍ਤਿ. ਉਦਕਂ ਪਤ੍ਵਾ ਪਨ ਸਕਟਮ੍ਪਿ ਸਕਟਭਣ੍ਡਮ੍ਪਿ ਯੁਤ੍ਤਗੋਣੇਪਿ ਨਾਵਾਭਾਰਂ ਕਰੋਨ੍ਤਿ. ਨਾਵਾ ਤਿਰਿਯਂ ਸੋਤਂ ਛਿਨ੍ਦਿਤ੍ਵਾ ਸੋਤ੍ਥਿਨਾ ਸੁਪਟ੍ਟਨਂ ਗਚ੍ਛਤਿ, ਏਵਮੇਵਂ ਕਿਞ੍ਚਾਪਿ ਸਮਾਪਤ੍ਤਿਂ ਨਿਸ੍ਸਾਯ ਵਿਪਸ੍ਸਨਂ ਪਟ੍ਠਪੇਤਿ, ਵਿਪਸ੍ਸਨਾ ਪਨ ਥਾਮਜਾਤਾ ਸਮਾਪਤ੍ਤਿਮ੍ਪਿ ਰਕ੍ਖਤਿ, ਥਾਮਜਾਤਂ ਕਰੋਤਿ. ਥਲਂ ਪਤ੍ਵਾ ਸਕਟਂ ਵਿਯ ਹਿ ਸਮਾਪਤ੍ਤਿ. ਉਦਕਂ ਪਤ੍ਵਾ ਨਾਵਾ ਵਿਯ ਵਿਪਸ੍ਸਨਾ. ਇਤਿ ਬੋਧਿਸਤ੍ਤਸ੍ਸ ਏਤ੍ਤਾਵਤਾ ਸਮਾਪਤ੍ਤਿਂ ਨਿਸ੍ਸਾਯ ਵਿਪਸ੍ਸਨਾਪਟ੍ਠਪਨਕਾਲੋ ਕਥਿਤੋਤਿ ਵੇਦਿਤਬ੍ਬੋ.

ਯਞ੍ਞਦੇਵਾਤਿਆਦਿ ਕਣ੍ਹਪਕ੍ਖੇ ਵੁਤ੍ਤਾਨੁਸਾਰੇਨੇਵ ਵੇਦਿਤਬ੍ਬਂ, ਇਧਾਪਿ ਅਤ੍ਥਦੀਪਿਕਂ ਉਪਮਂ ਦਸ੍ਸੇਤੁਂ ਸੇਯ੍ਯਥਾਪੀਤਿਆਦਿਮਾਹ. ਤਤ੍ਥ ਗਾਮਨ੍ਤਸਮ੍ਭਤੇਸੂਤਿ ਗਾਮਨ੍ਤਂ ਆਹਟੇਸੁ. ਸਤਿਕਰਣੀਯਮੇਵ ਹੋਤੀਤਿ ਏਤਾ ਗਾਵੋਤਿ ਸਤਿਉਪ੍ਪਾਦਨਮਤ੍ਤਮੇਵ ਕਾਤਬ੍ਬਂ ਹੋਤਿ. ਇਤੋ ਚਿਤੋ ਚ ਗਨ੍ਤ੍ਵਾ ਆਕੋਟਨਾਦਿਕਿਚ੍ਚਂ ਨਤ੍ਥਿ. ਏਤੇ ਧਮ੍ਮਾਤਿ ਏਤੇ ਸਮਥਵਿਪਸ੍ਸਨਾ ਧਮ੍ਮਾਤਿ ਸਤੁਪ੍ਪਾਦਨਮਤ੍ਤਮੇਵ ਕਾਤਬ੍ਬਂ ਹੋਤਿ. ਇਮਿਨਾ ਬੋਧਿਸਤ੍ਤਸ੍ਸ ਸਮਥਵਿਪਸ੍ਸਨਾਨਂ ਥਾਮਜਾਤਕਾਲੋ ਕਥਿਤੋ. ਤਦਾ ਕਿਰਸ੍ਸ ਸਮਾਪਤ੍ਤਿਂ ਅਪ੍ਪਨਤ੍ਥਾਯ ਨਿਸਿਨ੍ਨਸ੍ਸ ਅਟ੍ਠ ਸਮਾਪਤ੍ਤਿਯੋ ਏਕਾਵਜ੍ਜਨੇਨ ਆਪਾਥਂ ਆਗਚ੍ਛਨ੍ਤਿ, ਵਿਪਸ੍ਸਨਂ ਪਟ੍ਠਪੇਤ੍ਵਾ ਨਿਸਿਨ੍ਨੋ ਸਤ੍ਤ ਅਨੁਪਸ੍ਸਨਾ ਏਕਪ੍ਪਹਾਰੇਨੇਵ ਆਰੁਲ਼੍ਹੋ ਹੋਤਿ.

