੧੭. ਕੇਸਕਾਰੀਵਿਮਾਨਵਣ੍ਣਨਾ

ਇਦਂ ਵਿਮਾਨਂ ਰੁਚਿਰਂ ਪਭਸ੍ਸਰਨ੍ਤਿ ਕੇਸਕਾਰੀਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਬਾਰਾਣਸਿਯਂ ਵਿਹਰਤਿ ਇਸਿਪਤਨੇ ਮਿਗਦਾਯੇ. ਤੇਨ ਖੋ ਪਨ ਸਮਯੇਨ ਸਮ੍ਬਹੁਲਾ ਭਿਕ੍ਖੂ ਪੁਬ੍ਬਣ੍ਹਸਮਯਂ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਬਾਰਾਣਸਿਂ ਪਿਣ੍ਡਾਯ ਪਵਿਸਿਂਸੁ. ਤੇ ਅਞ੍ਞਤਰਸ੍ਸ ਬ੍ਰਾਹ੍ਮਣਸ੍ਸ ਗੇਹਦ੍ਵਾਰਸਮੀਪੇਨ ਗਚ੍ਛਨ੍ਤਿ. ਤਸ੍ਮਿਞ੍ਚ ਗੇਹੇ ਬ੍ਰਾਹ੍ਮਣਸ੍ਸ ਧੀਤਾ ਕੇਸਕਾਰੀ ਨਾਮ ਗੇਹਦ੍ਵਾਰਸਮੀਪੇ ਮਾਤੁ ਸੀਸਤੋ ਊਕਾ ਗਣ੍ਹਨ੍ਤੀ ਤੇ ਭਿਕ੍ਖੂ ਗਚ੍ਛਨ੍ਤੇ ਦਿਸ੍ਵਾ ਮਾਤਰਂ ਆਹ ‘‘ਅਮ੍ਮ, ਇਮੇ ਪਬ੍ਬਜਿਤਾ ਪਠਮੇਨ ਯੋਬ੍ਬਨੇਨ ਸਮਨ੍ਨਾਗਤਾ ਅਭਿਰੂਪਾ ਦਸ੍ਸਨੀਯਾ ਪਾਸਾਦਿਕਾ ਸੁਖੁਮਾਲਾ ਕੇਨਚਿ ਪਾਰਿਜੁਞ੍ਞੇਨ ਅਨਭਿਭੂਤਾ ਮਞ੍ਞੇ, ਕਸ੍ਮਾ ਨੁ ਖੋ ਇਮੇ ਇਮਸ੍ਮਿਂਯੇਵ ਵਯੇ ਪਬ੍ਬਜਨ੍ਤੀ’’ਤਿ? ਤਂ ਮਾਤਾ ਆਹ ‘‘ਅਤ੍ਥਿ, ਅਮ੍ਮ, ਸਕ੍ਯਪੁਤ੍ਤੋ ਸਕ੍ਯਕੁਲਾ ਪਬ੍ਬਜਿਤੋ ਬੁਦ੍ਧੋ ਲੋਕੇ ਉਪ੍ਪਨ੍ਨੋ, ਸੋ ਧਮ੍ਮਂ ਦੇਸੇਤਿ ਆਦਿਕਲ੍ਯਾਣਂ ਮਜ੍ਝੇਕਲ੍ਯਾਣਂ ਪਰਿਯੋਸਾਨਕਲ੍ਯਾਣਂ ਸਾਤ੍ਥਂ ਸਬ੍ਯਞ੍ਜਨਂ ਕੇਵਲਪਰਿਪੁਣ੍ਣਂ, ਪਰਿਸੁਦ੍ਧਂ ਬ੍ਰਹ੍ਮਚਰਿਯਂ ਪਕਾਸੇਤਿ, ਤਸ੍ਸ ਇਮੇ ਧਮ੍ਮਂ ਸੁਤ੍ਵਾ ਪਬ੍ਬਜਨ੍ਤੀ’’ਤਿ.

