੯. ਪਠਮਦਬ੍ਬਸੁਤ੍ਤਵਣ੍ਣਨਾ

੭੯. ਨਵਮੇ ਆਯਸ੍ਮਾਤਿ ਪਿਯਵਚਨਂ. ਦਬ੍ਬੋਤਿ ਤਸ੍ਸ ਥੇਰਸ੍ਸ ਨਾਮਂ. ਮਲ੍ਲਪੁਤ੍ਤੋਤਿ ਮਲ੍ਲਰਾਜਸ੍ਸ ਪੁਤ੍ਤੋ. ਸੋ ਹਿ ਆਯਸ੍ਮਾ ਪਦੁਮੁਤ੍ਤਰਸ੍ਸ ਭਗਵਤੋ ਪਾਦਮੂਲੇ ਕਤਾਭਿਨੀਹਾਰੋ ਕਪ੍ਪਸਤਸਹਸ੍ਸਂ ਉਪਚਿਤਪੁਞ੍ਞਸਞ੍ਚਯੋ ਅਮ੍ਹਾਕਂ ਭਗਵਤੋ ਕਾਲੇ ਮਲ੍ਲਰਾਜਸ੍ਸ ਦੇਵਿਕਾ ਕੁਚ੍ਛਿਯਂ ਨਿਬ੍ਬਤ੍ਤੋ ਕਤਾਧਿਕਾਰਤ੍ਤਾ ਜਾਤਿਯਾ ਸਤ੍ਤਵਸ੍ਸਿਕਕਾਲੇਯੇਵ ਮਾਤਾਪਿਤਰੋ ਉਪਸਙ੍ਕਮਿਤ੍ਵਾ ਪਬ੍ਬਜ੍ਜਂ ਯਾਚਿ. ਤੇ ਚ ‘‘ਪਬ੍ਬਜਿਤ੍ਵਾਪਿ ਆਚਾਰਂ ਤਾਵ ਸਿਕ੍ਖਤੁ, ਸਚੇ ਤਂ ਨਾਭਿਰਮਿਸ੍ਸਤਿ, ਇਧੇਵ ਆਗਮਿਸ੍ਸਤੀ’’ਤਿ ਅਨੁਜਾਨਿਂਸੁ. ਸੋ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਪਬ੍ਬਜ੍ਜਂ ਯਾਚਿ. ਸਤ੍ਥਾਪਿਸ੍ਸ ਉਪਨਿਸ੍ਸਯਸਮ੍ਪਤ੍ਤਿਂ ਓਲੋਕੇਤ੍ਵਾ ਪਬ੍ਬਜ੍ਜਂ ਅਨੁਜਾਨਿ. ਤਸ੍ਸ ਪਬ੍ਬਜ੍ਜਾਸਮਯੇ ਦਿਨ੍ਨਓਵਾਦੇਨ ਭਵਤ੍ਤਯਂ ਆਦਿਤ੍ਤਂ ਵਿਯ ਉਪਟ੍ਠਾਸਿ. ਸੋ ਵਿਪਸ੍ਸਨਂ ਪਟ੍ਠਪੇਤ੍ਵਾ ਖੁਰਗ੍ਗੇਯੇਵ ਅਰਹਤ੍ਤਂ ਪਾਪੁਣਿ. ਯਂਕਿਞ੍ਚਿ ਸਾਵਕੇਨ ਪਤ੍ਤਬ੍ਬਂ, ‘‘ਤਿਸ੍ਸੋ ਵਿਜ੍ਜਾ ਚਤਸ੍ਸੋ ਪਟਿਸਮ੍ਭਿਦਾ ਛਲ਼ਭਿਞ੍ਞਾ ਨਵ ਲੋਕੁਤ੍ਤਰਧਮ੍ਮਾ’’ਤਿ ਏਵਮਾਦਿਕਂ ਸਬ੍ਬਂ ਅਧਿਗਨ੍ਤ੍ਵਾ ਅਸੀਤਿਯਾ ਮਹਾਸਾਵਕੇਸੁ ਅਬ੍ਭਨ੍ਤਰੋ ਅਹੋਸਿ. ਵੁਤ੍ਤਞ੍ਹੇਤਂ ਤੇਨ ਆਯਸ੍ਮਤਾ –

‘‘ਮਯਾ ਖੋ ਜਾਤਿਯਾ ਸਤ੍ਤਵਸ੍ਸੇਨ ਅਰਹਤ੍ਤਂ ਸਚ੍ਛਿਕਤਂ, ਯਂਕਿਞ੍ਚਿ ਸਾਵਕੇਨ ਪਤ੍ਤਬ੍ਬਂ, ਸਬ੍ਬਂ ਤਂ ਅਨੁਪ੍ਪਤ੍ਤਂ ਮਯਾ’’ਤਿਆਦਿ (ਪਾਰਾ. ੩੮੦).

