੧੦. ਤਿਲਦਕ੍ਖਿਣਵਿਮਾਨਵਣ੍ਣਨਾ

ਅਭਿਕ੍ਕਨ੍ਤੇਨ ਵਣ੍ਣੇਨਾਤਿ ਤਿਲਦਕ੍ਖਿਣਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤੇਨ ਚ ਸਮਯੇਨ ਰਾਜਗਹੇ ਅਞ੍ਞਤਰਾ ਇਤ੍ਥੀ ਗਬ੍ਭਿਨੀ ਤਿਲੇ ਧੋਵਿਤ੍ਵਾ ਆਤਪੇ ਸੁਕ੍ਖਾਪੇਤਿ ਤੇਲਂ ਕਾਤੁਕਾਮਾ. ਸਾ ਚ ਪਰਿਕ੍ਖੀਣਾਯੁਕਾ ਤਂ ਦਿਵਸਮੇਵ ਚਵਨਧਮ੍ਮਾ, ਨਿਰਯਸਂਵਤ੍ਤਨਿਕਂ ਚਸ੍ਸਾ ਕਮ੍ਮਂ ਓਕਾਸਂ ਕਤ੍ਵਾ ਠਿਤਂ. ਅਥ ਨਂ ਭਗਵਾ ਪਚ੍ਚੂਸਵੇਲਾਯਂ ਲੋਕਂ ਵੋਲੋਕੇਨ੍ਤੋ ਦਿਬ੍ਬਚਕ੍ਖੁਨਾ ਦਿਸ੍ਵਾ ਚਿਨ੍ਤੇਸਿ ‘‘ਅਯਂ ਇਤ੍ਥੀ ਅਜ੍ਜ ਕਾਲਂ ਕਤ੍ਵਾ ਨਿਰਯੇ ਨਿਬ੍ਬਤ੍ਤਿਸ੍ਸਤਿ, ਯਂਨੂਨਾਹਂ ਤਿਲਭਿਕ੍ਖਾਪਟਿਗ੍ਗਹਣੇਨ ਤਂ ਸਗ੍ਗੂਪਗਂ ਕਰੇਯ੍ਯ’’ਨ੍ਤਿ. ਸੋ ਸਾਵਤ੍ਥਿਤੋ ਤਙ੍ਖਣੇਨੇਵ ਰਾਜਗਹਂ ਗਨ੍ਤ੍ਵਾ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਰਾਜਗਹੇ ਪਿਣ੍ਡਾਯ ਚਰਨ੍ਤੋ ਅਨੁਪੁਬ੍ਬੇਨ ਤਸ੍ਸਾ ਗੇਹਦ੍ਵਾਰਂ ਪਾਪੁਣਿ. ਸਾ ਇਤ੍ਥੀ ਭਗਵਨ੍ਤਂ ਪਸ੍ਸਿਤ੍ਵਾ ਸਞ੍ਜਾਤਪੀਤਿਸੋਮਨਸ੍ਸਾ ਸਹਸਾ ਉਟ੍ਠਹਿਤ੍ਵਾ ਕਤਞ੍ਜਲੀ ਅਞ੍ਞਂ ਦਾਤਬ੍ਬਯੁਤ੍ਤਕਂ ਅਪਸ੍ਸਨ੍ਤੀ ਹਤ੍ਥਪਾਦੇ ਧੋਵਿਤ੍ਵਾ ਤਿਲੇ ਰਾਸਿਂ ਕਤ੍ਵਾ ਉਭੋਹਿ ਹਤ੍ਥੇਹਿ ਪਰਿਗ੍ਗਹੇਤ੍ਵਾ ਅਞ੍ਜਲਿਪੂਰਂ ਤਿਲਂ ਭਗਵਤੋ ਪਤ੍ਤੇ ਆਕਿਰਿਤ੍ਵਾ ਭਗਵਨ੍ਤਂ ਵਨ੍ਦਿ. ਤਂ ਭਗਵਾ ਅਨੁਕਮ੍ਪਮਾਨੋ ‘‘ਸੁਖਿਨੀ ਹੋਹੀ’’ਤਿ ਵਤ੍ਵਾ ਪਕ੍ਕਾਮਿ. ਸਾ ਤਸ੍ਸਾ ਰਤ੍ਤਿਯਾ ਪਚ੍ਚੂਸਸਮਯੇ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਦ੍ਵਾਦਸਯੋਜਨਿਕੇ ਕਨਕਵਿਮਾਨੇ ਸੁਤ੍ਤਪਬੁਦ੍ਧਾ ਵਿਯ ਨਿਬ੍ਬਤ੍ਤਿ.

