੧੨. ਦੁਤਿਯਪਤਿਬ੍ਬਤਾਵਿਮਾਨਵਣ੍ਣਨਾ

ਵੇਲ਼ੁਰਿਯਥਮ੍ਭਨ੍ਤਿ ਦੁਤਿਯਪਤਿਬ੍ਬਤਾਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਸਾਵਤ੍ਥਿਯਂ ਕਿਰ ਅਞ੍ਞਤਰਾ ਉਪਾਸਿਕਾ ਪਤਿਬ੍ਬਤਾ ਹੁਤ੍ਵਾ ਸਦ੍ਧਾ ਪਸਨ੍ਨਾ ਪਞ੍ਚ ਸੀਲਾਨਿ ਸੁਵਿਸੁਦ੍ਧਾਨਿ ਕਤ੍ਵਾ ਰਕ੍ਖਿ, ਯਥਾਵਿਭਵਞ੍ਚ ਦਾਨਾਨਿ ਅਦਾਸਿ, ਸਾ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਉਪ੍ਪਜ੍ਜਿ. ਸੇਸਂ ਹੇਟ੍ਠਾ ਵੁਤ੍ਤਨਯਮੇਵ.

੧੦੧. ‘‘ਵੇਲ਼ੁਰਿਯਥਮ੍ਭਂ ਰੁਚਿਰਂ ਪਭਸ੍ਸਰਂ, ਵਿਮਾਨਮਾਰੁਯ੍ਹ ਅਨੇਕਚਿਤ੍ਤਂ;

ਤਤ੍ਥਚ੍ਛਸਿ ਦੇਵਿ ਮਹਾਨੁਭਾਵੇ, ਉਚ੍ਚਾਵਚਾ ਇਦ੍ਧਿ ਵਿਕੁਬ੍ਬਮਾਨਾ;

ਇਮਾ ਚ ਤੇ ਅਚ੍ਛਰਾਯੋ ਸਮਨ੍ਤਤੋ, ਨਚ੍ਚਨ੍ਤਿ ਗਾਯਨ੍ਤਿ ਪਮੋਦਯਨ੍ਤਿ ਚ.

੧੦੨. ‘‘ਦੇਵਿਦ੍ਧਿਪਤ੍ਤਾਸਿ ਮਹਾਨੁਭਾਵੇ,

ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ,

ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ. – ਪੁਚ੍ਛਿ;

੧੦੩. ‘‘ਸਾ ਦੇਵਤਾ ਅਤ੍ਤਮਨਾ, ਮੋਗ੍ਗਲ੍ਲਾਨੇਨ ਪੁਚ੍ਛਿਤਾ;

ਪਞ੍ਹਂ ਪੁਟ੍ਠਾ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

੧੦੪. ‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਉਪਾਸਿਕਾ ਚਕ੍ਖੁਮਤੋ ਅਹੋਸਿਂ;

ਪਾਣਾਤਿਪਾਤਾ ਵਿਰਤਾ ਅਹੋਸਿਂ, ਲੋਕੇ ਅਦਿਨ੍ਨਂ ਪਰਿਵਜ੍ਜਯਿਸ੍ਸਂ.

੧੦੫. ‘‘ਅਮਜ੍ਜਪਾ ਨੋ ਚ ਮੁਸਾ ਅਭਾਣਿਂ, ਸਕੇਨ ਸਾਮਿਨਾ ਅਹੋਸਿਂ ਤੁਟ੍ਠਾ;

ਅਨ੍ਨਞ੍ਚ ਪਾਨਞ੍ਚ ਪਸਨ੍ਨਚਿਤ੍ਤਾ, ਸਕ੍ਕਚ੍ਚ ਦਾਨਂ ਵਿਪੁਲਂ ਅਦਾਸਿਂ.

੧੦੬. ‘‘ਤੇਨ ਮੇਤਾਦਿਸੋ ਵਣ੍ਣੋ, ਤੇਨ ਮੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਮੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

੧੦੭. ‘‘ਅਕ੍ਖਾਮਿ ਤੇ ਭਿਕ੍ਖੁ ਮਹਾਨੁਭਾਵ,

ਮਨੁਸ੍ਸਭੂਤਾ ਯਮਕਾਸਿ ਪੁਞ੍ਞਂ;

ਤੇਨਮ੍ਹਿ ਏਵਂ ਜਲਿਤਾਨੁਭਾਵਾ,

ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ. – ਵਿਸ੍ਸਜ੍ਜੇਸਿ;

੧੦੧. ਤਤ੍ਥ ਵੇਲ਼ੁਰਿਯਥਮ੍ਭਨ੍ਤਿ ਵੇਲ਼ੁਰਿਯਮਣਿਮਯਥਮ੍ਭਂ. ਰੁਚਿਰਨ੍ਤਿ ਰਮਣੀਯਂ. ਪਭਸ੍ਸਰਨ੍ਤਿ ਅਤਿਵਿਯ ਭਾਸੁਰਂ. ਉਚ੍ਚਾਵਚਾਤਿ ਉਚ੍ਚਾ ਚ ਅਵਚਾ ਚ, ਵਿਵਿਧਾਤਿ ਅਤ੍ਥੋ.

੧੦੪-੫. ਉਪਾਸਿਕਾਤਿ ਸਰਣਗਮਨੇਨ ਉਪਾਸਿਕਾਲਕ੍ਖਣੇ ਠਿਤਾ. ਵੁਤ੍ਤਞ੍ਹਿ –

‘‘ਯਤੋ ਖੋ, ਮਹਾਨਾਮ, ਅਰਿਯਸਾਵਕੋ ਬੁਦ੍ਧਂ ਸਰਣਂ ਗਤੋ ਹੋਤਿ, ਧਮ੍ਮਂ ਸਰਣਂ ਗਤੋ ਹੋਤਿ, ਸਙ੍ਘਂ ਸਰਣਂ ਗਤੋ ਹੋਤਿ, ਏਤ੍ਤਾਵਤਾ ਖੋ, ਮਹਾਨਾਮ, ਅਰਿਯਸਾਵਕੋ ਉਪਾਸਕੋ ਹੋਤੀ’’ਤਿ (ਸਂ. ਨਿ. ੫.੧੦੩੩).

ਚਕ੍ਖੁਮਤੋਤਿ ਪਞ੍ਚਹਿ ਚਕ੍ਖੂਹਿ ਚਕ੍ਖੁਮਤੋ ਬੁਦ੍ਧਸ੍ਸ ਭਗਵਤੋ. ਏਵਂ ਉਪਾਸਿਕਾਭਾਵਕਿਤ੍ਤਨੇਨ ਆਸਯਸੁਦ੍ਧਿਂ ਦਸ੍ਸੇਤ੍ਵਾ ਪਯੋਗਸੁਦ੍ਧਿਂ ਦਸ੍ਸੇਤੁਂ ‘‘ਪਾਣਾਤਿਪਾਤਾ ਵਿਰਤਾ’’ਤਿਆਦਿ ਵੁਤ੍ਤਂ. ਤਤ੍ਥ ਸਕੇਨ ਸਾਮਿਨਾ ਅਹੋਸਿਂ ਤੁਟ੍ਠਾਤਿ ਮਿਚ੍ਛਾਚਾਰਾਵੇਰਮਣਿਮਾਹ. ਸੇਸਂ ਹੇਟ੍ਠਾ ਵੁਤ੍ਤਸਦਿਸਮੇਵ.

ਦੁਤਿਯਪਤਿਬ੍ਬਤਾਵਿਮਾਨਵਣ੍ਣਨਾ ਨਿਟ੍ਠਿਤਾ.