੬. ਚੇਤੋਖਿਲਸੁਤ੍ਤਵਣ੍ਣਨਾ
੧੮੫. ਏਵਂ ਮੇ ਸੁਤਨ੍ਤਿ ਚੇਤੋਖਿਲਸੁਤ੍ਤਂ. ਤਤ੍ਥ ਚੇਤੋਖਿਲਾਤਿ ਚਿਤ੍ਤਸ੍ਸ ਥਦ੍ਧਭਾਵਾ ਕਚਵਰਭਾਵਾ ਖਾਣੁਕਭਾਵਾ. ਚੇਤਸੋ ਵਿਨਿਬਨ੍ਧਾਤਿ ਚਿਤ੍ਤਂ ਬਨ੍ਧਿਤ੍ਵਾ ਮੁਟ੍ਠਿਯਂ ਕਤ੍ਵਾ ਵਿਯ ਗਣ੍ਹਨ੍ਤੀਤਿ ਚੇਤਸੋ ਵਿਨਿਬਨ੍ਧਾ. ਵੁਦ੍ਧਿਨ੍ਤਿਆਦੀਸੁ ਸੀਲੇਨ ਵੁਦ੍ਧਿਂ, ਮਗ੍ਗੇਨ ਵਿਰੁਲ਼੍ਹਿਂ, ਨਿਬ੍ਬਾਨੇਨ ਵੇਪੁਲ੍ਲਂ. ਸੀਲਸਮਾਧੀਹਿ ਵਾ ਵੁਦ੍ਧਿਂ, ਵਿਪਸ੍ਸਨਾਮਗ੍ਗੇਹਿ ਵਿਰੁਲ਼੍ਹਿਂ, ਫਲਨਿਬ੍ਬਾਨੇਹਿ ਵੇਪੁਲ੍ਲਂ. ਸਤ੍ਥਰਿ ਕਙ੍ਖਤੀਤਿ ਸਤ੍ਥੁ ਸਰੀਰੇ ਵਾ ਗੁਣੇ ਵਾ ਕਙ੍ਖਤਿ. ਸਰੀਰੇ ਕਙ੍ਖਮਾਨੋ ਦ੍ਵਤ੍ਤਿਂਸਵਰਲਕ੍ਖਣਪ੍ਪਟਿਮਣ੍ਡਿਤਂ ਨਾਮ ਸਰੀਰਂ ਅਤ੍ਥਿ ਨੁ ਖੋ ਨਤ੍ਥੀਤਿ ਕਙ੍ਖਤਿ, ਗੁਣੇ ਕਙ੍ਖਮਾਨੋ ਅਤੀਤਾਨਾਗਤਪਚ੍ਚੁਪ੍ਪਨ੍ਨਜਾਨਨਸਮਤ੍ਥਂ ਸਬ੍ਬਞ੍ਞੁਤਞ੍ਞਾਣਂ ਅਤ੍ਥਿ ਨੁ ਖੋ ਨਤ੍ਥੀਤਿ ਕਙ੍ਖਤਿ. ਵਿਚਿਕਿਚ੍ਛਤੀਤਿ ਵਿਚਿਨਨ੍ਤੋ ਕਿਚ੍ਛਤਿ, ਦੁਕ੍ਖਂ ਆਪਜ੍ਜਤਿ, ਵਿਨਿਚ੍ਛੇਤੁਂ ਨ ਸਕ੍ਕੋਤਿ. ਨਾਧਿਮੁਚ੍ਚਤੀਤਿ ਏਵਮੇਤਨ੍ਤਿ ਅਧਿਮੋਕ੍ਖਂ ਨ ਪਟਿਲਭਤਿ. ਨ ਸਮ੍ਪਸੀਦਤੀਤਿ ਗੁਣੇਸੁ ਓਤਰਿਤ੍ਵਾ ਨਿਬ੍ਬਿਚਿਕਿਚ੍ਛਭਾਵੇਨ ਪਸੀਦਿਤੁਂ, ਅਨਾਵਿਲੋ ਭਵਿਤੁਂ ਨ ਸਕ੍ਕੋਤਿ. ਆਤਪ੍ਪਾਯਾਤਿ ਕਿਲੇਸਸਨ੍ਤਾਪਕਵੀਰਿਯਕਰਣਤ੍ਥਾਯ. ਅਨੁਯੋਗਾਯਾਤਿ ਪੁਨਪ੍ਪੁਨਂ ਯੋਗਾਯ. ਸਾਤਚ੍ਚਾਯਾਤਿ ਸਤਤਕਿਰਿਯਾਯ ਪਧਾਨਾਯਾਤਿ ਪਦਹਨਤ੍ਥਾਯ. ਅਯਂ ਪਠਮੋ ਚੇਤੋਖਿਲੋਤਿ ਅਯਂ ਸਤ੍ਥਰਿ ਵਿਚਿਕਿਚ੍ਛਾਸਙ੍ਖਾਤੋ ਪਠਮੋ ਚਿਤ੍ਤਸ੍ਸ ਥਦ੍ਧਭਾਵੋ, ਏਵਮੇਤਸ੍ਸ ਭਿਕ੍ਖੁਨੋ ਅਪ੍ਪਹੀਨੋ ਹੋਤਿ. ਧਮ੍ਮੇਤਿ ਪਰਿਯਤ੍ਤਿਧਮ੍ਮੇ ਚ ਪਟਿਵੇਧਧਮ੍ਮੇ ਚ. ਪਰਿਯਤ੍ਤਿਧਮ੍ਮੇ ਕਙ੍ਖਮਾਨੋ, ਤੇਪਿਟਕਂ ਬੁਦ੍ਧਵਚਨਂ ਚਤੁਰਾਸੀਤਿ ਧਮ੍ਮਕ੍ਖਨ੍ਧਸਹਸ੍ਸਾਨੀਤਿ ਵਦਨ੍ਤਿ, ਅਤ੍ਥਿ ਨੁ ਖੋ ਏਤਂ ਨਤ੍ਥੀਤਿ ਕਙ੍ਖਤਿ. ਪਟਿਵੇਧਧਮ੍ਮੇ ਕਙ੍ਖਮਾਨੋ ਵਿਪਸ੍ਸਨਾਨਿਸ੍ਸਨ੍ਦੋ ਮਗ੍ਗੋ ਨਾਮ, ਮਗ੍ਗਨਿਸ੍ਸਨ੍ਦੋ ਫਲਂ ਨਾਮ, ਸਬ੍ਬਸਙ੍ਖਾਰਪਟਿਨਿਸ੍ਸਗ੍ਗੋ ਨਿਬ੍ਬਾਨਂ ਨਾਮਾਤਿ ਵਦਨ੍ਤਿ. ਤਂ ਅਤ੍ਥਿ ਨੁ ਖੋ ਨਤ੍ਥੀਤਿ ਕਙ੍ਖਤਿ. ਸਙ੍ਘੇ ਕਙ੍ਖਤੀਤਿ ਸੁਪ੍ਪਟਿਪਨ੍ਨੋਤਿਆਦੀਨਂ ਪਦਾਨਂ ਵਸੇਨ ਏਵਰੂਪਂ ਪਟਿਪਦਂ ਪਟਿਪਨ੍ਨਾ ਚਤ੍ਤਾਰੋ ਮਗ੍ਗਟ੍ਠਾ ਚਤ੍ਤਾਰੋ ਫਲਟ੍ਠਾਤਿ ਅਟ੍ਠਨ੍ਨਂ ਪੁਗ੍ਗਲਾਨਂ ਸਮੂਹਭੂਤੋ ਸਙ੍ਘੋ ਨਾਮ, ਸੋ ਅਤ੍ਥਿ ਨੁ ਖੋ ਨਤ੍ਥੀਤਿ ਕਙ੍ਖਤਿ. ਸਿਕ੍ਖਾਯ ਕਙ੍ਖਮਾਨੋ ਅਧਿਸੀਲਸਿਕ੍ਖਾ ਨਾਮ ਅਧਿਚਿਤ੍ਤਸਿਕ੍ਖਾ ਨਾਮ ਅਧਿਪਞ੍ਞਾਸਿਕ੍ਖਾ ਨਾਮਾਤਿ ਵਦਨ੍ਤਿ. ਸਾ ਅਤ੍ਥਿ ਨੁ ਖੋ ਨਤ੍ਥੀਤਿ ਕਙ੍ਖਤਿ. ਅਯਂ ਪਞ੍ਚਮੋਤਿ ਅਯਂ ਸਬ੍ਰਹ੍ਮਚਾਰੀਸੁ ਕੋਪਸਙ੍ਖਾਤੋ ਪਞ੍ਚਮੋ ਚਿਤ੍ਤਸ੍ਸ ਥਦ੍ਧਭਾਵੋ ਕਚਵਰਭਾਵੋ ਖਾਣੁਕਭਾਵੋ.
