੯. ਪੀਤਵਿਮਾਨਵਣ੍ਣਨਾ

ਪੀਤਵਤ੍ਥੇ ਪੀਤਧਜੇਤਿ ਪੀਤਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਤਿ ਪਰਿਨਿਬ੍ਬੁਤੇ ਰਞ੍ਞਾ ਅਜਾਤਸਤ੍ਤੁਨਾ ਅਤ੍ਤਨਾ ਪਟਿਲਦ੍ਧਾ ਭਗਵਤੋ ਸਰੀਰਧਾਤੁਯੋ ਗਹੇਤ੍ਵਾ ਥੂਪੇ ਚ ਮਹੇ ਚ ਕਤੇ ਰਾਜਗਹਵਾਸਿਨੀ ਅਞ੍ਞਤਰਾ ਉਪਾਸਿਕਾ ਪਾਤੋਵ ਕਤਸਰੀਰਪਟਿਜਗ੍ਗਨਾ ‘‘ਸਤ੍ਥੁ ਥੂਪਂ ਪੂਜੇਸ੍ਸਾਮੀ’’ਤਿ ਯਥਾਲਦ੍ਧਾਨਿ ਚਤ੍ਤਾਰਿ ਕੋਸਾਤਕੀਪੁਪ੍ਫਾਨਿ ਗਹੇਤ੍ਵਾ ਸਦ੍ਧਾਵੇਗੇਨ ਸਮੁਸ੍ਸਾਹਿਤਮਾਨਸਾ ਮਗ੍ਗਪਰਿਸ੍ਸਯਂ ਅਨੁਪਧਾਰੇਤ੍ਵਾਵ ਥੂਪਾਭਿਮੁਖੀ ਗਚ੍ਛਤਿ. ਅਥ ਨਂ ਤਰੁਣਵਚ੍ਛਾ ਗਾਵੀ ਅਭਿਧਾਵਨ੍ਤੀ ਵੇਗੇਨ ਆਪਤਿਤ੍ਵਾ ਸਿਙ੍ਗੇਨ ਪਹਰਿਤ੍ਵਾ ਜੀਵਿਤਕ੍ਖਯਂ ਪਾਪੇਸਿ. ਸਾ ਤਾਵਦੇਵ ਤਾਵਤਿਂਸਭਵਨੇ ਨਿਬ੍ਬਤ੍ਤਨ੍ਤੀ ਸਕ੍ਕਸ੍ਸ ਦੇਵਰਞ੍ਞੋ ਉਯ੍ਯਾਨਕੀਲ਼ਾਯ ਗਚ੍ਛਨ੍ਤਸ੍ਸ ਪਰਿਵਾਰਭੂਤਾਨਂ ਅਡ੍ਢਤਿਯਾਨਂ ਨਾਟਕਕੋਟੀਨਂ ਮਜ੍ਝੇ ਅਤ੍ਤਨੋ ਸਰੀਰਪਭਾਯ ਤਾ ਸਬ੍ਬਾ ਅਭਿਭਵਨ੍ਤੀ ਸਹ ਰਥੇਨ ਪਾਤੁਰਹੋਸਿ. ਤਂ ਦਿਸ੍ਵਾ ਸਕ੍ਕੋ ਦੇਵਰਾਜਾ ਵਿਮ੍ਹਿਤਚਿਤ੍ਤੋ ਅਚ੍ਛਰਿਯਬ੍ਭੁਤਜਾਤੋ ‘‘ਕੀਦਿਸੇਨ ਨੁ ਖੋ ਓਲ਼ਾਰਿਕੇਨ ਕਮ੍ਮੁਨਾ ਅਯਂ ਏਦਿਸਿਂ ਸੁਮਹਤਿਂ ਦੇਵਿਦ੍ਧਿਮੁਪਾਗਤਾ’’ਤਿ ਤਂ ਇਮਾਹਿ ਗਾਥਾਹਿ ਪੁਚ੍ਛਿ –

੭੯੫. ‘‘ਪੀਤਵਤ੍ਥੇ ਪੀਤਧਜੇ, ਪੀਤਾਲਙ੍ਕਾਰਭੂਸਿਤੇ;

ਪੀਤਚਨ੍ਦਨਲਿਤ੍ਤਙ੍ਗੇ, ਪੀਤਉਪ੍ਪਲਮਾਲਿਨੀ.

