੧੬. ਸਿਰਿਮਾਵਿਮਾਨਵਣ੍ਣਨਾ

ਯੁਤ੍ਤਾ ਚ ਤੇ ਪਰਮਅਲਙ੍ਕਤਾ ਹਯਾਤਿ ਸਿਰਿਮਾਵਿਮਾਨਂ. ਤਸ੍ਸ ਕਾ ਉਪ੍ਪਤ੍ਤਿ? ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ ਕਲਨ੍ਦਕਨਿਵਾਪੇ. ਤੇਨ ਚ ਸਮਯੇਨ ਹੇਟ੍ਠਾ ਅਨਨ੍ਤਰਵਤ੍ਥੁਮ੍ਹਿ ਵੁਤ੍ਤਾ ਸਿਰਿਮਾ ਗਣਿਕਾ ਸੋਤਾਪਤ੍ਤਿਫਲਸ੍ਸ ਅਧਿਗਤਤ੍ਤਾ ਵਿਸ੍ਸਜ੍ਜਿਤਕਿਲਿਟ੍ਠਕਮ੍ਮਨ੍ਤਾ ਹੁਤ੍ਵਾ ਸਙ੍ਘਸ੍ਸ ਅਟ੍ਠ ਸਲਾਕਭਤ੍ਤਾਨਿ ਪਟ੍ਠਪੇਸਿ. ਆਦਿਤੋ ਪਟ੍ਠਾਯ ਨਿਬਦ੍ਧਂ ਅਟ੍ਠ ਭਿਕ੍ਖੂ ਗੇਹਂ ਆਗਚ੍ਛਨ੍ਤਿ. ਸਾ ‘‘ਸਪ੍ਪਿਂ ਗਣ੍ਹਥ ਖੀਰਂ ਗਣ੍ਹਥਾ’’ਤਿਆਦੀਨਿ ਵਤ੍ਵਾ ਤੇਸਂ ਪਤ੍ਤੇ ਪੂਰੇਤਿ, ਏਕੇਨ ਲਦ੍ਧਂ ਤਿਣ੍ਣਮ੍ਪਿ ਚਤੁਨ੍ਨਮ੍ਪਿ ਪਹੋਤਿ, ਦੇਵਸਿਕਂ ਸੋਲ਼ਸਕਹਾਪਣਪਰਿਬ੍ਬਯੇਨ ਪਿਣ੍ਡਪਾਤੋ ਦੀਯਤਿ. ਅਥੇਕਦਿਵਸਂ ਏਕੋ ਭਿਕ੍ਖੁ ਤਸ੍ਸਾ ਗੇਹੇ ਅਟ੍ਠਕਭਤ੍ਤਂ ਭੁਞ੍ਜਿਤ੍ਵਾ ਤਿਯੋਜਨਮਤ੍ਥਕੇ ਏਕਂ ਵਿਹਾਰਂ ਅਗਮਾਸਿ. ਅਥ ਨਂ ਸਾਯਂ ਥੇਰੁਪਟ੍ਠਾਨੇ ਨਿਸਿਨ੍ਨਂ ਪੁਚ੍ਛਿਂਸੁ, ‘‘ਆਵੁਸੋ, ਕਹਂ ਭਿਕ੍ਖਂ ਗਹੇਤ੍ਵਾ ਇਧਾਗਤੋਸੀ’’ਤਿ? ‘‘ਸਿਰਿਮਾਯ ਅਟ੍ਠਕਭਤ੍ਤਂ ਮੇ ਭੁਤ੍ਤ’’ਨ੍ਤਿ. ‘‘ਤਂ ਮਨਾਪਂ ਕਤ੍ਵਾ ਦੇਤਿ, ਆਵੁਸੋ’’ਤਿ. ‘‘ਨ ਸਕ੍ਕਾ ਤਸ੍ਸਾ ਭਤ੍ਤਂ ਵਣ੍ਣੇਤੁਂ, ਅਤਿਪਣੀਤਂ ਕਤ੍ਵਾ ਦੇਤਿ, ਏਕੇਨ ਲਦ੍ਧਂ ਤਿਣ੍ਣਮ੍ਪਿ ਚਤੁਨ੍ਨਮ੍ਪਿ ਪਹੋਤਿ, ਤਸ੍ਸਾ ਪਨ ਦੇਯ੍ਯਧਮ੍ਮਤੋਪਿ ਦਸ੍ਸਨਮੇਵ ਉਤ੍ਤਰਿਤਰਂ’’. ਸਾ ਹਿ ਇਤ੍ਥੀ ਏਵਰੂਪਾ ਚ ਏਵਰੂਪਾ ਚਾਤਿ ਤਸ੍ਸਾ ਗੁਣੇ ਕਥੇਸਿ.

ਅਥੇਕੋ ਭਿਕ੍ਖੁ ਤਸ੍ਸਾ ਗੁਣਕਥਂ ਸੁਤ੍ਵਾ ਅਦਿਸ੍ਵਾਪਿ ਸਵਨੇਨੇਵ ਸਿਨੇਹਂ ਉਪ੍ਪਾਦੇਤ੍ਵਾ ‘‘ਮਯਾ ਤਤ੍ਥ ਗਨ੍ਤ੍ਵਾ ਤਂ ਦਟ੍ਠੁਂ ਵਟ੍ਟਤੀ’’ਤਿ ਅਤ੍ਤਨੋ ਵਸ੍ਸਗ੍ਗਂ ਕਥੇਤ੍ਵਾ ਤਂ ਭਿਕ੍ਖੁਂ ਠਿਤਿਕਂ ਪੁਚ੍ਛਿਤ੍ਵਾ ‘‘ਸ੍ਵੇ, ਆਵੁਸੋ, ਤਸ੍ਮਿਂ ਗੇਹੇ ਤ੍ਵਂ ਸਙ੍ਘਤ੍ਥੇਰੋ ਹੁਤ੍ਵਾ ਅਟ੍ਠਕਭਤ੍ਤਂ ਲਭਿਸ੍ਸਸੀ’’ਤਿ ਸੁਤ੍ਵਾ ਤਙ੍ਖਣਞ੍ਞੇਵ ਪਤ੍ਤਚੀਵਰਮਾਦਾਯ ਪਕ੍ਕਨ੍ਤੋ ਪਾਤੋਵ ਅਰੁਣੇ ਉਗ੍ਗਚ੍ਛਨ੍ਤੇ ਸਲਾਕਗ੍ਗਂ ਪਵਿਸਿਤ੍ਵਾ ਠਿਤੋ ਸਙ੍ਘਤ੍ਥੇਰੋ ਹੁਤ੍ਵਾ ਤਸ੍ਸਾ ਗੇਹੇ ਅਟ੍ਠਕਭਤ੍ਤਂ ਲਭਿ. ਯੋ ਪਨ ਸੋ ਭਿਕ੍ਖੁ ਹਿਯ੍ਯੋ ਭੁਞ੍ਜਿਤ੍ਵਾ ਪਕ੍ਕਾਮਿ, ਤਸ੍ਸ ਗਤਵੇਲਾਯਮੇਵਸ੍ਸਾ ਸਰੀਰੇ ਰੋਗੋ ਉਪ੍ਪਜ੍ਜਿ. ਤਸ੍ਮਾ ਆਭਰਣਾਨਿ ਓਮੁਞ੍ਚਿਤ੍ਵਾ ਨਿਪਜ੍ਜਿ. ਅਥਸ੍ਸਾ ਦਾਸਿਯੋ ਅਟ੍ਠਕਭਤ੍ਤਂ ਲਭਿਤੁਂ ਆਗਤੇ ਭਿਕ੍ਖੂ ਦਿਸ੍ਵਾ ਆਰੋਚੇਸੁਂ. ਸਾ ਗਨ੍ਤ੍ਵਾ ਸਹਤ੍ਥਾ ਪਤ੍ਤੇ ਗਹੇਤੁਂ ਵਾ ਨਿਸੀਦਾਪੇਤੁਂ ਵਾ ਅਸਕ੍ਕੋਨ੍ਤੀ ਦਾਸਿਯੋ ਆਣਾਪੇਸਿ ‘‘ਅਮ੍ਮਾ ਪਤ੍ਤੇ ਗਹੇਤ੍ਵਾ ਅਯ੍ਯੇ ਨਿਸੀਦਾਪੇਤ੍ਵਾ ਯਾਗੁਂ ਪਾਯੇਤ੍ਵਾ ਖਜ੍ਜਕਂ ਦਤ੍ਵਾ ਭਤ੍ਤਵੇਲਾਯ ਪਤ੍ਤੇ ਪੂਰੇਤ੍ਵਾ ਦੇਥਾ’’ਤਿ. ਤਾ ‘‘ਸਾਧੁ, ਅਯ੍ਯੇ’’ਤਿ ਭਿਕ੍ਖੂ ਪਵੇਸੇਤ੍ਵਾ ਯਾਗੁਂ ਪਾਯੇਤ੍ਵਾ ਖਜ੍ਜਕਂ ਦਤ੍ਵਾ ਭਤ੍ਤਵੇਲਾਯ ਭਤ੍ਤਸ੍ਸ ਪਤ੍ਤੇ ਪੂਰੇਤ੍ਵਾ ਤਸ੍ਸਾ ਆਰੋਚਯਿਂਸੁ. ਸਾ ‘‘ਮਂ ਪਰਿਗ੍ਗਹੇਤ੍ਵਾ ਨੇਥ, ਅਯ੍ਯੇ ਵਨ੍ਦਿਸ੍ਸਾਮੀ’’ਤਿ ਵਤ੍ਵਾ ਤਾਹਿ ਪਰਿਗ੍ਗਹੇਤ੍ਵਾ ਭਿਕ੍ਖੂਨਂ ਸਨ੍ਤਿਕਂ ਨੀਤਾ ਵੇਧਮਾਨੇਨ ਸਰੀਰੇਨ ਭਿਕ੍ਖੂ ਵਨ੍ਦਿ. ਸੋ ਭਿਕ੍ਖੁ ਤਂ ਓਲੋਕੇਤ੍ਵਾ ਚਿਨ੍ਤੇਸਿ ‘‘ਗਿਲਾਨਾਯ ਤਾਵ ਅਯਂ ਏਤਿਸ੍ਸਾ ਰੂਪਸੋਭਾ, ਅਰੋਗਕਾਲੇ ਪਨ ਸਬ੍ਬਾਭਰਣਪਟਿਮਣ੍ਡਿਤਾਯ ਇਮਿਸ੍ਸਾ ਕੀਦਿਸੀ ਰੂਪਸਮ੍ਪਤ੍ਤੀ’’ਤਿ. ਅਥਸ੍ਸ ਅਨੇਕਵਸ੍ਸਕੋਟਿਸਨ੍ਨਿਚਿਤੋ ਕਿਲੇਸੋ ਸਮੁਦਾਚਰਿ. ਸੋ ਅਞ੍ਞਾਣੀ ਹੁਤ੍ਵਾ ਭਤ੍ਤਂ ਭੁਞ੍ਜਿਤੁਂ ਅਸਕ੍ਕੋਨ੍ਤੋ ਪਤ੍ਤਂ ਆਦਾਯ ਵਿਹਾਰਂ ਗਨ੍ਤ੍ਵਾ ਪਤ੍ਤਂ ਪਿਧਾਯ ਏਕਮਨ੍ਤੇ ਠਪੇਤ੍ਵਾ ਚੀਵਰਕਣ੍ਣਂ ਪਤ੍ਥਰਿਤ੍ਵਾ ਨਿਪਜ੍ਜਿ. ਅਥ ਨਂ ਏਕੋ ਸਹਾਯਕੋ ਭਿਕ੍ਖੁ ਯਾਚਨ੍ਤੋਪਿ ਭੋਜੇਤੁਂ ਨਾਸਕ੍ਖਿ, ਸੋ ਛਿਨ੍ਨਭਤ੍ਤੋ ਅਹੋਸਿ.

