੫. ਕਞ੍ਜਿਕਦਾਯਿਕਾਵਿਮਾਨਵਣ੍ਣਨਾ

ਅਭਿਕ੍ਕਨ੍ਤੇਨ ਵਣ੍ਣੇਨਾਤਿ ਕਞ੍ਜਿਕਦਾਯਿਕਾਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਅਨ੍ਧਕਵਿਨ੍ਦੇ ਵਿਹਰਤਿ. ਤੇਨ ਚ ਸਮਯੇਨ ਭਗਵਤੋ ਕੁਚ੍ਛਿਯਂ ਵਾਤਰੋਗੋ ਉਪ੍ਪਜ੍ਜਿ. ਭਗਵਾ ਆਯਸ੍ਮਨ੍ਤਂ ਆਨਨ੍ਦਂ ਆਮਨ੍ਤੇਸਿ ‘‘ਗਚ੍ਛ ਤ੍ਵਂ ਆਨਨ੍ਦ, ਪਿਣ੍ਡਾਯ ਚਰਿਤ੍ਵਾ ਮਯ੍ਹਂ ਭੇਸਜ੍ਜਤ੍ਥਂ ਕਞ੍ਜਿਕਂ ਆਹਰਾ’’ਤਿ. ‘‘ਏਵਂ ਭਨ੍ਤੇ’’ਤਿ ਖੋ ਆਯਸ੍ਮਾ ਆਨਨ੍ਦੋ ਭਗਵਤੋ ਪਟਿਸ੍ਸੁਣਿਤ੍ਵਾ ਮਹਾਰਾਜਦਤ੍ਤਿਯਂ ਪਤ੍ਤਂ ਗਹੇਤ੍ਵਾ ਅਤ੍ਤਨੋ ਉਪਟ੍ਠਾਕਵੇਜ੍ਜਸ੍ਸ ਨਿਵੇਸਨਦ੍ਵਾਰੇ ਅਟ੍ਠਾਸਿ. ਤਂ ਦਿਸ੍ਵਾ ਵੇਜ੍ਜਸ੍ਸ ਭਰਿਯਾ ਪਚ੍ਚੁਗ੍ਗਨ੍ਤ੍ਵਾ ਵਨ੍ਦਿਤ੍ਵਾ ਪਤ੍ਤਂ ਗਹੇਤ੍ਵਾ ਥੇਰਂ ਪੁਚ੍ਛਿ ‘‘ਕੀਦਿਸੇਨ ਵੋ, ਭਨ੍ਤੇ, ਭੇਸਜ੍ਜੇਨ ਅਤ੍ਥੋ’’ਤਿ. ਸਾ ਕਿਰ ਬੁਦ੍ਧਿਸਮ੍ਪਨ੍ਨਾ ‘‘ਭੇਸਜ੍ਜੇਨ ਪਯੋਜਨੇ ਸਤਿ ਥੇਰੋ ਇਧਾਗਚ੍ਛਤਿ, ਨ ਭਿਕ੍ਖਤ੍ਥ’’ਨ੍ਤਿ ਸਲ੍ਲਕ੍ਖੇਸਿ. ‘‘ਕਞ੍ਜਿਕੇਨਾ’’ਤਿ ਚ ਵੁਤ੍ਤੇ ‘‘ਨ ਯਿਦਂ ਭੇਸਜ੍ਜਂ ਮਯ੍ਹਂ ਅਯ੍ਯਸ੍ਸ, ਤਥਾ ਹੇਸ ਭਗਵਤੋ ਪਤ੍ਤੋ, ਹਨ੍ਦਾਹਂ ਲੋਕਨਾਥਸ੍ਸ ਅਨੁਚ੍ਛਵਿਕਂ ਕਞ੍ਜਿਕਂ ਸਮ੍ਪਾਦੇਮੀ’’ਤਿ ਸੋਮਨਸ੍ਸਜਾਤਾ ਸਞ੍ਜਾਤਬਹੁਮਾਨਾ ਬਦਰਯੂਸੇਨ ਯਾਗੁਂ ਸਮ੍ਪਾਦੇਤ੍ਵਾ ਪਤ੍ਤਂ ਪੂਰੇਤ੍ਵਾ ਤਸ੍ਸ ਪਰਿਵਾਰਭਾਵੇਨ ਅਞ੍ਞਞ੍ਚ ਭੋਜਨਂ ਪਟਿਯਾਦੇਤ੍ਵਾ ਪੇਸੇਸਿ. ਤਂ ਪਰਿਭੁਤ੍ਤਮਤ੍ਤਸ੍ਸੇਵ ਭਗਵਤੋ ਸੋ ਆਬਾਧੋ ਵੂਪਸਮਿ. ਸਾ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਤਾਵਤਿਂਸੇਸੁ ਉਪ੍ਪਜ੍ਜਿਤ੍ਵਾ ਮਹਤਿਂ ਦਿਬ੍ਬਸਮ੍ਪਤ੍ਤਿਂ ਅਨੁਭਵਨ੍ਤੀ ਮੋਦਤਿ. ਅਥਾਯਸ੍ਮਾ ਮਹਾਮੋਗ੍ਗਲ੍ਲਾਨੋ ਦੇਵਚਾਰਿਕਂ ਚਰਨ੍ਤੋ ਤਂ ਅਚ੍ਛਰਾਸਹਸ੍ਸਪਰਿਵਾਰੇਨ ਵਿਚਰਨ੍ਤਿਂ ਦਿਸ੍ਵਾ ਤਾਯ ਕਤਕਮ੍ਮਂ ਇਮਾਹਿ ਗਾਥਾਹਿ ਪੁਚ੍ਛਿ –

