੩. ਨਾਗਵਿਮਾਨਵਣ੍ਣਨਾ

ਅਲਙ੍ਕਤਾ ਮਣਿਕਞ੍ਚਨਾਚਿਤਨ੍ਤਿ ਨਾਗਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਬਾਰਾਣਸਿਯਂ ਵਿਹਰਤਿ ਇਸਿਪਤਨੇ ਮਿਗਦਾਯੇ. ਤੇਨ ਸਮਯੇਨ ਬਾਰਾਣਸਿਵਾਸਿਨੀ ਏਕਾ ਉਪਾਸਿਕਾ ਸਦ੍ਧਾ ਪਸਨ੍ਨਾ ਸੀਲਾਚਾਰਸਮ੍ਪਨ੍ਨਾ ਭਗਵਨ੍ਤਂ ਉਦ੍ਦਿਸ੍ਸ ਵਤ੍ਥਯੁਗਂ ਵਾਯਾਪੇਤ੍ਵਾ ਸੁਪਰਿਧੋਤਂ ਕਾਰਾਪੇਤ੍ਵਾ ਉਪਸਙ੍ਕਮਿਤ੍ਵਾ ਭਗਵਤੋ ਪਾਦਮੂਲੇ ਠਪੇਤ੍ਵਾ ਏਵਮਾਹ ‘‘ਪਟਿਗ੍ਗਣ੍ਹਾਤੁ, ਭਨ੍ਤੇ ਭਗਵਾ, ਇਮਂ ਵਤ੍ਥਯੁਗਂ ਅਨੁਕਮ੍ਪਂ ਉਪਾਦਾਯ ਯਂ ਮਮ ਅਸ੍ਸ ਦੀਘਰਤ੍ਤਂ ਹਿਤਾਯ ਸੁਖਾਯਾ’’ਤਿ. ਭਗਵਾ ਤਂ ਪਟਿਗ੍ਗਹੇਤ੍ਵਾ ਤਸ੍ਸਾ ਉਪਨਿਸ੍ਸਯਸਮ੍ਪਤ੍ਤਿਂ ਦਿਸ੍ਵਾ ਧਮ੍ਮਂ ਦੇਸੇਸਿ, ਸਾ ਦੇਸਨਾਵਸਾਨੇ ਸੋਤਾਪਤ੍ਤਿਫਲੇ ਪਤਿਟ੍ਠਹਿਤ੍ਵਾ ਭਗਵਨ੍ਤਂ ਵਨ੍ਦਿਤ੍ਵਾ ਪਦਕ੍ਖਿਣਂ ਕਤ੍ਵਾ ਗੇਹਂ ਅਗਮਾਸਿ. ਸਾ ਨ ਚਿਰਸ੍ਸੇਵ ਕਾਲਂ ਕਤ੍ਵਾ ਤਾਵਤਿਂਸੇਸੁ ਉਪ੍ਪਨ੍ਨਾ ਸਕ੍ਕਸ੍ਸ ਦੇਵਰਾਜਸ੍ਸ ਪਿਯਾ ਅਹੋਸਿ ਵਲ੍ਲਭਾ ਯਸੁਤ੍ਤਰਾ ਨਾਮ ਨਾਮੇਨ. ਤਸ੍ਸਾ ਪੁਞ੍ਞਾਨੁਭਾਵੇਨ ਹੇਮਜਾਲਸਞ੍ਛਨ੍ਨੋ ਕੁਞ੍ਜਰਵਰੋ ਨਿਬ੍ਬਤ੍ਤਿ, ਤਸ੍ਸ ਚ ਖਨ੍ਧੇ ਮਣਿਮਯੋ ਮਣ੍ਡਪੋ, ਮਜ੍ਝੇ ਸੁਪਞ੍ਞਤ੍ਤਰਤਨਪਲ੍ਲਙ੍ਕੋ ਨਿਬ੍ਬਤ੍ਤਿ, ਦ੍ਵੀਸੁ ਦਨ੍ਤੇਸੁ ਚਸ੍ਸ ਕਮਲਕੁਵਲਯੁਜ੍ਜਲਾ ਰਮਣੀਯਾ ਦ੍ਵੇ ਪੋਕ੍ਖਰਣਿਯੋ ਪਾਤੁਰਹੇਸੁਂ. ਤਤ੍ਥ ਪਦੁਮਕਣ੍ਣਿਕਾਸੁ ਠਿਤਾ ਦੇਵਧੀਤਾ ਪਗ੍ਗਹਿਤਪਞ੍ਚਙ੍ਗਿਕਤੂਰਿਯਾ ਨਚ੍ਚਨ੍ਤਿ ਚੇਵ ਗਾਯਨ੍ਤਿ ਚ.