੭੯੬. ‘‘ਪੀਤਪਾਸਾਦਸਯਨੇ, ਪੀਤਾਸਨੇ ਪੀਤਭਾਜਨੇ;

ਪੀਤਛਤ੍ਤੇ ਪੀਤਰਥੇ, ਪੀਤਸ੍ਸੇ ਪੀਤਬੀਜਨੇ.

੭੯੭. ‘‘ਕਿਂ ਕਮ੍ਮਮਕਰੀ ਭਦ੍ਦੇ, ਪੁਬ੍ਬੇ ਮਾਨੁਸਕੇ ਭਵੇ;

ਦੇਵਤੇ ਪੁਚ੍ਛਿਤਾਚਿਕ੍ਖ, ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ.

ਸਾਪਿਸ੍ਸ ਇਮਾਹਿ ਗਾਥਾਹਿ ਬ੍ਯਾਕਾਸਿ –

੭੯੮. ‘‘ਕੋਸਾਤਕੀ ਨਾਮ ਲਤਤ੍ਥਿ ਭਨ੍ਤੇ, ਤਿਤ੍ਤਿਕਾ ਅਨਭਿਚ੍ਛਿਤਾ;

ਤਸ੍ਸਾ ਚਤ੍ਤਾਰਿ ਪੁਪ੍ਫਾਨਿ, ਥੂਪਂ ਅਭਿਹਰਿਂ ਅਹਂ.

੭੯੯. ‘‘ਸਤ੍ਥੁ ਸਰੀਰਮੁਦ੍ਦਿਸ੍ਸ, ਵਿਪ੍ਪਸਨ੍ਨੇਨ ਚੇਤਸਾ;

ਨਾਸ੍ਸ ਮਗ੍ਗਂ ਅਵੇਕ੍ਖਿਸ੍ਸਂ, ਨ ਤਗ੍ਗਮਨਸਾ ਸਤੀ.

੮੦੦. ‘‘ਤਤੋ ਮਂ ਅਵਧੀ ਗਾਵੀ, ਥੂਪਂ ਅਪਤ੍ਤਮਾਨਸਂ;

ਤਞ੍ਚਾਹਂ ਅਭਿਸਞ੍ਚੇਯ੍ਯਂ, ਭਿਯ੍ਯੋ ਨੂਨ ਇਤੋ ਸਿਯਾ.

੮੦੧. ‘‘ਤੇਨ ਕਮ੍ਮੇਨ ਦੇਵਿਨ੍ਦ, ਮਘਵਾ ਦੇਵਕੁਞ੍ਜਰ;

ਪਹਾਯ ਮਾਨੁਸਂ ਦੇਹਂ, ਤਵ ਸਹਬ੍ਯਮਾਗਤਾ’’ਤਿ.

੭੯੫-੬. ਤਤ੍ਥ ਪੀਤਚਨ੍ਦਨਲਿਤ੍ਤਙ੍ਗੇਤਿ ਸੁਵਣ੍ਣਵਣ੍ਣੇਨ ਚਨ੍ਦਨੇਨ ਅਨੁਲਿਤ੍ਤਸਰੀਰੇ. ਪੀਤਪਾਸਾਦਸਯਨੇਤਿ ਸਬ੍ਬਸੋਵਣ੍ਣਮਯੇਨ ਪਾਸਾਦੇਨ ਸੁਵਣ੍ਣਪਰਿਕ੍ਖਿਤ੍ਤੇਹਿ ਸਯਨੇਹਿ ਚ ਸਮਨ੍ਨਾਗਤੇ. ਏਵਂ ਸਬ੍ਬਤ੍ਥ ਹੇਟ੍ਠਾ ਉਪਰਿ ਚ ਪੀਤਸਦ੍ਦੇਨ ਸੁਵਣ੍ਣਮੇਵ ਗਹਿਤਨ੍ਤਿ ਦਟ੍ਠਬ੍ਬਂ.

