੫. ਕੁਞ੍ਜਰਵਿਮਾਨਵਣ੍ਣਨਾ

ਕੁਞ੍ਜਰੋ ਤੇ ਵਰਾਰੋਹੋਤਿ ਕੁਞ੍ਜਰਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ ਕਲਨ੍ਦਕਨਿਵਾਪੇ. ਅਥੇਕਦਿਵਸਂ ਰਾਜਗਹਨਗਰੇ ਨਕ੍ਖਤ੍ਤਂ ਘੋਸਿਤਂ. ਨਾਗਰਾ ਵੀਥਿਯੋ ਸੋਧੇਤ੍ਵਾ ਵਾਲੁਕਂ ਓਕਿਰਿਤ੍ਵਾ ਲਾਜਪਞ੍ਚਮਕਾਨਿ ਪੁਪ੍ਫਾਨਿ ਵਿਪ੍ਪਕਿਰਿਂਸੁ, ਗੇਹਦ੍ਵਾਰੇ ਗੇਹਦ੍ਵਾਰੇ ਕਦਲਿਯੋ ਚ ਪੁਣ੍ਣਘਟੇ ਚ ਠਪੇਸੁਂ, ਯਥਾਵਿਭਵਂ ਨਾਨਾਵਿਰਾਗਵਣ੍ਣਵਿਚਿਤ੍ਤਾ ਧਜਪਟਾਕਾਦਯੋ ਉਸ੍ਸਾਪੇਸੁਂ, ਸਬ੍ਬੋ ਜਨੋ ਅਤ੍ਤਨੋ ਅਤ੍ਤਨੋ ਵਿਭਵਾਨੁਰੂਪਂ ਸੁਮਣ੍ਡਿਤਪਸਾਧਿਤੋ ਨਕ੍ਖਤ੍ਤਕੀਲ਼ਂ ਕੀਲ਼ਿ, ਸਕਲਨਗਰਂ ਦੇਵਨਗਰਂ ਵਿਯ ਅਲਙ੍ਕਤਪਟਿਯਤ੍ਤਂ ਅਹੋਸਿ. ਅਥ ਬਿਮ੍ਬਿਸਾਰਮਹਾਰਾਜਾ ਪੁਬ੍ਬਚਾਰਿਤ੍ਤਵਸੇਨ ਮਹਾਜਨਸ੍ਸ ਚਿਤ੍ਤਾਨੁਰਕ੍ਖਣਤ੍ਥਞ੍ਚ ਅਤ੍ਤਨੋ ਰਾਜਭਵਨਤੋ ਨਿਕ੍ਖਮਿਤ੍ਵਾ ਮਹਨ੍ਤੇਨ ਪਰਿਵਾਰੇਨ ਮਹਤਾ ਰਾਜਾਨੁਭਾਵੇਨ ਉਲ਼ਾਰੇਨ ਸਿਰਿਸੋਭਗ੍ਗੇਨ ਨਗਰਂ ਪਦਕ੍ਖਿਣਂ ਕਰੋਤਿ.

ਤੇਨ ਚ ਸਮਯੇਨ ਰਾਜਗਹਵਾਸਿਨੀ ਏਕਾ ਕੁਲਧੀਤਾ ਰਞ੍ਞੋ ਤਂ ਵਿਭਵਸਮ੍ਪਤ੍ਤਿਂ ਸਿਰਿਸੋਭਗ੍ਗਂ ਰਾਜਾਨੁਭਾਵਞ੍ਚ ਪਸ੍ਸਿਤ੍ਵਾ ਅਚ੍ਛਰਿਯਬ੍ਭੁਤਚਿਤ੍ਤਜਾਤਾ ‘‘ਅਯਂ ਦੇਵਿਦ੍ਧਿਸਦਿਸਾ ਵਿਭਵਸਮ੍ਪਤ੍ਤਿ ਕੀਦਿਸੇਨ ਨੁ ਖੋ ਕਮ੍ਮੁਨਾ ਲਬ੍ਭਤੀ’’ਤਿ ਪਣ੍ਡਿਤਸਮ੍ਮਤੇ ਪੁਚ੍ਛਿ. ਤੇ ਤਸ੍ਸਾ ਕਥੇਸੁਂ ‘‘ਭਦ੍ਦੇ, ਪੁਞ੍ਞਕਮ੍ਮਂ ਨਾਮ ਚਿਨ੍ਤਾਮਣਿਸਦਿਸਂ ਕਪ੍ਪਰੁਕ੍ਖਸਦਿਸਂ, ਖੇਤ੍ਤਸਮ੍ਪਤ੍ਤਿਯਾ ਚਿਤ੍ਤਸਮ੍ਪਤ੍ਤਿਯਾ ਚ ਸਤਿ ਯਂ ਯਂ ਪਤ੍ਥੇਤ੍ਵਾ ਕਰੋਤਿ, ਤਂ ਤਂ ਨਿਪ੍ਫਾਦੇਤਿਯੇਵ. ਅਪਿਚ ਆਸਨਦਾਨੇਨ ਉਚ੍ਚਾਕੁਲੀਨਤਾ ਹੋਤਿ, ਅਨ੍ਨਦਾਨੇਨ ਬਲਸਮ੍ਪਤ੍ਤਿਪਟਿਲਾਭੋ, ਵਤ੍ਥਦਾਨੇਨ ਵਣ੍ਣਸਮ੍ਪਤ੍ਤਿਪਟਿਲਾਭੋ, ਯਾਨਦਾਨੇਨ ਸੁਖਵਿਸੇਸਪਟਿਲਾਭੋ, ਦੀਪਦਾਨੇਨ ਚਕ੍ਖੁਸਮ੍ਪਤ੍ਤਿਪਟਿਲਾਭੋ, ਆਵਾਸਦਾਨੇਨ ਸਬ੍ਬਸਮ੍ਪਤ੍ਤਿਪਟਿਲਾਭੋ ਹੋਤੀ’’ਤਿ. ਸਾ ਤਂ ਸੁਤ੍ਵਾ ‘‘ਦੇਵਸਮ੍ਪਤ੍ਤਿ ਇਤੋ ਉਲ਼ਾਰਾ ਹੋਤਿ ਮਞ੍ਞੇ’’ਤਿ ਤਤ੍ਥ ਚਿਤ੍ਤਂ ਠਪੇਤ੍ਵਾ ਪੁਞ੍ਞਕਿਰਿਯਾਯ ਅਤਿਵਿਯ ਉਸ੍ਸਾਹਜਾਤਾ ਅਹੋਸਿ.

