੭. ਦੁਤਿਯਨਾਵਾਵਿਮਾਨਵਣ੍ਣਨਾ

ਸੁਵਣ੍ਣਚ੍ਛਦਨਂ ਨਾਵਨ੍ਤਿ ਦੁਤਿਯਨਾਵਾਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਤਿ ਸਾਵਤ੍ਥਿਯਂ ਵਿਹਰਨ੍ਤੇ ਅਞ੍ਞਤਰੋ ਖੀਣਾਸਵਤ੍ਥੇਰੋ ਉਪਕਟ੍ਠਾਯ ਵਸ੍ਸੂਪਨਾਯਿਕਾਯ ਗਾਮਕਾਵਾਸੇ ਵਸ੍ਸਂ ਉਪਗਨ੍ਤੁਕਾਮੋ ਸਾਵਤ੍ਥਿਤੋ ਤਂ ਗਾਮਂ ਉਦ੍ਦਿਸ੍ਸ ਪਚ੍ਛਾਭਤ੍ਤਂ ਅਦ੍ਧਾਨਮਗ੍ਗਪਟਿਪਨ੍ਨੋ, ਮਗ੍ਗਪਰਿਸ੍ਸਮੇਨ ਕਿਲਨ੍ਤੋ ਤਸਿਤੋ ਅਨ੍ਤਰਾਮਗ੍ਗੇ ਅਞ੍ਞਤਰਂ ਗਾਮਂ ਸਮ੍ਪਤ੍ਤੋ, ਬਹਿਗਾਮੇ ਤਾਦਿਸਂ ਛਾਯੂਦਕਸਮ੍ਪਨ੍ਨਟ੍ਠਾਨਂ ਅਪਸ੍ਸਨ੍ਤੋ ਪਰਿਸ੍ਸਮੇਨ ਚ ਅਭਿਭੁਯ੍ਯਮਾਨੋ ਚੀਵਰਂ ਪਾਰੁਪਿਤ੍ਵਾ ਗਾਮਂ ਪਵਿਸਿਤ੍ਵਾ ਧੁਰਗੇਹਸ੍ਸੇਵ ਦ੍ਵਾਰੇ ਅਟ੍ਠਾਸਿ. ਤਤ੍ਥ ਅਞ੍ਞਤਰਾ ਇਤ੍ਥੀ ਥੇਰਂ ਪਸ੍ਸਿਤ੍ਵਾ ‘‘ਕੁਤੋ, ਭਨ੍ਤੇ, ਆਗਤਤ੍ਥਾ’’ਤਿ ਪੁਚ੍ਛਿਤ੍ਵਾ ਮਗ੍ਗਪਰਿਸ੍ਸਮਂ ਪਿਪਾਸਿਤਭਾਵਞ੍ਚ ਞਤ੍ਵਾ ‘‘ਏਥ, ਭਨ੍ਤੇ’’ਤਿ ਗੇਹਂ ਪਵੇਸੇਤ੍ਵਾ ‘‘ਇਧ ਨਿਸੀਦਥਾ’’ਤਿ ਆਸਨਂ ਪਞ੍ਞਾਪੇਤ੍ਵਾ ਅਦਾਸਿ. ਤਤ੍ਥ ਨਿਸਿਨ੍ਨੇ ਪਾਦੋਦਕਂ ਪਾਦਬ੍ਭਞ੍ਜਨਤੇਲਞ੍ਚ ਦਤ੍ਵਾ ਤਾਲਵਣ੍ਟਂ ਗਹੇਤ੍ਵਾ ਬੀਜਿ. ਪਰਿਲ਼ਾਹੇ ਵੂਪਸਨ੍ਤੇ ਮਧੁਰਂ ਸੀਤਲਂ ਸੁਗਨ੍ਧਂ ਪਾਨਕਂ ਯੋਜੇਤ੍ਵਾ ਅਦਾਸਿ. ਥੇਰੋ ਤਂ ਪਿਵਿਤ੍ਵਾ ਪਟਿਪ੍ਪਸ੍ਸਦ੍ਧਕਿਲਮਥੋ ਅਨੁਮੋਦਨਂ ਕਤ੍ਵਾ ਪਕ੍ਕਾਮਿ. ਸਾ ਅਪਰਭਾਗੇ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਨਿਬ੍ਬਤ੍ਤੀਤਿ ਸਬ੍ਬਂ ਅਨਨ੍ਤਰਵਿਮਾਨਸਦਿਸਨ੍ਤਿ ਵੇਦਿਤਬ੍ਬਂ. ਗਾਥਾਸੁਪਿ ਅਪੁਬ੍ਬਂ ਨਤ੍ਥਿ. ਤੇਨ ਵੁਤ੍ਤਂ –