ਤਂ ਦਿਵਸਮੇਵ ਸਾਯਨ੍ਹਸਮਯੇ ਸਿਰਿਮਾ ਕਾਲਮਕਾਸਿ. ਰਾਜਾ ਸਤ੍ਥੁ ਸਾਸਨਂ ਪੇਸੇਸਿ ‘‘ਭਨ੍ਤੇ, ਜੀਵਕਸ੍ਸ ਕਨਿਟ੍ਠਭਗਿਨੀ ਸਿਰਿਮਾ ਕਾਲਮਕਾਸੀ’’ਤਿ. ਸਤ੍ਥਾ ਤਂ ਸੁਤ੍ਵਾ ਰਞ੍ਞੋ ਸਾਸਨਂ ਪਹਿਣਿ ‘‘ਸਿਰਿਮਾਯ ਸਰੀਰਝਾਪਨਕਿਚ੍ਚਂ ਨਤ੍ਥਿ, ਆਮਕਸੁਸਾਨੇ ਤਂ ਯਥਾ ਕਾਕਾਦਯੋ ਨ ਖਾਦਨ੍ਤਿ, ਤਥਾ ਨਿਪਜ੍ਜਾਪੇਤ੍ਵਾ ਰਕ੍ਖਾਪੇਥਾ’’ਤਿ. ਰਾਜਾ ਤਥਾ ਅਕਾਸਿ. ਪਟਿਪਾਟਿਯਾ ਤਯੋ ਦਿਵਸਾ ਅਤਿਕ੍ਕਨ੍ਤਾ, ਚਤੁਤ੍ਥੇ ਦਿਵਸੇ ਸਰੀਰਂ ਉਦ੍ਧੁਮਾਯਿ, ਨਵਹਿ ਵਣਮੁਖੇਹਿ ਪੁਲ਼ਵਕਾ ਪਗ੍ਘਰਿਂਸੁ, ਸਕਲਸਰੀਰਂ ਭਿਨ੍ਨਸਾਲਿਭਤ੍ਤਚਾਟਿ ਵਿਯ ਅਹੋਸਿ. ਰਾਜਾ ਨਗਰੇ ਭੇਰਿਂ ਚਰਾਪੇਸਿ ‘‘ਠਪੇਤ੍ਵਾ ਗੇਹਰਕ੍ਖਣਕਦਾਰਕੇ ਸਿਰਿਮਾਯ ਦਸ੍ਸਨਤ੍ਥਂ ਅਨਾਗਚ੍ਛਨ੍ਤਾਨਂ ਅਟ੍ਠ ਕਹਾਪਣਾ ਦਣ੍ਡੋ’’ਤਿ. ਸਤ੍ਥੁ ਸਨ੍ਤਿਕਞ੍ਚ ਪੇਸੇਸਿ ‘‘ਬੁਦ੍ਧਪ੍ਪਮੁਖੋ ਕਿਰ ਸਙ੍ਘੋ ਸਿਰਿਮਾਯ ਦਸ੍ਸਨਤ੍ਥਂ ਆਗਚ੍ਛਤੂ’’ਤਿ. ਸਤ੍ਥਾ ਭਿਕ੍ਖੂਨਂ ਆਰੋਚਾਪੇਸਿ ‘‘ਸਿਰਿਮਾਯ ਦਸ੍ਸਨਤ੍ਥਂ ਗਮਿਸ੍ਸਾਮਾ’’ਤਿ.

ਸੋਪਿ ਦਹਰਭਿਕ੍ਖੁ ਚਤ੍ਤਾਰੋ ਦਿਵਸੇ ਕਸ੍ਸਚਿ ਵਚਨਂ ਅਗ੍ਗਹੇਤ੍ਵਾ ਛਿਨ੍ਨਭਤ੍ਤੋਵ ਨਿਪਜ੍ਜਿ. ਪਤ੍ਤੇ ਭਤ੍ਤਂ ਪੂਤਿਕਂ ਜਾਤਂ, ਪਤ੍ਤੇ ਮਲਮ੍ਪਿ ਉਟ੍ਠਹਿ. ਅਥ ਸੋ ਸਹਾਯਕਭਿਕ੍ਖੁਨਾ ਉਪਸਙ੍ਕਮਿਤ੍ਵਾ ‘‘ਆਵੁਸੋ ਸਤ੍ਥਾ ਸਿਰਿਮਾਯ ਦਸ੍ਸਨਤ੍ਥਂ ਗਚ੍ਛਤੀ’’ਤਿ ਵੁਚ੍ਚਮਾਨੋ ਤਥਾ ਛਾਤਜ੍ਝਤ੍ਤੋਪਿ ‘‘ਸਿਰਿਮਾ’’ਤਿ ਵੁਤ੍ਤਪਦੇਯੇਵ ਸਹਸਾ ਉਟ੍ਠਹਿਤ੍ਵਾ ‘‘ਸਤ੍ਥਾ ਸਿਰਿਮਂ ਦਟ੍ਠੁਂ ਗਚ੍ਛਤਿ, ਤ੍ਵਮ੍ਪਿ ਗਮਿਸ੍ਸਸੀ’’ਤਿ? ‘‘ਆਮ ਗਮਿਸ੍ਸਾਮੀ’’ਤਿ ਭਤ੍ਤਂ ਛਡ੍ਡੇਤ੍ਵਾ ਪਤ੍ਤਂ ਧੋਵਿਤ੍ਵਾ ਥਵਿਕਾਯ ਪਕ੍ਖਿਪਿਤ੍ਵਾ ਭਿਕ੍ਖੁਸਙ੍ਘੇਨ ਸਦ੍ਧਿਂ ਅਗਮਾਸਿ. ਸਤ੍ਥਾ ਭਿਕ੍ਖੁਸਙ੍ਘਪਰਿਵੁਤੋ ਏਕਪਸ੍ਸੇ ਅਟ੍ਠਾਸਿ, ਭਿਕ੍ਖੁਨਿਸਙ੍ਘੋਪਿ ਰਾਜਪਰਿਸਾਪਿ ਉਪਾਸਕਪਰਿਸਾਪਿ ਉਪਾਸਿਕਾਪਰਿਸਾਪਿ ਏਕੇਕਪਸ੍ਸੇ ਅਟ੍ਠਂਸੁ.