ਤੇਨ ਚ ਸਮਯੇਨ ਆਗਤਫਲੋ ਵਿਞ੍ਞਾਤਸਾਸਨੋ ਅਞ੍ਞਤਰੋ ਉਪਾਸਕੋ ਤਾਯ ਵੀਥਿਯਾ ਗਚ੍ਛਨ੍ਤੋ ਤਂ ਕਥਂ ਸੁਤ੍ਵਾ ਤਾਸਂ ਸਨ੍ਤਿਕਂ ਉਪਸਙ੍ਕਮਿ. ਅਥ ਨਂ ਬ੍ਰਾਹ੍ਮਣੀ ਆਹ ‘‘ਏਤਰਹਿ ਖੋ ਉਪਾਸਕ ਬਹੂ ਕੁਲਪੁਤ੍ਤਾ ਮਹਨ੍ਤਂ ਭੋਗਕ੍ਖਨ੍ਧਂ ਮਹਨ੍ਤਂ ਞਾਤਿਪਰਿਵਟ੍ਟਂ ਪਹਾਯ ਸਕ੍ਯਸਮਯੇ ਪਬ੍ਬਜਨ੍ਤਿ, ਤੇ ਕਿਂ ਨੁ ਖੋ ਅਤ੍ਥਵਸਂ ਸਮ੍ਪਸ੍ਸਨ੍ਤਾ ਪਬ੍ਬਜਨ੍ਤੀ’’ਤਿ? ਤਂ ਸੁਤ੍ਵਾ ਉਪਾਸਕੋ ‘‘ਕਾਮੇਸੁ ਆਦੀਨਵਂ, ਨੇਕ੍ਖਮ੍ਮੇ ਚ ਆਨਿਸਂਸਂ ਸਮ੍ਪਸ੍ਸਨ੍ਤਾ’’ਤਿ ਵਤ੍ਵਾ ਅਤ੍ਤਨੋ ਞਾਣਬਲਾਨੁਰੂਪਂ ਤਮਤ੍ਥਂ ਵਿਤ੍ਥਾਰਤੋ ਕਥੇਸਿ, ਤਿਣ੍ਣਞ੍ਚ ਰਤਨਾਨਂ ਗੁਣੇ ਪਕਾਸੇਸਿ, ਪਞ੍ਚਨ੍ਨਂ ਸੀਲਾਨਂ ਦਿਟ੍ਠਧਮ੍ਮਿਕਂ ਸਮ੍ਪਰਾਯਿਕਞ੍ਚ ਗੁਣਾਨਿਸਂਸਂ ਪਵੇਦੇਸਿ. ਅਥ ਬ੍ਰਾਹ੍ਮਣਧੀਤਾ ਤਂ ‘‘ਕਿਂ ਅਮ੍ਹੇਹਿਪਿ ਸਰਣੇਸੁ ਚ ਸੀਲੇਸੁ ਚ ਪਤਿਟ੍ਠਾਯ ਤਯਾ ਵੁਤ੍ਤੇ ਗੁਣਾਨਿਸਂਸੇ ਅਧਿਗਨ੍ਤੁਂ ਸਕ੍ਕਾ’’ਤਿ ਪੁਚ੍ਛਿ. ਸੋ ‘‘ਸਬ੍ਬਸਾਧਾਰਣਾ ਇਮੇ ਧਮ੍ਮਾ ਭਗਵਤਾ ਭਾਸਿਤਾ, ਕਸ੍ਮਾ ਨ ਸਕ੍ਕਾ’’ਤਿ ਵਤ੍ਵਾ ਤਸ੍ਸਾ ਸਰਣਾਨਿ ਚ ਸੀਲਾਨਿ ਚ ਅਦਾਸਿ. ਸਾ ਗਹਿਤਸਰਣਾ ਸਮਾਦਿਨ੍ਨਸੀਲਾ ਚ ਹੁਤ੍ਵਾ ਪੁਨ ਆਹ ‘‘ਕਿਂ ਇਤੋ ਉਤ੍ਤਰਿ ਅਞ੍ਞਮ੍ਪਿ ਕਰਣੀਯਂ ਅਤ੍ਥੀ’’ਤਿ. ਸੋ ਤਸ੍ਸਾ ਵਿਞ੍ਞੁਭਾਵਂ ਸਲ੍ਲਕ੍ਖੇਨ੍ਤੋ ‘‘ਉਪਨਿਸ੍ਸਯਸਮ੍ਪਨ੍ਨਾ ਭਵਿਸ੍ਸਤੀ’’ਤਿ ਞਤ੍ਵਾ ਸਰੀਰਸਭਾਵਂ ਵਿਭਾਵੇਨ੍ਤੋ ਦ੍ਵਤ੍ਤਿਂਸਾਕਾਰਕਮ੍ਮਟ੍ਠਾਨਂ ਕਥੇਤ੍ਵਾ ਕਾਯੇ ਵਿਰਾਗਂ ਉਪ੍ਪਾਦੇਤ੍ਵਾ ਉਪਰਿ ਅਨਿਚ੍ਚਤਾਦਿਪਟਿਸਂਯੁਤ੍ਤਾਯ ਧਮ੍ਮਿਯਾ ਕਥਾਯ ਸਂਵੇਜੇਤ੍ਵਾ ਵਿਪਸ੍ਸਨਾਮਗ੍ਗਂ ਆਚਿਕ੍ਖਿਤ੍ਵਾ ਗਤੋ. ਸਾ ਤੇਨ ਵੁਤ੍ਤਨਯਂ ਸਬ੍ਬਂ ਮਨਸਿ ਕਤ੍ਵਾ ਪਟਿਕੂਲਮਨਸਿਕਾਰੇ ਸਮਾਹਿਤਚਿਤ੍ਤਾ ਵਿਪਸ੍ਸਨਂ ਪਟ੍ਠਪੇਤ੍ਵਾ ਉਪਨਿਸ੍ਸਯਸਮ੍ਪਤ੍ਤਿਯਾ ਨ ਚਿਰਸ੍ਸੇਵ ਸੋਤਾਪਤ੍ਤਿਫਲੇ ਪਤਿਟ੍ਠਹਿ. ਅਥਾਪਰੇਨ ਸਮਯੇਨ ਕਾਲਂ ਕਤ੍ਵਾ ਸਕ੍ਕਸ੍ਸ ਦੇਵਰਞ੍ਞੋ ਪਰਿਚਾਰਿਕਾ ਹੁਤ੍ਵਾ ਨਿਬ੍ਬਤ੍ਤਿ, ਸਤਸਹਸ੍ਸਞ੍ਚਸ੍ਸਾ ਅਚ੍ਛਰਾਪਰਿਵਾਰੋ ਅਹੋਸਿ. ਤਂ ਸਕ੍ਕੋ ਦੇਵਰਾਜਾ ਦਿਸ੍ਵਾ ਅਚ੍ਛਰਿਯਬ੍ਭੁਤਚਿਤ੍ਤਜਾਤੋ ਪਮੁਦਿਤਹਦਯੋ –