ਮਾਤਾਪਿਤਰੋ ਚਸ੍ਸਾ ਅਹਤਂ ਵਤ੍ਥਯੁਗਂ ਨਵਪੀਠਂ ਏਕਂ ਪਦੁਮਕਲਾਪਂ ਸਪ੍ਪਿਮਧੁਸਕ੍ਖਰਾ ਤਣ੍ਡੁਲਖੀਰਾਨਿ ਚ ਪਰਿਭੋਗਤ੍ਥਾਯ ਪੇਸੇਸੁਂ. ਸਾ ਤਾਨਿ ਦਿਸ੍ਵਾ ‘‘ਅਹਞ੍ਚ ਦਾਨਂ ਦਾਤੁਕਾਮਾ, ਅਯਞ੍ਚ ਮੇ ਦੇਯ੍ਯਧਮ੍ਮੋ ਲਦ੍ਧੋ’’ਤਿ ਤੁਟ੍ਠਮਾਨਸਾ ਦੁਤਿਯਦਿਵਸੇ ਦਾਨਂ ਸਜ੍ਜੇਨ੍ਤੀ ਅਪ੍ਪੋਦਕਮਧੁਪਾਯਾਸਂ ਸਮ੍ਪਾਦੇਤ੍ਵਾ, ਤਸ੍ਸ ਪਰਿਵਾਰਭਾਵੇਨ ਅਞ੍ਞਮ੍ਪਿ ਬਹੁਂ ਖਾਦਨੀਯਭੋਜਨੀਯਂ ਪਟਿਯਾਦੇਤ੍ਵਾ ਦਾਨਗ੍ਗੇ ਗਨ੍ਧਪਰਿਭਣ੍ਡਂ ਕਤ੍ਵਾ ਵਿਕਸਿਤਪਦੁਮਪਤ੍ਤਕਿਞ੍ਜਕ੍ਖਕੇਸਰੋਪਸੋਭਿਤੇਸੁ ਪਦੁਮੇਸੁ ਆਸਨਂ ਪਞ੍ਞਾਪੇਤ੍ਵਾ, ਅਹਤੇਨ ਸੇਤਵਤ੍ਥੇਨ ਅਤ੍ਥਰਿਤ੍ਵਾ ਆਸਨਸ੍ਸ ਚਤੁਨ੍ਨਂ ਪਾਦਾਨਂ ਉਪਰਿ ਚਤ੍ਤਾਰਿ ਪਦੁਮਾਨਿ ਮਾਲਾਗੁਲ਼ਞ੍ਚ ਠਪੇਤ੍ਵਾ, ਆਸਨਸ੍ਸ ਉਪਰਿ ਵਿਤਾਨਂ ਬਨ੍ਧਿਤ੍ਵਾ ਮਾਲਾਦਾਮਓਲਮ੍ਬਕਦਾਮਾਨਿ ਓਲਮ੍ਬਿਤ੍ਵਾ, ਆਸਨਸ੍ਸ ਸਮਨ੍ਤਤੋ ਭੂਮਿਂ ਸਕੇਸਰੇਹਿ ਪਦੁਮਪਤ੍ਤੇਹਿ ਸਬ੍ਬਸਨ੍ਥਰਂ ਸਨ੍ਥਰਿਤ੍ਵਾ ‘‘ਦਕ੍ਖਿਣੇਯ੍ਯੇ ਆਗਤੇ ਪੂਜੇਸ੍ਸਾਮੀ’’ਤਿ ਪੁਪ੍ਫਪੂਰਿਤਂ ਚਙ੍ਕੋਟਕਂ ਏਕਮਨ੍ਤੇ ਠਪੇਸਿ.

