੫. ਅਨੁਮਾਨਸੁਤ੍ਤਵਣ੍ਣਨਾ

੧੮੧. ਏਵਂ ਮੇ ਸੁਤਨ੍ਤਿ ਅਨੁਮਾਨਸੁਤ੍ਤਂ. ਤਤ੍ਥ ਭਗ੍ਗੇਸੂਤਿ ਏਵਂਨਾਮਕੇ ਜਨਪਦੇ, ਵਚਨਤ੍ਥੋ ਪਨੇਤ੍ਥ ਵੁਤ੍ਤਾਨੁਸਾਰੇਨੇਵ ਵੇਦਿਤਬ੍ਬੋ. ਸੁਸੁਮਾਰਗਿਰੇਤਿ ਏਵਂਨਾਮਕੇ ਨਗਰੇ. ਤਸ੍ਸ ਕਿਰ ਨਗਰਸ੍ਸ ਵਤ੍ਥੁਪਰਿਗ੍ਗਹਦਿਵਸੇ ਅਵਿਦੂਰੇ ਉਦਕਰਹਦੇ ਸੁਂਸੁਮਾਰੋ ਸਦ੍ਦਮਕਾਸਿ, ਗਿਰਂ ਨਿਚ੍ਛਾਰੇਸਿ. ਅਥ ਨਗਰੇ ਨਿਟ੍ਠਿਤੇ ਸੁਂਸੁਮਾਰਗਿਰਂ ਤ੍ਵੇਵਸ੍ਸ ਨਾਮਂ ਅਕਂਸੁ. ਭੇਸਕਲ਼ਾਵਨੇਤਿ ਭੇਸਕਲ਼ਾਨਾਮਕੇ ਵਨੇ. ‘‘ਭੇਸਗਲ਼ਾਵਨੇ’’ਤਿਪਿ ਪਾਠੋ. ਮਿਗਦਾਯੇਤਿ ਤਂ ਵਨਂ ਮਿਗਪਕ੍ਖੀਨਂ ਅਭਯਦਿਨ੍ਨਟ੍ਠਾਨੇ ਜਾਤਂ, ਤਸ੍ਮਾ ਮਿਗਦਾਯੋਤਿ ਵੁਚ੍ਚਤਿ.

ਪਵਾਰੇਤੀਤਿ ਇਚ੍ਛਾਪੇਤਿ. ਵਦਨ੍ਤੂਤਿ ਓਵਾਦਾਨੁਸਾਸਨਿਵਸੇਨ ਵਦਨ੍ਤੁ, ਅਨੁਸਾਸਨ੍ਤੂਤਿ ਅਤ੍ਥੋ. ਵਚਨੀਯੋਮ੍ਹੀਤਿ ਅਹਂ ਤੁਮ੍ਹੇਹਿ ਵਤ੍ਤਬ੍ਬੋ, ਅਨੁਸਾਸਿਤਬ੍ਬੋ ਓਵਦਿਤਬ੍ਬੋਤਿ ਅਤ੍ਥੋ. ਸੋ ਚ ਹੋਤਿ ਦੁਬ੍ਬਚੋਤਿ ਸੋ ਚ ਦੁਕ੍ਖੇਨ ਵਤ੍ਤਬ੍ਬੋ ਹੋਤਿ, ਵੁਤ੍ਤੋ ਨ ਸਹਤਿ. ਦੋਵਚਸ੍ਸਕਰਣੇਹੀਤਿ ਦੁਬ੍ਬਚਭਾਵਕਾਰਕੇਹਿ ਉਪਰਿ ਆਗਤੇਹਿ ਸੋਲ਼ਸਹਿ ਧਮ੍ਮੇਹਿ. ਅਪ੍ਪਦਕ੍ਖਿਣਗ੍ਗਾਹੀ ਅਨੁਸਾਸਨਿਨ੍ਤਿ ਯੋ ਹਿ ਵੁਚ੍ਚਮਾਨੋ ਤੁਮ੍ਹੇ ਮਂ ਕਸ੍ਮਾ ਵਦਥ, ਅਹਂ ਅਤ੍ਤਨੋ ਕਪ੍ਪਿਯਾਕਪ੍ਪਿਯਂ ਸਾਵਜ੍ਜਾਨਵਜ੍ਜਂ ਅਤ੍ਥਾਨਤ੍ਥਂ ਜਾਨਾਮੀਤਿ ਵਦਤਿ. ਅਯਂ ਅਨੁਸਾਸਨਿਂ ਪਦਕ੍ਖਿਣਤੋ ਨ ਗਣ੍ਹਾਤਿ, ਵਾਮਤੋ ਗਣ੍ਹਾਤਿ, ਤਸ੍ਮਾ ਅਪ੍ਪਦਕ੍ਖਿਣਗ੍ਗਾਹੀਤਿ ਵੁਚ੍ਚਤਿ.