ਅਥਾਯਸ੍ਮਾ ਮਹਾਮੋਗ੍ਗਲ੍ਲਾਨੋ ਦੇਵਚਾਰਿਕਂ ਚਰਨ੍ਤੋ ਤਂ ਅਚ੍ਛਰਾਸਹਸ੍ਸਪਰਿਵੁਤਂ ਮਹਤਿਯਾ ਦੇਵਿਦ੍ਧਿਯਾ ਵਿਰੋਚਮਾਨਮੁਪਗਨ੍ਤ੍ਵਾ –

੮੫. ‘‘ਅਭਿਕ੍ਕਨ੍ਤੇਨ ਵਣ੍ਣੇਨ, ਯਾ ਤ੍ਵਂ ਤਿਟ੍ਠਸਿ ਦੇਵਤੇ;

ਓਭਾਸੇਨ੍ਤੀ ਦਿਸਾ ਸਬ੍ਬਾ, ਓਸਧੀ ਵਿਯ ਤਾਰਕਾ.

੮੬. ‘‘ਕੇਨ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

੮੭. ‘‘ਪੁਚ੍ਛਾਮਿ ਤਂ ਦੇਵਿ ਮਹਾਨੁਭਾਵੇ,

ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ,

ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ. – ਪੁਚ੍ਛਿ;

੮੮. ‘‘ਸਾ ਦੇਵਤਾ ਅਤ੍ਤਮਨਾ, ਮੋਗ੍ਗਲ੍ਲਾਨੇਨ ਪੁਚ੍ਛਿਤਾ;

ਪਞ੍ਹਂ ਪੁਟ੍ਠਾ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

੮੯. ‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਪੁਰਿਮਾਯ ਜਾਤਿਯਾ ਮਨੁਸ੍ਸਲੋਕੇ.

੯੦. ‘‘ਅਦ੍ਦਸਂ ਵਿਰਜਂ ਬੁਦ੍ਧਂ, ਵਿਪ੍ਪਸਨ੍ਨਮਨਾਵਿਲਂ;

ਆਸਜ੍ਜ ਦਾਨਂ ਅਦਾਸਿਂ, ਅਕਾਮਾ ਤਿਲਦਕ੍ਖਿਣਂ;

ਦਕ੍ਖਿਣੇਯ੍ਯਸ੍ਸ ਬੁਦ੍ਧਸ੍ਸ, ਪਸਨ੍ਨਾ ਸੇਹਿ ਪਾਣਿਭਿ.

੯੧. ‘‘ਤੇਨ ਮੇਤਾਦਿਸੋ ਵਣ੍ਣੋ, ਤੇਨ ਮੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਮੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

੯੨. ‘‘ਅਕ੍ਖਾਮਿ ਤੇ ਭਿਕ੍ਖੁ ਮਹਾਨੁਭਾਵ, ਮਨੁਸ੍ਸਭੂਤਾ ਯਮਕਾਸਿ ਪੁਞ੍ਞਂ;

ਤੇਨਮ੍ਹਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ. –

ਸਾ ਵਿਸ੍ਸਜ੍ਜੇਸਿ.

੯੦. ਤਤ੍ਥ ਆਸਜ੍ਜਾਤਿ ਅਯਂ ਆਸਜ੍ਜ-ਸਦ੍ਦੋ ‘‘ਆਸਜ੍ਜ ਨਂ ਤਥਾਗਤ’’ਨ੍ਤਿਆਦੀਸੁ (ਚੂਲ਼ਵ. ੩੫੦) ਘਟ੍ਟੇਨ ਆਗਤੋ. ‘‘ਆਸਜ੍ਜ ਦਾਨਂ ਦੇਤੀ’’ਤਿਆਦੀਸੁ (ਦੀ. ਨਿ. ੩.੩੩੬; ਅ. ਨਿ. ੮.੩੧) ਸਮਾਗਮੇ. ਇਧਾਪਿ ਸਮਾਗਮੇਯੇਵ ਦਟ੍ਠਬ੍ਬੋ. ਤਸ੍ਮਾ ਆਸਜ੍ਜਾਤਿ ਸਮਾਗਨ੍ਤ੍ਵਾ, ਸਮਵਾਯੇਨ ਸਮ੍ਪਤ੍ਵਾਤਿ ਅਤ੍ਥੋ. ਤੇਨਾਹ ‘‘ਅਕਾਮਾ’’ਤਿ. ਸਾ ਹਿ ਦੇਯ੍ਯਧਮ੍ਮਸਂਵਿਧਾਨਪੁਬ੍ਬਕਂ ਪੁਰਿਮਸਿਦ੍ਧਂ ਦਾਨਸਙ੍ਕਪ੍ਪਂ ਵਿਨਾ ਸਹਸਾ ਸਮ੍ਪਤ੍ਤੇ ਭਗਵਤਿ ਪਵਤ੍ਤਿਤਂ ਤਿਲਦਾਨਂ ਸਨ੍ਧਾਯਾਹ ‘‘ਆਸਜ੍ਜ ਦਾਨਂ ਅਦਾਸਿਂ, ਅਕਾਮਾ ਤਿਲਦਕ੍ਖਿਣ’’ਨ੍ਤਿ. ਸੇਸਂ ਵੁਤ੍ਤਨਯਮੇਵ.

ਤਿਲਦਕ੍ਖਿਣਵਿਮਾਨਵਣ੍ਣਨਾ ਨਿਟ੍ਠਿਤਾ.