ਅਥੇਵਂ ਕਤਦਾਨੂਪਕਰਣਸਂਵਿਧਾਨਾ ਸੀਸਂਨ੍ਹਾਤਾ ਸੁਦ੍ਧਵਤ੍ਥਨਿਵਤ੍ਥਾ ਸੁਦ੍ਧੁਤ੍ਤਰਾਸਙ੍ਗਾ ਵੇਲਂ ਸਲ੍ਲਕ੍ਖੇਤ੍ਵਾ ਏਕਂ ਦਾਸਿਂ ਆਣਾਪੇਸਿ ‘‘ਗਚ੍ਛ ਜੇ, ਅਮ੍ਹਾਕਂ ਤਾਦਿਸਂ ਦਕ੍ਖਿਣੇਯ੍ਯਂ ਪਰਿਯੇਸਾਹੀ’’ਤਿ. ਤੇਨ ਚ ਸਮਯੇਨ ਆਯਸ੍ਮਾ ਸਾਰਿਪੁਤ੍ਤੋ ਸਹਸ੍ਸਥਵਿਕਂ ਨਿਕ੍ਖਿਪਨ੍ਤੋ ਵਿਯ ਰਾਜਗਹੇ ਪਿਣ੍ਡਾਯ ਚਰਨ੍ਤੋ ਅਨ੍ਤਰਵੀਥਿਂ ਪਟਿਪਨ੍ਨੋ ਹੋਤਿ. ਅਥ ਸਾ ਦਾਸੀ ਥੇਰਂ ਵਨ੍ਦਿਤ੍ਵਾ ਆਹ ‘‘ਭਨ੍ਤੇ, ਤੁਮ੍ਹਾਕਂ ਪਤ੍ਤਂ ਮੇ ਦੇਥਾ’’ਤਿ. ‘‘ਏਕਿਸ੍ਸਾ ਉਪਾਸਿਕਾਯ ਅਨੁਗ੍ਗਹਤ੍ਥਂ ਇਤੋ ਏਥਾ’’ਤਿ ਚ ਆਹ. ਥੇਰੋ ਤਸ੍ਸਾ ਪਤ੍ਤਂ ਅਦਾਸਿ. ਸਾ ਥੇਰਂ ਗੇਹਂ ਪਵੇਸੇਸਿ. ਅਥ ਸਾ ਇਤ੍ਥੀ ਥੇਰਸ੍ਸ ਪਚ੍ਚੁਗ੍ਗਮਨਂ ਕਤ੍ਵਾ ਆਸਨਂ ਦਸ੍ਸੇਤ੍ਵਾ ‘‘ਨਿਸੀਦਥ, ਭਨ੍ਤੇ, ਇਦਮਾਸਨਂ ਪਞ੍ਞਤ੍ਤ’’ਨ੍ਤਿ ਵਤ੍ਵਾ ਥੇਰੇ ਤਤ੍ਥ ਨਿਸਿਨ੍ਨੇ ਸਕੇਸਰੇਹਿ ਪਦੁਮਪਤ੍ਤੇਹਿ ਥੇਰਂ ਪੂਜਯਮਾਨਾ ਆਸਨਸ੍ਸ ਸਮਨ੍ਤਤੋ ਓਕਿਰਿਤ੍ਵਾ ਪਞ੍ਚਪਤਿਟ੍ਠਿਤੇਨ ਵਨ੍ਦਿਤ੍ਵਾ ਸਪ੍ਪਿਮਧੁਸਕ੍ਖਰਾਸਮ੍ਮਿਸ੍ਸੇਨ ਅਪ੍ਪੋਦਕਮਧੁਪਾਯਾਸੇਨ ਪਰਿਵਿਸਿ. ਪਰਿਵਿਸਨ੍ਤੀ ਚ ‘‘ਇਮਸ੍ਸ ਮੇ ਪੁਞ੍ਞਸ੍ਸਾਨੁਭਾਵੇਨ ਦਿਬ੍ਬਗਜਕੂਟਾਗਾਰਪਲ੍ਲਙ੍ਕਸੋਭਿਤਾ ਦਿਬ੍ਬਸਮ੍ਪਤ੍ਤਿਯੋ ਹੋਨ੍ਤੁ, ਸਬ੍ਬਾਸੁ ਪਵਤ੍ਤੀਸੁ ਪਦੁਮਾ ਨਾਮ ਮਾ ਵਿਗਤਾ ਹੋਨ੍ਤੂ’’ਤਿ ਪਤ੍ਥਨਂ ਅਕਾਸਿ. ਪੁਨ ਥੇਰੇ ਕਤਭਤ੍ਤਕਿਚ੍ਚੇ ਪਤ੍ਤਂ ਧੋਵਿਤ੍ਵਾ ਸਪ੍ਪਿਮਧੁਸਕ੍ਖਰਾਹਿ ਪੂਰੇਤ੍ਵਾ ਪਲ੍ਲਙ੍ਕੇ ਅਤ੍ਥਤਂ ਸਾਟਕਂ ਚੁਮ੍ਬਟਕਂ ਕਤ੍ਵਾ ਥੇਰਸ੍ਸ ਹਤ੍ਥੇ ਠਪੇਤ੍ਵਾ ਥੇਰੇ ਚ ਅਨੁਮੋਦਨਂ ਕਤ੍ਵਾ ਪਕ੍ਕਮਨ੍ਤੇ ਦ੍ਵੇ ਪੁਰਿਸੇ ਆਣਾਪੇਸਿ ‘‘ਥੇਰਸ੍ਸ ਹਤ੍ਥੇ ਪਤ੍ਤਂ ਇਮਞ੍ਚ ਪਲ੍ਲਙ੍ਕਂ ਵਿਹਾਰਂ ਨੇਤ੍ਵਾ ਥੇਰਸ੍ਸ ਨਿਯ੍ਯਾਤੇਤ੍ਵਾ ਆਗਚ੍ਛਥਾ’’ਤਿ. ਤੇ ਤਥਾ ਅਕਂਸੁ.

ਸਾ ਅਪਰਭਾਗੇ ਕਾਲਂ ਕਤ੍ਵਾ ਤਾਵਤਿਂਸਭਵਨੇ ਯੋਜਨਸਤੁਬ੍ਬੇਧੇ ਕਨਕਵਿਮਾਨੇ ਨਿਬ੍ਬਤ੍ਤਿ ਅਚ੍ਛਰਾਸਹਸ੍ਸਪਰਿਵਾਰਾ. ਪਤ੍ਥਨਾਵਸੇਨ ਚਸ੍ਸਾ ਪਞ੍ਚਯੋਜਨੁਬ੍ਬੇਧੋ ਪਦੁਮਮਾਲਾਲਙ੍ਕਤੋ ਸਮਨ੍ਤਤੋ ਪਦੁਮਪਤ੍ਤਕਿਞ੍ਜਕ੍ਖਕੇਸਰੋਪਸੋਭਿਤੋ ਮਨੁਞ੍ਞਦਸ੍ਸਨੋ ਸੁਖਸਮ੍ਫਸ੍ਸੋ ਵਿਵਿਧਰਤਨਰਂਸਿਜਾਲਸਮੁਜ੍ਜਲਹੇਮਾਭਰਣਵਿਭੂਸਿਤੋ ਗਜਵਰੋ ਨਿਬ੍ਬਤ੍ਤਿ. ਤਸ੍ਸੂਪਰਿ ਯਥਾਵੁਤ੍ਤਸੋਭਾਤਿਸਯਯੁਤ੍ਤੋ ਯੋਜਨਿਕੋ ਕਨਕਪਲ੍ਲਙ੍ਕੋ ਨਿਬ੍ਬਤ੍ਤਿ. ਸਾ ਦਿਬ੍ਬਸਮ੍ਪਤ੍ਤਿਂ ਅਨੁਭਵਨ੍ਤੀ ਅਨ੍ਤਰਨ੍ਤਰਾ ਤਂ ਕੁਞ੍ਜਰਵਿਮਾਨਸ੍ਸ ਉਪਰਿ ਰਤਨਵਿਚਿਤ੍ਤਂ ਪਲ੍ਲਙ੍ਕਂ ਅਭਿਰੁਯ੍ਹ ਮਹਤਾ ਦੇਵਤਾਨੁਭਾਵੇਨ ਨਨ੍ਦਨਵਨਂ ਗਚ੍ਛਤਿ. ਅਥੇਕਸ੍ਮਿਂ ਉਸ੍ਸਵਦਿਵਸੇ ਦੇਵਤਾਸੁ ਯਥਾਸਕਂ ਦਿਬ੍ਬਾਨੁਭਾਵੇਨ ਉਯ੍ਯਾਨਕੀਲ਼ਨਤ੍ਥਂ ਨਨ੍ਦਨਵਨਂ ਗਚ੍ਛਨ੍ਤੀਸੂਤਿਆਦਿਨਾ ਸਬ੍ਬਂ ਪਠਮਪੀਠਵਿਮਾਨਵਣ੍ਣਨਾਯਂ ਆਗਤਸਦਿਸਂ, ਤਸ੍ਮਾ ਤਤ੍ਥ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਇਧ ਪਨ ਥੇਰੋ –

੩੧. ‘‘ਕੁਞ੍ਜਰੋ ਤੇ ਵਰਾਰੋਹੋ, ਨਾਨਾਰਤਨਕਪ੍ਪਨੋ;

ਰੁਚਿਰੋ ਥਾਮਵਾ ਜਵਸਮ੍ਪਨ੍ਨੋ, ਆਕਾਸਮ੍ਹਿ ਸਮੀਹਤਿ.

੩੨. ‘‘ਪਦੁਮਿ ਪਦ੍ਮਪਤ੍ਤਕ੍ਖਿ, ਪਦ੍ਮੁਪ੍ਪਲਜੁਤਿਨ੍ਧਰੋ;

ਪਦ੍ਮਚੁਣ੍ਣਾਭਿਕਿਣ੍ਣਙ੍ਗੋ, ਸੋਣ੍ਣਪੋਕ੍ਖਰਮਾਲਧਾ.

੩੩. ‘‘ਪਦੁਮਾਨੁਸਟਂ ਮਗ੍ਗਂ, ਪਦ੍ਮਪਤ੍ਤਵਿਭੂਸਿਤਂ;

ਠਿਤਂ ਵਗ੍ਗੁ ਮਨੁਗ੍ਘਾਤੀ, ਮਿਤਂ ਗਚ੍ਛਤਿ ਵਾਰਣੋ.

੩੪. ‘‘ਤਸ੍ਸ ਪਕ੍ਕਮਮਾਨਸ੍ਸ, ਸੋਣ੍ਣਕਂਸਾ ਰਤਿਸ੍ਸਰਾ;

ਤੇਸਂ ਸੁਯ੍ਯਤਿ ਨਿਗ੍ਘੋਸੋ, ਤੂਰਿਯੇ ਪਞ੍ਚਙ੍ਗਿਕੇ ਯਥਾ.

੩੫. ‘‘ਤਸ੍ਸ ਨਾਗਸ੍ਸ ਖਨ੍ਧਮ੍ਹਿ, ਸੁਚਿਵਤ੍ਥਾ ਅਲਙ੍ਕਤਾ;

ਮਹਨ੍ਤਂ ਅਚ੍ਛਰਾਸਙ੍ਘਂ, ਵਣ੍ਣੇਨ ਅਤਿਰੋਚਸਿ.

੩੬. ‘‘ਦਾਨਸ੍ਸ ਤੇ ਇਦਂ ਫਲਂ, ਅਥੋ ਸੀਲਸ੍ਸ ਵਾ ਪਨ;

ਅਥੋ ਅਞ੍ਜਲਿਕਮ੍ਮਸ੍ਸ, ਤਂ ਮੇ ਅਕ੍ਖਾਹਿ ਪੁਚ੍ਛਿਤਾ’’ਤਿ. – ਆਹ;

੩੧. ਤਤ੍ਥ ਕੁਞ੍ਜਰੋ ਤੇ ਵਰਾਰੋਹੋਤਿ ਕੁਞ੍ਜੇ ਗਿਰਿਤਟੇ ਰਮਤਿ ਅਭਿਰਮਤਿ, ਤਤ੍ਥ ਵਾ ਰਵਤਿ ਕੋਞ੍ਚਨਾਦਂ ਨਦਨ੍ਤੋ ਵਿਚਰਤਿ. ਕੁਂ ਵਾ ਪਥਵਿਂ ਤਦਭਿਘਾਤੇਨ ਜਰਯਤੀਤਿ ਕੁਞ੍ਜਰੋ, ਗਿਰਿਚਰਾਦਿਭੇਦੋ ਮਨੁਸ੍ਸਲੋਕੇ ਹਤ੍ਥੀ, ਅਯਂ ਪਨ ਕੀਲ਼ਨਕਾਲੇ ਕੁਞ੍ਜਰਸਦਿਸਤਾਯ ਏਵਂ ਵੁਤ੍ਤੋ. ਆਰੁਯ੍ਹਤੀਤਿ ਆਰੋਹੋ, ਆਰੋਹਨੀਯੋਤਿ ਅਤ੍ਥੋ. ਵਰੋ ਅਗ੍ਗੋ ਸੇਟ੍ਠੋ ਆਰੋਹੋਤਿ ਵਰਾਰੋਹੋ, ਉਤ੍ਤਮਯਾਨਨ੍ਤਿ ਵੁਤ੍ਤਂ ਹੋਤਿ. ਨਾਨਾਰਤਨਕਪ੍ਪਨੋਤਿ ਨਾਨਾਵਿਧਾਨਿ ਰਤਨਾਨਿ ਏਤੇਸਨ੍ਤਿ ਨਾਨਾਰਤਨਾ, ਕੁਮ੍ਭਾਲਙ੍ਕਾਰਾਦਿਹਤ੍ਥਾਲਙ੍ਕਾਰਾ. ਤੇਹਿ ਵਿਹਿਤੋ ਕਪ੍ਪਨ੍ਨੋ ਸਨ੍ਨਾਹੋ ਯਸ੍ਸ ਸੋ ਨਾਨਾਰਤਨਕਪ੍ਪਨੋ. ਰੁਚਿਂ ਅਭਿਰਤਿਂ ਦੇਤੀਤਿ ਰੁਚਿਰੋ, ਮਨੁਞ੍ਞੋਤਿ ਅਤ੍ਥੋ. ਥਾਮਵਾਤਿ ਥਿਰੋ, ਬਲਵਾਤਿ ਅਤ੍ਥੋ. ਜਵਸਮ੍ਪਨ੍ਨੋਤਿ ਸਮ੍ਪਨ੍ਨਜਵੋ, ਸੀਘਜਵੋਤਿ ਵੁਤ੍ਤਂ ਹੋਤਿ. ਆਕਾਸਮ੍ਹਿ ਸਮੀਹਤੀਤਿ ਆਕਾਸੇ ਅਨ੍ਤਲਿਕ੍ਖੇ ਸਮ੍ਮਾ ਈਹਤਿ, ਆਰੁਲ਼੍ਹਾਨਂ ਖੋਭਂ ਅਕਰੋਨ੍ਤੋ ਚਰਤਿ ਗਚ੍ਛਤੀਤਿ ਅਤ੍ਥੋ.

