੧੦. ਦੁਤਿਯਦਬ੍ਬਸੁਤ੍ਤਵਣ੍ਣਨਾ

੮੦. ਦਸਮੇ ਤਤ੍ਰ ਖੋ ਭਗਵਾ ਭਿਕ੍ਖੂ ਆਮਨ੍ਤੇਸੀਤਿ ਭਗਵਾ ਰਾਜਗਹੇ ਯਥਾਭਿਰਨ੍ਤਂ ਵਿਹਰਿਤ੍ਵਾ ਜਨਪਦਚਾਰਿਕਂ ਚਰਨ੍ਤੋ ਅਨੁਕ੍ਕਮੇਨ ਸਾਵਤ੍ਥਿਂ ਪਤ੍ਵਾ ਜੇਤਵਨੇ ਵਿਹਰਨ੍ਤੋਯੇਵ ਯੇਸਂ ਭਿਕ੍ਖੂਨਂ ਆਯਸ੍ਮਤੋ ਦਬ੍ਬਸ੍ਸ ਮਲ੍ਲਪੁਤ੍ਤਸ੍ਸ ਪਰਿਨਿਬ੍ਬਾਨਂ ਅਪਚ੍ਚਕ੍ਖਂ, ਤੇਸਂ ਤਂ ਪਚ੍ਚਕ੍ਖਂ ਕਤ੍ਵਾ ਦਸ੍ਸੇਤੁਂ, ਯੇਪਿ ਚ ਮੇਤ੍ਤਿਯਭੂਮਜਕੇਹਿ ਕਤੇਨ ਅਭੂਤੇਨ ਅਬ੍ਭਾਚਿਕ੍ਖਣੇਨ ਥੇਰੇ ਗਾਰਵਰਹਿਤਾ ਪੁਥੁਜ੍ਜਨਾ, ਤੇਸਂ ਥੇਰੇ ਬਹੁਮਾਨੁਪ੍ਪਾਦਨਤ੍ਥਞ੍ਚ ਆਮਨ੍ਤੇਸਿ. ਤਤ੍ਥ ਤਤ੍ਰਾਤਿ ਵਚਨਸਞ੍ਞਾਪਨੇ ਨਿਪਾਤਮਤ੍ਤਂ. ਖੋਤਿ ਅਵਧਾਰਣੇ. ਤੇਸੁ ‘‘ਤਤ੍ਰਾ’’ਤਿ ਇਮਿਨਾ ‘‘ਭਗਵਾ ਭਿਕ੍ਖੂ ਆਮਨ੍ਤੇਸੀ’’ਤਿ ਏਤੇਸਂ ਪਦਾਨਂ ਵੁਚ੍ਚਮਾਨਤਂਯੇਵ ਜੋਤੇਤਿ. ‘‘ਖੋ’’ਤਿ ਪਨ ਇਮਿਨਾ ਆਮਨ੍ਤੇਸਿਯੇਵ, ਨਾਸ੍ਸ ਆਮਨ੍ਤਨੇ ਕੋਚਿ ਅਨ੍ਤਰਾਯੋ ਅਹੋਸੀਤਿ ਇਮਮਤ੍ਥਂ ਦਸ੍ਸੇਤਿ. ਅਥ ਵਾ ਤਤ੍ਰਾਤਿ ਤਸ੍ਮਿਂ ਆਰਾਮੇ. ਖੋਤਿ ਵਚਨਾਲਙ੍ਕਾਰੇ ਨਿਪਾਤੋ. ਆਮਨ੍ਤੇਸੀਤਿ ਅਭਾਸਿ. ਕਸ੍ਮਾ ਪਨ ਭਗਵਾ ਭਿਕ੍ਖੂਯੇਵ ਆਮਨ੍ਤੇਸੀਤਿ? ਜੇਟ੍ਠਤ੍ਤਾ ਸੇਟ੍ਠਤ੍ਤਾ ਆਸਨ੍ਨਤ੍ਤਾ ਸਬ੍ਬਕਾਲਂ ਸਨ੍ਨਿਹਿਤਤ੍ਤਾ ਧਮ੍ਮਦੇਸਨਾਯ ਵਿਸੇਸਤੋ ਭਾਜਨਭੂਤਤ੍ਤਾ ਚ.

