੧੨. ਰਜ੍ਜੁਮਾਲਾਵਿਮਾਨਵਣ੍ਣਨਾ

ਅਭਿਕ੍ਕਨ੍ਤੇਨ ਵਣ੍ਣੇਨਾਤਿ ਰਜ੍ਜੁਮਾਲਾਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ. ਤੇਨ ਸਮਯੇਨ ਗਯਾਗਾਮਕੇ ਅਞ੍ਞਤਰਸ੍ਸ ਬ੍ਰਾਹ੍ਮਣਸ੍ਸ ਧੀਤਾ ਤਸ੍ਮਿਂਯੇਵ ਗਾਮੇ ਏਕਸ੍ਸ ਬ੍ਰਾਹ੍ਮਣਕੁਮਾਰਸ੍ਸ ਦਿਨ੍ਨਾ ਪਤਿਕੁਲਂ ਗਤਾ, ਤਸ੍ਮਿਂ ਗੇਹੇ ਇਸ੍ਸਰਿਯਂ ਵਤ੍ਤੇਨ੍ਤੀ ਤਿਟ੍ਠਤਿ. ਸਾ ਤਸ੍ਮਿਂ ਗੇਹੇ ਦਾਸਿਯਾ ਧੀਤਰਂ ਦਿਸ੍ਵਾ ਨ ਸਹਤਿ. ਦਿਟ੍ਠਕਾਲਤੋ ਪਟ੍ਠਾਯ ਕੋਧੇਨ ਤਟਤਟਾਯਮਾਨਾ ਅਕ੍ਕੋਸਤਿ ਪਰਿਭਾਸਤਿ, ਖਟਕਞ੍ਚਸ੍ਸਾ ਦੇਤਿ. ਯਦਾ ਪਨ ਸਾ ਵਯਪ੍ਪਤ੍ਤਿਯਾ ਕਿਚ੍ਚਸਮਤ੍ਥਾ ਜਾਤਾ, ਤਦਾ ਨਂ ਜਣ੍ਣੁਕਪ੍ਪਰਮੁਟ੍ਠੀਹਿ ਪਹਰਤੇਵ ਯਥਾ ਤਂ ਪੁਰਿਮਜਾਤੀਸੁ ਬਦ੍ਧਾਘਾਤਾ.

ਸਾ ਕਿਰ ਦਾਸੀ ਕਸ੍ਸਪਦਸਬਲਸ੍ਸ ਕਾਲੇ ਤਸ੍ਸਾ ਸਾਮਿਨੀ ਅਹੋਸਿ, ਇਤਰਾ ਦਾਸੀ. ਸਾ ਤਂ ਲੇਡ੍ਡੁਦਣ੍ਡਾਦੀਹਿ ਮੁਟ੍ਠਿਆਦੀਹਿ ਚ ਅਭਿਣ੍ਹਂ ਅਭਿਹਨਤਿ. ਸਾ ਤੇਨ ਨਿਬ੍ਬਿਨ੍ਨਾ ਯਥਾਬਲਂ ਦਾਨਾਦੀਨਿ ਪੁਞ੍ਞਾਨਿ ਕਤ੍ਵਾ ‘‘ਅਨਾਗਤੇ ਅਹਂ ਸਾਮਿਨੀ ਹੁਤ੍ਵਾ ਇਮਿਸ੍ਸਾ ਉਪਰਿ ਇਸ੍ਸਰਿਯਂ ਵਤ੍ਤੇਯ੍ਯ’’ਨ੍ਤਿ ਪਤ੍ਥਨਂ ਠਪੇਸਿ. ਅਥ ਸਾ ਦਾਸੀ ਤਤੋ ਚੁਤਾ ਅਪਰਾਪਰਂ ਸਂਸਰਨ੍ਤੀ ਇਮਸ੍ਮਿਂ ਬੁਦ੍ਧੁਪ੍ਪਾਦੇ ਵੁਤ੍ਤਨਯੇਨ ਗਯਾਗਾਮਕੇ ਬ੍ਰਾਹ੍ਮਣਕੁਲੇ ਨਿਬ੍ਬਤ੍ਤਿਤ੍ਵਾ ਪਤਿਕੁਲਂ ਗਤਾ, ਇਤਰਾਪਿ ਤਸ੍ਸਾ ਦਾਸੀ ਅਹੋਸਿ. ਏਵਂ ਬਦ੍ਧਾਘਾਤਤਾਯ ਸਾ ਤਂ ਵਿਹੇਠੇਤਿ.

ਏਵਂ ਵਿਹੇਠੇਨ੍ਤੀ ਅਕਾਰਣੇਨੇਵ ਕੇਸੇਸੁ ਗਹੇਤ੍ਵਾ ਹਤ੍ਥੇਹਿ ਚ ਪਾਦੇਹਿ ਚ ਸੁਹਤਂ ਹਨਿ. ਸਾ ਨ੍ਹਾਪਿਤਸਾਲਂ ਗਨ੍ਤ੍ਵਾ ਖੁਰਮੁਣ੍ਡਂ ਕਾਰੇਤ੍ਵਾ ਅਗਮਾਸਿ. ਸਾਮਿਨੀ ‘‘ਕਿਂ ਜੇ ਦੁਟ੍ਠਦਾਸਿ ਮੁਣ੍ਡਨਮਤ੍ਤੇਨ ਤਵ ਵਿਪ੍ਪਮੋਕ੍ਖੋ’’ਤਿ ਰਜ੍ਜੁਂ ਸੀਸੇ ਬਨ੍ਧਿਤ੍ਵਾ ਤਤ੍ਥ ਨਂ ਗਹੇਤ੍ਵਾ ਓਣਮੇਤ੍ਵਾ ਘਾਤੇਤਿ, ਤਸ੍ਸਾ ਤਞ੍ਚ ਰਜ੍ਜੁਂ ਅਪਨੇਤੁਂ ਨ ਦੇਤਿ. ਤਤੋ ਪਟ੍ਠਾਯ ਦਾਸਿਯਾ ‘‘ਰਜ੍ਜੁਮਾਲਾ’’ਤਿ ਨਾਮਂ ਅਹੋਸਿ.

ਅਥੇਕਦਿਵਸਂ ਸਤ੍ਥਾ ਪਚ੍ਚੂਸਸਮਯੇ ਮਹਾਕਰੁਣਾਸਮਾਪਤ੍ਤਿਤੋ ਵੁਟ੍ਠਾਯ ਲੋਕਂ ਵੋਲੋਕੇਨ੍ਤੋ ਰਜ੍ਜੁਮਾਲਾਯ ਸੋਤਾਪਤ੍ਤਿਫਲੂਪਨਿਸ੍ਸਯਂ, ਤਸ੍ਸਾ ਚ ਬ੍ਰਾਹ੍ਮਣਿਯਾ ਸਰਣੇਸੁ ਸੀਲੇਸੁ ਚ ਪਤਿਟ੍ਠਾਨਂ ਦਿਸ੍ਵਾ ਅਰਞ੍ਞਂ ਪਵਿਸਿਤ੍ਵਾ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਨਿਸੀਦਿ ਛਬ੍ਬਣ੍ਣਾ ਬੁਦ੍ਧਰਸ੍ਮਿਯੋ ਵਿਸ੍ਸਜ੍ਜੇਨ੍ਤੋ. ਰਜ੍ਜੁਮਾਲਾਪਿ ਖੋ ਦਿਵਸੇ ਦਿਵਸੇ ਤਾਯ ਤਥਾ ਵਿਹੇਠਿਯਮਾਨਾ ‘‘ਕਿਂ ਮੇ ਇਮਿਨਾ ਦੁਜ੍ਜੀਵਿਤੇਨਾ’’ਤਿ ਨਿਬ੍ਬਿਨ੍ਨਰੂਪਾ ਜੀਵਿਤੇ ਮਰਿਤੁਕਾਮਾ ਘਟਂ ਗਹੇਤ੍ਵਾ ਉਦਕਤਿਤ੍ਥਂ ਗਚ੍ਛਨ੍ਤੀ ਵਿਯ ਗੇਹਤੋ ਨਿਕ੍ਖਨ੍ਤਾ ਅਨੁਕ੍ਕਮੇਨ ਵਨਂ ਪਵਿਸਿਤ੍ਵਾ ਭਗਵਤੋ ਨਿਸਿਨ੍ਨਰੁਕ੍ਖਸ੍ਸ ਅਵਿਦੂਰੇ ਅਞ੍ਞਤਰਸ੍ਸ ਰੁਕ੍ਖਸ੍ਸ ਸਾਖਾਯ ਰਜ੍ਜੁਂ ਬਨ੍ਧਿਤ੍ਵਾ ਪਾਸਂ ਕਤ੍ਵਾ ਉਬ੍ਬਨ੍ਧਿਤੁਕਾਮਾ ਇਤੋ ਚਿਤੋ ਚ ਓਲੋਕੇਨ੍ਤੀ ਅਦ੍ਦਸ ਭਗਵਨ੍ਤਂ ਤਤ੍ਥ ਨਿਸਿਨ੍ਨਂ ਪਾਸਾਦਿਕਂ ਪਸਾਦਨੀਯਂ ਉਤ੍ਤਮਦਮਥਸਮਥਮਨੁਪ੍ਪਤ੍ਤਂ ਛਬ੍ਬਣ੍ਣਬੁਦ੍ਧਰਸ੍ਮਿਯੋ ਵਿਸ੍ਸਜ੍ਜੇਨ੍ਤਂ. ਦਿਸ੍ਵਾ ਬੁਦ੍ਧਗਾਰਵੇਨ ਆਕਡ੍ਢਿਯਮਾਨਹਦਯਾ ‘‘ਕਿਂ ਨੁ ਖੋ ਭਗਵਾ ਮਾਦਿਸਾਨਮ੍ਪਿ ਧਮ੍ਮਂ ਦੇਸੇਤਿ, ਯਮਹਂ ਸੁਤ੍ਵਾ ਇਤੋ ਦੁਜ੍ਜੀਵਿਤਤੋ ਮੁਚ੍ਚੇਯ੍ਯ’’ਨ੍ਤਿ ਚਿਨ੍ਤੇਸਿ.

