੨. ਪਭਸ੍ਸਰਵਿਮਾਨਵਣ੍ਣਨਾ

ਪਭਸ੍ਸਰਵਰਵਣ੍ਣਨਿਭੇਤਿ ਪਭਸ੍ਸਰਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਰਾਜਗਹੇ ਵਿਹਰਤਿ. ਤੇਨ ਚ ਸਮਯੇਨ ਰਾਜਗਹੇ ਅਞ੍ਞਤਰੋ ਉਪਾਸਕੋ ਮਹਾਮੋਗ੍ਗਲ੍ਲਾਨਤ੍ਥੇਰੇ ਅਭਿਪ੍ਪਸਨ੍ਨੋ ਹੋਤਿ. ਤਸ੍ਸੇਕਾ ਧੀਤਾ ਸਦ੍ਧਾ ਪਸਨ੍ਨਾ, ਸਾਪਿ ਥੇਰੇ ਗਰੁਚਿਤ੍ਤੀਕਾਰਬਹੁਲਾ ਹੋਤਿ. ਅਥੇਕਦਿਵਸਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਰਾਜਗਹੇ ਪਿਣ੍ਡਾਯ ਚਰਨ੍ਤੋ ਤਂ ਕੁਲਂ ਉਪਸਙ੍ਕਮਿ. ਸਾ ਥੇਰਂ ਦਿਸ੍ਵਾ ਸੋਮਨਸ੍ਸਜਾਤਾ ਆਸਨਂ ਪਞ੍ਞਾਪੇਤ੍ਵਾ ਥੇਰੇ ਤਤ੍ਥ ਨਿਸਿਨ੍ਨੇ ਸੁਮਨਮਾਲਾਯ ਪੂਜੇਤ੍ਵਾ ਮਧੁਰਂ ਗੁਲ਼ਫਾਣਿਤਂ ਥੇਰਸ੍ਸ ਪਤ੍ਤੇ ਆਕਿਰਿ, ਥੇਰੋ ਅਨੁਮੋਦਿਤੁਕਾਮੋ ਨਿਸੀਦਿ. ਸਾ ਘਰਾਵਾਸਸ੍ਸ ਬਹੁਕਿਚ੍ਚਤਾਯ ਅਨੋਕਾਸਤਂ ਪਵੇਦੇਤ੍ਵਾ ‘‘ਅਞ੍ਞਸ੍ਮਿਂ ਦਿਵਸੇ ਧਮ੍ਮਂ ਸੋਸ੍ਸਾਮੀ’’ਤਿ ਥੇਰਂ ਵਨ੍ਦਿਤ੍ਵਾ ਉਯ੍ਯੋਜੇਸਿ. ਤਦਹੇਵ ਚ ਸਾ ਕਾਲਂ ਕਤ੍ਵਾ ਤਾਵਤਿਂਸੇਸੁ ਨਿਬ੍ਬਤ੍ਤਿ. ਤਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਉਪਸਙ੍ਕਮਿਤ੍ਵਾ ਇਮਾਹਿ ਗਾਥਾਹਿ ਪੁਚ੍ਛਿ –

੬੯੭. ‘‘ਪਭਸ੍ਸਰਵਰਵਣ੍ਣਨਿਭੇ, ਸੁਰਤ੍ਤਵਤ੍ਥਵਸਨੇ;

ਮਹਿਦ੍ਧਿਕੇ ਚਨ੍ਦਨਰੁਚਿਰਗਤ੍ਤੇ,

ਕਾ ਤ੍ਵਂ ਸੁਭੇ ਦੇਵਤੇ ਵਨ੍ਦਸੇ ਮਮਂ.

੬੯੮. ‘‘ਪਲ੍ਲਙ੍ਕੋ ਚ ਤੇ ਮਹਗ੍ਘੋ, ਨਾਨਾਰਤਨਚਿਤ੍ਤਿਤੋ ਰੁਚਿਰੋ;

ਯਤ੍ਥ ਤ੍ਵਂ ਨਿਸਿਨ੍ਨਾ ਵਿਰੋਚਸਿ, ਦੇਵਰਾਜਾਰਿਵ ਨਨ੍ਦਨੇ ਵਨੇ.

੬੯੯. ‘‘ਕਿਂ ਤ੍ਵਂ ਪੁਰੇ ਸੁਚਰਿਤਮਾਚਰੀ ਭਦ੍ਦੇ, ਕਿਸ੍ਸ ਕਮ੍ਮਸ੍ਸ ਵਿਪਾਕਂ;

ਅਨੁਭੋਸਿ ਦੇਵਲੋਕਸ੍ਮਿਂ, ਦੇਵਤੇ ਪੁਚ੍ਛਿਤਾਚਿਕ੍ਖ;

ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ.