ਸਤ੍ਥਾ ਬਾਰਾਣਸਿਯਂ ਯਥਾਭਿਰਨ੍ਤਂ ਵਿਹਰਿਤ੍ਵਾ ਯੇਨ ਸਾਵਤ੍ਥਿ ਤੇਨ ਚਾਰਿਕਂ ਪਕ੍ਕਾਮਿ. ਅਨੁਪੁਬ੍ਬੇਨ ਸਾਵਤ੍ਥਿਂ ਪਤ੍ਵਾ ਤਤ੍ਰ ਸੁਦਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਅਥ ਸਾ ਦੇਵਤਾ ਅਤ੍ਤਨਾ ਅਨੁਭੁਯ੍ਯਮਾਨਂ ਦਿਬ੍ਬਸਮ੍ਪਤ੍ਤਿਂ ਓਲੋਕੇਤ੍ਵਾ ਤਸ੍ਸਾ ਕਾਰਣਂ ਉਪਧਾਰੇਨ੍ਤੀ ‘‘ਸਤ੍ਥੁ ਵਤ੍ਥਯੁਗਦਾਨਕਾਰਣ’’ਨ੍ਤਿ ਞਤ੍ਵਾ ਸਞ੍ਜਾਤਸੋਮਨਸ੍ਸਾ ਭਗਵਤਿ ਪਸਾਦਬਹੁਮਾਨਾ ਵਨ੍ਦਿਤੁਕਾਮਾ ਅਭਿਕ੍ਕਨ੍ਤਾਯ ਰਤ੍ਤਿਯਾ ਹਤ੍ਥਿਕ੍ਖਨ੍ਧਵਰਗਤਾ ਆਕਾਸੇਨ ਆਗਨ੍ਤ੍ਵਾ ਤਤੋ ਓਤਰਿਤ੍ਵਾ ਭਗਵਨ੍ਤਂ ਵਨ੍ਦਿਤ੍ਵਾ ਅਞ੍ਜਲਿਂ ਪਗ੍ਗਯ੍ਹ ਏਕਮਨ੍ਤਂ ਅਟ੍ਠਾਸਿ. ਤਂ ਆਯਸ੍ਮਾ ਵਙ੍ਗੀਸੋ ਭਗਵਤੋ ਅਨੁਞ੍ਞਾਯ ਇਮਾਹਿ ਗਾਥਾਹਿ ਪੁਚ੍ਛਿ –

੭੦੫. ‘‘ਅਲਙ੍ਕਤਾ ਮਣਿਕਞ੍ਚਨਾਚਿਤਂ, ਸੋਵਣ੍ਣਜਾਲਚਿਤਂ ਮਹਨ੍ਤਂ;

ਅਭਿਰੁਯ੍ਹ ਗਜਵਰਂ ਸੁਕਪ੍ਪਿਤਂ, ਇਧਾਗਮਾ ਵੇਹਾਯਸਂ ਅਨ੍ਤਲਿਕ੍ਖੇ.

੭੦੬. ‘‘ਨਾਗਸ੍ਸ ਦਨ੍ਤੇਸੁ ਦੁਵੇਸੁ ਨਿਮ੍ਮਿਤਾ, ਅਚ੍ਛੋਦਕਾ ਪਦੁਮਿਨਿਯੋ ਸੁਫੁਲ੍ਲਾ;

ਪਦੁਮੇਸੁ ਚ ਤੂਰਿਯਗਣਾ ਪਭਿਜ੍ਜਰੇ, ਇਮਾ ਚ ਨਚ੍ਚਨ੍ਤਿ ਮਨੋਹਰਾਯੋ.