੭੯੮. ਲਤਤ੍ਥੀਤਿ ਲਤਾ ਅਤ੍ਥਿ. ਭਨ੍ਤੇਤਿ ਸਕ੍ਕਂ ਦੇਵਰਾਜਾਨਂ ਗਾਰਵੇਨ ਆਲਪਤਿ. ਅਨਭਿਚ੍ਛਿਤਾਤਿ ਨ ਅਭਿਕਙ੍ਖਿਤਾ.

੭੯੯. ਸਰੀਰਨ੍ਤਿ ਸਰੀਰਭੂਤਂ ਧਾਤੁਂ. ਅਵਯਵੇ ਚਾਯਂ ਸਮੁਦਾਯਵੋਹਾਰੋ ਯਥਾ ‘‘ਪਟੋ ਡਡ੍ਢੋ, ਸਮੁਦ੍ਦੋ ਦਿਟ੍ਠੋ’’ਤਿ ਚ. ਅਸ੍ਸਾਤਿ ਗੋਰੂਪਸ੍ਸ. ਮਗ੍ਗਨ੍ਤਿ ਆਗਮਨਮਗ੍ਗਂ. ਨ ਅਵੇਕ੍ਖਿਸ੍ਸਨ੍ਤਿ ਨ ਓਲੋਕਯਿਂ. ਕਸ੍ਮਾ? ਨ ਤਗ੍ਗਮਨਸਾ ਸਤੀਤਿ, ਤਸ੍ਸਂ ਗਾਵਿਯਂ ਗਤਮਨਾ ਠਪਿਤਮਨਾ ਨ ਹੋਨ੍ਤੀ, ਅਞ੍ਞਦਤ੍ਥੁ ਭਗਵਤੋ ਥੂਪਗਤਮਨਾ ਏਵ ਸਮਾਨਾਤਿ ਅਤ੍ਥੋ. ‘‘ਤਦਙ੍ਗਮਨਸਾ ਸਤੀ’’ਤਿ ਚ ਪਾਠੋ, ਤਦਙ੍ਗੇ ਤਸ੍ਸ ਭਗਵਤੋ ਧਾਤੁਯਾ ਅਙ੍ਗੇ ਮਨੋ ਏਤਿਸ੍ਸਾਤਿ ਤਦਙ੍ਗਮਨਸਾ. ਏਵਂਭੂਤਾ ਅਹਂ ਤਦਾ ਤਸ੍ਸਾ ਮਗ੍ਗਂ ਨਾਵੇਕ੍ਖਿਸ੍ਸਨ੍ਤਿ ਦਸ੍ਸੇਤਿ.