ਅਥ ਭਗਵਾ ਤਸ੍ਸਾ ਚਿਤ੍ਤਾਚਾਰਂ ਓਲੋਕੇਤ੍ਵਾ ‘‘ਰਜ੍ਜੁਮਾਲੇ’’ਤਿ ਆਹ. ਸਾ ਤਂ ਸੁਤ੍ਵਾ ਅਮਤੇਨ ਵਿਯ ਅਭਿਸਿਤ੍ਤਾ ਪੀਤਿਯਾ ਨਿਰਨ੍ਤਰਂ ਫੁਟ੍ਠਾ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਤਸ੍ਸਾ ਭਗਵਾ ਅਨੁਪੁਬ੍ਬਿਕਥਾਨੁਪੁਬ੍ਬਕਂ ਚਤੁਸਚ੍ਚਕਥਂ ਕਥੇਸਿ, ਸਾ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਸਤ੍ਥਾ ‘‘ਵਟ੍ਟਤਿ ਏਤ੍ਤਕੋ ਰਜ੍ਜੁਮਾਲਾਯ ਅਨੁਗ੍ਗਹੋ, ਇਦਾਨੇਸਾ ਕੇਨਚਿ ਅਪ੍ਪਧਂਸਿਯਾ ਜਾਤਾ’’ਤਿ ਅਰਞ੍ਞਤੋ ਨਿਕ੍ਖਮਿਤ੍ਵਾ ਗਾਮਸ੍ਸ ਅਵਿਦੂਰੇ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਨਿਸੀਦਿ. ਰਜ੍ਜੁਮਾਲਾਪਿ ਅਤ੍ਤਾਨਂ ਵਿਨਿਪਾਤੇਤੁਂ ਅਭਬ੍ਬਤਾਯ ਖਨ੍ਤਿਮੇਤ੍ਤਾਨੁਦ੍ਦਯਸਮ੍ਪਨ੍ਨਤਾਯ ਚ ‘‘ਬ੍ਰਾਹ੍ਮਣੀ ਮਂ ਹਨਤੁ ਵਾ ਵਿਹੇਠੇਤੁ ਵਾ ਯਂ ਵਾ ਤਂ ਵਾ ਕਰੋਤੂ’’ਤਿ ਘਟੇਨ ਉਦਕਂ ਗਹੇਤ੍ਵਾ ਗੇਹਂ ਅਗਮਾਸਿ. ਸਾਮਿਕੋ ਗੇਹਦ੍ਵਾਰੇ ਠਿਤੋ ਤਂ ਦਿਸ੍ਵਾ ‘‘ਤ੍ਵਂ ਅਜ੍ਜ ਉਦਕਤਿਤ੍ਥਂ ਗਤਾ ਚਿਰਾਯਿਤ੍ਵਾ ਆਗਤਾ, ਮੁਖਵਣ੍ਣੋ ਚ ਤੇ ਅਤਿਵਿਯ ਵਿਪ੍ਪਸਨ੍ਨੋ, ਤ੍ਵਞ੍ਚ ਅਞ੍ਞੇਨ ਆਕਾਰੇਨ ਉਪਟ੍ਠਾਸਿ, ਕਿਂ ਏਤ’’ਨ੍ਤਿ ਪੁਚ੍ਛਿ. ਸਾ ਤਸ੍ਸ ਤਂ ਪਵਤ੍ਤਿਂ ਆਚਿਕ੍ਖਿ.

ਬ੍ਰਾਹ੍ਮਣੋ ਤਸ੍ਸਾ ਵਚਨਂ ਸੁਤ੍ਵਾ ਤੁਸ੍ਸਿਤ੍ਵਾ ਗੇਹਂ ਗਨ੍ਤ੍ਵਾ ਰਜ੍ਜੁਮਾਲਾਯ ਉਪਰਿ ‘‘ਤਯਾ ਨ ਕਿਞ੍ਚਿ ਕਾਤਬ੍ਬ’’ਨ੍ਤਿ ਸੁਣਿਸਾਯ ਵਤ੍ਵਾ ਤੁਟ੍ਠਮਾਨਸੋ ਸੀਘਤਰਂ ਸਤ੍ਥੁ ਸਨ੍ਤਿਕਂ ਗਨ੍ਤ੍ਵਾ ਵਨ੍ਦਿਤ੍ਵਾ ਸਾਦਰੇਨ ਕਤਪਟਿਸਨ੍ਥਾਰੋ ਸਤ੍ਥਾਰਂ ਨਿਮਨ੍ਤੇਤ੍ਵਾ ਅਤ੍ਤਨੋ ਗੇਹਂ ਆਨੇਤ੍ਵਾ ਪਣੀਤੇਨ ਖਾਦਨੀਯੇਨ ਭੋਜਨੀਯੇਨ ਪਰਿਵਿਸਿਤ੍ਵਾ ਭਗਵਨ੍ਤਂ ਭੁਤ੍ਤਾਵਿਂ ਓਨੀਤਪਤ੍ਤਪਾਣਿਂ ਉਪਸਙ੍ਕਮਿਤ੍ਵਾ ਏਕਮਨ੍ਤਂ ਨਿਸੀਦਿ, ਸੁਣਿਸਾਪਿਸ੍ਸ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਏਕਮਨ੍ਤਂ ਨਿਸੀਦਿ. ਗਯਾਗਾਮਵਾਸਿਨੋਪਿ ਬ੍ਰਾਹ੍ਮਣਗਹਪਤਿਕਾ ਤਂ ਪਵਤ੍ਤਿਂ ਸੁਤ੍ਵਾ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਅਪ੍ਪੇਕਚ੍ਚੇ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿਂਸੁ, ਅਪ੍ਪੇਕਚ੍ਚੇ ਸਮ੍ਮੋਦਨੀਯਂ ਕਤ੍ਵਾ ਏਕਮਨ੍ਤਂ ਨਿਸੀਦਿਂਸੁ.

ਸਤ੍ਥਾ ਰਜ੍ਜੁਮਾਲਾਯ ਤਸ੍ਸਾ ਚ ਬ੍ਰਾਹ੍ਮਣਿਯਾ ਪੁਰਿਮਜਾਤੀਸੁ ਕਤਕਮ੍ਮਂ ਵਿਤ੍ਥਾਰਤੋ ਕਥੇਤ੍ਵਾ ਸਮ੍ਪਤ੍ਤਪਰਿਸਾਯ ਅਨੁਰੂਪਂ ਧਮ੍ਮਂ ਦੇਸੇਸਿ. ਤਂ ਸੁਤ੍ਵਾ ਬ੍ਰਾਹ੍ਮਣੀ ਚ ਮਹਾਜਨੋ ਚ ਤਤ੍ਥ ਸਨ੍ਨਿਪਤਿਤੋ ਸਰਣੇਸੁ ਚ ਸੀਲੇਸੁ ਚ ਪਤਿਟ੍ਠਹਿ. ਸਤ੍ਥਾ ਆਸਨਾ ਉਟ੍ਠਹਿਤ੍ਵਾ ਸਾਵਤ੍ਥਿਮੇਵ ਅਗਮਾਸਿ. ਬ੍ਰਾਹ੍ਮਣੋ ਰਜ੍ਜੁਮਾਲਂ ਧੀਤੁਟ੍ਠਾਨੇ ਠਪੇਸਿ. ਤਸ੍ਸ ਸੁਣਿਸਾ ਰਜ੍ਜੁਮਾਲਂ ਪਿਯਚਕ੍ਖੂਹਿ ਓਲੋਕੇਨ੍ਤੀ ਯਾਵਜੀਵਂ ਮਨਾਪੇਨੇਵ ਸਿਨੇਹੇਨ ਪਰਿਹਰਿ. ਰਜ੍ਜੁਮਾਲਾ ਅਪਰਭਾਗੇ ਕਾਲਂ ਕਤ੍ਵਾ ਤਾਵਤਿਂਸੇਸੁ ਨਿਬ੍ਬਤ੍ਤਿ, ਅਚ੍ਛਰਾਸਹਸ੍ਸਞ੍ਚਸ੍ਸਾ ਪਰਿਵਾਰੋ ਅਹੋਸਿ. ਸਾ ਸਟ੍ਠਿਸਕਟਭਾਰਪ੍ਪਮਾਣੇਹਿ ਦਿਬ੍ਬਾਭਰਣੇਹਿ ਪਟਿਮਣ੍ਡਿਤਤ੍ਤਭਾਵਾ ਅਚ੍ਛਰਾਸਹਸ੍ਸਪਰਿਵੁਤ੍ਤਾ ਨਨ੍ਦਨਵਨਾਦੀਸੁ ਮਹਤਿਂ ਦਿਬ੍ਬਸਮ੍ਪਤ੍ਤਿਂ ਅਨੁਭਵਮਾਨਾ ਪਮੁਦਿਤਮਨਾ ਵਿਚਰਤਿ. ਅਥਾਯਸ੍ਮਾ ਮਹਾਮੋਗ੍ਗਲ੍ਲਾਨੋ ਦੇਵਚਾਰਿਕਂ ਗਤੋ ਤਂ ਮਹਨ੍ਤੇਨ ਦਿਬ੍ਬਾਨੁਭਾਵੇਨ ਮਹਤਿਯਾ ਦੇਵਿਦ੍ਧਿਯਾ ਵਿਜ੍ਜੋਤਮਾਨਂ ਦਿਸ੍ਵਾ ਤਾਯ ਕਤਕਮ੍ਮਂ ਇਮਾਹਿ ਗਾਥਾਹਿ ਪੁਚ੍ਛਿ.

੮੨੬. ‘‘ਅਭਿਕ੍ਕਨ੍ਤੇਨ ਵਣ੍ਣੇਨ, ਯਾ ਤ੍ਵਂ ਤਿਟ੍ਠਸਿ ਦੇਵਤੇ;

ਹਤ੍ਥੇ ਪਾਦੇ ਚ ਵਿਗ੍ਗਯ੍ਹ, ਨਚ੍ਚਸਿ ਸੁਪ੍ਪਵਾਦਿਤੇ.

੮੨੭. ‘‘ਤਸ੍ਸਾ ਤੇ ਨਚ੍ਚਮਾਨਾਯ, ਅਙ੍ਗਮਙ੍ਗੇਹਿ ਸਬ੍ਬਸੋ;

ਦਿਬ੍ਬਾ ਸਦ੍ਦਾ ਨਿਚ੍ਛਰਨ੍ਤਿ, ਸਵਨੀਯਾ ਮਨੋਰਮਾ.

੮੨੮. ‘‘ਤਸ੍ਸਾ ਤੇ ਨਚ੍ਚਮਾਨਾਯ, ਅਙ੍ਗਮਙ੍ਗੇਹਿ ਸਬ੍ਬਸੋ;

ਦਿਬ੍ਬਾ ਗਨ੍ਧਾ ਪਵਾਯਨ੍ਤਿ, ਸੁਚਿਗਨ੍ਧਾ ਮਨੋਰਮਾ.

੮੨੯. ‘‘ਵਿਵਤ੍ਤਮਾਨਾ ਕਾਯੇਨ, ਯਾ ਵੇਣੀਸੁ ਪਿਲ਼ਨ੍ਧਨਾ;

ਤੇਸਂ ਸੁਯ੍ਯਤਿ ਨਿਗ੍ਘੋਸੋ, ਤੂਰਿਯੇ ਪਞ੍ਚਙ੍ਗਿਕੇ ਯਥਾ.

੮੩੦. ‘‘ਵਟਂਸਕਾ ਵਾਤਧੁਤਾ, ਵਾਤੇਨ ਸਮ੍ਪਕਮ੍ਪਿਤਾ;

ਤੇਸਂ ਸੁਯ੍ਯਤਿ ਨਿਗ੍ਘੋਸੋ, ਤੂਰਿਯੇ ਪਞ੍ਚਙ੍ਗਿਕੇ ਯਥਾ.

੮੩੧. ‘‘ਯਾਪਿ ਤੇ ਸਿਰਸ੍ਮਿਂ ਮਾਲਾ, ਸੁਚਿਗਨ੍ਧਾ ਮਨੋਰਮਾ;

ਵਾਤਿ ਗਨ੍ਧੋ ਦਿਸਾ ਸਬ੍ਬਾ, ਰੁਕ੍ਖੋ ਮਞ੍ਜੂਸਕੋ ਯਥਾ.

੮੩੨. ‘‘ਘਾਯਸੇ ਤਂ ਸੁਚਿਗਨ੍ਧਂ, ਰੂਪਂ ਪਸ੍ਸਸਿ ਅਮਾਨੁਸਂ;

ਦੇਵਤੇ ਪੁਚ੍ਛਿਤਾਚਿਕ੍ਖ, ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ.

੮੨੬. ਤਤ੍ਥ ਹਤ੍ਥੇ ਪਾਦੇ ਚ ਵਿਗ੍ਗਯ੍ਹਾਤਿ ਹਤ੍ਥੇ ਚ ਪਾਦੇ ਚ ਵਿਵਿਧੇਹਿ ਆਕਾਰੇਹਿ ਗਹੇਤ੍ਵਾ, ਪੁਪ੍ਫਮੁਟ੍ਠਿਪੁਪ੍ਫਞ੍ਜਲਿਆਦਿਭੇਦਸ੍ਸ ਸਾਖਾਭਿਨਯਸ੍ਸ ਦਸ੍ਸਨਵਸੇਨ ਵਿਵਿਧੇਹਿ ਆਕਾਰੇਹਿ ਹਤ੍ਥੇ, ਚ, ਸਮਪਾਦਾਦੀਨਮ੍ਪਿ ਠਾਨਵਿਸੇਸਾਨਂ ਦਸ੍ਸਨਵਸੇਨ ਵਿਵਿਧੇਹਿ ਆਕਾਰੇਹਿ ਪਾਦੇ ਚ ਉਪਾਦਿਯਿਤ੍ਵਾਤਿ ਅਤ੍ਥੋ. ਚ-ਸਦ੍ਦੇਨ ਸਾਖਾਭਿਨਯਂ ਸਙ੍ਗਣ੍ਹਾਤਿ. ਨਚ੍ਚਸੀਤਿ ਨਟਸਿ. ਯਾ ਤ੍ਵਨ੍ਤਿ ਯਾ ਵੁਤ੍ਤਨਯਵਸੇਨ ਨਚ੍ਚਂ ਕਰੋਸੀਤਿ ਅਤ੍ਥੋ. ਸੁਪ੍ਪਵਾਦਿਤੇਤਿ ਸੁਨ੍ਦਰੇ ਪਵਜ੍ਜਨੇ ਸਤਿ ਤਵ ਨਚ੍ਚਸ੍ਸ ਅਨੁਰੂਪਵਸੇਨ ਵੀਣਾਵਂਸਮੁਦਿਙ੍ਗਤਾਲ਼ਾਦਿਕੇ ਵਾਦਿਯਮਾਨੇ, ਪਞ੍ਚਙ੍ਗਿਕੇ ਤੂਰਿਯੇ ਪਗ੍ਗਯ੍ਹਮਾਨੇਤਿ ਅਤ੍ਥੋ. ਸੇਸਂ ਹੇਟ੍ਠਾਵਿਮਾਨੇ ਵੁਤ੍ਤਨਯਮੇਵ.

