੬. ਵਿਹਾਰਵਿਮਾਨਵਣ੍ਣਨਾ

ਅਭਿਕ੍ਕਨ੍ਤੇਨ ਵਣ੍ਣੇਨਾਤਿ ਵਿਹਾਰਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ. ਤੇਨ ਸਮਯੇਨ ਵਿਸਾਖਾ ਮਹਾਉਪਾਸਿਕਾ ਅਞ੍ਞਤਰਸ੍ਮਿਂ ਉਸ੍ਸਵਦਿਵਸੇ ਉਯ੍ਯਾਨੇ ਵਿਚਰਣਤ੍ਥਂ ਸਹਾਯਿਕਾਹਿ ਪਰਿਜਨੇਨ ਚ ਉਸ੍ਸਾਹਿਤਾ ਸੁਨ੍ਹਾਤਾਨੁਲਿਤ੍ਤਾ ਸੁਭੋਜਨਂ ਭੁਞ੍ਜਿਤ੍ਵਾ ਮਹਾਲਤਾਪਸਾਧਨਂ ਪਿਲ਼ਨ੍ਧਿਤ੍ਵਾ ਪਞ੍ਚਮਤ੍ਤੇਹਿ ਸਹਾਯਿਕਾਸਤੇਹਿ ਪਰਿਵਾਰਿਤਾ ਮਹਨ੍ਤੇਨ ਇਸ੍ਸਰਿਯੇਨ ਮਹਤਾ ਪਰਿਚ੍ਛੇਦੇਨ ਗੇਹਤੋ ਨਿਕ੍ਖਮ੍ਮ ਉਯ੍ਯਾਨਂ ਉਦ੍ਦਿਸ੍ਸ ਗਚ੍ਛਨ੍ਤੀ ਚਿਨ੍ਤੇਸਿ ‘‘ਬਾਲਦਾਰਿਕਾਯ ਵਿਯ ਕਿਂ ਮੇ ਮੋਘਕੀਲ਼ਿਤੇਨ, ਹਨ੍ਦਾਹਂ ਵਿਹਾਰਂ ਗਨ੍ਤ੍ਵਾ ਭਗਵਨ੍ਤਂ ਮਨੋਭਾਵਨੀਯੇ ਚ ਅਯ੍ਯੇ ਵਨ੍ਦਿਸ੍ਸਾਮਿ, ਧਮ੍ਮਞ੍ਚ ਸੋਸ੍ਸਾਮੀ’’ਤਿ ਵਿਹਾਰਂ ਗਨ੍ਤ੍ਵਾ ਏਕਮਨ੍ਤੇ ਠਤ੍ਵਾ ਮਹਾਲਤਾਪਿਲ਼ਨ੍ਧਨਂ ਓਮੁਞ੍ਚਿਤ੍ਵਾ ਤਂ ਦਾਸਿਯਾ ਹਤ੍ਥੇ ਦਤ੍ਵਾ ਭਗਵਨ੍ਤਂ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ. ਤਸ੍ਸਾ ਭਗਵਾ ਧਮ੍ਮਂ ਦੇਸੇਸਿ.

ਸਾ ਧਮ੍ਮਂ ਸੁਤ੍ਵਾ ਭਗਵਨ੍ਤਂ ਵਨ੍ਦਿਤ੍ਵਾ ਪਦਕ੍ਖਿਣਂ ਕਤ੍ਵਾ ਮਨੋਭਾਵਨੀਯੇ ਚ ਭਿਕ੍ਖੂ ਵਨ੍ਦਿਤ੍ਵਾ ਵਿਹਾਰਤੋ ਨਿਕ੍ਖਮਿਤ੍ਵਾ ਥੋਕਂ ਗਨ੍ਤ੍ਵਾ ਦਾਸਿਂ ਆਹ ‘‘ਹਨ੍ਦ ਜੇ ਆਭਰਣਂ ਪਿਲ਼ਨ੍ਧਿਸ੍ਸਾਮੀ’’ਤਿ. ਸਾ ਤਂ ਭਣ੍ਡਿਕਂ ਕਤ੍ਵਾ ਬਨ੍ਧਿਤ੍ਵਾ ਵਿਹਾਰੇ ਠਪੇਤ੍ਵਾ ਤਹਂ ਤਹਂ ਵਿਚਰਿਤ੍ਵਾ ਗਮਨਕਾਲੇ ਵਿਸ੍ਸਰਿਤ੍ਵਾ ਗਤਤ੍ਤਾ ‘‘ਵਿਸ੍ਸਰਿਤਂ ਮਯਾ, ਤਿਟ੍ਠ ਅਯ੍ਯੇ ਆਹਰਿਸ੍ਸਾਮੀ’’ਤਿ ਨਿਵਤ੍ਤਿਤੁਕਾਮਾ ਅਹੋਸਿ. ਵਿਸਾਖਾ ‘‘ਸਚੇ ਜੇ ਵਿਹਾਰੇ ਠਪੇਤ੍ਵਾ ਵਿਸ੍ਸਰਿਤਂ, ਤਸ੍ਸ ਵਿਹਾਰਸ੍ਸੇਵ ਅਤ੍ਥਾਯ ਤਂ ਪਰਿਚ੍ਚਜਿਸ੍ਸਾਮੀ’’ਤਿ ਵਿਹਾਰਂ ਗਨ੍ਤ੍ਵਾ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਅਤ੍ਤਨੋ ਅਧਿਪ੍ਪਾਯਂ ਪਵੇਦੇਨ੍ਤੀ ‘‘ਵਿਹਾਰਂ, ਭਨ੍ਤੇ, ਕਾਰੇਸ੍ਸਾਮਿ, ਅਧਿਵਾਸੇਤੁ ਮੇ ਭਗਵਾ ਅਨੁਕਮ੍ਪਂ ਉਪਾਦਾਯਾ’’ਤਿ ਆਹ. ਅਧਿਵਾਸੇਸਿ ਭਗਵਾ ਤੁਣ੍ਹੀਭਾਵੇਨ.