ਯੇਨ ਭਗਵਾ ਤੇਨੁਪਸਙ੍ਕਮੀਤਿ ਸੋ ਕਿਰਾਯਸ੍ਮਾ ਏਕਦਿਵਸਂ ਰਾਜਗਹੇ ਪਿਣ੍ਡਾਯ ਚਰਿਤ੍ਵਾ ਪਚ੍ਛਾਭਤ੍ਤਂ ਪਿਣ੍ਡਪਾਤਪ੍ਪਟਿਕ੍ਕਨ੍ਤੋ ਭਗਵਤੋ ਵਤ੍ਤਂ ਦਸ੍ਸੇਤ੍ਵਾ ਦਿਵਾਟ੍ਠਾਨਂ ਗਨ੍ਤ੍ਵਾ ਉਦਕਕੁਮ੍ਭਤੋ ਉਦਕਂ ਗਹੇਤ੍ਵਾ ਪਾਦੇ ਪਕ੍ਖਾਲੇਤ੍ਵਾ ਗਤ੍ਤਾਨਿ ਸੀਤਿਂ ਕਤ੍ਵਾ ਚਮ੍ਮਕ੍ਖਣ੍ਡਂ ਪਞ੍ਞਾਪੇਤ੍ਵਾ ਨਿਸਿਨ੍ਨੋ ਕਾਲਪਰਿਚ੍ਛੇਦਂ ਕਤ੍ਵਾ ਸਮਾਪਤ੍ਤਿਂ ਸਮਾਪਜ੍ਜਿ. ਅਥਾਯਸ੍ਮਾ ਯਥਾਕਾਲਪਰਿਚ੍ਛੇਦਂ ਸਮਾਪਤ੍ਤਿਤੋ ਵੁਟ੍ਠਹਿਤ੍ਵਾ ਅਤ੍ਤਨੋ ਆਯੁਸਙ੍ਖਾਰੇ ਓਲੋਕੇਸਿ. ਤਸ੍ਸ ਤੇ ਪਰਿਕ੍ਖੀਣਾ ਕਤਿਪਯਮੁਹੁਤ੍ਤਿਕਾ ਉਪਟ੍ਠਹਿਂਸੁ. ਸੋ ਚਿਨ੍ਤੇਸਿ – ‘‘ਨ ਖੋ ਮੇਤਂ ਪਤਿਰੂਪਂ, ਯਮਹਂ ਸਤ੍ਥੁ ਅਨਾਰੋਚੇਤ੍ਵਾ ਸਬ੍ਰਹ੍ਮਚਾਰੀਹਿ ਚ ਅਵਿਦਿਤੋ ਇਧ ਯਥਾਨਿਸਿਨ੍ਨੋਵ ਪਰਿਨਿਬ੍ਬਾਯਿਸ੍ਸਾਮਿ. ਯਂਨੂਨਾਹਂ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਪਰਿਨਿਬ੍ਬਾਨਂ ਅਨੁਜਾਨਾਪੇਤ੍ਵਾ ਸਤ੍ਥੁ ਵਤ੍ਤਂ ਦਸ੍ਸੇਤ੍ਵਾ ਸਾਸਨਸ੍ਸ ਨਿਯ੍ਯਾਨਿਕਭਾਵਦਸ੍ਸਨਤ੍ਥਂ ਮਯ੍ਹਂ ਇਦ੍ਧਾਨੁਭਾਵਂ ਵਿਭਾਵੇਨ੍ਤੋ ਆਕਾਸੇ ਨਿਸੀਦਿਤ੍ਵਾ ਤੇਜੋਧਾਤੁਂ ਸਮਾਪਜ੍ਜਿਤ੍ਵਾ ਪਰਿਨਿਬ੍ਬਾਯੇਯ੍ਯਂ. ਏਵਂ ਸਨ੍ਤੇ ਯੇ ਮਯਿ ਅਸ੍ਸਦ੍ਧਾ ਅਪ੍ਪਸਨ੍ਨਾ, ਤੇਸਮ੍ਪਿ ਪਸਾਦੋ ਉਪ੍ਪਜ੍ਜਿਸ੍ਸਤਿ, ਤਦਸ੍ਸ ਤੇਸਂ ਦੀਘਰਤ੍ਤਂ ਹਿਤਾਯ ਸੁਖਾਯਾ’’ਤਿ. ਏਵਞ੍ਚ ਸੋ ਆਯਸ੍ਮਾ ਚਿਨ੍ਤੇਤ੍ਵਾ ਭਗਵਨ੍ਤਂ ਉਪਸਙ੍ਕਮਿਤ੍ਵਾ ਸਬ੍ਬਂ ਤਂ ਤਥੇਵ ਅਕਾਸਿ. ਤੇਨ ਵੁਤ੍ਤਂ – ‘‘ਅਥ ਖੋ ਆਯਸ੍ਮਾ ਦਬ੍ਬੋ ਮਲ੍ਲਪੁਤ੍ਤੋ ਯੇਨ ਭਗਵਾ ਤੇਨੁਪਸਙ੍ਕਮੀ’’ਤਿਆਦਿ.

ਤਤ੍ਥ ਪਰਿਨਿਬ੍ਬਾਨਕਾਲੋ ਮੇਤਿ ‘‘ਭਗਵਾ ਮਯ੍ਹਂ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬਾਨਕਾਲੋ ਉਪਟ੍ਠਿਤੋ, ਤਮਹਂ ਭਗਵਤੋ ਆਰੋਚੇਤ੍ਵਾ ਪਰਿਨਿਬ੍ਬਾਯਿਤੁਕਾਮੋਮ੍ਹੀ’’ਤਿ ਦਸ੍ਸੇਤਿ. ਕੇਚਿ ਪਨਾਹੁ ‘‘ਨ ਤਾਵ ਥੇਰੋ ਜਿਣ੍ਣੋ, ਨ ਚ ਗਿਲਾਨੋ, ਪਰਿਨਿਬ੍ਬਾਨਾਯ ਚ ਸਤ੍ਥਾਰਂ ਆਪੁਚ੍ਛਤਿ, ਕਿਂ ਤਤ੍ਥ ਕਾਰਣਂ? ‘ਮੇਤ੍ਤਿਯਭੂਮਜਕਾ ਭਿਕ੍ਖੂ ਪੁਬ੍ਬੇ ਮਂ ਅਮੂਲਕੇਨ ਪਾਰਾਜਿਕੇਨ ਅਨੁਦ੍ਧਂਸੇਸੁਂ, ਤਸ੍ਮਿਂ ਅਧਿਕਰਣੇ ਵੂਪਸਨ੍ਤੇਪਿ ਅਕ੍ਕੋਸਨ੍ਤਿਯੇਵ. ਤੇਸਂ ਸਦ੍ਦਹਿਤ੍ਵਾ ਅਞ੍ਞੇਪਿ ਪੁਥੁਜ੍ਜਨਾ ਮਯਿ ਅਗਾਰਵਂ ਪਰਿਭਵਞ੍ਚ ਕਰੋਨ੍ਤਿ. ਇਮਞ੍ਚ ਦੁਕ੍ਖਭਾਰਂ ਨਿਰਤ੍ਥਕਂ ਵਹਿਤ੍ਵਾ ਕਿਂ ਪਯੋਜਨਂ, ਤਸ੍ਮਾਹਂ ਇਦਾਨੇਵ ਪਰਿਨਿਬ੍ਬਾਯਿਸ੍ਸਾਮੀ’ਤਿ ਸਨ੍ਨਿਟ੍ਠਾਨਂ ਕਤ੍ਵਾ ਸਤ੍ਥਾਰਂ ਆਪੁਚ੍ਛੀ’’ਤਿ. ਤਂ ਅਕਾਰਣਂ. ਨ ਹਿ ਖੀਣਾਸਵਾ ਅਪਰਿਕ੍ਖੀਣੇ ਆਯੁਸਙ੍ਖਾਰੇ ਪਰੇਸਂ ਉਪਵਾਦਾਦਿਭਯੇਨ ਪਰਿਨਿਬ੍ਬਾਨਾਯ ਚੇਤੇਨ੍ਤਿ ਘਟਯਨ੍ਤਿ ਵਾਯਮਨ੍ਤਿ, ਨ ਚ ਪਰੇਸਂ ਪਸਂਸਾਦਿਹੇਤੁ ਚਿਰਂ ਤਿਟ੍ਠਨ੍ਤਿ, ਅਥ ਖੋ ਸਰਸੇਨੇਵ ਅਤ੍ਤਨੋ ਆਯੁਸਙ੍ਖਾਰਸ੍ਸ ਪਰਿਕ੍ਖਯਂ ਆਗਮੇਨ੍ਤਿ. ਯਥਾਹ –