੧੫੦. ‘‘ਇਦਂ ਵਿਮਾਨਂ ਰੁਚਿਰਂ ਪਭਸ੍ਸਰਂ, ਵੇਲ਼ੁਰਿਯਥਮ੍ਭਂ ਸਤਤਂ ਸੁਨਿਮ੍ਮਿਤਂ;

ਸੁਵਣ੍ਣਰੁਕ੍ਖੇਹਿ ਸਮਨ੍ਤਮੋਤ੍ਥਤਂ, ਠਾਨਂ ਮਮਂ ਕਮ੍ਮਵਿਪਾਕਸਮ੍ਭਵਂ.

੧੫੧. ‘‘ਤਤ੍ਰੂਪਪਨ੍ਨਾ ਪੁਰਿਮਚ੍ਛਰਾ ਇਮਾ, ਸਤਂ ਸਹਸ੍ਸਾਨਿ ਸਕੇਨ ਕਮ੍ਮੁਨਾ;

ਤੁਵਂਸਿ ਅਜ੍ਝੁਪਗਤਾ ਯਸਸ੍ਸਿਨੀ, ਓਭਾਸਯਂ ਤਿਟ੍ਠਸਿ ਪੁਬ੍ਬਦੇਵਤਾ.

੧੫੨. ‘‘ਸਸੀ ਅਧਿਗ੍ਗਯ੍ਹ ਯਥਾ ਵਿਰੋਚਤਿ, ਨਕ੍ਖਤ੍ਤਰਾਜਾਰਿਵ ਤਾਰਕਾਗਣਂ;

ਤਥੇਵ ਤ੍ਵਂ ਅਚ੍ਛਰਾਸਙ੍ਗਣਂ ਇਮਂ, ਦਦ੍ਦਲ੍ਲਮਾਨਾ ਯਸਸਾ ਵਿਰੋਚਸਿ.

੧੫੩. ‘‘ਕੁਤੋ ਨੁ ਆਗਮ੍ਮ ਅਨੋਮਦਸ੍ਸਨੇ, ਉਪਪਨ੍ਨਾ ਤ੍ਵਂ ਭਵਨਂ ਮਮਂ ਇਦਂ;

ਬ੍ਰਹ੍ਮਂਵ ਦੇਵਾ ਤਿਦਸਾ ਸਹਿਨ੍ਦਕਾ, ਸਬ੍ਬੇ ਨ ਤਪ੍ਪਾਮਸੇ ਦਸ੍ਸਨੇਨ ਤ’’ਨ੍ਤਿ. –

ਚਤੂਹਿ ਗਾਥਾਹਿ ਤਾਯ ਕਤਕਮ੍ਮਂ ਪੁਚ੍ਛਿ.

੧੫੦. ਤਤ੍ਥ ਇਦਂ ਵਿਮਾਨਨ੍ਤਿ ਯਸ੍ਮਿਂ ਵਿਮਾਨੇ ਸਾ ਦੇਵਤਾ ਉਪ੍ਪਨ੍ਨਾ, ਤਂ ਅਤ੍ਤਨੋ ਵਿਮਾਨਂ ਸਨ੍ਧਾਯਾਹ. ਸਤਤਨ੍ਤਿ ਸਬ੍ਬਕਾਲਂ ਰੁਚਿਰਂ ਪਭਸ੍ਸਰਨ੍ਤਿ ਯੋਜਨਾ. ਸਤਤਨ੍ਤਿ ਵਾ ਸਮ੍ਮਾਤਤਂ, ਅਤਿਵਿਯ ਵਿਤ੍ਥਿਣ੍ਣਨ੍ਤਿ ਅਤ੍ਥੋ. ਸਮਨ੍ਤਮੋਤ੍ਥਤਨ੍ਤਿ ਸਮਨ੍ਤਤੋ ਅਵਤ੍ਥਤਂ ਛਾਦਿਤਂ. ਠਾਨਨ੍ਤਿ ਵਿਮਾਨਮੇਵ ਸਨ੍ਧਾਯ ਵਦਤਿ. ਤਞ੍ਹਿ ਤਿਟ੍ਠਨ੍ਤਿ ਏਤ੍ਥ ਕਤਪੁਞ੍ਞਾਤਿ ਠਾਨਨ੍ਤਿ ਵੁਚ੍ਚਤਿ. ਕਮ੍ਮਵਿਪਾਕਸਮ੍ਭਵਨ੍ਤਿ ਕਮ੍ਮਵਿਪਾਕਭਾਵੇਨ ਸਮ੍ਭੂਤਂ, ਕਮ੍ਮਵਿਪਾਕੇਨ ਵਾ ਸਹ ਸਮ੍ਭੂਤਂ. ਮਮਨ੍ਤਿ ਇਦਂ ਮਮ ਠਾਨਂ ਮਮ ਕਮ੍ਮਵਿਪਾਕਸਮ੍ਭਵਨ੍ਤਿ ਦ੍ਵੀਹਿਪਿ ਪਦੇਹਿ ਯੋਜੇਤਬ੍ਬਂ.

