੯. ਸਧਾਯਮਾਨਸੁਤ੍ਤਵਣ੍ਣਨਾ

੪੯. ਨਵਮੇ ਮਾਣਵਕਾਤਿ ਤਰੁਣਾ. ਪਠਮੇ ਯੋਬ੍ਬਨੇ ਠਿਤਾ ਬ੍ਰਾਹ੍ਮਣਕੁਮਾਰਕਾ ਇਧਾਧਿਪ੍ਪੇਤਾ.

ਸਧਾਯਮਾਨਰੂਪਾਤਿ ਉਪ੍ਪਣ੍ਡਨਜਾਤਿਕਂ ਵਚਨਂ ਸਨ੍ਧਾਯ ਵੁਤ੍ਤਂ. ਅਞ੍ਞੇਸਂ ਉਪ੍ਪਣ੍ਡੇਨ੍ਤਾ ਸਧਨ੍ਤਿ, ਤਦਤ੍ਥਵਚਨਸੀਲਾਤਿ ਅਤ੍ਥੋ. ਤਸ੍ਸਾਯਂ ਵਚਨਤ੍ਥੋ – ਸਧਨਂ ਸਧੋ, ਤਂ ਆਚਿਕ੍ਖਨ੍ਤੀਤਿ ਸਧਯਮਾਨਾਤਿ ਵਤ੍ਤਬ੍ਬੇ ਦੀਘਂ ਕਤ੍ਵਾ ‘‘ਸਧਾਯਮਾਨਾ’’ਤਿ ਵੁਤ੍ਤਂ. ਅਥ ਵਾ ਵਿਸੇਸਤੋ ਸਸੇਧੇ ਵਿਯ ਅਤ੍ਤਾਨਂ ਆਵਦਨ੍ਤੀਤਿ ਸਧਾਯਮਾਨਾ. ਤੇ ਏਵਂ ਸਭਾਵਤਾਯ ‘‘ਸਧਾਯਮਾਨਰੂਪਾ’’ਤਿ ਵੁਤ੍ਤਂ. ‘‘ਸਦ੍ਦਾਯਮਾਨਰੂਪਾ’’ਤਿਪਿ ਪਾਠੋ, ਉਚ੍ਚਾਸਦ੍ਦਮਹਾਸਦ੍ਦਂ ਕਰੋਨ੍ਤਾਤਿ ਅਤ੍ਥੋ. ਭਗਵਤੋ ਅਵਿਦੂਰੇ ਅਤਿਕ੍ਕਮਨ੍ਤੀਤਿ ਭਗਵਤੋ ਸਵਨਵਿਸਯੇ ਤਂ ਤਂ ਮੁਖਾਰੁਲ਼੍ਹਂ ਵਦਨ੍ਤਾ ਅਤਿਯਨ੍ਤਿ.

ਏਤਮਤ੍ਥਂ ਵਿਦਿਤ੍ਵਾਤਿ ਏਤਂ ਤੇਸਂ ਵਾਚਾਯ ਅਸਞ੍ਞਤਭਾਵਂ ਜਾਨਿਤ੍ਵਾ ਤਦਤ੍ਥਦੀਪਕਂ ਧਮ੍ਮਸਂਵੇਗਵਸੇਨ ਇਮਂ ਉਦਾਨਂ ਉਦਾਨੇਸਿ.

