੬. ਪਠਮਨਾਵਾਵਿਮਾਨਵਣ੍ਣਨਾ

ਸੁਵਣ੍ਣਚ੍ਛਦਨਂ ਨਾਵਨ੍ਤਿ ਨਾਵਾਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਤਿ ਸਾਵਤ੍ਥਿਯਂ ਵਿਹਰਨ੍ਤੇ ਸੋਲ਼ਸਮਤ੍ਤਾ ਭਿਕ੍ਖੂ ਅਞ੍ਞਤਰਸ੍ਮਿਂ ਗਾਮਕਾਵਾਸੇ ਵਸਿਤ੍ਵਾ ਵੁਤ੍ਥਵਸ੍ਸਾ ‘‘ਭਗਵਨ੍ਤਂ ਪਸ੍ਸਿਸ੍ਸਾਮ, ਧਮ੍ਮਞ੍ਚ ਸੁਣਿਸ੍ਸਾਮਾ’’ਤਿ ਸਾਵਤ੍ਥਿਂ ਉਦ੍ਦਿਸ੍ਸ ਗਿਮ੍ਹਸਮਯੇ ਅਦ੍ਧਾਨਮਗ੍ਗਂ ਪਟਿਪਨ੍ਨਾ, ਅਨ੍ਤਰਾਮਗ੍ਗੇ ਚ ਨਿਰੁਦਕੋ ਕਨ੍ਤਾਰੋ, ਤੇ ਚ ਤਤ੍ਥ ਘਮ੍ਮਾਭਿਤਤ੍ਤਾ ਕਿਲਨ੍ਤਾ ਤਸਿਤਾ ਪਾਨੀਯਂ ਅਲਭਮਾਨਾ ਅਞ੍ਞਤਰਸ੍ਸ ਗਾਮਸ੍ਸ ਅਵਿਦੂਰੇਨ ਗਚ੍ਛਨ੍ਤਿ. ਤਤ੍ਥ ਅਞ੍ਞਤਰਾ ਇਤ੍ਥੀ ਉਦਕਭਾਜਨਂ ਗਹੇਤ੍ਵਾ ਉਦਕਤ੍ਥਾਯ ਉਦਪਾਨਾਭਿਮੁਖੀ ਗਚ੍ਛਤਿ. ਅਥ ਤੇ ਭਿਕ੍ਖੂ ਤਂ ਦਿਸ੍ਵਾ ‘‘ਯਤ੍ਥਾਯਂ ਇਤ੍ਥੀ ਗਚ੍ਛਤਿ, ਤਤ੍ਥ ਗਤੇ ਪਾਨੀਯਂ ਲਦ੍ਧੁਂ ਸਕ੍ਕਾ’’ਤਿ ਪਿਪਾਸਾਪਰੇਤਾ ਤਂਦਿਸਾਭਿਮੁਖਾ ਗਨ੍ਤ੍ਵਾ ਉਦਪਾਨਂ ਦਿਸ੍ਵਾ ਤਸ੍ਸਾ ਅਵਿਦੂਰੇ ਅਟ੍ਠਂਸੁ. ਸਾ ਇਤ੍ਥੀ ਤਤੋ ਉਦਕਂ ਗਹੇਤ੍ਵਾ ਨਿਵਤ੍ਤਿਤੁਕਾਮਾ ਤੇ ਭਿਕ੍ਖੂ ਦਿਸ੍ਵਾ ‘‘ਇਮੇ ਅਯ੍ਯਾ ਉਦਕੇਨ ਅਤ੍ਥਿਕਾ ਪਿਪਾਸਿਤਾ’’ਤਿ ਞਤ੍ਵਾ ਗਰੁਚਿਤ੍ਤੀਕਾਰਂ ਉਪਟ੍ਠਪੇਤ੍ਵਾ ਉਦਕੇਨ ਨਿਮਨ੍ਤੇਸਿ. ਤੇ ਪਤ੍ਤਥਵਿਕਤੋ ਪਰਿਸ੍ਸਾਵਨਂ ਨੀਹਰਿਤ੍ਵਾ ਪਰਿਸ੍ਸਾਵੇਤ੍ਵਾ ਯਾਵਦਤ੍ਥਂ ਪਾਨੀਯਂ ਪਿਵਿਤ੍ਵਾ ਹਤ੍ਥਪਾਦੇ ਸੀਤਲੇ ਕਤ੍ਵਾ ਤਸ੍ਸਾ ਇਤ੍ਥਿਯਾ ਪਾਨੀਯਦਾਨੇ ਅਨੁਮੋਦਨਂ ਵਤ੍ਵਾ ਅਗਮਂਸੁ.

