੯. ਦੀਪਵਿਮਾਨਵਣ੍ਣਨਾ

ਅਭਿਕ੍ਕਨ੍ਤੇਨ ਵਣ੍ਣੇਨਾਤਿ ਦੀਪਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਤਿ ਸਾਵਤ੍ਥਿਯਂ ਵਿਹਰਨ੍ਤੇ ਉਪੋਸਥਦਿਵਸੇ ਸਮ੍ਬਹੁਲਾ ਉਪਾਸਕਾ ਉਪੋਸਥਿਕਾ ਹੁਤ੍ਵਾ ਪੁਰੇਭਤ੍ਤਂ ਯਥਾਵਿਭਵਂ ਦਾਨਂ ਦਤ੍ਵਾ ਕਾਲਸ੍ਸੇਵ ਭੁਞ੍ਜਿਤ੍ਵਾ ਸੁਦ੍ਧਵਤ੍ਥਨਿਵਤ੍ਥਾ ਸੁਦ੍ਧੁਤ੍ਤਰਾਸਙ੍ਗਾ ਗਨ੍ਧਮਾਲਾਦਿਹਤ੍ਥਾ ਪਚ੍ਛਾਭਤ੍ਤਂ ਵਿਹਾਰਂ ਗਨ੍ਤ੍ਵਾ ਮਨੋਭਾਵਨੀਯੇ ਭਿਕ੍ਖੂ ਪਯਿਰੁਪਾਸਿਤ੍ਵਾ ਸਾਯਨ੍ਹੇ ਧਮ੍ਮਂ ਸੁਣਨ੍ਤਿ. ਵਿਹਾਰੇਯੇਵ ਵਸਿਤੁਕਾਮਾਨਂ ਤੇਸਂ ਧਮ੍ਮਂ ਸੁਣਨ੍ਤਾਨਂਯੇਵ ਸੂਰਿਯੋ ਅਤ੍ਥਙ੍ਗਤੋ, ਅਨ੍ਧਕਾਰੋ ਜਾਤੋ. ਤਤ੍ਥੇਕਾ ਅਞ੍ਞਤਰਾ ਇਤ੍ਥੀ ‘‘ਇਦਾਨਿ ਦੀਪਾਲੋਕਂ ਕਾਤੁਂ ਯੁਤ੍ਤ’’ਨ੍ਤਿ ਚਿਨ੍ਤੇਤ੍ਵਾ ਅਤ੍ਤਨੋ ਗੇਹਤੋ ਪਦੀਪੇਯ੍ਯਂ ਆਹਰਾਪੇਤ੍ਵਾ ਪਦੀਪਂ ਉਜ੍ਜਾਲੇਤ੍ਵਾ ਧਮ੍ਮਾਸਨਸ੍ਸ ਪੁਰਤੋ ਠਪੇਤ੍ਵਾ ਧਮ੍ਮਂ ਸੁਣਿ. ਸਾ ਤੇਨ ਪਦੀਪਦਾਨੇਨ ਅਤ੍ਤਮਨਾ ਪੀਤਿਸੋਮਨਸ੍ਸਜਾਤਾ ਹੁਤ੍ਵਾ ਵਨ੍ਦਿਤ੍ਵਾ ਅਤ੍ਤਨੋ ਗੇਹਂ ਗਤਾ. ਸਾ ਅਪਰਭਾਗੇ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਜੋਤਿਰਸਵਿਮਾਨੇ ਨਿਬ੍ਬਤ੍ਤਿ. ਸਰੀਰਸੋਭਾ ਪਨਸ੍ਸਾ ਅਤਿਵਿਯ ਪਭਸ੍ਸਰਾ ਅਞ੍ਞੇ ਦੇਵੇ ਅਭਿਭਵਿਤ੍ਵਾ ਦਸ ਦਿਸਾ ਓਭਾਸਯਮਾਨਾ ਤਿਟ੍ਠਤਿ. ਅਥੇਕਦਿਵਸਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਦੇਵਚਾਰਿਕਂ ਚਰਨ੍ਤੋਤਿ ਸਬ੍ਬਂ ਹੇਟ੍ਠਾ ਆਗਤਨਯੇਨੇਵ ਵੇਦਿਤਬ੍ਬਂ. ਇਧ ਪਨ –

੭੫. ‘‘ਅਭਿਕ੍ਕਨ੍ਤੇਨ ਵਣ੍ਣੇਨ, ਯਾ ਤ੍ਵਂ ਤਿਟ੍ਠਸਿ ਦੇਵਤੇ;

ਓਭਾਸੇਨ੍ਤੀ ਦਿਸਾ ਸਬ੍ਬਾ, ਓਸਧੀ ਵਿਯ ਤਾਰਕਾ.