੫੩. ‘‘ਸੁਵਣ੍ਣਚ੍ਛਦਨਂ ਨਾਵਂ, ਨਾਰਿ ਆਰੁਯ੍ਹ ਤਿਟ੍ਠਸਿ;

ਓਗਾਹਸਿ ਪੋਕ੍ਖਰਣਿਂ, ਪਦ੍ਮਂ ਛਿਨ੍ਦਸਿ ਪਾਣਿਨਾ.

੫੪. ‘‘ਕੇਨ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

੫੫. ‘‘ਪੁਚ੍ਛਾਮਿ ਤਂ ਦੇਵਿ ਮਹਾਨੁਭਾਵੇ, ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ.

੫੬. ‘‘ਸਾ ਦੇਵਤਾ ਅਤ੍ਤਮਨਾ, ਮੋਗ੍ਗਲ੍ਲਾਨੇਨ ਪੁਚ੍ਛਿਤਾ;

ਪਞ੍ਹਂ ਪੁਟ੍ਠਾ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲਂ’’.

੫੭. ‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਪੁਰਿਮਾਯ ਜਾਤਿਯਾ ਮਨੁਸ੍ਸਲੋਕੇ;

ਦਿਸ੍ਵਾਨ ਭਿਕ੍ਖੁਂ ਤਸਿਤਂ ਕਿਲਨ੍ਤਂ, ਉਟ੍ਠਾਯ ਪਾਤੁਂ ਉਦਕਂ ਅਦਾਸਿਂ.

੫੮. ‘‘ਯੋ ਵੇ ਕਿਲਨ੍ਤਸ੍ਸ ਪਿਪਾਸਿਤਸ੍ਸ, ਟ੍ਠਾਯ ਪਾਤੁਂ ਉਦਕਂ ਦਦਾਤਿ;

ਸੀਤੋਦਕਾ ਤਸ੍ਸ ਭਵਨ੍ਤਿ ਨਜ੍ਜੋ, ਪਹੂਤਮਲ੍ਯਾ ਬਹੁਪੁਣ੍ਡਰੀਕਾ.

੫੯. ‘‘ਤਂ ਆਪਗਾ ਅਨੁਪਰਿਯਨ੍ਤਿ ਸਬ੍ਬਦਾ, ਸੀਤੋਦਕਾ ਵਾਲੁਕਸਨ੍ਥਤਾ ਨਦੀ;

ਅਮ੍ਬਾ ਚ ਸਾਲਾ ਤਿਲਕਾ ਚ ਜਮ੍ਬੁਯੋ, ਉਦ੍ਦਾਲਕਾ ਪਾਟਲਿਯੋ ਚ ਫੁਲ੍ਲਾ.

੬੦. ‘‘ਤਂਭੂਮਿਭਾਗੇਹਿ ਉਪੇਤਰੂਪਂ, ਵਿਮਾਨਸੇਟ੍ਠਂ ਭੁਸ ਸੋਭਮਾਨਂ;

ਤਸ੍ਸੀਧ ਕਮ੍ਮਸ੍ਸ ਅਯਂ ਵਿਪਾਕੋ, ਏਤਾਦਿਸਂ ਪੁਞ੍ਞਕਤਾ ਲਭਨ੍ਤਿ.

੬੧. ‘‘ਤੇਨ ਮੇਤਾਦਿਸੋ ਵਣ੍ਣੋ, ਤੇਨ ਮੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਮੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

੬੨. ‘‘ਅਕ੍ਖਾਮਿ ਤੇ ਭਿਕ੍ਖੁ ਮਹਾਨੁਭਾਵ, ਮਨੁਸ੍ਸਭੂਤਾ ਯਮਕਾਸਿ ਪੁਞ੍ਞਂ;

ਤੇਨਮ੍ਹਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ.

ਅਤ੍ਥਵਣ੍ਣਨਾਸੁਪਿ ਇਧ ਏਕੋਵ ਥੇਰੋਤਿ ਅਪੁਬ੍ਬਂ ਨਤ੍ਥਿ.

ਦੁਤਿਯਨਾਵਾਵਿਮਾਨਵਣ੍ਣਨਾ ਨਿਟ੍ਠਿਤਾ.