ਸਤ੍ਥਾ ਰਾਜਾਨਂ ਪੁਚ੍ਛਿ ‘‘ਕਾ ਏਸਾ, ਮਹਾਰਾਜਾ’’ਤਿ? ‘‘ਭਨ੍ਤੇ, ਜੀਵਕਸ੍ਸ ਕਨਿਟ੍ਠਭਗਿਨੀ ਸਿਰਿਮਾ ਨਾਮਾ’’ਤਿ. ‘‘ਸਿਰਿਮਾ ਏਸਾ’’ਤਿ? ‘‘ਆਮ, ਭਨ੍ਤੇ’’ਤਿ. ਤੇਨ ਹਿ ਨਗਰੇ ਭੇਰਿਂ ਚਰਾਪੇਹਿ ‘‘ਸਹਸ੍ਸਂ ਦਤ੍ਵਾ ਸਿਰਿਮਂ ਗਣ੍ਹਨ੍ਤੂ’’ਤਿ. ਰਾਜਾ ਤਥਾ ਕਾਰੇਸਿ, ਏਕੋਪਿ ‘‘ਹ’’ਨ੍ਤਿ ਵਾ ‘‘ਹੁ’’ਨ੍ਤਿ ਵਾ ਵਦਨ੍ਤੋ ਨਾਮ ਨਾਹੋਸਿ. ਰਾਜਾ ਸਤ੍ਥੁ ਆਰੋਚੇਸਿ ‘‘ਨ ਗਣ੍ਹਨ੍ਤਿ ਭਨ੍ਤੇ’’ਤਿ, ਤੇਨ ਹਿ ਮਹਾਰਾਜ ਅਗ੍ਘਂ ਓਹਾਪੇਹੀਤਿ. ਰਾਜਾ ‘‘ਪਞ੍ਚਸਤਾਨਿ ਦਤ੍ਵਾ ਗਣ੍ਹਨ੍ਤੂ’’ਤਿ ਭੇਰਿਂ ਚਰਾਪੇਤ੍ਵਾ ਕਞ੍ਚਿ ਗਣ੍ਹਨਕਂ ਅਦਿਸ੍ਵਾ ‘‘ਅਡ੍ਢਤੇਯ੍ਯਸਤਾਨਿ, ਦ੍ਵੇਸਤਾਨਿ, ਸਤਂ, ਪਞ੍ਞਾਸਂ, ਪਞ੍ਚਵੀਸਤਿ, ਵੀਸਤਿ ਕਹਾਪਣੇ, ਦਸ ਕਹਾਪਣੇ, ਪਞ੍ਚ ਕਹਾਪਣੇ, ਏਕਂ ਕਹਾਪਣਂ, ਅਡ੍ਢਂ, ਪਾਦਂ, ਮਾਸਕਂ, ਕਾਕਣਿਕਂ ਦਤ੍ਵਾ ਸਿਰਿਮਂ ਗਣ੍ਹਨ੍ਤੂ’’ਤਿ ਭੇਰਿਂ ਚਰਾਪੇਤ੍ਵਾ ‘‘ਮੁਧਾਪਿ ਗਣ੍ਹਨ੍ਤੂ’’ਤਿ ਭੇਰਿਂ ਚਰਾਪੇਸਿ, ਤਥਾਪਿ ‘‘ਹ’’ਨ੍ਤਿ ਵਾ ‘‘ਹੁ’’ਨ੍ਤਿ ਵਾ ਵਦਨ੍ਤੋ ਨਾਮ ਨਾਹੋਸਿ. ਰਾਜਾ ‘‘ਮੁਧਾਪਿ, ਭਨ੍ਤੇ, ਗਣ੍ਹਨ੍ਤੋ ਨਤ੍ਥੀ’’ਤਿ ਆਹ. ਸਤ੍ਥਾ ‘‘ਪਸ੍ਸਥ, ਭਿਕ੍ਖਵੇ, ਮਹਾਜਨਸ੍ਸ ਪਿਯਮਾਤੁਗਾਮਂ, ਇਮਸ੍ਮਿਂਯੇਵ ਨਗਰੇ ਸਹਸ੍ਸਂ ਦਤ੍ਵਾ ਪੁਬ੍ਬੇ ਏਕਦਿਵਸਂ ਲਭਿਂਸੁ, ਇਦਾਨਿ ਮੁਧਾਪਿ ਗਣ੍ਹਨ੍ਤੋ ਨਤ੍ਥਿ ਏਵਰੂਪਂ ਨਾਮ ਰੂਪਂ ਖਯਵਯਪ੍ਪਤ੍ਤਂ ਆਹਰਿਮੇਹਿ ਅਲਙ੍ਕਾਰੇਹਿ ਵਿਚਿਤ੍ਤਕਤਂ ਨਵਨ੍ਨਂ ਵਣ੍ਣਮੁਖਾਨਂ ਵਸੇਨ ਅਰੁਭੂਤਂ ਤੀਹਿ ਅਟ੍ਠਿਸਤੇਹਿ ਸਮੁਸ੍ਸਿਤਂ ਨਿਚ੍ਚਾਤੁਰਂ ਕੇਵਲਂ ਬਾਲਮਹਾਜਨੇਨ ਬਹੁਧਾ ਸਙ੍ਕਪ੍ਪਿਤਤਾਯ ਬਹੁਸਙ੍ਕਪ੍ਪਂ ਅਦ੍ਧੁਵਂ ਅਤ੍ਤਭਾਵ’’ਨ੍ਤਿ ਦਸ੍ਸੇਨ੍ਤੋ –

‘‘ਪਸ੍ਸ ਚਿਤ੍ਤਕਤਂ ਬਿਮ੍ਬਂ, ਅਰੁਕਾਯਂ ਸਮੁਸ੍ਸਿਤਂ;

ਆਤੁਰਂ ਬਹੁਸਙ੍ਕਪ੍ਪਂ, ਯਸ੍ਸ ਨਤ੍ਥਿ ਧੁਵਂ ਠਿਤੀ’’ਤਿ. (ਥੇਰਗਾ. ੧੧੬੦) –

ਗਾਥਮਾਹ. ਦੇਸਨਾਪਰਿਯੋਸਾਨੇ ਸਿਰਿਮਾਯ ਪਟਿਬਦ੍ਧਚਿਤ੍ਤੋ ਭਿਕ੍ਖੁ ਵਿਗਤਛਨ੍ਦਰਾਗੋ ਹੁਤ੍ਵਾ ਵਿਪਸ੍ਸਨਂ ਵਡ੍ਢੇਤ੍ਵਾ ਅਰਹਤ੍ਤਂ ਪਾਪੁਣਿ, ਚਤੁਰਾਸੀਤਿਯਾ ਪਾਣਸਹਸ੍ਸਾਨਂ ਧਮ੍ਮਾਭਿਸਮਯੋ ਅਹੋਸਿ.

ਤੇਨ ਚ ਸਮਯੇਨ ਸਿਰਿਮਾ ਦੇਵਕਞ੍ਞਾ ਅਤ੍ਤਨੋ ਵਿਭਵਸਮਿਦ੍ਧਿਂ ਓਲੋਕੇਤ੍ਵਾ ਆਗਤਟ੍ਠਾਨਂ ਓਲੋਕੇਨ੍ਤੀ ਪੁਰਿਮਤ੍ਤਭਾਵੇ ਅਤ੍ਤਨੋ ਸਰੀਰਸਮੀਪੇ ਭਿਕ੍ਖੁਸਙ੍ਘਪਰਿਵੁਤਂ ਭਗਵਨ੍ਤਂ ਠਿਤਂ ਮਹਾਜਨਕਾਯਞ੍ਚ ਸਨ੍ਨਿਪਤਿਤਂ ਦਿਸ੍ਵਾ ਪਞ੍ਚਹਿ ਦੇਵਕਞ੍ਞਾਸਤੇਹਿ ਪਰਿਵੁਤਾ ਪਞ੍ਚਹਿ ਰਥਸਤੇਹਿ ਦਿਸ੍ਸਮਾਨਕਾਯਾ ਆਗਨ੍ਤ੍ਵਾ ਰਥਤੋ ਓਤਰਿਤ੍ਵਾ ਸਪਰਿਵਾਰਾ ਭਗਵਨ੍ਤਂ ਵਨ੍ਦਿਤ੍ਵਾ ਕਤਞ੍ਜਲੀ ਅਟ੍ਠਾਸਿ. ਤੇਨ ਚ ਸਮਯੇਨ ਆਯਸ੍ਮਾ ਵਙ੍ਗੀਸੋ ਭਗਵਤੋ ਅਵਿਦੂਰੇ ਠਿਤੋ ਹੋਤਿ. ਸੋ ਭਗਵਨ੍ਤਂ ਏਤਦਵੋਚ ‘‘ਪਟਿਭਾਤਿ ਮਂ ਭਗਵਾ ਏਕਂ ਪਞ੍ਹਂ ਪੁਚ੍ਛਿਤੁ’’ਨ੍ਤਿ. ‘‘ਪਟਿਭਾਤੁ ਤਂ ਵਙ੍ਗੀਸਾ’’ਤਿ ਭਗਵਾ ਅਵੋਚ. ਆਯਸ੍ਮਾ ਵਙ੍ਗੀਸੋ ਤਂ ਸਿਰਿਮਂ ਦੇਵਧੀਤਰਂ –

੧੩੭. ‘‘ਯੁਤ੍ਤਾ ਚ ਤੇ ਪਰਮਅਲਙ੍ਕਤਾ ਹਯਾ, ਅਧੋਮੁਖਾ ਅਘਸਿਗਮਾ ਬਲੀ ਜਵਾ;

ਅਭਿਨਿਮ੍ਮਿਤਾ ਪਞ੍ਚਰਥਾਸਤਾ ਚ ਤੇ, ਅਨ੍ਵੇਨ੍ਤਿ ਤਂ ਸਾਰਥਿਚੋਦਿਤਾ ਹਯਾ.

੧੩੮. ‘‘ਸਾ ਤਿਟ੍ਠਸਿ ਰਥਵਰੇ ਅਲਙ੍ਕਤਾ,

ਓਭਾਸਯਂ ਜਲਮਿਵ ਜੋਤਿ ਪੋਵਕੋ;

ਪੁਚ੍ਛਾਮਿ ਤਂ ਵਰਤਨੁ ਅਨੋਮਦਸ੍ਸਨੇ,

ਕਸ੍ਮਾ ਨੁ ਕਾਯਾ ਅਨਧਿਵਰਂ ਉਪਾਗਮੀ’’ਤਿ. – ਪਟਿਪੁਚ੍ਛਿ;