੬੯੭. ਤਤ੍ਥ ਪਭਸ੍ਸਰਵਰਵਣ੍ਣਨਿਭੇਤਿ ਨਿਭਾਤਿ ਦਿਬ੍ਬਤੀਤਿ ਨਿਭਾ, ਵਣ੍ਣੋਵ ਨਿਭਾ ਵਣ੍ਣਨਿਭਾ, ਅਤਿਵਿਯ ਓਭਾਸਨਤੋ ਪਭਸ੍ਸਰਾ ਛਵਿਦੋਸਾਭਾਵੇਨ ਵਰਾ ਉਤ੍ਤਮਾ ਵਣ੍ਣਨਿਭਾ ਏਤਿਸ੍ਸਾਤਿ ਪਭਸ੍ਸਰਵਰਵਣ੍ਣਨਿਭਾ. ਆਮਨ੍ਤਨਵਸੇਨ ‘‘ਪਭਸ੍ਸਰਵਰਵਣ੍ਣਨਿਭੇ’’ਤਿ ਵੁਤ੍ਤਂ. ਸੁਰਤ੍ਤਵਤ੍ਥਵਸਨੇਤਿ ਸੁਟ੍ਠੁ ਰਤ੍ਤਵਤ੍ਥਨਿਵਤ੍ਥੇ. ਚਨ੍ਦਨਰੁਚਿਰਗਤ੍ਤੇਤਿ ਚਨ੍ਦਨਾਨੁਲਿਤ੍ਤਂ ਵਿਯ ਰੁਚਿਰਗਤ੍ਤੇ, ਗੋਸੀਤਚਨ੍ਦਨੇਨ ਬਹਲਤਰਾਨੁਲਿਤ੍ਤਂ ਵਿਯ ਸੁਰਤ੍ਤਮਨੁਞ੍ਞਸਰੀਰਾਵਯਵੇਤਿ ਅਤ੍ਥੋ, ਚਨ੍ਦਨਾਨੁਲੇਪੇਨ ਵਾ ਰੁਚਿਰਗਤ੍ਤੇ.

ਏਵਂ ਥੇਰੇਨ ਪੁਟ੍ਠਾ ਦੇਵਤਾ ਇਮਾਹਿ ਗਾਥਾਹਿ ਬ੍ਯਾਕਾਸਿ –

੭੦੦. ‘‘ਪਿਣ੍ਡਾਯ ਤੇ ਚਰਨ੍ਤਸ੍ਸ, ਮਾਲਂ ਫਾਣਿਤਞ੍ਚ ਅਦਦਂ ਭਨ੍ਤੇ;

ਤਸ੍ਸ ਕਮ੍ਮਸ੍ਸਿਦਂ ਵਿਪਾਕਂ, ਅਨੁਭੋਮਿ ਦੇਵਲੋਕਸ੍ਮਿਂ.

੭੦੧. ‘‘ਹੋਤਿ ਚ ਮੇ ਅਨੁਤਾਪੋ, ਅਪਰਦ੍ਧਂ ਦੁਕ੍ਖਿਤਞ੍ਚ ਮੇ ਭਨ੍ਤੇ;

ਸਾਹਂ ਧਮ੍ਮਂ ਨਾਸ੍ਸੋਸਿਂ, ਸੁਦੇਸਿਤਂ ਧਮ੍ਮਰਾਜੇਨ.

੭੦੨. ‘‘ਤਂ ਤਂ ਵਦਾਮਿ ਭਦ੍ਦਨ੍ਤੇ, ਯਸ੍ਸ ਮੇ ਅਨੁਕਮ੍ਪਿਯੋ ਕੋਚਿ;

ਧਮ੍ਮੇਸੁ ਤਂ ਸਮਾਦਪੇਥ, ਸੁਦੇਸਿਤਂ ਧਮ੍ਮਰਾਜੇਨ.

੭੦੩. ‘‘ਯੇਸਂ ਅਤ੍ਥਿ ਸਦ੍ਧਾ ਬੁਦ੍ਧੇ, ਧਮ੍ਮੇ ਚ ਸਙ੍ਘਰਤਨੇ;

ਤੇ ਮਂ ਅਤਿਵਿਰੋਚਨ੍ਤਿ, ਆਯੁਨਾ ਯਸਸਾ ਸਿਰਿਯਾ.

੭੦੪. ‘‘ਪਤਾਪੇਨ ਵਣ੍ਣੇਨ ਉਤ੍ਤਰਿਤਰਾ, ਅਞ੍ਞੇ ਮਹਿਦ੍ਧਿਕਤਰਾ ਮਯਾ ਦੇਵਾ’’ਤਿ.

੭੦੦. ਤਤ੍ਥ ਮਾਲਨ੍ਤਿ ਸੁਮਨਪੁਪ੍ਫਂ. ਫਾਣਿਤਨ੍ਤਿ ਉਚ੍ਛੁਰਸਂ ਗਹੇਤ੍ਵਾ ਕਤਫਾਣਿਤਂ.

