੮. ਅਮ੍ਬਵਿਮਾਨਵਣ੍ਣਨਾ

ਦਿਬ੍ਬਂ ਤੇ ਅਮ੍ਬਵਨਂ ਰਮ੍ਮਨ੍ਤਿ ਅਮ੍ਬਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ. ਤੇਨ ਸਮਯੇਨ ਸਾਵਤ੍ਥਿਯਂ ਅਞ੍ਞਤਰਾ ਉਪਾਸਿਕਾ ਆਵਾਸਦਾਨਸ੍ਸ ਮਹਪ੍ਫਲਤਂ ਮਹਾਨਿਸਂਸਤਞ੍ਚ ਸੁਤ੍ਵਾ ਛਨ੍ਦਜਾਤਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਵਮਾਹ ‘‘ਅਹਂ, ਭਨ੍ਤੇ, ਏਕਂ ਆਵਾਸਂ ਕਾਰੇਤੁਕਾਮਾ, ਇਚ੍ਛਾਮਿ ਤਾਦਿਸਂ ਓਕਾਸਂ, ਆਚਿਕ੍ਖਤੂ’’ਤਿ. ਭਗਵਾ ਭਿਕ੍ਖੂ ਆਣਾਪੇਸਿ, ਭਿਕ੍ਖੂ ਤਸ੍ਸਾ ਓਕਾਸਂ ਦਸ੍ਸੇਸੁਂ. ਸਾ ਤਤ੍ਥ ਰਮਣੀਯਂ ਆਵਾਸਂ ਕਾਰੇਤ੍ਵਾ ਤਸ੍ਸ ਸਮਨ੍ਤਤੋ ਅਮ੍ਬਰੁਕ੍ਖੇ ਰੋਪੇਸਿ. ਸੋ ਆਵਾਸੋ ਸਮਨ੍ਤਤੋ ਅਮ੍ਬਪਨ੍ਤੀਹਿ ਪਰਿਕ੍ਖਿਤ੍ਤੋ ਛਾਯੂਦਕਸਮ੍ਪਨ੍ਨੋ ਮੁਤ੍ਤਾਜਾਲਸਦਿਸਵਾਲੁਕਾਕਿਣ੍ਣਪਣ੍ਡਰਭੂਮਿਭਾਗੋ ਅਤਿਵਿਯ ਮਨੋਹਰੋ ਅਹੋਸਿ. ਸਾ ਤਂ ਵਿਹਾਰਂ ਨਾਨਾਵਣ੍ਣੇਹਿ ਵਤ੍ਥੇਹਿ ਪੁਪ੍ਫਦਾਮਗਨ੍ਧਦਾਮਾਦੀਹਿ ਚ ਦੇਵਵਿਮਾਨਂ ਵਿਯ ਅਲਙ੍ਕਰਿਤ੍ਵਾ ਤੇਲਪਦੀਪਂ ਆਰੋਪੇਤ੍ਵਾ ਅਮ੍ਬਰੁਕ੍ਖੇ ਚ ਅਹਤੇਹਿ ਵਤ੍ਥੇਹਿ ਵੇਠੇਤ੍ਵਾ ਸਙ੍ਘਸ੍ਸ ਨਿਯ੍ਯਾਦੇਸਿ.

ਸਾ ਅਪਰਭਾਗੇ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਨਿਬ੍ਬਤ੍ਤਿ, ਤਸ੍ਸਾ ਮਹਨ੍ਤਂ ਵਿਮਾਨਂ ਪਾਤੁਰਹੋਸਿ ਅਮ੍ਬਵਨਪਰਿਕ੍ਖਿਤ੍ਤਂ. ਸਾ ਤਤ੍ਥ ਅਚ੍ਛਰਾਗਣਪਰਿਵਾਰਿਤਾ ਦਿਬ੍ਬਸਮ੍ਪਤ੍ਤਿਂ ਅਨੁਭਵਤਿ. ਤਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਉਪਗਨ੍ਤ੍ਵਾ ਇਮਾਹਿ ਗਾਥਾਹਿ ਪੁਚ੍ਛਿ –

੭੮੩. ‘‘ਦਿਬ੍ਬਂ ਤੇ ਅਮ੍ਬਵਨਂ ਰਮ੍ਮਂ, ਪਾਸਾਦੇਤ੍ਥ ਮਹਲ੍ਲਕੋ;

ਨਾਨਾਤੂਰਿਯਸਙ੍ਘੁਟ੍ਠੋ, ਅਚ੍ਛਰਾਗਣਘੋਸਿਤੋ.

੭੮੪. ‘‘ਪਦੀਪੋ ਚੇਤ੍ਥ ਜਲਤਿ, ਨਿਚ੍ਚਂ ਸੋਵਣ੍ਣਯੋ ਮਹਾ;

ਦੁਸ੍ਸਫਲੇਹਿ ਰੁਕ੍ਖੇਹਿ, ਸਮਨ੍ਤਾ ਪਰਿਵਾਰਿਤੋ.

੭੮੫. ‘‘ਕੇਨ ਤੇਤਾਦਿਸੋ ਵਣ੍ਣੋ…ਪੇ…ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੭੮੭. ‘‘ਸਾ ਦੇਵਤਾ ਅਤ੍ਤਮਨਾ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

੭੮੮. ‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਪੁਰਿਮਾਯ ਜਾਤਿਯਾ ਮਨੁਸ੍ਸਲੋਕੇ;

ਵਿਹਾਰਂ ਸਙ੍ਘਸ੍ਸ ਕਾਰੇਸਿਂ, ਅਮ੍ਬੇਹਿ ਪਰਿਵਾਰਿਤਂ.