੮੦੦. ਥੂਪਂ ਅਪਤ੍ਤਮਾਨਸਨ੍ਤਿ ਥੂਪਂ ਚੇਤਿਯਂ ਅਸਮ੍ਪਤ੍ਤਅਜ੍ਝਾਸਯਂ, ਮਨਸਿ ਭਵੋਤਿ ਹਿ ਮਾਨਸੋ, ਅਜ੍ਝਾਸਯੋ ਮਨੋਰਥੋ. ‘‘ਥੂਪਂ ਉਪਗਨ੍ਤ੍ਵਾ ਪੁਪ੍ਫੇਹਿ ਪੂਜੇਸ੍ਸਾਮੀ’’ਤਿ ਉਪ੍ਪਨ੍ਨਮਨੋਰਥਸ੍ਸ ਅਸਮ੍ਪੁਣ੍ਣਤਾਯ ਏਵਂ ਵੁਤ੍ਤਂ. ਥੂਪਂ ਚੇਤਿਯਂ ਪਨ ਪੁਪ੍ਫੇਹਿ ਪੂਜਨਚਿਤ੍ਤਂ ਸਿਦ੍ਧਮੇਵ, ਯੇਨ ਸਾ ਦੇਵਲੋਕੇ ਉਪ੍ਪਨ੍ਨ. ਤਞ੍ਚਾਹਂ ਅਭਿਸਞ੍ਚੇਯ੍ਯਨ੍ਤਿ ਤਞ੍ਚੇ ਅਹਂ ਅਭਿਸਞ੍ਚਿਨੇਯ੍ਯਂ, ਪੁਪ੍ਫਪੂਜਨੇਨ ਹਿ ਪੁਞ੍ਞਂ ਅਹਂ ਥੂਪਂ ਅਭਿਗਨ੍ਤ੍ਵਾ ਯਥਾਧਿਪ੍ਪਾਯਂ ਪੂਜਨੇਨ ਸਮ੍ਮਦੇਵ ਚਿਨੇਯ੍ਯਂ ਉਪਚਿਨੇਯ੍ਯਨ੍ਤਿ ਅਤ੍ਥੋ. ਭਿਯ੍ਯੋ ਨੂਨ ਇਤੋ ਸਿਯਾਤਿ ਇਤੋ ਯਥਾਲਦ੍ਧਸਮ੍ਪਤ੍ਤਿਤੋਪਿ ਭਿਯ੍ਯੋ ਉਪਰਿ ਉਤ੍ਤਰਿਤਰਾ ਸਮ੍ਪਤ੍ਤਿ ਸਿਯਾਤਿ ਮਞ੍ਞੇਤਿ ਅਤ੍ਥੋ.

੮੦੧. ਮਘਵਾ ਦੇਵਕੁਞ੍ਜਰਾਤਿ ਆਲਪਨਂ. ਤਤ੍ਥ ਦੇਵਕੁਞ੍ਜਰਾਤਿ ਸਬ੍ਬਬਲਪਰਕ੍ਕਮਾਦਿਵਿਸੇਸੇਹਿ ਦੇਵੇਸੁ ਕੁਞ੍ਜਰਸਦਿਸੋ. ਸਹਬ੍ਯਨ੍ਤਿ ਸਹਭਾਵਂ.

੮੦੨. ‘‘ਇਦਂ ਸੁਤ੍ਵਾ ਤਿਦਸਾਧਿਪਤਿ, ਮਘਵਾ ਦੇਵਕੁਞ੍ਜਰੋ;

ਤਾਵਤਿਂਸੇ ਪਸਾਦੇਨ੍ਤੋ, ਮਾਤਲਿਂ ਏਤਦਬ੍ਰਵੀ’’ਤਿ. –

ਇਦਂ ਧਮ੍ਮਸਙ੍ਗਾਹਕਵਚਨਂ. ਤਤੋ ਸਕ੍ਕੋ ਮਾਤਲਿਪਮੁਖਸ੍ਸ ਦੇਵਗਣਸ੍ਸ ਇਮਾਹਿ ਗਾਥਾਹਿ ਧਮ੍ਮਂ ਦੇਸੇਸਿ –

੮੦੩. ‘‘ਪਸ੍ਸ ਮਾਤਲਿ ਅਚ੍ਛੇਰਂ, ਚਿਤ੍ਤਂ ਕਮ੍ਮਫਲਂ ਇਦਂ;

ਅਪ੍ਪਕਮ੍ਪਿ ਕਤਂ ਦੇਯ੍ਯਂ, ਪੁਞ੍ਞਂ ਹੋਤਿ ਮਹਪ੍ਫਲਂ.