ਭਿਕ੍ਖਵੋਤਿ ਤੇਸਂ ਆਮਨ੍ਤਨਾਕਾਰਦਸ੍ਸਨਂ. ਭਦਨ੍ਤੇਤਿ ਆਮਨ੍ਤਿਤਾਨਂ ਭਿਕ੍ਖੂਨਂ ਗਾਰਵੇਨ ਸਤ੍ਥੁ ਪਟਿਵਚਨਦਾਨਂ. ਤਤ੍ਥ ‘‘ਭਿਕ੍ਖਵੋ’’ਤਿ ਵਦਨ੍ਤੋ ਭਗਵਾ ਤੇ ਭਿਕ੍ਖੂ ਆਲਪਤਿ. ‘‘ਭਦਨ੍ਤੇ’’ਤਿ ਵਦਨ੍ਤਾ ਤੇ ਪਚ੍ਚਾਲਪਨ੍ਤਿ. ਅਪਿਚ ‘‘ਭਿਕ੍ਖਵੋ’’ਤਿ ਇਮਿਨਾ ਕਰੁਣਾਵਿਪ੍ਫਾਰਸੋਮ੍ਮਹਦਯਨਿਸ੍ਸਿਤਪੁਬ੍ਬਙ੍ਗਮੇਨ ਵਚਨੇਨ ਤੇ ਭਿਕ੍ਖੂ ਕਮ੍ਮਟ੍ਠਾਨਮਨਸਿਕਾਰਧਮ੍ਮਪਚ੍ਚਵੇਕ੍ਖਣਾਦਿਤੋ ਨਿਵਤ੍ਤੇਤ੍ਵਾ ਅਤ੍ਤਨੋ ਮੁਖਾਭਿਮੁਖੇ ਕਰੋਤਿ. ‘‘ਭਦਨ੍ਤੇ’’ਤਿ ਇਮਿਨਾ ਸਤ੍ਥਰਿ ਆਦਰਬਹੁਮਾਨਗਾਰਵਦੀਪਨਵਚਨੇਨ ਤੇ ਭਿਕ੍ਖੂ ਅਤ੍ਤਨੋ ਸੁਸ੍ਸੂਸਤਂ ਓਵਾਦਪ੍ਪਟਿਗ੍ਗਹਗਾਰਵਭਾਵਞ੍ਚ ਪਟਿਵੇਦੇਨ੍ਤਿ. ਭਗਵਤੋ ਪਚ੍ਚਸ੍ਸੋਸੁਨ੍ਤਿ ਤੇ ਭਿਕ੍ਖੂ ਭਗਵਤੋ ਵਚਨਂ ਪਤਿਅਸ੍ਸੋਸੁਂ ਸੋਤੁਕਾਮਤਂ ਜਨੇਸੁਂ. ਏਤਦਵੋਚਾਤਿ ਭਗਵਾ ਏਤਂ ਇਦਾਨਿ ਵਕ੍ਖਮਾਨਂ ਸਕਲਂ ਸੁਤ੍ਤਂ ਅਭਾਸਿ. ਦਬ੍ਬਸ੍ਸ, ਭਿਕ੍ਖਵੇ, ਮਲ੍ਲਪੁਤ੍ਤਸ੍ਸਾਤਿਆਦਿ ਅਨਨ੍ਤਰਸੁਤ੍ਤੇ ਵੁਤ੍ਤਤ੍ਥਮੇਵ. ਏਤਮਤ੍ਥਨ੍ਤਿਆਦੀਸੁਪਿ ਅਪੁਬ੍ਬਂ ਨਤ੍ਥਿ, ਅਨਨ੍ਤਰਸੁਤ੍ਤੇ ਵੁਤ੍ਤਨਯੇਨੇਵ ਵੇਦਿਤਬ੍ਬਂ.