ਏਵਂ ਥੇਰੇਨ ਪੁਚ੍ਛਿਤਾ ਸਾ ਦੇਵਤਾ ਅਤ੍ਤਨੋ ਪੁਰਿਮਜਾਤਿਆਦਿਂ ਇਮਾਹਿ ਗਾਥਾਹਿ ਬ੍ਯਾਕਾਸਿ –

੮੩੩. ‘‘ਦਾਸੀ ਅਹਂ ਪੁਰੇ ਆਸਿਂ, ਗਯਾਯਂ ਬ੍ਰਾਹ੍ਮਣਸ੍ਸਹਂ;

ਅਪ੍ਪਪੁਞ੍ਞਾ ਅਲਕ੍ਖਿਕਾ, ਰਜ੍ਜੁਮਾਲਾਤਿ ਮਂ ਵਿਦੁਂ.

੮੩੪. ‘‘ਅਕ੍ਕੋਸਾਨਂ ਵਧਾਨਞ੍ਚ, ਤਜ੍ਜਨਾਯ ਚ ਉਗ੍ਗਤਾ;

ਕੁਟਂ ਗਹੇਤ੍ਵਾ ਨਿਕ੍ਖਮ੍ਮ, ਅਗਞ੍ਛਿਂ ਉਦਹਾਰਿਯਾ.

੮੩੫. ‘‘ਵਿਪਥੇ ਕੁਟਂ ਨਿਕ੍ਖਿਪਿਤ੍ਵਾ, ਵਨਸਣ੍ਡਂ ਉਪਾਗਮਿਂ;

‘ਇਧੇਵਾਹਂ ਮਰਿਸ੍ਸਾਮਿ, ਕੋ ਅਤ੍ਥੋ ਜੀਵਿਤੇਨ ਮੇ’.

੮੩੬. ‘‘ਦਲ਼੍ਹਂ ਪਾਸਂ ਕਰਿਤ੍ਵਾਨ, ਆਸੁਮ੍ਭਿਤ੍ਵਾਨ ਪਾਦਪੇ;

ਤਤੋ ਦਿਸਾ ਵਿਲੋਕੇਸਿਂ, ‘ਕੋ ਨੁ ਖੋ ਵਨਮਸ੍ਸਿਤੋ’.

੮੩੭. ‘‘ਤਤ੍ਥਦ੍ਦਸਾਸਿਂ ਸਮ੍ਬੁਦ੍ਧਂ, ਸਬ੍ਬਲੋਕਹਿਤਂ ਮੁਨਿਂ;

ਨਿਸਿਨ੍ਨਂ ਰੁਕ੍ਖਮੂਲਸ੍ਮਿਂ, ਝਾਯਨ੍ਤਂ ਅਕੁਤੋਭਯਂ.

੮੩੮. ‘‘ਤਸ੍ਸਾ ਮੇ ਅਹੁ ਸਂਵੇਗੋ, ਅਬ੍ਭੁਤੋ ਲੋਮਹਂਸਨੋ;

‘ਕੋ ਨੁ ਖੋ ਵਨਮਸ੍ਸਿਤੋ, ਮਨੁਸ੍ਸੋ ਉਦਾਹੁ ਦੇਵਤਾ’.

੮੩੯. ‘‘ਪਾਸਾਦਿਕਂ ਪਸਾਦਨੀਯਂ, ਵਨਾ ਨਿਬ੍ਬਨਮਾਗਤਂ;

ਦਿਸ੍ਵਾ ਮਨੋ ਮੇ ਪਸੀਦਿ, ਨਾਯਂ ਯਾਦਿਸਕੀਦਿਸੋ.

੮੪੦. ‘‘ਗੁਤ੍ਤਿਨ੍ਦ੍ਰਿਯੋ ਝਾਨਰਤੋ, ਅਬਹਿਗ੍ਗਤਮਾਨਸੋ;

ਹਿਤੋ ਸਬ੍ਬਸ੍ਸ ਲੋਕਸ੍ਸ, ਬੁਦ੍ਧੋ ਅਯਂ ਭਵਿਸ੍ਸਤਿ.

੮੪੧. ‘‘ਭਯਭੇਰਵੋ ਦੁਰਾਸਦੋ, ਸੀਹੋਵ ਗੁਹਮਸ੍ਸਿਤੋ;

ਦੁਲ੍ਲਭਾਯਂ ਦਸ੍ਸਨਾਯ, ਪੁਪ੍ਫਂ ਓਦੁਮ੍ਬਰਂ ਯਥਾ.

੮੪੨. ‘‘ਸੋ ਮਂ ਮੁਦੂਹਿ ਵਾਚਾਹਿ, ਆਲਪਿਤ੍ਵਾ ਤਥਾਗਤੋ;

ਰਜ੍ਜੁਮਾਲੇਤਿ ਮਂਵੋਚ, ਸਰਣਂ ਗਚ੍ਛ ਤਥਾਗਤਂ.

੮੪੩. ‘‘ਤਾਹਂ ਗਿਰਂ ਸੁਣਿਤ੍ਵਾਨ, ਨੇਲਂ ਅਤ੍ਥਵਤਿਂ ਸੁਚਿਂ;

ਸਣ੍ਹਂ ਮੁਦੁਞ੍ਚ ਵਗ੍ਗੁਞ੍ਚ, ਸਬ੍ਬਸੋਕਾਪਨੂਦਨਂ.

੮੪੪. ‘‘ਕਲ੍ਲਚਿਤ੍ਤਞ੍ਚ ਮਂ ਞਤ੍ਵਾ, ਪਸਨ੍ਨਂ ਸੁਦ੍ਧਮਾਨਸਂ;

ਹਿਤੋ ਸਬ੍ਬਸ੍ਸ ਲੋਕਸ੍ਸ, ਅਨੁਸਾਸਿ ਤਥਾਗਤੋ.

੮੪੫. ‘‘ਇਦਂ ਦੁਕ੍ਖਨ੍ਤਿ ਮਂਵੋਚ, ਅਯਂ ਦੁਕ੍ਖਸ੍ਸ ਸਮ੍ਭਵੋ;

ਦੁਕ੍ਖਨਿਰੋਧੋ ਮਗ੍ਗੋ ਚ, ਅਞ੍ਜਸੋ ਅਮਤੋਗਧੋ.

੮੪੬. ‘‘ਅਨੁਕਮ੍ਪਕਸ੍ਸ ਕੁਸਲਸ੍ਸ, ਓਵਾਦਮ੍ਹਿ ਅਹਂ ਠਿਤਾ;

ਅਜ੍ਝਗਾ ਅਮਤਂ ਸਨ੍ਤਿਂ, ਨਿਬ੍ਬਾਨਂ ਪਦਮਚ੍ਚੁਤਂ.

੮੪੭. ‘‘ਸਾਹਂ ਅਵਟ੍ਠਿਤਾਪੇਮਾ, ਦਸ੍ਸਨੇ ਅਵਿਕਮ੍ਪਿਨੀ;

ਮੂਲਜਾਤਾਯ ਸਦ੍ਧਾਯ, ਧੀਤਾ ਬੁਦ੍ਧਸ੍ਸ ਓਰਸਾ.

੮੪੮. ‘‘ਸਾਹਂ ਰਮਾਮਿ ਕੀਲ਼ਾਮਿ, ਮੋਦਾਮਿ ਅਕੁਤੋਭਯਾ;

ਦਿਬ੍ਬਮਾਲਂ ਧਾਰਯਾਮਿ, ਪਿਵਾਮਿ ਮਧੁਮਦ੍ਦਵਂ.

੮੪੯. ‘‘ਸਟ੍ਠਿਤੂਰਿਯਸਹਸ੍ਸਾਨਿ, ਪਟਿਬੋਧਂ ਕਰੋਨ੍ਤਿ ਮੇ;

ਆਲ਼ਮ੍ਬੋ ਗਗ੍ਗਰੋ ਭੀਮੋ, ਸਾਧੁਵਾਦੀ ਚ ਸਂਸਯੋ.