੧੩੭. ਤਤ੍ਥ ਯੁਤ੍ਤਾ ਚ ਤੇ ਪਰਮਅਲਙ੍ਕਤਾ ਹਯਾਤਿ ਪਰਮਂ ਅਤਿਵਿਯ ਵਿਸੇਸਤੋ ਅਲਙ੍ਕਤਾ, ਪਰਮੇਹਿ ਵਾ ਉਤ੍ਤਮੇਹਿ ਦਿਬ੍ਬੇਹਿ ਅਸ੍ਸਾਲਙ੍ਕਾਰੇਹਿ ਅਲਙ੍ਕਤਾ, ਪਰਮਾ ਵਾ ਅਗ੍ਗਾ ਸੇਟ੍ਠਾ ਆਜਾਨੀਯਾ ਸਬ੍ਬਾਲਙ੍ਕਾਰੇਹਿ ਅਲਙ੍ਕਤਾ ਹਯਾ ਅਸ੍ਸਾ ਤੇ ਤਵ ਰਥੇ ਯੋਜਿਤਾ, ਯੁਤ੍ਤਾ ਵਾ ਤੇ ਰਥਸ੍ਸ ਚ ਅਨੁਚ੍ਛਵਿਕਾ, ਅਞ੍ਞਮਞ੍ਞਂ ਵਾ ਸਦਿਸਤਾਯ ਯੁਤ੍ਤਾ ਸਂਸਟ੍ਠਾਤਿ ਅਤ੍ਥੋ. ਏਤ੍ਥ ਚ ‘‘ਪਰਮਅਲਙ੍ਕਤਾ’’ਤਿ ਪੁਰਿਮਸ੍ਮਿਂ ਪਕ੍ਖੇ ਸਨ੍ਧਿਂ ਅਕਤ੍ਵਾ ਦੁਤਿਯਸ੍ਮਿਂ ਪਕ੍ਖੇ ਅਵਿਭਤ੍ਤਿਕਨਿਦ੍ਦੇਸੋ ਦਟ੍ਠਬ੍ਬੋ. ਅਧੋਮੁਖਾਤਿ ਹੇਟ੍ਠਾਮੁਖਾ. ਯਦਿਪਿ ਤੇ ਤਦਾ ਪਕਤਿਯਾਵ ਠਿਤਾ, ਦੇਵਲੋਕਤੋ ਓਰੋਹਣਵਸੇਨ ‘‘ਅਧੋਮੁਖਾ’’ਤਿ ਵੁਤ੍ਤਾ. ਅਘਸਿਗਮਾਤਿ ਵੇਹਾਸਂਗਮਾ. ਬਲੀਤਿ ਬਲਵਨ੍ਤੋ. ਜਵਾਤਿ ਜਵਨਕਾ, ਬਲਵਨ੍ਤੋ ਚੇਵ ਵੇਗਵਨ੍ਤੋ ਚਾਤਿ ਅਤ੍ਥੋ. ਅਭਿਨਿਮ੍ਮਿਤਾਤਿ ਤਵ ਪੁਞ੍ਞਕਮ੍ਮੇਨ ਨਿਮ੍ਮਿਤਾ ਨਿਬ੍ਬਤ੍ਤਾ. ਸਯਂ ਨਿਮ੍ਮਿਤਮੇਵ ਵਾ ਸਨ੍ਧਾਯ ‘‘ਅਭਿਨਿਮ੍ਮਿਤਾ’’ਤਿ ਵੁਤ੍ਤਂ ਨਿਮ੍ਮਾਨਰਤਿਭਾਵਤੋ ਸਿਰਿਮਾਯ ਦੇਵਧੀਤਾਯ. ਪਞ੍ਚਰਥਾਸਤਾਤਿ ਗਾਥਾਸੁਖਤ੍ਥਂ ਥਕਾਰਸ੍ਸ ਦੀਘਂ ਲਿਙ੍ਗਵਿਪਲ੍ਲਾਸਞ੍ਚ ਕਤ੍ਵਾ ਵੁਤ੍ਤਂ, ਵਿਭਤ੍ਤਿਅਲੋਪੋ ਵਾ ਦਟ੍ਠਬ੍ਬੋ, ਪਞ੍ਚ ਰਥਸਤਾਨੀਤਿ ਅਤ੍ਥੋ. ਅਨ੍ਵੇਨ੍ਤਿ ਤਂ ਸਾਰਥਿਚੋਦਿਤਾ ਹਯਾਤਿ ਸਾਰਥੀਹਿ ਚੋਦਿਤਾ ਵਿਯ ਰਥੇਸੁ ਯੁਤ੍ਤਾ ਇਮੇ ਹਯਾ ਭਦ੍ਦੇ, ਦੇਵਤੇ, ਤਂ ਅਨੁਗਚ੍ਛਨ੍ਤਿ. ‘‘ਸਾਰਥਿਅਚੋਦਿਤਾ’’ਤਿ ਕੇਚਿ ਪਠਨ੍ਤਿ, ਸਾਰਥੀਹਿ ਅਚੋਦਿਤਾ ਏਵ ਅਨੁਗਚ੍ਛਨ੍ਤੀਤਿ ਅਤ੍ਥੋ. ‘‘ਸਾਰਥਿਚੋਦਿਤਾ ਹਯਾ’’ਤਿ ਏਕਂਯੇਵ ਵਾ ਪਦਂ ਗਾਥਾਸੁਖਤ੍ਥਂ ਦੀਘਂ ਕਤ੍ਵਾ ਵੁਤ੍ਤਂ, ਸਾਰਥਿਚੋਦਿਤਹਯਾ ਪਞ੍ਚ ਰਥਸਤਾਤਿ ਯੋਜਨਾ.

੧੩੮. ਸਾ ਤਿਟ੍ਠਸੀਤਿ ਸਾ ਤ੍ਵਂ ਤਿਟ੍ਠਸਿ. ਰਥਵਰੇਤਿ ਰਥੁਤ੍ਤਮੇ. ਅਲਙ੍ਕਤਾਤਿ ਸਟ੍ਠਿਸਕਟਭਾਰੇਹਿ ਦਿਬ੍ਬਾਲਙ੍ਕਾਰੇਹਿ ਅਲਙ੍ਕਤਸਰੀਰਾ. ਓਭਾਸਯਂ ਜਲਮਿਵ ਜੋਤਿ ਪਾਵਕੋਤਿ ਓਭਾਸੇਨ੍ਤੀ ਜੋਤਿਰਿਵ ਜਲਨ੍ਤੀ ਪਾਵਕੋ ਵਿਯ ਚ ਤਿਟ੍ਠਸਿ, ਸਮਨ੍ਤਤੋ ਓਭਾਸੇਨ੍ਤੀ ਜਲਨ੍ਤੀ ਤਿਟ੍ਠਸੀਤਿ ਵੁਤ੍ਤਂ ਹੋਤਿ. ‘‘ਜੋਤੀ’’ਤਿ ਚ ਚਨ੍ਦਿਮਸੂਰਿਯਨਕ੍ਖਤ੍ਤਤਾਰਕਰੂਪਾਨਂ ਸਾਧਾਰਣਨਾਮਂ. ਵਰਤਨੂਤਿ ਉਤ੍ਤਮਰੂਪਧਰੇ ਸਬ੍ਬਙ੍ਗਸੋਭਨੇ. ਤਤੋ ਏਵ ਅਨੋਮਦਸ੍ਸਨੇ ਅਲਾਮਕਦਸ੍ਸਨੇ, ਦਸ੍ਸਨੀਯੇ ਪਾਸਾਦਿਕੇਤਿ ਅਤ੍ਥੋ. ਕਸ੍ਮਾ ਨੁ ਕਾਯਾ ਅਨਧਿਵਰਂ ਉਪਾਗਮੀਤਿ ਕੁਤੋ ਨਾਮ ਦੇਵਕਾਯਤੋ ਅਨੁਤ੍ਤਰਂ ਸਮ੍ਮਾਸਮ੍ਬੁਦ੍ਧਂ ਪਯਿਰੁਪਾਸਨਾਯ ਉਪਗਞ੍ਛਿ ਉਪਗਤਾਸਿ.

ਏਵਂ ਥੇਰੇਨ ਪੁਚ੍ਛਿਤਾ ਸਾ ਦੇਵਤਾ ਅਤ੍ਤਾਨਂ ਆਵਿਕਰੋਨ੍ਤੀ –

੧੩੯. ‘‘ਕਾਮਗ੍ਗਪਤ੍ਤਾਨਂ ਯਮਾਹੁਨੁਤ੍ਤਰਂ, ਨਿਮ੍ਮਾਯ ਨਿਮ੍ਮਾਯ ਰਮਨ੍ਤਿ ਦੇਵਤਾ;

ਤਸ੍ਮਾ ਕਾਯਾ ਅਚ੍ਛਰਾ ਕਾਮਵਣ੍ਣਿਨੀ, ਇਧਾਗਤਾ ਅਨਧਿਵਰਂ ਨਮਸ੍ਸਿਤੁ’’ਨ੍ਤਿ. –

ਗਾਥਮਾਹ.

੧੩੯. ਤਤ੍ਥ ਕਾਮਗ੍ਗਪਤ੍ਤਾਨਂ ਯਮਾਹੁਨੁਤ੍ਤਰਨ੍ਤਿ ਕਾਮੂਪਭੋਗੇਹਿ ਅਗ੍ਗਭਾਵਂ ਪਤ੍ਤਾਨਂ ਪਰਨਿਮ੍ਮਿਤਵਸਵਤ੍ਤੀਨਂ ਦੇਵਾਨਂ ਯਂ ਦੇਵਕਾਯਂ ਯਸੇਨ ਭੋਗਾਦਿਵਸੇਨ ਚ ਅਨੁਤ੍ਤਰਨ੍ਤਿ ਵਦਨ੍ਤਿ, ਤਤੋ ਕਾਯਾ. ਨਿਮ੍ਮਾਯ ਨਿਮ੍ਮਾਯ ਰਮਨ੍ਤਿ ਦੇਵਤਾਤਿ ਨਿਮ੍ਮਾਨਰਤਿਦੇਵਤਾ ਅਤ੍ਤਨਾ ਯਥਾਰੁਚਿਤੇ ਕਾਮੇ ਸਯਂ ਨਿਮ੍ਮਿਨਿਤ੍ਵਾ ਨਿਮ੍ਮਿਨਿਤ੍ਵਾ ਰਮਨ੍ਤਿ ਕੀਲ਼ਨ੍ਤਿ ਲਲ਼ਨ੍ਤਾ ਅਭਿਰਮਨ੍ਤਿ. ਤਸ੍ਮਾ ਕਾਯਾਤਿ ਤਸ੍ਮਾ ਨਿਮ੍ਮਾਨਰਤਿਦੇਵਨਿਕਾਯਾ. ਕਾਮਵਣ੍ਣਿਨੀਤਿ ਕਾਮਰੂਪਧਰਾ ਯਥਿਚ੍ਛਿਤਰੂਪਧਾਰਿਨੀ. ਇਧਾਗਤਾਤਿ ਇਧ ਇਮਸ੍ਮਿਂ ਮਨੁਸ੍ਸਲੋਕੇ, ਇਮਂ ਵਾ ਮਨੁਸ੍ਸਲੋਕਂ ਆਗਤਾ.