੧੮੬. ਵਿਨਿਬਨ੍ਧੇਸੁ ਕਾਮੇਤਿ ਵਤ੍ਥੁਕਾਮੇਪਿ ਕਿਲੇਸਕਾਮੇਪਿ. ਕਾਯੇਤਿ ਅਤ੍ਤਨੋ ਕਾਯੇ. ਰੂਪੇਤਿ ਬਹਿਦ੍ਧਾ ਰੂਪੇ. ਯਾਵਦਤ੍ਥਨ੍ਤਿ ਯਤ੍ਤਕਂ ਇਚ੍ਛਤਿ, ਤਤ੍ਤਕਂ. ਉਦਰਾਵਦੇਹਕਨ੍ਤਿ ਉਦਰਪੂਰਂ. ਤਞ੍ਹਿ ਉਦਰਂ ਅਵਦੇਹਨਤੋ ਉਦਰਾਵਦੇਹਕਨ੍ਤਿ ਵੁਚ੍ਚਤਿ. ਸੇਯ੍ਯਸੁਖਨ੍ਤਿ ਮਞ੍ਚਪੀਠਸੁਖਂ, ਉਤੁਸੁਖਂ ਵਾ. ਪਸ੍ਸਸੁਖਨ੍ਤਿ ਯਥਾ ਸਮ੍ਪਰਿਵਤ੍ਤਕਂ ਸਯਨ੍ਤਸ੍ਸ ਦਕ੍ਖਿਣਪਸ੍ਸਵਾਮਪਸ੍ਸਾਨਂ ਸੁਖਂ ਹੋਤਿ, ਏਵਂ ਉਪ੍ਪਨ੍ਨਸੁਖਂ. ਮਿਦ੍ਧਸੁਖਨ੍ਤਿ ਨਿਦ੍ਦਾਸੁਖਂ. ਅਨੁਯੁਤ੍ਤੋਤਿ ਯੁਤ੍ਤਪਯੁਤ੍ਤੋ ਵਿਹਰਤਿ.
ਪਣਿਧਾਯਾਤਿ ਪਤ੍ਥਯਿਤ੍ਵਾ. ਸੀਲੇਨਾਤਿਆਦੀਸੁ ਸੀਲਨ੍ਤਿ ਚਤੁਪਾਰਿਸੁਦ੍ਧਿਸੀਲਂ. ਵਤਨ੍ਤਿ ਵਤਸਮਾਦਾਨਂ. ਤਪੋਤਿ ਤਪਚਰਣਂ. ਬ੍ਰਹ੍ਮਚਰਿਯਨ੍ਤਿ ਮੇਥੁਨਵਿਰਤਿ. ਦੇਵੋ ਵਾ ਭਵਿਸ੍ਸਾਮੀਤਿ ਮਹੇਸਕ੍ਖਦੇਵੋ ਵਾ ਭਵਿਸ੍ਸਾਮਿ. ਦੇਵਞ੍ਞਤਰੋ ਵਾਪਿ ਅਪ੍ਪੇਸਕ੍ਖਦੇਵੇਸੁ ਵਾ ਅਞ੍ਞਤਰੋ.