੮੫੦. ‘‘ਪੋਕ੍ਖਰੋ ਚ ਸੁਫਸ੍ਸੋ ਚ, ਵਿਣਾਮੋਕ੍ਖਾ ਚ ਨਾਰਿਯੋ;

ਨਨ੍ਦਾ ਚੇਵ ਸੁਨਨ੍ਦਾ ਚ, ਸੋਣਦਿਨ੍ਨਾ ਸੁਚਿਮ੍ਹਿਤਾ.

੮੫੧. ‘‘ਅਲਮ੍ਬੁਸਾ ਮਿਸ੍ਸਕੇਸੀ ਚ, ਪੁਣ੍ਡਰੀਕਾਤਿਦਾਰੁਣੀ;

ਏਣੀਫਸ੍ਸਾ ਸੁਫਸ੍ਸਾ ਚ, ਸੁਭਦ੍ਦਾ ਮੁਦੁਵਾਦਿਨੀ.

੮੫੨. ‘‘ਏਤਾ ਚਞ੍ਞਾ ਚ ਸੇਯ੍ਯਾਸੇ, ਅਚ੍ਛਰਾਨਂ ਪਬੋਧਿਕਾ;

ਤਾ ਮਂ ਕਾਲੇਨੁਪਾਗਨ੍ਤ੍ਵਾ, ਅਭਿਭਾਸਨ੍ਤਿ ਦੇਵਤਾ.

੮੫੩. ‘‘ਹਨ੍ਦ ਨਚ੍ਚਾਮ ਗਾਯਾਮ, ਹਨ੍ਦ ਤਂ ਰਮਯਾਮਸੇ;

ਨਯਿਦਂ ਅਕਤਪੁਞ੍ਞਾਨਂ, ਕਤਪੁਞ੍ਞਾਨਮੇਵਿਦਂ.

੮੫੪. ‘‘ਅਸੋਕਂ ਨਨ੍ਦਨਂ ਰਮ੍ਮਂ, ਤਿਦਸਾਨਂ ਮਹਾਵਨਂ;

ਸੁਖਂ ਅਕਤਪੁਞ੍ਞਾਨਂ, ਇਧ ਨਤ੍ਥਿ ਪਰਤ੍ਥ ਚ.

੮੫੫. ‘‘ਸੁਖਞ੍ਚ ਕਤਪੁਞ੍ਞਾਨਂ, ਇਧ ਚੇਵ ਪਰਤ੍ਥ ਚ;

ਤੇਸਂ ਸਹਬ੍ਯਕਾਮਾਨਂ, ਕਤ੍ਤਬ੍ਬਂ ਕੁਸਲਂ ਬਹੁਂ;

ਕਤਪੁਞ੍ਞਾ ਹਿ ਮੋਦਨ੍ਤਿ, ਸਗ੍ਗੇ ਭੋਗਸਮਙ੍ਗਿਨੋ.

੮੫੬. ‘‘ਬਹੂਨਂ ਵਤ ਅਤ੍ਥਾਯ, ਉਪ੍ਪਜ੍ਜਨ੍ਤਿ ਤਥਾਗਤਾ;

ਦਕ੍ਖਿਣੇਯ੍ਯਾ ਮਨੁਸ੍ਸਾਨਂ, ਪੁਞ੍ਞਕ੍ਖੇਤ੍ਤਾਨਮਾਕਰਾ;

ਯਤ੍ਥ ਕਾਰਂ ਕਰਿਤ੍ਵਾਨ, ਸਗ੍ਗੇ ਮੋਦਨ੍ਤਿ ਦਾਯਕਾ’’ਤਿ.

੮੩੩. ਤਤ੍ਥ ਦਾਸੀ ਅਹਂ ਪੁਰੇ ਆਸਿਨ੍ਤਿ ਪੁਰੇ ਪੁਰਿਮਜਾਤਿਯਂ ਅਹਂ ਅਨ੍ਤੋਜਾਤਾ ਦਾਸੀ ਅਹੋਸਿਂ. ਤਤ੍ਥ ਕਸ੍ਸਾਤਿ ਆਹ ‘‘ਗਯਾਯਂ ਬ੍ਰਾਹ੍ਮਣਸ੍ਸਹ’’ਨ੍ਤਿ, ਗਯਾਨਾਮਕੇ ਗਾਮੇ ਅਞ੍ਞਤਰਸ੍ਸ ਬ੍ਰਾਹ੍ਮਣਸ੍ਸ. ਹਨ੍ਤਿ ਨਿਪਾਤਮਤ੍ਤਂ. ਅਪ੍ਪਪੁਞ੍ਞਾਤਿ ਮਨ੍ਦਭਾਗ੍ਯਾ ਅਪੁਞ੍ਞਾ. ਅਲਕ੍ਖਿਕਾਤਿ ਨਿਸ੍ਸਿਰਿਕਾ ਕਾਲਕਣ੍ਣੀ. ਰਜ੍ਜੁਮਾਲਾਤਿ ਮਂ ਵਿਦੁਨ੍ਤਿ, ਕੇਸੇ ਗਹੇਤ੍ਵਾ ਆਕਡ੍ਢਨਪਰਿਕਡ੍ਢਨਦੁਕ੍ਖੇਨ ਮੁਣ੍ਡਕੇ ਕਤੇ ਪੁਨਪਿ ਤਦਤ੍ਥਮੇਵ ਸੀਸੇ ਦਲ਼੍ਹਂ ਬਨ੍ਧਿਤ੍ਵਾ ਠਪਿਤਰਜ੍ਜੁਕੁਣ੍ਡਲਕਵਸੇਨ ‘‘ਰਜ੍ਜੁਮਾਲਾ’’ਤਿ ਮਂ ਮਨੁਸ੍ਸਾ ਜਾਨਿਂਸੁ.

੮੩੪. ਵਧਾਨਨ੍ਤਿ ਤਾਲ਼ਨਾਨਂ. ਤਜ੍ਜਨਾਯਾਤਿ ਭਯਸਂਤਜ੍ਜਨੇਨ. ਉਗ੍ਗਤਾਤਿ ਉਗ੍ਗਤਾਯ ਦੋਮਨਸ੍ਸੁਪ੍ਪਤ੍ਤਿਯਾ. ਉਦਹਾਰਿਯਾਤਿ ਉਦਕਹਾਰਿਕਾ, ਉਦਕਂ ਆਹਰਨ੍ਤੀ ਵਿਯ ਹੁਤ੍ਵਾਤਿ ਅਧਿਪ੍ਪਾਯੋ.

੮੩੫. ਵਿਪਥੇਤਿ ਅਪਥੇ, ਮਗ੍ਗਤੋ ਅਪਕ੍ਕਮਿਤ੍ਵਾਤਿ ਅਤ੍ਥੋ. ਕ੍ਵਤ੍ਥੋਤਿ ਕੋ ਅਤ੍ਥੋ. ਸੋਯੇਵ ਵਾ ਪਾਠੋ.

੮੩੬. ਦਲ਼੍ਹਂ ਪਾਸਂ ਕਰਿਤ੍ਵਾਨਾਤਿ ਬਨ੍ਧਨਪਾਸਂ ਥਿਰਂ ਅਚ੍ਛਿਜ੍ਜਨਕਂ ਕਤ੍ਵਾ. ਆਸੁਮ੍ਭਿਤ੍ਵਾਨ ਪਾਦਪੇਤਿ ਵਿਟਪੇ ਲਗ੍ਗਨਵਸੇਨ ਪਾਦਪੇ ਰੁਕ੍ਖੇ ਖਿਪਿਤ੍ਵਾ. ਤਤੋ ਦਿਸਾ ਵਿਲੋਕੇਸਿਂ, ਕੋ ਨੁ ਖੋ ਵਨਮਸ੍ਸਿਤੋਤਿ ਇਮਂ ਵਨਂ ਪਵਿਸਨਵਸੇਨ ਅਸ੍ਸਿਤੋ ਨੁ ਖੋ ਕੋਚਿ ਅਤ੍ਥਿ, ਯਤੋ ਮੇ ਮਰਣਨ੍ਤਰਾਯੋ ਸਿਯਾਤਿ ਅਧਿਪ੍ਪਾਯੋ.