ਏਵਂ ਦੇਵਤਾਯ ਅਤ੍ਤਨੋ ਨਿਮ੍ਮਾਨਰਤਿਦੇਵਤਾਭਾਵੇ ਕਥਿਤੇ ਪੁਨ ਥੇਰੋ ਤਸ੍ਸਾ ਪੁਰਿਮਭਵਂ ਤਤ੍ਥ ਕਤਪੁਞ੍ਞਕਮ੍ਮਂ ਲਦ੍ਧਿਞ੍ਚ ਕਥਾਪੇਤੁਕਾਮੋ –

੧੪੦. ‘‘ਕਿਂ ਤ੍ਵਂ ਪੁਰੇ ਸੁਚਰਿਤਮਾਚਰੀਧ, ਕੇਨਚ੍ਛਸਿ ਤ੍ਵਂ ਅਮਿਤਯਸਾ ਸੁਖੇਧਿਤਾ;

ਇਦ੍ਧੀ ਚ ਤੇ ਅਨਧਿਵਰਾ ਵਿਹਙ੍ਗਮਾ, ਵਣ੍ਣੋ ਚ ਤੇ ਦਸ ਦਿਸਾ ਵਿਰੋਚਤਿ.

੧੪੧. ‘‘ਦੇਵੇਹਿ ਤ੍ਵਂ ਪਰਿਵੁਤਾ ਸਕ੍ਕਤਾ ਚਸਿ,

ਕੁਤੋ ਚੁਤਾ ਸੁਗਤਿਗਤਾਸਿ ਦੇਵਤੇ;

ਕਸ੍ਸ ਵਾ ਤ੍ਵਂ ਵਚਨਕਰਾਨੁਸਾਸਨਿਂ,

ਆਚਿਕ੍ਖ ਮੇ ਤ੍ਵਂ ਯਦਿ ਬੁਦ੍ਧਸਾਵਿਕਾ’’ਤਿ. – ਦ੍ਵੇ ਗਾਥਾ ਅਭਾਸਿ;

੧੪੦. ਤਤ੍ਥ ਆਚਰੀਤਿ ਦੀਘਂ ਕਤ੍ਵਾ ਵੁਤ੍ਤਂ, ਉਪਚਿਨੀਤਿ ਅਤ੍ਥੋ. ਇਧਾਤਿ ਨਿਪਾਤਮਤ੍ਤਂ, ਇਧ ਵਾ ਇਮਸ੍ਮਿਂ ਦੇਵਤ੍ਤਭਾਵੇ. ਕੇਨਚ੍ਛਸੀਤਿ ਕੇਨ ਪੁਞ੍ਞਕਮ੍ਮੇਨ ਅਸ੍ਸਤ੍ਥਾ ਅਚ੍ਛਸਿ. ‘‘ਕੇਨਾਸਿ ਤ੍ਵ’’ਨ੍ਤਿ ਕੇਚਿ ਪਠਨ੍ਤਿ. ਅਮਿਤਯਸਾਤਿ ਨ ਮਿਤਯਸਾ ਅਨਪ੍ਪਕਪਰਿਵਾਰਾ. ਸੁਖੇਧਿਤਾਤਿ ਸੁਖੇਨ ਵਡ੍ਢਿਤਾ, ਸੁਪਰਿਬ੍ਰੂਹਿਤਦਿਬ੍ਬਸੁਖਾਤਿ ਅਤ੍ਥੋ. ਇਦ੍ਧੀਤਿ ਦਿਬ੍ਬਾਨੁਭਾਵੋ. ਅਨਧਿਵਰਾਤਿ ਅਧਿਕਾ ਵਿਸਿਟ੍ਠਾ ਅਞ੍ਞਾ ਏਤਿਸ੍ਸਾ ਨਤ੍ਥੀਤਿ ਅਨਧਿਵਰਾ, ਅਤਿਉਤ੍ਤਮਾਤਿ ਅਤ੍ਥੋ. ਵਿਹਙ੍ਗਮਾਤਿ ਵੇਹਾਸਗਾਮਿਨੀ. ਦਸ ਦਿਸਾਤਿ ਦਸਪਿ ਦਿਸਾ. ਵਿਰੋਚਤੀਤਿ ਓਭਾਸੇਤਿ.

੧੪੧. ਪਰਿਵੁਤਾ ਸਕ੍ਕਤਾ ਚਸੀਤਿ ਸਮਨ੍ਤਤੋ ਪਰਿਵਾਰਿਤਾ ਸਮ੍ਭਾਵਿਤਾ ਚ ਅਸਿ. ਕੁਤੋ ਚੁਤਾ ਸੁਗਤਿਗਤਾਸੀਤਿ ਪਞ੍ਚਸੁ ਗਤੀਸੁ ਕਤਰਗਤਿਤੋ ਚੁਤਾ ਹੁਤ੍ਵਾ ਸੁਗਤਿਂ ਇਮਂ ਦੇਵਗਤਿਂ ਪਟਿਸਨ੍ਧਿਵਸੇਨ ਉਪਗਤਾ ਅਸਿ. ਕਸ੍ਸ ਵਾ ਤ੍ਵਂ ਵਚਨਕਰਾਨੁਸਾਸਨਿਨ੍ਤਿ ਕਸ੍ਸ ਨੁ ਵਾ ਸਤ੍ਥੁ ਸਾਸਨੇ ਪਾਵਚਨੇ ਓਵਾਦਾਨੁਸਾਸਨਿਸਮ੍ਪਟਿਚ੍ਛਨੇਨ ਤ੍ਵਂ ਵਚਨਕਰਾ ਅਸੀਤਿ ਯੋਜਨਾ. ਕਸ੍ਸ ਵਾ ਤ੍ਵਂ ਸਤ੍ਥੁ ਵਚਨਕਰਾ ਅਨੁਸਾਸਕਸ੍ਸ ਅਨੁਸਿਟ੍ਠਿਯਂ ਪਤਿਟ੍ਠਾਨੇਨਾਤਿ ਏਵਂ ਵਾ ਏਤ੍ਥ ਅਤ੍ਥੋ ਦਟ੍ਠਬ੍ਬੋ. ਏਵਂ ਅਨੁਦ੍ਦੇਸਿਕਵਸੇਨ ਤਸ੍ਸਾ ਲਦ੍ਧਿਂ ਪੁਚ੍ਛਿਤ੍ਵਾ ਪੁਨ ਉਦ੍ਦੇਸਿਕਵਸੇਨ ‘‘ਆਚਿਕ੍ਖ ਮੇ ਤ੍ਵਂ ਯਦਿ ਬੁਦ੍ਧਸਾਵਿਕਾ’’ਤਿ ਪੁਚ੍ਛਤਿ. ਤਤ੍ਥ ਬੁਦ੍ਧਸਾਵਿਕਾਤਿ ਸਬ੍ਬਮ੍ਪਿ ਞੇਯ੍ਯਧਮ੍ਮਂ ਸਯਮ੍ਭੁਞਾਣੇਨ ਹਤ੍ਥਤਲੇ ਆਮਲਕਂ ਵਿਯ ਪਚ੍ਚਕ੍ਖਤੋ ਬੁਦ੍ਧਤ੍ਤਾ ਬੁਦ੍ਧਸ੍ਸ ਭਗਵਤੋ ਧਮ੍ਮਸ੍ਸਵਨਨ੍ਤੇ ਜਾਤਾਤਿ ਬੁਦ੍ਧਸਾਵਿਕਾ.

ਏਵਂ ਥੇਰੇਨ ਪੁਚ੍ਛਿਤਮਤ੍ਥਂ ਕਥੇਨ੍ਤੀ ਦੇਵਤਾ ਇਮਾ ਗਾਥਾ ਅਭਾਸਿ –

੧੪੨. ‘‘ਨਗਨ੍ਤਰੇ ਨਗਰਵਰੇ ਸੁਮਾਪਿਤੇ, ਪਰਿਚਾਰਿਕਾ ਰਾਜਵਰਸ੍ਸ ਸਿਰਿਮਤੋ;

ਨਚ੍ਚੇ ਗੀਤੇ ਪਰਮਸੁਸਿਕ੍ਖਿਤਾ ਅਹੁਂ, ਸਿਰਿਮਾਤਿ ਮਂ ਰਾਜਗਹੇ ਅਵੇਦਿਂਸੁ.

੧੪੩. ‘‘ਬੁਦ੍ਧੋ ਚ ਮੇ ਇਸਿਨਿਸਭੋ ਵਿਨਾਯਕੋ, ਅਦੇਸਯੀ ਸਮੁਦਯਦੁਕ੍ਖਨਿਚ੍ਚਤਂ;

ਅਸਙ੍ਖਤਂ ਦੁਕ੍ਖਨਿਰੋਧ ਸਸ੍ਸਤਂ, ਮਗ੍ਗਞ੍ਚਿਮਂ ਅਕੁਟਿਲਮਞ੍ਜਸਂ ਸਿਵਂ.

੧੪੪. ‘‘ਸੁਤ੍ਵਾਨਹਂ ਅਮਤਪਦਂ ਅਸਙ੍ਖਤਂ, ਤਥਾਗਤਸ੍ਸਨਧਿਵਰਸ੍ਸ ਸਾਸਨਂ;

ਸੀਲੇਸ੍ਵਹਂ ਪਰਮਸੁਸਂਵੁਤਾ ਅਹੁਂ, ਧਮ੍ਮੇ ਠਿਤਾ ਨਰਵਰਬੁਦ੍ਧਦੇਸਿਤੇ.