੧੫੧. ਤਤ੍ਰੂਪਪਨ੍ਨਾਤਿ ਗਾਥਾਯ ਅਯਂ ਸਙ੍ਖੇਪਤ੍ਥੋ – ਤਤ੍ਰ ਤਸ੍ਮਿਂ ਯਥਾਵੁਤ੍ਤੇ ਵਿਮਾਨੇ ਉਪਪਨ੍ਨਾਤਿ ਨਿਬ੍ਬਤ੍ਤਾ ਪਗੇਵ ਉਪ੍ਪਨ੍ਨਤ੍ਤਾ ਪੁਬ੍ਬਦੇਵਤਾ ਇਮਾ ਪੁਰਿਮਾ ਅਚ੍ਛਰਾਯੋ ਪਰਿਮਾਣਤੋ ਸਤਂ ਸਹਸ੍ਸਾਨਿ. ਤੁਵਂਸੀਤਿ ਤ੍ਵਂ ਅਸਿ ਸਕੇਨ ਕਮ੍ਮੁਨਾ ਅਜ੍ਝੁਪਗਤਾ ਉਪਪਨ੍ਨਾ. ਯਸਸ੍ਸਿਨੀਤਿ ਪਰਿਵਾਰਸਮ੍ਪਨ੍ਨਾ, ਤੇਨੇਵ ਸਕੇਨ ਕਮ੍ਮੁਨਾ ਕਮ੍ਮਾਨੁਭਾਵੇਨ ਓਭਾਸਯਨ੍ਤੀ ਵਿਰੋਚਮਾਨਾ ਤਿਟ੍ਠਸੀਤਿ.

੧੫੨. ਇਦਾਨਿ ਤਮੇਵ ਓਭਾਸਨਂ ਉਪਮਾਯ ਵਿਭਾਵੇਨ੍ਤੋ ‘‘ਸਸੀ’’ਤਿ ਗਾਥਮਾਹ. ਤਸ੍ਸਤ੍ਥੋ – ਯਥਾ ਸਸਲਞ੍ਛਨਯੋਗੇਨ ‘‘ਸਸੀ’’ਤਿ, ਨਕ੍ਖਤ੍ਤੇਹਿ ਅਧਿਕਗੁਣਤਾਯ ‘‘ਨਕ੍ਖਤ੍ਤਰਾਜਾ’’ਤਿ ਚ ਲਦ੍ਧਨਾਮੋ ਚਨ੍ਦੋ ਸਬ੍ਬਂ ਤਾਰਕਾਗਣਂ ਅਧਿਗ੍ਗਯ੍ਹ ਅਭਿਭਵਿਤ੍ਵਾ ਵਿਰੋਚਤਿ ਵਿਰਾਜਤਿ, ਤਥੇਵ ਤ੍ਵਂ ਇਮਂ ਅਚ੍ਛਰਾਨਂ ਦੇਵਕਞ੍ਞਾਨਂ ਗਣਂ ਸਮੂਹਂ ਅਤ੍ਤਨੋ ਯਸਸਾ ਦਦ੍ਦਲ੍ਲਮਾਨਾ ਅਤਿਵਿਯ ਵਿਜ੍ਜੋਤਮਾਨਾ ਵਿਰੋਚਸੀਤਿ. ਏਤ੍ਥ ਚ ‘‘ਇਮਾ’’ਤਿ ‘‘ਇਮ’’ਨ੍ਤਿ ਚ ਨਿਪਾਤਮਤ੍ਤਂ. ਕੇਚਿ ਪਨ ‘‘ਨਕ੍ਖਤ੍ਤਰਾਜਾਰਿਵ ਤਾਰਾਗਣਂ ਤਥੇਵ ਤ੍ਵ’’ਨ੍ਤਿ ਪਠਨ੍ਤਿ.