੨੧੫. ਸੇਯ੍ਯਥਾਪੀਤਿ ਇਧ ਕਿਂ ਦਸ੍ਸੇਤਿ? ਅਯਂ ਪਾਟਿਯੇਕ੍ਕੋ ਅਨੁਸਨ੍ਧਿ, ਸਤ੍ਤਾਨਞ੍ਹਿ ਹਿਤੂਪਚਾਰਂ ਅਤ੍ਤਨੋ ਸਤ੍ਥੁਭਾਵਸਮ੍ਪਦਞ੍ਚ ਦਸ੍ਸੇਨ੍ਤੋ ਭਗਵਾ ਇਮਂ ਦੇਸਨਂ ਆਰਭਿ. ਤਤ੍ਥ ਅਰਞ੍ਞੇਤਿ ਅਟਵਿਯਂ. ਪਵਨੇਤਿ ਵਨਸਣ੍ਡੇ. ਅਤ੍ਥਤੋ ਹਿ ਇਦਂ ਦ੍ਵਯਂ ਏਕਮੇਵ, ਪਠਮਸ੍ਸ ਪਨ ਦੁਤਿਯਂ ਵੇਵਚਨਂ. ਅਯੋਗਕ੍ਖੇਮਕਾਮੋਤਿ ਚਤੂਹਿ ਯੋਗੇਹਿ ਖੇਮਂ ਨਿਬ੍ਭਯਟ੍ਠਾਨਂ ਅਨਿਚ੍ਛਨ੍ਤੋ ਭਯਮੇਵ ਇਚ੍ਛਨ੍ਤੋ. ਸੋਵਤ੍ਥਿਕੋਤਿ ਸੁਵਤ੍ਥਿਭਾਵਾਵਹੋ. ਪੀਤਿਗਮਨੀਯੋਤਿ ਤੁਟ੍ਠਿਂ ਗਮਨੀਯੋ. ‘‘ਪੀਤਗਮਨੀਯੋ’’ਤਿ ਵਾ ਪਾਠੋ. ਪਿਦਹੇਯ੍ਯਾਤਿ ਸਾਖਾਦੀਹਿ ਥਕੇਯ੍ਯ. ਵਿਵਰੇਯ੍ਯਾਤਿ ਵਿਸਦਮੁਖਂ ਕਤ੍ਵਾ ਵਿਵਟਂ ਕਰੇਯ੍ਯ. ਕੁਮ੍ਮਗ੍ਗਨ੍ਤਿ ਉਦਕਵਨਪਬ੍ਬਤਾਦੀਹਿ ਸਨ੍ਨਿਰੁਦ੍ਧਂ ਅਮਗ੍ਗਂ. ਓਦਹੇਯ੍ਯ ਓਕਚਰਨ੍ਤਿ ਤੇਸਂ ਓਕੇ ਚਰਮਾਨਂ ਵਿਯ ਏਕਂ ਦੀਪਕਮਿਗਂ ਏਕਸ੍ਮਿਂ ਠਾਨੇ ਠਪੇਯ੍ਯ. ਓਕਚਾਰਿਕਨ੍ਤਿ ਦੀਘਰਜ੍ਜੁਯਾ ਬਨ੍ਧਿਤਂਯੇਵ ਮਿਗਿਂ.

