੮. ਪਾਟਲਿਗਾਮਿਯਵਗ੍ਗੋ

੧. ਪਠਮਨਿਬ੍ਬਾਨਪਟਿਸਂਯੁਤ੍ਤਸੁਤ੍ਤਵਣ੍ਣਨਾ

੭੧. ਪਾਟਲਿਗਾਮਿਯਵਗ੍ਗਸ੍ਸ ਪਠਮੇ ਨਿਬ੍ਬਾਨਪਟਿਸਂਯੁਤ੍ਤਾਯਾਤਿ ਅਮਤਧਾਤੁਸਨ੍ਨਿਸ੍ਸਿਤਾਯ ਅਸਙ੍ਖਤਧਾਤੁਯਾ ਪਵੇਦਨਵਸੇਨ ਪਵਤ੍ਤਾਯ. ਧਮ੍ਮਿਯਾ ਕਥਾਯਾਤਿ ਧਮ੍ਮਦੇਸਨਾਯ. ਸਨ੍ਦਸ੍ਸੇਤੀਤਿ ਸਭਾਵਸਰਸਲਕ੍ਖਣਤੋ ਨਿਬ੍ਬਾਨਂ ਦਸ੍ਸੇਤਿ. ਸਮਾਦਪੇਤੀਤਿ ਤਮੇਵ ਅਤ੍ਥਂ ਤੇ ਭਿਕ੍ਖੂ ਗਣ੍ਹਾਪੇਤਿ. ਸਮੁਤ੍ਤੇਜੇਤੀਤਿ ਤਦਤ੍ਥਗਹਣੇ ਉਸ੍ਸਾਹਂ ਜਨੇਨ੍ਤੋ ਤੇਜੇਤਿ ਜੋਤੇਤਿ. ਸਮ੍ਪਹਂਸੇਤੀਤਿ ਨਿਬ੍ਬਾਨਗੁਣੇਹਿ ਸਮ੍ਮਦੇਵ ਸਬ੍ਬਪ੍ਪਕਾਰੇਹਿ ਤੋਸੇਤਿ.

ਅਥ ਵਾ ਸਨ੍ਦਸ੍ਸੇਤੀਤਿ ‘‘ਸੋ ਸਬ੍ਬਸਙ੍ਖਾਰਸਮਥੋ ਸਬ੍ਬੂਪਧਿਪਟਿਨਿਸ੍ਸਗ੍ਗਾ ਤਣ੍ਹਕ੍ਖਯੋ ਵਿਰਾਗੋ ਨਿਰੋਧੋ’’ਤਿਆਦਿਨਾ (ਮ. ਨਿ. ੧.੨੮੧; ੨.੩੩੭; ਮਹਾਵ. ੮) ਨਯੇਨੇਵ ਸਬ੍ਬਥਾ ਤੇਨ ਤੇਨ ਪਰਿਯਾਯੇਨ ਤੇਸਂ ਤੇਸਂ ਅਜ੍ਝਾਸਯਾਨੁਰੂਪਂ ਸਮ੍ਮਾ ਦਸ੍ਸੇਤਿ. ਸਮਾਦਪੇਤੀਤਿ ‘‘ਇਮਿਨਾ ਅਰਿਯਮਗ੍ਗੇਨ ਤਂ ਅਧਿਗਨ੍ਤਬ੍ਬ’’ਨ੍ਤਿ ਅਧਿਗਮਪਟਿਪਦਾਯ ਸਦ੍ਧਿਂ ਤਤ੍ਥ ਭਿਕ੍ਖੂ ਨਿਨ੍ਨਪੋਣਪਬ੍ਭਾਰੇ ਕਰੋਨ੍ਤੋ ਸਮ੍ਮਾ ਆਦਪੇਤਿ ਗਣ੍ਹਾਪੇਤਿ. ਸਮੁਤ੍ਤੇਜੇਤੀਤਿ ਏਤਂ ਦੁਕ੍ਕਰਂ ਦੁਰਭਿਸਮ੍ਭਵਨ੍ਤਿ ‘‘ਮਾ ਸਮ੍ਮਾਪਟਿਪਤ੍ਤਿਯਂ ਪਮਾਦਂ ਅਨ੍ਤਰਾਵੋਸਾਨਂ ਆਪਜ੍ਜਥ, ਉਪਨਿਸ੍ਸਯਸਮ੍ਪਨ੍ਨਸ੍ਸ ਵੀਰਿਯਵਤੋ ਨਯਿਦਂ ਦੁਕ੍ਕਰਂ, ਤਸ੍ਮਾ ਸੀਲਵਿਸੁਦ੍ਧਿਆਦਿਵਿਸੁਦ੍ਧਿਪਟਿਪਦਾਯ ਉਟ੍ਠਹਥ ਘਟਯਥ ਵਾਯਮੇਯ੍ਯਾਥਾ’’ਤਿ ਨਿਬ੍ਬਾਨਾਧਿਗਮਾਯ ਉਸ੍ਸਾਹੇਤਿ, ਤਤ੍ਥ ਵਾ ਚਿਤ੍ਤਂ ਵੋਦਪੇਤਿ. ਸਮ੍ਪਹਂਸੇਤੀਤਿ ‘‘ਮਦਨਿਮ੍ਮਦਨੋ ਪਿਪਾਸਵਿਨਯੋ ਆਲਯਸਮੁਗ੍ਘਾਤੋ’’ਤਿ (ਅ. ਨਿ. ੪.੩੪; ਇਤਿਵੁ. ੯੦), ਰਾਗਕ੍ਖਯੋ ਦੋਸਕ੍ਖਯੋ ਮੋਹਕ੍ਖਯੋਤਿ (ਸਂ. ਨਿ. ੪.੩੬੭; ਇਤਿਵੁ. ੪੪), ਅਸਙ੍ਖਤਨ੍ਤਿ (ਸਂ. ਨਿ. ੪.੩੬੭), ਅਮਤਞ੍ਚ ਸਨ੍ਤਨ੍ਤਿਆਦਿਨਾ ਚ ਅਨੇਕਪਰਿਯਾਯੇਨ (ਸਂ. ਨਿ. ੪.੪੦੯) ਨਿਬ੍ਬਾਨਾਨਿਸਂਸਪ੍ਪਕਾਸਨੇਨ ਤੇਸਂ ਭਿਕ੍ਖੂਨਂ ਚਿਤ੍ਤਂ ਤੋਸੇਨ੍ਤੋ ਹਾਸੇਨ੍ਤੋ ਸਮ੍ਪਹਂਸੇਤਿ ਸਮਸ੍ਸਾਸੇਤਿ.

ਤੇਧਾਤਿ ਤੇ ਇਧ. ਅਟ੍ਠਿਂ ਕਤ੍ਵਾਤਿ ‘‘ਅਤ੍ਥਿ ਕਿਞ੍ਚਿ ਅਯਂ ਨੋ ਅਤ੍ਥੋ ਅਧਿਗਨ੍ਤਬ੍ਬੋ’’ਤਿ ਏਵਂ ਸਲ੍ਲਕ੍ਖੇਤ੍ਵਾ ਤਾਯ ਦੇਸਨਾਯ ਅਤ੍ਥਿਕਾ ਹੁਤ੍ਵਾ. ਮਨਸਿ ਕਤ੍ਵਾਤਿ ਚਿਤ੍ਤੇ ਠਪੇਤ੍ਵਾ ਅਨਞ੍ਞਵਿਹਿਤਾ ਤਂ ਦੇਸਨਂ ਅਤ੍ਤਨੋ ਚਿਤ੍ਤਗਤਮੇਵ ਕਤ੍ਵਾ. ਸਬ੍ਬਂ ਚੇਤਸੋ ਸਮਨ੍ਨਾਹਰਿਤ੍ਵਾਤਿ ਸਬ੍ਬੇਨ ਕਾਰਕਚਿਤ੍ਤੇਨ ਆਦਿਤੋ ਪਟ੍ਠਾਯ ਯਾਵ ਪਰਿਯੋਸਾਨਾ ਦੇਸਨਂ ਆਵਜ੍ਜੇਤ੍ਵਾ, ਤਗ੍ਗਤਮੇਵ ਆਭੋਗਂ ਕਤ੍ਵਾਤਿ ਅਤ੍ਥੋ. ਅਥ ਵਾ ਸਬ੍ਬਂ ਚੇਤਸੋ ਸਮਨ੍ਨਾਹਰਿਤ੍ਵਾਤਿ ਸਬ੍ਬਸ੍ਮਾ ਚਿਤ੍ਤਤੋ ਦੇਸਨਂ ਸਮ੍ਮਾ ਅਨੁ ਅਨੁ ਆਹਰਿਤ੍ਵਾ. ਇਦਂ ਵੁਤ੍ਤਂ ਹੋਤਿ – ਦੇਸੇਨ੍ਤਸ੍ਸ ਯੇਹਿ ਚਿਤ੍ਤੇਹਿ ਦੇਸਨਾ ਕਤਾ, ਸਬ੍ਬਸ੍ਮਾ ਚਿਤ੍ਤਤੋ ਪਵਤ੍ਤਂ ਦੇਸਨਂ ਬਹਿ ਗਨ੍ਤੁਂ ਅਦੇਨ੍ਤੋ ਸਮ੍ਮਾ ਅਵਿਪਰੀਤਂ ਅਨੁ ਅਨੁ ਆਹਰਿਤ੍ਵਾ ਅਤ੍ਤਨੋ ਚਿਤ੍ਤਸਨ੍ਤਾਨਂ ਆਹਰਿਤ੍ਵਾ ਯਥਾਦੇਸਿਤਦੇਸਿਤਂ ਦੇਸਨਂ ਸੁਟ੍ਠੁ ਉਪਧਾਰੇਤ੍ਵਾ. ਓਹਿਤਸੋਤਾਤਿ ਅਵਹਿਤਸੋਤਾ, ਸੁਟ੍ਠੁ ਉਪਿਤਸੋਤਾ. ਓਹਿਤਸੋਤਾਤਿ ਵਾ ਅਵਿਕ੍ਖਿਤ੍ਤਸੋਤਾ. ਤਮੇਵ ਉਪਲਬ੍ਭਮਾਨੋਪਿ ਹਿ ਸਵਨੇ ਅਵਿਕ੍ਖੇਪੋ ਸਤਿਸਂਵਰੋ ਵਿਯ ਚਕ੍ਖੁਨ੍ਦ੍ਰਿਯਾਦੀਸੁ ਸੋਤਿਨ੍ਦ੍ਰਿਯੇਪਿ ਵਤ੍ਤੁਮਰਹਤੀਤਿ. ਏਤ੍ਥ ਚ ‘‘ਅਟ੍ਠਿਂ ਕਤ੍ਵਾ’’ਤਿਆਦੀਹਿ ਚਤੂਹਿਪਿ ਪਦੇਹਿ ਤੇਸਂ ਭਿਕ੍ਖੂਨਂ ਤਪ੍ਪਰਭਾਵਤੋ ਸਵਨੇ ਆਦਰਦੀਪਨੇਨ ਸਕ੍ਕਚ੍ਚਸਵਨਂ ਦਸ੍ਸੇਤਿ.

ਏਤਮਤ੍ਥਂ ਵਿਦਿਤ੍ਵਾਤਿ ਏਤਂ ਤੇਸਂ ਭਿਕ੍ਖੂਨਂ ਤਸ੍ਸਾ ਨਿਬ੍ਬਾਨਪਟਿਸਂਯੁਤ੍ਤਾਯ ਧਮ੍ਮਕਥਾਯ ਸਵਨੇ ਆਦਰਕਾਰਿਤਂ ਸਬ੍ਬਾਕਾਰਤੋ ਵਿਦਿਤ੍ਵਾ. ਇਮਂ ਉਦਾਨਨ੍ਤਿ ਇਮਂ ਨਿਬ੍ਬਾਨਸ੍ਸ ਤਬ੍ਬਿਧੁਰਧਮ੍ਮਦੇਸਨਾਮੁਖੇਨ ਪਰਮਤ੍ਥਤੋ ਵਿਜ੍ਜਮਾਨਭਾਵਵਿਭਾਵਨਂ ਉਦਾਨਂ ਉਦਾਨੇਸਿ.

ਤਤ੍ਥ ਅਤ੍ਥੀਤਿ ਵਿਜ੍ਜਤਿ, ਪਰਮਤ੍ਥਤੋ ਉਪਲਬ੍ਭਤੀਤਿ ਅਤ੍ਥੋ. ਭਿਕ੍ਖਵੇਤਿ ਤੇਸਂ ਭਿਕ੍ਖੂਨਂ ਆਲਪਨਂ. ਨਨੁ ਚ ਉਦਾਨਂ ਨਾਮ ਪੀਤਿਸੋਮਨਸ੍ਸਸਮੁਟ੍ਠਾਪਿਤੋ ਵਾ ਧਮ੍ਮਸਂਵੇਗਸਮੁਟ੍ਠਾਪਿਤੋ ਵਾ ਧਮ੍ਮਪਟਿਗ੍ਗਾਹਕਨਿਰਪੇਕ੍ਖੋ ਉਦਾਹਾਰੋ, ਤਥਾ ਚੇਵ ਏਤ੍ਤਕੇਸੁ ਸੁਤ੍ਤੇਸੁ ਆਗਤਂ, ਇਧ ਕਸ੍ਮਾ ਭਗਵਾ ਉਦਾਨੇਨ੍ਤੋ ਤੇ ਭਿਕ੍ਖੂ ਆਮਨ੍ਤੇਸੀਤਿ? ਤੇਸਂ ਭਿਕ੍ਖੂਨਂ ਸਞ੍ਞਾਪਨਤ੍ਥਂ. ਨਿਬ੍ਬਾਨਪਟਿਸਂਯੁਤ੍ਤਞ੍ਹਿ ਭਗਵਾ ਤੇਸਂ ਭਿਕ੍ਖੂਨਂ ਧਮ੍ਮਂ ਦੇਸੇਤ੍ਵਾ ਨਿਬ੍ਬਾਨਗੁਣਾਨੁਸ੍ਸਰਣੇਨ ਉਪ੍ਪਨ੍ਨਪੀਤਿਸੋਮਨਸ੍ਸਾ ਉਦਾਨਂ ਉਦਾਨੇਸਿ. ਇਧ ਨਿਬ੍ਬਾਨਵਜ੍ਜੋ ਸਬ੍ਬੋ ਸਭਾਵਧਮ੍ਮੋ ਪਚ੍ਚਯਾਯਤ੍ਤਵੁਤ੍ਤਿਕੋਵ ਉਪਲਬ੍ਭਤਿ, ਨ ਪਚ੍ਚਯਨਿਰਪੇਕ੍ਖੋ. ਅਯਂ ਪਨ ਨਿਬ੍ਬਾਨਧਮ੍ਮੋ ਕਤਮਪਚ੍ਚਯੇ ਉਪਲਬ੍ਭਤੀਤਿ ਤੇਸਂ ਭਿਕ੍ਖੂਨਂ ਚੇਤੋਪਰਿਵਿਤਕ੍ਕਮਞ੍ਞਾਯ ਤੇ ਚ ਸਞ੍ਞਾਪੇਤੁਕਾਮੋ ‘‘ਅਤ੍ਥਿ, ਭਿਕ੍ਖਵੇ, ਤਦਾਯਤਨ’’ਨ੍ਤਿਆਦਿਮਾਹ, ਨ ਏਕਨ੍ਤਤੋਵ ਤੇ ਪਟਿਗ੍ਗਾਹਕੇ ਕਤ੍ਵਾਤਿ ਵੇਦਿਤਬ੍ਬਂ. ਤਦਾਯਤਨਨ੍ਤਿ ਤਂ ਕਾਰਣਂ. ਦਕਾਰੋ ਪਦਸਨ੍ਧਿਕਰੋ. ਨਿਬ੍ਬਾਨਞ੍ਹਿ ਮਗ੍ਗਫਲਞਾਣਾਦੀਨਂ ਆਰਮ੍ਮਣਪਚ੍ਚਯਭਾਵਤੋ ਰੂਪਾਦੀਨਿ ਵਿਯ ਚਕ੍ਖੁਵਿਞ੍ਞਾਣਾਦੀਨਂ ਆਰਮ੍ਮਣਪਚ੍ਚਯਭੂਤਾਨੀਤਿ ਕਾਰਣਟ੍ਠੇਨ ‘‘ਆਯਤਨ’’ਨ੍ਤਿ ਵੁਚ੍ਚਤਿ. ਏਤ੍ਤਾਵਤਾ ਚ ਭਗਵਾ ਤੇਸਂ ਭਿਕ੍ਖੂਨਂ ਅਸਙ੍ਖਤਾਯ ਧਾਤੁਯਾ ਪਰਮਤ੍ਥਤੋ ਅਤ੍ਥਿਭਾਵਂ ਪਵੇਦੇਸਿ.

ਤਤ੍ਰਾਯਂ ਧਮ੍ਮਨ੍ਵਯੋ – ਇਧ ਸਙ੍ਖਤਧਮ੍ਮਾਨਂ ਵਿਜ੍ਜਮਾਨਤ੍ਤਾ ਅਸਙ੍ਖਤਾਯਪਿ ਧਾਤੁਯਾ ਭਵਿਤਬ੍ਬਂ ਤਪ੍ਪਟਿਪਕ੍ਖਤ੍ਤਾ ਸਭਾਵਧਮ੍ਮਾਨਂ. ਯਥਾ ਹਿ ਦੁਕ੍ਖੇ ਵਿਜ੍ਜਮਾਨੇ ਤਪ੍ਪਟਿਪਕ੍ਖਭੂਤਂ ਸੁਖਮ੍ਪਿ ਵਿਜ੍ਜਤਿਯੇਵ, ਤਥਾ ਉਣ੍ਹੇ ਵਿਜ੍ਜਮਾਨੇ ਸੀਤਮ੍ਪਿ ਵਿਜ੍ਜਤਿ, ਪਾਪਧਮ੍ਮੇਸੁ ਵਿਜ੍ਜਮਾਨੇਸੁ ਕਲ੍ਯਾਣਧਮ੍ਮਾਪਿ ਵਿਜ੍ਜਨ੍ਤਿ ਏਵ. ਵੁਤ੍ਤਞ੍ਚੇਤਂ –

‘‘ਯਥਾਪਿ ਦੁਕ੍ਖੇ ਵਿਜ੍ਜਨ੍ਤੇ, ਸੁਖਂ ਨਾਮਪਿ ਵਿਜ੍ਜਤਿ;

ਏਵਂ ਭਵੇ ਵਿਜ੍ਜਮਾਨੇ, ਵਿਭਵੋਪਿ ਇਚ੍ਛਿਤਬ੍ਬਕੋ.

‘‘ਯਥਾਪਿ ਉਣ੍ਹੇ ਵਿਜ੍ਜਨ੍ਤੇ, ਅਪਰਂ ਵਿਜ੍ਜਤਿ ਸੀਤਲਂ;

ਏਵਂ ਤਿਵਿਧਗ੍ਗਿ ਵਿਜ੍ਜਨ੍ਤੇ, ਨਿਬ੍ਬਾਨਂ ਇਚ੍ਛਿਤਬ੍ਬਕਂ.

‘‘ਯਥਾਪਿ ਪਾਪੇ ਵਿਜ੍ਜਨ੍ਤੇ, ਕਲ੍ਯਾਣਮਪਿ ਵਿਜ੍ਜਤਿ;

ਏਵਮੇਵ ਜਾਤਿ ਵਿਜ੍ਜਨ੍ਤੇ, ਅਜਾਤਿਮਪਿ ਇਚ੍ਛਿਤਬ੍ਬਕ’’ਨ੍ਤਿਆਦਿ. (ਬੁ. ਵਂ. ੨.੧੦-੧੨) –

ਅਪਿਚ ਨਿਬ੍ਬਾਨਸ੍ਸ ਪਰਮਤ੍ਥਤੋ ਅਤ੍ਥਿਭਾਵਵਿਚਾਰਣਂ ਪਰਤੋ ਆਵਿਭਵਿਸ੍ਸਤਿ.

ਏਵਂ ਭਗਵਾ ਅਸਙ੍ਖਤਾਯ ਧਾਤੁਯਾ ਪਰਮਤ੍ਥਤੋ ਅਤ੍ਥਿਭਾਵਂ ਸਮ੍ਮੁਖੇਨ ਦਸ੍ਸੇਤ੍ਵਾ ਇਦਾਨਿ ਤਬ੍ਬਿਧੁਰਧਮ੍ਮਾਪੋਹਨਮੁਖੇਨਸ੍ਸ ਸਭਾਵਂ ਦਸ੍ਸੇਤੁਂ, ‘‘ਯਤ੍ਥ ਨੇਵ ਪਥਵੀ ਨ ਆਪੋ’’ਤਿਆਦਿਮਾਹ. ਤਤ੍ਥ ਯਸ੍ਮਾ ਨਿਬ੍ਬਾਨਂ ਸਬ੍ਬਸਙ੍ਖਾਰਵਿਧੁਰਸਭਾਵਂ ਯਥਾ ਸਙ੍ਖਤਧਮ੍ਮੇਸੁ ਕਤ੍ਥਚਿ ਨਤ੍ਥਿ, ਤਥਾ ਤਤ੍ਥਪਿ ਸਬ੍ਬੇ ਸਙ੍ਖਤਧਮ੍ਮਾ. ਨ ਹਿ ਸਙ੍ਖਤਾਸਙ੍ਖਤਧਮ੍ਮਾਨਂ ਸਮੋਧਾਨਂ ਸਮ੍ਭਵਤਿ. ਤਤ੍ਰਾਯਂ ਅਤ੍ਥਵਿਭਾਵਨਾ – ਯਤ੍ਥ ਯਸ੍ਮਿਂ ਨਿਬ੍ਬਾਨੇ ਯਸ੍ਸਂ ਅਸਙ੍ਖਤਧਾਤੁਯਂ ਨੇਵ ਕਕ੍ਖਲ਼ਲਕ੍ਖਣਾ ਪਥਵੀਧਾਤੁ ਅਤ੍ਥਿ, ਨ ਪਗ੍ਘਰਣਲਕ੍ਖਣਾ ਆਪੋਧਾਤੁ, ਨ ਉਣ੍ਹਲਕ੍ਖਣਾ ਤੇਜੋਧਾਤੁ, ਨ ਵਿਤ੍ਥਮ੍ਭਨਲਕ੍ਖਣਾ ਵਾਯੋਧਾਤੁ ਅਤ੍ਥਿ. ਇਤਿ ਚਤੁਮਹਾਭੂਤਾਭਾਵਵਚਨੇਨ ਯਥਾ ਸਬ੍ਬਸ੍ਸਪਿ ਉਪਾਦਾਰੂਪਸ੍ਸ ਅਭਾਵੋ ਵੁਤ੍ਤੋ ਹੋਤਿ ਤਨ੍ਨਿਸ੍ਸਿਤਤ੍ਤਾ. ਏਵਂ ਅਨਵਸੇਸਤੋ ਕਾਮਰੂਪਭਵਸ੍ਸ ਤਤ੍ਥ ਅਭਾਵੋ ਵੁਤ੍ਤੋ ਹੋਤਿ ਤਦਾਯਤ੍ਤਵੁਤ੍ਤਿਭਾਵਤੋ. ਨ ਹਿ ਮਹਾਭੂਤਨਿਸ੍ਸਯੇਨ ਵਿਨਾ ਪਞ੍ਚਵੋਕਾਰਭਵੋ ਏਕਵੋਕਾਰਭਵੋ ਵਾ ਸਮ੍ਭਵਤੀਤਿ.

ਇਦਾਨਿ ਅਰੂਪਸਭਾਵਤ੍ਤੇਪਿ ਨਿਬ੍ਬਾਨਸ੍ਸ ਅਰੂਪਭਵਪਰਿਯਾਪਨ੍ਨਾਨਂ ਧਮ੍ਮਾਨਂ ਤਤ੍ਥ ਅਭਾਵਂ ਦਸ੍ਸੇਤੁਂ, ‘‘ਨ ਆਕਾਸਾਨਞ੍ਚਾਯਤਨਂ…ਪੇ… ਨ ਨੇਵਸਞ੍ਞਾਨਾਸਞ੍ਞਾਯਤਨ’’ਨ੍ਤਿ ਵੁਤ੍ਤਂ. ਤਤ੍ਥ ਨ ਆਕਾਸਾਨਞ੍ਚਾਯਤਨਨ੍ਤਿ ਸਦ੍ਧਿਂ ਆਰਮ੍ਮਣੇਨ ਕੁਸਲਵਿਪਾਕਕਿਰਿਯਭੇਦੋ ਤਿਵਿਧੋਪਿ ਆਕਾਸਾਨਞ੍ਚਾਯਤਨਚਿਤ੍ਤੁਪ੍ਪਾਦੋ ਨਤ੍ਥੀਤਿ ਅਤ੍ਥੋ. ਸੇਸੇਸੁਪਿ ਏਸੇਵ ਨਯੋ. ਯਦਗ੍ਗੇਨ ਚ ਨਿਬ੍ਬਾਨੇ ਕਾਮਲੋਕਾਦੀਨਂ ਅਭਾਵੋ ਹੋਤਿ, ਤਦਗ੍ਗੇਨ ਤਤ੍ਥ ਇਧਲੋਕਪਰਲੋਕਾਨਮ੍ਪਿ ਅਭਾਵੋਤਿ ਆਹ – ‘‘ਨਾਯਂ ਲੋਕੋ ਨ ਪਰਲੋਕੋ’’ਤਿ. ਤਸ੍ਸਤ੍ਥੋ – ਯ੍ਵਾਯਂ ‘‘ਇਤ੍ਥਤ੍ਤਂ ਦਿਟ੍ਠਧਮ੍ਮੋ ਇਧਲੋਕੋ’’ਤਿ ਚ ਲਦ੍ਧਵੋਹਾਰੋ ਖਨ੍ਧਾਦਿਲੋਕੋ, ਯੋ ਚ ‘‘ਤਤੋ ਅਞ੍ਞਥਾ ਪਰੋ ਅਭਿਸਮ੍ਪਰਾਯੋ’’ਤਿ ਚ ਲਦ੍ਧਵੋਹਾਰੋ ਖਨ੍ਧਾਦਿਲੋਕੋ, ਤਦੁਭਯਮ੍ਪਿ ਤਤ੍ਥ ਨਤ੍ਥੀਤਿ. ਨ ਉਭੋ ਚਨ੍ਦਿਮਸੂਰਿਯਾਤਿ ਯਸ੍ਮਾ ਰੂਪਗਤੇ ਸਤਿ ਤਮੋ ਨਾਮ ਸਿਯਾ, ਤਮਸ੍ਸ ਚ ਵਿਧਮਨਤ੍ਥਂ ਚਨ੍ਦਿਮਸੂਰਿਯੇਹਿ ਵਤ੍ਤਿਤਬ੍ਬਂ. ਸਬ੍ਬੇਨ ਸਬ੍ਬਂ ਪਨ ਯਤ੍ਥ ਰੂਪਗਤਮੇਵ ਨਤ੍ਥਿ, ਕੁਤੋ ਤਤ੍ਥ ਤਮੋ. ਤਮਸ੍ਸ ਵਾ ਵਿਧਮਨਾ ਚਨ੍ਦਿਮਸੂਰਿਯਾ, ਤਸ੍ਮਾ ਚਨ੍ਦਿਮਾ ਸੂਰਿਯੋ ਚਾਤਿ ਉਭੋਪਿ ਤਤ੍ਥ ਨਿਬ੍ਬਾਨੇ ਨਤ੍ਥੀਤਿ ਅਤ੍ਥੋ. ਇਮਿਨਾ ਆਲੋਕਸਭਾਵਤਂਯੇਵ ਨਿਬ੍ਬਾਨਸ੍ਸ ਦਸ੍ਸੇਤਿ.

ਏਤ੍ਤਾਵਤਾ ਚ ਅਨਭਿਸਮੇਤਾਵੀਨਂ ਭਿਕ੍ਖੂਨਂ ਅਨਾਦਿਮਤਿਸਂਸਾਰੇ ਸੁਪਿਨਨ੍ਤੇਪਿ ਅਨਨੁਭੂਤਪੁਬ੍ਬਂ ਪਰਮਗਮ੍ਭੀਰਂ ਅਤਿਦੁਦ੍ਦਸਂ ਸਣ੍ਹਸੁਖੁਮਂ ਅਤਕ੍ਕਾਵਚਰਂ ਅਚ੍ਚਨ੍ਤਸਨ੍ਤਂ ਪਣ੍ਡਿਤਵੇਦਨੀਯਂ ਅਤਿਪਣੀਤਂ ਅਮਤਂ ਨਿਬ੍ਬਾਨਂ ਵਿਭਾਵੇਨ੍ਤੋ ਪਠਮਂ ਤਾਵ ‘‘ਅਤ੍ਥਿ, ਭਿਕ੍ਖਵੇ, ਤਦਾਯਤਨ’’ਨ੍ਤਿ ਤਸ੍ਸ ਅਤ੍ਥਿਭਾਵਾ ਤੇਸਂ ਅਞ੍ਞਾਣਾਦੀਨਿ ਅਪਨੇਤ੍ਵਾ ‘‘ਯਤ੍ਥ ਨੇਵ ਪਥਵੀ …ਪੇ… ਨ ਉਭੋ ਚਨ੍ਦਿਮਸੂਰਿਯਾ’’ਤਿ ਤਦਞ੍ਞਧਮ੍ਮਾਪੋਹਨਮੁਖੇਨ ਤਂ ਵਿਭਾਵੇਤਿ ਧਮ੍ਮਰਾਜਾ. ਤੇਨ ਪਥਵੀਆਦਿਸਬ੍ਬਸਙ੍ਖਤਧਮ੍ਮਵਿਧੁਰਸਭਾਵਾ ਯਾ ਅਸਙ੍ਖਤਾ ਧਾਤੁ, ਤਂ ਨਿਬ੍ਬਾਨਨ੍ਤਿ ਦੀਪਿਤਂ ਹੋਤਿ. ਤੇਨੇਵਾਹ, ‘‘ਤਤ੍ਰਾਪਾਹਂ, ਭਿਕ੍ਖਵੇ, ਨੇਵ ਆਗਤਿਂ ਵਦਾਮੀ’’ਤਿ.

ਤਤ੍ਥ ਤਤ੍ਰਾਤਿ ਤਸ੍ਮਿਂ. ਅਪਿਸਦ੍ਦੋ ਸਮੁਚ੍ਚਯੇ. ਅਹਂ, ਭਿਕ੍ਖਵੇ, ਯਤ੍ਥ ਸਙ੍ਖਾਰਪਵਤ੍ਤੇ ਕੁਤੋਚਿ ਕਸ੍ਸਚਿ ਆਗਤਿਂ ਨ ਵਦਾਮਿ ਯਥਾਪਚ੍ਚਯਂ ਤਤ੍ਥ ਧਮ੍ਮਮਤ੍ਤਸ੍ਸ ਉਪ੍ਪਜ੍ਜਨਤੋ. ਏਵਂ ਤਸ੍ਮਿਮ੍ਪਿ ਆਯਤਨੇ ਨਿਬ੍ਬਾਨੇ ਕੁਤੋਚਿ ਆਗਤਿਂ ਆਗਮਨਂ ਨੇਵ ਵਦਾਮਿ ਆਗਨ੍ਤਬ੍ਬਟ੍ਠਾਨਤਾਯ ਅਭਾਵਤੋ. ਨ ਗਤਿਨ੍ਤਿ ਕਤ੍ਥਚਿ ਗਮਨਂ ਨ ਵਦਾਮਿ ਗਨ੍ਤਬ੍ਬਟ੍ਠਾਨਤਾਯ ਅਭਾਵਤੋ. ਨ ਹਿ ਤਤ੍ਥ ਸਤ੍ਤਾਨਂ ਠਪੇਤ੍ਵਾ ਞਾਣੇਨ ਆਰਮ੍ਮਣਕਰਣਂ ਆਗਤਿਗਤਿਯੋ ਸਮ੍ਭਵਨ੍ਤਿ, ਨਾਪਿ ਠਿਤਿਚੁਤੂਪਪਤ੍ਤਿਯੋ ਵਦਾਮਿ. ‘‘ਤਦਾਪਹ’’ਨ੍ਤਿਪਿ ਪਾਲ਼ਿ. ਤਸ੍ਸਤ੍ਥੋ – ਤਮ੍ਪਿ ਆਯਤਨਂ ਗਾਮਨ੍ਤਰਤੋ ਗਾਮਨ੍ਤਰਂ ਵਿਯ ਨ ਆਗਨ੍ਤਬ੍ਬਤਾਯ ਨ ਆਗਤਿ, ਨ ਗਨ੍ਤਬ੍ਬਤਾਯ ਨ ਗਤਿ, ਪਥਵੀਪਬ੍ਬਤਾਦਿ ਵਿਯ ਅਪਤਿਟ੍ਠਾਨਤਾਯ ਨ ਠਿਤਿ, ਅਪਚ੍ਚਯਤ੍ਤਾ ਵਾ ਉਪ੍ਪਾਦਾਭਾਵੋ, ਤਤੋ ਅਮਤਸਭਾਵਤ੍ਤਾ ਚਵਨਾਭਾਵੋ, ਉਪ੍ਪਾਦਨਿਰੋਧਾਭਾਵਤੋ ਚੇਵ ਤਦੁਭਯਪਰਿਚ੍ਛਿਨ੍ਨਾਯ ਠਿਤਿਯਾ ਚ ਅਭਾਵਤੋ ਨ ਠਿਤਿਂ ਨ ਚੁਤਿਂ ਨ ਉਪਪਤ੍ਤਿਂ ਵਦਾਮਿ. ਕੇਵਲਂ ਪਨ ਤਂ ਅਰੂਪਸਭਾਵਤ੍ਤਾ ਅਪਚ੍ਚਯਤ੍ਤਾ ਚ ਨ ਕਤ੍ਥਚਿ ਪਤਿਟ੍ਠਿਤਨ੍ਤਿ ਅਪ੍ਪਤਿਟ੍ਠਂ. ਤਤ੍ਥ ਪਵਤ੍ਤਾਭਾਵਤੋ ਪਵਤ੍ਤਪ੍ਪਟਿਪਕ੍ਖਤੋ ਚ ਅਪ੍ਪਵਤ੍ਤਂ. ਅਰੂਪਸਭਾਵਤ੍ਤੇਪਿ ਵੇਦਨਾਦਯੋ ਵਿਯ ਕਸ੍ਸਚਿਪਿ ਆਰਮ੍ਮਣਸ੍ਸ ਅਨਾਲਮ੍ਬਨਤੋ ਉਪਤ੍ਥਮ੍ਭਨਿਰਪੇਕ੍ਖਤੋ ਚ ਅਨਾਰਮ੍ਮਣਮੇਵ ਤਂ ‘‘ਆਯਤਨ’’ਨ੍ਤਿ ਵੁਤ੍ਤਂ ਨਿਬ੍ਬਾਨਂ. ਅਯਞ੍ਚ ਏਵਸਦ੍ਦੋ ਅਪ੍ਪਤਿਟ੍ਠਮੇਵ ਅਪ੍ਪਵਤ੍ਤਮੇਵਾਤਿ ਪਦਦ੍ਵਯੇਨਪਿ ਯੋਜੇਤਬ੍ਬੋ. ਏਸੇਵਨ੍ਤੋ ਦੁਕ੍ਖਸ੍ਸਾਤਿ ਯਦਿਦਂ ‘‘ਅਪ੍ਪਤਿਟ੍ਠ’’ਨ੍ਤਿਆਦੀਹਿ ਵਚਨੇਹਿ ਵਣ੍ਣਿਤਂ ਥੋਮਿਤਂ ਯਥਾਵੁਤ੍ਤਲਕ੍ਖਣਂ ਨਿਬ੍ਬਾਨਂ, ਏਸੋ ਏਵ ਸਕਲਸ੍ਸ ਵਟ੍ਟਦੁਕ੍ਖਸ੍ਸ ਅਨ੍ਤੋ ਪਰਿਯੋਸਾਨਂ ਤਦਧਿਗਮੇ ਸਤਿ ਸਬ੍ਬਦੁਕ੍ਖਾਭਾਵਤੋ. ਤਸ੍ਮਾ ‘‘ਦੁਕ੍ਖਸ੍ਸ ਅਨ੍ਤੋ’’ਤਿ ਅਯਮੇਵ ਤਸ੍ਸ ਸਭਾਵੋਤਿ ਦਸ੍ਸੇਤਿ.

ਪਠਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਦੁਤਿਯਨਿਬ੍ਬਾਨਪਟਿਸਂਯੁਤ੍ਤਸੁਤ੍ਤਵਣ੍ਣਨਾ

੭੨. ਦੁਤਿਯੇ ਇਮਂ ਉਦਾਨਨ੍ਤਿ ਇਮਂ ਨਿਬ੍ਬਾਨਸ੍ਸ ਪਕਤਿਯਾ ਗਮ੍ਭੀਰਭਾਵਤੋ ਦੁਦ੍ਦਸਭਾਵਦੀਪਨਂ ਉਦਾਨਂ ਉਦਾਨੇਸਿ. ਤਤ੍ਥ ਦੁਦ੍ਦਸਨ੍ਤਿ ਸਭਾਵਗਮ੍ਭੀਰਤ੍ਤਾ ਅਤਿਸੁਖੁਮਸਣ੍ਹਸਭਾਵਤ੍ਤਾ ਚ ਅਨੁਪਚਿਤਞਾਣਸਮ੍ਭਾਰੇਹਿ ਪਸ੍ਸਿਤੁਂ ਨ ਸਕ੍ਕਾਤਿ ਦੁਦ੍ਦਸਂ. ਵੁਤ੍ਤਞ੍ਹੇਤਂ – ‘‘ਤਞ੍ਹਿ ਤੇ, ਮਾਗਣ੍ਡਿਯ, ਅਰਿਯਂ ਪਞ੍ਞਾਚਕ੍ਖੁ ਨਤ੍ਥਿ, ਯੇਨ ਤ੍ਵਂ ਆਰੋਗ੍ਯਂ ਜਾਨੇਯ੍ਯਾਸਿ, ਨਿਬ੍ਬਾਨਮ੍ਪਿ ਪਸ੍ਸੇਯ੍ਯਾਸੀ’’ਤਿ (ਮ. ਨਿ. ੨.੨੧੮). ਅਪਰਮ੍ਪਿ ਵੁਤ੍ਤਂ – ‘‘ਇਦਮ੍ਪਿ ਖੋ ਠਾਨਂ ਦੁਦ੍ਦਸਂ, ਯਦਿਦਂ ਸਬ੍ਬਸਙ੍ਖਾਰਸਮਥੋ’’ਤਿਆਦਿ (ਮਹਾਵ. ੮; ਮ. ਨਿ. ੧.੨੮੧; ੨.੩੩੭). ਅਨਤਨ੍ਤਿ ਰੂਪਾਦਿਆਰਮ੍ਮਣੇਸੁ, ਕਾਮਾਦੀਸੁ ਚ ਭਵੇਸੁ ਨਮਨਤੋ ਤਨ੍ਨਿਨ੍ਨਭਾਵੇਨ ਪਵਤ੍ਤਿਤੋ ਸਤ੍ਤਾਨਞ੍ਚ ਤਤ੍ਥ ਨਮਨਤੋ ਤਣ੍ਹਾ ਨਤਾ ਨਾਮ, ਨਤ੍ਥਿ ਏਤ੍ਥ ਨਤਾਤਿ ਅਨਤਂ, ਨਿਬ੍ਬਾਨਨ੍ਤਿ ਅਤ੍ਥੋ. ‘‘ਅਨਨ੍ਤ’’ਨ੍ਤਿਪਿ ਪਠਨ੍ਤਿ, ਨਿਚ੍ਚਸਭਾਵਤ੍ਤਾ ਅਨ੍ਤਵਿਰਹਿਤਂ, ਅਚਵਨਧਮ੍ਮਂ ਨਿਰੋਧਂ ਅਮਤਨ੍ਤਿ ਅਤ੍ਥੋ. ਕੇਚਿ ਪਨ ‘‘ਅਨਨ੍ਤ’’ਨ੍ਤਿ ਪਦਸ੍ਸ ‘‘ਅਪ੍ਪਮਾਣ’’ਨ੍ਤਿ ਅਤ੍ਥਂ ਵਦਨ੍ਤਿ. ਏਤ੍ਥ ਚ ‘‘ਦੁਦ੍ਦਸ’’ਨ੍ਤਿ ਇਮਿਨਾ ਪਞ੍ਞਾਯ ਦੁਬ੍ਬਲੀਕਰਣੇਹਿ ਰਾਗਾਦਿਕਿਲੇਸੇਹਿ ਚਿਰਕਾਲਭਾਵਿਤਤ੍ਤਾ ਸਤ੍ਤਾਨਂ ਅਪਚ੍ਚਯਭਾਵਨਾ ਨ ਸੁਕਰਾਤਿ ਨਿਬ੍ਬਾਨਸ੍ਸ ਕਿਚ੍ਛੇਨ ਅਧਿਗਮਨੀਯਤਂ ਦਸ੍ਸੇਤਿ. ਨ ਹਿ ਸਚ੍ਚਂ ਸੁਦਸ੍ਸਨਨ੍ਤਿ ਇਮਿਨਾਪਿ ਤਮੇਵਤ੍ਥਂ ਪਾਕਟਂ ਕਰੋਤਿ. ਤਤ੍ਥ ਸਚ੍ਚਨ੍ਤਿ ਨਿਬ੍ਬਾਨਂ. ਤਞ੍ਹਿ ਕੇਨਚਿ ਪਰਿਯਾਯੇਨ ਅਸਨ੍ਤਸਭਾਵਾਭਾਵਤੋ ਏਕਨ੍ਤੇਨੇਵ ਸਨ੍ਤਤ੍ਤਾ ਅਵਿਪਰੀਤਟ੍ਠੇਨ ਸਚ੍ਚਂ. ਨ ਹਿ ਤਂ ਸੁਦਸ੍ਸਨਂ ਨ ਸੁਖੇਨ ਪਸ੍ਸਿਤਬ੍ਬਂ, ਸੁਚਿਰਮ੍ਪਿ ਕਾਲਂ ਪੁਞ੍ਞਞਾਣਸਮ੍ਭਾਰੇ ਸਮਾਨੇਨ੍ਤੇਹਿਪਿ ਕਸਿਰੇਨੇਵ ਸਮਧਿਗਨ੍ਤਬ੍ਬਤੋ. ਤਥਾ ਹਿ ਵੁਤ੍ਤਂ ਭਗਵਤਾ – ‘‘ਕਿਚ੍ਛੇਨ ਮੇ ਅਧਿਗਤ’’ਨ੍ਤਿ (ਮਹਾਵ. ੮; ਮ. ਨਿ. ੧.੨੮੧; ੨.੩੩੭).

ਪਟਿਵਿਦ੍ਧਾ ਤਣ੍ਹਾ ਜਾਨਤੋ ਪਸ੍ਸਤੋ ਨਤ੍ਥਿ ਕਿਞ੍ਚਨਨ੍ਤਿ ਤਞ੍ਚ ਨਿਰੋਧਸਚ੍ਚਂ ਸਚ੍ਛਿਕਿਰਿਯਾਭਿਸਮਯਵਸੇਨ ਅਭਿਸਮੇਨ੍ਤੇਨ ਵਿਸਯਤੋ ਕਿਚ੍ਚਤੋ ਚ ਆਰਮ੍ਮਣਤੋ ਚ ਆਰਮ੍ਮਣਪ੍ਪਟਿਵੇਧੇਨ ਅਸਮ੍ਮੋਹਪ੍ਪਟਿਵੇਧੇਨ ਚ ਪਟਿਵਿਦ੍ਧਂ, ਯਥਾਪਰਿਞ੍ਞਾਭਿਸਮਯਵਸੇਨ ਦੁਕ੍ਖਸਚ੍ਚਂ, ਭਾਵਨਾਭਿਸਮਯਵਸੇਨ ਮਗ੍ਗਸਚ੍ਚਞ੍ਚ ਅਸਮ੍ਮੋਹਤੋ ਪਟਿਵਿਦ੍ਧਂ ਹੋਤਿ, ਏਵਂ ਪਹਾਨਾਭਿਸਮਯਵਸੇਨ ਅਸਮ੍ਮੋਹਤੋ ਚ ਪਟਿਵਿਦ੍ਧਾ ਤਣ੍ਹਾ ਹੋਤਿ. ਏਵਞ੍ਚ ਚਤ੍ਤਾਰਿ ਸਚ੍ਚਾਨਿ ਯਥਾਭੂਤਂ ਅਰਿਯਮਗ੍ਗਪਞ੍ਞਾਯ ਜਾਨਤੋ ਪਸ੍ਸਤੋ ਭਵਾਦੀਸੁ ਨਤਭੂਤਾ ਤਣ੍ਹਾ ਨਤ੍ਥਿ, ਤਦਭਾਵੇ ਸਬ੍ਬਸ੍ਸਪਿ ਕਿਲੇਸਵਟ੍ਟਸ੍ਸ ਅਭਾਵੋ, ਤਤੋਵ ਕਮ੍ਮਵਿਪਾਕਵਟ੍ਟਾਨਂ ਅਸਮ੍ਭਵੋਯੇਵਾਤਿ ਏਵਂ ਭਗਵਾ ਤੇਸਂ ਭਿਕ੍ਖੂਨਂ ਅਨਵਸੇਸਵਟ੍ਟਦੁਕ੍ਖਵੂਪਸਮਹੇਤੁਭੂਤਂ ਅਮਤਮਹਾਨਿਬ੍ਬਾਨਸ੍ਸ ਆਨੁਭਾਵਂ ਪਕਾਸੇਸਿ. ਸੇਸਂ ਵੁਤ੍ਤਨਯਮੇਵ.

ਦੁਤਿਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩. ਤਤਿਯਨਿਬ੍ਬਾਨਪਟਿਸਂਯੁਤ੍ਤਸੁਤ੍ਤਵਣ੍ਣਨਾ

੭੩. ਤਤਿਯੇ ਅਥ ਖੋ ਭਗਵਾ ਏਤਮਤ੍ਥਂ ਵਿਦਿਤ੍ਵਾਤਿ ਤਦਾ ਕਿਰ ਭਗਵਤਾ ਅਨੇਕਪਰਿਯਾਯੇਨ ਸਂਸਾਰਸ੍ਸ ਆਦੀਨਵਂ ਪਕਾਸੇਤ੍ਵਾ ਸਨ੍ਦਸ੍ਸਨਾਦਿਵਸੇਨ ਨਿਬ੍ਬਾਨਪਟਿਸਂਯੁਤ੍ਤਾਯ ਧਮ੍ਮਦੇਸਨਾਯ ਕਤਾਯ ਤੇਸਂ ਭਿਕ੍ਖੂਨਂ ਏਤਦਹੋਸਿ – ‘‘ਅਯਂ ਸਂਸਾਰੋ ਭਗਵਤਾ ਅਵਿਜ੍ਜਾਦੀਹਿ ਕਾਰਣੇਹਿ ਸਹੇਤੁਕੋ ਪਕਾਸਿਤੋ, ਨਿਬ੍ਬਾਨਸ੍ਸ ਪਨ ਤਦੁਪਸਮਸ੍ਸ ਨ ਕਿਞ੍ਚਿ ਕਾਰਣਂ ਵੁਤ੍ਤਂ, ਤਯਿਦਂ ਅਹੇਤੁਕਂ, ਕਥਂ ਸਚ੍ਚਿਕਟ੍ਠਪਰਮਤ੍ਥੇਨ ਉਪਲਬ੍ਭਤੀ’’ਤਿ. ਅਥ ਭਗਵਾ ਤੇਸਂ ਭਿਕ੍ਖੂਨਂ ਏਤਂ ਯਥਾਵੁਤ੍ਤਂ ਪਰਿਵਿਤਕ੍ਕਸਙ੍ਖਾਤਂ ਅਤ੍ਥਂ ਵਿਦਿਤ੍ਵਾ. ਇਮਂ ਉਦਾਨਨ੍ਤਿ ਤੇਸਂ ਭਿਕ੍ਖੂਨਂ ਵਿਮਤਿਵਿਧਮਨਤ੍ਥਞ੍ਚੇਵ ਇਧ ਸਮਣਬ੍ਰਾਹ੍ਮਣਾਨਂ ‘‘ਨਿਬ੍ਬਾਨਂ ਨਿਬ੍ਬਾਨਨ੍ਤਿ ਵਾਚਾਵਤ੍ਥੁਮਤ੍ਤਮੇਵ, ਨਤ੍ਥਿ ਹਿ ਪਰਮਤ੍ਥਤੋ ਨਿਬ੍ਬਾਨਂ ਨਾਮ ਅਨੁਪਲਬ੍ਭਮਾਨਸਭਾਵਤ੍ਤਾ’’ਤਿ ਲੋਕਾਯਤਿਕਾਦਯੋ ਵਿਯ ਵਿਪ੍ਪਟਿਪਨ੍ਨਾਨਂ ਬਹਿਦ੍ਧਾ ਚ ਪੁਥੁਦਿਟ੍ਠਿਗਤਿਕਾਨਂ ਮਿਚ੍ਛਾਵਾਦਭਞ੍ਜਨਤ੍ਥਞ੍ਚ ਇਮਂ ਅਮਤਮਹਾਨਿਬ੍ਬਾਨਸ੍ਸ ਪਰਮਤ੍ਥਤੋ ਅਤ੍ਥਿਭਾਵਦੀਪਨਂ ਉਦਾਨਂ ਉਦਾਨੇਸਿ.

ਤਤ੍ਥ ਅਜਾਤਂ ਅਭੂਤਂ ਅਕਤਂ ਅਸਙ੍ਖਤਨ੍ਤਿ ਸਬ੍ਬਾਨਿਪਿ ਪਦਾਨਿ ਅਞ੍ਞਮਞ੍ਞਵੇਵਚਨਾਨਿ. ਅਥ ਵਾ ਵੇਦਨਾਦਯੋ ਵਿਯ ਹੇਤੁਪਚ੍ਚਯਸਮਵਾਯਸਙ੍ਖਾਤਾਯ ਕਾਰਣਸਾਮਗ੍ਗਿਯਾ ਨ ਜਾਤਂ ਨ ਨਿਬ੍ਬਤ੍ਤਨ੍ਤਿ ਅਜਾਤਂ, ਕਾਰਣੇਨ ਵਿਨਾ, ਸਯਮੇਵ ਵਾ ਨ ਭੂਤਂ ਨ ਪਾਤੁਭੂਤਂ ਨ ਉਪ੍ਪਨ੍ਨਨ੍ਤਿ ਅਭੂਤਂ, ਏਵਂ ਅਜਾਤਤ੍ਤਾ ਅਭੂਤਤ੍ਤਾ ਚ ਯੇਨ ਕੇਨਚਿ ਕਾਰਣੇਨ ਨ ਕਤਨ੍ਤਿ ਅਕਤਂ, ਜਾਤਭੂਤਕਤਸਭਾਵੋ ਚ ਨਾਮਰੂਪਾਨਂ ਸਙ੍ਖਤਧਮ੍ਮਾਨਂ ਹੋਤਿ, ਨ ਅਸਙ੍ਖਤਸਭਾਵਸ੍ਸ ਨਿਬ੍ਬਾਨਸ੍ਸਾਤਿ ਦਸ੍ਸਨਤ੍ਥਂ ਅਸਙ੍ਖਤਨ੍ਤਿ ਵੁਤ੍ਤਂ. ਪਟਿਲੋਮਤੋ ਵਾ ਸਮੇਚ੍ਚ ਸਮ੍ਭੂਯ ਪਚ੍ਚਯੇਹਿ ਕਤਨ੍ਤਿ ਸਙ੍ਖਤਂ, ਤਥਾ ਨ ਸਙ੍ਖਤਂ ਸਙ੍ਖਤਲਕ੍ਖਣਰਹਿਤਨ੍ਤਿ ਅਸਙ੍ਖਤਨ੍ਤਿ. ਏਵਂ ਅਨੇਕੇਹਿ ਕਾਰਣੇਹਿ ਨਿਬ੍ਬਤ੍ਤਿਤਭਾਵੇ ਪਟਿਸਿਦ੍ਧੇ ‘‘ਸਿਯਾ ਨੁ ਖੋ ਏਕੇਨੇਵ ਕਾਰਣੇਨ ਕਤ’’ਨ੍ਤਿ ਆਸਙ੍ਕਾਯ ‘‘ਨ ਯੇਨ ਕੇਨਚਿ ਕਤ’’ਨ੍ਤਿ ਦਸ੍ਸਨਤ੍ਥਂ ‘‘ਅਕਤ’’ਨ੍ਤਿ ਵੁਤ੍ਤਂ. ਏਵਂ ਅਪਚ੍ਚਯਮ੍ਪਿ ਸਮਾਨਂ ‘‘ਸਯਮੇਵ ਨੁ ਖੋ ਇਦਂ ਭੂਤਂ ਪਾਤੁਭੂਤ’’ਨ੍ਤਿ ਆਸਙ੍ਕਾਯ ਤਨ੍ਨਿਵਤ੍ਤਨਤ੍ਥਂ ‘‘ਅਭੂਤ’’ਨ੍ਤਿ ਵੁਤ੍ਤਂ. ‘‘ਅਯਞ੍ਚੇਤਸ੍ਸ ਅਸਙ੍ਖਤਾਕਤਾਭੂਤਭਾਵੋ ਸਬ੍ਬੇਨ ਸਬ੍ਬਂ ਅਜਾਤਿਧਮ੍ਮਤ੍ਤਾ’’ਤਿ ਦਸ੍ਸੇਤੁਂ ‘‘ਅਜਾਤ’’ਨ੍ਤਿ ਵੁਤ੍ਤਂ. ਏਵਮੇਤੇਸਂ ਚਤੁਨ੍ਨਮ੍ਪਿ ਪਦਾਨਂ ਸਾਤ੍ਥਕਭਾਵਂ ਵਿਦਿਤ੍ਵਾ ‘‘ਤਯਿਦਂ ਨਿਬ੍ਬਾਨਂ ਅਤ੍ਥਿ, ਭਿਕ੍ਖਵੇ’’ਤਿ ਪਰਮਤ੍ਥਤੋ ਨਿਬ੍ਬਾਨਸ੍ਸ ਅਤ੍ਥਿਭਾਵੋ ਪਕਾਸਿਤੋਤਿ ਵੇਦਿਤਬ੍ਬੋ. ਏਤ੍ਥ ਉਦਾਨੇਨ੍ਤੇਨ ਭਗਵਤਾ, ‘‘ਭਿਕ੍ਖਵੇ’’ਤਿ ਆਲਪਨੇ ਕਾਰਣਂ ਹੇਟ੍ਠਾ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.

ਇਤਿ ਸਤ੍ਥਾ ‘‘ਅਤ੍ਥਿ, ਭਿਕ੍ਖਵੇ, ਅਜਾਤਂ ਅਭੂਤਂ ਅਕਤਂ ਅਸਙ੍ਖਤ’’ਨ੍ਤਿ ਵਤ੍ਵਾ ਤਤ੍ਥ ਹੇਤੁਂ ਦਸ੍ਸੇਨ੍ਤੋ ‘‘ਨੋ ਚੇਤਂ, ਭਿਕ੍ਖਵੇ’’ਤਿਆਦਿਮਾਹ. ਤਸ੍ਸਾਯਂ ਸਙ੍ਖੇਪਤ੍ਥੋ – ਭਿਕ੍ਖਵੇ, ਯਦਿ ਅਜਾਤਾਦਿਸਭਾਵਾ ਅਸਙ੍ਖਤਾ ਧਾਤੁ ਨ ਅਭਵਿਸ੍ਸ ਨ ਸਿਯਾ, ਇਧ ਲੋਕੇ ਜਾਤਾਦਿਸਭਾਵਸ੍ਸ ਰੂਪਾਦਿਕ੍ਖਨ੍ਧਪਞ੍ਚਕਸਙ੍ਖਾਤਸ੍ਸ ਸਙ੍ਖਤਸ੍ਸ ਨਿਸ੍ਸਰਣਂ ਅਨਵਸੇਸਵੂਪਸਮੋ ਨ ਪਞ੍ਞਾਯੇਯ੍ਯ ਨ ਉਪਲਬ੍ਭੇਯ੍ਯ ਨ ਸਮ੍ਭਵੇਯ੍ਯ. ਨਿਬ੍ਬਾਨਞ੍ਹਿ ਆਰਮ੍ਮਣਂ ਕਤ੍ਵਾ ਪਵਤ੍ਤਮਾਨਾ ਸਮ੍ਮਾਦਿਟ੍ਠਿਆਦਯੋ ਅਰਿਯਮਗ੍ਗਧਮ੍ਮਾ ਅਨਵਸੇਸਕਿਲੇਸੇ ਸਮੁਚ੍ਛਿਨ੍ਦਨ੍ਤਿ. ਤੇਨੇਤ੍ਥ ਸਬ੍ਬਸ੍ਸਪਿ ਵਟ੍ਟਦੁਕ੍ਖਸ੍ਸ ਅਪ੍ਪਵਤ੍ਤਿ ਅਪਗਮੋ ਨਿਸ੍ਸਰਣਂ ਪਞ੍ਞਾਯਤਿ.

ਏਵਂ ਬ੍ਯਤਿਰੇਕਵਸੇਨ ਨਿਬ੍ਬਾਨਸ੍ਸ ਅਤ੍ਥਿਭਾਵਂ ਦਸ੍ਸੇਤ੍ਵਾ ਇਦਾਨਿ ਅਨ੍ਵਯਵਸੇਨਪਿ ਤਂ ਦਸ੍ਸੇਤੁਂ, ‘‘ਯਸ੍ਮਾ ਚ ਖੋ’’ਤਿਆਦਿ ਵੁਤ੍ਤਂ. ਤਂ ਵੁਤ੍ਤਤ੍ਥਮੇਵ. ਏਤ੍ਥ ਚ ਯਸ੍ਮਾ ‘‘ਅਪਚ੍ਚਯਾ ਧਮ੍ਮਾ, ਅਸਙ੍ਖਤਾ ਧਮ੍ਮਾ (ਧ. ਸ. ਦੁਕਮਾਤਿਕਾ ੭, ੮), ਅਤ੍ਥਿ, ਭਿਕ੍ਖਵੇ, ਤਦਾਯਤਨਂ, ਯਤ੍ਥ ਨੇਵ ਪਥਵੀ (ਉਦਾ. ੭੧), ਇਦਮ੍ਪਿ ਖੋ ਠਾਨਂ ਦੁਦ੍ਦਸਂ, ਯਦਿਦਂ ਸਬ੍ਬਸਙ੍ਖਾਰਸਮਥੋ ਸਬ੍ਬੂਪਧਿਪਟਿਨਿਸ੍ਸਗ੍ਗੋ (ਮਹਾਵ. ੮; ਮ. ਨਿ. ੧.੨੮੧; ੨.੩੩੭), ਅਸਙ੍ਖਤਞ੍ਚ ਵੋ, ਭਿਕ੍ਖਵੇ, ਧਮ੍ਮਂ ਦੇਸੇਸ੍ਸਾਮਿ ਅਸਙ੍ਖਤਗਾਮਿਨਿਞ੍ਚ ਪਟਿਪਦ’’ਨ੍ਤਿਆਦੀਹਿ (ਸਂ. ਨਿ. ੪.੩੬੬-੩੬੭) ਅਨੇਕੇਹਿ ਸੁਤ੍ਤਪਦੇਹਿ, ‘‘ਅਤ੍ਥਿ, ਭਿਕ੍ਖਵੇ, ਅਜਾਤ’’ਨ੍ਤਿ ਇਮਿਨਾਪਿ ਚ ਸੁਤ੍ਤੇਨ ਨਿਬ੍ਬਾਨਧਾਤੁਯਾ ਪਰਮਤ੍ਥਤੋ ਸਮ੍ਭਵੋ ਸਬ੍ਬਲੋਕਂ ਅਨੁਕਮ੍ਪਮਾਨੇਨ ਸਮ੍ਮਾਸਮ੍ਬੁਦ੍ਧੇਨ ਦੇਸਿਤੋ, ਤਸ੍ਮਾ ਯਦਿਪਿ ਤਤ੍ਥ ਅਪਚ੍ਚਕ੍ਖਕਾਰੀਨਮ੍ਪਿ ਵਿਞ੍ਞੂਨਂ ਕਙ੍ਖਾ ਵਾ ਵਿਮਤਿ ਵਾ ਨਤ੍ਥਿਯੇਵ. ਯੇ ਪਨ ਪਰਨੇਯ੍ਯਬੁਦ੍ਧਿਨੋ ਪੁਗ੍ਗਲਾ, ਤੇਸਂ ਵਿਮਤਿਵਿਨੋਦਨਤ੍ਥਂ ਅਯਮੇਤ੍ਥ ਅਧਿਪ੍ਪਾਯਨਿਦ੍ਧਾਰਣਮੁਖੇਨ ਯੁਤ੍ਤਿਵਿਚਾਰਣਾ – ਯਥਾ ਪਰਿਞ੍ਞੇਯ੍ਯਤਾਯ ਸਉਤ੍ਤਰਾਨਂ ਕਾਮਾਨਂ ਰੂਪਾਦੀਨਞ੍ਚ ਪਟਿਪਕ੍ਖਭੂਤਂ ਤਬ੍ਬਿਧੁਰਸਭਾਵਂ ਨਿਸ੍ਸਰਣਂ ਪਞ੍ਞਾਯਤਿ, ਏਵਂ ਤਂਸਭਾਵਾਨਂ ਸਬ੍ਬੇਸਮ੍ਪਿ ਸਙ੍ਖਤਧਮ੍ਮਾਨਂ ਪਟਿਪਕ੍ਖਭੂਤੇਨ ਤਬ੍ਬਿਧੁਰਸਭਾਵੇਨ ਨਿਸ੍ਸਰਣੇਨ ਭਵਿਤਬ੍ਬਂ. ਯਞ੍ਚੇਤਂ ਨਿਸ੍ਸਰਣਂ, ਸਾ ਅਸਙ੍ਖਤਾ ਧਾਤੁ. ਕਿਞ੍ਚ ਭਿਯ੍ਯੋ ਸਙ੍ਖਤਧਮ੍ਮਾਰਮ੍ਮਣਂ ਵਿਪਸ੍ਸਨਾਞਾਣਂ ਅਪਿ ਅਨੁਲੋਮਞਾਣਂ ਕਿਲੇਸੇ ਸਮੁਚ੍ਛੇਦਵਸੇਨ ਪਜਹਿਤੁਂ ਨ ਸਕ੍ਕੋਤਿ. ਤਥਾ ਸਮ੍ਮੁਤਿਸਚ੍ਚਾਰਮ੍ਮਣਂ ਪਠਮਜ੍ਝਾਨਾਦੀਸੁ ਞਾਣਂ ਵਿਕ੍ਖਮ੍ਭਨਵਸੇਨੇਵ ਕਿਲੇਸੇ ਪਜਹਤਿ, ਨ ਸਮੁਚ੍ਛੇਦਵਸੇਨ. ਇਤਿ ਸਙ੍ਖਤਧਮ੍ਮਾਰਮ੍ਮਣਸ੍ਸ ਸਮ੍ਮੁਤਿਸਚ੍ਚਾਰਮ੍ਮਣਸ੍ਸ ਚ ਞਾਣਸ੍ਸ ਕਿਲੇਸਾਨਂ ਸਮੁਚ੍ਛੇਦਪ੍ਪਹਾਨੇ ਅਸਮਤ੍ਥਭਾਵਤੋ ਤੇਸਂ ਸਮੁਚ੍ਛੇਦਪ੍ਪਹਾਨਕਰਸ੍ਸ ਅਰਿਯਮਗ੍ਗਞਾਣਸ੍ਸ ਤਦੁਭਯਵਿਪਰੀਤਸਭਾਵੇਨ ਆਰਮ੍ਮਣੇਨ ਭਵਿਤਬ੍ਬਂ, ਸਾ ਅਸਙ੍ਖਤਾ ਧਾਤੁ. ਤਥਾ ‘‘ਅਤ੍ਥਿ, ਭਿਕ੍ਖਵੇ, ਅਜਾਤਂ ਅਭੂਤਂ ਅਕਤਂ ਅਸਙ੍ਖਤ’’ਨ੍ਤਿ ਇਦਂ ਨਿਬ੍ਬਾਨਪਦਸ੍ਸ ਪਰਮਤ੍ਥਤੋ ਅਤ੍ਥਿਭਾਵਜੋਤਕਂ ਵਚਨਂ ਅਵਿਪਰੀਤਤ੍ਥਂ ਭਗਵਤਾ ਭਾਸਿਤਤ੍ਤਾ. ਯਞ੍ਹਿ ਭਗਵਤਾ ਭਾਸਿਤਂ, ਤਂ ਅਵਿਪਰੀਤਤ੍ਥਂ ਪਰਮਤ੍ਥਂ ਯਥਾ ਤਂ ‘‘ਸਬ੍ਬੇ ਸਙ੍ਖਾਰਾ ਅਨਿਚ੍ਚਾ, ਸਬ੍ਬੇ ਸਙ੍ਖਾਰਾ ਦੁਕ੍ਖਾ, ਸਬ੍ਬੇ ਧਮ੍ਮਾ ਅਨਤ੍ਤਾ’’ਤਿ (ਅ. ਨਿ. ੩.੧੩੭; ਮਹਾਨਿ. ੨੭), ਤਥਾ ਨਿਬ੍ਬਾਨਸਦ੍ਦੋ ਕਤ੍ਥਚਿ ਵਿਸਯੇ ਯਥਾਭੂਤਪਰਮਤ੍ਥਵਿਸਯੋ ਉਪਚਾਰਮਤ੍ਤਵੁਤ੍ਤਿਸਬ੍ਭਾਵਤੋ ਸੇਯ੍ਯਥਾਪਿ ਸੀਹਸਦ੍ਦੋ. ਅਥ ਵਾ ਅਤ੍ਥੇਵ ਪਰਮਤ੍ਥਤੋ ਅਸਙ੍ਖਤਾ ਧਾਤੁ, ਇਤਰਤਬ੍ਬਿਪਰੀਤਵਿਨਿਮੁਤ੍ਤਸਭਾਵਤ੍ਤਾ ਸੇਯ੍ਯਥਾਪਿ ਪਥਵੀਧਾਤੁ ਵੇਦਨਾਤਿ. ਏਵਮਾਦੀਹਿ ਨਯੇਹਿ ਯੁਤ੍ਤਿਤੋਪਿ ਅਸਙ੍ਖਤਾਯ ਧਾਤੁਯਾ ਪਰਮਤ੍ਥਤੋ ਅਤ੍ਥਿਭਾਵੋ ਵੇਦਿਤਬ੍ਬੋ.

ਤਤਿਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪. ਚਤੁਤ੍ਥਨਿਬ੍ਬਾਨਪਟਿਸਂਯੁਤ੍ਤਸੁਤ੍ਤਵਣ੍ਣਨਾ

੭੪. ਚਤੁਤ੍ਥੇ ਅਥ ਖੋ ਭਗਵਾ ਏਤਮਤ੍ਥਂ ਵਿਦਿਤ੍ਵਾਤਿ ਤਦਾ ਕਿਰ ਭਗਵਤਾ ਅਨੇਕਪਰਿਯਾਯੇਨ ਸਨ੍ਦਸ੍ਸਨਾਦਿਵਸੇਨ ਨਿਬ੍ਬਾਨਪਟਿਸਂਯੁਤ੍ਤਾਯ ਧਮ੍ਮਦੇਸਨਾਯ ਕਤਾਯ ਤੇਸਂ ਭਿਕ੍ਖੂਨਂ ਏਤਦਹੋਸਿ – ‘‘ਅਯਂ ਤਾਵ ਭਗਵਤਾ ਅਮਤਮਹਾਨਿਬ੍ਬਾਨਧਾਤੁਯਾ ਅਨੇਕਾਕਾਰਵੋਕਾਰਂ ਆਨਿਸਂਸਂ ਦਸ੍ਸੇਨ੍ਤੇਨ ਅਨਞ੍ਞਸਾਧਾਰਣੋ ਆਨੁਭਾਵੋ ਪਕਾਸਿਤੋ, ਅਧਿਗਮੂਪਾਯੋ ਪਨਸ੍ਸਾ ਨ ਭਾਸਿਤੋ, ਕਥਂ ਨੁ ਖੋ ਪਟਿਪਜ੍ਜਨ੍ਤੇਹਿ ਅਮ੍ਹੇਹਿ ਅਯਂ ਅਧਿਗਨ੍ਤਬ੍ਬਾ’’ਤਿ. ਅਥ ਭਗਵਾ ਤੇਸਂ ਭਿਕ੍ਖੂਨਂ ਏਤਂ ਯਥਾਵੁਤ੍ਤਪਰਿਵਿਤਕ੍ਕਸਙ੍ਖਾਤਂ ਅਤ੍ਥਂ ਸਬ੍ਬਾਕਾਰਤੋ ਵਿਦਿਤ੍ਵਾ. ਇਮਂ ਉਦਾਨਨ੍ਤਿ ਤਣ੍ਹਾਵਸੇਨ ਕਤ੍ਥਚਿ ਅਨਿਸ੍ਸਿਤਸ੍ਸ ਪਸ੍ਸਦ੍ਧਕਾਯਚਿਤ੍ਤਸ੍ਸ ਵੀਥਿਪਟਿਪਨ੍ਨਵਿਪਸ੍ਸਨਸ੍ਸ ਅਰਿਯਮਗ੍ਗੇਨ ਅਨਵਸੇਸਤੋ ਤਣ੍ਹਾਪਹਾਨੇਨ ਨਿਬ੍ਬਾਨਾਧਿਗਮਵਿਭਾਵਨਂ ਇਮਂ ਉਦਾਨਂ ਉਦਾਨੇਸਿ.

