੨. ਰੇਵਤੀਵਿਮਾਨਵਣ੍ਣਨਾ

ਉਟ੍ਠੇਹਿ ਰੇਵਤੇ ਸੁਪਾਪਧਮ੍ਮੇਤਿ ਰੇਵਤੀਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਬਾਰਾਣਸਿਯਂ ਵਿਹਰਤਿ ਇਸਿਪਤਨੇ ਮਿਗਦਾਯੇ. ਤੇਨ ਸਮਯੇਨ ਬਾਰਾਣਸਿਯਂ ਸਦ੍ਧਾਸਮ੍ਪਨ੍ਨਸ੍ਸ ਕੁਲਸ੍ਸ ਪੁਤ੍ਤੋ ਨਨ੍ਦਿਯੋ ਨਾਮ ਉਪਾਸਕੋ ਅਹੋਸਿ ਸਦ੍ਧਾਸਮ੍ਪਨ੍ਨੋ ਦਾਯਕੋ ਦਾਨਪਤਿ ਸਙ੍ਘੁਪਟ੍ਠਾਕੋ. ਅਥਸ੍ਸ ਮਾਤਾਪਿਤਰੋ ਸਮ੍ਮੁਖਗੇਹਤੋ ਮਾਤੁਲਧੀਤਰਂ ਰੇਵਤਿਂ ਨਾਮ ਕਞ੍ਞਂ ਆਨੇਤੁਕਾਮਾ ਅਹੇਸੁਂ. ਸਾ ਪਨ ਅਸ੍ਸਦ੍ਧਾ ਅਦਾਨਸੀਲਾ, ਨਨ੍ਦਿਯੋ ਤਂ ਨ ਇਚ੍ਛਿ. ਤਸ੍ਸ ਮਾਤਾ ਰੇਵਤਿਂ ਆਹ ‘‘ਅਮ੍ਮ, ਤ੍ਵਂ ਇਮਂ ਗੇਹਂ ਆਗਨ੍ਤ੍ਵਾ ਭਿਕ੍ਖੁਸਙ੍ਘਸ੍ਸ ਨਿਸੀਦਨਟ੍ਠਾਨਂ ਹਰਿਤੇਨ ਗੋਮਯੇਨ ਉਪਲਿਮ੍ਪਿਤ੍ਵਾ ਆਸਨਾਨਿ ਪਞ੍ਞਾਪੇਹਿ, ਆਧਾਰਕੇ ਠਪੇਹਿ, ਭਿਕ੍ਖੂਨਂ ਆਗਤਕਾਲੇ ਵਨ੍ਦਿਤ੍ਵਾ ਪਤ੍ਤਂ ਗਹੇਤ੍ਵਾ ਨਿਸੀਦਾਪੇਤ੍ਵਾ ਧਮਕਰਣੇਨ ਪਾਨੀਯਂ ਪਰਿਸ੍ਸਾਵੇਤ੍ਵਾ ਭੁਤ੍ਤਕਾਲੇ ਪਤ੍ਤਾਨਿ ਧੋਵਾਹਿ, ਏਵਂ ਮੇ ਪੁਤ੍ਤਸ੍ਸ ਆਰਾਧਿਕਾ ਭਵਿਸ੍ਸਸੀ’’ਤਿ. ਸਾ ਤਥਾ ਅਕਾਸਿ. ਅਥ ਨਂ ‘‘ਓਵਾਦਕ੍ਖਮਾ ਜਾਤਾ’’ਤਿ ਪੁਤ੍ਤਸ੍ਸ ਆਰੋਚੇਤ੍ਵਾ ਤੇਨ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤੇ ਦਿਵਸਂ ਠਪੇਤ੍ਵਾ ਆਵਾਹਂ ਕਰਿਂਸੁ.

ਅਥ ਨਂ ਨਨ੍ਦਿਯੋ ਆਹ ‘‘ਸਚੇ ਭਿਕ੍ਖੁਸਙ੍ਘਂ ਮਾਤਾਪਿਤਰੋ ਚ ਮੇ ਉਪਟ੍ਠਹਿਸ੍ਸਸਿ, ਏਵਂ ਇਮਸ੍ਮਿਂ ਗੇਹੇ ਵਸਿਤੁਂ ਲਭਿਸ੍ਸਸਿ, ਅਪ੍ਪਮਤ੍ਤਾ ਹੋਹੀ’’ਤਿ. ਸਾ ‘‘ਸਾਧੂ’’ਤਿ ਪਟਿਸ੍ਸੁਣਿਤ੍ਵਾ ਕਿਞ੍ਚਿ ਕਾਲਂ ਸਦ੍ਧਾ ਵਿਯ ਹੁਤ੍ਵਾ ਭਤ੍ਤਾਰਂ ਅਨਵਤ੍ਤੇਨ੍ਤੀ ਦ੍ਵੇ ਪੁਤ੍ਤੇ ਵਿਜਾਯਿ. ਨਨ੍ਦਿਯਸ੍ਸ ਮਾਤਾਪਿਤਰੋ ਕਾਲਮਕਂਸੁ. ਗੇਹੇ ਸਬ੍ਬਿਸ੍ਸਰਿਯਂ ਤਸ੍ਸਾ ਏਵ ਅਹੋਸਿ. ਨਨ੍ਦਿਯੋਪਿ ਮਹਾਦਾਨਪਤਿ ਹੁਤ੍ਵਾ ਭਿਕ੍ਖੁਸਙ੍ਘਸ੍ਸ ਦਾਨਂ ਪਟ੍ਠਪੇਸਿ, ਕਪਣਦ੍ਧਿਕਾਦੀਨਮ੍ਪਿ ਗੇਹਦ੍ਵਾਰੇ ਪਾਕਵਤ੍ਤਂ ਪਟ੍ਠਪੇਸਿ. ਇਸਿਪਤਨਮਹਾਵਿਹਾਰੇ ਚਤੂਹਿ ਗਬ੍ਭੇਹਿ ਪਟਿਮਣ੍ਡਿਤਂ ਚਤੁਸਾਲਂ ਕਾਰੇਤ੍ਵਾ ਮਞ੍ਚਪੀਠਾਦੀਨਿ ਅਤ੍ਥਰਾਪੇਤ੍ਵਾ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਦਤ੍ਵਾ ਤਥਾਗਤਸ੍ਸ ਹਤ੍ਥੇ ਦਕ੍ਖਿਣੋਦਕਂ ਪਾਤੇਤ੍ਵਾ ਨਿਯ੍ਯਾਦੇਸਿ, ਸਹ ਦਕ੍ਖਿਣੋਦਕਦਾਨੇਨ ਤਾਵਤਿਂਸਭਵਨੇ ਆਯਾਮਤੋ ਚ ਵਿਤ੍ਥਾਰਤੋ ਚ ਸਮਨ੍ਤਾ ਦ੍ਵਾਦਸਯੋਜਨਿਕੋ ਯੋਜਨਸਤੁਬ੍ਬੇਧੋ ਸਤ੍ਤਰਤਨਮਯੋ ਅਚ੍ਛਰਾਗਣਸਹਸ੍ਸਸਙ੍ਘੁਟ੍ਠੋ ਦਿਬ੍ਬਪਾਸਾਦੋ ਉਗ੍ਗਞ੍ਛਿ.

