੮. ਵਿਸਾਖਾਸੁਤ੍ਤਵਣ੍ਣਨਾ

੭੮. ਅਟ੍ਠਮੇ ਵਿਸਾਖਾਯ ਮਿਗਾਰਮਾਤੁਯਾ ਨਤ੍ਤਾ ਕਾਲਙ੍ਕਤਾ ਹੋਤੀਤਿ ਵਿਸਾਖਾਯ ਮਹਾਉਪਾਸਿਕਾਯ ਪੁਤ੍ਤਸ੍ਸ ਧੀਤਾ ਕੁਮਾਰਿਕਾ ਕਾਲਙ੍ਕਤਾ ਹੋਤਿ. ਸਾ ਕਿਰ ਵਤ੍ਤਸਮ੍ਪਨ੍ਨਾ ਸਾਸਨੇ ਅਭਿਪ੍ਪਸਨ੍ਨਾ ਮਹਾਉਪਾਸਿਕਾਯ ਗੇਹਂ ਪਵਿਟ੍ਠਾਨਂ ਭਿਕ੍ਖੂਨਂ ਭਿਕ੍ਖੁਨੀਨਞ੍ਚ ਅਤ੍ਤਨਾ ਕਾਤਬ੍ਬਵੇਯ੍ਯਾਵਚ੍ਚਂ ਪੁਰੇਭਤ੍ਤਂ ਪਚ੍ਛਾਭਤ੍ਤਞ੍ਚ ਅਪ੍ਪਮਤ੍ਤਾ ਅਕਾਸਿ, ਅਤ੍ਤਨੋ ਪਿਤਾਮਹਿਯਾ ਚਿਤ੍ਤਾਨੁਕੂਲਂ ਪਟਿਪਜ੍ਜਿ. ਤੇਨ ਵਿਸਾਖਾ ਗੇਹਤੋ ਬਹਿ ਗਚ੍ਛਨ੍ਤੀ ਸਬ੍ਬਂ ਤਸ੍ਸਾਯੇਵ ਭਾਰਂ ਕਤ੍ਵਾ ਗਚ੍ਛਤਿ, ਰੂਪੇਨ ਚ ਦਸ੍ਸਨੀਯਾ ਪਾਸਾਦਿਕਾ, ਇਤਿ ਸਾ ਤਸ੍ਸਾ ਵਿਸੇਸਤੋ ਪਿਯਾ ਮਨਾਪਾ ਅਹੋਸਿ. ਸਾ ਰੋਗਾਭਿਭੂਤਾ ਕਾਲਮਕਾਸਿ. ਤੇਨ ਵੁਤ੍ਤਂ – ‘‘ਤੇਨ ਖੋ ਪਨ ਸਮਯੇਨ ਵਿਸਾਖਾਯ ਮਿਗਾਰਮਾਤੁਯਾ ਨਤ੍ਤਾ ਕਾਲਙ੍ਕਤਾ ਹੋਤਿ ਪਿਯਾ ਮਨਾਪਾ’’ਤਿ. ਅਥ ਮਹਾਉਪਾਸਿਕਾ ਤਸ੍ਸਾ ਮਰਣੇਨ ਸੋਕਂ ਸਨ੍ਧਾਰੇਤੁਂ ਅਸਕ੍ਕੋਨ੍ਤੀ ਦੁਕ੍ਖੀ ਦੁਮ੍ਮਨਾ ਸਰੀਰਨਿਕ੍ਖੇਪਂ ਕਾਰੇਤ੍ਵਾ ‘‘ਅਪਿ ਨਾਮ ਸਤ੍ਥੁ ਸਨ੍ਤਿਕਂ ਗਤਕਾਲੇ ਚਿਤ੍ਤਸ੍ਸਾਦਂ ਲਭੇਯ੍ਯ’’ਨ੍ਤਿ ਭਗਵਨ੍ਤਂ ਉਪਸਙ੍ਕਮਿ. ਤੇਨ ਵੁਤ੍ਤਂ – ‘‘ਅਥ ਖੋ ਵਿਸਾਖਾ ਮਿਗਾਰਮਾਤਾ’’ਤਿਆਦਿ. ਤਤ੍ਥ ਦਿਵਾ ਦਿਵਸ੍ਸਾਤਿ ਦਿਵਸਸ੍ਸਾਪਿ ਦਿਵਾ, ਮਜ੍ਝਨ੍ਹਿਕੇ ਕਾਲੇਤਿ ਅਤ੍ਥੋ.

ਭਗਵਾ ਵਿਸਾਖਾਯ ਵਟ੍ਟਾਭਿਰਤਿਂ ਜਾਨਨ੍ਤੋ ਉਪਾਯੇਨ ਸੋਕਤਨੁਕਰਣਤ੍ਥਂ ‘‘ਇਚ੍ਛੇਯ੍ਯਾਸਿ ਤ੍ਵਂ ਵਿਸਾਖੇ’’ਤਿਆਦਿਮਾਹ. ਤਤ੍ਥ ਯਾਵਤਿਕਾਤਿ ਯਤ੍ਤਕਾ. ਤਦਾ ਕਿਰ ਸਤ੍ਤ ਜਨਕੋਟਿਯੋ ਸਾਵਤ੍ਥਿਯਂ ਪਟਿਵਸਨ੍ਤਿ. ਤਂ ਸਨ੍ਧਾਯ ਭਗਵਾ ‘‘ਕੀਵਬਹੁਕਾ ਪਨ ਵਿਸਾਖੇ ਸਾਵਤ੍ਥਿਯਾ ਮਨੁਸ੍ਸਾ ਦੇਵਸਿਕਂ ਕਾਲਂ ਕਰੋਨ੍ਤੀ’’ਤਿ ਪੁਚ੍ਛਿ. ਵਿਸਾਖਾ ‘‘ਦਸਪਿ, ਭਨ੍ਤੇ’’ਤਿਆਦਿਮਾਹ. ਤਤ੍ਥ ਤੀਣੀਤਿ ਤਯੋ. ਅਯਮੇਵ ਵਾ ਪਾਠੋ. ਅਵਿਵਿਤ੍ਤਾਤਿ ਅਸੁਞ੍ਞਾ.

ਅਥ ਭਗਵਾ ਅਤ੍ਤਨੋ ਅਧਿਪ੍ਪਾਯਂ ਪਕਾਸੇਨ੍ਤੋ ‘‘ਅਪਿ ਨੁ ਤ੍ਵਂ ਕਦਾਚਿ ਕਰਹਚਿ ਅਨਲ੍ਲਵਤ੍ਥਾ ਵਾ ਭਵੇਯ੍ਯਾਸਿ ਅਨਲ੍ਲਕੇਸਾ ਵਾ’’ਤਿ ਆਹ. ਨਨੁ ਏਵਂ ਸਨ੍ਤੇ ਤਯਾ ਸਬ੍ਬਕਾਲਂ ਸੋਕਾਭਿਭੂਤਾਯ ਮਤਾਨਂ ਪੁਤ੍ਤਾਦੀਨਂ ਅਮਙ੍ਗਲੂਪਚਾਰਵਸੇਨ ਉਦਕੋਰੋਹਣੇਨ ਅਲ੍ਲਵਤ੍ਥਾਯ ਅਲ੍ਲਕੇਸਾਯ ਏਵ ਭਵਿਤਬ੍ਬਨ੍ਤਿ ਦਸ੍ਸੇਤਿ. ਤਂ ਸੁਤ੍ਵਾ ਉਪਾਸਿਕਾ ਸਂਵੇਗਜਾਤਾ ‘‘ਨੋ ਹੇਤਂ, ਭਨ੍ਤੇ’’ਤਿ ਪਟਿਕ੍ਖਿਪਿਤ੍ਵਾ ਪਿਯਵਤ੍ਥੁਂ ਵਿਪ੍ਪਟਿਸਾਰਤੋ ਅਤ੍ਤਨੋ ਚਿਤ੍ਤਸ੍ਸ ਨਿਵਤ੍ਤਭਾਵਂ ਸਤ੍ਥੁ ਆਰੋਚੇਨ੍ਤੀ ‘‘ਅਲਂ ਮੇ, ਭਨ੍ਤੇ, ਤਾਵਬਹੁਕੇਹਿ ਪੁਤ੍ਤੇਹਿ ਚ ਨਤ੍ਤਾਰੇਹਿ ਚਾ’’ਤਿ ਆਹ.