ਸਾ ਤਂ ਪਿਲ਼ਨ੍ਧਨਂ ਸਤਸਹਸ੍ਸਾਧਿਕਨਵਕੋਟਿਅਗ੍ਘਨਕਂ ਵਿਸ੍ਸਜ੍ਜੇਤ੍ਵਾ ਆਯਸ੍ਮਤਾ ਮਹਾਮੋਗ੍ਗਲ੍ਲਾਨੇਨ ਨਵਕਮ੍ਮਾਧਿਟ੍ਠਾਯਕੇਨ ਸੁਵਿਭਤ੍ਤਭਿਤ੍ਤਿਥਮ੍ਭਤੁਲਾਗੋਪਾਨਸਿਕਣ੍ਣਿਕਦ੍ਵਾਰਬਾਹਵਾਤਪਾਨ ਸੋਪਾਨਾਦਿਗੇਹਾਵਯਵਂ ਮਨੋਹਰਂ ਸੁਵਿਕਪ੍ਪਿਤਕਟ੍ਠਕਮ੍ਮਰਮਣੀਯਂ ਸੁਪਰਿਕਮ੍ਮਕਤਸੁਧਾਕਮ੍ਮਂ ਮਨੁਞ੍ਞਂ ਸੁਵਿਰਚਿਤਮਾਲਾਕਮ੍ਮਲਤਾਕਮ੍ਮਾਦਿਚਿਤ੍ਤਕਮ੍ਮਵਿਚਿਤ੍ਤਂ ਸੁਪਰਿਨਿਟ੍ਠਿਤਮਣਿਕੁਟ੍ਟਿਮ ਸਦਿਸਭੂਮਿਤਲਂ ਦੇਵਵਿਮਾਨਸਦਿਸਂ ਹੇਟ੍ਠਾਭੂਮਿਯਂ ਪਞ੍ਚ ਗਬ੍ਭਸਤਾਨਿ, ਉਪਰਿਭੂਮਿਯਂ ਪਞ੍ਚ ਗਬ੍ਭਸਤਾਨੀਤਿ ਗਬ੍ਭਸਹਸ੍ਸਪਟਿਮਣ੍ਡਿਤਂ ਬੁਦ੍ਧਸ੍ਸ ਭਗਵਤੋ ਭਿਕ੍ਖੁਸਙ੍ਘਸ੍ਸ ਚ ਵਸਨਾਨੁਚ੍ਛਵਿਕਂ ਮਹਨ੍ਤਂ ਪਾਸਾਦਂ ਤਸ੍ਸ ਪਰਿਵਾਰਪਾਸਾਦਸਹਸ੍ਸਞ੍ਚ ਤੇਸਂ ਪਰਿਵਾਰਭਾਵੇਨ ਕੁਟਿਮਣ੍ਡਪਚਙ੍ਕਮਨਾਦੀਨਿ ਚ ਕਾਰੇਨ੍ਤੀ ਨਵਹਿ ਮਾਸੇਹਿ ਵਿਹਾਰਂ ਨਿਟ੍ਠਾਪੇਸਿ. ਪਰਿਨਿਟ੍ਠਿਤੇ ਚ ਵਿਹਾਰੇ ਨਵਹੇਵ ਹਿਰਞ੍ਞਕੋਟੀਹਿ ਵਿਹਾਰਮਹਂ ਕਾਰੇਨ੍ਤੀ ਪਞ੍ਚਮਤ੍ਤੇਹਿ ਸਹਾਯਿਕਾਸਤੇਹਿ ਸਦ੍ਧਿਂ ਪਾਸਾਦਂ ਅਭਿਰੁਹਿਤ੍ਵਾ ਤਸ੍ਸ ਸਮ੍ਪਤ੍ਤਿਂ ਦਿਸ੍ਵਾ ਸੋਮਨਸ੍ਸਜਾਤਾ ਸਹਾਯਿਕਾ ਆਹ ‘‘ਇਮਂ ਏਵਰੂਪਂ ਪਾਸਾਦਂ ਕਾਰੇਨ੍ਤਿਯਾ ਯਂ ਮਯਾ ਪੁਞ੍ਞਂ ਪਸੁਤਂ, ਤਂ ਅਨੁਮੋਦਥ, ਪਤ੍ਤਿਦਾਨਂ ਵੋ ਦਮ੍ਮੀ’’ਤਿ. ‘‘ਅਹੋ ਸਾਧੁ ਅਹੋ ਸਾਧੂ’’ਤਿ ਪਸਨ੍ਨਚਿਤ੍ਤਾ ਸਬ੍ਬਾਪਿ ਅਨੁਮੋਦਿਂਸੁ.

ਤਤ੍ਥ ਅਞ੍ਞਤਰਾ ਉਪਾਸਿਕਾ ਵਿਸੇਸਤੋ ਤਂ ਪਤ੍ਤਿਦਾਨਂ ਮਨਸਾਕਾਸਿ. ਸਾ ਨ ਚਿਰਸ੍ਸੇਵ ਕਾਲਂ ਕਤ੍ਵਾ ਤਾਵਤਿਂਸੇਸੁ ਨਿਬ੍ਬਤ੍ਤਿ. ਤਸ੍ਸਾ ਪੁਞ੍ਞਾਨੁਭਾਵੇਨ ਅਨੇਕਕੂਟਾਗਾਰਪਾਕਾਰਉਯ੍ਯਾਨਪੋਕ੍ਖਰਣਿਆਦਿਪਟਿਮਣ੍ਡਿਤਂ ਸੋਲ਼ਸਯੋਜਨਾਯਾਮਵਿਤ੍ਥਾਰਬ੍ਬੇਧਂ ਅਤ੍ਤਨੋ ਪਭਾਯ ਯੋਜਨਸਤਂ ਫਰਨ੍ਤਂ ਆਕਾਸਚਾਰਿਂ ਮਹਨ੍ਤਂ ਵਿਮਾਨਂ ਪਾਤੁਰਹੋਸਿ. ਸਾ ਗਚ੍ਛਨ੍ਤੀਪਿ ਅਚ੍ਛਰਾਸਹਸ੍ਸਪਰਿਵਾਰਾ ਸਹ ਵਿਮਾਨੇਨ ਗਚ੍ਛਤਿ. ਵਿਸਾਖਾ ਪਨ ਮਹਾਉਪਾਸਿਕਾ ਵਿਪੁਲਪਰਿਚ੍ਚਾਗਤਾਯ ਸਦ੍ਧਾਸਮ੍ਪਤ੍ਤਿਯਾ ਚ ਨਿਮ੍ਮਾਨਰਤੀਸੁ ਨਿਬ੍ਬਤ੍ਤਿਤ੍ਵਾ ਸੁਨਿਮ੍ਮਿਤਦੇਵਰਾਜਸ੍ਸ ਅਗ੍ਗਮਹੇਸਿਭਾਵਂ ਸਮ੍ਪਾਪੁਣਿ. ਅਥਾਯਸ੍ਮਾ ਅਨੁਰੁਦ੍ਧੋ ਦੇਵਚਾਰਿਕਂ ਚਰਨ੍ਤੋ ਤਂ ਵਿਸਾਖਾਯ ਸਹਾਯਿਕਂ ਤਾਵਤਿਂਸਭਵਨੇ ਉਪ੍ਪਨ੍ਨਂ ਦਿਸ੍ਵਾ –

੭੨੯. ‘‘ਅਭਿਕ੍ਕਨ੍ਤੇਨ ਵਣ੍ਣੇਨ, ਯਾ ਤ੍ਵਂ ਤਿਟ੍ਠਸਿ ਦੇਵਤੇ;

ਓਭਾਸੇਨ੍ਤੀ ਦਿਸਾ ਸਬ੍ਬਾ, ਓਸਧੀ ਵਿਯ ਤਾਰਕਾ.

੭੩੦. ‘‘ਤਸ੍ਸਾ ਤੇ ਨਚ੍ਚਮਾਨਾਯ, ਅਙ੍ਗਮਙ੍ਗੇਹਿ ਸਬ੍ਬਸੋ;

ਦਿਬ੍ਬਾ ਸਦ੍ਦਾ ਨਿਚ੍ਛਰਨ੍ਤਿ, ਸਵਨੀਯਾ ਮਨੋਰਮਾ.

੭੩੧. ‘‘ਤਸ੍ਸਾ ਤੇ ਨਚ੍ਚਮਾਨਾਯ, ਅਙ੍ਗਮਙ੍ਗੇਹਿ ਸਬ੍ਬਸੋ;

ਦਿਬ੍ਬਾ ਗਨ੍ਧਾ ਪਵਾਯਨ੍ਤਿ, ਸੁਚਿਗਨ੍ਧਾ ਮਨੋਰਮਾ.

੭੩੨. ‘‘ਵਿਵਤ੍ਤਮਾਨਾ ਕਾਯੇਨ, ਯਾ ਵੇਣੀਸੁ ਪਿਲ਼ਨ੍ਧਨਾ;

ਤੇਸਂ ਸੁਯ੍ਯਤਿ ਨਿਗ੍ਘੋਸੋ, ਤੂਰਿਯੇ ਪਞ੍ਚਙ੍ਗਿਕੇ ਯਥਾ.

੭੩੩. ‘‘ਵਟਂਸਕਾ ਵਾਤਧੁਤਾ, ਵਾਤੇਨ ਸਮ੍ਪਕਮ੍ਪਿਤਾ;

ਤੇਸਂ ਸੁਯ੍ਯਤਿ ਨਿਗ੍ਘੋਸੋ, ਤੂਰਿਯੇ ਪਞ੍ਚਙ੍ਗਿਕੇ ਯਥਾ.

੭੩੪. ‘‘ਯਾਪਿ ਤੇ ਸਿਰਸ੍ਮਿਂ ਮਾਲਾ, ਸੁਚਿਗਨ੍ਧਾ ਮਨੋਰਮਾ;

ਵਾਤਿ ਗਨ੍ਧੋ ਦਿਸਾ ਸਬ੍ਬਾ, ਰੁਕ੍ਖੋ ਮਞ੍ਜੂਸਕੋ ਯਥਾ.

੭੩੫. ‘‘ਘਾਯਸੇ ਤਂ ਸੁਚਿਗਨ੍ਧਂ, ਰੂਪਂ ਪਸ੍ਸਸਿ ਅਮਾਨੁਸਂ;

ਦੇਵਤੇ ਪੁਚ੍ਛਿਤਾਚਿਕ੍ਖ, ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ. –

ਇਮਾਹਿ ਗਾਥਾਹਿ ਪੁਚ੍ਛਿ. ਸਾਪਿ ਤਸ੍ਸ ਏਵਂ ਬ੍ਯਾਕਾਸਿ –

੭੩੬. ‘‘ਸਾਵਤ੍ਥਿਯਂ ਮਯ੍ਹਂ ਸਖੀ ਭਦਨ੍ਤੇ, ਸਙ੍ਘਸ੍ਸ ਕਾਰੇਸਿ ਮਹਾਵਿਹਾਰਂ;

ਤਤ੍ਥਪ੍ਪਸਨ੍ਨਾ ਅਹਮਾਨੁਮੋਦਿਂ, ਦਿਸ੍ਵਾ ਅਗਾਰਞ੍ਚ ਪਿਯਞ੍ਚ ਮੇਤਂ.

੭੩੭. ‘‘ਤਾਯੇਵ ਮੇ ਸੁਦ੍ਧਨੁਮੋਦਨਾਯ, ਲਦ੍ਧਂ ਵਿਮਾਨਬ੍ਭੁਤਦਸ੍ਸਨੇਯ੍ਯਂ;

ਸਮਨ੍ਤਤੋ ਸੋਲ਼ਸਯੋਜਨਾਨਿ, ਵੇਹਾਯਸਂ ਗਚ੍ਛਤਿ ਇਦ੍ਧਿਯਾ ਮਮ.

੭੩੮. ‘‘ਕੂਟਾਗਾਰਾ ਨਿਵੇਸਾ ਮੇ, ਵਿਭਤ੍ਤਾ ਭਾਗਸੋ ਮਿਤਾ;

ਦਦ੍ਦਲ੍ਲਮਾਨਾ ਆਭਨ੍ਤਿ, ਸਮਨ੍ਤਾ ਸਤਯੋਜਨਂ.

੭੩੯. ‘‘ਪੋਕ੍ਖਰਞ੍ਞੋ ਚ ਮੇ ਏਤ੍ਥ, ਪੁਥੁਲੋਮਨਿਸੇਵਿਤਾ;

ਅਚ੍ਛੋਦਕਾ ਵਿਪ੍ਪਸਨ੍ਨਾ, ਸੋਣ੍ਣਵਾਲੁਕਸਨ੍ਥਤਾ.

੭੪੦. ‘‘ਨਾਨਾਪਦੁਮਸਞ੍ਛਨ੍ਨਾ, ਪੁਣ੍ਡਰੀਕਸਮੋਤਤਾ;

ਸੁਰਭੀ ਸਮ੍ਪਵਾਯਨ੍ਤਿ, ਮਨੁਞ੍ਞਾ ਮਾਲੁਤੇਰਿਤਾ.

੭੪੧. ‘‘ਜਮ੍ਬੁਯੋ ਪਨਸਾ ਤਾਲਾ, ਨਾਲ਼ਿਕੇਰਵਨਾਨਿ ਚ;

ਅਨ੍ਤੋਨਿਵੇਸਨੇ ਜਾਤਾ, ਨਾਨਾਰੁਕ੍ਖਾ ਅਰੋਪਿਮਾ.