ਅਥਾਯਸ੍ਮਾ ਮਹਾਮੋਗ੍ਗਲ੍ਲਾਨੋ ਦੇਵਚਾਰਿਕਂ ਚਰਨ੍ਤੋ ਤਂ ਪਾਸਾਦਂ ਦਿਸ੍ਵਾ ਅਤ੍ਤਾਨਂ ਵਨ੍ਦਿਤੁਂ ਆਗਤੇ ਦੇਵਪੁਤ੍ਤੇ ਪੁਚ੍ਛਿ ‘‘ਕਸ੍ਸਾਯਂ ਪਾਸਾਦੋ’’ਤਿ? ‘‘ਇਮਸ੍ਸ, ਭਨ੍ਤੇ, ਪਾਸਾਦਸ੍ਸ ਸਾਮਿਕੋ ਮਨੁਸ੍ਸਲੋਕੇ ਬਾਰਾਣਸਿਯਂ ਨਨ੍ਦਿਯੋ ਨਾਮ ਕੁਟੁਮ੍ਬਿਯਪੁਤ੍ਤੋ ਸਙ੍ਘਸ੍ਸ ਇਸਿਪਤਨਮਹਾਵਿਹਾਰੇ ਚਤੁਸਾਲਂ ਕਾਰੇਸਿ, ਤਸ੍ਸਾਯਂ ਨਿਬ੍ਬਤ੍ਤੋ ਪਾਸਾਦੋ’’ਤਿ ਆਹਂਸੁ. ਪਾਸਾਦੇ ਨਿਬ੍ਬਤ੍ਤਦੇਵਚ੍ਛਰਾਯੋਪਿ ਥੇਰਂ ਵਨ੍ਦਿਤ੍ਵਾ ‘‘ਭਨ੍ਤੇ, ਮਯਂ ਬਾਰਾਣਸਿਯਂ ਨਨ੍ਦਿਯਸ੍ਸ ਨਾਮ ਉਪਾਸਕਸ੍ਸ ਪਰਿਚਾਰਿਕਾ ਭਵਿਤੁਂ ਇਧ ਨਿਬ੍ਬਤ੍ਤਾ, ਤਸ੍ਸ ਏਵਂ ਵਦੇਥ ‘‘ਤੁਯ੍ਹਂ ਪਰਿਚਾਰਿਕਾ ਭਵਿਤੁਂ ਨਿਬ੍ਬਤ੍ਤਾ, ਦੇਵਤਾਯੋ ਤਯਿ ਚਿਰਾਯਨ੍ਤੇ ਉਕ੍ਕਣ੍ਠਿਤਾ, ਦੇਵਲੋਕਸਮ੍ਪਤ੍ਤਿ ਨਾਮ ਮਤ੍ਤਿਕਾਭਾਜਨਂ ਭਿਨ੍ਦਿਤ੍ਵਾ ਸੁਵਣ੍ਣਭਾਜਨਸ੍ਸ ਗਹਣਂ ਵਿਯ ਅਤਿਮਨਾਪ’ਨ੍ਤਿ ਵਤ੍ਵਾ ਇਧਾਗਮਨਤ੍ਥਾਯ ਤਸ੍ਸ ਵਦੇਥਾ’’ਤਿ ਆਹਂਸੁ. ਥੇਰੋ ‘‘ਸਾਧੂ’’ਤਿ ਪਟਿਸ੍ਸੁਣਿਤ੍ਵਾ ਸਹਸਾ ਦੇਵਲੋਕਤੋ ਆਗਨ੍ਤ੍ਵਾ ਚਤੁਪਰਿਸਮਜ੍ਝੇ ਭਗਵਨ੍ਤਂ ਪੁਚ੍ਛਿ ‘‘ਨਿਬ੍ਬਤ੍ਤਤਿ ਨੁ ਖੋ, ਭਨ੍ਤੇ, ਕਤਪੁਞ੍ਞਾਨਂ ਮਨੁਸ੍ਸਲੋਕੇ ਠਿਤਾਨਂਯੇਵ ਦਿਬ੍ਬਸਮ੍ਪਤ੍ਤੀ’’ਤਿ? ‘‘ਨਨੁ ਤੇ, ਮੋਗ੍ਗਲ੍ਲਾਨ, ਨਨ੍ਦਿਯਸ੍ਸ ਦੇਵਲੋਕੇ ਨਿਬ੍ਬਤ੍ਤਾ ਦਿਬ੍ਬਸਮ੍ਪਤ੍ਤਿ ਸਾਮਂ ਦਿਟ੍ਠਾ, ਕਸ੍ਮਾ ਮਂ ਪੁਚ੍ਛਸੀ’’ਤਿ? ‘‘ਏਵਂ, ਭਨ੍ਤੇ, ਨਿਬ੍ਬਤ੍ਤਤੀ’’ਤਿ. ਅਥਸ੍ਸ ਸਤ੍ਥਾ ‘‘ਯਥਾ ਚਿਰਂ ਵਿਪ੍ਪਵਸਿਤ੍ਵਾ ਆਗਤਂ ਪੁਰਿਸਂ ਮਿਤ੍ਤਬਨ੍ਧਵਾ ਅਭਿਨਨ੍ਦਨ੍ਤਿ ਸਮ੍ਪਟਿਚ੍ਛਨ੍ਤਿ, ਏਵਂ ਕਤਪੁਞ੍ਞਂ ਪੁਗ੍ਗਲਂ ਇਤੋ ਪਰਲੋਕਂ ਗਤਂ ਸਕਾਨਿ ਪੁਞ੍ਞਾਨਿ ਸਮ੍ਪਤ੍ਤਿਹਤ੍ਥੇਹਿ ਸਮ੍ਪਟਿਚ੍ਛਨ੍ਤਿ ਪਟਿਗ੍ਗਣ੍ਹਨ੍ਤੀ’’ਤਿ ਦਸ੍ਸੇਨ੍ਤੋ –

੮੬੧. ‘‘ਚਿਰਪ੍ਪਵਾਸਿਂ ਪੁਰਿਸਂ, ਦੂਰਤੋ ਸੋਤ੍ਥਿਮਾਗਤਂ;

ਞਾਤਿਮਿਤ੍ਤਾ ਸੁਹਜ੍ਜਾ ਚ, ਅਭਿਨਨ੍ਦਨ੍ਤਿ ਆਗਤਂ.