੭੦੭. ‘‘ਦੇਵਿਦ੍ਧਿਪਤ੍ਤਾਸਿ ਮਹਾਨੁਭਾਵੇ, ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੭੦੫. ਤਤ੍ਥ ਅਲਙ੍ਕਤਾਤਿ ਸਬ੍ਬਾਭਰਣਵਿਭੂਸਿਤਾ. ਮਣਿਕਞ੍ਚਨਾਚਿਤਨ੍ਤਿ ਤੇਹਿ ਦਿਬ੍ਬਮਾਨੇਹਿ ਮਣਿਸੁਵਣ੍ਣੇਹਿ ਆਚਿਤਂ. ਸੋਵਣ੍ਣਜਾਲਚਿਤਨ੍ਤਿ ਹੇਮਜਾਲਸਞ੍ਛਨ੍ਨਂ. ਮਹਨ੍ਤਨ੍ਤਿ ਵਿਪੁਲਂ. ਸੁਕਪ੍ਪਿਤਨ੍ਤਿ ਗਮਨਸਨ੍ਨਾਹਵਸੇਨ ਸੁਟ੍ਠੁ ਸਨ੍ਨਦ੍ਧਂ. ਵੇਹਾਯਸਨ੍ਤਿ ਵੇਹਾਯਸਭੂਤੇ ਹਤ੍ਥਿਪਿਟ੍ਠੇ. ਅਨ੍ਤਲਿਕ੍ਖੇਤਿ ਆਕਾਸੇ, ‘‘ਅਲਙ੍ਕਤਮਣਿਕਞ੍ਚਨਾਚਿਤ’’ਨ੍ਤਿਪਿ ਪਾਠੋ. ਅਯਞ੍ਹੇਤ੍ਥ ਸਙ੍ਖੇਪਤ੍ਥੋ – ਦੇਵਤੇ, ਤ੍ਵਂ ਸਬ੍ਬਾਲਙ੍ਕਾਰੇਹਿ ਅਲਙ੍ਕਤਾ ਅਲਙ੍ਕਤਮਣਿਕਞ੍ਚਨਾਚਿਤਂ, ਅਤਿਵਿਯ ਦਿਬ੍ਬਮਾਨੇਹਿ ਮਣੀਹਿ ਕਞ੍ਚਨੇਹਿ ਚ ਅਲਙ੍ਕਰਣਵਸੇਨ ਖਚਿਤਂ, ਹੇਮਜਾਲੇਹਿ ਕੁਮ੍ਭਾਲਙ੍ਕਾਰਾਦਿਭੇਦੇਹਿ ਹਤ੍ਥਾਲਙ੍ਕਾਰੇਹਿ ਚਿਤਂ ਆਮੁਤ੍ਤਂ ਮਹਨ੍ਤਂ ਅਤਿਵਿਯ ਬ੍ਰਹਨ੍ਤਂ ਉਤ੍ਤਮਂ ਗਜਂ ਆਰੁਯ੍ਹ ਹਤ੍ਥਿਪਿਟ੍ਠਿਯਾ ਨਿਸਿਨ੍ਨਾ ਆਕਾਸੇਨੇਵ ਇਧ ਅਮ੍ਹਾਕਂ ਸਨ੍ਤਿਕਂ ਆਗਤਾਤਿ.

੭੦੬. ਨਾਗਸ੍ਸ ਦਨ੍ਤੇਸੁ ਦੁਵੇਸੁ ਨਿਮ੍ਮਿਤਾਤਿ ਏਰਾਵਣਸ੍ਸ ਵਿਯ ਨਾਗਰਾਜਸ੍ਸ ਇਮਸ੍ਸ ਦ੍ਵੀਸੁ ਦਨ੍ਤੇਸੁ ਦ੍ਵੇ ਪੋਕ੍ਖਰਣਿਯੋ ਸੁਚਰਿਤਸਿਪ੍ਪਿਨਾ ਸੁਟ੍ਠੁ ਵਿਰਚਿਤਾ. ਤੂਰਿਯਗਣਾਤਿ ਪਞ੍ਚਙ੍ਗਿਕਤੂਰਿਯਸਮੂਹਾ. ਪਭਿਜ੍ਜਰੇਤਿ ਦ੍ਵਾਦਸਨ੍ਨਂ ਲਯਭੇਦਾਨਂ ਵਸੇਨ ਪਭੇਦਂ ਗਚ੍ਛਨ੍ਤਿ. ‘‘ਪਵਜ੍ਜਰੇ’’ਤਿ ਚ ਪਠਨ੍ਤਿ, ਪਕਾਰੇਹਿ ਵਾਦੀਯਨ੍ਤੀਤਿ ਅਤ੍ਥੋ.