੧੫੩. ਇਦਾਨਿ ਤਸ੍ਸਾ ਦੇਵਤਾਯ ਪੁਰਿਮਭਵਂ ਤਤ੍ਥ ਕਤਪੁਞ੍ਞਞ੍ਚ ਪੁਚ੍ਛਨ੍ਤੋ ‘‘ਕੁਤੋ ਨੁ ਆਗਮ੍ਮਾ’’ਤਿ ਗਾਥਮਾਹ. ਤਤ੍ਥ ਕੁਤੋ ਨੁ ਆਗਮ੍ਮਾਤਿ ਕੁਤੋ ਨੁ ਭਵਤੋ ਕੁਤੋ ਨੁ ਪੁਞ੍ਞਕਮ੍ਮਤੋ ਕਾਰਣਭੂਤਤੋ ਇਦਂ ਮਮ ਭਵਨਂ ਆਗਮ੍ਮ ਭਦ੍ਦੇ ਅਨੋਮਦਸ੍ਸਨੇ ਸਬ੍ਬਙ੍ਗਸੋਭਨੇ ਤ੍ਵਂ ਉਪਪਨ੍ਨਾ ਉਪ੍ਪਤ੍ਤਿਗਹਣਵਸੇਨ ਉਪਗਤਾ. ‘‘ਅਨੋਮਦਸ੍ਸਨੇ’’ਤਿ ਵੁਤ੍ਤਮੇਵਤ੍ਥਂ ਉਪਮਾਯ ਪਕਾਸੇਨ੍ਤੋ ‘‘ਬ੍ਰਹ੍ਮਂਵ ਦੇਵਾ ਤਿਦਸਾ ਸਹਿਨ੍ਦਕਾ, ਸਬ੍ਬੇ ਨ ਤਪ੍ਪਾਮਸੇ ਦਸ੍ਸਨੇਨ ਤ’’ਨ੍ਤਿ ਆਹ. ਤਤ੍ਥ ਯਥਾ ਬ੍ਰਹ੍ਮਾਨਂ ਸਹਮ੍ਪਤਿਂ ਸਨਙ੍ਕੁਮਾਰਂ ਵਾ ਉਪਗਤਂ ਸਹ ਇਨ੍ਦੇਨਾਤਿ ਸਹਿਨ੍ਦਕਾ ਤਾਵਤਿਂਸਾ ਦੇਵਾ ਪਸ੍ਸਨ੍ਤਾ ਦਸ੍ਸਨੇਨ ਨ ਤਪ੍ਪਨ੍ਤਿ, ਏਵਂ ਤਵ ਦਸ੍ਸਨੇਨ ਮਯਂ ਸਬ੍ਬੇ ਦੇਵਾ ਨ ਤਪ੍ਪਾਮਸੇਤਿ ਅਤ੍ਥੋ.

ਏਵਂ ਪਨ ਸਕ੍ਕੇਨ ਦੇਵਾਨਮਿਨ੍ਦੇਨ ਪੁਚ੍ਛਿਤਾ ਸਾ ਦੇਵਤਾ ਤਮਤ੍ਥਂ ਪਕਾਸੇਨ੍ਤੀ –

੧੫੪. ‘‘ਯਮੇਤਂ ਸਕ੍ਕ ਅਨੁਪੁਚ੍ਛਸੇ ਮਮਂ, ਕੁਤੋ ਚੁਤਾ ਤ੍ਵਂ ਇਧ ਆਗਤਾਤਿ;

ਬਾਰਾਣਸੀ ਨਾਮ ਪੁਰਤ੍ਥਿ ਕਾਸਿਨਂ, ਤਤ੍ਥ ਅਹੋਸਿਂ ਪੁਰੇ ਕੇਸਕਾਰਿਕਾ.

੧੫੫. ‘‘ਬੁਦ੍ਧੇ ਚ ਧਮ੍ਮੇ ਚ ਪਸਨ੍ਨਮਾਨਸਾ, ਸਙ੍ਘੇ ਚ ਏਕਨ੍ਤਗਤਾ ਅਸਂਸਯਾ;

ਅਖਣ੍ਡਸਿਕ੍ਖਾਪਦਾ ਆਗਤਪ੍ਫਲਾ, ਸਮ੍ਬੋਧਿਧਮ੍ਮੇ ਨਿਯਤਾ ਅਨਾਮਯਾ’’ਤਿ. –

ਗਾਥਦ੍ਵਯਮਾਹ.

੧੫੪-੫. ਤਤ੍ਥ ਯਮੇਤਨ੍ਤਿ ਯਂ ਏਤਂ ਪਞ੍ਹਨ੍ਤਿ ਅਤ੍ਥੋ. ਅਨੁਪੁਚ੍ਛਸੇਤਿ ਅਨੁਕੂਲਭਾਵੇਨ ਪੁਚ੍ਛਸਿ. ਮਮਨ੍ਤਿ ਮਂ. ਪੁਰਤ੍ਥੀਤਿ ਪੁਰਂ ਅਤ੍ਥਿ. ਕਾਸਿਨਨ੍ਤਿ ਕਾਸਿਰਟ੍ਠਸ੍ਸ. ਕੇਸਕਾਰਿਕਾਤਿ ਪੁਰਿਮਤ੍ਤਭਾਵੇ ਅਤ੍ਤਨੋ ਨਾਮਂ ਵਦਤਿ. ਬੁਦ੍ਧੇ ਚ ਧਮ੍ਮੇ ਚਾਤਿਆਦਿਨਾ ਅਤ੍ਤਨੋ ਪੁਞ੍ਞਂ ਵਿਭਾਵੇਤਿ.