੭੪੨. ‘‘ਨਾਨਾਤੂਰਿਯਸਙ੍ਘੁਟ੍ਠਂ, ਅਚ੍ਛਰਾਗਣਘੋਸਿਤਂ;

ਯੋਪਿ ਮਂ ਸੁਪਿਨੇ ਪਸ੍ਸੇ, ਸੋਪਿ ਵਿਤ੍ਤੋ ਸਿਯਾ ਨਰੋ.

੭੪੩. ‘‘ਏਤਾਦਿਸਂ ਅਬ੍ਭੁਤਦਸ੍ਸਨੇਯ੍ਯਂ, ਵਿਮਾਨਂ ਸਬ੍ਬਸੋ ਪਭਂ;

ਮਮ ਕਮ੍ਮੇ ਹਿ ਨਿਬ੍ਬਤ੍ਤਂ, ਅਲਂ ਪੁਞ੍ਞਾਨਿ ਕਾਤਵੇ’’ਤਿ.

੭੩੬. ਤਤ੍ਥ ਸਾਵਤ੍ਥਿਯਂ ਮਯ੍ਹਂ ਸਖੀ ਭਦਨ੍ਤੇ, ਸਙ੍ਘਸ੍ਸ ਕਾਰੇਸਿ ਮਹਾਵਿਹਾਰਨ੍ਤਿ ਭਨ੍ਤੇ ਅਨੁਰੁਦ੍ਧ, ਸਾਵਤ੍ਥਿਯਾ ਸਮੀਪੇ ਪਾਚੀਨਪਸ੍ਸੇ ਮਯ੍ਹਂ ਮਮ ਸਕ੍ਖੀ ਸਹਾਯਿਕਾ ਵਿਸਾਖਾ ਮਹਾਉਪਾਸਿਕਾ ਆਗਤਾਗਤਂ ਚਾਤੁਦ੍ਦਿਸਂ ਭਿਕ੍ਖੁਸਙ੍ਘਂ ਉਦ੍ਦਿਸ੍ਸ ਨਵਹਿਰਞ੍ਞਕੋਟਿਪਰਿਚ੍ਚਾਗੇਨ ਪੁਬ੍ਬਾਰਾਮਂ ਨਾਮ ਮਹਨ੍ਤਂ ਵਿਹਾਰਂ ਕਾਰੇਸਿ. ਤਤ੍ਥਪ੍ਪਸਨ੍ਨਾ ਅਹਮਾਨੁਮੋਦਿਨ੍ਤਿ ਤਸ੍ਮਿਂ ਵਿਹਾਰੇ ਕਤਪਰਿਯੋਸਿਤੇ ਸਙ੍ਘਸ੍ਸ ਨਿਯ੍ਯਾਦਿਯਮਾਨੇ ਤਾਯ ਕਤੇ ਪਤ੍ਤਿਦਾਨੇ ‘‘ਅਹੋ ਠਾਨੇ ਵਤ ਪਰਿਚ੍ਚਾਗੋ ਕਤੋ’’ਤਿ ਪਸਨ੍ਨਾ ਰਤਨਤ੍ਤਯੇ ਕਮ੍ਮਫਲੇ ਚ ਸਞ੍ਜਾਤਪਸਾਦਾ ਅਹਂ ਅਨੁਮੋਦਿਂ. ਵਤ੍ਥੁਵਸੇਨ ਤਸ੍ਸਾ ਅਨੁਮੋਦਨਾਯ ਉਲ਼ਾਰਭਾਵਂ ਦਸ੍ਸੇਤੁਂ ‘‘ਦਿਸ੍ਵਾ ਅਗਾਰਞ੍ਚ ਪਿਯਞ੍ਚ ਮੇਤ’’ਨ੍ਤਿ ਆਹ. ਸਹਸ੍ਸਗਬ੍ਭਂ ਅਤਿਵਿਯ ਰਮਣੀਯਂ ਦੇਵਵਿਮਾਨਸਦਿਸਂ ਤਞ੍ਚ ਅਗਾਰਂ ਮਹਨ੍ਤਂ ਪਾਸਾਦਂ ਪਿਯਞ੍ਚ ਮੇ ਬੁਦ੍ਧਪ੍ਪਮੁਖਂ ਸਙ੍ਘਂ ਉਦ੍ਦਿਸ੍ਸ ਤਾਦਿਸਂ ਮਹਨ੍ਤਂ ਧਨਪਰਿਚ੍ਚਾਗਂ ਦਿਸ੍ਵਾ ਅਨੁਮੋਦਿਨ੍ਤਿ ਯੋਜਨਾ.

੭੩੭. ਤਾਯੇਵ ਮੇ ਸੁਦ੍ਧਨੁਮੋਦਨਾਯਾਤਿ ਯਥਾਵੁਤ੍ਤਾਯ ਦੇਯ੍ਯਧਮ੍ਮਪਰਿਚ੍ਚਾਗਾਭਾਵੇਨ ਸੁਦ੍ਧਾਯ ਕੇਵਲਾਯ ਅਨੁਮੋਦਨਾਯੇਵ. ਲਦ੍ਧਂ ਵਿਮਾਨਬ੍ਭੁਤਦਸ੍ਸਨੇਯ੍ਯਨ੍ਤਿ ਮਯ੍ਹਂ ਪੁਬ੍ਬੇ ਈਦਿਸਸ੍ਸ ਅਭੂਤਪੁਬ੍ਬਤਾਯ ਅਬ੍ਭੁਤਂ ਸਮਨ੍ਤਭਦ੍ਦਕਭਾਵੇਨ ਅਤਿਵਿਯ ਸੁਰੂਪਤਾਯ ਚ ਦਸ੍ਸਨੇਯ੍ਯਂ ਇਮਂ ਵਿਮਾਨਂ ਲਦ੍ਧਂ ਅਧਿਗਤਂ. ਏਵਂ ਤਸ੍ਸ ਵਿਮਾਨਸ੍ਸ ਅਭਿਰੂਪਤਂ ਦਸ੍ਸੇਤ੍ਵਾ ਇਦਾਨਿ ਪਮਾਣਮਹਤ੍ਤਂ ਪਭਾਵਮਹਤ੍ਤਂ ਉਪਭੋਗਵਤ੍ਥੁਮਹਤ੍ਤਞ੍ਚ ਦਸ੍ਸੇਤੁਂ ‘‘ਸਮਨ੍ਤਤੋ ਸੋਲ਼ਸਯੋਜਨਾਨੀ’’ਤਿਆਦਿ ਵੁਤ੍ਤਂ. ਤਤ੍ਥ ਇਦ੍ਧਿਯਾ ਮਮਾਤਿ ਮਮ ਪੁਞ੍ਞਿਦ੍ਧਿਯਾ.