੮੬੨. ‘‘ਤਥੇਵ ਕਤਪੁਞ੍ਞਮ੍ਪਿ, ਅਸ੍ਮਾ ਲੋਕਾ ਪਰਂ ਗਤਂ;

ਪੁਞ੍ਞਾਨਿ ਪਟਿਗ੍ਗਣ੍ਹਨ੍ਤਿ, ਪਿਯਂ ਞਾਤੀਵ ਆਗਤ’’ਨ੍ਤਿ. – ਗਾਥਾ ਅਭਾਸਿ;

ਨਨ੍ਦਿਯੋ ਤਂ ਸੁਤ੍ਵਾ ਭਿਯ੍ਯੋਸੋਮਤ੍ਤਾਯ ਦਾਨਾਨਿ ਦੇਤਿ, ਪੁਞ੍ਞਾਨਿ ਕਰੋਤਿ, ਸੋ ਵਣਿਜ੍ਜਾਯ ਗਚ੍ਛਨ੍ਤੋ ਰੇਵਤਿਂ ਆਹ ‘‘ਭਦ੍ਦੇ, ਮਯਾ ਪਟ੍ਠਪਿਤਂ ਸਙ੍ਘਸ੍ਸ ਦਾਨਂ ਅਨਾਥਾਨਂ ਪਾਕਵਤ੍ਤਞ੍ਚ ਤ੍ਵਂ ਅਪ੍ਪਮਤ੍ਤਾ ਪਵਤ੍ਤੇਯ੍ਯਾਸੀ’’ਤਿ. ਸਾ ‘‘ਸਾਧੂ’’ਤਿ ਪਟਿਸ੍ਸੁਣਿ. ਸੋ ਪਵਾਸਗਤੋਪਿ ਯਤ੍ਥ ਯਤ੍ਥ ਵਾਸਂ ਕਪ੍ਪੇਤਿ, ਤਤ੍ਥ ਤਤ੍ਥ ਭਿਕ੍ਖੂਨਂ ਅਨਾਥਾਨਞ੍ਚ ਯਥਾਵਿਭਵਂ ਦਾਨਂ ਦੇਤਿਯੇਵ. ਤਸ੍ਸ ਅਨੁਕਮ੍ਪਾਯ ਖੀਣਾਸਵਾ ਦੂਰਤੋਪਿ ਆਗਨ੍ਤ੍ਵਾ ਦਾਨਂ ਸਮ੍ਪਟਿਚ੍ਛਨ੍ਤਿ. ਰੇਵਤੀ ਪਨ ਤਸ੍ਮਿਂ ਗਤੇ ਕਤਿਪਾਹਮੇਵ ਦਾਨਂ ਪਵਤ੍ਤੇਤ੍ਵਾ ਅਨਾਥਾਨਂ ਭਤ੍ਤਂ ਉਪਚ੍ਛਿਨ੍ਦਿ, ਭਿਕ੍ਖੂਨਮ੍ਪਿ ਭਤ੍ਤਂ ਕਣਾਜਕਂ ਬਿਲਙ੍ਗਦੁਤਿਯਂ ਅਦਾਸਿ. ਭਿਕ੍ਖੂਨਂ ਭੁਤ੍ਤਟ੍ਠਾਨੇ ਅਤ੍ਤਨਾ ਭੁਤ੍ਤਾਵਸੇਸਾਨਿ ਸਿਤ੍ਥਾਨਿ ਮਚ੍ਛਮਂਸਖਣ੍ਡਮਿਸ੍ਸਕਾਨਿ ਚਲਕਟ੍ਠਿਕਾਨਿ ਚ ਪਕਿਰਿਤ੍ਵਾ ਮਨੁਸ੍ਸਾਨਂ ਦਸ੍ਸੇਤਿ ‘‘ਪਸ੍ਸਥ ਸਮਣਾਨਂ ਕਮ੍ਮਂ, ਸਦ੍ਧਾਦੇਯ੍ਯਂ ਨਾਮ ਏਵਂ ਛਡ੍ਡੇਨ੍ਤੀ’’ਤਿ.

ਅਥ ਨਨ੍ਦਿਯੋ ਵੋਹਾਰਕਸਿਦ੍ਧਿ ਯਥਾਲਾਭੋ ਆਗਨ੍ਤ੍ਵਾ ਤਂ ਪਵਤ੍ਤਿਂ ਸੁਤ੍ਵਾ ਰੇਵਤਿਂ ਗੇਹਤੋ ਨੀਹਰਿਤ੍ਵਾ ਗੇਹਂ ਪਾਵਿਸਿ. ਦੁਤਿਯਦਿਵਸੇ ਬੁਦ੍ਧਪ੍ਪਮੁਖਸ੍ਸ ਭਿਕ੍ਖੁਸਙ੍ਘਸ੍ਸ ਮਹਾਦਾਨਂ ਪਵਤ੍ਤੇਤ੍ਵਾ ਨਿਚ੍ਚਭਤ੍ਤਂ ਅਨਾਥਭਤ੍ਤਞ੍ਚ ਸਮ੍ਮਦੇਵ ਪਵਤ੍ਤੇਸਿ, ਅਤ੍ਤਨੋ ਸਹਾਯੇਹਿ ਉਪਨੀਤਂ ਰੇਵਤਿਂ ਘਾਸਚ੍ਛਾਦਨਪਰਮਤਾਯ ਠਪੇਸਿ. ਸੋ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਅਤ੍ਤਨੋ ਵਿਮਾਨੇਯੇਵ ਨਿਬ੍ਬਤ੍ਤਿ. ਰੇਵਤੀ ਪਨ ਸਬ੍ਬਂ ਦਾਨਂ ਪਚ੍ਛਿਨ੍ਦਿਤ੍ਵਾ ‘‘ਇਮੇਸਂ ਵਸੇਨ ਮਯ੍ਹਂ ਲਾਭਸਕ੍ਕਾਰੋ ਪਰਿਹਾਯੀ’’ਤਿ ਭਿਕ੍ਖੁਸਙ੍ਘਂ ਅਕ੍ਕੋਸਨ੍ਤੀ ਪਰਿਭਾਸਨ੍ਤੀ ਵਿਚਰਤਿ. ਅਥ ਵੇਸ੍ਸਵਣੋ ਦ੍ਵੇ ਯਕ੍ਖੇ ਆਣਾਪੇਸਿ ‘‘ਗਚ੍ਛਥ, ਭਣੇ, ਬਾਰਾਣਸਿਨਗਰੇ ਉਗ੍ਘੋਸਥ ‘‘ਇਤੋ ਸਤ੍ਤਮੇ ਦਿਵਸੇ ਰੇਵਤੀ ਜੀਵਨ੍ਤੀਯੇਵ ਨਿਰਯੇ ਪਕ੍ਖਿਪੀਯਤੀ’ਤਿ’’. ਤਂ ਸੁਤ੍ਵਾ ਮਹਾਜਨੋ ਸਂਵੇਗਜਾਤੋ ਭੀਤਤਸਿਤੋ ਅਹੋਸਿ.