ਤਤ੍ਥ ਨਿਸ੍ਸਿਤਸ੍ਸ ਚਲਿਤਨ੍ਤਿ ਰੂਪਾਦਿਸਙ੍ਖਾਰੇ ਤਣ੍ਹਾਦਿਟ੍ਠੀਹਿ ਨਿਸ੍ਸਿਤਸ੍ਸ ਚਲਿਤਂ ‘‘ਏਤਂ ਮਮ, ਏਸੋ ਮੇ ਅਤ੍ਤਾ’’ਤਿ ਤਣ੍ਹਾਦਿਟ੍ਠਿਵਿਪ੍ਫਨ੍ਦਿਤਂ ਹੋਤਿ. ਅਪ੍ਪਹੀਨਤਣ੍ਹਾਦਿਟ੍ਠਿਕਸ੍ਸ ਹਿ ਪੁਗ੍ਗਲਸ੍ਸ ਸੁਖਾਦੀਸੁ ਉਪ੍ਪਨ੍ਨੇਸੁ ਤਾਨਿ ਅਭਿਭੁਯ੍ਯ ਵਿਹਰਿਤੁਂ ਅਸਕ੍ਕੋਨ੍ਤਸ੍ਸ ‘‘ਮਮ ਵੇਦਨਾ, ਅਹਂ ਵੇਦਿਯਾਮੀ’’ਤਿਆਦਿਨਾ ਤਣ੍ਹਾਦਿਟ੍ਠਿਗਾਹਵਸੇਨ ਕੁਸਲਪ੍ਪਵਤ੍ਤਿਤੋ ਚਿਤ੍ਤਸਨ੍ਤਾਨਸ੍ਸ ਚਲਨਂ ਕਮ੍ਪਨਂ, ਅਵਕ੍ਖਲਿਤਂ ਵਾ ਹੋਤੀਤਿ ਅਤ੍ਥੋ. ਅਨਿਸ੍ਸਿਤਸ੍ਸ ਚਲਿਤਂ ਨਤ੍ਥੀਤਿ ਯੋ ਪਨ ਵਿਸੁਦ੍ਧਿਪਟਿਪਦਂ ਪਟਿਪਜ੍ਜਨ੍ਤੋ ਸਮਥਵਿਪਸ੍ਸਨਾਹਿ ਤਣ੍ਹਾਦਿਟ੍ਠਿਯੋ ਵਿਕ੍ਖਮ੍ਭੇਤ੍ਵਾ ਅਨਿਚ੍ਚਾਦਿਵਸੇਨ ਸਙ੍ਖਾਰੇ ਸਮ੍ਮਸਨ੍ਤੋ ਵਿਹਰਤਿ, ਤਸ੍ਸ ਤਂ ਅਨਿਸ੍ਸਿਤਸ੍ਸ ਯਥਾਵੁਤ੍ਤਂ ਚਲਿਤਂ ਅਵਕ੍ਖਲਿਤਂ, ਵਿਪ੍ਫਨ੍ਦਿਤਂ ਵਾ ਨਤ੍ਥਿ ਕਾਰਣਸ੍ਸ ਸੁਵਿਕ੍ਖਮ੍ਭਿਤਤ੍ਤਾ.

ਚਲਿਤੇ ਅਸਤੀਤਿ ਯਥਾਵੁਤ੍ਤੇ ਚਲਿਤੇ ਅਸਤਿ ਯਥਾ ਤਣ੍ਹਾਦਿਟ੍ਠਿਗਾਹਾ ਨਪ੍ਪਵਤ੍ਤਨ੍ਤਿ, ਤਥਾ ਵੀਥਿਪਟਿਪਨ੍ਨਾਯ ਵਿਪਸ੍ਸਨਾਯ ਤਂ ਉਸ੍ਸੁਕ੍ਕਨ੍ਤਸ੍ਸ. ਪਸ੍ਸਦ੍ਧੀਤਿ ਵਿਪਸ੍ਸਨਾਚਿਤ੍ਤਸਹਜਾਤਾਨਂ ਕਾਯਚਿਤ੍ਤਾਨਂ ਸਾਰਮ੍ਭਕਰਕਿਲੇਸਵੂਪਸਮਿਨੀ ਦੁਵਿਧਾਪਿ ਪਸ੍ਸਦ੍ਧਿ ਹੋਤਿ. ਪਸ੍ਸਦ੍ਧਿਯਾ ਸਤਿ ਨਤਿ ਨ ਹੋਤੀਤਿ ਪੁਬ੍ਬੇਨਾਪਰਂ ਵਿਸੇਸਯੁਤ੍ਤਾਯ ਪਸ੍ਸਦ੍ਧਿਯਾ ਸਤਿ ਅਨਵਜ੍ਜਸੁਖਾਧਿਟ੍ਠਾਨਂ ਸਮਾਧਿਂ ਵਡ੍ਢੇਤ੍ਵਾ ਤਂ ਪਞ੍ਞਾਯ ਸਮਵਾਯਕਰਣੇਨ ਸਮਥਵਿਪਸ੍ਸਨਂ ਯੁਗਨਦ੍ਧਂ ਯੋਜੇਤ੍ਵਾ ਮਗ੍ਗਪਰਮ੍ਪਰਾਯ ਕਿਲੇਸੇ ਖੇਪੇਨ੍ਤਸ੍ਸ ਕਾਮਭਵਾਦੀਸੁ ਨਮਨਤੋ ‘‘ਨਤੀ’’ਤਿ ਲਦ੍ਧਨਾਮਾ ਤਣ੍ਹਾ ਅਰਹਤ੍ਤਮਗ੍ਗਕ੍ਖਣੇ ਅਨਵਸੇਸਤੋ ਨ ਹੋਤਿ, ਅਨੁਪ੍ਪਤ੍ਤਿਧਮ੍ਮਤਂ ਆਪਾਦਿਤਤ੍ਤਾ ਨ ਉਪ੍ਪਜ੍ਜਤੀਤਿ ਅਤ੍ਥੋ.

ਨਤਿਯਾ ਅਸਤੀਤਿ ਅਰਹਤ੍ਤਮਗ੍ਗੇਨ ਤਣ੍ਹਾਯ ਸੁਪ੍ਪਹੀਨਤ੍ਤਾ ਭਵਾਦਿਅਤ੍ਥਾਯ ਆਲਯਨਿਕਨ੍ਤਿ ਪਰਿਯੁਟ੍ਠਾਨੇ ਅਸਤਿ. ਆਗਤਿਗਤਿ ਨ ਹੋਤੀਤਿ ਪਟਿਸਨ੍ਧਿਵਸੇਨ ਇਧ ਆਗਤਿ ਆਗਮਨਂ ਚੁਤਿਵਸੇਨ ਗਤਿ ਇਤੋ ਪਰਲੋਕਗਮਨਂ ਪੇਚ੍ਚਭਾਵੋ ਨ ਹੋਤਿ ਨ ਪਵਤ੍ਤਤਿ. ਆਗਤਿਗਤਿਯਾ ਅਸਤੀਤਿ ਵੁਤ੍ਤਨਯੇਨ ਆਗਤਿਯਾ ਚ ਗਤਿਯਾ ਚ ਅਸਤਿ. ਚੁਤੂਪਪਾਤੋ ਨ ਹੋਤੀਤਿ ਅਪਰਾਪਰਂ ਚਵਨੁਪਪਜ੍ਜਨਂ ਨ ਹੋਤਿ ਨ ਪਵਤ੍ਤਤਿ. ਅਸਤਿ ਹਿ ਕਿਲੇਸਵਟ੍ਟੇ ਕਮ੍ਮਵਟ੍ਟਂ ਪਚ੍ਛਿਨ੍ਨਮੇਵ, ਪਚ੍ਛਿਨ੍ਨੇ ਚ ਤਸ੍ਮਿਂ ਕੁਤੋ ਵਿਪਾਕਵਟ੍ਟਸ੍ਸ ਸਮ੍ਭਵੋ. ਤੇਨਾਹ – ‘‘ਚੁਤੂਪਪਾਤੇ ਅਸਤਿ ਨੇਵਿਧ ਨ ਹੁਰ’’ਨ੍ਤਿਆਦਿ. ਤਤ੍ਥ ਯਂ ਵਤ੍ਤਬ੍ਬਂ, ਤਂ ਹੇਟ੍ਠਾ ਬਾਹਿਯਸੁਤ੍ਤੇ ਵਿਤ੍ਥਾਰਤੋ ਵੁਤ੍ਤਮੇਵ. ਤਸ੍ਮਾ ਤਤ੍ਥ ਵੁਤ੍ਤਨਯੇਨੇਵ ਅਤ੍ਥੋ ਵੇਦਿਤਬ੍ਬੋ.

ਇਤਿ ਭਗਵਾ ਇਧਾਪਿ ਤੇਸਂ ਭਿਕ੍ਖੂਨਂ ਅਨਵਸੇਸਤੋ ਵਟ੍ਟਦੁਕ੍ਖਵੂਪਸਮਹੇਤੁਭੂਤਂ ਅਮਤਮਹਾਨਿਬ੍ਬਾਨਸ੍ਸ ਆਨੁਭਾਵਂ ਸਮ੍ਮਾਪਟਿਪਤ੍ਤਿਯਾ ਪਕਾਸੇਤਿ.

ਚਤੁਤ੍ਥਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫. ਚੁਨ੍ਦਸੁਤ੍ਤਵਣ੍ਣਨਾ

੭੫. ਪਞ੍ਚਮੇ ਮਲ੍ਲੇਸੂਤਿ ਏਵਂਨਾਮਕੇ ਜਨਪਦੇ. ਮਹਤਾ ਭਿਕ੍ਖੁਸਙ੍ਘੇਨਾਤਿ ਗੁਣਮਹਤ੍ਤਸਙ੍ਖ੍ਯਾਮਹਤ੍ਤੇਹਿ ਮਹਤਾ. ਸੋ ਹਿ ਭਿਕ੍ਖੁਸਙ੍ਘੋ ਸੀਲਾਦਿਗੁਣਵਿਸੇਸਯੋਗੇਨਪਿ ਮਹਾ ਤਤ੍ਥ ਸਬ੍ਬਪਚ੍ਛਿਮਕਸ੍ਸ ਸੋਤਾਪਨ੍ਨਭਾਵਤੋ, ਸਙ੍ਖ੍ਯਾਮਹਤ੍ਤੇਨਪਿ ਮਹਾ ਅਪਰਿਚ੍ਛਿਨ੍ਨਗਣਨਤ੍ਤਾ. ਆਯੁਸਙ੍ਖਾਰੋਸ੍ਸਜ੍ਜਨਤੋ ਪਟ੍ਠਾਯ ਹਿ ਆਗਤਾਗਤਾ ਭਿਕ੍ਖੂ ਨ ਪਕ੍ਕਮਿਂਸੁ. ਚੁਨ੍ਦਸ੍ਸਾਤਿ ਏਵਂਨਾਮਕਸ੍ਸ. ਕਮ੍ਮਾਰਪੁਤ੍ਤਸ੍ਸਾਤਿ ਸੁਵਣ੍ਣਕਾਰਪੁਤ੍ਤਸ੍ਸ. ਸੋ ਕਿਰ ਅਡ੍ਢੋ ਮਹਾਕੁਟੁਮ੍ਬਿਕੋ ਭਗਵਤੋ ਪਠਮਦਸ੍ਸਨੇਨੇਵ ਸੋਤਾਪਨ੍ਨੋ ਹੁਤ੍ਵਾ ਅਤ੍ਤਨੋ ਅਮ੍ਬਵਨੇ ਸਤ੍ਥੁਵਸਨਾਨੁਚ੍ਛਵਿਕਂ ਗਨ੍ਧਕੁਟਿਂ, ਭਿਕ੍ਖੁਸਙ੍ਘਸ੍ਸ ਚ ਰਤ੍ਤਿਟ੍ਠਾਨਦਿਵਾਟ੍ਠਾਨਉਪਟ੍ਠਾਨਸਾਲਾਕੁਟਿਮਣ੍ਡਪਚਙ੍ਕਮਨਾਦਿਕੇ ਚ ਸਮ੍ਪਾਦੇਤ੍ਵਾ ਪਾਕਾਰਪਰਿਕ੍ਖਿਤ੍ਤਂ ਦ੍ਵਾਰਕੋਟ੍ਠਕਯੁਤ੍ਤਂ ਵਿਹਾਰਂ ਕਤ੍ਵਾ ਬੁਦ੍ਧਪ੍ਪਮੁਖਸ੍ਸ ਸਙ੍ਘਸ੍ਸ ਨਿਯ੍ਯਾਦੇਸਿ. ਤਂ ਸਨ੍ਧਾਯ ਵੁਤ੍ਤਂ – ‘‘ਤਤ੍ਰ ਸੁਦਂ ਭਗਵਾ ਪਾਵਾਯਂ ਵਿਹਰਤਿ ਚੁਨ੍ਦਸ੍ਸ ਕਮ੍ਮਾਰਪੁਤ੍ਤਸ੍ਸ ਅਮ੍ਬਵਨੇ’’ਤਿ.

ਪਟਿਯਾਦਾਪੇਤ੍ਵਾਤਿ ਸਮ੍ਪਾਦੇਤ੍ਵਾ. ‘‘ਸੂਕਰਮਦ੍ਦਵਨ੍ਤਿ ਸੂਕਰਸ੍ਸ ਮੁਦੁਸਿਨਿਦ੍ਧਂ ਪਵਤ੍ਤਮਂਸ’’ਨ੍ਤਿ ਮਹਾਅਟ੍ਠਕਥਾਯਂ ਵੁਤ੍ਤਂ. ਕੇਚਿ ਪਨ ‘‘ਸੂਕਰਮਦ੍ਦਵਨ੍ਤਿ ਨ ਸੂਕਰਮਂਸਂ, ਸੂਕਰੇਹਿ ਮਦ੍ਦਿਤਵਂਸਕਲ਼ੀਰੋ’’ਤਿ ਵਦਨ੍ਤਿ. ਅਞ੍ਞੇ ‘‘ਸੂਕਰੇਹਿ ਮਦ੍ਦਿਤਪ੍ਪਦੇਸੇ ਜਾਤਂ ਅਹਿਛਤ੍ਤਕ’’ਨ੍ਤਿ. ਅਪਰੇ ਪਨ ‘‘ਸੂਕਰਮਦ੍ਦਵਂ ਨਾਮ ਏਕਂ ਰਸਾਯਨ’’ਨ੍ਤਿ ਭਣਿਂਸੁ. ਤਞ੍ਹਿ ਚੁਨ੍ਦੋ ਕਮ੍ਮਾਰਪੁਤ੍ਤੋ ‘‘ਅਜ੍ਜ ਭਗਵਾ ਪਰਿਨਿਬ੍ਬਾਯਿਸ੍ਸਤੀ’’ਤਿ ਸੁਤ੍ਵਾ ‘‘ਅਪ੍ਪੇਵ ਨਾਮ ਨਂ ਪਰਿਭੁਞ੍ਜਿਤ੍ਵਾ ਚਿਰਤਰਂ ਤਿਟ੍ਠੇਯ੍ਯਾ’’ਤਿ ਸਤ੍ਥੁ ਚਿਰਜੀਵਿਤੁਕਮ੍ਯਤਾਯ ਅਦਾਸੀਤਿ ਵਦਨ੍ਤਿ.

ਤੇਨ ਮਂ ਪਰਿਵਿਸਾਤਿ ਤੇਨ ਮਮਂ ਭੋਜੇਹਿ. ਕਸ੍ਮਾ ਭਗਵਾ ਏਵਮਾਹ? ਪਰਾਨੁਦ੍ਦਯਤਾਯ. ਤਞ੍ਚ ਕਾਰਣਂ ਪਾਲ਼ਿਯਂ ਵੁਤ੍ਤਮੇਵ. ਤੇਨ ਅਭਿਹਟਭਿਕ੍ਖਾਯ ਪਰੇਸਂ ਅਪਰਿਭੋਗਾਰਹਤੋ ਚ ਤਥਾ ਵਤ੍ਤੁਂ ਵਟ੍ਟਤੀਤਿ ਦਸ੍ਸਿਤਂ ਹੋਤਿ. ਤਸ੍ਮਿਂ ਕਿਰ ਸੂਕਰਮਦ੍ਦਵੇ ਦ੍ਵਿਸਹਸ੍ਸਦੀਪਪਰਿਵਾਰੇਸੁ ਚਤੂਸੁ ਮਹਾਦੀਪੇਸੁ ਦੇਵਤਾ ਓਜਂ ਪਕ੍ਖਿਪਿਂਸੁ. ਤਸ੍ਮਾ ਤਂ ਅਞ੍ਞੋ ਕੋਚਿ ਸਮ੍ਮਾ ਜੀਰਾਪੇਤੁਂ ਨ ਸਕ੍ਕੋਤਿ, ਤਮਤ੍ਥਂ ਪਕਾਸੇਨ੍ਤੋ ਸਤ੍ਥਾ ਪਰੂਪਵਾਦਮੋਚਨਤ੍ਥਂ ‘‘ਨਾਹਂ ਤਂ, ਚੁਨ੍ਦ, ਪਸ੍ਸਾਮੀ’’ਤਿਆਦਿਨਾ ਸੀਹਨਾਦਂ ਨਦਿ. ਯੇ ਹਿ ਪਰੇ ਉਪਵਦੇਯ੍ਯੁਂ ‘‘ਅਤ੍ਤਨਾ ਪਰਿਭੁਤ੍ਤਾਵਸੇਸਂ ਨੇਵ ਭਿਕ੍ਖੂਨਂ, ਨ ਅਞ੍ਞੇਸਂ ਮਨੁਸ੍ਸਾਨਂ ਅਦਾਸਿ, ਆਵਾਟੇ ਨਿਖਣਾਪੇਤ੍ਵਾ ਵਿਨਾਸੇਸੀ’’ਤਿ, ‘‘ਤੇਸਂ ਵਚਨੋਕਾਸੋ ਮਾ ਹੋਤੂ’’ਤਿ ਪਰੂਪਵਾਦਮੋਚਨਤ੍ਥਂ ਸੀਹਨਾਦਂ ਨਦਿ.

ਤਤ੍ਥ ਸਦੇਵਕੇਤਿਆਦੀਸੁ ਸਹ ਦੇਵੇਹੀਤਿ ਸਦੇਵਕੋ, ਸਹ ਮਾਰੇਨਾਤਿ ਸਮਾਰਕੋ, ਸਹ ਬ੍ਰਹ੍ਮੁਨਾਤਿ ਸਬ੍ਰਹ੍ਮਕੋ, ਸਹ ਸਮਣਬ੍ਰਾਹ੍ਮਣੇਹੀਤਿ ਸਸ੍ਸਮਣਬ੍ਰਾਹ੍ਮਣੀ, ਪਜਾਤਤ੍ਤਾ ਪਜਾ, ਸਹ ਦੇਵਮਨੁਸ੍ਸੇਹੀਤਿ ਸਦੇਵਮਨੁਸ੍ਸਾ. ਤਸ੍ਮਿਂ ਸਦੇਵਕੇ ਲੋਕੇ…ਪੇ… ਸਦੇਵਮਨੁਸ੍ਸਾਯ. ਤਤ੍ਥ ਸਦੇਵਕਵਚਨੇਨ ਪਞ੍ਚਕਾਮਾਵਚਰਦੇਵਗ੍ਗਹਣਂ, ਸਮਾਰਕਵਚਨੇਨ ਛਟ੍ਠਕਾਮਾਵਚਰਦੇਵਗ੍ਗਹਣਂ, ਸਬ੍ਰਹ੍ਮਕਵਚਨੇਨ ਬ੍ਰਹ੍ਮਕਾਯਿਕਾਦਿਬ੍ਰਹ੍ਮਗ੍ਗਹਣਂ, ਸਸ੍ਸਮਣਬ੍ਰਾਹ੍ਮਣੀਵਚਨੇਨ ਸਾਸਨਸ੍ਸ ਪਚ੍ਚਤ੍ਥਿਕਪਚ੍ਚਾਮਿਤ੍ਤਸਮਣਬ੍ਰਾਹ੍ਮਣਗ੍ਗਹਣਂ ਸਮਿਤਪਾਪਬਾਹਿਤਪਾਪਸਮਣਬ੍ਰਾਹ੍ਮਣਗ੍ਗਹਣਞ੍ਚ, ਪਜਾਵਚਨੇਨ ਸਤ੍ਤਲੋਕਗ੍ਗਹਣਂ, ਸਦੇਵਮਨੁਸ੍ਸਵਚਨੇਨ ਸਮ੍ਮੁਤਿਦੇਵਅਵਸੇਸਮਨੁਸ੍ਸਗ੍ਗਹਣਂ. ਏਵਮੇਤ੍ਥ ਤੀਹਿ ਪਦੇਹਿ ਓਕਾਸਲੋਕਵਸੇਨ, ਦ੍ਵੀਹਿ ਪਜਾਵਸੇਨ ਸਤ੍ਤਲੋਕੋ ਗਹਿਤੋਤਿ ਵੇਦਿਤਬ੍ਬੋ. ਅਪਰੋ ਨਯੋ – ਸਦੇਵਕਵਚਨੇਨ ਅਰੂਪਾਵਚਰਲੋਕੋ ਗਹਿਤੋ, ਸਮਾਰਕਵਚਨੇਨ ਛਕਾਮਾਵਚਰਦੇਵਲੋਕੋ, ਸਬ੍ਰਹ੍ਮਕਵਚਨੇਨ ਰੂਪੀ ਬ੍ਰਹ੍ਮਲੋਕੋ, ਸਸ੍ਸਮਣਬ੍ਰਾਹ੍ਮਣਵਚਨੇਨ ਚਤੁਪਰਿਸਵਸੇਨ ਸਮ੍ਮੁਤਿਦੇਵੇਹਿ ਸਹ ਮਨੁਸ੍ਸਲੋਕੋ, ਅਵਸੇਸਸਤ੍ਤਲੋਕੋ ਵਾ ਗਹਿਤੋਤਿ ਵੇਦਿਤਬ੍ਬੋ.

ਭੁਤ੍ਤਾਵਿਸ੍ਸਾਤਿ ਭੁਤ੍ਤਵਤੋ. ਖਰੋਤਿ ਫਰੁਸੋ. ਆਬਾਧੋਤਿ ਵਿਸਭਾਗਰੋਗੋ. ਪਬਾਲ਼੍ਹਾਤਿ ਬਲਵਤਿਯੋ. ਮਾਰਣਨ੍ਤਿਕਾਤਿ ਮਰਣਨ੍ਤਾ ਮਰਣਸਮੀਪਪਾਪਨਸਮਤ੍ਥਾ. ਸਤੋ ਸਮ੍ਪਜਾਨੋ ਅਧਿਵਾਸੇਸੀਤਿ ਸਤਿਂ ਉਪਟ੍ਠਿਤਂ ਕਤ੍ਵਾ ਞਾਣੇਨ ਪਰਿਚ੍ਛਿਨ੍ਦਿਤ੍ਵਾ ਅਧਿਵਾਸੇਸਿ. ਅਵਿਹਞ੍ਞਮਾਨੋਤਿ ਵੇਦਨਾਨੁਵਤ੍ਤਨਵਸੇਨ ਅਸਲ੍ਲਕ੍ਖਿਤਧਮ੍ਮੋ ਵਿਯ ਅਪਰਾਪਰਂ ਪਰਿਵਤ੍ਤਨਂ ਅਕਰੋਨ੍ਤੋ ਅਪੀਲ਼ਿਯਮਾਨੋ ਅਦੁਕ੍ਖਿਯਮਾਨੋ ਵਿਯ ਅਧਿਵਾਸੇਸਿ. ਭਗਵਤੋ ਹਿ ਵੇਲ਼ੁਵਗਾਮਕੇਯੇਵ ਤਾ ਵੇਦਨਾ ਉਪ੍ਪਨ੍ਨਾ, ਸਮਾਪਤ੍ਤਿਬਲੇਨ ਪਨ ਵਿਕ੍ਖਮ੍ਭਿਤਾ ਯਾਵ ਪਰਿਨਿਬ੍ਬਾਨਦਿਵਸਾ ਨ ਉਪ੍ਪਜ੍ਜਿਂਸੁ ਦਿਵਸੇ ਦਿਵਸੇ ਸਮਾਪਤ੍ਤੀਹਿ ਪਟਿਪਣਾਮਨਤੋ. ਤਂ ਦਿਵਸਂ ਪਨ ਪਰਿਨਿਬ੍ਬਾਯਿਤੁਕਾਮੋ ‘‘ਕੋਟਿਸਹਸ੍ਸਹਤ੍ਥੀਨਂ ਬਲਂ ਧਾਰੇਨ੍ਤਾਨਂ ਵਜਿਰਸਙ੍ਘਾਤਸਮਾਨਕਾਯਾਨਂ ਅਪਰਿਮਿਤਕਾਲਂ ਉਪਚਿਤਪੁਞ੍ਞਸਮ੍ਭਾਰਾਨਮ੍ਪਿ ਭਵੇ ਸਤਿ ਏਵਰੂਪਾ ਵੇਦਨਾ ਪਵਤ੍ਤਨ੍ਤਿ, ਕਿਮਙ੍ਗਂ ਪਨ ਅਞ੍ਞੇਸ’’ਨ੍ਤਿ ਸਤ੍ਤਾਨਂ ਸਂਵੇਗਜਨਨਤ੍ਥਂ ਸਮਾਪਤ੍ਤਿਂ ਨ ਸਮਾਪਜ੍ਜਿ, ਤੇਨ ਵੇਦਨਾ ਖਰਾ ਵਤ੍ਤਿਂਸੁ. ਆਯਾਮਾਤਿ ਏਹਿ ਯਾਮ.

ਚੁਨ੍ਦਸ੍ਸ ਭਤ੍ਤਂ ਭੁਞ੍ਜਿਤ੍ਵਾਤਿਆਦਿਕਾ ਅਪਰਭਾਗੇ ਧਮ੍ਮਸਙ੍ਗਾਹਕੇਹਿ ਠਪਿਤਾ ਗਾਥਾ. ਤਤ੍ਥ ਭੁਤ੍ਤਸ੍ਸ ਚ ਸੂਕਰਮਦ੍ਦਵੇਨਾਤਿ ਭੁਤ੍ਤਸ੍ਸ ਉਦਪਾਦਿ, ਨ ਪਨ ਭੁਤ੍ਤਪਚ੍ਚਯਾ. ਯਦਿ ਹਿ ਅਭੁਤ੍ਤਸ੍ਸ ਉਪ੍ਪਜ੍ਜਿਸ੍ਸਾ, ਅਤਿਖਰੋ ਅਭਵਿਸ੍ਸਾ, ਸਿਨਿਦ੍ਧਭੋਜਨਂ ਪਨ ਭੁਤ੍ਤਤ੍ਤਾ ਤਨੁਕਾ ਵੇਦਨਾ ਅਹੋਸਿ, ਤੇਨੇਵ ਪਦਸਾ ਗਨ੍ਤੁਂ ਅਸਕ੍ਖਿ. ਏਤੇਨ ਯ੍ਵਾਯਂ ‘‘ਯਸ੍ਸ ਤਂ ਪਰਿਭੁਤ੍ਤਂ ਸਮ੍ਮਾ ਪਰਿਣਾਮਂ ਗਚ੍ਛੇਯ੍ਯ ਅਞ੍ਞਤ੍ਰ ਤਥਾਗਤਸ੍ਸਾ’’ਤਿ ਸੀਹਨਾਦੋ ਨਦਿਤੋ, ਤਸ੍ਸ ਸਾਤ੍ਥਕਤਾ ਦਸ੍ਸਿਤਾ. ਬੁਦ੍ਧਾਨਞ੍ਹਿ ਅਟ੍ਠਾਨੇ ਗਜ੍ਜਿਤਂ ਨਾਮ ਨਤ੍ਥਿ. ਯਸ੍ਮਾ ਤਂ ਪਰਿਭੁਤ੍ਤਂ ਭਗਵਤੋ ਨ ਕਿਞ੍ਚਿ ਵਿਕਾਰਂ ਉਪ੍ਪਾਦੇਸਿ, ਕਮ੍ਮੇਨ ਪਨ ਲਦ੍ਧੋਕਾਸੇਨ ਉਪ੍ਪਾਦਿਯਮਾਨਂ ਵਿਕਾਰਂ ਅਪ੍ਪਮਤ੍ਤਤਾਯ ਉਪਸਮੇਨ੍ਤੋ ਸਰੀਰੇ ਬਲਂ ਉਪ੍ਪਾਦੇਸਿ, ਯੇਨ ਯਥਾ ਵਕ੍ਖਮਾਨਂ ਤਿਵਿਧਂ ਪਯੋਜਨਂ ਸਮ੍ਪਾਦੇਸਿ, ਤਸ੍ਮਾ ਸਮ੍ਮਦੇਵ ਤਂ ਪਰਿਣਾਮਂ ਗਤਂ, ਮਾਰਣਨ੍ਤਿਕਤ੍ਤਾ ਪਨ ਵੇਦਨਾਨਂ ਅਵਿਞ੍ਞਾਤਂ ਅਪਾਕਟਂ ਅਹੋਸੀਤਿ. ਵਿਰਿਚ੍ਚਮਾਨੋਤਿ ਅਭਿਣ੍ਹਂ ਪਵਤ੍ਤਲੋਹਿਤਵਿਰੇਚਨੋਵ ਸਮਾਨੋ. ਅਵੋਚਾਤਿ ਅਤ੍ਤਨਾ ਇਚ੍ਛਿਤਟ੍ਠਾਨੇ ਪਰਿਨਿਬ੍ਬਾਨਤ੍ਥਾਯ ਏਵਮਾਹ.

ਕਸ੍ਮਾ ਪਨ ਭਗਵਾ ਏਵਂ ਰੋਗੇ ਉਪ੍ਪਨ੍ਨੇ ਕੁਸਿਨਾਰਂ ਅਗਮਾਸਿ, ਕਿਂ ਅਞ੍ਞਤ੍ਥ ਨ ਸਕ੍ਕਾ ਪਰਿਨਿਬ੍ਬਾਯਿਤੁਨ੍ਤਿ? ਪਰਿਨਿਬ੍ਬਾਯਿਤੁਂ ਨਾਮ ਨ ਕਤ੍ਥਚਿ ਨ ਸਕ੍ਕਾ, ਏਵਂ ਪਨ ਚਿਨ੍ਤੇਸਿ – ਮਯਿ ਕੁਸਿਨਾਰਂ ਗਤੇ ਮਹਾਸੁਦਸ੍ਸਨਸੁਤ੍ਤਦੇਸਨਾਯ (ਦੀ. ਨਿ. ੨.੨੪੧) ਅਟ੍ਠੁਪ੍ਪਤ੍ਤਿ ਭਵਿਸ੍ਸਤਿ, ਤਾਯ ਯਾ ਦੇਵਲੋਕੇ ਅਨੁਭਵਿਤਬ੍ਬਸਦਿਸਾ ਸਮ੍ਪਤ੍ਤਿ ਮਨੁਸ੍ਸਲੋਕੇ ਮਯਾ ਅਨੁਭੂਤਾ, ਤਂ ਦ੍ਵੀਹਿ ਭਾਣਵਾਰੇਹਿ ਪਟਿਮਣ੍ਡੇਤ੍ਵਾ ਦੇਸੇਸ੍ਸਾਮਿ, ਤਂ ਸੁਤ੍ਵਾ ਬਹੂ ਜਨਾ ਕੁਸਲਂ ਕਤ੍ਤਬ੍ਬਂ ਮਞ੍ਞਿਸ੍ਸਨ੍ਤਿ. ਸੁਭਦ੍ਦੋਪਿ ਕਤ੍ਥ ਮਂ ਉਪਸਙ੍ਕਮਿਤ੍ਵਾ ਪਞ੍ਹਂ ਪੁਚ੍ਛਿਤ੍ਵਾ ਵਿਸ੍ਸਜ੍ਜਨਪਰਿਯੋਸਾਨੇ ਸਰਣੇਸੁ ਪਤਿਟ੍ਠਾਯ ਪਬ੍ਬਜਿਤ੍ਵਾ ਲਦ੍ਧੂਪਸਮ੍ਪਦੋ ਕਮ੍ਮਟ੍ਠਾਨਂ ਭਾਵੇਤ੍ਵਾ ਮਯਿ ਧਰਨ੍ਤੇਯੇਵ ਅਰਹਤ੍ਤਂ ਪਤ੍ਵਾ ਪਚ੍ਛਿਮਸਾਵਕੋ ਨਾਮ ਭਵਿਸ੍ਸਤਿ. ਅਞ੍ਞਤ੍ਥ ਮਯਿ ਪਰਿਨਿਬ੍ਬੁਤੇ ਧਾਤੁਨਿਮਿਤ੍ਤਂ ਮਹਾਕਲਹੋ ਭਵਿਸ੍ਸਤਿ, ਲੋਹਿਤਂ ਨਦੀ ਵਿਯ ਸਨ੍ਦਿਸ੍ਸਤਿ. ਕੁਸਿਨਾਰਾਯਂ ਪਨ ਪਰਿਨਿਬ੍ਬੁਤੇ ਦੋਣਬ੍ਰਾਹ੍ਮਣੋ ਤਂ ਵਿਵਾਦਂ ਵੂਪਸਮੇਤ੍ਵਾ ਧਾਤੁਯੋ ਵਿਭਜਿਤ੍ਵਾ ਦਸ੍ਸਤੀਤਿ ਇਮਾਨਿ ਤੀਣਿ ਕਾਰਣਾਨਿ ਪਸ੍ਸਨ੍ਤੋ ਭਗਵਾ ਮਹਤਾ ਉਸ੍ਸਾਹੇਨ ਕੁਸਿਨਾਰਂ ਅਗਮਾਸਿ.

