੧੧. ਪਠਮਪਤਿਬ੍ਬਤਾਵਿਮਾਨਵਣ੍ਣਨਾ

ਕੋਞ੍ਚਾ ਮਯੂਰਾ ਦਿਵਿਯਾ ਚ ਹਂਸਾਤਿ ਪਤਿਬ੍ਬਤਾਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤਤ੍ਥ ਅਞ੍ਞਤਰਾ ਇਤ੍ਥੀ ਪਤਿਬ੍ਬਤਾ ਅਹੋਸਿ ਭਤ੍ਤੁ ਅਨੁਕੂਲਵਤ੍ਤਿਨੀ ਖਮਾ ਪਦਕ੍ਖਿਣਗ੍ਗਾਹਿਨੀ, ਨ ਕੁਦ੍ਧਾਪਿ ਪਟਿਪ੍ਫਰਤਿ, ਅਫਰੁਸਵਾਚਾ ਸਚ੍ਚਵਾਦਿਨੀ ਸਦ੍ਧਾ ਪਸਨ੍ਨਾ ਯਥਾਵਿਭਵਂ ਦਾਨਾਨਿ ਚ ਅਦਾਸਿ. ਸਾ ਕੇਨਚਿਦੇਵ ਰੋਗੇਨ ਫੁਟ੍ਠਾ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਨਿਬ੍ਬਤ੍ਤਿ. ਅਥਾਯਸ੍ਮਾ ਮਹਾਮੋਗ੍ਗਲ੍ਲਾਨੋ ਪੁਰਿਮਨਯੇਨੇਵ ਦੇਵਚਾਰਿਕਂ ਚਰਨ੍ਤੋ ਤਂ ਦੇਵਧੀਤਰਂ ਮਹਤਿਂ ਸਮ੍ਪਤ੍ਤਿਂ ਅਨੁਭਵਨ੍ਤਿਂ ਦਿਸ੍ਵਾ ਤਸ੍ਸਾ ਸਮੀਪਮੁਪਗਤੋ. ਸਾ ਅਚ੍ਛਰਾਸਹਸ੍ਸਪਰਿਵੁਤਾ ਸਟ੍ਠਿਸਕਟਭਾਰਾਲਙ੍ਕਾਰਪਟਿਮਣ੍ਡਿਤਤ੍ਤਭਾਵਾ ਥੇਰਸ੍ਸ ਪਾਦੇਸੁ ਸਿਰਸਾ ਵਨ੍ਦਿਤ੍ਵਾ ਏਕਮਨ੍ਤਂ ਅਟ੍ਠਾਸਿ. ਥੇਰੋਪਿ ਤਾਯ ਕਤਪੁਞ੍ਞਕਮ੍ਮਂ ਪੁਚ੍ਛਨ੍ਤੋ –

੯੩. ‘‘ਕੋਞ੍ਚਾ ਮਯੂਰਾ ਦਿਵਿਯਾ ਚ ਹਂਸਾ, ਵਗ੍ਗੁਸ੍ਸਰਾ ਕੋਕਿਲਾ ਸਮ੍ਪਤਨ੍ਤਿ;

ਪੁਪ੍ਫਾਭਿਕਿਣ੍ਣਂ ਰਮ੍ਮਮਿਦਂ ਵਿਮਾਨਂ, ਅਨੇਕਚਿਤ੍ਤਂ ਨਰਨਾਰਿਸੇਵਿਤਂ.

੯੪. ‘‘ਤਤ੍ਥਚ੍ਛਸਿ ਦੇਵਿ ਮਹਾਨੁਭਾਵੇ, ਇਦ੍ਧੀ ਵਿਕੁਬ੍ਬਨ੍ਤਿ ਅਨੇਕਰੂਪਾ;

ਇਮਾ ਚ ਤੇ ਅਚ੍ਛਰਾਯੋ ਸਮਨ੍ਤਤੋ, ਨਚ੍ਚਨ੍ਤਿ ਗਾਯਨ੍ਤਿ ਪਮੋਦਯਨ੍ਤਿ ਚ.

੯੫. ‘‘ਦੇਵਿਦ੍ਧਿਪਤ੍ਤਾਸਿ ਮਹਾਨੁਭਾਵੇ,

ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ,

ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ. – ਆਹ;

੯੬. ‘‘ਸਾ ਦੇਵਤਾ ਅਤ੍ਤਮਨਾ, ਮੋਗ੍ਗਲ੍ਲਾਨੇਨ ਪੁਚ੍ਛਿਤਾ;

ਪਞ੍ਹਂ ਪੁਟ੍ਠਾ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

੯੭. ‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਪਤਿਬ੍ਬਤਾਨਞ੍ਞਮਨਾ ਅਹੋਸਿਂ;

ਮਾਤਾਵ ਪੁਤ੍ਤਂ ਅਨੁਰਕ੍ਖਮਾਨਾ, ਕੁਦ੍ਧਾਪਿਹਂ ਨਪ੍ਫਰੁਸਂ ਅਵੋਚਂ.