੩੨. ਪਦੁਮੀਤਿ ਪਦੁਮਸਮਾਨਵਣ੍ਣਤਾਯ ‘‘ਪਦੁਮ’’ਨ੍ਤਿ ਲਦ੍ਧਨਾਮੇਨ ਕੁਮ੍ਭਵਣ੍ਣੇਨ ਸਮਨ੍ਨਾਗਤਤ੍ਤਾ ਪਦੁਮੀ. ਪਦ੍ਮਪਤ੍ਤਕ੍ਖੀਤਿ ਕਮਲਦਲਸਦਿਸਨਯਨੇ, ਆਲਪਨਮੇਤਂ ਤਸ੍ਸਾ ਦੇਵਤਾਯ. ਪਦ੍ਮੁਪ੍ਪਲਜੁਤਿਨ੍ਧਰੋਤਿ ਦਿਬ੍ਬਪਦੁਮੁਪ੍ਪਲਮਾਲਾਲਙ੍ਕਤਸਰੀਰਤਾਯ ਤਹਂ ਤਹਂ ਵਿਪ੍ਫੁਰਨ੍ਤਂ ਵਿਜ੍ਜੋਤਮਾਨਂ ਪਦੁਮੁਪ੍ਪਲਜੁਤਿਂ ਧਾਰੇਤੀਤਿ ਪਦੁਮੁਪ੍ਪਲਜੁਤਿਨ੍ਧਰੋ. ਪਦ੍ਮਚੁਣ੍ਣਾਭਿਕਿਣ੍ਣਙ੍ਗੋਤਿ ਪਦੁਮਪਤ੍ਤਕਿਞ੍ਜਕ੍ਖਕੇਸਰੇਹਿ ਸਮਨ੍ਤਤੋ ਓਕਿਣ੍ਣਗਤ੍ਤੋ. ਸੋਣ੍ਣਪੋਕ੍ਖਰਮਾਲਧਾਤਿ ਹੇਮਮਯਕਮਲਮਾਲਾਭਾਰੀ.

੩੩. ਪਦੁਮਾਨੁਸਟਂ ਮਗ੍ਗਂ ਪਦ੍ਮਪਤ੍ਤਵਿਭੂਸਿਤਨ੍ਤਿ ਹਤ੍ਥਿਨੋ ਪਦਨਿਕ੍ਖੇਪੇ ਪਦਨਿਕ੍ਖੇਪੇ ਤਸ੍ਸ ਪਾਦਂ ਸਨ੍ਧਾਰੇਨ੍ਤੇਹਿ ਮਹਨ੍ਤੇਹਿ ਪਦੁਮੇਹਿ ਅਨੁਸਟਂ ਵਿਪ੍ਪਕਿਣ੍ਣਂ, ਨਾਨਾਵਿਰਾਗਵਣ੍ਣੇਹਿ ਤੇਸਂਯੇਵ ਚ ਪਤ੍ਤੇਹਿ ਇਤੋ ਚਿਤੋ ਚ ਪਰਿਬ੍ਭਮਨ੍ਤੇਹਿ ਵਿਸੇਸਤੋ ਮਣ੍ਡਿਤਤਾਯ ਵਿਭੂਸਿਤਂ ਮਗ੍ਗਂ ਗਚ੍ਛਤੀਤਿ ਯੋਜਨਾ. ਠਿਤਨ੍ਤਿ ਇਦਂ ਮਗ੍ਗਵਿਸੇਸਨਂ, ਪਦੁਮਪਤ੍ਤਵਿਭੂਸਿਤਂ ਹੁਤ੍ਵਾ ਠਿਤਂ ਮਗ੍ਗਨ੍ਤਿ ਅਤ੍ਥੋ. ਵਗ੍ਗੂਤਿ ਚਾਰੁ, ਕਿਰਿਯਾਵਿਸੇਸਨਞ੍ਚੇਤਂ, ਮ-ਕਾਰੋ ਪਦਸਨ੍ਧਿਕਰੋ. ਅਨੁਗ੍ਘਾਤੀਤਿ ਨ ਉਗ੍ਘਾਤਿ, ਅਤ੍ਤਨੋ ਉਪਰਿ ਨਿਸਿਨ੍ਨਾਨਂ ਈਸਕਮ੍ਪਿ ਖੋਭਂ ਅਕਰੋਨ੍ਤੋਤਿ ਅਤ੍ਥੋ. ਮਿਤਨ੍ਤਿ ਨਿਮ੍ਮਿਤਂ, ਨਿਕ੍ਖੇਪਪਦਂ ਵੀਤਿਕ੍ਕਮਨ੍ਤਿ ਅਤ੍ਥੋ. ਅਯਞ੍ਹੇਤ੍ਥ ਅਤ੍ਥੋ ‘‘ਵਗ੍ਗੁ ਚਾਰੁ ਪਦਨਿਕ੍ਖੇਪਂ ਕਤ੍ਵਾ ਗਚ੍ਛਤੀ’’ਤਿ. ਮਿਤਨ੍ਤਿ ਵਾ ਪਰਿਮਿਤਂ ਪਮਾਣਯੁਤ੍ਤਂ, ਨਾਤਿਸੀਘਂ, ਨਾਤਿਸਣਿਕਨ੍ਤਿ ਵੁਤ੍ਤਂ ਹੋਤਿ. ਵਾਰਣੋਤਿ ਹਤ੍ਥੀ. ਸੋ ਹਿ ਪਚ੍ਚਤ੍ਥਿਕਵਾਰਣਤੋ ਗਮਨਪਰਿਕ੍ਕਿਲੇਸਵਾਰਣਤੋ ਚ ‘‘ਵਾਰਣੋ’’ਤਿ ਵੁਚ੍ਚਤਿ.