੮੩੭. ਸਮ੍ਬੁਦ੍ਧਨ੍ਤਿਆਦਿ ਤਦਾ ਤਸ੍ਸਾ ਤਾਦਿਸੇ ਨਿਚ੍ਛਯੇ ਅਸਤਿਪਿ ਸਭਾਵਵਸੇਨ ਵੁਤ੍ਤਂ. ਤਸ੍ਸਤ੍ਥੋ – ਸਯਮੇਵ ਸਮ੍ਮਦੇਵ ਚ ਸਬ੍ਬਸ੍ਸਾਪਿ ਬੁਜ੍ਝਿਤਬ੍ਬਸ੍ਸ ਬੁਦ੍ਧਤ੍ਤਾ ਸਮ੍ਬੁਦ੍ਧਂ, ਮਹਾਕਰੁਣਾਯੋਗੇਨ ਹੀਨਾਦਿਭੇਦਭਿਨ੍ਨਸ੍ਸ ਸਬ੍ਬਸ੍ਸਾਪਿ ਲੋਕਸ੍ਸ ਏਕਨ੍ਤਹਿਤਤ੍ਤਾ ਸਬ੍ਬਲੋਕਹਿਤਂ, ਉਭਯਲੋਕਂ ਮੁਨਨਤੋ ਮੁਨਿਂ, ਨਿਸਜ੍ਜਾਵਸੇਨ ਕਿਲੇਸਾਭਿਸਙ੍ਖਾਰੇਹਿ ਠਾਨਾ ਚਾਵਨਾਭਾਵੇਨ ਚ ਨਿਸਿਨ੍ਨਂ, ਆਰਮ੍ਮਣੂਪਨਿਜ੍ਝਾਨੇਨ ਲਕ੍ਖਣੂਪਨਿਜ੍ਝਾਨੇਨ ਚ ਝਾਯਨ੍ਤਂ, ਬੋਧਿਮੂਲੇਯੇਵ ਭਯਹੇਤੂਨਂ ਸਮੁਚ੍ਛਿਨ੍ਨਤ੍ਤਾ ਕੁਤੋਚਿਪਿ ਭਯਾਭਾਵਤੋ ਅਕੁਤੋਭਯਨ੍ਤਿ ਵੇਦਿਤਬ੍ਬਂ.

੮੩੮. ਸਂਵੇਗੋ ਨਾਮ ਸਹੋਤ੍ਤਪ੍ਪਂ ਞਾਣਂ, ਸੋ ਤਸ੍ਸਾ ਭਗਵਤੋ ਦਸ੍ਸਨੇਨ ਉਪ੍ਪਜ੍ਜਿ. ਤੇਨਾਹ ‘‘ਤਸ੍ਸਾ ਮੇ ਅਹੁ ਸਂਵੇਗੋ’’ਤਿ.

੮੩੯. ਪਾਸਾਦਿਕਨ੍ਤਿ ਪਸਾਦਾਵਹਂ, ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਅਸੀਤਿਅਨੁਬ੍ਯਞ੍ਜਨਬ੍ਯਾਮਪ੍ਪਭਾਕੇਤੁਮਾਲਾਲਙ੍ਕਤਾਯ ਸਮਨ੍ਤਪਾਸਾਦਿਕਾਯ ਅਤ੍ਤਨੋ ਸਰੀਰਸੋਭਾਸਮ੍ਪਤ੍ਤਿਯਾ ਰੂਪਕਾਯਦਸ੍ਸਨਬ੍ਯਾਵਟਸ੍ਸ ਜਨਸ੍ਸ ਸਾਧੁਭਾਵਤੋ ਪਸਾਦਸਂਵਡ੍ਢਨਨ੍ਤਿ ਅਤ੍ਥੋ. ਪਸਾਦਨੀਯਨ੍ਤਿ ਦਸਬਲ-ਚਤੁਵੇਸਾਰਜ੍ਜਛਅਸਾਧਾਰਣਞਾਣ-ਅਟ੍ਠਾਰਸਾਵੇਣਿਕ-ਬੁਦ੍ਧਧਮ੍ਮਪਭੁਤਿਅਪਰਿਮਾਣਗੁਣਸਮਨ੍ਨਾਗਤਾਯ ਧਮ੍ਮਕਾਯਸਮ੍ਪਤ੍ਤਿਯਾ ਸਰਿਕ੍ਖਕਜਨਸ੍ਸ ਪਸੀਦਿਤਬ੍ਬਯੁਤ੍ਤਂ, ਪਾਸਾਦਿਕਨ੍ਤਿ ਅਤ੍ਥੋ. ਵਨਾਤਿ ਕਿਲੇਸਵਨਤੋ ਅਪਕ੍ਕਮਿਤ੍ਵਾ. ਨਿਬ੍ਬਨਮਾਗਤਨ੍ਤਿ ਨਿਤ੍ਤਣ੍ਹਭਾਵਂ ਨਿਬ੍ਬਾਨਮੇਵ ਉਪਗਤਂ ਅਧਿਗਤਂ. ਯਾਦਿਸਕੀਦਿਸੋਤਿ ਯੋ ਵਾ ਸੋ ਵਾ, ਪਚੁਰਜਨੋਤਿ ਅਤ੍ਥੋ.

੮੪੦-੪੧. ਮਨਚ੍ਛਟ੍ਠਾਨਂ ਇਨ੍ਦ੍ਰਿਯਾਨਂ ਅਗ੍ਗਮਗ੍ਗਗੋਪਨਾਯ ਗੋਪਿਤਤ੍ਤਾ ਗੁਤ੍ਤਿਨ੍ਦ੍ਰਿਯੋ. ਅਗ੍ਗਫਲਜ੍ਝਾਨਾਭਿਰਤਿਯਾ ਝਾਨਰਤੋ. ਤਤੋ ਏਵ ਬਹਿਭੂਤੇਹਿ ਰੂਪਾਦਿਆਰਮ੍ਮਣੇਹਿ ਅਪਕ੍ਕਮਿਤ੍ਵਾ ਵਿਸਯਜ੍ਝਤ੍ਤੇ ਨਿਬ੍ਬਾਨੇ ਚ ਓਗਾਲ਼੍ਹਚਿਤ੍ਤਤਾਯ ਅਬਹਿਗ੍ਗਤਮਾਨਸੋ. ਮਿਚ੍ਛਾਗਾਹਮੋਚਨਭਯੇਨ ਵਿਪਲ੍ਲਾਸਵਨ੍ਤੇਹਿ ਮਿਚ੍ਛਾਦਿਟ੍ਠਿਕੇਹਿ ਭਾਯਿਤਬ੍ਬਤੋ ਤੇਸਞ੍ਚ ਭਯਜਨਨਤੋ ਭਯਭੇਰਵੋ. ਪਯੋਗਾਸਯਵਿਪਨ੍ਨੇਹਿ ਅਨੁਪਗਮਨੀਯਤੋ ਚ ਕੇਨਚਿਪਿ ਅਨਾਸਾਦਨੀਯਤੋ ਚ ਦੁਰਾਸਦੋ. ਦੁਲ੍ਲਭਾਯਨ੍ਤਿ ਦੁਲ੍ਲਭੋ ਅਯਂ. ਦਸ੍ਸਨਾਯਾਤਿ ਦਟ੍ਠੁਮ੍ਪਿ. ਪੁਪ੍ਫਂ ਓਦੁਮ੍ਬਰਂ ਯਥਾਤਿ ਯਥਾ ਨਾਮ ਉਦੁਮ੍ਬਰੇ ਭਵਂ ਪੁਪ੍ਫਂ ਦੁਲ੍ਲਭਦਸ੍ਸਨਂ, ਕਦਾਚਿਦੇਵ ਭਵੇਯ੍ਯ, ਨ ਵਾ ਭਵੇਯ੍ਯ, ਏਵਂ ਈਦਿਸਸ੍ਸ ਉਤ੍ਤਮਪੁਗ੍ਗਲਸ੍ਸਾਤਿ ਅਤ੍ਥੋ.

੮੪੨. ਸੋ ਤਥਾਗਤੋ ਮੁਦੂਹਿ ਵਾਚਾਹਿ ਸਣ੍ਹਾਯ ਵਾਚਾਯ ‘‘ਰਜ੍ਜੁਮਾਲੇ’’ਤਿ ਮਂ ਆਲਪਿਤ੍ਵਾ ਆਮਨ੍ਤੇਤ੍ਵਾ ਸਰਣਂ ਗਚ੍ਛ ਤਥਾਗਤਨ੍ਤਿ ‘‘ਤਥਾ ਆਗਤੋ’’ਤਿਆਦਿਨਾ ਤਥਾਗਤਂ ਸਮ੍ਮਾਸਮ੍ਬੁਦ੍ਧਂ ਸਰਣਂ ਗਚ੍ਛਾਤਿ ਮਂ ਅਵੋਚ ਅਭਾਸੀਤਿ ਯੋਜਨਾ.