ਅਥ ਰੇਵਤੀ ਪਨ ਪਾਸਾਦਂ ਅਭਿਰੁਹਿਤ੍ਵਾ ਦ੍ਵਾਰਂ ਥਕੇਤ੍ਵਾ ਨਿਸੀਦਿ. ਸਤ੍ਤਮੇ ਦਿਵਸੇ ਤਸ੍ਸਾ ਪਾਪਕਮ੍ਮਸਞ੍ਚੋਦਿਤੇਨ ਵੇਸ੍ਸਵਣੇਨ ਰਞ੍ਞਾ ਆਣਤ੍ਤਾ ਜਲਿਤਕਪਿਲਕੇਸਮਸ੍ਸੁਕਾ ਚਿਪਿਟਵਿਰੂਪਨਾਸਿਕਾ ਪਰਿਣਤਦਾਠਾ ਲੋਹਿਤਕ੍ਖਾ ਸਜਲਧਰਸਮਾਨਵਣ੍ਣਾ ਅਤਿਵਿਯ ਭਯਾਨਕਰੂਪਾ ਦ੍ਵੇ ਯਕ੍ਖਾ ਉਪਗਨ੍ਤ੍ਵਾ ‘‘ਉਟ੍ਠੇਹਿ, ਰੇਵਤੇ, ਸੁਪਾਪਧਮ੍ਮੇ’’ਤਿਆਦੀਨਿ ਵਦਨ੍ਤਾ ਨਾਨਾਬਾਹਾਸੁ ਗਹੇਤ੍ਵਾ ‘‘ਮਹਾਜਨੋ ਪਸ੍ਸਤੂ’’ਤਿ ਸਕਲਨਗਰੇ ਵੀਥਿਤੋ ਵੀਥਿਂ ਪਰਿਬ੍ਭਮਾਪੇਤ੍ਵਾ ਆਕਾਸਂ ਅਬ੍ਭੁਗ੍ਗਨ੍ਤ੍ਵਾ ਤਾਵਤਿਂਸਭਵਨਂ ਨੇਤ੍ਵਾ ਨਨ੍ਦਿਯਸ੍ਸ ਵਿਮਾਨਂ ਸਮ੍ਪਤ੍ਤਿਞ੍ਚਸ੍ਸਾ ਦਸ੍ਸੇਤ੍ਵਾ ਤਂ ਵਿਲਪਨ੍ਤਿਂਯੇਵ ਉਸ੍ਸਦਨਿਰਯਸਮੀਪਂ ਪਾਪੇਸੁਂ. ਤਂ ਯਮਪੁਰਿਸਾ ਉਸ੍ਸਦਨਿਰਯੇ ਖਿਪਿਂਸੁ. ਤੇਨਾਹ –

੮੬੩. ‘‘ਉਟ੍ਠੇਹਿ ਰੇਵਤੇ ਸੁਪਾਪਧਮ੍ਮੇ, ਅਪਾਰੁਤਦ੍ਵਾਰੇ ਅਦਾਨਸੀਲੇ;

ਨੇਸ੍ਸਾਮ ਤਂ ਯਤ੍ਥ ਥੁਨਨ੍ਤਿ ਦੁਗ੍ਗਤਾ, ਸਮਪ੍ਪਿਤਾ ਨੇਰਯਿਕਾ ਦੁਖੇਨਾ’’ਤਿ.

ਤਤ੍ਥ ਉਟ੍ਠੇਹੀਤਿ ਉਟ੍ਠਹ, ਨ ਦਾਨੇਸ ਪਾਸਾਦੋ ਤਂ ਨਿਰਯਭਯਤੋ ਰਕ੍ਖਿਤੁਂ ਸਕ੍ਕੋਤਿ, ਤਸ੍ਮਾ ਸੀਘਂ ਉਟ੍ਠਹਿਤ੍ਵਾ ਆਗਚ੍ਛਾਹੀਤਿ ਅਤ੍ਥੋ. ਰੇਵਤੇਤਿ ਤਂ ਨਾਮੇਨ ਆਲਪਤਿ. ਸੁਪਾਪਧਮ੍ਮੇਤਿਆਦਿਨਾ ਉਟ੍ਠਾਨਸ੍ਸ ਕਾਰਣਂ ਵਦਤਿ. ਯਸ੍ਮਾ ਤ੍ਵਂ ਅਰਿਯਾਨਂ ਅਕ੍ਕੋਸਨਪਰਿਭਾਸਨਾਦਿਨਾ ਸੁਟ੍ਟੁ ਲਾਮਕਪਾਪਧਮ੍ਮਾ, ਯਸ੍ਮਾ ਚ ਅਪਾਰੁਤਂ ਦ੍ਵਾਰਂ ਨਿਰਯਸ੍ਸ ਤਵ ਪਵੇਸਨਤ੍ਥਂ, ਤਸ੍ਮਾ ਉਟ੍ਠੇਹੀਤਿ. ਅਦਾਨਸੀਲੇਤਿ ਕਸ੍ਸਚਿ ਕਿਞ੍ਚਿ ਨ ਦਾਨਸੀਲੇ ਕਦਰਿਯੇ ਮਚ੍ਛਰਿਨੀ, ਇਦਮ੍ਪਿ ਉਟ੍ਠਾਨਸ੍ਸੇਵ ਕਾਰਣਵਚਨਂ. ਯਸ੍ਮਾ ਦਾਨਸੀਲਾਨਂ ਅਮਚ੍ਛਰੀਨਂ ਤਵ ਸਾਮਿਕਸਦਿਸਾਨਂ ਸੁਗਤਿਯਂ ਨਿਵਾਸੋ, ਤਾਦਿਸਾਨਂ ਪਨ ਅਦਾਨਸੀਲਾਨਂ ਮਚ੍ਛਰੀਨਂ ਨਿਰਯੇ ਨਿਵਾਸੋ, ਤਸ੍ਮਾ ਉਟ੍ਠੇਹਿ, ਮੁਹੁਤ੍ਤਮਤ੍ਤਮ੍ਪਿ ਤਵ ਇਧ ਠਾਤੁਂ ਨ ਦਸ੍ਸਾਮੀਤਿ ਅਧਿਪ੍ਪਾਯੋ. ਯਤ੍ਥ ਥੁਨਨ੍ਤਿ ਦੁਗ੍ਗਤਾਤਿ ਦੁਕ੍ਖਗਤਤ੍ਤਾ ਦੁਗ੍ਗਤਾ. ਨੇਰਯਿਕਾਤਿ ਨਿਰਯਦੁਕ੍ਖੇਨ ਸਮਪ੍ਪਿਤਾ ਸਮਙ੍ਗੀਭੂਤਾ ਯਸ੍ਮਿਂ ਨਿਰਯੇ ਥੁਨਨ੍ਤਿ, ਯਾਵ ਪਾਪਕਮ੍ਮਂ ਨ ਬ੍ਯਨ੍ਤਿ ਹੋਤਿ, ਤਾਵ ਨਿਕ੍ਖਮਿਤੁਂ ਅਲਭਨ੍ਤਾ ਨਿਤ੍ਥੁਨਨ੍ਤਿ, ਤਤ੍ਥ ਤਂ ਨੇਸ੍ਸਾਮ ਨਯਿਸ੍ਸਾਮ ਖਿਪਿਸ੍ਸਾਮਾਤਿ ਯੋਜਨਾ.

੮੬੪. ‘‘ਇਚ੍ਚੇਵ ਵਤ੍ਵਾਨ ਯਮਸ੍ਸ ਦੂਤਾ, ਤੇ ਦ੍ਵੇ ਯਕ੍ਖਾ ਲੋਹਿਤਕ੍ਖਾ ਬ੍ਰਹਨ੍ਤਾ;

ਪਚ੍ਚੇਕਬਾਹਾਸੁ ਗਹੇਤ੍ਵਾ ਰੇਵਤਂ, ਪਕ੍ਕਾਮਯੁਂ ਦੇਵਗਣਸ੍ਸ ਸਨ੍ਤਿਕੇ’’ਤਿ. –

ਇਦਂ ਸਙ੍ਗੀਤਿਕਾਰਵਚਨਂ.