ਅਥਸ੍ਸਾ ਭਗਵਾ ‘‘ਦੁਕ੍ਖਂ ਨਾਮੇਤਂ ਪਿਯਵਤ੍ਥੁਨਿਮਿਤ੍ਤਂ, ਯਤ੍ਤਕਾਨਿ ਪਿਯਵਤ੍ਥੂਨਿ, ਤਤ੍ਤਕਾਨਿ ਦੁਕ੍ਖਾਨਿ. ਤਸ੍ਮਾ ਸੁਖਕਾਮੇਨ ਦੁਕ੍ਖਪ੍ਪਟਿਕੂਲੇਨ ਸਬ੍ਬਸੋ ਪਿਯਵਤ੍ਥੁਤੋ ਚਿਤ੍ਤਂ ਵਿਵੇਚੇਤਬ੍ਬ’’ਨ੍ਤਿ ਧਮ੍ਮਂ ਦੇਸੇਨ੍ਤੋ ‘‘ਯੇਸਂ ਖੋ ਵਿਸਾਖੇ ਸਤਂ ਪਿਯਾਨਿ, ਸਤਂ ਤੇਸਂ ਦੁਕ੍ਖਾਨੀ’’ਤਿਆਦਿਮਾਹ. ਤਤ੍ਥ ਸਤਂ ਪਿਯਾਨੀਤਿ ਸਤਂ ਪਿਯਾਯਿਤਬ੍ਬਵਤ੍ਥੂਨਿ. ‘‘ਸਤਂ ਪਿਯ’’ਨ੍ਤਿਪਿ ਕੇਚਿ ਪਠਨ੍ਤਿ. ਏਤ੍ਥ ਚ ਯਸ੍ਮਾ ਏਕਤੋ ਪਟ੍ਠਾਯ ਯਾਵ ਦਸ, ਤਾਵ ਸਙ੍ਖ੍ਯਾ ਸਙ੍ਖ੍ਯੇਯ੍ਯਪ੍ਪਧਾਨਾ, ਤਸ੍ਮਾ ‘‘ਯੇਸਂ ਦਸ ਪਿਯਾਨਿ, ਦਸ ਤੇਸਂ ਦੁਕ੍ਖਾਨੀ’’ਤਿਆਦਿਨਾ ਪਾਲ਼ਿ ਆਗਤਾ. ਕੇਚਿ ਪਨ ‘‘ਯੇਸਂ ਦਸ ਪਿਯਾਨਂ, ਦਸ ਨੇਸਂ ਦੁਕ੍ਖਾਨ’’ਨ੍ਤਿਆਦਿਨਾ ਪਠਨ੍ਤਿ, ਤਂ ਨ ਸੁਨ੍ਦਰਂ. ਯਸ੍ਮਾ ਪਨ ਵੀਸਤਿਤੋ ਪਟ੍ਠਾਯ ਯਾਵ ਸਤਂ, ਤਾਵ ਸਙ੍ਖ੍ਯਾ ਸਙ੍ਖ੍ਯੇਯ੍ਯਪ੍ਪਧਾਨਾਵ, ਤਸ੍ਮਾ ਤਤ੍ਥਾਪਿ ਸਙ੍ਖ੍ਯੇਯ੍ਯਪ੍ਪਧਾਨਤਂਯੇਵ ਗਹੇਤ੍ਵਾ ‘‘ਯੇਸਂ ਖੋ ਵਿਸਾਖੇ ਸਤਂ ਪਿਯਾਨਿ, ਸਤਂ ਤੇਸਂ ਦੁਕ੍ਖਾਨੀ’’ਤਿਆਦਿਨਾ ਪਾਲ਼ਿ ਆਗਤਾ. ਸਬ੍ਬੇਸਮ੍ਪਿ ਚ ‘‘ਯੇਸਂ ਏਕਂ ਪਿਯਂ, ਏਕਂ ਤੇਸਂ ਦੁਕ੍ਖ’’ਨ੍ਤਿ ਪਾਠੋ, ਨ ਪਨ ਦੁਕ੍ਖਸ੍ਸਾਤਿ. ਏਤਸ੍ਮਿਞ੍ਹਿ ਪਕ੍ਖੇ ਏਕਰਸਾ ਏਕਜ੍ਝਾਸਯਾ ਚ ਭਗਵਤੋ ਦੇਸਨਾ ਹੋਤਿ. ਤਸ੍ਮਾ ਯਥਾਵੁਤ੍ਤਨਯਾਵ ਪਾਲ਼ਿ ਵੇਦਿਤਬ੍ਬਾ.

ਏਤਮਤ੍ਥਂ ਵਿਦਿਤ੍ਵਾ ਸੋਕਪਰਿਦੇਵਾਦਿਕਂ ਚੇਤਸਿਕਂ ਕਾਯਿਕਞ੍ਚ ਦੁਕ੍ਖਂ ਪਿਯਵਤ੍ਥੁਨਿਮਿਤ੍ਤਂ ਪਿਯਵਤ੍ਥੁਮ੍ਹਿ ਸਤਿ ਹੋਤਿ, ਅਸਤਿ ਨ ਹੋਤੀਤਿ ਏਤਮਤ੍ਥਂ ਸਬ੍ਬਾਕਾਰਤੋ ਜਾਨਿਤ੍ਵਾ ਤਦਤ੍ਥਪਰਿਦੀਪਨਂ ਇਮਂ ਉਦਾਨਂ ਉਦਾਨੇਸਿ.

ਤਸ੍ਸਤ੍ਥੋ – ਞਾਤਿਭੋਗਰੋਗਸੀਲਦਿਟ੍ਠਿਬ੍ਯਸਨੇਹਿ ਫੁਟ੍ਠਸ੍ਸ ਅਨ੍ਤੋ ਨਿਜ੍ਝਾਯਨ੍ਤਸ੍ਸ ਬਾਲਸ੍ਸ ਚਿਤ੍ਤਸਨ੍ਤਾਪਲਕ੍ਖਣਾ ਯੇ ਕੇਚਿ ਮੁਦੁਮਜ੍ਝਾਦਿਭੇਦੇਨ ਯਾਦਿਸਾ ਤਾਦਿਸਾ ਸੋਕਾ ਵਾ ਤੇਹਿਯੇਵ ਫੁਟ੍ਠਸ੍ਸ ਸੋਕੁਦ੍ਦੇਹਕਸਮੁਟ੍ਠਾਪਿਤਵਚੀਵਿਪ੍ਪਲਾਪਲਕ੍ਖਣਾ ਪਰਿਦੇਵਿਤਾ ਵਾ ਅਨਿਟ੍ਠਫੋਟ੍ਠਬ੍ਬਪਟਿਹਤਕਾਯਸ੍ਸ ਕਾਯਪੀਲ਼ਨਲਕ੍ਖਣਾ ਦੁਕ੍ਖਾ ਵਾ ਤਥਾ ਅਵੁਤ੍ਤਤ੍ਥਸ੍ਸ ਵਿਕਪ੍ਪਨਤ੍ਥੇਨ ਵਾਸਦ੍ਦੇਨ ਗਹਿਤਾ ਦੋਮਨਸ੍ਸੂਪਾਯਾਸਾਦਯੋ ਵਾ ਨਿਸ੍ਸਯਭੇਦੇਨ ਚ ਅਨੇਕਰੂਪਾ ਨਾਨਾਵਿਧਾ ਇਮਸ੍ਮਿਂ ਸਤ੍ਤਲੋਕੇ ਦਿਸ੍ਸਨ੍ਤਿ ਉਪਲਬ੍ਭਨ੍ਤਿ, ਸਬ੍ਬੇਪਿ ਏਤੇ ਪਿਯਂ ਪਿਯਜਾਤਿਕਂ ਸਤ੍ਤਂ ਸਙ੍ਖਾਰਞ੍ਚ ਪਟਿਚ੍ਚ ਨਿਸ੍ਸਾਯ ਆਗਮ੍ਮ ਪਚ੍ਚਯਂ ਕਤ੍ਵਾ ਪਭਵਨ੍ਤਿ ਨਿਬ੍ਬਤ੍ਤਨ੍ਤਿ. ਤਸ੍ਮਿਂ ਪਨ ਯਥਾਵੁਤ੍ਤੇ ਪਿਯਵਤ੍ਥੁਮ੍ਹਿ ਪਿਯੇ ਅਸਨ੍ਤੇ ਪਿਯਭਾਵਕਰੇ ਛਨ੍ਦਰਾਗੇ ਪਹੀਨੇ ਨ ਕਦਾਚਿਪਿ ਏਤੇ ਭਵਨ੍ਤਿ. ਵੁਤ੍ਤਞ੍ਹੇਤਂ – ‘‘ਪਿਯਤੋ ਜਾਯਤੀ ਸੋਕੋ…ਪੇ… ਪੇਮਤੋ ਜਾਯਤੀ ਸੋਕੋ’’ਤਿ ਚ ਆਦਿ (ਧ. ਪ. ੨੧੨-੨੧੩). ਤਥਾ ‘‘ਪਿਯਪ੍ਪਭੂਤਾ ਕਲਹਾ ਵਿਵਾਦਾ, ਪਰਿਦੇਵਸੋਕਾ ਸਹਮਚ੍ਛਰੇਹੀ’’ਤਿ ਚ ਆਦਿ (ਸੁ. ਨਿ. ੮੬੯). ਏਤ੍ਥ ਚ ‘‘ਪਰਿਦੇਵਿਤਾ ਵਾ ਦੁਕ੍ਖਾ ਵਾ’’ਤਿ ਲਿਙ੍ਗਵਿਪਲ੍ਲਾਸੇਨ ਵੁਤ੍ਤਂ, ‘‘ਪਰਿਦੇਵਿਤਾਨਿ ਵਾ ਦੁਕ੍ਖਾਨਿ ਵਾ’’ਤਿ ਵਤ੍ਤਬ੍ਬੇ ਵਿਭਤ੍ਤਿਲੋਪੋ ਵਾ ਕਤੋਤਿ ਵੇਦਿਤਬ੍ਬੋ.