ਤਤ੍ਥ ਪਰਿਮੁਟ੍ਠਾਤਿ ਦਨ੍ਧਾ ਮੁਟ੍ਠਸ੍ਸਤਿਨੋ. ਪਣ੍ਡਿਤਾਭਾਸਾਤਿ ਪਣ੍ਡਿਤਪਤਿਰੂਪਕਾ ‘‘ਕੇ ਅਞ੍ਞੇ ਜਾਨਨ੍ਤਿ, ਮਯਮੇਵੇਤ੍ਥ ਜਾਨਾਮਾ’’ਤਿ ਤਸ੍ਮਿਂ ਤਸ੍ਮਿਂ ਅਤ੍ਥੇ ਅਤ੍ਤਾਨਮੇਵ ਜਾਨਨ੍ਤਂ ਕਤ੍ਵਾ ਸਮੁਦਾਚਰਣਤੋ. ਵਾਚਾਗੋਚਰਭਾਣਿਨੋਤਿ ਯੇਸਂ ਵਾਚਾ ਏਵ ਗੋਚਰੋ ਵਿਸਯੋ, ਤੇ ਵਾਚਾਗੋਚਰਭਾਣਿਨੋ, ਵਾਚਾਵਤ੍ਥੁਮਤ੍ਤਸ੍ਸੇਵ ਭਾਣਿਨੋ ਅਤ੍ਥਸ੍ਸ ਅਪਰਿਞ੍ਞਾਤਤ੍ਤਾ. ਅਥ ਵਾ ਵਾਚਾਯ ਅਗੋਚਰਂ ਅਰਿਯਾਨਂ ਕਥਾਯ ਅਵਿਸਯਂ ਮੁਸਾਵਾਦਂ ਭਣਨ੍ਤੀਤਿ ਵਾਚਾਗੋਚਰਭਾਣਿਨੋ. ਅਥ ਵਾ ‘‘ਗੋਚਰਭਾਣਿਨੋ’’ਤਿ ਏਤ੍ਥ ਆਕਾਰਸ੍ਸ ਰਸ੍ਸਭਾਵੋ ਕਤੋ. ਵਾਚਾਗੋਚਰਾ, ਨ ਸਤਿਪਟ੍ਠਾਨਾਦਿਗੋਚਰਾ ਭਾਣਿਨੋਵ. ਕਥਂ ਭਾਣਿਨੋ? ਯਾਵਿਚ੍ਛਨ੍ਤਿ ਮੁਖਾਯਾਮਂ ਅਤ੍ਤਨੋ ਯਾਵ ਮੁਖਾਯਾਮਂ ਯਾਵ ਮੁਖਪ੍ਪਸਾਰਣਂ ਇਚ੍ਛਨ੍ਤਿ, ਤਾਵ ਪਸਾਰੇਤ੍ਵਾ ਭਾਣਿਨੋ, ਪਰੇਸੁ ਗਾਰਵੇਨ, ਅਤ੍ਤਨੋ ਅਵਿਸਯਤਾਯ ਚ ਮੁਖਸਙ੍ਕੋਚਂ ਨ ਕਰੋਨ੍ਤੀਤਿ ਅਤ੍ਥੋ. ਅਥ ਵਾ ਵਾਚਾਗੋਚਰਾ ਏਵ ਹੁਤ੍ਵਾ ਭਾਣਿਨੋ, ਸਯਂ ਅਜਾਨਿਤ੍ਵਾ ਪਰਪਤ੍ਤਿਕਾ ਏਵ ਹੁਤ੍ਵਾ ਵਤ੍ਤਾਰੋਤਿ ਅਤ੍ਥੋ. ਤਤੋ ਏਵ ਯਾਵਿਚ੍ਛਨ੍ਤਿ ਮੁਖਾਯਾਮਂ ਯੇਨ ਵਚਨੇਨ ਸਾਵੇਤਬ੍ਬਾ, ਤਂ ਅਚਿਨ੍ਤੇਤ੍ਵਾ ਯਾਵਦੇਵ ਅਤ੍ਤਨੋ ਮੁਖਪ੍ਪਸਾਰਣਮਤ੍ਤਂ ਇਚ੍ਛਨ੍ਤੀਤਿ ਅਤ੍ਥੋ. ਯੇਨ ਨੀਤਾ ਨ ਤਂ ਵਿਦੂਤਿ ਯੇਨ ਮੁਟ੍ਠਸ੍ਸਚ੍ਚਾਦਿਨਾ ਨਿਲ੍ਲਜ੍ਜਭਾਵਂ ਪਣ੍ਡਿਤਮਾਨੀਭਾਵਞ੍ਚ ਨੀਤਾ ‘‘ਮਯਮੇਵਂ ਭਣਾਮਾ’’ਤਿ, ਤਂ ਤਥਾ ਅਤ੍ਤਨੋ ਭਣਨ੍ਤਸ੍ਸ ਕਾਰਣਂ ਨ ਵਿਦੂ, ਅਵਿਦ੍ਦਸੁਨੋ ਅਸੂਰਾ ਨ ਜਾਨਨ੍ਤੀਤਿ ਅਤ੍ਥੋ.

ਨਵਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.