‘‘ਨਾਭਿਕਙ੍ਖਾਮਿ ਮਰਣਂ, ਨਾਭਿਕਙ੍ਖਾਮਿ ਜੀਵਿਤਂ;

ਕਾਲਞ੍ਚ ਪਟਿਕਙ੍ਖਾਮਿ, ਨਿਬ੍ਬਿਸਂ ਭਤਕੋ ਯਥਾ’’ਤਿ. (ਥੇਰਗਾ. ੧੯੬, ੬੦੬; ਮਿ. ਪ. ੨.੨.੪) –

ਭਗਵਾਪਿਸ੍ਸ ਆਯੁਸਙ੍ਖਾਰਂ ਓਲੋਕੇਤ੍ਵਾ ਪਰਿਕ੍ਖੀਣਭਾਵਂ ਞਤ੍ਵਾ ‘‘ਯਸ੍ਸਦਾਨਿ ਤ੍ਵਂ, ਦਬ੍ਬ, ਕਾਲਂ ਮਞ੍ਞਸੀ’’ਤਿ ਆਹ.

ਵੇਹਾਸਂ ਅਬ੍ਭੁਗ੍ਗਨ੍ਤ੍ਵਾਤਿ ਆਕਾਸਂ ਅਭਿਉਗ੍ਗਨ੍ਤ੍ਵਾ, ਵੇਹਾਸਂ ਗਨ੍ਤ੍ਵਾਤਿ ਅਤ੍ਥੋ. ਅਭਿਸਦ੍ਦਯੋਗੇਨ ਹਿ ਇਦਂ ਉਪਯੋਗਵਚਨਂ, ਅਤ੍ਥੋ ਪਨ ਭੁਮ੍ਮਵਸੇਨ ਵੇਦਿਤਬ੍ਬੋ. ਵੇਹਾਸਂ ਅਬ੍ਭੁਗ੍ਗਨ੍ਤ੍ਵਾ ਕਿਂ ਅਕਾਸੀਤਿ ਆਹ – ‘‘ਆਕਾਸੇ ਅਨ੍ਤਲਿਕ੍ਖੇ ਪਲ੍ਲਙ੍ਕੇਨ ਨਿਸੀਦਿਤ੍ਵਾ’’ਤਿਆਦਿ. ਤਤ੍ਥ ਤੇਜੋਧਾਤੁਂ ਸਮਾਪਜ੍ਜਿਤ੍ਵਾਤਿ ਤੇਜੋਕਸਿਣਚਤੁਤ੍ਥਜ੍ਝਾਨਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ. ਥੇਰੋ ਹਿ ਤਦਾ ਭਗਵਨ੍ਤਂ ਵਨ੍ਦਿਤ੍ਵਾ ਤਿਕ੍ਖਤ੍ਤੁਂ ਪਦਕ੍ਖਿਣਂ ਕਤ੍ਵਾ ਏਕਮਨ੍ਤਂ ਠਿਤੋ ‘‘ਭਗਵਾ ਕਪ੍ਪਸਤਸਹਸ੍ਸਂ ਤੁਮ੍ਹੇਹਿ ਸਦ੍ਧਿਂ ਤਤ੍ਥ ਤਤ੍ਥ ਵਸਨ੍ਤੋ ਪੁਞ੍ਞਾਨਿ ਕਰੋਨ੍ਤੋ ਇਮਮੇਵਤ੍ਥਂ ਸਨ੍ਧਾਯ ਅਕਾਸਿਂ, ਸ੍ਵਾਯਮਤ੍ਥੋ ਅਜ੍ਜ ਮਤ੍ਥਕਂ ਪਤ੍ਤੋ, ਇਦਂ ਪਚ੍ਛਿਮਦਸ੍ਸਨ’’ਨ੍ਤਿ ਆਹ. ਯੇ ਤਤ੍ਥ ਪੁਥੁਜ੍ਜਨਭਿਕ੍ਖੂ ਸੋਤਾਪਨ੍ਨਸਕਦਾਗਾਮਿਨੋ ਚ, ਤੇਸੁ ਏਕਚ੍ਚਾਨਂ ਮਹਨ੍ਤਂ ਕਾਰੁਞ੍ਞਂ ਅਹੋਸਿ, ਏਕਚ੍ਚੇ ਆਰੋਦਨਪ੍ਪਤ੍ਤਾ ਅਹੇਸੁਂ. ਅਥਸ੍ਸ ਭਗਵਾ ਚਿਤ੍ਤਾਚਾਰਂ ਞਤ੍ਵਾ ‘‘ਤੇਨ ਹਿ, ਦਬ੍ਬ, ਮਯ੍ਹਂ ਭਿਕ੍ਖੁਸਙ੍ਘਸ੍ਸ ਚ ਇਦ੍ਧਿਪਾਟਿਹਾਰਿਯਂ ਦਸ੍ਸੇਹੀ’’ਤਿ ਆਹ. ਤਾਵਦੇਵ ਸਬ੍ਬੋ ਭਿਕ੍ਖੁਸਙ੍ਘੋ ਸਨ੍ਨਿਪਤਿ. ਅਥਾਯਸ੍ਮਾ ਦਬ੍ਬੋ ‘‘ਏਕੋਪਿ ਹੁਤ੍ਵਾ ਬਹੁਧਾ ਹੋਤੀ’’ਤਿਆਦਿਨਾ (ਪਟਿ. ਮ. ੧.੧੦੨; ਦੀ. ਨਿ. ੧.੪੮੪) ਨਯੇਨ ਆਗਤਾਨਿ ਸਾਵਕਸਾਧਾਰਣਾਨਿ ਸਬ੍ਬਾਨਿ ਪਾਟਿਹਾਰਿਯਾਨਿ ਦਸ੍ਸੇਤ੍ਵਾ ਪੁਨ ਚ ਭਗਵਨ੍ਤਂ ਵਨ੍ਦਿਤ੍ਵਾ ਆਕਾਸਂ ਅਬ੍ਭੁਗ੍ਗਨ੍ਤ੍ਵਾ ਆਕਾਸੇ ਪਥਵਿਂ ਨਿਮ੍ਮਿਨਿਤ੍ਵਾ ਤਤ੍ਥ ਪਲ੍ਲਙ੍ਕੇਨ ਨਿਸਿਨ੍ਨੋ ਤੇਜੋਕਸਿਣਸਮਾਪਤ੍ਤਿਯਾ ਪਰਿਕਮ੍ਮਂ ਕਤ੍ਵਾ ਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਵੁਟ੍ਠਾਯ ਸਰੀਰਂ ਆਵਜ੍ਜਿਤ੍ਵਾ ਪੁਨ ਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਸਰੀਰਝਾਪਨਤੇਜੋਧਾਤੁਂ ਅਧਿਟ੍ਠਹਿਤ੍ਵਾ ਪਰਿਨਿਬ੍ਬਾਯਿ. ਸਹ ਅਧਿਟ੍ਠਾਨੇਨ ਸਬ੍ਬੋ ਕਾਯੋ ਅਗ੍ਗਿਨਾ ਆਦਿਤ੍ਤੋ ਅਹੋਸਿ. ਖਣੇਨੇਵ ਚ ਸੋ ਅਗ੍ਗਿ ਕਪ੍ਪਵੁਟ੍ਠਾਨਗ੍ਗਿ ਵਿਯ ਅਣੁਮਤ੍ਤਮ੍ਪਿ ਸਙ੍ਖਾਰਗਤਂ ਮਸਿਮਤ੍ਤਮ੍ਪਿ ਤਤ੍ਥ ਕਿਞ੍ਚਿ ਅਨਵਸੇਸੇਨ੍ਤੋ ਅਧਿਟ੍ਠਾਨਬਲੇਨ ਝਾਪੇਤ੍ਵਾ ਨਿਬ੍ਬਾਯਿ. ਤੇਨ ਵੁਤ੍ਤਂ – ‘‘ਅਥ ਖੋ ਆਯਸ੍ਮਾ ਦਬ੍ਬੋ ਮਲ੍ਲਪੁਤ੍ਤੋ’’ਤਿਆਦਿ. ਤਤ੍ਥ ਵੁਟ੍ਠਹਿਤ੍ਵਾ ਪਰਿਨਿਬ੍ਬਾਯੀਤਿ ਇਦ੍ਧਿਚਿਤ੍ਤਤੋ ਵੁਟ੍ਠਹਿਤ੍ਵਾ ਭਵਙ੍ਗਚਿਤ੍ਤੇਨ ਪਰਿਨਿਬ੍ਬਾਯਿ.