੯੮. ‘‘ਸਚ੍ਚੇ ਠਿਤਾ ਮੋਸਵਜ੍ਜਂ ਪਹਾਯ, ਦਾਨੇ ਰਤਾ ਸਙ੍ਗਹਿਤਤ੍ਤਭਾਵਾ;

ਅਨ੍ਨਞ੍ਚ ਪਾਨਞ੍ਚ ਪਸਨ੍ਨਚਿਤ੍ਤਾ, ਸਕ੍ਕਚ੍ਚ ਦਾਨਂ ਵਿਪੁਲਂ ਅਦਾਸਿਂ.

੯੯. ‘‘ਤੇਨ ਮੇਤਾਦਿਸੋ ਵਣ੍ਣੋ, ਤੇਨ ਮੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਮੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

੧੦੦. ‘‘ਅਕ੍ਖਾਮਿ ਤੇ ਭਿਕ੍ਖੁ ਮਹਾਨੁਭਾਵ, ਮਨੁਸ੍ਸਭੂਤਾ ਯਮਕਾਸਿ ਪੁਞ੍ਞਂ;

ਤੇਨਮ੍ਹਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ. –

ਸਾ ਦੇਵਤਾ ਵਿਸ੍ਸਜ੍ਜੇਸਿ.

੯੩. ਤਤ੍ਥ ਕੋਞ੍ਚਾਤਿ ਕੋਞ੍ਚਸਕੁਣਾ, ਯੇ ‘‘ਸਾਰਸਾ’’ਤਿਪਿ ਵੁਚ੍ਚਨ੍ਤਿ. ਮਯੂਰਾਤਿ ਮੋਰਾ. ਦਿਵਿਯਾਤਿ ਦਿਬ੍ਬਾਨੁਭਾਵਾ. ਇਦਞ੍ਹਿ ਪਦਂ ‘‘ਦਿਵਿਯਾ ਕੋਞ੍ਚਾ, ਦਿਵਿਯਾ ਮਯੂਰਾ’’ਤਿਆਦਿਨਾ ਚਤੂਹਿਪਿ ਪਦੇਹਿ ਯੋਜੇਤਬ੍ਬਂ. ਹਂਸਾਤਿ ਸੁਵਣ੍ਣਹਂਸਾਦਿਹਂਸਾ. ਵਗ੍ਗੁਸ੍ਸਰਾਤਿ ਮਧੁਰਸ੍ਸਰਾ. ਕੋਕਿਲਾਤਿ ਕਾਲ਼ਕੋਕਿਲਾ ਚੇਵ ਸੁਕ੍ਕਕੋਕਿਲਾ ਚ. ਸਮ੍ਪਤਨ੍ਤੀਤਿ ਦੇਵਤਾਯ ਅਭਿਰਮਣਤ੍ਥਂ ਕੀਲ਼ਨ੍ਤਾ ਲਲ਼ਨ੍ਤਾ ਸਮਨ੍ਤਤੋ ਪਤਨ੍ਤਿ ਵਿਚਰਨ੍ਤਿ. ਕੋਞ੍ਚਾਦਿਰੂਪੇਨ ਹਿ ਦੇਵਤਾਯ ਰਤਿਜਨਨਤ੍ਥਂ ਪਰਿਵਾਰਭੂਤਾ ਦੇਵਤਾ ਕੀਲ਼ਨ੍ਤਾ ਲਲ਼ਨ੍ਤਾ ‘‘ਕੋਞ੍ਚਾ’’ਤਿਆਦਿਨਾ ਵੁਤ੍ਤਾ. ਪੁਪ੍ਫਾਭਿਕਿਣ੍ਣਨ੍ਤਿ ਗਨ੍ਥਿਤਾਗਨ੍ਥਿਤੇਹਿ ਨਾਨਾਵਿਧਰਤਨਕੁਸੁਮੇਹਿ ਓਕਿਣ੍ਣਂ. ਰਮ੍ਮਨ੍ਤਿ ਰਮਣੀਯਂ, ਮਨੋਰਮਨ੍ਤਿ ਅਤ੍ਥੋ. ਅਨੇਕਚਿਤ੍ਤਨ੍ਤਿ ਅਨੇਕੇਹਿ ਉਯ੍ਯਾਨਕਪ੍ਪਰੁਕ੍ਖਪੋਕ੍ਖਰਣਿਆਦੀਹਿ ਵਿਮਾਨੇਸੁ ਚ ਅਨੇਕੇਹਿ ਭਿਤ੍ਤਿਵਿਸੇਸਾਦੀਹਿ ਚਿਤ੍ਤਂ. ਨਰਨਾਰਿਸੇਵਿਤਨ੍ਤਿ ਪਰਿਵਾਰਭੂਤੇਹਿ ਦੇਵਪੁਤ੍ਤੇਹਿ ਦੇਵਧੀਤਾਹਿ ਚ ਉਪਸੇਵਿਤਂ.