ਗਾਥਾਸੁ ਪਨ ਅਯੋਘਨਹਤਸ੍ਸਾਤਿ ਅਯੋ ਹਞ੍ਞਤਿ ਏਤੇਨਾਤਿ ਅਯੋਘਨਂ, ਕਮ੍ਮਾਰਾਨਂ ਅਯੋਕੂਟਂ ਅਯੋਮੁਟ੍ਠਿ ਚ. ਤੇਨ ਅਯੋਘਨੇਨ ਹਤਸ੍ਸ ਪਹਤਸ੍ਸ. ਕੇਚਿ ਪਨ ‘‘ਅਯੋਘਨਹਤਸ੍ਸਾਤਿ ਘਨਅਯੋਪਿਣ੍ਡਂ ਹਤਸ੍ਸਾ’’ਤਿ ਅਤ੍ਥਂ ਵਦਨ੍ਤਿ. ਏਵ-ਸਦ੍ਦੋ ਚੇਤ੍ਥ ਨਿਪਾਤਮਤ੍ਤਂ. ਜਲਤੋ ਜਾਤਵੇਦਸੋਤਿ ਝਾਯਮਾਨਸ੍ਸ ਅਗ੍ਗਿਸ੍ਸ. ਅਨਾਦਰੇ ਏਤਂ ਸਾਮਿਵਚਨਂ. ਅਨੁਪੁਬ੍ਬੂਪਸਨ੍ਤਸ੍ਸਾਤਿ ਅਨੁਕ੍ਕਮੇਨ ਉਪਸਨ੍ਤਸ੍ਸ ਵਿਜ੍ਝਾਤਸ੍ਸ ਨਿਰੁਦ੍ਧਸ੍ਸ. ਯਥਾ ਨ ਞਾਯਤੇ ਗਤੀਤਿ ਯਥਾ ਤਸ੍ਸ ਗਤਿ ਨ ਞਾਯਤਿ. ਇਦਂ ਵੁਤ੍ਤਂ ਹੋਤਿ – ਅਯੋਮੁਟ੍ਠਿਕੂਟਾਦਿਨਾ ਮਹਤਾ ਅਯੋਘਨੇਨ ਹਤਸ੍ਸ ਸਂਹਤਸ੍ਸ, ਕਂਸਭਾਜਨਾਦਿਗਤਸ੍ਸ ਵਾ ਜਲਮਾਨਸ੍ਸ ਅਗ੍ਗਿਸ੍ਸ, ਤਥਾ ਉਪ੍ਪਨ੍ਨਸ੍ਸ ਵਾ ਸਦ੍ਦਸ੍ਸ ਅਨੁਕ੍ਕਮੇਨ ਉਪਸਨ੍ਤਸ੍ਸ ਸੁਵੂਪਸਨ੍ਤਸ੍ਸ ਦਸਸੁ ਦਿਸਾਸੁ ਨ ਕਤ੍ਥਚਿ ਗਤਿ ਪਞ੍ਞਾਯਤਿ ਪਚ੍ਚਯਨਿਰੋਧੇਨ ਅਪ੍ਪਟਿਸਨ੍ਧਿਕਨਿਰੁਦ੍ਧਤ੍ਤਾ.

ਏਵਂ ਸਮ੍ਮਾਵਿਮੁਤ੍ਤਾਨਨ੍ਤਿ ਏਵਂ ਸਮ੍ਮਾ ਹੇਤੁਨਾ ਞਾਯੇਨ ਤਦਙ੍ਗਵਿਕ੍ਖਮ੍ਭਨਵਿਮੁਤ੍ਤਿਪੁਬ੍ਬਙ੍ਗਮੇਨ ਅਰਿਯਮਗ੍ਗੇਨ ਚਤੂਹਿਪਿ ਉਪਾਦਾਨੇਹਿ ਆਸਵੇਹਿ ਚ ਵਿਮੁਤ੍ਤਤ੍ਤਾ ਸਮ੍ਮਾ ਵਿਮੁਤ੍ਤਾਨਂ, ਤਤੋ ਏਵ ਕਾਮਪਬਨ੍ਧਸਙ੍ਖਾਤਂ ਕਾਮੋਘਂ ਭਵੋਘਾਦਿਭੇਦਂ ਅਵਸਿਟ੍ਠਂ ਓਘਞ੍ਚ ਤਰਿਤ੍ਵਾ ਠਿਤਤ੍ਤਾ ਕਾਮਬਨ੍ਧੋਘਤਾਰਿਨਂ ਸੁਟ੍ਠੁ ਪਟਿਪਸ੍ਸਮ੍ਭਿਤਸਬ੍ਬਕਿਲੇਸਵਿਪ੍ਫਨ੍ਦਿਤਤ੍ਤਾ ਕਿਲੇਸਾਭਿਸਙ੍ਖਾਰਵਾਤੇਹਿ ਚ ਅਕਮ੍ਪਨੀਯਤਾਯ ਅਚਲਂ ਅਨੁਪਾਦਿਸੇਸਨਿਬ੍ਬਾਨਸਙ੍ਖਾਤਂ ਸਬ੍ਬਸਙ੍ਖਾਰੂਪਸਮਂ ਸੁਖਂ ਪਤ੍ਤਾਨਂ ਅਧਿਗਤਾਨਂ ਖੀਣਾਸਵਾਨਂ ਗਤਿ ਦੇਵਮਨੁਸ੍ਸਾਦਿਭੇਦਾਸੁ ਗਤੀਸੁ ਅਯਂ ਨਾਮਾਤਿ ਪਞ੍ਞਪੇਤਬ੍ਬਤਾਯ ਅਭਾਵਤ੍ਤਾ ਪਞ੍ਞਾਪੇਤੁਂ ਨਤ੍ਥਿ ਨ ਉਪਲਬ੍ਭਤਿ, ਯਥਾਵੁਤ੍ਤਜਾਤਵੇਦੋ ਵਿਯ ਅਪਞ੍ਞਤ੍ਤਿਕਭਾਵਮੇਵ ਹਿ ਸੋ ਗਤੋਤਿ ਅਤ੍ਥੋ.

ਦਸਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਨਿਟ੍ਠਿਤਾ ਚ ਪਾਟਲਿਗਾਮਿਯਵਗ੍ਗਵਣ੍ਣਨਾ.

ਨਿਗਮਨਕਥਾ

ਏਤ੍ਤਾਵਤਾ ਚ –

ਸੁਵਿਮੁਤ੍ਤਭਵਾਦਾਨੋ, ਦੇਵਦਾਨਵਮਾਨਿਤੋ;

ਪਚ੍ਛਿਨ੍ਨਤਣ੍ਹਾਸਨ੍ਤਾਨੋ, ਪੀਤਿਸਂਵੇਗਦੀਪਨੋ.

ਸਦ੍ਧਮ੍ਮਦਾਨਨਿਰਤੋ, ਉਪਾਦਾਨਕ੍ਖਯਾਵਹੋ;

ਤਤ੍ਥ ਤਤ੍ਥ ਉਦਾਨੇ ਯੇ, ਉਦਾਨੇਸਿ ਵਿਨਾਯਕੋ.

ਤੇ ਸਬ੍ਬੇ ਏਕਤੋ ਕਤ੍ਵਾ, ਆਰੋਪੇਨ੍ਤੇਹਿ ਸਙ੍ਗਹਂ;

ਉਦਾਨਮਿਤਿ ਸਙ੍ਗੀਤਂ, ਧਮ੍ਮਸਙ੍ਗਾਹਕੇਹਿ ਯਂ.

ਤਸ੍ਸ ਅਤ੍ਥਂ ਪਕਾਸੇਤੁਂ, ਪੋਰਾਣਟ੍ਠਕਥਾਨਯਂ;

ਨਿਸ੍ਸਾਯ ਯਾ ਸਮਾਰਦ੍ਧਾ, ਅਤ੍ਥਸਂਵਣ੍ਣਨਾ ਮਯਾ.

ਸਾ ਤਤ੍ਥ ਪਰਮਤ੍ਥਾਨਂ, ਸੁਤ੍ਤਨ੍ਤੇਸੁ ਯਥਾਰਹਂ;

ਪਕਾਸਨਾ ਪਰਮਤ੍ਥਦੀਪਨੀ ਨਾਮ ਨਾਮਤੋ.

ਸਮ੍ਪਤ੍ਤਾ ਪਰਿਨਿਟ੍ਠਾਨਂ, ਅਨਾਕੁਲਵਿਨਿਚ੍ਛਯਾ;

ਚਤੁਤ੍ਤਿਂਸਪ੍ਪਮਾਣਾਯ, ਪਾਲ਼ਿਯਾ ਭਾਣਵਾਰਤੋ.

ਇਤਿ ਤਂ ਸਙ੍ਖਰੋਨ੍ਤੇਨ, ਯਂ ਤਂ ਅਧਿਗਤਂ ਮਯਾ;

ਪੁਞ੍ਞਂ ਤਸ੍ਸਾਨੁਭਾਵੇਨ, ਲੋਕਨਾਥਸ੍ਸ ਸਾਸਨਂ.

ਓਗਾਹਿਤ੍ਵਾ ਵਿਸੁਦ੍ਧਾਯ, ਸੀਲਾਦਿਪਟਿਪਤ੍ਤਿਯਾ;

ਸਬ੍ਬੇਪਿ ਦੇਹਿਨੋ ਹੋਨ੍ਤੁ, ਵਿਮੁਤ੍ਤਿਰਸਭਾਗਿਨੋ.

ਚਿਰਂ ਤਿਟ੍ਠਤੁ ਲੋਕਸ੍ਮਿਂ, ਸਮ੍ਮਾਸਮ੍ਬੁਦ੍ਧਸਾਸਨਂ;

ਤਸ੍ਮਿਂ ਸਗਾਰਵਾ ਨਿਚ੍ਚਂ, ਹੋਨ੍ਤੁ ਸਬ੍ਬੇਪਿ ਪਾਣਿਨੋ.

ਸਮ੍ਮਾ ਵਸ੍ਸਤੁ ਕਾਲੇਨ, ਦੇਵੋਪਿ ਜਗਤੀਪਤਿ;

ਸਦ੍ਧਮ੍ਮਨਿਰਤੋ ਲੋਕਂ, ਧਮ੍ਮੇਨੇਵ ਪਸਾਸਤੂਤਿ.

ਬਦਰਤਿਤ੍ਥਵਿਹਾਰਵਾਸਿਨਾ ਆਚਰਿਯਧਮ੍ਮਪਾਲਤ੍ਥੇਰੇਨ

ਕਤਾਉਦਾਨਸ੍ਸ ਅਟ੍ਠਕਥਾ ਸਮਤ੍ਤਾ.