ਝਾਯਮਾਨਸ੍ਸਾਤਿ ਜਾਲਿਯਮਾਨਸ੍ਸ. ਡਯ੍ਹਮਾਨਸ੍ਸਾਤਿ ਤਸ੍ਸੇਵ ਵੇਵਚਨਂ. ਅਥ ਵਾ ਝਾਯਮਾਨਸ੍ਸਾਤਿ ਜਾਲਾਪਵਤ੍ਤਿਕ੍ਖਣਂ ਸਨ੍ਧਾਯ ਵੁਤ੍ਤਂ, ਡਯ੍ਹਮਾਨਸ੍ਸਾਤਿ ਵੀਤਚ੍ਚਿਤਙ੍ਗਾਰਕ੍ਖਣਂ. ਛਾਰਿਕਾਤਿ ਭਸ੍ਮਂ. ਮਸੀਤਿ ਕਜ੍ਜਲਂ. ਨ ਪਞ੍ਞਾਯਿਤ੍ਥਾਤਿ ਨ ਪਸ੍ਸਿਤ੍ਥ, ਅਧਿਟ੍ਠਾਨਬਲੇਨ ਸਬ੍ਬਂ ਖਣੇਨੇਵ ਅਨ੍ਤਰਧਾਯਿਤ੍ਥਾਤਿ ਅਤ੍ਥੋ. ਕਸ੍ਮਾ ਪਨ ਥੇਰੋ ਉਤ੍ਤਰਿਮਨੁਸ੍ਸਧਮ੍ਮਂ ਇਦ੍ਧਿਪਾਟਿਹਾਰਿਯਂ ਦਸ੍ਸੇਸਿ, ਨਨੁ ਭਗਵਤਾ ਇਦ੍ਧਿਪਾਟਿਹਾਰਿਯਕਰਣਂ ਪਟਿਕ੍ਖਿਤ੍ਤਨ੍ਤਿ? ਨ ਚੋਦੇਤਬ੍ਬਮੇਤਂ ਗਿਹੀਨਂ ਸਮ੍ਮੁਖਾ ਪਾਟਿਹਾਰਿਯਕਰਣਸ੍ਸ ਪਟਿਕ੍ਖਿਤ੍ਤਤ੍ਤਾ. ਤਞ੍ਚ ਖੋ ਵਿਕੁਬ੍ਬਨਵਸੇਨ, ਨ ਪਨੇਵਂ ਅਧਿਟ੍ਠਾਨਵਸੇਨ. ਅਯਂ ਪਨਾਯਸ੍ਮਾ ਧਮ੍ਮਸਾਮਿਨਾ ਆਣਤ੍ਤੋਵ ਪਾਟਿਹਾਰਿਯਂ ਦਸ੍ਸੇਸਿ.

ਏਤਮਤ੍ਥਂ ਵਿਦਿਤ੍ਵਾਤਿ ਏਤਂ ਆਯਸ੍ਮਤੋ ਦਬ੍ਬਸ੍ਸ ਮਲ੍ਲਪੁਤ੍ਤਸ੍ਸ ਅਨੁਪਾਦਾਪਰਿਨਿਬ੍ਬਾਨਂ ਸਬ੍ਬਾਕਾਰਤੋ ਵਿਦਿਤ੍ਵਾ ਤਦਤ੍ਥਪਰਿਦੀਪਨਂ ਇਮਂ ਉਦਾਨਂ ਉਦਾਨੇਸਿ.