ਪਾਪਿਕਾਨਂ ਇਚ੍ਛਾਨਨ੍ਤਿ ਲਾਮਕਾਨਂ ਅਸਨ੍ਤਸਮ੍ਭਵਨਪਤ੍ਥਨਾਨਂ. ਪਟਿਪ੍ਫਰਤੀਤਿ ਪਟਿਵਿਰੁਦ੍ਧੋ, ਪਚ੍ਚਨੀਕੋ ਹੁਤ੍ਵਾ ਤਿਟ੍ਠਤਿ, ਅਪਸਾਦੇਤੀਤਿ ਕਿਂ ਨੁ ਖੋ ਤੁਯ੍ਹਂ ਬਾਲਸ੍ਸ ਅਬ੍ਯਤ੍ਤਸ੍ਸ ਭਣਿਤੇਨ, ਤ੍ਵਮ੍ਪਿ ਨਾਮ ਭਣਿਤਬ੍ਬਂ ਮਞ੍ਞਿਸ੍ਸਸੀਤਿ ਏਵਂ ਘਟ੍ਟੇਤਿ. ਪਚ੍ਚਾਰੋਪੇਤੀਤਿ, ਤ੍ਵਮ੍ਪਿ ਖੋਸਿ ਇਤ੍ਥਨ੍ਨਾਮਂ ਆਪਤ੍ਤਿਂ ਆਪਨ੍ਨੋ, ਤਂ ਤਾਵ ਪਟਿਕਰੋਹੀਤਿ ਏਵਂ ਪਟਿਆਰੋਪੇਤਿ.

ਅਞ੍ਞੇਨਞ੍ਞਂ ਪਟਿਚਰਤੀਤਿ ਅਞ੍ਞੇਨ ਕਾਰਣੇਨ ਵਚਨੇਨ ਵਾ ਅਞ੍ਞਂ ਕਾਰਣਂ ਵਚਨਂ ਵਾ ਪਟਿਚ੍ਛਾਦੇਤਿ. ‘‘ਆਪਤ੍ਤਿਂ ਆਪਨ੍ਨੋਸੀ’’ਤਿ ਵੁਤ੍ਤੇ ‘‘ਕੋ ਆਪਨ੍ਨੋ, ਕਿਂ ਆਪਨ੍ਨੋ, ਕਿਸ੍ਮਿਂ ਆਪਨ੍ਨੋ, ਕਂ ਭਣਥ, ਕਿਂ ਭਣਥਾ’’ਤਿ ਵਾ ਵਦਤਿ. ‘‘ਏਵਰੂਪਂ ਕਿਞ੍ਚਿ ਤਯਾ ਦਿਟ੍ਠ’’ਨ੍ਤਿ ਵੁਤ੍ਤੇ ‘‘ਨ ਸੁਣਾਮੀ’’ਤਿ ਸੋਤਂ ਵਾ ਉਪਨੇਤਿ. ਬਹਿਦ੍ਧਾ ਕਥਂ ਅਪਨਾਮੇਤੀਤਿ ‘‘ਇਤ੍ਥਨ੍ਨਾਮਂ ਆਪਤ੍ਤਿਂ ਆਪਨ੍ਨੋਸੀ’’ਤਿ ਪੁਟ੍ਠੋ ‘‘ਪਾਟਲਿਪੁਤ੍ਤਂ ਗਤੋਮ੍ਹੀ’’ਤਿ ਵਤ੍ਵਾ ਪੁਨ ‘‘ਨ ਤਵ ਪਾਟਲਿਪੁਤ੍ਤਗਮਨਂ ਪੁਚ੍ਛਾਮ, ਆਪਤ੍ਤਿਂ ਪੁਚ੍ਛਾਮਾ’’ਤਿ ਵੁਤ੍ਤੇ ‘‘ਤਤੋ ਰਾਜਗੇਹਂ ਗਤੋਮ੍ਹੀ’’ਤਿ, ਰਾਜਗੇਹਂ ਵਾ ਯਾਹਿ ਬ੍ਰਾਹ੍ਮਣਗੇਹਂ ਵਾ, ਆਪਤ੍ਤਿਂ ਆਪਨ੍ਨੋਸੀਤਿ. ਤਤ੍ਥ ਮੇ ਸੂਕਰਮਂਸਂ ਲਦ੍ਧਨ੍ਤਿਆਦੀਨਿ ਵਦਨ੍ਤੋ ਕਥਂ ਬਹਿਦ੍ਧਾ ਵਿਕ੍ਖਿਪਤਿ.