੩੪. ਤਸ੍ਸ ਪਕ੍ਕਮਮਾਨਸ੍ਸ, ਸੋਣ੍ਣਸਂਕਾ ਰਤਿਸ੍ਸਰਾਤਿ ਤਸ੍ਸ ਯਥਾਵੁਤ੍ਤਸ੍ਸ ਕੁਞ੍ਜਰਸ੍ਸ ਗਚ੍ਛਨ੍ਤਸ੍ਸ ਸੋਣ੍ਣਕਂਸਾ ਸੁਵਣ੍ਣਮਯਾ ਘਣ੍ਟਾ ਰਤਿਸ੍ਸਰਾ ਰਮਣੀਯਸਦ੍ਦਾ ਮਨੁਞ੍ਞਨਿਗ੍ਘੋਸਾ ਓਲਮ੍ਬਨ੍ਤੀਤਿ ਅਧਿਪ੍ਪਾਯੋ. ਤਸ੍ਸ ਹਿ ਕੁਞ੍ਜਰਸ੍ਸ ਉਭੋਸੁ ਪਸ੍ਸੇਸੁ ਮਹਾਕੋਲਮ੍ਬਪ੍ਪਮਾਣਾ ਮਣਿਮੁਤ੍ਤਾਦਿਖਚਿਤਾ ਹੇਮਮਯਾ ਅਨੇਕਸਤਾ ਮਹਨ੍ਤਿਯੋ ਘਣ੍ਟਾ ਤਹਂ ਤਹਂ ਓਲਮ੍ਬਮਾਨਾ ਪਚਲਨ੍ਤਿ, ਯਤੋ ਛੇਕੇਨ ਗਨ੍ਧਬ੍ਬਕੇਨ ਪਯੁਤ੍ਤਵਾਦਿਤਤੋ ਅਤਿਵਿਯ ਮਨੋਹਰਸਦ੍ਦੋ ਨਿਚ੍ਛਰਤਿ. ਤੇਨਾਹ ‘‘ਤੇਸਂ ਸੁਯ੍ਯਤਿ ਨਿਗ੍ਘੋਸੋ, ਤੂਰਿਯੇ ਪਞ੍ਚਙ੍ਗਿਕੇ ਯਥਾ’’ਤਿ. ਤਸ੍ਸਤ੍ਥੋ – ਯਥਾ ਨਾਮ ਆਤਤਂ ਵਿਤਤਂ ਆਤਤਵਿਤਤਂ ਘਨਂ ਸੁਸਿਰਨ੍ਤਿ ਏਵਂ ਪਞ੍ਚਙ੍ਗਿਕੇ ਤੂਰਿਯੇ ਕੁਸਲੇਹਿ ਵਾਦਿਯਮਾਨੇ ਠਾਨੁਪ੍ਪਤ੍ਤਿਯਾ ਮਨ੍ਦਤਾਰਵਿਭਾਗਂ ਦਸ੍ਸੇਨ੍ਤੇਨ ਗਾਯਨ੍ਤੇਨ ਸਮੀਰਿਤੋ ਵਾਦਿਤਸਰੋ ਵਗ੍ਗੁ ਰਜਨੀਯੋ ਨਿਗ੍ਘੋਸੋ ਸੁਯ੍ਯਤਿ, ਏਵਂ ਤੇਸਂ ਸੋਵਣ੍ਣਕਂਸਾਨਂ ਤਪਨੀਯਘਣ੍ਟਾਨਂ ਨਿਗ੍ਘੋਸੋ ਸੁਯ੍ਯਤੀਤਿ.

੩੫. ਨਾਗਸ੍ਸਾਤਿ ਹਤ੍ਥਿਨਾਗਸ੍ਸ. ਮਹਨ੍ਤਨ੍ਤਿ ਸਮ੍ਪਤ੍ਤਿਮਹਤ੍ਤੇਨਾਪਿ ਸਙ੍ਖ੍ਯਾਮਹਤ੍ਤੇਨਾਪਿ ਮਹਨ੍ਤਂ. ਅਚ੍ਛਰਾਸਙ੍ਘਨ੍ਤਿ ਦੇਵਕਞ੍ਞਾਸਮੂਹਂ. ਵਣ੍ਣੇਨਾਤਿ ਰੂਪੇਨ.

੩੬. ਦਾਨਸ੍ਸਾਤਿ ਦਾਨਮਯਪੁਞ੍ਞਸ੍ਸ. ਸੀਲਸ੍ਸਾਤਿ ਕਾਯਿਕਸਂਵਰਾਦਿਸਂਵਰਸੀਲਸ੍ਸ. ਵਾ-ਸਦ੍ਦੋ ਅਵੁਤ੍ਤਵਿਕਪ੍ਪਨਤ੍ਥੋ. ਤੇਨ ਅਭਿਵਾਦਨਾਦਿਂ ਅਵੁਤ੍ਤਂ ਚਾਰਿਤ੍ਤਸੀਲਂ ਸਙ੍ਗਣ੍ਹਾਤਿ.

ਏਵਂ ਥੇਰੇਨ ਪੁਚ੍ਛਿਤਾ ਸਾ ਦੇਵਤਾ ਪਞ੍ਹਂ ਵਿਸ੍ਸਜ੍ਜੇਸਿ, ਤਮਤ੍ਥਂ ਦਸ੍ਸੇਤੁਂ –

੩੭. ‘‘ਸਾ ਦੇਵਤਾ ਅਤ੍ਤਮਨਾ, ਮੋਗ੍ਗਲ੍ਲਾਨੇਨ ਪੁਚ੍ਛਿਤਾ;

ਪਞ੍ਹਂ ਪੁਟ੍ਠਾ ਵਿਯਾਕਾਸਿ, ਯਸ੍ਸ ਕਮ੍ਮਸ੍ਸਿਦਂ ਫਲ’’ਨ੍ਤਿ. –

ਅਯਂ ਗਾਥਾ ਧਮ੍ਮਸਙ੍ਗਾਹਕੇਹਿ ਵੁਤ੍ਤਾ, ਤਸ੍ਸਾ ਅਤ੍ਥੋ ਹੇਟ੍ਠਾ ਵੁਤ੍ਤੋ ਏਵ.