ਤਸ੍ਮਾ ਹਿ ਤੇ ਸੁਖਿਨੋ ਵੀਤਸੋਕਾਤਿ ਯਸ੍ਮਾ ਪਿਯਪ੍ਪਭੂਤਾ ਸੋਕਾਦਯੋ ਯੇਸਂ ਨਤ੍ਥਿ, ਤਸ੍ਮਾ ਤੇ ਏਵ ਸੁਖਿਨੋ ਵੀਤਸੋਕਾ ਨਾਮ. ਕੇ ਪਨ ਤੇ? ਯੇਸਂ ਪਿਯਂ ਨਤ੍ਥਿ ਕੁਹਿਞ੍ਚਿ ਲੋਕੇ ਯੇਸਂ ਅਰਿਯਾਨਂ ਸਬ੍ਬਸੋ ਵੀਤਰਾਗਤ੍ਤਾ ਕਤ੍ਥਚਿਪਿ ਸਤ੍ਤਲੋਕੇ ਸਙ੍ਖਾਰਲੋਕੇ ਚ ਪਿਯਂ ਪਿਯਭਾਵੋ ‘‘ਪੁਤ੍ਤੋ’’ਤਿ ਵਾ ‘‘ਭਾਤਾ’’ਤਿ ਵਾ ‘‘ਭਗਿਨੀ’’ਤਿ ਵਾ ‘‘ਭਰਿਯਾ’’ਤਿ ਵਾ ਪਿਯਂ ਪਿਯਾਯਨਂ ਪਿਯਭਾਵੋ ਨਤ੍ਥਿ, ਸਙ੍ਖਾਰਲੋਕੇਪਿ ‘‘ਏਤਂ ਮਮ ਸਨ੍ਤਕਂ, ਇਮਿਨਾਹਂ ਇਮਂ ਨਾਮ ਸੁਖਂ ਲਭਾਮਿ ਲਭਿਸ੍ਸਾਮੀ’’ਤਿ ਪਿਯਂ ਪਿਯਾਯਨਂ ਪਿਯਭਾਵੋ ਨਤ੍ਥਿ. ਤਸ੍ਮਾ ਅਸੋਕਂ ਵਿਰਜਂ ਪਤ੍ਥਯਾਨੋ, ਪਿਯਂ ਨ ਕਯਿਰਾਥ ਕੁਹਿਞ੍ਚਿ ਲੋਕੇਤਿ ਯਸ੍ਮਾ ਚ ਸੁਖਿਨੋ ਨਾਮ ਵੀਤਸੋਕਾ, ਵੀਤਸੋਕਤ੍ਤਾਵ ਕਤ੍ਥਚਿਪਿ ਵਿਸਯੇ ਪਿਯਭਾਵੋ ਨਤ੍ਥਿ, ਤਸ੍ਮਾ ਅਤ੍ਤਨੋ ਯਥਾਵੁਤ੍ਤਸੋਕਾਭਾਵੇਨ ਚ ਅਸੋਕਂ ਅਸੋਕਭਾਵਂ ਰਾਗਰਜਾਦਿਵਿਗਮਨੇਨ ਵਿਰਜਂ ਵਿਰਜਭਾਵਂ ਅਰਹਤ੍ਤਂ, ਸੋਕਸ੍ਸ ਰਾਗਰਜਾਦੀਨਞ੍ਚ ਅਭਾਵਹੇਤੁਭਾਵਤੋ ਵਾ ‘‘ਅਸੋਕਂ ਵਿਰਜ’’ਨ੍ਤਿ ਲਦ੍ਧਨਾਮਂ ਨਿਬ੍ਬਾਨਂ ਪਤ੍ਥਯਾਨੋ ਕਤ੍ਤੁਕਮ੍ਯਤਾਕੁਸਲਚ੍ਛਨ੍ਦਸ੍ਸ ਵਸੇਨ ਛਨ੍ਦਜਾਤੋ ਕਤ੍ਥਚਿ ਲੋਕੇ ਰੂਪਾਦਿਧਮ੍ਮੇ ਅਨ੍ਤਮਸੋ ਸਮਥਵਿਪਸ੍ਸਨਾਧਮ੍ਮੇਪਿ ਪਿਯਂ ਪਿਯਭਾਵਂ ਵਿਯਾਯਨਂ ਨ ਕਯਿਰਾਥ ਨ ਉਪ੍ਪਾਦੇਯ੍ਯ. ਵੁਤ੍ਤਞ੍ਹੇਤਂ – ‘‘ਧਮ੍ਮਾਪਿ ਵੋ, ਭਿਕ੍ਖਵੇ, ਪਹਾਤਬ੍ਬਾ, ਪਗੇਵ ਅਧਮ੍ਮਾ’’ਤਿ (ਮ. ਨਿ. ੧.੨੪੦).

ਅਟ੍ਠਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.