ਮਿਗਲੁਦ੍ਦਕੋ ਹਿ ਅਰਞ੍ਞਂ ਮਿਗਾਨਂ ਵਸਨਟ੍ਠਾਨਂ ਗਨ੍ਤ੍ਵਾ ‘‘ਇਧ ਵਸਨ੍ਤਿ, ਇਮਿਨਾ ਮਗ੍ਗੇਨ ਨਿਕ੍ਖਮਨ੍ਤਿ, ਏਤ੍ਥ ਚਰਨ੍ਤਿ, ਏਤ੍ਥ ਪਿਵਨ੍ਤਿ, ਇਮਿਨਾ ਮਗ੍ਗੇਨ ਪਵਿਸਨ੍ਤੀ’’ਤਿ ਸਲ੍ਲਕ੍ਖੇਤ੍ਵਾ ਮਗ੍ਗਂ ਪਿਧਾਯ ਕੁਮ੍ਮਗ੍ਗਂ ਵਿਵਰਿਤ੍ਵਾ ਓਕਚਰਞ੍ਚ ਓਕਚਾਰਿਕਞ੍ਚ ਠਪੇਤ੍ਵਾ ਸਯਂ ਪਟਿਚ੍ਛਨ੍ਨਟ੍ਠਾਨੇ ਸਤ੍ਤਿਂ ਗਹੇਤ੍ਵਾ ਤਿਟ੍ਠਤਿ. ਅਥ ਸਾਯਨ੍ਹਸਮਯੇ ਮਿਗਾ ਅਕੁਤੋਭਯੇ ਅਰਞ੍ਞੇ ਚਰਿਤ੍ਵਾ ਪਾਨੀਯਂ ਪਿਵਿਤ੍ਵਾ ਮਿਗਪੋਤਕੇਹਿ ਸਦ੍ਧਿਂ ਕੀਲ਼ਮਾਨਾ ਵਸਨਟ੍ਠਾਨਸਨ੍ਤਿਕਂ ਆਗਨ੍ਤ੍ਵਾ ਓਕਚਰਞ੍ਚ ਓਕਚਾਰਿਕਞ੍ਚ ਦਿਸ੍ਵਾ ‘‘ਸਹਾਯਕਾ ਨੋ ਆਗਤਾ ਭਵਿਸ੍ਸਨ੍ਤੀ’’ਤਿ ਨਿਰਾਸਙ੍ਕਾ ਪਵਿਸਨ੍ਤਿ, ਤੇ ਮਗ੍ਗਂ ਪਿਹਿਤਂ ਦਿਸ੍ਵਾ ‘‘ਨਾਯਂ ਮਗ੍ਗੋ, ਅਯਂ ਮਗ੍ਗੋ ਭਵਿਸ੍ਸਤੀ’’ਤਿ ਕੁਮ੍ਮਗ੍ਗਂ ਪਟਿਪਜ੍ਜਨ੍ਤਿ. ਮਿਗਲੁਦ੍ਦਕੋ ਨ ਤਾਵ ਕਿਞ੍ਚਿ ਕਰੋਤਿ, ਪਵਿਟ੍ਠੇਸੁ ਪਨ ਸਬ੍ਬਪਚ੍ਛਿਮਂ ਸਣਿਕਂ ਪਹਰਤਿ. ਸੋ ਉਤ੍ਤਸਤਿ, ਤਤੋ ਸਬ੍ਬੇ ਉਤ੍ਤਸਿਤ੍ਵਾ ‘‘ਭਯਂ ਉਪ੍ਪਨ੍ਨ’’ਨ੍ਤਿ ਪੁਰਤੋ ਓਲੋਕੇਨ੍ਤਾ ਉਦਕੇਨ ਵਾ ਵਨੇਨ ਵਾ ਪਬ੍ਬਤੇਨ ਵਾ ਸਨ੍ਨਿਰੁਦ੍ਧਂ ਮਗ੍ਗਂ ਦਿਸ੍ਵਾ ਉਭੋਹਿ ਪਸ੍ਸੇਹਿ ਅਙ੍ਗੁਲਿਸਙ੍ਖਲਿਕਂ ਵਿਯ ਗਹਨਵਨਂ ਪਵਿਸਿਤੁਂ ਅਸਕ੍ਕੋਨ੍ਤਾ ਪਵਿਟ੍ਠਮਗ੍ਗੇਨੇਵ ਨਿਕ੍ਖਮਿਤੁਂ ਆਰਭਨ੍ਤਿ. ਲੁਦ੍ਦਕੋ ਤੇਸਂ ਨਿਵਤ੍ਤਨਭਾਵਂ ਞਤ੍ਵਾ ਆਦਿਤੋ ਪਟ੍ਠਾਯ ਤਿਂਸਮ੍ਪਿ ਚਤ੍ਤਾਲੀਸਮ੍ਪਿ ਮਿਗੇ ਘਾਤੇਤਿ. ਇਦਂ ਸਨ੍ਧਾਯ ਏਵਞ੍ਹਿ ਸੋ, ਭਿਕ੍ਖਵੇ, ਮਹਾਮਿਗਸਙ੍ਘੋ ਅਪਰੇਨ ਸਮਯੇਨ ਅਨਯਬ੍ਯਸਨਂ ਆਪਜ੍ਜੇਯ੍ਯਾਤਿ ਵੁਤ੍ਤਂ.

‘‘ਨਨ੍ਦੀਰਾਗਸ੍ਸੇਤਂ ਅਧਿਵਚਨਂ, ਅਵਿਜ੍ਜਾਯੇਤਂ ਅਧਿਵਚਨ’’ਨ੍ਤਿ ਏਤ੍ਥ ਯਸ੍ਮਾ ਇਮੇ ਸਤ੍ਤਾ ਅਵਿਜ੍ਜਾਯ ਅਞ੍ਞਾਣਾ ਹੁਤ੍ਵਾ ਨਨ੍ਦੀਰਾਗੇਨ ਆਬਨ੍ਧਿਤ੍ਵਾ ਰੂਪਾਰਮ੍ਮਣਾਦੀਨਿ ਉਪਨੀਤਾ ਵਟ੍ਟਦੁਕ੍ਖਸਤ੍ਤਿਯਾ ਘਾਤਂ ਲਭਨ੍ਤਿ. ਤਸ੍ਮਾ ਭਗਵਾ ਓਕਚਰਂ ਨਨ੍ਦੀਰਾਗੋਤਿ, ਓਕਚਾਰਿਕਂ ਅਵਿਜ੍ਜਾਤਿ ਕਤ੍ਵਾ ਦਸ੍ਸੇਸਿ.

ਮਿਗਲੁਦ੍ਦਕੋ ਹਿ ਏਕਦਾਪਿ ਤੇਸਂ ਸਾਖਾਭਙ੍ਗੇਨ ਸਰੀਰਂ ਪੁਞ੍ਛਿਤ੍ਵਾ ਮਨੁਸ੍ਸਗਨ੍ਧਂ ਅਪਨੇਤ੍ਵਾ ਓਕਚਰਂ ਏਕਸ੍ਮਿਂ ਠਾਨੇ ਠਪੇਤ੍ਵਾ ਓਕਚਾਰਿਕਂ ਸਹ ਰਜ੍ਜੁਯਾ ਵਿਸ੍ਸਜ੍ਜੇਤ੍ਵਾ ਅਤ੍ਤਾਨਂ ਪਟਿਚ੍ਛਾਦੇਤ੍ਵਾ ਸਤ੍ਤਿਂ ਆਦਾਯ ਓਕਚਰਸ੍ਸ ਸਨ੍ਤਿਕੇ ਤਿਟ੍ਠਤਿ, ਓਕਚਾਰਿਕਾ ਮਿਗਗਣਸ੍ਸ ਚਰਣਟ੍ਠਾਨਾਭਿਮੁਖੀ ਗਚ੍ਛਤਿ. ਤਂ ਦਿਸ੍ਵਾ ਮਿਗਾ ਸੀਸਾਨਿ ਉਕ੍ਖਿਪਿਤ੍ਵਾ ਤਿਟ੍ਠਨ੍ਤਿ, ਸਾਪਿ ਸੀਸਂ ਉਕ੍ਖਿਪਿਤ੍ਵਾ ਤਿਟ੍ਠਤਿ, ਤੇ ‘‘ਅਮ੍ਹਾਕਂ ਸਮਜਾਤਿਕਾ ਅਯ’’ਨ੍ਤਿ ਗੋਚਰਂ ਗਣ੍ਹਨ੍ਤਿ. ਸਾਪਿ ਤਿਣਾਨਿ ਖਾਦਨ੍ਤੀ ਵਿਯ ਸਣਿਕਂ ਉਪਗਚ੍ਛਤਿ. ਆਰਞ੍ਞਿਕੋ ਯੂਥਪਤਿਮਿਗੋ ਤਸ੍ਸਾ ਵਾਤਂ ਲਭਿਤ੍ਵਾ ਸਕਭਰਿਯਂ ਵਿਸ੍ਸਜ੍ਜੇਤ੍ਵਾ ਤਦਭਿਮੁਖੋ ਹੋਤਿ.

ਸਤ੍ਤਾਨਞ੍ਹਿ ਨਵਨਵਮੇਵ ਪਿਯਂ ਹੋਤਿ. ਓਕਚਾਰਿਕਾ ਆਰਞ੍ਞਿਕਸ੍ਸ ਮਿਗਸ੍ਸ ਅਚ੍ਚਾਸਨ੍ਨਭਾਵਂ ਅਦਤ੍ਵਾ ਤਦਭਿਮੁਖੀਵ ਪਚ੍ਛਤੋ ਪਟਿਕ੍ਕਮਿਤ੍ਵਾ ਓਕਚਰਸ੍ਸ ਸਨ੍ਤਿਕਂ ਗਚ੍ਛਤਿ, ਯਤ੍ਥ ਯਤ੍ਥਸ੍ਸਾ ਰਜ੍ਜੁ ਲਗ੍ਗਤਿ, ਤਤ੍ਥ ਤਤ੍ਥ ਖੁਰੇਨ ਪਹਰਿਤ੍ਵਾ ਮੋਚੇਤਿ, ਆਰਞ੍ਞਿਕੋ ਮਿਗੋ ਓਕਚਰਂ ਦਿਸ੍ਵਾ ਓਕਚਾਰਿਕਾਯ ਸਮ੍ਮਤ੍ਤੋ ਹੁਤ੍ਵਾ ਓਕਚਰੇ ਉਸੂਯਂ ਕਤ੍ਵਾ ਪਿਟ੍ਠਿਂ ਨਾਮੇਤ੍ਵਾ ਸੀਸਂ ਕਮ੍ਪੇਨ੍ਤੋ ਤਿਟ੍ਠਤਿ, ਤਸ੍ਮਿਂ ਖਣੇ ਸਤ੍ਤਿਂ ਜਿਵ੍ਹਾਯ ਲੇਹਨ੍ਤੋਪਿ ‘‘ਕਿਂ ਏਤ’’ਨ੍ਤਿ ਨ ਜਾਨਾਤਿ, ਓਕਚਰੋਪਿ ਸਚਸ੍ਸ ਉਪਰਿਭਾਗੇਨ ਤਂ ਮਿਗਂ ਪਹਰਿਤੁਂ ਸੁਖਂ ਹੋਤਿ, ਪਿਟ੍ਠਿਂ ਨਾਮੇਤਿ. ਸਚਸ੍ਸ ਹੇਟ੍ਠਾਭਾਗੇਨ ਪਹਰਿਤੁਂ ਸੁਖਂ ਹੋਤਿ, ਹਦਯਂ ਉਨ੍ਨਾਮੇਤਿ. ਅਥ ਲੁਦ੍ਦਕੋ ਆਰਞ੍ਞਿਕਂ ਮਿਗਂ ਸਤ੍ਤਿਯਾ ਪਹਰਿਤ੍ਵਾ ਤਤ੍ਥੇਵ ਘਾਤੇਤ੍ਵਾ ਮਂਸਂ ਆਦਾਯ ਗਚ੍ਛਤਿ. ਏਵਮੇਵ ਯਥਾ ਸੋ ਮਿਗੋ ਓਕਚਾਰਿਕਾਯ ਸਮ੍ਮਤ੍ਤੋ ਓਕਚਰੇ ਉਸੂਯਂ ਕਤ੍ਵਾ ਸਤ੍ਤਿਂ ਜਿਵ੍ਹਾਯ ਲੇਹਨ੍ਤੋਪਿ ਕਿਞ੍ਚਿ ਨ ਜਾਨਾਤਿ, ਤਥਾ ਇਮੇ ਸਤ੍ਤਾ ਅਵਿਜ੍ਜਾਯ ਸਮ੍ਮਤ੍ਤਾ ਅਨ੍ਧਭੂਤਾ ਕਿਞ੍ਚਿ ਅਜਾਨਨ੍ਤਾ ਰੂਪਾਦੀਸੁ ਨਨ੍ਦੀਰਾਗਂ ਉਪਗਮ੍ਮ ਵਟ੍ਟਦੁਕ੍ਖਸਤ੍ਤਿਯਾ ਵਧਂ ਲਭਨ੍ਤੀਤਿ ਭਗਵਾ ਓਕਚਰਂ ਨਨ੍ਦੀਰਾਗੋਤਿ, ਓਕਚਾਰਿਕਂ ਅਵਿਜ੍ਜਾਤਿ ਕਤ੍ਵਾ ਦਸ੍ਸੇਸਿ.

ਇਤਿ ਖੋ, ਭਿਕ੍ਖਵੇ, ਵਿਵਟੋ ਮਯਾ ਖੇਮੋ ਮਗ੍ਗੋਤਿ ਇਤਿ ਖੋ, ਭਿਕ੍ਖਵੇ, ਮਯਾ ਇਮੇਸਂ ਸਤ੍ਤਾਨਂ ਹਿਤਚਰਣੇਨ ਸਮ੍ਮਾਸਮ੍ਬੋਧਿਂ ਪਤ੍ਵਾ ਅਹਂ ਬੁਦ੍ਧੋਸ੍ਮੀਤਿ ਤੁਣ੍ਹੀਭੂਤੇਨ ਅਨਿਸੀਦਿਤ੍ਵਾ ਧਮ੍ਮਚਕ੍ਕਪ੍ਪਵਤ੍ਤਨਤੋ ਪਟ੍ਠਾਯ ਧਮ੍ਮਂ ਦੇਸੇਨ੍ਤੇਨ ਵਿਵਟੋ ਖੇਮੋ ਅਰਿਯੋ ਅਟ੍ਠਙ੍ਗਿਕੋ ਮਗ੍ਗੋ, ਪਿਹਿਤੋ ਕੁਮ੍ਮਗ੍ਗੋ, ਅਞ੍ਞਾਤਕੋਣ੍ਡਞ੍ਞਾਦੀਨਂ ਭਬ੍ਬਪੁਗ੍ਗਲਾਨਂ ਊਹਤੋ ਓਕਚਰੋ ਨਨ੍ਦੀਰਾਗੋ ਦ੍ਵੇਧਾ ਛੇਤ੍ਵਾ ਪਾਤਿਤੋ, ਨਾਸਿਤਾ ਓਕਚਾਰਿਕਾ ਅਵਿਜ੍ਜਾ ਸਬ੍ਬੇਨ ਸਬ੍ਬਂ ਸਮੁਗ੍ਘਾਤਿਤਾਤਿ ਅਤ੍ਤਨੋ ਹਿਤੂਪਚਾਰਂ ਦਸ੍ਸੇਸਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਦ੍ਵੇਧਾਵਿਤਕ੍ਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.