ਇਙ੍ਘਾਤਿ ਚੋਦਨਤ੍ਥੇ ਨਿਪਾਤੋ. ਕਿਲਨ੍ਤੋਸ੍ਮੀਤਿ ਪਰਿਸ੍ਸਨ੍ਤੋ ਅਸ੍ਮਿ. ਤੇਨ ਯਥਾਵੁਤ੍ਤਵੇਦਨਾਨਂ ਬਲਵਭਾਵਂ ਏਵ ਦਸ੍ਸੇਤਿ. ਭਗਵਾ ਹਿ ਅਤ੍ਤਨੋ ਆਨੁਭਾਵੇਨ ਤਦਾ ਪਦਸਾ ਅਗਮਾਸਿ, ਅਞ੍ਞੇਸਂ ਪਨ ਯਥਾ ਪਦੁਦ੍ਧਾਰਮ੍ਪਿ ਕਾਤੁਂ ਨ ਸਕ੍ਕਾ, ਤਥਾ ਵੇਦਨਾ ਤਿਖਿਣਾ ਖਰਾ ਕਟੁਕਾ ਵਤ੍ਤਿਂਸੁ. ਤੇਨੇਵਾਹ ‘‘ਨਿਸੀਦਿਸ੍ਸਾਮੀ’’ਤਿ.

ਇਦਾਨੀਤਿ ਅਧੁਨਾ. ਲੁਲ਼ਿਤਨ੍ਤਿ ਮਦ੍ਦਿਤਂ ਵਿਯ ਆਕੁਲਂ. ਆਵਿਲਨ੍ਤਿ ਆਲੁਲਂ. ਅਚ੍ਛੋਦਕਾਤਿ ਤਨੁਪਸਨ੍ਨਸਲਿਲਾ. ਸਾਤੋਦਕਾਤਿ ਮਧੁਰਤੋਯਾ. ਸੀਤੋਦਕਾਤਿ ਸੀਤਲਜਲਾ. ਸੇਤੋਦਕਾਤਿ ਨਿਕ੍ਕਦ੍ਦਮਾ. ਉਦਕਞ੍ਹਿ ਸਭਾਵਤੋ ਸੇਤਵਣ੍ਣਂ, ਭੂਮਿਵਸੇਨ ਕਦ੍ਦਮਾਵਿਲਤਾਯ ਚ ਅਞ੍ਞਾਦਿਸਂ ਹੋਤਿ, ਕਕੁਧਾਪਿ ਨਦੀ ਵਿਮਲਵਾਲਿਕਾ ਸਮੋਕਿਣ੍ਣਾ ਸੇਤਵਣ੍ਣਾ ਸਨ੍ਦਤਿ. ਤੇਨ ਵੁਤ੍ਤਂ ‘‘ਸੇਤੋਦਕਾ’’ਤਿ. ਸੁਪਤਿਤ੍ਥਾਤਿ ਸੁਨ੍ਦਰਤਿਤ੍ਥਾ. ਰਮਣੀਯਾਤਿ ਮਨੋਹਰਭੂਮਿਭਾਗਤਾਯ ਰਮਿਤਬ੍ਬਾ ਯਥਾਵੁਤ੍ਤਉਦਕਸਮ੍ਪਤ੍ਤਿਯਾ ਚ ਮਨੋਰਮਾ.

ਕਿਲਨ੍ਤੋਸ੍ਮਿ ਚੁਨ੍ਦਕ, ਨਿਪਜ੍ਜਿਸ੍ਸਾਮੀਤਿ ਤਥਾਗਤਸ੍ਸ ਹਿ –

‘‘ਕਾਲ਼ਾਵਕਞ੍ਚ ਗਙ੍ਗੇਯ੍ਯਂ, ਪਣ੍ਡਰਂ ਤਮ੍ਬਪਿਙ੍ਗਲਂ;

ਗਨ੍ਧਮਙ੍ਗਲਹੇਮਞ੍ਚ, ਉਪੋਸਥਛਦ੍ਦਨ੍ਤਿਮੇ ਦਸਾ’’ਤਿ. –

ਏਵਂ ਵੁਤ੍ਤੇਸੁ ਦਸਸੁ ਹਤ੍ਥਿਕੁਲੇਸੁ ਕਾਲ਼ਾਵਕਸਙ੍ਖਾਤਾਨਂ ਯਂ ਦਸਨ੍ਨਂ ਪਕਤਿਹਤ੍ਥੀਨਂ ਬਲਂ, ਤਂ ਏਕਸ੍ਸ ਗਙ੍ਗੇਯ੍ਯਸ੍ਸਾਤਿ ਏਵਂ ਦਸਗੁਣਿਤਾਯ ਗਣਨਾਯ ਪਕਤਿਹਤ੍ਥੀਨਂ ਕੋਟਿਸਹਸ੍ਸਬਲਪ੍ਪਮਾਣਂ ਸਰੀਰਬਲਂ. ਤਂ ਸਬ੍ਬਮ੍ਪਿ ਤਸ੍ਮਿਂ ਦਿਵਸੇ ਪਚ੍ਛਾਭਤ੍ਤਤੋ ਪਟ੍ਠਾਯ ਚਙ੍ਗਵਾਰੇ ਪਕ੍ਖਿਤ੍ਤਉਦਕਂ ਵਿਯ ਪਰਿਕ੍ਖਯਂ ਗਤਂ. ਪਾਵਾਯ ਤਿਗਾਵੁਤੇ ਕੁਸਿਨਾਰਾ. ਏਤਸ੍ਮਿਂ ਅਨ੍ਤਰੇ ਪਞ੍ਚਵੀਸਤਿਯਾ ਠਾਨੇਸੁ ਨਿਸੀਦਿਤ੍ਵਾ ਮਹਨ੍ਤਂ ਉਸ੍ਸਾਹਂ ਕਤ੍ਵਾ ਆਗਚ੍ਛਨ੍ਤੋ ਸੂਰਿਯਤ੍ਥਙ੍ਗਮਨਵੇਲਾਯ ਭਗਵਾ ਕੁਸਿਨਾਰਂ ਪਾਪੁਣੀਤਿ ਏਵਂ ‘‘ਰੋਗੋ ਨਾਮ ਸਬ੍ਬਂ ਆਰੋਗ੍ਯਂ ਮਦ੍ਦਨ੍ਤੋ ਆਗਚ੍ਛਤੀ’’ਤਿ ਇਮਮਤ੍ਥਂ ਦਸ੍ਸੇਨ੍ਤੋ ਸਦੇਵਕਸ੍ਸ ਲੋਕਸ੍ਸ ਸਂਵੇਗਕਰਂ ਵਾਚਂ ਭਾਸਨ੍ਤੋ ‘‘ਕਿਲਨ੍ਤੋਸ੍ਮਿ, ਚੁਨ੍ਦਕ, ਨਿਪਜ੍ਜਿਸ੍ਸਾਮੀ’’ਤਿ ਆਹ.

ਸੀਹਸੇਯ੍ਯਨ੍ਤਿ ਏਤ੍ਥ ਕਾਮਭੋਗੀਸੇਯ੍ਯਾ ਪੇਤਸੇਯ੍ਯਾ ਤਥਾਗਤਸੇਯ੍ਯਾ ਸੀਹਸੇਯ੍ਯਾਤਿ ਚਤਸ੍ਸੋ ਸੇਯ੍ਯਾ. ਤਤ੍ਥ ‘‘ਯੇਭੁਯ੍ਯੇਨ, ਭਿਕ੍ਖਵੇ, ਕਾਮਭੋਗੀ ਵਾਮੇਨ ਪਸ੍ਸੇਨ ਸੇਯ੍ਯਂ ਕਪ੍ਪੇਨ੍ਤੀ’’ਤਿ (ਅ. ਨਿ. ੪.੨੪੬) ਅਯਂ ਕਾਮਭੋਗੀਸੇਯ੍ਯਾ. ‘‘ਯੇਭੁਯ੍ਯੇਨ, ਭਿਕ੍ਖਵੇ, ਪੇਤਾ ਉਤ੍ਤਾਨਾ ਸੇਨ੍ਤੀ’’ਤਿ (ਅ. ਨਿ. ੪.੨੪੬) ਅਯਂ ਪੇਤਸੇਯ੍ਯਾ. ਚਤੁਤ੍ਥਜ੍ਝਾਨਂ ਤਥਾਗਤਸੇਯ੍ਯਾ. ‘‘ਸੀਹੋ, ਭਿਕ੍ਖਵੇ, ਮਿਗਰਾਜਾ ਦਕ੍ਖਿਣੇਨ ਪਸ੍ਸੇਨ ਸੇਯ੍ਯਂ ਕਪ੍ਪੇਤੀ’’ਤਿ (ਅ. ਨਿ. ੪.੨੪੬) ਅਯਂ ਸੀਹਸੇਯ੍ਯਾ. ਅਯਞ੍ਹਿ ਤੇਜੁਸ੍ਸਦਇਰਿਯਾਪਥਤ੍ਤਾ ਉਤ੍ਤਮਸੇਯ੍ਯਾ ਨਾਮ. ਤੇਨ ਵੁਤ੍ਤਂ – ‘‘ਦਕ੍ਖਿਣੇਨ ਪਸ੍ਸੇਨ ਸੀਹਸੇਯ੍ਯਂ ਕਪ੍ਪੇਸੀ’’ਤਿ. ਪਾਦੇ ਪਾਦਨ੍ਤਿ ਦਕ੍ਖਿਣਪਾਦੇ ਵਾਮਪਾਦਂ. ਅਚ੍ਚਾਧਾਯਾਤਿ ਅਤਿਆਧਾਯ, ਗੋਪ੍ਫਕਂ ਅਤਿਕ੍ਕਮ੍ਮ ਠਪੇਤ੍ਵਾ. ਗੋਪ੍ਫਕੇਨ ਹਿ ਗੋਪ੍ਫਕੇ, ਜਾਣੁਨਾ ਜਾਣੁਮ੍ਹਿ ਸਙ੍ਘਟ੍ਟਿਯਮਾਨੇ ਅਭਿਣ੍ਹਂ ਵੇਦਨਾ ਉਪ੍ਪਜ੍ਜਨ੍ਤਿ, ਸੇਯ੍ਯਾ ਫਾਸੁਕਾ ਨ ਹੋਤਿ. ਯਥਾ ਪਨ ਨ ਸਙ੍ਘਟ੍ਟੇਤਿ, ਏਵਂ ਅਤਿਕ੍ਕਮ੍ਮ ਠਪਿਤੇ ਵੇਦਨਾ ਨੁਪ੍ਪਜ੍ਜਨ੍ਤਿ, ਸੇਯ੍ਯਾ ਫਾਸੁਕਾ ਹੋਤਿ. ਤਸ੍ਮਾ ਏਵਂ ਨਿਪਜ੍ਜਿ.

ਗਨ੍ਤ੍ਵਾਨ ਬੁਦ੍ਧੋਤਿ ਇਮਾ ਗਾਥਾ ਅਪਰਭਾਗੇ ਧਮ੍ਮਸਙ੍ਗਾਹਕੇਹਿ ਠਪਿਤਾ. ਤਤ੍ਥ ਨਦਿਕਨ੍ਤਿ ਨਦਿਂ. ਅਪ੍ਪਟਿਮੋਧ ਲੋਕੇਤਿ ਅਪ੍ਪਟਿਮੋ ਇਧ ਇਮਸ੍ਮਿਂ ਸਦੇਵਕੇ ਲੋਕੇ. ਨ੍ਹਤ੍ਵਾ ਚ ਪਿਵਿਤ੍ਵਾ ਚੁਦਤਾਰੀਤਿ ਗਤ੍ਤਾਨਂ ਸੀਤਿਕਰਣਵਸੇਨ ਨ੍ਹਤ੍ਵਾ ਚ ਪਾਨੀਯਂ ਪਿਵਿਤ੍ਵਾ ਚ ਨਦਿਤੋ ਉਤ੍ਤਰਿ. ਤਦਾ ਕਿਰ ਭਗਵਤਿ ਨ੍ਹਾਯਨ੍ਤੇ ਅਨ੍ਤੋਨਦਿਯਂ ਮਚ੍ਛਕਚ੍ਛਪਾ, ਉਦਕਂ, ਉਭੋਸੁ ਤੀਰੇਸੁ ਵਨਸਣ੍ਡੋ, ਸਬ੍ਬੋ ਚ ਸੋ ਭੂਮਿਭਾਗੋਤਿ ਸਬ੍ਬਂ ਸੁਵਣ੍ਣਵਣ੍ਣਮੇਵ ਅਹੋਸਿ. ਪੁਰਕ੍ਖਤੋਤਿ ਗੁਣਵਿਸਿਟ੍ਠਸਤ੍ਤੁਤ੍ਤਮਗਰੁਭਾਵਤੋ ਸਦੇਵਕੇਨ ਲੋਕੇਨ ਪੂਜਾਸਮ੍ਮਾਨਵਸੇਨ ਪੁਰਕ੍ਖਤੋ. ਭਿਕ੍ਖੁਗਣਸ੍ਸ ਮਜ੍ਝੇਤਿ ਭਿਕ੍ਖੁਸਙ੍ਘਸ੍ਸ ਮਜ੍ਝੇ. ਤਦਾ ਭਿਕ੍ਖੂ ਭਗਵਤੋ ਵੇਦਨਾਨਂ ਅਧਿਮਤ੍ਤਭਾਵਂ ਵਿਦਿਤ੍ਵਾ ਆਸਨ੍ਨਾ ਹੁਤ੍ਵਾ ਸਮਨ੍ਤਤੋ ਪਰਿਵਾਰੇਤ੍ਵਾਵ ਗਚ੍ਛਨ੍ਤਿ. ਸਤ੍ਥਾਤਿ ਦਿਟ੍ਠਧਮ੍ਮਿਕਸਮ੍ਪਰਾਯਿਕਪਰਮਤ੍ਥੇਹਿ ਸਤ੍ਤਾਨਂ ਅਨੁਸਾਸਨਤੋ ਸਤ੍ਥਾ. ਪਵਤ੍ਤਾ ਭਗਵਾ ਇਧ ਧਮ੍ਮੇਤਿ ਭਾਗ੍ਯਵਨ੍ਤਤਾਦੀਹਿ ਭਗਵਾ ਇਧ ਸੀਲਾਦਿਸਾਸਨਧਮ੍ਮੇ ਪਵਤ੍ਤਾ, ਧਮ੍ਮੇ ਵਾ ਚਤੁਰਾਸੀਤਿਧਮ੍ਮਕ੍ਖਨ੍ਧਸਹਸ੍ਸਾਨਿ ਪਵਤ੍ਤਾ ਪਵਤ੍ਤੇਤਾ. ਅਮ੍ਬਵਨਨ੍ਤਿ ਤਸ੍ਸਾ ਏਵ ਨਦਿਯਾ ਤੀਰੇ ਅਮ੍ਬਵਨਂ. ਆਮਨ੍ਤਯਿ ਚੁਨ੍ਦਕਨ੍ਤਿ ਤਸ੍ਮਿਂ ਕਿਰ ਖਣੇ ਆਯਸ੍ਮਾ ਆਨਨ੍ਦੋ ਉਦਕਸਾਟਿਕਂ ਪੀਲ਼ੇਨ੍ਤੋ ਓਹੀਯਿ, ਚੁਨ੍ਦਕਤ੍ਥੇਰੋ ਸਮੀਪੇ ਅਹੋਸਿ. ਤਸ੍ਮਾ ਤਂ ਭਗਵਾ ਆਮਨ੍ਤਯਿ. ਪਮੁਖੇ ਨਿਸੀਦੀਤਿ ਵਤ੍ਤਸੀਸੇਨ ਸਤ੍ਥੁ ਪੁਰਤੋ ਨਿਸੀਦਿ ‘‘ਕਿਂ ਨੁ ਖੋ ਸਤ੍ਥਾ ਆਣਾਪੇਤੀ’’ਤਿ. ਏਤ੍ਤਾਵਤਾ ਧਮ੍ਮਭਣ੍ਡਾਗਾਰਿਕੋ ਅਨੁਪ੍ਪਤ੍ਤੋ. ਏਵਂ ਅਨੁਪ੍ਪਤ੍ਤਂ ਅਥ ਖੋ ਭਗਵਾ ਆਯਸ੍ਮਨ੍ਤਂ ਆਨਨ੍ਦਂ ਆਮਨ੍ਤੇਸਿ.

ਉਪਦਹੇਯ੍ਯਾਤਿ ਉਪ੍ਪਾਦੇਯ੍ਯ, ਵਿਪ੍ਪਟਿਸਾਰਸ੍ਸ ਉਪ੍ਪਾਦਕੋ ਕੋਚਿ ਪੁਰਿਸੋ ਸਿਯਾ ਅਪਿ ਭਵੇਯ੍ਯ. ਅਲਾਭਾਤਿ ਯੇ ਅਞ੍ਞੇਸਂ ਦਾਨਂ ਦਦਨ੍ਤਾਨਂ ਦਾਨਾਨਿਸਂਸਸਙ੍ਖਾਤਾ ਲਾਭਾ ਹੋਨ੍ਤਿ, ਤੇ ਅਲਾਭਾ. ਦੁਲ੍ਲਦ੍ਧਨ੍ਤਿ ਪੁਞ੍ਞਵਿਸੇਸੇਨ ਲਦ੍ਧਮ੍ਪਿ ਮਨੁਸ੍ਸਤ੍ਤਂ ਦੁਲ੍ਲਦ੍ਧਂ. ਯਸ੍ਸ ਤੇਤਿ ਯਸ੍ਸ ਤਵ. ਉਤ੍ਤਣ੍ਡੁਲਂ ਵਾ ਅਤਿਕਿਲਿਨ੍ਨਂ ਵਾ ਕੋ ਤਂ ਜਾਨਾਤਿ, ਕੀਦਿਸਮ੍ਪਿ ਪਚ੍ਛਿਮਂ ਪਿਣ੍ਡਪਾਤਂ ਭੁਞ੍ਜਿਤ੍ਵਾ ਤਥਾਗਤੋ ਪਰਿਨਿਬ੍ਬੁਤੋ, ਅਦ੍ਧਾ ਤੇਨ ਯਂ ਵਾ ਤਂ ਵਾ ਦਿਨ੍ਨਂ ਭਵਿਸ੍ਸਤੀਤਿ. ਲਾਭਾਤਿ ਦਿਟ੍ਠਧਮ੍ਮਿਕਸਮ੍ਪਰਾਯਿਕਾ ਦਾਨਾਨਿਸਂਸਸਙ੍ਖਾਤਾ ਲਾਭਾ. ਸੁਲਦ੍ਧਨ੍ਤਿ ਤੁਯ੍ਹਂ ਮਨੁਸ੍ਸਤ੍ਤਂ ਸੁਲਦ੍ਧਂ. ਸਮ੍ਮੁਖਾਤਿ ਸਮ੍ਮੁਖਤੋ, ਨ ਅਨੁਸ੍ਸਵੇਨ ਨ ਪਰਮ੍ਪਰਾਯਾਤਿ ਅਤ੍ਥੋ. ਮੇਤਨ੍ਤਿ ਮੇ ਏਤਂ ਮਯਾ ਏਤਂ. ਦ੍ਵੇਮੇਤਿ ਦ੍ਵੇ ਇਮੇ. ਸਮਸਮਫਲਾਤਿ ਸਬ੍ਬਾਕਾਰੇਨ ਸਮਾਨਫਲਾ.

ਨਨੁ ਚ ਯਂ ਸੁਜਾਤਾਯ ਦਿਨ੍ਨਂ ਪਿਣ੍ਡਪਾਤਂ ਭੁਞ੍ਜਿਤ੍ਵਾ ਤਥਾਗਤੋ ਅਭਿਸਮ੍ਬੁਦ੍ਧੋ, ਤਂ ਕਿਲੇਸਾਨਂ ਅਪ੍ਪਹੀਨਕਾਲੇ ਦਾਨਂ, ਇਦਂ ਪਨ ਚੁਨ੍ਦਸ੍ਸ ਦਾਨਂ ਖੀਣਾਸਵਕਾਲੇ, ਕਸ੍ਮਾ ਏਤਾਨਿ ਸਮਫਲਾਨੀਤਿ? ਪਰਿਨਿਬ੍ਬਾਨਸਮਤਾਯ ਸਮਾਪਤ੍ਤਿਸਮਤਾਯ ਅਨੁਸ੍ਸਰਣਸਮਤਾਯ ਚ. ਭਗਵਾ ਹਿ ਸੁਜਾਤਾਯ ਦਿਨ੍ਨਂ ਪਿਣ੍ਡਪਾਤਂ ਭੁਞ੍ਜਿਤ੍ਵਾ ਸਉਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬੁਤੋ, ਚੁਨ੍ਦੇਨ ਦਿਨ੍ਨਂ ਭੁਞ੍ਜਿਤ੍ਵਾ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬੁਤੋਤਿ ਏਵਂ ਪਰਿਨਿਬ੍ਬਾਨਸਮਤਾਯਪਿ ਸਮਫਲਾਨਿ. ਅਭਿਸਮ੍ਬੁਜ੍ਝਨਦਿਵਸੇ ਚ ਅਗ੍ਗਮਗ੍ਗਸ੍ਸ ਹੇਤੁਭੂਤਾ ਚਤੁਵੀਸਤਿਕੋਟਿਸਤਸਹਸ੍ਸਸਙ੍ਖਾ ਸਮਾਪਤ੍ਤਿਯੋ ਸਮਾਪਜ੍ਜਿ, ਪਰਿਨਿਬ੍ਬਾਨਦਿਵਸੇਪਿ ਸਬ੍ਬਾ ਤਾ ਸਮਾਪਜ੍ਜਿ. ਏਵਂ ਸਮਾਪਤ੍ਤਿਸਮਤਾਯਪਿ ਸਮਫਲਾਨਿ. ਵੁਤ੍ਤਞ੍ਹੇਤਂ ਭਗਵਤਾ –

‘‘ਯਸ੍ਸ ਚੇਤਂ ਪਿਣ੍ਡਪਾਤਂ ਪਰਿਭੁਞ੍ਜਿਤ੍ਵਾ ਅਨੁਤ੍ਤਰਂ ਅਪ੍ਪਮਾਣਂ ਚੇਤੋਸਮਾਧਿਂ ਉਪਸਮ੍ਪਜ੍ਜ ਵਿਹਰਤਿ, ਅਪ੍ਪਮਾਣੋ ਤਸ੍ਸ ਪੁਞ੍ਞਾਭਿਸਨ੍ਦੋ ਕੁਸਲਾਭਿਸਨ੍ਦੋ’’ਤਿਆਦਿ. –

ਸੁਜਾਤਾ ਚ ਅਪਰਭਾਗੇ ਅਸ੍ਸੋਸਿ ‘‘ਨ ਕਿਰ ਸਾ ਰੁਕ੍ਖਦੇਵਤਾ, ਬੋਧਿਸਤ੍ਤੋ ਕਿਰੇਸ, ਤਂ ਕਿਰ ਪਿਣ੍ਡਪਾਤਂ ਪਰਿਭੁਞ੍ਜਿਤ੍ਵਾ ਅਨੁਤ੍ਤਰਂ ਸਮ੍ਮਾਸਮ੍ਬੋਧਿਂ ਅਭਿਸਮ੍ਬੁਦ੍ਧੋ, ਸਤ੍ਤਸਤ੍ਤਾਹਂ ਕਿਰਸ੍ਸ ਤੇਨ ਯਾਪਨਾ ਅਹੋਸੀ’’ਤਿ. ਤਸ੍ਸਾ ਇਦਂ ਸੁਤ੍ਵਾ ‘‘ਲਾਭਾ ਵਤ ਮੇ’’ਤਿ ਅਨੁਸ੍ਸਰਨ੍ਤਿਯਾ ਬਲਵਪੀਤਿਸੋਮਨਸ੍ਸਂ ਉਦਪਾਦਿ. ਚੁਨ੍ਦਸ੍ਸਪਿ ਅਪਰਭਾਗੇ ‘‘ਅਵਸਾਨਪਿਣ੍ਡਪਾਤੋ ਕਿਰ ਮਯਾ ਦਿਨ੍ਨੋ, ਧਮ੍ਮਸੀਸਂ ਕਿਰ ਮਯਾ ਗਹਿਤਂ, ਮਯ੍ਹਂ ਕਿਰ ਪਿਣ੍ਡਪਾਤਂ ਪਰਿਭੁਞ੍ਜਿਤ੍ਵਾ ਸਤ੍ਥਾ ਅਤ੍ਤਨਾ ਚਿਰਕਾਲਾਭਿਪਤ੍ਥਿਤਾਯ ਅਨੁਪਾਦਿਸੇਸਾਯ ਨਿਬ੍ਬਾਨਧਾਤੁਯਾ ਪਰਿਨਿਬ੍ਬੁਤੋ’’ਤਿ ਸੁਤ੍ਵਾ ‘‘ਲਾਭਾ ਵਤ ਮੇ’’ਤਿ ਅਨੁਸ੍ਸਰਤੋ ਬਲਵਪੀਤਿਸੋਮਨਸ੍ਸਂ ਉਦਪਾਦਿ. ਏਵਂ ਅਨੁਸ੍ਸਰਣਸਮਤਾਯਪਿ ਸਮਫਲਾਨਿ ਦ੍ਵੇਪਿ ਪਿਣ੍ਡਪਾਤਦਾਨਾਨੀਤਿ ਵੇਦਿਤਬ੍ਬਾਨਿ.

ਆਯੁਸਂਵਤ੍ਤਨਿਕਨ੍ਤਿ ਦੀਘਾਯੁਕਸਂਵਤ੍ਤਨਿਕਂ. ਉਪਚਿਤਨ੍ਤਿ ਪਸੁਤਂ ਉਪ੍ਪਾਦਿਤਂ. ਯਸਸਂਵਤ੍ਤਨਿਕਨ੍ਤਿ ਪਰਿਵਾਰਸਂਵਤ੍ਤਨਿਕਂ. ਆਧਿਪਤੇਯ੍ਯਸਂਵਤ੍ਤਨਿਕਨ੍ਤਿ ਸੇਟ੍ਠਭਾਵਸਂਵਤ੍ਤਨਿਕਂ.

ਏਤਮਤ੍ਥਂ ਵਿਦਿਤ੍ਵਾਤਿ ਏਤਂ ਦਾਨਸ੍ਸ ਮਹਪ੍ਫਲਤਞ੍ਚੇਵ ਸੀਲਾਦਿਗੁਣੇਹਿ ਅਤ੍ਤਨੋ ਚ ਅਨੁਤ੍ਤਰਦਕ੍ਖਿਣੇਯ੍ਯਭਾਵਂ ਅਨੁਪਾਦਾਪਰਿਨਿਬ੍ਬਾਨਞ੍ਚਾਤਿ ਤਿਵਿਧਮ੍ਪਿ ਅਤ੍ਥਂ ਸਬ੍ਬਾਕਾਰਤੋ ਵਿਦਿਤ੍ਵਾ ਤਦਤ੍ਥਦੀਪਨਂ ਇਮਂ ਉਦਾਨਂ ਉਦਾਨੇਸਿ.

ਤਤ੍ਥ ਦਦਤੋ ਪੁਞ੍ਞਂ ਪਵਡ੍ਢਤੀਤਿ ਦਾਨਂ ਦੇਨ੍ਤਸ੍ਸ ਚਿਤ੍ਤਸਮ੍ਪਤ੍ਤਿਯਾ ਚ ਦਕ੍ਖਿਣੇਯ੍ਯਸਮ੍ਪਤ੍ਤਿਯਾ ਚ ਦਾਨਮਯਂ ਪੁਞ੍ਞਂ ਉਪਚੀਯਤਿ, ਮਹਪ੍ਫਲਤਰਞ੍ਚ ਮਹਾਨਿਸਂਸਤਰਞ੍ਚ ਹੋਤੀਤਿ ਅਤ੍ਥੋ. ਅਥ ਵਾ ਦਦਤੋ ਪੁਞ੍ਞਂ ਪਵਡ੍ਢਤੀਤਿ ਦੇਯ੍ਯਧਮ੍ਮਂ ਪਰਿਚ੍ਚਜਨ੍ਤੋ ਪਰਿਚ੍ਚਾਗਚੇਤਨਾਯ ਬਹੁਲੀਕਤਾਯ ਅਨੁਕ੍ਕਮੇਨ ਸਬ੍ਬਤ੍ਥ ਅਨਾਪਤ੍ਤਿਬਹੁਲੋ ਸੁਵਿਸੁਦ੍ਧਸੀਲਂ ਰਕ੍ਖਿਤ੍ਵਾ ਸਮਥਵਿਪਸ੍ਸਨਞ੍ਚ ਭਾਵੇਤੁਂ ਸਕ੍ਕੋਤੀਤਿ ਤਸ੍ਸ ਦਾਨਾਦਿਵਸੇਨ ਤਿਵਿਧਮ੍ਪਿ ਪੁਞ੍ਞਂ ਅਭਿਵਡ੍ਢਤੀਤਿ ਏਵਮੇਤ੍ਥ ਅਤ੍ਥੋ ਵੇਦਿਤਬ੍ਬੋ. ਸਂਯਮਤੋਤਿ ਸੀਲਸਂਯਮੇਨ ਸਂਯਮਨ੍ਤਸ੍ਸ, ਸਂਵਰੇ ਠਿਤਸ੍ਸਾਤਿ ਅਤ੍ਥੋ. ਵੇਰਂ ਨ ਚੀਯਤੀਤਿ ਪਞ੍ਚਵਿਧਵੇਰਂ ਨ ਪਵਡ੍ਢਤਿ, ਅਦੋਸਪਧਾਨਤ੍ਤਾ ਵਾ ਅਧਿਸੀਲਸ੍ਸ ਕਾਯਵਾਚਾਚਿਤ੍ਤੇਹਿ ਸਯਂਮਨ੍ਤੋ ਸੁਵਿਸੁਦ੍ਧਸੀਲੋ ਖਨ੍ਤਿਬਹੁਲਤਾਯ ਕੇਨਚਿ ਵੇਰਂ ਨ ਕਰੋਤਿ, ਕੁਤੋ ਤਸ੍ਸ ਉਪਚਯੋ. ਤਸ੍ਮਾ ਤਸ੍ਸ ਸਂਯਮਤੋ ਸਂਯਮਨ੍ਤਸ੍ਸ, ਸਂਯਮਹੇਤੁ ਵਾ ਵੇਰਂ ਨ ਚੀਯਤਿ. ਕੁਸਲੋ ਚ ਜਹਾਤਿ ਪਾਪਕਨ੍ਤਿ ਕੁਸਲੋ ਪਨ ਞਾਣਸਮ੍ਪਨ੍ਨੋ ਸੁਵਿਸੁਦ੍ਧਸੀਲੇ ਪਤਿਟ੍ਠਿਤੋ ਅਟ੍ਠਤਿਂਸਾਯ ਆਰਮ੍ਮਣੇਸੁ ਅਤ੍ਤਨੋ ਅਨੁਰੂਪਂ ਕਮ੍ਮਟ੍ਠਾਨਂ ਗਹੇਤ੍ਵਾ ਉਪਚਾਰਪ੍ਪਨਾਭੇਦਂ ਝਾਨਂ ਸਮ੍ਪਾਦੇਨ੍ਤੋ ਪਾਪਕਂ ਲਾਮਕਂ ਕਾਮਚ੍ਛਨ੍ਦਾਦਿਅਕੁਸਲਂ ਵਿਕ੍ਖਮ੍ਭਨਵਸੇਨ ਜਹਾਤਿ ਪਰਿਚ੍ਚਜਤਿ. ਸੋ ਤਮੇਵ ਝਾਨਂ ਪਾਦਕਂ ਕਤ੍ਵਾ ਸਙ੍ਖਾਰੇਸੁ ਖਯਵਯਂ ਪਟ੍ਠਪੇਤ੍ਵਾ ਵਿਪਸ੍ਸਨਾਯ ਕਮ੍ਮਂ ਕਰੋਨ੍ਤੋ ਵਿਪਸ੍ਸਨਂ ਉਸ੍ਸੁਕ੍ਕਾਪੇਤ੍ਵਾ ਅਰਿਯਮਗ੍ਗੇਨ ਅਨਵਸੇਸਂ ਪਾਪਕਂ ਲਾਮਕਂ ਅਕੁਸਲਂ ਸਮੁਚ੍ਛੇਦਵਸੇਨ ਜਹਾਤਿ. ਰਾਗਦੋਸਮੋਹਕ੍ਖਯਾ ਸ ਨਿਬ੍ਬੁਤੋਤਿ ਸੋ ਏਵਂ ਪਾਪਕਂ ਪਜਹਿਤ੍ਵਾ ਰਾਗਾਦੀਨਂ ਖਯਾ ਅਨਵਸੇਸਕਿਲੇਸਨਿਬ੍ਬਾਨੇਨ, ਤਤੋ ਪਰਂ ਖਨ੍ਧਨਿਬ੍ਬਾਨੇਨ ਚ ਨਿਬ੍ਬੁਤੋ ਹੋਤੀਤਿ ਏਵਂ ਭਗਵਾ ਚੁਨ੍ਦਸ੍ਸ ਚ ਦਕ੍ਖਿਣਸਮ੍ਪਤ੍ਤਿਂ, ਅਤ੍ਤਨੋ ਚ ਦਕ੍ਖਿਣੇਯ੍ਯਸਮ੍ਪਤ੍ਤਿਂ ਨਿਸ੍ਸਾਯ ਪੀਤਿਵੇਗਵਿਸ੍ਸਟ੍ਠਂ ਉਦਾਨਂ ਉਦਾਨੇਸਿ.