੭੬. ‘‘ਕੇਨ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

੭੭. ‘‘ਕੇਨ ਤ੍ਵਂ ਵਿਮਲੋਭਾਸਾ, ਅਤਿਰੋਚਸਿ ਦੇਵਤਾ;

ਕੇਨ ਤੇ ਸਬ੍ਬਗਤ੍ਤੇਹਿ, ਸਬ੍ਬਾ ਓਭਾਸਤੇ ਦਿਸਾ.

੭੮. ‘‘ਪੁਚ੍ਛਾਮਿ ਤਂ ਦੇਵਿ ਮਹਾਨੁਭਾਵੇ, ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ. –

ਚਤੂਹਿ ਗਾਥਾਹਿ ਪੁਚ੍ਛਿ.

੭੯. ‘‘ਸਾ ਦੇਵਤਾ ਅਤ੍ਤਮਨਾ, ਮੋਗ੍ਗਲ੍ਲਾਨੇਨ ਪੁਚ੍ਛਿਤਾ;

ਪਞ੍ਹਂ ਪੁਟ੍ਠਾ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

੮੦. ‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਪੁਰਿਮਾਯ ਜਾਤਿਯਾ ਮਨੁਸ੍ਸਲੋਕੇ;

ਤਮਨ੍ਧਕਾਰਮ੍ਹਿ ਤਿਮੀਸਿਕਾਯਂ, ਪਦੀਪਕਾਲਮ੍ਹਿ ਅਦਾਸਿ ਦੀਪਂ.

੮੧. ‘‘ਯੋ ਅਨ੍ਧਕਾਰਮ੍ਹਿ ਤਿਮੀਸਿਕਾਯਂ, ਪਦੀਪਕਾਲਮ੍ਹਿ ਦਦਾਤਿ ਦੀਪਂ;

ਉਪ੍ਪਜ੍ਜਤਿ ਜੋਤਿਰਸਂ ਵਿਮਾਨਂ, ਪਹੂਤਮਲ੍ਯਂ ਬਹੁਪੁਣ੍ਡਰੀਕਂ.

੮੨. ‘‘ਤੇਨ ਮੇਤਾਦਿਸੋ ਵਣ੍ਣੋ, ਤੇਨ ਮੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਮੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

੮੩. ‘‘ਤੇਨਾਹਂ ਵਿਮਲੋਭਾਸਾ, ਅਤਿਰੋਚਾਮਿ ਦੇਵਤਾ;

ਤੇਨ ਮੇ ਸਬ੍ਬਗਤ੍ਤੇਹਿ, ਸਬ੍ਬਾ ਓਭਾਸਤੇ ਦਿਸਾ.

੮੪. ‘‘ਅਕ੍ਖਾਮਿ ਤੇ ਭਿਕ੍ਖੁ ਮਹਾਨੁਭਾਵ, ਮਨੁਸ੍ਸਭੂਤਾ ਯਮਕਾਸਿ ਪੁਞ੍ਞਂ;

ਤੇਨਮ੍ਹਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ. –

ਵਿਸ੍ਸਜ੍ਜੇਸਿ.