੩੮. ‘‘ਦਿਸ੍ਵਾਨ ਗੁਣਸਮ੍ਪਨ੍ਨਂ, ਝਾਯਿਂ ਝਾਨਰਤਂ ਸਤਂ;

ਅਦਾਸਿਂ ਪੁਪ੍ਫਾਭਿਕਿਣ੍ਣਂ, ਆਸਨਂ ਦੁਸ੍ਸਸਨ੍ਥਤਂ.

੩੯. ‘‘ਉਪਡ੍ਢਂ ਪਦ੍ਮਮਾਲਾਹਂ, ਆਸਨਸ੍ਸ ਸਮਨ੍ਤਤੋ;

ਅਬ੍ਭੋਕਿਰਿਸ੍ਸਂ ਪਤ੍ਤੇਹਿ, ਪਸਨ੍ਨਾ ਸੇਹਿ ਪਾਣਿਭਿ.

੪੦. ‘‘ਤਸ੍ਸ ਕਮ੍ਮਕੁਸਲਸ੍ਸ, ਇਦਂ ਮੇ ਈਦਿਸਂ ਫਲਂ;

ਸਕ੍ਕਾਰੋ ਗਰੁਕਾਰੋ ਚ, ਦੇਵਾਨਂ ਅਪਚਿਤਾ ਅਹਂ.

੪੧. ‘‘ਯੋ ਵੇ ਸਮ੍ਮਾਵਿਮੁਤ੍ਤਾਨਂ, ਸਨ੍ਤਾਨਂ ਬ੍ਰਹ੍ਮਚਾਰਿਨਂ;

ਪਸਨ੍ਨੋ ਆਸਨਂ ਦਜ੍ਜਾ, ਏਵਂ ਨਨ੍ਦੇ ਯਥਾ ਅਹਂ.

੪੨. ‘‘ਤਸ੍ਮਾ ਹਿ ਅਤ੍ਤਕਾਮੇਨ, ਮਹਤ੍ਤਮਭਿਕਙ੍ਖਤਾ;

ਆਸਨਂ ਦਾਤਬ੍ਬਂ ਹੋਤਿ, ਸਰੀਰਨ੍ਤਿਮਧਾਰਿਨ’’ਨ੍ਤਿ. – ਦੇਵਤਾਯ ਵੁਤ੍ਤਗਾਥਾ;

੩੮. ਤਤ੍ਥ ਗੁਣਸਮ੍ਪਨ੍ਨਨ੍ਤਿ ਸਬ੍ਬੇਹਿ ਸਾਵਕਗੁਣੇਹਿ ਸਮਨ੍ਨਾਗਤਂ, ਤੇਹਿ ਵਾ ਪਰਿਪੁਣ੍ਣਂ. ਏਤੇਨ ਸਾਵਕਪਾਰਮਿਞਾਣਸ੍ਸ ਮਤ੍ਥਕਪ੍ਪਤ੍ਤਿਂ ਦਸ੍ਸੇਤਿ. ਝਾਯਿਨ੍ਤਿ ਆਰਮ੍ਮਣੂਪਨਿਜ੍ਝਾਨਂ ਲਕ੍ਖਣੂਪਨਿਜ੍ਝਾਨਨ੍ਤਿ ਦੁਵਿਧੇਨਾਪਿ ਝਾਨੇਨ ਝਾਯਨਸੀਲਂ, ਤੇਨ ਵਾ ਝਾਪੇਤਬ੍ਬਂ ਸਬ੍ਬਸਂਕਿਲੇਸਪਕ੍ਖਂ ਝਾਪੇਤ੍ਵਾ ਠਿਤਂ. ਤਤੋ ਏਵ ਝਾਨੇ ਰਤਨ੍ਤਿ ਝਾਨਰਤਂ. ਸਤਨ੍ਤਿ ਸਮਾਨਂ, ਸਨ੍ਤਂ ਵਾ, ਸਪ੍ਪੁਰਿਸਨ੍ਤਿ ਅਤ੍ਥੋ. ਪੁਪ੍ਫਾਭਿਕਿਣ੍ਣਨ੍ਤਿ ਪੁਪ੍ਫੇਹਿ ਅਭਿਕਿਣ੍ਣਂ, ਕਮਲਦਲੇਹਿ ਅਭਿਪ੍ਪਕਿਣ੍ਣਨ੍ਤਿ ਅਤ੍ਥੋ. ਦੁਸ੍ਸਸਨ੍ਥਤਨ੍ਤਿ ਵਤ੍ਥੇਨ ਉਪਰਿ ਅਤ੍ਥਤਂ.

੩੯. ਉਪਡ੍ਢਂ ਪਦ੍ਮਮਾਲਾਹਨ੍ਤਿ ਉਪਡ੍ਢਂ ਪਦੁਮਪੁਪ੍ਫਂ ਅਹਂ. ਆਸਨਸ੍ਸ ਸਮਨ੍ਤਤੋਤਿ ਥੇਰੇਨ ਨਿਸਿਨ੍ਨਸ੍ਸ ਆਸਨਸ੍ਸ ਸਮਨ੍ਤਾ ਭੂਮਿਯਂ. ਅਬ੍ਭੋਕਿਰਿਸ੍ਸਨ੍ਤਿ ਅਭਿਓਕਿਰਿਂ ਅਭਿਪ੍ਪਕਿਰਿਂ. ਕਥਂ? ਪਤ੍ਤੇਹੀਤਿ, ਤਸ੍ਸ ਉਪਡ੍ਢਪਦੁਮਸ੍ਸ ਵਿਸੁਂ ਵਿਸੁਂ ਕਤੇਹਿ ਪਤ੍ਤੇਹਿ ਪੁਪ੍ਫਵਸ੍ਸਾਭਿਵਸ੍ਸਨਕਨਿਯਾਮੇਨ ਓਕਿਰਿਨ੍ਤਿ ਅਤ੍ਥੋ.