੮੪੩-੪. ਤਾਹਨ੍ਤਿ ਤਂ ਅਹਂ. ਗਿਰਨ੍ਤਿ ਵਾਚਂ. ਨੇਲਨ੍ਤਿ ਨਿਦ੍ਦੋਸਂ. ਅਤ੍ਥਵਤਿਨ੍ਤਿ ਅਤ੍ਥਯੁਤ੍ਤਂ ਸਾਤ੍ਥਂ, ਏਕਨ੍ਤਹਿਤਂ ਵਾ. ਵਚੀਸੋਚੇਯ੍ਯਤਾਯ ਸੁਚਿਂ. ਅਕਕ੍ਖਲ਼ਤਾਯ ਸਣ੍ਹਂ. ਵੇਨੇਯ੍ਯਾਨਂ ਮੁਦੁਭਾਵਕਰਤ੍ਤਾ ਮੁਦੁ. ਸਵਨੀਯਭਾਵੇਨ ਵਗ੍ਗੁਂ. ਸਬ੍ਬਸੋਕਾਪਨੂਦਨਨ੍ਤਿ ਞਾਤਿਬ੍ਯਸਨਾਦਿਵਸੇਨ ਉਪ੍ਪਜ੍ਜਨਕਸ੍ਸ ਸਬ੍ਬਸ੍ਸਾਪਿ ਸੋਕਸ੍ਸ ਵਿਨੋਦਨਂ ਗਿਰਂ ਸੁਤ੍ਵਾਨ ਪਸਨ੍ਨਚਿਤ੍ਤਾ ਅਹੋਸਿਨ੍ਤਿ ਸਮ੍ਬਨ੍ਧੋ. ਸਬ੍ਬਮੇਤਂ ਦਾਨਕਥਂ ਆਦਿਂ ਕਤ੍ਵਾ ਉਸ੍ਸਕ੍ਕਿਤ੍ਵਾ ਨੇਕ੍ਖਮ੍ਮੇ ਆਨਿਸਂਸਂ ਵਿਭਾਵਨਵਸੇਨ ਪਵਤ੍ਤਿਤਂ ਭਗਵਤੋ ਅਨੁਪੁਬ੍ਬਿਕਥਂ ਸਨ੍ਧਾਯ ਵਦਤਿ. ਤੇਨੇਵਾਹ ‘‘ਕਲ੍ਲਚਿਤ੍ਤਞ੍ਚ ਮਂ ਞਤ੍ਵਾ’’ਤਿਆਦਿ.

ਤਤ੍ਥ ਕਲ੍ਲਚਿਤ੍ਤਨ੍ਤਿ ਕਮ੍ਮਨਿਯਚਿਤ੍ਤਂ, ਹੇਟ੍ਠਾ ਪਵਤ੍ਤਿਤਦੇਸਨਾਯ ਅਸ੍ਸਦ੍ਧਿਯਾਦੀਨਂ ਚਿਤ੍ਤਦੋਸਾਨਂ ਵਿਗਤਤ੍ਤਾ ਉਪਰਿਦੇਸਨਾਯ ਭਾਜਨਭਾਵੂਪਗਮਨੇਨ ਕਮ੍ਮਕ੍ਖਮਚਿਤ੍ਤਂ, ਭਾਵਨਾਕਮ੍ਮਸ੍ਸ ਯੋਗ੍ਗਚਿਤ੍ਤਨ੍ਤਿ ਅਤ੍ਥੋ. ਤੇਨੇਵਾਹ ‘‘ਪਸਨ੍ਨਂ ਸੁਦ੍ਧਮਾਨਸ’’ਨ੍ਤਿ. ਤਤ੍ਥ ‘‘ਪਸਨ੍ਨ’’ਨ੍ਤਿ ਇਮਿਨਾ ਅਸ੍ਸਦ੍ਧਿਯਾਪਗਮਮਾਹ, ‘‘ਸੁਦ੍ਧਮਾਨਸ’’ਨ੍ਤਿ ਇਮਿਨਾ ਕਾਮਚ੍ਛਨ੍ਦਾਦਿਅਪਗਮਨੇਨ ਮੁਦੁਚਿਤ੍ਤਤਂ ਉਦਗ੍ਗਚਿਤ੍ਤਤਞ੍ਚ ਦਸ੍ਸੇਤਿ. ਅਨੁਸਾਸੀਤਿ ਓਵਦਿ, ਸਾਮੁਕ੍ਕਂਸਿਕਾਯ ਧਮ੍ਮਦੇਸਨਾਯ ਸਹ ਉਪਾਯੇਨ ਪਵਤ੍ਤਿਨਿਵਤ੍ਤਿਯੋ ਉਪਦਿਸੀਤਿ ਅਤ੍ਥੋ. ਤੇਨੇਵਾਹ ‘‘ਇਦਂ ਦੁਕ੍ਖ’’ਨ੍ਤਿਆਦਿ. ਅਨੁਸਾਸਿਤਾਕਾਰਦਸ੍ਸਨਞ੍ਹੇਤਂ.

੮੪੫. ਤਤ੍ਥ ਇਦਂ ਦੁਕ੍ਖਨ੍ਤਿ ਮਂਵੋਚਾਤਿ ਇਦਂ ਤਣ੍ਹਾਵਜ੍ਜਂ ਤੇਭੂਮਕਂ ਧਮ੍ਮਜਾਤਂ ਬਾਧਕਸਭਾਵਤ੍ਤਾ ਕੁਚ੍ਛਿਕਂ ਹੁਤ੍ਵਾ ਤੁਚ੍ਛਸਭਾਵਤ੍ਤਾ ਤਥਤ੍ਤਾ ਚ ਦੁਕ੍ਖਂ ਅਰਿਯਸਚ੍ਚਨ੍ਤਿ ਮਯ੍ਹਂ ਅਭਾਸਿ. ਅਯਂ ਦੁਕ੍ਖਸ੍ਸ ਸਮ੍ਭਵੋਤਿ ਅਯਂ ਆਮਤਣ੍ਹਾਦਿਭੇਦਾ ਤਣ੍ਹਾ ਯਥਾਵੁਤ੍ਤਸ੍ਸ ਦੁਕ੍ਖਸ੍ਸ ਸਮ੍ਭਵੋ ਪਭਵੋ ਉਪ੍ਪਤ੍ਤਿ ਹੇਤੁ ਸਮੁਦਯੋ ਅਰਿਯਸਚ੍ਚਨ੍ਤਿ. ਦੁਕ੍ਖਨਿਰੋਧੋਤਿ ਦੁਕ੍ਖਸ੍ਸ ਸਨ੍ਤਿਭਾਵੋ ਅਸਙ੍ਖਤਧਾਤੁ ਨਿਰੋਧੋ ਅਰਿਯਸਚ੍ਚਨ੍ਤਿ. ਅਨ੍ਤਦ੍ਵਯਸ੍ਸ ਪਰਿਵਜ੍ਜਨਤੋ ਅਞ੍ਜਸੋ ਨਿਬ੍ਬਾਨਗਾਮਿਨਿਪਟਿਪਦਾਭਾਵਤੋ ਅਮਤੋਗਧੋ ਮਗ੍ਗੋ ਅਰਿਯਸਚ੍ਚਨ੍ਤਿ ਮਂ ਅਵੋਚਾਤਿ ਸਮ੍ਬਨ੍ਧੋ.