ਤਤ੍ਥ ਇਚ੍ਚੇਵ ਵਤ੍ਵਾਨਾਤਿ ਇਤਿ ਏਵ ‘‘ਉਟ੍ਠੇਹੀ’’ਤਿਆਦਿਨਾ ਵਤ੍ਵਾ, ਵਚਨਸਮਨਨ੍ਤਰਮੇਵਾਤਿ ਅਤ੍ਥੋ. ਯਮਸ੍ਸ ਦੂਤਾਤਿ ਅਪ੍ਪਟਿਸੇਧਨਿਯਤਸ੍ਸ ਯਮਸ੍ਸ ਰਞ੍ਞੋ ਦੂਤਸਦਿਸਾ. ਵੇਸ੍ਸਵਣੇਨ ਹਿ ਤੇ ਪੇਸਿਤਾ. ਤਥਾ ਹਿ ਤੇ ਤਾਵਤਿਂਸਭਵਨਂ ਨਯਿਂਸੁ. ਕੇਚਿ ‘‘ਨ ਯਮਸ੍ਸ ਦੂਤਾ’’ਤਿ ਨ-ਕਾਰਂ ‘‘ਯਮਸ੍ਸਾ’’ਤਿ ਪਦੇਨ ਸਮ੍ਬਨ੍ਧਿਤ੍ਵਾ ‘‘ਵੇਸ੍ਸਵਣਸ੍ਸ ਦੂਤਾ’’ਤਿ ਅਤ੍ਥਂ ਵਦਨ੍ਤਿ, ਤਂ ਨ ਯੁਜ੍ਜਤਿ. ਨ ਹਿ ਨ ਯਮਦੂਤਤਾਯ ਵੇਸ੍ਸਵਣਸ੍ਸ ਦੂਤਾਤਿ ਸਿਜ੍ਝਤਿ. ਯਜਨ੍ਤਿ ਤਤ੍ਥ ਬਲਿਂ ਉਪਹਰਨ੍ਤੀਤਿ ਯਕ੍ਖਾ. ਲੋਹਿਤਕ੍ਖਾਤਿ ਰਤ੍ਤਨਯਨਾ. ਯਕ੍ਖਾਨਞ੍ਹਿ ਨੇਤ੍ਤਾਨਿ ਅਤਿਲੋਹਿਤਾਨਿ ਹੋਨ੍ਤਿ. ਬ੍ਰਹਨ੍ਤਾਤਿ ਮਹਨ੍ਤਾ. ਪਚ੍ਚੇਕਬਾਹਾਸੂਤਿ ਏਕੋ ਏਕਬਾਹਾਯਂ, ਇਤਰੋ ਇਤਰਬਾਹਾਯਨ੍ਤਿ ਪਚ੍ਚੇਕਂ ਬਾਹਾਸੁ. ਰੇਵਤਨ੍ਤਿ ਰੇਵਤਿਂ. ਰੇਵਤਾਤਿਪਿ ਤਸ੍ਸਾ ਨਾਮਮੇਵ. ਤਥਾ ਹਿ ‘‘ਰੇਵਤੇ’’ਤਿ ਵੁਤ੍ਤਂ. ਪਕ੍ਕਾਮਯੁਨ੍ਤਿ ਪਕ੍ਕਾਮੇਸੁਂ, ਉਪਨੇਸੁਨ੍ਤਿ ਅਤ੍ਥੋ. ਦੇਵਗਣਸ੍ਸਾਤਿ ਤਾਵਤਿਂਸਭਵਨੇ ਦੇਵਸਙ੍ਘਸ੍ਸ.

ਏਵਂ ਤੇਹਿ ਯਕ੍ਖੇਹਿ ਤਾਵਤਿਂਸਭਵਨਂ ਨੇਤ੍ਵਾ ਨਨ੍ਦਿਯਵਿਮਾਨਸ੍ਸ ਅਵਿਦੂਰੇ ਠਪਿਤਾ ਰੇਵਤੀ ਤਂ ਸੂਰਿਯਮਣ੍ਡਲਸਦਿਸਂ ਅਤਿਵਿਯ ਪਭਸ੍ਸਰਂ ਦਿਸ੍ਵਾ –

੮੬੫. ‘‘ਆਦਿਚ੍ਚਵਣ੍ਣਂ ਰੁਚਿਰਂ ਪਭਸ੍ਸਰਂ, ਬ੍ਯਮ੍ਹਂ ਸੁਭਂ ਕਞ੍ਚਨਜਾਲਛਨ੍ਨਂ;

ਕਸ੍ਸੇਤਮਾਕਿਣ੍ਣਜਨਂ ਵਿਮਾਨਂ, ਸੁਰਿਯਸ੍ਸ ਰਂਸੀਰਿਵ ਜੋਤਮਾਨਂ.

੮੬੬. ‘‘ਨਾਰੀਗਣਾ ਚਨ੍ਦਨਸਾਰਲਿਤ੍ਤਾ, ਉਭਤੋ ਵਿਮਾਨਂ ਉਪਸੋਭਯਨ੍ਤਿ;

ਤਂ ਦਿਸ੍ਸਤਿ ਸੁਰਿਯਸਮਾਨਵਣ੍ਣਂ, ਕੋ ਮੋਦਤਿ ਸਗ੍ਗਪਤ੍ਤੋ ਵਿਮਾਨੇ’’ਤਿ. –

ਤੇ ਯਕ੍ਖੇ ਪੁਚ੍ਛਿ. ਤੇਪਿ ਤਸ੍ਸਾ –

੮੬੭. ‘‘ਬਾਰਾਣਸਿਯਂ ਨਨ੍ਦਿਯੋ ਨਾਮਾਸਿ, ਉਪਾਸਕੋ ਅਮਚ੍ਛਰੀ ਦਾਨਪਤਿ ਵਦਞ੍ਞੂ;

ਤਸ੍ਸੇਤਮਾਕਿਣ੍ਣਜਨਂ ਵਿਮਾਨਂ, ਸੂਰਿਯਸ੍ਸ ਰਂਸੀਰਿਵ ਜੋਤਮਾਨਂ.

੮੬੮. ‘‘ਨਾਰੀਗਣਾ ਚਨ੍ਦਨਸਾਰਲਿਤ੍ਤਾ, ਉਭਤੋ ਵਿਮਾਨਂ ਉਪਸੋਭਯਨ੍ਤਿ;

ਤਂ ਦਿਸ੍ਸਤਿ ਸੂਰਿਯਸਮਾਨਵਣ੍ਣਂ, ਸੋ ਮੋਦਤਿ ਸਗ੍ਗਪਤ੍ਤੋ ਵਿਮਾਨੇ’’ਤਿ. –

ਆਚਿਕ੍ਖਿਂਸੁ.