ਸਾ ਤਂ ਪੁਞ੍ਞਂ ਹਦਯੇ ਠਪੇਤ੍ਵਾ ਅਨ੍ਤਰਨ੍ਤਰਾ ਅਨੁਸ੍ਸਰਨ੍ਤੀ ਅਪਰਭਾਗੇ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਨਿਬ੍ਬਤ੍ਤਿ. ਤਸ੍ਸਾ ਪੁਞ੍ਞਾਨੁਭਾਵੇਨ ਕਪ੍ਪਰੁਕ੍ਖੋਪਸੋਭਿਤਂ ਮਹਨ੍ਤਂ ਵਿਮਾਨਂ ਉਪ੍ਪਜ੍ਜਿ. ਤਂ ਵਿਮਾਨਂ ਪਰਿਕ੍ਖਿਪਿਤ੍ਵਾ ਮੁਤ੍ਤਜਾਲਰਜਤਵਿਭੂਸਿਤਾ ਵਿਯ ਸਿਕਤਾਵਕਿਣ੍ਣਪਣ੍ਡਰਪੁਲਿਨਤਟਾ ਮਣਿਕ੍ਖਨ੍ਧਨਿਮ੍ਮਲਸਲਿਲਵਾਹਿਨੀ ਸਰਿਤਾ. ਤਸ੍ਸਾ ਉਭੋਸੁ ਤੀਰੇਸੁ ਉਯ੍ਯਾਨਵਿਮਾਨਦ੍ਵਾਰੇ ਚ ਮਹਤੀ ਪੋਕ੍ਖਰਣੀ ਪਞ੍ਚਵਣ੍ਣਪਦੁਮਸਣ੍ਡਮਣ੍ਡਿਤਾ ਸਹ ਸੁਵਣ੍ਣਨਾਵਾਯ ਨਿਬ੍ਬਤ੍ਤਿ. ਸਾ ਤਤ੍ਥ ਦਿਬ੍ਬਸਮ੍ਪਤ੍ਤਿਂ ਅਨੁਭਵਨ੍ਤੀ ਨਾਵਾਯ ਕੀਲ਼ਨ੍ਤੀ ਲਲ਼ਨ੍ਤੀ ਵਿਚਰਤਿ. ਅਥੇਕਦਿਵਸਂ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਦੇਵਚਾਰਿਕਂ ਚਰਨ੍ਤੋ ਤਂ ਦੇਵਧੀਤਰਂ ਨਾਵਾਯ ਕੀਲ਼ਨ੍ਤਿਂ ਦਿਸ੍ਵਾ ਤਾਯ ਕਤਪੁਞ੍ਞਕਮ੍ਮਂ ਪੁਚ੍ਛਨ੍ਤੋ –

੪੩. ‘‘ਸੁਵਣ੍ਣਚ੍ਛਦਨਂ ਨਾਵਂ, ਨਾਰਿ ਆਰੁਯ੍ਹ ਤਿਟ੍ਠਸਿ;

ਓਗਾਹਸਿ ਪੋਕ੍ਖਰਣਿਂ, ਪਦ੍ਮਂ ਛਿਨ੍ਦਸਿ ਪਾਣਿਨਾ.

੪੪. ‘‘ਕੇਨ ਤੇਤਾਦਿਸੋ ਵਣ੍ਣੋ, ਕੇਨ ਤੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਤੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

੪੫. ‘‘ਪੁਚ੍ਛਾਮਿ ਤਂ ਦੇਵਿ ਮਹਾਨੁਭਾਵੇ,

ਮਨੁਸ੍ਸਭੂਤਾ ਕਿਮਕਾਸਿ ਪੁਞ੍ਞਂ;

ਕੇਨਾਸਿ ਏਵਂ ਜਲਿਤਾਨੁਭਾਵਾ,

ਵਣ੍ਣੋ ਚ ਤੇ ਸਬ੍ਬਦਿਸਾ ਪਭਾਸਤੀ’’ਤਿ. – ਆਹ;

ਤਤੋ ਥੇਰੇਨ ਪੁਟ੍ਠਾਯ ਦੇਵਤਾਯ ਵਿਸ੍ਸਜ੍ਜਿਤਾਕਾਰਂ ਦਸ੍ਸੇਤੁਂ ਸਙ੍ਗੀਤਿਕਾਰੇਹਿ –

੪੬. ‘‘ਸਾ ਦੇਵਤਾ ਅਤ੍ਤਮਨਾ, ਮੋਗ੍ਗਲ੍ਲਾਨੇਨ ਪੁਚ੍ਛਿਤਾ;

ਪਞ੍ਹਂ ਪੁਟ੍ਠਾ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ. –

ਅਯਂ ਗਾਥਾ ਵੁਤ੍ਤਾ.