ਅਪਦਾਨੇਤਿ ਅਤ੍ਤਨੋ ਚਰਿਯਾਯ. ਨ ਸਮ੍ਪਾਯਤੀਤਿ, ਆਵੁਸੋ, ਤ੍ਵਂ ਕੁਹਿਂ ਵਸਸਿ, ਕਂ ਨਿਸ੍ਸਾਯ ਵਸਸੀਤਿ ਵਾ, ਯਂ ਤ੍ਵਂ ਵਦੇਸਿ ‘‘ਮਯਾ ਏਸ ਆਪਤ੍ਤਿਂ ਆਪਜ੍ਜਨ੍ਨੋ ਦਿਟ੍ਠੋ’’ਤਿ. ਤ੍ਵਂ ਤਸ੍ਮਿਂ ਸਮਯੇ ਕਿਂ ਕਰੋਸਿ, ਅਯਂ ਕਿਂ ਕਰੋਤਿ, ਕਤ੍ਥ ਵਾ ਤ੍ਵਂ ਅਚ੍ਛਸਿ ਕਤ੍ਥ ਵਾ ਅਯਨ੍ਤਿਆਦਿਨਾ ਨਯੇਨ ਚਰਿਯਂ ਪੁਟ੍ਠੋ ਸਮ੍ਪਾਦੇਤ੍ਵਾ ਕਥੇਤੁਂ ਨ ਸਕ੍ਕੋਤਿ.

੧੮੩. ਤਤ੍ਰਾਵੁਸੋਤਿ, ਆਵੁਸੋ, ਤੇਸੁ ਸੋਲ਼ਸਸੁ ਧਮ੍ਮੇਸੁ. ਅਤ੍ਤਨਾਵ ਅਤ੍ਤਾਨਂ ਏਵਂ ਅਨੁਮਿਨਿਤਬ੍ਬਨ੍ਤਿ ਏਵਂ ਅਤ੍ਤਨਾਵ ਅਤ੍ਤਾ ਅਨੁਮੇਤਬ੍ਬੋ ਤੁਲੇਤਬ੍ਬੋ ਤੀਰੇਤਬ੍ਬੋ.

੧੮੪. ਪਚ੍ਚਵੇਕ੍ਖਿਤਬ੍ਬਨ੍ਤਿ ਪਚ੍ਚਵੇਕ੍ਖਿਤਬ੍ਬੋ. ਅਹੋਰਤ੍ਤਾਨੁਸਿਕ੍ਖਿਨਾਤਿ ਦਿਵਾਪਿ ਰਤ੍ਤਿਮ੍ਪਿ ਸਿਕ੍ਖਨ੍ਤੇਨ, ਰਤਿਞ੍ਚ ਦਿਵਾ ਚ ਕੁਸਲੇਸੁ ਧਮ੍ਮੇਸੁ ਸਿਕ੍ਖਨ੍ਤੇਨ ਪੀਤਿਪਾਮੋਜ੍ਜਮੇਵ ਉਪ੍ਪਾਦੇਤਬ੍ਬਨ੍ਤਿ ਅਤ੍ਥੋ.

ਅਚ੍ਛੇ ਵਾ ਉਦਕਪਤ੍ਤੇਤਿ ਪਸਨ੍ਨੇ ਵਾ ਉਦਕਭਾਜਨੇ. ਮੁਖਨਿਮਿਤ੍ਤਨ੍ਤਿ ਮੁਖਪਟਿਬਿਮ੍ਬਂ. ਰਜਨ੍ਤਿ ਆਗਨ੍ਤੁਕਰਜਂ. ਅਙ੍ਗਣਨ੍ਤਿ ਤਤ੍ਥ ਜਾਤਕਂ ਤਿਲਕਂ ਵਾ ਪਿਲ਼ਕਂ ਵਾ. ਸਬ੍ਬੇਪਿਮੇ ਪਾਪਕੇ ਅਕੁਸਲੇ ਧਮ੍ਮੇ ਪਹੀਨੇਤਿ ਇਮਿਨਾ ਸਬ੍ਬਪ੍ਪਹਾਨਂ ਕਥੇਸਿ. ਕਥਂ? ਏਤ੍ਤਕਾ ਅਕੁਸਲਾ ਧਮ੍ਮਾ ਪਬ੍ਬਜਿਤਸ੍ਸ ਨਾਨੁਚ੍ਛਵਿਕਾਤਿ ਪਟਿਸਙ੍ਖਾਨਂ ਉਪ੍ਪਾਦਯਤੋ ਹਿ ਪਟਿਸਙ੍ਖਾਨਪ੍ਪਹਾਨਂਕਥਿਤਂ ਹੋਤਿ. ਸੀਲਂ ਪਦਟ੍ਠਾਨਂ ਕਤ੍ਵਾ ਕਸਿਣਪਰਿਕਮ੍ਮਂ ਆਰਭਿਤ੍ਵਾ ਅਟ੍ਠ ਸਮਾਪਤ੍ਤਿਯੋ ਨਿਬ੍ਬਤ੍ਤੇਨ੍ਤਸ੍ਸ ਵਿਕ੍ਖਮ੍ਭਨਪ੍ਪਹਾਨਂ ਕਥਿਤਂ. ਸਮਾਪਤ੍ਤਿਂ ਪਦਟ੍ਠਾਨਂ ਕਤ੍ਵਾ ਵਿਪਸ੍ਸਨਂ ਵਡ੍ਢੇਨ੍ਤਸ੍ਸ ਤਦਙ੍ਗਪ੍ਪਹਾਨਂ ਕਥਿਤਂ. ਵਿਪਸ੍ਸਨਂ ਵਡ੍ਢੇਤ੍ਵਾ ਮਗ੍ਗਂ ਭਾਵੇਨ੍ਤਸ੍ਸ ਸਮੁਚ੍ਛੇਦਪ੍ਪਹਾਨਂ ਕਥਿਤਂ. ਫਲੇ ਆਗਤੇ ਪਟਿਪ੍ਪਸ੍ਸਦ੍ਧਿਪ੍ਪਹਾਨਂ, ਨਿਬ੍ਬਾਨੇ ਆਗਤੇ ਨਿਸ੍ਸਰਣਪ੍ਪਹਾਨਨ੍ਤਿ ਏਵਂ ਇਮਸ੍ਮਿਂ ਸੁਤ੍ਤੇ ਸਬ੍ਬਪ੍ਪਹਾਨਂ ਕਥਿਤਂਵ ਹੋਤਿ.