੭੫. ਤਤ੍ਥ ਅਭਿਕ੍ਕਨ੍ਤੇਨ ਵਣ੍ਣੇਨਾਤਿ ਏਤ੍ਥ ਅਭਿਕ੍ਕਨ੍ਤ-ਸਦ੍ਦੋ ‘‘ਅਭਿਕ੍ਕਨ੍ਤਾ, ਭਨ੍ਤੇ, ਰਤ੍ਤਿ, ਨਿਕ੍ਖਨ੍ਤੋ ਪਠਮੋ ਯਾਮੋ’’ਤਿਆਦੀਸੁ (ਅ. ਨਿ. ੮.੨੦; ਉਦਾ. ੪੫; ਚੂਲ਼ਵ. ੩੮੩) ਖਯੇ ਆਗਤੋ. ‘‘ਅਯਂ ਇਮੇਸਂ ਚਤੁਨ੍ਨਂ ਪੁਗ੍ਗਲਾਨਂ ਅਭਿਕ੍ਕਨ੍ਤਤਰੋ ਚ ਪਣੀਤਤਰੋ ਚਾ’’ਤਿਆਦੀਸੁ (ਅ. ਨਿ. ੪.੧੦੦) ਸੁਨ੍ਦਰੇ. ‘‘ਅਭਿਕ੍ਕਨ੍ਤਂ, ਭਨ੍ਤੇ, ਅਭਿਕ੍ਕਨ੍ਤਂ, ਭਨ੍ਤੇ’’ਤਿਆਦੀਸੁ (ਦੀ. ਨਿ. ੧.੨੫੦; ਪਾਰਾ. ੧੫) ਅਬ੍ਭਨੁਮੋਦਨੇ. ‘‘ਅਭਿਕ੍ਕਨ੍ਤੇਨ ਵਣ੍ਣੇਨ, ਸਬ੍ਬਾ ਓਭਾਸਯਂ ਦਿਸਾ’’ਤਿਆਦੀਸੁ (ਵਿ. ਵ. ੮੫੭) ਅਭਿਰੂਪੇ. ਇਧਾਪਿ ਅਭਿਰੂਪੇ ਏਵ ਦਟ੍ਠਬ੍ਬੋ. ਤਸ੍ਮਾ ਅਭਿਕ੍ਕਨ੍ਤੇਨਾਤਿ ਅਤਿਕਨ੍ਤੇਨ ਅਤਿਮਨਾਪੇਨ, ਅਭਿਰੂਪੇਨਾਤਿ ਅਤ੍ਥੋ. ਵਣ੍ਣੇਨਾਤਿ ਛਵਿਵਣ੍ਣੇਨ. ਓਭਾਸੇਨ੍ਤੀ ਦਿਸਾ ਸਬ੍ਬਾਤਿ ਸਬ੍ਬਾਪਿ ਦਸ ਦਿਸਾ ਜੋਤੇਨ੍ਤੀ ਏਕਾਲੋਕਂ ਕਰੋਨ੍ਤੀ. ਕਿਂ ਵਿਯਾਤਿ ਆਹ ‘‘ਓਸਧੀ ਵਿਯ ਤਾਰਕਾ’’ਤਿ. ਉਸ੍ਸਨ੍ਨਾ ਪਭਾ ਏਤਾਯ ਧੀਯਤਿ, ਓਸਧੀਨਂ ਵਾ ਅਨੁਬਲਪ੍ਪਦਾਯਿਕਾਤਿ ਕਤ੍ਵਾ ‘‘ਓਸਧੀ’’ਤਿ ਲਦ੍ਧਨਾਮਾ ਤਾਰਕਾ ਯਥਾ ਸਮਨ੍ਤਤੋ ਆਲੋਕਂ ਕੁਰੁਮਾਨਾ ਤਿਟ੍ਠਤਿ, ਏਵਮੇਵ ਤ੍ਵਂ ਸਬ੍ਬਾ ਦਿਸਾ ਓਭਾਸਯਨ੍ਤੀ ਤਿਟ੍ਠਸੀਤਿ.

੭੭. ਸਬ੍ਬਗਤ੍ਤੇਹੀਤਿ ਸਬ੍ਬੇਹਿ ਸਰੀਰਾਵਯਵੇਹਿ, ਸਕਲੇਹਿ ਅਙ੍ਗਪਚ੍ਚਙ੍ਗੇਹਿ ਓਭਾਸਤੀਤਿ ਅਧਿਪ੍ਪਾਯੋ, ਹੇਤੁਮ੍ਹਿ ਚੇਤਂ ਕਰਣਵਚਨਂ. ਸਬ੍ਬਾ ਓਭਾਸਤੇ ਦਿਸਾਤਿ ਸਬ੍ਬਾਪਿ ਦਸਦਿਸਾ ਵਿਜ੍ਜੋਤਤਿ. ‘‘ਓਭਾਸਰੇ’’ਤਿਪਿ ਪਠਨ੍ਤਿ, ਤੇਸਂ ਸਬ੍ਬਾ ਦਿਸਾਤਿ ਬਹੁਵਚਨਮੇਵ ਦਟ੍ਠਬ੍ਬਂ.