੧੪੫. ‘‘ਞਤ੍ਵਾਨਹਂ ਵਿਰਜਪਦਂ ਅਸਙ੍ਖਤਂ, ਤਥਾਗਤੇਨਨਧਿਵਰੇਨ ਦੇਸਿਤਂ;

ਤਤ੍ਥੇਵਹਂ ਸਮਥਸਮਾਧਿਮਾਫੁਸਿਂ, ਸਾਯੇਵ ਮੇ ਪਰਮਨਿਯਾਮਤਾ ਅਹੁ.

੧੪੬. ‘‘ਲਦ੍ਧਾਨਹਂ ਅਮਤਵਰਂ ਵਿਸੇਸਨਂ, ਏਕਂਸਿਕਾ ਅਭਿਸਮਯੇ ਵਿਸੇਸਿਯ;

ਅਸਂਸਯਾ ਬਹੁਜਨਪੂਜਿਤਾ ਅਹਂ, ਖਿਡ੍ਡਾਰਤਿਂ ਪਚ੍ਚਨੁਭੋਮਨਪ੍ਪਕਂ.

੧੪੭. ‘‘ਏਵਂ ਅਹਂ ਅਮਤਦਸਮ੍ਹਿ ਦੇਵਤਾ, ਤਥਾਗਤਸ੍ਸਨਧਿਵਰਸ੍ਸ ਸਾਵਿਕਾ;

ਧਮ੍ਮਦ੍ਦਸਾ ਪਠਮਫਲੇ ਪਤਿਟ੍ਠਿਤਾ, ਸੋਤਾਪਨ੍ਨਾ ਨ ਚ ਪਨ ਮਤ੍ਥਿ ਦੁਗ੍ਗਤਿ.

੧੪੮. ‘‘ਸਾ ਵਨ੍ਦਿਤੁਂ ਅਨਧਿਵਰਂ ਉਪਾਗਮਿਂ, ਪਾਸਾਦਿਕੇ ਕੁਸਲਰਤੇ ਚ ਭਿਕ੍ਖਵੋ;

ਨਮਸ੍ਸਿਤੁਂ ਸਮਣਸਮਾਗਮਂ ਸਿਵਂ, ਸਗਾਰਵਾ ਸਿਰਿਮਤੋ ਧਮ੍ਮਰਾਜਿਨੋ.

੧੪੯. ‘‘ਦਿਸ੍ਵਾ ਮੁਨਿਂ ਮੁਦਿਤਮਨਮ੍ਹਿ ਪੀਣਿਤਾ, ਤਥਾਗਤਂ ਨਰਵਰਦਮ੍ਮਸਾਰਥਿਂ;

ਤਣ੍ਹਚ੍ਛਿਦਂ ਕੁਸਲਰਤਂ ਵਿਨਾਯਕਂ, ਵਨ੍ਦਾਮਹਂ ਪਰਮਹਿਤਾਨੁਕਮ੍ਪਕ’’ਨ੍ਤਿ.

੧੪੨. ਤਤ੍ਥ ਨਗਨ੍ਤਰੇਤਿ ਇਸਿਗਿਲਿਵੇਪੁਲ੍ਲਵੇਭਾਰਪਣ੍ਡਵਗਿਜ੍ਝਕੂਟਸਙ੍ਖਾਤਾਨਂ ਪਞ੍ਚਨ੍ਨਂ ਪਬ੍ਬਤਾਨਂ ਅਨ੍ਤਰੇ ਵੇਮਜ੍ਝੇ, ਯਤੋ ਤਂ ਨਗਰਂ ‘‘ਗਿਰਿਬ੍ਬਜ’’ਨ੍ਤਿ ਵੁਚ੍ਚਤਿ. ਨਗਰਵਰੇਤਿ ਉਤ੍ਤਮਨਗਰੇ, ਰਾਜਗਹਂ ਸਨ੍ਧਾਯਾਹ. ਸੁਮਾਪਿਤੇਤਿ ਮਹਾਗੋਵਿਨ੍ਦਪਣ੍ਡਿਤੇਨ ਵਤ੍ਥੁਵਿਜ੍ਜਾਵਿਧਿਨਾ ਸਮ੍ਮਦੇਵ ਨਿਵੇਸਿਤੇ. ਪਰਿਚਾਰਿਕਾਤਿ ਸਂਗੀਤਪਰਿਚਰਿਯਾਯ ਉਪਟ੍ਠਾਯਿਕਾ. ਰਾਜਵਰਸ੍ਸਾਤਿ ਬਿਮ੍ਬਿਸਾਰਮਹਾਰਾਜਸ੍ਸ. ਸਿਰਿਮਤੋਤਿ ਏਤ੍ਥ ‘‘ਸਿਰੀਤਿ ਬੁਦ੍ਧਿਪੁਞ੍ਞਾਨਂ ਅਧਿਵਚਨ’’ਨ੍ਤਿ ਵਦਨ੍ਤਿ. ਅਥ ਵਾ ਪੁਞ੍ਞਨਿਬ੍ਬਤ੍ਤਾ ਸਰੀਰਸੋਭਗ੍ਗਾਦਿਸਮ੍ਪਤ੍ਤਿ ਕਤਪੁਞ੍ਞਂ ਨਿਸ੍ਸਯਤਿ, ਕਤਪੁਞ੍ਞੇਹਿ ਵਾ ਨਿਸ੍ਸੀਯਤੀਤਿ ‘‘ਸਿਰੀ’’ਤਿ ਵੁਚ੍ਚਤਿ, ਸਾ ਏਤਸ੍ਸ ਅਤ੍ਥੀਤਿ ਸਿਰਿਮਾ, ਤਸ੍ਸ ਸਿਰਿਮਤੋ. ਪਰਮਸੁਸਿਕ੍ਖਿਤਾਤਿ ਅਤਿਵਿਯ ਸਮ੍ਮਦੇਵ ਚ ਸਿਕ੍ਖਿਤਾ. ਅਹੁਨ੍ਤਿ ਅਹੋਸਿਂ. ਅਵੇਦਿਂਸੂਤਿ ਅਞ੍ਞਾਸੁਂ.

੧੪੩. ਇਸਿਨਿਸਭੋਤਿ ਗਵਸਤਜੇਟ੍ਠਕੋ ਉਸਭੋ, ਗਵਸਹਸ੍ਸਜੇਟ੍ਠਕੋ ਵਸਭੋ, ਵਜਸਤਜੇਟ੍ਠਕੋ ਵਾ ਉਸਭੋ, ਵਜਸਹਸ੍ਸਜੇਟ੍ਠਕੋ ਵਸਭੋ, ਸਬ੍ਬਗਵਸੇਟ੍ਠੋ ਸਬ੍ਬਪਰਿਸ੍ਸਯਸਹੋ ਸੇਤੋ ਪਾਸਾਦਿਕੋ ਮਹਾਭਾਰਵਹੋ ਅਸਨਿਸਤਸਦ੍ਦੇਹਿਪਿ ਅਸਮ੍ਪਕਮ੍ਪਿਯੋ ਨਿਸਭੋ. ਰਥਾ ਸੋ ਅਤ੍ਤਨੋ ਨਿਸਭਬਲੇਨ ਸਮਨ੍ਨਾਗਤੋ ਚਤੂਹਿ ਪਾਦੇਹਿ ਪਥਵਿਂ ਉਪ੍ਪੀਲ਼ੇਤ੍ਵਾ ਕੇਨਚਿ ਪਰਿਸ੍ਸਯੇਨ ਅਕਮ੍ਪਿਯੋ ਅਚਲਟ੍ਠਾਨੇਨ ਤਿਟ੍ਠਤਿ, ਏਵਂ ਭਗਵਾ ਦਸਹਿ ਤਥਾਗਤਬਲੇਹਿ ਸਮਨ੍ਨਾਗਤੋ ਚਤੂਹਿ ਵੇਸਾਰਜ੍ਜਪਾਦੇਹਿ ਅਟ੍ਠਪਰਿਸਪਥਵਿਂ ਉਪ੍ਪੀਲ਼ੇਤ੍ਵਾ ਸਦੇਵਕੇ ਲੋਕੇ ਕੇਨਚਿ ਪਚ੍ਚਤ੍ਥਿਕੇਨ ਪਚ੍ਚਾਮਿਤ੍ਤੇਨ ਅਕਮ੍ਪਿਯੋ ਅਚਲਟ੍ਠਾਨੇਨ ਤਿਟ੍ਠਤਿ, ਤਸ੍ਮਾ ਨਿਸਭੋ ਵਿਯਾਤਿ ਨਿਸਭੋ. ਸੀਲਾਦੀਨਂ ਧਮ੍ਮਕ੍ਖਨ੍ਧਾਨਂ ਏਸਨਟ੍ਠੇਨ ‘‘ਇਸੀ’’ਤਿ ਲਦ੍ਧਵੋਹਾਰੇਸੁ ਸੇਕ੍ਖਾਸੇਕ੍ਖਇਸੀਸੁ ਨਿਸਭੋ, ਇਸੀਨਂ ਵਾ ਨਿਸਭੋ, ਇਸਿ ਚ ਸੋ ਨਿਸਭੋ ਚਾਤਿ ਵਾ ਇਸਿਨਿਸਭੋ. ਵੇਨੇਯ੍ਯਸਤ੍ਤੇ ਵਿਨੇਤੀਤਿ ਵਿਨਾਯਕੋ, ਨਾਯਕਵਿਰਹਿਤੋਤਿ ਵਾ ਵਿਨਾਯਕੋ, ਸਯਮ੍ਭੂਤਿ ਅਤ੍ਥੋ.