ਇਦਞ੍ਹਿ ਸੁਤ੍ਤਂ ਭਿਕ੍ਖੁਪਾਤਿਮੋਕ੍ਖਂ ਨਾਮਾਤਿ ਪੋਰਾਣਾ ਵਦਨ੍ਤਿ. ਇਦਂ ਦਿਵਸਸ੍ਸ ਤਿਕ੍ਖਤ੍ਤੁਂ ਪਚ੍ਚਵੇਕ੍ਖਿਤਬ੍ਬਂ. ਪਾਤੋ ਏਵ ਵਸਨਟ੍ਠਾਨਂ ਪਵਿਸਿਤ੍ਵਾ ਨਿਸਿਨ੍ਨੇਨ ‘‘ਇਮੇ ਏਤ੍ਤਕਾ ਕਿਲੇਸਾ ਅਤ੍ਥਿ ਨੁ ਖੋ ਮਯ੍ਹਂ ਨਤ੍ਥੀ’’ਤਿ ਪਚ੍ਚਵੇਕ੍ਖਿਤਬ੍ਬਾ. ਸਚੇ ਅਤ੍ਥੀਤਿ ਪਸ੍ਸਤਿ, ਤੇਸਂ ਪਹਾਨਾਯ ਵਾਯਮਿਤਬ੍ਬਂ. ਨੋ ਚੇ ਪਸ੍ਸਤਿ, ਸੁਪਬ੍ਬਜਿਤੋਸ੍ਮੀਤਿ ਅਤ੍ਤਮਨੇਨ ਭਵਿਤਬ੍ਬਂ. ਭਤ੍ਤਕਿਚ੍ਚਂ ਕਤ੍ਵਾ ਰਤ੍ਤਿਟ੍ਠਾਨੇ ਵਾ ਦਿਵਾਟ੍ਠਾਨੇ ਵਾ ਨਿਸੀਦਿਤ੍ਵਾਪਿ ਪਚ੍ਚਵੇਕ੍ਖਿਤਬ੍ਬਂ. ਸਾਯਂ ਵਸਨਟ੍ਠਾਨੇ ਨਿਸੀਦਿਤ੍ਵਾਪਿ ਪਚ੍ਚਵੇਕ੍ਖਿਤਬ੍ਬਂ. ਤਿਕ੍ਖਤ੍ਤੁਂ ਅਸਕ੍ਕੋਨ੍ਤੇਨ ਦ੍ਵੇ ਵਾਰੇ ਪਚ੍ਚਵੇਕ੍ਖਿਤਬ੍ਬਂ. ਦ੍ਵੇ ਵਾਰੇ ਅਸਕ੍ਕੋਨ੍ਤੇਨ ਪਨ ਅਵਸ੍ਸਂ ਏਕਵਾਰਂ ਪਚ੍ਚਵੇਕ੍ਖਿਤਬ੍ਬਂ, ਅਪ੍ਪਚ੍ਚਵੇਕ੍ਖਿਤੁਂ ਨ ਵਟ੍ਟਤੀਤਿ ਵਦਨ੍ਤਿ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.

ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ

ਅਨੁਮਾਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.