੧. ਮਞ੍ਜਿਟ੍ਠਕਵਿਮਾਨਵਣ੍ਣਨਾ

ਮਞ੍ਜਿਟ੍ਠਕਵਗ੍ਗੇ ਮਞ੍ਜਿਟ੍ਠਕੇ ਵਿਮਾਨਸ੍ਮਿਨ੍ਤਿ ਮਞ੍ਜਿਟ੍ਠਕਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ. ਤਤ੍ਥ ਅਞ੍ਞਤਰੋ ਉਪਾਸਕੋ ਭਗਵਨ੍ਤਂ ਨਿਮਨ੍ਤੇਤ੍ਵਾ ਅਨਨ੍ਤਰਵਿਮਾਨੇ ਵੁਤ੍ਤਨਯੇਨੇਵ ਮਣ੍ਡਪਂ ਸਜ੍ਜੇਤ੍ਵਾ ਤਤ੍ਥ ਨਿਸਿਨ੍ਨਂ ਸਤ੍ਥਾਰਂ ਪੂਜੇਤ੍ਵਾ ਦਾਨਂ ਦੇਤਿ. ਤੇਨ ਚ ਸਮਯੇਨ ਅਞ੍ਞਤਰਾ ਕੁਲਦਾਸੀ ਅਨ੍ਧਵਨੇ ਸੁਪੁਪ੍ਫਿਤਂ ਸਾਲਰੁਕ੍ਖਂ ਦਿਸ੍ਵਾ ਤਤ੍ਥ ਪੁਪ੍ਫਾਨਿ ਗਹੇਤ੍ਵਾ ਹੀਰੇਹਿ ਆਵੁਣਿਤ੍ਵਾ ਵਟਂਸਕੇ ਕਤ੍ਵਾ ਪੁਨ ਬਹੂਨਿ ਮੁਤ੍ਤਪੁਪ੍ਫਾਨਿ ਅਗ੍ਗਪੁਪ੍ਫਾਨਿ ਚ ਗਹੇਤ੍ਵਾ ਨਗਰਂ ਪਵਿਟ੍ਠਾ. ਤਸ੍ਮਿਂ ਮਣ੍ਡਪੇ ਯੁਗਨ੍ਧਰਪਬ੍ਬਤਕੁਚ੍ਛਿਂ ਓਭਾਸਯਮਾਨਂ ਬਾਲਸੂਰਿਯਂ ਵਿਯ ਛਬ੍ਬਣ੍ਣਬੁਦ੍ਧਰਂਸਿਯੋ ਵਿਸ੍ਸਜ੍ਜੇਤ੍ਵਾ ਨਿਸਿਨ੍ਨਂ, ਭਗਵਨ੍ਤਂ ਦਿਸ੍ਵਾ ਪਸਨ੍ਨਚਿਤ੍ਤਾ ਤੇਹਿ ਪੁਪ੍ਫੇਹਿ ਪੂਜੇਨ੍ਤੀ ਵਟਂਸਕਾਨਿ ਆਸਨਸ੍ਸ ਸਮਨ੍ਤਤੋ ਠਪੇਤ੍ਵਾ ਇਤਰਾਨਿ ਚ ਪੁਪ੍ਫਾਨਿ ਓਕਿਰਿਤ੍ਵਾ ਸਕ੍ਕਚ੍ਚਂ ਵਨ੍ਦਿਤ੍ਵਾ ਤਿਕ੍ਖਤ੍ਤੁਂ ਪਦਕ੍ਖਿਣਂ ਕਤ੍ਵਾ ਅਗਮਾਸਿ. ਸਾ ਅਪਰਭਾਗੇ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਨਿਬ੍ਬਤ੍ਤਿ, ਤਤ੍ਥ ਤਸ੍ਸਾ ਰਤ੍ਤਫਲਿਕਮਯਂ ਵਿਮਾਨਂ, ਤਸ੍ਸ ਚ ਪੁਰਤੋ ਸੁਵਣ੍ਣਵਾਲੁਕਾਸਨ੍ਥਤਭੂਮਿਭਾਗਂ ਮਹਨ੍ਤਂ ਸਾਲਵਨਂ ਪਾਤੁਰਹੋਸਿ. ਸਾ ਯਦਾ ਵਿਮਾਨਤੋ ਨਿਕ੍ਖਮਿਤ੍ਵਾ ਸਾਲਵਨਂ ਪਵਿਸਤਿ, ਤਦਾ ਸਾਲਸਾਖਾ ਓਨਮਿਤ੍ਵਾ ਤਸ੍ਸਾ ਉਪਰਿ ਕੁਸੁਮਾਨਿ ਓਕਿਰਨ੍ਤਿ. ਤਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਹੇਟ੍ਠਾ ਵੁਤ੍ਤਨਯੇਨ ਉਪਗਨ੍ਤ੍ਵਾ ਇਮਾਹਿ ਗਾਥਾਹਿ ਕਤਕਮ੍ਮਂ ਪੁਚ੍ਛਿ –