੮੦੪. ‘‘ਨਤ੍ਥਿ ਚਿਤ੍ਤੇ ਪਸਨ੍ਨਮ੍ਹਿ, ਅਪ੍ਪਕਾ ਨਾਮ ਦਕ੍ਖਿਣਾ;

ਤਥਾਗਤੇ ਵਾ ਸਮ੍ਬੁਦ੍ਧੇ, ਅਥ ਵਾ ਤਸ੍ਸ ਸਾਵਕੇ.

੮੦੫. ‘‘ਏਹਿ ਮਾਤਲਿ ਅਮ੍ਹੇਪਿ, ਭਿਯ੍ਯੋ ਭਿਯ੍ਯੋ ਮਹੇਮਸੇ;

ਤਥਾਗਤਸ੍ਸ ਧਾਤੁਯੋ, ਸੁਖੋ ਪੁਞ੍ਞਾਨਮੁਚ੍ਚਯੋ.

੮੦੬. ‘‘ਤਿਟ੍ਠਨ੍ਤੇ ਨਿਬ੍ਬੁਤੇ ਚਾਪਿ, ਸਮੇ ਚਿਤ੍ਤੇ ਸਮਂ ਫਲਂ;

ਚੇਤੋਪਣਿਧਿਹੇਤੁਹਿ, ਸਤ੍ਤਾ ਗਚ੍ਛਨ੍ਤਿ ਸੁਗ੍ਗਤਿਂ.

੮੦੭. ‘‘ਬਹੂਨਂ ਵਤ ਅਤ੍ਥਾਯ, ਉਪ੍ਪਜ੍ਜਨ੍ਤਿ ਤਥਾਗਤਾ;

ਯਤ੍ਥ ਕਾਰਂ ਕਰਿਤ੍ਵਾਨ, ਸਗ੍ਗਂ ਗਚ੍ਛਨ੍ਤਿ ਦਾਯਕਾ’’ਤਿ.

੮੦੨. ਤਤ੍ਥ ਪਸਾਦੇਨ੍ਤੋਤਿ ਪਸਨ੍ਨੇ ਕਰੋਨ੍ਤੋ, ਰਤਨਤ੍ਤਯੇ ਸਦ੍ਧਂ ਉਪ੍ਪਾਦੇਨ੍ਤੋਤਿ ਅਤ੍ਥੋ.

੮੦੩. ਚਿਤ੍ਤਨ੍ਤਿ ਵਿਚਿਤ੍ਤਂ ਅਚਿਨ੍ਤੇਯ੍ਯਂ. ਕਮ੍ਮਫਲਨ੍ਤਿ ਦੇਯ੍ਯਧਮ੍ਮਸ੍ਸ ਅਨੁਲ਼ਾਰਤ੍ਤੇਪਿ ਖੇਤ੍ਤਸਮ੍ਪਤ੍ਤਿਯਾ ਚ ਚਿਤ੍ਤਸਮ੍ਪਤ੍ਤਿਯਾ ਚ ਉਲ਼ਾਰਸ੍ਸ ਪੁਞ੍ਞਕਮ੍ਮਸ੍ਸ ਫਲਂ ਪਸ੍ਸਾਤਿ ਯੋਜਨਾ. ਅਪ੍ਪਕਮ੍ਪਿ ਕਤਂ ਦੇਯ੍ਯਂ, ਪੁਞ੍ਞਂ ਹੋਤਿ ਮਹਪ੍ਫਲਨ੍ਤਿ ਏਤ੍ਥ ਕਤਨ੍ਤਿ ਕਾਰਵਸੇਨ ਸਕ੍ਕਾਰਵਸੇਨ ਆਯਤਨੇ ਵਿਨਿਯੁਤ੍ਤਂ. ਦੇਯ੍ਯਨ੍ਤਿ ਦਾਤਬ੍ਬਵਤ੍ਥੁਂ. ਪੁਞ੍ਞਨ੍ਤਿ ਤਥਾਪਵਤ੍ਤਂ ਪੁਞ੍ਞਕਮ੍ਮਂ.