੭੩੯. ਪੋਕ੍ਖਰਞ੍ਞੋਤਿ ਪੋਕ੍ਖਰਣਿਯੋ. ਪੁਥੁਲੋਮਨਿਸੇਵਿਤਾਤਿ ਦਿਬ੍ਬਮਚ੍ਛੇਹਿ ਉਪਸੇਵਿਤਾ.

੭੪੦. ਨਾਨਾਪਦੁਮਸਞ੍ਛਨ੍ਨਾਤਿ ਸਤਪਤ੍ਤਸਹਸ੍ਸਪਤ੍ਤਾਦਿਭੇਦੇਹਿ ਨਾਨਾਵਿਧੇਹਿ ਰਤ੍ਤਪਦੁਮੇਹਿ ਰਤ੍ਤਕਮਲੇਹਿ ਚ ਸਞ੍ਛਾਦਿਤਾ. ਪੁਣ੍ਡਰੀਕਸਮੋਤਤਾਤਿ ਨਾਨਾਵਿਧੇਹਿ ਸੇਤਕਮਲੇਹਿ ਸਮਨ੍ਤਤੋ ਅਵਤਤਾ, ਨਾਨਾਰੁਕ੍ਖਾ ਅਰੋਪਿਮਾ ਸੁਰਭੀ ਸਮ੍ਪਵਾਯਨ੍ਤੀਤਿ ਯੋਜਨਾ.

੭੪੨. ਸੋਪੀਤਿ ਸੋ ਸੁਪਿਨਦਸ੍ਸਾਵੀਪਿ. ਵਿਤ੍ਤੋਤਿ ਤੁਟ੍ਠੋ.

੭੪੩. ਸਬ੍ਬਸੋ ਪਭਨ੍ਤਿ ਸਮਨ੍ਤਤੋ ਓਭਾਸਮਾਨਂ. ਕਮ੍ਮੇ ਹੀਤਿ ਕਮ੍ਮਨਿਮਿਤ੍ਤਂ. ਹੀਤਿ ਨਿਪਾਤਮਤ੍ਤਂ. ਚੇਤਨਾਨਂ ਵਾ ਅਪਰਾਪਰੁਪ੍ਪਤ੍ਤਿਯਾ ਬਹੁਭਾਵਤੋ ‘‘ਕਮ੍ਮੇਹੀ’’ਤਿ ਵੁਤ੍ਤਂ. ਅਲਨ੍ਤਿ ਯੁਤ੍ਤਂ. ਕਾਤਵੇਤਿ ਕਾਤੁਂ.

ਇਦਾਨਿ ਥੇਰੋ ਵਿਸਾਖਾਯ ਨਿਬ੍ਬਤ੍ਤਟ੍ਠਾਨਂ ਕਥਾਪੇਤੁਕਾਮੋ ਇਮਂ ਗਾਥਮਾਹ –

੭੪੪. ‘‘ਤਾਯੇਵ ਤੇ ਸੁਦ੍ਧਨੁਮੋਦਨਾਯ,

ਲਦ੍ਧਂ ਵਿਮਾਨਬ੍ਭੁਤਦਸ੍ਸਨੇਯ੍ਯਂ;

ਯਾ ਚੇਵ ਸਾ ਦਾਨਮਦਾਸਿ ਨਾਰੀ,

ਤਸ੍ਸਾ ਗਤਿਂ ਬ੍ਰੂਹਿ ਕੁਹਿਂ ਉਪ੍ਪਨ੍ਨਾ ਸਾ’’ਤਿ.

੭੪੪. ਤਤ੍ਥ ਯਾ ਚੇਵ ਸਾ ਦਾਨਮਦਾਸਿ ਨਾਰੀਤਿ ਯਸ੍ਸ ਦਾਨਸ੍ਸ ਅਨੁਮੋਦਨਾਯ ਤ੍ਵਂ ਈਦਿਸਂ ਸਮ੍ਪਤ੍ਤਿਂ ਪਟਿਲਭਿ, ਤਂ ਦਾਨਂ ਯਾ ਚੇਵ ਸਾ ਨਾਰੀ ਅਦਾਸੀਤਿ ਵਿਸਾਖਂ ਮਹਾਉਪਾਸਿਕਂ ਸਨ੍ਧਾਯ ਵਦਤਿ. ਤਾਯ ਏਵ ਦੇਵਤਾਯ ਤਸ੍ਸਾ ਸਮ੍ਪਤ੍ਤਿਂ ਕਥਾਪੇਤੁਕਾਮੋ ਆਹ ‘‘ਤਸ੍ਸਾ ਗਤਿਂ ਬ੍ਰੂਹਿ ਕੁਹਿਂ ਉਪ੍ਪਨ੍ਨਾ ਸਾ’’ਤਿ. ਤਸ੍ਸਾ ਗਤਿਨ੍ਤਿ ਤਾਯ ਨਿਬ੍ਬਤ੍ਤਦੇਵਗਤਿਂ.

ਇਦਾਨਿ ਥੇਰੇਨ ਪੁਚ੍ਛਿਤਮਤ੍ਥਂ ਦਸ੍ਸੇਨ੍ਤੀ ਆਹ –

੭੪੫. ‘‘ਯਾ ਸਾ ਅਹੁ ਮਯ੍ਹਂ ਸਖੀ ਭਦਨ੍ਤੇ, ਸਙ੍ਘਸ੍ਸ ਕਾਰੇਸਿ ਮਹਾਵਿਹਾਰਂ;

ਵਿਞ੍ਞਾਤਧਮ੍ਮਾ ਸਾ ਅਦਾਸਿ ਦਾਨਂ, ਉਪ੍ਪਨ੍ਨਾ ਨਿਮ੍ਮਾਨਰਤੀਸੁ ਦੇਵੇਸੁ.

੭੪੬. ‘‘ਪਜਾਪਤੀ ਤਸ੍ਸ ਸੁਨਿਮ੍ਮਿਤਸ੍ਸ,

ਅਚਿਨ੍ਤਿਯੋ ਕਮ੍ਮਵਿਪਾਕ ਤਸ੍ਸਾ;

ਯਮੇਤਂ ਪੁਚ੍ਛਸਿ ‘ਕੁਹਿਂ ਉਪ੍ਪਨ੍ਨਾ ਸਾ’ਤਿ,

ਤਂ ਤੇ ਵਿਯਾਕਾਸਿਂ ਅਨਞ੍ਞਥਾ ਅਹ’’ਨ੍ਤਿ.