ਪਞ੍ਚਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੬. ਪਾਟਲਿਗਾਮਿਯਸੁਤ੍ਤਵਣ੍ਣਨਾ

੭੬. ਛਟ੍ਠੇ ਮਗਧੇਸੂਤਿ ਮਗਧਰਟ੍ਠੇ. ਮਹਤਾਤਿ ਇਧਾਪਿ ਗੁਣਮਹਤ੍ਤੇਨਪਿ ਅਪਰਿਚ੍ਛਿਨ੍ਨਸਙ੍ਖ੍ਯਤ੍ਤਾ ਗਣਨਮਹਤ੍ਤੇਨਪਿ ਮਹਤਾ ਭਿਕ੍ਖੁਸਙ੍ਘੇਨ. ਪਾਟਲਿਗਾਮੋਤਿ ਏਵਂਨਾਮਕੋ ਮਗਧਰਟ੍ਠੇ ਏਕੋ ਗਾਮੋ. ਤਸ੍ਸ ਕਿਰ ਗਾਮਸ੍ਸ ਮਾਪਨਦਿਵਸੇ ਗਾਮਗ੍ਗਹਣਟ੍ਠਾਨੇ ਦ੍ਵੇ ਤਯੋ ਪਾਟਲਙ੍ਕੁਰਾ ਪਥਵਿਤੋ ਉਬ੍ਭਿਜ੍ਜਿਤ੍ਵਾ ਨਿਕ੍ਖਮਿਂਸੁ. ਤੇਨ ਤਂ ‘‘ਪਾਟਲਿਗਾਮੋ’’ਤ੍ਵੇਵ ਵੋਹਰਿਂਸੁ. ਤਦਵਸਰੀਤਿ ਤਂ ਪਾਟਲਿਗਾਮਂ ਅਵਸਰਿ ਅਨੁਪਾਪੁਣਿ. ਕਦਾ ਪਨ ਭਗਵਾ ਪਾਟਲਿਗਾਮਂ ਅਨੁਪਾਪੁਣਿ? ਹੇਟ੍ਠਾ ਵੁਤ੍ਤਨਯੇਨ ਸਾਵਤ੍ਥਿਯਂ ਧਮ੍ਮਸੇਨਾਪਤਿਨੋ ਚੇਤਿਯਂ ਕਾਰਾਪੇਤ੍ਵਾ ਤਤੋ ਨਿਕ੍ਖਮਿਤ੍ਵਾ ਰਾਜਗਹੇ ਵਸਨ੍ਤੋ ਤਤ੍ਥ ਆਯਸ੍ਮਤੋ ਮਹਾਮੋਗ੍ਗਲ੍ਲਾਨਸ੍ਸ ਚ ਚੇਤਿਯਂ ਕਾਰਾਪੇਤ੍ਵਾ ਤਤੋ ਨਿਕ੍ਖਮਿਤ੍ਵਾ ਅਮ੍ਬਲਟ੍ਠਿਕਾਯਂ ਵਸਿਤ੍ਵਾ ਅਤੁਰਿਤਚਾਰਿਕਾਵਸੇਨ ਜਨਪਦਚਾਰਿਕਂ ਚਰਨ੍ਤੋ ਤਤ੍ਥ ਤਤ੍ਥ ਏਕਰਤ੍ਤਿਵਾਸੇਨ ਵਸਿਤ੍ਵਾ ਲੋਕਂ ਅਨੁਗ੍ਗਣ੍ਹਨ੍ਤੋ ਅਨੁਕ੍ਕਮੇਨ ਪਾਟਲਿਗਾਮਂ ਅਨੁਪਾਪੁਣਿ.

ਪਾਟਲਿਗਾਮਿਯਾਤਿ ਪਾਟਲਿਗਾਮਵਾਸਿਨੋ ਉਪਾਸਕਾ. ਤੇ ਕਿਰ ਭਗਵਤੋ ਪਠਮਦਸ੍ਸਨੇਨ ਕੇਚਿ ਸਰਣੇਸੁ, ਕੇਚਿ ਸੀਲੇਸੁ, ਕੇਚਿ ਸਰਣੇਸੁ ਚ ਸੀਲੇਸੁ ਚ ਪਤਿਟ੍ਠਿਤਾ. ਤੇਨ ਵੁਤ੍ਤਂ ‘‘ਉਪਾਸਕਾ’’ਤਿ. ਯੇਨ ਭਗਵਾ ਤੇਨੁਪਸਙ੍ਕਮਿਂਸੂਤਿ ਪਾਟਲਿਗਾਮੇ ਕਿਰ ਅਜਾਤਸਤ੍ਤੁਨੋ ਲਿਚ੍ਛਵਿਰਾਜੂਨਞ੍ਚ ਮਨੁਸ੍ਸਾ ਕਾਲੇਨ ਕਾਲਂ ਗਨ੍ਤ੍ਵਾ ਗੇਹਸਾਮਿਕੇ ਗੇਹਤੋ ਨੀਹਰਿਤ੍ਵਾ ਮਾਸਮ੍ਪਿ ਅਡ੍ਢਮਾਸਮ੍ਪਿ ਵਸਨ੍ਤਿ. ਤੇਨ ਪਾਟਲਿਗਾਮਵਾਸਿਨੋ ਮਨੁਸ੍ਸਾ ਨਿਚ੍ਚੁਪਦ੍ਦੁਤਾ ‘‘ਏਤੇਸਞ੍ਚੇਵ ਆਗਤਕਾਲੇ ਵਸਨਟ੍ਠਾਨਂ ਭਵਿਸ੍ਸਤੀ’’ਤਿ ਏਕਪਸ੍ਸੇ ਇਸ੍ਸਰਾਨਂ ਭਣ੍ਡਪ੍ਪਟਿਸਾਮਨਟ੍ਠਾਨਂ, ਏਕਪਸ੍ਸੇ ਵਸਨਟ੍ਠਾਨਂ, ਏਕਪਸ੍ਸੇ ਆਗਨ੍ਤੁਕਾਨਂ ਅਦ੍ਧਿਕਮਨੁਸ੍ਸਾਨਂ, ਏਕਪਸ੍ਸੇ ਦਲਿਦ੍ਦਾਨਂ ਕਪਣਮਨੁਸ੍ਸਾਨਂ, ਏਕਪਸ੍ਸੇ ਗਿਲਾਨਾਨਂ ਵਸਨਟ੍ਠਾਨਂ ਭਵਿਸ੍ਸਤੀਤਿ ਸਬ੍ਬੇਸਂ ਅਞ੍ਞਮਞ੍ਞਂ ਅਘਟ੍ਟੇਤ੍ਵਾ ਵਸਨਪ੍ਪਹੋਨਕਂ ਨਗਰਮਜ੍ਝੇ ਮਹਾਸਾਲਂ ਕਾਰੇਸੁਂ, ਤਸ੍ਸਾ ਨਾਮਂ ਆਵਸਥਾਗਾਰਨ੍ਤਿ. ਤਂ ਦਿਵਸਞ੍ਚ ਨਿਟ੍ਠਾਨਂ ਅਗਮਾਸਿ. ਤੇ ਤਤ੍ਥ ਗਨ੍ਤ੍ਵਾ ਹਤ੍ਥਕਮ੍ਮਸੁਧਾਕਮ੍ਮਚਿਤ੍ਤਕਮ੍ਮਾਦਿਵਸੇਨ ਸੁਪਰਿਨਿਟ੍ਠਿਤਂ ਸੁਸਜ੍ਜਿਤਂ ਦੇਵਵਿਮਾਨਸਦਿਸਂ ਤਂ ਦ੍ਵਾਰਕੋਟ੍ਠਕਤੋ ਪਟ੍ਠਾਯ ਓਲੋਕੇਤ੍ਵਾ ‘‘ਇਦਂ ਆਵਸਥਾਗਾਰਂ ਅਤਿਵਿਯ ਮਨੋਰਮਂ ਸਸ੍ਸਿਰਿਕਂ, ਕੇਨ ਨੁ ਖੋ ਪਠਮਂ ਪਰਿਭੁਤ੍ਤਂ ਅਮ੍ਹਾਕਂ ਦੀਘਰਤ੍ਤਂ ਹਿਤਾਯ ਸੁਖਾਯ ਅਸ੍ਸਾ’’ਤਿ ਚਿਨ੍ਤੇਸੁਂ, ਤਸ੍ਮਿਂਯੇਵ ਚ ਖਣੇ ‘‘ਭਗਵਾ ਤਂ ਗਾਮਂ ਅਨੁਪ੍ਪਤ੍ਤੋ’’ਤਿ ਅਸ੍ਸੋਸੁਂ. ਤੇਨ ਤੇ ਉਪ੍ਪਨ੍ਨਪੀਤਿਸੋਮਨਸ੍ਸਾ ‘‘ਅਮ੍ਹੇਹਿ ਭਗਵਾ ਗਨ੍ਤ੍ਵਾਪਿ ਆਨੇਤਬ੍ਬੋ ਸਿਯਾ, ਸੋ ਪਨ ਸਯਮੇਵ ਅਮ੍ਹਾਕਂ ਵਸਨਟ੍ਠਾਨਂ ਸਮ੍ਪਤ੍ਤੋ, ਅਜ੍ਜ ਮਯਂ ਭਗਵਨ੍ਤਂ ਇਧ ਵਸਾਪੇਤ੍ਵਾ ਪਠਮਂ ਪਰਿਭੁਞ੍ਜਾਪੇਸ੍ਸਾਮ ਤਥਾ ਭਿਕ੍ਖੁਸਙ੍ਘਂ, ਭਿਕ੍ਖੁਸਙ੍ਘੇ ਆਗਤੇ ਤੇਪਿਟਕਂ ਬੁਦ੍ਧਵਚਨਂ ਆਗਤਮੇਵ ਭਵਿਸ੍ਸਤਿ, ਸਤ੍ਥਾਰਂ ਮਙ੍ਗਲਂ ਵਦਾਪੇਸ੍ਸਾਮ, ਧਮ੍ਮਂ ਕਥਾਪੇਸ੍ਸਾਮ. ਇਤਿ ਤੀਹਿ ਰਤਨੇਹਿ ਪਰਿਭੁਤ੍ਤੇ ਪਚ੍ਛਾ ਅਮ੍ਹਾਕਞ੍ਚ ਪਰੇਸਞ੍ਚ ਪਰਿਭੋਗੋ ਭਵਿਸ੍ਸਤਿ, ਏਵਂ ਨੋ ਦੀਘਰਤ੍ਤਂ ਹਿਤਾਯ ਸੁਖਾਯ ਭਵਿਸ੍ਸਤੀ’’ਤਿ ਸਨ੍ਨਿਟ੍ਠਾਨਂ ਕਤ੍ਵਾ ਏਤਦਤ੍ਥਮੇਵ ਭਗਵਨ੍ਤਂ ਉਪਸਙ੍ਕਮਿਂਸੁ. ਤਸ੍ਮਾ ਏਵਮਾਹਂਸੁ – ‘‘ਅਧਿਵਾਸੇਤੁ ਨੋ, ਭਨ੍ਤੇ ਭਗਵਾ, ਆਵਸਥਾਗਾਰ’’ਨ੍ਤਿ.

ਯੇਨ ਆਵਸਥਾਗਾਰਂ ਤੇਨੁਪਸਙ੍ਕਮਿਂਸੂਤਿ ਕਿਞ੍ਚਾਪਿ ਤਂ ਤਂ ਦਿਵਸਮੇਵ ਪਰਿਨਿਟ੍ਠਿਤਤ੍ਤਾ ਦੇਵਵਿਮਾਨਂ ਵਿਯ ਸੁਸਜ੍ਜਿਤਂ ਸੁਪਟਿਜਗ੍ਗਿਤਂ, ਬੁਦ੍ਧਾਰਹਂ ਪਨ ਕਤ੍ਵਾ ਨ ਪਞ੍ਞਤ੍ਤਂ, ‘‘ਬੁਦ੍ਧਾ ਨਾਮ ਅਰਞ੍ਞਜ੍ਝਾਸਯਾ ਅਰਞ੍ਞਾਰਾਮਾ, ਅਨ੍ਤੋਗਾਮੇ ਵਸੇਯ੍ਯੁਂ ਵਾ ਨੋ ਵਾ, ਤਸ੍ਮਾ ਭਗਵਤੋ ਰੁਚਿਂ ਜਾਨਿਤ੍ਵਾਵ ਪਞ੍ਞਾਪੇਸ੍ਸਾਮਾ’’ਤਿ ਚਿਨ੍ਤੇਤ੍ਵਾ ਤੇ ਭਗਵਨ੍ਤਂ ਉਪਸਙ੍ਕਮਿਂਸੁ, ਇਦਾਨਿ ਭਗਵਤੋ ਰੁਚਿਂ ਜਾਨਿਤ੍ਵਾ ਤਥਾ ਪਞ੍ਞਾਪੇਤੁਕਾਮਾ ਯੇਨ ਆਵਸਥਾਗਾਰਂ ਤੇਨੁਪਸਙ੍ਕਮਿਂਸੁ. ਸਬ੍ਬਸਨ੍ਥਰਿਂ ਆਵਸਥਾਗਾਰਂ ਸਨ੍ਥਰਿਤ੍ਵਾਤਿ ਯਥਾ ਸਬ੍ਬਮੇਵ ਸਨ੍ਥਤਂ ਹੋਤਿ, ਏਵਂ ਤਂ ਸਨ੍ਥਰਿਤ੍ਵਾ ਸਬ੍ਬਪਠਮਂ ਤਾਵ ‘‘ਗੋਮਯਂ ਨਾਮ ਸਬ੍ਬਮਙ੍ਗਲੇਸੁ ਵਤ੍ਤਤੀ’’ਤਿ ਸੁਧਾਪਰਿਕਮ੍ਮਕਤਮ੍ਪਿ ਭੂਮਿਂ ਅਲ੍ਲਗੋਮਯੇਨ ਓਪੁਞ੍ਜਾਪੇਤ੍ਵਾ ਪਰਿਸੁਕ੍ਖਭਾਵਂ ਞਤ੍ਵਾ ਯਥਾ ਅਕ੍ਕਨ੍ਤਟ੍ਠਾਨੇ ਪਦਂ ਨ ਪਞ੍ਞਾਯਤਿ, ਏਵਂ ਚਤੁਜ੍ਜਾਤਿਯਗਨ੍ਧੇਹਿ ਲਿਮ੍ਪੇਤ੍ਵਾ ਉਪਰਿ ਨਾਨਾਵਣ੍ਣਕਟਸਾਰਕੇ ਸਨ੍ਥਰਿਤ੍ਵਾ ਤੇਸਂ ਉਪਰਿ ਮਹਾਪਿਟ੍ਠਿਕਕੋਜਵਾਦਿਂ ਕਤ੍ਵਾ ਹਤ੍ਥਤ੍ਥਰਣਾਦੀਹਿ ਨਾਨਾਵਣ੍ਣੇਹਿ ਅਤ੍ਥਰਣੇਹਿ ਸਨ੍ਥਰਿਤਬ੍ਬਯੁਤ੍ਤਕਂ ਸਬ੍ਬੋਕਾਸਂ ਸਨ੍ਥਰਾਪੇਸੁਂ. ਤੇਨ ਵੁਤ੍ਤਂ – ‘‘ਸਬ੍ਬਸਨ੍ਥਰਿਂ ਆਵਸਥਾਗਾਰਂ ਸਨ੍ਥਰਿਤ੍ਵਾ’’ਤਿ.

ਆਸਨਾਨਞ੍ਹਿ ਮਜ੍ਝਟ੍ਠਾਨੇ ਤਾਵ ਮਙ੍ਗਲਥਮ੍ਭਂ ਨਿਸ੍ਸਾਯ ਮਹਾਰਹਂ ਬੁਦ੍ਧਾਸਨਂ ਪਞ੍ਞਾਪੇਤ੍ਵਾ ਤਤ੍ਥ ਯਂ ਯਂ ਮੁਦੁਕਞ੍ਚ ਮਨੋਰਮਞ੍ਚ ਪਚ੍ਚਤ੍ਥਰਣਂ, ਤਂ ਤਂ ਪਚ੍ਚਤ੍ਥਰਿਤ੍ਵਾ ਉਭਤੋਲੋਹਿਤਕਂ ਮਨੁਞ੍ਞਦਸ੍ਸਨਂ ਉਪਧਾਨਂ ਉਪਦਹਿਤ੍ਵਾ ਉਪਰਿ ਸੁਵਣ੍ਣਰਜਤਤਾਰਕਾਵਿਚਿਤ੍ਤਂ ਵਿਤਾਨਂ ਬਨ੍ਧਿਤ੍ਵਾ ਗਨ੍ਧਦਾਮਪੁਪ੍ਫਦਾਮਾਦੀਹਿ ਅਲਙ੍ਕਰਿਤ੍ਵਾ ਸਮਨ੍ਤਾ ਦ੍ਵਾਦਸਹਤ੍ਥੇ ਠਾਨੇ ਪੁਪ੍ਫਜਾਲਂ ਕਾਰੇਤ੍ਵਾ ਤਿਂਸਹਤ੍ਥਮਤ੍ਤਟ੍ਠਾਨਂ ਪਟਸਾਣਿਯਾ ਪਰਿਕ੍ਖਿਪਾਪੇਤ੍ਵਾ ਪਚ੍ਛਿਮਭਿਤ੍ਤਿਂ ਨਿਸ੍ਸਾਯ ਭਿਕ੍ਖੁਸਙ੍ਘਸ੍ਸ ਪਲ੍ਲਙ੍ਕਅਪਸ੍ਸਯਮਞ੍ਚਪੀਠਾਦੀਨਿ ਪਞ੍ਞਾਪੇਤ੍ਵਾ ਉਪਰਿ ਸੇਤਪਚ੍ਚਤ੍ਥਰਣੇਹਿ ਪਚ੍ਚਤ੍ਥਰਾਪੇਤ੍ਵਾ ਸਾਲਾਯ ਪਾਚੀਨਪਸ੍ਸਂ ਅਤ੍ਤਨੋ ਨਿਸਜ੍ਜਾਯੋਗ੍ਗਂ ਕਾਰੇਸੁਂ. ਤਂ ਸਨ੍ਧਾਯ ਵੁਤ੍ਤਂ ‘‘ਆਸਨਾਨਿ ਪਞ੍ਞਾਪੇਤ੍ਵਾ’’ਤਿ.

ਉਦਕਮਣਿਕਨ੍ਤਿ ਮਹਾਕੁਚ੍ਛਿਕਂ ਉਦਕਚਾਟਿਂ. ਏਵਂ ਭਗਵਾ ਭਿਕ੍ਖੁਸਙ੍ਘੋ ਚ ਯਥਾਰੁਚਿਯਾ ਹਤ੍ਥਪਾਦੇ ਧੋਵਿਸ੍ਸਨ੍ਤਿ, ਮੁਖਂ ਵਿਕ੍ਖਾਲੇਸ੍ਸਨ੍ਤੀਤਿ ਤੇਸੁ ਤੇਸੁ ਠਾਨੇਸੁ ਮਣਿਵਣ੍ਣਸ੍ਸ ਉਦਕਸ੍ਸ ਪੂਰੇਤ੍ਵਾ ਵਾਸਤ੍ਥਾਯ ਨਾਨਾਪੁਪ੍ਫਾਨਿ ਚੇਵ ਉਦਕਵਾਸਚੁਣ੍ਣਾਨਿ ਚ ਪਕ੍ਖਿਪਿਤ੍ਵਾ ਕਦਲਿਪਣ੍ਣੇਹਿ ਪਿਦਹਿਤ੍ਵਾ ਪਤਿਟ੍ਠਪੇਸੁਂ. ਤੇਨ ਵੁਤ੍ਤਂ ‘‘ਉਦਕਮਣਿਕਂ ਪਤਿਟ੍ਠਾਪੇਤ੍ਵਾ’’ਤਿ.

ਤੇਲਪ੍ਪਦੀਪਂ ਆਰੋਪੇਤ੍ਵਾਤਿ ਰਜਤਸੁਵਣ੍ਣਾਦਿਮਯਦਣ੍ਡਦੀਪਿਕਾਸੁ ਯੋਧਕਰੂਪਵਿਲਾਸਖਚਿਤਰੂਪਕਾਦੀਨਂ ਹਤ੍ਥੇ ਠਪਿਤਸੁਵਣ੍ਣਰਜਤਾਦਿਮਯਕਪਲ੍ਲਿਕਾਸੁ ਤੇਲਪ੍ਪਦੀਪਂ ਜਾਲਯਿਤ੍ਵਾ. ਯੇਨ ਭਗਵਾ ਤੇਨੁਪਸਙ੍ਕਮਿਂਸੂਤਿ ਏਤ੍ਥ ਪਨ ਤੇ ਪਾਟਲਿਗਾਮਿਯਾ ਉਪਾਸਕਾ ਨ ਕੇਵਲਂ ਆਵਸਥਾਗਾਰਮੇਵ, ਅਥ ਖੋ ਸਕਲਸ੍ਮਿਮ੍ਪਿ ਗਾਮੇ ਵੀਥਿਯੋ ਸਜ੍ਜਾਪੇਤ੍ਵਾ ਧਜੇ ਉਸ੍ਸਾਪੇਤ੍ਵਾ ਗੇਹਦ੍ਵਾਰੇਸੁ ਪੁਣ੍ਣਘਟੇ ਕਦਲਿਯੋ ਚ ਠਪਾਪੇਤ੍ਵਾ ਸਕਲਗਾਮਂ ਦੀਪਮਾਲਾਹਿ ਵਿਪ੍ਪਕਿਣ੍ਣਤਾਰਕਂ ਵਿਯ ਕਤ੍ਵਾ ‘‘ਖੀਰਪਕੇ ਦਾਰਕੇ ਖੀਰਂ ਪਾਯੇਥ, ਦਹਰਕੁਮਾਰੇ ਲਹੁਂ ਲਹੁਂ ਭੋਜੇਤ੍ਵਾ ਸਯਾਪੇਥ, ਉਚ੍ਚਾਸਦ੍ਦਂ ਮਾ ਕਰਿਤ੍ਥ, ਅਜ੍ਜ ਏਕਰਤ੍ਤਿਂ ਸਤ੍ਥਾ ਅਨ੍ਤੋਗਾਮੇ ਵਸਿਸ੍ਸਤਿ, ਬੁਦ੍ਧਾ ਨਾਮ ਅਪ੍ਪਸਦ੍ਦਕਾਮਾ ਹੋਨ੍ਤੀ’’ਤਿ ਭੇਰਿਂ ਚਰਾਪੇਤ੍ਵਾ ਸਯਂ ਦਣ੍ਡਦੀਪਿਕਾ ਆਦਾਯ ਯੇਨ ਭਗਵਾ ਤੇਨੁਪਸਙ੍ਕਮਿਂਸੁ.

ਅਥ ਖੋ ਭਗਵਾ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਸਦ੍ਧਿਂ ਭਿਕ੍ਖੁਸਙ੍ਘੇਨ ਯੇਨ ਆਵਸਥਾਗਾਰਂ ਤੇਨੁਪਸਙ੍ਕਮੀਤਿ ‘‘ਯਸ੍ਸ ਦਾਨਿ, ਭਨ੍ਤੇ, ਭਗਵਾ ਕਾਲਂ ਮਞ੍ਞਤੀ’’ਤਿ ਏਵਂ ਕਿਰ ਤੇਹਿ ਕਾਲੇ ਆਰੋਚਿਤੇ ਭਗਵਾ ਲਾਖਾਰਸੇਨ ਤਿਨ੍ਤਰਤ੍ਤਕੋਵਿਲ਼ਾਰਪੁਪ੍ਫਵਣ੍ਣਂ ਰਤ੍ਤਦੁਪਟ੍ਟਂ ਕਤ੍ਤਰਿਯਾ ਪਦੁਮਂ ਕਨ੍ਤੇਨ੍ਤੋ ਵਿਯ, ਸਂਵਿਧਾਯ ਤਿਮਣ੍ਡਲਂ ਪਟਿਚ੍ਛਾਦੇਨ੍ਤੋ ਨਿਵਾਸੇਤ੍ਵਾ ਸੁਵਣ੍ਣਪਾਮਙ੍ਗੇਨ ਪਦੁਮਕਲਾਪਂ ਪਰਿਕ੍ਖਿਪਨ੍ਤੋ ਵਿਯ, ਵਿਜ੍ਜੁਲਤਾਸਸ੍ਸਿਰਿਕਂ ਕਾਯਬਨ੍ਧਨਂ ਬਨ੍ਧਿਤ੍ਵਾ ਰਤ੍ਤਕਮ੍ਬਲੇਨ ਗਜਕੁਮ੍ਭਂ ਪਰਿਯੋਨਨ੍ਧਨ੍ਤੋ ਵਿਯ, ਰਤਨਸਤੁਬ੍ਬੇਧੇ ਸੁਵਣ੍ਣਗ੍ਘਿਕੇ ਪਵਾਲ਼ਜਾਲਂ ਖਿਪਮਾਨੋ ਵਿਯ, ਮਹਤਿ ਸੁਵਣ੍ਣਚੇਤਿਯੇ ਰਤ੍ਤਕਮ੍ਬਲਕਞ੍ਚੁਕਂ ਪਟਿਮੁਞ੍ਚਨ੍ਤੋ ਵਿਯ, ਗਚ੍ਛਨ੍ਤਂ ਪੁਣ੍ਣਚਨ੍ਦਂ ਰਤ੍ਤਵਲਾਹਕੇਨ ਪਟਿਚ੍ਛਾਦੇਨ੍ਤੋ ਵਿਯ, ਕਞ੍ਚਨਗਿਰਿਮਤ੍ਥਕੇ ਸੁਪਕ੍ਕਲਾਖਾਰਸਂ ਪਰਿਸਿਞ੍ਚਨ੍ਤੋ ਵਿਯ, ਚਿਤ੍ਤਕੂਟਪਬ੍ਬਤਮਤ੍ਥਕਂ ਵਿਜ੍ਜੁਲਤਾਜਾਲੇਨ ਪਰਿਕ੍ਖਿਪਨ੍ਤੋ ਵਿਯ, ਸਕਲਚਕ੍ਕਵਾਲ਼ਸਿਨੇਰੁਯੁਗਨ੍ਧਰਮਹਾਪਥਵਿਂ ਚਾਲੇਤ੍ਵਾ ਗਹਿਤਨਿਗ੍ਰੋਧਪਲ੍ਲਵਸਮਾਨਵਣ੍ਣਂ ਸੁਰਤ੍ਤਵਰਪਂਸੁਕੂਲਂ ਪਾਰੁਪਿਤ੍ਵਾ ਵਨਗਹਨਤੋ ਨਿਕ੍ਖਨ੍ਤਕੇਸਰਸੀਹੋ ਵਿਯ, ਸਮਨ੍ਤਤੋ ਉਦਯਪਬ੍ਬਤਕੂਟਤੋ ਪੁਣ੍ਣਚਨ੍ਦੋ ਵਿਯ, ਬਾਲਸੂਰਿਯੋ ਵਿਯ ਚ ਅਤ੍ਤਨਾ ਨਿਸਿਨ੍ਨਚਾਰੁਮਣ੍ਡਪਤੋ ਨਿਕ੍ਖਮਿ.

ਅਥਸ੍ਸ ਕਾਯਤੋ ਮੇਘਮੁਖਤੋ ਵਿਜ੍ਜੁਕਲਾਪਾ ਵਿਯ ਰਸ੍ਮਿਯੋ ਨਿਕ੍ਖਮਿਤ੍ਵਾ ਸੁਵਣ੍ਣਰਸਧਾਰਾਪਰਿਸੇਕਪਿਞ੍ਜਰਪਤ੍ਤਪੁਪ੍ਫਫਲਸਾਖਾਵਿਟਪੇ ਵਿਯ ਸਮਨ੍ਤਤੋ ਰੁਕ੍ਖੇ ਕਰਿਂਸੁ. ਤਾਵਦੇਵ ਅਤ੍ਤਨੋ ਅਤ੍ਤਨੋ ਪਤ੍ਤਚੀਵਰਮਾਦਾਯ ਮਹਾਭਿਕ੍ਖੁਸਙ੍ਘੋ ਭਗਵਨ੍ਤਂ ਪਰਿਵਾਰੇਸਿ. ਤੇ ਚ ਨਂ ਪਰਿਵਾਰੇਤ੍ਵਾ ਠਿਤਾ ਭਿਕ੍ਖੂ ਏਵਰੂਪਾ ਅਹੇਸੁਂ ਅਪ੍ਪਿਚ੍ਛਾ ਸਨ੍ਤੁਟ੍ਠਾ ਪਵਿਵਿਤ੍ਤਾ ਅਸਂਸਟ੍ਠਾ ਆਰਦ੍ਧਵੀਰਿਯਾ ਵਤ੍ਤਾਰੋ ਵਚਨਕ੍ਖਮਾ ਚੋਦਕਾ ਪਾਪਗਰਹਿਨੋ ਸੀਲਸਮ੍ਪਨ੍ਨਾ ਸਮਾਧਿਸਮ੍ਪਨ੍ਨਾ ਪਞ੍ਞਾਸਮ੍ਪਨ੍ਨਾ ਵਿਮੁਤ੍ਤਿਸਮ੍ਪਨ੍ਨਾ ਵਿਮੁਤ੍ਤਿਞਾਣਦਸ੍ਸਨਸਮ੍ਪਨ੍ਨਾ. ਤੇਹਿ ਪਰਿਵੁਤੋ ਭਗਵਾ ਰਤ੍ਤਕਮ੍ਬਲਪਰਿਕ੍ਖਿਤ੍ਤੋ ਵਿਯ ਸੁਵਣ੍ਣਕ੍ਖਨ੍ਧੋ, ਨਕ੍ਖਤ੍ਤਪਰਿਵਾਰਿਤੋ ਵਿਯ ਪੁਣ੍ਣਚਨ੍ਦੋ, ਰਤ੍ਤਪਦੁਮਵਨਸਣ੍ਡਮਜ੍ਝਗਤਾ ਵਿਯ ਸੁਵਣ੍ਣਨਾਵਾ, ਪਵਾਲ਼ਵੇਦਿਕਪਰਿਕ੍ਖਿਤ੍ਤੋ ਵਿਯ ਸੁਵਣ੍ਣਪਾਸਾਦੋ ਵਿਰੋਚਿਤ੍ਥ. ਮਹਾਕਸ੍ਸਪਪ੍ਪਮੁਖਾ ਪਨ ਮਹਾਥੇਰਾ ਮੇਘਵਣ੍ਣਂ ਪਂਸੁਕੂਲਚੀਵਰਂ ਪਾਰੁਪਿਤ੍ਵਾ ਮਣਿਵਮ੍ਮਵਮ੍ਮਿਤਾ ਵਿਯ ਮਹਾਨਾਗਾ ਪਰਿਵਾਰਯਿਂਸੁ ਵਨ੍ਤਰਾਗਾ ਭਿਨ੍ਨਕਿਲੇਸਾ ਵਿਜਟਿਤਜਟਾ ਛਿਨ੍ਨਬਨ੍ਧਨਾ ਕੁਲੇ ਵਾ ਗਣੇ ਵਾ ਅਲਗ੍ਗਾ.

ਇਤਿ ਭਗਵਾ ਸਯਂ ਵੀਤਰਾਗੋ ਵੀਤਰਾਗੇਹਿ, ਵੀਤਦੋਸੋ ਵੀਤਦੋਸੇਹਿ, ਵੀਤਮੋਹੋ ਵੀਤਮੋਹੇਹਿ, ਨਿਤ੍ਤਣ੍ਹੋ ਨਿਤ੍ਤਣ੍ਹੇਹਿ, ਨਿਕ੍ਕਿਲੇਸੋ ਨਿਕ੍ਕਿਲੇਸੇਹਿ, ਸਯਂ ਬੁਦ੍ਧੋ ਅਨੁਬੁਦ੍ਧੇਹਿ ਪਰਿਵਾਰਿਤੋ ਪਤ੍ਤਪਰਿਵਾਰਿਤਂ ਵਿਯ ਕੇਸਰਂ, ਕੇਸਰਪਰਿਵਾਰਿਤਾ ਵਿਯ ਕਣ੍ਣਿਕਾ, ਅਟ੍ਠਨਾਗਸਹਸ੍ਸਪਰਿਵਾਰਿਤੋ ਵਿਯ ਛਦ੍ਦਨ੍ਤੋ ਨਾਗਰਾਜਾ, ਨਵੁਤਿਹਂਸਸਹਸ੍ਸਪਰਿਵਾਰਿਤੋ ਵਿਯ ਧਤਰਟ੍ਠੋ ਹਂਸਰਾਜਾ, ਸੇਨਙ੍ਗਪਰਿਵਾਰਿਤੋ ਵਿਯ ਚਕ੍ਕਵਤ੍ਤਿਰਾਜਾ, ਮਰੁਗਣਪਰਿਵਾਰਿਤੋ ਵਿਯ ਸਕ੍ਕੋ ਦੇਵਰਾਜਾ, ਬ੍ਰਹ੍ਮਗਣਪਰਿਵਾਰਿਤੋ ਵਿਯ ਹਾਰਿਤਮਹਾਬ੍ਰਹ੍ਮਾ, ਤਾਰਾਗਣਪਰਿਵਾਰਿਤੋ ਵਿਯ ਪੁਣ੍ਣਚਨ੍ਦੋ, ਅਨੁਪਮੇਨ ਬੁਦ੍ਧਵੇਸੇਨ ਅਪਰਿਮਾਣੇਨ ਬੁਦ੍ਧਵਿਲਾਸੇਨ ਪਾਟਲਿਗਾਮਿਨਂ ਮਗ੍ਗਂ ਪਟਿਪਜ੍ਜਿ.

ਅਥਸ੍ਸ ਪੁਰਤ੍ਥਿਮਕਾਯਤੋ ਸੁਵਣ੍ਣਵਣ੍ਣਾ ਘਨਬੁਦ੍ਧਰਸ੍ਮਿਯੋ ਉਟ੍ਠਹਿਤ੍ਵਾ ਅਸੀਤਿਹਤ੍ਥਟ੍ਠਾਨਂ ਅਗ੍ਗਹੇਸੁਂ, ਤਥਾ ਪਚ੍ਛਿਮਕਾਯਤੋ ਦਕ੍ਖਿਣਪਸ੍ਸਤੋ ਵਾਮਪਸ੍ਸਤੋ ਸੁਵਣ੍ਣਵਣ੍ਣਾ ਘਨਬੁਦ੍ਧਰਸ੍ਮਿਯੋ ਉਟ੍ਠਹਿਤ੍ਵਾ ਅਸੀਤਿਹਤ੍ਥਟ੍ਠਾਨਂ ਅਗ੍ਗਹੇਸੁਂ, ਉਪਰਿਕੇਸਨ੍ਤਤੋ ਪਟ੍ਠਾਯ ਸਬ੍ਬਕੇਸਾਵਟ੍ਟੇਹਿ ਮੋਰਗੀਵਰਾਜਵਣ੍ਣਾ ਅਸਿਤਾ ਘਨਬੁਦ੍ਧਰਸ੍ਮਿਯੋ ਉਟ੍ਠਹਿਤ੍ਵਾ ਗਗਨਤਲੇ ਅਸੀਤਿਹਤ੍ਥਟ੍ਠਾਨਂ ਅਗ੍ਗਹੇਸੁਂ, ਹੇਟ੍ਠਾਪਾਦਤਲੇਹਿ ਪਵਾਲ਼ਵਣ੍ਣਾ ਰਸ੍ਮਿਯੋ ਉਟ੍ਠਹਿਤ੍ਵਾ ਘਨਪਥਵਿਯਂ ਅਸੀਤਿਹਤ੍ਥਟ੍ਠਾਨਂ ਅਗ੍ਗਹੇਸੁਂ, ਦਨ੍ਤਤੋ ਅਕ੍ਖੀਨਂ ਸੇਤਟ੍ਠਾਨਤੋ, ਨਖਾਨਂ ਮਂਸਵਿਮੁਤ੍ਤਟ੍ਠਾਨਤੋ ਓਦਾਤਾ ਘਨਬੁਦ੍ਧਰਸ੍ਮਿਯੋ ਉਟ੍ਠਹਿਤ੍ਵਾ ਅਸੀਤਿਹਤ੍ਥਟ੍ਠਾਨਂ ਅਗ੍ਗਹੇਸੁਂ, ਰਤ੍ਤਪੀਤਵਣ੍ਣਾਨਂ ਸਮ੍ਭਿਨ੍ਨਟ੍ਠਾਨਤੋ ਮਞ੍ਜੇਟ੍ਠਵਣ੍ਣਾ ਰਸ੍ਮਿਯੋ ਉਟ੍ਠਹਿਤ੍ਵਾ ਅਸੀਤਿਹਤ੍ਥਟ੍ਠਾਨਂ ਅਗ੍ਗਹੇਸੁਂ, ਸਬ੍ਬਤ੍ਥਕਮੇਵ ਪਭਸ੍ਸਰਾ ਰਸ੍ਮਿਯੋ ਉਟ੍ਠਹਿਂਸੁ. ਏਵਂ ਸਮਨ੍ਤਾ ਅਸੀਤਿਹਤ੍ਥਟ੍ਠਾਨਂ ਛਬ੍ਬਣ੍ਣਾ ਬੁਦ੍ਧਰਸ੍ਮਿਯੋ ਵਿਜ੍ਜੋਤਮਾਨਾ ਵਿਪ੍ਫਨ੍ਦਮਾਨਾ ਵਿਧਾਵਮਾਨਾ ਕਞ੍ਚਨਦਣ੍ਡਦੀਪਿਕਾਦੀਹਿ ਨਿਚ੍ਛਰਿਤ੍ਵਾ ਆਕਾਸਂ ਪਕ੍ਖਨ੍ਦਮਾਨਾ ਮਹਾਪਦੀਪਜਾਲਾ ਵਿਯ, ਚਾਤੁਦ੍ਦੀਪਿਕਮਹਾਮੇਘਤੋ ਨਿਕ੍ਖਨ੍ਤਵਿਜ੍ਜੁਲਤਾ ਵਿਯ ਚ ਦਿਸੋਦਿਸਂ ਪਕ੍ਖਨ੍ਦਿਂਸੁ. ਯਾਹਿ ਸਬ੍ਬੇ ਦਿਸਾਭਾਗਾ ਸੁਵਣ੍ਣਚਮ੍ਪਕਪੁਪ੍ਫੇਹਿ ਵਿਕਿਰਿਯਮਾਨਾ ਵਿਯ, ਸੁਵਣ੍ਣਘਟਤੋ ਸੁਵਣ੍ਣਰਸਧਾਰਾਹਿ ਆਸਿਞ੍ਚਿਯਮਾਨਾ ਵਿਯ, ਪਸਾਰਿਤਸੁਵਣ੍ਣਪਟਪਰਿਕ੍ਖਿਤ੍ਤਾ ਵਿਯ, ਵੇਰਮ੍ਭਵਾਤੇਨ ਸਮੁਦ੍ਧਤਕਿਂਸੁਕਕਣਿਕਾਰਕੋਵਿਲ਼ਾਰਪੁਪ੍ਫਚੁਣ੍ਣਸਮੋਕਿਣ੍ਣਾ ਵਿਯ, ਚੀਨਪਿਟ੍ਠਚੁਣ੍ਣਸਮ੍ਪਰਿਰਞ੍ਜਿਤਾ ਵਿਯ ਚ ਵਿਰੋਚਿਂਸੁ.

ਭਗਵਤੋਪਿ ਅਸੀਤਿਅਨੁਬ੍ਯਞ੍ਜਨਬ੍ਯਾਮਪ੍ਪਭਾਪਰਿਕ੍ਖੇਪਸਮੁਜ੍ਜਲਂ ਦ੍ਵਤ੍ਤਿਂਸਮਹਾਪੁਰਿਸਲਕ੍ਖਣਪ੍ਪਟਿਮਣ੍ਡਿਤਂ ਸਰੀਰਂ ਅਬ੍ਭਮਹਿਕਾਦਿਉਪਕ੍ਕਿਲੇਸਵਿਮੁਤ੍ਤਂ ਸਮੁਜ੍ਜਲਨ੍ਤਤਾਰਕਾਵਭਾਸਿਤਂ ਵਿਯ, ਗਗਨਤਲਂ ਵਿਕਸਿਤਂ ਵਿਯ ਪਦੁਮਵਨਂ, ਸਬ੍ਬਪਾਲਿਫੁਲ੍ਲੋ ਵਿਯ ਯੋਜਨਸਤਿਕੋ ਪਾਰਿਚ੍ਛਤ੍ਤਕੋ, ਪਟਿਪਾਟਿਯਾ ਠਪਿਤਾਨਂ ਦ੍ਵਤ੍ਤਿਂਸਸੂਰਿਯਾਨਂ ਦ੍ਵਤ੍ਤਿਂਸਚਨ੍ਦਿਮਾਨਂ ਦ੍ਵਤ੍ਤਿਂਸਚਕ੍ਕਵਤ੍ਤੀਨਂ ਦ੍ਵਤ੍ਤਿਂਸਦੇਵਰਾਜਾਨਂ ਦ੍ਵਤ੍ਤਿਂਸਮਹਾਬ੍ਰਹ੍ਮਾਨਂ ਸਿਰਿਯਾ ਸਿਰਿਂ ਅਭਿਭਵਮਾਨਂ ਵਿਯ ਵਿਰੋਚਿਤ੍ਥ, ਯਥਾ ਤਂ ਦਸਹਿ ਪਾਰਮੀਹਿ ਦਸਹਿ ਉਪਪਾਰਮੀਹਿ ਦਸਹਿ ਪਰਮਤ੍ਥਪਾਰਮੀਹੀਤਿ ਸਮ੍ਮਦੇਵ ਪਰਿਪੂਰਿਤਾਹਿ ਸਮਤਿਂਸਪਾਰਮਿਤਾਹਿ ਅਲਙ੍ਕਤਂ ਕਪ੍ਪਸਤਸਹਸ੍ਸਾਧਿਕਾਨਿ ਚਤ੍ਤਾਰਿ ਅਸਙ੍ਖ੍ਯੇਯ੍ਯਾਨਿ ਦਿਨ੍ਨੇਨ ਦਾਨੇਨ ਰਕ੍ਖਿਤੇਨ ਸੀਲੇਨ ਕਤੇਨ ਕਲ੍ਯਾਣਕਮ੍ਮੇਨ ਏਕਸ੍ਮਿਂ ਅਤ੍ਤਭਾਵੇ ਸਮੋਸਰਿਤ੍ਵਾ ਵਿਪਾਕਂ ਦਾਤੁਂ ਓਕਾਸਂ ਅਲਭਮਾਨੇਨ ਸਮ੍ਬਾਧਪ੍ਪਤ੍ਤਂ ਵਿਯ ਨਿਬ੍ਬਤ੍ਤਿਤਂ ਨਾਵਾਸਹਸ੍ਸਭਣ੍ਡਂ ਏਕਂ ਨਾਵਂ ਆਰੋਪਨਕਾਲੋ ਵਿਯ, ਸਕਟਸਹਸ੍ਸਭਣ੍ਡਂ ਏਕਂ ਸਕਟਂ ਆਰੋਪਨਕਾਲੋ ਵਿਯ, ਪਞ੍ਚਵੀਸਤਿਯਾ ਗਙ੍ਗਾਨਂ ਸਮ੍ਭਿਨ੍ਨਮੁਖਦ੍ਵਾਰੇ ਏਕਤੋ ਰਾਸਿਭੂਤਕਾਲੋ ਵਿਯ ਅਹੋਸਿ.

ਇਮਾਯ ਬੁਦ੍ਧਸਿਰਿਯਾ ਓਭਾਸਮਾਨਸ੍ਸਪਿ ਭਗਵਤੋ ਪੁਰਤੋ ਅਨੇਕਾਨਿ ਦਣ੍ਡਦੀਪਿਕਾਸਹਸ੍ਸਾਨਿ ਉਕ੍ਖਿਪਿਂਸੁ. ਤਥਾ ਪਚ੍ਛਤੋ ਵਾਮਪਸ੍ਸੇ ਦਕ੍ਖਿਣਪਸ੍ਸੇ ਜਾਤਿਕੁਸੁਮਚਮ੍ਪਕਵਨਮਾਲਿਕਾਰਤ੍ਤੁਪ੍ਪਲਨੀਲੁਪ੍ਪਲਬਕੁਲਸਿਨ੍ਦੁਵਾਰਾਦਿਪੁਪ੍ਫਾਨਿ ਚੇਵ ਨੀਲਪੀਤਾਦਿਵਣ੍ਣਸੁਗਨ੍ਧਚੁਣ੍ਣਾਨਿ ਚ ਚਾਤੁਦ੍ਦੀਪਿਕਮਹਾਮੇਘਵਿਸ੍ਸਟ੍ਠਾ ਸਲਿਲਵੁਟ੍ਠਿਯੋ ਵਿਯ ਵਿਪ੍ਪਕਿਰਿਂਸੁ. ਪਞ੍ਚਙ੍ਗਿਕਤੂਰਿਯਨਿਗ੍ਘੋਸਾ ਚ ਬੁਦ੍ਧਧਮ੍ਮਸਙ੍ਘਗੁਣਾਸਂਯੁਤ੍ਤਾ ਥੁਤਿਘੋਸਾ ਚ ਸਬ੍ਬਾ ਦਿਸਾ ਪੂਰਯਮਾਨਾ ਮੁਖਸਮ੍ਭਾਸਾ ਵਿਯ ਅਹੇਸੁਂ. ਦੇਵਸੁਪਣ੍ਣਨਾਗਯਕ੍ਖਗਨ੍ਧਬ੍ਬਮਨੁਸ੍ਸਾਨਂ ਅਕ੍ਖੀਨਿ ਅਮਤਪਾਨਂ ਵਿਯ ਲਭਿਂਸੁ. ਇਮਸ੍ਮਿਂ ਪਨ ਠਾਨੇ ਠਤ੍ਵਾ ਪਦਸਹਸ੍ਸੇਹਿ ਗਮਨਵਣ੍ਣਨਂ ਵਤ੍ਤੁਂ ਵਟ੍ਟਤਿ. ਤਤ੍ਰਿਯਂ ਮੁਖਮਤ੍ਤਂ –

‘‘ਏਵਂ ਸਬ੍ਬਙ੍ਗਸਮ੍ਪਨ੍ਨੋ, ਕਮ੍ਪਯਨ੍ਤੋ ਵਸੁਨ੍ਧਰਂ;

ਅਹੇਠਯਨ੍ਤੋ ਪਾਣਾਨਿ, ਯਾਤਿ ਲੋਕਵਿਨਾਯਕੋ.

‘‘ਦਕ੍ਖਿਣਂ ਪਠਮਂ ਪਾਦਂ, ਉਦ੍ਧਰਨ੍ਤੋ ਨਰਾਸਭੋ;

ਗਚ੍ਛਨ੍ਤੋ ਸਿਰਿਸਮ੍ਪਨ੍ਨੋ, ਸੋਭਤੇ ਦ੍ਵਿਪਦੁਤ੍ਤਮੋ.

‘‘ਗਚ੍ਛਤੋ ਬੁਦ੍ਧਸੇਟ੍ਠਸ੍ਸ, ਹੇਟ੍ਠਾ ਪਾਦਤਲਂ ਮੁਦੁ;

ਸਮਂ ਸਮ੍ਫੁਸਤੇ ਭੂਮਿਂ, ਰਜਸਾਨੁਪਲਿਮ੍ਪਤਿ.

‘‘ਨਿਨ੍ਨਂ ਠਾਨਂ ਉਨ੍ਨਮਤਿ, ਗਚ੍ਛਨ੍ਤੇ ਲੋਕਨਾਯਕੇ;

ਉਨ੍ਨਤਞ੍ਚ ਸਮਂ ਹੋਤਿ, ਪਥਵੀ ਚ ਅਚੇਤਨਾ.

‘‘ਪਾਸਾਣਾ ਸਕ੍ਖਰਾ ਚੇਵ, ਕਥਲਾ ਖਾਣੁਕਣ੍ਟਕਾ;

ਸਬ੍ਬੇ ਮਗ੍ਗਾ ਵਿਵਜ੍ਜਨ੍ਤਿ, ਗਚ੍ਛਨ੍ਤੇ ਲੋਕਨਾਯਕੇ.

‘‘ਨਾਤਿਦੂਰੇ ਉਦ੍ਧਰਤਿ, ਨਚ੍ਚਾਸਨ੍ਨੇ ਚ ਨਿਕ੍ਖਿਪਂ;

ਅਘਟ੍ਟਯਨ੍ਤੋ ਨਿਯ੍ਯਾਤਿ, ਉਭੋ ਜਾਣੂ ਚ ਗੋਪ੍ਫਕੇ.

‘‘ਨਾਤਿਸੀਘਂ ਪਕ੍ਕਮਤਿ, ਸਮ੍ਪਨ੍ਨਚਰਣੋ ਮੁਨਿ;

ਨ ਚਾਪਿ ਸਣਿਕਂ ਯਾਤਿ, ਗਚ੍ਛਮਾਨੋ ਸਮਾਹਿਤੋ.

‘‘ਉਦ੍ਧਂ ਅਧੋ ਚ ਤਿਰਿਯਂ, ਦਿਸਞ੍ਚ ਵਿਦਿਸਂ ਤਥਾ;

ਨ ਪੇਕ੍ਖਮਾਨੋ ਸੋ ਯਾਤਿ, ਯੁਗਮਤ੍ਤਂਵਪੇਕ੍ਖਤਿ.

‘‘ਨਾਗਵਿਕ੍ਕਨ੍ਤਚਾਰੋ ਸੋ, ਗਮਨੇ ਸੋਭਤੇ ਜਿਨੋ;

ਚਾਰੁਂ ਗਚ੍ਛਤਿ ਲੋਕਗ੍ਗੋ, ਹਾਸਯਨ੍ਤੋ ਸਦੇਵਕੇ.

‘‘ਉਸਭਰਾਜਾਵ ਸੋਭਨ੍ਤੋ, ਚਾਰੁਚਾਰੀਵ ਕੇਸਰੀ;

ਤੋਸਯਨ੍ਤੋ ਬਹੂ ਸਤ੍ਤੇ, ਗਾਮਂ ਸੇਟ੍ਠੋ ਉਪਾਗਮੀ’’ਤਿ. –

ਵਣ੍ਣਕਾਲੋ ਨਾਮ ਕਿਰੇਸ. ਏਵਂਵਿਧੇਸੁ ਕਾਲੇਸੁ ਭਗਵਤੋ ਸਰੀਰਵਣ੍ਣੇ ਵਾ ਗੁਣਵਣ੍ਣੇ ਵਾ ਧਮ੍ਮਕਥਿਕਸ੍ਸ ਥਾਮੋਯੇਵ ਪਮਾਣਂ, ਚੁਣ੍ਣਿਯਪਦੇਹਿ ਗਾਥਾਬਨ੍ਧੇਹਿ ਯਤ੍ਤਕਂ ਸਕ੍ਕੋਤਿ, ਤਤ੍ਤਕਂ ਵਤ੍ਤਬ੍ਬਂ. ‘‘ਦੁਕ੍ਕਥਿਤ’’ਨ੍ਤਿ ਵਾ ‘‘ਅਤਿਤ੍ਥੇਨ ਪਕ੍ਖਨ੍ਦੋ’’ਤਿ ਵਾ ਨ ਵਤ੍ਤਬ੍ਬੋ. ਅਪਰਿਮਾਣਵਣ੍ਣਾ ਹਿ ਬੁਦ੍ਧਾ ਭਗਵਨ੍ਤੋ, ਤੇਸਂ ਬੁਦ੍ਧਾਪਿ ਅਨਵਸੇਸਤੋ ਵਣ੍ਣਂ ਵਤ੍ਤੁਂ ਅਸਮਤ੍ਥਾ. ਸਕਲਮ੍ਪਿ ਹਿ ਕਪ੍ਪਂ ਵਣ੍ਣੇਨ੍ਤਾ ਪਰਿਯੋਸਾਪੇਤੁਂ ਨ ਸਕ੍ਕੋਨ੍ਤਿ, ਪਗੇਵ ਇਤਰਾ ਪਜਾਤਿ. ਇਮਿਨਾ ਸਿਰਿਵਿਲਾਸੇਨ ਅਲਙ੍ਕਤਪ੍ਪਟਿਯਤ੍ਤਂ ਪਾਟਲਿਗਾਮਂ ਪਾਵਿਸਿ, ਪਵਿਸਿਤ੍ਵਾ ਭਗਵਾ ਪਸਨ੍ਨਚਿਤ੍ਤੇਨ ਜਨੇਨ ਪੁਪ੍ਫਗਨ੍ਧਧੂਮਵਾਸਚੁਣ੍ਣਾਦੀਹਿ ਪੂਜਿਯਮਾਨੋ ਆਵਸਥਾਗਾਰਂ ਪਾਵਿਸਿ. ਤੇਨ ਵੁਤ੍ਤਂ – ‘‘ਅਥ ਖੋ ਭਗਵਾ ਨਿਵਾਸੇਤ੍ਵਾ ਪਤ੍ਤਚੀਵਰਮਾਦਾਯ ਸਦ੍ਧਿਂ ਭਿਕ੍ਖੁਸਙ੍ਘੇਨ ਯੇਨ ਆਵਸਥਾਗਾਰਂ ਤੇਨੁਪਸਙ੍ਕਮੀ’’ਤਿ.

ਪਾਦੇ ਪਕ੍ਖਾਲੇਤ੍ਵਾਤਿ ਯਦਿਪਿ ਭਗਵਤੋ ਪਾਦੇ ਰਜੋਜਲ੍ਲਂ ਨ ਉਪਲਿਮ੍ਪਤਿ, ਤੇਸਂ ਪਨ ਉਪਾਸਕਾਨਂ ਕੁਸਲਾਭਿਵੁਦ੍ਧਿਂ ਆਕਙ੍ਖਨ੍ਤੋ ਪਰੇਸਂ ਦਿਟ੍ਠਾਨੁਗਤਿਂ ਆਪਜ੍ਜਨਤ੍ਥਞ੍ਚ ਭਗਵਾ ਪਾਦੇ ਪਕ੍ਖਾਲੇਤਿ. ਅਪਿਚ ਉਪਾਦਿਨ੍ਨਕਸਰੀਰਂ ਨਾਮ ਸੀਤਂ ਕਾਤਬ੍ਬਮ੍ਪਿ ਹੋਤੀਤਿ ਏਤਦਤ੍ਥਮ੍ਪਿ ਭਗਵਾ ਨ੍ਹਾਨਪਾਦਧੋਵਨਾਦੀਨਿ ਕਰੋਤਿਯੇਵ. ਭਗਵਨ੍ਤਂਯੇਵ ਪੁਰਕ੍ਖਤ੍ਵਾਤਿ ਭਗਵਨ੍ਤਂ ਪੁਰਤੋ ਕਤ੍ਵਾ. ਤਤ੍ਥ ਭਗਵਾ ਭਿਕ੍ਖੂਨਞ੍ਚੇਵ ਉਪਾਸਕਾਨਞ੍ਚ ਮਜ੍ਝੇ ਨਿਸਿਨ੍ਨੋ ਗਨ੍ਧੋਦਕੇਨ ਨ੍ਹਾਪੇਤ੍ਵਾ ਦੁਕੂਲਚੁਮ੍ਬਟਕੇਨ ਵੋਦਕਂ ਕਤ੍ਵਾ ਜਾਤਿਹਿਙ੍ਗੁਲਕੇਨ ਮਜ੍ਜਿਤ੍ਵਾ ਰਤ੍ਤਕਮ੍ਬਲੇਨ ਪਲਿਵੇਠੇਤ੍ਵਾ ਪੀਠੇ ਠਪਿਤਾ ਰਤ੍ਤਸੁਵਣ੍ਣਘਨਪਟਿਮਾ ਵਿਯ ਅਤਿਵਿਰੋਚਿਤ੍ਥ.

ਅਯਂ ਪਨੇਤ੍ਥ ਪੋਰਾਣਾਨਂ ਵਣ੍ਣਭਣਨਮਗ੍ਗੋ –

‘‘ਗਨ੍ਤ੍ਵਾਨ ਮਣ੍ਡਲਮਾਲ਼ਂ, ਨਾਗਵਿਕ੍ਕਨ੍ਤਚਾਰਣੋ;

ਓਭਾਸਯਨ੍ਤੋ ਲੋਕਗ੍ਗੋ, ਨਿਸੀਦਿ ਵਰਮਾਸਨੇ.

‘‘ਤਹਿਂ ਨਿਸਿਨ੍ਨੋ ਨਰਦਮ੍ਮਸਾਰਥਿ,

ਦੇਵਾਤਿਦੇਵੋ ਸਤਪੁਞ੍ਞਲਕ੍ਖਣੋ;

ਬੁਦ੍ਧਾਸਨੇ ਮਜ੍ਝਗਤੋ ਵਿਰੋਚਤਿ,

ਸੁਵਣ੍ਣਨਿਕ੍ਖਂ ਵਿਯ ਪਣ੍ਡੁਕਮ੍ਬਲੇ.

‘‘ਨੇਕ੍ਖਂ ਜਮ੍ਬੋਨਦਸ੍ਸੇਵ, ਨਿਕ੍ਖਿਤ੍ਤਂ ਪਣ੍ਡੁਕਮ੍ਬਲੇ;

ਵਿਰੋਚਤਿ ਵੀਤਮਲੋ, ਮਣਿਵੇਰੋਚਨੋ ਯਥਾ.

‘‘ਮਹਾਸਾਲੋਵ ਸਮ੍ਫੁਲ੍ਲੋ, ਮੇਰੁਰਾਜਾਵਲਙ੍ਕਤੋ;

ਸੁਵਣ੍ਣਯੂਪਸਙ੍ਕਾਸੋ, ਪਦੁਮੋ ਕੋਕਨਦੋ ਯਥਾ.

‘‘ਜਲਨ੍ਤੋ ਦੀਪਰੁਕ੍ਖੋਵ, ਪਬ੍ਬਤਗ੍ਗੇ ਯਥਾ ਸਿਖੀ;

ਦੇਵਾਨਂ ਪਾਰਿਛਤ੍ਤੋਵ, ਸਬ੍ਬਫੁਲ੍ਲੋ ਵਿਰੋਚਤੀ’’ਤਿ.

ਪਾਟਲਿਗਾਮਿਯੇ ਉਪਾਸਕੇ ਆਮਨ੍ਤੇਸੀਤਿ ਯਸ੍ਮਾ ਤੇਸੁ ਉਪਾਸਕੇਸੁ ਬਹੂ ਜਨਾ ਸੀਲੇਸੁ ਪਤਿਟ੍ਠਿਤਾ, ਤਸ੍ਮਾ ਪਠਮਂ ਤਾਵ ਸੀਲਵਿਪਤ੍ਤਿਯਾ ਆਦੀਨਵਂ ਪਕਾਸੇਤ੍ਵਾ ਪਚ੍ਛਾ ਸੀਲਸਮ੍ਪਦਾਯ ਆਨਿਸਂਸਂ ਦਸ੍ਸੇਤੁਂ, ‘‘ਪਞ੍ਚਿਮੇ ਗਹਪਤਯੋ’’ਤਿਆਦਿਨਾ ਧਮ੍ਮਦੇਸਨਤ੍ਥਂ ਆਮਨ੍ਤੇਸਿ.

ਤਤ੍ਥ ਦੁਸ੍ਸੀਲੋਤਿ ਨਿਸ੍ਸੀਲੋ. ਸੀਲਵਿਪਨ੍ਨੋਤਿ ਵਿਪਨ੍ਨਸੀਲੋ ਭਿਨ੍ਨਸਂਵਰੋ. ਏਤ੍ਥ ਚ ‘‘ਦੁਸ੍ਸੀਲੋ’’ਤਿ ਪਦੇਨ ਪੁਗ੍ਗਲਸ੍ਸ ਸੀਲਾਭਾਵੋ ਵੁਤ੍ਤੋ. ਸੋ ਪਨਸ੍ਸ ਸੀਲਾਭਾਵੋ ਦੁਵਿਧੋ ਅਸਮਾਦਾਨੇਨ ਵਾ ਸਮਾਦਿਨ੍ਨਸ੍ਸ ਭੇਦੇਨ ਵਾਤਿ. ਤੇਸੁ ਪੁਰਿਮੋ ਨ ਤਥਾ ਸਾਵਜ੍ਜੋ, ਯਥਾ ਦੁਤਿਯੋ ਸਾਵਜ੍ਜਤਰੋ. ਯਥਾਧਿਪ੍ਪੇਤਾਦੀਨਵਨਿਮਿਤ੍ਤਂ ਸੀਲਾਭਾਵਂ ਪੁਗ੍ਗਲਾਧਿਟ੍ਠਾਨਾਯ ਦੇਸਨਾਯ ਦਸ੍ਸੇਤੁਂ, ‘‘ਸੀਲਵਿਪਨ੍ਨੋ’’ਤਿ ਵੁਤ੍ਤਂ. ਤੇਨ ‘‘ਦੁਸ੍ਸੀਲੋ’’ਤਿ ਪਦਸ੍ਸ ਅਤ੍ਥਂ ਦਸ੍ਸੇਤਿ. ਪਮਾਦਾਧਿਕਰਣਨ੍ਤਿ ਪਮਾਦਕਾਰਣਾ. ਇਦਞ੍ਚ ਸੁਤ੍ਤਂ ਗਹਟ੍ਠਾਨਂ ਵਸੇਨ ਆਗਤਂ, ਪਬ੍ਬਜਿਤਾਨਮ੍ਪਿ ਪਨ ਲਬ੍ਭਤੇਵ. ਗਹਟ੍ਠੋ ਹਿ ਯੇਨ ਸਿਪ੍ਪਟ੍ਠਾਨੇਨ ਜੀਵਿਕਂ ਕਪ੍ਪੇਤਿ ਯਦਿ ਕਸਿਯਾ ਯਦਿ ਵਾਣਿਜ੍ਜਾਯ ਯਦਿ ਗੋਰਕ੍ਖੇਨ, ਪਾਣਾਤਿਪਾਤਾਦਿਵਸੇਨ ਪਮਤ੍ਤੋ ਤਂ ਤਂ ਯਥਾਕਾਲਂ ਸਮ੍ਪਾਦੇਤੁਂ ਨ ਸਕ੍ਕੋਤਿ, ਅਥਸ੍ਸ ਕਮ੍ਮਂ ਵਿਨਸ੍ਸਤਿ. ਮਾਘਾਤਕਾਲੇ ਪਨ ਪਾਣਾਤਿਪਾਤਾਦੀਨਿ ਕਰੋਨ੍ਤੋ ਦਣ੍ਡਵਸੇਨ ਮਹਤਿਂ ਭੋਗਜਾਨਿਂ ਨਿਗਚ੍ਛਤਿ. ਪਬ੍ਬਜਿਤੋ ਦੁਸ੍ਸੀਲੋ ਪਮਾਦਕਾਰਣਾ ਸੀਲਤੋ ਬੁਦ੍ਧਵਚਨਤੋ ਝਾਨਤੋ ਸਤ੍ਤਅਰਿਯਧਨਤੋ ਚ ਜਾਨਿਂ ਨਿਗਚ੍ਛਤਿ.

ਪਾਪਕੋ ਕਿਤ੍ਤਿਸਦ੍ਦੋਤਿ ਗਹਟ੍ਠਸ੍ਸ ‘‘ਅਸੁਕੋ ਅਮੁਕਕੁਲੇ ਜਾਤੋ ਦੁਸ੍ਸੀਲੋ ਪਾਪਧਮ੍ਮੋ ਪਰਿਚ੍ਚਤ੍ਤਇਧਲੋਕਪਰਲੋਕੋ ਸਲਾਕਭਤ੍ਤਮਤ੍ਤਮ੍ਪਿ ਨ ਦੇਤੀ’’ਤਿ ਪਰਿਸਮਜ੍ਝੇ ਪਾਪਕੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਚ੍ਛਤਿ. ਪਬ੍ਬਜਿਤਸ੍ਸ ‘‘ਅਸੁਕੋ ਨਾਮ ਥੇਰੋ ਸਤ੍ਥੁ ਸਾਸਨੇ ਪਬ੍ਬਜਿਤ੍ਵਾ ਨਾਸਕ੍ਖਿ ਸੀਲਾਨਿ ਰਕ੍ਖਿਤੁਂ, ਨ ਬੁਦ੍ਧਵਚਨਂ ਗਹੇਤੁਂ, ਵੇਜ੍ਜਕਮ੍ਮਾਦੀਹਿ ਜੀਵਤਿ, ਛਹਿ ਅਗਾਰਵੇਹਿ ਸਮਨ੍ਨਾਗਤੋ’’ਤਿ ਏਵਂ ਪਾਪਕੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਚ੍ਛਤਿ.

ਅਵਿਸਾਰਦੋਤਿ ਗਹਟ੍ਠੋ ਤਾਵ ਅਵਸ੍ਸਂ ਬਹੂਨਂ ਸਨ੍ਨਿਪਾਤਟ੍ਠਾਨੇ ‘‘ਕੋਚਿ ਮਮ ਕਮ੍ਮਂ ਜਾਨਿਸ੍ਸਤਿ, ਅਥ ਮਂ ਨਿਨ੍ਦਿਸ੍ਸਤਿ, ਰਾਜਕੁਲਸ੍ਸ ਵਾ ਦਸ੍ਸੇਸ੍ਸਤੀ’’ਤਿ ਸਭਯੋ ਉਪਸਙ੍ਕਮਤਿ, ਮਙ੍ਕੁਭੂਤੋ ਪਤ੍ਤਕ੍ਖਨ੍ਧੋ ਅਧੋਮੁਖੋ ਨਿਸੀਦਤਿ, ਵਿਸਾਰਦੋ ਹੁਤ੍ਵਾ ਕਥੇਤੁਂ ਨ ਸਕ੍ਕੋਤਿ. ਪਬ੍ਬਜਿਤੋਪਿ ਬਹੁਭਿਕ੍ਖੁਸਙ੍ਘੇ ਸਨ੍ਨਿਪਤਿਤੇ ‘‘ਅਵਸ੍ਸਂ ਕੋਚਿ ਮਮ ਕਮ੍ਮਂ ਜਾਨਿਸ੍ਸਤਿ, ਅਥ ਮੇ ਉਪੋਸਥਮ੍ਪਿ ਪਵਾਰਣਮ੍ਪਿ ਠਪੇਤ੍ਵਾ ਸਾਮਞ੍ਞਤੋ ਚਾਵੇਤ੍ਵਾ ਨਿਕ੍ਕਡ੍ਢਿਸ੍ਸਤੀ’’ਤਿ ਸਭਯੋ ਉਪਸਙ੍ਕਮਤਿ, ਵਿਸਾਰਦੋ ਹੁਤ੍ਵਾ ਕਥੇਤੁਂ ਨ ਸਕ੍ਕੋਤਿ. ਏਕਚ੍ਚੋ ਪਨ ਦੁਸ੍ਸੀਲੋਪਿ ਸਮਾਨੋ ਸੁਸੀਲੋ ਵਿਯ ਚਰਤਿ, ਸੋਪਿ ਅਜ੍ਝਾਸਯੇਨ ਮਙ੍ਕੁ ਹੋਤਿਯੇਵ.

ਸਮ੍ਮੂਲ਼੍ਹੋ ਕਾਲਂ ਕਰੋਤੀਤਿ ਦੁਸ੍ਸੀਲਸ੍ਸ ਹਿ ਮਰਣਮਞ੍ਚੇ ਨਿਪਨ੍ਨਸ੍ਸ ਦੁਸ੍ਸੀਲਕਮ੍ਮਾਨਿ ਸਮਾਦਾਯ ਪਵਤ੍ਤਿਤਟ੍ਠਾਨਾਨਿ ਆਪਾਥਂ ਆਗਚ੍ਛਨ੍ਤਿ. ਸੋ ਉਮ੍ਮੀਲੇਤ੍ਵਾ ਇਧਲੋਕਂ, ਨਿਮੀਲੇਤ੍ਵਾ ਪਰਲੋਕਂ ਪਸ੍ਸਤਿ. ਤਸ੍ਸ ਚਤ੍ਤਾਰੋ ਅਪਾਯਾ ਕਮ੍ਮਾਨੁਰੂਪਂ ਉਪਟ੍ਠਹਨ੍ਤਿ, ਸਤ੍ਤਿਸਤੇਨ ਪਹਰਿਯਮਾਨੋ ਵਿਯ ਅਗ੍ਗਿਜਾਲਾਭਿਘਾਤੇਨ ਝਾਯਮਾਨੋ ਵਿਯ ਚ ਹੋਤਿ. ਸੋ ‘‘ਵਾਰੇਥ, ਵਾਰੇਥਾ’’ਤਿ ਵਿਰਵਨ੍ਤੋਵ ਮਰਤਿ. ਤੇਨ ਵੁਤ੍ਤਂ – ‘‘ਸਮ੍ਮੂਲ਼੍ਹੋ ਕਾਲਂ ਕਰੋਤੀ’’ਤਿ.