੬੮੯. ‘‘ਮਞ੍ਜਿਟ੍ਠਕੇ ਵਿਮਾਨਸ੍ਮਿਂ, ਸੋਣ੍ਣਵਾਲੁਕਸਨ੍ਥਤੇ;

ਪਞ੍ਚਙ੍ਗਿਕੇਨ ਤੂਰਿਯੇਨ, ਰਮਸਿ ਸੁਪ੍ਪਵਾਦਿਤੇ.

੬੯੦. ‘‘ਤਮ੍ਹਾ ਵਿਮਾਨਾ ਓਰੁਯ੍ਹ, ਨਿਮ੍ਮਿਤਾ ਰਤਨਾਮਯਾ;

ਓਗਾਹਸਿ ਸਾਲਵਨਂ, ਪੁਪ੍ਫਿਤਂ ਸਬ੍ਬਕਾਲਿਕਂ.

੬੯੧. ‘‘ਯਸ੍ਸ ਯਸ੍ਸੇਵ ਸਾਲਸ੍ਸ, ਮੂਲੇ ਤਿਟ੍ਠਸਿ ਦੇਵਤੇ;

ਸੋ ਸੋ ਮੁਞ੍ਚਤਿ ਪੁਪ੍ਫਾਨਿ, ਓਨਮਿਤ੍ਵਾ ਦੁਮੁਤ੍ਤਮੋ.

੬੯੨. ‘‘ਵਾਤੇਰਿਤਂ ਸਾਲਵਨਂ, ਆਧੁਤਂ ਦਿਜਸੇਵਿਤਂ;

ਵਾਤਿ ਗਨ੍ਧੋ ਦਿਸਾ ਸਬ੍ਬਾ, ਰੁਕ੍ਖੋ ਮਞ੍ਜੂਸਕੋ ਯਥਾ.

੬੯੩. ‘‘ਘਾਯਸੇ ਤਂ ਸੁਚਿਗਨ੍ਧਂ, ਰੂਪਂ ਪਸ੍ਸਸਿ ਅਮਾਨੁਸਂ;

ਦੇਵਤੇ ਪੁਚ੍ਛਿਤਾਚਿਕ੍ਖ, ਕਿਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ.

੬੮੯. ਤਤ੍ਥ ਮਞ੍ਜਿਟ੍ਠਕੇ ਵਿਮਾਨਸ੍ਮਿਨ੍ਤਿ ਰਤ੍ਤਫਲਿਕਮਯੇ ਵਿਮਾਨੇ. ਸਿਨ੍ਦੁਵਾਰਕਣਵੀਰਮਕੁਲਸਦਿਸਵਣ੍ਣਞ੍ਹਿ ‘‘ਮਞ੍ਜਿਟ੍ਠਕ’’ਨ੍ਤਿ ਵੁਚ੍ਚਤਿ. ਸੋਣ੍ਣਵਾਲੁਕਸਨ੍ਥਤੇਤਿ ਸਮਨ੍ਤਤੋ ਵਿਪ੍ਪਕਿਣ੍ਣਾਹਿ ਸੁਵਣ੍ਣਵਾਲੁਕਾਹਿ ਸਨ੍ਥਤਭੂਮਿਭਾਗੇ. ਰਮਸਿ ਸੁਪ੍ਪਵਾਦਿਤੇਤਿ ਸੁਟ੍ਠੁ ਪਵਾਦਿਤੇਨ ਪਞ੍ਚਙ੍ਗਿਕੇਨ ਤੂਰਿਯੇਨ ਅਭਿਰਮਸਿ.

੬੯੦. ਨਿਮਿਤ੍ਤਾ ਰਤਨਾਮਯਾਤਿ ਤਵ ਸੁਚਰਿਤਸਿਪ੍ਪਿਨਾ ਅਭਿਨਿਮ੍ਮਿਤਾ ਰਤਨਮਯਾ ਵਿਮਾਨਾ. ਓਗਾਹਸੀਤਿ ਪਵਿਸਸਿ. ਸਬ੍ਬਕਾਲਿਕਨ੍ਤਿ ਸਬ੍ਬਕਾਲੇ ਸੁਖਂ ਸਬ੍ਬਉਤੁਸਪ੍ਪਾਯਂ, ਸਬ੍ਬਕਾਲੇ ਪੁਪ੍ਫਨਕਂ ਵਾ.