੪੭. ‘‘ਅਹਂ ਮਨੁਸ੍ਸੇਸੁ ਮਨੁਸ੍ਸਭੂਤਾ, ਪੁਰਿਮਾਯ ਜਾਤਿਯਾ ਮਨੁਸ੍ਸਲੋਕੇ;

ਦਿਸ੍ਵਾਨ ਭਿਕ੍ਖੂ ਤਸਿਤੇ ਕਿਲਨ੍ਤੇ, ਉਟ੍ਠਾਯ ਪਾਤੁਂ ਉਦਕਂ ਅਦਾਸਿਂ.

੪੮. ‘‘ਯੋ ਵੇ ਕਿਲਨ੍ਤਾਨ ਪਿਪਾਸਿਤਾਨਂ, ਉਟ੍ਠਾਯ ਪਾਤੁਂ ਉਦਕਂ ਦਦਾਤਿ;

ਸੀਤੋਦਕਾ ਤਸ੍ਸ ਭਵਨ੍ਤਿ ਨਜ੍ਜੋ, ਪਹੂਤਮਲ੍ਯਾ ਬਹੁਪੁਣ੍ਡਰੀਕਾ.

੪੯. ‘‘ਤਂ ਆਪਗਾ ਅਨੁਪਰਿਯਨ੍ਤਿ ਸਬ੍ਬਦਾ, ਸੀਤੋਦਕਾ ਵਾਲੁਕਸਨ੍ਥਤਾ ਨਦੀ;

ਅਮ੍ਬਾ ਚ ਸਾਲਾ ਤਿਲਕਾ ਚ ਜਮ੍ਬੁਯੋ, ਉਦ੍ਦਾਲਕਾ ਪਾਟਲਿਯੋ ਚ ਫੁਲ੍ਲਾ.

੫੦. ‘‘ਤਂਭੂਮਿਭਾਗੇਹਿ ਉਪੇਤਰੂਪਂ, ਵਿਮਾਨਸੇਟ੍ਠਂ ਭੁਸ ਸੋਭਮਾਨਂ;

ਤਸ੍ਸੀਧ ਕਮ੍ਮਸ੍ਸ ਅਯਂ ਵਿਪਾਕੋ, ਏਤਾਦਿਸਂ ਪੁਞ੍ਞਕਤਾ ਲਭਨ੍ਤਿ.

੫੧. ‘‘ਤੇਨ ਮੇਤਾਦਿਸੋ ਵਣ੍ਣੋ, ਤੇਨ ਮੇ ਇਧ ਮਿਜ੍ਝਤਿ;

ਉਪ੍ਪਜ੍ਜਨ੍ਤਿ ਚ ਮੇ ਭੋਗਾ, ਯੇ ਕੇਚਿ ਮਨਸੋ ਪਿਯਾ.

੫੨. ‘‘ਅਕ੍ਖਾਮਿ ਤੇ ਭਿਕ੍ਖੁ ਮਹਾਨੁਭਾਵ, ਮਨੁਸ੍ਸਭੂਤਾ ਯਮਕਾਸਿ ਪੁਞ੍ਞਂ;

ਤੇਨਮ੍ਹਿ ਏਵਂ ਜਲਿਤਾਨੁਭਾਵਾ, ਵਣ੍ਣੋ ਚ ਮੇ ਸਬ੍ਬਦਿਸਾ ਪਭਾਸਤੀ’’ਤਿ. –

ਅਯਂ ਦੇਵਤਾਯ ਵਿਸ੍ਸਜ੍ਜਿਤਾਕਾਰੋ.