ਕਾਯਸ੍ਸ ਭੇਦਾਤਿ ਉਪਾਦਿਨ੍ਨਕ੍ਖਨ੍ਧਪਰਿਚ੍ਚਾਗਾ. ਪਰਂ ਮਰਣਾਤਿ ਤਦਨਨ੍ਤਰਂ ਅਭਿਨਿਬ੍ਬਤ੍ਤਕ੍ਖਨ੍ਧਗ੍ਗਹਣਾ. ਅਥ ਵਾ ਕਾਯਸ੍ਸ ਭੇਦਾਤਿ ਜੀਵਿਤਿਨ੍ਦ੍ਰਿਯਸ੍ਸ ਉਪਚ੍ਛੇਦਾ. ਪਰਂ ਮਰਣਾਤਿ ਚੁਤਿਤੋ ਉਦ੍ਧਂ. ਅਪਾਯਨ੍ਤਿਆਦਿ ਸਬ੍ਬਂ ਨਿਰਯਵੇਵਚਨਂ. ਨਿਰਯੋ ਹਿ ਸਗ੍ਗਮੋਕ੍ਖਹੇਤੁਭੂਤਾ ਪੁਞ੍ਞਸਙ੍ਖਾਤਾ ਅਯਾ ਅਪੇਤਤ੍ਤਾ, ਸੁਖਾਨਂ ਵਾ ਅਯਸ੍ਸ, ਆਗਮਨਸ੍ਸ ਵਾ ਅਭਾਵਾ ਅਪਾਯੋ. ਦੁਕ੍ਖਸ੍ਸ ਗਤਿ ਪਟਿਸਰਣਨ੍ਤਿ ਦੁਗ੍ਗਤਿ, ਦੋਸਬਹੁਲਤਾਯ ਵਾ ਦੁਟ੍ਠੇਨ ਕਮ੍ਮੁਨਾ ਨਿਬ੍ਬਤ੍ਤਾ ਗਤੀਤਿ ਦੁਗ੍ਗਤਿ. ਵਿਵਸਾ ਨਿਪਤਨ੍ਤਿ ਏਤ੍ਥ ਦੁਕ੍ਕਤਕਾਰਿਨੋਤਿ ਵਿਨਿਪਾਤੋ, ਵਿਨਸ੍ਸਨ੍ਤਾ ਵਾ ਏਤ੍ਥ ਨਿਪਤਨ੍ਤਿ ਸਮ੍ਭਿਜ੍ਜਮਾਨਙ੍ਗਪਚ੍ਚਙ੍ਗਾਤਿ ਵਿਨਿਪਾਤੋ. ਨਤ੍ਥਿ ਏਤ੍ਥ ਅਸ੍ਸਾਦਸਞ੍ਞਿਤੋ ਅਯੋਤਿ ਨਿਰਯੋ.

ਅਥ ਵਾ ਅਪਾਯਗ੍ਗਹਣੇਨ ਤਿਰਚ੍ਛਾਨਯੋਨਿਂ ਦੀਪੇਤਿ. ਤਿਰਚ੍ਛਾਨਯੋਨਿ ਹਿ ਅਪਾਯੋ ਸੁਗਤਿਤੋ ਅਪੇਤਤ੍ਤਾ, ਨ ਦੁਗ੍ਗਤਿ ਮਹੇਸਕ੍ਖਾਨਂ ਨਾਗਰਾਜਾਦੀਨਂ ਸਮ੍ਭਵਤੋ. ਦੁਗ੍ਗਤਿਗ੍ਗਹਣੇਨ ਪੇਤ੍ਤਿਵਿਸਯਂ ਦੀਪੇਤਿ. ਸੋ ਹਿ ਅਪਾਯੋ ਚੇਵ ਦੁਗ੍ਗਤਿ ਚ ਸੁਗਤਿਤੋ ਅਪੇਤਤ੍ਤਾ, ਦੁਕ੍ਖਸ੍ਸ ਚ ਗਤਿਭੂਤਤ੍ਤਾ, ਨ ਤੁ ਵਿਨਿਪਾਤੋ ਅਸੁਰਸਦਿਸਂ ਅਵਿਨਿਪਤਿਤਤ੍ਤਾ ਪੇਤਮਹਿਦ੍ਧਿਕਾਨਮ੍ਪਿ ਵਿਜ੍ਜਮਾਨਤ੍ਤਾ. ਵਿਨਿਪਾਤਗ੍ਗਹਣੇਨ ਅਸੁਰਕਾਯਂ ਦੀਪੇਤਿ. ਸੋ ਹਿ ਯਥਾਵੁਤ੍ਤੇਨਟ੍ਠੇਨ ‘‘ਅਪਾਯੋ’’ ਚੇਵ ‘‘ਦੁਗ੍ਗਤਿ’’ ਚ ਸਬ੍ਬਸਮ੍ਪਤ੍ਤਿਸਮੁਸ੍ਸਯੇਹਿ ਵਿਨਿਪਤਿਤਤ੍ਤਾ ‘‘ਵਿਨਿਪਾਤੋ’’ਤਿ ਚ ਵੁਚ੍ਚਤਿ. ਨਿਰਯਗ੍ਗਹਣੇਨ ਅਵੀਚਿਆਦਿਕਂ ਅਨੇਕਪ੍ਪਕਾਰਂ ਨਿਰਯਮੇਵ ਦੀਪੇਤਿ. ਉਪਪਜ੍ਜਤੀਤਿ ਨਿਬ੍ਬਤ੍ਤਤਿ.

ਆਨਿਸਂਸਕਥਾ ਵੁਤ੍ਤਵਿਪਰਿਯਾਯੇਨ ਵੇਦਿਤਬ੍ਬਾ. ਅਯਂ ਪਨ ਵਿਸੇਸੋ – ਸੀਲਵਾਤਿ ਸਮਾਦਾਨਵਸੇਨ ਸੀਲਵਾ. ਸੀਲਸਮ੍ਪਨ੍ਨੋਤਿ ਪਰਿਸੁਦ੍ਧਂ ਪਰਿਪੁਣ੍ਣਞ੍ਚ ਕਤ੍ਵਾ ਸੀਲਸ੍ਸ ਸਮਾਦਾਨੇਨ ਸੀਲਸਮ੍ਪਨ੍ਨੋ. ਭੋਗਕ੍ਖਨ੍ਧਨ੍ਤਿ ਭੋਗਰਾਸਿਂ. ਸੁਗਤਿਂ ਸਗ੍ਗਂ ਲੋਕਨ੍ਤਿ ਏਤ੍ਥ ਸੁਗਤਿਗ੍ਗਹਣੇਨ ਮਨੁਸ੍ਸਗਤਿਪਿ ਸਙ੍ਗਯ੍ਹਤਿ, ਸਗ੍ਗਗ੍ਗਹਣੇਨ ਦੇਵਗਤਿ ਏਵ. ਤਤ੍ਥ ਸੁਨ੍ਦਰਾ ਗਤਿ ਸੁਗਤਿ, ਰੂਪਾਦੀਹਿ ਵਿਸਯੇਹਿ ਸੁਟ੍ਠੁ ਅਗ੍ਗੋਤਿ ਸਗ੍ਗੋ, ਸੋ ਸਬ੍ਬੋਪਿ ਲੁਜ੍ਜਨਪਲੁਜ੍ਜਨਟ੍ਠੇਨ ਲੋਕੋਤਿ.

ਪਾਟਲਿਗਾਮਿਯੇ ਉਪਾਸਕੇ ਬਹੁਦੇਵ ਰਤ੍ਤਿਂ ਧਮ੍ਮਿਯਾ ਕਥਾਯਾਤਿ ਅਞ੍ਞਾਯਪਿ ਪਾਲ਼ਿਮੁਤ੍ਤਾਯ ਧਮ੍ਮਕਥਾਯ ਚੇਵ ਆਵਸਥਾਨੁਮੋਦਨਕਥਾਯ ਚ. ਤਦਾ ਹਿ ਭਗਵਾ ਯਸ੍ਮਾ ਅਜਾਤਸਤ੍ਤੁਨਾ ਤਤ੍ਥ ਪਾਟਲਿਪੁਤ੍ਤਨਗਰਂ ਮਾਪੇਨ੍ਤੇਨ ਅਞ੍ਞੇਸੁ ਗਾਮਨਿਗਮਜਨਪਦਰਾਜਧਾਨੀਸੁ ਯੇ ਸੀਲਾਚਾਰਸਮ੍ਪਨ੍ਨਾ ਕੁਟੁਮ੍ਬਿਕਾ, ਤੇ ਆਨੇਤ੍ਵਾ ਧਨਧਞ੍ਞਘਰਵਤ੍ਥੁਖੇਤ੍ਤਵਤ੍ਥਾਦੀਨਿ ਚੇਵ ਪਰਿਹਾਰਞ੍ਚ ਦਾਪੇਤ੍ਵਾ ਨਿਵੇਸਿਯਨ੍ਤਿ. ਤਸ੍ਮਾ ਪਾਟਲਿਗਾਮਿਯਾ ਉਪਾਸਕਾ ਆਨਿਸਂਸਦਸ੍ਸਾਵਿਤਾਯ ਵਿਸੇਸਤੋ ਸੀਲਗਰੁਕਾ ਸਬ੍ਬਗੁਣਾਨਞ੍ਚ ਸੀਲਸ੍ਸ ਅਧਿਟ੍ਠਾਨਭਾਵਤੋ ਤੇਸਂ ਪਠਮਂ ਸੀਲਾਨਿਸਂਸੇ ਪਕਾਸੇਤ੍ਵਾ ਤਤੋ ਪਰਂ ਆਕਾਸਗਙ੍ਗਂ ਓਤਾਰੇਨ੍ਤੋ ਵਿਯ, ਪਥਵੋਜਂ ਆਕਡ੍ਢਨ੍ਤੋ ਵਿਯ, ਮਹਾਜਮ੍ਬੁਂ ਮਤ੍ਥਕੇ ਗਹੇਤ੍ਵਾ ਚਾਲੇਨ੍ਤੋ ਵਿਯ, ਯੋਜਨਿਕਮਧੁਕਣ੍ਡਂ ਚਕ੍ਕਯਨ੍ਤੇਨ ਪੀਲ਼ੇਤ੍ਵਾ ਮਧੁਰਸਂ ਪਾਯਮਾਨੋ ਵਿਯ ਪਾਟਲਿਗਾਮਿਕਾਨਂ ਉਪਾਸਕਾਨਂ ਹਿਤਸੁਖਾਵਹਂ ਪਕਿਣ੍ਣਕਕਥਂ ਕਥੇਨ੍ਤੋ ‘‘ਆਵਾਸਦਾਨਂ ਨਾਮੇਤਂ ਗਹਪਤਯੋ ਮਹਨ੍ਤਂ ਪੁਞ੍ਞਂ, ਤੁਮ੍ਹਾਕਂ ਆਵਾਸੋ ਮਯਾ ਪਰਿਭੁਤ੍ਤੋ, ਭਿਕ੍ਖੁਸਙ੍ਘੇਨ ਚ ਪਰਿਭੁਤ੍ਤੋ, ਮਯਾ ਚ ਭਿਕ੍ਖੁਸਙ੍ਘੇਨ ਚ ਪਰਿਭੁਤ੍ਤੇ ਪਨ ਧਮ੍ਮਰਤਨੇਨਪਿ ਪਰਿਭੁਤ੍ਤੋਯੇਵ ਹੋਤਿ. ਏਵਂ ਤੀਹਿ ਰਤਨੇਹਿ ਪਰਿਭੁਤ੍ਤੇ ਅਪਰਿਮੇਯ੍ਯੋ ਚ ਵਿਪਾਕੋ, ਅਪਿਚ ਆਵਾਸਦਾਨਸ੍ਮਿਂ ਦਿਨ੍ਨੇ ਸਬ੍ਬਦਾਨਂ ਦਿਨ੍ਨਮੇਵ ਹੋਤਿ, ਭੂਮਟ੍ਠਕਪਣ੍ਣਸਾਲਾਯ ਵਾ ਸਾਖਾਮਣ੍ਡਪਸ੍ਸ ਵਾ ਸਙ੍ਘਂ ਉਦ੍ਦਿਸ੍ਸ ਕਤਸ੍ਸ ਆਨਿਸਂਸੋ ਪਰਿਚ੍ਛਿਨ੍ਦਿਤੁਂ ਨ ਸਕ੍ਕਾ. ਆਵਾਸਦਾਨਾਨੁਭਾਵੇਨ ਹਿ ਭਵੇ ਨਿਬ੍ਬਤ੍ਤਮਾਨਸ੍ਸਪਿ ਸਮ੍ਪੀਲ਼ਿਤਗਬ੍ਭਵਾਸੋ ਨਾਮ ਨ ਹੋਤਿ, ਦ੍ਵਾਦਸਹਤ੍ਥੋ ਓਵਰਕੋ ਵਿਯਸ੍ਸ ਮਾਤੁਕੁਚ੍ਛਿ ਅਸਮ੍ਬਾਧੋਵ ਹੋਤੀ’’ਤਿ ਏਵਂ ਨਾਨਾਨਯੇਹਿ ਵਿਚਿਤ੍ਤਂ ਬਹੁਂ ਧਮ੍ਮਕਥਂ ਕਥੇਤ੍ਵਾ –

‘‘ਸੀਤਂ ਉਣ੍ਹਂ ਪਟਿਹਨ੍ਤਿ, ਤਤੋ ਵਾਲ਼ਮਿਗਾਨਿ ਚ;

ਸਰੀਸਪੇ ਚ ਮਕਸੇ, ਸਿਸਿਰੇ ਚਾਪਿ ਵੁਟ੍ਠਿਯੋ.

‘‘ਤਤੋ ਵਾਤਾਤਪੋ ਘੋਰੋ, ਸਞ੍ਜਾਤੋ ਪਟਿਹਞ੍ਞਤਿ;

ਲੇਣਤ੍ਥਞ੍ਚ ਸੁਖਤ੍ਥਞ੍ਚ, ਝਾਯਿਤੁਞ੍ਚ ਵਿਪਸ੍ਸਿਤੁਂ.

‘‘ਵਿਹਾਰਦਾਨਂ ਸਙ੍ਘਸ੍ਸ, ਅਗ੍ਗਂ ਬੁਦ੍ਧੇਨ ਵਣ੍ਣਿਤਂ;

ਤਸ੍ਮਾ ਹਿ ਪਣ੍ਡਿਤੋ ਪੋਸੋ, ਸਮ੍ਪਸ੍ਸਂ ਅਤ੍ਥਮਤ੍ਤਨੋ.

‘‘ਵਿਹਾਰੇ ਕਾਰਯੇ ਰਮ੍ਮੇ, ਵਾਸਯੇਤ੍ਥ ਬਹੁਸ੍ਸੁਤੇ;

ਤੇਸਂ ਅਨ੍ਨਞ੍ਚ ਪਾਨਞ੍ਚ, ਵਤ੍ਥਸੇਨਾਸਨਾਨਿ ਚ.

‘‘ਦਦੇਯ੍ਯ ਉਜੁਭੂਤੇਸੁ, ਵਿਪ੍ਪਸਨ੍ਨੇਨ ਚੇਤਸਾ;

ਤੇ ਤਸ੍ਸ ਧਮ੍ਮਂ ਦੇਸੇਨ੍ਤਿ, ਸਬ੍ਬਦੁਕ੍ਖਾਪਨੂਦਨਂ;

ਯਂ ਸੋ ਧਮ੍ਮਂ ਇਧਞ੍ਞਾਯ, ਪਰਿਨਿਬ੍ਬਾਤਿ ਅਨਾਸਵੋ’’ਤਿ. (ਚੂਲ਼ਵ. ੨੯੫) –

ਏਵਂ ਅਯਮ੍ਪਿ ਆਵਾਸਦਾਨੇ ਆਨਿਸਂਸੋਤਿ ਬਹੁਦੇਵ ਰਤ੍ਤਿਂ ਅਤਿਰੇਕਤਰਂ ਦਿਯਡ੍ਢਯਾਮਂ ਆਵਾਸਦਾਨਾਨਿਸਂਸਕਥਂ ਕਥੇਸਿ. ਤਤ੍ਥ ਇਮਾ ਗਾਥਾ ਤਾਵ ਸਙ੍ਗਹਂ ਆਰੁਲ਼੍ਹਾ, ਪਕਿਣ੍ਣਕਧਮ੍ਮਦੇਸਨਾ ਪਨ ਸਙ੍ਗਹਂ ਨਾਰੋਹਤਿ. ਸਨ੍ਦਸ੍ਸੇਤ੍ਵਾਤਿਆਦੀਨਿ ਵੁਤ੍ਤਤ੍ਥਾਨੇਵ.

ਅਭਿਕ੍ਕਨ੍ਤਾਤਿ ਅਤਿਕ੍ਕਨ੍ਤਾ ਦ੍ਵੇ ਯਾਮਾ ਗਤਾ. ਯਸ੍ਸ ਦਾਨਿ ਕਾਲਂ ਮਞ੍ਞਥਾਤਿ ਯਸ੍ਸ ਗਮਨਸ੍ਸ ਤੁਮ੍ਹੇ ਕਾਲਂ ਮਞ੍ਞਥ, ਗਮਨਕਾਲੋ ਤੁਮ੍ਹਾਕਂ, ਗਚ੍ਛਥਾਤਿ ਵੁਤ੍ਤਂ ਹੋਤਿ. ਕਸ੍ਮਾ ਪਨ ਭਗਵਾ ਤੇ ਉਯ੍ਯੋਜੇਸੀਤਿ? ਅਨੁਕਮ੍ਪਾਯ. ਤਿਯਾਮਰਤ੍ਤਿਞ੍ਹਿ ਤਤ੍ਥ ਨਿਸੀਦਿਤ੍ਵਾ ਵੀਤਿਨਾਮੇਨ੍ਤਾਨਂ ਤੇਸਂ ਸਰੀਰੇ ਆਬਾਧੋ ਉਪ੍ਪਜ੍ਜੇਯ੍ਯਾਤਿ, ਭਿਕ੍ਖੁਸਙ੍ਘੇਪਿ ਚ ਵਿਪ੍ਪਭਾਤਸਯਨਨਿਸਜ੍ਜਾਯ ਓਕਾਸੋ ਲਦ੍ਧੁਂ ਵਟ੍ਟਤਿ, ਇਤਿ ਉਭਯਾਨੁਕਮ੍ਪਾਯ ਉਯ੍ਯੋਜੇਸੀਤਿ. ਸੁਞ੍ਞਾਗਾਰਨ੍ਤਿ ਪਾਟਿਯੇਕ੍ਕਂ ਸੁਞ੍ਞਾਗਾਰਂ ਨਾਮ ਤਤ੍ਥ ਨਤ੍ਥਿ. ਤੇਨ ਕਿਰ ਗਹਪਤਯੋ ਤਸ੍ਸੇਵ ਆਵਸਥਾਗਾਰਸ੍ਸ ਏਕਪਸ੍ਸੇ ਪਟਸਾਣਿਯਾ ਪਰਿਕ੍ਖਿਪਾਪੇਤ੍ਵਾ ਕਪ੍ਪਿਯਮਞ੍ਚਂ ਪਞ੍ਞਾਪੇਤ੍ਵਾ ਤਤ੍ਥ ਕਪ੍ਪਿਯਪਚ੍ਚਤ੍ਥਰਣਂ ਅਤ੍ਥਰਿਤ੍ਵਾ ਉਪਰਿ ਸੁਵਣ੍ਣਰਜਤਤਾਰਕਾਗਨ੍ਧਮਾਲਾਦਿਪਟਿਮਣ੍ਡਿਤਂ ਵਿਤਾਨਂ ਬਨ੍ਧਿਤ੍ਵਾ ਤੇਲਪ੍ਪਦੀਪਂ ਆਰੋਪੇਸੁਂ ‘‘ਅਪ੍ਪੇਵ ਨਾਮ ਸਤ੍ਥਾ ਧਮ੍ਮਾਸਨਤੋ ਵੁਟ੍ਠਾਯ ਥੋਕਂ ਵਿਸ੍ਸਮਿਤੁਕਾਮੋ ਇਧ ਨਿਪਜ੍ਜੇਯ੍ਯ, ਏਵਂ ਨੋ ਇਦਂ ਆਵਸਥਾਗਾਰਂ ਭਗਵਤਾ ਚਤੂਹਿ ਇਰਿਯਾਪਥੇਹਿ ਪਰਿਭੁਤ੍ਤਂ ਦੀਘਰਤ੍ਤਂ ਹਿਤਾਯ ਸੁਖਾਯ ਭਵਿਸ੍ਸਤੀ’’ਤਿ. ਸਤ੍ਥਾਪਿ ਤਦੇਵ ਸਨ੍ਧਾਯ ਤਤ੍ਥ ਸਙ੍ਘਾਟਿਂ ਪਞ੍ਞਾਪੇਤ੍ਵਾ ਸੀਹਸੇਯ੍ਯਂ ਕਪ੍ਪੇਸਿ. ਤਂ ਸਨ੍ਧਾਯ ਵੁਤ੍ਤਂ ‘‘ਸੁਞ੍ਞਾਗਾਰਂ ਪਾਵਿਸੀ’’ਤਿ. ਤਤ੍ਥ ਪਾਦਧੋਵਨਟ੍ਠਾਨਤੋ ਪਟ੍ਠਾਯ ਯਾਵ ਧਮ੍ਮਾਸਨਾ ਅਗਮਾਸਿ, ਏਤ੍ਤਕੇ ਠਾਨੇ ਗਮਨਂ ਨਿਪ੍ਫਨ੍ਨਂ. ਧਮ੍ਮਾਸਨਂ ਪਤ੍ਵਾ ਥੋਕਂ ਅਟ੍ਠਾਸਿ, ਇਦਂ ਤਤ੍ਥ ਠਾਨਂ. ਭਗਵਾ ਦ੍ਵੇ ਯਾਮੇ ਧਮ੍ਮਾਸਨੇ ਨਿਸੀਦਿ, ਏਤ੍ਤਕੇ ਠਾਨੇ ਨਿਸਜ੍ਜਾ ਨਿਪ੍ਫਨ੍ਨਾ. ਉਪਾਸਕੇ ਉਯ੍ਯੋਜੇਤ੍ਵਾ ਧਮ੍ਮਾਸਨਤੋ ਓਰੁਯ੍ਹ ਯਥਾਵੁਤ੍ਤੇ ਠਾਨੇ ਸੀਹਸੇਯ੍ਯਂ ਕਪ੍ਪੇਸਿ. ਏਵਂ ਤਂ ਠਾਨਂ ਭਗਵਤਾ ਚਤੂਹਿ ਇਰਿਯਾਪਥੇਹਿ ਪਰਿਭੁਤ੍ਤਂ ਅਹੋਸੀਤਿ.

ਸੁਨਿਧਵਸ੍ਸਕਾਰਾਤਿ ਸੁਨਿਧੋ ਚ ਵਸ੍ਸਕਾਰੋ ਚ ਦ੍ਵੇ ਬ੍ਰਾਹ੍ਮਣਾ. ਮਗਧਮਹਾਮਤ੍ਤਾਤਿ ਮਗਧਰਞ੍ਞੋ ਮਹਾਅਮਚ੍ਚਾ, ਮਗਧਰਟ੍ਠੇ ਵਾ ਮਹਾਮਤ੍ਤਾ ਮਹਤਿਯਾ ਇਸ੍ਸਰਿਯਮਤ੍ਤਾਯ ਸਮਨ੍ਨਾਗਤਾਤਿ ਮਹਾਮਤ੍ਤਾ. ਪਾਟਲਿਗਾਮੇ ਨਗਰਂ ਮਾਪੇਨ੍ਤੀਤਿ ਪਾਟਲਿਗਾਮਸਙ੍ਖਾਤੇ ਭੂਮਿਪਦੇਸੇ ਨਗਰਂ ਮਾਪੇਨ੍ਤਿ. ਵਜ੍ਜੀਨਂ ਪਟਿਬਾਹਾਯਾਤਿ ਲਿਚ੍ਛਵਿਰਾਜੂਨਂ ਆਯਮੁਖਪ੍ਪਚ੍ਛਿਨ੍ਦਨਤ੍ਥਂ. ਸਹਸ੍ਸਸਹਸ੍ਸੇਵਾਤਿ ਏਕੇਕਵਗ੍ਗਵਸੇਨ ਸਹਸ੍ਸਂ ਸਹਸ੍ਸਂ ਹੁਤ੍ਵਾ. ਵਤ੍ਥੂਨੀਤਿ ਘਰਵਤ੍ਥੂਨਿ. ਚਿਤ੍ਤਾਨਿ ਨਮਨ੍ਤਿ ਨਿਵੇਸਨਾਨਿ ਮਾਪੇਤੁਨ੍ਤਿ ਰਞ੍ਞੋ ਰਾਜਮਹਾਮਤ੍ਤਾਨਞ੍ਚ ਨਿਵੇਸਨਾਨਿ ਮਾਪੇਤੁਂ ਵਤ੍ਥੁਵਿਜ੍ਜਾਪਾਠਕਾਨਂ ਚਿਤ੍ਤਾਨਿ ਨਮਨ੍ਤਿ. ਤੇ ਕਿਰ ਅਤ੍ਤਨੋ ਸਿਪ੍ਪਾਨੁਭਾਵੇਨ ਹੇਟ੍ਠਾਪਥਵਿਯਂ ਤਿਂਸਹਤ੍ਥਮਤ੍ਤੇ ਠਾਨੇ ‘‘ਇਧ ਨਾਗਗ੍ਗਾਹੋ, ਇਧ ਯਕ੍ਖਗ੍ਗਾਹੋ, ਇਧ ਭੂਤਗ੍ਗਾਹੋ, ਇਧ ਪਾਸਾਣੋ ਵਾ ਖਾਣੁਕੋ ਵਾ ਅਤ੍ਥੀ’’ਤਿ ਜਾਨਨ੍ਤਿ. ਤੇ ਤਦਾ ਸਿਪ੍ਪਂ ਜਪ੍ਪੇਤ੍ਵਾ ਦੇਵਤਾਹਿ ਸਦ੍ਧਿਂ ਸਮ੍ਮਨ੍ਤਯਮਾਨਾ ਵਿਯ ਮਾਪੇਨ੍ਤਿ.

ਅਥ ਵਾ ਨੇਸਂ ਸਰੀਰੇ ਦੇਵਤਾ ਅਧਿਮੁਚ੍ਚਿਤ੍ਵਾ ਤਤ੍ਥ ਤਤ੍ਥ ਨਿਵੇਸਨਾਨਿ ਮਾਪੇਤੁਂ ਚਿਤ੍ਤਂ ਨਾਮੇਨ੍ਤਿ. ਤਾ ਚਤੂਸੁ ਕੋਣੇਸੁ ਖਾਣੁਕੇ ਕੋਟ੍ਟੇਤ੍ਵਾ ਵਤ੍ਥੁਮ੍ਹਿ ਗਹਿਤਮਤ੍ਤੇ ਪਟਿਵਿਗਚ੍ਛਨ੍ਤਿ. ਸਦ੍ਧਕੁਲਾਨਂ ਸਦ੍ਧਾ ਦੇਵਤਾ ਤਥਾ ਕਰੋਨ੍ਤਿ, ਅਸ੍ਸਦ੍ਧਕੁਲਾਨਂ ਅਸ੍ਸਦ੍ਧਾ ਦੇਵਤਾ. ਕਿਂਕਾਰਣਾ? ਸਦ੍ਧਾਨਞ੍ਹਿ ਏਵਂ ਹੋਤਿ ‘‘ਇਧ ਮਨੁਸ੍ਸਾ ਨਿਵੇਸਨਂ ਮਾਪੇਨ੍ਤਾ ਪਠਮਂ ਭਿਕ੍ਖੁਸਙ੍ਘਂ ਨਿਸੀਦਾਪੇਤ੍ਵਾ ਮਙ੍ਗਲਂ ਵਦਾਪੇਸ੍ਸਨ੍ਤਿ, ਅਥ ਮਯਂ ਸੀਲਵਨ੍ਤਾਨਂ ਦਸ੍ਸਨਂ ਧਮ੍ਮਕਥਂ ਪਞ੍ਹਵਿਸ੍ਸਜ੍ਜਨਂ ਅਨੁਮੋਦਨਂ ਸੋਤੁਂ ਲਭਿਸ੍ਸਾਮ, ਮਨੁਸ੍ਸਾ ਚ ਦਾਨਂ ਦਤ੍ਵਾ ਅਮ੍ਹਾਕਂ ਪਤ੍ਤਿਂ ਦਸ੍ਸਨ੍ਤੀ’’ਤਿ. ਅਸ੍ਸਦ੍ਧਾ ਦੇਵਤਾਪਿ ‘‘ਅਤ੍ਤਨੋ ਇਚ੍ਛਾਨੁਰੂਪਂ ਤੇਸਂ ਪਟਿਪਤ੍ਤਿਂ ਪਸ੍ਸਿਤੁਂ, ਕਥਞ੍ਚ ਸੋਤੁਂ ਲਭਿਸ੍ਸਾਮਾ’’ਤਿ ਤਥਾ ਕਰੋਨ੍ਤਿ.

ਤਾਵਤਿਂਸੇਹੀਤਿ ਯਥਾ ਹਿ ਏਕਸ੍ਮਿਂ ਕੁਲੇ ਏਕਂ ਪਣ੍ਡਿਤਮਨੁਸ੍ਸਂ, ਏਕਸ੍ਮਿਞ੍ਚ ਵਿਹਾਰੇ ਏਕਂ ਬਹੁਸ੍ਸੁਤਂ ਭਿਕ੍ਖੁਂ ਉਪਾਦਾਯ ‘‘ਅਸੁਕਕੁਲੇ ਮਨੁਸ੍ਸਾ ਪਣ੍ਡਿਤਾ, ਅਸੁਕਵਿਹਾਰੇ ਭਿਕ੍ਖੂ ਬਹੁਸ੍ਸੁਤਾ’’ਤਿ ਸਦ੍ਦੋ ਅਬ੍ਭੁਗ੍ਗਚ੍ਛਤਿ, ਏਵਮੇਵ ਸਕ੍ਕਂ ਦੇਵਰਾਜਾਨਂ, ਵਿਸ੍ਸਕਮ੍ਮਞ੍ਚ ਦੇਵਪੁਤ੍ਤਂ ਉਪਾਦਾਯ ‘‘ਤਾਵਤਿਂਸਾ ਪਣ੍ਡਿਤਾ’’ਤਿ ਸਦ੍ਦੋ ਅਬ੍ਭੁਗ੍ਗਤੋ. ਤੇਨਾਹ ‘‘ਤਾਵਤਿਂਸੇਹੀ’’ਤਿ. ਸੇਯ੍ਯਥਾਪੀਤਿਆਦਿਨਾ ਦੇਵੇਹਿ ਤਾਵਤਿਂਸੇਹਿ ਸਦ੍ਧਿਂ ਮਨ੍ਤੇਤ੍ਵਾ ਵਿਯ ਸੁਨਿਧਵਸ੍ਸਕਾਰਾ ਨਗਰਂ ਮਾਪੇਨ੍ਤੀਤਿ ਦਸ੍ਸੇਤਿ.

ਯਾਵਤਾ, ਆਨਨ੍ਦ, ਅਰਿਯਂ ਆਯਤਨਨ੍ਤਿ ਯਤ੍ਤਕਂ ਅਰਿਯਮਨੁਸ੍ਸਾਨਂ ਓਸਰਣਟ੍ਠਾਨਂ ਨਾਮ ਅਤ੍ਥਿ. ਯਾਵਤਾ ਵਣਿਪ੍ਪਥੋਤਿ ਯਤ੍ਤਕਂ ਵਾਣਿਜਾਨਂ ਆਹਟਭਣ੍ਡਸ੍ਸ ਰਾਸਿਵਸੇਨ ਕਯਵਿਕ੍ਕਯਟ੍ਠਾਨਂ ਨਾਮ, ਵਾਣਿਜਾਨਂ ਵਸਨਟ੍ਠਾਨਂ ਵਾ ਅਤ੍ਥਿ. ਇਦਂ ਅਗ੍ਗਨਗਰਨ੍ਤਿ ਤੇਸਂ ਅਰਿਯਾਯਤਨਵਣਿਪ੍ਪਥਾਨਂ ਇਦਂ ਨਗਰਂ ਅਗ੍ਗਂ ਭਵਿਸ੍ਸਤਿ ਜੇਟ੍ਠਕਂ ਪਾਮੋਕ੍ਖਂ. ਪੁਟਭੇਦਨਨ੍ਤਿ ਭਣ੍ਡਪੁਟਭੇਦਨਟ੍ਠਾਨਂ, ਭਣ੍ਡਭਣ੍ਡਿਕਾਨਂ ਮੋਚਨਟ੍ਠਾਨਨ੍ਤਿ ਵੁਤ੍ਤਂ ਹੋਤਿ. ਸਕਲਜਮ੍ਬੁਦੀਪੇ ਅਲਦ੍ਧਭਣ੍ਡਮ੍ਪਿ ਹਿ ਇਧੇਵ ਲਭਿਸ੍ਸਨ੍ਤਿ, ਅਞ੍ਞਤ੍ਥ ਵਿਕ੍ਕਯਂ ਅਗਚ੍ਛਨ੍ਤਾਪਿ ਇਧੇਵ ਵਿਕ੍ਕਯਂ ਗਚ੍ਛਿਸ੍ਸਨ੍ਤਿ, ਤਸ੍ਮਾ ਇਧੇਵ ਪੁਟਂ ਭਿਨ੍ਦਿਸ੍ਸਨ੍ਤੀਤਿ ਅਤ੍ਥੋ. ਆਯਾਨਮ੍ਪਿ ਹਿ ਚਤੂਸੁ ਦ੍ਵਾਰੇਸੁ ਚਤ੍ਤਾਰਿ, ਸਭਾਯਂ ਏਕਨ੍ਤਿ ਏਵਂ ਦਿਵਸੇ ਦਿਵਸੇ ਪਞ੍ਚਸਤਸਹਸ੍ਸਾਨਿ ਤਤ੍ਥ ਉਟ੍ਠਹਿਸ੍ਸਨ੍ਤਿ. ਤਾਨਿ ਸਭਾਵਾਨਿ ਆਯਾਨੀਤਿ ਦਸ੍ਸੇਤਿ.

