੧੦. ਪਠਮਭਿਕ੍ਖਾਦਾਯਿਕਾਵਿਮਾਨਵਣ੍ਣਨਾ

ਅਭਿਕ੍ਕਨ੍ਤੇਨ ਵਣ੍ਣੇਨਾਤਿ ਭਿਕ੍ਖਾਦਾਯਿਕਾਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ. ਤੇਨ ਚ ਸਮਯੇਨ ਉਤ੍ਤਰਮਧੁਰਾਯਂ ਅਞ੍ਞਤਰਾ ਇਤ੍ਥੀ ਖੀਣਾਯੁਕਾ ਹੋਤਿ ਅਪਾਯੇ ਉਪ੍ਪਜ੍ਜਨਾਰਹਾ. ਭਗਵਾ ਪਚ੍ਚੂਸਵੇਲਾਯਂ ਮਹਾਕਰੁਣਾਸਮਾਪਤ੍ਤਿਤੋ ਵੁਟ੍ਠਾਯ ਲੋਕਂ ਵੋਲੋਕੇਨ੍ਤੋ ਤਂ ਇਤ੍ਥਿਂ ਅਪਾਯੇ ਉਪ੍ਪਜ੍ਜਨਾਰਹਂ ਦਿਸ੍ਵਾ ਮਹਾਕਰੁਣਾਯ ਸਞ੍ਚੋਦਿਤਮਾਨਸੋ ਤਂ ਸੁਗਤਿਯਂ ਪਤਿਟ੍ਠਾਪੇਤੁਕਾਮੋ ਏਕੋ ਅਦੁਤਿਯੋ ਮਧੁਰਂ ਅਗਮਾਸਿ. ਗਨ੍ਤ੍ਵਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਂ ਆਦਾਯ ਬਹਿਨਗਰਂ ਪਿਣ੍ਡਾਯ ਪਾਵਿਸਿ. ਤੇਨ ਸਮਯੇਨ ਸਾ ਇਤ੍ਥੀ ਗੇਹੇ ਆਹਾਰਂ ਸਮ੍ਪਾਦੇਤ੍ਵਾ ਏਕਮਨ੍ਤੇ ਪਟਿਸਾਮੇਤ੍ਵਾ ਘਟਂ ਗਹੇਤ੍ਵਾ ਉਦਕਤਿਤ੍ਥਂ ਗਨ੍ਤ੍ਵਾ ਨ੍ਹਾਯਿਤ੍ਵਾ ਘਟੇਨ ਉਦਕਂ ਗਹੇਤ੍ਵਾ ਅਤ੍ਤਨੋ ਗੇਹਂ ਗਚ੍ਛਨ੍ਤੀ ਅਨ੍ਤਰਾਮਗ੍ਗੇ ਭਗਵਨ੍ਤਂ ਪਸ੍ਸਿਤ੍ਵਾ ‘‘ਅਪਿ, ਭਨ੍ਤੇ, ਪਿਣ੍ਡੋ ਲਦ੍ਧੋ’’ਤਿ ਵਤ੍ਵਾ ‘‘ਲਭਿਸ੍ਸਾਮੀ’’ਤਿ ਚ ਭਗਵਤਾ ਵੁਤ੍ਤੇ ਅਲਦ੍ਧਭਾਵਂ ਞਤ੍ਵਾ ਘਟਂ ਠਪੇਤ੍ਵਾ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ‘‘ਅਹਂ, ਭਨ੍ਤੇ, ਪਿਣ੍ਡਪਾਤਂ ਦਸ੍ਸਾਮਿ, ਅਧਿਵਾਸੇਥਾ’’ਤਿ ਆਹ. ਅਧਿਵਾਸੇਸਿ ਭਗਵਾ ਤੁਣ੍ਹੀਭਾਵੇਨ. ਸਾ ਭਗਵਤੋ ਅਧਿਵਾਸਨਂ ਵਿਦਿਤ੍ਵਾ ਪਠਮਤਰਂ ਗਨ੍ਤ੍ਵਾ ਸਿਤ੍ਤਸਮ੍ਮਟ੍ਠੇ ਪਦੇਸੇ ਆਸਨਂ ਪਞ੍ਞਾਪੇਤ੍ਵਾ ਭਗਵਤੋ ਪਵੇਸਨਂ ਉਦਿਕ੍ਖਮਾਨਾ ਅਟ੍ਠਾਸਿ. ਭਗਵਾ ਗੇਹਂ ਪਵਿਸਿਤ੍ਵਾ ਪਞ੍ਞਤ੍ਤੇ ਆਸਨੇ ਨਿਸੀਦਿ. ਅਥ ਸਾ ਭਗਵਨ੍ਤਂ ਭੋਜੇਸਿ. ਭਗਵਾ ਕਤਭਤ੍ਤਕਿਚ੍ਚੋ ਓਨੀਤਪਤ੍ਤਪਾਣੀ ਤਸ੍ਸਾ ਅਨੁਮੋਦਨਂ ਕਤ੍ਵਾ ਪਕ੍ਕਾਮਿ. ਸਾ ਅਨੁਮੋਦਨਂ ਸੁਤ੍ਵਾ ਅਨਪ੍ਪਕਂ ਪੀਤਿਸੋਮਨਸ੍ਸਂ ਪਟਿਸਂਵੇਦੇਨ੍ਤੀ ਯਾਵ ਚਕ੍ਖੁਪਥਸਮਤਿਕ੍ਕਮਾ ਬੁਦ੍ਧਾਰਮ੍ਮਣਂ ਪੀਤਿਂ ਅਵਿਜਹਨ੍ਤੀ ਨਮਸ੍ਸਮਾਨਾ ਅਟ੍ਠਾਸਿ. ਸਾ ਕਤਿਪਯਦਿਵਸਾਤਿਕ੍ਕਮੇਨੇਵ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਨਿਬ੍ਬਤ੍ਤਿ, ਅਚ੍ਛਰਾਸਹਸ੍ਸਞ੍ਚਸ੍ਸਾ ਪਰਿਵਾਰੋ ਅਹੋਸਿ. ਤਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ –

੨੭੦. ‘‘ਅਭਿਕ੍ਕਨ੍ਤੇਨ ਵਣ੍ਣੇਨ…ਪੇ… ਓਸਧੀ ਵਿਯ ਤਾਰਕਾ.

੨੭੧. ‘‘ਕੇਨ ਤੇਤਾਦਿਸੋ ਵਣ੍ਣੋ…ਪੇ…

ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ. – ਗਾਥਾਹਿ ਪੁਚ੍ਛਿ;

੨੭੩. ‘‘ਸਾ ਦੇਵਤਾ ਅਤ੍ਤਮਨਾ…ਪੇ… ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

੨੭੪. ‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ,

ਪੁਰਿਮਾਯ ਜਾਤਿਯਾ ਮਨੁਸ੍ਸਲੋਕੇ.

੨੭੫. ‘‘ਅਦ੍ਦਸਂ ਵਿਰਜਂ ਬੁਦ੍ਧਂ, ਵਿਪ੍ਪਸਨ੍ਨਮਨਾਵਿਲਂ;

ਤਸ੍ਸ ਅਦਾਸਹਂ ਭਿਕ੍ਖਂ, ਪਸਨ੍ਨਾ ਸੇਹਿ ਪਾਣਿਭਿ.

੨੭੬. ‘‘ਤੇਨ ਮੇਤਾਦਿਸੋ ਵਣ੍ਣੋ…ਪੇ…

ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ. –

ਦੇਵਤਾ ਬ੍ਯਾਕਾਸਿ. ਸੇਸਂ ਸਬ੍ਬਂ ਹੇਟ੍ਠਾ ਵੁਤ੍ਤਨਯਤ੍ਤਾ ਉਤ੍ਤਾਨਤ੍ਥਮੇਵ.

ਪਠਮਭਿਕ੍ਖਾਦਾਯਿਕਾਵਿਮਾਨਵਣ੍ਣਨਾ ਨਿਟ੍ਠਿਤਾ.