੧੮੯. ਇਦ੍ਧਿਪਾਦੇਸੁ ਛਨ੍ਦਂ ਨਿਸ੍ਸਾਯ ਪਵਤ੍ਤੋ ਸਮਾਧਿ ਛਨ੍ਦਸਮਾਧਿ. ਪਧਾਨਭੂਤਾ ਸਙ੍ਖਾਰਾ ਪਧਾਨਸਙ੍ਖਾਰਾ. ਸਮਨ੍ਨਾਗਤਨ੍ਤਿ ਤੇਹਿ ਧਮ੍ਮੇਹਿ ਉਪੇਤਂ. ਇਦ੍ਧਿਯਾ ਪਾਦਂ, ਇਦ੍ਧਿਭੂਤਂ ਵਾ ਪਾਦਨ੍ਤਿ ਇਦ੍ਧਿਪਾਦਂ. ਸੇਸੇਸੁਪਿ ਏਸੇਵ ਨਯੋ, ਅਯਮੇਤ੍ਥ ਸਙ੍ਖੇਪੋ. ਵਿਤ੍ਥਾਰੋ ਪਨ ਇਦ੍ਧਿਪਾਦਵਿਭਙ੍ਗੇ ਆਗਤੋ ਯੇਵ. ਵਿਸੁਦ੍ਧਿਮਗ੍ਗੇਪਿਸ੍ਸ ਅਤ੍ਥੋ ਦੀਪਿਤੋ. ਇਤਿ ਇਮੇਹਿ ਚਤੂਹਿ ਇਦ੍ਧਿਪਾਦੇਹਿ ਵਿਕ੍ਖਮ੍ਭਨਪ੍ਪਹਾਨਂ ਕਥਿਤਂ. ਉਸ੍ਸੋਲ਼੍ਹੀਯੇਵ ਪਞ੍ਚਮੀਤਿ ਏਤ੍ਥ ਉਸ੍ਸੋਲ਼੍ਹੀਤਿ ਸਬ੍ਬਤ੍ਥ ਕਤ੍ਤਬ੍ਬਵੀਰਿਯਂ ਦਸ੍ਸੇਤਿ. ਉਸ੍ਸੋਲ਼੍ਹੀਪਨ੍ਨਰਸਙ੍ਗਸਮਨ੍ਨਾਗਤੋਤਿ ਪਞ੍ਚ ਚੇਤੋਖਿਲਪ੍ਪਹਾਨਾਨਿ ਪਞ੍ਚ ਵਿਨਿਬਨ੍ਧਪ੍ਪਹਾਨਾਨਿ ਚਤ੍ਤਾਰੋ ਇਦ੍ਧਿਪਾਦਾ ਉਸ੍ਸੋਲ਼੍ਹੀਤਿ ਏਵਂ ਉਸ੍ਸੋਲ਼੍ਹਿਯਾ ਸਦ੍ਧਿਂ ਪਨ੍ਨਰਸਹਿ ਅਙ੍ਗੇਹਿ ਸਮਨ੍ਨਾਗਤੋ. ਭਬ੍ਬੋਤਿ ਅਨੁਰੂਪੋ, ਅਨੁਚ੍ਛਵਿਕੋ. ਅਭਿਨਿਬ੍ਭਿਦਾਯਾਤਿ ਞਾਣੇਨ ਕਿਲੇਸਭੇਦਾਯ. ਸਮ੍ਬੋਧਾਯਾਤਿ ਚਤੁਮਗ੍ਗਸਮ੍ਬੋਧਾਯ. ਅਨੁਤ੍ਤਰਸ੍ਸਾਤਿ ਸੇਟ੍ਠਸ੍ਸ. ਯੋਗਕ੍ਖੇਮਸ੍ਸਾਤਿ ਚਤੂਹਿ ਯੋਗੇਹਿ ਖੇਮਸ੍ਸ ਅਰਹਤ੍ਤਸ੍ਸ. ਅਧਿਗਮਾਯਾਤਿ ਪਟਿਲਾਭਾਯ. ਸੇਯ੍ਯਥਾਤਿ ਓਪਮ੍ਮਤ੍ਥੇ ਨਿਪਾਤੋ. ਪੀਤਿ ਸਮ੍ਭਾਵਨਤ੍ਥੇ. ਉਭਯੇਨਪਿ ਸੇਯ੍ਯਥਾਪਿ ਨਾਮ, ਭਿਕ੍ਖਵੇਤਿ ਦਸ੍ਸੇਤਿ.