੮੬੮. ਤਤ੍ਥ ਚਨ੍ਦਨਸਾਰਲਿਤ੍ਤਾਤਿ ਸਾਰਭੂਤੇਨ ਚਨ੍ਦਨਗਨ੍ਧੇਨ ਅਨੁਲਿਤ੍ਤਸਰੀਰਾ. ਉਭਤੋ ਵਿਮਾਨਨ੍ਤਿ ਵਿਮਾਨਂ ਉਭਤੋ ਅਨ੍ਤੋ ਚੇਵ ਬਹਿ ਚ ਸਙ੍ਗੀਤਾਦੀਹਿ ਉਪੇਚ੍ਚ ਸੋਭਯਨ੍ਤਿ.

ਅਥ ਰੇਵਤੀ –

੮੬੯. ‘‘ਨਨ੍ਦਿਯਸ੍ਸਾਹਂ ਭਰਿਯਾ, ਅਗਾਰਿਨੀ ਸਬ੍ਬਕੁਲਸ੍ਸ ਇਸ੍ਸਰਾ;

ਭਤ੍ਤੁ ਵਿਮਾਨੇ ਰਮਿਸ੍ਸਾਮਿ ਦਾਨਹਂ, ਨ ਪਤ੍ਥਯੇ ਨਿਰਯਂ ਦਸ੍ਸਨਾਯਾ’’ਤਿ. –

ਆਹ. ਤਤ੍ਥ ਅਗਾਰਿਨੀਤਿ ਗੇਹਸਾਮਿਨੀ. ‘‘ਭਰਿਯਾ ਸਗਾਮਿਨੀ’’ਤਿਪਿ ਪਠਨ੍ਤਿ, ਭਰਿਯਾ ਸਹਗਾਮਿਨੀਤਿ ਅਤ੍ਥੋ. ਸਬ੍ਬਕੁਲਸ੍ਸ ਇਸ੍ਸਰਾ ਭਤ੍ਤੂਤਿ ਮਮ ਭਤ੍ਤੁ ਨਨ੍ਦਿਯਸ੍ਸ ਸਬ੍ਬਕੁਟੁਮ੍ਬਿਕਸ੍ਸ ਇਸ੍ਸਰਾ ਸਾਮਿਨੀ ਅਹੋਸਿਂ, ਤਸ੍ਮਾ ਇਦਾਨਿਪਿ ਵਿਮਾਨੇ ਇਸ੍ਸਰਾ ਭਵਿਸ੍ਸਾਮੀਤਿ ਆਹ. ਵਿਮਾਨੇ ਰਮਿਸ੍ਸਾਮਿ ਦਾਨਹਨ੍ਤਿ ਏਵਂ ਪਲੋਭੇਤੁਮੇਵ ਹਿ ਤਂ ਤੇ ਤਤ੍ਥ ਨੇਸੁਂ. ਨ ਪਤ੍ਥਯੇ ਨਿਰਯਂ ਦਸ੍ਸਨਾਯਾਤਿ ਯਂ ਪਨ ਨਿਰਯਂ ਮਂ ਤੁਮ੍ਹੇ ਨੇਤੁਕਾਮਾ, ਤਂ ਨਿਰਯਂ ਦਸ੍ਸਨਾਯਪਿ ਨ ਪਤ੍ਥਯੇ, ਕੁਤੋ ਪਵਿਸਿਤੁਨ੍ਤਿ ਵਦਤਿ.

ਏਵਂ ਵਦਨ੍ਤਿਮੇਵ ‘‘ਤ੍ਵਂ ਤਂ ਪਤ੍ਥੇਹਿ ਵਾ ਮਾ ਵਾ, ਕਿਂ ਤਵ ਪਤ੍ਥਨਾਯਾ’’ਤਿ ਨਿਰਯਸਮੀਪਂ ਨੇਤ੍ਵਾ –

੮੭੦. ‘‘ਏਸੋ ਤੇ ਨਿਰਯੋ ਸੁਪਾਪਧਮ੍ਮੇ, ਪੁਞ੍ਞਂ ਤਯਾ ਅਕਤਂ ਜੀਵਲੋਕੇ;

ਨ ਹਿ ਮਚ੍ਛਰੀ ਰੋਸਕੋ ਪਾਪਧਮ੍ਮੋ, ਸਗ੍ਗੂਪਗਾਨਂ ਲਭਤਿ ਸਹਬ੍ਯਤ’’ਨ੍ਤਿ. –

ਗਾਥਮਾਹਂਸੁ. ਤਸ੍ਸਤ੍ਥੋ – ਏਸੋ ਤਵ ਨਿਰਯੋ, ਤਯਾ ਦੀਘਰਤ੍ਤਂ ਮਹਾਦੁਕ੍ਖਂ ਅਨੁਭਵਿਤਬ੍ਬਟ੍ਠਾਨਭੂਤੋ. ਕਸ੍ਮਾ? ਪੁਞ੍ਞਂ ਤਯਾ ਅਕਤਂ ਜੀਵਲੋਕੇ, ਯਸ੍ਮਾ ਮਨੁਸ੍ਸਲੋਕੇ ਅਪ੍ਪਮਤ੍ਤਕਮ੍ਪਿ ਤਯਾ ਪੁਞ੍ਞਂ ਨਾਮ ਨ ਕਤਂ, ਏਵਂ ਅਕਤਪੁਞ੍ਞੋ ਪਨ ਤਾਦਿਸੋ ਸਤ੍ਤੋ ਮਚ੍ਛਰੀ ਅਤ੍ਤਨੋ ਸਮ੍ਪਤ੍ਤਿਨਿਗੂਹਨਲਕ੍ਖਣੇਨ ਮਚ੍ਛਰੇਨ ਸਮਨ੍ਨਾਗਤੋ, ਪਰੇਸਂ ਰੋਸੁਪ੍ਪਾਦਨੇਨ ਰੋਸਕੋ, ਲੋਭਾਦੀਹਿ ਪਾਪਧਮ੍ਮੇਹਿ ਸਮਙ੍ਗੀਭਾਵਤੋ ਪਾਪਧਮ੍ਮੋ ਸਗ੍ਗੂਪਗਾਨਂ ਦੇਵਾਨਂ ਸਹਬ੍ਯਤਂ ਸਹਭਾਵਂ ਨ ਲਭਤੀਤਿ ਯੋਜਨਾ.

ਏਵਂ ਪਨ ਵਤ੍ਵਾ ਤੇ ਦ੍ਵੇ ਯਕ੍ਖਾ ਤਤ੍ਥੇਵਨ੍ਤਰਧਾਯਿਂਸੁ. ਤਂਸਦਿਸੇ ਪਨ ਦ੍ਵੇ ਨਿਰਯਪਾਲੇ ਸਂਸਵਕੇ ਨਾਮ ਗੂਥਨਿਰਯੇ ਪਕ੍ਖਿਪਿਤੁਂ ਆਕਡ੍ਢਨ੍ਤੇ ਪਸ੍ਸਿਤ੍ਵਾ –

੮੭੧. ‘‘ਕਿਂ ਨੁ ਗੂਥਞ੍ਚ ਮੁਤ੍ਤਞ੍ਚ, ਅਸੁਚਿ ਪਟਿਦਿਸ੍ਸਤਿ;

ਦੁਗ੍ਗਨ੍ਧਂ ਕਿਮਿਦਂ ਮੀਲ਼੍ਹਂ, ਕਿਮੇਤਂ ਉਪਵਾਯਤੀ’’ਤਿ. –

ਤਂ ਨਿਰਯਂ ਪੁਚ੍ਛਿ.

