੭. ਚਤੁਰਿਤ੍ਥਿਵਿਮਾਨਵਣ੍ਣਨਾ

ਅਭਿਕ੍ਕਨ੍ਤੇਨ ਵਣ੍ਣੇਨਾਤਿ ਚਤੁਰਿਤ੍ਥਿਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਤਿ ਸਾਵਤ੍ਥਿਯਂ ਵਿਹਰਨ੍ਤੇ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਹੇਟ੍ਠਾ ਵੁਤ੍ਤਨਯੇਨ ਦੇਵਚਾਰਿਕਂ ਚਰਨ੍ਤੋ ਤਾਵਤਿਂਸਭਵਨਂ ਗਤੋ. ਸੋ ਤਤ੍ਥ ਪਟਿਪਾਟਿਯਾ ਠਿਤੇਸੁ ਚਤੂਸੁ ਵਿਮਾਨੇਸੁ ਚਤਸ੍ਸੋ ਦੇਵਧੀਤਰੋ ਪਚ੍ਚੇਕਂ ਅਚ੍ਛਰਾਸਹਸ੍ਸਪਰਿਵਾਰਾ ਦਿਬ੍ਬਸਮ੍ਪਤ੍ਤਿਂ ਅਨੁਭਵਨ੍ਤਿਯੋ ਦਿਸ੍ਵਾ ਤਾਹਿ ਪੁਬ੍ਬੇ ਕਤਕਮ੍ਮਂ ਪੁਚ੍ਛਨ੍ਤੋ –

੭੫੫. ‘‘ਅਭਿਕ੍ਕਨ੍ਤੇਨ ਵਣ੍ਣੇਨ…ਪੇ…ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ. –

ਇਮਾਹਿ ਗਾਥਾਹਿ ਪਟਿਪਾਟਿਯਾ ਪੁਚ੍ਛਿ. ਤਾਪਿ ਤਸ੍ਸ ਪੁਚ੍ਛਾਨਨ੍ਤਰਂ ਪਟਿਪਾਟਿਯਾ ਬ੍ਯਾਕਰਿਂਸੁ. ਤਂ ਦਸ੍ਸੇਤੁਂ –

੭੫੮. ‘‘ਸਾ ਦੇਵਤਾ ਅਤ੍ਤਮਨਾ…ਪੇ…ਯਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ. –

ਅਯਂ ਗਾਥਾ ਵੁਤ੍ਤਾ.

ਤਾ ਕਿਰ ਕਸ੍ਸਪਸ੍ਸ ਭਗਵਤੋ ਕਾਲੇ ਏਸਿਕਾਨਾਮਕੇ ਰਟ੍ਠੇ ਪਣ੍ਣਕਤੇ ਨਾਮ ਨਗਰੇ ਕੁਲਗੇਹੇ ਨਿਬ੍ਬਤ੍ਤਾ ਵਯਪ੍ਪਤ੍ਤਾ ਤਸ੍ਮਿਂਯੇਵ ਨਗਰੇ ਪਤਿਕੁਲਂ ਗਤਾ ਸਮਗ੍ਗਵਾਸਂ ਵਸਨ੍ਤਿ. ਤਾਸੁ ਏਕਾ ਅਞ੍ਞਤਰਂ ਪਿਣ੍ਡਚਾਰਿਕਂ ਭਿਕ੍ਖੁਂ ਦਿਸ੍ਵਾ ਪਸਨ੍ਨਚਿਤ੍ਤਾ ਇਨ੍ਦੀਵਰਕਲਾਪਂ ਅਦਾਸਿ, ਅਪਰਾ ਅਞ੍ਞਸ੍ਸ ਨੀਲੁਪ੍ਪਲਹਤ੍ਥਕਂ ਅਦਾਸਿ, ਅਪਰਾ ਪਦੁਮਹਤ੍ਥਕਂ ਅਦਾਸਿ, ਅਪਰਾ ਸੁਮਨਮਕੁਲ਼ਾਨਿ ਅਦਾਸਿ. ਤਾ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਨਿਬ੍ਬਤ੍ਤਿਂਸੁ, ਤਾਸਂ ਅਚ੍ਛਰਾਸਹਸ੍ਸਂ ਪਰਿਵਾਰੋ ਅਹੋਸਿ. ਤਾ ਤਤ੍ਥ ਯਾਵਤਾਯੁਕਂ ਦਿਬ੍ਬਸਮ੍ਪਤ੍ਤਿਂ ਅਨੁਭਵਿਤ੍ਵਾ ਤਤੋ ਚੁਤਾ ਤਸ੍ਸੇਵ ਕਮ੍ਮਸ੍ਸ ਵਿਪਾਕਾਵਸੇਸੇਨ ਅਪਰਾਪਰਂ ਤਤ੍ਥੇਵ ਸਂਸਰਨ੍ਤਿਯੋ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਤਤ੍ਥੇਵ ਉਪ੍ਪਨ੍ਨਾ ਵੁਤ੍ਤਨਯੇਨ ਆਯਸ੍ਮਤਾ ਮਹਾਮੋਗ੍ਗਲ੍ਲਾਨੇਨ ਪੁਚ੍ਛਿਤਾ. ਤਾਸੁ ਏਕਾ ਅਤ੍ਤਨਾ ਕਤਂ ਪੁਬ੍ਬਕਮ੍ਮਂ ਥੇਰਸ੍ਸ ਕਥੇਨ੍ਤੀ –