ਏਵਂ ਥੇਰੇਨ ਪੁਟ੍ਠਾ ਦੇਵਤਾ ਇਮਾਹਿ ਗਾਥਾਹਿ ਵਿਸ੍ਸਜ੍ਜੇਸਿ –

੭੦੮. ‘‘ਬਾਰਾਣਸਿਯਂ ਉਪਸਙ੍ਕਮਿਤ੍ਵਾ, ਬੁਦ੍ਧਸ੍ਸਹਂ ਵਤ੍ਥਯੁਗਂ ਅਦਾਸਿਂ;

ਪਾਦਾਨਿ ਵਨ੍ਦਿਤ੍ਵਾ ਛਮਾ ਨਿਸੀਦਿਂ, ਵਿਤ੍ਤਾ ਚਹਂ ਅਞ੍ਜਲਿਕਂ ਅਕਾਸਿਂ.

੭੦੯. ‘‘ਬੁਦ੍ਧੋ ਚ ਮੇ ਕਞ੍ਚਨਸਨ੍ਨਿਭਤ੍ਤਚੋ, ਅਦੇਸਯਿ ਸਮੁਦਯਦੁਕ੍ਖਨਿਚ੍ਚਤਂ;

ਅਸਙ੍ਖਤਂ ਦੁਕ੍ਖਨਿਰੋਧਸਸ੍ਸਤਂ, ਮਗ੍ਗਂ ਅਦੇਸਯਿ ਯਤੋ ਵਿਜਾਨਿਸਂ.

੭੧੦. ‘‘ਅਪ੍ਪਾਯੁਕੀ ਕਾਲਕਤਾ ਤਤੋ ਚੁਤਾ, ਉਪਪਨ੍ਨਾ ਤਿਦਸਗਣਂ ਯਸਸ੍ਸਿਨੀ;

ਸਕ੍ਕਸ੍ਸਹਂ ਅਞ੍ਞਤਰਾ ਪਜਾਪਤਿ, ਯਸੁਤ੍ਤਰਾ ਨਾਮ ਦਿਸਾਸੁ ਵਿਸ੍ਸੁਤਾ’’ਤਿ.

੭੦੮-੯. ਤਤ੍ਥ ਛਮਾਤਿ ਭੂਮਿਯਂ. ਭੁਮ੍ਮਤ੍ਥੇ ਹਿ ਇਦਂ ਪਚ੍ਚਤ੍ਤਵਚਨਂ. ਵਿਤ੍ਤਾਤਿ ਤੁਟ੍ਠਾ. ਯਤੋਤਿ ਯਤੋ ਸਤ੍ਥੁ ਸਾਮੁਕ੍ਕਂਸਿਕਧਮ੍ਮਦੇਸਨਤੋ. ਵਿਜਾਨਿਸਨ੍ਤਿ ਚਤ੍ਤਾਰਿ ਅਰਿਯਸਚ੍ਚਾਨਿ ਪਟਿਵਿਜ੍ਝਿਂ.

੭੧੦. ਅਪ੍ਪਾਯੁਕੀਤਿ ‘‘ਈਦਿਸਂ ਨਾਮ ਉਲ਼ਾਰਂ ਪੁਞ੍ਞਂ ਕਤ੍ਵਾ ਨ ਤਯਾ ਏਤਸ੍ਮਿਂ ਦੁਕ੍ਖਬਹੁਲੇ ਮਨੁਸ੍ਸਤ੍ਤਭਾਵੇ ਏਵਂ ਠਾਤਬ੍ਬ’’ਨ੍ਤਿ ਸਞ੍ਜਾਤਾਭਿਸਨ੍ਧਿਨਾ ਵਿਯ ਪਰਿਕ੍ਖਯਂ ਗਤੇਨ ਕਮ੍ਮੁਨਾ ਅਪ੍ਪਾਯੁਕਾ ਸਮਾਨਾ. ਅਞ੍ਞਤਰਾ ਪਜਾਪਤੀਤਿ ਸੋਲ਼ਸਸਹਸ੍ਸਾਨਂ ਮਹੇਸੀਨਂ ਅਞ੍ਞਤਰਾ. ਦਿਸਾਸੁ ਵਿਸ੍ਸੁਤਾਤਿ ਦ੍ਵੀਸੁ ਦੇਵਲੋਕੇਸੁ ਸਬ੍ਬਦਿਸਾਸੁ ਪਾਕਟਾ ਪਞ੍ਞਾਤਾ. ਸੇਸਂ ਵੁਤ੍ਤਨਯਮੇਵ.

ਨਾਗਵਿਮਾਨਵਣ੍ਣਨਾ ਨਿਟ੍ਠਿਤਾ.