੮੧. ਪਦੀਪਕਾਲਮ੍ਹੀਤਿ ਪਦੀਪਕਰਣਕਾਲੇ, ਪਦੀਪੁਜ੍ਜਲਨਯੋਗ੍ਗੇ ਅਨ੍ਧਕਾਰੇਤਿ ਅਤ੍ਥੋ. ਤੇਨਾਹ ‘‘ਯੋ ਅਨ੍ਧਕਾਰਮ੍ਹਿ ਤਿਮੀਸਿਕਾਯ’’ਨ੍ਤਿ, ਬਹਲੇ ਮਹਨ੍ਧਕਾਰੇਤਿ ਅਤ੍ਥੋ. ਦਦਾਤਿ ਦੀਪਨ੍ਤਿ ਪਦੀਪਂ ਉਜ੍ਜਾਲੇਨ੍ਤੋ ਵਾ ਅਨੁਜ੍ਜਾਲੇਨ੍ਤੋ ਵਾ ਪਦੀਪਦਾਨਂ ਦਦਾਤਿ, ਪਦੀਪੋਪਕਰਣਾਨਿ ਦਕ੍ਖਿਣੇਯ੍ਯੇ ਉਦ੍ਦਿਸ੍ਸ ਪਰਿਚ੍ਚਜਤਿ. ਉਪਪਜ੍ਜਤਿ ਜੋਤਿਰਸਂ ਵਿਮਾਨਨ੍ਤਿ ਪਟਿਸਨ੍ਧਿਗ੍ਗਹਣਵਸੇਨ ਜੋਤਿਰਸਂ ਵਿਮਾਨਂ ਉਪਗਚ੍ਛਤੀਤਿ. ਸੇਸਂ ਵੁਤ੍ਤਨਯਮੇਵ.

ਅਥ ਯਥਾਪੁਚ੍ਛਿਤੇ ਅਤ੍ਥੇ ਦੇਵਤਾਯ ਕਥਿਤੇ ਥੇਰੋ ਤਮੇਵ ਕਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਦਾਨਾਦਿਕਥਾਯ ਤਸ੍ਸਾ ਕਲ੍ਲਚਿਤ੍ਤਾਦਿਭਾਵਂ ਞਤ੍ਵਾ ਸਚ੍ਚਾਨਿ ਪਕਾਸੇਸਿ, ਸਚ੍ਚਪਰਿਯੋਸਾਨੇ ਸਪਰਿਵਾਰਾ ਸਾ ਦੇਵਤਾ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਥੇਰੋ ਤਤੋ ਆਗਨ੍ਤ੍ਵਾ ਤਂ ਪਵਤ੍ਤਿਂ ਭਗਵਤੋ ਆਰੋਚੇਸਿ, ਭਗਵਾ ਤਸ੍ਮਿਂ ਵਤ੍ਥੁਸ੍ਮਿਂ ਸਮ੍ਪਤ੍ਤਪਰਿਸਾਯ ਵਿਤ੍ਥਾਰੇਨ ਧਮ੍ਮਂ ਦੇਸੇਸਿ. ਸਾ ਦੇਸਨਾ ਮਹਾਜਨਸ੍ਸ ਸਾਤ੍ਥਿਕਾ ਜਾਤਾ, ਮਹਾਜਨੋ ਵਿਸੇਸਤੋ ਦੀਪਦਾਨੇ ਸਕ੍ਕਚ੍ਚਕਾਰੀ ਅਹੋਸੀਤਿ.

ਦੀਪਵਿਮਾਨਵਣ੍ਣਨਾ ਨਿਟ੍ਠਿਤਾ.