੭੫੯. ‘‘ਇਨ੍ਦੀਵਰਾਨਂ ਹਤ੍ਥਕਂ ਅਹਮਦਾਸਿਂ, ਭਿਕ੍ਖੁਨੋ ਪਿਣ੍ਡਾਯ ਚਰਨ੍ਤਸ੍ਸ;

ਏਸਿਕਾਨਂ ਉਣ੍ਣਤਸ੍ਮਿਂ, ਨਗਰਵਰੇ ਪਣ੍ਣਕਤੇ ਰਮ੍ਮੇ.

੭੬੦. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ…ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ. –

ਆਹ. ਅਪਰਾ –

੭੬੬. ‘‘ਨੀਲੁਪ੍ਪਲਹਤ੍ਥਕਂ ਅਹਮਦਾਸਿਂ, ਭਿਕ੍ਖੁਨੋ ਪਿਣ੍ਡਾਯ ਚਰਨ੍ਤਸ੍ਸ;

ਏਸਿਕਾਨਂ ਉਣ੍ਣਤਸ੍ਮਿਂ, ਨਗਰਵਰੇ ਪਣ੍ਣਕਤੇ ਰਮ੍ਮੇ.

੭੬੭. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ…ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ. –

ਆਹ. ਅਪਰਾ –

੭੭੩. ‘‘ਓਦਾਤਮੂਲਕਂ ਹਰਿਤਪਤ੍ਤਂ, ਉਦਕਸ੍ਮਿਂ ਸਰੇ ਜਾਤਂ ਅਹਮਦਾਸਿਂ;

ਭਿਕ੍ਖੁਨੋ ਪਿਣ੍ਡਾਯ ਚਰਨ੍ਤਸ੍ਸ, ਏਸਿਕਾਨਂ ਉਣ੍ਣਤਸ੍ਮਿਂ;

ਨਗਰਵਰੇ ਪਣ੍ਣਕਤੇ ਰਮ੍ਮੇ.

੭੭੪. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ…ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ. –

ਆਹ. ਅਪਰਾ –

੭੮੦. ‘‘ਅਹਂ ਸੁਮਨਾ ਸੁਮਨਸ੍ਸ ਸੁਮਨਮਕੁਲ਼ਾਨਿ, ਦਨ੍ਤਵਣ੍ਣਾਨਿ ਅਹਮਦਾਸਿਂ;

ਭਿਕ੍ਖੁਨੋ ਪਿਣ੍ਡਾਯ ਚਰਨ੍ਤਸ੍ਸ, ਏਸਿਕਾਨਂ ਉਣ੍ਣਤਸ੍ਮਿਂ;

ਨਗਰਵਰੇ ਪਣ੍ਣਕਤੇ ਰਮ੍ਮੇ.

੭੮੧. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ…ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ. –

ਆਹ.