੮੦੪. ਇਦਾਨਿ ਯਤ੍ਥ ਅਪ੍ਪਕਮ੍ਪਿ ਕਤਂ ਪੁਞ੍ਞਂ ਮਹਪ੍ਫਲਂ ਹੋਤਿ, ਤਂ ਪਾਕਟਂ ਕਤ੍ਵਾ ਦਸ੍ਸੇਨ੍ਤੋ ‘‘ਨਤ੍ਥਿ ਚਿਤ੍ਤੇ ਪਸਨ੍ਨਮ੍ਹੀ’’ਤਿ ਗਾਥਮਾਹ. ਤਂ ਸੁਵਿਞ੍ਞੇਯ੍ਯਮੇਵ.

੮੦੫-੬. ਅਮ੍ਹੇਪੀਤਿ ਮਯਮ੍ਪਿ. ਮਹੇਮਸੇਤਿ ਮਹਾਮਸੇ ਪੂਜਾਮਸੇ. ਚੇਤੋਪਣਿਧਿਹੇਤੁ ਹੀਤਿ ਅਤ੍ਤਨੋ ਚਿਤ੍ਤਸ੍ਸ ਸਮ੍ਮਦੇਵ ਠਪਨਨਿਮਿਤ੍ਤਂ, ਅਤ੍ਤਸਮ੍ਮਾਪਣਿਧਾਨੇਨਾਤਿ ਅਤ੍ਥੋ. ਤੇਨਾਹ ਭਗਵਾ –

‘‘ਨ ਤਂ ਮਾਤਾਪਿਤਾ ਕਯਿਰਾ, ਅਞ੍ਞੇ ਵਾਪਿ ਚ ਞਾਤਕਾ;

ਸਮ੍ਮਾ ਪਣਿਹਿਤਂ ਚਿਤ੍ਤਂ, ਸੇਯ੍ਯਸੋ ਨਂ ਤਤੋ ਕਰੇ’’ਤਿ. (ਧ. ਪ. ੪੩);

ਏਵਞ੍ਚ ਪਨ ਵਤ੍ਵਾ ਸਕ੍ਕੋ ਦੇਵਾਨਮਿਨ੍ਦੋ ਉਯ੍ਯਾਨਕੀਲ਼ਾਯ ਉਸ੍ਸਾਹਂ ਪਟਿਪ੍ਪਸ੍ਸਮ੍ਭੇਤ੍ਵਾ ਤਤੋਵ ਪਟਿਨਿਵਤ੍ਤਿਤ੍ਵਾ ਅਤ੍ਤਨਾ ਅਭਿਣ੍ਹਂ ਪੂਜਨੇਯ੍ਯਟ੍ਠਾਨਭੂਤੇ ਚੂਲ਼ਾਮਣਿਚੇਤਿਯੇ ਸਤ੍ਤਾਹਂ ਪੂਜਂ ਅਕਾਸਿ. ਅਥ ਅਪਰੇਨ ਸਮਯੇਨ ਦੇਵਚਾਰਿਕਂ ਗਤਸ੍ਸ ਆਯਸ੍ਮਤੋ ਨਾਰਦਤ੍ਥੇਰਸ੍ਸ ਤਂ ਪਵਤ੍ਤਿਂ ਗਾਥਾਹੇਵ ਕਥੇਸਿ, ਥੇਰੋ ਧਮ੍ਮਸਙ੍ਗਾਹਕਾਨਂ ਆਰੋਚੇਸਿ, ਤੇ ਤਥਾ ਨਂ ਸਙ੍ਗਹਂ ਆਰੋਪੇਸੁਨ੍ਤਿ.

ਪੀਤਵਿਮਾਨਵਣ੍ਣਨਾ ਨਿਟ੍ਠਿਤਾ.