੯੪. ਇਦ੍ਧੀ ਵਿਕੁਬ੍ਬਨ੍ਤਿ ਅਨੇਕਰੂਪਾਤਿ ਨਾਨਾਰੂਪਾਨਂ ਵਿਦਂਸਨੇਨ ਅਨੇਕਰੂਪਾ ਕਮ੍ਮਾਨੁਭਾਵਸਿਦ੍ਧਾ ਇਦ੍ਧੀ ਵਿਕੁਬ੍ਬਨ੍ਤੀ ਵਿਕੁਬ੍ਬਨਿਦ੍ਧਿਯੋ ਵਲਞ੍ਜੇਨ੍ਤੀ ਅਚ੍ਛਸੀਤਿ ਯੋਜਨਾ.

੯੭. ਅਨਞ੍ਞਮਨਾਤਿ ਪਤਿਬ੍ਬਤਾ, ਪਤਿਤੋ ਅਞ੍ਞਸ੍ਮਿਂ ਮਨੋ ਏਤਿਸ੍ਸਾਤਿ ਅਞ੍ਞਮਨਾ, ਨ ਅਞ੍ਞਮਨਾਤਿ ਅਨਞ੍ਞਮਨਾ, ਮਯ੍ਹਂ ਸਾਮਿਕਤੋ ਅਞ੍ਞਸ੍ਮਿਂ ਪੁਰਿਸੇ ਪਾਪਕਂ ਚਿਤ੍ਤਂ ਨ ਉਪ੍ਪਾਦੇਸਿਨ੍ਤਿ ਅਤ੍ਥੋ. ਮਾਤਾਵ ਪੁਤ੍ਤਂ ਅਨੁਰਕ੍ਖਮਾਨਾਤਿ ਯਥਾ ਮਾਤਾ ਪੁਤ੍ਤਂ, ਏਵਂ ਮਯ੍ਹਂ ਸਾਮਿਕਂ, ਸਬ੍ਬੇਪਿ ਵਾ ਸਤ੍ਤੇ ਹਿਤੇਸਿਤਾਯ ਅਹਿਤਾਪਨਯਨਕਾਮਤਾਯ ਚ ਅਨੁਦ੍ਦਯਮਾਨਾ. ਕੁਦ੍ਧਾਪਿਹਂ ਨਪ੍ਫਰੁਸਂ ਅਵੋਚਨ੍ਤਿ ਪਰੇਨ ਕਤਂ ਅਫਾਸੁਕਂ ਪਟਿਚ੍ਚ ਕੁਦ੍ਧਾਪਿ ਸਮਾਨਾ ਅਹਂ ਫਰੁਸਵਚਨਂ ਨ ਕਥੇਸਿਂ, ਅਞ੍ਞਦਤ੍ਥੁ ਪਿਯਵਚਨਮੇਵ ਅਭਾਸਿਨ੍ਤਿ ਅਧਿਪ੍ਪਾਯੋ.

੯੮. ਸਚ੍ਚੇ ਠਿਤਾਤਿ ਸਚ੍ਚੇ ਪਤਿਟ੍ਠਿਤਾ. ਯਸ੍ਮਾ ਮੁਸਾਵਾਦਾ ਵੇਰਮਣਿਯਾ ਸਚ੍ਚੇ ਪਤਿਟ੍ਠਿਤਾ ਨਾਮ ਹੋਤਿ, ਨ ਕਦਾਚਿ ਸਚ੍ਚਵਚਨਮਤ੍ਤੇਨਾਤਿ ਆਹ – ਮੋਸਵਜ੍ਜਂ ਪਹਾਯਾਤਿ ਮੁਸਾਵਾਦਂ ਪਹਾਯ. ਦਾਨੇ ਰਤਾਤਿ ਦਾਨੇ ਅਭਿਰਤਾ, ਯੁਤ੍ਤਪ੍ਪਯੁਤ੍ਤਾਤਿ ਅਤ੍ਥੋ. ਸਙ੍ਗਹਿਤਤ੍ਤਭਾਵਾਤਿ ਸਙ੍ਗਹਵਤ੍ਥੂਹਿ ਅਤ੍ਤਾਨਂ ਵਿਯ ਸਭਾਵੇਨੇਵ ਪਰੇਸਂ ਸਙ੍ਗਣ੍ਹਨਸੀਲਾ ਅਨ੍ਨਞ੍ਚ ਪਾਨਞ੍ਚ ਕਮ੍ਮਫਲਸਦ੍ਧਾਯ ਪਸਨ੍ਨਚਿਤ੍ਤਾ ਸਕ੍ਕਚ੍ਚਂ ਚਿਤ੍ਤੀਕਾਰੇਨ ਅਦਾਸਿਂ, ਅਞ੍ਞਞ੍ਚ ਵਤ੍ਥਾਦਿਦਾਨਂ ਵਿਪੁਲਂ ਉਲ਼ਾਰਂ ਅਦਾਸਿਨ੍ਤਿ ਯੋਜਨਾ. ਸੇਸਂ ਵੁਤ੍ਤਨਯਮੇਵ.

ਪਤਿਬ੍ਬਤਾਵਿਮਾਨਵਣ੍ਣਨਾ ਨਿਟ੍ਠਿਤਾ.