ਅਦੇਸਯੀ ਸਮੁਦਯਦੁਕ੍ਖਨਿਚ੍ਚਤਨ੍ਤਿ ਸਮੁਦਯਸਚ੍ਚਸ੍ਸ ਚ ਦੁਕ੍ਖਸਚ੍ਚਸ੍ਸ ਚ ਅਨਿਚ੍ਚਤਂ ਵਯਧਮ੍ਮਤਂ ਅਭਾਸਿ. ਤੇਨ ‘‘ਯਂਕਿਞ੍ਚਿ ਸਮੁਦਯਧਮ੍ਮਂ, ਸਬ੍ਬਂ ਤਂ ਨਿਰੋਧਧਮ੍ਮ’’ਨ੍ਤਿ ਅਤ੍ਤਨੋ ਅਭਿਸਮਯਞਾਣਸ੍ਸ ਪਵਤ੍ਤਿਆਕਾਰਂ ਦਸ੍ਸੇਤਿ. ਸਮੁਦਯਦੁਕ੍ਖਨਿਚ੍ਚਤਨ੍ਤਿ ਵਾ ਸਮੁਦਯਸਚ੍ਚਞ੍ਚ ਦੁਕ੍ਖਸਚ੍ਚਞ੍ਚ ਅਨਿਚ੍ਚਤਞ੍ਚ. ਤਤ੍ਥ ਸਮੁਦਯਸਚ੍ਚਦੁਕ੍ਖਸਚ੍ਚਗ੍ਗਹਣੇਨ ਵਿਪਸ੍ਸਨਾਯ ਭੂਮਿਂ ਦਸ੍ਸੇਤਿ, ਅਨਿਚ੍ਚਤਾਗਹਣੇਨ ਤਸ੍ਸਾ ਪਵਤ੍ਤਿਆਕਾਰਂ ਦਸ੍ਸੇਤਿ. ਸਙ੍ਖਾਰਾਨਞ੍ਹਿ ਅਨਿਚ੍ਚਾਕਾਰੇ ਵਿਭਾਵਿਤੇ ਦੁਕ੍ਖਾਕਾਰੋ ਅਨਤ੍ਤਾਕਾਰੋਪਿ ਵਿਭਾਵਿਤੋਯੇਵ ਹੋਤਿ ਤਂਨਿਬਨ੍ਧਨਤ੍ਤਾ ਤੇਸਂ. ਤੇਨਾਹ ‘‘ਯਦਨਿਚ੍ਚਂ, ਤਂ ਦੁਕ੍ਖਂ, ਯਂ ਦੁਕ੍ਖਂ, ਤਦਨਤ੍ਤਾ’’ਤਿ (ਸਂ. ਨਿ. ੩.੧੫). ਅਸਙ੍ਖਤਂ ਦੁਕ੍ਖਨਿਰੋਧਸਸ੍ਸਤਨ੍ਤਿ ਕੇਨਚਿ ਪਚ੍ਚਯੇਨ ਨ ਸਙ੍ਖਤਨ੍ਤਿ ਅਸਙ੍ਖਤਂ, ਸਬ੍ਬਕਾਲਂ ਤਥਭਾਵੇਨ ਸਸ੍ਸਤਂ, ਸਕਲਵਟ੍ਟਦੁਕ੍ਖਨਿਰੋਧਭਾਵਤੋ ਦੁਕ੍ਖਨਿਰੋਧਂ ਅਰਿਯਸਚ੍ਚਞ੍ਚ ਮੇ ਅਦੇਸਯੀਤਿ ਯੋਜਨਾ. ਮਗ੍ਗਞ੍ਚਿਮਂ ਅਕੁਟਿਲਮਞ੍ਜਸਂ ਸਿਵਨ੍ਤਿ ਅਨ੍ਤਦ੍ਵਯਪਰਿਵਜ੍ਜਨੇਨ ਕੁਟਿਲਭਾਵਕਰਾਨਂ ਮਾਯਾਦੀਨਂ ਕਾਯਵਙ੍ਕਾਦੀਨਞ੍ਚ ਪਹਾਨੇਨ ਅਕੁਟਿਲਂ, ਤਤੋ ਏਵ ਅਞ੍ਜਸਂ, ਅਸਿਵਭਾਵਕਰਾਨਂ ਕਾਮਰਾਗਾਦੀਨਂ ਸਮੁਚ੍ਛਿਨ੍ਦਨੇਨ ਸਿਵਂ ਨਿਬ੍ਬਾਨਂ. ਮਗ੍ਗਨ੍ਤਿ ਨਿਬ੍ਬਾਨਤ੍ਥਿਕੇਹਿ ਮਗ੍ਗੀਯਤਿ, ਕਿਲੇਸੇ ਵਾ ਮਾਰੇਨ੍ਤੋ ਗਚ੍ਛਤੀਤਿ ‘‘ਮਗ੍ਗੋ’’ਤਿ ਲਦ੍ਧਨਾਮਂ ਇਦਂ ਤੁਮ੍ਹਾਕਞ੍ਚ ਮਮਞ੍ਚ ਪਚ੍ਚਕ੍ਖਭੂਤਂ ਦੁਕ੍ਖਨਿਰੋਧਗਾਮਿਨਿਪਟਿਪਦਾਸਙ੍ਖਾਤਂ ਅਰਿਯਸਚ੍ਚਞ੍ਚ ਮੇ ਅਦੇਸਯੀਤਿ ਯੋਜਨਾ.

੧੪੪. ਸੁਤ੍ਵਾਨਹਂ ਅਮਤਪਦਂ ਅਸਙ੍ਖਤਂ, ਤਥਾਗਤਸ੍ਸਨਧਿਵਰਸ੍ਸ ਸਾਸਨਨ੍ਤਿ ਏਤ੍ਥ ਅਯਂ ਸਙ੍ਖੇਪਤ੍ਥੋ – ਤਥਾ ਆਗਮਨਾਦਿਅਤ੍ਥੇਨ ਤਥਾਗਤਸ੍ਸ, ਸਦੇਵਕੇ ਲੋਕੇ ਅਗ੍ਗਭਾਵਤੋ ਅਨਧਿਵਰਸ੍ਸ, ਸਮ੍ਮਾਸਮ੍ਬੁਦ੍ਧਸ੍ਸ ਅਮਤਪਦਂ ਅਸਙ੍ਖਤਂ ਨਿਬ੍ਬਾਨਂ ਉਦ੍ਦਿਸ੍ਸ ਦੇਸਿਤਤ੍ਤਾ, ਅਮਤਸ੍ਸ ਵਾ ਨਿਬ੍ਬਾਨਸ੍ਸ ਪਟਿਪਜ੍ਜਨੁਪਾਯਤ੍ਤਾ ਕੇਨਚਿਪਿ ਅਸਙ੍ਖਰਣੀਯਤ੍ਤਾ ਚ ਅਮਤਪਦਂ ਅਸਙ੍ਖਤਂ ਸਾਸਨਂ ਸਦ੍ਧਮ੍ਮਂ ਅਹਂ ਸੁਤ੍ਵਾਨਾਤਿ. ਸੀਲੇਸ੍ਵਹਨ੍ਤਿ ਸੀਲੇਸੁ ਨਿਪ੍ਫਾਦੇਤਬ੍ਬੇਸੁ ਅਹਂ. ਪਰਮਸੁਸਂਵੁਤਾਤਿ ਅਤਿਵਿਯ ਸਮ੍ਮਦੇਵ ਸਂਵੁਤਾ. ਅਹੁਨ੍ਤਿ ਅਹੋਸਿਂ. ਧਮ੍ਮੇ ਠਿਤਾਤਿ ਪਟਿਪਤ੍ਤਿਧਮ੍ਮੇ ਪਤਿਟ੍ਠਿਤਾ.

੧੪੫. ਞਤ੍ਵਾਨਾਤਿ ਸਚ੍ਛਿਕਿਰਿਯਾਭਿਸਮਯਵਸੇਨ ਜਾਨਿਤ੍ਵਾ. ਤਤ੍ਥੇਵਾਤਿ ਤਸ੍ਮਿਂਯੇਵ ਖਣੇ, ਤਸ੍ਮਿਂਯੇਵ ਵਾ ਅਤ੍ਤਭਾਵੇ. ਸਮਥਸਮਾਧਿਮਾਫੁਸਿਨ੍ਤਿ ਪਚ੍ਚਨੀਕਧਮ੍ਮਾਨਂ ਸਮੁਚ੍ਛੇਦਵਸੇਨ ਸਮਨਤੋ ਵੂਪਸਮਨਤੋ ਪਰਮਤ੍ਥਸਮਥਭੂਤਂ ਲੋਕੁਤ੍ਤਰਸਮਾਧਿਂ ਆਫੁਸਿਂ ਅਧਿਗਚ੍ਛਿਂ. ਯਦਿਪਿ ਯਸ੍ਮਿਂ ਖਣੇ ਨਿਰੋਧਸ੍ਸ ਸਚ੍ਛਿਕਿਰਿਯਾਭਿਸਮਯੋ, ਤਸ੍ਮਿਂਯੇਵ ਖਣੇ ਮਗ੍ਗਸ੍ਸ ਭਾਵਨਾਭਿਸਮਯੋ, ਆਰਮ੍ਮਣਪਟਿਵੇਧਂ ਪਨ ਭਾਵਨਾਪਟਿਵੇਧਸ੍ਸੇਵ ਪੁਰਿਮਸਿਦ੍ਧਿਕਾਰਣਂ ਵਿਯ ਕਤ੍ਵਾ ਦਸ੍ਸੇਤੁਂ –

‘‘ਞਤ੍ਵਾਨਹਂ ਵਿਰਜਪਦਂ ਅਸਙ੍ਖਤਂ, ਤਥਾਗਤੇਨਨਧਿਵਰੇਨ ਦੇਸਿਤਂ’’.