੬੯੨. ਵਾਤੇਰਿਤਨ੍ਤਿ ਯਥਾ ਪੁਪ੍ਫਾਨਿ ਓਕਿਰਨ੍ਤਿ, ਏਵਂ ਵਾਤੇਨ ਈਰਿਤਂ ਚਲਿਤਂ. ਆਧੁਤਨ੍ਤਿ ਮਨ੍ਦੇਨ ਮਾਲੁਤੇਨ ਸਣਿਕਸਣਿਕਂ ਵਿਧੂਪਯਮਾਨਂ. ਦਿਜਸੇਵਿਤਨ੍ਤਿ ਮਯੂਰਕੋਕਿਲਾਦਿਸਕੁਣਸਙ੍ਘੇਹਿ ਉਪਸੇਵਿਤਂ.

ਏਵਂ ਥੇਰੇਨ ਪੁਟ੍ਠਾ ਸਾ ਦੇਵਤਾ ਇਮਾਹਿ ਗਾਥਾਹਿ ਬ੍ਯਾਕਾਸਿ –

੬੯੪. ‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਦਾਸੀ ਅਯਿਰਕੁਲੇ ਅਹੁਂ;

ਬੁਦ੍ਧਂ ਨਿਸਿਨ੍ਨਂ ਦਿਸ੍ਵਾਨ, ਸਾਲਪੁਪ੍ਫੇਹਿ ਓਕਿਰਿਂ.

੬੯੫. ‘‘ਵਟਂਸਕਞ੍ਚ ਸੁਕਤਂ, ਸਾਲਪੁਪ੍ਫਮਯਂ ਅਹਂ;

ਬੁਦ੍ਧਸ੍ਸ ਉਪਨਾਮੇਸਿਂ, ਪਸਨ੍ਨਾ ਸੇਹਿ ਪਾਣਿਭਿ.

੬੯੬. ‘‘ਤਾਹਂ ਕਮ੍ਮਂ ਕਰਿਤ੍ਵਾਨ, ਕੁਸਲਂ ਬੁਦ੍ਧਵਣ੍ਣਿਤਂ;

ਅਪੇਤਸੋਕਾ ਸੁਖਿਤਾ, ਸਮ੍ਪਮੋਦਾਮਨਾਮਯਾ’’ਤਿ.

੬੯੪-੫. ਤਤ੍ਥ ਅਯਿਰਕੁਲੇਤਿ ਅਯ੍ਯਕੁਲੇ, ਸਾਮਿਕਗੇਹੇਤਿ ਅਤ੍ਥੋ. ਅਹੁਨ੍ਤਿ ਅਹੋਸਿਂ. ਓਕਿਰਿਨ੍ਤਿ ਪੁਪ੍ਫੇਹਿ ਵਿਪ੍ਪਕਿਰਿਂ. ਉਪਨਾਮੇਸਿਨ੍ਤਿ ਪੂਜਾਵਸੇਨ ਉਪਨਾਮੇਸਿਂ. ਸੇਸਂ ਵੁਤ੍ਤਨਯਮੇਵ.

ਅਥਾਯਸ੍ਮਾ ਮਹਾਮੋਗ੍ਗਲ੍ਲਾਨੋ ਸਪਰਿਵਾਰਾਯ ਤਸ੍ਸਾ ਦੇਵਤਾਯ ਧਮ੍ਮਂ ਦੇਸੇਤ੍ਵਾ ਮਨੁਸ੍ਸਲੋਕਂ ਆਗਨ੍ਤ੍ਵਾ ਭਗਵਤੋ ਤਮਤ੍ਥਂ ਨਿਵੇਦੇਸਿ. ਭਗਵਾ ਤਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਮਹਾਜਨਸ੍ਸ ਧਮ੍ਮਂ ਦੇਸੇਸਿ. ਦੇਸਨਾ ਸਦੇਵਕਸ੍ਸ ਲੋਕਸ੍ਸ ਸਾਤ੍ਥਿਕਾ ਅਹੋਸੀਤਿ.

ਮਞ੍ਜਿਟ੍ਠਕਵਿਮਾਨਵਣ੍ਣਨਾ ਨਿਟ੍ਠਿਤਾ.