ਅਗ੍ਗਿਤੋ ਵਾਤਿਆਦੀਸੁ ਸਮੁਚ੍ਚਯਤ੍ਥੋ ਵਾਸਦ੍ਦੋ, ਅਗ੍ਗਿਨਾ ਚ ਉਦਕੇਨ ਚ ਮਿਥੁਭੇਦੇਨ ਚ ਨਸ੍ਸਿਸ੍ਸਤੀਤਿ ਅਤ੍ਥੋ. ਤਸ੍ਸ ਹਿ ਏਕੋ ਕੋਟ੍ਠਾਸੋ ਅਗ੍ਗਿਨਾ ਨਸ੍ਸਿਸ੍ਸਤਿ, ਨਿਬ੍ਬਾਪੇਤੁਂ ਨ ਸਕ੍ਖਿਸ੍ਸਨ੍ਤਿ, ਏਕਂ ਕੋਟ੍ਠਾਸਂ ਗਙ੍ਗਾ ਗਹੇਤ੍ਵਾ ਗਮਿਸ੍ਸਤਿ, ਏਕੋ ਇਮਿਨਾ ਅਕਥਿਤਂ ਅਮੁਸ੍ਸ, ਅਮੁਨਾ ਅਕਥਿਤਂ ਇਮਸ੍ਸ ਵਦਨ੍ਤਾਨਂ ਪਿਸੁਣਵਾਚਾਨਂ ਵਸੇਨ ਭਿਨ੍ਨਾਨਂ ਮਨੁਸ੍ਸਾਨਂ ਅਞ੍ਞਮਞ੍ਞਭੇਦੇਨ ਵਿਨਸ੍ਸਿਸ੍ਸਤਿ. ਏਵਂ ਵਤ੍ਵਾ ਭਗਵਾ ਪਚ੍ਚੂਸਕਾਲੇ ਗਙ੍ਗਾਤੀਰਂ ਗਨ੍ਤ੍ਵਾ ਕਤਮੁਖਧੋਵਨੋ ਭਿਕ੍ਖਾਚਾਰਵੇਲਂ ਆਗਮਯਮਾਨੋ ਨਿਸੀਦਿ.

ਸੁਨਿਧਵਸ੍ਸਕਾਰਾਪਿ ‘‘ਅਮ੍ਹਾਕਂ ਰਾਜਾ ਸਮਣਸ੍ਸ ਗੋਤਮਸ੍ਸ ਉਪਟ੍ਠਾਕੋ, ਸੋ ਅਮ੍ਹੇ ਉਪਗਤੇ ਪੁਚ੍ਛਿਸ੍ਸਤਿ ‘ਸਤ੍ਥਾ ਕਿਰ ਪਾਟਲਿਗਾਮਂ ਅਗਮਾਸਿ, ਕਿਂ ਤਸ੍ਸ ਸਨ੍ਤਿਕਂ ਉਪਸਙ੍ਕਮਿਤ੍ਥ, ਨ ਉਪਸਙ੍ਕਮਿਤ੍ਥਾ’ਤਿ. ‘ਉਪਸਙ੍ਕਮਿਮ੍ਹਾ’ਤਿ ਚ ਵੁਤ੍ਤੇ ‘ਨਿਮਨ੍ਤਯਿਤ੍ਥ, ਨ ਨਿਮਨ੍ਤਯਿਤ੍ਥਾ’ਤਿ ਪੁਚ੍ਛਿਸ੍ਸਤਿ. ‘ਨ ਨਿਮਨ੍ਤਯਿਮ੍ਹਾ’ਤਿ ਚ ਵੁਤ੍ਤੇ ਅਮ੍ਹਾਕਂ ਦੋਸਂ ਆਰੋਪੇਤ੍ਵਾ ਨਿਗ੍ਗਣ੍ਹਿਸ੍ਸਤਿ, ਇਦਞ੍ਚਾਪਿ ਮਯਂ ਅਕਤਟ੍ਠਾਨੇ ਨਗਰਂ ਮਾਪੇਮ, ਸਮਣਸ੍ਸ ਖੋ ਪਨ ਗੋਤਮਸ੍ਸ ਗਤਗਤਟ੍ਠਾਨੇ ਕਾਲ਼ਕਣ੍ਣਿਸਤ੍ਤਾ ਪਟਿਕ੍ਕਮਨ੍ਤਿ, ਤਂ ਮਯਂ ਨਗਰਮਙ੍ਗਲਂ ਵਾਚਾਪੇਸ੍ਸਾਮਾ’’ਤਿ ਚਿਨ੍ਤੇਤ੍ਵਾ ਸਤ੍ਥਾਰਂ ਉਪਸਙ੍ਕਮਿਤ੍ਵਾ ਨਿਮਨ੍ਤਯਿਂਸੁ. ਤੇਨ ਵੁਤ੍ਤਂ – ‘‘ਅਥ ਖੋ ਸੁਨਿਧਵਸ੍ਸਕਾਰਾ’’ਤਿਆਦਿ.

ਪੁਬ੍ਬਣ੍ਹਸਮਯਨ੍ਤਿ ਪੁਬ੍ਬਣ੍ਹੇ ਕਾਲੇ. ਨਿਵਾਸੇਤ੍ਵਾਤਿ ਗਾਮਪਵੇਸਨਨੀਹਾਰੇਨ ਨਿਵਾਸਨਂ ਨਿਵਾਸੇਤ੍ਵਾ ਕਾਯਬਨ੍ਧਨਂ ਬਨ੍ਧਿਤ੍ਵਾ. ਪਤ੍ਤਚੀਵਰਮਾਦਾਯਾਤਿ ਚੀਵਰਂ ਪਾਰੁਪਿਤ੍ਵਾ ਪਤ੍ਤਂ ਹਤ੍ਥੇਨ ਗਹੇਤ੍ਵਾ.

ਸੀਲਵਨ੍ਤੇਤ੍ਥਾਤਿ ਸੀਲਵਨ੍ਤੋ ਏਤ੍ਥ ਅਤ੍ਤਨੋ ਵਸਨਟ੍ਠਾਨੇ. ਸਞ੍ਞਤੇਤਿ ਕਾਯਵਾਚਾਚਿਤ੍ਤੇਹਿ ਸਞ੍ਞਤੇ. ਤਾਸਂ ਦਕ੍ਖਿਣਮਾਦਿਸੇਤਿ ਸਙ੍ਘਸ੍ਸ ਦਿਨ੍ਨੇ ਚਤ੍ਤਾਰੋ ਪਚ੍ਚਯੇ ਤਾਸਂ ਘਰਦੇਵਤਾਨਂ ਆਦਿਸੇਯ੍ਯ ਪਤ੍ਤਿਂ ਦਦੇਯ੍ਯ. ਪੂਜਿਤਾ ਪੂਜਯਨ੍ਤੀਤਿ ‘‘ਇਮੇ ਮਨੁਸ੍ਸਾ ਅਮ੍ਹਾਕਂ ਞਾਤਕਾਪਿ ਨ ਹੋਨ੍ਤਿ, ਏਵਮ੍ਪਿ ਨੋ ਪਤ੍ਤਿਂ ਦੇਨ੍ਤੀ’’ਤਿ ਆਰਕ੍ਖਂ ਸੁਸਂਵਿਹਿਤਂ ਕਰੋਨ੍ਤਿ ਸੁਟ੍ਠੁ ਆਰਕ੍ਖਂ ਕਰੋਨ੍ਤਿ. ਮਾਨਿਤਾ ਮਾਨਯਨ੍ਤੀਤਿ ਕਾਲਾਨੁਕਾਲਂ ਬਲਿਕਮ੍ਮਕਰਣੇਨ ਮਾਨਿਤਾ ‘‘ਏਤੇ ਮਨੁਸ੍ਸਾ ਅਮ੍ਹਾਕਂ ਞਾਤਕਾਪਿ ਨ ਹੋਨ੍ਤਿ, ਤਥਾਪਿ ਚਤੁਪਞ੍ਚਛਮਾਸਨ੍ਤਰਂ ਨੋ ਬਲਿਕਮ੍ਮਂ ਕਰੋਨ੍ਤੀ’’ਤਿ ਮਾਨੇਨ੍ਤਿ ਉਪ੍ਪਨ੍ਨਪਰਿਸ੍ਸਯਂ ਹਰਨ੍ਤਿ. ਤਤੋ ਨਨ੍ਤਿ ਤਤੋ ਤਂ ਪਣ੍ਡਿਤਜਾਤਿਕਂ ਪੁਰਿਸਂ. ਓਰਸਨ੍ਤਿ ਉਰੇ ਠਪੇਤ੍ਵਾ ਵਡ੍ਢਿਤਂ, ਯਥਾ ਮਾਤਾ ਓਰਸਂ ਪੁਤ੍ਤਂ ਅਨੁਕਮ੍ਪਤਿ, ਉਪ੍ਪਨ੍ਨਪਰਿਸ੍ਸਯਹਰਣਤ੍ਥਮੇਵਸ੍ਸ ਯਥਾ ਵਾਯਮਤਿ, ਏਵਂ ਅਨੁਕਮ੍ਪਨ੍ਤੀਤਿ ਅਤ੍ਥੋ. ਭਦ੍ਰਾਨਿ ਪਸ੍ਸਤੀਤਿ ਸੁਨ੍ਦਰਾਨਿ ਪਸ੍ਸਤਿ.

ਅਨੁਮੋਦਿਤ੍ਵਾਤਿ ਤੇਹਿ ਤਦਾ ਪਸੁਤਪੁਞ੍ਞਸ੍ਸ ਅਨੁਮੋਦਨਵਸੇਨ ਤੇਸਂ ਧਮ੍ਮਕਥਂ ਕਤ੍ਵਾ. ਸੁਨਿਧਵਸ੍ਸਕਾਰਾਪਿ ‘‘ਯਾ ਤਤ੍ਥ ਦੇਵਤਾ ਆਸੁਂ, ਤਾਸਂ ਦਕ੍ਖਿਣਮਾਦਿਸੇ’’ਤਿ ਭਗਵਤੋ ਵਚਨਂ ਸੁਤ੍ਵਾ ਦੇਵਤਾਨਂ ਪਤ੍ਤਿਂ ਅਦਂਸੁ. ਤਂ ਗੋਤਮਦ੍ਵਾਰਂ ਨਾਮ ਅਹੋਸੀਤਿ ਤਸ੍ਸ ਨਗਰਸ੍ਸ ਯੇਨ ਦ੍ਵਾਰੇਨ ਭਗਵਾ ਨਿਕ੍ਖਮਿ, ਤਂ ਗੋਤਮਦ੍ਵਾਰਂ ਨਾਮ ਅਹੋਸਿ. ਗਙ੍ਗਾਯ ਪਨ ਉਤ੍ਤਰਣਤ੍ਥਂ ਅਨੋਤਿਣ੍ਣਤ੍ਤਾ ਗੋਤਮਤਿਤ੍ਥਂ ਨਾਮ ਨਾਹੋਸਿ. ਪੂਰਾਤਿ ਪੁਣ੍ਣਾ. ਸਮਤਿਤ੍ਤਿਕਾਤਿ ਤਟਸਮਂ ਉਦਕਸ੍ਸ ਤਿਤ੍ਤਾ ਭਰਿਤਾ. ਕਾਕਪੇਯ੍ਯਾਤਿ ਤੀਰੇ ਠਿਤਕਾਕੇਹਿ ਪਾਤੁਂ ਸਕ੍ਕੁਣੇਯ੍ਯਉਦਕਾ. ਦ੍ਵੀਹਿਪਿ ਪਦੇਹਿ ਉਭਤੋਕੂਲਸਮਂ ਪਰਿਪੁਣ੍ਣਭਾਵਮੇਵ ਦਸ੍ਸੇਤਿ. ਉਲ਼ੁਮ੍ਪਨ੍ਤਿ ਪਾਰਗਮਨਤ੍ਥਾਯ ਦਾਰੂਨਿ ਸਙ੍ਘਾਟੇਤ੍ਵਾ ਆਣਿਯੋ ਕੋਟ੍ਟੇਤ੍ਵਾ ਕਤਂ. ਕੁਲ੍ਲਨ੍ਤਿ ਵੇਲ਼ੁਦਣ੍ਡਾਦਿਕੇ ਵਲ੍ਲਿਆਦੀਹਿ ਬਨ੍ਧਿਤ੍ਵਾ ਕਤਂ.

ਏਤਮਤ੍ਥਂ ਵਿਦਿਤ੍ਵਾਤਿ ਏਤਂ ਮਹਾਜਨਸ੍ਸ ਗਙ੍ਗੋਦਕਮਤ੍ਤਸ੍ਸਪਿ ਕੇਵਲਂ ਤਰਿਤੁਂ ਅਸਮਤ੍ਥਤਂ, ਅਤ੍ਤਨੋ ਪਨ ਭਿਕ੍ਖੁਸਙ੍ਘਸ੍ਸ ਚ ਅਤਿਗਮ੍ਭੀਰਵਿਤ੍ਥਤਂ ਸਂਸਾਰਮਹਣ੍ਣਵਂ ਤਰਿਤ੍ਵਾ ਠਿਤਭਾਵਞ੍ਚ ਸਬ੍ਬਾਕਾਰਤੋ ਵਿਦਿਤ੍ਵਾ ਤਦਤ੍ਥਪਰਿਦੀਪਨਂ ਇਮਂ ਉਦਾਨਂ ਉਦਾਨੇਸਿ.

ਤਤ੍ਥ ਅਣ੍ਣਵਨ੍ਤਿ ਸਬ੍ਬਨ੍ਤਿਮੇਨ ਪਰਿਚ੍ਛੇਦੇਨ ਯੋਜਨਮਤ੍ਤਂ ਗਮ੍ਭੀਰਸ੍ਸ ਚ ਵਿਤ੍ਥਤਸ੍ਸ ਚ ਉਦਕਟ੍ਠਾਨਸ੍ਸੇਤਂ ਅਧਿਵਚਨਂ. ਸਰਨ੍ਤਿ ਸਰਿਤ੍ਵਾ ਗਮਨਤੋ ਇਧ ਨਦੀ ਅਧਿਪ੍ਪੇਤਾ. ਇਦਂ ਵੁਤ੍ਤਂ ਹੋਤਿ – ਯੇ ਗਮ੍ਭੀਰਵਿਤ੍ਥਤਂ ਸਂਸਾਰਣ੍ਣਵਂ ਤਣ੍ਹਾਸਰਿਤਞ੍ਚ ਤਰਨ੍ਤਿ, ਤੇ ਅਰਿਯਮਗ੍ਗਸਙ੍ਖਾਤਂ ਸੇਤੁਂ ਕਤ੍ਵਾਨ ਵਿਸਜ੍ਜ ਪਲ੍ਲਲਾਨਿ ਅਨਾਮਸਿਤ੍ਵਾਵ ਉਦਕਭਰਿਤਾਨਿ ਨਿਨ੍ਨਟ੍ਠਾਨਾਨਿ, ਅਯਂ ਪਨ ਇਦਂ ਅਪ੍ਪਮਤ੍ਤਕਂ ਉਦਕਂ ਤਰਿਤੁਕਾਮੋ ਕੁਲ੍ਲਞ੍ਹਿ ਜਨੋ ਪਬਨ੍ਧਤਿ ਕੁਲ੍ਲਂ ਬਨ੍ਧਿਤੁਂ ਆਯਾਸਂ ਆਪਜ੍ਜਤਿ. ਤਿਣ੍ਣਾ ਮੇਧਾਵਿਨੋ ਜਨਾਤਿ ਅਰਿਯਮਗ੍ਗਞਾਣਸਙ੍ਖਾਤਾਯ ਮੇਧਾਯ ਸਮਨ੍ਨਾਗਤਤ੍ਤਾ ਮੇਧਾਵਿਨੋ ਬੁਦ੍ਧਾ ਚ ਬੁਦ੍ਧਸਾਵਕਾ ਚ ਵਿਨਾ ਏਵ ਕੁਲ੍ਲੇਨ ਤਿਣ੍ਣਾ ਪਰਤੀਰੇ ਪਤਿਟ੍ਠਿਤਾਤਿ.

ਛਟ੍ਠਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੭. ਦ੍ਵਿਧਾਪਥਸੁਤ੍ਤਵਣ੍ਣਨਾ

੭੭. ਸਤ੍ਤਮੇ ਅਦ੍ਧਾਨਮਗ੍ਗਪਟਿਪਨ੍ਨੋਤਿ ਅਦ੍ਧਾਨਸਙ੍ਖਾਤਂ ਦੀਘਮਗ੍ਗਂ ਪਟਿਪਨ੍ਨੋ ਗਚ੍ਛਨ੍ਤੋ ਹੋਤਿ. ਨਾਗਸਮਾਲੇਨਾਤਿ ਏਵਂਨਾਮਕੇਨ ਥੇਰੇਨ. ਪਚ੍ਛਾਸਮਣੇਨਾਤਿ ਅਯਂ ਤਦਾ ਭਗਵਤੋ ਉਪਟ੍ਠਾਕੋ ਅਹੋਸਿ. ਤੇਨ ਨਂ ਪਚ੍ਛਾਸਮਣਂ ਕਤ੍ਵਾ ਮਗ੍ਗਂ ਪਟਿਪਜ੍ਜਿ. ਭਗਵਤੋ ਹਿ ਪਠਮਬੋਧਿਯਂ ਵੀਸਤਿਵਸ੍ਸਾਨਿ ਅਨਿਬਦ੍ਧਾ ਉਪਟ੍ਠਾਕਾ ਅਹੇਸੁਂ, ਤਤੋ ਪਰਂ ਯਾਵ ਪਰਿਨਿਬ੍ਬਾਨਾ ਪਞ੍ਚਵੀਸਤਿਵਸ੍ਸਾਨਿ ਆਯਸ੍ਮਾ ਆਨਨ੍ਦੋ ਛਾਯਾਵ ਉਪਟ੍ਠਾਸਿ. ਅਯਂ ਪਨ ਅਨਿਬਦ੍ਧੁਪਟ੍ਠਾਕਕਾਲੋ. ਤੇਨ ਵੁਤ੍ਤਂ – ‘‘ਆਯਸ੍ਮਤਾ ਨਾਗਸਮਾਲੇਨ ਪਚ੍ਛਾਸਮਣੇਨਾ’’ਤਿ. ਦ੍ਵਿਧਾਪਥਨ੍ਤਿ ਦ੍ਵਿਧਾਭੂਤਂ ਮਗ੍ਗਂ. ‘‘ਦ੍ਵੇਧਾਪਥ’’ਨ੍ਤਿਪਿ ਪਠਨ੍ਤਿ ਆਯਸ੍ਮਾ ਨਾਗਸਮਾਲੋ ਅਤ੍ਤਨਾ ਪੁਬ੍ਬੇ ਤਤ੍ਥ ਕਤਪਰਿਚਯਤ੍ਤਾ ਉਜੁਭਾਵਞ੍ਚਸ੍ਸ ਸਨ੍ਧਾਯ ਵਦਤਿ ‘‘ਅਯਂ, ਭਨ੍ਤੇ ਭਗਵਾ, ਪਨ੍ਥੋ’’ਤਿ.

ਭਗਵਾ ਪਨ ਤਦਾ ਤਸ੍ਸ ਸਪਰਿਸ੍ਸਯਭਾਵਂ ਞਤ੍ਵਾ ਤਤੋ ਅਞ੍ਞਂ ਮਗ੍ਗਂ ਗਨ੍ਤੁਕਾਮੋ ‘‘ਅਯਂ, ਨਾਗਸਮਾਲ, ਪਨ੍ਥੋ’’ਤਿ ਆਹ. ‘‘ਸਪਰਿਸ੍ਸਯੋ’’ਤਿ ਚ ਵੁਤ੍ਤੇ ਅਸਦ੍ਦਹਿਤ੍ਵਾ ‘‘ਭਗਵਾ ਨ ਤਤ੍ਥ ਪਰਿਸ੍ਸਯੋ’’ਤਿ ਵਦੇਯ੍ਯ, ਤਦਸ੍ਸ ਦੀਘਰਤ੍ਤਂ ਅਹਿਤਾਯ ਦੁਕ੍ਖਾਯਾਤਿ ‘‘ਸਪਰਿਸ੍ਸਯੋ’’ਤਿ ਨ ਕਥੇਸਿ. ਤਿਕ੍ਖਤ੍ਤੁਂ ‘‘ਅਯਂ ਪਨ੍ਥੋ, ਇਮਿਨਾ ਗਚ੍ਛਾਮਾ’’ਤਿ ਵਤ੍ਵਾ ਚਤੁਤ੍ਥਵਾਰੇ ‘‘ਨ ਭਗਵਾ ਇਮਿਨਾ ਮਗ੍ਗੇਨ ਗਨ੍ਤੁਂ ਇਚ੍ਛਤਿ, ਅਯਮੇਵ ਚ ਉਜੁਮਗ੍ਗੋ, ਹਨ੍ਦਾਹਂ ਭਗਵਤੋ ਪਤ੍ਤਚੀਵਰਂ ਦਤ੍ਵਾ ਇਮਿਨਾ ਮਗ੍ਗੇਨ ਗਮਿਸ੍ਸਾਮੀ’’ਤਿ ਚਿਨ੍ਤੇਤ੍ਵਾ ਸਤ੍ਥੁ ਪਤ੍ਤਚੀਵਰਂ ਦਾਤੁਂ ਅਸਕ੍ਕੋਨ੍ਤੋ ਭੂਮਿਯਂ ਠਪੇਤ੍ਵਾ ਪਚ੍ਚੁਪਟ੍ਠਿਤੇਨ ਦੁਕ੍ਖਸਂਵਤ੍ਤਨਿਕੇਨ ਕਮ੍ਮੁਨਾ ਚੋਦਿਯਮਾਨੋ ਭਗਵਤੋ ਵਚਨਂ ਅਨਾਦਿਯਿਤ੍ਵਾਵ ਪਕ੍ਕਾਮਿ. ਤੇਨ ਵੁਤ੍ਤਂ – ‘‘ਅਥ ਖੋ ਆਯਸ੍ਮਾ ਨਾਗਸਮਾਲੋ ਭਗਵਤੋ ਪਤ੍ਤਚੀਵਰਂ ਤਤ੍ਥੇਵ ਛਮਾਯਂ ਨਿਕ੍ਖਿਪਿਤ੍ਵਾ ਪਕ੍ਕਾਮੀ’’ਤਿ. ਤਤ੍ਥ ਭਗਵਤੋ ਪਤ੍ਤਚੀਵਰਨ੍ਤਿ ਅਤ੍ਤਨੋ ਹਤ੍ਥਗਤਂ ਭਗਵਤੋ ਪਤ੍ਤਚੀਵਰਂ. ਤਤ੍ਥੇਵਾਤਿ ਤਸ੍ਮਿਂਯੇਵ ਮਗ੍ਗੇ ਛਮਾਯਂ ਪਥਵਿਯਂ ਨਿਕ੍ਖਿਪਿਤ੍ਵਾ ਪਕ੍ਕਾਮਿ. ਇਦਂ ਵੋ ਭਗਵਾ ਪਤ੍ਤਚੀਵਰਂ, ਸਚੇ ਇਚ੍ਛਥ, ਗਣ੍ਹਥ, ਯਦਿ ਅਤ੍ਤਨਾ ਇਚ੍ਛਿਤਮਗ੍ਗਂਯੇਵ ਗਨ੍ਤੁਕਾਮਤ੍ਥਾਤਿ ਅਧਿਪ੍ਪਾਯੋ. ਭਗਵਾਪਿ ਅਤ੍ਤਨੋ ਪਤ੍ਤਚੀਵਰਂ ਸਯਮੇਵ ਗਹੇਤ੍ਵਾ ਯਥਾਧਿਪ੍ਪੇਤਂ ਮਗ੍ਗਂ ਪਟਿਪਜ੍ਜਿ.

ਅਨ੍ਤਰਾਮਗ੍ਗੇ ਚੋਰਾ ਨਿਕ੍ਖਮਿਤ੍ਵਾਤਿ ਤਦਾ ਕਿਰ ਪਞ੍ਚਸਤਾ ਪੁਰਿਸਾ ਲੁਦ੍ਦਾ ਲੋਹਿਤਪਾਣਿਨੋ ਰਾਜਾਪਰਾਧਿਨੋ ਹੁਤ੍ਵਾ ਅਰਞ੍ਞਂ ਪਵਿਸਿਤ੍ਵਾ ਚੋਰਿਕਾਯ ਜੀਵਿਕਂ ਕਪ੍ਪੇਨ੍ਤਾ ‘‘ਪਾਰਿਪਨ੍ਥਿਕਭਾਵੇਨ ਰਞ੍ਞੋ ਆਯਪਥਂ ਪਚ੍ਛਿਨ੍ਦਿਸ੍ਸਾਮਾ’’ਤਿ ਮਗ੍ਗਸਮੀਪੇ ਅਰਞ੍ਞੇ ਤਿਟ੍ਠਨ੍ਤਿ. ਤੇ ਥੇਰਂ ਤੇਨ ਮਗ੍ਗੇਨ ਗਚ੍ਛਨ੍ਤਂ ਦਿਸ੍ਵਾ ‘‘ਅਯਂ ਸਮਣੋ ਇਮਿਨਾ ਮਗ੍ਗੇਨ ਆਗਚ੍ਛਤਿ, ਅਵਲ਼ਞ੍ਜਿਤਬ੍ਬਂ ਮਗ੍ਗਂ ਵਲ਼ਞ੍ਜੇਤਿ, ਅਮ੍ਹਾਕਂ ਅਤ੍ਥਿਭਾਵਂ ਨ ਜਾਨਾਤਿ, ਹਨ੍ਦ ਨਂ ਜਾਨਾਪੇਸ੍ਸਾਮਾ’’ਤਿ ਕੁਜ੍ਝਿਤ੍ਵਾ ਗਹਨਟ੍ਠਾਨਤੋ ਵੇਗੇਨ ਨਿਕ੍ਖਮਿਤ੍ਵਾ ਸਹਸਾ ਥੇਰਂ ਭੂਮਿਯਂ ਪਾਤੇਤ੍ਵਾ ਹਤ੍ਥਪਾਦੇਹਿ ਕੋਟ੍ਟੇਤ੍ਵਾ ਮਤ੍ਤਿਕਾਪਤ੍ਤਞ੍ਚਸ੍ਸ ਭਿਨ੍ਦਿਤ੍ਵਾ ਚੀਵਰਂ ਖਣ੍ਡਾਖਣ੍ਡਿਕਂ ਛਿਨ੍ਦਿਤ੍ਵਾ ਪਬ੍ਬਜਿਤਤ੍ਤਾ ‘‘ਤਂ ਨ ਹਨਾਮ, ਇਤੋ ਪਟ੍ਠਾਯ ਇਮਸ੍ਸ ਮਗ੍ਗਸ੍ਸ ਪਰਿਸ੍ਸਯਭਾਵਂ ਜਾਨਾਹੀ’’ਤਿ ਵਿਸ੍ਸਜ੍ਜੇਸੁਂ. ਤੇਨ ਵੁਤ੍ਤਂ – ‘‘ਅਥ ਖੋ ਆਯਸ੍ਮਤੋ…ਪੇ… ਵਿਪ੍ਫਾਲੇਸੁ’’ਨ੍ਤਿ.

ਭਗਵਾਪਿ ‘‘ਅਯਂ ਤੇਨ ਮਗ੍ਗੇਨ ਗਤੋ ਚੋਰੇਹਿ ਬਾਧਿਤੋ ਮਂ ਪਰਿਯੇਸਿਤ੍ਵਾ ਇਦਾਨੇਵ ਆਗਮਿਸ੍ਸਤੀ’’ਤਿ ਞਤ੍ਵਾ ਥੋਕਂ ਗਨ੍ਤ੍ਵਾ ਮਗ੍ਗਾ ਓਕ੍ਕਮ੍ਮ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਨਿਸੀਦਿ. ਆਯਸ੍ਮਾਪਿ ਖੋ ਨਾਗਸਮਾਲੋ ਪਚ੍ਚਾਗਨ੍ਤ੍ਵਾ ਸਤ੍ਥਾਰਾ ਗਤਮਗ੍ਗਮੇਵ ਗਹੇਤ੍ਵਾ ਗਚ੍ਛਨ੍ਤੋ ਤਸ੍ਮਿਂ ਰੁਕ੍ਖਮੂਲੇ ਭਗਵਨ੍ਤਂ ਪਸ੍ਸਿਤ੍ਵਾ ਉਪਸਙ੍ਕਮਿਤ੍ਵਾ ਵਨ੍ਦਿਤ੍ਵਾ ਤਂ ਪਵਤ੍ਤਿਂ ਸਬ੍ਬਂ ਆਰੋਚੇਸਿ. ਤੇਨ ਵੁਤ੍ਤਂ – ‘‘ਅਥ ਖੋ ਆਯਸ੍ਮਾ ਨਾਗਸਮਾਲੋ…ਪੇ… ਸਙ੍ਘਾਟਿਞ੍ਚ ਵਿਪ੍ਫਾਲੇਸੁ’’ਨ੍ਤਿ.

ਏਤਮਤ੍ਥਂ ਵਿਦਿਤ੍ਵਾਤਿ ਏਤਂ ਆਯਸ੍ਮਤੋ ਨਾਗਸਮਾਲਸ੍ਸ ਅਤ੍ਤਨੋ ਵਚਨਂ ਅਨਾਦਿਯਿਤ੍ਵਾ ਅਖੇਮਨ੍ਤਮਗ੍ਗਗਮਨਂ, ਅਤ੍ਤਨੋ ਚ ਖੇਮਨ੍ਤਮਗ੍ਗਗਮਨਂ ਵਿਦਿਤ੍ਵਾ ਤਦਤ੍ਥਦੀਪਨਂ ਇਮਂ ਉਦਾਨਂ ਉਦਾਨੇਸਿ.

ਤਤ੍ਥ ਸਦ੍ਧਿਂ ਚਰਨ੍ਤਿ ਸਹ ਚਰਨ੍ਤੋ. ਏਕਤੋ ਵਸਨ੍ਤਿ ਇਦਂ ਤਸ੍ਸੇਵ ਵੇਵਚਨਂ, ਸਹ ਵਸਨ੍ਤੋਤਿ ਅਤ੍ਥੋ. ਮਿਸ੍ਸੋ ਅਞ੍ਞਜਨੇਨ ਵੇਦਗੂਤਿ ਵੇਦਿਤਬ੍ਬਟ੍ਠੇਨ ਵੇਦਸਙ੍ਖਾਤੇਨ ਚਤੁਸਚ੍ਚਅਰਿਯਮਗ੍ਗਞਾਣੇਨ ਗਤਤ੍ਤਾ ਅਧਿਗਤਤ੍ਤਾ, ਵੇਦਸ੍ਸ ਵਾ ਸਕਲਸ੍ਸ ਞੇਯ੍ਯਸ੍ਸ ਪਾਰਂ ਗਤਤ੍ਤਾ ਵੇਦਗੂ. ਅਤ੍ਤਨੋ ਹਿਤਾਹਿਤਂ ਨ ਜਾਨਾਤੀਤਿ ਅਞ੍ਞੋ, ਅਵਿਦ੍ਵਾ ਬਾਲੋਤਿ ਅਤ੍ਥੋ. ਤੇਨ ਅਞ੍ਞੇਨ ਜਨੇਨ ਮਿਸ੍ਸੋ ਸਹਚਰਣਮਤ੍ਤੇਨ ਮਿਸ੍ਸੋ. ਵਿਦ੍ਵਾ ਪਜਹਾਤਿ ਪਾਪਕਨ੍ਤਿ ਤੇਨ ਵੇਦਗੂਭਾਵੇਨ ਵਿਦ੍ਵਾ ਜਾਨਨ੍ਤੋ ਪਾਪਕਂ ਅਭਦ੍ਦਕਂ ਅਤ੍ਤਨੋ ਦੁਕ੍ਖਾਵਹਂ ਪਜਹਾਤਿ, ਪਾਪਕਂ ਵਾ ਅਕਲ੍ਯਾਣਪੁਗ੍ਗਲਂ ਪਜਹਾਤਿ. ਯਥਾ ਕਿਂ? ਕੋਞ੍ਚੋ ਖੀਰਪਕੋਵ ਨਿਨ੍ਨਗਨ੍ਤਿ ਯਥਾ ਕੋਞ੍ਚਸਕੁਣੋ ਉਦਕਮਿਸ੍ਸਿਤੇ ਖੀਰੇ ਉਪਨੀਤੇ ਵਿਨਾ ਤੋਯਂ ਖੀਰਮਤ੍ਤਸ੍ਸੇਵ ਪਿਵਨਤੋ ਖੀਰਪਕੋ ਨਿਨ੍ਨਟ੍ਠਾਨਗਮਨੇਨ ਨਿਨ੍ਨਗਸਙ੍ਖਾਤਂ ਉਦਕਂ ਪਜਹਾਤਿ ਵਜ੍ਜੇਤਿ, ਏਵਂ ਪਣ੍ਡਿਤੋ ਕਿਰ ਦੁਪ੍ਪਞ੍ਞਪੁਗ੍ਗਲੇਹਿ ਠਾਨਨਿਸਜ੍ਜਾਦੀਸੁ ਸਹਭੂਤੋਪਿ ਆਚਾਰੇਨ ਤੇ ਪਜਹਾਤਿ, ਨ ਕਦਾਚਿਪਿ ਸਮ੍ਮਿਸ੍ਸੋ ਹੋਤਿ.