ਕੁਕ੍ਕੁਟਿਯਾ ਅਣ੍ਡਾਨਿ ਅਟ੍ਠ ਵਾ ਦਸ ਵਾ ਦ੍ਵਾਦਸ ਵਾਤਿ ਏਤ੍ਥ ਪਨ ਕਿਞ੍ਚਾਪਿ ਕੁਕ੍ਕੁਟਿਯਾ ਵੁਤ੍ਤਪ੍ਪਕਾਰਤੋ ਊਨਾਧਿਕਾਨਿਪਿ ਅਣ੍ਡਾਨਿ ਹੋਨ੍ਤਿ, ਵਚਨਸਿਲਿਟ੍ਠਤਾਯ ਪਨ ਏਵਂ ਵੁਤ੍ਤਂ. ਏਵਞ੍ਹਿ ਲੋਕੇ ਸਿਲਿਟ੍ਠਂ ਵਚਨਂ ਹੋਤਿ. ਤਾਨਸ੍ਸੂਤਿ ਤਾਨਿ ਅਸ੍ਸੁ, ਭਵੇਯ੍ਯੁਨ੍ਤਿ ਅਤ੍ਥੋ. ਕੁਕ੍ਕੁਟਿਯਾ ਸਮ੍ਮਾ ਅਧਿਸਯਿਤਾਨੀਤਿ ਤਾਯ ਜਨੇਤ੍ਤਿਯਾ ਕੁਕ੍ਕੁਟਿਯਾ ਪਕ੍ਖੇ ਪਸਾਰੇਤ੍ਵਾ ਤੇਸਂ ਉਪਰਿ ਸਯਨ੍ਤਿਯਾ ਸਮ੍ਮਾ ਅਧਿਸਯਿਤਾਨਿ. ਸਮ੍ਮਾ ਪਰਿਸੇਦਿਤਾਨੀਤਿ ਕਾਲੇਨ ਕਾਲਂ ਉਤੁਂ ਗਾਹਾਪੇਨ੍ਤਿਯਾ ਸੁਟ੍ਠੁ ਸਮਨ੍ਤਤੋ ਸੇਦਿਤਾਨਿ ਉਸ੍ਮੀਕਤਾਨਿ. ਸਮ੍ਮਾ ਪਰਿਭਾਵਿਤਾਨੀਤਿ ਕਾਲੇਨ ਕਾਲਂ ਸੁਟ੍ਠੁ ਸਮਨ੍ਤਤੋ ਭਾਵਿਤਾਨਿ, ਕੁਕ੍ਕੁਟਗਨ੍ਧਂ ਗਾਹਾਪਿਤਾਨੀਤਿ ਅਤ੍ਥੋ. ਕਿਞ੍ਚਾਪਿ ਤਸ੍ਸਾ ਕੁਕ੍ਕੁਟਿਯਾਤਿ ਤਸ੍ਸਾ ਕੁਕ੍ਕੁਟਿਯਾ ਇਮਂ ਤਿਵਿਧਕਿਰਿਯਾਕਰਣੇਨ ਅਪ੍ਪਮਾਦਂ ਕਤ੍ਵਾ ਕਿਞ੍ਚਾਪਿ ਨ ਏਵਂ ਇਚ੍ਛਾ ਉਪ੍ਪਜ੍ਜੇਯ੍ਯ. ਅਥ ਖੋ ਭਬ੍ਬਾਵ ਤੇਤਿ ਅਥ ਖੋ ਤੇ ਕੁਕ੍ਕੁਟਪੋਤਕਾ ਵੁਤ੍ਤਨਯੇਨ ਸੋਤ੍ਥਿਨਾ ਅਭਿਨਿਬ੍ਭਿਜ੍ਜਿਤੁਂ ਭਬ੍ਬਾਵ. ਤੇ ਹਿ ਯਸ੍ਮਾ ਤਾਯ ਕੁਕ੍ਕੁਟਿਯਾ ਏਵਂ ਤੀਹਾਕਾਰੇਹਿ ਤਾਨਿ ਅਣ੍ਡਾਨਿ ਪਰਿਪਾਲੀਯਮਾਨਾਨਿ ਨ ਪੂਤੀਨਿ ਹੋਨ੍ਤਿ. ਯੋਪਿ ਨੇਸਂ ਅਲ੍ਲਸਿਨੇਹੋ, ਸੋਪਿ ਪਰਿਯਾਦਾਨਂ ਗਚ੍ਛਤਿ, ਕਪਾਲਂ ਤਨੁਕਂ ਹੋਤਿ, ਪਾਦਨਖਸਿਖਾ ਚ ਮੁਖਤੁਣ੍ਡਕਞ੍ਚ ਖਰਂ ਹੋਤਿ, ਸਯਂ ਪਰਿਪਾਕਂ ਗਚ੍ਛਤਿ, ਕਪਾਲਸ੍ਸ ਤਨੁਤ੍ਤਾ ਬਹਿ ਆਲੋਕੋ ਅਨ੍ਤੋ ਪਞ੍ਞਾਯਤਿ, ਤਸ੍ਮਾ ‘‘ਚਿਰਂ ਵਤ ਮਯਂ ਸਙ੍ਕੁਟਿਤਹਤ੍ਥਪਾਦਾ ਸਮ੍ਬਾਧੇ ਸਯਿਮ੍ਹਾ, ਅਯਞ੍ਚ ਬਹਿ ਆਲੋਕੋ ਦਿਸ੍ਸਤਿ, ਏਤ੍ਥ ਦਾਨਿ ਨੋ ਸੁਖਵਿਹਾਰੋ ਭਵਿਸ੍ਸਤੀ’’ਤਿ ਨਿਕ੍ਖਮਿਤੁਕਾਮਾ ਹੁਤ੍ਵਾ ਕਪਾਲਂ ਪਾਦੇਨ ਪਹਰਨ੍ਤਿ, ਗੀਵਂ ਪਸਾਰੇਨ੍ਤਿ, ਤਤੋ ਤਂ ਕਪਾਲਂ ਦ੍ਵੇਧਾ ਭਿਜ੍ਜਤਿ. ਅਥ ਤੇ ਪਕ੍ਖੇ ਵਿਧੁਨਨ੍ਤਾ ਤਙ੍ਖਣਾਨੁਰੂਪਂ ਵਿਰਵਨ੍ਤਾ ਨਿਕ੍ਖਮਨ੍ਤਿਯੇਵ, ਨਿਕ੍ਖਮਿਤ੍ਵਾ ਚ ਗਾਮਕ੍ਖੇਤ੍ਤਂ ਉਪਸੋਭਯਮਾਨਾ ਵਿਚਰਨ੍ਤਿ.
ਏਵਮੇਵ ਖੋਤਿ ਇਦਂ ਓਪਮ੍ਮਸਮ੍ਪਟਿਪਾਦਨਂ. ਤਂ ਏਵਂ ਅਤ੍ਥੇਨ ਸਂਸਨ੍ਦੇਤ੍ਵਾ ਵੇਦਿਤਬ੍ਬਂ – ਤਸ੍ਸਾ ਕੁਕ੍ਕੁਟਿਯਾ ਅਣ੍ਡੇਸੁ ਤਿਵਿਧਕਿਰਿਯਾਕਰਣਂ ਵਿਯ ਹਿ ਇਮਸ੍ਸ ਭਿਕ੍ਖੁਨੋ ਉਸ੍ਸੋਲ਼੍ਹੀਪਨ੍ਨਰਸੇਹਿ ਅਙ੍ਗੇਹਿ ਸਮਨ੍ਨਾਗਤਭਾਵੋ. ਕੁਕ੍ਕੁਟਿਯਾ ਤਿਵਿਧਕਿਰਿਯਾਸਮ੍ਪਾਦਨੇਨ ਅਣ੍ਡਾਨਂ ਅਪੂਤਿਭਾਵੋ ਵਿਯ ਪਨ੍ਨਰਸਙ੍ਗਸਮਨ੍ਨਾਗਤਸ੍ਸ ਭਿਕ੍ਖੁਨੋ ਤਿਵਿਧਾਨੁਪਸ੍ਸਨਾਸਮ੍ਪਾਦਨੇਨ ਵਿਪਸ੍ਸਨਾਞਾਣਸ੍ਸ ਅਪਰਿਹਾਨਿ. ਤਸ੍ਸਾ ਤਿਵਿਧਕਿਰਿਯਾਕਰਣੇਨ ਅਣ੍ਡਾਨਂ ਅਲ੍ਲਸਿਨੇਹਪਰਿਯਾਦਾਨਂ ਵਿਯ ਤਸ੍ਸ ਭਿਕ੍ਖੁਨੋ ਤਿਵਿਧਾਨੁਪਸ੍ਸਨਾਸਮ੍ਪਾਦਨੇਨ ਭਵਤ੍ਤਯਾਨੁਗਤਨਿਕਨ੍ਤਿਸਿਨੇਹਪਰਿਯਾਦਾਨਂ. ਅਣ੍ਡਕਲਾਪਾਨਂ ਤਨੁਭਾਵੋ ਵਿਯ ਭਿਕ੍ਖੁਨੋ ਅਵਿਜ੍ਜਣ੍ਡਕੋਸਸ੍ਸ ਤਨੁਭਾਵੋ. ਕੁਕ੍ਕੁਟਪੋਤਕਾਨਂ ਪਾਦਨਖਮੁਤੁਣ੍ਡਕਾਨਂ ਥਦ੍ਧਖਰਭਾਵੋ ਵਿਯ ਭਿਕ੍ਖੁਨੋ ਵਿਪਸ੍ਸਨਾਞਾਣਸ੍ਸ ਤਿਕ੍ਖਖਰਵਿਪ੍ਪਸਨ੍ਨਸੂਰਭਾਵੋ. ਕੁਕ੍ਕੁਟਪੋਤਕਾਨਂ ਪਰਿਣਾਮਕਾਲੋ ਵਿਯ ਭਿਕ੍ਖੁਨੋ ਵਿਪਸ੍ਸਨਾਞਾਣਸ੍ਸ ਪਰਿਣਾਮਕਾਲੋ ਵਡ੍ਢਿਤਕਾਲੋ ਗਬ੍ਭਗ੍ਗਹਣਕਾਲੋ. ਕੁਕ੍ਕੁਟਪੋਤਕਾਨਂ ਪਾਦਨਖਸਿਖਾਯ ਵਾ ਮੁਖਤੁਣ੍ਡਕੇਨ ਵਾ ਅਣ੍ਡਕੋਸਂ ਪਦਾਲੇਤ੍ਵਾ ਪਕ੍ਖੇ ਪਪ੍ਫੋਟੇਤ੍ਵਾ ਸੋਤ੍ਥਿਨਾ ਅਭਿਨਿਕ੍ਖਮਨਕਾਲੋ ਵਿਯ ਤਸ੍ਸ ਭਿਕ੍ਖੁਨੋ ਵਿਪਸ੍ਸਨਾਞਾਣਗਬ੍ਭਂ ਗਣ੍ਹਾਪੇਤ੍ਵਾ ਵਿਚਰਨ੍ਤਸ੍ਸ ਤਜ੍ਜਾਤਿਕਂ ਉਤੁਸਪ੍ਪਾਯਂ ਵਾ ਭੋਜਨਸਪ੍ਪਾਯਂ ਵਾ ਪੁਗ੍ਗਲਸਪ੍ਪਾਯਂ ਵਾ ਧਮ੍ਮਸ੍ਸਵਨਸਪ੍ਪਾਯਂ ਵਾ ਲਭਿਤ੍ਵਾ ਏਕਾਸਨੇ ਨਿਸਿਨ੍ਨਸ੍ਸੇਵ ਵਿਪਸ੍ਸਨਂ ਵਡ੍ਢੇਨ੍ਤਸ੍ਸ ਅਨੁਪੁਬ੍ਬਾਧਿਗਤੇਨ ਅਰਹਤ੍ਤਮਗ੍ਗੇਨ ਅਵਿਜ੍ਜਣ੍ਡਕੋਸਂ ਪਦਾਲੇਤ੍ਵਾ ਅਭਿਞ੍ਞਾਪਕ੍ਖੇ ਪਪ੍ਫੋਟੇਤ੍ਵਾ ਸੋਤ੍ਥਿਨਾ ਅਰਹਤ੍ਤਪ੍ਪਤ੍ਤਕਾਲੋ ਵੇਦਿਤਬ੍ਬੋ. ਯਥਾ ਪਨ ਕੁਕ੍ਕੁਟਪੋਤਕਾਨਂ ਪਰਿਣਤਭਾਵਂ ਞਤ੍ਵਾ ਮਾਤਾਪਿ ਅਣ੍ਡਕੋਸਂ ਭਿਨ੍ਦਤਿ, ਏਵਂ ਤਥਾਰੂਪਸ੍ਸ ਭਿਕ੍ਖੁਨੋ ਞਾਣਪਰਿਪਾਕਂ ਞਤ੍ਵਾ ਸਤ੍ਥਾਪਿ –