ਤਤ੍ਥੇਵਹਂ ‘ਸਮਥਸਮਾਧਿਮਾਫੁਸਿ’ਨ੍ਤਿ ਵੁਤ੍ਤਂ ਯਥਾ ‘‘ਚਕ੍ਖੁਞ੍ਚ ਪਟਿਚ੍ਚ ਰੂਪੇ ਚ ਉਪ੍ਪਜ੍ਜਤਿ ਚਕ੍ਖੁਵਿਞ੍ਞਾਣ’’ਨ੍ਤਿ (ਮ. ਨਿ. ੧.੪੦੦; ੩.੪੨੧; ਸਂ. ਨਿ. ੪.੬੦). ਞਤ੍ਵਾਨਾਤਿ ਵਾ ਸਮਾਨਕਾਲਵਸੇਨ ਵੁਤ੍ਤਨ੍ਤਿ ਵੇਦਿਤਬ੍ਬਂ ਯਥਾ ‘‘ਨਿਹਨ੍ਤ੍ਵਾਨ ਤਮਂ ਸਬ੍ਬਂ, ਆਦਿਚ੍ਚੋ ਨਭਮੁਗ੍ਗਤੋ’’ਤਿ. ਸਾਯੇਵਾਤਿ ਯਾ ਲੋਕੁਤ੍ਤਰਸਮਾਧਿਫੁਸਨਾ ਲਦ੍ਧਾ, ਸਾਯੇਵ. ਪਰਮਨਿਯਾਮਤਾਤਿ ਪਰਮਾ ਉਤ੍ਤਮਾ ਮਗ੍ਗਨਿਯਾਮਤਾ.

੧੪੬. ਵਿਸੇਸਨਨ੍ਤਿ ਪੁਥੁਜ੍ਜਨੇਹਿ ਵਿਸੇਸਕਂ ਵਿਸਿਟ੍ਠਭਾਵਸਾਧਕਂ. ਏਕਂਸਿਕਾਤਿ ‘‘ਸਮ੍ਮਾਸਮ੍ਬੁਦ੍ਧੋ ਭਗਵਾ, ਸ੍ਵਾਕ੍ਖਾਤੋ ਧਮ੍ਮੋ, ਸੁਪ੍ਪਟਿਪਨ੍ਨੋ ਸਙ੍ਘੋ’’ਤਿ ਏਕਂਸਗਾਹਵਤੀ ਰਤਨਤ੍ਤਯੇ ਨਿਬ੍ਬਿਚਿਕਿਚ੍ਛਾ. ਅਭਿਸਮਯੇ ਵਿਸੇਸਿਯਾਤਿ ਸਚ੍ਚਪਟਿਵੇਧਵਸੇਨ ਵਿਸੇਸਂ ਪਤ੍ਵਾ. ‘‘ਵਿਸੇਸਿਨੀ’’ਤਿਪਿ ਪਠਨ੍ਤਿ, ਅਭਿਸਮਯਹੇਤੁ ਵਿਸੇਸਵਤੀਤਿ ਅਤ੍ਥੋ. ਅਸਂਸਯਾਤਿ ਸੋਲ਼ਸਵਤ੍ਥੁਕਾਯ ਅਟ੍ਠਵਤ੍ਥੁਕਾਯ ਚ ਵਿਚਿਕਿਚ੍ਛਾਯ ਪਹੀਨਤ੍ਤਾ ਅਪਗਤਸਂਸਯਾ. ‘‘ਅਸਂਸਿਯਾ’’ਤਿ ਕੇਚਿ ਪਠਨ੍ਤਿ. ਬਹੁਜਨਪੂਜਿਤਾਤਿ ਸੁਗਤੀਹਿ ਪਰੇਹਿ ਪਤ੍ਥਨੀਯਗੁਣਾਤਿ ਅਤ੍ਥੋ. ਖਿਡ੍ਡਾਰਤਿਨ੍ਤਿ ਖਿਡ੍ਡਾਭੂਤਂ ਰਤਿਂ, ਅਥ ਵਾ ਖਿਡ੍ਡਞ੍ਚ ਰਤਿਞ੍ਚ ਖਿਡ੍ਡਾਵਿਹਾਰਞ੍ਚ ਰਤਿਸੁਖਞ੍ਚ.

੧੪੭. ਅਮਤਦਸਮ੍ਹੀਤਿ ਅਮਤਦਸਾ ਨਿਬ੍ਬਾਨਦਸ੍ਸਾਵਿਨੀ ਅਮ੍ਹਿ. ਧਮ੍ਮਦ੍ਦਸਾਤਿ ਚਤੁਸਚ੍ਚਧਮ੍ਮਂ ਦਿਟ੍ਠਵਤੀ. ਸੋਤਾਪਨ੍ਨਾਤਿ ਅਰਿਯਮਗ੍ਗਸੋਤਂ ਆਦਿਤੋ ਪਤ੍ਤਾ. ਨ ਚ ਪਨ ਮਤ੍ਥਿ ਦੁਗ੍ਗਤੀਤਿ ਨ ਚ ਪਨ ਮੇ ਅਤ੍ਥਿ ਦੁਗ੍ਗਤਿ ਅਵਿਨਿਪਾਤਧਮ੍ਮਤ੍ਤਾ.

੧੪੮. ਪਾਸਾਦਿਕੇਤਿ ਪਸਾਦਾਵਹੇ. ਕੁਸਲਰਤੇਤਿ ਕੁਸਲੇ ਅਨਵਜ੍ਜਧਮ੍ਮੇ ਨਿਬ੍ਬਾਨੇ ਰਤੇ. ਭਿਕ੍ਖਵੋਤਿ ਭਿਕ੍ਖੂ ਨਮਸ੍ਸਿਤੁਂ ਉਪਾਗਮਿਨ੍ਤਿ ਯੋਜਨਾ. ਸਮਣਸਮਾਗਮਂ ਸਿਵਨ੍ਤਿ ਸਮਣਾਨਂ ਸਮਿਤਪਾਪਾਨਂ ਬੁਦ੍ਧਬੁਦ੍ਧਸਾਵਕਾਨਂ ਸਿਵਞ੍ਚ ਧਮ੍ਮਂ ਖੇਮਂ ਸਮਾਗਮਂ ਸਙ੍ਗਮਂ ਪਯਿਰੁਪਾਸਿਤੁਂ ਉਪਾਗਮਿਨ੍ਤਿ ਸਮ੍ਬਨ੍ਧੋ. ਸਿਰਿਮਤੋ ਧਮ੍ਮਰਾਜਿਨੋਤਿ ਭੁਮ੍ਮਤ੍ਥੇ ਸਾਮਿਵਚਨਂ. ਸਿਰਿਮਤਿ ਧਮ੍ਮਰਾਜਿਨੀਤਿ ਅਤ੍ਥੋ. ਏਵਮੇਵ ਚ ਕੇਚਿ ਪਠਨ੍ਤਿ.

੧੪੯. ਮੁਦਿਤਮਨਮ੍ਹੀਤਿ ਮੋਦਿਤਮਨਾ ਅਮ੍ਹਿ. ਪੀਣਿਤਾਤਿ ਤੁਟ੍ਠਾ, ਪੀਤਿਰਸਵਸੇਨ ਵਾ ਤਿਤ੍ਤਾ. ਨਰਵਰਦਮ੍ਮਸਾਰਥਿਨ੍ਤਿ ਨਰਵਰੋ ਚ ਸੋ ਅਗ੍ਗਪੁਗ੍ਗਲਤ੍ਤਾ, ਦਮ੍ਮਾਨਂ ਦਮੇਤਬ੍ਬਾਨਂ ਵੇਨੇਯ੍ਯਾਨਂ ਨਿਬ੍ਬਾਨਾਭਿਮੁਖਂ ਸਾਰਣਤੋ ਦਮ੍ਮਸਾਰਥਿ ਚਾਤਿ ਨਰਵਰਦਮ੍ਮਸਾਰਥਿ, ਤਂ. ਪਰਮਹਿਤਾਨੁਕਮ੍ਪਕਨ੍ਤਿ ਪਰਮੇਨ ਉਤ੍ਤਮੇਨ ਹਿਤੇਨ ਸਬ੍ਬਸਤ੍ਤਾਨਂ ਅਨੁਕਮ੍ਪਕਂ.

ਏਵਂ ਸਿਰਿਮਾ ਦੇਵਧੀਤਾ ਅਤ੍ਤਨੋ ਲਦ੍ਧਿਪਵੇਦਨਮੁਖੇਨ ਰਤਨਤ੍ਤਯੇ ਪਸਾਦਂ ਪਵੇਦੇਤ੍ਵਾ ਭਗਵਨ੍ਤਂ ਭਿਕ੍ਖੁਸਙ੍ਘਞ੍ਚ ਵਨ੍ਦਿਤ੍ਵਾ ਪਦਕ੍ਖਿਣਂ ਕਤ੍ਵਾ ਦੇਵਲੋਕਮੇਵ ਗਤਾ. ਭਗਵਾ ਤਮੇਵ ਓਤਿਣ੍ਣਵਤ੍ਥੁਂ ਅਟ੍ਠੁਪ੍ਪਤ੍ਤਿਂ ਕਤ੍ਵਾ ਧਮ੍ਮਂ ਦੇਸੇਸਿ, ਦੇਸਨਾਪਰਿਯੋਸਾਨੇ ਉਕ੍ਕਣ੍ਠਿਤਭਿਕ੍ਖੁ ਅਰਹਤ੍ਤਂ ਪਾਪੁਣਿ, ਸਮ੍ਪਤ੍ਤਪਰਿਸਾਯਪਿ ਸਾ ਧਮ੍ਮਦੇਸਨਾ ਸਾਤ੍ਥਿਕਾ ਜਾਤਾਤਿ.

ਸਿਰਿਮਾਵਿਮਾਨਵਣ੍ਣਨਾ ਨਿਟ੍ਠਿਤਾ.