੪੩. ਤਤ੍ਥ ਸੁਵਣ੍ਣਚ੍ਛਦਨਨ੍ਤਿ ਵਿਚਿਤ੍ਤਭਿਤ੍ਤਿਵਿਰਚਨੇਹਿ ਰਤ੍ਤਸੁਵਣ੍ਣਮਯੇਹਿ ਉਭੋਹਿ ਪਸ੍ਸੇਹਿ ਪਟਿਚ੍ਛਾਦਿਤਬ੍ਭਨ੍ਤਰਤਾਯ ਚੇਵ ਨਾਨਾਰਤਨਸਮੁਜ੍ਜਲਿਤੇਨ ਕਨਕਮਯਾਲਙ੍ਕਾਰੇਨ ਉਪਰਿ ਛਾਦਿਤਤਾਯ ਚ ਸੁਵਣ੍ਣਚ੍ਛਦਨਂ. ਨਾਵਨ੍ਤਿ ਪੋਤਂ. ਸੋ ਹਿ ਓਰਤੋ ਪਾਰਂ ਪਵਤਿ ਗਚ੍ਛਤੀਤਿ ਪੋਤੋ, ਸਤ੍ਤੇ ਨੇਤੀਤਿ ਨਾਵਾਤਿ ਚ ਵੁਚ੍ਚਤਿ. ਨਾਰੀਤਿ ਤਸ੍ਸਾ ਦੇਵਧੀਤਾਯ ਆਲਪਨਂ. ਨਰਤਿ ਨੇਤੀਤਿ ਨਰੋ, ਪੁਰਿਸੋ. ਯਥਾ ਹਿ ਪਠਮਪਕਤਿਭੂਤੋ ਸਤ੍ਤੋ ਇਤਰਾਯ ਪਕਤਿਯਾ ਸੇਟ੍ਠਤ੍ਥੇਨ ਪੁਰਿ ਸੇਤੀਤਿ ‘‘ਪੁਰਿਸੋ’’ਤਿ ਵੁਚ੍ਚਤਿ, ਏਵਂ ਨਯਨਟ੍ਠੇਨ ‘‘ਨਰੋ’’ਤਿ. ਪੁਤ੍ਤਭਾਤੁਭੂਤੋਪਿ ਹਿ ਪੁਗ੍ਗਲੋ ਮਾਤੁਜੇਟ੍ਠਭਗਿਨੀਨਂ ਪਿਤੁਟ੍ਠਾਨੇ ਤਿਟ੍ਠਤਿ, ਪਗੇਵ ਭਤ੍ਤੁਭੂਤੋ. ਨਰਸ੍ਸ ਏਸਾਤਿ ਨਾਰੀ, ਅਯਞ੍ਚ ਸਮਞ੍ਞਾ ਮਨੁਸ੍ਸਿਤ੍ਥੀਸੁ ਪਵਤ੍ਤਾ ਰੁਲ਼੍ਹਿਵਸੇਨ ਇਤਰਾਸੁਪਿ ਤਥਾ ਵੁਚ੍ਚਤਿ. ਓਗਾਹਸਿ ਪੋਕ੍ਖਰਣਿਨ੍ਤਿ ਸਤਿਪਿ ਰਤ੍ਤੁਪ੍ਪਲਨੀਲੁਪ੍ਪਲਾਦਿਕੇ ਬਹੁਵਿਧੇ ਰਤਨਮਯੇ ਜਲਜਕੁਸੁਮੇ ਪੋਕ੍ਖਰਸਙ੍ਖਾਤਾਨਂ ਦਿਬ੍ਬਪਦੁਮਾਨਂ ਤਤ੍ਥ ਯੇਭੁਯ੍ਯੇਨ ਅਤ੍ਥਿਤਾਯ ‘‘ਪੋਕ੍ਖਰਣੀ’’ਤਿ ਲਦ੍ਧਨਾਮਂ ਦਿਬ੍ਬਸਰਂ ਜਲਵਿਹਾਰਰਤਿਯਾ ਅਨੁਪਵਿਸਸਿ. ਪਦ੍ਮਂ ਛਿਨ੍ਦਸਿ ਪਾਣਿਨਾਤਿ ਰਜਤਮਯਨਾਲ਼ਂ ਪਦੁਮਰਾਗਰਤਨਮਯਪਤ੍ਤਸਙ੍ਘਾਤਂ ਕਨਕਮਯਕਣ੍ਣਿਕਾਕਿਞ੍ਜਕ੍ਖਕੇਸਰਂ ਦਿਬ੍ਬਕਮਲਂ ਲੀਲਾਰਵਿਨ੍ਦਂ ਕਤ੍ਤੁਕਾਮਤਾਯ ਤਵ ਹਤ੍ਥੇਨ ਭਞ੍ਜਸਿ.

