੧੩. ਪਠਮਸੁਣਿਸਾਵਿਮਾਨਵਣ੍ਣਨਾ

ਅਭਿਕ੍ਕਨ੍ਤੇਨ ਵਣ੍ਣੇਨਾਤਿ ਸੁਣਿਸਾਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਸਾਵਤ੍ਥਿਯਂ ਅਞ੍ਞਤਰਸ੍ਮਿਂ ਗੇਹੇ ਏਕਾ ਕੁਲਸੁਣ੍ਹਾ ਗੇਹਂ ਪਿਣ੍ਡਾਯ ਪਵਿਟ੍ਠਂ ਖੀਣਾਸਵਤ੍ਥੇਰਂ ਦਿਸ੍ਵਾ ਸਞ੍ਜਾਤਪੀਤਿਸੋਮਨਸ੍ਸਾ ‘‘ਇਦਂ ਮਯ੍ਹਂ ਉਤ੍ਤਮਂ ਪੁਞ੍ਞਕ੍ਖੇਤ੍ਤਂ ਉਪਟ੍ਠਿਤ’’ਨ੍ਤਿ ਅਤ੍ਤਨਾ ਲਦ੍ਧਂ ਪੂਵਭਾਗਂ ਆਦਾਯ ਆਦਰੇਨ ਥੇਰਸ੍ਸ ਉਪਨੇਸਿ, ਥੇਰੋ ਤਂ ਪਟਿਗ੍ਗਹੇਤ੍ਵਾ ਅਨੁਮੋਦਨਂ ਕਤ੍ਵਾ ਗਤੋ. ਸਾ ਅਪਰਭਾਗੇ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਉਪ੍ਪਜ੍ਜਿ. ਸੇਸਂ ਸਬ੍ਬਂ ਹੇਟ੍ਠਾ ਵੁਤ੍ਤਸਦਿਸਮੇਵ. ਤੇਨ ਵੁਤ੍ਤਂ –

੧੦੮. ‘‘ਅਭਿਕ੍ਕਨ੍ਤੇਨ ਵਣ੍ਣੇਨ, ਯਾ ਤ੍ਵਂ ਤਿਟ੍ਠਸਿ ਦੇਵਤੇ;

ਓਭਾਸੇਨ੍ਤੀ ਦਿਸਾ ਸਬ੍ਬਾ, ਓਸਧੀ ਵਿਯ ਤਾਰਕਾ.

੧੦੯. ‘‘ਕੇਨ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

੧੧੦. ‘‘ਪੁਚ੍ਛਾਮਿ ਤਂ ਦੇਵਿ ਮਹਾਨੁਭਾਵੇ, ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੧੧੧. ‘‘ਸਾ ਦੇਵਤਾ ਅਤ੍ਤਮਨਾ, ਮੋਗ੍ਗਲ੍ਲਾਨੇਨ ਪੁਚ੍ਛਿਤਾ;

ਪਞ੍ਹਂ ਪੁਟ੍ਠਾ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

੧੧੨. ‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਸੁਣਿਸਾ ਅਹੋਸਿਂ ਸਸੁਰਸ੍ਸ ਗੇਹੇ.

੧੧੩. ‘‘ਅਦ੍ਦਸਂ ਵਿਰਜਂ ਭਿਕ੍ਖੁਂ, ਵਿਪ੍ਪਸਨ੍ਨਮਨਾਵਿਲਂ;

ਤਸ੍ਸ ਅਦਾਸਹਂ ਪੂਵਂ, ਪਸਨ੍ਨਾ ਸੇਹਿ ਪਾਣਿਭਿ;

ਭਾਗਡ੍ਢਭਾਗਂ ਦਤ੍ਵਾਨ, ਮੋਦਾਮਿ ਨਨ੍ਦਨੇ ਵਨੇ.

੧੧੪. ‘‘ਤੇਨ ਮੇਤਾਦਿਸੋ ਵਣ੍ਣੋ, ਤੇਨ ਮੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਮੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

੧੧੫. ‘‘ਅਕ੍ਖਾਮਿ ਤੇ ਭਿਕ੍ਖੁ ਮਹਾਨੁਭਾਵ, ਮਨੁਸ੍ਸਭੂਤਾ ਯਮਕਾਸਿ ਪੁਞ੍ਞਂ;

ਤੇਨਮ੍ਹਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

੧੧੨. ਤਤ੍ਥ ਸੁਣਿਸਾਤਿ ਪੁਤ੍ਤਸ੍ਸ ਭਰਿਯਾ. ਇਤ੍ਥਿਯਾ ਹਿ ਸਾਮਿਕਸ੍ਸ ਪਿਤਾ ‘‘ਸਸੁਰੋ’’ਤਿ ਵੁਚ੍ਚਤਿ, ਤਸ੍ਸ ਚ ਸਾ ‘‘ਸੁਣਿਸਾ’’ਤਿ. ਤਂ ਸਨ੍ਧਾਯ ‘‘ਸੁਣਿਸਾ ਅਹੋਸਿਂ ਸਸੁਰਸ੍ਸ ਗੇਹੇ’’ਤਿ.

੧੧੩. ਭਾਗਡ੍ਢਭਾਗਨ੍ਤਿ ਅਤ੍ਤਨਾ ਲਦ੍ਧਪਟਿਵੀਸਤੋ ਉਪਡ੍ਢਭਾਗਂ. ਮੋਦਾਮਿ ਨਨ੍ਦਨੇ ਵਨੇਤਿ ਥੇਰੇਨ ਨਨ੍ਦਨਵਨੇ ਦਿਟ੍ਠਤਾਯ ਆਹ. ਸੇਸਂ ਵੁਤ੍ਤਨਯਮੇਵ.

ਸੁਣਿਸਾਵਿਮਾਨਵਣ੍ਣਨਾ ਨਿਟ੍ਠਿਤਾ.