੭੪੫. ਤਤ੍ਥ ਵਿਞ੍ਞਾਤਧਮ੍ਮਾਤਿ ਵਿਞ੍ਞਾਤਸਾਸਨਧਮ੍ਮਾ, ਪਟਿਵਿਦ੍ਧਚਤੁਸਚ੍ਚਧਮ੍ਮਾਤਿ ਅਤ੍ਥੋ.

੭੪੬. ਸੁਨਿਮ੍ਮਿਤਸ੍ਸਾਤਿ ਸੁਨਿਮ੍ਮਿਤਸ੍ਸ ਦੇਵਰਾਜਸ੍ਸ. ਅਚਿਨ੍ਤਿਯੋ ਕਮ੍ਮਵਿਪਾਕ ਤਸ੍ਸਾਤਿ ਵਿਭਤ੍ਤਿਲੋਪਂ ਕਤ੍ਵਾ ਨਿਦ੍ਦੇਸੋ, ਤਸ੍ਸਾ ਮਮ ਸਖਿਯਾ ਨਿਬ੍ਬਾਨਰਤੀਸੁ ਨਿਬ੍ਬਤ੍ਤਾਯ ਕਮ੍ਮਵਿਪਾਕੋ ਪੁਞ੍ਞਕਮ੍ਮਸ੍ਸ ਵਿਪਾਕਭੂਤਾ ਦਿਬ੍ਬਸਮ੍ਪਤ੍ਤਿ ਅਚਿਨ੍ਤਿਯਾ ਅਪ੍ਪਮੇਯ੍ਯਾਤਿ ਅਤ੍ਥੋ. ਅਨਞ੍ਞਥਾਤਿ ਅਵਿਪਰੀਤਂ ਯਥਾਸਭਾਵਤੋ. ਕਥਂ ਪਨਾਯਂ ਤਸ੍ਸਾ ਸਮ੍ਪਤ੍ਤਿਂ ਅਞ੍ਞਾਸੀਤਿ? ਸੁਭਦ੍ਦਾ ਵਿਯ ਭਦ੍ਦਾਯ, ਵਿਸਾਖਾਪਿ ਦੇਵਧੀਤਾ ਇਮਿਸ੍ਸਾ ਸਨ੍ਤਿਕਂ ਅਗਮਾਸਿ.

ਇਦਾਨਿ ਦੇਵਧੀਤਾ ਥੇਰਂ ਅਞ੍ਞੇਸਮ੍ਪਿ ਦਾਨਸਮਾਦਪਨੇ ਨਿਯੋਜੇਨ੍ਤੀ ਇਮਾਹਿ ਗਾਥਾਹਿ ਧਮ੍ਮਂ ਦੇਸੇਸਿ –

੭੪੭. ‘‘ਤੇਨਹਞ੍ਞੇਪਿ ਸਮਾਦਪੇਥ, ਸਙ੍ਘਸ੍ਸ ਦਾਨਾਨਿ ਦਦਾਥ ਵਿਤ੍ਤਾ;

ਧਮ੍ਮਞ੍ਚ ਸੁਣਾਥ ਪਸਨ੍ਨਮਾਨਸਾ, ਸੁਦੁਲ੍ਲਭੋ ਲਦ੍ਧੋ ਮਨੁਸ੍ਸਲਾਭੋ.

੭੪੮. ‘‘ਯਂ ਮਗ੍ਗਂ ਮਗ੍ਗਾਧਿਪਤੀ ਅਦੇਸਯਿ, ਬ੍ਰਹ੍ਮਸ੍ਸਰੋ ਕਞ੍ਚਨਸਨ੍ਨਿਭਤ੍ਤਚੋ;

ਸਙ੍ਘਸ੍ਸ ਦਾਨਾਨਿ ਦਦਾਥ ਵਿਤ੍ਤਾ, ਮਹਪ੍ਫਲਾ ਯਤ੍ਥ ਭਵਨ੍ਤਿ ਦਕ੍ਖਿਣਾ.

੭੪੯. ‘‘ਯੇ ਪੁਗ੍ਗਲਾ ਅਟ੍ਠ ਸਤਂ ਪਸਤ੍ਥਾ, ਚਤ੍ਤਾਰਿ ਏਤਾਨਿ ਯੁਗਾਨਿ ਹੋਨ੍ਤਿ;

ਤੇ ਦਕ੍ਖਿਣੇਯ੍ਯਾ ਸੁਗਤਸ੍ਸ ਸਾਵਕਾ, ਏਤੇਸੁ ਦਿਨ੍ਨਾਨਿ ਮਹਪ੍ਫਲਾਨਿ.

੭੫੦. ‘‘ਚਤ੍ਤਾਰੋ ਚ ਪਟਿਪਨ੍ਨਾ, ਚਤ੍ਤਾਰੋ ਚ ਫਲੇ ਠਿਤਾ;

ਏਸ ਸਙ੍ਘੋ ਉਜੁਭੂਤੋ, ਪਞ੍ਞਾਸੀਲਸਮਾਹਿਤੋ.

੭੫੧. ‘‘ਯਜਮਾਨਾਨਂ ਮਨੁਸ੍ਸਾਨਂ, ਪੁਞ੍ਞਪੇਕ੍ਖਾਨ ਪਾਣਿਨਂ;

ਕਰੋਤਂ ਓਪਧਿਕਂ ਪੁਞ੍ਞਂ, ਸਙ੍ਘੇ ਦਿਨ੍ਨਂ ਮਹਪ੍ਫਲਂ.

੭੫੨. ‘‘ਏਸੋ ਹਿ ਸਙ੍ਘੋ ਵਿਪੁਲੋ ਮਹਗ੍ਗਤੋ, ਏਸਪ੍ਪਮੇਯ੍ਯੋ ਉਦਧੀਵ ਸਾਗਰੋ;

ਏਤੇ ਹਿ ਸੇਟ੍ਠਾ ਨਰਵੀਰਸਾਵਕਾ, ਪਭਙ੍ਕਰਾ ਧਮ੍ਮਮੁਦੀਰਯਨ੍ਤਿ.

੭੫੩. ‘‘ਤੇਸਂ ਸੁਦਿਨ੍ਨਂ ਸੁਹੁਤਂ ਸੁਯਿਟ੍ਠਂ, ਯੇ ਸਙ੍ਘਮੁਦ੍ਦਿਸ੍ਸ ਦਦਨ੍ਤਿ ਦਾਨਂ;

ਸਾ ਦਕ੍ਖਿਣਾ ਸਙ੍ਘਗਤਾ ਪਤਿਟ੍ਠਿਤਾ, ਮਹਪ੍ਫਲਾ ਲੋਕਵਿਦੂਨ ਵਣ੍ਣਿਤਾ.

੭੫੪. ‘‘ਏਤਾਦਿਸਂ ਯਞ੍ਞਮਨੁਸ੍ਸਰਨ੍ਤਾ, ਯੇ ਵੇਦਜਾਤਾ ਵਿਚਰਨ੍ਤਿ ਲੋਕੇ;

ਵਿਨੇਯ੍ਯ ਮਚ੍ਛੇਰਮਲਂ ਸਮੂਲਂ, ਅਨਿਨ੍ਦਿਤਾ ਸਗ੍ਗਮੁਪੇਨ੍ਤਿ ਠਾਨ’’ਨ੍ਤਿ.

੭੪੭. ਤਤ੍ਥ ਤੇਨਹਞ੍ਞੇਪੀਤਿ ਤੇਨਹਿ ਅਞ੍ਞੇਪਿ. ਤੇਨਾਤਿ ਚ ਤੇਨ ਕਾਰਣੇਨ, ਹੀਤਿ ਨਿਪਾਤਮਤ੍ਤਂ. ‘‘ਸਮਾਦਪੇਥਾ’’ਤਿ ਵਤ੍ਵਾ ਸਮਾਦਪਨਾਕਾਰਂ ਦਸ੍ਸੇਤੁਂ ‘‘ਸਙ੍ਘਸ੍ਸ ਦਾਨਾਨਿ ਦਦਾਥਾ’’ਤਿਆਦਿ ਵੁਤ੍ਤਂ. ਅਟ੍ਠਹਿ ਅਕ੍ਖਣੇਹਿ ਵਜ੍ਜਿਤਂ ਮਨੁਸ੍ਸਭਾਵਂ ਸਨ੍ਧਾਯਾਹ ‘‘ਸੁਦੁਲ੍ਲਭੋ ਲਦ੍ਧੋ ਮਨੁਸ੍ਸਲਾਭੋ’’ਤਿ. ਤਤ੍ਥ ਅਟ੍ਠ ਅਕ੍ਖਣਾ ਨਾਮ ਤਯੋ ਅਪਾਯਾ ਅਰੂਪਾ ਅਸਞ੍ਞਸਤ੍ਤਾ ਪਚ੍ਚਨ੍ਤਦੇਸੋ ਇਨ੍ਦ੍ਰਿਯਾਨਂ ਵੇਕਲ੍ਲਂ ਨਿਯਤਮਿਚ੍ਛਾਦਿਟ੍ਠਿਕਤਾ ਅਪਾਤੁਭਾਵੋ ਬੁਦ੍ਧਸ੍ਸਾਤਿ.

੭੪੮. ਯਂ ਮਗ੍ਗਨ੍ਤਿ ਯਂ ਖੇਤ੍ਤਵਿਸੇਸੇ ਕਤਂ ਦਾਨਂ, ਤਂ ਏਕਨ੍ਤੇਨ ਸੁਗਤਿਸਮ੍ਪਾਪਨਤੋ ਸੁਗਤਿਗਾਮਿਮਗ੍ਗਂ ਅਪਾਯਮਗ੍ਗਤੋ ਜਗ੍ਘਮਗ੍ਗਾਦਿਤੋ ਚ ਅਤਿਵਿਯ ਸੇਟ੍ਠਭਾਵੇਨ ਮਗ੍ਗਾਧਿਪਨ੍ਤਿ ਕਤ੍ਵਾ. ਦਾਨਮ੍ਪਿ ਹਿ ਸਦ੍ਧਾਹਿਰਿਯੋ ਵਿਯ ‘‘ਦੇਵਲੋਕਗਾਮਿਮਗ੍ਗੋ’’ਤਿ ਵੁਚ੍ਚਤਿ. ਯਥਾਹ –

‘‘ਸਦ੍ਧਾ ਹਿਰਿਯਂ ਕੁਸਲਞ੍ਚ ਦਾਨਂ, ਧਮ੍ਮਾ ਏਤੇ ਸਪ੍ਪੁਰਿਸਾਨੁਯਾਤਾ;

ਏਤਞ੍ਹਿ ਮਗ੍ਗਂ ਦਿਵਿਯਂ ਵਦਨ੍ਤਿ, ਏਤੇਨ ਹਿ ਗਚ੍ਛਤਿ ਦੇਵਲੋਕ’’ਨ੍ਤਿ.(ਅ. ਨਿ. ੮.੩੨; ਕਥਾ. ੪੮੦);

‘‘ਮਗ੍ਗਾਧਿਪਤੀ’’ਤਿ ਵਾ ਪਾਠੋ, ਤਸ੍ਸ ਅਰਿਯਮਗ੍ਗੇਨ ਸਦੇਵਕਸ੍ਸ ਲੋਕਸ੍ਸ ਅਧਿਪਤਿਭੂਤੋ ਸਤ੍ਥਾਤਿ ਅਤ੍ਥੋ ਦਟ੍ਠਬ੍ਬੋ. ਸਙ੍ਘਸ੍ਸ ਦਾਨਾਨਿ ਦਦਾਥਾਤਿਆਦਿਨਾ ਪੁਨਪਿ ਦਕ੍ਖਿਣੇਯ੍ਯੇਸੁ ਦਾਨਸਂਵਿਭਾਗੇ ਨਿਯੋਜੇਨ੍ਤੀ ਆਹ.