੭੮੯. ‘‘ਪਰਿਯੋਸਿਤੇ ਵਿਹਾਰੇ, ਕਾਰੇਨ੍ਤੇ ਨਿਟ੍ਠਿਤੇ ਮਹੇ;

ਅਮ੍ਬੇਹਿ ਛਾਦਯਿਤ੍ਵਾਨ, ਕਤ੍ਵਾ ਦੁਸ੍ਸਮਯੇ ਫਲੇ.

੭੯੦. ‘‘ਪਦੀਪਂ ਤਤ੍ਥ ਜਾਲੇਤ੍ਵਾ, ਭੋਜਯਿਤ੍ਵਾ ਗਣੁਤ੍ਤਮਂ;

ਨਿਯ੍ਯਾਦੇਸਿਂ ਤਂ ਸਙ੍ਘਸ੍ਸ, ਪਸਨ੍ਨਾ ਸੇਹਿ ਪਾਣਿਭਿ.

੭੯੧. ‘‘ਤੇਨ ਮੇ ਅਮ੍ਬਵਨਂ ਰਮ੍ਮਂ, ਪਾਸਾਦੇਤ੍ਥ ਮਹਲ੍ਲਕੋ;

ਨਾਨਾਤੂਰਿਯਸਙ੍ਘੁਟ੍ਠੋ, ਅਚ੍ਛਰਾਗਣਘੋਸਿਤੋ.

੭੯੨. ‘‘ਪਦੀਪੋ ਚੇਤ੍ਥ ਜਲਤਿ, ਨਿਚ੍ਚਂ ਸੋਵਣ੍ਣਯੋ ਮਹਾ;

ਦੁਸ੍ਸਫਲੇਹਿ ਰੁਕ੍ਖੇਹਿ, ਸਮਨ੍ਤਾ ਪਰਿਵਾਰਿਤੋ.

੭੯੩. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ…ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ. –

ਸਾ ਦੇਵਤਾ ਬ੍ਯਾਕਾਸਿ.

੭੮੩. ਤਤ੍ਥ ਮਹਲ੍ਲਕੋਤਿ ਮਹਨ੍ਤੋ ਆਯਾਮਵਿਤ੍ਥਾਰੇਹਿ ਉਬ੍ਬੇਧੇਨ ਚ ਵਿਪੁਲੋ, ਉਲ਼ਾਰਤਮੋਤਿ ਅਤ੍ਥੋ. ਅਚ੍ਛਰਾਗਣਘੋਸਿਤੋਤਿ ਤਂ ਪਮੋਦਿਤੁਂ ਸਙ੍ਗੀਤਿਵਸੇਨ ਚੇਵ ਪਿਯਸਲ੍ਲਾਪਵਸੇਨ ਚ ਅਚ੍ਛਰਾਸਙ੍ਘੇਨ ਸਮੁਗ੍ਘੋਸਿਤੋ.

੭੮੪. ਪਦੀਪੋ ਚੇਤ੍ਥ ਜਲਤੀਤਿ ਸੂਰਿਯਰਸ੍ਮਿਸਮੁਜ੍ਜਲਕਿਰਣਵਿਤਾਨੋ ਰਤਨਪ੍ਪਦੀਪੋ ਚ ਏਤ੍ਥ ਏਤਸ੍ਮਿਂ ਪਾਸਾਦੇ ਅਭਿਜਲਤਿ. ਦੁਸ੍ਸਫਲੇਹੀਤਿ ਦੁਸ੍ਸਾਨਿ ਫਲਾਨਿ ਏਤੇਸਨ੍ਤਿ ਦੁਸ੍ਸਫਲਾ. ਤੇਹਿ ਸਮੁਗ੍ਗਿਰਿਯਮਾਨਦਿਬ੍ਬਵਤ੍ਥੇਹੀਤਿ ਅਤ੍ਥੋ.

੭੮੯. ਕਾਰੇਨ੍ਤੇ ਨਿਟ੍ਠਿਤੇ ਮਹੇਤਿ ਕਤਪਰਿਯੋਸਿਤਸ੍ਸ ਵਿਹਾਰਸ੍ਸ ਮਹੇ ਪੂਜਾਯ ਕਰੀਯਮਾਨਾਯ ਚ. ਕਤ੍ਵਾ ਦੁਸ੍ਸਮਯੇ ਫਲੇਤਿ ਦੁਸ੍ਸੇਯੇਵ ਤੇਸਂ ਅਮ੍ਬਾਨਂ ਫਲਂ ਕਤ੍ਵਾ.

੭੯੦. ਗਣੁਤ੍ਤਮਨ੍ਤਿ ਗਣਾਨਂ ਉਤ੍ਤਮਂ ਭਗਵਤੋ ਸਾਵਕਸਙ੍ਘਂ. ਨਿਯ੍ਯਾਦੇਸਿਨ੍ਤਿ ਸਮ੍ਪਟਿਚ੍ਛਾਪੇਸਿਂ, ਅਦਾਸਿਨ੍ਤਿ ਅਤ੍ਥੋ. ਸੇਸਂ ਵੁਤ੍ਤਨਯਮੇਵ.

ਅਮ੍ਬਵਿਮਾਨਵਣ੍ਣਨਾ ਨਿਟ੍ਠਿਤਾ.