੭੫੯. ਤਤ੍ਥ ਇਨ੍ਦੀਵਰਾਨਂ ਹਤ੍ਥਕਨ੍ਤਿ ਉਦ੍ਦਾਲਕਪੁਪ੍ਫਹਤ੍ਥਂ ਵਾਤਘਾਤਕਪੁਪ੍ਫਕਲਾਪਂ. ਏਸਿਕਾਨਨ੍ਤਿ ਏਸਿਕਾਰਟ੍ਠਸ੍ਸ. ਉਣ੍ਣਤਸ੍ਮਿਂ ਨਗਰਵਰੇਤਿ ਉਣ੍ਣਤੇ ਭੂਮਿਪਦੇਸੇ ਨਿਵਿਟ੍ਠੇ ਮੇਘੋਦਰਂ ਲਿਹਨ੍ਤੇਹਿ ਵਿਯ ਅਚ੍ਚੁਗ੍ਗਤੇਹਿ ਪਾਸਾਦਕੂਟਾਗਾਰਾਦੀਹਿ ਉਣ੍ਣਤੇ ਉਤ੍ਤਮਨਗਰੇ. ਪਣ੍ਣਕਤੇਤਿ ਏਵਂਨਾਮਕੇ ਨਗਰੇ.

੭੬੬. ਨੀਲੁਪ੍ਪਲਹਤ੍ਥਕਨ੍ਤਿ ਕੁਵਲਯਕਲਾਪਂ.

੭੭੩. ਓਦਾਤਮੂਲਕਨ੍ਤਿ ਸੇਤਮੂਲਂ, ਭਿਸਮੂਲਾਨਂ ਧਵਲਤਾਯ ਵੁਤ੍ਤਂ, ਪਦੁਮਕਲਾਪਂ ਸਨ੍ਧਾਯ ਵਦਤਿ. ਤੇਨਾਹ ‘‘ਹਰਿਤਪਤ੍ਤ’’ਨ੍ਤਿਆਦਿ. ਤਤ੍ਥ ਹਰਿਤਪਤ੍ਤਨ੍ਤਿ ਨੀਲਪਤ੍ਤਂ. ਅਵਿਜਹਿਤਮਕੁਲ਼ਪਤ੍ਤਸ੍ਸ ਹਿ ਪਦੁਮਸ੍ਸ ਬਾਹਿਰਪਤ੍ਤਾਨਿ ਹਰਿਤਵਣ੍ਣਾਨਿ ਏਵ ਹੋਨ੍ਤਿ. ਉਦਕਸ੍ਮਿਂ ਸਰੇ ਜਾਤਨ੍ਤਿ ਸਰੇ ਉਦਕਮ੍ਹਿ ਜਾਤਂ, ਸਰੋਰੁਹਨ੍ਤਿ ਅਤ੍ਥੋ.

੭੮੦. ਸੁਮਨਾਤਿ ਏਵਂਨਾਮਾ. ਸੁਮਨਸ੍ਸਾਤਿ ਸੁਨ੍ਦਰਚਿਤ੍ਤਸ੍ਸ. ਸੁਮਨਮਕੁਲ਼ਾਨੀਤਿ ਜਾਤਿਸੁਮਨਪੁਪ੍ਫਮਕੁਲ਼ਾਨਿ. ਦਨ੍ਤਵਣ੍ਣਾਨੀਤਿ ਸਜ੍ਜੁਕਂ ਉਲ੍ਲਿਖਿਤਹਤ੍ਥਿਦਨ੍ਤਸਦਿਸਵਣ੍ਣਾਨਿ.

ਏਵਂ ਤਾਹਿ ਅਤ੍ਤਨਾ ਕਤਕਮ੍ਮੇ ਕਥਿਤੇ ਥੇਰੋ ਤਾਸਂ ਅਨੁਪੁਬ੍ਬਿਂ ਕਥਂ ਕਥੇਤ੍ਵਾ ਸਚ੍ਚਾਨਿ ਪਕਾਸੇਸਿ. ਸਚ੍ਚਪਰਿਯੋਸਾਨੇ ਸਾ ਸਬ੍ਬਾਪਿ ਸਹਪਰਿਵਾਰਾ ਸੋਤਾਪਨ੍ਨਾ ਅਹੇਸੁਂ. ਥੇਰੋ ਤਂ ਪਵਤ੍ਤਿਂ ਮਨੁਸ੍ਸਲੋਕਂ ਆਗਨ੍ਤ੍ਵਾ ਭਗਵਤੋ ਆਰੋਚੇਸਿ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ. ਸਾ ਧਮ੍ਮਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਜਾਤਾਤਿ.

ਚਤੁਰਿਤ੍ਥਿਵਿਮਾਨਵਣ੍ਣਨਾ ਨਿਟ੍ਠਿਤਾ.