੭੧੯. ‘‘ਅਭਿਕ੍ਕਨ੍ਤੇਨ ਵਣ੍ਣੇਨ …ਪੇ… ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ. –

ਸਾਪਿ ਬ੍ਯਾਕਾਸਿ.

੭੨੧. ‘‘ਸਾ ਦੇਵਤਾ ਅਤ੍ਤਮਨਾ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

੭੨੩. ‘‘ਅਹਂ ਅਨ੍ਧਕਵਿਨ੍ਦਮ੍ਹਿ, ਬੁਦ੍ਧਸ੍ਸਾਦਿਚ੍ਚਬਨ੍ਧੁਨੋ;

ਅਦਾਸਿਂ ਕੋਲਸਮ੍ਪਾਕਂ, ਕਞ੍ਜਿਕਂ ਤੇਲਧੂਪਿਤਂ.

੭੨੪. ‘‘ਪਿਪ੍ਫਲ੍ਯਾ ਲਸੁਣੇਨ ਚ, ਮਿਸ੍ਸਂ ਲਾਮਞ੍ਜਕੇਨ ਚ;

ਅਦਾਸਿਂ ਉਜੁਭੂਤਸ੍ਮਿਂ, ਵਿਪ੍ਪਸਨ੍ਨੇਨ ਚੇਤਸਾ.

੭੨੫. ‘‘ਯਾ ਮਹੇਸਿਤ੍ਤਂ ਕਾਰੇਯ੍ਯ, ਚਕ੍ਕਵਤ੍ਤਿਸ੍ਸ ਰਾਜਿਨੋ;

ਨਾਰੀ ਸਬ੍ਬਙ੍ਗਕਲ੍ਯਾਣੀ, ਭਤ੍ਤੁ ਚਾਨੋਮਦਸ੍ਸਿਕਾ;

ਏਕਸ੍ਸ ਕਞ੍ਜਿਕਦਾਨਸ੍ਸ, ਕਲਂ ਨਾਗ੍ਘਤਿ ਸੋਲ਼ਸਿਂ.

੭੨੬. ‘‘ਸਤਂ ਨਿਕ੍ਖਾ ਸਤਂ ਅਸ੍ਸਾ, ਸਤਂ ਅਸ੍ਸਤਰੀਰਥਾ;

ਸਤਂ ਕਞ੍ਞਾਸਹਸ੍ਸਾਨਿ, ਆਮੁਤ੍ਤਮਣਿਕੁਣ੍ਡਲਾ;

ਏਕਸ੍ਸ ਕਞ੍ਜਿਕਦਾਨਸ੍ਸ, ਕਲਂ ਨਾਗ੍ਘਨ੍ਤਿ ਸੋਲ਼ਸਿਂ.