੪੦. ਇਦਂ ਮੇ ਈਦਿਸਂ ਫਲਨ੍ਤਿ ਇਮਿਨਾ ‘‘ਕੁਞ੍ਜਰੋ ਤੇ ਵਰਾਰੋਹੋ’’ਤਿਆਦਿਨਾ ਥੇਰੇਨ ਗਹਿਤਂ ਅਗ੍ਗਹਿਤਞ੍ਚ ਆਯੁਯਸਸੁਖਰੂਪਾਦਿਭੇਦਂ ਅਤ੍ਤਨੋ ਦਿਬ੍ਬਸਮ੍ਪਤ੍ਤਿਂ ਏਕਤੋ ਦਸ੍ਸੇਤ੍ਵਾ ਪੁਨਪਿ ਥੇਰੇਨ ਅਗ੍ਗਹਿਤਮੇਵ ਅਤ੍ਤਨੋ ਆਨੁਭਾਵਸਮ੍ਪਤ੍ਤਿਂ ਦਸ੍ਸੇਤੁਂ ‘‘ਸਕ੍ਕਾਰੋ ਗਰੁਕਾਰੋ’’ਤਿਆਦਿਮਾਹ. ਤੇਨ ‘‘ਨ ਕੇਵਲਂ ਭਨ੍ਤੇ ਤੁਮ੍ਹੇਹਿ ਯਥਾਵੁਤ੍ਤਮੇਵ ਇਧ ਮਯ੍ਹਂ ਪੁਞ੍ਞਫਲਂ, ਅਪਿਚ ਖੋ ਇਦਂ ਦਿਬ੍ਬਂ ਆਧਿਪਤੇਯ੍ਯਮ੍ਪੀ’’ਤਿ ਦਸ੍ਸੇਤਿ. ਤਤ੍ਥ ਸਕ੍ਕਾਰੋਤਿ ਆਦਰਕਿਰਿਯਾ, ਦੇਵੇਹਿ ਅਤ੍ਤਨੋ ਸਕ੍ਕਾਤਬ੍ਬਤਾਤਿ ਅਤ੍ਥੋ. ਤਥਾ ਗਰੁਕਾਰੋਤਿ ਗਰੁਕਾਤਬ੍ਬਤਾ. ਦੇਵਾਨਨ੍ਤਿ ਦੇਵੇਹਿ. ਅਪਚਿਤਾਤਿ ਪੂਜਿਤਾ.

੪੧. ਸਮ੍ਮਾਵਿਮੁਤ੍ਤਾਨਨ੍ਤਿ ਸੁਟ੍ਠੁ ਵਿਮੁਤ੍ਤਾਨਂ ਸਬ੍ਬਸਂਕਿਲੇਸਪ੍ਪਹਾਯੀਨਂ. ਸਨ੍ਤਾਨਨ੍ਤਿ ਸਨ੍ਤਕਾਯਵਚੀਮਨੋਕਮ੍ਮਾਨਂ ਸਾਧੂਨਂ. ਮਗ੍ਗਬ੍ਰਹ੍ਮਚਰਿਯਸ੍ਸ ਚ ਸਾਸਨਬ੍ਰਹ੍ਮਚਰਿਯਸ੍ਸ ਚ ਚਿਣ੍ਣਤ੍ਤਾ ਬ੍ਰਹ੍ਮਚਾਰਿਨਂ. ਪਸਨ੍ਨੋ ਆਸਨਂ ਦਜ੍ਜਾਤਿ ਕਮ੍ਮਫਲਸਦ੍ਧਾਯ ਰਤਨਤ੍ਤਯਸਦ੍ਧਾਯ ਚ ਪਸਨ੍ਨਮਾਨਸੋ ਹੁਤ੍ਵਾ ਯਦਿ ਆਸਨਮਤ੍ਤਮ੍ਪਿ ਦਦੇਯ੍ਯ. ਏਵਂ ਨਨ੍ਦੇ ਯਥਾ ਅਹਨ੍ਤਿ ਯਥਾ ਅਹਂ ਤੇਨ ਆਸਨਦਾਨੇਨ ਏਤਰਹਿ ਨਨ੍ਦਾਮਿ ਮੋਦਾਮਿ, ਏਵਮੇਵ ਅਞ੍ਞੋਪਿ ਨਨ੍ਦੇਯ੍ਯ ਮੋਦੇਯ੍ਯ.

੪੨. ਤਸ੍ਮਾਤਿ ਤੇਨ ਕਾਰਣੇਨ. ਹਿ-ਸਦ੍ਦੋ ਨਿਪਾਤਮਤ੍ਤਂ. ਅਤ੍ਤਕਾਮੇਨਾਤਿ ਅਤ੍ਤਨੋ ਹਿਤਕਾਮੇਨ. ਯੋ ਹਿ ਅਤ੍ਤਨੋ ਹਿਤਾਵਹਂ ਕਮ੍ਮਂ ਕਰੋਤਿ, ਨ ਅਹਿਤਾਵਹਂ, ਸੋ ਅਤ੍ਤਕਾਮੋ. ਮਹਤ੍ਤਨ੍ਤਿ ਵਿਪਾਕਮਹਤ੍ਤਂ. ਸਰੀਰਨ੍ਤਿਮਧਾਰਿਨਨ੍ਤਿ ਅਨ੍ਤਿਮਂ ਦੇਹਂ ਧਾਰੇਨ੍ਤਾਨਂ, ਖੀਣਾਸਵਾਨਨ੍ਤਿ ਅਤ੍ਥੋ. ਅਯਞ੍ਹੇਤ੍ਥ ਅਤ੍ਥੋ – ਯਸ੍ਮਾ ਅਰਹਤਂ ਆਸਨਦਾਨੇਨ ਅਹਂ ਏਵਂ ਦਿਬ੍ਬਸਮ੍ਪਤ੍ਤਿਯਾ ਮੋਦਾਮਿ, ਤਸ੍ਮਾ ਅਞ੍ਞੇਨਾਪਿ ਅਤ੍ਤਨੋ ਅਭਿਵੁਦ੍ਧਿਂ ਪਤ੍ਥਯਮਾਨੇਨ ਅਨ੍ਤਿਮਸਮੁਸ੍ਸਯੇ ਠਿਤਾਨਂ ਆਸਨਂ ਦਾਤਬ੍ਬਂ, ਨਤ੍ਥਿ ਤਾਦਿਸਂ ਪੁਞ੍ਞਨ੍ਤਿ ਦਸ੍ਸੇਤਿ. ਤੇਸਂ ਵੁਤ੍ਤਸਦਿਸਮੇਵਾਤਿ.

ਕੁਞ੍ਜਰਵਿਮਾਨਵਣ੍ਣਨਾ ਨਿਟ੍ਠਿਤਾ.