੧੧. ਵਨ੍ਦਨਵਿਮਾਨਵਣ੍ਣਨਾ

ਅਭਿਕ੍ਕਨ੍ਤੇਨ ਵਣ੍ਣੇਨਾਤਿ ਵਨ੍ਦਨਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਸਮਯੇਨ ਸਮ੍ਬਹੁਲਾ ਭਿਕ੍ਖੂ ਅਞ੍ਞਤਰਸ੍ਮਿਂ ਗਾਮਕਾਵਾਸੇ ਵਸ੍ਸਂ ਵਸਿਤ੍ਵਾ ਵੁਤ੍ਥਵਸ੍ਸਾ ਪਵਾਰੇਤ੍ਵਾ ਸੇਨਾਸਨਂ ਪਟਿਸਾਮੇਤ੍ਵਾ ਪਤ੍ਤਚੀਵਰਮਾਦਾਯ ਸਾਵਤ੍ਥਿਂ ਉਦ੍ਦਿਸ੍ਸ ਭਗਵਨ੍ਤਂ ਦਸ੍ਸਨਤ੍ਥਾਯ ਗਚ੍ਛਨ੍ਤਾ ਅਞ੍ਞਤਰਸ੍ਸ ਗਾਮਸ੍ਸ ਮਜ੍ਝੇਨ ਅਤਿਕ੍ਕਮਨ੍ਤਿ. ਤਤ੍ਥ ਅਞ੍ਞਤਰਾ ਇਤ੍ਥੀ ਤੇ ਭਿਕ੍ਖੂ ਦਿਸ੍ਵਾ ਪਸਨ੍ਨਚਿਤ੍ਤਾ ਸਞ੍ਜਾਤਗਾਰਵਬਹੁਮਾਨਾ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਸਿਰਸ੍ਮਿਂ ਅਞ੍ਜਲਿਂ ਪਗ੍ਗਯ੍ਹ ਯਾਵ ਦਸ੍ਸਨੂਪਚਾਰਾ ਪਸਾਦਸੋਮ੍ਮਾਨਿ ਅਕ੍ਖੀਨਿ ਉਮ੍ਮੀਲੇਤ੍ਵਾ ਓਲੋਕੇਨ੍ਤੀ ਅਟ੍ਠਾਸਿ. ਸਾ ਅਪਰੇਨ ਸਮਯੇਨ ਕਾਲਂ ਕਤ੍ਵਾ ਤਾਵਤਿਂਸੇਸੁ ਨਿਬ੍ਬਤ੍ਤਿ. ਅਥ ਨਂ ਤਤ੍ਥ ਦਿਬ੍ਬਸਮ੍ਪਤ੍ਤਿਂ ਅਨੁਭਵਨ੍ਤਿਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਇਮਾਹਿ ਗਾਥਾਹਿ ਪਟਿਪੁਚ੍ਛਿ –

੮੧੯. ‘‘ਅਭਿਕ੍ਕਨ੍ਤੇਨ ਵਣ੍ਣੇਨ…ਪੇ…ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੮੨੨. ‘‘ਸਾ ਦੇਵਤਾ ਅਤ੍ਤਮਨਾ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

੮੨੩. ‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਦਿਸ੍ਵਾਨ ਸਮਣੇ ਸੀਲਵਨ੍ਤੇ;

ਪਾਦਾਨਿ ਵਨ੍ਦਿਤ੍ਵਾ ਮਨਂ ਪਸਾਦਯਿਂ, ਵਿਤ੍ਤਾ ਚਹਂ ਅਞ੍ਜਲਿਕਂ ਅਕਾਸਿਂ.

੮੨੪. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ…ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ. –

ਇਮਾਹਿ ਗਾਥਾਹਿ ਬ੍ਯਾਕਾਸਿ.

੮੨੩. ਤਤ੍ਥ ਸਮਣੇਤਿ ਸਮਿਤਪਾਪੇ. ਸੀਲਵਨ੍ਤੇਤਿ ਸੀਲਗੁਣਯੁਤ੍ਤੇ. ਮਨਂ ਪਸਾਦਯਿਨ੍ਤਿ ‘‘ਸਾਧੁਰੂਪਾ ਵਤਿਮੇ ਅਯ੍ਯਾ ਧਮ੍ਮਚਾਰਿਨੋ ਸਮਚਾਰਿਨੋ ਬ੍ਰਹ੍ਮਚਾਰਿਨੋ’’ਤਿ ਤੇਸਂ ਗੁਣੇ ਆਰਬ੍ਭ ਚਿਤ੍ਤਂ ਪਸਾਦੇਸਿਂ. ਵਿਤ੍ਤਾ ਚਹਂ ਅਞ੍ਜਲਿਕਂ ਅਕਾਸਿਨ੍ਤਿ ਤੁਟ੍ਠਾ ਸੋਮਨਸ੍ਸਜਾਤਾ ਅਹਂ ਵਨ੍ਦਿਂ. ਪੇਸਲਾਨਂ ਭਿਕ੍ਖੂਨਂ ਪਸਾਦਵਿਕਸਿਤਾਨਿ ਅਕ੍ਖੀਨਿ ਉਮ੍ਮੀਲੇਤ੍ਵਾ ਦਸ੍ਸਨਮਤ੍ਤਮ੍ਪਿ ਇਮੇਸਂ ਸਤ੍ਤਾਨਂ ਬਹੂਪਕਾਰਂ, ਪਗੇਵ ਵਨ੍ਦਨਾਤਿ. ਤੇਨਾਹ ‘‘ਤੇਨ ਮੇਤਾਦਿਸੋ ਵਣ੍ਣੋ’’ਤਿਆਦਿ. ਸੇਸਂ ਵੁਤ੍ਤਨਯਮੇਵ.

ਵਨ੍ਦਨਵਿਮਾਨਵਣ੍ਣਨਾ ਨਿਟ੍ਠਿਤਾ.