੭੨੭. ‘‘ਸਤਂ ਹੇਮਵਤਾ ਨਾਗਾ, ਈਸਾਦਨ੍ਤਾ ਉਰੂਲ਼੍ਹਵਾ;

ਸੁਵਣ੍ਣਕਚ੍ਛਾ ਮਾਤਙ੍ਗਾ, ਹੇਮਕਪ੍ਪਨਵਾਸਸਾ,

ਏਕਸ੍ਸ ਕਞ੍ਜਿਕਦਾਨਸ੍ਸ, ਕਲਂ ਨਾਗ੍ਘਨ੍ਤਿ ਸੋਲ਼ਸਿਂ.

੭੨੮. ‘‘ਚਤੁਨ੍ਨਮਪਿ ਦੀਪਾਨਂ, ਇਸ੍ਸਰਂ ਯੋਧ ਕਾਰਯੇ;

ਏਕਸ੍ਸ ਕਞ੍ਜਿਕਦਾਨਸ੍ਸ, ਕਲਂ ਨਾਗ੍ਘਤਿ ਸੋਲ਼ਸਿ’’ਨ੍ਤਿ.

੭੨੩-੪. ਤਤ੍ਥ ਅਦਾਸਿਂ ਕੋਲਸਮ੍ਪਾਪਕਂ, ਕਞ੍ਜਿਕਂ ਤੇਲਧੂਪਿਤਨ੍ਤਿ ਬਦਰਮੋਦਕਕਸਾਵੇ ਚਤੁਗੁਣੋਦਕਸਮੋਦਿਤੇ ਪਾਕੇਨ ਚਤੁਤ੍ਥਭਾਗਾਵਸਿਟ੍ਠਂ ਯਾਗੁਂ ਪਚਿਤ੍ਵਾ ਤਂ ਤਿਕਟੁਕਅਜਮੋਦਹਿਙ੍ਗੁਜੀਰਕਲਸੁਣਾਦੀਹਿ ਕਟੁਕਭਣ੍ਡੇਹਿ ਅਭਿਸਙ੍ਖਰਿਤ੍ਵਾ ਸੁਧੂਪਿਤਂ ਕਤ੍ਵਾ ਲਾਮਞ੍ਜਗਨ੍ਧਂ ਗਾਹਾਪੇਤ੍ਵਾ ਪਸਨ੍ਨਚਿਤ੍ਤੇਨ ਭਗਵਤੋ ਪਤ੍ਤੇ ਆਕਿਰਿਤ੍ਵਾ ਸਤ੍ਥਾਰਂ ਉਦ੍ਦਿਸਿਤ੍ਵਾ ਅਦਾਸਿਂ, ਥੇਰਸ੍ਸ ਹਤ੍ਥੇ ਪਤਿਟ੍ਠਪੇਸਿਨ੍ਤਿ ਦਸ੍ਸੇਤਿ. ਤੇਨਾਹ –

‘‘ਪਿਪ੍ਫਲ੍ਯਾ ਲਸੁਣੇਨ ਚ, ਮਿਸ੍ਸਂ ਲਾਮਞ੍ਜਕੇਨ ਚ;

ਅਦਾਸਿਂ ਉਜੁਭੂਤਸ੍ਮਿਂ, ਵਿਪ੍ਪਸਨ੍ਨੇਨ ਚੇਤਸਾ’’ਤਿ.

ਸੇਸਂ ਵੁਤ੍ਤਨਯਮੇਵ.

ਏਵਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਤਾਯ ਦੇਵਤਾਯ ਅਤ੍ਤਨਾ ਸਮੁਪਚਿਤਸੁਚਰਿਤਕਮ੍ਮੇ ਆਵਿਕਤੇ ਸਪਰਿਵਾਰਾਯ ਤਸ੍ਸਾ ਧਮ੍ਮਂ ਦੇਸੇਤ੍ਵਾ ਮਨੁਸ੍ਸਲੋਕਂ ਆਗਨ੍ਤ੍ਵਾ ਤਂ ਪਵਤ੍ਤਿਂ ਭਗਵਤੋ ਆਰੋਚੇਸਿ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਚਤੁਪਰਿਸਮਜ੍ਝੇ ਧਮ੍ਮਂ ਦੇਸੇਸਿ. ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸੀਤਿ.

ਕਞ੍ਜਿਕਦਾਯਿਕਾਵਿਮਾਨਵਣ੍ਣਨਾ ਨਿਟ੍ਠਿਤਾ.