੮੪੬. ਕੁਸਲਸ੍ਸਾਤਿ ਓਵਾਦਦਾਨੇ ਵੇਨੇਯ੍ਯਦਮਨੇ ਛੇਕਸ੍ਸ, ਅਪ੍ਪਮਾਦਪਟਿਪਤ੍ਤਿਯਾ ਵਾ ਮਤ੍ਥਕਪ੍ਪਤ੍ਤਿਯਾ ਅਨਵਜ੍ਜਸ੍ਸ. ਓਵਾਦਮ੍ਹਿ ਅਹਂ ਠਿਤਾਤਿ ਯਥਾਵੁਤ੍ਤੇ ਓਵਾਦੇ ਅਨੁਸਿਟ੍ਠਿਯਂ ਸਿਕ੍ਖਾਤ੍ਤਯਪਾਰਿਪੂਰਿਯਾ ਸਚ੍ਚਪਟਿਵੇਧੇਨ ਅਹਂ ਪਤਿਟ੍ਠਿਤਾ. ਤੇਨਾਹ ‘‘ਅਜ੍ਝਗਾ ਅਮਤਂ ਸਨ੍ਤਿਂ, ਨਿਬ੍ਬਾਨਂ ਪਦਮਚ੍ਚੁਤ’’ਨ੍ਤਿ, ਇਦਂ ਓਵਾਦੇ ਪਤਿਟ੍ਠਾਨਸ੍ਸ ਕਾਰਣਵਚਨਂ. ਯਾ ਨਿਚ੍ਚਤਾਯ ਮਰਣਾਭਾਵਤੋ ਅਮਤਂ, ਸਬ੍ਬਦੁਕ੍ਖਵੂਪਸਮਤਾਯ ਸਨ੍ਤਿਂ, ਅਧਿਗਤਾਨਂ ਅਚਵਨਹੇਤੁਤਾਯ ਅਚ੍ਚੁਤਂ ਨਿਬ੍ਬਾਨਂ ਪਦਂ ਅਜ੍ਝਗਾ ਅਧਿਗਞ੍ਛਿ, ਸਾ ਏਕਂਸੇਨ ਸਤ੍ਥੁ ਓਵਾਦੇ ਪਤਿਟ੍ਠਿਤਾ ਨਾਮਾਤਿ.

੮੪੭. ਅਵਟ੍ਠਿਤਾਪੇਮਾਤਿ ਦਲ਼੍ਹਭਤ੍ਤੀ ਰਤਨਤ੍ਤਯੇ ਨਿਚ੍ਚਲਪਸਾਦਸਿਨੇਹਾ. ਕਸ੍ਮਾ? ਯਸ੍ਮਾ ਦਸ੍ਸਨੇ ਅਵਿਕਮ੍ਪਿਨੀ, ‘‘ਸਮ੍ਮਾਸਮ੍ਬੁਦ੍ਧੋ ਭਗਵਾ, ਸ੍ਵਾਕ੍ਖਾਤੋ ਧਮ੍ਮੋ, ਸੁਪ੍ਪਟਿਪਨ੍ਨੋ ਸਙ੍ਘੋ’’ਤਿ ਏਤਸ੍ਮਿਂ ਸਮ੍ਮਾਦਸ੍ਸਨੇ ਅਚਲਾ ਕੇਨਚਿ ਅਚਾਲਨੀਯਾ. ਕੇਨ ਪਨੇਤਂ ਅਵਿਕਮ੍ਪਨਨ੍ਤਿ ਆਹ ‘‘ਮੂਲਜਾਤਾਯ ਸਦ੍ਧਾਯਾ’’ਤਿ. ਅਯਂ ‘‘ਇਤਿਪਿ ਸੋ ਭਗਵਾ ਅਰਹ’’ਨ੍ਤਿਆਦਿਨਾ (ਮ. ਨਿ. ੧.੭੪; ਸਂ. ਨਿ. ੫.੯੯੭; ਅ. ਨਿ. ੯.੨੭) ਸਮ੍ਮਾਸਮ੍ਬੁਦ੍ਧੇ, ‘‘ਸ੍ਵਾਕ੍ਖਾਤੋ ਭਗਵਤਾ ਧਮ੍ਮਾ’ਤਿਆਦਿਨਾ ਤਸ੍ਸ ਧਮ੍ਮੇ, ‘‘ਸੁਪ੍ਪਟਿਪਨ੍ਨੋ ਭਗਵਤੋ ਸਾਵਕਸਙ੍ਘੋ’’ਤਿਆਦਿਨਾ ਤਸ੍ਸ ਸਙ੍ਘੇ ਚ ਸਚ੍ਚਾਭਿਸਮਯਸਙ੍ਖਾਤੇਨ ਮੂਲੇਨ ਜਾਤਮੂਲਾ ਸਦ੍ਧਾ, ਤਾਯ ਅਹਂ ਅਵਿਕਮ੍ਪਿਨੀਤਿ ਦਸ੍ਸੇਤਿ. ਤਤੋ ਏਵ ਧੀਤਾ ਬੁਦ੍ਧਸ੍ਸ ਓਰਸਾਤਿ ਸਮ੍ਮਾਸਮ੍ਬੁਦ੍ਧਸ੍ਸ ਉਰੇ ਵਾਯਾਮਜਨਿਤਾਭਿਜਾਤਿਤਾਯ ਓਰਸਪੁਤ੍ਤੀ.

੮੪੮. ਸਾਹਂ ਰਮਾਮੀਤਿ ਸਾ ਅਹਂ ਤਦਾ ਅਰਿਯਾਯ ਜਾਤਿਯਾ ਇਦਾਨਿ ਦੇਵੂਪਪਤ੍ਤਿਯਾ ਆਗਤਾ ਮਗ੍ਗਰਤਿਯਾ ਫਲਰਤਿਯਾ ਚ ਰਮਾਮਿ, ਕਾਮਗੁਣਰਤਿਯਾ ਕੀਲ਼ਾਮਿ, ਉਭਯੇਨਾਪਿ ਮੋਦਾਮਿ. ਅਤ੍ਤਾਨੁਵਾਦਭਯਾਦੀਨਂ ਅਪਗਤਤ੍ਤਾ ਅਕੁਤੋਭਯਾ. ਮਧੁਮਦ੍ਦਵਨ੍ਤਿ ਮਧੁਸਙ੍ਖਾਤਂ ਮਦ੍ਦਵਕਰਂ, ਨਚ੍ਚਨਗਾਯਨਕਾਲੇਸੁ ਸਰੀਰਸ੍ਸ ਸਰਸ੍ਸ ਚ ਮੁਦੁਭਾਵਾਵਹਂ ਗਨ੍ਧਪਾਨਂ ਸਨ੍ਧਾਯ ਵਦਤਿ.‘‘ਮਧੁਮਾਦਵ’’ਨ੍ਤਿਪਿ ਪਠਨ੍ਤਿ, ਆਦਵਂ ਯਾਵਦਵਂ ਯਾਵਦੇਵ ਦਵਤ੍ਥਂ ਮਧੁਰਂ ਪਿਵਾਮੀਤਿ ਅਤ੍ਥੋ.

੮੪੯. ਪੁਞ੍ਞਕ੍ਖੇਤ੍ਤਾਨਮਾਕਰਾਤਿ ਸਦੇਵਕਸ੍ਸ ਲੋਕਸ੍ਸ ਪੁਞ੍ਞਕ੍ਖੇਤ੍ਤਭੂਤਾਨਂ ਅਰਿਯਾਨਂ ਮਗ੍ਗਫਲਟ੍ਠਾਨਂ ਅਰਿਯਸਙ੍ਘਸ੍ਸ ਆਕਰਾ ਉਪ੍ਪਤ੍ਤਿਟ੍ਠਾਨਂ ਤਥਾਗਤਾ. ਯਥਾਤਿ ਯਸ੍ਮਿਂ ਪੁਞ੍ਞਕ੍ਖੇਤ੍ਤੇ. ਸੇਸਂ ਵੁਤ੍ਤਨਯਮੇਵ.

ਅਥਾਯਸ੍ਮਾ ਮਹਾਮੋਗ੍ਗਲ੍ਲਾਨੋ ਅਤ੍ਤਨਾ ਚ ਦੇਵਤਾਯ ਚ ਪਵਤ੍ਤਿਤਂ ਇਮਂ ਕਥਾਸਲ੍ਲਾਪਂ ਮਨੁਸ੍ਸਲੋਕਂ ਆਗਨ੍ਤ੍ਵਾ ਭਗਵਤੋ ਆਰੋਚੇਸਿ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ. ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਅਹੋਸੀਤਿ.

ਰਜ੍ਜੁਮਾਲਾਵਿਮਾਨਵਣ੍ਣਨਾ ਨਿਟ੍ਠਿਤਾ.

ਇਤਿ ਪਰਮਤ੍ਥਦੀਪਨਿਯਾ ਖੁਦ੍ਦਕ-ਅਟ੍ਠਕਥਾਯ ਵਿਮਾਨਵਤ੍ਥੁਸ੍ਮਿਂ

ਦ੍ਵਾਦਸਵਤ੍ਥੁਪਟਿਮਣ੍ਡਿਤਸ੍ਸ ਚਤੁਤ੍ਥਸ੍ਸ ਮਞ੍ਜਿਟ੍ਠਕਵਗ੍ਗਸ੍ਸ

ਅਤ੍ਥਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤਾ ਚ ਇਤ੍ਥਿਵਿਮਾਨਵਣ੍ਣਨਾ.