੮੭੨. ‘‘ਏਸ ਸਂਸਵਕੋ ਨਾਮ, ਗਮ੍ਭੀਰੋ ਸਤਪੋਰਿਸੋ;

ਯਤ੍ਥ ਵਸ੍ਸਸਹਸ੍ਸਾਨਿ, ਤੁਵਂ ਪਚ੍ਚਸਿ ਰੇਵਤੇ’’ਤਿ. –

ਤਸ੍ਮਿਂ ਕਥਿਤੇ ਤਤ੍ਥ ਅਤ੍ਤਨੋ ਨਿਬ੍ਬਤ੍ਤਿਹੇਤੁਭੂਤਂ ਕਮ੍ਮਂ ਪੁਚ੍ਛਨ੍ਤੀ –

੮੭੩. ‘‘ਕਿਂ ਨੁ ਕਾਯੇਨ ਵਾਚਾਯ, ਮਨਸਾ ਦੁਕ੍ਕਟਂ ਕਤਂ;

ਕੇਨ ਸਂਸਵਕੋ ਲਦ੍ਧੋ, ਗਮ੍ਭੀਰੋ ਸਤਪੋਰਿਸੋ’’ਤਿ. – ਆਹ;

੮੭੪. ‘‘ਸਮਣੇ ਬ੍ਰਾਹ੍ਮਣੇ ਚਾਪਿ, ਅਞ੍ਞੇ ਵਾਪਿ ਵਨਿਬ੍ਬਕੇ;

ਮੁਸਾਵਾਦੇਨ ਵਞ੍ਚੇਸਿ, ਤਂ ਪਾਪਂ ਪਕਤਂ ਤਯਾ’’ਤਿ. –

ਤਸ੍ਸਾ ਤਂ ਕਮ੍ਮਂ ਕਥੇਤ੍ਵਾ ਪੁਨ ਤੇ –

੮੭੫. ‘‘ਤੇਨ ਸਂਸਵਕੋ ਲਦ੍ਧੋ, ਗਮ੍ਭੀਰੋ ਸਤਪੋਰਿਸੋ;

ਤਤ੍ਥੇ ਵਸ੍ਸਸਹਸ੍ਸਾਨਿ, ਤੁਵਂ ਪਚ੍ਚਸਿ ਰੇਵਤੇ’’ਤਿ. –

ਆਹਂਸੁ. ਤਤ੍ਥ ਸਂਸਵਕੋ ਨਾਮਾਤਿ ਨਿਚ੍ਚਕਾਲਂ ਗੂਥਮੁਤ੍ਤਾਦਿਅਸੁਚਿਸ੍ਸ ਸਂਸਵਨਤੋ ਪਗ੍ਘਰਣਤੋ ਸਂਸਵਕੋ ਨਾਮ.

ਨ ਕੇਵਲਂ ਤੁਯ੍ਹਂ ਇਧ ਸਂਸਵਕਲਾਭੋ ਏਵ, ਅਥ ਖੋ ਏਤ੍ਥ ਅਨੇਕਾਨਿ ਵਸ੍ਸਸਹਸ੍ਸਾਨਿ ਪਚ੍ਚਿਤ੍ਵਾ ਉਤ੍ਤਿਣ੍ਣਾਯ ਹਤ੍ਥਚ੍ਛੇਦਾਦਿਲਾਭੋਪੀਤਿ ਦਸ੍ਸੇਤੁਂ –

੮੭੬. ‘‘ਹਤ੍ਥੇਪਿ ਛਿਨ੍ਦਨ੍ਤਿ ਅਥੋਪਿ ਪਾਦੇ, ਕਣ੍ਣੇਪਿ ਛਿਨ੍ਦਨ੍ਤਿ ਅਥੋਪਿ ਨਾਸਂ;

ਅਥੋਪਿ ਕਾਕੋਲ਼ਗਣਾ ਸਮੇਚ੍ਚ, ਸਙ੍ਗਮ੍ਮ ਖਾਦਨ੍ਤਿ ਵਿਫਨ੍ਦਮਾਨ’’ਨ੍ਤਿ. –

ਤਤ੍ਥ ਲਦ੍ਧਬ੍ਬਕਾਰਣਂ ਆਹਂਸੁ. ਤਤ੍ਥ ਕਾਕੋਲ਼ਗਣਾਤਿ ਕਾਕਸਙ੍ਘਾ. ਤੇ ਕਿਰਸ੍ਸਾ ਤਿਗਾਵੁਤਪ੍ਪਮਾਣੇ ਸਰੀਰੇ ਅਨੇਕਸਤਾਨਿ ਅਨੇਕਸਹਸ੍ਸਾਨਿ ਪਤਿਤ੍ਵਾ ਤਾਲਕ੍ਖਨ੍ਧਪਰਿਮਾਣੇਹਿ ਸੁਨਿਸਿਤਗ੍ਗੇਹਿ ਅਯੋਮਯੇਹਿ ਮੁਖਤੁਣ੍ਡੇਹਿ ਵਿਜ੍ਝਿਤ੍ਵਾ ਵਿਜ੍ਝਿਤ੍ਵਾ ਖਾਦਨ੍ਤਿ, ਮਂਸਂ ਗਹਿਤਗਹਿਤਟ੍ਠਾਨੇ ਕਮ੍ਮਬਲੇਨ ਪੂਰਤੇਵ. ਤੇਨਾਹ ‘‘ਕਾਕੋਲ਼ਗਣਾ ਸਮੇਚ੍ਚ, ਸਙ੍ਗਮ੍ਮ ਖਾਦਨ੍ਤਿ ਵਿਫਨ੍ਦਮਾਨ’’ਨ੍ਤਿ.

ਪੁਨ ਸਾ ਮਨੁਸ੍ਸਲੋਕਂ ਪਚ੍ਚਾਨਯਨਾਯ ਯਾਚਨਾਦਿਵਸੇਨ ਤਂ ਤਂ ਵਿਪ੍ਪਲਪਿ. ਤੇਨ ਵੁਤ੍ਤਂ –

੮੭੭. ‘‘ਸਾਧੁ ਖੋ ਮਂ ਪਟਿਨੇਥ, ਕਾਹਾਮਿ ਕੁਸਲਂ ਬਹੁਂ;

ਦਾਨੇਨ ਸਮਚਰਿਯਾਯ, ਸਂਯਮੇਨ ਦਮੇਨ ਚ;

ਯਂ ਕਤ੍ਵਾ ਸੁਖਿਤਾ ਹੋਨ੍ਤਿ, ਨ ਚ ਪਚ੍ਛਾਨੁਤਪ੍ਪਰੇ’’ਤਿ.