੭੦੧. ਅਨੁਤਾਪੋਤਿ ਵਿਪ੍ਪਟਿਸਾਰੋ. ਤਸ੍ਸ ਕਾਰਣਮਾਹ ‘‘ਅਪਰਦ੍ਧਂ ਦੁਕ੍ਖਤਞ੍ਚ ਮੇ ਭਨ੍ਤੇ’’ਤਿ. ਇਦਾਨਿ ਤਂ ਸਰੂਪਤੋ ਦਸ੍ਸੇਤਿ ‘‘ਸਾਹਂ ਧਮ੍ਮਂ ਨਾਸ੍ਸੋਸਿ’’ਨ੍ਤਿ, ਸਾ ਅਹਂ ਤਦਾ ਤਵ ਦੇਸੇਤੁਕਾਮਸ੍ਸ ਧਮ੍ਮਂ ਨ ਸੁਣਿਂ. ਕੀਦਿਸਂ? ਸੁਦੇਸਿਤਂ ਧਮ੍ਮਰਾਜੇਨਾਤਿ, ਸਮ੍ਮਾਸਮ੍ਬੁਦ੍ਧੇਨ ਆਦਿਕਲ੍ਯਾਣਾਦਿਤਾਯ ਏਕਨ੍ਤਨਿਯ੍ਯਾਨਿਕਤਾਯ ਚ ਸ੍ਵਾਖਾਤਨ੍ਤਿ ਅਤ੍ਥੋ.

੭੦੨. ਤਨ੍ਤਿ ਤਸ੍ਮਾ ਧਮ੍ਮਰਾਜੇਨ ਸੁਦੇਸਿਤਤ੍ਤਾ ਅਸਵਨਸ੍ਸ ਚ ਮਾਦਿਸਾਨਂ ਅਨੁਤਾਪਹੇਤੁਭਾਵਤੋ. ਤਨ੍ਤਿ ਤੁਵਂ, ਤੁਯ੍ਹਨ੍ਤਿ ਅਤ੍ਥੋ. ਯਸ੍ਸਾਤਿ ਯੋ ਅਸ੍ਸ. ਅਨੁਕਮ੍ਪਿਯੋਤਿ ਅਨੁਕਮ੍ਪਿਤਬ੍ਬੋ. ਕੋਚੀਤਿ ਯੋ ਕੋਚਿ. ਧਮ੍ਮੇਸੂਤਿ ਸੀਲਾਦਿਧਮ੍ਮੇਸੁ. ‘‘ਧਮ੍ਮੇ ਹੀ’’ਤਿ ਵਾ ਪਾਠੋ, ਸਾਸਨਧਮ੍ਮੇਤਿ ਅਤ੍ਥੋ. ਹੀਤਿ ਨਿਪਾਤਮਤ੍ਤਂ, ਵਚਨਵਿਪਲ੍ਲਾਸੋ ਵਾ. ਤਨ੍ਤਿ ਅਨੁਕਮ੍ਪਿਤਬ੍ਬਪੁਗ੍ਗਲਂ. ਸੁਦੇਸਿਤਨ੍ਤਿ ਸੁਟ੍ਠੁ ਦੇਸਿਤਂ.

੭੦੩-੪. ਤੇ ਮਂ ਅਤਿਵਿਰੋਚਨ੍ਤੀਤਿ ਤੇ ਰਤਨਤ੍ਤਯੇ ਪਸਨ੍ਨਾ ਦੇਵਪੁਤ੍ਤਾ ਮਂ ਅਤਿਕ੍ਕਮਿਤ੍ਵਾ ਵਿਰੋਚਨ੍ਤਿ. ਪਤਾਪੇਨਾਤਿ ਤੇਜਸਾ ਆਨੁਭਾਵੇਨ. ਅਞ੍ਞੇਤਿ ਯੇ ਅਞ੍ਞੇ. ਮਯਾਤਿ ਨਿਸ੍ਸਕ੍ਕੇ ਕਰਣਵਚਨਂ. ਵਣ੍ਣੇਨ ਉਤ੍ਤਰਿਤਰਾ ਮਹਿਦ੍ਧਿਕਤਰਾ ਚ ਦੇਵਾ, ਤੇ ਰਤਨਤ੍ਤਯੇ ਅਭਿਪ੍ਪਸਨ੍ਨਾਯੇਵਾਤਿ ਦਸ੍ਸੇਤਿ. ਸੇਸਂ ਵੁਤ੍ਤਨਯਮੇਵ.

ਪਭਸ੍ਸਰਵਿਮਾਨਵਣ੍ਣਨਾ ਨਿਟ੍ਠਿਤਾ.