ਤਤ੍ਥ ਅਭੇਦਿ ਕਾਯੋਤਿ ਸਬ੍ਬੋ ਭੂਤੁਪਾਦਾਯਪਭੇਦੋ ਚਤੁਸਨ੍ਤਤਿਰੂਪਕਾਯੋ ਭਿਜ੍ਜਿ, ਅਨਵਸੇਸਤੋ ਡਯ੍ਹਿ, ਅਨ੍ਤਰਧਾਯਿ, ਅਨੁਪ੍ਪਤ੍ਤਿਧਮ੍ਮਤਂ ਆਪਜ੍ਜਿ. ਨਿਰੋਧਿ ਸਞ੍ਞਾਤਿ ਰੂਪਾਯਤਨਾਦਿਗੋਚਰਤਾਯ ਰੂਪਸਞ੍ਞਾਦਿਭੇਦਾ ਸਬ੍ਬਾਪਿ ਸਞ੍ਞਾ ਅਪ੍ਪਟਿਸਨ੍ਧਿਕੇਨ ਨਿਰੋਧੇਨ ਨਿਰੁਜ੍ਝਿ. ਵੇਦਨਾ ਸੀਤਿਭਵਿਂਸੁ ਸਬ੍ਬਾਤਿ ਵਿਪਾਕਵੇਦਨਾ ਕਿਰਿਯਵੇਦਨਾਤਿ ਸਬ੍ਬਾਪਿ ਵੇਦਨਾ ਅਪ੍ਪਟਿਸਨ੍ਧਿਕਨਿਰੋਧੇਨ ਨਿਰੁਦ੍ਧਤ੍ਤਾ ਅਣੁਮਤ੍ਤਮ੍ਪਿ ਵੇਦਨਾਦਰਥਸ੍ਸ ਅਭਾਵਤੋ ਸੀਤਿਭੂਤਾ ਅਹੇਸੁਂ, ਕੁਸਲਾਕੁਸਲਵੇਦਨਾ ਪਨ ਅਰਹਤ੍ਤਫਲਕ੍ਖਣੇਯੇਵ ਨਿਰੋਧਂ ਗਤਾ. ‘‘ਸੀਤਿਰਹਿਂਸੂ’’ਤਿਪਿ ਪਠਨ੍ਤਿ, ਸਨ੍ਤਾ ਨਿਰੁਦ੍ਧਾ ਅਹੇਸੁਨ੍ਤਿ ਅਤ੍ਥੋ. ਵੂਪਸਮਿਂਸੁ ਸਙ੍ਖਾਰਾਤਿ ਵਿਪਾਕਕਿਰਿਯਪ੍ਪਭੇਦਾ ਸਬ੍ਬੇਪਿ ਫਸ੍ਸਾਦਯੋ ਸਙ੍ਖਾਰਕ੍ਖਨ੍ਧਧਮ੍ਮਾ ਅਪ੍ਪਟਿਸਨ੍ਧਿਕਨਿਰੋਧੇਨੇਵ ਨਿਰੁਦ੍ਧਤ੍ਤਾ ਵਿਸੇਸੇਨ ਉਪਸਮਿਂਸੁ. ਵਿਞ੍ਞਾਣਂ ਅਤ੍ਥਮਾਗਮਾਤਿ ਵਿਞ੍ਞਾਣਮ੍ਪਿ ਵਿਪਾਕਕਿਰਿਯਪ੍ਪਭੇਦਂ ਸਬ੍ਬਂ ਅਪ੍ਪਟਿਸਨ੍ਧਿਕਨਿਰੋਧੇਨੇਵ ਅਤ੍ਥਂ ਵਿਨਾਸਂ ਉਪਚ੍ਛੇਦਂ ਅਗਮਾ ਅਗਚ੍ਛਿ.

ਇਤਿ ਭਗਵਾ ਆਯਸ੍ਮਤੋ ਦਬ੍ਬਸ੍ਸ ਮਲ੍ਲਪੁਤ੍ਤਸ੍ਸ ਪਞ੍ਚਨ੍ਨਮ੍ਪਿ ਖਨ੍ਧਾਨਂ ਪੁਬ੍ਬੇਯੇਵ ਕਿਲੇਸਾਭਿਸਙ੍ਖਾਰੁਪਾਦਾਨਸ੍ਸ ਅਨਵਸੇਸਤੋ ਨਿਰੁਦ੍ਧਤ੍ਤਾ ਅਨੁਪਾਦਾਨੋ ਵਿਯ ਜਾਤਵੇਦੋ ਅਪ੍ਪਟਿਸਨ੍ਧਿਕਨਿਰੋਧੇਨ ਨਿਰੁਦ੍ਧਭਾਵਂ ਨਿਸ੍ਸਾਯ ਪੀਤਿਵੇਗਵਿਸ੍ਸਟ੍ਠਂ ਉਦਾਨਂ ਉਦਾਨੇਸੀਤਿ.

ਨਵਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.