ਪੁਨ ਸਕ੍ਕੋ ਤਸ੍ਸਾ ਤਂ ਪੁਞ੍ਞਸਮ੍ਪਤ੍ਤਿਞ੍ਚ ਦਿਬ੍ਬਸਮ੍ਪਤ੍ਤਿਞ੍ਚ ਅਨੁਮੋਦਮਾਨੋ –

੧੫੬. ‘‘ਤਨ੍ਤ੍ਯਾਭਿਨਨ੍ਦਾਮਸੇ ਸ੍ਵਾਗਤਞ੍ਚ ਤੇ,

ਧਮ੍ਮੇਨ ਚ ਤ੍ਵਂ ਯਸਸਾ ਵਿਰੋਚਸਿ;

ਬੁਦ੍ਧੇ ਚ ਧਮ੍ਮੇ ਚ ਪਸਨ੍ਨਮਾਨਸੇ,

ਸਙ੍ਘੇ ਚ ਏਕਨ੍ਤਗਤੇ ਅਸਂਸਯੇ;

ਅਖਣ੍ਡਸਿਕ੍ਖਾਪਦੇ ਆਗਤਪ੍ਫਲੇ,

ਸਮ੍ਬੋਧਿਧਮ੍ਮੇ ਨਿਯਤੇ ਅਨਾਮਯੇ’’ਤਿ. – ਆਹ;

੧੫੬. ਤਤ੍ਥ ਤਨ੍ਤ੍ਯਾਭਿਨਨ੍ਦਾਮਸੇਤਿ ਤਂ ਤੇ ਦੁਵਿਧਮ੍ਪਿ ਸਮ੍ਪਤ੍ਤਿਂ ਅਭਿਨਨ੍ਦਾਮ ਅਨੁਮੋਦਾਮ. ਸ੍ਵਾਗਤਞ੍ਚ ਤੇਤਿ ਤੁਯ੍ਹਞ੍ਚ ਇਧਾਗਮਨਂ ਸ੍ਵਾਗਤਂ, ਅਮ੍ਹਾਕਂ ਪੀਤਿਸੋਮਨਸ੍ਸਸਂਵਦ੍ਧਨਮੇਵ. ਸੇਸਂ ਵੁਤ੍ਤਨਯਮੇਵਾਤਿ.

ਤਂ ਪਨ ਪਵਤ੍ਤਿਂ ਸਕ੍ਕੋ ਦੇਵਰਾਜਾ ਆਯਸ੍ਮਤੋ ਮਹਾਮੋਗ੍ਗਲ੍ਲਾਨਤ੍ਥੇਰਸ੍ਸ ਕਥੇਸਿ, ਥੇਰੋ ਭਗਵਤੋ ਨਿਵੇਦੇਸਿ. ਭਗਵਾ ਤਮਤ੍ਥਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ. ਸਾ ਦੇਸਨਾ ਸਦੇਵਕਸ੍ਸ ਲੋਕਸ੍ਸ ਸਾਤ੍ਥਿਕਾ ਜਾਤਾਤਿ.

ਕੇਸਕਾਰੀਵਿਮਾਨਵਣ੍ਣਨਾ ਨਿਟ੍ਠਿਤਾ.

ਇਤਿ ਪਰਮਤ੍ਥਦੀਪਨਿਯਾ ਖੁਦ੍ਦਕ-ਅਟ੍ਠਕਥਾਯ ਵਿਮਾਨਵਤ੍ਥੁਸ੍ਮਿਂ

ਸਤ੍ਤਰਸਵਤ੍ਥੁਪਟਿਮਣ੍ਡਿਤਸ੍ਸ ਪਠਮਸ੍ਸ ਪੀਠਵਗ੍ਗਸ੍ਸ

ਅਤ੍ਥਵਣ੍ਣਨਾ ਨਿਟ੍ਠਿਤਾ.