੭੪੯. ਇਦਾਨਿ ਤਂ ਦਕ੍ਖਿਣੇਯ੍ਯਂ ਅਰਿਯਸਙ੍ਘਂ ਸਰੂਪਤੋ ਦਸ੍ਸੇਨ੍ਤੀ ‘‘ਯੇ ਪੁਗ੍ਗਲਾ ਅਟ੍ਠ ਸਤਂ ਪਸਤ੍ਥਾ’’ਤਿ ਗਾਥਮਾਹ. ਤਤ੍ਥ ਯੇਤਿ ਅਨਿਯਮਿਤਨਿਦ੍ਦੇਸੋ. ਪੁਗ੍ਗਲਾਤਿ ਸਤ੍ਤਾ. ਅਟ੍ਠਾਤਿ ਤੇਸਂ ਗਣਨਪਰਿਚ੍ਛੇਦੋ. ਤੇ ਹਿ ਚਤ੍ਤਾਰੋ ਚ ਪਟਿਪਨ੍ਨਾ ਚਤ੍ਤਾਰੋ ਚ ਫਲੇ ਠਿਤਾਤਿ ਅਟ੍ਠ ਹੋਨ੍ਤਿ. ਸਤਂ ਪਸਤ੍ਥਾਤਿ ਸਪ੍ਪੁਰਿਸੇਹਿ ਬੁਦ੍ਧਪਚ੍ਚੇਕਬੁਦ੍ਧਸਾਵਕੇਹਿ ਅਞ੍ਞੇਹਿ ਚ ਦੇਵਮਨੁਸ੍ਸੇਹਿ ਪਸ੍ਸਤ੍ਥਾ. ਕਸ੍ਮਾ? ਸਹਜਾਤਸੀਲਾਦਿਗੁਣਯੋਗਤੋ. ਤੇਸਞ੍ਹਿ ਚਮ੍ਪਕਬਕੁਲਕੁਸੁਮਾਦੀਨਂ ਵਿਯ ਸਹਜਾਤਵਣ੍ਣਗਨ੍ਧਾਦਯੋ ਸਹਜਾਤਸੀਲਸਮਾਧਿਆਦਯੋ ਗੁਣਾ, ਤੇਨ ਤੇ ਵਣ੍ਣਗਨ੍ਧਾਦਿਸਮ੍ਪਨ੍ਨਾਨਿ ਵਿਯ ਪੁਪ੍ਫਾਨਿ ਦੇਵਮਨੁਸ੍ਸਾਨਂ ਸਤਂ ਪਿਯਾ ਮਨਾਪਾ ਪਾਸਂਸਿਯਾ ਚ ਹੋਨ੍ਤਿ. ਤੇਨ ਵੁਤ੍ਤਂ ‘‘ਯੇ ਪੁਗ੍ਗਲਾ ਅਟ੍ਠ ਸਤਂ ਪਸਤ੍ਥਾ’’ਤਿ. ਤੇ ਪਨ ਸਙ੍ਖੇਪਤੋ ਸੋਤਾਪਤ੍ਤਿਮਗ੍ਗਟ੍ਠੋ ਫਲਟ੍ਠੋਤਿ ਏਕਂ ਯੁਗਂ, ਏਵਂ ਯਾਵ ਅਰਹਤ੍ਤਮਗ੍ਗਟ੍ਠੋ ਫਲਟ੍ਠੋਤਿ ਏਕਂ ਯੁਗਨ੍ਤਿ ਚਤ੍ਤਾਰਿ ਯੁਗਾਨਿ ਹੋਨ੍ਤਿ. ਤੇਨਾਹ ‘‘ਚਤ੍ਤਾਰਿ ਏਤਾਨਿ ਯੁਗਾਨਿ ਹੋਨ੍ਤਿ ਤੇ ਦਕ੍ਖਿਣੇਯ੍ਯਾ’’ਤਿ. ਤੇਤਿ ਪੁਬ੍ਬੇ ਅਨਿਯਮਤੋ ਉਦ੍ਦਿਟ੍ਠਾਨਂ ਨਿਯਮੇਤ੍ਵਾ ਦਸ੍ਸਨਂ. ਤੇ ਹਿ ਸਬ੍ਬੇਪਿ ਕਮ੍ਮਂ ਕਮ੍ਮਫਲਞ੍ਚ ਸਦ੍ਦਹਿਤ੍ਵਾ ਦਾਤਬ੍ਬਦੇਯ੍ਯਧਮ੍ਮਸਙ੍ਖਾਤਂ ਦਕ੍ਖਿਣਂ ਅਰਹਨ੍ਤੀਤਿ ਦਕ੍ਖਿਣੇਯ੍ਯਾ ਗੁਣਵਿਸੇਸਯੋਗੇਨ ਦਾਨਸ੍ਸ ਮਹਪ੍ਫਲਭਾਵਸਾਧਨਤੋ. ਸੁਗਤਸ੍ਸ ਸਾਵਕਾਤਿ ਸਮ੍ਮਾਸਮ੍ਬੁਦ੍ਧਸ੍ਸ ਧਮ੍ਮਸਵਨਨ੍ਤੇ ਅਰਿਯਾਯ ਜਾਤਿਯਾ ਜਾਤਤਾਯ ਤਂ ਧਮ੍ਮਂ ਸੁਣਨ੍ਤੀਤਿ ਸਾਵਕਾ. ਏਤੇਸੁ ਦਿਨ੍ਨਾਨਿ ਮਹਪ੍ਫਲਾਨੀਤਿ ਏਤੇਸੁ ਸੁਗਤਸ੍ਸ ਸਾਵਕੇਸੁ ਅਪ੍ਪਕਾਨਿਪਿ ਦਾਨਾਨਿ ਦਿਨ੍ਨਾਨਿ ਪਟਿਗ੍ਗਾਹਕਤੋ ਦਕ੍ਖਿਣਾਵਿਸੁਦ੍ਧਿਯਾ ਮਹਪ੍ਫਲਾਨਿ ਹੋਨ੍ਤਿ. ਤੇਨਾਹ ਭਗਵਾ ‘‘ਯਾਵਤਾ, ਭਿਕ੍ਖਵੇ, ਸਙ੍ਘਾ ਵਾ ਗਣਾ ਵਾ, ਤਥਾਗਤਸਾਵਕਸਙ੍ਘੋ ਤੇਸਂ ਅਗ੍ਗਮਕ੍ਖਾਯਤੀ’’ਤਿਆਦਿ (ਅ. ਨਿ. ੪.੩੪; ੫.੩੨; ਇਤਿਵੁ. ੯੦).

੭੫੦. ਚਤ੍ਤਾਰੋ ਚ ਪਟਿਪਨ੍ਨਾਤਿਆਦਿ ਹੇਟ੍ਠਾ ਵੁਤ੍ਤਤ੍ਥਮੇਵ.

ਇਧ ਪਨ ਆਯਸ੍ਮਾ ਅਨੁਰੁਦ੍ਧੋ ਅਤ੍ਤਨਾ ਦੇਵਤਾਯ ਚ ਵੁਤ੍ਤਮਤ੍ਥਂ ਮਨੁਸ੍ਸਲੋਕਂ ਆਗਨ੍ਤ੍ਵਾ ਭਗਵਤੋ ਆਰੋਚੇਸਿ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ. ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸੀਤਿ.

ਵਿਹਾਰਵਿਮਾਨਵਣ੍ਣਨਾ ਨਿਟ੍ਠਿਤਾ.