‘‘ਉਚ੍ਛਿਨ੍ਦ ਸਿਨੇਹਮਤ੍ਤਨੋ, ਕੁਮੁਦਂ ਸਾਰਦਿਕਂਵ ਪਾਣਿਨਾ;
ਸਨ੍ਤਿਮਗ੍ਗਮੇਵ ਬ੍ਰੂਹਯ, ਨਿਬ੍ਬਾਨਂ ਸੁਗਤੇਨ ਦੇਸਿਤ’’ਨ੍ਤਿ. (ਧ. ਪ. ੨੮੫) –
ਆਦਿਨਾ ਨਯੇਨ ਓਭਾਸਂ ਫਰਿਤ੍ਵਾ ਗਾਥਾਯ ਅਵਿਜ੍ਜਣ੍ਡਕੋਸਂ ਪਹਰਤਿ, ਸੋ ਗਾਥਾਪਰਿਯੋਸਾਨੇ ਅਵਿਜ੍ਜਾਣ੍ਡਕੋਸਂ ਭਿਨ੍ਦਿਤ੍ਵਾ ਅਰਹਤ੍ਤਂ ਪਾਪੁਣਾਤਿ. ਤਤੋ ਪਟ੍ਠਾਯ ਯਥਾ ਤੇ ਕੁਕ੍ਕੁਟਪੋਤਕਾ ਗਾਮਕ੍ਖੇਤ੍ਤਂ ਉਪਸੋਭਯਮਾਨਾ ਤਤ੍ਥ ਤਤ੍ਥ ਵਿਚਰਨ੍ਤਿ, ਏਵਂ ਅਯਮ੍ਪਿ ਮਹਾਖੀਣਾਸਵੋ ਨਿਬ੍ਬਾਨਰਮ੍ਮਣਂ ਫਲਸਮਾਪਤ੍ਤਿਂ ਅਪ੍ਪੇਤ੍ਵਾ ਸਙ੍ਘਾਰਾਮਂ ਉਪਸੋਭਯਮਾਨੋ ਵਿਚਰਤਿ.
ਇਤਿ ਇਮਸ੍ਮਿਂ ਸੁਤ੍ਤੇ ਚਤ੍ਤਾਰਿ ਪਹਾਨਾਨਿ ਕਥਿਤਾਨਿ. ਕਥਂ? ਚੇਤੋਖਿਲਾਨਞ੍ਹਿ ਚੇਤੋਵਿਨਿਬਨ੍ਧਾਨਂ ਪਹਾਨੇਨ ਪਟਿਸਙ੍ਖਾਨਪ੍ਪਪਹਾਨਂ ਕਥਿਤਂ, ਇਦ੍ਧਿਪਾਦੇਹਿ ਵਿਕ੍ਖਮ੍ਭਨਪ੍ਪਹਾਨਂ ਕਥਿਤ, ਮਗ੍ਗੇ ਆਗਤੇ ਸਮੁਚ੍ਛੇਦਪ੍ਪਹਾਨਂ ਕਥਿਤਂ, ਫਲੇ ਆਗਤੇ ਪਟਿਪ੍ਪਸ੍ਸਦ੍ਧਿਪ੍ਪਹਾਨਂ ਕਥਿਤਂ. ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇਵਾਤਿ.
ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ
ਚੇਤੋਖਿਲਸੁਤ੍ਤਵਣ੍ਣਨਾ ਨਿਟ੍ਠਿਤਾ.