ਪੁਨ ਨਿਰਯਪਾਲਾ –

੮੭੮. ‘‘ਪੁਰੇ ਤੁਵਂ ਪਮਜ੍ਜਿਤ੍ਵਾ, ਇਦਾਨਿ ਪਰਿਦੇਵਸਿ;

ਸਯਂ ਕਤਾਨਂ ਕਮ੍ਮਾਨਂ, ਵਿਪਾਕਂ ਅਨੁਭੋਸ੍ਸਸੀ’’ਤਿ. –

ਆਹਂਸੁ. ਪੁਨ ਸਾ ਆਹ –

੮੭੯. ‘‘ਕੋ ਦੇਵਲੋਕਤੋ ਮਨੁਸ੍ਸਲੋਕਂ, ਗਨ੍ਤ੍ਵਾਨ ਪੁਟ੍ਠੋ ਮੇ ਏਵਂ ਵਦੇਯ੍ਯ;

ਨਿਕ੍ਖਿਤ੍ਤਦਣ੍ਡੇਸੁ ਦਦਾਥ ਦਾਨਂ, ਅਚ੍ਛਾਦਨਂ ਸੇਯ੍ਯਮਥਨ੍ਨਪਾਨਂ;

ਨ ਹਿ ਮਚ੍ਛਰੀ ਰੋਸਕੋ ਪਾਪਧਮ੍ਮੋ, ਸਗ੍ਗੂਪਗਾਨਂ ਲਭਤਿ ਸਹਬ੍ਯਤਂ.

੮੮੦. ‘‘ਸਾਹਂ ਨੂਨ ਇਤੋ ਗਨ੍ਤ੍ਵਾ, ਯੋਨਿਂ ਲਦ੍ਧਾਨ ਮਾਨੁਸਿਂ;

ਵਦਞ੍ਞੂ ਸੀਲਸਮ੍ਪਨ੍ਨਾ, ਕਾਹਾਮਿ ਕੁਸਲਂ ਬਹੁਂ;

ਦਾਨੇਨ ਸਮਚਰਿਯਾਯ, ਸਂਯਮੇਨ ਦਮੇਨ ਚ.

੮੮੧. ‘‘ਆਰਾਮਾਨਿ ਚ ਰੋਪਿਸ੍ਸਂ, ਦੁਗ੍ਗੇ ਸਙ੍ਕਮਾਨਿ ਚ;

ਪਪਞ੍ਚ ਉਦਪਾਨਞ੍ਚ, ਵਿਪ੍ਪਸਨ੍ਨੇਨ ਚੇਤਸਾ.

੮੮੨. ‘‘ਚਾਤੁਦ੍ਦਸਿਂ ਪਞ੍ਚਦਸਿਂ, ਯਾ ਚ ਪਕ੍ਖਸ੍ਸ ਅਟ੍ਠਮੀ;

ਪਾਟਿਹਾਰਿਯਪਕ੍ਖਞ੍ਚ, ਅਟ੍ਠਙ੍ਗਸੁਸਮਾਗਤਂ.

੮੮੩. ‘‘ਉਪੋਸਥਂ ਉਪਵਸਿਸ੍ਸਂ, ਸਦਾ ਸੀਲੇਸੁ ਸਂਵੁਤਾ;

ਨ ਚ ਦਾਨੇ ਪਮਜ੍ਜਿਸ੍ਸਂ, ਸਾਮਂ ਦਿਟ੍ਠਮਿਦਂ ਮਯਾ’’ਤਿ.

੮੮੪. ‘‘ਇਚ੍ਚੇਵਂ ਵਿਪ੍ਪਲਪਨ੍ਤਿਂ, ਫਨ੍ਦਮਾਨਂ ਤਤੋ ਤਤੋ;

ਖਿਪਿਂਸੁ ਨਿਰਯੇ ਘੋਰੇ, ਉਦ੍ਧਂਪਾਦਂ ਅਵਂਸਿਰ’’ਨ੍ਤਿ. –

ਇਦਂ ਸਙ੍ਗੀਤਿਕਾਰਵਚਨਂ. ਪੁਨ ਸਾ –

੮੮੫. ‘‘ਅਹਂ ਪੁਰੇ ਮਚ੍ਛਰਿਨੀ ਅਹੋਸਿਂ, ਪਰਿਭਾਸਿਕਾ ਸਮਣਬ੍ਰਾਹ੍ਮਣਾਨਂ;

ਵਿਤਥੇਨ ਚ ਸਾਮਿਕਂ ਵਞ੍ਚਯਿਤ੍ਵਾ, ਪਚ੍ਚਾਮਹਂ ਨਿਰਯੇ ਘੋਰਰੂਪੇ’’ਤਿ. –

ਓਸਾਨਗਾਥਮਾਹ. ਤਤ੍ਥ ‘‘ਅਹਂ ਪੁਰੇ ਮਚ੍ਛਰਿਨੀ’’ਤਿ ਗਾਥਾ ਨਿਰਯੇ ਨਿਬ੍ਬਤ੍ਤਾਯ ਵੁਤ੍ਤਾ, ਇਤਰਾ ਅਨਿਬ੍ਬਤ੍ਤਾਯ ਏਵਾਤਿ ਵੇਦਿਤਬ੍ਬਾ. ਸੇਸਂ ਸੁਵਿਞ੍ਞੇਯ੍ਯਮੇਵਾਤਿ.

ਭਿਕ੍ਖੂ ਰੇਵਤਿਯਾ ਯਕ੍ਖੇਹਿ ਗਹੇਤ੍ਵਾ ਨੀਤਭਾਵਂ ਭਗਵਤੋ ਆਰੋਚੇਸੁਂ. ਤਂ ਸੁਤ੍ਵਾ ਭਗਵਾ ਆਦਿਤੋ ਪਟ੍ਠਾਯ ਇਮਂ ਵਤ੍ਥੁਂ ਕਥੇਤ੍ਵਾ ਉਪਰਿ ਵਿਤ੍ਥਾਰੇਨ ਧਮ੍ਮਂ ਦੇਸੇਸਿ, ਦੇਸਨਾਪਰਿਯੋਸਾਨੇ ਬਹੂ ਸੋਤਾਪਤ੍ਤਿਫਲਾਦੀਨਿ ਪਾਪੁਣਿਂਸੁ. ਕਾਮਞ੍ਚੇਤਂ ਰੇਵਤੀਪਟਿਬਦ੍ਧਾਯ ਕਥਾਯ ਯੇਭੁਯ੍ਯਭਾਵਤੋ ‘‘ਰੇਵਤੀਵਿਮਾਨ’’ਨ੍ਤਿ ਵੋਹਰੀਯਤਿ, ਯਸ੍ਮਾ ਪਨ ਰੇਵਤੀ ਵਿਮਾਨਦੇਵਤਾ ਨ ਹੋਤਿ, ਨਨ੍ਦਿਯਸ੍ਸ ਪਨ ਦੇਵਪੁਤ੍ਤਸ੍ਸ ਵਿਮਾਨਾਦਿਸਮ੍ਪਤ੍ਤਿਪਟਿਸਂਯੁਤ੍ਤਞ੍ਚੇਤਂ, ਤਸ੍ਮਾ ਪੁਰਿਸਵਿਮਾਨੇਸ੍ਵੇਵ ਸਙ੍ਗਹਂ ਆਰੋਪਿਤਨ੍ਤਿ ਦਟ੍ਠਬ੍ਬਂ.

ਰੇਵਤੀਵਿਮਾਨਵਣ੍ਣਨਾ ਨਿਟ੍ਠਿਤਾ.