੪੭. ਤਸਿਤੇਤਿ ਪਿਪਾਸਿਤੇ. ਕਿਲਨ੍ਤੇਤਿ ਤਾਯ ਪਿਪਾਸਾਯ ਅਦ੍ਧਾਨਪਰਿਸ੍ਸਮੇਨ ਚ ਕਿਲਨ੍ਤਕਾਯੇ. ਉਟ੍ਠਾਯਾਤਿ ਉਟ੍ਠਾਨਵੀਰਿਯਂ ਕਤ੍ਵਾ, ਆਲਸਿਯਂ ਅਨਾਪਜ੍ਜਿਤ੍ਵਾਤਿ ਅਤ੍ਥੋ.

੪੮. ਯੋ ਵੇਤਿਆਦਿਨਾ ਯਥਾ ਅਹਂ, ਏਵਂ ਅਞ੍ਞੇਪਿ ਆਯਤਨਗਤੇਨ ਉਦਕਦਾਨਪੁਞ੍ਞੇਨ ਏਤਾਦਿਸਂ ਫਲਂ ਪਟਿਲਭਨ੍ਤੀਤਿ ਦਿਟ੍ਠੇਨ ਅਦਿਟ੍ਠਸ੍ਸ ਅਨੁਮਾਨਵਿਧਿਂ ਦਸ੍ਸੇਨ੍ਤੀ ਥੇਰੇਨ ਪੁਟ੍ਠਮਤ੍ਥਂ ਸਾਧਾਰਣਤੋ ਵਿਸ੍ਸਜ੍ਜੇਤਿ. ਤਤ੍ਥ ਤਸ੍ਸਾਤਿ ਤਨ੍ਤਿ ਚ ਯਥਾਵੁਤ੍ਤਪੁਞ੍ਞਕਾਰਿਨਂ ਪਚ੍ਚਾਮਸਤਿ.

੪੯. ਅਨੁਪਰਿਯਨ੍ਤੀਤਿ ਅਨੁਰੂਪਵਸੇਨ ਪਰਿਕ੍ਖਿਪਨ੍ਤਿ. ਤਸ੍ਸ ਵਸਨਟ੍ਠਾਨਪਰਿਕ੍ਖਿਪਨੇਨ ਸੋਪਿ ਪਰਿਕ੍ਖਿਤ੍ਤੋ ਨਾਮ ਹੋਤਿ. ਤਿਲਕਾਤਿ ਬਨ੍ਧੁਜੀਵਕਪੁਪ੍ਫਸਦਿਸਪੁਪ੍ਫਾ ਏਕਾ ਰੁਕ੍ਖਜਾਤਿ. ਉਦ੍ਦਾਲਕਾਤਿ ਵਾਤਘਾਤਕਾ, ਯੇ ‘‘ਰਾਜਰੁਕ੍ਖਾ’’ਤਿਪਿ ਵੁਚ੍ਚਨ੍ਤਿ.

੫੦. ਤਂਭੂਮਿਭਾਗੇਹੀਤਿ ਤਾਦਿਸੇਹਿ ਭੂਮਿਭਾਗੇਹਿ, ਯਥਾਵੁਤ੍ਤਪੋਕ੍ਖਰਣੀਨਦੀਉਯ੍ਯਾਨਵਨ੍ਤੇਹਿ ਭੂਮਿਪਦੇਸੇਹੀਤਿ ਅਤ੍ਥੋ. ਉਪੇਤਰੂਪਨ੍ਤਿ ਪਾਸਂਸਿਯਭਾਵੇਨ ਉਪੇਤਂ, ਤੇਸਂ ਪੋਕ੍ਖਰਣੀਆਦੀਨਂ ਵਸੇਨ ਰਮਣੀਯਸਨ੍ਨਿਵੇਸਨ੍ਤਿ ਵੁਤ੍ਤਂ ਹੋਤਿ. ਭੁਸ ਸੋਭਮਾਨਨ੍ਤਿ ਭੁਸਂ ਅਤਿਵਿਯ ਵਿਰੋਚਮਾਨਂ ਵਿਮਾਨਸੇਟ੍ਠਂ ਲਭਨ੍ਤੀਤਿ ਯੋਜਨਾ. ਸੇਸਂ ਵੁਤ੍ਤਨਯਮੇਵਾਤਿ.

ਪਠਮਨਾਵਾਵਿਮਾਨਵਣ੍ਣਨਾ ਨਿਟ੍ਠਿਤਾ.